.

.

السنة الجاية ... تكون معايا  

Posted by: فاتيما in


- الله ..قايمة بدرى النهاردة يعنى
- أصلى رايحة المعرض .. غادة هتمضى نسخ لكتابها و عايزة نسخة موقعة ...
- متتأخريش طيب
- تعالى معايا
- ماشى بس البسى بسرعة .. انت يومك بسنة
لبست واتمكيجت ونزلناانا و ماما وقفنا تاكسى..راح عن طريق نفق الازهر..مبحبوش ..يظهر عندى فوبيا الأماكن المغلقة ..كل ما امشى فيه أفكر..انا لما اموت هقعد فى حتة مقفولة تحت الارض كده ازاى.. و بعدين اطرد الفكرة بسرعة ..انا هبقى فى ايه والا ايه؟؟ ..ساعتها يحلها ربنا..أخر النفق دايما بيفكرنى بأبويا..كان دايما يقول للناس لما تيجى تزوره وتخفف عنه رقدته فى السرير ..انه معندوش مانع يرقد ...بس عاوز يشوف الضوء فى أخر النفق المظلم الى هو فيه..أى ضوء عشان يبقى عنده أمل..الله يرحمك يا بابا
وصلنا ودخلنا أكتر من قاعة ودار نشر..دكتور زين على حق ..معرض الأمارات متعة للزائر مع ان الانتاج هزيل بس نظام زرار وعملوله بدلة..و المؤلم ان بعده بخطوات معرض الكتب المخفضة للهيئة المصرية العامة للكتاب...و مش عايزة اقولكم عن الفرق الشاسع بينه وبين المعرض المجاور..الكتب مرمية على بعض والناس بتنقى كتب الأطفال زى ما يكون بياع فرشهم على الارض و الموظفين بينفخوا من الغيظ وحاجة غريبة....بس كل حاجة تعانى من الفوضى اشمعنى هما يعنى .
بس برضه كل حاجة تهون جنب الوقوف وسط كل الكتب دى والواحد حاسس ان دول ماد ان ايجيبت ..يمكن الدنيا كلها تسبقنا فى المدنية و الامكانات لكن تيجى لحد الابداع والموهبة و..معلش لا مجال للمقارنة..الى مستغرباله اننا وسط الغلب دا كله وحلوين برضه ..امال لو أتعدلت..هيحصل أيه؟..متهيألى انها بتمشى معانا بالعكس ...
انا مروحتش المعرض من سبع سنين لظروف قهرية..بس حاسة ان المسألة بقى فيها شىء من البراح ..زمان كنت بحس اننا عاملين زى عادل امام فى الارهاب والكباب - فاكرينه- بنمشى مسيرين لا مخيرين..المرة دى فيه بعض المساحة وحاسة ان الكتب المعروضة أقل عما يجب ..والا اصلا مفيش نشر كتير .. والا الفلوس قلت والناس قلت ..والا انا كبرت قوى لدرجة انى حاسة ان الدنيا بقت ضيقة؟
- كفاية يا بنتى رجلى وجعتنى
- معلش يا ماما خلاص الساعة اتنين و نص وقربنا على معاد التوقيع
- طب يا لله على دار الشروق
- لسه نص ساعة.. نتفرج تانى ميجراش حاجة
دخلنا واشتريت كتاب غادة عبدالعال ( عايزة اتجوز) وكتاب لأحمد بهجت اسمه( ثانية واحدة من الحب) أول مرة اسمع عنه..و أذ فجأتن..الأقى الأخ الامور بتاع الدار بيقولى على فكرة المؤلفة جت أهى و تقدرى تاخدى توقيعها..نسيت أقولكم انى سألته هتيجى غادة امتى؟؟ ييجى مرتين ...أمال اشترى الكتاب أونطة من غير أمضا..بعدين البنت تشتهر قوى وتبقى النسخة دى ليها قيمة مضاعفة..موش ناوية ابيعها والله بس عايزة اسيب ليوسف مكتبة مميزة ..
قوم ايه الاقى الانسةبرايد - غادة- جاية مع رحاب بسام قصاصة شابة برضه- وقاعدين بيمضوا النسخ..ايه دا جايين بدرى وقبل المعاد معقولة؟؟ الشياكة برضو ليها ناسها وغادة بقى قمر يا جماعة ..أجمل بكتيير من الصورة الذهنية ..مش الشكل لأنى عارفة انها أمورة متسألونيش ازاى ..لكن اللطف الانسانى الى ظهر فى الدقيقتين الى وقفتهم كان كافى لتأكيد انطباعى ..بقيت بحبها أكتر ..و أتسائل ايه يا جماعة الرجالة جرالها ايه؟؟ دا مفيش نظر خالص بقى
- قولتلها عل المدونة بتاعتك
- لأ يا ماما ..هى مالها
- موش تتعرفوا على بعض
- يا ستى بكرة تيجى فرصة..و بعدين النهاردة محدش يقولها غير مبروك و بس
- طب خلاص نروح بقى
- تعبت يا جميل و عجزتى
- يا بنتى انا صحتى على قدى كويس لحد كده
- طب يللا
ركبنا تاكسى فى الرجوع ..خراب بيوت بقى ..و ركب معانا واحد من زوار المعرض..سواق التاكسى سأله بيبيعوا ايه فى المعرض ده..الراجل بصله بصة كده فهمتها علطول ..و قاله بيبيعو كتب ..مش السواق يسكت لأ ..سأله مبيبعوش حاجات تانية جوه..الراجل بصراحة كان صبور ومحتوى ..قاله لأ ..يعنى عندهم الكتب والحاجات المتعلقة بيها زى السى دى وكده.. أناو الراجل اتمنيناانه يسكت بقى ..و الحمدلله انه سكت ..
يوسف
يا روح قلبى
.. عارف منسيتكش و انا هناك ..كنت بتلف معايا فى كل حتة.. وكنت بكلمك فى سرى عشان تيتة متخدش بالها
...أشتريتلك كام كتاب هيعجبوك ..و كان فيه سيديهات بالهبل من الى بتحبها..مكنتش عارفة أختار ايه..كان نفسك تروح معايا معرض الكتاب من كتر ما كنت بأحكيلك عنه ..بس معلش.. اتمنى باباك يكون وداك..
يا رب
السنة الجاية تكون معايا
لو سمحتم ..قولو أمين..

