.

.

الـدنـيـا لـعـبـة جـومـانـجـى  

Posted by: فاتيما in







فاكرين الفيلم دا
بتاع الممثل العبقرى روبن وليامز
 اللى إسمه فى القصة 
 الآن
ولد فى طور المراهقة....
إبن وحيد لعائلة غنية و يبدو مدلل 
و غير مبالى بالنعم اللى فى حياته
و صدفة لقى لعبة منزلية شكلها غريب 
و لما جه يلعبها مع أعز صديقة ليه ...
من أول دور اتشفط جواها
و إتحبس فى لوحة اللعبة ستة و عشرين سنة
وصديقته قعدت تتعالج من أمراض نفسية
لحد ما بالصدفة طفلين صغيرين لقيوا اللعبة 
و كملوا الدور و خرجوه
من أدغال متوحشة 
و صياد يطارده بإستمرار كأنه رمز الموت


أحد الطفلين رمى الزهر
و إذا با للعبة تصدر حكم يخرج بيه 
 الآن
  من جومانجى فيلاقى حياته أتبدلت تماما
و بقى رجل فى أواخر التلاتينات
 و مفيش حاجة زى ما سابها
و لزم عليه ينهى الدور عشان العواقب المترتبة
 عن اللعبة هى كمان تنتهى


دور على صديقته القديمة 
و بمساعدة الطفلين
توالت أحداث الفيلم لغاية ما فى الآخر نجحوا
 فى إعادة عقارب الزمن الى الوراء 
ليستعيد كل واحد حياته من جديد



الفيلم دا إتعمل منه كارتون
كان بيتذاع فى إحدى قنوات الأطفال
كنت بشوفه مع يوسف 
و كل نهاية حلقة .....
 الطفلين يخرجوا من اللعبة
 و يفضل 
 الآن 
 محبوس
يقولوه هنرجعلك تانى 
و نحاول نخرجك ...
كل نهاية حلقة ... كل مرة ... أروح عاملة صوت
 
 إهىء إهىء -
 - ماما بتعيطى ليه؟؟
- أصل لسه الآن محبوس جوه ...
 و أنا عاوزه يطلع من هناك
 - ماهو هيطلع متقلقيش ...
بس فى آخر حلقة خالص
- - بجد .. !!!
عشان هو صعبان عليا قوى ....
 إهىء إهىء
 - متعيطيش يا ماما ... 
و لو فضل جوه أنا هدخل أطلعه
- -أخلاق يا يوسف .
و الله يا ناس أنا مخلفة ولد أخلاق ... 
طب هات بوسة بقى

وبس 



القصة بسيطة و مليئة بالعبر ...
إزاى فجأة بالصدفة البحتة تعتر فى مصيبة
 و إنت لا بيك و لا عليك
و تبدأ بالتعامل معها دون أن ترى 
الشر الكامن وراءها ...
موش هى دى الدنيا الحقيقة بالظبط
لقى الآن لعبة 
و إبتدى يلعب بيها ... 
مكانش يتصور إنه هيدفع تمن دا 
أحلى سنين حياته
اللى عاشها و معشهاش
فى بعد تانى
عبارة عن أدغال موحشة الداخل فيها 
مفقود و الخارج مولود
لكن القدر أراد يرجع لحياته تانى 
و يواجه كل شىء



ساعات كتير احس
 أن حياتى لعبة جومانجى
مصيرى السىء قادنى للوقوع
 فى أدغال مشابهة لجومانجى بالظبط
حاجات كدا 
لا منطق لها إتفرضت عليا
لمجرد إنى بس  .... رميت الزهر
و حاولت ألعب بسلامة نية 
دون أن أدرك ما سيحدث لى
 



عشان كدا الآن بيصعب عليا
أصلى لأنى فى نفس مكانه
نفسى حد ييجى يكمل الدور و يرمى الزهر
 و يطلعنى من الغابة
و يرجعنى للدنيا بتاعتى



صحيح هارجع لدنيا مختلفة شويتين
لكن أهى أرحم من جومانجى بكتيير



يوسف قاللى لو
 الآن
  مخرجش هاروح أنا أطلعه بنفسى
دات نت يا روح ماما اللى دلوقتى جوا اللعبة 
 من غير ما تعرف
و ماما أضعف من إنها تخرجك
عارف ليه ؟




لأن ماما كمان فى نفس المكان ....
بس الحيوانات المفترسة حايشنى عنك
و كل واحد فينا إحنا الاتنين قاعد دلوقتى لوحده كمشان مستخبى من رصاص الصياد
 و أنياب الضوارى المفترسة




مبقاش فاضل غير حل وحيد ....
و لو إنه هياخد وقت لكن منتظراه
عارف إيه؟؟!!
حد كدا ... 
يكون صاحب كرامات
يرمى الزهر و يخرجنى أنا و أنت
من لعبة
جومانجى
  يا ترى هيحصل ف يوم و ... ممكن ؟!؟

--------------------------------------

This entry was posted on الجمعة, مارس 07, 2008 and is filed under . You can leave a response and follow any responses to this entry through the .

64 كــــلام بيطــبطـــب عـــلى قــــلبى و روحــــى

للمرة التانية انتي جميلة اوي
وطول ما يوسف له ام زيك
عمرك ما تخافي عليه

ربنا يخرجكم من لعبة جومانجي علي خير

انا كمان بحب المسلسل دا
بس اكيد مش هاأحب جومانجي بتاعتك يافاطمة

ربنا يخرجك منها بالسلامة انتي ويوسف
ويخليلك يوسف يارب

مررت بمدونتك لافهم قصة يوسف
ثم فهمت .. و هو امر استثنائي جدا لو تعلمين ..
لا املك كلاما كثيرا لاقوله حيال لعبة الجومانجي التى تقضين وقتك بداخلها
لكني املك املا ورجاء
و هو ان تضحكي
فيوسف بالتأكيد
يحبك ضاحكة
..
ملحوظة
يوسف يشبهني في اسمي
فهو شخص سيأتي بالتأكيد

فاضل

السلام عليكم ورحمة الله وبركاته

ربنا يطلعك منها علي خير انت وروح قلبك يوسف
بس عاوزه اقولك حاجه كل واحد فينا وليه الجومانجي بتاعه واللي مزنوق جواها ومستني حد يرمي الزهر ويطلعه منها بدون خساير

