.

.

عـلـى رصـيـف الـمـيـنـا .....  

Posted by: فاتيما in


لما بشوفها
أبقى عاوزة أرمى نفسى فى حضنها
و أقعد أعيط ...
أعيط ...
لحد م أقول
يا بس....
ارتاح بعدها .... و احس ان الدنيا ممكن تتعاش
و الهموم تحتمل
هى .....
دادة الى مربيانى
ف أين عمرى
لما كنت البنت الصغيرة أم ضفاير و بيجوزونى لعمو عزيز
و انسحبت من حياتى عشان ما تشوفنيش وانا بندبح ...
و لما رجعت أخبط فى كل حد يواجهنى ... سكتت و أستحملتنى و اكتفت بنظرة عتاب
هى ....
جارتى الى مضللة عليا
ف سيدة القصر
لما قابلت أغرب انسان فى حياتى ... لخبطنى ... و حبيته ....
و معاها عرفت ... يعنى ايه معنى السند و الحماية الحقيقة
و هى واقفة زى الأسد قدام البيه ابن الذوات بكل هيلمانو بترجعله هديته
و تعلى صوتها بكل كبرياء .... أنت عاوز من بنتنا إيه؟؟!
هى ....
خالتى الى معرفتش ليا أم غيرها
ف ليلى بنت الريف
كانت ست بسيطة ع الفطرة بس بألف راجل ... بتفرض كلمتها و إرادتها ...
لما قالت لأبنها المعترض على جوازه منى لأنى مجرد فلاحة ...
إن الفلاحة ... هى الى ربته و كبرته و سفرته باريس و رجع منها دكتور ...
و انه لازم يجوزنى لأنى أصلح واحدة ليه ... و كانت أبعدنا نظر و حكمة
هى ...
أحن أم هتشوفها فى يوم على شاشة السينما
أقرب و أقوى مشهد ليها فى ذاكرتى
بيعصر قلبى زى فص لمونة .... لآخر نقطة
و قوفها على رصيف المينا ...
بكل ذل و انكسار
بعد ما عرف إبنها كل الى عاشت العمر تخبيه عنه
ساكتة و خجلانة
بس
نظرة عيونها بتقول كل حاجة
بتستعطفه
تترجاه ما يسافرش تانى
كل الناس بتغلط يعنى
و أمك زيهم ... ضعيفة
و ندمانة ....
سامحنى
و هو ... رجب ... ابنها
واقف بكبرياء مشروخ
و بيهرب من النظر فى عيينيها
لحسن يحن ...
مصدوم فيها ...
و كرامته منعاه يسامحها
قلبه مكسور ... فاكر حبيبته لحد غيره
حد ميقدرش يبقى عدوه
هيتغرب تانى لأنه ... موش هيقدر يستنى
المشهد صارخ بلا ضجيج
و هى بقى فى اللحظة دى .... بكل هدوء
و بساطة ...
بتدى دروس مجانية فى ...
كيف تصبحين أما
كل مشاعر الأمومة الى ف الدنيا ... ممكن تختصر فى الست دى
فى نظراتها
العيون كلها حنان و دفء
والدموع محبوسة ما تنزلش
فيها خضوع و خنوع ... بيشيع جو من الجلال والسكينة
الى هى بالمختصر ...
قمة الرقة و الانوثة .... المحتشمة
سوأل ... و بيلح عليا
يا ترى ...
يا يوسف
هيجيى يوم و نكرر المشهد دا انا و انت؟؟؟
أقف قدامك بكل ذنوبى
و تحاسبنى ؟؟؟
و أسكت
و عينى تقولك من غير كلام
سامحنى
على انى جبتك للدنيا من غير ما أحسبهالك صح
و من غير ما أوفرلك حياة صح
و أخترلك أب صح
و أرسملك مستقبل صح
مش عارفة الأجابة ....
لكن عارفة حاجة تانية
إن رجب فى آخر لقطة
مهنش عليه يسيب كل عمره ...
تراجع ...
و رجع
عقبال ما انت كمان
ترجعلى
يا حبيبى
و يا ريت تعرف ...
إنى مقدرة جدا من الآن .... كم الغضب الى فى قلبك
و لوم على ماما ... زى ما انت عاوز
و بالمرة بقى
و إحنا لسه فيها
أنا أهو بقولهالك مقدما
سامحنى
و كمان ... و حياتى عندك وقتها
بالراحة على ماما .... يا قلب ماما
و أرجوك ....
متبقاش توقفنى كتيييييير
على رصيف المينا