This entry was posted on الجمعة, فبراير 01, 2008 and is filed under . You can leave a response and follow any responses to this entry through the .

25 كــــلام بيطــبطـــب عـــلى قــــلبى و روحــــى

دي يمكن التدوينة العاشرة اللي أقراها عن معرض الكتاب .. ورغم إني من اللي بيشتروا كتب طول السنة من غير معرض للكتاب ولا حاجة .. إلا إني في منتهى السعادة لأن لسه فيه ناس مهتمة بالكتاب .. ده غير إني إكتشفت إن فيه بعض المدونين على قدر عالي من الثقافة في إختياراتهم كمان

صحيح نسيت أقولها: آمين

يا عم مراكبى..
أنا بروح معرض الكتاب من دورته العاشرة والا حاجة..من أيام ما كان مقره أرض الجزيرة - دار الاوبرا حاليا - وكمان كنا بنزور المعرض الصناعى الزراعى كمان اذا كنت توعى عليه ..يعنى أنا من الزوار المؤسسين لمعرض الكتاب ..والحقيقةعندك حق فى سعادتك ..العدد بيزيد موش بيقل رغم سوء الاحوال الاقتصادية انما لسه متعة الفرجة حتى مارحتش..المهم انت رحت واشتريت ايه؟؟
تحياتى

الحقيقه لم أتصور أنى أقرأ
مدونه بهذا الجمال و الحيويه
انا كنت فى اليوم ده فى المعرض و فى حفل التوقيع اياه
يارينى كنت قرأت مدونتك قبلا لأتعرف عليك يومها
أصل قابلت فى اليوم دة مدونين صحابى كتار
وكأننا نحتفل بشرعيه المدونات و تأثيرها فى المجتمع
ثلاث كتب مره واحده و هتبقى سلسله
حاجه تفرح حقيقى
سأطلق ذكرياتى مع معرض الكتاب معك بعد ما ابشرك ان المعرض امتدد الى يوم الخميس القادم ههههههههييييييييييييه
المعرض السنه دى مواضب على حضوره يوميا بعد الشغل ،بعد الساعه الخامسه
عملت سلفتين من المرتب علشان أغوص فى سور الازبكيه مكانى المفضل فى المعرض
هذا لا يمنع أنى لفيت على كل السرايات و الخيم الثقافيه و تابعت الفاعليات كلها
كل معرض كنت بروع يومين أو ثلاثه لشراء كتب محدده لكن المعرض ده مختلف جدا
أدخله بأعتبارى كاتب قصه يتعرف على الادباء و الناشرين و يقابلهم يوميا فى المقهى الثقافى
و يحضر مناقشات كتب أصدقائه الادباء
و يفرح معهم لأن الكتاب الذى أنتظروه طويلا عند الناشر و المطبعه صدر أخيرا فى معرض الكتاب
أى زهو هذا!!!!
حكايات كثيره خلت المعرض ده متميز كدا لى
شكرا على التدوينه اللطيفه دى