ربنا يخلصنا منها جميعا ويطلعنا من الدنيا علي خير

كان نفسي النرد يبقى فى ايدي وارميهولك صح ياماما والله
ان شاء الله بكره اكيد احلى
انا اسفةعلى تاخيري عليكى والله بقالى 4 ايام مش بدخل بيتنا ولو دخلت يدوب الحق انام وانزل على نبطشياتي تاني
اناقريت اللى فاتنى وسبتلك تعليق على موضوع النبي تبسم
والنبي يا شيخة انتى كمان لا تتبسمي
وتعالى شوفي بنتك بتعمل ايه فى العيانين
:))

سدورة الجميلة
انتى أجمل أوى أوى
و واخدة فيا قلم أوى أوى أوى
بس تفتكرى
يوسف لسه فاكرانى يا سدورة ؟؟
أتمنى ذلك

أريد عريسا
نورتى المدونة و عالم التدوين عموما
على فكرة فيه مدونة رائدة فى نفس موضوعك لكن بشكل كوميدى و ساخر إسمها عايزةاتجوز
http://wanna-b-a-bride.blogspot.com
وهتفيدك قوى و ان كنت أظن مدونتك هتتطرق لموضوعات آخرى غير البحث عن الزوج المناسب
إنتى شكلك زميلة و لا إيه؟ظ
يعنى أمينة مكتبة و لا أنا تخمينى غلط
تحياتى

مفقوعة مرارتها
يا رب نخرج منها أناو يوسف و كل حد زيى
و لازم عندك كتاكيت صغننة بتتفرجى معاهم بقى
و لا بتتفرجى مع خماتك العزيزة
ما دا اللى ناقصها بصراحة
إنها تدخل لعبة جومانجى و تريحنا
تحياتى الخالصة

يا شخصا سيأتى بالتأكيد
عودا احمد للتدوين مرة آخرى
أنا بضحك و الله
دا نا من كتر ما بعمل كدا المقربين ليا بيتصورا إنى نسيت خلاص و لا كأن أبنى بعيد عن حضنى و لسان حالهم بيقولوا دى رابطة على قلبها حجلر و لا هاممها
بس موش عارفة لما آجى اكتب تدوينة الجزن بيفط من سطورها ليه؟؟
أتمنى ليوسف أن يحمل بعضا من أسمك بشكل عملى و لا يظل إسما محتملا
تحياتى العطرة

خمسة فضفضة
يا أحلى صيدلانية فى المحروسة
ما هى الدنيا لعبة جومانجى
و كل واحد عايش الدنيا دى
و الكل عاوز يخرج منها سليم قدر الإمكان ...
أنتى فيكى حزن غريب
أرجو فى يوم أقدر أكشفه و احاول أشيل معاكى شوية منه
حبى الخالص ليكى

مرمر يا لماضة
يا طعامة
يا حبيبتى إنتى تتأخرى زى ماإنتى عايزة
إحن فى ديك الساعة تبقى دكتورتنا بالهمة و النشاط و الإنشغالدا
كله لصالحك يا حبيبتى و من فضلك متعتذريش على حاجة بعد كدا خالص
و بتعملى إيه قوليلى ...
أكيد كل خير منتى ميطلعش منك غير كدا
و شوية اللماضة دول على القلب زى العسل
بوسة كبيرة على خدك المندى بهوا إسكندرية الحلوة

سيدتى /FATIMA
داخلك حزن كامن ،هونى عن نفسك سيدتى أبحثى عن أصدقاء جدد غيرى نمط حياتك أنا لا أطالبك بنسيان يوسف و لكن أطالبك بعدم نسيان نفسك دوما كونى مع كتاب الله و كلامه سبحانه و تعالى و أدعوك لقرأة سيرة النبى صلى الله عليه و سلم ففيها العزاء عن غياب يوسف و أكثرى من الدعاء لله تعالى من أعماق قلبك و لسوف يعيد لك ربك يوسف بإذن الله..
أبو خالد

ليه حسه فى كلامك انك تقصدى ذئاب بشريه اممممممممممممم
ولا يكون انا مش فاهمه وانت تقصدى مصر وحالها عموما جاوب على حاجه من الاتنين ولك زير كلاشينكوفى هديه
اتمنى ان يوسف يبقى هو كل الامل والحب اللى فى حياتك يا قمر انتى

جومانجي
تعرفي انك قلبتى عليا المواجع
انا كنت على طول بتفرج على المسلسل ده مع كوكي " أخويا الصغير " وبقالى اكتر من شهرين ماشفتوش
ربنا يخرجك انتى ويوسف من جومانجي بالسلامه
تحياتى

بطوط

انتي فعلا فعلا واصلن يعني جميله اوي بشهاده كل الناس

كفايه جواكي الحلو دا
كفايه حبك ليوسف

في بوسه بس جامده اوي المره دي

وزة

فاطيماتاااااا
لم يفتني بوست الشاكوش
وكنتم معكم داخل غرفة الكشف اشاهد ماحدث هذا ما حدث معي باحساس وليس بالقراءة
وانتابني الضحك قبل ان تذكري موضوع الضحك معك
وارجع للمهم في المقابلة نصف العلاج وده مهم جداً
وعلى رأي المثل اللي ستي قالتهولي
لاقيني ولا تغديني
واقعد معايا ولا تعشيني


أما بخصوص لعبة الجومانجي
وماتتمنيه يافاطيماتااااا
قلبي معك
أنا أتكلم معك بمنتهى الجدية
لماذا ننتظر دائماً الكرامات وابو زيد الهلالي وليلة القدر لتحقيق امنية وقد يكون الحل قاب قوسين أو أدنى منا
وقد يكون الحل في اطراف أناملنا اللي بتنمل احيانا
لماذا ننتظر دائما أن يأتي شفاء صدورنا الينا لماذا لا نفعل مايستحق منا البحث والتعب والأخذ بالأسباب
عجب أمرنا نحن بني البشر واللهي نعرف علتنا ونشخصها ولا نعرف دواءنا وليس المُسكن اكرر وليس المُسكن
انسي موضوع الكرامات
ولاتعتمدي على رمية زهر
حتى لا تذهبي في غفلة