This entry was posted on الخميس, فبراير 21, 2008 and is filed under . You can leave a response and follow any responses to this entry through the .

45 كــــلام بيطــبطـــب عـــلى قــــلبى و روحــــى

وحياتى انا عندك يا ماما انتى بتوجعي قلبي
انا بقعد بتخيل نفسى مكان يوسف لو ماما قالتلى كده بجد وعملتلى كده
يا خبر ده انا هفضل ابوس اديها ورجليها كمان
انتى ملكيش ذنب يا ست الكل
ويارب يرجعلك قريب ويتشاقى ويتلامض معاكي زى ما انا مطلعه عنيهم فى البيت كده
وبيقولى غلطه عمرنا انتى يا لماضه
:)

أبكيتينى سيدتى سامحك الله.
أبو خالد

سيدتى الفاضلة :
تحية تقدير و أحترام لشخصك الكريم و قلبك الكبير ،تجولت سيدتى فى مدونتك بعد أن أبكانى هذا البوست ، ووجدتنى سيدتى أمام معنى الأمومة العميق العظيم و كم هى أليمة لحظات الفراق لفلذات أكبادنا،هونى عن نفسك سيدتى فسيرد الله لك يوسف كما رد نبى الله يوسف عليه السلام لأبيه سيدنا يعقوب ..قصبرا جميل ،سيدتى تفكرت كثيرا فى لحظات إنتزاع الأبن من أمه و أيقنت مدى المعاناة،تذكرت أمى و دموعها الأخيرة قبل موتها رحمها الله حميمية هى تلك الدموع و قاسية هى لحظة الفراق و أجدنى الآن لا أملك إلى الدعاء إلى الله العلى القدير أن يجعل قلب أبو يوسف رحيم بيوسف و لا يحرمه من أمه و يشركك معه فى تربية يوسف و توجيهه و الله سبحانه هو و لى ذلك و القادر عليه..
أخيرا سيدتى أرجو الا اكون قد أقتحمت خلوة نفسك أو تسببت لك فى الأحزان..تحياتى و دمتى قلب كبير عطوف و رحيم ..أبو خالد

هوني عليكي .. أصل إحنا بنشيل نفسنا ذنوب زي الجبال .. آه مبررنا في كده قلوبنا اللي بتحب اللي منّا

بس في الآخر لو حللناها بعقل قوي
حانلاقي انه نصيب و قدر ربنا كاتبهولنا

ربنا يرجعهولك و يفرّحك بيه
وأنا عارفة ان قلب يوسف طيب زي قلب ماما عمره ماحايشيل منها ولا يقدر يجرح حنيتها ده ولو بنظرة

عمري ما أخدت بالي من الست ده خالص
طول عمري بتفرج عليها و خلاص.. أول مرة أحبها قوي كده دلوقت



تحياتي

السلام عليكم ورحمة الله وبركاته

كلامك بيوجع اوي يا فاطيما ، ربنا يردلك يوسف لحضنك ويقر عينيك بيه قريب ان شاء الله

