.

.

هـدهـود موش هيقول  

Posted by: فاتيما in


المشهد نهار خارجى
يوسف و مامته يخرجون من البوابة الرئسية للعمارة
مارين بالحديقة متوجهين للشارع الاسفلتى
- ماما بصى
- فين ؟
- هناك ... الحمامة دى هناك اللى شكلها غريب
- يا حبيبى دى موش حمامة دا أسمه هدهد يا بابا
- هدهد !!
- أيوه ... دا نوع من الطيور ... شوف شكله جميل إزاى و الريش فوق راسه عامل زى التاج... بص
- آه ... تعالى ناخده معانا نحطه مع سوسو و فوفو
يقصد العصفورين الكناريا الذى يربيهم
- لأ مينفعش دا طائر بيعيش فى الخلا يعنى لو حطيته فى قفص يموت
- إشمعنى عصافيرنا مبتموتش؟
- عشان هما متعودين من صغرهم على كدا ... انما الهدهد طائر مميز و...
معاندا و عازما على الإمساك به
- لأ أنا هروح امسكه و أقنعه يعيش مع سوسو و فوفو
يجرى وراءه و كلما إقترب منه يطير و يحط على بعد
- تعال يا يوسف موش هتعرف تمسكه ...
أصيح عليه من بعيد فيأتى يائسا
- خلاص طظ فيه ... موش عايزه...
بعصبية و ضيق
- يا حبيبى متزعلش ... أصل الهدهد دا موش طير عادى دا حكاية كبيرة قوى
- حكاية إيه؟؟
بفضول يصارع الغضب و يحاول إسكاته
- أنت عارف انو جد جد جد جده .... كان شخصية مهمة فى جيش الملك سليمان ... تعرفه؟
- أيوه موش اللى كان بيكلم الحيوانات... عارفه ؟؟
- أيوه تمام ... و كان كمان عنده جيش كبير من الحيوانات و الطيور ...و عارف مين بقى كان ريسهم ؟؟
- الهدهد ؟؟
- أيوه كان بيعمل حاجة إسمها الايام دى إستخبارات عسكرية
يعنى يروح فى الإستخوبث كدا يشوف الاعداء بيعملوا إيه
و يرجع يبلغ سيدنا سليمان فيستعدو لمواجهة الاعداء و يسبقوهم ...
مندهشا من هذا الكائن الدقيق
- بس دا صغنونة قوى... الحيوانات المفترسة إزاى ما كلتوش ؟؟
- لأ ما هم بيسمعو كلام سيدنا سليمان و هو قال الهدهد ريسهم يبقوا يسمعوا كلامه
و بعدين الحكاية بالذكاء موش بالمقاسات يا سى بعجر
- طب ما فيه حيوانات تانية ذكية برضو ...
- ما هو ربنا يا حبيبى بيعلمنا إن الواحد ممكن يكون جسمه قليل بس يكون أفيد و أذكى ...
- طب ليه موش عاوز يخلينى أمسكه ... هطبطب عليه و بعدين أسيبه
محاولة لألهائه عن مسعاه
- بص بيعمل إيه...
ينظر إليه بدهشة متسأئلا
- دا عمال بيحفرفى الطينة ...هو عاوز يعمل تواليت ؟؟
- لأ .... دا بيدور على دود و حشرات يروح بيها لبيته ...
أصله عنده ولاد فى البيت دلوقتى ولازم يرجع يأكلهم و يقعد معاهم
صمت ... و سؤال مباغت
- ماما ... هو بابا بيحبنى ؟؟
- طبعا ... ليه بتسأل السؤال دا؟
- أومال موش بيقعد معايا زى الهدهد دا ما بيعمل ليه؟؟
بإنزعاج مفتعل
- أخص عليك يا يوسف ... كدا تقول الكلام دا على بابا ... أعتذرله فورا والملايكة هتوصل الأعتذار حالا ...
ينظر أمامه ... محدثا الفراغ
- خلاص ... سورى
بعتاب مصطنع كأننى أقول الحقيقة .... و سامحنى يا رب
- يعنى هدهود دا بيطير لمسافة قريبة و يرجع للعش تانى
لكن بابا بيطير لبلد تانية بعيييييدة خالص و يشتغل و يتعب عشان يبعتلك فلوس نجيب بيها كل اللى عاوزينه ....
بابا بيتعب عشانك و بيحبك بس بطريقة مختلفة شوية ... تقوم تقول عليه بعد كل التعب دا مبيحبكش ؟؟!
محدثا الهواء كأن فيه أحد
- خلاص خلاص آسف يا بابا ....
يسأل محاولا تغيير الموضوع و رفع الحرج ...
- إنتى سميته هدهود ؟
- آه ...إيه رآيك ... أسم حلو؟؟
بتسليم
- يعنى .... شغال
- طب يللا قوله باىباى .... عشان المينى باص جاى
يلوح من بعيد و يودعه قائلا
- باىباى يا هدهود ...باىباى ... أشوفك بكرة هه.... باى
أنظر للطائر
نظرة
ترجوه الأ يذيع النبا
و الا يبلغ ... يوسف ما هى الحقيقة
و أعده أنى سأحفظ له الجميل ما حييت
من على سلم الباص
القى عليه نظرة أخيرة فاحصة
الهدهد بخطوات رشيقة و بكل خيلاء
ينبئنى بإنه
سيحفظ السر
و يمضى فى إستكمال الحفر بهمة
لإنهاء المهمة المقدسة
قطع

