.

.

يوسـف و سـلـمى  

Posted by: فاتيما in


المشهد ليل خارجى
شارع رئيسى فى المنفى
- الله بص العربية دى يا يوسف ... اللى عليها ورد و زينة
بهدوء تام
- أه شايفها ...
بفرحة ممزوجة بالتمنى
- جواها عروسة و عريس ... عقبال يوم فرحك يا يوسف
بكل ثقة و تاكيد
- أنا هتجوز سلمى بنت خالو هانى ...
بنبرة إندهاش و مفاجاة
- ياااه جواز كدا مرة واحدة ...طب قول نطلب ايدها الاول و نشوف هتوافق و لا لأ
بيقين بالغ
- هتوافق طبعا
- يا سلام إيه الثقة دى ؟؟؟ايش عرفك انها هتوافق يعنى؟
- عشان هيا المرة اللى فاتت قاللتى فى الموبايل انها بتحبنى أد الكورة الارضية ...
محاولة لتوصيل معلومة غائبة
- أيوه بتحبك حب القرايب و الاصدقاء اللى بيلعبوا سوا مع بعض ...
بس يمكن لما تكبر تقابل ولد اسمه احمد مثلا فى الجامعة فى الشغل و تحبه و.....
مقاطعا بشدة
- لأ ... هيا هتتجوزنى انا موش احمد ...
- الله ... انت ايش عرفك ... ما يمكن تختار احمد
بغيظ و تحفز
- لأ ... احمد دا أنا هحطه على شريط القطر و اربطه
بدهشة بالغة
- إيه دا ؟.... إيه الاجرام اللى انت فيه دا؟
...طب ما القطر كدا هيعدى عليه و يموته و تخش السجن
بلا مبالاة
- عارف ...بس انا شوفتهم فى الكارتون بيعملوا كدا و محدش بيموت و لا حاجة
- دا فى الكارتون الكلام دا ... و بعدين انت فاكر لما تموته ... تفتكر ساعتها سلمى هترضى تتجوزك انشاءالله؟؟؟
يائسا و قبضة يده اليمنى تضرب الكف اليسرىو هى مفتوحة
- طب بلاش ... هضربه بالبوكس فى عينه بس
بنبرة مطمئنة
- بس ... طب والله كتر خيرك ...عموما لسه بدرى على الموضوع دا
بس أنا زعلانة منك على فكرة
مندهشاً
- ليه ؟
- عشان الحب موش بالعافية و عاوزك تتعلم لما تحب حد متفرضش نفسك عليه ...
يعنى إنا يا يوسف مشكلتى انى سبت باباك و موش بقيت بحبه
و هو عاوز يحبنى بالعافية زى مانت عاوز تعمل مع سلمى كدا ...
محبكش تكون عنيف و تبقى دى طريقتك بدل ما تتفاهم مع حد بالعقل ...
و كدا هتعمل زى بوش لما دخل العراق بالعافية و بيقول انى عاوز مصلحتهم و بحبهم ...
متراجعا كمن اكتشف شيئا
- لأ ... طب لو هيا موش عاوزنى خلاص ... بلاش
- يا حبيبى ... لما تكبر تبقى ساعتها تشوف
هتختارك و لا تختار أحمد و انت توافق على إختيارها و تبقى ابن عمتها و اخوها الكبير ...ماشى
مسلما بالأمر و مخفيا خيبة امل
- ماشى ... طيب
إقتراح بديل يظهر فجأة
- ماما ... طب ما نجيبها تقعد معانا لغاية ما نبقى نكبر ؟
برفض قاطع لصعوبة الفكرة
- مينفعش مامتها موش هتوافق تسيبها ...
و كل واحد أصلاً المفروض يقعد مع أهله يا أستاذ ميقعدش فى بيت حد تانى
بثقة مطلقة
- أنا هقول لخالو هانى و هخليه يوافق
اصلو بيحبنى و موش هيرضى يزعلنى و يقوللى لأ....
بتصميم بالغ على معرفة السبب
- أنا موش عارفة إيه اللى مخليك مصمم على انها تقعد معانا من دلوقتى يعنى ؟؟
مخفضا صوته كى لا يسمعنا أحد
- أقولك و متقوليش لحد ...
بهمس متبادل
- قول ....إحنا ماشيين فى الشارع و محدش عارفنا أصلاً ...هاااه
هامساً كمن ياتمننى على حياته
- عشان ألحق اتجوزها قبل ما تشوف احمد و يتجوزها هو !

This entry was posted on الثلاثاء, مارس 25, 2008 and is filed under . You can leave a response and follow any responses to this entry through the .

72 كــــلام بيطــبطـــب عـــلى قــــلبى و روحــــى

احترت معاكى و الله بوست يبكى و بوست يضحك ... يعنى لسه مخلص البوست اللى فات وباحاول ابلع دمعة مخنوقة جوايا وعمال افكر منين اجيب سور او حتى سلم خشب تطلعى عليه وتملى عينك من يوسف لدرجة انك خلتينى اشرب سيجارة مع انى مبطلها من زمااااااااااان وبعد ما عملت فنجان القهوة المتين رجعت اشوف البوست الجديد ومن ساعتها مش قادر امسك نفسى من الضحك عليكى و على يوسف وسلمى ... عشان لما اقول ست الحزن و الجمال ما تبقيش تزعلى اصلى استأذنت الست فيروز فى اللقب والست ما مانعتش ولا حاجة بالعكس رحبت و قالت

قديش كان فى ناس .... على المفرق تنطر ناس ................