اه واه عليك يازمن الشواكيش
العب لك شيش يك تلعب لي شيش بيش

تحياتي
حسن ارابيسك

اول مره ادخل مدونتك و ان شاء الله ماتكونش الاخيره
حقيقي مسيتي مشاعري بقوة و صدق مشاعرك و احاسيسك
مش لا قيه تعليق مناسب عن التدوينه دي بجد
مش عارفه اقول ايه , عشان عارفه انمافيش حاجه اصعب في الدنيا من بعد طف عن امه و بعد ام عن طفلها
ماعنديش حاجه اقلها غير دعاء ان ربنا يجمعكوا سوا على خير
وافكرك بالآية الكريمة
" و عسى ان تكرهوا شيئا و يجعل الله فيه خيرا كثيرا"
عارفه انك في اقصى مراحل الكره لشيء حصل بيحصل ضد الفتره و ضد القدره على التحمل , بس ربنا دايما بيصدق في كلامه و ان شاء الله خير و ان شاء الله ربنا يعوضكوا خير
---
من كام يوم كنت بتفرج على برتامج عن الطبالنفسي عنالاطفال و قالوا فيه ان الطفل الذكر بيطلع سوي و مستقر نفسيا اكتر لما بيتربى مع ابوه عن لما بيتربى مع امه
معرفش ازاي بس هما قالوا كده
يمكن يكون في ده عذاء ليكي
و ربنا يلهمك الصبر يا رب
واسفه على الرغي الطويل ده

بجد عيوني دمعت وانا بقرأ البوست بتاعك

ربنا يكتب لك الخير ويسعد ايامك ويجمعك بالغايب يا رب وينور لك طريقك انت ويوسف حبيبي وحبيبك

انت انسانه طيبه وروحك جميله وتستاهل كل الخير واكيد ربنا هيكون جنبك باذن الله ودا مجرد ابتلاء وربنا هيعوضك عنه كل الخير بعد طول صبرك

ما تقلقيش انتي بس ...
وياسيتي انا لو ااقدر وفي ايدي الزهرة اللي تطلعك وتجمعك انت ويوسف صدقيني مش هتردد وهرميها عشان تتلاقوا من تاني ... بس انتي قولي لي الزهر فين يا فطمطم

تحياتي لرقه وعذوبه احساسك
وكل عيد ام وانت طيبه وبخير وان شاء الله تكوني مع يوسف يا ماما

أبو خالد
يمكن أح أسباب دا إنى مبشتغلشى و دا مسببلى فراغ كبير و لا يوجد ما يلههينى بعض الشىء
و بخصوص الاصدقاء الجدد
الله ... أومال انتو تبقوا إيه ؟؟
و شكرا على نصايحك اللى فى محلها بالفعل
تحياتى الخالصة
و فين مدونتك يا عم ؟؟
لسه ما زالت تحت الإ نشاء؟

آبى الجميلة
لأ دا الموضوع كبير قوى
مص مرة واحدة؟
يعنى ممكن و الله ما هو مصر جزء من الدنيا
و الدنيا لعبة جومانجى
بس أنا كنت بتكلم عن دنيتى أن و يوسف
و الوحوش الضارية دى تبقى ناس بيتقال عليهم بنى آدمين كد من غير وجه حق
و بدل ما يفصلوهم عننا بيسيوهوم يميشوا بيننا يختارو فرائسهم بمنتهى السهولة و لا يجروء احد على التصدى ليهم
ساعات الوحوش اللى فى البرارى بيبقوا أرحم من البنى آدمين
عمرك شفتى حيوان ماسك حيوان تانى بيعذبه بالكهربا
يوسف كان دايما يسألنى ليه ربنا خلق الحيوانات المتوحشة دى ؟؟
كنت بجاوبه إن ربنا عاوزنا نتعلم منها حاجة ... نتعلم من الاسد الشجاعة ... من الفهد السرعة و الرشاقة .. حتى التعبان نتعلم منه فن الالتخفى و مباغتة الاعداء
بس كمان الحيوانات بتعلمنا الإنسانية
إزاى تكون إنسان بجد
تحياتى و معلش طولت عليكى

mabioon
معلشى خليها عليا المرة دى
و كوكى دا بقى يبقى إسمه الاصلى كريم و لا إيه بالظبط عشا ابقى عارفة
و ربنا يرجعه يالسلامة إذا كان قلرب يخلص و يحصلك فى دخول جامعة فى مصر
ان شاء الله يرجع بالسلامة
و خللى بالك من نفسك كدا و من صحتك عشان عارفة الواحد لما بيبقى لوحده بيطنش نفسه شويتين و بيبقى عنده ميول تصعلكية قوية
خلى بالك على روحك
وتحياتى ليك و لكوكى

وزة القمرين
متحرمش منك
ولا من كلامك الحلو
و لا البوسات الكتيرة دى ...
أنا خايفة نتحسد بقى ...
حبى و قبلاتى

فاطيما
ايه الشجن اللى بتخلقيه جوايا ده كله
اسمعينى وصدقينى
محدش هيساعدك غيرك
مدى ايدك لنفسك وانتشليها
خليكى ايجابية ورتبى افكارك لابعد مدى
ايوه هتلاقى صعوبات كثير اوى
لحد متقدرى تغيرى حياتك للشكل اللى انتى عوزاه
بس فى النهاية هتغيريه


كل مرحلة من حياتنا هى عتبة سلم
لابد من اننا نخطيها عشان نكمل باقى المشوار
الشاطر بقا اللى ياخد باله
عتبة السلم دى سليمة ولا مكسوره

