.

.

تـلات تـيـام  

Posted by: فاتيما in

المكان : المنفى الإجبارى
المناسبة : عيد الام
الزمان : السنة اللى فاتت
الوقت : الساعة اتناشر الضهر
- ماما
- نعم
- تعالى نعدى على الراجل اللى بيبيع كل حاجة بجنيه
- طيب ... نشترى الطلبات من المحل و بعدين قبل ما نركب المينى باص نعدى عليه ... انت عاوز منه إيه
- موش هقولك ... دى مفجأة
- إبتسامة ماكرة أخفيها ... يعنى موش هتقول لماما ؟؟... أشمعنى انا بقولك على أسرارى ؟؟!!
- خلاص هقولك ... عشان أجيبلك هدية عيدالأم...ارتحتى
- يا حبيبى ...ما انا قولت كدا برضو ... بس انت معاك فلوس و لا أسلفك ؟
- لأ معايا ... أخدت من الحصالة بتاعتى الفلوس كلها كلها ... يعنى جيبى كل الحاجات اللى عند عمو البياع كلها لو عاوزة
- يا حبيب ماما متحرمش منك ... الحاجة كلها مرة واحدة ... لأ ... انا كفاية عليا حاجة واحدة بس
- طب انتى عاوزة اجيبلك ايه؟؟
- لأ... انت نقيللى اللى يعجبك و انا هبقى مبسوطة
- طيب ... انا هجيبلك توكة للشعر شوفتها أمبارح عنده و انا بشترى ميدالية الليزر و كانت كويسة يعنى ...
- دى هتبقى أجمل هدية جاتلى فى حياتى يا يوسف ... ربنا يخليك ليا و تعيش و تجيبلى
- بكرة لما أبقى غنى و معايا فلوس كتيييير ... هجيبلك كل حاجة نفسك فيها يا ماما
- متحرمشى منك يا حبيب ماما
ماما
أجمل كلمة فى الكون
تلات تيام
و أتمنى اسمعها من بين شفايفك انت و بس
تلات تيام
و نفسى أخدك فى حضنى و متخرجش منه الا بخروج روحى
تلات تيام
و فيضان الحنين عمال يجرف كل حاجة فى سكته
لغاية ما قرب يوصل لقلبى
و خايفة يغرقه
و ميقبش تانى
و عشان الحزن بقى عدوى
و لأنى بحبكو
موش ناوية أعديكو بالمرض
فيكو ناس موش ناقصين علل
و لا وجع قلب
قصدى على الناس اللى بقوا بفعل فاعل
و فعل فاعل
زى حالاتى يعنى
إما نص أولاد
و إما نص امهات
يخلصو التلات تيام
و أعود مجددا كما أنا
أنا الآن أقل حتى من ... نصف أم
لكن بالرغم من ذلك ...
لن يمنعنى ما بالقلب من وهن
من أن أقولها لكم بكل همسة باقية فيه
كل سنة و أنتم طيبين
أمهات و أبناء
و نص نص

This entry was posted on الاثنين, مارس 17, 2008 and is filed under . You can leave a response and follow any responses to this entry through the .

66 كــــلام بيطــبطـــب عـــلى قــــلبى و روحــــى

السلام عليكم ورحمة الله وبركاته

كل سنة وانت طيبه يا فاطيما و يارب يجمعك بيوسف علي خير ويفضل معاكي طول العمر ومافيش اي حاجه تفرقكم ابدا


هانت كلها تلات تيام


:-)

بجد انت مش نص ام
اصلا مفيش نص ام
الام دي هي سر الحب في الكون كله
تلات تيام
وحشتيني يا امي وحشتيني
المهم ربنا يجمعك على يوسف بخير يا ام يوسف
يارب

سيدتى الفاضلة/فاتيما
كل عام و حضرتك بخير وأنا أدعوا لكى فى كل حين أن يجمعك الله و يوسف إلى الأبد و لا يفرقكم ابداو أنا على يقين أن الله سيجيب الدعاء..أبو خالد

يا رب تفرحى بيه ويخليه لكى يا رب واشوفه عريس زى القمر ويفضل عمرة كله حنين عليكى
كل سنه وانتى طيبه يا ست الكل

حبيبتى فاطيما

ام يوسف

دخلت لمدونتك اكتر من مرة

ومكنتش فاهمة اية الموضوع

وكان نفسي اسألك هو في اية

بس خفت ازود همومك وافتح جراحك

بس قرات لك اليوم تعليق

فهمت منه

ان يوسف مع باباه

وبدعى لك من قلبي

انه يجي لك فى عيد الام او يتصل بيك

لو كان برة مصر

وان شاء الله ربنا يهدى باباه

ويخليه يكلمك

وعايزة اقولك انك فى قلب يوسف

محفورة بالصوت والاسم والصورة

وعمر ما حد هيقدر يغير ده

بل بالعكس سينقلب السحر على الساحر يوما

وهتطلعي من هذه المحنة

منصوووووووورة ان شاء الله

وعايزة اقولك انا نفسي اتعرف عليك

تحياااااااااتى لك يا ام يوسف

كل سنه وانتى طيبه وعيد سعيد عليكم

على فكره انتى كلامك ده اثر فيا لدرجة انى دمعت وانا بقراه عشان امى وحشتنى جدا مع انى لسه سايبها من يومين بس..
واكتر حاجه زعلتنى انى مش هكون معاها فى عيد الام..
ربنا يخليلك يوسف ومايحرمكيش منه ابدا
بالمناسبه هو يوسف عنده كام سنه؟؟

يااااااااا
بطووووووط

وبعدين معاكي بقه مش احنا قلنا ان يوسف القمر زي امه يعني حنين اوي اوي

يعني يوسف انتي جواه وحاسس بيكي واكيد واحشاه زي ماهو وحشك
الواد ده اكيد قمر زي بطه
كل سنه وانتي طيبه ومعاكي يوسف
ربنا ما يحرمك منه ويرجعلك بالسلامه