بعد ماقريت البوست ده
لقيت نفسى باقرا المدونة كلها
كل اللى كان على لسانى وفى قلبى دعوة ان ربنا يرجعهولك تانى لحضنك ويفرحك بيه ويفرحه بيكى لانك بجد أم جميلة اوى وانا عارفة ان يوسف كمان عارف ان انتى جميلة اوى كده وعارف انه روح قلب ماما زى ماانتى روحه كده
أبكيتنى بشدة..أتمنى تفرحينى قريباعند رجوعه لحضنك مرة اخرى
فى الانتظار

استمرى ف الضغط على اوتار القلب النازف.. استمرى فكلامك يعيد لنا أحساس النبض المتوارى وسط تيارات الماديه والقسوه ..
انا مدمن لسطورك
لك الله يا يوسف يا حبيبى
على فكره يا يوسف انا شفت رسوماتك والقطه مشمشيه والقط والعنبكوت وكله كله
واحتمال اعزل من هنا من عند ماما
واجى ابات عندك يا يوسف
سلام يا صاحبى

ربنا يعينك و يصبرك
تحياتى

fatima
انا اول مرة ادخل عندك
في اول البوست كنت فاكره بوست عادي تحليل لشخصيه حاضرة في معظم الافلام المصرية وحاضرة في حياتنا الاجتماعيه كمان في اي بيت واي مكان
لحد ما وصلت لفيلم المينا ولاقيتك بتحكي عن يوسف
قريت البوست اللي قبله وقريت التعليقات ولاقيت عيني بتدمع
ربنا يرجعهلوك بالسلامة ان شاء الله يا فاطيما ويهدي ابوه ويحنن قلبه على طفله
وان شاء الله تفرحي وتفرحينا قريب برجوع يوسف لحضن فاطيما

فعلا الست دى لما بشوفها بحس بكم حنان غير طبيعى
حتى فى نبرات صوتها
ومن الواضح حبيبتى انك لا تقلى عنها ربما تزيدين
ربنا يرجع لك يوسف بالسلامة
وصدقينى هو اول ما يترمى فى حضنك مش هيفتكر اى حاجه غير حاجه واحدة بس
انه بيحبك

يوسف عمره ما يزعل منك واكيد هو مسامحك

فيه حد يكون عندم ام زي القمر كدا بكل الحنيه دي ويزعل منها

اكيد يوسف شبهك هيكون حنين عليكي


انتي جميله اوي يابطه


تحياتي ليكي ....... وزة

أرجع تاني وأقولك إن ما أصابك لم يكن ليخطئك؟

وإزاي يوسف الجميل هايلومك على النصيب؟

مافيش في إيدك تغيري اللي فات
بس ممكن تضيفي على اللي جاي..شحنة المشاعر اللي عندك..على حبك ليوسف
وشوفي النتيجة

الحب يا حبيبتي يصنع المعجزات

بوسة كبيرة
:)

لماضة يا طعامة
انتى بعد الخضة الى خضتيهلنا دى ... أشهدلك بالعشرة
يا رب يا حبيبتى بس هو يرجع
و انا هعمل غرفة طوارىء 24 ساعة 7 تيام ..
بس ... انتو الاتنين هتعملوا روبطية عليا شكلوا
ماشى يا ستى
ميحرمنيش من حنيتك و شقاوتك ابدا
قبلاتى

----------
أبوخالد
قلبك فيه الخير يا سيدى ...
ابو خالد دا اسم حركى و لا زى حالاتى واخده لقب رسمى ...عندك ولد اسمه خالد و لا بتتمنى يكونلك ..
الاسم دا غلى قوى قوى على قلبى
و اتمنى مكنوش نكدية قوى لحسن صديقة عزيزة ليا قاللتى المدونة حزاينى قوى خالص...
اشكر ذوقك و احترامك الى يهمنى جدا
تحياتى الخالصة

