.

.

تكونشى ؟؟!!  

Posted by: فاتيما in


الواااد ماجد
أخويا الصغير
هوه بشهادة الميلاد و حساب السنين
الأخ الصغير
بس بحساب الحجم و الطول و الدماغ العالية
يعتبر أخويا الكبيييير
عمره دلوقتى 23 سنة و تقريبا أنا اللى مربياه ...
لهذا السبب بالذات بقعد كتير أبصله و أندهش و أسأل نفسى
- هوه الواد دا طلع مؤدب و أخلاق كدا أزاى ؟؟
بإفتراض ضمنى انى فى طفولتى المشردة كنت شقية و مؤذية
و ابويا و امى و الأهل و الجيران و المدرسين
و القطر كله بيقولوا منى جااااى
بس ربنا أراد يعوض المجتمع خير فى الجيل التالى
صحيح العوض جه بعد 13سنة
لكن أحسن من مفيش
من 23 سنة فى يوم فى شهر اكتوبر
انا و اخويا هانى اللى اكبر منى بسنتين و يتصادف انه راجل أخلاق برضو
قاعدين نتجادل
- ماما هتجيب ولد
- لأ بنت عشان تلعب معايا بالعرايس
- يا بنتى هيا بتيجى بالدور يعنى ...... ولد ... بنت ... ولد ... بنت كدا
- يا سلام ؟.... لأ بقى هتيجى بنت بالعند فيك
و لأن أختكو فيها حاجة لله كدا ... و قلبها دليلها
طلع ولد
- كبسة ... كبسة
دا هانى اللى قال
جه سى ماجد الى هذه الحياة
ليكون أخويا الصغير اللى أغلى عندى من ميت بنت
و كمان عشان يكون إبنى البكر الذى لم ألده
وصل البيت مع ماما
و أنا و هانى قاعدين نبحلق فى المخلوق العجيب اللى كان من يومين جوا بطن ماما
و أنا كل شوية كنت أقعد اتصنت عليه
و اكلمه عبر الأثير و طيات جلد و هدوم ماما ...
و قاعدة ادلع بقى
- يا حبيبتى
يا قطتى
يا عصفورتى
و فى الآخر يطلع ولد !!!
طيب ... ماشى
من عمر 13 اتعلمت أبقى أم
و اخويا هانى بقى أب فى سن 15
بدأت كورسات الرعاية و الأمومة المبكرة
بمجرد رجوعى من المدرسة وردية لحد هانى ما يخلص واجب و مذاكرة ثم تنتقل اليه المهمة ...
و كل ليلة خناقة ماجد هينام فى حضن مين النهاردة ؟؟
كان ألطف طفل شفته فى حياتى
براءة و هدوء مكنوش عند الأطفال
اللى فى نفس سنه
يمكن تربيته وسط أربع اشخاص كبار خلاه أنضج
بس النضج و الهدوء دا ساعات كتير بيفرس
و محستيش بدا الا فى السنوات الأخيرة
و سفرى بعيد لسنوات
انتو عارفين ظروفها
رجعت على تغييرات جديدة
الواد فى الشغل تلات ربع اليوم ... و الربع الباقى اما مع أصحابه أو قصاد النت
أتسحب من وراه و هوه قاعد قدام الكمبيوتر ...
أبوسه فى شعره
ينتفض بذعر
- إيه يا حااااجة ؟
- إيه يا ماجد ببوسك ... عااادى
- إيه لازمته يعنى ؟
- الله ... باخد جرعة حنان ... فيه مشكلة فى كدا ؟
- بلاش الحاجات دى ...
- ليه ؟
- أصلى حاطط جل ... و بعدين أبقى اعملى الحاجات دى مع يوسف إبنك موش معايا
- يا سلااام ... و انت لأ ليه ؟
تكونش فاكر نفسك كبرت عليا ؟؟
أيوه ... الباشا كبر
و بيعتبر البوسة دى للعيال الصغيرين بس و عيب ميصحش كدا
بقى كمان كتوم جدا
يقعد يذلنى عشان أخرج منه بجملة مفيدة
و ياااه لما أطلب منه يخرج معايا مشوار
- ماجد ...انا رايحة النقابة بتاعة بابا ما تيجى معايا
- و انتى عاوزنى ليه ...مليش فى المشاوير دى
- يا واد دانا هأنجك و الناس تقعد تبص علينا
- لأ... روحى مع ماما
- ماما مبتحبش تخرج خالص ... تعال انتا
يهز رأسه بالرفض
أدور على ثغرة فى ملفه
و أباغته بها
- دانا كنت بغيرلك و انت صغير ...
- هوه كل ما أقولك على حاجة لأ ...
تقولى كدا ... ما تنسى الحكاية دى بقى
- يعنى كان تمر فيك
- كان من عشرين سنة الكلام دا ...
خلاص المرحلة دى عدت من زمن و كبرنا بقى
- ليه ... انت زى ما انت ... هتفضل أخويا الصغير...و بعدين تعالى هنا
تكونشى فاكر نفسك كبرت عليا ؟؟!!
المأساة الكبرى بقى
لما أكون زهقانة و عاوزة أحكى معاه شوية
- ماجد
- هه
- شفت الحلقة بتاعة العاشرة مساءاً بتاعة مجدى مهنا
- أيوه
- كانت مؤثرة قوى ...
- طيب
- هوه إيه اللى طيب ؟
- إيه المطلوب منى ؟
- هوه لازم أعوز حاجة ؟... أنا بفتح مواضيع معاك ... نتكلم فى أى حاجة
- ..........
- يعنى سكت
- أقول إيه ... لا تعليق
- آ ه ... يعنى أمشى أشوفلى أى حاجة أعملها بعيد عن وشك ؟
- انا متكلمتش
- ما هيا دى المشكلة !!
يا بنى قول أى حاجة و لا خلاص مبقاش فيه حاجات عاوز تقولهالى و بقالك خصوصيات
تكونشى فاكر نفسك كبرت عليا ؟!
غالبا دا أطول حوار بيدور بينا
ردوده بتبقى واخدة شكل أسئلة من نوعية
- عاوزة إيه يعنى ؟
- هاتى من الآخر
- لخصى
موش معايا بس الكلام دا مع الست الوالدة كمان
بس هيا بتستخدم غريزة الامومة الصرفة و بتفهمه أسرع منى
حاسة ان بقى فيه فجوة بينا
و انى كبرت قوووى فى الكام سنة اللى فاتت
و بقعد أفكر لما كان صغير
كان ممكن فهمه و التنبؤ بسلوكه
دلوقتى بعد ما بقى فى السن دا
بقي غامض و صعب إقتحامه
و يقفز فى ذهنى السؤال التالى
يا ترى يوسف لما يكبر
هيبقى زيه كدا
ما هوه الواد لخالو
و هيبقى قدامى لغز كبييييير
أقعد أفكر ... أحله أزاى
و كل ما نيجى نتكلم
أى حوار ما بيينا
هينتهى بإنى أقوله فى الآخر
نفس السؤال ذاته
- تكونشى فاكر نفسك كبرت عليا ؟!

