.

.

خطيب ماما ...  

Posted by: فاتيما in


- يوسف ممكن لو سمحت تغير و تجيب قناة الافلام بقى

- عاوز أكمل الضاحكون

- احنا أتفقنا لما ييجى الفيلم هتغير ..موش إحنا اتفقنا ؟

- خلاص أهو

صمت

- ايه الى عاجبك فى الفيلم دا ؟!

- ما انت عارف .. فوزى حبيبى

بص بص دلوقت هيكشف فاتن حمامة ويعرف انها مستخبية تحت السرير

- يااه خايفة من حتة الفار الصغنن دا !!

- يا بختها يا بنى .. طب أنا يطلعلى أسد و أبقى مع محمد فوزى فى اودة واحدة

- بتحبيه قوى يا ماما ؟!

- طبعا ياحبيب ماما .. طب موش فاكر وانت صغير

النشيد الوطنى الى كنت بانيمك عليه بتاع

ماما زمانهاجاية ....ج

- بعد شوية جايبة لعب وحاجات عارف عارف

صمت

- طب ليه مش بتتجوزيه ؟؟

- ياريت يا بنى ... بس مينفعش

- ليه .. هو متجوز ؟

- أه بس موش دا السبب لوحده يعنى ..أصله يا خسارة

مات من قبل أنا ما أتولد

- يا حرااام

صمت

- بس عارف يا يوسف ... أنا هتجوزه برضه

- أزاى بقى مش مات يا ماما ؟!!!

- هتجوزه فى الجنة يا حبيبى.. مش أنا قولتلك

لما نطلع فوق ونخش الجنة إن شاء الله ربنا هيدينا عصايا سحرية

نشاور بيها كده تنفذ الى هنقولها عليه..انا هتمنى أنها تجيبلى محمد فوزى هنا

وتوقعه فى غرامى بقى و اتجوزه

- موش هينفع

- ليه بس ؟

- مراته الى متجوزها موش هتزعل مننا

- لا يا حبيبى ماانا همعل منه أستنساخ وأديها واحد
و أخد أنا واحد

صمت

ولو انها شغلانة زرقة.. أنا هدى مين و لا مين

دا كان متجوز ييجى تلاتة ورا بعض دا غير المعجبات

و كلهم عاوزين يجوزوه برضه

- ابقى أعملى منه شورت كت على الكمبيوتريا ماما

- والله فكرة يا يوسف تصور.. كنت هحل المشكلة دى

أزاى من غيرك؟؟

صمت

- ماما

- نعم

- لما تتجوزى محمد فوزى دا ... هتسيبينى ؟

- ايه السؤال دا ؟

- بفكر هعمل ايه لوحدى؟؟

- أولا أنا هاخد موافقتك عليه

يعنى لو دمه تقيل على قلبك هلغى الجوازة

ثانيا انت هتيجى تعيش معانا

ثالثا انت اصلاً هتبقى وسط بنات زى القمر و موش هتبقى فاضى

- وسط بنات أيه ؟؟!

أنا ولد ... مش حقعد وسط البنات يا ماما

- لأ .. يعنى يا يوسف أنا قصدى أنت هتبقى فى الجنة يا حبيبى

..يعنى مجلات ميكى بقى ولعب كمبيوتر و شكولاتة.. وأيس كريم بالهبل

هتقعد تلعب وتنشغل و موش عاوزة أعطلك عن الانبساط

واقعدك جنبى

- طيب

صمت

- طب ما انتى كمان بتحبى الحاجات دى. تعالى العبى بيها معايا

- بقولك ايه .. ما بلاها الجوازة دى

وشكلك كدا مش موافق و مش عاوزنى اتجوزه ؟؟

- لأ لأ خلاص

- يعنى لا يبقى جوزى لا دنيا ولا أخرة يا يوسف

- خلاص خلاص أتجوزيه

- يعنى موافق خلاص

- أه

صمت

- بس هو لسه بدرى على الموضوع دا

يعنى احنا نمشيها خطوبة لحد يوم القيامة و بعدين يبقى ربنا يسهل

- أنا عرفت انتى عاوزة تجوزيه ليه؟

- ليه يا فصيح

- عشان تسافرى معاه فى القطر ببلاش زى
فاتن حمامة .. صح؟؟!

الى صاحب الأهداء الجميل...  

