.

.

معجم المصطلحات اليـوسـيفـيـة  

Posted by: فاتيما in





عاوزة حباية فيتامين
لما ماما تبقى عاوزنى اديها بوسة جامدة على خدها
إدينى حضونة
لما ماما تبقى عاوزنى أحضنها حضن جامد
عشان تتدفى و أو تكون خايفة من حاجة
أعطنى جرعة حنان
لما ماما تبقى زعلانة أو معيطة و عاوزنى آجى جنبها
نتكلم شويتين فى الحياة
دى حتة سنتوفة
لما ماما تبقى عاوزانى أخلص آخر معلقة فى الطبق
وآخر حتة فى السندوتش اللى موش قادر اكمله
يا فنان يا تشكيكى
لما ماما تقعد تتفرج على رسوماتى اللى برسمها
هاتى إيدك يا بسكوتة
لما ماما تكون بتعدى الشارع و تروح ماسكة إيدى
عشان فاكرانى لسه صغنن معرفش أعدى لوحدى
الواد السوسة الفنوسة
لما ماما تلاقينى بعمل هاى سكور فى ألعاب الكمبيوتر
إنت قطتى المشمشية
لما ماما تطلب منى أعمل حاجة و أسمع الكلام
أو أقول حاجة بتعجبها
المزغودة دى
لما ماما تشاور بغيظ على القطة بتاعتى
و غالبا بتكون عاملة تواليت على السجادة
يوسف هل أنتا تحبونى ؟
لما ماما تبقى قاعدة ساكتة و مرة واحدة
تسألنى وكل مرة أقولها ... طبعا أحوبك
وحياة تيتة ما هيحصل
لما ماما مترضاش تجيبلى لعبة بدل اللى انكسرت
و تقول موش هتشترى واحدة تانية من عند الراجل أبداً مهما حصل
ليه يا رب عملت كدا فيا ؟
لما ماما تبقى متنرفزة منى عشان عملت حاجة غلط
ودايما تقولها وهيا باصة للسقف

This entry was posted on الأربعاء, أبريل 16, 2008 and is filed under . You can leave a response and follow any responses to this entry through the .

68 كــــلام بيطــبطـــب عـــلى قــــلبى و روحــــى

اوعى تكون دى اكتر جمله بتتقال
ليه يا رب عملت كدا فيا ؟
هههههههههههههههههههه
ربنا يخليكوا لبعض ياااااااارب

عرفت منين يا بطوط ؟؟؟!!!
دى كل يوم يا بنى كانت بتتقال ...
بس من ورا قلبى والله
دا هوه اجمل حاجة ربنا عملها فيا
بس بقول كدا بس كرت إرهاب
عشان يعرف انه عمل حاجة مضايقنى و يبطلها
ربنا يحرسه مطرح ما موجود
و يرجعه بالسلامة لحسن وحشتنى لماضته و كلامه الحلو قوى قوى

الاطفال نعمه من الله
ربنا يبارك لك
اسلوبك هايل
شكرا

المزغوده

ههههههههههههههههههه
تصدقي فعلا امي الله يرحمها لما القطه .. قطة ايه .. لما قطيع القطط كانو يعملو الحمام في البيت ويبهدلو الدنيا كانت بتقول الكلمة دي
(راجع موضوع .. سوووو وتسع قطط)

فاضل كلمة واحده ماقلتيهاش لكن انا متأكد انك محوشهالو تقوليهالو لما تشوفيه

مش هقولها عشان ما اضيعش عليكي المفاجأه


ملحوظه
الله يكرمك بوسيلي مامتك من هنا ومن هنا وخديلي منها حضن جامد قوي قوي قوي وقوليلها ربنا يسعدها ويكرمها في ولادها وفي ولاد ولادها وتفرح بيهم وبولادهم وبولاد ولادهم
ويخليهالنا يارب
انا باتكلم باعتبار انها خلاص بقت امي مافيهاش كلام