خلى بالك من نفسك
لانك حد حلو اوى من جوا


تحياتى حبيبتى

حسن يا فنان يا كبير
مش كدا و النبى ؟
لاقينى و لا تعكنن عليا
أما بخصوص كلام الجد فلا تظن يا حسن إنى بإيدى الحل أو على بعد مسافات منى و أنا اللى موش واعيله قوى ..
قد لا أتمكن من شرح التفاصيل أكتر بس أنا جربت أعمل زى ما أنت قلت كدا من 7 سنين بالفعل و عملت فيها شجيعة و هاخد حقى يعنى هاخده
عارف حصللى إيه؟؟
6 سنين من شبابى راحو و خسرت سمعتى و شغلى و فلوسى و شقتى اللى بابا سبهالى و كل محتوياتها من الابرة للصاروخ و..و..
كل دا موش مهم كأن حصلت حريقة وكل دا راح فيها المهم نفسى وإبنى لو جراله وفداه دا كله حتى البهدلة لى و لأهلى وافقت عليها
لكن توصل لحد يوسف كمان ؟؟
أنت متصور أن لو فى إيدى أنحت من عضمى زهر موش هعمل كدا
بس أنا إيدى مغلولة و لو مان ينفع كنت أقولك تعال مكانى خمس دقايق و بعدين إرجع مطرحك
و قولى هيكون رأيك إيه؟؟
و كمان إسملى لقيتله أغنية لأا دا انا موش قدك و غنوة قديمة لمحمد فؤاد دا نا كنت فاكرة انى الوحيدة اللى فى مصر عارفاها
يا عم مشكرين
أحرجتنى بأخلاقك
يا فنان يا كبير

rosa
خطوة عزيزة
و نورتى مطرحنا المتواضع انا و يوسف
طبعا كلامك صح ..
و أنا مستنية ربنا يفرجها من عنده
رامى الزهر المنتظر دا مجرد رمز يعنى أصلى كتير بحس ان لازم أسكت و أقعد أبص للسما و أقوله حالى يغنيك عن سؤالى
و أنا أصلى سألت كتير و كل اللى بيحبونى سألو برضو
عارفة صديق عزيز على قلبى قالى حاجة لطيفة قوى
ان الأزمات نوعين
مشكلة و معضلة
المشكلة تفكرى فيها لغاية ما تلاقى حل و تحليها لوحدك أو بمساعدة حد
المعضلة تفكرى فيها و ملهاش حل لا بيكى و لا بغيرك .. يبقى تسلميها لله و خلاص
و موضوع تربية الولد مع أبوه احسن ... أتمنى أن يكون أب على مستوى النعمة اللى ربنا بعتاهله بس كان من الاول يا روزا
هو الابوة بتتخلق كدا بين يوم و ليلة ؟
أرجو ذلك عشان مصلحة يوسف
تحياتى يا حبيبتى

قبلة الحياة
يا حبيبتى
متحرمش منك
إيه كل الكلام الحلو دا
و الدعوات اللى أحلى
بصى الزهر أو النرد زى ما دا اسمه بالفصحى لا فى إيدى و لا إيدك و لا حتى إيد والد يوسف
الموضوع كله بين إيدين الذى لا يغفل و لا ينام
و عندى أمل ان يوسف يرجع بمشيئته و أمره هو بس
عشان يبقى رجوع و نصرة
و أنا فى الإنتظار
مبسوطة بزيارتك قوى و ممتنة لشعورك الطيب
تحياتى الخالصة

نيرفانا
الكلام الكبير دا أنا موش قده
بصى انا نفسى و الله بس فيه حاجات بتحدن من حركتى
يعنى يمكن أقدر فى مرة أقولكم فى تدوينة قادمة التحديات المرتقبة ..إيه الكلام الكبير اللى أنا بقوله دا؟؟
يعنى بالبلدى هقول على اللى محجمنى أعمل اللى بتقولى عليه ..
أنا منتظرة فرصة شغل بشروط معينة
و بحاول أشتغل على نفى فعلا و المدونتين دول جزء كبير من التنفيس عن مشاعرى عشان ما يجراليش حاجة و أتعب اللى حواليا بيا ..ز
و فى إنتظار يوسف
شكرا على مرورك و دعمك الكبير
متقطعيش الزيارات بقى
و أنا بعملك شجن ؟؟
دا المدونة بتاعتك ماجستير فى الشجن يا نيرفانا ...
طب بس خدينا جنبك

لا حول ولا قوة الا بالله
انا مش قادرة افهم حاجة يا فاتيما
واضح ان المواضيع عندك مكلكعة خالص
ربنا يسهلك امورك
وتلاقى حد يرمى الزهر علشان انت ويوسف تخرجوا من اللعبة القميئة دى
ربنا يفرج همك يارب
تحياتى ليكى

زى ما فهمت الاجابه الاولانيه دنيتك انتى ويوسف ربنا معاكى يا رب

قريت بوست الشاكوش
الف سلامة عليكى يا فاتيما
وعلى فكرة اسمع ان اللى بيكتب بالشمال علامة على الذكاء
مامتى هى كمان شولة
بس عايزة اقولك حاجة تانى
انا كمان ساعات يحصلى حكاية التنميل فى ايدى دى ومعرفش اتحكم فى القلم
يااااااااااه
ده احساس زفت جدا
بس بصراحة عمرى ما فكرت فى حكاية انى اروح للدكتور دى
كنت فاكراها حاجة عادية وبتحصل للناس كلهم
مرة حصلتلى وانا بمتحن
ومعرفتش اكتب كلمة واحدة فى الامتحان
الف سلامة عليكى
بس انا مش معاكى انك تقطعى الروشتة كنت روحتى عملتى الاختبار علشان نطمن عليكى
يلا سلام
اختك خيخة

صباح معطر بالورد والياسمين

الدنيا لعبة جومانجى وايضا لعبة شطرنج لازم تبقى فاهمه كويس ومفكره فى كل خطوه تخطيها ومتنبئه بما سيحدث ومش ينفع نلعب من غير مانفكر ولكن لايمنع حذر من القدرو من المكتوب على الانسان
فهى خطا كتبت علينا ومن كتبت عليه خطا مشاها ....كما يقول الشاعر

يمكن مش بأيدك ترجعى عقارب الساعه او تصلحى فى اللى فات بس الاكيد ان الحاضر والمستقبل فى ايدك والانسان الذى يستحق صفه النجاح ليس الانسان الذى تمهدت له الظروف لينجح ولكن الانسان الذى اذا لم تمهد له الظروف خلق بنفسه الظروف التى تساعده على نجاحه

ليس فى يدكى ياعزيزتى غير ان تاقلمى نفسك على ظروفك الحاليه والرضاء بااختبار الله لكى فى الدنيا فلكل انسان منا اختبار فى الدنيا مع ...التفكير فى ايجاد حل لمشكلة حياتك ممكن يكون وسيلة تفاهم مع الصياد او الانسان سبب المشكله . احيانا... بنقع فى حفر ومشاكل مش عيب المهم نفكر جيدا بدون ان يدخل جونا الاحساس بالياس فى طريقه للخروج من الحفره او اللعبه