تحياتى من على حدود المجرة و للمرة الاف نأسف على التأخير لكن دائماً ثقى بعودتى للمتابعة كما ثقتك من عودة يوسف بسور بقى من غير سور ... احنا وراه لحد ما يرجع ويا ريت تبلغيه ان خلاص مفيش احمد اللى حيخطف سلمى ... اصل عمو حازم .... خطفوا

تحياتى الخالصة و تقديرى الدائم

الحمدلله ان في ابتسامه ولو اني بطل عليكي كل فترة وبتوه في البوستات والتعليقات لو اني فاهمه الفكرة الاساسيه من المدونه
ومحترمه مشاعرك
ايه تاني
اه مبسوطه انك ضحكتي ومش فاهمه برضه هو معاكي ولا مع حد تاني
المهم انك بتشوفيه علي فترات
بيمد روحك بالامل
كل سنه وانتي طيبه

علي فكرة أنا حبيت يوسف أوي
انا لسة كنت علي مدونة "يوسف روح قلب ماما" واتفرجت علي الروسمات وعجبني اوي جو المدونة بجد حبيتها جدا

والمدونة هنا بحبها وبحب جوها اوي مش عارفة ليه , بحب الصور الأبيض والأسود وبحب الكلام عن يوسف وباتمني بجد اني ادخل مرة المدونة وأشوف صورته واعرف انه رجع بالسلامة
علي فكرة انا لو من يوسف هأحبك اوي ومش هأسيبك ولا لحظة في حياتي
ربنا يفرحك بيه عن قريب يا رب

التعليقات هنا عايزه موضوع تانى بجد
بتبقى كلها فكر وكبيره قوى
بس انا بس حبيت اقول انى رجعت تانى أستمتع بقرايتك وقرايه يوسف
بين كلماتك .. هو صحيح الحوار بيبقى طفولى قوى .بس بيعلمنى ازاى مثلا اعرف اربى ولادى وأغرس فيهم أفكار جميله
وعجبنى التطرق لبوش ولبابا
اقناع بالعقل
مش هيا كده وخلاص
يلا .. أدينا بنفضفض سوا
ربنا يجازيكى خير ع الجو اللى بتعيشينا فيه ده..سلامى ودعواتى كتير

بيعجبنى جدا اسلوبك حوارك مع يوسف واسلوب تربيتك ليه اسلوب مميز
وربنا يفرحك بيوسف وتشوفيه فى الكوشه مع من يختاره قلبه بعد مايكبر ويكتب له الله الخير والسعاده معها

والبوست جميل اوى اضحكنى كتير و كنت محتاجه للضحك ويوسف بنبونايه بجد ربنا يخلوهولك وعجبتنى جدا كلمه ان الحب مش بالعافيه وفعلا ... لما نحب حد نتمنى له السعاده حتى ولو مع غيرنا ومش ينفع نفرض حبنا على حد ولا نتمسك بحد مش متمسك بينا

تحياتى

خبيبتلا ربنا يخليهولك
نفس الحوار دة بيدور بينى وبين ابنى ع بنت خالتة زوزا ولبقولى هى بتحبنى وكل ما تتصل بتقولى هتجوزك وبالفعل البنت متعلقة بية جدا ومبتاكلش غير من ايدة حتى باباها دايما بيقولة يا واد انا مش هجوزك بنتى وابنى بيقولة بص انا فرض عليك وجوز بنتك غصب عنك
وينتهى الحوار بابتسامة واللة اعلم ما فى جعبة الايام
ولكن بالنسبة للبوست ويوسف تحياتى لك ولكل ام تستطيع التواصل بهذا الشكل مع ابنها وتعليمة الحب لا شئ غير الحب والرحمة واخترام اختيارات الاخرين
تحياتى لام جميلة جدا وطفل اجمل

يا اهلا بالامل....
يا اهلا بالتفاؤل...
ويا اهلا بيكي تاني .....بعيد شويه عن جدران الحزن والخوف....
بس مهم تبلغي يوسف
انه يخلي باله لحسن هو اللي يغير رايه
مش احمد اللي يخطف منه سلمى
تحياتي

بصي ممكن كل واحد يكتب ده عن ولاده، لكن ماحدش يكتبه - صدقيني - بالجمال ده، بقيت محتار معاكي، وأديني بأقولك للمرة العاشرة، كل بوست بتكتبيه بيأكدلي موهبتك، ومش فاهم إيه اللي معطلك، الكتابة موهبه لما توصل لروح الناس على طول، ولقلوبهم، ومن غير تزويق.. مش عارف أقولك غيه غير إن أنا وراكي والزمن طويل.. سلميلي على يوسف أفندي.. وقوليله بلاش حركات سي يوسف بيه وهبي دي (-:
خالص محبتي واحترامي

الأم الحنون /فاتيما
يا رب فرح قلبها بيوسف و تشوفه عريس جميل و أرزقها منه أحفاد..آمين آمين آمين
أبو خالد

هههههههههههههه
عسل يا يوسف
ربنا يخليه ويفرحه بحبيبته سواء سلمى او هو كمان هيقابل واحده تانية واسمها سارة ولا حاجه
المهم يارب دايما فرحان وسعيد ويحقق له ما يتمنى

ام يوسف حياتي

هو احمد دا ورايا ووراي يوسف كمان طالعلنا في البخت بس ما علينا نستحملوا بقه

انا نفسي كل ما اجي تكوني مبسوطه وحياه يوسف عندك

ماشي يابطوط

قولي ماشي ياووزة

وصل السلام لمحمد وانا اخدت البوسه
سلامووووووووز يابطتي

الله
وحشني جو مدونتك ده قوي
:) طريقة تعليمك ابلغ من القصص بمراحل
مع انك ظلمتيه شوية عشان مفيش حد زي بوش
بس بردو الولد كده مداركه تتفتح
ويوصل للي هو عاوزه
ولـ سلمى
:)
تحيتي اليك

مامت نور وزياد  

انا بقى عايزة من دلوقتي دعوة للفرح- باذن الله على سلمى- انا مش فاهمة ازاي تحبطي الولد كده ده بدل ما تفهميه يحبها ازاي؟؟؟ لا لا لا انا زعلانة منك قوي يا بطوطه !!! يظهر انك مش موافقة على سلمى مع انه اسم جميل قوي!! عموما اعتقد ان الست سلمى مش هتقدر اصلا تقاوم سحر يوسف ومين يقدر؟؟؟ دا الحسن هو يوسفه وربنا يفرح قلبك ويقرب البعيد وهانت لسه كام سنة ويتجوز وا؟؟
على فكرة اشكر لك زيارتك الجميلة وخطوة عزيزة وشرفتيني
زيانور