و شيلى تأكيد الكلمه من إعدادت المدونه
أصلها رخمه قوى

طبعا ده فاوست
ولازم تهدي نفسك معاه لأنه كده.ز
بس جامد جدا وعبقري حقيقي..
مع الوقت هاتتعرفي على الطقم كله.. هم مش كتير، بس تحسي إن الدنيا بخير وأن هناك شيئا ما يمكن أن تتشاركي فيه مع هؤلاء الأباطرة غير المرئيين..
ماعرفتش اشتريتي إيه.. يعني لسته كده فيها أهم العناوين ولا جبتي دول بس..المهم تحياتي لجو..ولمامته..وجدته..
خالص تمنياتي

ان شاء الله السنة الجاية نلاقي كتابك في المعرض
وساعتها ... انا عايزك توقعي لي....وترجعي لي ثمن الكتاب

فاوست العزيز
يا سيدى مشكرين على رأيك و ذوقك
ملحوقة واكيد هتيجى مناسبة نتجمع كلنا بس ان شالله تكون مناسبة سعيدة ...و لو ان المعرض أرقى مكان ممكن حد يقابل حد ..
أنا دخلت مدونتك مرارا..أنت غيرت عنوانها والا ايه؟؟ كان الاول فيها الفكر وانتهى الايمان ..دلوقتى انتهى الاتنين ؟؟فى نفس واحد ..دى جواب نهائى يعنى مفيهوش مناقشة ؟؟..موش هسألك عن كتابك لأنه عيب اسأل.. وهعرف لما أقرى المدونة كاملة..وهقولك رأيى اذا كان يعنيك..
حكاية تأكيد الكلمة دى هحاول الغيها ..أصل انا معلوماتى فى الكمبيوتر توازى معلوماتك فى اليابانية كدا ...طشاش يعنى (اوعى تكون دراستك يابانى و أنا نشنت ؟؟)..بس هحاول و براحة عليا أنا سنة اولى حضانة مدونات يا اخواننا ...
سعدت بزيارتك ..
أرجو الا تنقطع يوما

د.زين الغالى
الى طرفنا بيرودا السلام مضاعف...
أنا تلاشيت خجلا لتدونيتك المشجعة عنى ..والكلام بيسكت قصاد كرمك و ميعرفش ينطق ..بس سكوته سكوت فرحة مدهشة موش زى صديقنا المهووس ب أبوللو بسكوته الحزين..
أنا يا سيدى روحت المعرض مرتين
مرة مع صديقة من أيام الجامعة كانت بتشترى كتب لمكان شغلها ..والمرة التانية الى كتبت عنها ..فى المرتين و لضيق الميزانية لم اشتر كل ما تمنيت ..
لو عليا مكنتش سبت ديوان شعر ولا رواية ولا كتاب سياسى ولا تراجم و مجيتهموش..بس الميزانية بقى
أشتريت أصداء السيرة الذاتية وأحلام فترة النقاهةلعم نجيب محفوظ ..بابا كان شارى الأعمال الكاملة بتاعته ودول مكانوش فيها ..واشترين ديوان لصالح جودت اسمه الله النيل الارض لأنه بيفكرنى بأيام الجامعة وكنت بقراه فى المكتبة المركزية فى اوقات فراغى يعنى اشتريته لسبب عاطفى بحت.. جبت ديوان الامام الشافعى ..وكتب ليوسف من المكتبة الخضراء لأنى كنت بقراها وانا قده ..وان شاء الله هروح تانى مع صديقة غالية عليا ومعاها ولادها ..هما اصغر من يوسف سنة وسنتين .. هناخدهم يتفسحوا ويتعودا على زيارة المعرض من صغرهم فيبقى عادة متأصلة زى ما اتعمل فينا واحنا قدهم ..
اما عن فاوست ..فمتقلقش ..كلهم أولادى ..أنا بحبهم كلهم وحاسة انى بتعامل معاهم بمنطق امومى بحت ..مش بس انى اكبر منهم سنا لأ..انابحبهم وبحب كتاباتهم وكأنهم يوسف لما يكبر ..يا ريت يبقى زيهم كدا حاجة تشرح القلب ..بكسرة موش فتحة ..
اسعد الله مساؤك وصباحك

طبعا فاكر المعرض لما كان في أرض الجزيرة .. وكان بجد ليه شكل أحلى من كده لكنه كان زحام مش عادي نظرا لضيق المكان