الامر فى يدك بعد الله سبحانه وتعالى وليس فى يد احد غيرك لكى تفكرى وتبذلى اقصى ماعندك من جهد وتقاتلى بدون انسحاب او يأس كيف تخرجى نفسك وتخرجى ابنك من اللعبه وصدقنى لست محتاجه
لحد كدا يكون صاحب كرامات
يرمى الزهر و يخرجك أنتى و يوسف
من لعبة جومانى

اسفه على تاخيرى فى زيارتك ولكن عندى ازمه فى الوقت دائمه فتقبلى عذرى


تحياتى
بوست ممتع وجميل
قلب بيحبك

fatima

اية اخبارك يارب تكونى كويسة

بصى دى اول مرة اعلق فيها على بوست انتى منزلاة بس مش اول مرة ازور المدونة

حاسة اقولك انا حاساها جدا

انا بحبك وبحترمك جداااااااا

دومت بكل الخير انتى ويوسف

نوراى

ربنا يخرجنا من الجومانجى كلنا على خير بس بجد اسلوبك روعه قوى وسهل ممتنع

فاطيماتاااا
دعواتي لكي دائما بصلاح الحال
وأن يجمع الله شملكما عن قريب
وبخصوص الفراغ
ولماذا لا تقدمين على دراسات حرة لشئ تحبينه ثم تعملي فيه اذا اتاحت لكي الفرصة

وبخصوص البيتين اللي كتبتهم
دول جم معايا كده وأول مرة أعرف ان فيه اعنية كده لمحمد فؤاد

تحياتي
حسن أرابيسك

يا سيدتى لست أدرى ماذا أقول ... كل ما اعرفه أنى الان اموت خجلاً منكِ .. فوجئت بالبوست الجميل عنى و عن العصفور الذى سافر .. والله أنا لا استحق كل هذا الكرم و التقدير و جميلك فوق الراس يا ست الكل و كده بتحطينى فى موقف حرج يعنى مش حأعرف أغطس تانى و الا شكلى حيبقى وحش قدامكم ... عموما كل التحايا لكِ و لكل من سأل عنى و لكل رواد مدونتك الجميلة اللى فى ازدياد و ربنا يخليكى لينا يا رب مجاملة و حنونة على طول .... وعلى فكرة انا وصيت النورس الابيض وبلغته رسالتك يمكن يقدر يطير بعيد لهناك ويبلغ يوسف السلام و يقوله ان عنده أعظم ام فى الدنيا و انها بتحبه و خلتنا احنا كمان نحبه رغم كل الوجع اللى فى كلامها عنه ... فاطمة العزيزة ... حملى نورسك الابيض كل أمانيك و دعيه يحلق الى هناك الى حيث يوسف الصغير .. أغمضى عينيك و ثقى أنكما ستلتقيان هناك ... على اطراف الحلم ...........
شكرا ايتها العزيزة وتقبلى كل التحايا و الامنيات الطيبة على الدوام

إنتي هتقوليلي عالدنيا؟

دائما دائما .. لا تأتي الرياح بما تشتهي السفن

كل الفرص بتيجي في الوقت اللي مش مناسب .. ولما الوقت بيكون مناسب .. بتضيع الفرص

وعجبي

بصى يا فاطمة انا اخدت ولادى من طليقى [اعجوبة برغم انى اتنازلت عن كل شئ عشانهم برضة تعبنى وحاول ياخهم هربت بيهم برة مصر وبالمشاكل رجعنى وبرضة مستسلمتش فضلت حاضناهم ورافضة انة ياخدهم انا والدتى عايشة وهو متزوج والحضانة من حقى بس يمكن ظروفنا مختلفة لكن اللى عاوزة اقولهولك ان طليقى حاول يخطفهم مرة ورحتلة بيتة واخدتهم من شقتة بفضيحة وهو مش موجود والنتية انة جة وكسرلى بيتى وشقتى الخاصة وضرب ابى وامى وحبستة يومين واتنازلت بسبب ابويا عن البلاغ وفالنهاية محدش قدر يبعدة الا بنتة بنتى وقفت قدامة وقالتلة انا عاوزة ماما مش هعيش معاك بحبك وهزورك وهبقى جنبك ع طول بس لو مش عاوزنى اكرهك سبنى مع امى طليقى مليونير وبهدلنى بس انا كنت اقوى بحبى لولادى وثقتى فأرتباطنا سوا
اوعى تفتكرى انة اخد ابنك منك ابنك طول ما بيحبك فحضنك وجنبك وفيوم هتلاقية هيرجعلك انتى بس اهتمى بنفسك وخليكى قوية وعلمى ابنك القوة والصلابة وخلية يستفيد من وجودة مع والدة بقدر استطاعتك انا مبقتش اخاف ان ولادى يروحوا لباباهم خلاص الارتباط بيننا بقى اقوى من الوقت والمسافات
وفالصيف بيسافروا بالشهور مارينا والغردقة معاة وبيننا تلفونات بس دايما ع ثقة بأنهم هيرجعوا
كلمة اخيرة خليها فودنك الحب بيكسر حواجز كتير ويحطم كل الاسوا والظلم زى مالة بداية لة نهاية ولعبة الجومانجى انتى اقوى منها وهتطلعى لوحدك منها بحبك لأبنك وهتفتكرى كلامى يوم ما تلاقى ابو ابنك دخل جوة اللعبة برجلية وبظلمة
انتى اقوى من كل اللعب انتى ام بقلب ام وحضن ام وحنان ام
تحياتى

انا عن خبرة عارفة انك ممكن تمرى بلحظات حزن كتيرة برغم كل السعادة والقوة اللى بتظهريها للى حواليكى
ع اية حال لو احتجتى لوجود شخص بجانبك انا موجودة نمرتى ممكن تاخديها لواحتجتيهااكتبيلى ايميلك وانا ابعتهالك
لو حسيتى بالوحدة بسبب بعدابنك اتصلى بية انا تحت امرك
انا متأكدة انى هقدر اساعدك
تحياتى