بطووووووووط انا بحبك
وزة

كل سنة وانتى طيب وارق واجمل ام فى الدنيا دى كلها
وان شاء الله يوسف يبقى غنى ويجيبلك هدية عيد الام اللى يتمنى يهاديكى بيها والام ربنا يرجعلك اجمل هدية فى الوجود بالف سلامة
يوسف طبعا
كلامك ابكانى ووجع قلبى
عيد ام سعيد يا احن واطيب ام فى الدنيا

لا بقى حرام عليكي والله انا عيطت.
رغم ان المجرم نور لسه مقليش كل سنه وانتي طيبه.. شفتي العقوق...!!
احلى حاجة تعمليها بجد انك تحطي التوكه بتاعة يوسف في شعرك يومها بس انا حاسة انه هيتصل بيكي ويفرح قلبك هو صغير بس اصله اكبر من سنه ما شاء الله ولو ما اتصلش يبقى اكيد هيبوسك في خياله ويقولك " كل ثنه وانتي طيبه يا ماما يا جميله"
طب ايه رايك لو مبطلتيش انا شكلي هاوافق على عيد الاسرة ده!! والله اعملها!!!
بوسه كبيرة ليكي وحضن يدفيكي لحد ما يوسف يكلمك!!
زيانور

سمعت صوت عياطك وانتى بتكتبى اخر كام سطر فى البوست
خدتك فى حضنى وطبطبت عليكى
ماتعيطيش يا فاتيما
هايرجعلك اكيد ان شاء الله
وهايجبلك احلى توكة شعر

بقولك ايه تعالى يوم السبت الجاى فى ساقية الصاوى
لو جيتى هاجيبلك شريف معايا
لو مش هتيجى مش هاجيبه بصراحة
انا هاجيبه علشانك انتى بس تلعبى معاه شوية
كل سنة وانتى طيبة يا اكمل ام
انتى مش نص ام ابدا
تحياتى ليكى
اختك خيخة

قال نص أم قال...داحنا جنبك أرباع
أمهات يا أحلى أم في العالم
تحياتي وكل سنة وانت أحن وألذ أم
:)

DEAR FATIMA
HAPPY MOTHER'S DAY
SORRY I AM OUTSIDE THE WORLD..I AM OUTSAAAAYYYYED
I HOPE EVERYTHING IS FINE
BEST REGARDS

فاتيما ربنا يخليلك يوسف لسه قاريه ردك علي تعليقي القديم عندك واحب اقولك اني عندي بنتين
لسه بنتي الصغيرة جايبالي كارت
من مصروفها عشان كنت مسافرة
مش بيحسوا الحاجات دي بتبهدلنا من جوه ازاي زتحسسنا بالذنب لو قصرنا معاهم او اتعصبنا عليهم
كل سنه وانتي بالصحه والسلامه وتشيلي ولاده يارب
بس تقريبا من قراءه سريعه اتلخبطت انا فهمت ان فيه انفصال بس هو عايش معاكي ولا مه ابوة ولا هو كان بيزورك
مش عارفه اتلخبطت لانه في معلومات متداخله
عموما ربنا بفرحك بيه
كل سنه وانتي بخير

كل سنة وانت طيب ياجميل انتى بس ادينى عنوانك وانا ابعتلك الشحطين بتوعى بهدايا واللة ماما هى اللى امهم وولادى اصلا معودتهمش يجيبولى حاجة انا بحب اليوم دة اخدهم ونقضية فدار ايتام مع الاطفال اعتقد انك لوحاولتى هتلاقى نتيجة ممتازة وطاقة الحنان اللى فيكى هتلاقى منفذ
تحياتى وكل عيد ام وانتى بخير لانك ام سواء بأبنك او من دونة

فكرة انا كل عيد ام ببعت ولادى لأبوهم يجيبوا هدية لمرات ابوهم وانا بقضيها مع نفسى الأرتباط بالهدايا للأغراب مش الأحباب
التعليق راح لسوو ورجع تانى هههههه

كل سنه وانتى دائما طيبه
وكل سنه ودايما يوسف يكون فى حضنك الدافىء يكبر ويلعب ويحلم جواه ومش يغيب عنك ثانيه واحده .....بقول يارب
وبهذه المناسبه بهديلك اغنيه سعاد حسنى لعيد الام واللى بحبها جدا.... صباح الخير يمولاتى

تحياتى
قلب بيحبك وبيتمنى لك كل السعاده والحب

كراملة

انتى مش نص أم أنتى أجمل و أرق و احن أم فى الدنيا و ربنا يرجعلك يوسف بالسلامه و ميفرقش حضنك ابداً
أنا بكيت و انا بقرا لانى حسيتك أوى حتى وانا لسة مش بقيت ام
يــــــــــارب يوسف يبقى معاكى يوم عيد الام

ملحوظة : سلامك ليا فى مكسرات بيوصلنى و ليكى منى تحيات و سلامات كتتتتتتير اوى

كل سنة و إنت طيبة يا أجمل أم شفتها في الدنيا

كل سنة و ويوسف فحضنك حتى لو ماكنش بجد في حضنك

كل سنة و إنت في قلبه حتى لو مش قدام عينيه

يارب آجي يوم عيد الأم و ألاقيكي فرحانة بيه وبحضه أو حتى صوته

الحزن عدوى لما يعدي على قلوب عندها أحزانها يا فاطمة

و لما حزنك يعدي على حزني بيعلى إحساسنا.. يمكن بيوجعنا الحزن و يزيد

بس المعزة بتزيد و المحبة بتكبر

مين بقى الأغلى .. دول ولا الحزن؟؟

يارب يفرح قلبك الطيب ده

كل سنة و إنت طيبة يا أجمل أم مش نص أم

كل ثانية وإنتى ويوسف بكل بخير
انا كنت بروح وأجى كده بشكل سريع على مدونتك...الدافئة الحانية...
بس شكلى هكون من المتابعين الدائمين