This entry was posted on الأربعاء, أبريل 09, 2008 and is filed under . You can leave a response and follow any responses to this entry through the .

51 كــــلام بيطــبطـــب عـــلى قــــلبى و روحــــى

تصدقى بصره
انا زيك بالظبط
مربيه اخ من اخواتى وهو عمره 6 شهور
تصدقى
نفس اللى بتتكلمى عليه بيحصل معايا
وبرضه بقوله
تكونشى فاكر نفسك كبرت عليا ولا ايه ؟؟

طبعا جاي اعلق بعد فرنسا هانم
يعني انا الاول مكرر

ندخل في الموضوع

وبما اني راجل ...وكبير اخواتي يعني محدش رباني ( متربي والله متفهموش غلط)
احب اوضح لكم ان المسألة غير ما انتو متخيلين خالص ودي مشكله عامه!!!

الموضوع ببساطة ان 99% من الرجالة كلامهم قليل جدا في البيت ايا كان الطرف التاني

ولو كان الطرف التاني الزوجة النسبة اللي فوق بتكون حقيقة مش تزوير زي الإنتخابات

طيب ليه؟؟؟؟

الراجل يا بنات بيخرج كتيييير من همومه ومشاكله ومساغله بره البيت ( شغل اصحاب كافيتريا فهوة كوره الخ الخ )

يرجع البيت فاصل خالص ومحتاج يقعد مع نفسه وبس واحيانا مبيكونش فاضي حتى يقعد مع تفسه

عموما مشكلتكم نفس مشكله كل الستات ...واسالوا ست الناس

اهلا بطوطة تصدقي انك ضحكتيني !! انا كمان لي اخ عنده 21 سنة اخر العنقود واقعداحاول معاه عشان افهم مجريات الامور وفين وفين لما يحن علي ويحكي ده ان حكى اصلا !!! قوم احترم بقى وضعه الجديد انه يعني الواد كبر وعايز يفرض قواعده هو .. يللا .. وساعات نور يعاندني برضه وميرضاش يحكي لي بس له بنت عمة انكشها تقوم تخر لي على كل حاجة - هي صحبته ومن سنه- شوفتي بس عموما انا زي اخوطي ما بحبش الكلام الكتير باتونس اكتر بالوحدة والصمت ..
يللا ربنا يهدي الجميع..

فاتيما
انا اول مره ازور المدونه وبجد حاسه بيها اوى يمكن لأنى لمسه صدق المشاعر
وبساطه الكلمات ...
وموضع الخ الصغير انا كمان اخويا الصغير بس هو بجد لسه صغىر شايف نفسه كبر وهو لسه عنده9سنين
ربنا يستر ونعرف نتفاهم مع وأولادنا

الله على ابوست ده يجنن انتى فعلا كنتى صادقة في كل كلمة كتبتيها عشان كده وصلت بسرعه تعرفي انك خلتينى افكر في الموضوع ده انا اخويا اكبر منى بحوالي سنة و8 شهور لما كنا صغيرين كانت فترات جميلة كلها شد وجزب عمرى ما هنساها بس فترة المراهقة بتاعتنا الله لا يوريكي كلها خناقات وضرب وبهدله بس بعد فترة لما كبرنا و دخلنا جامعه واشتغلنا صدقينى قربنا من بعض اكتر بكتير انا عاوزة اقولك بقينا اصحاب اخويا من النوع اللي تسبيه وهوه هيجي يتكلم معاكى لكن لو انتى اتبعتى طريقة 4 2 4 ورحتي انته تكلميه هيكسفك ويقلك بعدين بعدين مش فاضي متفتحيش الباب كده على طول انا مشغول دلوقتى واشياء من هذا القبيل
عاوزة رائي انته لو فعلا عاوزة تتواصلي مع اخوكى من جديد متحاوليش تحسسيه انك كبرتى وهوه لسه الولد الصغير لان الولاد بتتخنق من حاجه زى كده اخته خلاص اتجوزت وبقي عندها ولاد يعنى خلاص بقي ليها حياتها وانفصلت عنهم حاولي تفتحى معاه مواضيع تخصه هوه مش حد غيره فهمانى يعنى بلاش برامج السياسة دى لحسن النكد فيها بالكوم كلميه عن صحابة حاولي تقعدى معاه على الكمبيوتر قوليله يفهمك ده ايه ودى بتتعمل ازاى
ان شاء الله ترجعوا تتواصلوا مع بعض من جديد
تحياتى
صاحبة مدونة يوميات موظفة استقبال

