.

.

الـنـبـى .... تـبـسـم  

Posted by: فاتيما in

المشهد ليل داخلى
عيادة دكتور الأعصاب
المرضى متنتورين على الكراسى
التلفزيون شغال على مسلسل حدائق الشيطان
الممرضة بعد تتر النهاية التفتت لينا قائلة :
- الله أنتو لسه قاعدين ... إتفضلوا الدكتور وصل من ربع ساعة
بهدوء أدخل الأودة و ماما معايا نلقى السلام ونقعد
الدكتور شاب فى التلاتينات على أسوء تقدير أربعين سنة
شكله من نوعيه الناس الراسية ... بالبلدى كدا بيتقال عليه تقيل و موش من النوع اللى بيبتسم بسهولة
صمت تام و مطبق
و أنا و ماما قاعدين نبص لبعض ... نظام و بعدين هو ساكت ليه؟
فين و فين لما نطق ... و سأل أمى
- خير يا ماما بتشتكى من إيه؟
- لأ يا دكتور موش أنا ... داأنا لما هأجيلك هيشيلونى مرابعة .... دى بنتى هى اللى تعبانة
- بعد الشر يا ماما
- يلتفت لى ... ببرود .... بتشتكى من إيه؟
هو مكشر و لا انا اللى بيتهيألى .... جايز أنا ببالغ .... يمكن
- حضرتك أيدى الشمال فيها صوبعين منملين و ومبعرفش ساعات أتحكم فيهم
بقرف لا أعرف سببه ....
- يعنى أيه منملين ؟؟.... يعنى مبتعرفيش تحركيهم خالص
- لأ بعرف ... بس أوقات كتير ممكن متحكمش فيهم و يقع من إيدى حاجات ...أو معرفش أتحكم فى القلم و انا بكتب ... كدا يعنى
بإضطرار ... من لا حيلة أمامه غير كدا
- اتفضلى أكشف عليكى
و الكشف دا أستمر لأكثر من تلت ساعة ... عبارة عن تخبيط بالشاكوش ... عارفينه ؟
اللى كنا بنشوفه فى الافلام الدكتور يخبط بيه على ركب المريض
يوسف لما كنت بأشتريله أدوات الدكتور اللعبة كان دايما يسألنى
- هو الدكتور بيعمل إيه يا ماما بالشاكوش ؟ بيكسر بيه إيه ؟
- معرفش يا حبيبى ...
حاجة تانية إفتكرتها لما مسك الشاكوش...
....المشهد اللى كان عبدالمنعم مدبولى فيه بيخبط رجل العيان ... بتاع أنا موش قصير أذوعة أنا طويل و أهبل ...
عدة محاولات مستميتة و ناجحة لكتم الضحكة .....
الدكتور ما زال فى التجهم مستمرا ...
قاعد بيدق كل جزء فى جسمى و يملى طلبات على شكل أوامر سخيفة ... من عينة
- قومى أمشى قدامى على خط السراميك من غير ما تشيلى رجلك من على الارض
- افردى دراعاتك و خليهم يرجعوا يلمسوا مناخيرك
- إعملى الحاجات دى كلها وانتى مفتحة وبعدين و انتى مغمضة
- مدى إيديكى قدام و بسرعة رجعيهم
- شدى إيديك ناحيتى...شدى عدل
- بتضحكى على إيه ؟؟!
- حد فيكو معاها دبوس؟
شلت واحد من إيشاربى ... و إدتهولو
و ماسبش حته فى مراكز الإحساس مشكشهاش
و أسئلة كتيير و معادة ... أجاوبها و يسألها تانى
ولا إبتسامة واحدة حتى ترسمها مجاملة يا أخى دا تبسمك فى وجه المريض صدقة !
و فى الآخرقعد على مكتبه و بدأ يتكلم
و كأنه بيزق الكلام من بقه زق
- أسمك
- فاطمة
- أنسة
- لأ مدام
بنظرة واضحة كأنه بيقول لنفسه ... كنت متوقع كدا من منظرك ...
- بصى أنا عملت فحص دقيق و مش شايف أى حاجة عضوية .... فيه حاجة مزعلاكى؟
