.

.

كــتـاب الأغــانـى  

Posted by: فاتيما in


كان قلبى يكتم ضحكاته و انت تسألنى ..
متى ستأتى جنية الأسنان لتستبدل سنتك التى سقطت بعدأن وضعتها أنت تحت وسادتك دون جدوى ..
- هى الجنية متعرفش عنوان البيت بتاعنا يا ماما؟؟
- يا حبيبى احنا معندناش فى مصر الأستاذة جنية بتاعتك دى .. دى بتبقى عند الأجانب بس .. لو كنت قولتلى بعد السنة ما وقعت علطول كنت دليتك على الطريقة الصح
- يعنى السنة باظت ..؟
- لأ ..احنا بقى فى مصر لما الولاد الصغننين بتقعلهم سنة بيرموها فى عين الشمس
- طب ما هى كدا هتقع فى الارض وندوس عليها برجلينا
- لأ ما هى الشمس هتبعت أشعتها لغاية الأرض وتمسك سنتك و تطلعها فوق لربنا وتقوله يوسف دا ولد شاطر ويستاهل يا رب تديله سنة جديدة ياكل بيها البسبوسة
- خلاص يللا نرميها قبل الشمس ما تروح
كنت تصدقنى
لكن ..
سيأتى يوم و تعلم الحقيقة ..
هل ستسامحنى على أكاذيبى الصغيرة ؟
أم ستعتبرها خيالات مهينة لذكائك ..
..و ترمينى بنظرة عتاب
ندخل شرفة منزلنا و تلقى بالسنة فى وجه الشمس
فتنكسف من جمالك
و نتمتم معا..بكلمات الغنوة..
..
أن أن أن إن إن إن
والشمس البرتقانى عليها ليا سنة

كنت و ما زلت رجلى الذى أحتمى به من كل ألم يعصف بى ..اذكر نفسى دائما..
انك بجانبى وان الله سيرأف بنا لخاطر عيونك ..أفخر بنفسى وأنا امشى بجانبك فى الطرقات ..
- يوسف هات إيدك عشان هنعدى
- ماما انا موش عيل ..أنا راجل أعرف أعدى لوحدى
- طبعا يا حبيبى دانت راجل وسيدى الرجالة كمان ..أومال انا عاوزاك تمسك ايدى ليه ؟؟ موش عشان تاخد بالك منى لحسن أقع ولا حد يغلس عليا .. لما يلاقو معايا راجل زيك يخافوا ويبعدوا عشان ماشية جنب أسد
- أيه دا عرفو منين أنى برج الأسد ؟؟
- باين عليك ..يلا هات ايدك بقى
- طيب .. خلى بالك هنعدى لما تبقى الفرصة سانحة.
- سانحة .. !! يا بنى الكلمة دى معرفتهاش الا فى الاعدادية ..سمعتها فين دى؟؟
- فى الجزيرة للأطفال ..يعنى تعدى لما الطريق يبقى فاضى ..هاتى أيدك و خلصينا
أمنحك يدى و كأنى أمدها لأميرى الوسيم فى قصره قبل دقات الساعة الاثنى عشر..
ليمنحنى حب ودفء وأمان كأنه سيغمرنى العمر ... يمحو رعبى الدائم من لحظة فراق آتية دون محالةوأتحدى البعاد فى لحظة ... أردد .. و انت معى

هى دموع و الا أكتر
هو فراق و الا أكتر
لو على سبب البعد حبيبى
قلبى كبير ومقدر
الكون بعدك فراغ شاسع ..لا أملك سوى أن أملئه حنينا.. كنت طبيب جراحى ..و كفك تشفى الأوجاع بلمسات سحرية ..
تلطمنى صدمة ..
فأبكى
..تهرول عندى مسرعا تاركا وراءك الألعاب وقطتك الصغيرة ..تضع ذراعك حول عنقى و تشدنى نحوك ..
- ماما ما تعيطيش ...طب بس معلش معلش
كنت أبكى بعدما أخبرونى على الهاتف أننا خسرنا القضية ..
فى هذة اللحظة المرعبة .. نزعتك يد قاسية من رحمى إنتزاعا ..تلمس خدى و تكفكف دمعى و تضحك .. لا تدرى ما يخبئه لك الغد.. تقبلنى فى كل مكان فى وجهى و عندما تقرب شفتيك الندية من عينى أفزع وأذكرك بكلمات الأغنية.. محذرة من سوء المصير.. فتقبلنى مؤكدا بثقة انك لن تتركنى مهما حدث..أغنيها انا و أنت سويا ..

