.

.

الحسن أنت يوسفه  

Posted by: فاتيما in


لكل انسان فينا نصيب من أسمه
دى جملة كنت بسمعها ساعات و أفوتها
بقيت دلوقتى أشجعها بحرارة و أبصم بالعشرة
و انا فى فترة الطفولة و انت داخل على المراهقة كدا بشارعين
كنت اتفرج على سعاد حسنى فى فيلم التلاتة يحبونها
و هيا بتفركش الجواز من الشاب اللى بيحبها
أستغرب قووووى
و ابقى عايزة أكسر شاشة التليفزيون و أجيبها من زمارة رقبتها
و أقولها ... حرام عليكى يا شيخة ... طب يا ريت انا يحبنى واد زى القمر كدا
كان بيصعب عليا قوى فى إحنا التلامذة محدش واخد باله منه يا حرام
طب أنا أهو شايفاك و صعبان عليا و الله ....
كان فتى أحلامى الوحيد ساعتها
و بالصدفة كان
أسمه يوسف فخر الدين
لما كنا نسافر بلد بابا كنت أسهر فى أوضة المكتبة بتاعته
أقعد أقرى فى الروايات و الكتب و المجلات القديمة
من ضمن الحاجات اللى محفورة فى ذهنى مسرحية الفرافير
كنت أقرأها مرة و اتنين
و أحاول أدور للمؤلف دا على كتب تانية .... أحترمت عقله و بقيت أتابع مقالاته
و ياااه لما ييجى فى لقاء تليفزيونى و اشوفه كدا و هوه معتد بنفسه
و عنده ثقة تكفى عشر كتاب معاه كمان
حسيت انه يستاهل اعامله بأحترام زى ما بيعاملنى
و بالصدفة كان أسمه
يوسف إدريس
لما سافرنا الخليج .... كانت بتوصلنا هناك مجلة اكتوبر
كان فيها واحد بيكتب مقالة أسبوعية دمه خفيف قوى و بيموتنى من الضحك
كان هذا الساخر العظيم اللى كان بيتوقع حالنا هيبقى شكله إيه من عشرين سنة قبل النهاردة
اتونست بقلمه فى الغربة و بقينا أصحاب
و بالصدفة كان أسمه
يوسف عوف
بحب السيما من اول ما وعيت على الفرجة
و عكس صحباتى و زميلاتى لما كانوا يقولو مبنحبش افلام الراجل دا
مبنفهمهاش !!... أقولهم موش مهم نفهم
المهم نحسها و نحبها ونبقى نفهمها على مهلنا بقى ....
وقعت فى غرام أفلامه و بقت متعتى اعيد الشريط مرات و مرات
عشان أسمع جملة موش واضحة
احاول افهم هوه عاوز يقول إيه؟
احاول اوصل لفكرة واحدة حتى
من جملة الأفكار اللى واضح انه تعب عشان يصوغها فى شكل فيلم
حبيته و بقيت مشاهدة مخلصة للسينما بتاعته
و بالصدفة كان أسمه
يوسف شاهين
أشتغلت فى مكان ليه صبغة تاريخية و جغرافية
و انا بدعبس فى مقتنيات القاعة و أعيدترتبها
لمحت أسم بيتتردد كتير قصاد عينى
كان أسم امير
أيوه
الراجل دا كان أحد امراء اسرة محمد على
و كان وريث للعرش لولا والده اتنازل للملك فؤاد عن العرش فى لحظة كبرياء
رفض فيها يحكم مصر تحت الاحتلال الانجليزى
و الولد طلع لأبوه ... دماغ
و كان مغامر و فنان و رحالة كبير و جامع للتحف و النفائس
و غنى قوى قوى كمان
بس حب يكونله دور اجتماعى و وطنى
عشان كدا انشأ مدرسة للفنون الجميلة الاولى من نوعها فى مصر
و كمان تبرع بفدادين و اموال لمشروع الجامعة المصرية
زى الأميرة فاطمة طوسون
عمل حاجات كتير دا غير مؤلفاته و رحلاته الإستكشافيه لصحراء مصر وجنوب أفريقيا
الراجل دا كان دماغ بجد موش زكيبة فلوس و بس
حبيته من غير ما اكون عاصرته و لا شفته
بس أحترمته
و بالصدفة كان أسمه
يوسف كمال
بعد ما بقيت حامل
قعدنا نفكر فى أسم المولود يبقى إيه لو جه ولد
اتحيرت كتير و أسم يوسف مخطرشى على بالى خالص
موش عارفة ليه كدا ؟
رغم كل اللى فات و طابور اليوسفيات دا ؟؟!!
بس لقيتنى قبل الولادة بيومين
بيحصلى حاجات غريبة
آجى أركب تاكسى ...الأقى السواق مشغل سورة يوسف !
أشترى من محل ...يبقى البياع فاتح أذاعة القرآن الكريم عليها !
إيه الحكاية ؟
دى أشارة من ربنا ؟؟
جايز !
مع ان الدكتور قاللى فى السونار انها بنت يا مدام
لأ دا فيه شىء موش عادى
الأسم بيلح عليا كتير
الله بس أنا كمان بحب السورة دى قوى ؟
أزاى مفكرتش فى الأسم دا قبل كدا ؟!
و قصة سيدنا يوسف - عليه السلام -
دى القصة اللى ربنا سبحانه و تعالى بذاته
قالنا
انها أجمل القصص
طب ليه لأ ؟؟!
و فعلا هذا ما حدث
لما فقت من الولادة لقيتهم بيقولولى
ولد
ولد
هتسموه إيه ؟
هوه عاد فيه إلا أسم واحد؟؟
بس المرة دى موش هيبقى صدفة
يوسف
أجمل يوسف فى دنيتى
يا ترى هيكون ليه نصيب من أسمه ؟
و كأنى كنت بقرى الغيب
و أتنبأله بمصير اللى أتسمى على أسمه
بس عارفين إيه الجميل فى القصة دى ؟؟
ان النهاية بتاعتها جميلة
و زى ما السورة بشرتنى بإسمه
هتبشرنى كمان أنه راجع
بإذن الله
شوفتو ان لكل واحد فعلا نصيب من أسمه
قولولى بقى
لما الشمس طلعت و نورتو الدنيا و أتولدتو
أهاليكم سموكو - موش سممكو- بالأسم دا ليه ؟ ؟!
و ليكو نصيب فى الاسم دا ولا لأ؟
أنا مستنية الإجابة و محدش يزوغ

This entry was posted on السبت, أبريل 12, 2008 and is filed under . You can leave a response and follow any responses to this entry through the .