أنا بقى لي سنين ما رحتش المعرض لأني برة مصر

يا عم طهقان
يسمع منك ربنا..
تدونياتك هى الى ممكن تتجمع فى كتاب من نوعية الأدب الساخر ..وهاخد منك نسخة موقعة بأسم يوسف ..بس هادفع تمنه عشان مطهاقش اكتر من انت طهقان..
تحياتى

مراكبى..
تيجى بألف سلامة

مدونتك جميلة اوى واحسن حاجة ان صورة يوجى فيها بحبه جدا

انا كان نفسى ازور معرض الكتاب
بس الظروف منعتى بشدة
اظن بعد اللى قريته
هتهون عليا الحكاية شوية

ميرسى جدا

كريم بهي

السلام عليكم
يارب يجمعك بيوسف وما يفرقكوش عن بعض أبدا ..وتقريله كل القصص وكل الكتب وكل الحكايات وتلفوا وتسهروا وكل حاجه حلوه مع بعض
آمين ..آمين ..آمين
ربنا يوفقك بجد ...ويحققلك كل الخير
تحياتى بكل مشاعرى والله..انا حسيت بغصه كده لما حسيت ان يوسف مع باباه وانتى مش معاه علطول...ربنا معاكى
والآيه من سوره يوسف قاسيه قوى
ربنا يصبرك .آمين

امين امين
جميل ان يكون في مهرجان يفكر دايما الناس ان ويحفزهم طبعا مقصدشي القراء الدؤبين على القراءة اقصد باقية الناس زي سواق التاكسي اللي بحمد ربنا انى مكنتش معاكي في التاكسي بدال الراجل اللي رد علية لأنى مكنتش هسيبة فحاله
وكل معرض وانت طيبة بس مقلتلناش اسماء الكتب بتاعت يوسف اية
تحياتي

أمين أمين .... يارب ان تحقق لهذه الام كل امالها فى ابنها وروح قلبها وان يكون دائما معاها السنه الجيه وكل سنه وكل دقيقه
انا عينى دمعت من كلماتك لابنك يوسف
لايوجد عندى تعليق على هذا البوست غير هذه الكلمات البسيطه والدعوه اللى بقول يارب يحقق لك كل امالك فى الحياه ويكتب لكى السعاده والحب والنجاح فى حياتك كلها يافاطيما

مش حقدر اكتب حاجه تانيه فى هذا التعليق على هذا البوست

تحياتى
قلب بيحبك

هند هنادى
هو انا اقدر ما حطوش صورته؟؟ دا يوجى باشا يوه على سن ورمح ..طب دا يوسف يعرف عنه معلومات أكتر ما يعرف من معلومات عنى انا مامته ..بس ماشى حكم القوى مقدرش افتح بقى ..
انت مختارة صورة البروفايل لشخصية مشابهة ليوجى ..هو سيادتك معاه فى مبارزة الوحوش والنظام دا برضو ..؟؟
اهلا بيك وشكرا لرأيك و ذوقك

كريم ..
السنة الجاية تروحه ان شاء الله
بس تكون رايح بصفتك مؤلف وليك كتاب والناس مستنياك فى حفل توقيع لنسخ من الطبعة الأولى ..و هتلاقينى واقفة فى الدورى فى الطابور عشان تمضيلى نسختى..
يا رب
انا كمان ميرسى يرضه ..
تحياتى

يا مصطفى.ز
انت ايه حكايتك يا بنى ؟؟
أنت شفاف قوى ..بشكل خلانى أغير نظرتى للدكاترة عموما ..من واقع تجارب معهم بشوفهم هادئى الطباع ..لدرجة البرود ..القاتل احيانا ..يمكن امراض مهنة يعنى ..التعود اليومى على مناظر الدم والمواجع و الألم ..انت مختلف .. حساك بتتقلب كل يوم على نار لا تخمد ..يمكن عندك دم زيادة عل اللزوم ..فى وقت سياسية تكبير الدماغ هى الى سايدة ..يمكن ؟؟
هون عليك ..وما توجعش قلبككده ..عشان قلبك فيه الخير ..
ربنا يسمع دعواتك و يطمن قلبك
تحياتى