بلاش تبوسنى فى عنيا دا البوسة فى العين تفرق
يمكن فى يوم ترجع الى و القلب حلمه يتحقق
خلى الوداع من غير قبل
عشان يكون عندى أمل

إبتسامة زائفة أرسمها على وجهى كلما نظر الى أحدهم ..أعرف الآتى ..اتوقع السؤال القادم كلما هاتفنى أو رآنى شخص عزيز ..
-أزى يوسف ؟..مفيش أخبار عنه؟ ..
آه لو يعلمون كم تذبحنى هذه الكلمات القليلة ..
نواياهم سليمة ومنشغلون هم عليك ..لكن النصل ينغرس فى قلبى ..
أنزعه ببطء كيلا يشعرون ..
- لسه مفيش ..يا جماعة محدش يسألنى ..يعنى لو فيه أخبار كنت هاستنى لما تسألونى؟؟ هاقولكم أول ما أعرف حاجة
يا روح روح القلب ..
أصبحت سؤالا على الشفاه..
و تصاوير متناثرة هنا وهناك ..
و خلفية مكتب على جهاز الحاسب ..
و ألبوم صور مغلق لا أقوى حتى على تصفحه..
و جرحا ينزف فى روحى ..أداريه بأبتسامة و دندنة بينى وبينك ..
و لأول مرة لا نغنى معا.. ..
....
أنا راح منى كمان حاجة كبيرة
أكبر من أنى أجبيلها سيرة
قلبى بيزغزغ روحه بروحه
علشان يمسح منه التكشيرة

This entry was posted on الخميس, فبراير 14, 2008 and is filed under . You can leave a response and follow any responses to this entry through the .

14 كــــلام بيطــبطـــب عـــلى قــــلبى و روحــــى

مش لاقي عندي اللي اقدر اقوله
المدونة بتاعتك جوها متفرد ونادر وصادق بدرجة فظيعة
بس ما يكتب فيها اقسى من انه يكون جوا انسان واحد
واصعب من انه يعلق عليه
خلى عندك ثقة في يوسف هو اكيد جاي

يبدو انني سوف اعيش بشخصيتين من الان فصاعدا ..
رجل المطر و يوسف
دائما احب ان اعلق بلسانه
لا اعتقد انني سوف اتوقف عن هذه العادة الا حين يعود
و اظنني سأتوقف عنها قريبا جدا

( الكلام على لسان يوسف )

سافري اماه و انسي أدمعي
و استريحي كوكبا في اضلعــي
انت فى الاهداب صبحُ(ن) عالقُ(ن) ..؛
و نشيدُ(ن)عاشقُ(ن) في مسمعي
فاهدئي تجديني عندك آتيا
من شرايين الجهات الاربعِ

اسلمي ليوسف

ههههههه

بجد رائع

مدونة جميلة اوى

اظن انى اول مرة اجى هنا

بس بتلفت نظرى اوى المدونات اللى بتكتب عن الاطفال

لانى انا كمان بكتب عن الاطفال

ولاد اخواتى

اللى هما - المخاليل ههههه

تقبلى تحياتى

احمد

انا فاكره نفس كلامك يا ماما بابا قالهولنا واحنا صغيرين بالظبط
وكان المشهد بيتكرر قدامى
احب اقولك عن لسان يوسف
انى بحب ابابا جدا لما كدب عليا الكدبه الصغيره دى لانه وسع ادراكي بسهوله جدا وادنى فرصه احلم واطير مع شعاع الشمس اللى واخد سنتى وصدقتها واحلوت فى عينى اكتر لما سمعت جدو مدبولى بيغني الشمس البرتقانى عليها ليا سنه وبقينا نسرح ونسرح فى احلام جميله بجد
ولما كبرنا دلوقتى زاد حبي وشكري ليه لانه سابنى اعيش الاحلام دى وكمان سابلى ليها ذكرى حلوه

الله يسامحك بكتيني
الله يعينك علي الفراق

انا اول مرة اجي هنا

انتي جميله اوي وطيبه اوي وحنينه اوي

ووجعتي قلبي اوي اوي اوي

***
ربنا هيطمنك عليه بإذن الله

انا وزة

يوسف بيقولك يا ماما انتى وحشانى اووووى وانا راجع لك قريب ان شاء الله
علشان نقف فى البلكونة وسا ونغنى ان ان ان إن إن إن
ونرجع السنة اللى عند الشمس
بس انتى ابتسمى للدنيا واضحكى من قلبك بقى
ربنا يخليه ويحفظه ويرجع بالف خير وسلامه