This entry was posted on الاثنين, مارس 10, 2008 and is filed under . You can leave a response and follow any responses to this entry through the .

51 كــــلام بيطــبطـــب عـــلى قــــلبى و روحــــى

جميلة قوى يا ماما الحوار ده
ويوسف زي العسل وواضح طبعا عليه اللماضة زي ناس
:)
ربنا يخليه ليكى ويرجعهولك بالسلامه يارب

الله...ختام أكثر من رائع،كم من أسرار نحفظها عنهم كي لا تخدش براءة أرواحهم،ربنا يحفظهولك يارب ويباركلك فيه

جميل جدا الحوار ده

حلو قوي قوي اسلوبك التربوي في التعامل مع يوسف

ربنا يخليه لك ويبارك لك فيه هو ووالده يارب

الظاهر ان رجلي هتاخد ع المطرح ماليش دعوة انتي اللي قلتي!! واسلوبك جميل والقصة معبرة.. ربنا يلم شملكم على بعض انا مش هزهق من الدعاء لحد ما تيجي في يوم وتبشريني ان يوسف خلاص رجع ومفيش اقرب من الايام واحنا معاكي نعضدك ونساندك ونحب المك ونقبلك يا ام يوسف...
زيانور

السلام عليكم
بمناسبة الهدهد و الجوابات
جئتك من منتدى اسرار اون لاين بنبأ عظيم ..
ليس نبأ بالمعني المعروف و انما دعوة لزيارة المنتدى و المشاركة فيه
في شخص في المنتدى ده .. شخص بعينه .. هيسعده انه يشوفك هنك
تعالي زورينا و اعرفيه بنفسك

اتفضلي الرابط يالي اسمك عند الشخص ده غالي اوي :D

http://asraronline.com/vb/

سلام

انا حبيتك وحبيت يوسف جداااا

تحيااااااتى ليكى ولمدونتك الرائعة

السلام عليكم ورحمة الله وبركاته


ماشاءالله اسلوب رائع في التربيه والتعليم بطريقه مبسطه

وكمان عجبني اوي انك مابتحاوليش تكرهي الولد في باباه ، بجد جزاكِ الله خير ، واكيد هو لما يكبر ويفهم هايعرف اد ايه انت كنت بتحبيه وحاولتي علي اد ما تقدري تطلعي شخصيه سويه ماعندهاش عقد


ربنا يخليلك يوسف ويطمن قلبك عليه

تحياتي

كل اللى لاحظته من الحوار هو ذكاء يوسف
ما شاء الله ربنا يحفظه

أحزان وراء أحزان تترى
إيثار و تضحية و نكران ذات
إخلاص فى التربية و تجميل لصورة أب
حتى لو بالكذب ..أنصحك تزورى بورسعيد أو الأسكندرية و تجلسين على رمال الشاطئ حتى الغروب ..وحدك بدون أى ذكريات تأملى البحر العظيم و إنكسار ضوء الشمس فى الغروب سوف تشعرين ببعض الراحة مما أنتى فيه ..و أدعو الله أن يقر عينك برؤية يوسف الحبيب..
سيدتى كلماتك تمزق القلب أرحمى نفسك سيدتى..
أبو خالد

عجبني الربط السريع بين الهدهد اللي في الشارع ده و قصة سيدنا سليمان

و تساءلت
هو أنا اما أكون أم عقلي حايكون مستعد بسرعة كده لخلق حوار و ربط الاحداث بالشكل المفيد و التلقائي ده؟؟

عاوزة أسأل هو يوسف بيحب القطط كمان
أصله ربط الحفر بالتواليت و ده عند القطط بس!!
:)

