حد غيرك  

Posted by: فاتيما in

إنتا أصلك حاسس بيا
ومن غير ما أنطق ربع كلمة حتى ... صح؟!!
بس أنا المرة دى نطقت الكلمتين بصوت عالى و مش بينى و بينك كالعادة
دايما أقولها بقلبى و ساعات كتير بعينيا
بس قليل لما تخرج من بين شفايفى و حد تانى يسمعها
إمبارح مقدرتش أحوشنى أكررها مية مرة و انا راجعة البيت
لكن مكنتش متصورة إنك سامعنى و بتحبنى قوى غير اليومين اللى فاتوا دول
مش عشان الشغل الجديد اللى إستلمته .. رغم إنه نعمة كبيرة منك
بس مش هوه السبب الأساسى .. و مش عارفة ليه كل ما حد يسالنى
أقوله إن دا رزق يوسف و ربنا باعتهوله هوه ... مش أنا
إحساس غريب عبيط بيقولى إنك هترده لحضنى
رغم إن مفيش شواهد تدل على ذلك
بقالى شهرين و زيادة .. كل كام يوم أتصل بيه ف التليفون
و دايما محدش بيرد عليا
و ف أوقات تانية السكة بتتقفل ف وشى و أقول معلش
مسيره يوم هيرد عليا صدفة و إسمع صوته
بقالى شهرين و زيادة بترجى حسه من الدنيا و محاولاتى تذهب هباء
لكنى لا اكل و لا امل
عارفة إنها لعبة شد و جذب و حرب نفسية طويلة الأمد و إتعلمت أتكيف
إمبارح وحشنى قوى زى ما علطول بيوحشنى قلت و أنا راجعة من الشغل اكلمه
لعل و عسى
المرة دى ردت عليا جدته و قالتلى مش موجود و لما يرجع يبقى يكلمك
قلبى غاص فى سابع أرض .. إتكبست ...حزنت .. سكتت
إتمنيت إنهم بس يقولوا قصاده إنى سألت عليه عشان يعرف إنى بفكر فيه علطول
الليل كان طويل .. بس كلمتين فضلوا يرنوا ف ودنى و مبطلوش
سيبك من العبد و خليكى مع الرب
صحيت الجمعة و يوم اجازتى قررت أقضيه فى عمل مسرح عرايس عشانه
عدى الوقت و أنا بقولك الكلمتين اللى بينى و بينك و محدش سامعنا غيرك
حمولى عليك و توكلى .. مفيش غيرك هيقدر يساعدنا ...
أرجوك
متسبيناش لوحدنا فى الدنيا الواسعة دى أنا و هوه
أنا عارفة إنى غلطت كتير ...و سببت مشاكل لناس كتير
و اذيت نفسى و غيرى ساعات بقصد و ساعات تانية ف الأعم الغالب من غير قصد
صحيح بتعلم الصح ببطء بس بحاول مكررش نفس الغلطات تانى
ببص لبكرة بتفاوءل غريب لا يليق بواحدة زيى .. لكن بجاهد يأسى و ضعفى
برفع راسى بكرامة لأنى عارفة إنى من غيرها هنهزم
و هيدوسنى اللى مستقوى عليا
هل من الممكن إنك تدينى فرصة تانية أصلح بيها اللى إنكسر ؟
ممكن تساعدنى عشان اعوضه عن اللى فات و الحاضر باللى جاى من أيامنا
مش عاوزاه يكرهنى و لا يكره الدنيا ... و مش هستحمل اكون السبب
إدينى بس فرصة و مش هضيعها المرة دى
أنا مستعدة النهاردة اكتر من أى يوم فات ف عمرى
المسرح جهز و شكله بقى حلو .. يا ترى هيعجبه؟!!
يا حبيبى .. وحشتنى ضحكة عيونه و فرحته لما كان بيشوف حاجة جديدة
يا عالم .. يمكن بكرة يرجع و يشوفه
هرجع الالوان و المقص مكانهم و اجيب قماشة اعملها ستارة للمسرح
و اجيب كمان مية لحسن عطشانة .. يا ترى بيشرب و لا بيأكل إيه دلوقتى ؟!!
اول حاجة عملتها لما قعدت على مكتبى ف أول يوم شغل
إنى حطيت صورته على الديسك توب
كل يوم أفتح الجهاز و أصبَح عليه و اقول يا ترى هل ترى ؟؟؟
ممكن يحصل إنه ييجى معايا الشغل
و أعرفه على كل الموجودين و أقولهم .. دا إبنى .... معقول ؟!!!
المعقول يبدو مستحيلاً .... ف واقعى الفعلى
لكن لو أنتظره منك إنت ...فمش بعيدة و لا صعبة و أكيد هتحصل ف يوم
لوحك اللى عارف معاده
وعارفة إنك قادر تحققها قبل ما أغمض عينى و أفتحها
تقدر و مليار تقدر
كلمتين إنتا عارفهم و هفضل أقولهم
إبنى يا رب
يا رب
أقوم اجيب إزازة المية و كوباية بقى
تررررررررررررن
طب أرد على التليفون الاول
الله !!!
النمرة دى .... مش هيا .... معقولة ؟
ألو
ماما
أنا يوسف .. ازيك
س : حد غيرك ؟
ج : محدش غيرك يقدر