سلامووووووووووووووز

عسول اوي البوست دا

ماشاء الله

اللهم بارك

البوست ماشاء الله تحفه

ربنا يخليكوا لبعض ويباركلك فيه

صباحك ورد يا ام يوسف

البوست ده بجد خطيييييير

يااااه على الحنين للغالي
بيخلينا نقعد نفتكر كل حاجه والتفاصيل الصغيره اللي بجد هي اللي بتكمل الصورة وتحليها
بس واه من بس
برضه التفاصيل دي هي اللي بتوجع القلب

ربنا ما يحرمك منه ولا من الحنين ليه

بالمناسبة

قريب جدا هبعتلك قصة واحد صحبي

ظروفه نفس ظروف يوسف
بس هو دلوقتي عنده 44 سنه
علشان تشوفي بكره
من النهارده

انا بس مستني الاذن منه
وبعدين صاروخ تكون عندك
سلامي
لروح قلب ماما

ماشاء الله عليه

ربنا يبارك لك فيه ويخليه
وتشوفيه
رئيس مجمع اللغة العربية
:)

ساعات بيبقى فى شوية مصطلحات بسيطة وصغننه بين الام وولادهابس بيبقى ليها معنى كبير لان احلى حاجة انهم اللى فاهمينها

ربنا يخليهولك يارب ويقولك وتقوليله كل اللى فى نفسكم

يارب عملت أحسن حاجة...عشان نقرأ أحلى بوست وأحلى كلام....
بقى من طقوسى دلوقت أول حاجة أعملها لما أدخل النت أشوف فاتيما...كاتبة اية النهاردة...
وربنا يطمن قلبك ويرده لك على خير

ممممممممممممواه

نفسي أشوف رد فعله لما يكبر و يشوف معجم المصطلحات العظيم ده
:)

يارب تشوفيه أكبر الناس قدرا وعلى قد حنانك و حنينك يارب يسعدك بيه

ماشاء الله يا ام يوسف

بوست جميل جدا

دى فعلا اغلب تعليقاتنا مع الاولاد

ههههههههه
محمد ابنى لما بيحب يقعد ع الكومبيوتر

يجى جنبى ويجيب كراسة المدرسه

ويقولى شوف يابابا المس ادتنى انهارده نجمه

جدع يا محمد انا مبسوط منك

بجد يابابا مبسوط منى

اه والله مبسوط يا محمد حتى شوف

هههههههههههههه

واضحك جاامد

يقولى انا مش حاسس يابابا

طب عاوز ايه يامحمد يعنى

اصل المس قالتلى انت شاطر اوى يامحمد

وهى كافئتنى وادتنى بونبنايه

طب كويس ياحماده

بقلك المس ادتنى بونبنايه ودى المس يابابا

طب ماشى عاوز ايه يعنى

هههههههههه

يقولى شوف انت بئه ولا المس
انت هتدينى ايه

يلهووووووى يامحمد كل االف والدوران دا علشان هتاخد منى ايه

ماشى ياعم روح خدلك ربع جنيه من جيب القميص

يبصلى بصةاستنكار
ويلوى بوزه

ويقولى بابا

البونبنايه فى الشنطه انا هجيبهالك

خليها جنب الربع جنيه

هههههههههههههه

تحياتى يا ام يوسف

ربنا يقرب البعيد

احمد سكر

ههههههههههههه

حلوة فنان تشكيكى دى يا فاتيما بجد

ربنا يا رب يسعد قلبك

ربنا يخليكوا لبعض يارب ومش يحرمكوا من بعض

بجد احساس جميل جدا ان الواحد يكون بينه وبين طفله علاقة من نوع خاص بالشكل ده


سلامي لعمي يوسف

ههههههههه
بجد روعة اسلوبكم فى تعامل جميل قوى مع بعض ربنا يخليكوا لبعض وما يحرمكوش من خفة الدم واللذاذة وما يحرمكوش مننا كمان
انا عندى همس لما تعمل حاجة غلط او مليهاش مزاج تعمل حاجة تقولهم بابا يدعق يعنى بابا يزعق
ما قولتليش هو يوسف عنده كام سنة
تحياتى ليكى يا ام يوسف
وبجد سعيد جدا بمعرفتك والله
خالد

