.

.

خطيب ماما ...  

Posted by: فاتيما in


- يوسف ممكن لو سمحت تغير و تجيب قناة الافلام بقى

- عاوز أكمل الضاحكون

- احنا أتفقنا لما ييجى الفيلم هتغير ..موش إحنا اتفقنا ؟

- خلاص أهو

صمت

- ايه الى عاجبك فى الفيلم دا ؟!

- ما انت عارف .. فوزى حبيبى

بص بص دلوقت هيكشف فاتن حمامة ويعرف انها مستخبية تحت السرير

- يااه خايفة من حتة الفار الصغنن دا !!

- يا بختها يا بنى .. طب أنا يطلعلى أسد و أبقى مع محمد فوزى فى اودة واحدة

- بتحبيه قوى يا ماما ؟!

- طبعا ياحبيب ماما .. طب موش فاكر وانت صغير

النشيد الوطنى الى كنت بانيمك عليه بتاع

ماما زمانهاجاية ....ج

- بعد شوية جايبة لعب وحاجات عارف عارف

صمت

- طب ليه مش بتتجوزيه ؟؟

- ياريت يا بنى ... بس مينفعش

- ليه .. هو متجوز ؟

- أه بس موش دا السبب لوحده يعنى ..أصله يا خسارة

مات من قبل أنا ما أتولد

- يا حرااام

صمت

- بس عارف يا يوسف ... أنا هتجوزه برضه

- أزاى بقى مش مات يا ماما ؟!!!

- هتجوزه فى الجنة يا حبيبى.. مش أنا قولتلك

لما نطلع فوق ونخش الجنة إن شاء الله ربنا هيدينا عصايا سحرية

نشاور بيها كده تنفذ الى هنقولها عليه..انا هتمنى أنها تجيبلى محمد فوزى هنا

وتوقعه فى غرامى بقى و اتجوزه

- موش هينفع

- ليه بس ؟

- مراته الى متجوزها موش هتزعل مننا

- لا يا حبيبى ماانا همعل منه أستنساخ وأديها واحد
و أخد أنا واحد

صمت

ولو انها شغلانة زرقة.. أنا هدى مين و لا مين

دا كان متجوز ييجى تلاتة ورا بعض دا غير المعجبات

و كلهم عاوزين يجوزوه برضه

- ابقى أعملى منه شورت كت على الكمبيوتريا ماما

- والله فكرة يا يوسف تصور.. كنت هحل المشكلة دى

أزاى من غيرك؟؟

صمت

- ماما

- نعم

- لما تتجوزى محمد فوزى دا ... هتسيبينى ؟

- ايه السؤال دا ؟

- بفكر هعمل ايه لوحدى؟؟

- أولا أنا هاخد موافقتك عليه

يعنى لو دمه تقيل على قلبك هلغى الجوازة

ثانيا انت هتيجى تعيش معانا

ثالثا انت اصلاً هتبقى وسط بنات زى القمر و موش هتبقى فاضى

- وسط بنات أيه ؟؟!

أنا ولد ... مش حقعد وسط البنات يا ماما

- لأ .. يعنى يا يوسف أنا قصدى أنت هتبقى فى الجنة يا حبيبى

..يعنى مجلات ميكى بقى ولعب كمبيوتر و شكولاتة.. وأيس كريم بالهبل

هتقعد تلعب وتنشغل و موش عاوزة أعطلك عن الانبساط

واقعدك جنبى

- طيب

صمت

- طب ما انتى كمان بتحبى الحاجات دى. تعالى العبى بيها معايا

- بقولك ايه .. ما بلاها الجوازة دى

وشكلك كدا مش موافق و مش عاوزنى اتجوزه ؟؟

- لأ لأ خلاص

- يعنى لا يبقى جوزى لا دنيا ولا أخرة يا يوسف

- خلاص خلاص أتجوزيه

- يعنى موافق خلاص

- أه

صمت

- بس هو لسه بدرى على الموضوع دا

يعنى احنا نمشيها خطوبة لحد يوم القيامة و بعدين يبقى ربنا يسهل

- أنا عرفت انتى عاوزة تجوزيه ليه؟

- ليه يا فصيح

- عشان تسافرى معاه فى القطر ببلاش زى
فاتن حمامة .. صح؟؟!

This entry was posted on الثلاثاء, يناير 29, 2008 and is filed under . You can leave a response and follow any responses to this entry through the .

11 كــــلام بيطــبطـــب عـــلى قــــلبى و روحــــى

انا بأقترح تمشيها خطوبة أحسن ومن هنا ليوم القيامة مش كتير و بعدين فى فترة الخطوبة ممكن تركبى القطر ببلاش زى فاتن حمامة لكن صدقينى لو اتجوزتم أكيد حيدفعك فلوس التذكرة زائد الغرامة وممكن يرميكى من القطر كمان .