- العادى يا دكتور
بضيق و نفاذ صبر
- العادى دا يعنى فيه حاجة مضايقكى
ماما تتدخل ... بعد ما لقيتنى أتغيرت و وشى قلب ....
- أيوه يا دكتور فيه مشاكل
- طيب يا حاجة ... إلتفت لى .... أنتى مشكلتك إيه فى إيدك الشمال؟
- منملة حضرتك و فيها شد ... بنظرة مندهشة أومال انا بقول إيه من الصبح
- منملة و لا بتشد ... انتى عارفة يعنى إيه منملة الأول؟؟؟
- أيوه عارفة يا فندم ... أنا ليسانس آداب حضرتك
و بعدين فى الشغلانة السودا دى ... الراجل دا موش طايقينى كدا ليه؟؟
- طب لما بتنمل بتعملك مشكلة فى إيه؟؟
يا دكتور أنا شولة بستخدم أيدى الشمال فى كل حاجة ...أنا خوفى إن التنميل دا ... ينتقل لباقى الصوابع معرفش أحركها تانى ...بس
- هى دلوقتى عملالك مشكلة فى إيه يعنى ؟
هو أحنا بنقرى فى سورة عبس ...
أنت موش عاوز تفهم و لا أنا اللى موش عارفة أشرح؟
- لما باجى أكتب ساعات ما بعرفش أتحكم فى القلم و الضغط عليه بخطى بيطلع أى كلام ...
- طب إكتبى أى حاجة قدامى كدا ...
أخدت القلم و كتبت .... فاطمة تعبانة ... بصلى باستغراب
- انتى عندك أولاد؟؟
- ........ أيوه عندى ولد
- بيعملك مشاكل و ضغوط
- ...........
- ماما تتدخل للمرة التانية
- هو موش موجود فى حضانتها يا دكتور دلوقتى هو مع والده
بلامبالاة و فتور قاتم
- ما أنا فهمت ده.... أنتى بتبردى فى الشتا ؟؟
- أذا كنت حضرتك تقصد البرد القارص اللى بيصيب الأطراف ... فأنا مبشتكيش من الموضوع دا
- فيه حد مبيتعبش من البرد ... دا كدا ميبقاش عادى
بلهجة يائسة من إنه يفهمنى و يكفى على الاقل انه يساعدنى ...
- أنا عاوزة حاجة تمنع التنميل دا يوصل لبقية الصوابع ... بس يا دكتورمش أكتر
- أنا مفيش عندى حاجةواضحة دلوقتى ... ممكن بقى نعمل إختبار االأعصاب للأيد الشمال نشوف أخبارها إيه
كتب على الروشتة إسم الأختبار و مكان ينفع نعمله فيه ...
- طيب ... يللا يا ماما
التفت اليه... و لم يكلف نفسه عناء النظر حتى فى عينى ...
- أسفة على تضييع وقتك
- .............
خرجنا من عنده ونازلين على السلم ...
- يللا نكلم الدكتورة اللى عندها الأختبار عشان نروحلها
- و مين قالك أنى هروح
- عشان نشوف إيه الحكاية يا بنتى
- خلاص أناعرفت المهم ... أن الحالة نفسية و إن مفيش سبب جسمانى ...و دا بيقولك السبب نفسى ... هنعالجها أزاى دى بقى؟؟ ...العلاج عند حد غيره
- طب بس تعالى
- ماما خلاص هى فلوس على الفاضى ... أنا إستحملت رزالة الدكتور الرخم دا عشانك ... لو مكنتيش قاعدة ...و الله كنت خرجت بعد أول لوية بوز من وشه...
قطعت الروشتة بهدوء عشان أقطع عليها السكة
- و أدى الروشتة أهى
- ليه بس كدا دا فيه إستشارة الاسبوع الجاى
- ... و مين بقى اللى هيبص فى خلقته بعد أسبوع ... يللا يا بيضة أسمعى الكلام عشان أحبك ...
بقولك إيه؟... ما تيجى نجيب حلاوة المولد بالمرة مدام نزلنا

