.

.

بــتــحـصـلى ... ســاعــات  

Posted by: فاتيما in


المشهد
ليل داخلى
- يوسف تعال فى حضن ماما شوية
- موش عاوز أنام دلوقت

تهرب بشكل مهذب
- عشان خاطرى تعال نيمنى طيب وقوم بعد كده
تكتيك متبع لسحب العيال للنوم وفى الغالب بينيمونا احنا ويفضلوا هما صاحيين
- لأ هنام من غير ما أحس
رأى مبنى على خبرات سابقة فى هذه المواقف
-
طيب تعال فى حضنى دفينى
مناورة ومحاولة أستدراجية تنتهى بتكوره فى حضنى عشان يعدى الليلة
- هاتناموا من دلوقتى ؟؟!
سوأل من ماجد أخويا الصغير و قاعد شغال قصاد النت
- شوية وبعدين ابقوا صحونى
صوت نهنهة وعياط مكتوم وتنبه مفاجىء فيتعدل ويقوم يقعد ممسكا برأسى
-
ماما أنتى بتعيطى ؟؟
- لأ يا حبيبيى
- لأ بتعيطى..
-
مالك يا حاجة؟؟
السوأل جاى من ناحية المكتب الى عليه الكمبيوتر
- مفيش ..يعنى يا يوسف ..ساعات الواحد بيبقى مخنوق و مضايق شوية م الدنيا
بصوت متقطع يتخلله بكاء
- بتحصلى ساعات ...
يوسف يتأكيد وثقة مطلقة
- نعم يا أخويا ..
ماجد يستدير من خلف المكتب تاركا النت
- بيحصلك ايه كده سمعنى
- اه.. ساعات انا كمان الدنيا بتعمل حاجات تخلينى زعلان
- انتى ياحاجة عاجبك كده .. بهتى ع الواد ..هو أنتى كل يومين ليك ساعة نكد.. دنيا ايه الى خانأكى منهك لوه .. دانتو تخنقوا
المجموعة الشمسية كوكب ..كوكب
- خلاص خلاص موش زعلانة ولا حاجة
بضحكة متشنجة مختلطة بالبكاء
- متزعليش ياماما مين مزعلك و أنا أكسره
- مفيش حد يا حبيبى معقولة أزعل وانت فى حضنى
- مانا بقول برضه ..
صمت مفاجىء ..و اقتناص فكرة كانت تايهة ولاقها
- ماما تصورى ان البعوضة عندها تلاتلف عين فى دماغها
محاولا ألهائى وتغيير الموضوع
- يااااه بتعمل ايه بيهم دول كلهم..؟؟!!
مبالغة فى اظهار مدى انبهارى بالمعلومة
- موش عارف بس طيب متعيطش بقى
وطبطبة مستمرة على كتفى بأنتظام كعقرب الثوانى
- حاضر خلاص بطلت أهوه..
- لا حول و لا قوة الا بالله ما مل الأول ..دانتو عالم غريبة فعلا
ماجد يلتفت للنت ويكمل النقر على المفاتيح
هدوء تام
يوسف يحضنى ويطبطب عليا
لحد ما أغمض عينى و أنام ...
ختام


This entry was posted on السبت, يناير 26, 2008 and is filed under . You can leave a response and follow any responses to this entry through the .

4 كــــلام بيطــبطـــب عـــلى قــــلبى و روحــــى

السلام عليكم
انتاجك 3 مواضيع فى فتره صغيره قوى
ان شاء الله حضرتك تغرقينا مواضيع
ومش هنسقف
لأ هنسمع ونحس
وان شاء الله يجى يوم يسمع فيه يوسف كمان
اللى عاجبنى فى السكريبت ده
انو متقسم صح
يعنى فى 3 أشخاص بس مش كتير وتكدس وتشتيت لا فى فوكس حلو
..والإيموشن الرائعه بتاعه البطل والبطله
اللى هو السطر اللى بتقوليه عن حاله المتحدث أثناء الكلام
بيرسم صوره ومشهد حى
بجد رائعه ..ولغتك سلسله وجميله
فى بس استفسار صغير
حضرتك قولتى
يحس
أن ماما فضلت فاكراه
وبتكلمه ولو حتى فى الخيال لانها
لو كانت تقدر تعمل كدا فى الحقيقة
مكنتش استنت لحظة
ليه هو يوسف مش موجود برده ولا انتى اتحرمتى منه
ع العموم ربنا يخليهولك
ويجمعك بيه دنيا وآخره إن شاء الله
تحياتى

يا عزيزى
frake ghost
أنت أول تعليق فى هذا المكان ..أنا سعيدة بك و برأيك..أتابع تليقاتك عند حورس جيفارا ..وأحترم تحليلاتك و..أنا بقولك مل الأول كدا أنا أغلب مل الغلب ..يعنى انا لا أديبة لا شاعرة و لا حاجة خالص غير أنى أم قسموا قلبها نصين ..
شكرا على تدشين السفينة ..وعالله بقى ما تغرقش..
تحياتى

اول مرة ازور مدونتك
واضح انها هتبقى جميلة
اقولك حسيت بقية في قرايتى ليها
بسيطة جدا لدرجة الصعوبة طبعا هتقوليلي اية الجنان دة بس لأ مش جنان ولا حاجة وصفتى موقف لدرجة انك خليتى الكلمات تتحول لمشهد
اتمنى اليك التوفيق والتقدم
متنسيش تزورينى يارب مدونتى تعجبك
تحياتي ومودتى
صاحب المكسرات

ياأستاذ مكسرات
أشكرك على تشجعيك واناكمان بدخل مدونتك كتير و عجبتنى جدا تدوينة زائر بس معلقتش قبل كده لكن اوعدك انى هكون مواظبة وبعدين يعنى داحنا دلوقتى جيران وعالله بس مكونش جارة حشرية ومزعجة
وبعدين يا سيدى مفيش فى كلامك تاتش جنان حتى..انطباعك فى محله المشهد دا واقعى ..او يندرج تحت فئة الافلام التسجيلية ..حصل فعلا بينى وبين يوسف فى يوم من الايام الغامقة اياها وبكلمتين وحضن منه الشمس طلعت والسما نورت ..
أقولك بقى ع الجنان الى بجد ؟؟
أنا بكتب الكلام دا عشان كل يوم بقضى وقت طويييييل فى تذكر طريقة ابنى فى الكلام واسلوبه وخفة دمه..
بكتب ده عشان افتكر كلامه كان ايه وازاى
تتصور انى قربت انسى ؟؟
شفت بقى الجنان الى على حق ..
تحياتى وشكرى

إرسال تعليق