شقيقة الروح ام يوسف

لن ابالغ صدقينى .. لن اجامل او ابثك كلمات بغرض التعليق ليس الا او كرد على تعليقاتك العذبة الرائعة التى تشرفينى بها كلما زرتينى فى مدونتى المتواضعة .. فقط سأقول شعورى بصدق فكلما دخلت مدونتك هذه او الاخرى امتلأت عينى بالدموع وشعرت بالعجز لعدم استطاعتى حتى التعليق على كلماتك الموجعة

شقيقة الروح .. انت انسانة جميلة وام رائعة ثقى من رحمة الله التى وسعت كل شىء
كم احب هذا الالتفاف الجميل من اصدقاء المدونة الاعزاء حولك واريد ان تقبلينى واحدة مستجدة لكنها قديمة بحكم الاشتراك فى الالم على اختلاف نوعه

عزيزتى البوست الاخير به ابتسامات شجعتنى على ان اكتب لكى تعليق دون ان ابكى !!انت ام رائعة فعلا تعرفين كيف تبثين طفلك لغة الحوار ومفردات التفكير السليم والشعور الانسانى .. اعاده الله لكى بكل خير وسلامة

ادعو لكى من قلبى ان ينصركى الله ويثبتكى ويثيبك خيرا على صبرك الجميل

دمت اما رائعة ليوسف
وادام الله عليكى حبه

هدى

ربنا يرجعه ليكي بالسلامة يارب


ويفرحك بيه


وتشوفيه زي ما بتحلمي يكون


تحياتي

حاااازم
يا عصفور آرقه الحنين ....
أنا محتارة و الله أكتر منك ... بس مبسوطة انه عجبك ...
و دخنت سيجارة بعد ما بطلتها !!... لأ بقى انت بتتلكك ....
يا عم صحتك ....
و يا سيدى ما اسعدنى باللقب ... لأنه آت منك فيغمرنى بالفرح
و تأخيرك دا موش عارفة سببه إيه بس موش هغلس عليك بأسئلة خاصة يعنى ...
بس الواحد من كتر ما هو مفضوح قدامكو ... عاوز برضو بفضول يعرف عنكو اكتر ...
بتغطس تروح فين يا بنى بس ؟؟
آه ...
عرفت ...
رحت فى عملية كوماندوز تخطف احمد
طب و الله فيك الخير و يوسف هيشيلهالك جميلة
و منتحرمش منك أبداً
و كفاية سفر و ريح العصفور شوية عاوزين نقرى بوستات جديدة فى أحلامك ..
تحياتى الخالصة يا عصفور

بنت القمر
منورة ..انتى بالذات لازم تنورى
يا عزيزتى أشكرك على مرورك و سعادتك لسعادتى و بسعادتى ...
أنا عارفة ان الحكاية بتلخبط ...
بس يوسف موش معايا فى الواقع هوه مع باباه ..
لكن هوه بالخيال و فى القلب معايا و كل حكاياتى اللى بكتبها دى من وحى الماضى و ذكرياتى و حوراتى معه..زفى ال8 سنوات الماضية ...
ساعات افتكر الحاجات الحلوة و اكتبها ..
و ساعات قلبى يوجعنى و أنثر الآلآمى على الملأ ...
و مابين دا و دا ...الحب كدا
على راى الست ....
تحياتى ليكى دائما

سنوايت
يا اميرة من الحواديت
اولا ... أزيك
ثانيا...انتى بتقرى أفكارى و لا إيه ؟؟؟
أنا ناوية لما يرجع احط صورته ... فعلا
عرفتى أزاى انى هعمل كدا ..؟؟؟
آه نسيت
ما انتى أميرة من الحواديت و لازم تكونى عارفة اللى ورا الخيال ...
اشكرك على رأيك فى المدونتين ...
و لما يعود روح قلب ماما ستكونين من أوائل العارفين يا اميرة ...
تحياتى و حبى

مصطفى ...
يا روح شفافة
عامل إيه فى الامتحانات ..هه
و الموود بقى احسن ؟؟
طب الحمدلله دايما ...
يا سيدى قدركو كدا بقى هتعملو إيه ...شوية نكد و شوية سذاجة من بتاعة العيال ... بس الولد كانت حوارته تقريبا كدا ...
يعنى لذيذ و ذكى و ساعات أحس ان الواد موش أبنى ...
أقعد أقول الواد موش طالعلى خالص و ما شاء الله عليه نبيه و سابق سنه ..
عقبال ما اشوفه دكتور زيك يا مصطفى
يا رب
ما يحرمنى من كل اللى بحبهم زى ولادى و انت منهم
تحياتى ليك يا روح شفافة تحوم حولى

نبضات
يا عرافتى الساحرة
أزيك يا حبيبتى
أمبارح جيتى على بالى و انا بتفرج على عمر خيرت فى حلقة العاشرة مساءاً ... عزف خللى بالك من عقلك اللى بنموت كلنا فيها و عزف العرافة و العطور الساحرة و اللى بتفكرنى بيكى قوى ...
مبسوطة ان التدوينة ضحكتك ... أنا شخصياكنت موت من الضحك فى الشارع لما قاللى هضرب احمد بالبوكس فى عينه .. بس
الأطفال مينفعش حد غيرهم فى الكون يكون احباب الله ...
اللقب دا حصرى ليهم ...
تفتكرى فيه مخلوق تانى بجمالهم دا ...
و الحب موش بالعافية ... بس مين يقدر على شيطانه و يبعد فى هدوء ؟؟
تحياتى يا حبيبتى و عرافتى الساحرة

كلاكيت تانى و تانى
الله ...
هيا العيال دى مربطة بينها و بين بعضيها من ورانا و لا إيه؟؟؟
طب أنا فاكره أول قصة حب فى حياتى كانت فى رابعة أبتدائى و دا على أيامنا كان يعتبر أنحراف ...مع انو كان حب مكتوم فى قلبى و الله و محدش عرفه غير اصحابى فى الفصل و المدرسة و كل العمارة بتاعتنا أصلو كان جارنا ...
و العيال دلوقتى مظبطة المسائل من الحضانة و داخلة على جواز موش لسه هنحب بقى و ندارى و الكلام العبيط بتاعى دا ...
عموما البنت بنت خاله و من العيلة و عارفة البلاوى كلها يعنى موش لسه هنشرح و نقول ...
و الأهم من دا كله ... بتموت فى يوسف و كل ما تزورنا تسالنى عليه و تقولى يوسف وحشنى ...
بالأختصار الواد عامل شغل تمام زى الباشا بتاعك
و ربنا يفرحنا بيهم مع واحدة بنت حلال و خلاص ..ماأحنا أصلا محدش فيهم هيسيبنا ننقى لهم ...
تحياتى يا نرمو يا حبيبتى