مع تحياتى ومودتى

انتي مش متخيلة قلقي عليكي وصل لحد فيييين أختفيتي فين ... أرجوكي طمنينا
يااارب يكون المانع خير
كل سنة وانتي طيبة ياأطيب أم في الدنيا

كل سنه اونتي طيبه يارب
وتكوني دايما بخير
ويخليلك يوسف دايما ومش يحرمك منه ابدا
ويكون معاكي ع طول
تقبلي مروري
تحياتي ليكي
ابنتك زوزو

خمسة فضفضة
و عليكم السلام و رحمة الله و بركاته
وانتى طيبة يا حبيبتى و ولادك بألف خير
و مدونتك كمان تفضل بنفس الصدق و الرقة و يتزايد مريديها
تحياتى الخالصة
بس أهو مجرد كلام ... يعنى بعد التلات تيام إيه اللى هيتحسن يعنى ؟؟
أنا بضحك على نفسى زى العيال ما بيصبروهم بالوهم يمكن بعد مدة يزهقوا و ينسوا

يا خايف من الحقيقة
كل سنة و انت طيب ...
والدتك موجودة ربنا يخليهالك ... و لا ربنا أصطفاها جنبه؟؟
فى الحالتين ....واضح ان شرخ البعاد مازال موجودا و لم يلتئم أبداً
ربنا يطيب جروحنا جميعا
و تحياتى لكل من عندك

العزيز أبو خالد
دعواتك الطيبة دى بتدينى ساعات أمل أن ممكن ربنا فى يوم يرضى عنى أنا و يوسف و يضمه لحضنى من تانى ...
بس أغلب الوقت اجدنى لا أستحق ... موش عارفة
كل سنة و انت طيب و زوجتك الفاضلة بخير و أولادك و أحفادك بألف صحة و خير
تحياتى الخالصة

آبى الجميلة
عارفة يا آبى ... لو بس ينفع كنت خطفت يوسف و جيت بيه على كوكبك الجميل عشنا هناك من غير ما حد يهوب ناحيتنا ... على الأقل كوكبك محترم و غير مسموح فيه بالظلم و الإستهتار بالمشاعر و لا القهر لأى سبب ...
و الله كنت عملتها ...
بس انتى كوكبك بعييييد قوى
يا دوب أشوفه فى الخيال و بس
كل سنة و انتى بألف خير و والدتك و والدك فى أتم صحة
تحياتى العطرة

فضفضة
يا عزيزتى كل سنة و انتى بأتم صحة و سعادة
والموضوع أصلو كبير و متشابك و كل سوأل هيودى لسوأل
بس الخلاصة انى مطلقة و رغم انى لم اتزوج مرة آخرى لكن يوسف انتقلت حضانته لأم أبوه ...و مكن أرفع قضية ضم لحضانتى لأنى غير متزوجة بس مينفعش ...
ممكن أكسبها زى ما خدت أحكام قضائية بالنفقة ليل و ليوسف و حكم تبديد و المؤخر و...و...
كل دا معايا بس ملوش فايدة فى الواقع
بالعكس ... بسبب الناس الحلوة اللى الواحد أتشنكل فى طلعتهم البهية ...مينفعش معاهم أى حاجة و لا أى قانون و لا حاجة
الموضوع كبير قوى ....
بس سيبك ...
ربنا أكبر برضو و لو انى مستنية حاجة كبيرة تمحى الهم الكبير
تحياتى ليكى و شكرا على إهتمامك بيا و بمشاكلى

يا صوت من مصر
أشكرك أولا على ذوقك
ثانيا أن سعيدة جدا ان ما أكتبه يثير إهتمامك و يدفعك للتعليق عندى .. مع انك لسه فى مقتبل شبابك و الموضوع بتاعى عواجيزى شوية و يندرج تحت مسميات محاكم الأسرة و فرع المطلقات و الشئون الإجتماعية و أريد حلا و الحاجات دى
يعنى بالنسبة لك حاجات صعبة شوية و تسد النفس
.... أشكرك جدا على معايدتى
و كل سنة و والدتك بألف خير
و ربنا يفرحها بيك عشان عندها حق تفرح
تحياتى

زيزو
موش عرفة زيزو دا معتز و لا زياد و لا إيه ؟؟
حطيت صورت ... طب قول إسمك بقى عشان أعرف أندهلك ولا نمشيها زيزو ...ماشى
كل سنة و انت طيب و والدتك [الف خير ... و متروحش ليه دا فيه أجازة تلات تيام اهم .... عموما مكالمات التليفون برضو مهمة و ليها أثر
و يوسف عند تمن سنسن و نص ....
تحياتى الخالصة ليك و لما يجيلك تعليقات من أسماء جديدة عليك متفتحش اللينك اللى كتبينه عشان بيبقى فيرس و حصلتلى كتير من ناس بتسعى فى الخير موش عارفة إحنا مضايقنهم فى إيه؟؟؟
بص أعمل system restore علطول لكام يوم ورا و الجهاز هتلاقيه أتعدل هو و النت و متدخلش على لينك مجهول بعد كدا
تحياتى

وزة القمرين
معلشى يا وزة
غصب عنى ...
أنا حتى آخرت الرد على التعليقات لحد ما أفوت الجو الحزاينى بتاعى و مينضحش كآبة فى الردود موش عارفة حتى أعمل كدا
كل سنة و انتى طيبة و كل من عندك بألف خير
تحياتى و حاضر هحاول أصلح المووود

قطة الصحراء
قطتى الحلوة
عندى قطتين سيامى
ولد و بنت ... الولد هادى و رزين ...
والبنت صغنونة و شقية و بالإختصار مجرمة ...
كل ما أجى الاعبها أفتكرك ...أصلها لذيذة قوى و سو كيوت
كل سنة و انتى طيبة يا حبيبتى و مامتك بألف خير
تحياتى الخالصة لكى