لماضة يا طعامة
بصى يا مرمر من ناحية اللماضة أنتى و هو متتوصوش و ربنا يخليكو ليا
على فكرة هدهود دا بجد موش خيال و كل ما كنا نخرج نلاقيه بيدور على الأكل ... و نقعد نسلم عليه من بعيد لبعيد
تحياتى يا حبيبتى
و بوسة كبيرة على خدك

كاميليا
نورتى المطرح كله ...
و الله حاولت على قد ما أقدر
بس دلوقتى هو فى المعسكر المعادى ... و زمانهم بوظوا كل اللى عملته
بس خلاص هعمل إيه بقى نصيب
مبسوطة بيكى
و يبارك فيكى إنتى كمان
تحيات عطرة

بيللا
أسعد كثيرا بالزيارات الأولى دى
انتى اللى جميلة و ربنا يسمع منك و لو إن والده فى أحيان كثيرة يبدو كمن ولد بغير قلب و زى شيرين ما بتغنى
.. قلبك دا إيه؟؟
بيدق بس عشان يعيش
ربنا يهديه
عشان يوسف بس
تحياتى يا بيلا

زيانور
يا ستى المطرح مطرحك
و تعالى طول الوقت دانتى مونسانى و واخدة بحسى أهو
دا كفاية الدعا الحلو اللى طالع من قلبك الطيب
دا عندى معناه كبير قوى
و انتى منورانى قوى قوى
سلامى لنور و زياد
تحياتى

أمين سر
ميدو يا ندل
أنا زعلانة منك
كدا تقفل باب لمدونة فى وش أختك الكبيرة
طب إعمل خاطر للأسم اللى بتقول غالى عليك
بلاش إعمل خاطر ليوسف حتى
عموما أنا بحاول أدخل لتفاصيل المدونة الجديدة و لم انجح حتى الآن لكن هكرر المحاولات و أعلق طبعا و لو انك لسه مزعلنى
لكن ماشى
مبروك على المدونة الجديدة و اللقب الجديد يا سى أمين
تحياتى ليك

مروة الزارع
أنتى من الناس المهمة فى عالم المدونات و الواحد بيعملك حساب كبير
أشكرك على رآيك فى مكان يوسف روح قلب ماما ...
أتمنى أن تدوم المحبة بينا دايما
تحياتى الخالصة

خمسة فضفضة
يا أحلى صيدلانية فى المحروسة
يا رب يخليكى و كل مرة أنسى أرد التحية
و عليكم السلام و رحمة الله و بركاته
معلشى بقى ...خليها بأثر رجعى لكل تعليقاتك الجميلة السابقة
و حكاية تزييف الواقع للحفاظ على نفسية الولد ... فدا كان همى الوحيد مكنتش عايزاه يدخل المرسة يلاقى أصحابه بيتكلموا عن أباهتهم كويس و هو اللى باباه وحش ...و كمان موش عاوزه يكبر و قلبه أسود ... كنت دايما أقوله بابا بيحبنا بس عليه طغوط من أخواته و طمعهم بس هو بيحبك و إحنا الاتنين بنتخانق عليك من حبنا فيك موش لحاجة تانية
بس تفتكرى يا فضفضة لما يكبر و يعرف كل الحقايق هيصدقنى بعد كدا و لا يقول الست دى ما كانت طول عمرها بتكدب عليا
خاصة و انو دلوقتى هناك مع أهل أبوه و زمانهم بيسمعوه احلى أحلى كلام عنى ؟؟؟
خايفة يصدقهم ..
بس ربنا كبير
الحاجات دى كتير على طفل برىء فى سنه
بس أرجع و أفتكر سيدنا يوسف ...
و أكسف من نفسى
تحياتى يا حبيبتى

قطة الصحراء
قطتى الحلوة
بصى يا قطقوطة من ناحية الذكاء فهو واخد ذكاء أبوه ... بس أرجو لما يكبر يستخدم الذكاء دا فى الخير موش فى الشر
كان بيفاجئنى بتعليقاته و أفكاره و كأنى مع راجل بجد يعتمد عليه ...
وحشنى قوى
و كالعادة دقيقة الملاحظة يا قطة و متحرمش منك
أمواااا جامدة ليكى