59 كــــلام بيطــبطـــب عـــلى قــــلبى و روحــــى

الأم الحنون /فاتيما و الأفضل فاطمة
سوف أسألك سؤال وهل أنتى تحبين اليوسفى ؟
سلام عليكى أم يوسف متأكد انا أن قلبك و روحك يوسف و سوف يعود لكى كما عاد سيدنا يوسف لأبوه سيدنا يعقوب
لن أهرب من سؤالك و سأقول لكى لماذا احب أسمى؟عندما بدأت ادرك المسميات سألت أمى ليه أنا اسمى محمود و ليس محمدا؟و كان ردها الذى لازال محفور فى الذاكرة إلى أن يقبض الله روحى ..يا حبيبى فى الأرض محمد و فى السما محمود ؟
تصورى يا فاطمة أحببت أسمى لهذا السبب.
و الأن أشعر براحة لكونى أفضفض معك بعفوية.أنتى روح طيبة يا فاطمة و أرجو أن يكون فاطمة هو أسمك .
أبو خالد

سلام عليكم
صباح جميل على احلى وارق واحن فاتيما انا بجد اتعاملت معاها عن قرب صحيح مش كتير بس ليكى كاريزما غريبه يا طمطم بتخلى الى قدامك بجد يحبك لله فى لله
ندخل فى الموضوع سبحان الله يا طمطم بس انا امنت ان مفيش صدف فى الدنيا واى شئ بيحصلنا فى حياتنا اكيد بيبقى ليه حكمه بنعرفها فى الوقت الى ربنا سبحانه وتعالى رايده وعايزه
ربنا يرجع لك يوسف فى حضنك تانى ومتقلقيش صدقينى ربنا هيعوضك خير عن صبرك ده لانك بجد جميله اوى من جوى
اقولك سر انا كمان بحب يوسف فخر الدين جدا وكمان عندى ابنى البكرى الى صحيح محملتوش بس ربيته وكنت بسهر عليه وهو لسه مولود ده ابن اختى واسمه يوسف برضه صحيح عمره ست سنين بس بحس انه بجد صديقى وصاحبى وحبيبى وابنى الى مجبتهوش
بالنسبه لاسمى بقى مش عارف بس اختى هى الى سمتنى بعد ماكان اسمى هيبقى دينا اتغير واتكتب باسمى الحالى ليه اكيد لحكمه ربنا عالم بيها
اتمنى ربنا يرجع لك يوسف بالف سلامه واشوفك دايما بخير
خالص تحياتى

فاتيما سعاده الشيف

طبعا كلامك حلو كالمعتاد وربطك للاحداث دى فيهاذكاء على فكرة
وعقلانيه قوى
بس انا معرفش ليه سمونى ..........زههههههههههه مش هقولك بينى وبينك خلى آبى بس انا بحب آبى اكتر
وعموما انا بحب يوسف ابنك وبحب يوسف فخر الدين
وبيجيلى هلاوس ووساوس سمعيه وبصريه من يوسف شاهين هههههههههخخخخخخخخخخخخخ بما ان مخى تخين فى فهم بعض افلامه
ربنا يرجعه لكى بالسلامه يا سعاده الشيف الا مقولتيش مهمتك انك كل يوم تكتبى وصفه اكله او سلطه خفيفه كده نونو فى الكوكب عندى متستعبطيش ده مش اسم شرفى كل يوم او يوم ويوم تكتبى لنا عمل اى حاجه بس بطريقه مختصرة خلينا نقضى على الناس ومبهزرش هوقع عليكى قلل وغرامه

وقفت تاااااني قدام المشكلة القديمة اللي بقالي فترة متغلب عليها
إني مش عارف أكتبلك تعليق
انت بس تجيبي سيرة يوسف من هنا و أنا أروح في عالم تاني من هنا
بجد يا طمطم مش عارف اقولك إيه
ربنا ينتقم من الظالم
و يرجّعلك فرحتك و يردلك روحك قلبك
بالنسبة بقى لموضوع الإسم
أحيانا يا فاتيما بتكسف من نفسي
و أحس إني شايل قيمة كبييييييرة أنا مش قد حملها
بل بالإضافة بحس إني أسأت إليها
اسأل الله الهداية و الإستقامة
أنا اسمي محمد يا طمطم