السلام عليكم
لن أبكى بل سأضحك
نعم أضحك كثيرا ..لشقاوه يوسف
وانت م الآخر كده فكرتينى بطفولتى قوى
لما ماما كانت تمسك يدى
وحوار
يا شمس يا شموسه هاتى سنه العروسه ..ومش عارف ايه كده الجموسه
ياه .. كذبه جميله والجنيه اللى بتخوف الاطفال والبطل الأسطورى فى كل خيالاتهم
حاجه جميله قوى
.....
مش ممكن يوسف يبقى عنده أم كده وينساها
..يوسف هيتنيه فاكرك قوى وكنت احب اكون بلسان يوسف انا كمان ..بس كفايه عليا انى اعيش بطل فى قصصك وبين سطورك ..بطل لسه دوره ماجاش ..بطل يصاحب يوسف لما يكبر ويفهمه أنه عنده ام مش موجوده فى حته تانيه ومهما الدنياع عملت فيه ..هيفضل برده ابنها الل بيموت فيها ..
ام يوسف ...كفكفى دمعك واحذرى جفاف قلمك الساحر ..انا عشت مع الاغنيه اللى فاتت ده خرافه بجد
تحياتى لكل ما تكتبين

سلامة
يا شاعر يا كبير
أرجو ان الجو العام للمدونة ميكونش كئيب ..انا عارفة انى نكدت عليكو كتير ..بس هحاول أغير النمط شوية عشان حرام كده
زيارتك ليها معنى كبير عندى
أحييك

-----------
ميدو..
الغالى
ياريت بيبان السما تبقى مفتوحة ويسمع ربنا من قلبك ..أنت ينطبق عليك الحديث الىى بيقول أحب و كتم فعف مات شهيدا..ومتهيألى أنت مشروع شهيد وأظن دعوتك مستجابة..
تحياتى وشكرا على الرد الافتراضى الممتع

-----------
خالو أحمد
أهلا بيك فى ركنى المتواضع ..ايه يا عم زورتك و فوجئت انك ذو حيثية جامدة بين المدونين ..أبقى طل علينا دايما و هرد الزيارات
تحياتى للمخاليل الى بيخلوا للدنيا منطق و الى علمونا نركز ونعقل

----------
لماضة يا حبيبتى
شكرا على زيارتك لمدونة يوسف الخاصة وتعليقاتك المشجعة أنا هاسيبله الردود لما يرجع هو يكتبلهالك بنفسه ..
ومعلشى بأه أستلفت رابط على أذاعتك الخاصة .. أصلها مميزة قوى زيك ..
و حكاية السنة دى أصلها عاملتلى مشكلة مع أخويا الصغير تقريباانا الى مربياه بينى وبينه 14 سنة و لما بقى راجل و أطول منى بقى يقولى ايه العبط الى كنتى بتضحكى عليا بيه دا وانت كنت بصدقك ..بصراحة حسسنى انى أهنت ذكائه ..بس الله يطمن قلبك و يطلع يوسف زيك .. هايم فى الخيال
قبلاتى وحبى

------------
أنا وهى
أنين الحزن
أهلا بيكم نورتونى
بس معلش ..و من دا كتير .. اصل انا فقرية على رأى اخويا وغاوية نكد ..هحاول اغير الموود ...و متوجعوش قلبكو ... قلبكو فيه الخير
تحياتى

-----------
قطتى الحلة
أزيك ..لقيتى الاقرار والا لسه ..أوعدك ابطل أحدف ع النكد شوية ..بس لما يرجع يوسف موش عايزةاغنى الغنوة دى .. أصلو لازم نوقع سنة بقى وكدا شكله موش هيبقى لطيشف..
ربنا يسعد قلبك
تحياتى يا قطة

--------------
يا شمس يا شموسة
خدى سنة الننوسة
و ادينى سنة جديدة
أكل بيها البسبوسة
والله ..كل الامهات بيعملوا كدا يا مصطفى؟؟! ..أصل واحدة صاحبتى بحكيلها دا قالتلى انا برضه بقول لأبنى امسك ايدى عدينى .. كأنى موش انا الى بعديه و هو الراجل الى بياخد باله منى ..كويس والله ..اصلى ساعات بحس انى أم مبتدئة و عماله أجرب فى الواد أفتكاساتى ..
وانت قصتك الاخيرة كانت هايلة ..لمستنى قوى ..ربنا يفتح عليك كمان وكمان ..
و حسك دايما معاي
تحياتى الدائمة

أحسن حاجة عملتيها لحد دلوقت هو إنك عملتي المدونة دي .. طلعي كل اللي جواكي هنا .. كله هييجي بفايدة في يوم من الأيام .. مش مهم اليوم ده إمتى .. لكن أنا متأكد إنه هيكون مفيد ليكي وليوسف ولناس كتيرة كمان ممكن تستفيد