ههههههههههههههه
تصدقى يا فاتيما
انا كنت كاتبة حاجة شبه كدة
وكنت بفكر فعلا انشرها
هتخلينى اتشجع وانزلها بوست قريب
ربنا مايحرمكيش منه ابدا
تحياتى ليكى
اختك خيخة

طيب يا فاتيما انا دلوقتى عايزة منك حضونة كبيييييييره اوى
بجد والله نفسى فى الوقت ده بالذات تخضينى فى حضنك اوى

الأم الحنون /فاتيما
اللهم يارب العالمين يا قوى يا عزيز أرجع يوسف لأمه فاطمة و قر عينها بحضنه الدافئ وكلماته الجميلة و مداعباته ..قلبى ينفطر لشجونك فاطمة و عسى أن يكون بعد كل ضيق فرج بأذن الله..
أبو خالد

ربنا يباركلك فى يوسف
على فكرة باين دمه خفيف لمامته

ربنا يخليكوا لبعض

سلام

انا اصلا هموت وابقا ام والبوست ده زود احساسى بكده امنى بقا يا رب اقول لابنى كده
ربنا يخليكو لبعض

هههههههههههه

ماشاء الله

عسل عسل

زى المخاليل تمام

انا كمان عندى معجم المصطلحات المخاليلية

:))

تحياتى لك

احمد الصباغ

هههههه

طيب إيه من المصطلحات دي حديث وإيه منها قديم؟

على فكرة .. رغم إن فكرة نشر الموضوع ده جريئة جدا .. لكن فيه جوه كل بيت برضه مصطلحات خاصة جدا ما حدش يفهمها برة

إعملي دعوة لنشر المصطلحات الداخلية وإبقى إعملي قاموس مستقل ليها

تعرفي اني بجد نفسي اعرف السر في ان دايما وجود طفل في البيت يعني وجود مصطلحات جديدة بسيطة وبتبقي خاصة بالطفل دا بس حتي لو فيه طفل تاني جه بعده
اكيد يوسف مفتقدها جدا
ربنا يخليكي ليه يا رب

السلام عليكم ورحمة الله وبركاته
يتشرف اتحاد المدونين المصريين بدعوة سيادتكم لحضور اجتماع الاتحاد يوم 25 / 4 فى كافيتريا المحروسة التابعة لفندق المحروسة للقوات المسلحة بالاسكندرية الساعة العاشرة صباحا .
وتفضلوا بقبول فائق الاحترام
مع تحيات اعضاء اللجنة الاجتماعية
وادرة منتديات اتحاد المدونين المصرين
http://egtadwin.yoo7.com/index.htm

fatima
--------
ساعات الاحزان بتفجر جوانا حاجات احنا ما كناش نعرفها...
بصى بقى حاولى تغيرى فى طريقتك شويه اصلى كل لما بادخل عندك بعيط...و انا عاوزه اضحك شويه..زالعياط على قفا مين يشيل ..بس الضحك شاحح اليومين دول..انتى دمك خفيف و انا لمسته فى تعليقاتك على بعض المدونات......
اصبرى..ان الله مع الصابرين...

ياترى المصطلحات دى برضه هتستخدميها وهو كبير؟
ربنا يخليهولك ويباركلك فيه

snohe
أشكرك يا سنوحى
و أهلا بيك فى المطرح كله
و مبروك علينا دخولك لعالم المدونات
ربنا يكتر احبابك و زوارك
تحياتى الخالصة

واد يا سوووو
الحاجة بتقولك متشكرين يا بنى و ربنا يكرمك ...
و إيه دا ؟؟!
مامتك كمان كانت بتقول الكلمة دى على القطط ؟؟؟
الله ... يبقى مزغودة دى مصطلح مقنن بقى و مصدق عليه و شائع الإستخدام بين فئات الشعب المصرى من زمان و عحنا موش عارفين
و كويس اهى حاجة مشتركة جديدة بينا يا صديقى و هى تربية القطط ...
و انا موش عارفة بالظبط الكلمة اللى فى بالك بس بخمن انها
يا روح قلب ماما
صح ؟؟
سعيدة دائما بوجودك يا صديقى