بوست روعة بجد دا انتي بقى من بتوع العلامات وتتبع الاثر في طريق الحياة وانا اعتقد زيك ان فيه حاجات لا تخضع لحسابات القل لكن للروح واعتقد ان اسم يوسف وهو اسم جميل مرتبط بالمعاناة بش برضه بالفوز في النهاية(وعلى فكرة انا باعشق سورة يوسف لانها تحتوي على كم مهول من الحروف المتحركة التي تعطي للقراة والتجويد بعدا فنيا تقشعر له الابدان- وكمان شوفي الفيلم السينمائي في تتابع المشاهد لسيدنا يوسف انا باتكلم عت فنية السورة والصور التي تستدعيها كل ده ويقولك الفن حرام طب ايه رايك ان القران فيه موسيقى داخلية مبهرة ومؤثرة
المهم يا جميلة يا فنانة انا مش عارفة ان كان اسمي له علاقة باي شىء انا اسمي الحقيقي امل مرة واحدة بس حسيت ان له قيمة كنت راكبة مواصلات وطلعت واحدة واضح انها كانت بتجري علشان تلحق المواصلات واخذت تحكي لي بدون مناسبة انها تريد عما دراسات عليا والكل يعترضها وانها تعول على اليوم للقبول رغم تاخرها وتقريع والدتها لها بان الزواج افضل من وجع القلب ..الخ وكان واضح انها تتعلق بامل ان تقبل اوراقها في هذا اليوم وبعدين اخذت اشجعها واقول لها ان شاء الله خير وربنا يوفقك .. الخ فجاة سالتني اسمك ايه؟ قلت لها وانا اشعر لاول مرة بوقع اسمي "امل" فتاثرت جدا وقالت الله وكأنها رسالة من السماء.. ثم نزلت ولم اراها بعد ذلك ولا مرة هي كانت مرة في الحياة يمكن سبت اثر جواها هي سابت اثر جوايا انني اخذت بالي لاول مرة ان اسمي امل!!!!
زيانور

السلام عليكم ورحمة الله وبركاته

لزيك يا فاطمطم عامله ايه يا ام يوسف ان شاء الله بخير
حلوه حكاية اختيارك للاسم ده
زي ما انت عارفه ان اي حد فينا بيبقي ربنا هو اللي مسميه قبل ما اهله يسموه ورسولنا الكريم اخبرنا ان الجنين وهو لسه نطفه في بطن امه ربنا بيرسله الملك فينفخ فيه الروح ويؤمر بأربع كلمات :
رزقه وأجله وعمله وشقي أو سعيد

يارب يوسف يبقي من السعداء موفوري الرزق ومن اهل الجنه

عن اسمي فابي رحمة الله كان مصمم انه يسميني علي اسم والدته بس ماما رفضت لان الاسم دي موديل ، وعلشان نوصل لحل يرضي جميع الاطراف تم تعديل بسيط في الاسم علشان يبقي علي الموضه وفنفس الوقت ما يزعلش جدتي رحمها الله بس يا ستي واي اسئله تانيه احنا في الخدمه

سلام يا قمر

انسان عزيز عليا اوي كان دايما يقولي الجمله دي
" لكل من اسمه نصيب"
مكنتش مقتنعه اوي في الاول بس دلوقتي مقتنعه جداااااااااااا

تقبلي مروري

عجبتيي أو يحكايتك مع إسم يوسف
ربنا يخليلك يوسف و تفرحي بيه
تحياتي

إيه بقى النظام ؟
فيه ناسس بتتهرب ليه ؟
طب أشجعكو أنا
يا أبو خالد يا راجل يا طيب
أنا أسمى فاطمة فعلا ... على أسم جدتى الله يرحمها
و أول واحد نادنى على النت بأسم فاتيما كان الغالى د.زين صاحب مدونة تسابيح اللى كان صاحب الفضل الكبير بعد ربنا إنى أدخل العالم السحرى دا و أتعرف عليكو و دا من فضل ربنا عليا
حاجة تانية بقى متعرفهواش برضو
يا مامت نور و زياد
تتصورى بقى أن أنا كمان ليا أسم تانى بتنادى بيه فى البيت و وسط القرايب و الجيران ...عارفة أسمى التانى إيه؟
امل
آه و الله ...
كانت ماما متفقة مع بابا يسمونى أمل عشان ساعة ما تولدت كانت أم كلثوم بتغنى أمل حياتى و ناس كتير سمت بناتها كدا ...
بس وفاة جدتى غيرت الخطط خالص ... بابا أصر و ماما تحايلت على القرار...
و بقالى أسمين
ليا فيهم نصيب ...
فاطمة معناها بجانب الفطام ..زبرضو معناها الصبورة و أظن أنا معنديش غيره حاليا
أما أمل فدا كمان لسه عايش جوايا طول ما يوسف أبنى و ربنا مدينى عمر
و يا مشمشة أسمك فيه من سمات الشخصية العظيمة الشيماء فى جلدها و عاطفتها المتقدة ...
و يا ست آبى ..انتى داخلة على طمع بقى
طبخة كل يوم دا إيه ...دانتى واخدة فيا علبة ألوان موش قلم واحد ...
و بعدين بلاش الأسم الحقيقى طب إسم آبى أخترتيه ليه ؟
و انتى كمان يا daydreaming
يا أبوخالد يا راجل يا طيب
و يا نيجرو يا أخويا الصغير
يسلم الأسم و يسلم صحابه
و ربنا يكتبلكو صحبته يوم الدين
و نكون معاكو

يا مايكل نورت قوى
أنا سعيدة انك بتيجى ...
بس تعال هنا ...
مجوبتش على سؤالى ليه ؟
اسمك على أسم قديس موش كدا ؟
صحح اجابتى و قولنا نبذة عنه خلينا نتعلم شوية و نستفيد يا مايكليتو
تحياتى يا عزيزى

بتعجبني كتير يا فاتيما سلاسة أفكارك وصدق مشاعرك الشفافة.
كل شي الو نهاية، حتى العذاب.
انتبهي لحالك.

عزيزتى الجميلة فاتيما....على فكرة انا كده اكون اتعرفيت عليكى مرتين....مرة لما شوفتك فى قسم المكتبات جامعة حلوان ....ومرة لما كنت بقرأ لك وأنا معرفش إنك نفس الشخصية...لحد ما عرفت النهاردة من دكتورة تغريد...