-----------

هنودة
يا قمراية اسكندرانية
انا كمان مكنتش بهتم و انا صغيرة بس لما بقيت أم تغيرت نظرتى ...
عارفة زمان كنت أحب أمينة رزق أكتر ...
أم قوية الشكيمة كدا مش عارفة شكيمة دى يعنى ايه .. بس تشكم دى يعنى تدى معنى بتسيطر و تملك زمام الامور ...
بعد الى حصلى لقيتنى بحب فردوس محمد أكتر لأنى حسيت انى بقيت عاملة زيها ...
أم منكسرة قليلة الحيلة و اكتشفت ان هى النموذج الواقعى للام فى حياتى انا على الاقل ..
و فيه أم منقرضة الى هى آمال زايد بتاعة أمينة سى السيد ...يا خرابى على جمالها
أمى ربنا يخليهالى زى أمينة رزق و هى سندى الحقيقى فى الدنيا
انت مامتك أنهى فيهم؟؟؟

خمسة فضفضة
خطوة عزيزة
نورتينى
و أنا معجبة بمدونتك جدا و هقراها بتأنى و احدة واحدة عشان اتعرف عليكى أكتر ...
ربنا معاكو على وزارة الصحة
و ما ضاع حق وراءه مطالب
و حد بيعلى صوت الحق
و يدافع عنه
خالص تحياتى

--------------

توتة
يا حبيبتى مكنش قصدى أبكيكى ..
بس انتى الى قلبك جميل و رقيق
ربنا يسمع دعاكى انت وكل حبابيى دانا حاسة انى واقفة على جبل عرفة و الله من كتر الدعا الى طالع من القلب فى المكان دا
ربنا يستجيب
و نورتينى جدا جدا جدا

------------

مصطفى
يا روح شفافة
هكتب طول ما فيه ناس جميلة زيك بتقرى ...
بجد عجبك مدونة يوسف ؟؟؟
أصلى نفسى لما يرجع و يشوفها تعجبه و يحس انى إهتميت بحاجات الى سابها على الجهاز قبل ما يمشى
بالنيابة عنه بقولك
كلك ذووووووق
تحياتى العطرة

--------------

شريف طلال
أهلا بيك
قلبك فيه الخير
ابقى زورنى دايما
تحياتى

------------

الكسندرانى
نورتنى
و معلش مش قصدى اعيطكوا يا جماعة انتو الى قلبكو حنين قوى قوى
و الصراحة الحكاية بتجيب بعضها ... بتفرج عل الفيلم فى امان الله
الاقى نفسى مشحونة و مخنوقة وطالبة معايا عياط ...
فى ثوانى لقيتنى بحط نفسى مكانها و فجأة توحدت معاها و تخيلت الموقف هيحصلى مستقبلا ...
دا غير انها ست حلوة قوى قوى و اتظلمت فى الادوار ..
تخيل كم الحنان الى بيفط من الشاشة دا لما بتطل علينا فى دور محدود
أومال لو خدت مساحة أكبر كانت عملت فينا إيه؟؟؟
تحياتى ليك

قطتى الحلوة
ياااه
تفتكرى هيحصل ؟
معقول يا قطة .. و ييجى فى حضنى من تانى
معقول
يا رب يسمع منك
...إيه أخبار الإقرار؟؟؟
قبلاتى و حبى

-----------

وزة اللطافة
انتى الى أجمل ميت مرة
هو والله حنين قوى قوى
و حضنه كان بالدنيا و يحسسك انه راجلك كدا و انتى الى تبعه و ماشية فى ضله ...
انا خايفة يقسوا قلبه عليا بس مش أكتر
تحياتى يا وزة يا لطافة

--------------
ميومة البهية
و انتى بوسة أكبر ...
بس برضو الى بتيجى تكون اسرة لازم تحسن الاختيار و كونى اتغشيت و لا ما سمعتش نصايح أهلى ...
دى غلطة كبيرة مقدرتش عواقبها
و أكيد هيسامحنى فى يوم بس مش من الاول علطول ...
كنا إحنا عذرنا أهالينا و مكناش قعدنا سنين مش عاجبنا اسلوب حياتهم و فاكرين لما نبقى مكانهم هنعرف نعيشها صح ...
أنا بدفع تمن عبطى و لومى على أمى و أبويا ..مكنش عاجبنى طريقتهم فى الحياة ..
دلوقتى نفسى بس أكون ربعهم ..
موش عارفة حتى أعمل كده
بس
تحياتى و حبى