مامت زياد و نور
ربنا يكرمك فيهم ... و كل سنة و انتى طيبة يا حبيتى
و معلشى موش بعرف أسيطر على النكد اللى جوايا و بيطلع منى تلقائى و الله ...
انا طول عمرى كدا حتى من قبل أى حاجة ... بميل للحزن أكتر
الواحد برضو شاف كتير فى الدنيا دى
بس بقيت اتعلم أقفش فى أى لحظة فرح و أستغلها
لكن لحظة فرحى لم تأت بعد
تحياتى ليكى و لكل من عندك

نوران الغالية
كل سنة و انتى طيبة
بس مفيش داعى تنتظرينى يوميها ...
موش هقدر ىجى لعدة أسباب ...لدواعى أمنية و أجتماعية نفسية
انا روحت ندوة غادة عبدالعال لأن محدش يعرفنى هناك و لما سلمت عليها قولت كلمتين و مشيت ...
بصى انا قعدت 6 سنين فى منفى بهرب منالناس عشان محدش يسألنى انتى مين و ساكنة فين و فين جوزك و ابنكفى سنة كام ... و حالات التعارف اللى بين البشر العاديين دى مبقتش اعرف أعملها ...
اتعودت أبقى خفية و غير مرئية و يمكن هو دا السبب بتعلقى بامدونات ... ناس تعرفيهم من غير ما يلزموكى بواجبات إجتماعية منتيش هتقدرى عليها
ثانيا ... أى تجمعات للمدونين صعب أحضرها ...انا بروح الاماكن سرقة و المفروض محدش يكون واخد باله منى ... انا ممكن الاقى طليقى تنشق الارض و يطلعلى و دا بقى واحد بتاع فضايح و بهدلة فى الشوارع و غالبا مبيخلص الموضوع الا فى القسم ...انا روحت زرت أصدقاء ليا من أيام الجامعة زميلى و زميلتى اتجوزو..و رايحة اسلم عليهم .. صديقى وزميلى عرض يروحنى بعربيته رفضت ... لأنى خفت طليقى يشوفنى معاه و ياخد رقم عربيته و يقرفه زى ما قرفنا و أبقى أذيته من غير ذنب ... بس الراجل طلع جدع برضو و وصلنى لحد المترو بس قعد يدخل من شوارع و يخؤج من شوارع تمويه ...
انا حياتى كلها أصبحت حركة تمويه كبرى
عشان كدا مقدرش آجى و أسبب لكو مشاكل ....
أرجو تكونى فهمانى يا نوران
جايز تقولى هيا بتبالغ ...
محدش هيمشى ورا حد كدا طول الوقت
بس اصلى جربت المواقف دى كذا مرة لحد ما بقيت اتمنى مخرجش من البيت خالص
و مسببش مشاكل لحد
تحياتى يا نوران ليكى و لشيكو

ميومة البهية
لأ
نص أم
و يمكن تمن كمان
يا مى ...أنا أم ضعيفة لا تقوى على حماية نملة ..موش بنى آدم متعلق فى رقبتك
أقولكو على حاجة
يوسف أتصل يوم الأربع
عارفة المثل الانجليزى بتاع إحذر مما تتمناه
هو دا اللى حصل بعد المكالمة
الولد كلمنى عشان يسألنى انتى رفعتى قضية الحضانة و لا لسه؟
قولتله لأ
هتيجى تزورينى فى المدرسة ؟
قولتله مقدرش معمولى محضر عدم تعرض
قالى طب تعالى زورينى فى البيت جدتى بتقولك أهلا و سهلا
قولتله مقدرش أدخل البيت دا تانى بعد المشاكل اللى بينا و بينهم
عارفة يوسف قاللى إيه فى الآخر ..
قاللى طيب انتى كويسة ...خلاص باىباى عشان بابا جه و انا بتكلم من وراهانا وجدتى ...
كان بيقولى انتى كويسة بيأس
بيكلمنى عشان يقولوى يا ماما الحقينى
مقدرتش أقوله حاضر ... هكسر الدنيا علشانك
مقدرتش أبقى أم يا مى
مقدرتش

د.زين
الذى ما زال غالى
بص حضرتك
حمدلله ع السلامة اولا
ثانيا
حضرتك بتكبلى بالانجليزى كدا باى اكسدنت و لا مقصود عشان تقولى انك يا فاطمة بقيتى واحدة جاية من بره و خواجاية على البلد دى مدام موش عاوزة تكتبى فى السياسة و بتقولى على نفسك جبانة ؟؟
لو كان دا قصد حضرتك انى جاية من الاوت سايد...
فمقدرش أقولك أى حاجة غير أنى العالم اللى انا جاية أسوأ من حال البلد ميت مرة ...
بس حضرتك برضو عندك حق ...
و انا برضو بعرف أفك الخط بالانجليزى ميجراش حاجة
يمكن الجنسية الجديدة تنفعنى ساعة وقوع مصيبة ما من اللى متعودة عليهم
حمدلله على سلامتك
يا غالى

ست الحبايب..ياحبيبه
ياحبيبه ..ياحبيبه..وحبيبه
ياأغلى من روحي ودمي
ياحنينه وكل طيبه
يارب يخليكي ياأمي ..ياست الحبايب
ياحبيبه ..ياحبيبه..وحبيبه

لو عشت طول عمري أوفي جمايلك الغاليه عليا
أجيب منين عمر يكفي ولاقي فين أغلى هديه
نور عيني ومهجتي
وحياتي ودنيتي
لو ترضي تقبليهم دول هما هديتي
يارب يخليكي ياأمي ..ياست الحبايب
ياحبيبه ..ياحبيبه..وحبيبه