أفكار تدافعت فى دماغى و أنا بنزل آخر درجة سلم ....
أنا شكلى هو اللى موش عاجبه و لا فاكرنى بدلع مثلا ... و لا هو مضايق خلقة لوحده
طب حتى لو كان أى حاجة ... ذنبى إيه يعاملنى بجفاء شديد و يخرجنى من عنده بإحساس سلبى كدا؟
إتنين غاليين جم على بالى لحظتها ...و قولت فى سرى
الله يمسيك بالخير يا لماضة ....
و إنت كمان يا مصطفى ....
سوأل يقفز الى ذهنى ...
إمتى هتخلصوا دراسة بقى و ترحمونا ... من المناظر دى ؟؟؟
و آه صحيح
يوسف يا روح قلب ماما
موش أنا عرفت .... الدكتور بيكسر إيه بالشاكوش ؟؟!!!

This entry was posted on الخميس, مارس 06, 2008 and is filed under . You can leave a response and follow any responses to this entry through the .

36 كــــلام بيطــبطـــب عـــلى قــــلبى و روحــــى

السلام عليكم
تقريبا كده مع فتره النقاهه الإيمانيه اللى بمر بيها دوقتى
قررت إنى اخفف من المدونات اللى بقراها وكمان أقلل التعليقات
بس ما ينفعشى دا ام يوسف
بتجبرك على القرايه سطر سر
تكون بتفلى الموضوت
وتنزعك من رهبنه الصمت ..
ترزعك جوا إلهام فظيع .. تحرك جواك كم من المشعاعر ..انت اساسا مش مكتشفه جواك
تعاطف.. غضب من الكائن الهلامى ده .. طبطبه نفسك توصلها بعنيك .. ابتسامه وفشخه بق ممكن تعوض تجهم الدكتور الخنيق ده ... حضن كبير للجده
مربعه... يشيلونى ..حلاوه المولد
تحس فيها بطيبه الناس البركه بتوع زمان ..فكرتنى بجدتى بحبها قوى
واسمها فاطمه...بموت ف الاسم ده
** *** *** *** ***
مش بعرف أكون جد فى كلامك
ورغم عادتى أنى اناقش فكره الموضوع عاده والإسقاطات النفسيه
بعض الظواهر الادبيه
إلا أنى وسط كلماتك بلاقينى بركز على النفسيه قوى وبهمل أى حاجه زى ما تكون نقط صغننه جنب جبل كبير قوى من المشاعر
فيضان أحاسيس
ماسوره صدق وضربت ف المكان .طبعا اتغرقت منها .. خدت قبس من صدق
قبس من طهر
قبس من نقاء ..قبس من روح صافيه بجد
****
انا اتخنقت م الدكتور ده . وهتلاقيه خد فيزتا قد راسه
التبسم ده رائع .. الحمد لله لما الواحد بيرسم ابتسامه م نقلبه فى زيارات للمرضى وكده ..بيبقوا فرحانين قوى وتحسى انهما شفوا من السرطان الخبيث اللى بيجرى ف دمهم ..بيقولوك
ازيك يا دكتور
المهنه دى ..اساسا انا مش بحبها الال علشان انها مرتبطه بالتخفيف عن الناس
مش مجرد موظف
لا ده ..بيعالج قلوب ناس مكسوره
بأنه يتواضع ويطاطى علشان هما يرفعوا معنوايتهم
طب هو عارف ان المرض نفسى موش عضوى
يبقى رفه عن مريضتك بضحكه ..ناقش مشاكلها
طبيب نفسى لازم يبقى جوا كل طبيب
علشان يمسع ويفهم ويخفف

بس سيبك انتى
أكشن الدخله الأولانى
مسرح مرسح يعنى .. ليل داخلى
فاضل (قطع)اللى بتبقى ف الآخر
بس فعلا رسمتى ببراعه متناهيه مشهد خطير
وجالك صبر تلونى كل جمله حواريه بلون
علشان نفهم سياق الحديث
الأشخاص
فاطمه بتكلم نفسها
.صوت داخلى أبرع شخصيه ..هى اللى قشت التعاطف
فاطمه .. الدكتور ..ماما
جميله حوار المولد ..عجبنى قوى تربيطه المشاعر..بيفكرنى بجو الشارع لما كنتوا ماشيين فى معرض الكتاب
إضفاء التفاصيل الصغننه دى ..بيخلى الواحد يعيشها من جوا ..يزق البطله من الكادر .. ويتحشر هوا ف الصوره
من كتر حبه فى مشاعر المشهد
برافو
ولو بقيم من عشره
هتاخدى
+9
بجد برافو ..برافو
وياستى كلها 4 سنين اهو
وهنبقى دكاتره قد الدنيا
وعونيا ليكوا ان شاء الله
بس ربنا ما يحوجك لينا ..وتنيكى بألف صحه وسلامه علشان تجوزى يوسف
وابقى ادعينا للفرح بقه
وطبعا
مشهد ليل خارجى
عياده دكتور النسا
الممرضه تعلن الإذن بالدخول بإيماه فاتره... يتقدم شاب وسيم جدا ومعاه ست مصريه فى الخمسينات ..حامل فى العشرينات
- دفعتوا الفزيتا برده ..200 جنيه
هنبقى فى 2020 بقه..عايزين ايه
اللحمه بقت ب 33 جنيه ونص
- بقه كده برده يا مصطفى بعد العمر ده كله ..بينا فلوس
- أكيد ..المهنه دى دمويه اساسا
امال كنت بذاكر سبع سنين وماجسير ودكتوراه وهباب ازرق علشان ايه
ويرسم تكشيره لا تبرح وجهه طول الكشف
بس يولد بيبى جميل
اسمها
ساره يوسف ....
بنت فاطمه ..اعظم جده ف الدنيا
بعد جدتى ومامتى طبعا
****
سلامو عليكم
وحلوه حته الشواكيش دى بجد ..وبرده حشرتى يوسف ف النص
بجد علشان خاطرنا ..فرفشى وبلاش تكتأبى وتيجى على صحتك ف الآخر
ربنا يثبتك ويعينك يارب
بقه انتى شوله بقه .. وخطك بقه وحش
ربنا يستر ..ويتبقى فيكى حاجه اكشف عليها لما أتخصص واكبر
بجد ألف شكر ليكى وبكل فخر بقولها
انا بعرف الست المصريه الطيبه دى
وشكرا تانى علشان جيت ف بالك
وربنا يخليلنا الدكتوره لماضه
خلاص قربت اهى ..كلها سنه تقريبا
ربنا يبارك للجميع
بحب جو البيت ده قوى
مدونه رائعه
سلام