الموضوع جميل ...وعلى فكرة أؤمن أن شىء لا يحدث فى الكون صدفة.زى ما يقول د.مصطفى محمود..ولكن قصور ادراكنا غالبا ما يجعلنا لا نربط بين الأشياء...

وبحب أسمى الأشياء أو الأحداث دى الرسائل المشفرة....اللى دايما ربنا بيبعتها ...لينا عشان توجهنا لتصرفات أو تفكير معين...

أما عن إسمى فبابا بيقولى إحترت فى إسمك كتير أوى ...مرة شيماء وبعدين هدى وشوية أسماء ...وفى الأخر فجأة ...سمانى إيمان...وقد يكون نصيبى من إسمى ...والله أعلم ...إنى مؤمنة إن ربنا رغم ظروفى شايلى خير كتير ...ورغم تباعات هذه الظروف ...فأكيد اختيار ربنا سبحانه وتعالى هو الأفضل مهما تراءى لغيرى عكس ذلك

تحياتى لك وليوسف

ويارب أشوفك قريب

ما شاء الله

بوست رائع وفيه معانى جميلة

سلمتى أختى فاتيما وسلم قلمك الرقراق

اختى فاتيما
طبعا الاسامى بيبقى ليها نصيب من الشخصيه
وكتير قوى تسألى واحد او واحده عن اسمه او اسمها
وبعد ما يجاوبك تحسى ان الاسم لايق جدا عليه او عليها
هو ده نصيب الواحد من الاسماء
اما اسم فرنسا هانم
فده نصيب مدونتى من الاسماء
ههههههههههههههه

ايه الكلام الحلو ده
على راى امى الله يمتعها بكل الصحة اللى يحب حد يحب الشارع اللى عدى فيه يوم
ههههههههههههههههه
دمتى بالخير العنوان رائع

يا سلام على التوافق !! ربك لما يريد بقى !!! طب الحمد لله ان اسمك امل ويا ريت بقى تصبري نفسك ان اسم امل ده مش صجفة وان الفرج قريب ان شاء الله
قبلاتي يا جميلة..
زيانور

ghida
يا ستى الف اهلا و سهلا
نورتى المكان كله
و انا بحب اقرالك من بدرى بس مجتش مناسبة أعلق الا آخر بوست
مبسوطة انك جيتى هنا قوى ... و أسمك غيداء ؟
صح كدا كتابته بالعربى ؟
طب مقولتيش معناه و ليه أتسميتى بيه؟
عموما لو موش عاوزة تقولى بلاش
بس برضو نورتى

إيمان الجميلة
يا حبيبتى أنا اللى أسعد منك بكتيير
أسألى تغريد كدا هتقولك انك اكتر واحدة لفتت نظرى من البنات فى القسم ...قولتلها انك دخلتى قلبى علطول ...و حسيت ان فيه لينك خفى كدا من بعيد لبعيد ...
أهو ربنا جمعنا تانى فى لينك برضو ...
بس ان شاء الله تدوم المحبة
و يا حبيبتى نورتى
و انتى أسم على مسمى فعلا
لأن وشك فيه ارتياح و سكينة موش موجودة الا عند الناس المؤمنة بس
نورتينى يا حبيبتى متتصوريش قد إيه
أولا لأنك انسانة مميزة
و ثانيا لأنك من طرف انسانة غالية قوى على قلبى

يا أستاذ حشرى
ياللى بتحارب الفساد ...
منور خالص
بس مقولتش أسمك إيه و ليه ؟
بس الحشرى دى مفهومة ...هتحشر مناخيرك فى الحاجة لغاية ما تتعدل ..صح؟؟
ربنا يكرمك و شكرا على ذوقك

فرنسا هانم
يا نوارة السويس كلها
يا فندم بتحرجينى بأخلاق أهل السويس البلد العظيمة دى
كلامك الف فى المية صح ...
بس فيه ناس بييجى نصيبها بالعكس خالص
يعنى أسمه وجيه و هو تافه
أسمها سلوى و هيا بتخلق المشاكل
كدا ....
و يا ستى أسمك من مدونتك
أحلى اسم و احلى مدونة يا فندم

لعلها خير
يا ستى كلك ذوق
بس الأسم دا أنا سمعته و غالبا مطلع قصيدة و مسيرى هوصلها لأنها على أسم روح قلبى يوسف ...
و مامتك و الله بتقول أمثال قيمة فعلا ...
الواحد بيحب كل حاجة تفكرة بالغالى عنده
تحياتى يا عزيزتى

مامت نور وزياد
شفتى بقى الصدفة ؟
بس انا سعيدة اننا بنشتلر كفى الاسم دا و لو انه موش رسمى يعنى ...أسم حركى
الغريب انى بفصل خالص بين الأسمين ...
يعنى لو كان حد فى الشغل ينده أمل مردش عليه
و لو فى البيت حد قاللى فاطمة أحس انه بيكلم واحدة تانية غيرى ...
حاجة غريبة قوى
بس أوعدك انى هعتبره نصيبى من الأسماء و يكونلى امل عشان أسمى امل
بس فاطمة بحبه قوى
و فاتيما بموت فيه لأنكو بتندهونى بيه
تحياتى و قبلاتى أنا كمان برضو

انا اسمس سحر وبحب السهر للسحر
ياريت اسمي كان ليه معاني اكتر بس مش وارد
بس انتي كدة حبيبتيني في اسم يوسف ليكي علي اسمي ابني التالت يوسف عشان خاطرك
لماابقي اجيبه بقي وعليكي خير

البوست هايل
رائع بجد
انا اهلى سمونى محمود - مش بطوط- تقريبا لان على اسم عم والدى مات ومخلفش فجدى كان عايز يحيي الاسم وبيقولوا ان جدى كان دايما بيقعد يدعيلى جامد عشان الاسم
ابويه كان دايما يقولى انت مبروك لان جدك دعالك