-------------------
امي الحبيبه امي الحنون
ياقلب أبيض من الندى
ياصوره عايشه في العيون
امي الحبيبه امي الحنون
ياصابره دايماً على الأسى
وعلى الهوان وعلى الشجون
امي الحبيبه امي الحنون
أنا كنت فين قبلك أنا
ومين غيرك إزاي أكون
امي الحبيبه امي الحنون
سامحيني ياحضن الحنان.. سامحيني
سامحيني لو خدني الزمان..سامحيني
وأدعيلي دايماً خلي طريق الصعب ياما عليا يهون
امي الحبيبه امي الحنون
ياحب غالي..ماليكل كياني
علمني ربي..والرسول وصاني
أوفي جمايلك في خريف عمرك
وأسأل عليكي..ومن أخر الدنيا أمشيلك
زي الطيور التايهة ماتعود للغصون
يابسمه حلوة نورت لياليا
انتي الكفاح والصبر والتضحية
ماتزعليش لو شفتي مني أسيه
أنا برضه ابنك مهما كان ويكون
وانتي اللي جوه القلب
يا أمي الحنون
امي الحبيبه امي الحنون
امي الحبيبه امي الحنون

ابنك
يوسف
وبينا ميعاد
لو احنا بعاد

بنت القمر
كل سنة و انتى طيبة و بناتك بخير دايما
يعيشو و يجيبولك ي رب
معرفش التفاصيل أصلها كتيرة و أرجو فى إجابتى على فضفضة يكون اتفهم بس الحكاية فيها ثغرات مقولتهاش عشان المشاكل و عشان يوسف برضو متبقاش قصة حياة امه و أبوه بكل غسيلها القذر معلقة على الحبال ..
آه لسه فيه حاجات أسوأ من اللى اتكتب بمراحل ...
أرجو الا يأتى اليوم و أضطر لكتابتها علنا
تحياتى ليكى

نرمين
طاقة النور
كل سنة و انتى طيبة و ولادك و مامتك بألف خير
يا ستى من غير هدايا و كفاية سوألك و اهتمامك
و بصراحة انا حاليا لست فى مزاج للخروج و التحدث مع أى حد و لا أى مكان و لا أى شىء ...
و الزيارات دى لازم الواحد يكون مستعدلها نفسيا عشان ميروحش ينكد على الناس هما موش ناقصينى أصلا ..
ناوية أعمل كدا و الله بس لما المووود يتحسن ..
مكالمة يوسف كرهتنى فى نفسى
و بحاول حاليا بمساعدة نا انى أكلمه فى المدرسة الجديدة موش هقدر أقول على التفاصيل دلوقتى
بس هوله و اكلمه فى التلفيون أقوله انى هحاول فى سكك تانية غيرالقضايا اللى متوديش لحاجة ...أصل أبوه فهمنى كويس انى لو رفعت قضية حضانة و لا حتى رؤيا ...انى موش هشوفه تانى الأ بعدست سنين و عليا خير
و يعمل فيا زى ما عملت و ياخد الول و يهرب بيه على بره عند أخوهفى الكويت
قادر و سهل يعملها و يعمل اللى أسوأ من كدا
عشان دا موش قادرة ارفع قضية حضانة و لا رؤية و لا حتى أهوب ناحية مدرسته لأن معمولى محضر بعدم التعرض و الا يبقى هيتهمنى انى رايحة أخطفه دا غير ان ممكن يخيفيه و يقول انى خطفته فعلا
دى موش أفلام و الله
سهل عليه يعمل أى حاجة
كفاية انو زور شهادة وفاة ليوسف و قدمها للمحكمة عشان يوقف النفقة بتاعته و انا أصلا مخدتش من النفقة دى مليم واحد ... انا رفعاها عشان بحكم الدفع أو الحبس أمنعه يجيلى عند باب المدرسة يبهدلنى قدام زملائى ...
أنا لا أستحق أن أكون أم لهذا الولد المسكين
يا ريتك كنتى انتى يا نرمين ...
كان هيبقى مصيره أحسن ألف مرة
تعرفى انى كنت ساعات اتمناله الموت ...
أقول يا رب لما تاخده عندك مفيش حد هيقدر يأذيه زى ما بيحصله فى الدنيا
شوفتى ام بتدعى لإبنها بكدا
أنا الأم دى
و تقولولى أحن أم فى الدنيا
دانتو مخدوعين فيا جامد قوى

نبضات
عرافتى الساحرة
بلاش أنا تقوليلى الكلام دا ...بحس انو حلم مستحيل و انا أصلا مستهلوش
المهم انتى عملتى إيه فى موضوعك؟؟
سيبك منى

كراملة
يا حبيبتى انتى جيتيلى فى وقت غلط خالص
كان نفسى تيجى تشوفينى و ان شكلى أحسن من كدا
بس دى حقيقتى و مبقتش أقدر حتى أغيرها
متتصوريش أنا بحب قوى قصتك انتى و مكسرات قد إيه ... لسه فيه حب نقى و لطيف و بفرح كدا ...
بتدونى أمل ان لسه فيه ناس بتحب و تعلن عن حبها بكل فخر و شفافية
و ربنا يتملكوا القصة على خير و نفرح بيكو و بوصول الانجال
تحياتى يا حبيبتى ليكى و لسيد المكسرات

هنوده
يا قمراية
أجمل ام شفتها عنينكى
طب أقرى التعليقات اللى فاتت دى و انتى هتغيرى رايك
... انا قعدت استنى مكالمة يوسف ... و لما كلمنى اتمنيت مكنتش كلمته ...و خذلته و حسسته انى موش حقدر اعمله حاجة
دلوقتى بحاول اوصله علشان أضحك عليه و أقوله لأ هحاول أعمل حاجة ترجعك ليا تانى
هكدب عليه يا هند
هكدب عليه علشان أخليه يستحمل الحياة اللى اتفرضت عليه بدون ذنب لمجرد الارتباط البيولوجى ان دا أبوه
هكدب عليه
أنا ام كدابة
و عاجزة يا هند
و الحزن أقل عقاب أستحقه

إيمان
أهلا بيكى
و لو انى اظن انك هتغيرى رأيك بعد المرة دى
تحياتى ليكى و تقبلى أعتذارى مقدما
على أى حاجة ممكن تكون ضايقتك من المدونة