أبو خالد
بلاش البحر عشان أنا عكس الناس التانية كلها ...
البحر بيثير أشجانى و ياخدنى مع الافكار الحزينة أكتر ...
بهرب من البحر لأنى بحبه قوى ..
و متسألنيش إزاى تهربى من الحب عشان دى قصة حياتى أو زى ما الأمريكان ما بيقولو
the story of my life
و الحاجات دى لازم تتعمل
أومال الأمومة دى اللى هى نعمة و منحة عظيمة من ربنا نحافظ عليها إزاى
أنا طول الوقت أفكر فى يوسف قبل أى تصرف ... موش عاوزة لما يكبر تصرفاتى تخدشه و تحسسه بالخجل منى ... عاوزة إحترامه و حبه و دا لازم يحصل لما أديله انا الأول حبى و احترامى
و ساعتها أستنى المعاملة تكون بالمثل
و لو إنى برضو هفضل مديونة له
تحياتى ليك و لأهل بورسعيد الحلوين

هنوده يا قمراية إسكندرانية
يا حبيبتى أصلى من عشاق أحمد بهجت و له كتاب عن الحيوان فى القرآن ...و لو قريتيه تلاقى الكاتب بيتكلم بلسان حال الحيوانات المذكورة فى القرآن ...
و منهم الهدهد و عشان كدا لما شوفته أنا و يوسف قفز فى ذهنى توصيف أحمد بهجت ...و باقى الحيوانات الآخرى برضو ..
زى ما حاليا يقفز فى ذهنى المظلوم الأعظم
ذئب بنى يعقوب المسكين ...لأنى عارفة الذئاب الحقيقة اللى ألصقت فيه التهمة زورا
و قطط بس يا هنودة؟؟؟
سعادتك إحنا عيلة تخصص قطط سيامى و رومى من واناعندى 7 سنين و الحمدلله زرعت الحكاية دى فى يوسف
و كمان جبتله عصافير قبل موضوع إنفلونزا الطيور ما توصل مصر و بعدين مشيناهم...
دا غير هدهود
و الفراشات اللى فى الجناين اللى بيسابقها و أقوله دى جاية تصبح عليك و تمشى ..
و حبه للكلاب اللى ماشية فى الشارع
و السلاحف بس أنا قولت لأ عشان القطة
أصل إحنا كنا عايشين فى فراغ شاسع و الحيوانات كانت متنفس
و خاصا القطط كانت بتلعب معاه و تونس وحدته
ملاحظ ذكية يا هنودة
إنتى كمان كييفة قطط؟؟
تحياتى يا حبيبتى

مساء الخير يا ام يوسف اخبارك ايه

ما شاء الله ولاحول ولا قوة الا بالله

ربنا يبارك لك فيه يارب بحب اووووووي اسئله الاطفال بموت فيهم بحس انها اسئله زكيه واكبر من سنهم وتحسي بمتعه وانتي بتكلميهم واسأل مجرب ...

بطوط كان ايه السر اللي بينك وبين الهدهد وانا اوعدك اني اكون هدهود نمرة 2 ومش هقول لحد وهكمل حفر بس قولي لي بليييييييييييييز

ربنا يارب يكرمك ويفرحك بيوسف ويجعله ذريه صالحه ليكي باذن الله

تمنياتي لك بالسعاده والخير

تحياتي

قبلة الحياة
مشكرين يا ستى على رأيك فى يوسف
و السر اللى هدهود كاتمه ؟؟؟
لااااااا
دانتى لازم تقرى المدونة من أولها علشان تعرفى السر اللى كنت مخبياه عنه
أصل الموضوع كبير قوى قوى
خلاص موش هتعبك يا ستى كل الحكاية إنباباه لا كان مسافر و لا كان بيبعت فلوس و لا كان بيهتم خالص ..بالعكس هو السبب فى سفرنا بعيدا عن العالم كله لمدة 6 سنوات عجاف
بس خلاص
تحياتى ليكى

بسم الله ماشاء الله عليه وعليكي
تصدقي وتؤمني بالله
لا اله الا الله
محمد رسول الله
انا كل ما باجي هنا باحب يوسف اكتر
وباتمنى اني بجد بجد اتعرف عليه وعليكي والله

ربنا يارب يباركلك فيه ويكون نعم الابن لنعم الام


ملحوظه
ايه بقى حقوق النشر والحوارات المكتوبه تحت دي .. هو احنا مش في مقام اخواتك برضه ويوسف ده بان اختنا .. يبقى اللي يخصو يخصنا
ولا في كلام تاني؟؟؟؟؟؟