يا سيد مكسرات
الحمدلله يا عم انك مكنتش راكب معانا ..كنت هخلص بينكو ازاى وانا موافقكو انتو الاتنين
انا معاك انه احترام المعرض حتى لمعنى ثقافى فى حد ذاته ضرورى ..لكن السواق برضه عنده عذر ..ايه يخليه يحب الحكاية ويحترمها ؟
انا وعيت ع الدنيا فى بيت راجل بيشتغل فى بلاط صاحبة الجلالة .. يعنى كتب وجرايد من كل صنف ولون وشكل دخلت بيتنا ..مجلات الأطفال الاسبوعية كانت فى متناول ايدينا من قبل ما نطلبها حتى..معرض الكتاب كان معاد سنوى مقدس وبابا كان يدى ماما فلوس زيادة و يقولها هاتى كل الى عاوزينه ..الأفئدة بتهوى للمعرض كل عام ..عشان فيه حب تكون على مر السنين ..انما الأخ السواق بقى ..تفتكر الى يدفعه لذلك؟ صحيح فيه ناس عمرها ما شافت كتاب فى بيت أهلها لكن حبوا الكتب والقراية لأسباب أخرى ..كان فيه شرارة الحب الأولى الى وقعتهم فى الغرام الأبدى الى ماينتهيش الا بنهاية العمر ..فأعذره .
و كويس يا عم انه فلت من ايدك كان زماننا دلوقتلى بنغير يافطة المدونة بتاعتك ونخليها ..تكسيرات سيد سعد ..
ربنا سلم ومعلش قلبك ابيض ..
تحياتى

نبضات الحبيبة
انتى يا بنتى حنينة كدا ليه؟؟
ورد و مزيكا وصباح معطر كمان ؟؟!
ربنا يسعد قلبك ويسمع منك و يحبب فيك الناس زى ما بتحبيهم وزيادة
ارجو ان ألا أحرم من طلتك عليا وسؤالك ودعواتك...
قلب بيحبك أكتر

هو أنا غلط و لا حاجه؟؟؟
أصل رد د.زين (حبيبى) بيقولأنى لخبطت فى الكلام
عذرا لو ده حصل
أقصد طبعا اننا نتقابل فى معرض الكتاب
لأنى قلت انى قابلت مدونين كتير يوميها
لا أثر ولا أقل


بالنسبه لعنوان مدونتى
فيرجى الرجوع الى تدوينتى
حوار بين د.ض و د.ف
الجزء الاول و الجزء الثانى على هذة الروابط
http://fawest.blogspot.com/2007/11/blog-post_10.html

http://fawest.blogspot.com/2007/11/2.html

مش عارف اعتبر البوست عن المعرض ولا عن يوسف لاني أول مرة ادخل المدونة
بس اخر فقرة هي اللي وقفتني
وقلتلك امين يا رب
بالنسبة لمساحة العرض فهي اكبر بكتير من السنة للسنة والانتاج اعلى بكتير جدا بس للأسف العرض اسوأ
انا احسن مرة شفت فيها المعرض كانت من عشر سنين ومتكررش زيها
لكن واضح ان دور المدونين السنادي كان اعلى بكتير مما الواحد تخيل
الحمد لله
طلعت القربة سليمة
سلامي ليكي وتحياتي لمدونتك الشيقة

ابدا يا فاوست مفيش حاجة يمكن د.زين عاوز يقولك براحة عل البونية ..دى ملهاش فى تقنيات المدونات وعلى باب الله يعنى ..
انا حاولت اشيل تأكيد الكلمة وارجو انى اكون نجحت ..و الأ علمنى يا سيدى ازاى واكسب فى اختك الكبيرة ثواب..
تحياتى الدائمة

اهلا بأجمد فنجان قهوة يتشرب ع النت ...
اسعدتنى زيارتك
معاك ان المدونين ليهم وجود قوى ..هما بيضخوا دماء جديدة ..عبر قناة متاحة بعد ما اتقفل فى وشهم الابواب التانية لعدة اسباب ... انت هنا سيد مساحتك ..تكتب الى يمليه عليك احساسك ..والقراء كمان يقرو الى على هواهم ..مفيش تعقيدات ولا تكلفة مرهقة ..فيه حرية وتشجيع ..و شعاع أمل باين من بعيد..
اما التدوينة دى ..فكل حاجة بكتبها بلاقى يوسف بيتنطط بين سطورها ويشاورلى ويقول ماما ماما ..انا هنا ..ويغمزلى بعينه زى ما بيحب يعمل ..نظام معاكسات بقى ..فمقدرش مجيبش سيرته يا أحمد ..
ربنا يرزقك نعمة الأبوة و انت تعرف قصدى ايه ..انت وكل الناس يا رب..
تحياتى

آآآمين يا رب

أنا علقت على بوست عريس ماما الأول.. و بعدين جيت و علقت هنا.. ورغم اني بعد ما قرأت و إتمليت بمشاعر كتير خلتني حاسة إني ماعنديش ولا كلمة أقولها

لكن برضه دخلت عشان أقول آمين

إرسال تعليق