بجد صدقك فى كلامك عجبنى جدا
بس ان شاء الله تعرفى تتكلمى مع يوسف يارب

النقطة انه فعلا كبر خلاص
وبقى ليه خصوصيته
وكيانه
واسراره

هتعرفى ايه اللى جواه وان فرحان او زعلان من عيونه وردوده لكن لازم هتوصلى فى الاخر انك تحترمى غموضه وهدوءه وخصوصياته

مراحل عمرية

نسيتى لما الواحد بيبقى فى ثانوى ويروح يستخبى من مامته ويتكلم مع صحباته لانه بيرتاح اكتر

ثم تربية الرجال خاصة بتفرق لانه بيبقى فى السن ده عاوز يرسم شخصيته ويبقى ليه كينونة كده وبتاع

بس اللى مش بيتغير ابدا الصداقة سواء مع الابن او الاخ او حتى الزوج

حافظى عالصداقة ها مش كل شوية تفكريه بالبامبرز

فضحتو الراجل
وش بيضحك
وبيغمزلك

تحياتى
ويارب كل أحلامك تتحقق عن قريب
ولتعلمى ان لك رب كبير
يمهل ولا يهمل
وبشر الصابرين

هبة

عادة الجيل الاصغر من الجيل الاكبر منه .. ايه الكلام اللي انا بقوله ده؟؟؟

قصدي يعني ان اختلاف الاجيال بيخلي الجيل الاصغر عايز يعلن استقلاليته
خصوصا وانك بتقولي انك واخوكي الكبير لما بتقولوه بهزار انكم كنتو زمان بتغيرولو البامبرز وكده .. حتى ولو كانت دي بهزار ممكن تضايق
عارفه
خليه هو الكبير
يعني في يوم كده قوليله انك عايزه رايه في موضوع معاكي مثلا
او انك بتقي في ذوقه وعايزاه يختارلك حاجه
او بينيلو انه اكبر من مجرد اخ اصغر ليكي وفي مقام ابنك
اعتقد انه ساعتها هيتحول لصديق واخ اكتر من مجرد انه زي الابن بالنسبه ليكي





سلاموووووووووووووووووووز

طبعا زيارة متاخرة جدا يا ام يوسف
بس سعيد جدا بزيارة اجمل وارق مدونة بالتاكيد
انا بقى اكبر اخواتى
واخواتى الصغيرين كلهم صبيان كنت باشيلهم هما وصغيرين بس دلوقتى بقم اطول منى ومش عارف اكلمهم كمان بخاف منهم ههههههه لانى قصير وهما طوال
بس بجد الحمد لله هم بيحبونى قوى وبيحترمونى
عامة ربنا يخليكو لبعض وما يحرمكوش منهم ولا من دلعك فيه
ويخليكى ليوسف وتعملى معاه كده
تحياتى يا ام يوسف

ربنا يخليكوا لبعض
معلش هما فى السن ده بيبقوا كده واكتر والرد على اد الكلمة وخلاص

انا برضه عندى اخت صغيرة بينى وبينها 8 سنين وبيحصل بينا نفس الحوار تقريبا

ودايما معندهاش غير كلمه خلصى وانجزى ودماغك ومش عارف ايه لدرجة بتحسسنى انى من العصر الحجرى

لكن ساعات الاقيها فجأة تيجى تحط راسها على كتفى عايزة تنام اقولهاعلى راى اللمبى انتى متعرفنيش غير لما يكون ليكى موصلحه

فاتيما انا جاية اشكرك على ردك لغيبتى
وعايزة اعتذرلك عن اى كلمة جارحة اتوجهتلك من الشخصية المجهولة اللى سابت تعليق عندى

ارجو تقبلى شكرى واعتذارى

اختك خيخة

و الله يا فاتيما أنا لو عندي أخت سكر زيك كده
ما كنتش كسرتلها كلمة و لا رفضتلها طلب أبدا
بجد أنا بحس ان اللي عنده أخوات بنات ده في نعمة
يلا الحمد لله على كل شيء
بالنسبة بقى لحكاية البامبرز و كده
انا برده عندي خالتي كل اما تشوفني بعمل حاجة مش عاجباها تقولي : أهوه .. الِحجر ده ياما عملتها عليه(تقريبا كده ماكانوش بيلبّسوني بامبرز و أنا صغير) .. هو الموضوع بيبقى في أغلب الأحيان كوميدي وبأخده بضحك
بس أحيانا
بأخده بضحك برده
أصل بصراحة مش شايف فيها حاجة تزعل يعني
و بأقعد أقولها: يا خالتو انتِ أخدت الشرف
و بس
سلام يا طمطم

فرنسا هانم
يا اهلا بنوارة السويس
و الله
طب يعنى أنا موش لوحدى اللى عندها الحالة دى ...
انتى كمان أم من بدرى بدرى كدا ...
بس و الله مفيش اجمل من أنك تبصليهم كدا بعد ما بقوا اطول منك و تحسى انك شاركتى فى تنشئة الجدع الجميل دا
ربنا يخليهم لينا يا رب
نورتينى خالص ...أومال فين العجلة ؟