Posted by: فاتيما in


ولدان
يفصل بينهما فى العمر سنتين
و يباعد بينهما فى الزمن أكثر من أربعين عام
يجمعهم كثير حتى تتلاشى الفوارق
طويت أولى صفحات الرواية فوجدتهما يتراقصان بين الصفحات
الولد الأول
قطعة حية من هذا البلد .. بورسعيد ..يحمل تاريخه وحاضره و ناسه وأفراحه وأنكساراته
صدمته الهزيمة كشاحنة مسرعة .. أفاق على أشلاء حياته و قد تبعثرت ..يحاول استرجاعها فتخرسه موجات متتالية من الأخبار السيئة..أخبار عن أحباب رحلوا وبلد يتحلل وزمان لن يعود...
الولد الثانى
عمره ثمان..يشبهه فى الذكاء واللطافة و الفضول ..يبعثر الحب على كل من حوله و يحمل فى قلبه مكانا خاصا لجدته الأثيرة لديه..ارتبط بأناس واماكن و هو مضطر أن يفارقها
الولدان..محرومان من الأم و الوطن و الأله الذى يحتمون به من عواصف الزمن
الولد الأول أزعم لوهلة أننى أعرفه ..مرت الأيام عليه و قد تعلم كيف يعايشها..أشتعل قلبه حزنا ..فخرجت من رحم الأحزان نفائس..
الولد الثانى..هو علتى وسؤالى..لو كان معى لقرأت له دماء أبوللو ..ربما يظن الدنيا أحسن مما تبدو عليه الأن..
الأول أعطى ظهره لزمن عذبه و أله خذله وعبر من أربعين عام
الثانى ما زال على متن المعدية ..يطل على مجهول ينتظره و أم تنظر له من بعيد تتسائل هل سيرجع يوما ما ؟؟
هذه الامنيات والأحلام البريئة اكاد أقسم انى سمعتها من أبنى مع بعض التغييرات البسيطة لكنها حملت نفس الرقة و التمنى لكل الدنيا بأن تبقى بخير
أنظروا معى كم هى رقراقة وناعمة..أحلامهما:...


- تفتكروا أبوللو هو كده فعلا
- انت شاغل نفسك بسى أبوللو بتاعك ده ليه(سألتنى لبنى)
- مش عارف حاسس انه يمكن علشان شبه جدى و يمكن شبه عبدالناصر
- بس عبدالناصر مش كده خالص .. وجدك ابيض و عينيه زرقاء واقرع
-مش عارف حاسس ان فيهم شبه من بعض
- انت بتحبه قوى كده(سألتنى هدى)
- مش عارف ..عايز أبقى زيه..
- يعنى أيه تبقى زيه
نهضت واقفا و قلت
" عايز أطير ..ألمس النجوم ..امسك الجنيات الصغيرين..احقق أحلامنا كلنا ..عايز أبويا يكسب انتخابات المصنع..عايز جدى وستى يعيشوا على طول..عايز تبقى عندى أجنحة وأروح جبال الجريك هناك..عايز عمى حامد يرجع م اليمن..عايز كريستينا ما تمشيش..عايز بورسعيد تبقى جنةكلها..مش لما المطرة بتنزل بورسعيد بتبقى جنة..حلوة شكل الجنة عندنا خصوصا لما تقرب الأرض تنشف منها..مش عايز نكبر و نبقى عواجيز..عايز نفضل صغيرين على طول.."
يا دكتور زين...أسعد الله مساءك وصباحك