وجدك كان راجل صالح

والله يا فاتيما مش عارف ايه سبب تسميتى أيمن بس إن والدتى كانت عاوزة تسمى المولود أيمن ووالدى كان عاوز يسميه أحمد فلقوا اتنين توأم- طبعا زى القمر- واحد سموه أيمن اللى هو بلا فخر انا والتانى احمد اخويا التوأم.. بس خلاص
مدونة جميلة ومن زوارك الدائمين
مستنيكى فى مدونتى

أحلى تعليق لأحلى أم لأحلى يوسف فى الدنيا
اسم جميل وكلام أجمل عجبتنى المدونة جدا وأتمنى الاستمرار

كلامك كله دفا وحنية ورقة ...أنا اللى سعيدة بيك جدا ويارب يبقى بينا لينكات وايقونات وكل حاجة طيبة وجميلة

تحياتى وحبى ومودتى

السلام عليكم

ازيك ياام يوسف

تصدقى انا تهت وسرحت وضحكت ودمعت فى البوست

دمعت لانى عرفت ان يوسف مش معاكى

ودا شىء انا اول مره اعرفه

وصدقينى حاسس بيكى وبمعاناتك
انا لما بسافر اى ماموريه للشغل
ببقى هتجنن علشان اشوف الاولاد

وتقريبا اغلب البدل بتاعى
بدل السفر
انا بضيعه فى التليفونات علشان اسمع صوت الاولاد
تحياتى لصاحبة القلب الحنون
الاخت العطوف
الام المثاليه

امممممممم
اما يستى سمونى احمد ليه
ممممممممم
هسأل بابا وهقلك علطول

بس هقلك محمد ومحمود سمتهم بالاسم دا ليه
انا كنت ناوى انى اسمى اول اولادى احمد
وكنت هوصيه هو كمان يسمى احمد
هههههههههه
مش انانيه والله

بس علشان كان ليا صديق الله يرحمه
كنت بحبه اوى

وكان اسمه احمد احمد احمد احمد العنانى
ايون
هههههههههه
4 احمد
المهم لما جاه محمد ابنى

كانت ولادته صعبه جدا

ومامته تعبت فيه جدا

وكان الدكتور وبعد ربنا طبعا كان ليه فضل كبير

والدكتور دا كان اسمه محمد احمد

فقلت والله انا هسميه مححمد على ايم الدكتور

اما محمود

انا بردو كنت ناوى اسميه احمد

بس قبل ولادته باسبوع

جانى جدى رحمة الله عيه
فى المنام

وقالى محمود
محمود

فقلت ان شاء الله هسميه محمود

وفعلا رزقت بمحمود

والصدفه ان الدكتور اللى ولده

كان اسمه محمود احمد

تحياتى يا يا اختى الفاضله

اخيكى احمد سكر

ام يوسف

اسمك كده وانا مش هغيره ولا اتنازل عنه

موضوعك جميل جدا
وحقيقي لكل انسان من اسمه نصيب

عمر ابني

ان بحلم اسميه عمر من وانا طالب في الثانوي

وفي الجامعه لما قابلت مامته اتفقنا على كده (_انا وهي دفعه واحده وقصه حب طووووووووووويله)

بس الدكتور قالنا انه بنت

ويوم الولاده هي اصرت انه ولد

ولما خرجت من غرفه العمليات وقبل ما تفوق من البنج قعدت تنادي فين عمر

تصوري واحنا كنا متخيلين انه بنت
وانها مش مدركه
طلعت صح

عموما

انا محمود

واسمي على اسم خالي

تحياتي ليوسف

وام يوسف

تدرج اختيارك لاسم يوسف كان نفس تقريبا اللى خلانى اختار اسم ابنى واخليه يوسف بس انا من اول معرفت نوع الجنين وقالولى انه ولد وكانت كل الاشارات زى محلصلتلك وهما بينادونى بام يوسف من قبل مولد

وبعدها جه يوسف ونور الدنيا بجماله
وفعلا الواحد بيناله جزء كبير من اسمه وبيتصف بصفات منه وخاصة أسماء الأنبياء

لكى كل تقدر وتحية
ويارب يسعد قلبك وينور عقلك
ويجمعك بيه على خير
========
عارفة
كل لما بجيلك بحس على الرغم من آلامك الا انى بحسك مليانة رضا بقضاء ربنا

عارفة بقى ان الوصول للدرجة دى صعبة قوى ولكن ثوابها عند ربنا عظيم قوى

اقولك حاجة تانية

بشعر ان اللى انتى فيه ده كله خير كبير قوى ربنا باعتهولك بس احنا دايما بنشوفه بعدين فى وقت لاحق لكن تعمقى بفكرك شوية هتلاقى كل الخير

ربك له حكمة فى كده واكيد هيثيبك على صبرك وتحملك على الرغم من تمام معرفتى بما يجول بصدرك من مشاعر مؤلمة ولكن تمسكى برضاكى بالله وايمانك بقضائه

هبة

أنا بحب أوي آجي هنا يا فاتيما و أشوف سيطرة يوسف على كل تفاصيلك
المدونة مليانة بإسمه و كلمات عنه


تدويناتك مليانه بروحه و ذكريات أيامك معاه

نظرتك للحاجات كلها بحسها بتدور و تلف حوليه حتى لو الكلام مش عنه

رغم ان كل بيوجعني عشانك
إلا إنه جميل قوي ويفرح برضه

إنشاء الله حايرجع يوسف لمكانه الطبيعي و لكل الخير و النعمة اللي ربنا شايلهاله جوه حضنك

وانشاء الله تشوفيه في ايمان يوسف و يقينه وجماله و جاذبيته ويمتلك نفس محبة الناس ليه و يكون حظه من الدنيا زي حظه

أما إسمي فقريت إن معناه جماعة من الجمال(الابل يعني)

وأنا مش لاقية أي علاقة بين الجمال و حياتي!!!!