يا خايف من الحقيقة
طب وجهة نظر محترمة برضو ...
هوه طول الوقت بيقولى كدا ...
بس أنا مفيش مشكلة معايا أنا بس مشفقة عليه لما يتجوز و مراته هتقعد تشتكى بقى ...
الواحدة برضو عاوزة حس و ونس معاها ...
و سلامى الحار لست الناس
و يا سيدى ... سكات سكات
على قلبنا زى العسل

مامت نور و زياد
انتى كمان ؟!!
و نور ماشى فى نفس السكة ؟
بس انتى عندك مصادر آخرى ...
أنا بقى معنديش خالص ....
انا معاكى انه فعلا كبير و بيفرض قواعده و كينونته و كدا ...
بس برضو الواحد لسه شايفه صغير بشورت و لعبة و مصاصة

رهف
منورة لاول مرة و شرفتى المطرح
لأ بتهرجى ؟
تسع سنين بس و بيعمل كدا ...
أومال هتعملى إيه مع ولادك صحيح ؟
متهيألى الوضع هيختلف حبتين .. لأنك هتكونى المسئولة عنهم من الألف للياء ...لكن انا و انتى كأخوات كانت مسئوليتنا متضامنة مع الوالدين و باقى الأخوات ...
فالموضوع هيختلف و هتعرفى عنهم من غير حتى ما يسمحولك أو لا يسمحوا
نورتى خالص

فراشة
بصى يا ستى انا اتجوزت و بعدين خدت لقب ...
بقيت مطلقة يعنى ...
يعنى رجعت تانى البيت و بس لظروف بعدت 6 سنين و رجعت تانى ...
لقيته خد الثانوية العامة و اتخرج و اشتغل كمان ...
بقى فيه مرحلة معشتهاش معاه ...
و تغيرات خصلتله ما واكبتهاش ...
هو دا اللى بقول عليه بس ...
انما يا ستى انا راضية و موافقة
نورتى

rona
أهلا و سهلا
خطوة عزيزة يا رونا
و يا رب يسمع منك ربنا و يوسف ميغلبنيش زى ماج و لو ان الواد لخالو زى مانتى عارفة ...
يا رب أشوفه زى ماجد بس يتكلم أكتر من كدا
نورتى المكان كله

مش عارف يا فاطمة
يمكن علشان طالع عينه في الكلية فبيبقى في البيت عايز يروح عن نفسه و يفرفش بالطريقة اللي تعجبه
نت بقى أو كمبيوتر او قراية او مع اصحابه

أنا برضه من كتر ما بأنطحن في الشغل بأقعد كتير على النت و المدونات و قليل قوي لما أتكلم مع ماما و برضه بأبقى عايزها تجيب من الآخر
:)

doba
أهلا يا دوبا ...
شرفتينى
و كلامك صح ...
ماما برضو قاللتى عيب اللى كتبتيه دا ...موش هنقوله انك كتبتى بوست عنه ليزعل جدا ....
يعنى موش قصدى ...ماكلنا عملناه و احنا عيال يعنى أيه اللى حصل ؟
يا ستى نورتى خالص

آه
الف شكر على دعوتك ليا و ليوسف يا هبة ...
ربنا يجازيكى خير عننا يا رب

يا سوووو
حرام عليك يا عم
أعامله على انه الكبير ؟؟
ما دا اللى بيحصل فعلا ...
انت عارف المشاكل اللى حصلتلى خلت منظرى قدامه موش لطيشف ...يعنى بيتهيألى مبقتش المثل الأعلى اللى ممكن لما يحصله موقف و لا مشكلة يسألنى يعمل إيه ...لأنى من وجهة نظره موش مؤهلة لكدا و الا كنت حليت لنفسى المشاكل ...
بص انا بالنسبله واحدة كدا ساذجة بتحركها عواطفها و طول الوقت ظروفها ملخبطة ...
هوه و اخويا هانى كانوا سندى فى السنين اللى فاتت فكبر بدرى بدرى زائد انه مكنش فيه سلطة ابوية ممكن الأحتماء بيها بسبب مرض بابا ...
يعنى الواد بإختصار ...
بقى عجوز و عمره 23
شفت بقى ؟

همس الاحباب
يا خالد
نورتنى جدا و يا سيدى المهم ان الزيارة حصلت و بس
ماجد بيحترمنى برضو و عمره ما زعلنى تقريبا ...
أنا اللى طمعانة انى أبقى صديقة مقربة منه ...بس يظهر ان فرق السن و المزاج بيق قصاد الامنية دى
هوه ابنى البكرى و دا كفاية عايا
و شكرا لدعائك لينا
و أرجو الا تنقطع الزيارات ابداً
و سلامى للجماعة و الأولاد

اهو دا عيبه
بجد و الله يا شيخة
طمنتى قلبى ...
يعنى موش انا لوحدى اللى عندى فقر تواصل مع الاشقاء الصغار أهو ...
طب كويس و الله دانا ابتديت أفتكر ان العيب منى و انا اللى أقل من مستوى الموقف ...
طلع الموضوع عام و بيحصل فى احسن العائلات أهو
طب يا ستى منتحرمشى منك و من مساندتك دى
بجد الصورة اتوضحت أكتر
تحياتى يا عزيزتى