انا بدعوكى لقرايه البوست ده
ممكن يخفف عنك (إليك سآوى)

http://45days-repentance.blogspot.com/2008/03/blog-post.html
تحياتى كتير

قال الحكيم كلمته في العلّة و المعلول
كشّر كمان خلقته و ضرب لي بوز على طول
و قالي شوف الدوا مش عندي يا أفندي
قلت الدوا لو عنده من وشّه حتى يغور
وعجبي
KING TOOOT

كعادتك اسلوبك في الكتابة قوته وجماله في سلاسة اسلوبك
تحياتي
سيد سعد

يعني ديك أم دا دكتور..
وسلامتك..
فيه حد عايز حاجة تانية..
وبعدين يعني هي ناقصة وجع في إيديكي مش كفاية يوسف..
ابقي قوليلي عنوان كتلة الرخامة المتحركة دي..لأن نصهم جزارين ونصهم مافيش احساس..
نورتينا باحساسك الجميل

البوست باين عليه قديم شويتين
المولد لسه بدرى عليه حسب توقعاتى
لكن حكاية التنميل دى بتحصللى فى الصابع الصغير لحد بتاع عشرة سنتى تحت منه والجزء العلوى من الصابع اللى جنبه وهى مرتبطه بالبرد والتغذية ويكدب عليكى اللى يقولك ان ليها اسباب نفسية
يعنى تاخدى حمامك سخن ولو انتى بتاخديه سخن يبقى لازم تزودى درجة حرارة المية شويتين
ولازم تاكلى احسن من كدا وطبعا تلعبى رياضة علشان تحرقى اللى كلتيه
الأكل بيدى طاقة
ألف سلامة
مرة بقى اشتكيت لدكتور من تجمع سائل على ركبتى الشمال ووريته الركبتين بتوعى ووريته ازاى انهم مش شكل بعض
كانت المفاجأة انو سألنى
فيه حركة مابتقدرش تعملها أو حاجة بتوجعك
قلتله لأ
قاللى بتشتكى من إيه أومال ؟
قلتله دى إصابة ملعب من زمان وأخاف يكون ليها أثر على المدى البعيد
قاللى لما يبقى ليها أثر هانتصرف
حسيت انى بكلم دكتور بيطرى
فى مرة سألت حسن أمين ابن عمى بما انه دكتور بيطرى :
ممكن تعملو عمليات تجميل لحيوان ؟او اى جراحة متقدمة عملية فى القلب مثلا او ازالة ورم سرطانى لحيوان ؟
قاللى لو الحيوان دا نادر جدا من نوعه او سلالته ومحتاجينه فى الإنتاج

يعنى حصان أصيل وعاوزين سلالته تفضل موجوده
أو نمر هندى
لكن عمليه جراحية فى قلب لا مؤاخذة جاموسة مايساويش تمنها ولا تمن الحليب المتوقع منها فالبتالى ندبحها ونستفيد من لحمها احسن
المشكلة بقى ان فى دكاترة بشريين بيتعاملو بالمنطق البيطرى
لكن الجديد فى حكايتك ان دا دكتور امراض نفسية

ماقولتيليش :
المدونة فتحت ...اصل دى مشكلة ناس كتير
المدونة اصلا مابتفتحش لحد ما الناس يقعدو على الكنبة

سيدتى /
لأول و هلة وإنطباع حسيت أنه بوست طويل فشغلت نفسى ثم عدت أليك و بدأت أقرأ واندمجت فى القرأة كثيرا ثم قرأت مرة ثانية و ثالثة و أتضح لى انك كاتبة سيناريو من الدرجة الأولى لدرجة أنى كرهت هذا الدكتور سامحه الله لطريقتة معك..تصويرك للحدث فيه إبداع و عبقرية..و يارب يهدى الدكاترة من هذا الطراز..أبو خالد

