.

.

مـش ... مـش  

Posted by: فاتيما in

مش عاوزة كل شوية أشتريلك لعبة و أحطها فى الدولاب بقفلتها جنب إخواتها

مش عاوزة القطة الجديدة بتاعتنا تكبر بسرعة من غير ما تلحق تشوفها وتلعب معاها

مش عاوزة أروح مسرح العرايس أو المتحف المصرى ولا أدخل ماكدونالدز من غيرك

مش عاوزة كل ما أشوف لبس حلو آجى أشتريه

أتراجع عشان بخاف اجيبه و يتركن لحد ما مقاسه يصغر

مش عاوزة أقص شعرى و احاول اخس جامد عشان ترجع تلاقي شكلى متغيرش

مش عاوزة أتفرج على أى قناة من قنوات الأطفال و انت موش قاعد بتتفرج معايا

مش عاوزة كل ما حد يكلمنى فى التليفون يسألنى هوه مفيش اخبار عن يوسف ؟؟

مش عاوزة كل ليلة أقول ل نوتى الأرنوب بتاعك

تصبح على خير يا يوسف بدل ما أقولهالك إنت

مش عاوزة رمضان الجاى يدخل علينا و منعلقش الزينة

و نرص الفوانيس جنب بعضيها زى كل سنة

مش عاوزة حد ينصحنى اشوف حالى و يقوللى يوسف لما يكبر

هيدور عليكى و يجيلك لوحده

مش عاوزة قلبى فى يوم غصب عنه يدق و يحب إنسان

ميعرفش عنك حاجة غير الحكايات والصور و بس

مش عاوزة تيتة اللى هيا مامتى تفضل شايلة همى

كل يوم من أول ما تصحى الصبح لحد ما تيجى تنام

مش عاوزة الأيام تباعد بينا لحد ما تلهيك و تقسيك

و تنسيك إن ماما أكتر واحدة بتحبك فى الدنيا دى

مش عاوزة أفضل اكتب بوستات عنك لغاية ما حد يقوللى كفاية بقى زهقتينا

This entry was posted on الأحد, أبريل 20, 2008 and is filed under . You can leave a response and follow any responses to this entry through the .

85 كــــلام بيطــبطـــب عـــلى قــــلبى و روحــــى

احجز بس

ماصدقت

مره اكون الاول

يااااااااه
معقول
انا مش مصدق

طب اجرب مره تانى كدا

الله لعبه حلوه والله

انا هاخد البوست دا لوحدى بئه

وتالت مره

علشان الحبايب

ام يوسف

هونى عليكى يا ام يوسف

والله خلتينى ادمع من تانى

ابكى من تانى

هونى عليكى اختاه

مش عارف ااقلك ايه والله

غير انى حاسس بكل حروف من حروفك

كل كلمه من كلامك

كل همساتك

ارجوكى هونى على نفسك اختاه

واسف مكنتش اعرف ان البوست حزيناوى كدا

اخذت اكتر من تعليق

تحياتى

اخيكى احمد

:)
ربنا يرجعهولك يا فاتينا

إن شاء الله كل حاجة هتبقي تمام :)

الصبر تاج ، على راس الصابرين يلمع
يشفي و يمسح دموع ، في عيننا لو تدمع
خلليها ع الرحمن ،،الهادي بعد الكرب
دي الدنيا بعد الليل ، شمسها بتطلع
و عجبي
KING TOOOT

مش عايز اقولك اصبري
لانك حاليا لا تملكين سواه
مش عايز اقولك انسي وعيشي حياتك
لانه مينفعش ومش هتقدري ولا تحاولي

بس عايز اقولك ان ضروري جدا وبسرعه

تخرجي من الوضع النفسي ده

بلاش فلاش باك علطول

بصي لبكرة بشوية امل

عزيزتي بين سطورك ياس مخيف

ارجوكي
حاولي تتخطي الياس بعمل
انساني
طلعي فيه الحنان المكبوت ده
روحي دار ايتام
اقعدي هناك شويه
خدي طفل في حضنك وابكي
معاه وعليه وعلى نفسك
اغسلي بالدموع الاحزان ويمكن تخرجي من هناك احسن