نوران الغالية
بت يا خيخة ياللى موش خيخة
إنتى أيه حكايتك يا بنتى
بتعتذرى عن حاجة مقولتيهاش ؟
ليه بقى ان شاء الله ....
و بعدين المجهول دا يعنى قال أيه ...
انى متطلقة ؟
طب و إيه يعنى ؟
هو موش الطلاق دا شرع ربنا برضو
و الا انا عملت حاجة غلط
انتى عموما مسحتى البوستات و حجمتى الموقف بس عالله يترد بقى و يسكت ...
و الف بعد الشر على شيكو حبيبى
يا ريت الواحد كان وقف حائط صد و اخد الدعوات دى بداله ..
حسبنى عليه و خلاص
تحياتى يا حبيبتى
و احنا قولنا إيه ؟
مفيش بينا أى اعتذرات خالص

nigro
يا سيدى نشكر شجاعتك دى ...
أصلا دى بشة خير و دايما بيقولو للى بيحصله كدا انك هتتكسى و تجيب هدوم جديدة ....
يعنى انتو و انتم صغار مصدر نعمة و فرح
و لما تكبروا بتبقوا نور عينين الواحد ...
عارف يا نيجرو لما ببص لماجد و هوه لابس و نازل الشغل و حاطط اسبراى و جل و حركات ...
اقعد أقول الله أكبر و اخاف عليه من الحسد
ربنا يخليكوا لينا و لأهليكو و لكل اللى بيحبكو يا سيدى
و يا عم عندك انا و خيخة و فرنسا و يا لهووووى كتيير قوى ..كلنا أخواتك البنات
و نتشرف بكدا
تحياتى يا أخونا الصغير

يا مهندس يا مصرى
يا محمد انا مقولتش حاجة ...
انا بس خايفة المسافات بينا تبعد خالص ...
لكن واضح كدا من تعليقاتكو انها تغيرات عادية مصاحبة لمرحلة الشباب اللى سيادته فيها ...
و هوه حاليا بيشتغل على فكرة و من ناحية طالع روحه فى الشغل ...فهوه طالع روحه و بيرجع موش عاوز يكلم حد فعلا و بيقعد قصاد النت زيك كدا يا محمد ...
الله
يكونشى الواد دا عامل مدونة و انا معرفشى بيها ..
يكونشى ؟؟!!

انا كنت هقول نفس الكلام بتاع خايف من الحقيقه
اصلى الكبير برضه
وفكره خرس الرجاله فى البيت يعرفها كل اخرس قصدى كل راجل
المشكله ان باقى البيت بيبقى فاكر ان ده غموض او اى حاجه تانيه
رغم انه طبيعى
كلنا هذا الرجل

بطوط حبوب
يعنى يا محمود موش بدرى حبتين على حكاية الخرس دى؟!!
طب نقول شوية كلام و نخلصهم و بعدين الواحد يصاب بالخرس ...
انما من أولها كدا سوكتيم بوكتيم ؟
انا بس صعبان عليا تكتموا فى قلبكوا يا رجالة ....
و بعدين يعنى هنكلم مين بس ؟
نورت يا بطوط و مبروك على المدونة الجديدة

اولا مدونة رقيقة وجميلة بجد


ثانيا اسلوب رائع في العرض

ثالثا بقى والاهم انك مش تقلقي على يوسف خالص لانك هاتتعاملي معاه زي مالست الوالدة بتعامل مع ماجد دلوقتي برضو

وبعدين ماجد دلوقتي في مرحلة مراهقة ونضج طبيعي بيولد تمرد بشكل طبيعي خالص


ياريت تخلي السؤال الاخير ده ليوسف لما يكبر شوية لاني لحد النهادره باسمعه من أمي ربنا يخليها لي


تحياتي مرة أخرى على المدونة الجميلة

السلام عليكم

ازيك يا ام يوسف

وكابتن ماجد اللى مجننك اخباره ايه

لو سمحتى ملكيش دعوع بالجيل تانى

الحوار بقى مفقود صدقينى

اخويا محمد انا شغلته معايا فى المطار

وكمان اخويا ايمن

وببقى فرحان جدا لما بيقولو اواته معاه فى المطار

العيال اجى اروح ليهم فى شغلهم

علشان ارغى فى اى حاجه ينفضولى

وكان الحوار خلاص حتى بين الاخوات راحت عليه

نروح البيت اروح ليهم ازورهم الحوار كله سلامات وتحيات
بابا عامل ايه وماما عاملا ايه
ههههههه

متلوميش ماجد

احنا بقينا فى زمن ومهما فى زمن تانى

زمن النت والموبيل وكل شىء متاح

فاكرا زمااان منا بنستنى اجازة بابا علشان يقعد يرغى معانا
ويحكى لينا

فاكرا زمااان لما كنا بنبص لاخونا الاكبر مننا

ونعامله زى بابا بالضبط

وكنا بنبقى مبسوطين جدا لما يجى يحكى لينا حكايه او موقف حصل فى الشغل بتاعه

ام يوسف
للمره المليون اشكرك لسؤالك الدائم عنى
تحيااتى
اخيكى احمد سكر

السلام عليكم
حبيبتى فاتيما للاسف الفجوه مش بينك وبين اخوكى رعاه الله لكى الفجوه بقت جوانا احنا الشباب للاسف التمرد ورفض سلطه الكبير بسبب الى بنشوفه فى حياتنا بره بتخلى ردود افعالنا عنيفه كده وكمان ضيفى لده الضغوط الى علينا بجد انك تثبتى ذاتك ده شئ صعب جدا فى دنيا اصعب ماليانا بالصخب انتى من الزمن الجميل الى اتربى على الهدوء والتروى والتفكير الهادى والنقاش لكن احنا للاسف جيل سريع فى كل حاجه بنجيب من الاخر ويا خوفى من السرعه دى
ربنا يخليكى ليه ويا ريت مش تزعلى من ردود افعاله واوعى تحسى ان الفجوه دى انتى السبب فيها او ظروف غربتك صدقينى ده حال كتييييييييير من الشباب
دمتى بالف ود وخير وصحه وسعاده وربنا يخليلك يوسف
خالص تحياتى