فاتيما الفكرة من مدونتك كلها هي الهيام والشغف بيوسف الذي بين ايدي اخري وهي فكرة قاسيه ومؤلمه جدا
كلامك في عز الهزار يقطر الما اخرجي بعيدا عن دائرة العذاب المقيمه تناسي حزنك ولا تنسيه
حاولي ان تعبري فوق جروحك وحققي نفسك في اي شيئ تاني ربنا يردهولك
مش عارفه اقولك ايه؟ اما عارفه الكلام سهل بس احنا في مجتمعنا بنسجن كيان الانثي في كونها ام وده غلط جدا
محدش بيمحي ذلته في حد بكرة يكبر ويشق طريقه وتبقا له حياته ايا كانت
طب تعملي ايه ساعتها وما يكونش حد مانعه عنك
تحياتي

فاتيما مدونتك حلوه جدا وموضوعاتك شيقه
واوعى تخلى حاجه تزعلك ولا تقهر فى نفسيتك محدش واخد منها حاجه
مش كده ولا ايه

أختى العزيزه فاطمه تحية طيبه
أولا أسلوبك فى كتابة الاأحداث تحفة ورائع لاقصى درجه ممكن اتخيلها
ثانيا
التنميل اللى عندك ده بييجي نتيجة ضغط الفقرات اللى بين ايدك ودراعك على القناة اللى بيمر فيها العصب اعذريني بس انا مش عارف اسمهم بالعربي
ودي بتيجي للستات اكتر من الرجالة بسبب ان أولا تكوينهم الخلقى بيختلف عن الرجالة وثانيا عشان شغل البيت واستخدام الميه السخنه كتير فى الشتا يعنى على قد ماتقدري تكون الميه فاتره يعنى لاهي بارده ولا هى سخنه وقللى استخدام ايدك اليسرى
وانتى ممكن تعملى علاج طبيعي على ايدك صدقينى هتقل جدا عن الاول
انا اسف اذا كنت طولت عليكي بس ياريت اكون افدتك :)

الف سلامة عليكي وربنا يشفيكي يارب ويحفظك ويجمعك بكل اللي بتحبيهم يارب

فطومة انا لو منك كنت خبطت الدكتور الكشري دا بكلمتين في عضمه

دي الابتسامه في وجه اخيك صدقه

دي مفتاح القلوب والشفا

معلشي المهم ما تزعليش نفسك تلاقيه واخد علقه من مراته

ولا تلاقي حماته اتصلت اداته كلمتين في اوعيته الدمويه

الف سلامه عليكي يا قمر

تحياتي وحبي ليكي وليوسف طبعا اسم غالي اووووووووووي

مصطفى
أخويا الصغير الكبير بقلبه
مبسوطة قوى ان التدوينة عجبتك ... لعدة أسباب أهمها ان الاعجاب جاى من كاتب قصة كبير زيك ...و بكرة تشوف
أنا قولتلك من الاول لما كنت أول تعليق يتكتب فى المونة دى انى غلبانة قوى و متحطنيش جنب الناس العتاولة زيك و زى حورس و غيرهم ...
أنا بكتب أحاسيسى موش بكتب عمل أدبى زيك
و بعدين انا غالبا روحت للدكتور دا فى وقت غلط فى يوم غلط فى مزرج نفسى غلط
موش عارفة المهم انه ينطبق علينا وصف ما تنافر منها إختلف
و متخفش يا سيدى هدفع الفيزيتة ... أنت راجل وراك بيت و مصاريف برضو موش هخدها حلوانة فى سلوانة و أستغل الجيرة دى و أدخلك ببلاش
و حفيدتى الاولى أسمها سارة
يسمع منك ربنا دانا بموت فى البنات
على فكرة قريت بوستك و أنا بدخل مدونة 45 يوم دايما بس مبلقيش كلام أقوله بعد اللى بتكتبه بحس أنى أضعف من أنى ألاقى كلام موازى لنصك
متحرمش منك يا أحسن دكتور فى مصر

كنج توت
برافو
أنت وصفت المشوار كله فى سطور قليلة و إختزلت كل اللى قعدت أرص فيه سطور سطور
أحرجتنى أدبيا
و عبرت عن اللى جوايا بالظبط
سعيدة جدا بوجودك
تحياتى العطرة يا ملك

سيد المكسرات
يا عم هو إحنا نيجيى جنبك حاجة ؟؟
دانت الفن و الاسلوب المعبر كله
ربنا يكرمك
و إزيى كراملة السكرة؟؟
سلامى ليها و ليك