بــتــحـصـلى ... ســاعــات  

Posted by: فاتيما in


المشهد
ليل داخلى
- يوسف تعال فى حضن ماما شوية
- موش عاوز أنام دلوقت

تهرب بشكل مهذب
- عشان خاطرى تعال نيمنى طيب وقوم بعد كده
تكتيك متبع لسحب العيال للنوم وفى الغالب بينيمونا احنا ويفضلوا هما صاحيين
- لأ هنام من غير ما أحس
رأى مبنى على خبرات سابقة فى هذه المواقف
-
طيب تعال فى حضنى دفينى
مناورة ومحاولة أستدراجية تنتهى بتكوره فى حضنى عشان يعدى الليلة
- هاتناموا من دلوقتى ؟؟!
سوأل من ماجد أخويا الصغير و قاعد شغال قصاد النت
- شوية وبعدين ابقوا صحونى
صوت نهنهة وعياط مكتوم وتنبه مفاجىء فيتعدل ويقوم يقعد ممسكا برأسى
-
ماما أنتى بتعيطى ؟؟
- لأ يا حبيبيى
- لأ بتعيطى..
-
مالك يا حاجة؟؟
السوأل جاى من ناحية المكتب الى عليه الكمبيوتر
- مفيش ..يعنى يا يوسف ..ساعات الواحد بيبقى مخنوق و مضايق شوية م الدنيا
بصوت متقطع يتخلله بكاء
- بتحصلى ساعات ...
يوسف يتأكيد وثقة مطلقة
- نعم يا أخويا ..
ماجد يستدير من خلف المكتب تاركا النت
- بيحصلك ايه كده سمعنى
- اه.. ساعات انا كمان الدنيا بتعمل حاجات تخلينى زعلان
- انتى ياحاجة عاجبك كده .. بهتى ع الواد ..هو أنتى كل يومين ليك ساعة نكد.. دنيا ايه الى خانأكى منهك لوه .. دانتو تخنقوا
المجموعة الشمسية كوكب ..كوكب
- خلاص خلاص موش زعلانة ولا حاجة
بضحكة متشنجة مختلطة بالبكاء
- متزعليش ياماما مين مزعلك و أنا أكسره
- مفيش حد يا حبيبى معقولة أزعل وانت فى حضنى
- مانا بقول برضه ..
صمت مفاجىء ..و اقتناص فكرة كانت تايهة ولاقها
- ماما تصورى ان البعوضة عندها تلاتلف عين فى دماغها
محاولا ألهائى وتغيير الموضوع
- يااااه بتعمل ايه بيهم دول كلهم..؟؟!!
مبالغة فى اظهار مدى انبهارى بالمعلومة
- موش عارف بس طيب متعيطش بقى
وطبطبة مستمرة على كتفى بأنتظام كعقرب الثوانى
- حاضر خلاص بطلت أهوه..
- لا حول و لا قوة الا بالله ما مل الأول ..دانتو عالم غريبة فعلا
ماجد يلتفت للنت ويكمل النقر على المفاتيح
هدوء تام
يوسف يحضنى ويطبطب عليا
لحد ما أغمض عينى و أنام ...
ختام


يــعـقـوب ... يـطـلق صـفـارات الأنذار  

Posted by: فاتيما in , ,



يا عالم المدونات
احترس
يتسلل اليك الأن متلصص من عالم بعيد
أيوه
المقصودة هى أنا
بكتب لأنى زى ناس كتير زيى
تعبت
بقيت عاملة زى أنغام كل ما أحتاج أتكلم ..
يأما أكلم روحى زى الناس الى بيقولوا عليهم سيكو
يأما بسكت لحد ما احس انى هطق
والحل ايه للخروج من الأزمة دى؟؟
سمعت نصيحة أصدقاء عزاز
دلونى على نفس الطريق الى مشيوا فيه قبلى
وأن تعددت الأسباب
ولو أنى هختلف عنهم شوية فى أن
كل أحبابى فى مدوناتهم موهوبين
الى شاعر والى أديب والى بيكتب فى دفتر أحوال الوطن والى بتحكى بلسان حال بنات جيلها..
أما أنا
فهدفى شىء تانى غير أن بس الناس تسمعنى
علمونا فى مجالنا أن كل مكان ليه جمهور مستهدف واجبك انك تخدمه
جمهورى فى المكان دا هو شخص ...
مفيش فى الدنيا أهم منه
ابنى
روح قلب ماما
يوسف
لسه صغير على انه يقرا و يستوعب
لكن ميهمنيش
يكفى انه ممكن فى يوم يوصله صوتى ويفهم
بلاش يفهم
يحس
أن ماما فضلت فاكراه
وبتكلمه ولو حتى فى الخيال لانها
لو كانت تقدر تعمل كدا فى الحقيقة
مكنتش استنت لحظة
و يعرف انهاهتفضل تحبه لأخر لحظة ممكن فيها تحب
أرجوكو تسامحونى على أى تفاهات و حاجات عبيطة تلاقوها فى المكان دا
يمكن حد فى نفس ظروفى يكون عاوز انى أكونه
و أقول نفس الى كان نفسه يقوله
و نشكى و نحكى..
وانشالله نقعد نعيط سوا
كل أم
و كل أب اتحرموا يسمعوا الكلمة الى بتحيى وتموت
ماما
بابا
وبيقضوا يومهم فى محاولة تذكر أصوات أولادهم كانت ازاى..
أنا موش بكتب عشان حد يسقف لى
أنا بكتب عشان يمكن حد يسمعنى
بكتب عشان ...
مقدرش أكون زيه فى الصبر
بكتب عشان ما ميجيش اليوم
تبيض عيناى من الحزن
.. بس