تحياتى ايتها العزيزة .. تحياتى يا ام يوسف ومرة تانية و تالتة و عاشرة مبروووووووك .. ركنك الهادى الجميل ده للفضفضة و الاحلام .
تحياتى و تقديرى على الدوام

شوفتى بقى يوسف فهمك ازاي وعرف انك عاوزة تزوغي من تزكرة القطر
مدونتك جميلة متنسيش تسلميلي على يوسف
تحياتي وتقديري ومبروك على المدونة

اسمحيلى اولا ام يوسف
انحنى اعجابا واحتراما لما خطته يداكِ
بصراحة انا دخلت مدونات كتير اوى لكن اول مرة ادخل مدوونة دمها خفيف اوى كدا
بصراحة حديثك مع الامور يوسف عجبنى اوى واضحكنى من كثرة جماله
بصراحة حضرتك تملكى حسا رائعا
ربما كتبتى هذ البوست للفضفضة او الموقف
لكن تعبيرك فيه كان واضح لمحمد فوضى وتوصيلك للطفل معنى الجنة
على فكرة انا فى مدونتى كنت بعمل حاجة اسمها
ادب الاطفال المكتوب للكبار
حاجة تشبة كدا

انا سعيد بمدونتك جدا واتمنى اكون صديق لحضرتك وللمدونة

ودعوة لزيارتى كمان
ورسالتى ليوسف كفاي خطوبة لحد يوم القيامة دا موضوع عاوز تفكير

تحياتى الوردية

كريم بهي

يا حاااااازم
العود أحمد ..لأ لأ العود حازم ..أيه يا عم روحت وقلت عدولى..زهقتنى أنتظار لدرجة انى قولت أعمل مدونة ..و كنت حأكتب فيها نداء أنسانى لأصحاب القلوب الرحيمة لو كنت اتأخرت شوية كمان..بس عدت على خير ..لا تكررها وتقلقنا عليك..
الله يبارك فيك مرة واتنين وعشرة ..و لو أنك أنت و د. زين و نبضات و جيفارا .. ليكو أسهم عالية فى هذا المكان ..يعنى تقدر تقول من أوائل المساهمين و ليكو حصة فى الأرض.. ولو كنت أتشجعت فدا بسببكو أنتوا
و بعدين يا سيدى يركبنى جوا القطر ..برا القطر ..فوق القطر..أى حاجة دا محمد فوزى يا جماعة ..
تحياتى

يا سيد مكسرات ...
من ناحية انه فاهمنى فدا أكيد ..دا ساعات كان بيقرا أفكارى وكنت بأخاف منه ..يعنى خوف عليه من شدة الشفافية الى عنده..وخوف برضه من أنى علطول مفقوسة !!..
الله يبارك فيك ..ولو كان يقدر يسمعنا .. كان يوسف هيقولك الله يسلم حضرتك
تحياتى

أهلا بيك يا كريم
أنا دخلت مدونتك كتير و دايما كان يجيلى أحساس لطيف ..بتفكرنى بنفسى وأنا فى سنك..يعنى من ييجيى 200 سنة كدا..كنت غارقانة فى بحور الادب والشعر والاغانى الى بتفصلنى عن العالم البايخ الى كنت مضطرة أعيشه غصبن عنى من غير ما حد يسألنى عاوزة أيه..
تأكد من أنى هازوك كتير بعد كده
رأيك فى مدونتى يسعدنى خاصة وانك قأرى محترف فيما يبدو ..لكن خفة الدم دى مجاملة كبيرة قوى ..لو عايز خفة الدم المصفاة فعلا فأنا أنصحك تزور برايد أو غادة فى
wanna-b-a-bride.blogspot.com
هتقرى خفة الدم المصرية الحقيقة دا غير أنها عملت كتاب هشترى منه نسخة وأخليها تمضيللى عليها.. تشجيعا منى وتحمسا لها..وعقبال ديوانك الأول
تحياتى

ياعسل
ربنا يارب يخليهولك يارب
وتجوزيه .. تجوزيه منى زكي
او غاده عادل
او عائشه الكيلاني
شوية مزز انما ايه
من ابو اخر يعني




سلاموووووز

يمكن تستغربي ليه جيت علقت ع البوست ده بالذات.. يعني اللي قبله كان أولى

لكن أنا جيتلك من عند المراكبي بعد ما قريت التعليقين بتوعك.. و تجولت في المدونة و بكيت لحد ما غرقت الدنيا و ماتسألنيش ليه
و جيت أشوف حكاية محمد فوزي معاكي
:)

جواي إعجاب شديد جدا بمشاعرك و عالمك

:)

تحياتي

انتى نورتينى يا هنوده..ومتحرمنيش من طلتك عليا وعلى يوسف ..
تحياتى

شوفتى بقا

هو عرف السر

هههههههههههههههههههههههه

ربنا يخلهولك

يا مامت يوسف

(:

إرسال تعليق