بلاش تحملى نفسك ذنوب
قلبك قلب ام كبير اوى
واكيد هو هيحس بيكي

ربنا يطمنك عليه ويقويكى

ايه؟؟؟؟؟؟؟؟؟؟
يوسف مش معاكى
سبتى يوسف ؟؟؟؟؟؟؟؟؟؟؟؟؟؟؟؟
ازاى؟؟؟؟؟؟؟؟؟؟؟
يوسف مش فى حضنك ازاى؟؟؟؟؟؟؟؟؟
ويعنى ايه يوسف زعلان منك؟؟؟؟؟؟؟؟
هو انتى سبتيه بخاطرك يا فاتيما؟؟؟؟؟
مش فاهمة حاجة
يوسف مش فى حضنك ازاى؟؟؟؟؟
ازاى ماروحتيش نهشتى بضوافرك اللى خده منك
ازاى ماروحتيش مسكتيه من رقبته وعضتيه وشديتى ابنك منه
مش فاهمة حاجة خالص يعنى ايه يوسف مش فى حضنك؟
يعنى ممكن شريف مايبقاش فى حضنى؟
هو انا ليه بعيط دلوقتى؟؟؟؟؟؟
انا مش بلومك يا فاتيما انا بس عايزة افهم ازاى حد جالله الجرءة انه ياخد يوسف من حضنك
ازاى حد قدر يحرم ام من ابنها
انا مضايقالك اوى ومتغظالك اوى وعايزة اجى معاكى نروح نهبش بضوافرنا فى اللى خد يوسف منك
وعايزة اقعد اعض فيه واضربه بالشلاليت
وبعد كدة ناخد يوسف واخبيكى انتى ويوسف علشان محدش ياخده منك تانى

تحياتي لكلماتك .. لأنها ليست مجرد كلمات ، بل هي مشاعر في قمة النبل ... أدعو الله أن لا يطيل فترة الاختبار لني واثق أنك ستجدين يوسف بجوارك قريبا
تحياتي

سيدتى الفاضلة/تحية و أحترام
فعلا سيدتى لى أبن أسمه خالد و هو أصغر أولادى و هو فى الصف السادس الأبتدائى و لى أحفاد من أبنتى الكبرى أسماء و هما تؤام مريم و أحمد..ربنا يفرحك بأولاد يوسف ان شاء الله..أبو خالد

اول زيارة لمدونتك وحاجة تقطع القلب والله معلش ربنا يرجعهولك بالسلامة

سيكولوبيا
أهلا بيكى
واضح انك هتكونى إضافة قوية فى حزب المدوناتى
...موش عاوزة أقولك طبعا الحالة النفسية فى المجتمع المصرى واصلة لحد فين عشان ميصحش نفتى و سيكولوبيا فى المدينة .. قصدى فى النت
بس و النبى ..إستغلالا بقى ..
تبصى لأخوتك فى المدونات عموما و انا منهم و تخلى بالك علينا
لحسن التدوين دا عارض بنبىء عن امراض نفسية متغلغلة فينا و مش قادرين نعالجها ف بنحايلها بالكتابة
و لا إيه رأيك يا فندم ؟؟
...يمكن البوح يدوايها ..يمكن
نورتينى