نوران الغالية
أنا هنا يا نوران
و المدونة اللى بتقول عليها أيمان 0التعليق اللى يسبقك ) مليئة بالدفء ... تشتعل نارا ... بسب غضبى و كرهى لعجزى و حياتى التى لا معنى لها
ماما كلمت مديرى السابق و اتفقت معاه يشوفلى شغل من كتر ما شايفنى حالتى بقت صعبة
و نزلت أشتريلها هدية عيد الأم بعد ما استلفت فلوسها من أخويا الصغير لأن معييش فلوس
لحد أمتى هعيش عوالة على الدنيا و الناس و مبقاش ليا لازمة ...
أنا فين ؟؟
أنا موش موجودة على الخريطة اصلا

يا مفقوعة مرارتها أنا موش أطيب ام
الطيبة اللى بتقولى عليها دى أسمها الفعلى خيابة
يعنى لو كنت أشطر شوية و بعرف اتصرف و امللك زمام الامور كنتى قولتى ام قوية ام جدعة ...
لكن انا ام خايبة مبتقدرش تعمل حاجة غير النواح و البكا
متقلقيش عليا ...
انا على قيد الحياة
تحياتى

زوزو
كل سنة و انتى طيبة و بالف خير انتى و كل الغاليين عليكى
أتقبل مرورك ؟؟!!
يا ستى الف أهلا و سهلا بس انتى ابقى تعالى دايما
تحياتى ليكى

حسن
يا فنان يا كبير
حبيبى كان
هنى و سهيان
ما فى غيره
حملنى سنين
منن هاينين
كتر خيره
صباح و مسا
شى ما بينتسا
تركت الحب
أخدت الآسى
فيروز
ست الحزن و الجمال

فاتيما كل سنة وانت طيبة ويارب تكون كل ايامك عيد وانت مع يوسف
تقبلي باقت الورد من ومن كرامله لأم رقيقة نعتز بها
سيد سعد

هههههههه فاتيما كتبتلك 3 مرات والنت يفصل بصى ياقمر انا بقى ورايا مجنون مضيع فلوسة علية بالجرى ورايا بسأنا قطعت نفسة طليقك عارف انك ضعيفة نفسيا عشان كدة بيبهدلك أنا لية صحاب وبخرج واللى بيتعرضلى بقطعة وألم علية الدنيا واللة بقم همة اللى بيخافوا انتى بس محتاجة شوية قوة وتفكير عقلانى طليقك حطك جوة دايرة من القلق والخوف وصدقينى مش هتقدرى تعمليلة حاجة الا أذا كنتى أقوى من كدة وبعدين كويت اية اللى يسافرلها هو كان مستنيكى تقوليلة وأن راح أخر الدنياأبنك هيرجعلك أخدى بس وحلى عندك ثقة فربنا وخلينا بس ناخد الموضوع بهدوء
لازم تضبطى علاقتك بنفسك وتبقى أقوى
لازم تفكرى اية اللى ممكن يتعمل بهدوء ومش لوحدك
لازم تخرجى من عزلتك لأن الكتابة هتفرغ طاقتك بس مش حل لمشاكلك
لازم تضبطى علاقتك بأبنك ومتكرهيهوش فأبوة مهما عمل لأنة برضة أبوة الأمان لازم عليكى كأم توفرية لأبنك حتى ولو بمكالمة او لو هو فيطن الحوت مش فحضن ابوة
قوى نفسك بس واتصلى بية او تعالى نتقابل ومتخافيش لو حد انشقت الأرض وطلع هرجعهولك تانى تحت الأرض
تحياتى

ما أملكش غير أنى أقول .... كل سنة و انتى طيبة و بالف خير يا ست الحزن و الجمال .. كل سنة و انتى زى ما انتى أجمل ام فى الدنيا قبل التلات ايام و بعد التلات ايام ... وربنا يجمع شملك على يوسف انه على كل شئ قدير .... تحياتى الخالصة من هناك ... من على حدود المجرة .

تلات تيام
واشوفك يا عمري
راجع تغني
راع تبدأ مع الاحلام
قصة جديدة
ومش جديدة
بس سعيدة
تلا ت تيام
وليا ف بكرة فرحة
وليا النهاردا سلام
تلات تيام
بيعدوا زى انبارح
زى الكلام
اللى بيطلع من ؟؟

تلات تيام

كل سنة وانتى طيبة
وانتى طيبة
طيبة
طيبة
اووووووووووووووووي
وحبيبة
اووووووووووووووي
يا احلى ام فى الدنيا

كريم بهي

سيد المكسرات
ازيك
امبارح كنت متضايقة و الشرر يتطاير من قلبى و قولت كام حاجة كدا ...
و معلش كنت بايخة حبتين و انا برحب بكراملة العزيزة
البونية أول مرة تزورنى فى المدونة أقوم أسقط عليها إحباطى و غضبى من حاجة ملهاش دعوة بيها
أعتذرلها بالنيابة عنى و النبى
و كل سنة و هى بخير و حماتك و حماتها بخير
و السنة الجاية بعايدكو بإعتبارها ام محتملة و سيادتك على وش أبوة
كل سنة و انتو أحباب
و أحبابى انا كمان
تحياتى الخالصة ليك و لكراملة حبيبتك

نرمين
طاقة النور
معلش يا نرمو امبارح كنت سخيفة و جت فيكو
أسفة اذا كنت اثقلت عليكو بس ساعات الواحد مبيقدرش يحتمل كم الغضب داخله و المدونة يظهر هيا اللى بتمتص دا كله زى ما قولتى
انا موش ساكتة يا طاقة النور
بحاول محاولات لكن مقدرش أسبق الاحداث و أقول
الحياة الحذرة اللى عشتها علمتنى مقولش و خلاص بقت عادة موش عارفة اتخلص منها
هحاول اعمل زى ما قولتى و اخرج للدنيا بس على الله الدنيا متعملشى فيا اللى عملته قبل كدا ...
و بدل ما اخرج للدنيا ... تخرجنى هيا منها
أوعدك انى هحاول التمس الطريق للخروج من النفق المظلم نحو طاقة النور
تحياتى يا نرمو