سلامووووووووووووز

سوووووو
يا واد بتوحشنى تعليقاتك قوى
و يارب مشوار خيخة أنفع أروحه و مفيش حاجة تمنعنى عشان أشوف ناس كتير بحبها و إنت من أوائلهم يا سوووو
و انا متاكدة ان يوسف لما يعرفك هيحبك قوى برضو و هعقد أقراله مذكرات واد جميل إسمه سووو عشان يطلع بيحب الادب الساخر اللى بيخلينا كلنا نستحمل أوجاع الدنيا و نضحك على نفسنا بدل ما هى تضحك علينا
و حكاية الحقوق و الحورات دى ..... سيادتك اللى مفروض تعملها عشان كتاباتك محدش يلطشها كدا عينى عينك و ... لما حضرت ندوة غادة و غادة و رحاب بسام فى ساقية الصاوى ... رحاب نبهت المدونين كلهم رغم هلامية الموضوع و صعوبة تحيد الواحد لحقوق الملكية الفكرية .... لكن ضرورى كلنا نكتب الجملة دى فى مدوناتنا إحتياطى
طبعا أنا كتبتها غلاسة موش اكتر ...أصل انت عارف كبرى دور النشر فى مصر هارينى تليفونات بس أنا بصحى من النوم متأخر حبتين ..ز
لأ بجد .... أختك أخصائية مكتبات يعنى ليه شوية فىحكاية الكتابة والملكيات الفكرية و الكلام دا فحبيت يعنى أكتبها موش هتخسر
و خصوصيات يوسف دى أنتو ليكو فيها و نص و تلتتربع ... أنا قصدى على الناس التانية اللى ملهموش فيه أى نايب
يا واد دانت خاله ...خالو سوووو
تحياتى الخالصة يا بتاع البليلة

بصراحه يوسف ده مفروض يتبخر لان مخه اكبر من سنه
ربنا يحرسه ويخليهولك
واسلوبك فى السرد هايل يا ام يوسف
تحياتى اليكى وبوسه كبيره ليوسف

التربية أصعب شئ فالدنيا والأكثرصعوبة
أنك تقنعى طفل مشاغب وذكىزى ابنك و زى البية أبنى اللى حرارتة 39 وقاعد جنبى عاوز يفتح موقع جوجول عشان يجيب شفرات جاتا الساعة 5و30الفجر
يارب يجمعكواع خير
وع العموم ميرو ابنى موجود وهيكرهك فالأطفال خالص لو عاوزاة اعارة انا مستعدةوهو جنبى مستعدكمان
ربنا معاكى
تحياتى

فاتيما يا سكر
بجد اولا ربنا يخليك يوسف ويفتح قلبك وعقلك وتحتويه اكتر بجد بهنيكى على طريقة سردك الحوار معاه واقناعه
وكمان عملتى حاجه مهمه جدا جدا وهى صورة الاب ربنا يكرمك ارفه اكتر حاجه بتحطم نفسية الاطفال محاوله احدى الطرفين الاب او الام فى تشويهه صورة الاخر بصورة او بأخرى
انت ام هايله ربنا يبارك فيكى
وكمان ماشاء الله عليه ربنا يحميه يا رب ذكى حاولى تنمى ذكائه اكتر بالمعرفه

فاطمة:
ممكن من غير القاب رغم اننا منعرفش بعض!!!
ممكن .....كويس خالص
اسمعي يا ستي:
انا قريت مدونتك كلها للمرة التانية من شوية
اول مره كنت عاوز اخلص علشان اعلق
بس تاني مره مكنتش عايز اخلص علشان موش عاوز اعلق
لان التعليق هيوجعني اوي
بس اكتشفت ان انا اتوجعت وقلبي اتوجع
سواء علقت او معلقتش
خلاص يبقى هعلق واللي يحصل يحصل
رغم ان ظروفي تختلف عن ظروفك تماما
بس حاسس بيكي لدرجه لا تتخيليها
والاهم اني حاسس بيوسف
حاسس بيه وعارف ومتاكد كمان هو حاسس بايه حاليا
وبكره هيحس بايه
لاني بشكل او باخر وبدون ايضاح كتير
تجربته هو مش تجربتك انتي
عارفها كويس جداجداجداجداوكمان جداوالي احب ااكد ليك عليه ان يوسف
بكره هيكبر ويعرف كل حاجه وصدقيني هيقيم بكل موضوعيه ويحدد مين غلط ومين مغلطش بس
حبه ليكي هيكون دايما حاجه تانيه خاص رغم كل حاجه
يوسف هيكون بمشيئة الله انسان ممتاز وهيستفيد من التجربه
وصدقيني الضربات هتقويه وتصقله
صدقيني لان دي حقيقه انا بعايشها كل يوم مش نظريه ولا امنيه
وام يوسف زي ام ............. ( مش هقول الاسم) هتفضل اغلى واحن قلب وام
ربنا معاكي ويصبرك ويقويكي ويبعد عنك ابو الهول
ولو منك بلاش بلاش تفتحي الشقة تاني وارمي المفتاح عشان خاطر يسوف
صاحب العمارة ...طبعا فهماني
طولت قوي
بس اعتبريه تعليق مجمع وعربون اخوه صادقه