د.زين الغالى
يا ريت حضرتك كنت موجود و أنا بقرى التعليق بتاعك ...
ماما بصلتى كدا ...بتضحكى على إيه قوى كدا
قريتلها تعليقك
بس انت كدا خدت ذنب شتيمت والدته و الست برضو تلاقيها طيبة معملتش حاجة هو اللى كشرى كدا منه لنفسه
و الله يمكن عشان صغير موش كبير فمعندوش خبرة
و معندوش ذوق برضو
و الا انا اللى بقيت حساسة يا دكتور زيادة عن اللزوم و عايزة الناس تاخدنى بالراحة موش عارفة؟؟
بس يا رب ميحرمنى من الحمقة بتاعتك دى الواحد حاسس ان وراه رجالة أسود ..
تحياتى يا فيلسوف

دانتى المصرى
من البرد و التغذية؟؟
تفتكر كدا
عموما هحاول أنقذ النصيحة دى ..ز
و يا ريت ميكونش السبب نفسى عشان دا علاجه صعب
أومال هو مقلش كدا ليه؟؟
دا دكتور مخ و أعصاب يا دانتى
موش نفسى
لأ لسه شوية على الهسس
وشكرا على إهتمامك
و بعدين يا عم المدونة دى متعزم عليها متتفتحشى و لا إيه؟؟
و الشباب دول حديد و بعيد ميقعدوش على الكنبة خالص
أعمل إيه
تعرف أحسن حال ؟؟
تكرشهم من المدونة أحسن عشان نعرف ندخلك يا جدع
تحياتى الخالصة

أبوخالد
يا خرابى
عبقرية مرة واحدة .. دا حضرتك واخد فيا مقلب جامد قوى
أنت كللك ذوق و أخلاق
متحرمش من مساندتك لى أبدا
تحياتى لكل اللى عندك خصوصا الاحفاد

بنت القمر
منورانى قوى
و الله أنا بحاول أعمل كدا فعلا
عن طريق المدونة دى
هى طاقة نور ليا بدل ماأشيل المشاعر جوايا تقهرنى ... أخرجها بره و نتقاسمها معا ...
نعمة المدونات ان أصحابها فى الغلب برضو عندهم حاجة جواهم عاوزين يطلعوها و حد يسمعهم و يشاركهم
فيه أجمل من كدا ؟؟
بس حكاية انى أفكر ان يوسف لما يكبر هيعيش حياته و هبقلى لوحى دى
بصى بقى
أنا عمرى ما هتجوز الا و يوسف فى حضنى
اللى هييجى دا ياخدونا احنا الاتنين شروة واحدة ...
انا لوحدى لا
لازم يعرف ان يوسف هو رقم 1 و أى حاجة تيجى بعد كده ... زى ما أنا عارفة ومتاكدة انه لو عنده ولاد أنا هبقى بعدهم و لو أنا قبلهم يبقى موش عاوزة أتجوزه لأنه موش هيبقى الأب الى أتمناه لأبنى و أحترمه
معرفش انتى ظروفك إيه؟ظ
بس بكرة لما تبقى أم هتعرفى أن المخلوق الصغير دا بعد ما جه الدنيا خلاص
أنتى حياتك أتغيرت نهائيا و إختياراتك كمان إتغيرت
و يا ستى لو فضلت كدا زى ما أنا و هو كبر و أتجوز كأنى إترملت و خلاص أنا خدت على الوحدة و إتصاحبت عليها
تحياتى ليكى

دينا
يا رب يخليكى
انتى اللى أحلى
و كلك ذوق
تحياتى العطرة

مبيوون
بص أنا موش قادرة أستوعب مبيون دى مشتقة من إيه بالظبط بس هبقى أسأل أخويا الصغير يمكن يقدر يشرحلى
يا سيدى شكرا على الإشتشارة الطبية اللى ببلاش دى
و الله موشس كنت أولى من الدكتور الرذل دا
على الاقل كلك ذوق و بتدى النصيحة لله فى لله و دا بياكد انك هتكون متخصص علاج طبيعى ممتاز
عارف انا والدى الله يرحمه جاله جلطتين أقعدوه 8 سنين عدى علينا أشكال و ألوان بتوع علاج طبيعى
الشغلانة دى عايزة صبر و معاملة حنونة لأن أغلب رضاها من كبار السن
متحرمشى من أهتمامك يا مبيون
تحياتى الخالصة