يا خايف من الحقيقة
أتمنى دائما ان يكون حالى احسن لكى لا أطبع عليكم أحوالى ...
عارف أصدقائى يطلقون علياساعات لقب ...
سيدة التناقضات ..ساعات تلاقينى مغمورة بمشاعر عدة و مختلفة و متصارعة فى وقت واحد ....
و انتو وقعتو فى ملقف بقى
هتعمل إيه فى الورطة دى ؟؟؟
و ليه بس نقول الحقيقة كدا فى وشه مرة واحدة ..
أقولهاله بالتدريج أحسن ..
و يا سيدى يا عالم
موش يمكن ربنا يقسمهالو ....
تحياتى ليك و لست الناس

د.زين الغالى
رأيك فى أسلوب كتابتى ...يملؤنى بالفخر ...
لما الإطراء يأتى من اديب كبير زى حضرتك ....
بس انا بكتب اللى حصل بالظبط ..
هذا الأسلوب من فعل يوسف ...
موش عاوزة أقول لحضرتك ان تعبيراته دايما أكبر من سنه ...
و تلاقينا احنا الاتنين قاعدين بنتكلم بالنحوى ...
و كان بيتابع معايا البرامج الاخبارية و تقريبا عارف معانى المصطلحات المكلكعة ... كنت أسأله و يجاوبنى بإجابات مدهشة ... تلجمنى و تشعرنى بالنشوة
أنا أم لهذا المخلوق المميز ؟؟؟
يوسف هو اللى بيكتب موش أنا يا دكتور ...
و رتوش يوسف وهبى ضرورية ...
موش يعنى ..
ما الدنيا الأ مسرح كبير ؟؟
و يوسف هو البطل
و هو روح قلب ماما
تحياتى يا فيلسوف

ههههههههههههههههههههههه
ربنا يخليهولك يا فاتيما
ويارب يتجوز سلمى ابن خالى هانى
اهه برضه اللى نعرفه احسن من اللى منعرفهوش ولو انى ضد فكرة جواز القرايب
بس محدش عارف النصيب فين
ربنا يحميه يارب وتفرحى بيه يا فاتيما
اختك خيخة

يا رب
تسمع الدعاء من هذا الرجل
الطيب ذو القلب الكبير ...
و طمئن قلبى على يوسف
و طمئن قلب الراجل الطيب دا علينا
و أمنحه قدر ما يملك من قلب كبير
خير كبير
يا رب

قطة الصحراء
قطتى الحلوة
انتى اللى عسل و سكر
و كل سنة و مدونتك بخير
و غيرتى النيولوك لنيونيولوك ليه؟؟؟
بس القطط الكتير دى حلوة قوى ..
أنا و يوسف مجانين قطط و بكرة لما يرجع هيركن قصاد مدونتك للصبح ..
و هتدوها نونوة انتو الاتنين بقى
و سارة والله أسم جميل قوى ...يللا شدى حيلك و خلفيلنا بنوتة و اديكى عارفة البير و غطاه و أستروا على الواد بقى و اكسبو فيه ثواب ...
تحياتى يا قطتى الحلوة

وزة القمرين
يا ماما أصلا كل قصص السينما زمان كانت ...أحمد و منى
و كل فصل ندخله تلاقى اتنين تلاتة أحمد والجامعة كذلك ... و الشغل صعب متقابلش فيه حد اسمه احمد ...لا يوجد اسم يوازيه فى الشهرة و الذيوع سوى أسم محمد ..و طبعا السبب معروف ...
اللى جه على بالى ساعتها بقى ...
كان المفروض اضرب أى أسم تانى ...بس يظهر بقى الأسم دا فيه حاجة كدا ملمسة ...
عموما يوسف بقى متضامن معاكى وجدانيا ...و بس يرجع و هو تحت امرك فى اى خناقة ...
تحياتى يا حبيبتى يا قمرين

احمد
يا اجمد فنجان قهوة يعدل الدماغ ...
أزيك و يا سيدى فينك ...
حتى مدونتك أنت لا تزورها الا قليلا ..
بتغطس فين انت كمان بقى ؟؟
و حكاية بوش دى جت بالصدفة والله فى وسط الكلام ...
أصل يوسف كان عايش معايا لحظة بلحظة غزو العراق .. و جبنا صورة لبوش من الجرنال و عملنالو قرون شيطانية و عملناها لافتة و كنا بنتظاهر جوا الشقة ضد الراجل مؤذى دا ...
و كان بيعيط معايا و يطبطب عليا لما شوفنا الولد اللى أسمه على اللى قذيفة فتلت كل أسرته و قطعت ذراعيه و قدميه و أحرقت كل جسده ...
قعدت أبكى و يوسف يطبط عليا و يشتم فى بوش .. و عرف ساعتها ان الراجل دا هو السبب فى اللى حصل لعلى ...
يمكن التصاقنا سوا بسبب الظروف خلته يعيش معايا حاجات اكتر من سنه ..
و دا الحمدلله خلاه أوعى بكتير من أطفال فى نفس سنه ...
اسعدتنى زيارتك و تعليقك ...
تحياتى الخالصة