شقيقة الروح فاطمة

موضوع الصمت الرجالى ده مشكلة مش من جيل لجيل بس المصيبة انه فى جميع المراحل

اخويا وصديقى اللى بعدى بينا سنتين ونص بس كنا اصدقاء بدرجة مخيفة لدرجة ما كنتش متخيلة ان اى راجل فى الدنيا يختلف عن كده والا يبقى مش طبيعى مريض يعنى !!0

ومع الوقت والسن ابتعدنا .. بفتقده جدا واصبحنا جزر معزولة

لاحظت كمان ان الازواج بيصيبهم نفس الصمت الغامض

تفتكرى الستات هى اللى رغاية والا الرجالة مش حابين الكلام الا برة البيت ؟0

لسة عتابى فى ردى على تعليقك قائم .. ليه ما رديتيش يا طمطم

حبى ودعائى

هدى

الأم الحنون /فاتيما و الأفضل (فاطمة)
أنا لن أحدثك عن ماجد و لا عن يوسف
سأحدثك عن نفسك فاطمة لقد خلقتى أم
حنون و هذا هو طبعك التى جبلت عليه
فأنتى بداخلك قلب أم حنين رقيق و ليس
قلب أى أم.. ..أنتى تذكرينى بقلب أمى (رحمها الله)كنت متزوج و أعول و كانت
متحملة همى تحدثنى فى الصغيرة و الكبيرة
أغيب عنها يوم أو أثنين أو ثلاثة أجدها تركت لى فى الثلاجة نصيبى من أى أكل أو حلوى أو فاكهة ..أقول لها أمى
أنا أكل و أشرب لا تتركى لى نصيب و لكن هو طبع فيها كانت تنظر إلى تفهمنى لأول و هلة.. ياه يا فاطمة نفس لهفتك على أخوك نفس لهفتك على يوسف كانت دائما
متلهفة على الغائب منا بحميمية فوق العادة.. أنتى أصغر منى بعقدين أو يزيد و لكنى أحسك أم للجميع ..طبتى أم حنون كلماتك تقطر رحمه و طيبه و حنان..أقر الله عينكى برؤية يوسف الغالى
أبو خالد

سيحب يوسف ان يجالسك ما بين الحين و الحين
احايين كثيرة
فإن و الله
عمرو بن كلثوم ليس منه ابر
كلاهما من الطيبين
اذا ما ابتليا
يقتصان بالسيف
ممن يقلل من قدر سيدة الامهات

صاحب المضيفة
يا سيدى كتر الف خيرك على الراى الجمسل ده
على فكرة ببقى مبسوطة قوى لما المدونة تبقى عاجبة السادة الرجال ...
بتدينى امل فى ان لسه فيه رجالة حنينة و قلبها مليان دفا و أبوة اهو ...
اصلى عندى مشكلة فى تصديق الحكاية دى ...
انما بترجعولى الثقة واحدة واحدة و من غير ما تاخدوا بالكم و ربنا ما يحرمنى من مساندتكم ابدا
و يا عم الواد ماجد فى مرحلة الشباب دلوقتى خلاص عدينا مرحلة التخبط بس انا كدا استوعبت من كل الردود ان الموضوع دا عادى ....
و يا رب مقولش السؤال دا ليوسف الا على سبيل التهريج ليس اكثر ...لأنه هيفضل صغير مهما كبر ...و بقى راجل
هحبه زى ما يكون لسه طفل و هخاف عليه برضو و لو شعره كله شاب و بقى جد موش أب بس
تحياتى يا عزيزى و نورت قوى

أحمد يا سكر
و عليكم السلام يا فندم
الله
يعنى كل الطقم كدا ؟
طب خلاص بقى ...
و بعدين بتفكرنى ليه بزمان يا احمد ؟
هيييييه
فين الأيام دى لما نتجمع كل يوم على الغدا ...دلوقتى كل واحد فى أودته فى معاد مختلف و مبقيناش بنعقد مع بعض ...
متجيبش سيرة زمان و النبى ...
و ربنا يخليلك اخواتك و يخليلى ماجد ..
و إيه يا عم التشكرات الكتير دى ..أكونش هديت و بنيت مدونتك من أول و جديد ؟
انا كنت بسال عليك و دا الواجب يا جدع...بتشكرنى على الواجب ؟؟

only spot
مشمشة الجميلة
أزيك يا حبيبتى ...
و بعدين انتى كمان ؟
طيب انتى بتأكدى على المعنى اللى وصلنى ... ان دى تغييرات طبيعية و غالبا العيب موش فى حد العيب على الظروف الحالية اللى بتخلى الشباب منغلق على ذاته و على أصدقائه على أكتر تقدير ...
انا بس اتمنى اننا منكونش بعاد عن بعض الا شكليا بس ...موش عاوزة يوم اصحى من النوم الاقى اخويا حد تانى غريب عنى معرفوش ...
بس كدا
تحياتى يا جميلة و رقيقة و قلبك شعلة احاسيس متقدةلا تهدأ