إلى أجمل أم شافتها المدونات
فطومة
حوار جميل انا شخصيا اتعلمت منه ازاي ممكن اتكلم مع ولادي بصورة مفيدة
يارب يا يوسف تنور دنيا فطومة وماتبعدش عنها ابدا ابدا

تحياتي ياقمر الأمهات

:)

بطوووووووووط
حلو اوي الحوار وواضح ان يوسف دا قمر زي بطه

عارفه انا زمان وانا في المدرسه في 4 ابتداءي كدا مره بردك كان نفسي امسك الهدهد وانا بشوف الحوار بقيت شايفه نفسي وانا بجري ورا الهدهد وعايزة امسكه بس انا كنت لوحدي
مكنش معايا بطوط .
سلاموووووووووز بس جامد اوي

ونخف من البوس علشان الحسد

وزة

:)

جميلة اوى

يارب يخلية ليكى ويحفظة ويبارك فيه

تحياتى

أحمد الصباغ

أسلوب رائع ومدونه اكثر من روعه ..

قصتك مع ابنك وطريقة حكيك ليها هنا .. فى منتهى الروعه

أستمرى وكلى شوق لجديد تدوينك بجد ..

على فكرة دخلت مدونه ابنك وابنى كان هيتهبل عليها ... عايز يفتح كل صورة على حد ويفصص كل صورة .. ومبسوط بتيمون وبومبا .. ونيمو .. وخلاص مش عايز يسيب ليا الجهاز .. سبتله المدونه والجهاز وقومت خالص :)

بجد سلمت ايدك يا قمر ..

فى انتظار جديدك

عجبتينى اوى يا فاتيما
علشان بتحافظى على صورة ابو يوسف قدام يوسف
ومعملتيش زى اغلب الامهات اللى ممكن يبوظوا صورة الاب فى عيون اولادهم
برافو عليكى
تحياتى
اختك خيخة

صالح سعيد
تعيش و ربنا يسمع منك
و كل سنة و والدتك بخيرر و عقبال ما يجيلك اللى يبقى عاوز هو كمان يتبخر
تحياتى الخالصة

كلاكيت تانى و تانى
سلامته الف سلامة ...
و هى الدنيا يبقلها طعم من غير شقاوتهم و جدالهم و عم سمعانهم الكلام؟؟!!!
و يا شيخة حرام عليكى ... إنتى آخر واحدة تتكلم عن تسليف الولاد و إعاراتهم !!!
ربنا ما يحرمك منهم أبداً تحت أى ظرف من الظروف
تحياتى الخالصة و سلامته

جميل قوى اسلوبك فى التربيه ده يا ام يوسف
وبوسى لى يوسف قوى قوى
وقوليله خالتو فرنسا بتحب الهدهد
او هدهود
جدا جدا

آبى الغالية
متشكرة جدا على كل الكلام الحلو دا علينا ...
و هو يرجع بس و أنا ناوية على ميت حاجة هوديه الاليوسىماث و هوديه يلعب مزيكا فى الاوبرا و هنروح مسرح و سينما و ندوات و ألف مكان بس يرجع و أبقى حرة اخرج بيه من غير خوف و تهديدات ...
ربنا كريم و متحرمش منك

يا خايف من الحقيقة
طبعا قول يا فاطمة علطول من غير تكليف
و سعيدة بتعليقك جدا جدا ... أنا عارفة الواحد لما بيقرى حاجة قريبة من حالته الوجدانية قوى ... بيجيله كدا قفلة و بالبلدى تخمة نفسية و بيبقى موش عاوز يقول حاجة و يقفل على المواضيع ...ساعات بعمل كدا مع مامتى لما تبقى عايزة تنكشنى ... أقولها موش عاوزة أقول حاجة دلوقتى ... بس أرجع بعد كدا و الاقينى بتكلم ...
إذا كنت مررت بتجربة يوسف وتوصلت للنتيجة دى ؟؟ظ
أنا بشكرك جدا على البلورة السحرية اللى فتحتهالى و قوللتلى بصى على يوسف فى المستقبل هيكون إيه؟؟
أصلى خايفة موت بكرة بتاع يبقى أسوء وأصعب من إنى أعرف أصلح فيه حاجة و يكون موش عاوز منى أى مساعدة و لا حتى يبص فى وشى....
طمنتنى الله يخليك
و متقلقش من موضوع أبوالهول ما ناراسيتكو على الفولة
أرجو متنقطعش زرياراتك و علق وقت ما تلاقى نفسك عاوز تعلق
بس
تحياتى الخلصة ليك و لست الكل