محمد
جست هيومن
لأ
متقولوش ؟
محمد اللى هوه جست هيومن تعطف و تكرم و تلطف و خطى عندنا يوزرنا فى المكان الغلبان بتاعنا أنا و يوسف ؟؟
لأ
متقولوش ؟
دا مصر اليوم فى عيد يا جماعة
نورتنى يا محمد
و متشكرين يا فندم على رأيك فى البوست
أرجو ان كل البوستات تنال إعجابك
و تحياتى

raspoutine
أهلا و سهلا
منور و خطوة عزيزة
و أشكرك على رايك
و ذوقك
و تشجيعك
و أرجو أن تزورنا دائما

سمسمة
يا طيف يدور جميع الأكوان
منورة
و ميرسى على ذوقك
و أشكرك جدا على الدعوات الطيبة دى
أنا و يوسف احوج ما نكون إليه عل الله يستجيب لكم و يرجع لحضنى تانى
ربنا يبارك فيك
و شرفتينى بالزيارة

يا خايف من الحقيقة
طبعا دا أساسى
كل بيت فيه أطفال لازم يكونله معجم مصطلحات ...
و انت أصبت كبد الحقيقة يا خايف من الحقيقة بس بتقولها ...
أنا فعلا عندى حنين أسمع الكلام دا و أقولهولوه زى ما كنا بنعمل ...
بكتفى دلوقتى انى أكتبه و أسجله هنا عشان خايفة أنساه فى يوم غصب عنى
و بخصوص قصة صديقك
أنا متشوقة أعرف حكايته
و متشوقة اكتر أسمع النهاية
و ربنا يحسن نهايتنا جميعا
سلامى لست الناس العزيزة

أكتب بالرصاص
منور يا تامر
انت فين يا بنى ؟؟
طول الوقت طاير كدا ...
و بعدين مجمع اللغة العربية إيه بس ..
و الفن التشكيكى نسيبه لمين ؟؟؟

أهو ده عيبه
دى بتحصل فعلا يا بيبو ...
الأمهات غالبا بيشتغلو مترجمات لعيالهم خصوصا أول سنة دى ...
الكلمات بتبقى حروفها ناقصة و مبهمة و معقدة
و فيها تمويه و لا أجدع شفرة كان بيستخدمها محمود عبعزيز فى رافت الهجان ...
نورت يا جميل

إيمو
يا حبيبتى يا مشجعانى علطول كدا
انتى تنورى و تشرفى و تزودى فرحتى بوجودك دايما ....
و اتمنى انى لا أخذلك أبدا فى أى توقعات تنتظريها منى فى يوم
أممممممممممو ليكى انتى كمان يا بسبسة

هنودة
يا قمراية اسكندرانية
أزيك يا هنودة ؟
أرجو ان تمر عليكى الأيام سريعة و تتخففى من ثقل الغربة ....
و يا حبيبتى هوه بس يوسف يرجع و أنا أقول و أقول و أقول و مبطلش كلام
و نخترع كلام تانى و تالت و رابع ...
ربنا يسمع دعاكى يا حبيبتى

أحمد يا سكر
يختى عليه يا سكر
ربنا يحرسه و يخليه هوه و أخوه و مامتهم
بس الولد داخل على طمع و لا أنا متهيألى ...
كدا تسيبه يغلبك و يعامل الربع جنيه الغلبان المعاملة دى
موش تقعده جنبك و تفهمه يا سكر
و تحكيله الربع جنيه اللى موش عاجبه دا
على إيامنا كان بيسوى الهوايل و يعمل العمايل ...
طب دا حتى المبلغ دا ممكن يجيب خمس و لا تلت بونبونات من بتوع الأبلة ...
و ملحوظة جانبية كدا
الأبلة دى بتعمل فورتينة بينك و بين الولد
و كدا قصدها تخليه موش طايق عيشتكو
و يتمرد على المصروف
انا بقولك أهو و أنا أصلى أحب أهدى النفوس