قبلة الحياة
و الله هو أنا كان ممكن أعمل كدا بس ماما كانت قاعدة و مرضيتش
الست نازلة معايا و مهتمة يعنى و أحطها فى الموقف دا طب إفرضى الراجل الرذل دا سمعنا كلام بايخ شتم عمل أى حاجة ...محبتش أضايقها
و بعدين أنا من طبيعتى أصبر على اللى قدامى قوى ..يمكن يفك بعد شوية
يكسف على دمه انى ببتسمله
أنما دا يظهر إفتكر الابتسامة دى إستفزاز و إهانة ليه و قاللى بتضحكى على إيه؟؟؟
أومال هتنبسط لما أكشر زيك ؟؟
أقولك بقى على سر محدش يعرفه؟؟
أنا ببتسم عشان أمسح من وشى التكشيرة زى سعاد حسنى ما بتغنى
بس هو اللى وش فقر
تحياتى ليكى جدا

لعلمك نقص الكربوهيدرات له علاقه بمشاكل تبدو عصبيه
شكلك بتعملى ريجيم او بتحافظى فى الأكل علشان ماتتخنيش
http://hlihlistan.blogspot.com/
دا لينك لمدونة مشتركة مع ناس تانية
مش عارف بنت القمر سابتنا ليه؟

الف مليون سلاااااااااااااامه يابطتي

ايه الراجل دا عارفه بقه كنتي امسكي
الشاكوش وقوليلوا هما بيعمولو بيه ايه
.............

قليولو ممكن اجرب وانتي عارفه بقه هتعملي ايه

بحبك يابطوط

وزة

هو المفروض الدكتور بتكون معاملتة بشوشة وخصوصا الاعصاب علشان المريض اساسا مش بيبقى ناقص .... لكن فى ناس بتكون طبيعتها كدا بتضحك فى المناسبات ان حصلت يعنى كل واحد بقى الله اعلم بظروفة
تحياتى

وزرة القمرين
طب والله فكرة حلوة
بس دا مكنش مدى أى فرصة لأى أفكار إبداعية زى بتاعتك
يلا المرة الجاية موش هشيل فى نفسى و هستخدم الشاكوش إستخدام عكسى
بدل ميكسرلى نفسى هكسرله دماغه
تحياتى و حبى

قطة الصحراء
قطتى الحلوة
أنا برضو قولت كدا يمكن عنده مشاكل و لا حاجة ..
بس ذنبى إيه؟؟
عارفة أنا حاليا قاعدة فى البيت لكن لما شغلى فيه تعامل مع الناس ...
كل ما أبقلى مضايقة من حاجة و أتعامل مع حد إفتكر كلام دكتور فى الجامعة كان يقولنا تبسمك فى وجه المستفيد صدقة و موش مهم لبسه و شكله و طريقة كلامه لازم تحسسه بإرتياح عشان تفهم هو عاوز إيه و تقدمله الخدمة و تشجعه ييجى تانى بعد كدا
حط نفسك مكانه و عامله كما تحب أن تعامل
بس
بوسة كبيرة لأحلى قطة
أموااا

عارفة احساسك والله
ادعيلى بس
والف بعد الشر عليكي يا ست الكل

على فكرة لماضة خلصت و أخدت بكالوريوس بس لسه بتتدرب عملي في السنة الإمتياز
ربنا يوفقها
أنا فعلاً اتشديت للتدوينة من أول سطر و ما قدرتش اسيبها غير لما خلصتها
اسلوب الحكاية ممتاز خصوصاً المونولوج الداخلي بينك و بين نفسك
انا كرهت تكشيرة الدكتور ده من حكايتك
و ربنا يديكي الصحة
:)

أولا ألف سلامة عليكي .. دي مش حالة نفسية ولا حاجة .. ما توهميش نفسك .. دي بس حالة نفسية مش أكتر

ثانيا .. ما تعتمديش على الدكاترة المدونين دول .. دول سايبين مذاكرتهم وقاعدين قدام الكومبيوتر

ثالثا .. أصحابي الأطباء بيقولولي إن من كتر ما عدى عليهم بقوا فاقدين الإحساس بالأمور الإنسانية دي .. وبيتعاملوا مع المريض كإنه شيء هيشتغلوا عليه زي أي جماد تاني .. نفس الحالات بتعدي عليهم كل يوم لكن المريض بتكون حالته دي هي أهم حاجة في حياته .. والدكاترة بيبقى ده موضوع متكرر عليهم وعادي

مرمر لماضة
يا طعامة
أةعى يا بنت تكونى بتعملى كدا فى العيانين اللى بيجولك
احسن أزعل قوى
أنا قولت أنتى و مصطفى بلسم
متهيألى كل إناء ينضح بما فيه و صعب قوى تبقو بالجمال و ال‘نسانية دى و فى عملكو تتحولو لناس تانية
عشان كدا عشمى فيكو كبير
و فى محله
ربنا يفرحنى بيكى انتى و مصطفى و تبقوا أحسن دكاترة فى العالم كله
تحياتى يا حبيبتى و شدى حيلك فى المذاكرة
المرضى يناشدونك
خلصى بقى