مامت نور و زياد
يا حبيبتى دانا مقصرة معاكى و الله
و أزاى تقولى انى موش موافقة على سلمى ؟؟
هو أحنا نطول تبقة مرات أبنى ...طب بس يوافقوا هما ...
دى بنت أخويا الغالى هانى ..اخويا الكبير اللى شالنى طول السنين السودا دى ..ز و رفيق عمرى من و احنا عيال و بينا أقدم صداقة فى عمرى كله ..ز
و البت سلومة أصلاً قطعية منى ...
يعنى مجرمة و شقية و مشاغبة و مامتها و باباها بيشتكو منها ...يعنى لبط زيى و مستقبلها مبشر ...و ربنا يكتبلها نصيب غير نصيب عمتها ان شاءالله
و يا ستى انتى معزومة من دلوقتى انتى و الكتاكيت بس بشرط ... تفقعينا زغروطة من على باب القاعة

هدى
يا ألوان السما السبعة
يا حبيبتى ...
أكتبى تعليق وقت ما تحسى انك عاوزة تكتبى ..و أمتنعى وقتما تريدى أو تشعرى انك لن تكتبى شىء من قلبك خالصا ...
يكفينى اننا على البعد نتلامس روحيا ...و يوما ما سنتقارب كما نفعل الآن ...
انتى شقيقة روحى فى الألم ؟؟
أرجو أن نتقاسمه سويا فيقل حجمه مع الأيام ..
و التفاف المدونين الاعزاء من حولى ...
يا خرابى يا هدى ...
أنا طايرة فى السحاب منكو ...ساعات أحس من تعليقات رائعة هنا ..انى نايمة و حد هييجى يصحينى من الحلم الحلو دا ...
أنا سعيدة بهذا الحب و أرجو أن أكون التى تستحق هذا الحب و تحافظ عليه قدر ما تستطيع
و أهلا بك دائما يا عزيزتى
و شقيقتى

نانا
خطوة عزيزة
و نورتى مطرحنا المتواضع
أشكرك من قلبى على دعوتك الخالصة
و قلبك فيه الخير بقدر ما يدعو لواحدة غريبة و لأبنها ... و انتى لا تعرفينى
و لا اعرفك
لكن ربنا عارفنا و عارف اللى فى قلوبنا
و سعيدة بزيارتك و ارجو ان تكرريها
تحياتى العطرة

نوران الغالية
ما هو سيادتك لو اتجدعتنى كدا و نفذتى شوية نصايح من النصايح أياها اللى كتبتيها فى بوست قديم عندك للنساء فقط ...طبعا فكراه
لو بس عملتى بشوية نصايح منها ... هتجيبيلنا عروسة موش من القرايب ... بس يعنى هنجيب عروسة منين ...
حتى كل أصدقائى مخلفين ولاد ...تصورى !!
أقولهم حد يبين كرامة و يخلف تانى يمكن تيجى بنت عاوزة عروسة للواد ..ز
يقولوى و افرضى جه ولد .. تبقى دبستينا فى واحد زيادة و يقعد جنب اخواته ؟؟
و بعدين البنت عسولة خالص ..
و بتموت فيه
و هوه بيحبها قوى
و متمسك بيها جدا لدرجة إحداث عاهة
يبقى أنا بقى اللى هقف فى طريق حبهم ؟؟؟
كفاية الزمن هيقف ... بس انا موش هسكتله .. و أنا كمان هقفله..
تحياتى ليكى و لشريف حبيبى

ياستى خليه يتجوز سلمى فى الكارتون بتاعه براحته

بكره يكبر ويتصدم بالواقع زى ما حصل معانا كلنا
بهيه هتستناكى

صباح معطر بالورد والياسمين
انا شفت حلقه عمرو خيرت بس للاسف مش من اولها وكنت زعلانه اوى انى مش لحقتها فى اولها وتخيلى يافتيما انى افتكرتك زى ماافتكرتنى وقلت لو كنت اعرف رقم موبيلها كنت كلمتها عشان تشوف الحلقه الساحره ديه قد ايه كانت حلقه جميله وساحره وانا كان نفسى اسمع موسيقى فيلم تيمور وشفيقه لانها من روائعه ايضا ومنى الشاذلى من افضل المذيعات ودائما اسئلتها لضيوفها واسلوب حوارها مميز عن غيرها
لذلك استمتعت بالحلقه لان المحاور كان مذيعتى المفضله منى الشاذلى واختيارها ان يكون اللقاء فى الاوبرا اعطى جو للحلقه رومانسى ورفيع المستوى يليق بالكلام عن الموسيقى وعن الفنان عمرو خيرت
على فكره ...انا شفت حوارات مع عمرو خيرت فى برامج متعدده وعارفه انه مش بيعرف اوى يعبر بالكلمات لانه بيعبر اكتر بالموسيقى وهو مره قال كده
ولكن مع منى الشاذلى حسيته مستمتع بالقاء اكتر واكثرا تعبيرا من اى لقاء اخر وهذا كله يرجع الى المذيعه اللامعه فى ثقافتها والمامها بكل شىء ليس فى مواضيع السياسه فقط ولكن فى الموسيقى ايضا وحوارتها الصريحه والجريئه والممتعه فهى فعلا تستحق الاحترام والتحيه
والفنان عمرو خيرت لايوجد عندى كلمات اوصف بها رقه مشاعره واحساسه المرهف الذى ينعكس فى موسيقاه المميزه والساحره التى تعزف على اوتار قلوبنا عندما نسمعها
وعلى فكره يافتيما انا بسمع الفنان عمرو خيرت منذ 15 سنه تقريبا منذ كنت صغيره وكان لسه ماحدش يعرفه

اسفه على الاطاله ولكنى بعتبر انها فى بيتها برده يعنى زى مدونتى

تحياتى

أنا بأهني يوسف بجد علشان ثلاث حاجات
أولا إنه لما حس بحب للبنت مافكرش غير في الزواج يعني الإطار الصحيح للعلاقة و ده دليل على صحة النشأة و النفسيه
و ثانيا إنه لما عرف إن العنف مش الطريق لتنفيذ الموضوع إستخدم الحيلة و ده دليل على إنه زكي
و ثالثا إنه ماأستسلمش و قرر إنه يحارب علشان حبه ده
فاضل حاجة واحدة بس ناقصاه علشان يضمن إنه يتجوز سلمى
الحاجة دي هي أنه يعرف يحبها إزاي ، يعني يعرف البنت كويس و يشوف الطريقة المناسبة ليها في تعبيره عن حبه ده
تحياتي لطفلك المميز
KING TOOOT