مش عايز اقولك الدنيا مش يوسف بس لانها يوسف بس

بس يوسف لازم يرجع يلاقي دنيته عمرانه ومخربهاش الياس والالم


وربنا معاكي

مش ممكن هنقولك كفاية بوستات عن يوسف زهقتينا

فأنت يوسف ويوسف انتِ نحبك فأحببناه

لعله منعك ليعطيك

يا شقيقة الروح والالم
كونى شقيقتى فى الصير والانتظار
فى الامل بوجه الحى الذى لا يموت

مش ممكن تكونى اقوى عشان يرجع يوسف يلاقيكى اقوى بوجوده ؟

حاولى .. بدعيلك من روحى

خليكى رحيمة بنفسك شوية،صحيح انا معرفش تفاصيل كتير لاسباب بعاد يوسف عنك او سنه دلوقتى لكن حبيته وحبيتك من اللى بتكتبيه فاوعى تقولى ان حد ممكن يقولك كفاية
انا بقى مش عايزاكى تبطلى كلام عن يوسف

مش عايزاكى تفقدى الصبر او املك فى ربنا انه يرجعلك

مش عايزاكى تنسى ان فى ناس حبوكى وحبوه من غير ما يشوفوكى لكن من مجرد احساسك الصادق

مش عايزاكى تبقى قاسية على نفسك قوى كده


مش عايزاكى تقلقى او تخافى من بكرة لان بكرة ده بايد ربنا وهو ارحم بينا من اى حد حتى من نفسنا

بجد كل حاجة هتبقى كويسة صدقيني.. ما هوز يعني مش معقول ربنا يخيب ظن كل الناس اللي بتدعيلك دي.. معلش.. اصبري شوية وربنا كبير ، وزي ما بيقولولا
وقد يجمع الله الشتيتين بعدما يظنان كل الظن الا تلاقيا

فاتيما
مش قادر بصراحه اعلق الكلام وجعنى جدا
سيد سعد

ان شاء الله هيرجع وتاخديه في حضنك وبعدين بقي خلتينى اعيط طيب والله سمعتك وانتى بتعيطى الله يخليكى بلاش الحزن ده انا هقلك حاجه ده اختبار من ربنا عاوز يشوفك هتعملي ايه هتتمسكى بايمانك بيه ولا هتياسي وجت في اغلي حاجه عندك عارفه بقي انتى لو خدتيها من المنظور ده هتلاقي ان شاء الله ربنا فرجها عليكي ومن وسع وربنا هيبعتلك السعاده من حيث لا تعلمين عارفه انا مرت عليه 3 سنين من اسوء سنين عمرى عاوزة اقلك انى مكنتش بخرج من اوضتى بالشهور وضيق وضيق واتمسكت بالقرب من ربنا عدت عليا ايام كان ممكن انتحر واخلص نفسي من العذاب ده لكن لا الصبر ثم الصبر عارفه دلوقتى لما ربنا اراد انه يفرج همي والابواب المقفوله اتفتحت والحمد لله ربنا اكرمنى وبشرنى برؤيا بعد ال3 بالفرج والحمد لله انا هنا اهوه واقفه بضحك وبحمد ربي على نعمه الكتير .