مهندس يا مصرى
و يديك الصحة يا رب انت كمان
متصورش أنا مبسوطة بزياراتك قد إيه
إنت و كام حد كدا من عمد التدوين بالنسبة لى و كون تدويناتى بتشدك يبقى معناها كبير عندى قوى
أرجو أن أكون عند حسن ظنك و ظنكو جميعا
تحياتى العاطرة

عم مراكبى
يا نبع الحكمة
أولا :
أنا قلقانة من حاجة واحدة بس ... أصدقائى بيدورلى على شغل حاليا و ممكن فجأة يقولولى روح بكرة الصبح قابلى حد و استلمى ...أختك أمينة مكتبة ... يعنى واخدة الكتب فحت وردك ... شغلنا فيه جانب عضلى لا يستهان بيه موش عاوزة أخذل أصدقائى بإنى الاقى نفسى موش قادرة على كدا خاصا و انها الايد الشمال اللى بإستخدمها أكتر ... بس ربنا يسهل
ثانيا :
يا عم لا سايبين المذاكرة و لا حاجة انت هتطلع سمعة ليه على العيال الغلابة دول ... دول ولادنا برضو و يجربوا فينا أحسن ما يجربوا فى الغرب تبقى مشكلة ...
ثالثا :
أفترض و أتصور إن الطبيب كل ما تعدى عليه الالم البشر يبقى أكثر شفافية ... أنا إتفرجت على الدكتور مجدى يعقوب فى العاشرة مساء
ذهلت من كم الرقة فى هذا الرجل
كل ما يعلى فى المكانة كل ما يحس بمعاناة مرضاه أكتر
يعنى هى دى القاعدة متهيألى و أن كانت مثالية حبيتين
بس ...
متحرمش من سوألك علينا
يا نبع الحكمة
تحياتى الخالصة

تصدقي بالله
:)
قولي لا اله الا الله
:)

أنا عمري ما اعتبرت نفسي من عمد التدوين زي ما انتي بتقول لي
انا يادوب مهندس بيدون و بيقرأ مدونات الآخرين في وقت فراغه
و بأفضفض في مدونتي
و باكت اللي يجيي في دماغي علطول بدون ترتيب و لا تزويق
يعني مش كوميدي و لا ظريف و لا بأضحك الناس
و في نفس الوقت مش مناضل و لا صاحب دعوة و رسالة زي البعض

انا انسان عادي أو دي نظرتي لنفسي
فعمري ما فكرت أبداً اني ممكن ابقى حاجة في عالم التدوين

عموماً شكراً لحضرتك يا رافعة روحي المعنوية
:)
و أنا فعلاً بأعلق على المدونات اللي تشدني
و مدونة حضرتك مليانة احساس رقيق

ربنا يكرمك يارب

مهندس يا مصرى
لا اله الا الله
بص بقى
هو لازم يكون الواحد أى حاجة من دول ..؟؟
كفاية تكون نفسك بس
و مع هذا تجد الناس متحمسالك و بتقرالك مع أنك أبسط من أبسط حد بيدون .ز
يبقى دا معناه إيه؟؟
إنك مميز بس انت موش واخد بالك
انت بتشارك الناس ..كلها تقريبا
موش دى برضو من وظايف العمدة ..
تلاقيه فى كل مناسبة تخص الناس ..
و انت حاجة فعلا
بس حاجة كويسة قوى
تحياتى الخالصة

بصى بقلب فى ورقك القديم :-)
اصل المسلسل مش عايز ينزل و مش فى بالى اكتب نفسى اقرأ

اولا اغنية شرين لمست جرح :-) جوايا
لسه كنت بدور على صورة و اخبار المؤدب فى الفيس بوك عند اخوة اصله من زميلى هو كمان و مشوفتوش
معرفش استريحت و لا لا ؟ كنت خايفة اشوفة و هو مع صور اولاده زى الباقين
انساه ازى ده ؟ اعتراف مجنونة

تعرفى اخر زيارة كنت فى مصر ، جاتلى حالة امتناع عن الاكل و امى كانت عايزنى اروح لدكتور نفسى زيك كده بس لاهيتها :-)) و مثلت انى كويسة و غصبت على نفسى اكل من ثانى قدمها
،،،
المهم لما قاريت البوست ده ، ابتسمت من وسط دموعى و قولت الحمد لله انى مروحتش
و بعدين تبويزة الدكترة عاشرتها 10 سنين :-) و استكفيت و الله لو كنت مكانك كنت مسكت الشاكوش و رمتهولوا على المكتب :-))

إرسال تعليق