هو انا جيت متأخرة ليه عاااااااااااااا
اسف يا حبيبه قلبى

بجد ضحكتينى خالص يا رب بقى يطمن قلبك
بس بجدك كلامك بيعلم ناس كتير تتعامل ازاى مع اولادها

مغنواتى بهية
بص يا سيدى ..
انا دخلت مدونتك و قلبى معاك ...بس محدش عارف النصيب فين يا عزيزى ...
و ساعات النصيب مفيش حكاية الفلوس و النفوذ و الحاجات دى ...و دا بناءاً على تجربة موش كلام و بس
... و بعدين متخوفنيش بقى ...
انا لما قريت عن حادثة تحرش وسط البلد بقيت مرعوبة و قعدت أقول يا رب متخلنيش اشوف يوسف فى يوم زى الولاد دى ... بيعبر عن غضبه و كبته بكدا ...
اتمنى لك كل خير و ربنا يقسم لكا واحد اللى فيه الخير ليه ...
تحياتى الخالصة

نبضات
عرافتى الساحرة
يا حبيبتى القلوب عند بعضيها
أنا بقى عجوزة شوية و بسمع عمر خيرت من سنة 86 لما نزل شريط وهابيات ..ز
كنا فى الخليج ساعتها و شوفت الشريط فى محل الكاسيت و قولت ايه الراجل اللى واقف بشموخ دا و بيشاور بعصايته ... كنت بجيب شريط لعلى الحجار و منير ...قلت أما أجيب الشريط دا موش مشكلة يعنى ما بابا اللى هيدفع ...
و لما جبنا فيلم خللى بالك من عقلك سمعت المزيكا وو قعت فى غرامه ...
بصراحة هو يستاهل يتوقع فى غرامه ... لأنه عاشق حقيقى ...
كل العمر دا و لسه محافظ عليا و عليكى و على كل حد حبه ...بيقوم بواجبه و يروى شجرة الحب دى لحد ما بقت بستان يسر الناظرين
و يا حبيبتى طولى زى مانت عايزة ..
انتى قولتيها دى مدونتك فعلا
تحياتى يا حبيبتى و عرافتى

وليد يا راعى الملك
بص انا مقصرة معاك و سامحنى ..
ثانيا أشكرك على كل اللى قولته على يوسف ..أنا فخورة ان الواد الحلو دا أبنى ...
و بس يبقى معايا و انا اعلمه ن كتاب الحب فصول و فصول ...متوصينيش دانا واخدة ماجستير فى الموضوع دا ...
الحب موش بس قلبك يدق ...الحب ان تسمع حبيبك دقة قلبك ...
و أنا حاولت أعلمه دا ..زانه يقول للى حواليه دايما كلام حلو .. كلمة بحبك من الحين للآخر ... هدية كدا من غير مناسبة ...دلع بقى بالهبل و كان دايما يقول لمامتى اللى هيا جدته ..يا قطتى ..
و الحاجات البسيطة دى بتأثر ... و سلمى فى مرة كانت عندنا و زعلانة موش راضية تاكل ... الكل اتحايل عليها مرضيتش ..محدش قدر عليها غير يوسف و قعد ياكلها بأيديه ..لما هانى اخويا و باباها .. زعق كدا تمثيل .. و قال لمراته اتفرجى يا هانم على بنتك ..طب موش قدامى الكلام دا ؟؟العيال دى متتسبش لوحدها خالص ...
لا تقلق يا وليد ...الواد حبيب قوى
شكرا لمرورك و تعليقك الودود

آبى الجميلة
بس يا حبيبتى متعيطيش ...
لأ .. قلبى ما يستحملش كدا طب اعمل إيه دلوقتى بس ؟؟؟
خلاص حقك عليا ...
و صحيح الكلام دا ؟؟؟
طب كويس يعنى الواحد بينكد عليكو .. بس بيعمل حاجة مفيدة برضو ...
يا حبيبتى دايما منورانى و مبسوطة بيكى قوى قوى
و أزاى الخرفان الحلوة بتاعتك

أنا آسف على التاخير
حضرتك عارفة الظروف
بس بجد البوست ده جميل و روحه حلوة
بأحب كتاباتك المفرحة
و بأتأثر قوي بكتاباتك الحزينة
كتاباتك بتوصل للقلب علطول
ربنا يريح قلبك
و يطمنك على يوسف في حضنك

الكرتوب بيبوظ عقل العيال
وبيخليهم يفتكروا ان القتل ده سهل
بجد ربنا يستر عليهم وعلي عقولهم

وحشتينى مدونتك الجميلة

وكلامك الحلو والروح الجميلة

تسلمى

احمد

هو على حسب ما فهمت يوسف يبقى ابنك؟
ماشاء الله ربنا يخليهولك وسيبيه يتجوز سلمى
ههههههههههههههههههه
حوار رائع بجد ماشاء الله

فاتيما
ما رأيك ان نقوم انتى وانا ومدونة اؤلنيم الشتاءاريج السمر بعمل مدونة للمطلقات فقط ولنتفق ع اسمها لاحقا انها فكرة تلاحقنى كلما فتحت مدوناتنا ووجدت التشابة فى انفعالاتنا ومشاكلنا وجروحنا
نستطيع ذلك سويا
ما رأيك
سأنتظر ردك

فاطيمة
احلى ام فى الدنيا

تحياتى
معذرة
لانى مقل جدا فى الزيارة بسبب الظروف
احب لو تزورينى
وتقري
اخر بوستين ليا