حازم
يا عصفور سافر على حدود المجرة
انت فين يا حازم؟؟
أختك امبارح و أول و اول كانت فى حالة ما يعلم بيها الا ربنا
كنت محتاجة أقرى كلامك ...
فيه ناس كدا بتشتاقلهم وقت الحزن عشان يقاسموك الشجن و انت منهم
بتغطس فين يا عم انا هشيلك من على حدود المجرة اللى مبعدة المسافات دى و السكة طويلة على قلب العصفور
يا دوب يرحل و يدوب يوصل و يدوب يحط
و خلاص اديتنى اللقب ... دا بتاع فيروز بس
كل سنة و انت طيب يا ابو الاحلام و الحنين

كريم يا ابهى من البهاء
كعادتك يا ولد ... حس الشاعر جوال بيقتنص اللحظة و يبروزها ...
تعرف لو يهمك رأيى يعنى اختك الكبيرة برضو و غاوية شعر و عندى نظرة نوعا ما فى كتابات الناس ...
يا ريت تركز فى كتابة الشعر بالفصحى ... هتبقى أوقع و أقوى ...
انت افكارك مميزة ...بس عاوزة تركيز اكتر و كمان الالفاظ الفصحى هتدى الفكرة تماسك اكتر ...
و لو عاوز تفضل تكتب عامى ... ليه متجربش تكتب أغانى ...انت عندك الامكانية بس محتاجة تفضل تكتب و تكتب لغاية ما تثبت الشكل ..ز
يعنى دا رأى كدا على قدى بس حاول و موش هتخسر ... أغلب شعراء العامية الكبار كانت محاولاتهم الاولى بالفصحى و بعدين لقو نفسهم فى العامية موش يمكن تيجى معاك بالعكس...
تحياتى يا كريم

لو انها متأخره
لكن معلشى
انتى عارفه الظروف
اجى بعد العيد علشان اهرب من الهديه
كل سنه وانتى وكل ام بخير وسعاده

دمعت عينى وانا اقراء كلامك يا ام يوسف
ولو انى جيت متاخره
اتمنى تكونى شفتى يوسف واخدتيه بين احضانك
ربنا يخليلك يوسف ويخليكى ليوسف
انتى ام كامله
مش نص ام
انتى عظيمه
وبس مش عارفه اكمل

يا عبده يا رايق
أهلا و سهلا
و موش متاخر و لا حاجة المهم انك جيت
و يا سيدى الهدية ملحوقة .. السنة الجاية يحينا ربنا و هتجيبها بقى انا فوتت المرة دى
كل سنة و انت طيب
تحياتى العطرة

خالتى فرنسا
بصى انا بفرح قوى لما بتزورينى ...
انتى غالية عليا متصوريش قد إيه
و معلش بقى .. المدونة جوها حزاينى و بيبقى غصب عنى ...
للأسف لم أراه و لم أحتضنه الا فى الخيال ...
بس أخدت أرنوبه المفضل فى حضنى و جنبى كل ليلة
مسميه نوتى ...عشان كدا حطيته أسمه فى إيميلى ..مودى نوتى ...
عشان أفضل اكتب حاجات تخصه كل يوم
تحياتى الخالصة لكى من كل قلبى
و كل سنة و انتى بألف خير و صحة

اولا اشكرك على السؤال والاحساس والاهتمام
ثانيا : انا اسفه انى مش قدرت ارد على التعليقات فى اخر بوست وانا كتبت السبب ولكن عشان انتى اهتميتى وعاوزه تطمئنى عليا عشان كده ممكن ارد على تعليقك ولكن فى مدونتك
انا قفلت الموضوع نهائى لانى مش باخد قرار الا لما افكر جيدا الاول وانظر للموضوع من جميع الزوايا زى مابيقول عبد الوهاب مطاوع لازم نلف حول التل لفه كامله قبل اخذ القرار

وانا لست واضعه موصفات فى ذهنى أولازم اللى ارتبط بيه يكونى مثلى تماما او مافهوش عيوب او ماحولتش افهمه ولكن ياعزيزتى فى حاجه اسمها نقطة التقاء وفكر مشترك وشخصيه تقدر تحتوى عقلى ومشاعرى ولو حتى كنا مختلفين فى حاجات أخرى وفى بعض الاراء . وانا بدخل فى عمق الاشياء ولا احكم على البشر
بسطحيه

هو انسان رائع بتمنى له السعاده ولكن طريقنا مش واحد وكل واحد منا بيتكلم بلغه غير الاخر عشان كده عمرنا ماحنفهم بعض نهائى

لا انكر ان الانسحاب من الموضوع كان مؤلم وكان مثل عمليه جراحيه لازم اجرائها بسرعه واى تاخر بيزيد فى الالم اكتر وصدقنى انسحابى لمصلحته قبل مصلحتى عشان مش يتعلق بيا اكتر من كده

وعموما ...انا احسن الان وهى ازمه او اختبار وحيعدى ياريت تدعلى خصوصا انى عندى امتحانات الدرسات العليا فى اول شهر 5 ولسه ماذكرتش بسبب هذا الموضوع
دعواتك ومتقلقيش عليا بخصوص هذا الموضوع ولكن هو موضوع اتقفل نهائى بالنسبه لى .