آبى
يا أحلى كوكب فى المجموعة الشمسية جمعااء
طب بذمت و أنا عارفة ذمتك محدش يستجرى يهوب ناحيتها بدبوس
موش لفظ تشكيكى أقرب الى الصواب ...
يعنى الفنان من دول بيرسم اللوحات المغايرة للشكل التقليدى اللى متعودين عليه ...ورد فازة وش حلو
أ ... الفنان التشكيكى بيتشكك فى كل ما سبق و تعارف عليه الناس و يرسم حسب رؤيته هوه
و نبقى إحنا الواقفين نتفرج على اللوحة نقعد نتشكك بقى ..و نقول هوه كان قصده إيه ..الحتة دى معناها إيه ...
تشكيكى أنسب و الله من وجهة نظرنا المتواضعة أنا و يوسف
و بصراحة الواد أول مرة نطق اللفظ نطقه صدفة كدا
و أنا ما صدقت و عجبتنى و بقيت بقولها عن استمتاع و إقتناع رغم انو بقى يقولها تشكيلى ...
أقوم أضحك و أقوله غلط ..تشكيكى
اتعلمو الكلام بقى

يا صاحب المضيفة
نورت
و سعيدة ان الالألفاظ دى عجبتك
و كل بيت فيه طفل دا العادى بتاعه انه ينطق الكلمات غلط ...
بس الغلط اللذيذ اللى يخليك تكون سعيد و بتضحك من قلبك و متنساش الكلمات دى مهما الطفل دا كبر ...
أنا بحمد ربنا ان يوسف فى المرحلة دى كان فى حضنى و سمعته و متحرمتش من المتعة دى ...
و ربنا كريم و استمتع بالباقى الآتى
تحياتى

همس الاحباب
يا خالد سعيدة بمجيك و الله
بص يوسف فاضله 4شهور و يتم تسع سنين
عقبال ما أشوف راجل و أب
و ربنا يخلى همس و تشوفها عروسة و تشيل ولادها
أن لسه فاكره يوسف و هو أصغر من دلوقتى و كان بيقول حاجات تفطس من الضحك
تخيل كدا ....
كان بينطق الميم باء ...
عصير المانجو يبقى بانجو
و الباء ينطقها ميم
و البوتجاز يبقى موتجاز
و قيس ألفاظ كتير بقى على هذا المنوال
و ربنا يسعدهم قد ما بيسعدونا
و ميخلوش حد مننا يزعل و يتعصب و يدعق

نوران الغالية
بت يا خيخة ..
تعالى هنا
انتى عاملة إيه فى البلوج بتاعك ؟؟
وديتى البوستات للمغسلة و لا سلفتيهم لحد ؟؟
ادخل عند الاقى آخر بوست بس و كمان حرمان تام من التعليق ...
مالك الايام دى فيه حاجة غريبة عجيبة مريبة بتحصلك و لازم هعرفها بس لما تيجى الفرصة و هتقرى و تعترفى و على رأى يوسف
متخلنيش أنتكب حماقة ...
عشان انتكاب الحماقة يعقبه الندم
و يا ستى مين يشجع مين
دانت الكابتن الكبير بتاعنا و إحنا قاعدين على الدكة بنتعلم ...
ربنا يخلى شريف و تشوفيه أحسن حد فى الدنيا

قطة الصحراء
يا قطتى الحلوة
يا حبيبتى بس كدا ؟؟
طب ليكى عليا أول مرة هشوفك فيها هديكى حضونة كبيييييرة من بتوع يوسف من النوع الممتاز بس انتى تستحملى
أصل انا عارفة القطط رقيقة و بسكوتة

أبو خالد
يا راجل يا طيب
يا رب تسمع من الراجل الطيب أبو قلب كبير دا
متحرمشى منك و لا من دعاك الحلو
و سلامة قلبك مقصدش أوجعه بس أنت قلبك شفاف و بيستقبل المشاعر كدا بدون حجاب ...
ربنا يريح قلبك يا رب
و تحياتى ليك و للمحظوظين بيك

رصيف نمرة خمسة
منورة خالص
و ميرسى على ذوقك خالص
و من ناحية خفة دم يوسف .. فهو دمه خفيف خالص خالص ...
دمتى بألف خير يا عزيزتى