:))

تحياتي و خالص محبتي

ربنا يخليهولك ويرجعهولك بالسلامة
مامتى هلى اللى سمتنى ومش عارفة نصيبى ايه؟دى حاجة لسه فى علم الغيب

يا مفقوعة مرارتها
يا سحورة
هاتى التالت و متتلكيكيش بيا ....
و عموما كنت فاكرة لما سميت يوسف بالإسم دا إن الواد أسمه نادر و موش كتير بقيت كل حتة أروحها الاقى أم و لا اب بينده على أبنه بيوسف ....
حاجة غريبة بس جميلة برضو ....
و يا سحر أسمك حلو قووى ... أنا من عشاق السهر و يمكن اعتبارى مخلوقة ليلية صرفة ...
نورتى يا جميلة
و مجبتيش شريحة بيتزا معاكى و لا حاجة ؟
بس من ام جبنة قليلة عشان المغص و حياتك

بطوط يا حبوب
يا محمود أسمك من أجمل الاسماء لأنه ينتمى لسيد الخلق و أكرمهم صلى الله عليه و سلم
و يا سيدى ربنا يكرمك فى جدك و عم والدك و والدك ...
و يصيبك نصيب من دعاهم جميعا أينما كانوا
تحياتى يا حبوب

أيمن بدر
مبروك على مدونتك و طبعا هزورك ان شاء اللهو شكرا على رأيك فى مدونتى
يا رب دايما تكون عند حسن ظنك
و أنتم بقى تؤام متشابه و لا مختلف ؟؟
متهيألى لو متشابه هيبقى عندك رصيد حكايات كتير تقولهلنا فى مدونتك
اهلا بيك دايما

إيمان الجميلة
يا حبيبتى يا رب يخليكى
و الشعور متبادل و الله
و أسفة للمرة الألف على اللى حصل النهادرة أنا حاولت أكلمك من موبايل تغريد و معرفتش أوصلك
المرة الجاية تتعوض يا إيمو
و تحياتى يا جميلة

أحمد يا سكر
معلشى يا احمد كنت هتعرف منين الا واحدة واحدة
و ربنا كريم و قادر على كل شىء
و بكرة يرجع لحضنى
و ربنا يخليلك ولادك يا رب
و معقولة يا احمد مسألتش و لا مرة أتسميت ليه بالأسم دا دونا عن غيره ؟؟
معقول
دا نت كنت طفل هادى بقى و موش فضولى
و بعدين تسمية الولاد على اسامى الدكاترة اللى ولدهوم دا فال حلو
نجيب محفوظ اتسمى على أسم طبيب الولادة بتاع والدته ....
و ربنا يكرمك فيهم و يبقالهم حظ من أسمهم سواء على أسم سيد الخلق أجمعين
أو من حظ الأديب العظيم يا سكر
تحياتى يا أب جميل قوى

دوبا
هبة يا حلوة
أنتى كمان عندك يوسفى زيى ...
ربنا يحرسهما هما وكل اللى زيهم يا رب
بصى الصبر و السكينة اللى أنا فيهم دول موش جايين بالساهل كدا
دول نتاج مناطحة فى الصخر و خبط راسى فى الحيطة لما الحيط اتفلق منى
و لقيت فى الآخر مفيش فايدة
طب خلاص
أن صبرتم أجرتم و امر الله نافذ
و ان ما صبرتم كفرتم و أمر الله نافذ
طب نصبر و ربنا يجازينى خير ان شاء الله بس كل شوية أفتكر ان يوسف لوحده موش معايا أطمنه واحميه و اكله و أخرجه و أعمل معاه اللى كنا دايما نعمله سوا ...بتعب و قلبى يوجعنى
و ساعات ضميرى يوجعنى انى عايشة عادى كدا و ان المفروض الحياة توقف احتجاجا على بعده ...
بس هاحتج على مين ...على ربنا ؟
دانا أبقى غبية قوى قوى ...
يبقى مفيش غير الصبر
و ربنا فرجه قريب
ماما دايما تقوللى ...تبات نار تصبح رماد
تحياتى يا ام يوسف انتى كمان

هنودة
يا قمراية اسكندرانية
أزيك يا دودو ...واحشنى تعليقاتك
و ازاى تقولى ملكيش نصيب من أسمك بقى
هوه الجمل دا موش أبو الترحال و السفر
و عنده صبر يهد جبال ...
و موش كمان بيقعد يجتر وقت الشدة
موش سيادتك بتعملى دا كله و انتى عندك
مين اللى شد الرحال و اتغرب و عدى الصحارى بعيد عن المعشوقة اسكندرية
موش انتى؟
مين اللى قاعد يناجى المحبوبة و يجتر فى أحزانه و احساسه بالغربة
موش انتى؟
داالجمل عيونه كلها حزن دفين
موش عيونك فيها دا لما بتفتكرى شوارع و بحر اسكندرية ؟؟
يا دودو نورتينى و متبقيش تغيبى علينا

موناليزا
أهلابيكى
بس مقولتيش موناليزا دا اسمك فى المدونة و لا الحقيقى ؟
لو موش عاوزة تقولى الحقيقى مفيش مشكلة بس اسمك فى المدونة اخترتيه ليه؟
على أسم اللوحة الشهيرة و لا شخصية ما قريبة ليكى بتحبيها ؟؟؟
تحياتى يا عزيزتى