السلام عليكم ورحمة الله وبركاته

ازيك يا فاطيما معلش مقصره معاكي شوية بس اعمل ايه بقي في ضغط الشغل اللي وايد اوي اليومين دول

ربنا يطمن قلبك علي يوسف ويردهولك قريب وتفرحي بيه وبعياله وعيال عياله


سلام يا قمر

ايه ده انا ملى انتى سايبه سكر يلعب هنا ولا ايه لا انا ماشيه عااااااااااااااااا

وزلعانه منه ومنك بقى
عااااااااا

المهم مش هنقولك بطلى تكتبى انتى اكتبى فى اى مكان وبعدين ده بيتك ومدونتك اعملى اللى يعجبك يا حبيبه قلبى واللى مش عجبه ينطح خروف

العزيزة قوى / ام يوسف
تعرفى انى عندى كلام كتير ومش عارف اتكلم واقول ايه حاسس ان جسمى كله مقشعر وايدى بترتعش من كلامك
والدموع فى عينى بجد مش عايزاخليها تنزل لانه جنبى ناس مش اكتر
بس بجد كلامك حرقنى قوى قوى وهزنى جامد
قد ايه انتى رقيقة وكلامك كله مشاعر امومة وحنية رائعة.
وطبعا عمرنا ما نزهق منك ولا من كلامك عن يوسف اللى ربنا يخليكى ليه وما يحرمكوش من بعض وتجوزيه وتشوفى عياله وعيال عياله كمان
بس على فكرة خلى بالك انك اتفضلى شايلة همه حتى بعد الجواز انا امى لسه شايلة همى بعد الجواز وبعد ما خلفت كمان وبتبعتلى اكل من سوهاج لحد هنا تخيلى بقى وانتى زيها اتبقى كده واكتر
بس انا عايز اتعرف على الموضوع من الاول لانى بصراحة مش عارف ايه الحكاية ويوسف فين بالظبط وليه انتى حزينة كده
انا كل اللى اعرفه انه فيه انفصال بس
انا اسف طبعا بس بجد انا حاسس انك اختى الكبيرة واعرفك من زمان ده احساسى بيكى
وطبعا احنا كلنا اخواتك ويسعدنا انك تحكى عن يوسف طول الوقت وعمرنا ما انزهق منك ولا من كلامك بس المهم تبقى سعيدة علشان احنا نبقى مطمنين عليكى
تحياتى يا ام يوسف

السلام عليكم حبيبتي
اول مرة ازورك حبيبتي ويشرفني اني اتابعك
انا كمان ام يوسف ربنايخليهم ويبارك فيهم يوسف ابني وابنك
هوني على نفسك يا اختي علشان يوسف
وباذن الله ربنا يرده اليكي ردا جميلا
ولا تهنوا ولا تحزنوا
ان بعد العسر يسرا اختاه
الجاي لرب العباد وابتهلي الليه واستغفريه واجعليه ملاذك وكوني في ثقة من رحمته عليكي وعلى يوسف
بادعيلك من قلبي بنا يطمنك عليه
بدعيلك من قلب ام استطعمت غلاوة الضنا ازاي ربنا يرده ليكي يا حبيبتي ويقر عينك بيه يارب
تمسكي بالامل واوعي تبطلي كتابة
اكتبي وقولي كل اللي تقدري عليه حتى لو هتكتبي كلمة واحدة هي فاكراك
علشان بكرة لما يرجعلك تقوليله شوف كنت بكتبلك وفاكرة
ربنا يطمنك ويريح قلبك ويثلج صدرك بضمة منه
تحياتي وتقديري يا ام يوسف

انا على فكرة قرايت كل بوستاتك القديمة دلوقتى من بعد التعليق بتاعى
بس مش قادر اتكلم بجد مخنوق قوى
اكلمك بعدين
تحياتى

عمرى ماهقوللك زهقتينا انا عن نفسى بحبك وبحب كتاباتك وبحب يوسف كمان لانه السبب فى اننا اتعرفنا على ام رقيقة وجميلة ذيك
يارب تشوفيه قريب

انا كتبت التعليق وبعدين مسحته
الموضوع قطع قلبى بجد ومش هقدر اتكلم

الأم الحنون /فاتيما
الراجل ده مالوش حد كبير فى عائلته يكلمه يقول له اللى بيعمله ده حرام
لا أحد من الطرفين يتنازل من أجل رد الأبن لأمه لا أحد
نفسى أراه و جها لوجه
ظالم ظالم
فاتيما صدقينى تمسكى بكتاب الله اكثر و اكثر ..أدمعت عينى من أجلك
ربى طمئن قلب فاطمة
أبو خالد