من زمان و من يوم ما اتعودت أسمع فيروز وأنا دايماً بأحس فى صوتها بشجن غريب وما احبش بعد ما اسمعها اعمل اى حاجة تانية غير انى اكون لوحدى .. صوتها مليان وجع غريب .. نفس الاحساس بأحسه بعد قراءة كلماتك رغم أنك تحاولين تغليفها ببعض المرح لكن و رغماً عنك تقطر حروفك بألم لا حدود له .

جميل قوى تسميتك لفيروز بسيدة الحزن و الجمال ... جميلة قوى حكايتك مع الهدهد بأفكر ابدل النورس بتاعى بهدهود بتاع يوسف .. ممكن

تحياتى الخالصة يا سيدة الحزن و الجمال

ميومة البهية
يا حبيبتى يخليكى ليا و الدعوة دى غالية و مميزة لإنها دعوة أم و إحنا داخلين على يوم مفترج كل سنة و انتى طيبة و كل أمهاتنا بخير
و الله الواحد مكنش قاصد ... أنا بلاقى الكلام طالع منى كدا و الحمدلله الكتب و الافلام اللى الواحد شافها و حاجات برضو مريت بيها خلتنى فى المواقف الصعبة دى أبقى بحاول أمشى على الحبل أجاوبه بشوية خيال و حاجات موش غلط علميا و فى ذات الوقت اخبى النواقص اللى ملوش ذنب يستقبلها عقله و يخزنها كدا على بشاعتها ...
متهيألى موش يوسف بس لأكل الاطفال عندهم ذاكرة قوية و الكلام اللى بتقوليه بيفتكروه كويس
الواحد لازم يحاسب الف مرة بس يا رب لما يعرف الحقايق كاملة فى يوم من الايام ميقولش ماما كانت معيشانى فى كدبة كبيرة
تحياتى يا ميومة و فصة الحب الأعمى هايلة متتكتبش الأ عندك و بس

وزة القمرين
انتى كمان ؟؟!!
بصراحة الهدهد طائر كله كبرياء و شياكة ... يستاهل يبقى فى مركز حساس والله ...شكله قيم و مهندم هو على الطبيعة جميل أكتر من الصورة بكتير
و بعدين يا ستى لما محمد ييديكى ال7مليون إبقى إشترى جنينة حيوانات بحالها بقفص الهدهد و اولاده و أحفاده كمان ...
تحياتى الخالصة

خالو أحمد الصباغ
و يخليك يا خالو
و كل سنة و مدونتك بخير و أنت محل إحترام المدونين كافة
تحياتى العطرة

ضى القمر
بجد؟؟!!
حقيقى إبنك عجيته المدونة ؟؟؟
طب يا رب يخليكى يعنى يوسف لما يرجع هتعجبه برضو ... ممكن تخلى إبنك يعمل واحدة بس بعد المذاكرة طبعا ... هتنمى عنده الحاسة و الملكة الفنية مدام هو غاوى ...
سلمى عليه قوى
و أرجو ان تظل المدونة عند حسن ظنك
تحياتى و قبلاتى

يا نوران الغالية
يا فندم إحنا نقطة فى بحرك
و أرجو إن كل المناورات اللى عملتها دى متكونش أخترقت و تم تشويهها ...
و ربنا يهديهم يا رب و يحافظو على براءته و نقائه دون خدوش
بوسة كبيرة لشريك البراءة شيكو القمر

زغروطة يا عالم
يا ألف ليلة بيضا
إيه الهنا اللى انتى فيه دا يا فاطمة؟؟؟
فرنسا هانم عندنا هنا ... دا غحنا زارنا النبى
و خللى باللك يا واد انتو وهو من العجلة و روقوها تمام
نورتينى يا خالتى ...
و متشكرة قوى على رأيك يا جماعة بتحسسونى إن الكلام دا موش عبط و إنى كنت بتصرف صح ..ز أصل خالى كان بيقولى كان لازم تصارحى الولد بالحقيقة من و هو صغير عشان يكبر و هو عارف و ميلعبوش فى دماغه بعدين
كان يوسف عنده لسه سنة و نص و كنا فى بداية المشاكل ...
مرضيتش ... صعب عليا أشيله الهم دا و بأيدى أنا كمان؟؟
لأ ...
كلامكم بيثبتنى ...
متحرمش منك و من زيارتك
و سلامى لكل اهل السويس الباسلة