نوران الغالية
موش قادرة تفهمى ؟
احسن يا بنتى أحسنلك متفهميش أصل الموضوع كبير قوى و متشابك
و كلمة مكلكعة دى كلمة خيخةو أى كلام بالمقارنة للواقع الفعلى
تحياتى و يسمع منك ربنا

آبى الجميلة
إنتى صح يا حبيبتى و لو حبيت أوصف حال مصر بقى و لا ميت لعبة جومانجى فى بعض يوصفو حالها
و البقاء لله فى عم محمد يا حبيبتى
ربنا يجعلها آخر أحزانك
تحياتى الخالصة

نوران الغلية
بصى أنا من ساعة ما وعيت ع الدنيا و انا بسمع المعلومة دى
لكن فى الواقع مفيش أى دلالة على ذلك
تقدرى تعتبرنى شواذ القاعدة
كان بودى أقولك أيوه بس الكدب ملوش رجلين
و الموقف بتاع الامتحان بتاععك دا صعب قوى ..عشان كدا كنت عاوزة أتجنب مواقف مشابهة بس لو لقيت الحالة بتتأخر هروح لواحد تانى بقى و أمرى للهو هبقى أطمنكوا برضو
بوسة كبيرةليكى و لشيكو

نبضات
عرافتى الجميلة
وحشنى صباحاتك المعطرة يا حبيبتى
إنتى فين مستخبية ؟؟
حكاية الشطرنج دى صعبة قوى عليا يا نبضات دى لعبة ذكاء صرف...
و أنا بحاول اهو ميأسش عشان خاطر يوسف و عشان خاطر الناس اللى بيحبونى ميروحش كل تعبهم عشانى على الفاضى
أوعدك أنى أحاول دايما و لا أيأس
تحياتى ليكى يا عرافتى
قلب بيحبك أكتر

نوراى
خطوة عزيزة
حبك و إحترامك دول يعنولى الكثير و لا تعلمين كيف
موش لازم تعلقى الا لما تحسى ان عندك كلام عاوزة تقوليهفعلا ...أنا على البعد بحس بحبايبى و مهما يغيبوا و لما يرجعو كلمة منهم تكفينى فمتقلقيش من الموضوع دا خالص
ربنا يسمع من قلوبكو الحلوة دى
و سيادتك مأجزة من التدوين ليه بقى يا فندم ؟؟
تحياتى العطرة

رئيس جمهورية نفسى
نورت مكاننا المتواضع يا سيادة الريس
و أسلوبى روعة؟؟
يكرمك ربنا إحنا موش قدك يا عم
ربنا يخرج كل مظلوم من لعبة جومانجى على خير و يسمع منك ربنا
نورت بجد يا ريس
تحياتى الخالصة

حسن يا فنان يا كبير
معلش دوشتك بتفاصيل كتير كئيبة
و حكاية الدراسات الحرة دى ممكنة بس تنصحنى بإيه؟؟
أصلى بصيت فى إعلانات الوسيط و رحت لشركة بتدرب على الصناعات الصغيرة المنزلية و خدت كورس بفلوس طبعا إزاى أعمل براويز و دفعت تمن خامات وبعد حسابات إكتشفت إنى هدفع من جيبى فلوس كمان و يمكن صاحبة الشركة ميعجبهاش الشغل و تقولى لأ...
فقررت أرجع عن الحكاية
لو عندك إقتراحات يبقى تكسب فى أختك ثواب
لأان دراسات عليا فى تخصص هتكلفنى حتير و أنا عاوزة عمل يكسبنى فلوس بدل ما أنا قاعدة أصرف و بس
و يا فاطيماتا يا عيون المها دى غنوة لمحمد فؤاد من سنة 88 كدا كانت أختك فى تانية ثانوى و تلاقيك كنت فى أبتدائى فموش هتفتكرها قوى
تحياتى يا فنان

حاااازم
يا فندم دا أقل واجب نعمله
إحنا فديك الساعة لما العصفور يرجع بعد الغيبة الطويلة دى
دا المفروض كنا نجيب زفة حسبالله على لينك المدونة بتاعتك و نديها لغاية الفجر
بس قولنا مفيش داعى نزعج المدونات اللى جنبينا الجيرة ليها أصول
و من الأصول لما يغيب عنك جارك العزيز تفضل تشقر عليه لحد ما يرجع بيته بالسلامة
و صحيح وصيت النورس؟؟
طيب أنا معتمدة عليه بقى إياك يصدق معايا
تحياتى ليك يا أبو قلب دهب

عم مراكبى
يا نبع الحكمة
موش كدا و النبى
دايما الحاجة تيجى بعد فوات الوقت
و يبقى فرحتها ناقصة و طعمها ماسخ و لونها باهت
و نقعد نعصر لمون بالكوم عشان نضحك على روحن و نقبلها و نتخيل إنها جت فى معادها برضو متأخرتش قوى قوى ..
يعنى جت قبل ما نموت على الاقل و أهو أحسن من مفيش ...
دا جومانجى تتوارى خجلا أما الدنيا
تحياتى يا نبع الحكمة الصرف

كلاكيت تانى و تانى
أولا مها وصفتلك أنا فرحانة بيكى قد إيه موش هتصدقى
ثانيا أنتى لقية و جاتنى من السما ...
ثالثا ... كلامك لن أزيد عليه فأنتى أدرى منى بكل حاجة لأنك دخلتى اللعبة دى قبل كدا بس الحمدلله خرجتى بسلام
عارفة بتدينى بكلامك و تجربتك طاقة نور كبيرة فى آخر النفق
ماما و كل الناس الكبار فى عليتنا بيعقدوا يقولوى كلام مشابه ...إن يوسف بكرة لما يكلر و رجليه تشيله هتلاقيه بيخبط على بابك و يجيلك و أبوه موش هيقدر ساعتها يمنعه عنك و لا العفاريت الزرق حتى
كان كلام نظرى بس إنتى إديتنيى أمل أنه ممكن يحصل بجد و لو أنى هنتظر برضو ...
أنتى أم و عارفة تفكير الواحدة بيبقلى أزاى ... بياكل إيه بيشرب إيه بيعاملوه كويس ولا لأ ..بينام مرتاح و لا حد بيضايقه..
كل لقمة تحطيها فى بقك تفكرى بياكل زيها دلوقتى و لا محروم ..كدا
المدونة دى جزء من الهروب من الوحدة و الحمدلله هى وسيلة هايلة للتعرف على قلوب شفافة و واعية و بتساعد بقلب
مونتك جميلة قوى و لن تنقطع زياراتى و لا تواصلنا معا ان شاء الله تحياتى لقلبك الكبير و لكتاكيتك الحلوين