إعترافات أنثى جامحة
يا ستى كلك ذوق
شكرا على الزيارة

عصفورة من الشرق
يا ستى ربنا يوعدك و تبقى ام لتلت أربع خمس عيال و متزوديش عن كدا ..
أنا كان نفسى فى خمس عيال بس ربنا أراد يرزقنى بعيل واحد بس بقى عندى بعشرة عيال ...
و ربنا يكتبلك نصيب أحسن منى ألف مرة
لأن الفرحة بكونك أم يقابلها على الجانب الآخر صعوبات رهيبة لكى تتمكنى من أداء الدور المرسوم و العب الجميل الملقى على كاهلك و المسئولية الخطيرة دى
ربنا يرزقك يا حبيبتى

خالو احمد الصباغ
منور يا احمد ...
و يا سيدى ربنا يخلى مخاليلك و يخليلى مخلولى ...
دا اجمل مخولة فى الدنيا بتحصل و غحنا معاهم ...
و عقبال ما تبقى أبو المخاليل
يللا شد حيلك و أضف لقائمة المخاليل أعضاء جدد

عم مراكبى
يا نبع الحكمة
بتروح فين بس و تتأخر علينا
بفتقد تعليقاتك جدا ...
و نفسى أعرف انت راسملى صورة شكلها إيه فى خيالك ؟؟
متهيألى انت واخد فكرة غلط خالص
يعنى اتصور انك فكرانى جان دارك اول ما أهم كدا و أرفع لواء الفكرة ..
الناس هتيجى وراىا علطول ...
المعجم دا حاجة غلبانة كدا على قدى أنا و القطة المشمشية بتاعتى يوسف ..
بس بفكر أعمل جزء تانى عن الألفاظ المهجورة ....بس هيبقى صعب عليكو قوى
يعنى كلمة " ضيضة "
تعرف معناها إيه عند يوسف ؟؟
يعنى "بيضة "
لأ ...
هيبقى صعب قووووى

سنووايت
يا أميرة الحواديت
تفتكرى ؟
طب يا ريت بس يفضل فاكر نصهم بلاش كلهم ...
و بس يرجع و أفكره و نألف مصطلحات جديدة ...
نورتى يا اميرة

أحمد هيكل
يا شاعر الأحزان
كنت أتمنى المشاركة لكن ...
إسكندرية الجميلة بعيدة حبتين عليا
و ان كان الشوق اليها مالى القلب
ربنا يوفقكو فى مسعاكم
تحياتى

واحدة مفروسة
يا فندم منورة
و طب بس أعمل فى نفسى إيه؟؟
المووود العام كدا ...
و الموقف حتى الآن لم يتغير ...
تفتكرى أسلوبى هيتغير ليه؟....
بس أنا مبقصدش أبقى كتابتى حزاينى و تتعبك ...
أرجو ان تسامحينى على الخطأ الغير مقصود دا ...

موناليزا
طبعنن
أومال يا ماما هفضل أقولها
عارفة أخويا الصغير
بقى شاب ماشالله أطول منى ..
لسه لغاية دلوقتى أقعد أقوله فى وسط الكلام على ألفاظ كان بيقولها و هوه عيل ...
و يقعد يضحك على نفسه
دا تاريخ و مثبت و مسجل
لازم أمسك عليهم ذلة و أفهمهم انهم ميكبروش عليا و الله يرحم و حاجات كدا

مدونتك رائعة
واسلوبك بسيط جدا وجميل
انا نزلت قبل كدة موضوع شبه الموضوع ده
عن بنت اختى ياريت تدخلى وتقوليلىرأيك
اسمه اللغة الكنزية الجديدة

تقصدى ليه يارب عملت فيا كدة ومرزقتنيش باثنين ثلاثة كدة



بارك الله لك فيه

هتتحسدو يافاتيماااااااا
ربنا يباركلك فيه يارب
ويخلهولك
ويبعد عنه العين الوحشة

السلام عليكم
ادة انتى عملتيلوا معجم ربنا يخلهيولك

ربنا يخليكوا لبعض احلى حاجة فى الدنيا الام

كتير قوى الواحد يقعد زيك و يفتكر جمل بعينها اتقالت فى مناسبات معينه و تفكره بذكريات جميله و يبتسم و هو بيفتكرها و يقول يااااااااااااااااااااه كانت ايام
ربنا يردلك اللى غايب و يجمعكم على خير
امين يارب العالمين