معلشى طولت عليكى ولكن سعدت جدا باهتمامك وسؤلك ربنا يديم بيننا هذا الصداقه الافتراضيه الجميله

تحياتى

نبضات
يا عرافتى الساحرة
خلاص يا حبيبتى مدام وصلتى لنقطة الارجوع دى يبقى خلاص
و أرجو الا يعاودك أدنى إحساس بالذنب مستقبلا و يكون احساسك الحالى بالذنب على إضطرراك للإنسحاب فقط ...
لكن لن تندمى على قرارك فى المستقبل ..
أصل عندى صديقة غالية قوى عليا ... إتقدملها ابن خالتها يتجوزها ... فى لحظات ارتباك و تردد و تباعد فكرى رفضته ....
قولتلها ليه متديه فرصة ... كان هو خد الصدمة و واحد صاحبه خده يخطبله أخته ...
و باعدت بينهم الأيام ... و قولت لصديقتى تروح لبنت خالتها تفهمها ان رفضها مكنش سببه ان الولد وحش بس هيا حست بالغربة معاه ...
و تعدى الايام و الولد يسيب خطيبته و يرجع يدور على صديقتى و دلوقتى متجوزين و عندهم ولدين زى الفل ...
كل ما نتكلم تقولى ... انتى الوحيدة يا فاطمة انتى و اختى اللى كنتو بتقولولى الموضوع دا لسه منتهاش و كنا بنشجعها تدى فرصة تانية ...
يعنى دا بيخلينى انصح الناس اللى بحبهم عموما يمنحوا الآخرين فرص و يسيبوا الزمن يداوى و يقرب مابين القلوب ...
عموما يا حبيبتى انتى أدلرى الناس بقلبك ..ز
و ربنا يسعدك دايما ...
قلب بيحبك كتير قوى

ربنا يسامحك يا ام يوسف
ربنا يسامحك
افتكرت امي الله يرحمها
وافتكرت اني ماجبتلهاش ولا هديه في عيد الام
وافتكرت انها دايما كانت بتقولي لما ظروفك تتحسن ابقى هاتلي اللي تجيبه
وافتكرت اني كنت ناوي اول حاجه اعملهالها لما يبقى معايا فلوس اني اروح احج بيت ربنا انا وهي
افتكرتها وهي في زي الايام دي كانت بتموت قدام عيني لحظه بلحظه وانا واقف عاجز ما املكش غير اني اعيط وادعي ربنا يشفيها
افتكرتها وهي في الحمام وانا باحميها وهي بتقولي انها تعبتني معاها وانا اضحكلها واقولها مانتي ياما تعبتي معايا وسهرتي جنبي وانا صغير
افتكرتها لما وقعت من طولها قدام عيني وجريت عليها اقومها من عالارض ولمحت في عينيها نظرة حزن
افتكرتها لما كانت تعبانه في اخر ايامها وانا عمال اقرى قرآن ولقيتني بانهار من العياط وباحضنها وهي نايمه وهي قامت من النوم مفزوعه قلقانه وخايفه علي وبتقولي مالك ياحبيبي بتعيط ليه
افتكرت كل ده
ولقيت اني لم اكن الابن البار بأمي
ربنا يرحمها برحمته
وربنا يرجعلك يوسف وهو راجل ملو هدومه
ويعوضك عن كل اللي فاتك

سلام

سووو
حقك عليا
بس ازاى تقول مكنتش بار بيها
اومال مين اللى كان بيراعيها فى مرضها و ياخد باله منها
و هى كانت عارفة دا و حساه ... و كفاية انها سابت الدنيا و هى راضية عنك
بص الدنيا ساعات تتحسب بالكم و تراكم الاحداث ... بس ساعات تيجى لحظات سحرية كدا تختصر اللى فات كله و تمسحه بأستيكة و تخلق شىء جديد ينسيك كل القديم
والدتك الله يرحمها مظنش انها افتكرتلك أى تقصير و مبقاش فى ذهنا الا سووو حبيبها اللى مموت روحه عليها حب
ربنا يكتبلك نصيب فى دعاها و ..
و يا سيدى كل ما ضميرك ينقح عليك ...أبقى عوض دا فى ولادك ...
و هى ساعتها هتبقى راضية عنك برضو
تحياتى يا عزيزى

أة
و كمان لما ربنا يفرجها أبقى روح حجلها مخصوص ...
هتتكتبلها برضو و تعوضها
و إدعيلها و هو يوصلها
... و قولى انت ملكش أخوات و لا إيه؟؟

و يا سيدى كل ما ضميرك ينقح عليك ...أبقى عوض دا فى ولادك ...
-----

هتصدقيني لو قلتلك ان عشان لحظة الفراق اللي انا عيشتها مش عايز لا اتجوز ولا اخلف عيال ممكن يزعلو علي لما اموت

يا سووو
متقولشى الكلام و توجع قلبى بقى
حرام عليك يا بنى دانت هتكون أب مثالى و تقدر قيمة الأبوة ...
و هتعرف قيمة اللى بتملكهو تحافظ عليه
ما فيه ناس متجيش فى قلبك حاجة و عندهم عيال زى الفل و مبهدلينهم و متخلنيش اتفتح بقى ...
و بعدين خايف تزعلهم و تكسر قلبهم ؟؟
يا سووو انت بتسيب ذكرى حلوة ليك فى الدنيا ... و تخيل ممكن تطلعهم ناس صالحين قد إيه أومال انا اللى مجننى إيه ؟؟... كان نفسى يكونلى سلطة أقوى على يوسف علشان أطلعه انسان كويس يساعد نفسه و يساعد الناس ...
محناش أنبيا نغير الكون ... لكن على الأقل عندنا القدرة نغير اللى حوالينا و نبدأ بأحبائنا ...
مقدرتش لحد دلوقتى أعمل كدا بس ربنا يساعدنى و أقدر ..
تقوم تيجى سيادتك تقولى ممكن بس موش عايز ؟؟
دانا عاوزة اربعة يحوشونى بقى ...
أوعى تقول كدا تانى ..ز
يا بنى الواحد ما بيصدق يلاقى ناس حلوة زيك ...
و والدتك الله يرحمها تفتكر لو سمعاك هتوافق على كدا يا أستاذ؟؟؟
طبعا لأ..
.. خلاص ...اتفقنا
ممكن الاربعة يمشوا بقى مشكرين أنا خلاص هديت
تحياتى يا عزيزى

إرسال تعليق