هدى يا شقيقة الروح
يا حبيبتى لا عشت و لا كنت ازعلك ابداً
حقك عليا قوى قوى
انا نفسى مكنتش متاكدة انى رايحة يوم التبرع بس انا كنت سعيدة بالناس الحلوة اللى عرفتهم عن قرب و طلعوا بنفس جمال مدوناتهم و اكتر ...
انا أسفة و المرة الجاية أوعدك انى لازم اقولك من قبل منها عشان تيجى و أشوفك و نتعرف على بعض ...
بس المرة اللى فاتت مرضيتش أجزم بوعد و يمكن اخل بيه ...
حقك عليا
و حكاية الخرس دى مشكلة كبيرة قوى ...دى فى كل البيوت بقى و انا فكراها عندى بس و عشان بعدت عن البيت شوية ؟...
اتاريها حالة عامة
و طبعا الرجالة مبتتكلمش الابره البيت بس ...لأأصل الكلام بره معليهوش جمرك يا ماما و محدش بيحاسبهم ...انما جو البيت فيه كاميرا بتسجل كل كلمة عشان يتحاسب عليها بعد كدا ...فبياخدوها من قصيرو و يسكتوا ...
تحياتى يا حبيبتى

أبو خالد
يا راجل يا طيب
انت دايما كدا رافع معنوياتى و الله
يا رب يخليلك ...
أنا بس بحاول اتعلم أزاى احافظ على النعمة الكبيرة اللى ربنا منحهالى ...
عارف و انا فى الجامعة كنت أقول لزملائى اناعاوزة اتبنى طفل أربيه و موش عاوزة اتجوز خلاص ...
عشان مالاقيش زوج يتحكم فيا و ينكد على الولد (سبحان الله كنت باستشرف المستقبل ) كانوا يتغاظو و يقولولى يا بنتى حرام عليكى ... يعنى موش عاوزة تبقى أم عادية زى بقية الأمهات ...
أقولهم و هو الأم بالولادة بس ؟ ...
أنا أم لأخويا الصغير و بعدين الأطفال اللى فى الميلأجى دى موش امهات هما اللى ولدهم ...دانا لو جبت أبن من بطنى موش هبقى عاوزة حاجة من الدنيا اكتر من كدا ....
اتمنى ان يوسف يرجع و ان موش هخلف ظنه فيا تانى و كفاية تدعيلى بس بدعواتك الحلوة دى
و ربنا يرفع من دلرجات الحاجة الكبيرة والدة حضرتك على قدر ما بتدعيلها و انت نعم الأبن البار ...
تحياتى ليك و للمحظوظين بك

ميدو
يا رب يخليلك يا ميدو ..
بس معلش برضو الواحد لما يبقى موش عارف حاجة يسال ؟
ما هى قصة عمرو بن كلثوم ؟
عشان أبقى أستفيد منها و تكسب فى أختك ثواب كمان
تحياتى يا غالى

فاطيماتااااا
المشكلةان الإنسان اللي قدامنا مفيهوش مفتاح نضغط عليه فيروح يتكلم يحكي يفضفض، ابدا لأن بفرض اتكلم هايكون كلام بلا معنى ومتقطع وناشف
أجمل شئ تتركي الإنسان اللي قدامك على راحته لأن وقت ماهايحب يتكلم ومحتاج حد يتكلم معاه هايتكلم وبتلقائية شديدة دون أي تحفظ لمجرد انه يشعر ان اللي قدامه يجيد الإنصات للمشاركة في الحالة وليس لمجرد المعرفة
ثانياً لاتبدين أي تعليق أو رأي إلا اذا طلب منك هذا بعد أن تكوني وضعتي يدك على مفاتيح الموضوع ومفاتيح
الواحد لما بيحب يتكلم صدقيني هو اللي بيجي لوحده وهو اللي بيمهد لنفسه في فتح موضوع ما
ثم هناك نوعية لاتفصح عما بداخلها بسهولة وهي ايضا صاحبة القرار في وقت الإفصاح والتعبير
ولذلك الشخصية الكتومة حين تفصح لابد من الحذر في التعامل معها فيما يخص الموضوع من انصات وتركيز وعدم التسرع في الاستنتاج وعدم الأسئلة الكثيرة الكثيرة فالانصات مهم حتى لا يفصل ذهنيا ونفسياً

كبر العصفور الصغير
كبـر خــلاص واتغير
تايـه شـارد متحير
وحبل الموده الكبير
صبح ياعيني قصـــير


تحياتي
أرابيسك

حسن
يا أرابيسك ...أنت إيه حكاية الزارير و المفاتيح معاك المرة دى ؟؟!!
يا عم إيه كل التخطيط و التيكتيكات دى كلها ...
انا عايزة اتعامل عادى زى ما بتعامل طول عمرى
بص انا بقيت متفقة معاكو ان الموضوع كبير و لازم أكبر تصرفاتى و طريقة المعاملة ...
بس بصراحة بقى دا ميكانيزم دفاعى من ناحيتى .. أصلى موش عايزة أحس ان الواد كبر و ان أنا كمان كبرت معاه ...
بس الواحد لازم يعترف بقى
و يعيش الواقع ...
يا سيدى متشكرين على اهتمامك و
تعالى هنا انتا كمان بتقول شعر يا حسن ؟؟؟
طب قول حاجة تنسينى موش تفكرنى يا جدع!
نورتنى يا فنان يا كبير