انتى مش محتاجة حد يخرجك يا فاتيما
انتى محتاجة قوة ارادة وشوية عزم
وانا شايفة ان املك فى ربنا كبير
وده فى حد ذاته جميل
لانه بنفسه قال انا عند ظن عبدى بى
باذن الله خير
تحياتى

انا مش عارفة اقول لك ايه.. بس كان لازم اسيب اي حاجة تدل على مؤازرتي وعلى الحضن الكبير الي عايزة اديه لك وعلى الحضن اللي اموت واشوف يوسف راجع يعطيه لك انا ابكي وانا اكتب اصلي مش متخيلة ان ابعد عن اولادي او ان حد اي حد ممكن يحرمني منهم والله انا اشفق علي حزنك والمك بس عايزة برضه اقول لك كلام مشجع مش لاقيه اصل الشجاعة نفسها هي اللي عملتيه كتبتي وعبرتي ودا لعلمك تاريخ اكيد يوسف لما يدخل يوم على النت ولو صدفة ويقرا كل الحب ده والالم دا والحنين دا ده لو بيكرهك هيلين.. فكري في بكرة وبكرة لكي ان شاء الله !!
لسه عايزة اتونس بيكي واونسك يا ريت اقدر اعمل حاجة يا ريت للحب قوة زي الكره والاختلافات بس مش عارفة ليه انا متأكدة ان بكرة ليكي مش ممكن ان ربنا يضيعك او يكسفك انا دايما باقول لنور ابني ان ربنا يحبه اكتر مني انا وقريت مرة اننا "عيال الله" وانه ارحم بينا من امهاتنا اللي ولدونا.. اما عن اللعبة جومانجي انا اعتقد ان الارادة تسبق الحظ او الصدفة وان لله عباد يختبرهم .زخليكي مع ربنا ونصره قريب والله قريب!!!
Zeyanour

انا مش فاهمة حاجة فقصتك لأن انتى لو حتى هو اخد الحضانة من حقك الرؤية وانا لو تحبى اخلى المحامى بتاعى يرفعها هنا عندنا اعملك محل سكن هنا واشحططهولك وابنك هتشوفية غصب عنة
اسمعى القوة مش كلام الفعل والقدرة انك تكونى اقوى من ظالمك هى دى القوة الحقيقية
وانا عند وعدى لو احتجتينى تأكدى انى مش هخذلك دون اى مقابل ولا حتى اهتمام بأتخنها تخين
عشان بس ربنا اعلى من الكل وانا دايما بستمد ثقتى منة

نسيت اقول لك قد ايه مدونتك جميلة ودافئة وفيها الكثير من الحلم والانكسار والحنين والكثير الكثير من الحب اللي بجد الحب اللي تعرض للاختبار وصمد وكبر..
تحياتي لك
Zeyanour

تحياتى ليوسف
ولمامته اووووووووووووووووووووي

اما عن الدنيا
هي لعبة
بس هى اللى بتلعبنا مش احنااللى بنلعبها

تحياتى
يا اجمل ام

كريم بهي

قطتى الحلوة
يا حبيبتى قوليلى انتى جايبة الدماغ الحلوة دى منين
إزاى بتعرفى تبقى مصحصحة و مشغلة ذكاءك و فى نفس الوقت رومانسية و تدوبى من الهوا كدا ؟؟
دى ملكة موش عند ناس كتير
و فراستك فى محلها بالظبط
أنا عندى أمل فى ربنا كبير عشان جربت عباده كتير
نصهم خذلنى و النص التانى مفيش فى إيده حيلة و لو فيه حيلة هيكون تمنها غالى قوى على الجميع
ربنا مفيش أحسن منه
و لا اكبر منه
و فين الاموااا بتاعتى ؟؟

zeyanour
خطوة عزيزة و نورتى المطرح كله
بصى أنا موش عارفة من إسمك غير نصه التانى اللى جاى من نور إبنك ربنا يفرحك بيه دايما ..ز
و عايزة أقولك بتحرجينى بمشاعرك الجميلة و بتطبطبى على قلبى أكتر ما تتصورى و تتخيلى تاثير دا عليا شكله أزاى
ماما برضو بتقولى نفس كلامك ..بتقولى يا بنتى دا أبوه موش معقول هيبهدله ..و بعدين ربنا قسم كدا و هو يحرسه
هنروح بعيد ليه يا مامت نور ..
طب ما سيدنا يوسف اللى مسمية أبنى على أسمه - معرفش حنت بقرى الغيب و لا إيه؟- بعد عن أحن قلب عليه و هو صغير و شاف أهوال ... معنى كدا ان ربنا مكنش بيحرس؟؟
أومال مين اللى بقى سيد مصر كلها بعد كدا ...
ربنا كريم
أنا بس اللى طمعانة حبتين فى كرمه .ز
و مستعجلة تلات حبات
تحياتى ليكى و لنور

كلاكيت تانى و تانى
نرمين العزيزة
بصى متحيرش نفسك ..
أنا موش متجوزة و من حقى الحضانة
و امى موجودة و من حقها الحضانة
و حتى و هى موش معان من حقى أشوفه
و من حقى نفقة و مؤخر و تعويض عن القايمة اللى سرقت
و..ز
و...
من حقى حاجات كتير قعدت سنين أجرى وراها موش عشان اخدها ..لأ عشان أساوم بيها على حريتى و سلامتى أنا و إبنى و أهلى
بس كل المحاولات أتقلبت بغم و مشاكل
أنا عندى جيش محامين و.. هو طليقى إخواته الجوز محامين من تحت السلم
و تفاصيل كتير موش هاوجع دماغك بيها ..
بس انا حاولت و الله
و دعوتك لمساعدتى على رأسى من فوق
بس ساعات الواحد بيظطر يرفض المساعدة عشان الضرر الناتج عنها أكبر من نفعها
يا ترى فاهمنى
بس ربنا كبير و أنا منتظرة المحامى الأعظم اللى هياخدلى حقى و محدش هيجرؤ يعمل حاجة من بعده
متحرمش منك و من ذوقك و حنيتك