الحلقة المحظورة ...
الأن في صحبة ........
دعوة عامة
تدعوكي مدونة الصحبة للرد علي أبشع المقالات عن الأخوان المسلميين .... بالله عليكم أرجوا الرد لنعرف من علي صواب

* الأخوان تخلوا عن الشعب
* من الصحبة الي الأخوان

و أكثر ... بل و أبشع ... فقط في الحلقة المحظورة ... علي مدونة صحبة بالله عليكم أدخلوا هنا
وشوفوا انا عندي حق ولا لأ بس ردوا
أوكية
http://so7bah.blogspot.com/

كما أتمني أن اكون من مدوناتك المفضلة التي تزورها دائما .... أنتظرك في مدونتي

بذرة أمل
أولا اهلا بيكى و شرفتينى بالزيارة
ثانيا أنا روحت قريت البوست بتاعك ..
و يختى على كنزى القمر دى ...
عسولة و ربنا يحرسها يا رب
بس بصراحة بقى أنا معجمى أبسط بكتير من بتاعها ...
دى صعبة قوى قوى و موش أى متخصص حد يعرف يفك الشفرة دى ...
سعيدة لمرورك و شكرا على ذوقك

الطائر الحزين
أنت منورنى قوى
و سعيدة بحضورك مرة اخرى
و طبعا قصدى اللى قولته ...
بس ربنا موش كاتب غير ولد واحد بس هوه عندى بكل العيال و الله ..
لأنه شخصية لطيفة و مرحة و يحسسك لما بيلعب إن فى الأوضة تلت أربع عيال موش واحد ...
ربنا يرجعه بالسلامة يا رب
و سعيدة قوى بمرورك الكريم

مدحت محمد
لأ بقى يا مدحت
إحنا آخر إتنين نتحسد فى الدنيا ...
هنتحسد على الفراق ؟؟
بس تعرف ممكن يكون عندك حق برضو ...
العلاقة اللى اتكونت ما بينى و بينه عدت مرحلة العادى بين أم و إبنها و دا يمكن يكون مميز لدرجة الحسد ...
نظرية برضو
نورت و سلامنا للبنى

رئيسة حزب الأحلام
و هوه يوسف أقل منها يعنى عشان يتعملو معجم ؟
موش هتيجى لحد عنده و تقف بقى
نورتى يا ريسة

hitham
أهلا بيك و شرفت
و أشكرك جدا على ذوقك و كلامك الطيب

صيدلانية طالعة نازلة
يا ستى منورة و متشكرين على الدعوات الحلوة ...
و مين بقى اللى بتعقدى تفتكريه و تفتكريه الكلام الحلو بتاعهم؟؟؟
يللا
إعترفى

أحمد على
بص طبعا أهلا بيك يا احمد
و أشكرك على انك يعنى عملتلى إعتبار و وجهتلى دعوة لزيارتك و التعليق فى مدونتك ...
بس هقولك الصراحة من الآخر كدا عشان موش عاوزة ألاوع حد محترم
أنا من الناس اللى بتعارض فكرة وجود حزب او جماعة أو مؤسسة أو أى حاجة مماثلة تتخذ من الدين عباءة لأهداف ما
و متقوليش الاخوان المسلمين هدفهم الدين و نصرته لأن ثبت بالدليل القاطع على مر السنين عكس ذلك و أختك كبيرة موش صغيرة فى السن و لسه هتسمع عنهم ...و هما بذاتهم لم ينكؤروا ان لهم أهداف سياسية بحتة ...
أنا فقط أتعاطف معهم لما بيتعرضوا لظلم و هذا لا أرضاه لأى حد موش هما بس
لهذا بشكرك على دعوتك فى كل الاحوال
و ربنا يوفقك فى اتجاهك و أفكارك
و شكرا ليك

إرسال تعليق