أحمد يا سكر
يا فندم المدونة مدونتك أحجز التعليقات اللى تعجبك ...
بس الحجز دا يبقى أملة بجد عند الناس الجامدة اللى زى خالتى فرنسا و خيخة و سووو و غيرهم من الفطاحل موش الغلبانة اللى زى حالاتى ...
و معلش بقى خليتك تدمع ...أصل أنا شخصيا قربت أبقى زى الحيطة و الكلام دا مبقاش يأثر فيا لدرجة العياط ..أنا بكتبه و أقراه كأنه العادى ...و كأنه ليه؟؟
ما هوه دا العادى يا سكر
فمتوجعش قلبك قوى عشانى
أنا بخير
تحياتى ليك و انت كمان أصلاً فيك اللى مكفيك

محمد
جست هيومن
يا سلااااام يا محمد عليك
انت نسخة يا بنى من ماجد أخويا ...
هوه فى نفس سنك و راسيانك و كمان أسلوبك فى الكلام
أبقى معيطة و متنيلة و متبهدلة
و الأستاذ ييجى جنبى كدا و يروح مطبطب عليا و يقولى الكلمة بتاعتك دى
إن شاء الله كل حاجة هتبقى تمام ...
أبصله و أروح ضاحكة و انا بعيط فى ذات الوقت
و أقوله يا سلاااااام
بس بحس ان الكلمة دى ممكن تكون بجد و فعلا بكرة كل حاجة هتبقى كويسة و تتحسن
أنا مبسوطة بيك قوى يا محمد
بس إنت راخر زى ماجد كلمة و رد غطاها
طيب ...ماشى... موافقين
و تحياتى يا عزيزى

وليد
يا راعى الملك
يا فندم تعيش و تربع فى رباعيات
و أنا فى إنتظار الشمس تطلع
متحرمش من زيارتك انت و الجماعة
و تحياتى للجميلة بوبو

يا خايف من الحقيقة
موش عاوزاك تقلق عليا و توجع قلبك كدا
أنا كويسة و الله
و اللى بكتبه دا هوه اللى محتاجه فعلا
إنى أنفس عن مشاعرى بدل ما أحبسها جوايا
أنا موش عارفة أقولها ليوسف ... فبقولها ليكم بالنيابة عنه لحد ما يعود
انتو بتحضنوا قلبى زى ما كان بيعمل
موش عاوزاك تقلق
و زيارة دار الأيتام دى أنا ناويها فعلا بس لما يوسف يرجع عشان أنا وعدته هنروح سوا و موش عاوزة اخلف وعدى و الحاجات اللى اتفقنا عليها أطلع فيها عيلة قصاده
أنا كل حاجة قبل ما أعملها أفكر لو كان معايا كنا هنعمل إيه و اتصرف على هذا الأساس
و أرجوكو محدش يقولى انتى موقفة حياتك و الحاجات دى
الكلام ممكن لو كان يوسف لا قدر الله عند ربنا و موش راجع ...
لكن هوه الحمدلله موجود و كل الخطط المستقبلية لازم تبنى على أساس وجوده حتى و لو كان غايب مؤقتا ...
و تحياتى ليك و لست الناس
و أخبار صاحبك إيه ؟؟

هدى
يا شقيقة الروح
يا حبيبتى أنا قوية عكس ما يبان من الكلام
أنا بس لما بكتب مشاعرى بتكون باينة ضعيفة و منكسرة ...
بس الحقيقة أنا قوية بيوسف و بأهلى و
بيكو أنتو كمان
كفاية بس تشجيعكو و قلقكوا عليا
موش عاوزاكى تخافى و تقلقى
أنا قوية للأسباب اللى ذكرتها سلفا
و تحياتى يا حبيبتى
و انتى مقولتليش ظ
إنتى منتظرة مين ؟؟؟