حااااازم
يا عصفورأرقه الحنين
أن كمان بموت فى فيروز و بموت فى حزنها و شجنها الجميل و متهيالى ربنا خلقها عشان تبقى مصدر سعادة للبشر و أكيد ربنا هيكرمها و يدخلها الجنة مكأفاة لها على مسحها لأحزاننا و غسيلها لروحنا كدا لله فى لله ...
و يا سيدى هدهود بتاعنا النورس بتاعك هما الأتنين سوا فيهم شموخ و تحليق لفوق محدش بيقدر يحصلهم بس بيتعلق بيهم و يستنى رجوعهم ...
و ممكن؟؟؟
إنت تعمل اللى سيادتك عاوزة انا قولتلك قبل كدا إنت ليك حصة فى أرض الممدونة ونسبة من الأرباح ...
تحياتى يا أبو الأحلام و الحنين

فاطيماتااااا
احلى مافي حواديتك المعايشة التي نجد أنفسنا دون إي إختيارات داخلنا نجد أنفسنا داخل حواديتك المستوحاه من مواقف ممكن تعدي على كتير وأصعب ما في حواديتك دايما وتر الشجن الذي لا ينفك نسمع لحنه منفرداً
اهو الموضوع ده وغيره جعلني ألمح قدرتك على تكوين لغة بسيطة داخل حدوته اشبه بحواديت الأطفال أو قريبة منها صدقيني ممكن تستغلي الحته دي عندك وتشتغلي عليها وتحاولي تكتبي قصص للأطفال فكري تعملي عدة قصص للأطفال صغيرة وخديها لدار نشر وان شاء الله ربنا يوفقك وصدقيني الكتاب المتخصين للأطفال لدينا قليلون جداً المهم حدوته تكون بسيطو وقريبة من عقل الطفل
فكري مين عارف

حسن يا فنان يا كبير
يا خرابى يا حسن انت خلاص شلت همى للدرجة دى و قاعد تفكرلى ؟؟
يا سيدى متحرمش منك ابدا ...
دا كلام مجرد كلام بينى و بين يوسف بكتبه لحسن أنساه و ييجى اليوم اللى أحاول افتكر فيه كنا بنتكلم فى إيه مفتكرش ساعتها بقى موش عارفة أقولك هعمل ايه فى نفسى ...
و على فكرة انا روحت شركة تانية و برضو جانى نفس الإحساس من عيون الراجل ...انو عاوز بس ياخد فلوس و ملوش دعوة بعد كدا ...
بس هدور فى سكة تانية ... و ربنا يسهل
و متشيلش همى يا حسن
ربنا يسعد أيامك
تحياتى يا فنان يا كبير

مافيش طيور بتحفظ الأسرار في الزمن ده خلاص .. كل حاجة هتتعرف .. وبدري جدا عما كنتي تتخيلي .. إبنك هيكبر بسرعة هتفاجئك .. بكرة تقوليلي المراكبي قال

عم مراكبى يا نبع الحكمة
يا راجل حرام عليك ...
دا الهدهد مؤتمن من زمان الزمان ... و سيدنا سليمان عليه السلام هو اللى وثق فيه ...
طب خلينى عايشة فى الخيال شوية
بتيجى تصحينى من اغفلة ليه بس ؟؟؟
آه صحيح .ز
ما انت بع الحكمة ...يعنى كل نقطة ميه منك مغموسة صدق و صراحة
ماشى يا عم ...
بس بقى هدهود طلع جدع و لحد ما ميشنا من هناك مقلشى حاجة و عملها بجميلة ...
لكن طبعا دلوقتى يوسف عرف الحقيقة طبعا ...
بس موش من هدهود ..
عرفها من الجوارح ...
أه ... أصلى مسمياهم الجوارح ...عشان بيفكرونى بالمشهد التقليدى فى الافلام الاجنبى لما حد بيبقى فى صحرا و متهالك و بيحتضر و الجوارح عمالة تحم من فوقه فى شكل دائرى منتظرة موته ...
و نصيبها فى الوليمة
زمان الجوارح قالتله ...
أرجو أن يصمد ...
و لما يكبر بسرعة زى ما بتقول
يفضل كويس
و يفضا فاكرنى بالخير
تحياتى يا نبع الحكمة الصادق

مش هعرف أعلق غير كدة


(:

ابتسامة كبيرة جدا جدا جدا

كفاية يا عم رامى ح

حاضر (:

ربنا يخليهولك

إرسال تعليق