اكرهينى
وانساااكِ

ربنا يخلى ويوسف وسلمي

يااارب
كريم بهي

مهندس يا مصرى
أزيك يا محمد ..
و متتأسفش على حاجة ... انا عارفة الاستعداد للسفر بيبقى ملهوج الواحد و ملخبطه إزاى ...
و خلينا نتدرب شوية على الغياب عشان لما تسافر ان شاء الله هتلاقى ميت حاجة تعطلك عن التعليق و يمكن بس تعرف تزونا و متلاقيش الوقت تشارك ...
بس احنا مقدرين ... و مبسوطين قوى عشان يمكن حالة القرف اللى لازمتك تنتهى ... و تفضل علطول مبتسم إبتسامة الخلاص ...
و سعيدة جدا بأنك مهتم بمدونتى و حريص على زيارتى
و بلاش حضرتك دى ..أنت زى اخويا و ..أخويا مبيقوليش حضرتك دى الا لما بيكون غالبا بيتريأ يعنى ...طبعا عارفة انك بتقوله شياكة و أدب ..
بس قول يا فاطمة ..يا فاتيما ..يا أم يوسف ... يا مامت يوسف ...
أى حاجة إحنا اخوات ...
تحياتى و ربنا يباركلك فى كل خطوة تخطيها ان شاء الله

مفقوعة مرارتها ...
يا حبيبتى بصراحة الكارتون بالنسبة لى كان عامل مساعد ..
يوسف بقى شاطر فى اللغة العربية و الألفاظ و التذوق الادبى من غير ما يكون راح مدرسة ..
و السبب قنوات الاطفال
دا غير المعلومات العامة و تنمية الحس الفنى و توسيع الخيال ...
بس طبعا لازم نقول من حين لآخر على حكاية العنف دى ...انها موش حقيقة
بس يا ستى ربنا بيستر ...
و الواقع فيه اللى أعنف و أصعب من اللى فى الكارتون ...
و اظن الست حماتك مثال ناطق و حى على كدا
ربنا يعينك يا ماما و تحياتى

وائل
لأ
يوسف موش أبنى
يوسف يبقى
روح قلب ماما
يعنى اكتر كمان من أبنى يا وائل
و يا سيدى أنا سيباه أهو ...
المهم الزمن يسيبهم فى حالهم بس
سعدت لمرورك و ارجو ان يتكرر
تحياتى العطرة

كلاكيت تانى و تانى
يا نرمو يا جميلة
بصى .. هيا فكرة جميلة ..
بس موش عارفة ليه مبحبش حكاية المدونات المجمعة دى ...يمكن لأنى خدت على الوحدة ...و لا بحس انكأنى قاعدة وسط ناس كتير و موش هعرف ألمس شخصياتهم كل واحد على حدا ...
أنا أسفة ..
و موش عارفة ليه كل ما تشجعينى على حاجة ..أطلع رخمة معاكى...
بس معلش بقى ..
لكن تأكدى ان لما مدونتكو تتعمل هكون من كبار المعجبات و المعلقات فيها
تحياتى يا حبيبتى

أحمد الصباغ ...
معلش حقك عليا عديت دورك ...
معاش انت عارف اختك بقت عضمة كبيرة و شايفة بالعافية
و العتب على النظر ...
أنا مبسوطة جدا بزيارتك دى ...
أرجو ان ينال الكلام اللى بكتبه دايما اعجابك
و تحياتى للمخاليل الحلوين

كريم يا أبهى من البهاء
يا سيدى و لا يهمك ...
و تيجى فى أى وقت يريحك و يعجبك و يناسبك ...
و حالا هروح أقرى البوستات المتميزة بتاعتك ...بس عالله الاقى كلام أقوله يكون حلو بما يتناسب مع جمال ما تكتبه ...
تحياتى يا صديقى الصغير

متأخر اوى بس لازم اعلق
واعلق لقول اية بعد كل الكلام دة
عارفة يا فطومة احلى حاجى بالقيها هنا فى مدونتك اية
الجو الأسرى اللى عاملاه
بحس انى قاعد معاكوا وبنشرب فنجان قهوة
بحس ان المعرفة معرفة شخصية
مش من خلال المدونات بس
بحس كدة بجد
اما البوست فمفيش كلام اقولة اكتر من اللى اتقال
سعيد بابتسامتك
ومتهيألى انة ناقص زغروتة من بتوع ابى الجميلة
هتبقى حلوة مع ابتسامتك اللى مش لوحدى كنت مستنيها

ربنا يريح قلبك
يا رب

تحياتى

حاضر يا ستي
من هنا و رايح حأقول أم يوسف أو فاطمة
:)

بصراحة مدونتك حلوة قوى وفيها حاجات توجع القلب من جوا

انا تقريبا قرات كل الموضوعات وحاسة فعلا بيكى ومقدرة مشاعر ام

واتمنى اشوف موضوعات جديدة

ههههههه
احلي حوار تعمليه مع طفل خياله واسع و لبق....ربنا يخليهولك يا رب
فكرتيني بأحمد حلمي في لعب عيال

عمو
نورت المطرح كله يا عمو
و انت بتقول على مدونتى جوها أسرى ؟؟؟!
يا راااجل
طب قول جوها بيفكرك بمحكمة الاسرة
ب أريد حلا
حاجة كدا ...
بص الجو الأسرى اللى بجد و حقيقى تلاقيه فى مدونة أختى و حبيبتى و الغالية عليا
نوران اللى هيا
بت خيخة و أى كلام ..
اللينك بتاعها فى الشريط الجانبى تحت عنوان
كيف تصبحين أماً
هتلاقى نفسك كأنك فى بيت العيلة بالظبط ...
و كل الحبابيب اللى اللينكات بتاعتهم عندى فيهم نفس الألفة و الجو الدافىء
الارواح جند مجندة ...
و هو دا كان أحساسى لما دخلت عالم المدونات السحرى دا و طلعت فوق السحاب
أرجو ان تزورنى دائما ...
شرفت بمرورك جدا
تحياتى الخالصة

مهندس يا مصرى
يا فندم إحنا نتشرف بكده
أختك فاطمة أو أم يوسف

أهو دا عيبه
شكرا بشدة على رأيك فى المدونة
أوعدك انى هحاول أغير فى المواضيع ..
بس غصب عنى بلاقى كل الحاجات بتصب فى الآخر فى اتجاه واحد ...
على فكرة زرت مدونتك ..
عجبنى قوى أسلوبك و رشاقة تعبيراتك
و اللى يجنن فعلا هو شكل المدونة و ألوانها ..أختياراك هايل
أنا أصلى عيلة قوى و بحب الألوان و الدندشة دى ...و بنفس عن ده فى مدونة الواد يوسف روح قلب ماما ...
أرجو ان تطلى علينا دايما و نورتينى
تحياتى العطرة