كريم يا أبهى من البهاء ذاته
بص إحنا بس نلعب فى الأول و لا كأن فيه حاجة
فجأة تنقلب الحكاية عليك و تلاقى الدوامة شدتك
و اللى يعرف يخرج منها يبقى خير و نعمة من ربنا
تحياتى يا عزيزى

عزيزتي فاتيما
اشكرك على ردك الجميل.. اللي اسرني واتأسف لكي اي لم اقدم نفسي كما ينبغي انا عندي نور وزياد وباحب امضي باسم مركب منهم هما الاتنين ممكن تقولي يا ام نور وخلاص وعلى فكرة انا دخلت كذا مرة وكل مرة اتخاذل وبابقى مش عارفة اقول ايه.. وبعدين قلت انه ما ينفعش اظل سلبية لو كل واحد طبطب مرة واحدة بس على جرحك ممكن تلاقي السلوى العزيزة والصعبة .. سيبك انتي انت اجدع ميت مرة مننا متحملة وصابرة وعلى فكرة كمان اطمعي كتير في كرم ربنا واتعشمي لانه تعالى يحب ان يطمع عبده واتحايلي كتير عليه وتاكدي جدا ان فرجه قريب عارفة لما تتاكدي 100 في الميه ان فرجه قريب والله وعزة جلال الله هيفرجها اصله عند حسن ظن عبده بيه!!
بس مدونتك حلوة ومليانة ورود رغم الالم اهنئك عليها
انا كمان لي مدونة صغيرة كده تشرفيني لو عديتي مرة ولقيتي فيها سلوى او ابتسامة يا رب اقدر ارسمها على شفايفك
مدونتي اهيه:
www.nourzeyad.arwp.net
تحيــــــــــــاتي وقبلاتـــي يا ام يوسف
زيانور

فاطيماتااا
حرام انك بداتي خطوات مهمة وخسارة انك تخليتي عن فكرة قطعتي فيها مشوار صحيح كنتي بتغرمي من جيبك لكن أكيد كله كان هايعود عليكي ناس كتير اتعلمت انتاج منتج معين وخدت قرض وابتدات حتى بورشة صغيرة وكبرت بعد كده
بصراحة حرام اكيد اخترتي حاجه حبيتي تتعلميها وعندك رغبة فيها
وبخصوص الأغنية دي لمحمد فؤاد انا عارفها انا افتكرت اغنية الشواكيش
وبعدين توليلي كنت في ابتدائي الله يسامحك ده أنا أكبر منك
سنه 88 دي سنة ماانسهاش في حياتي اشتريت فيها سيارة جديدة من الوكالة وفي نفس السنة دي جالي دعوة تذكرتين لليابان مع الإقامة لمدة اسبوع مجاني وزيارتي لنفس المصنع اللي انتج سيارتي وقتها..قصة طويلة
المهم فكري في المشروع تاني اي مشروع بيتعمل في الدنيا بيحط قدامه في دراسته للموضوع ان هناك فترة في الأول الربح فيها غير وارد

تعرفي أنا سمعت في اذاعة البي بي سي لقاء مع مواطنة مصرية كانت لاتجيد شئ مثلما تجيد عمل الكنافة بانواعها وعملت فكرة جميلة قوي وعملت دعايه لها على النت وفي الجرائد أيضا وبالفعل انهالت عليها الطلبات ولقت شهرة وكانت كمان ساعات بتوصل بنفسها الطلبات للمنازل وهي شهادة جامعية ومتزوجة وربة منزل وساكنه في مصر الجديدة، الحقيقة كانت محل تقدير واعجاب شديد مني ومن أخرين
حاولي تاني وهافكر لك برضه
تحياتي

يا مامت نور و زياد
ربنا يحرسهم و يفرحك بيهم
أنا اللى سعيدة بيكى ... و تأكدى إنى هتابع مدونتك أنشاء الله ... تعرفى حوراتك مع الولاد يتفكرنى بنفس المحادثات اللى كانت بينى و بين يوسف
هى العيال كلها طعمة زى بعض ولا إيه؟
نورتى المكان و الزمان و القلب

حسن ارابيسك
يا فنان يا كبير
يا حسن أنا لم أتخلى عن الموضوع ... أنا بس حسبت التكلفة و الخامات و الألوان و المواصلات ..ألخ لقيتنى هبقى خسرانة موش حتى بغطى التكلفة...
تخليت عن الفكرة مؤقتا لغاية ما الاقى منفذ آخر مناسب ..ز
و بينى و بينك ... بحن لمجالى ... الكتب و المكتبات و القراية ..أصل دا داء متأصل لا يمحوه الأ الموت
ربنا يكرم ان شاء الله و بدور فى اتجاهات تانية برضو
و بخصوص السن
يا عم حقك علينا مغلطناش قوى يعنى
دا انت المفروض تنبسط انى إفتكرتك صغير ..كان تقدير جزافى من الصورة الموجودة على مدونتك
أصل الرجالة ما بيبنش عليها ..انا موش حسد و لا حاجة دا قر ...
صغرتك شويتين ... موش كتر خيرى يعنى
طب أنا نفسى حد يعملها معايا ..
شكرا على إهتمامك الكبير
اخجلتمونا والله
يا فنان يا كبير

عمال اجرى انا فى البوستات

مش عارف ليه جت كدة فى بالى مرة واحدة

اشوف البوستات القديمة

مش عارف

جميل قوى البوست يا فاتيما

و يارب يبعد عنكم الصياد و الوحوش الضارية

و تطلعوا بسرعة من اللعبة اللى أصعب من جومنجى دى

(:
بس فاكرتينى بجد دة انا و اخواتى مدمنين افلام روبن وليامز

فاكرة الفيلم كان طالع فيه بدور ثانوى

كان طالع دكتور روسى للولادة و الأطفال بجد فيلم جميل جدا بس مش فاكر الأسم

فى اخر الفيلم جابوا صور الممثلين كلهم هما و اطفال صورة روبن وليامز
كان زى القمر

(:

رغاى انا عارف

معلش (:

يلا سلام للبوست اللى عليه الدور (:

(:

إرسال تعليق