اولا انا زيك بحب يوسف فخر الدين وحاسة انه ماخدش حظه كفاية

اما حكاية حظ الانسان من اسمه فدى لغاية دلوقتى محصلتش معايا بس لاحظتها على ناس تانية يعنى تقريبا كل الناس اللى كان اسمهم سعاد حظهم قليل فى السعادة مش عارفه ده صح ولا لا بس ده اللى حصل معاهم

عموما اتمنى ان يوسف يبقى ليه حظ حلو من اسمه ويرجعلك بالسلامة ان شاء الله

يا يا فاتيما جبتي معني كان غايب عني تماما.. حسستيني انك عارفاني قوي

أنا كده دمعت و حافضح الدنيا

خالص محبتي

والله يافاتيما انا انااسمي مصطفي واعرف ان مصطفي دة يعني معناه المختار يعني حاجةكدةحلوة قوي وليهاقيمةكبيرة وحتي من تصريفات الأسم الصفوة بس مش عارف هل ليا من اسمي نصيب ولا لاء لوعارفة قوليلي بليز

أهو ده عيبه
هوه فعلا يوسف فخرالدين مخدش حقه كفاية و انحسرت ادواره فى الافلام الكوميدى الخفيفة بس هوه كان ممكن يطلع منه حاجات أكتر من كدا بس بحبه قوى فى أخواته البنات و أصعب جواز و الثلاثة يحبونها و الاشقياء الثلاثة و مسلسل الدوامة ... يعنى
و مقولتيش اسمك يا جميل ...ماشى
أحترم رغبتك فى إخفاؤه
بس عندك حق فيه ناس اسمها ساعات بيبقى عكس نصيبها من الدنيا
وتحياتى الخالصة ليكى

هنودة
يا قمراية اسكندرانية
يا ماما انتى مفضوحة أصلا
دانتى المدونة بتاعتك متغرقة شجن
و حنين الغربة باين عليكى
و كل كلماتك مشحونة صبر مضطرة اليه عشان تعدى ايامك هناك ..
أصلى كمان اتغربت مرتين و حاسة بيكى يا حبيبتى و ربنا يقصر ايام غربتك و ترجعى بالف سلامة و انتى مجبورة الخاطر
يا رب

mostafarayan
و الله يا مصطفى موش عارفة لسه ليك من إسمك نصيب و لا لأ...
بس طبعا اتمنالك دا
و على فكرة المصطفى احد أسماء سيدنا محمد صلى الله عليه و سلم ...
يعنى انت متسمى تيمنا بإسم أشرف الخلق
ربنا يكتبلك صحبيته يوم الدين
يكتبلنا معاك
تحياتى يا شاب يا ثائر يا مبدع

نسيتي اهم يوسف
واطيب قلب يوسف
واقوي قلب يوسف
واشجع قلب يوسف
يوسف بن أيوب بن شاذي بن مروان
والشهرة
صلاح الدين الإيوبي
من جمال الاسم يتحب يوسف
:)
ربنا يحميه

يااااااااااه
أحمد سلامة
فينك يا راجل
و فين قهوتك المظبوطة اللى تعدل الدماغ يا عم
المدونة نورت و الله
و ريحة البن المعتبر عبئت المكان و لا اجدع بخور ....
لأ منسيتش صلاح الدين ...بس مكنتش أعرف ان دا إسمه أعرف أسم الشهرة بس
و بعدين سعادتك يوسف أول مرة نطق أسمه ...
قالى يا ماما اللى دخل القدرس اسمه صلاح الدين القليوبى
و طبعا يشرف محافظة القليوبية ان البطل دا يبقى من عندها ...
بس سنة بقى عشان أصلح الأسم ....
و نورت يا عم إبقى تعالى

شقيقة الروح والالم

تأخرت رغما عنى لكنى اتابعك دوما ابتسم وتدمع عيناى مع كل حروفك الرقيقة واجد نفسى مع كلماتك المسكونة بالحب الخالص

يوسف اسم جميل ولم اعرف يوسف ليس جميلا حتى الآن ! اعاده الله لاحضانك عن قريب

لا اعرف هل لى نصيب فى اسمى ام لا عزيزتى
فهدى من الهدوء والهداية على حد علمى
وعلى نفس حدود العلم لست بهادئة ابدا فداخلى بركان يمور حمما من قلق ابدى
اما الهداية فدوما اسأل الله ان يجعلنى من المهتدين وان يجعل وجودى هداية ما بشكل او بآخر وليس تحريضا على شىء آخر

احب اسمك يا فاطمة
يذكرنى بالسيدة فاطمة بنت الرسول رضى الله عنها وصلى الله عليه وعلى اهله وصحبه اجمعين

دمتى جميلة
شقيقة للروح

هدى

هدى يا شقيقة الروح
بصى يا هدهودة الاول شكرا على إنك ما زوغتيش
ثانيا شكرا على رأيك فى يوسف و دعاك ليه و ليا
ثالثا إسمك يا جميل جاى من الهدى يعنى الرشادو الصلاح ...
بس على فكرة ليه معنى تانى و هو النهار و دى غريبة كنت أول مرة أعرفها ....
و لما نقول ربنا يهدى الى الخير يعنى الهدى هنا بمعنى السبيل الى الحق
يعنى من الآخر كدا سيادتك ليكى نصيب كبير من إسمك ...
يعنى بتقولى انك بركان ثائر لا يهدأ و بيدور على ملجأ للروح المتألمة ...يعنى طول الوقت بتحاولى تسلكى السبيل اللى هيوصلك للراحة و السكينة
و أى خدمة يا فندم...
بس تعالى هنا...
انتى مخاوية على فكرة و شقيقة الروح بجد
أنا أسمى على أسم أجمل نساء العالمين
أسمى فاطمة الزهراء ...
عرفتى أزاى بقى قولليلى ؟؟؟!