نوران الغالية
و الحبيبة
يااااه يا بنتى ...
هو انا كنت لسه هستنى اعمل كدا؟؟
ما انا عملتها من 6 سنين و اخدت يوسف و هربت لحتة تانية ..و عارفة زى الافلام الاجنبى بالظبط
برنامج حماية الشهود و الحاجات دى ؟؟
انا عشتها مع يوسف
حتة جديدة محدش يعرفنا فيها غيرت اسمى و كدبت الف كدبة ع الجيران ..
6 سنين أهلى بيزورونى سرقةعشان محدش يكون ماشى وراهم و يوصلنا
6 سنين و 18 قضية فى المحاكم تقريبا خسرت 16 منهم دا غير كل مليم من شقا أبويا اتصرف فى الرحلة اللطيفة دى و غير الى أخدوه المحامين ..مكتب بكل طاقمه عشان يلاحقوا ع القضايا
معرفتش حد و كنت بهرب بالولد من قصاد الناس عشان محدش يسألنا انتو منين و باباه فين و ليه محدش بيزوركو ولا بتسافرى لأهلك فى الاعياد و ليه يوسف مبيروحش مدرسة؟؟؟
طول الوقت أكدب كدب عبيط و عايشة فى رعب حد يتعرف عليا و يروح يقول لأهل يوسف ييجوا ورانا ..
6 سنين ابويا مات من غير ما اشوفه ..
و لا هو يشوف حفيده بعد ما بقى عنده8 سنين..
كان لازم أرجع بقى عشان يدخل المدرسة يا نوران
كان لازم قبل ما يتم 8 ..و الا يوح تعليم فنى أو محو امية ..يعنى مستقبلو يدمر من غير أى ذنب انى امه و اخترت له أب و اعمام كدا .. حاجة تشرح القلب الحزين
و عشان كده رجعتوا عن طريق محكمة الأسرة لأبوه ..
أيوه طلبت انى أرجعهولو ..
بنفسى
بس عارفة ليه؟؟
لأنى مكنتش بوديه المدرسة .. زى بقية العيال الطبيعية الى فى الدنيا ..
التهديدات بخطفه و بعدين اتهامى بالاهمال و السجن كانت كلها مازالت قائمة من زمان و لحد دلوقتى ..
هفضل مقعاده جنبى فى البيت لحد امتى ؟؟؟
كان نفسه يروح مسرح العرايس
و السينما
و المتحف المصرى ...
و الف حتة .. مكناش بنجرأ نخرج بيه بره البيت .. إحنا شبعنا بهدلة
و أوعى تقوليلى البلد فيها قانون و روحى أعملى محضر ..و الكلامالحلو دا عشان نفضل أصدقاء و متزعلينيش منك يا نوران
انا سبته عشان يروح مدرسة ..
كفاية انه 8 سنين و لسه سنة اولى و عمره ما دخل حضانة زى الأطفال التانية؟؟؟
كفاية العمر الى اتسرق منه زمان...
عارفة قلب الأم و انك اتوجعتى ... بس و الله غصب عنى بعدت عنه ...
مكنش ينفع أضيعله الى فات و كمان الى جاى؟؟!!
..........
مش عارفة هتفهمينى و لا تلومينى
بس مش هستغرب من أى رد فعل ...انا نفسى مستغربة من نفسى ...إزاى بعيش الايام كدا من غير عقلى ما يطير ...بس ربنا كبير قوى
.. أحضنيلى شيكو قوى قوى

بندق
منورنى ...
تفتكر صحيح ؟؟
ربنا يسمع منك و تبقى فترة و تعدى
انت الى كلامك و طبطبتك عليا كلها نبل
تحياتى الخالصة

ابو خالد
ياه انت جد كمان ..
دا يشرفنى اهتمامك جدا يا جدا
ربنا يكرمك فيهم و يبعد عنهم كل شر
متقطعش الزيارات ابدا
تحياتى العطرة

إسلام رفاعى
سلامة قلبك يا سيدى
و ربنا مع الجميع
و ان شاء الله تنجحوا فى حملتكوا للدفاع عن أى مواطن أيا كان انتماؤه و لكنه مدنى ولا يجب ان يحاكم عسكريا ..
ربنا ينصر كل صاحب حق