أهو ده عيبه
كل اللى عايزاه منى يا بيبو هيحصل
و ان شاء الله موش هخذلك
تحياتى يا حبيبتى

bobo
و الله أنا كمان بقول كدا برضو فى سرى ..
يا رب بلاش دعايا أنا يمكن انا مستحقش تسمعنى
طب امى و أهلى و اصدقائى و معارفى
طب كل الناس الحلوة قةوى قوى دى اللى بتدعيلى من غير مصلحة و لا سابق معرفة غير التعاطف و القلب الطيب ..
كل الدعاوات دى يا رب
أكتب ليوسف فيها نصيب
و ربنا كريم يا بوبو
تحياتى ليكى و لراعى الملك

سيد المكسرات
متقولش حاجة يا سيد
أنا حاسة كل اللى عاوز تقولوه من غير ما تقول ...
دى اللى بيسموها التخمة العاطفية
انا فاهمة من غير ولا كلمة
سلامى لكراملة الجميلة

فراشة
بصى انتى شكلك انتى كمان خدتى هدر لغاية آخره زى حالاتى و ان كانت المدة مختلفة بس أكيد الخساير كانت مدمرة و كفيلة باقصائك عن العالم هذه المدة
أنا كمان لسه باخد على الدنيا من تانى و أحاول أعيشها بس صعبة عليا من غير يوسف ما يبقى معايا ...
اتمنى أعمل زيك و أضحك تانى
متشكرة قوى قوى على مساندتك دى

خمسة فضفضة
يا أحلى صيدلانية فى المحروسة
يا ستى و عليكم السلام و رحمة الله و بركاته
و لا يهمك... مدام التأخير سببه الشغل يبقى مجراش حاجة ... على الأقل انتى بتضيعى الوقت فى محو الالام البشر ..
اللى واضح ان المرض زاد عليهم قوى الفترة الاخيرة و الأسباب معروفة
و شكرا يا ستى على الدعا اللى طالع من القلب

آبى
إيه يا بيبى زعلانة ليه بس
و بتعيطى ليه يا كتكوتة ...
الواد سكر مزعلك ...
خلاص حقك عليا
امشى يا سكر إمشى دلوقتى متزعلشى آبى الجميلة هوه عندنا بركة الأ هيا ...
أوعى تبقى زلعانة منى دددا نا مقدرشى على زلعنك خاااالص
بوسة يا حبيبتى على خدك الحلو
و معلش يا سكر اختك و نحيالها إنت الكبير برضو

همس الأحباب
يا خالد
أنا يشرفنى طبعا انك تعتبرنى أختك دا يبقى من حسن حظى و انا حظى كان منيل قوى لحد وقت قريب لكن ربنا عمال بيكرمنى و يعوضنى خير بيكو أهو ...
و معلش إن الموضوع كبير و طويل و يوجع القلب
لكن موش عاوزاك تضايق نفسك قصتى دى بتحصل كتير قوى الأيام دى و موش عارفة ليه كدا ؟؟؟
يعنى اللى بيبهدل بنات الناس دا مبيخافش ربنا
و الأسوأ انو بيبهدل أم أبنه و أبنه
و لا يفكر انه فى يوم هيقف قدام ربنا و يسأله عمل إيه فى أهل بيته ؟؟
كل دا عشان الفلوس و العند و الأنتقام ؟؟؟
ربنا كريم و فى يوم قادر ينسينى المرارة و الخسارة و البهدلة اللى عشتها أنا و اهلى و يوسف ...
بس اللى مقدرش أنساه هوه بعد إبنى عنى
دا هوه اللى طلعت بيه يا خالد من كل اللى فات ...
ربنا كريم
و هيرجع
و أفرحكو معايا زى ما دمعت عينكو
و فرجه قريب

nonoymm
أولا أهلا بيكى و منورة لأول مرة
و يا ريت تيجى كتير و تشرفى
و أشكرك جدا على تعاطفك معايا و دعواتك الطيبة
و ربنا يخليلك يوسفك الجميل
تحياتى الخالصة