هممممم
والله يافاتيما هو انا اول ما اتولدت قالو هيسموني عطيه على اسم جدي
لكن انا وقفتلهم واعترضت واعلنت استنكاري وتمردي متمثلا في اني عملت بي بي كتير قوي .. فقالو لا مش هينفع ويستحسن نسميه حاجه تانيه
قمت انا اقترحت عليهم في جلسه اسريه انهم يسموني حسب الله .. لكن اقتراحي لم يلقى قبول وامي ساعتها كتمتني ورضعتني ونومتني .. صحيت تاني يوم لقيتهم بيقولولي ازيك ياحمد
؟؟؟
احمد مين يا جدعان احنا مش كنا اتفقنا على حسب الله وقرينا الفاتحه على كده
قالولي انت لسه صغير ومش هتفهم قيمة اسمك غير لما تكبر
وفعلا لما كبرت ودخلت المدرسه فهمت قيمة اسمي .. باعتبار انه بيبدأ بأول حرف من حروف الابجديه فانا كنت اول واحد يمتحنوه شفوي وابقى مخنوق واقول مش لو كانو سموني ياسر ولا يحي ولا يوسف كنت امتحن اخر واحد
لكن لما كنت اخلص الامتحان الشفوي واخرج اول واحد من العيال اللي لسه بيمتحنو كنت باحمد ربنا
!!!!!
احمد ربنا
؟؟؟؟
يبقى هو ده حظي من اسمي
اني احمد ربنا دايما
والحمدلله على كل شيء






سلامووووووووووووووز

يا خرابى يا سوووو
بص انا فطست من الضحك من اول أرع أسطر
ماما قاللتلى بتضحكى على إيه ؟
قريتلاها كلامك
هيا كمان فطست ....و قالتلى شكله إيه الواد دا ؟؟
وريتها صورتك الموجودة عند خالو أحمد الصباغ ...
عملتلك كشف هيئة طبعا مع الرجوع لخلفيات سابقة زلى ميدان رمسيس و البليلة
و بتقولك دمك خفيف يا بنى ....
و ربنا يروقلك الحال دايما ....
شوفت بقى التسلسل المنطقى بتاعك للوصول لمغزى الاسم ...
ميعملش الحكاية دى الأ حد متمكن
زى سووو
بضم صوتى لماما و اقولك
أضحك الله سنك
يا صديقى

بلغي والدتك العزيزة اني باحبها قوي قوي قوي
ومن النهارده انا باعتبرها ام المدونين كلهم
بس على الله ترضى وتقبل انها تكون والدتنا وتستحمل تعبنا

وربنا يارب يارب يارب يديها طولة العمر ودوام العافيه وراحة البال




سلاموووووووووووووز

الست الوالدة جالها ذهول و غحراج عاطفى من الكلام الحلو اللى قولته يا سووو
و لغاية ما تنقشع حالة الذهول
بقولك بالنيابة عنها
يا بنى دا يشرفنى و كترالف خيرك
و ربنا يحرسكوا و يبعد عنكو ولاد الحرام و ينورلوكو طريقكو ...
الطقم دا بتودع بيه ماجد اخويا و هوه نازل الشغل الصبح
و أنا لما اكون خارجة ... مع إضافة خللى بالك من نفسك و اذا لقيتى اللى ما يتسمى فى وشك و لا اتعرضلك
صوتى و لمى عليه الناس يا فوزية يوه قصدى يا بنتى
و اتصلى بياو أناآجيلك
خد أول أرع تسطر و سيب آخر جزء دا انت موش محتاجله ...
و أى خدمة يا فندم
تحياتى يا صديقى

تصدقي لفته ما أخدتش بالي منها خالص .. وهي الخاتمة الجميلة لقصة سيدنا يوسف عندما إلتقى أبويه وإخوته بعد سنين طويلة من الفراق

ده بجد فأل كويس جدا .. ليوسف الصغير .. عما قريب

الجميله فاطمه...وربطنا غلى قلب ام يوسف..اصبرى صبرا جميلاوربنا يقويكى ويعينك انا عارفه انه ظرف صعب...فكرتينى بنزار قبانى فى ممنوعةٌانت من الدخول يا حبيبتى علىَ
انا اسمى رضوى ونصيبى من اسمى كبييير
والله راضيه بقضاء الله كله بسهله وصعبه والحمد لله الف حمد راضانى اوى اوى مفيش وصف لكرمه الودود...ربنا يرد يوسف ليكى ردا جميلاوساعتها تقولى عدت والغود "احمد"
dodda

عم مراكبى
يا نبع الحكمة
أنا كمان مكنتش عارفة و انا بسميه يوسف انه هيكونله نفس مصيره و هو طفل
بس إحنا دلوقتى فى منتصف الحكاية ...
انا دايما كل ما يوسف يوحشنى أفتكر سيدنا يعقوب و أقول يااااه
الإنسان العظيم دا اتعذب كتير قوى قوى
و اذا كنت عارفة ابنى فين و مع مين و جراله إيه ...أومال سيدنا يعقوب اللى مكنش عارف حاجة خالص كان حاله عامل ازاى ...
و كان نبى ...و مع ذلك نال نصيبه من العذاب كأى بشر ....
عشان أى حد ييجى بعده و يكون فى نفس حالته ..
يفتكره و يثبت و يستنى البشارة
و يشتم ريح يوسف
و انا فى انتظار القميص

dodda
يا رضوى منورة
و خطوة عزيزة
و شكرا على مساندتك دى و إحساسك الدافىء ...
و يظهر فعلا ان ليك من اسمك نصيب كبير
لأن حتى تعبيراتك وكلماتك بتقول انك انسانة مؤمنة و هادئة و راضية
يا رضوى
نورتى و تعالى كتير

إرسال تعليق