سؤالٌُ
مرسوم علي شفتى عمري
سؤالٌ
محفور علي سفن نهري
سؤالٌ
محزون جدا بحزن وتري
مجرد سؤال يحمل فى حروفه
جنين الدموع
يحمل ذكري تنوى الرجوع
يحمل ضيا برئ
شقيا ، أحيانا
احيانا جرئ
***
كطفل أنا
في حدائق السفر
العب
كطفل أنا
في حواري الذكري
أمرح
كطفل يبكي
من غير دموع
يرسم دمعاته
شخابيط حائرة
كمتاهة احزان
يرسم
من شدة الحزن
يخرق الطفل الالوان
كطفل أنا
جدا حزين
خرقت الالوان
حاولت الهروب
من تلك الخروق
الي النسيان
لا
لا
الي الاوطان
نعم حاولت الهروب
من خروق الالوان
كظفل أنا
*******
مجرد ارتجال مش عارف معناه ايه لكن لما قريت لبوست حسيت ان عاوز اكتب شعر فكتبت
من وحي كلامك ويوسف
من وحي الاحزان
اصلى زى البوصلة بميل لاي شعور بالحزن او بالحب او بالحنان

تحياتى

كريم بهي

عم مراكبى
يا رافع معنوياتى ..
كأنك بتقرى افكارى .. اصلى بسأل نفسى .. المدونة دى فيها كم كآبة لا بأس به .. و مشكلتى جايز كتير بيمروا بيها .. لكن ذنب الناس أيه فى النكد دا ؟؟ ..
دانا كتير بزهق منى شخصيا
و مبقاش عاوزة حد يسألنى ايه الموضوع و التفاصيل المملة دى ... بحس ان الناس مش ناقصين مآسى .. بس يعنى العزاء انو الى موش عاجبه المكان هيبطل ييجى تانى ..و انا هقدر دا و عذراهم من دلوقتى
أرجو ان تظل صديق لى .. فأنت المراكبى بجد .. الى زمان كنت بركب المعدية بتاعته فى المنيل و انا رايحة المدرسة و هو الى من غيره مبوصلش الناحية التانية فى المعاد الصح
..انا شايفة مدونتك قبلة لكل المدونين المميزين ..لذا ف تشجيعك يعنيلى الكثير
تحياتى
-----------
كريم يا ابهى من البهاء
الشعر لا يتأتى الا غالبا من الاحزان والمواجع ..بس أرجو ان برضو الفرح يلاقله نصيب عندى وعندك و عند الكل .. و ياعم انت التاج معاك دلوقتى ..فأكتب ما شئت
شكرى الخالص يا نقطة نور فى الظلمة

صباح معطر بالورد والياسمين

امممممممممممم مش لاقيه بجد كلمات معبره عما شعرت به وانا اقرا هذا البوست العميق و صورة البوست معبره كتير ورائعه تحياتى على اختيارها اما الكلمات فصادقه وشفافه لمشاعر جميله ورقيقه وعميقه وحزينة
انا عارفه ان كلماتى ممكن تكون اقل كتير من انها تحاول تمسح بعض الحزن اللى جواكى او انها تكون متضامنه معاكى فى مشاعرك الرقيقه ولكن .....ماذا اقول وماذا افعل ؟؟؟؟لا اعرف

يمكن تضحكى لو قلت لك عاوزه اضمك لحضنى وامسح دموعك وقولك اكيد يوسف حيرجع وقريب ان شاء الله لهذا الحضن الدافىء اللى مش حيلاقى حضن يحتويه زيه
واكيد دا اختبار من ربنا ليكى فاصبرى فالحياه ماهى الا اختبار قصير
والجنه ليست فى الاخره فقط ولكن هناك جنه على الارض للمتقين وهى ان يحقق الله لك امنيتك فى الحياه ولكن لاتخافى واصبرى
وان شاء الله كل الخير والسعادة لانك تستحقيها


تحياتى
قلب بيحبك

نبضات الحبيبة
أزيك يا حبيبتى ....
كل ليل وله آخر ...دايما أسمع النبؤة دى من كل الى حواليا و أدينى مستنية مكرهة أختك لا بطلة..
انتى بتعملى كل دا لما بتكتبيلى و تشدى على - موش ايدى - لأ قلبى ..
امتى بقى نشوفلك تدوينة جديدة .. بلاش كسل و اكتبى
حبى و قبلاتى
قلب بيحبك أكتر

إرسال تعليق