كوكو الكميل
يا كتكوتة ...
ميرسى خالص
و قصدك إيه ؟؟
أنا شبه أحمد حلمى برضو؟؟
عيب قوى كدا
دانتى بتظلمى الواد خالص و بتوقفى سوقه
الله
نسيت دا متجوز خلاص ...
طيب
ماشى شبهه شبهه
بس انا فعلا شبهه فى حاجة ...
اننا إحنا الاتنين بيحصلنا نفس الدهشة و المفاجأة لما بنتحاور مع الطفل المدهش اللى قصادنا دا
أظن كل اللى عنده أطفال بيمر بنفس الدهشة دى لما بيدلهم ودانه حبيتين و ياخدوا عليه ...
عموما أنا موافقة أكون شبهه بس يدونى تمن أجره فى الفيلم الواحد و بلاش نصيب من الايرادات ...
أنا قنوعة خالص أهو
تحياتى يا كوكو يا كميل

ههههههههه والله يوسف ده ذى العسل ربنا يحميه ويخليهولك

فاطيمه
يوسف ماشاءلله ذكى ولماح وعنده روح تصميم عاليه اكيد حيطلع حد كويس اوى اوى انشاءلله وحيحقق كل اللى بيتمناه
وربنا يبعد احمد عن سلمي يارب وتبقي من نصيب يوسف يارب
:)
ربنا يرجعه لحضنك بالسلامه قريب

هههههههههههههههه
طيب استنى انت يا يوسف لما تشوفني
يمكن احلو فى عينك وتسيبك من بنت خالو هاني

موناليزا
منورة خالص
و متشكرة على رأيك فى يوسف خالص
تحياتى الخالصة

نسرين اللى فاض بيها
أهلا و سهلا
ازيك
و انطباعك عن يوسف بيسعدنى و يحسسنى انى عرفت أوصل صورته صح و أخليكو تحسو قد إيه هوه طفل لذيذ و ذكى و أرجو ان يسمع الله دعائك
و اشوفه احسن الناس يا رب
تحياتى يا حبيبتى
و جبتى منين الصورة الغريبة اللى فى بوستك الأخير دى؟؟؟

لماضة يا طعامة
انتى فين يا بنوتة يا قمورة
وحشانى يا حبيبتى و وكمان وحشانى لماضتك
و بعدين يا فندم إحنا نطول ...
بس أنا ميخلصنيش أزعل عم مراكبى نبع الحكمة بتاعى ...
و أنا فهمت كدا ان المواضيع اتظبطت معاه خلاص ...
و انا عمالة أدى للواد دروس فى ان لا تتعدى على حبيبة غيرك و تحطم قلب عصفورين ...
تيجى انتى و عاوزنى أبوظ المسألة كلها ...
و احطم قلب أبن الباشمنهدس الراجل الكومل السكرة بتاعنا
لأ ...
متجيش خالص
و أنتى و يوسف مشوها أخوة و خلاص
تحياتى يا حبوبتى و حضونة كبيرة ليكى فى أحلى مدينة فيكى يا مصر

ايه ده
يوسف ده بالدنيا بالكون بالعالم بالناس بكل حاجة
يوسف ده جميل اوي زي مامتو

السلام عليكم ورحمة الله وبركاته

هههههههههه
ماشاء الله عليك يا يوسف ربنا يحميك

شايفه يا فاطيما العيال اليومين دول بتفكر في ايه واحنا كنا بنفكر في ايه

بجد لو الموقف ده حصل وحقيقي فعلا
يبقى ابن يوسف بسم الله ماشاء الله عليه هيطلع واد جدع
عارفه عرفت ازاي
من تغير حالته لما قلتيله يمكن هي مش هتحبك
وهو عدل عن رأيه الطفولي بالرغم من ان الاطفال بتتمسك بوجهات نظرها بطريقه مستميته


ربنا يارب يفرحك بيه وبولاده وبولاد ولاده كمان ياستي


ملحوظه
هو ليه دايما اسم احمد عامل عقدة للناس .. يعني شوية انتي وشوية وزة انين الحزن .. اروح اولع في اسمي يعني ولا ايه ياجرعااان




سلامووووووووووووز

سدورة الجميلة
يا حبيبتى شكرا خالص على رأيك فى يوسف
هوه كل ده فعلا عندى
بس جميل زى مامتو دى فيها نظر
لما تشوفينى الأول طيب تبقى تحكمى
و لا نمشيها مجاملة و خلاص
عموما كلك على بعضك حلو ...
قصدى كلك ذوق يا سدورة
تحياتى يا عزيزتى

خمسة فضفضة
يا أحلى صيدلانية فى المحروسة
و عليكم السلام و رحمة الله و بركاته
طبعا يا ماما
دى ناس مظبطة المسائل من بدرى
موش زينا خايبيبن يقعدوا يحبوا على روحهم و من غير امل و فى الآخر ...و لا بلاش
ربنا يجعل أيامهم أحسن مننا ...
و يسعد قلبهم و يفضل برىء من غير دنس
تحياتى يا حبيبتى

سوووو
أزيك يا واد ...
بص بقى أنا هقولك على سر ومتقولش لحد
هه
أنا أول حب فى حياتى كان أسمه احمد ...
أبن الجيران بقى و أختك فى رابعة ابتدائى و الحب بهدلة
و الأستاذ عارف و مطنش ..
و المنتقة - على حد وصفك - كلها عارفة
و غالبا مصر كلها كانت عارفة
و كالعادة انصدمت فى حبى
و الكابتن كان مركز فى الابتدائية و معندوش وقت للكلام دا
بس عادى يعنى أنا روحى رياضية و واخدة الموضوع ببساطة خالص
حتى تلاقينى موش فاكرة حتى الواد جارنا دا كان أسمه أيه؟؟
أسمه إيه؟!!
أسمه إيه؟؟؟!!!
شفت
عادى خالص
يا رب أشوف يوسف واد مجدع زيك
على فكرة كنت بقوله يا جرع ...برضو
تحياتى يا صديقى الغالى أحمد

إرسال تعليق