كلامك وجعنى قوى قوى قوى يا فاتيما
ادعوا الله ان يقرب بينك وبين يوسف
واحنا عمرنا ما هنزهق منكى
انتى اختنا

monaliza
يا مونا متحرمشى منك أبداً
و خلاص يا ستى هنكتب و موش هنبطل كتابة لحد ما رجع الغالى
تحياتى يا عزيزتى

بطوط يا حبوب
معلشى أنا عارفة الإحساس ده
بس أنا برضو بخمن إنت كتبت تعليق شكله إيه
و بشكرك عليه من غير ما أقراه
و قلبك فيه الخير يا بطوط

أبو خالد
يا راجل يا طيب
يووووه
هوه لو كان عندهم حد كبير و له كلمة تتسمع كان دا بقى حالى ؟؟
للأسف هوه كبير عيلته و محدش يقدر عليه و اخواته من نفس نوعيته كدا ...
و لو كان التفاوض بيجيب نتيجة صدقنى كان نفع
و حتى القضايا منفعتش
و سوقنا عليهم كل الناس و اللى بيروح بيرجع يقول الله يكون فى عونكم ...
مبقاش باقى غير أنى أفوض أمرى الى الله و أنتظر الحل الالهى ...يمكن ربنا يهديهمو يرجعوه لوحدهم
يمكن ربنا يوقعهم فى شر اعمالهم و ميبقوش فاضيينله و يرجعوه لوحدهم
يمكن أبوه يتجوز و مراته تقول موش عاوزه إبن موش إبنها فيرجعوه لوحدهم
أى حل بس يعملوه من نفسهم عشان أنا موش عايزة أستفزهم بأى تصرف لحسن نبتدى المشاكل من اول جديد تانى
و متقلقش عليا يا راجل يا طيب
أبقى بس أدعيلى و ربنا هيسمع منك اكيد ...
تحياتى ليك و للمحظوظين بيك

عبده الرايق
يا خبررررر
وزير المالية سخصيا عندنا....
يا أهلا و سهلا يا فندم
منور والله
و يا سيدى يشرفنى انكم تعتبرونى اختكم
و كتر الف خيرك على المساندة و الدعوة الحلوة
و ربنا يسمع منك
تحياتى يا فندم
مساعد اول وزير المالية
و مفيش مكافأة ترقية كدا على الماشى

يا حبابيبى
و أصدقائى
و كل من ينور المطرح و يدخل يطل عليا
أختكو مسافرة كدا كام يوم ...
موش عاوزة حد يقلق عليا و يقول فاتيما اتخطفت و لا عزلت و لا جرالها حاجة ....
و الله هتوحشونى من دلوقتى و انا لسه بكتب التعليق أهو ....
خالكو بالكوا من نفسكوا لحد ما أرجع
و بوس بقى بالهبل على خدود كل البنات القمرات بتوع المدونات
و ورد كتيييير بيتوزع بقى على كل الرجالة بتوع المدونات اللى زى الورد
سلامو عليكم وباى باى و العواف

طمطم الحلوه
البوست شديد ..عليه وعليكى وعلى كل اللى حيقراه..كلنا بنحبك وبنموت فى يوسف روح قلب ماماوان شاء الله لما يوصللك بالسلامه حعملك حفله كبيره نعزم فيها كل اللى يعرفوكى ويعرفوه مش حنقولك بطلى زهقنا المدونه بتاعتك ومن حقك تفضفضى اى وقت اللى يزهق يتفضل يفارقنا من حقك تعيشى حياتك لابنك اديله منك على اد ما تقدرىكلامك عنه حجه قويه تخليه يعرف قيمته عندك
اذا قابلك اللى تحبيه ويستاهل انك تحبيه متمنعيش نفسك..انا لو مكان يوسف مش حقدر اصادر او احجر على مشاعرك..مش من حق تيته تملى عليكى مشاعر عشان هى تطمن..الدنيا مش كده
الدنيا ليست "مش"وعارفه ان انتى ويوسف حتتقابلوا قريب زى نصين حبه المشمشالدنيا لسه فيها الحلا تمسكى واصبرى
ان الله مع الصابرين