7 كلام بيطبطب على قلبى

و إنت فعلاً طيب  

Posted by: فاتيما in

Webfetti.com

كل سنة و إنت طيب يا عمرو
لأنك فعلاً
إنسان جميل و طيب

دوس هنا

يا مزاميزو  

Posted by: فاتيما in ,

المكان : الأوضة بتاعتى أنا و يوسف
الزمان : ما بعد صلاة الضهر بشوية
الموقع : السرير بتاعى و المخدة فوق دماغى
الحدث : حركات شقاوة و نغبشة معتادة تجرى غالباً و بشكل شبه يومى
متخذة مكانها ورا سلسلة ضهرى .. ألتفت ورايا زى كل يووووووم
عشان الاقى القط السيامى بتاعى ميزو فأمسكه من زمارة رقبته المسكة المخبرينى قائلة
الله !!
أى .. إيه اللى بيشكنى دا؟
يا دى النييييييلة
إنتا يا مزغود يا ميزوووووووووووو
يا بعجر .... هوه كل يوم القصة دى ؟
إسشتنى بس متجريييييش
تعالى هنا ف حضونتى متخافش أنا بس هفهمك غلطك
و أقولك كلمتين ينفعوك
و مش هضربك أنا هقطعك ترنشات بس
ممكن تقولى جبت البتاعة دى من أنهى فازة ؟
دنتا نهارك مش فايت
مش قولتلك ميت مرة يا ميزو يا مزاميزو يا حبيبى ملكشى دعوة
بالورد البلاستيك اللى ف أنحاء الشقة
لحسن تيتة اللى هيا امى اللى هيا الحاجة اللى هيا صاحبة البيت
لو شافتك هتبعتر كرامتك
أنا عارفة إنك بتحب تلعب بيه و تعضعضه بسنانك
و صدقنى لو عليا مش معترضة
و عارفة كمان إنك عاوز تصحينى من النوم بشياكة و عاملى فيها عم الرومانسى
و هذا بحق يسعدنى
بس الحاجة امى مبتحبش تفضل تمشى تلملم فى كراكيبك من كل حتة
و بتشتكى من شعرك اللى مالى السجاجيد
خلى بالك إنها مش طيقاك اساساً و لولا جبتك من فلوسى و جبتك البيت عنوة
و صممت أقعدك و قررت الإستعانة بماجد اخويا للتمسك بيك
كان زمانك و لمؤاخذة قاعد زى البوبى فى محل الحيوانات جنب إخواتك
و محدش عبرك و لو قولت يا ناو للصبح
يبقى الصح إنك تلم التعابين و متزعلش الحاجة منك
عشان يبقالك عيش ف البيت دا
هاه
لأ متبصليش كدا و تسبلى عينك و تهزيلى ديلك و تنام على بطنى
و و تتمطع و الحركات دى كلها عشان مش هتأثر معايا
أنا بتكلم جد دلوقتى
و بعدين تعالى هنا .. امتى هتبطل تغتت على لوزة و تاكل اكلها ؟
يعنى إنت صحيح ولد وحيد على تلات قططات كانوا معاك فى القفص
و متعود تفترى عليهم و هما يسكتولك
بس خد بالك إن لوزة نظام تانى دى لما إشترتها من عند الراجل كانت وحيدة مامتها