اسفة يا فاتيما اذا كنت قلبتى عليكى المواجع
انا مش بلومك يا حبيبتى
ربنا يكون فى عونك
ولما عرفت الحكاية بقول فى نفسى معاها حق ما هو لازم يروح مدرسة
مش هتنفعك قعدته جنبك وهو مش عايز زى باقى الاطفال
ساعات الواحد بيتحط فى مواقف بيضطر انه يضحى بالانسان اللى بيحبه علشان خاطر مصلحته مصلحة الانسان اللى بيحبه يعنى مش مصلحته هو الشخصيه

بجد مش عارفة اقولك ايه
دموعى مش شايفة منها الكيبورد كويس

ومش هاقولك قانون وزفت لانى بقرا كل يوم جمعة مشكلة الاخبار بتاعة حسن شاه وبشوف حكاوى المطلقات وقانون الرؤية والقرف اللى الواحدة بتشوفه من طليقها لو كانوا انفصلوا بطريقة غير متحضرة
مشاكل وقرف وقضايا وفى الاخر الخسران هى الام والطفل
ربنا يكون فى عونك ويصبرك
واسفة اذا كان تعليقى اللى فات قلب عليكى المواجع
ربنا هيعوضك عن كل اللى شوفتيه
مش عارفة اقولك ايه
بس لو فيه حاجة اقدر اقدمهالك
انتى تأمرينى بس يا فاتيما
ولو هاقدر اعملهالك هاعملها من غير تردد
ربنا يطمك على يوسف دايما
وتشوفيه احسن الناس

انا اسفة مرة تانية
سلام
اختك خيخة

مدونتك جميلة جداً بتعبر عن أم بكل معاني للكلمة ربنا يعينك علي فراق الأحبة

يوسف لو دخل المدونة دي لما يكبر ويفهم هايعرف انتي قد ايه بتحبيه وقلبك عليه وان كل اللي حصل كان غصب عنك
بتوحشيني

ليت الحقائق كالاحلام وخيالات الشعراء

نوران الغالية
هو انتى لسه هتعملى ؟؟؟
انتى عملتى والى كان كان
يا حبيبتى كفاية كلامك الى طالع من القلب ...
كفاية شيكو و صورته و هو نايم فكرنى بيوسف ..
و نفس الكلام والشقاوة ..
ربنا يحرسهم هما وكل الى ولاد الناس التانية
ربنا يخليكى ليا
يا رب

ام أحمد
خطوة عزيزة
أشكرك من قلبى و يا ريت تنورينى دايما
مين القمر الى فى الصورة ؟؟
هو دا أحمد ؟؟
ربنا يحفظه من كل شر ...
هزورك ضرورى ..
تحياتى الخالصة

المفقوعة مرارتها
تفتكرى ؟؟
معقول يقدر يفهم كدا ... دا لو ما لوثوش عقله بكلام كدب عنى و غسلو مخه ..
انتى عارفة الاطفال ممكن إعادة تشكيل أفكارهم ... و الزن ع الودان أمر من السحر ..
موش عارفة
بس اتمنى كلامك يبقى هو الصح
و مدونتك يا ستى فى زمن قياسى بقت عليها العين . . اللهم لا حسد .. انا حاطة ايدى على المكتب الخشب أهو
أنا سعيدة بيك جدا

مكنش حد غلب يا صانعة الاحلام
طب دا الاحلام هى السبب الرئيسى فى الى احنا فيه دا ...
غالبا بنحلم احلام صعب تجسيدها على أرض الواقع ... و بنعيش واقع ونحاول نكيفه مع احلامنا و نخدع روحنا ..
و نفوق من الوهم على حقيقة بشعة أبشع مما يمكننا تصوره فى أسوأ احلامنا
احلام ...احلام
نورتينى
و هزورك عشان أشوف ايه حكايتك مع الاحلام دى يمكن تصنعى حلم ينهى كوابيسىو كوابيسنا جميعا
تحياتى الخالصة