doddaنسيت امضيلك على الكومنتانا الغير معرفاللى فات ده

وانا مش هقولك اى حاجه من اللى انتى مش عايزه تسمعيها
انا هقولك وحشتينى

كان الله فى عونك
مش عارف اكتب اى حاجه مع انى احيانا بتكلم كتير
ان شاء الله كل شىء هيكون تمام

ياااه

متعرفيش ردك دا اسعدني اد ايه وانك اعتبرتيني زي ماجد اخوكي ..

بصي الحياة كلها عمرها ما هتفضل طالعه بس ولا عمرها هتفضل نازلة بس .. كل حاجة بتاخد وقتها وبعدين ترجع لأصلها ..دي حكمة ربنا اللي وضعها في حياتنا ..

واتعلمت اني اصبر مهما حصل هيجي يوم والوضع يتغير ولو حد مكنش فاهم هيفهم ولو حق راح هيتعرف ولو حد ظلم حد ظلمه هيتقلب عليه ..

ممكن كنت بتعب كتير بس كنت ببقي عارف ان بكرة لما يجي هيكون الوضع مختلف ..

وان شاء الله بكرة بتاعك هيجي قريب :)

يااااه انا اسفة للتأخير .. اصلي كنت مشغولة ببلوج جديد لي ..
حبيبية قلبي .. كل اللي اقدر اقوله لك هو هوني على نفسك ولما يوسف يرجع بالف سلامة ولو حتى اتغير شوية هتتكيفوا تاني وهترجعوا تاني لكل الاماكن الجميلة والعادات المشتركة
البوست اللي فات تحفة وروعة انت عندك حس فكاهي بشكل مش ممكن .. ضحكتيني والله ضحك كله حنان ليكي وعليكي..
بوسات للصبح
زيانور

حرام عليكى يا فاتيما
حرام عليكى بجد
هونى على نفسك شوية
هايرجعلك يا حبيبتى قريب ان شاء اللهع
هيرجعلك قبل رمضان وترصوا الفوانيس سوا
هبرجعلك قبل ما تخسى وتقصى شعرك
هيرجعلك وهتقوليله تصبح على خير ليه هو مش للارنوب
هيرجعلك وتشتريله لبس جديد
هيرجعلك وهتحضنيه ويحضنك
يا فاتيما مش كدة
هونى على نفسك شوية وارمى حمولك على ربنا وخلى عشمك فى ربنا كبير

ترجعى بالسلامة يا فاتيما

هتوحشينا يا ام يوسف

متتاخريش كتير

وزى ما عملتى عنندى

كل يوم هدخل عندك

اكنك موجوده

احمد

يا بخت يوسف أن ماما تكن له كل هذه المشاعر الجميله
بالنسبه لمعني إسمي فهو إسم ملاك يدعي ميخائيل و مايكل هو ترجمته الانجليزيهخ و الفرنسيه هي ميشيل و العبري ميخا علي ما أظن و الالماني ميشائيل
:)
أي خدمه
:)
تحياتي لكي و ليوسف

حبيبتى بجد وجعتى قلبى جداااااااااااااااا على بعد ابنك عنك
انا مش عارفة اقولك ايه
كل اللى اقدر عليه انى ادعيلك ربنا يهدى باباه و يرجعهولك فى أقرب وقت وتقرى عينك به وتملى الدنيا فرحة
بس انتى قربى أوى لربنا وادعي ليل نهار انه يجمعك به قريب جدااااااااا
واكيد انتى بتعملى كده