عندى بوسى اختى الصغيرة اللى بعمل فيها كده

هههههههههه مش اخويا اصل اخويا اطول منى بعيد عنك هههههههههههههههه

ربنا يخليه ليكى يا رب

آبى يا جميلة
بعيد عنى ليه ؟
ماجد سعادتك أطول منى
و الواد بيطول و أنا بكلمه
ربنا يخليلك بسبوسة و يخلى كل واحد لأهله يا رب

انا بردو عندى خالد باشا الى عمره الان 15 سنة ونفس الفرق اللى بينك وبين ماجد هو الفرق اللى بينى وبين خالد
يعنى تقدورا تخمنوا وصللللللللللت كام دلوقت بلا فخر...يلا ما علينا...بلاش موضوع السن المزعج...ده ينفع يا فاتيما تقلبى عليا.....
خالد جتى الان بنسى نفسى وأدلعه وأقوله توتو ...وشوية يا كوكو ...ده غير خالودة طبعا...وهو يتنرفز ويقولى متقوليليش كده يا أبلة ايمان

بس خالد مازال لما يرجع من المدرسة أو مباريات الهوكى اللى دايما بلا فخر بيخسروها يحى وياخد رايى ويمكن يعيط على استحياء...لما الموضوع يبقى مضايقو شوية ....وتضحكى عليه لما يعترض على رأى ليا ويقولى انتى غلبانة اوى يا ابلة ايمان ..أنتى متعرفيش حاجة ..على فكرة الموضوع ده مش كده خالص....اتكتم ضحكى (واقول فى نفسى هو اللى عملاناه فى أهلينا هيطلع علينا ولا اية)
واسمع وجهات نظره العاقلة الرشيدة...ده حتى الان معرفش بعد كده هيخبى عليا ويبقى له خصوصيات ولا اية...هزعل اوى وقتها ...بس يلا سنة الحياة ...نربى ونكبر ...والعيال تكبر وتطول علينا
تحياتى وحبى

إيمان يا جميلة
يا حبيبتى أنا بعتذرلك ألف مرة عشان مشيت من غير ما أقعد معاكى ...
بس غصب عنى
أنا استنيتك فى مكتب اللى عند القسم و لغاية ماجت ميلتك و قالت انك موش جاية هنا و لما حاولت اكلمك على موبايل تغريد أعتذرلك بس للأسف يظهر انك مسمعتيش الموبايل و لا حاجة ...
بعتذرلك تانى
و المرة الجاية نعوضها
و يا ستى ربنا يخليلك خالد و عقبال ما يبقى عندك زيه ...
و متكبريش فى روحك كدا اومال انا أقول إيه بقى ...
و يا حبيبتى اللى بتقوليه عندنا مثل مصرى شائع دايما ماما تقولهولى ...
ربى يا خايبة للغايبة
لما بقعد أفهم فى يوسف يكون كويس مع اللى هيجوزها و مع البنات عموما
ماما تضحك و تقول المثل دا ...
يظهر هينطبق علينا مع اخواتنا يا إيمو ...
قبلاتى يا جميلة

لا خالص ان الواجب عليا الاعتذار وشكرك جداااااااا أنا كنت طالعة فعلا القسم ...بس للأسف مقدرتش لانى عندى تمزق فى الاربطة ..ولما دكتورة تغريد كلمتنى الشنطة كانت مع واحدة زميلتى وشوفت الاتصال بعد وقته بنص الساعة وكنت فى التاكس وكان رصيدى الحمد لله
بعد كده كلمت د.تغريد واعتذرت لها وقلتلى انك كنتى عايزا تكلمينى,,,وقولتلها توصلك سلامى
أنا كمان كان نفسى اقعد معاكى على ربنا يكرمنى بمقابلة من حيث لا ندرى واشوفك على الف خير

تحياتى

إنشاءالله يا إيمو يا جميلة

سألتي سؤال: تكونشي؟

الإجابة: للأسف أيوة

إحنا بندعي إننا هنكون من أقرب ما يمكن لأولادنا في تفكيرهم .. وإحنا فعلا هنحاول .. لكن المشكلة مش في محاولتنا من عدمها .. المشكلة في فروق المسلمات بين الأجيال واللي بتزداد بشدة مع التقدم التكنولوجي

الفرق بين جيل آباءنا وأجدادنا ضئيل

والفرق بين جيلنا وجيل آباءنا كبير

بننا وبين أولادنا هيكون مهول .. إلا من رحم ربي وقدر يتابع ويقلل الفروق

عم مراكبى
يا نبع الحكمة
مختلفة معاك يا عم
جايز فى مرحلة ما نختلف و الأسلوب يبقى عتيق و يبدو متخلف
بس بنيجى فى مرحلة و بنعى جيدا أهالينا كانوا صح قدا إيه و إحنا محتاجينلهم قدإيه و عاوزين نتكلم معاهم اكتر و نحاول نبقى زيهم اكتر
متهيألى ولادنا برضو هيعملوا كدا
فى الأول هنبقى متخلفين من وجهة نظرهم و نبقى موش عاجبينهم و يحاولو إقصاءنا عن حياتهم لحد ما يرجعوا تانى و يلزقوا فينا ...
أنا عملت كدا مع أمى ...
و بتمنى يوسف يعمل كدا معايا
و ربنا بس يطمنا عليهم و خلاص
بعاد عنا و لا كانوا قريبين
تحياتى يا نبع الحكمة بتاعى

إرسال تعليق