.

.

يــا عـيـون مـامـا ...بـغـنـيـلـك  

Posted by: فاتيما in


بوسة عل الخد دا
و بوسة عل الخد دا
و الخد دا لا يزعل..
ويغير مل الخد دا
واحدة ع .. الشمال
والتانية ع .. اليمين
و التالتة عل .. الجبين
يا عيون ماما إنت ... قولى
قولى طالع لمين ... جميل بالشكل دا
بحبك قد روحى
لأ .. لأ أكتر كتير
نفسى أغمض وأفتح
ألأقاك بقيت كبير
والدنيا .. مفتوحالك
و تتحقق أمالك
قد ما قلبى دعالك..
لأ ..أكتر من كدا
يا عيون ماما أنت ... قولى
قولى طالع لمين ... جميل بالشكل دا
عايزاك تـخلى بالك
من روحك ليل نهار
و تكون صديق لبابا
زى أصحابه الكبار
و تذاكر بأهتمام
و تسمع الكلام
و أنا أجيبلك كل حاجة
و أزو..
...... !!!!!
حتى الغنوة
ما أملكش أكملها يا رب ؟؟!!
يا روح قلب ماما
طول الوقت أغنيلك الغنوة دى و أقولك يا عيون ماما ...
سامـحنى ..
حضنك وحشنى يا أبن الأيه
قوى قوى قوى

This entry was posted on الثلاثاء, فبراير 12, 2008 and is filed under . You can leave a response and follow any responses to this entry through the .

14 كــــلام بيطــبطـــب عـــلى قــــلبى و روحــــى

عدت بعد غياب وجئت مسرعاً كى ارى يوسف العزيز وحكاياته مع أمه التى تحلم أن تحتضنه بين يديها و تتمنى له كل سعادة الدنيا ... جئت و كما فى كل مرة أغادر و أنا تترقرق عينى بدموع لا اعرف سببها ... لماذا يقطر قلمك الماً وتنساب عذاباتك بين السطور انهاراً من دماء لا ينضب منبعها .... قسماً حاولت أن أكمل عنك الاغنية ولم استطع كل ما استطعته أن أدعو ربما يستجيب الله دعائى ويأتى اليوم الذى تستطيعين فيه ان تسمعى يوسف اغنيته و تكمليها له ... ربما ياتى اليوم الذى ينام فيه بين ذراعيك دون خوف
تقديرى و احترامى تعرفينه مسبقاً اما دعواتى فثقى أنها لن تنقطع لكِ و ليوسف العزيز ... تحياتى و شكرى على سؤالك الدائم

ياااااااه
أيه بقى ده.. يا سى حازم
انت بتختفى فين و ليه؟؟
لو حاجة خنأك لدرجة انك موش عايز حتى تتكتبها فى مدونتك ..طيب فضفض معانا يمكن نقدر نشيل عنك شوية زى ما بتحلم لنا وتشيل معانا الحمل ..
مالك شكلك داخل فى حالة بيات .. شتوى أكتئابى ..عميق ..انهى بقى حتة فيهم عشان نفك اللعبكة دى و نساعد ..
أقتسام الهموم يخففها .. و عيب دا انت الى مشجعنى على المدونة تقوم تفلسع انت و تلم خلجاتك وتهرب على بره ...
تحياتى و احترامى و قلقى

ان شاء الله يا ست الكل تغنيهاله وكمان تسمعيهاله
وتقوليله اختك لماضه عندهااغاني كتير كمان وكمان
:)
ربنا يرجعه لحضنك يارب وما يحرمك منه

صباح معطر بالورد والياسمين ... اول التعليقات بعد غيابى عن التدوين فتره لظروف شخصيه واول ماشفت تعليقك قلت لازم اجى اصبح عليكى ..وحشتينى

ربنا يخليلك يوسف وتشوفيه زى مابتتمنى واكتر ويرجع لحضنك الدافىء ويفضل فيه طول عمره . قد ايه شعور الامومه جميل رغم انى مش جربته ولكنى بحسه اجمل شعور فى الدنيا وبحس اكتر فى حروفك وكلماتك التى تدمع عينى كلما قرائتها

تحياتى
قلب بيحبك

على فكره انا حعلق فى البوستات اللى فاتتنى فى غيابى

وبعدين معاكي يا فاتيما

كلامك عشان حقيقي بيأثر فيا أوي

تحية جامدة ليوسف وليكي

أروح اقرا تاني بأه سلام
:)

لماضة يا قمورتى
يا حبيبتى بس هو يرجع ..والله من غير ما تقولى كنت هعمل كده وهو بيحب أغانى كتير منها زى الشمس البرتقانى منت بغنيهاله كل ما يوقع سنة .زو العنكبوت النون كنا بنسمعها فى حفلات مكادونالدز و كنا مواظبين عليها ..دلوقتى مش عايزة ارفع عينى وانا معدية جنبها وابص على الغابهم الجديدة ..كنا بنعمل كده ونجمع اللعب ..دلوقتى ..يالله بلاش انكد عليكو احسن انا حاسة ان المدونة بقت حزاينى قوى وانتو ملكوش ذنب
تحياتى وقبلاتى