ربنا يرجعهولك بالسلامة ان شاء لله

اي انسان في الدنيا تبقى امه بالحنيه دي
لازم يولع صوابعه العشره شمع لمجرد انه يسعدها

وانا متأكد ان يوسف هيطلع راجل .. وحنين على امه زي ماهي حنينه مع الناس كلها





سلاموووووووووووووووووز

ااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااه


كريم بهي

والله انا مش عارف ليه انا مش قادر أفهم ممكن علشان مش قادر اكمل قراءه ؟ وممكن علشان الكلام كتير الله أعلم ... نصيحه حبيبة قلبى حاولى الكتابه تكون أقل من كده علشان نمنع الملل ويارب ماتزعلى من نصيحتى

اتمنى تزورينى وتنصحينى
تحيـــــــــاتى
المصــــــــــرى

أحمد عبدالفتاح
يا من يميل الحزن عنده للممازحة ..
يسمع منك ربنا
و أشكرك جدا
تحيات خالصة

سووووووو
يا راجل ..!!
دانت كنت يئست و قولت خلاص سووو قطع العلاقات
و الواد دا طلع زعله وحش قوى كدا ليه؟؟
طلعت برضو أجدع و خلتنى مكسوفة من نفسى موت
تعرف بجد بقى ..
لو يوسف هيطلع جدع زى ما بتقول ..
انا عاوزه يطلع جدع
تؤ تؤ
جرع ...
جرع زيك
انت ... و بقلبك الطيب الى بينسى الآسية و يفتكر الخير و بس
ربنا يديم المحبة دى و متزعلش منى ابدا
أختك الكبيرة

كريم يا ابهى من البهاء
طب يعنى آر أقول إيه؟؟
خلاص من غير ما تفسر .. فاهماك
قلبك كله خير
تحيات عطرة

المصرى
اهلا بيك أولا
ثانيا .زمعاك ان التدوينات طويلة و ساعات كتير لحد الملل .. بس الحقيقة دا موش بإيدى قوى .. احيانا الافكار تتدافع وو مينفعش ابترها فى مرحلة ما ...
أكيد لأنى موش محترفة زى سيادتك ..
دانت عامل دورية .زو صحافة ..و كدا يعنى أختزال الاحداث و رشاقة الموضوعات و دى مش شغلتى ..
بس اوعدك أحاول ..بجد
و أزعل منك ليه ؟؟؟
انت عاوزلى الخير و تشكر على كده
هازوك طبعا
بس نصايح إيه ؟؟؟
انا آجى إيه فى فطاحل التدوين ..انا عاوزة اللى ينصحنى ابقى زيهم ازاى
تحياتى الخالصة

يا مصرى
ملحوظة بسيطة كدا
بلاش حبيبة قلبى دى و الكلام الحلو قوى دا لحسن انا عندى إبنى يوسف ...
بخمسة صعايدة فى قلب بعض و لو قرى الكلمتين الحنينين دول ممكن يهد المدونة على دماغى ..
فبلاش و حياتك
و مفيناش من زعل
ماشى
تحياتى

يا مجدلية الزمن الآتى
الله عليكى انتى
نورتينى و خطو عزيزة
هقراكى بتأنى و روية عشان شكلك كدا عاوزة روقان و دماغ مركزة جامد
تحياتى العطرة

بعد ما قريت لحد نص البوست قلقت لحسن تنسى أم رجب
لكن ربنا ستر
وطبعا فاجئتى الجميع بإسقاطك الرائع من رجب الى يوسف والقاسم المشترك بينهما -والشبه بينك وبين فردوس محمد الله يرحمها
عاوزة تشوفى يوسف - الإبن الغائب - من وجهه نظر مختلفة اقرى المدونة دى
طبعا دى مش مدونتى http://nokosh.blogspot.com/
وماتنسيش تعلقى عليها

إرسال تعليق