و بنت ناس قوى و بالتالى متعرفش فى شغل البلطجة بتاعك دا
فخليك لو سمحت جنتل كات
و مش كل ما هتيجوا تاكلوا أحطك فوق التلاجة لحد ما البونية تخلص نصيبها
منظرك مش لطيشف قدام المجتمع القططى كله
دنتا شاب وسيم و متربى و متجوز و كلها كام شهر و هتبقى أب
لشوية قطاقيط مساخيط قدك
مش هتبقى حلوة ف حقك و إنت معتقل فوق التلاجة و العيال بيبصولك
و كل هذوها عشان فجعنتك
و بعيييييين إنت راجل ذو مهام محددة إنتا جاى البيت دا عشان تتجوز لوزة
و تجيبولنا عيال
عشان لما يوسف يرجع يلاقى قطط صغنونة يلعب معاها
أيوه يوسف ..اوعى تكون نسيته دنا كل يوم احكيلك عنه
الكلام طار ... طبعاً ما إنتا دماغك مش معايا
نافوخك دلوقتى فى صنية الفراخ اللى بتستوى ف الفرن و ريحتها وصلالنا
و دماغك كمان مركزة مع ماجد اخويا إكمنوكو الرجالة الوحيدين ف البيت يعنى
و بتعملوا روبطية
طب شوفت إنت بتحب ماجد إزاى و بتقعد فى أوضته علطول ؟؟!!
لما تشوف يوسف يا بنى دنتا هتتجنن من حبه و مش هترضى تفارقه لحظة
اصله ولد جميل و حنين و مفيش قطة جبناها إلا و وقعت ف غرامه
فمل الآخر كدا خليييييييييك شييييييييك
عشان تفضل معانا و تلحق تشوفه لما يرجع
قلبى حاسس إن دا هيحصل قريب و هتشوف إن كلامى كان كله صح
إيه الصوت دا ؟
يوه ... دى تيتة بتزعق و متنرفزة !
دى عمالة تجيب ف سيرتك و سيرة عيلتك كلها
نهارك ازرق مقلم بفوشيا ... إنتا موقع إيه تانى ف الطرقة ؟!!!
طب إتفضل بقى إستلقى وعدك ... أديك إتقفشت يا حلو
لاااااااا معلطكشى و لا أعرفك .. كل واحد يخلص نفسه
و لا أقولك حراااااام انا هعمل بأصلى برضو
طب إجرى بسرعة روح عل البلكونة و لو ماما سألتنى عليك هقول مشفتكشى
خد الوردة دى فى بوقك و إنت ماشى داريها فى أيوها مطرح و نلتقى بعد الفاصل
يلا بااااااااى يا ميزو
يا مزاميزو

34 كلام بيطبطب على قلبى
رسائل أقدم

خد بالك


كافة المواد المنشورة في هذا الموقع محفوظةومحمية بموجب قوانين حقوق النشر والملكية الفكرية. لا يجوز نسخ هذه المواد أو إعادةإنتاجها أو نشرها أو تعديلها أو اقتباسها لخلق عمل جديدأوإرسالها أو ترجمتها أوإذاعتها أوإتاحتها للجمهور بأي شكل دون الحصول على إذن مسبق