------------
نبضات يا غالية
حمدلله ع السلامة يا ستى ..اسكندرية فرحت اليومين دول على حسك ..و صحيح هى فى الشتا جنة و مناخها أوروبى كدا ومتعة الخروج فى جوها تحسى الشجن الجميل ..انا مستنية بوست معتبر من وحى اليومين دول ..
قلب بيحبك أكتر

-------------
دوشورة و ماليبى
متهيألى حاجة مل الاتنين
يانا موش فاهمة حاجة والعتب ع النظر
ياأما انتو مش قاصدين مدونتى و دخلتو بالغلط
فى كل الاحوال أهلا بكما

------------
مى
يا مشرفنا فى غانا
و العائدة بالكاس
و متصورة مع حسن شحاتة و بكرة متعرفيناش
يا عزيزتى مش قصدى أوجع قلبكو..بس الغنوة دى انا بسمعها من وردة من أول مرة اتعرض فيها مسلسل "اورق الورد "و غالبا كانت آخر مرة ومتعرضش تانى لكن قصته واغانيه فضلت محفورة فى ذهنى ومكنتش اتخيل انى يوم هبقى مكان وردة و اغنى الغنوة دى وللأسف معرفش مؤلفها ..بس الى اعرفه انه انسان قوى قوى قوى ..و ربنا يباركله و يمسح عنه ذنوبه بالغنوة دى .. بس بحسها بتطلع من قلب قلبى ..
تحياتى وحمدلله عل السلامة

: )

ربنا يخليكو لبعض

----

ربنا يخليه لك ويحفظه
ويجمعك بيه قريب اوى بالف الف خير
ويلعب ويجرى ويتنطط قدامك وتاخدية فى حضنك العمكر كله وبوسه على الخد ده والخد ده لا يزعل منى ليوسف ومامته
امواااااااااااااه

سيدة اللحظات
لا تقلقي على يوسف فهو بخير
لأنه معتصم
بنظرة بريئة
تحتضن الآفاق
بدمعة في العين
تستدرجها الاشواق
لأنه معتصم بالماء
و الشمس
بالاشجار
و الهواء
لأنه معتصم بوجهه النظيف
و حبه الهادىء لكِ
و العنيف
لا تقلقي يا سيدة اللحظات انه بخير
لا خوف لا مكابدة لا عناء
و لذا
فيمكنكِ مواصلة الغناء

و تسمع الكلام
و أنا أجيبلك كل حاجة
و أزوء الايام
وتبقى في حضني دايما
راجل كبير همام
وافرح بيك في فرحك
بعروسه مـ الاحلام
بس اوعى تخطفك مني
وتنسيك انك .. مني
قولها دي تبقى امي
وربي وصاني بيها
احب على ايدها
واحب على رجليها
وان كنت في يوم بعيد
اكيد باحن ليها
ولنظرة من عينيها
ولحضن بين ايديها
دي هي احلى واحده
وربنا يحميها

-----

حاولت اني اكتب بلسان ابنك
لكن اكيد هو لما يكبر ان شاء الله هيكتب احسن
عشان هيطلع ان شاء الله زي والدته .. احاسيسها مرهفه وعندها كم حب ومشاعر لو اتوزعت عالناس كلها .. هنعيش كلنا في حب .. وهيفيض مننا الحب كمان



ملحوظه
ياريت تيجي يوم الجمعه وتحضري اول تجمع لصحابي المدونين في الاوبرا
وصدقيني .. كلنا عنده هموم وجراح .. ولازم نقف قدامها مع بعض ومانخافش منها .. مش هم دول برضه الصحاب ؟؟




سلامووووووووووز

على باب الله
و يخليك يا رب
تحياتى وشكرى لزيارتك وما تقطعش الزيارات

----------
قطتى الحلوة
يا رب يخليكى يا حبيبتى ..و على فكرة احنا عندنا قط سيامى مجرم .. لو دخلك قافية هيبطلك نونوة ..بعد الشر عليكى ..نونوى يا قطتى دايما ونورينى
تحياتى وقبلاتى

------------
رجل المطر
يا ميدو الى بتعمله انا مش قده .. انا شكلى هتبناك بقى .زانا حاسة ان أغلبكو ولادى موش بس أصدقائى السحريين .ز
الف شكر على رقة احساسك

------------
سوووووو
انا هتبنى مين ولا مين بقى ..انت صحيح عجوز عنده 30 بس انت طفل جميل برىء انت كمان زى ميدو ..
يا ريت يكون يوسف دلوقتى حاسس بربع الى بتقوله دا ..عارف ساعات بقول لنفسى ..ان يوسف لما يكبر شوية ..ويعرف حاجات اكتر عن حكايتنا .. يمكن يكرهنى ... لأ ..دا أكيد هيكرهنى و يحاسبنى ويقول انى معملتش الى مفروض تعمله الامهات و ميبقاش عاوز يبص فى وشى تانى ..و انا والله ممكن اعذره .. و ما الومش عليه .. ههههه.. يا عالم .
اما عن معاد الاجتماع فانا هارد عليك فى مدونتك و...
أقبل أعتذارى و تحياتى

إرسال تعليق