وان شاء الله
ان شاء الله هنسمع منك اخبار حلوة قريب ونفرح معاكى برجوع روح قلبك يوسف

هتوحشينا يا فاتيما
متتاخريش علينا
وطمنينا عليكى دايما

ترجعى بالسلامة يا حبيبتى
أختك سالى

لا انتى فهمتى غلط الموضوع مش كده خالص بس هيه كانت مشاكل عائلية عندى حاجات متلخبطه كده واوضاع غلط في غلط خلتنى احس انى لازم اختفي جوه اوضتى وده لحاسيتى الشديده صحيح اتصدمت في ناس كتير ويمكن كمان اقرب الناس بس ادينى هنا بهرج معاكوا وان شاء الله تسمعوا اخبار حلوة عنى قريب وتفرحوا معايا بس ادعيلي انتى بس

عمرك ما حتزهقينا
انا بقيت أول حاجة أهملها لما أقعد ع النت آجي عندك و أشوف ايه أخبار يوسف معاكي و شوقك موديكي فين

وكل يوم بتمنى معاكي غن ربنا يرجعهولك و يفرحك و يفرحني عاكي

بقيت بحس انها فرحتي أنا كمان هي يوم رجوعه و متاقة للبوست اللي حاتنزليه اليوم ده و مشتاقة أقرى كل اتعليقات اللي حاتتساب يوممها


يارب قريب

من زمان عندي ايمان بحاااجة غريبة جدا بس لقيتها صح

إن لو الدنيا بعدتني عن حد غالي قوي
ولو فضلت شايلاه فقلبي و فضل عايش في أيامي و ألاقيه مصاحب كل كلمة كلمة بقولها و مصاحب كل صورة بتقع عليها عيني و كل غمضة عين بغمضها

ساعتها أكيييييد حايكونلي نصيب في أيامه و خياله و ذاكرته

أمال بقى لو الحد دده إبني
و إن العلاقة اللي بيني وبينه ربنا هوو اللي راعيها عشان هو اللي عظمها و أكيد هو اللي حايحميها

صدقيني عمر ما يوسف ما هاتلهيه عنك أي حاجة ولا هاتنسيه أي حاجة

أنا عاوزة أحكيلك عن حد إسمه حسن بس ما تتعبيش من طول التعليق
وده بوست فيه صورته لو حبيتي تشوفيه

http://hannoda.blogspot.com/2008/02/blog-post.html

حسن ده من وهو عنده شهور أمه الامريكية سابته هو وباباه و رجعت بلدها

يعني ما يعرفش عنها غير الصور و حكايات باباه اللي مليانا غضب و اشمئزاز و كام مكالمة أيام ما كان لسة بيبتدي يتكلم

وبعدين قرر إنه مش حايكلمممها تاني ابدا.. مش عاوزها تتصل
وكلنا دبحنا قراره.. أول قرار ياخده في حياته هو مقاطعة أمه

بس عمره ما نسيها رغم إنه بيصر بكل جهده إن ماحدش يشوف لمحة شوق في عنيه

بس رغم كل شيء هو طفل.. ووشه و شروده و بريق في عينه بيفضحه كل ما جه ذكر أمريكا قدامه لأي سبب

هي جواه.. طول الوقت بتشده رغم إن عمره ما شافها ولا عمره ما أخد منها حضن ولا عمره ماراح معاها ماكدونال ولا المتحف المصري و مسرح العرايس

ماشافش منها حنية ولا إهتمام

بس لحد إنهارده.. عندده 10 سنين و عمره ما نسيها و بنقدر نشوف ده في عنيه كل مابيحاول حد يجيب سيرتها

حرام عليكي نفسك لو فكرتي لحظة إنه ممكن تلهيه حاجة عنك يا فاتيما

ووعمري ما حبطل دعاء ليكي و ليوسف

مش عاوزة أفضل اكتب بوستات عنك لغاية ما حد يقوللى كفاية بقى زهقتينا
------
قطع لسان اللي يقول كده
ده مافيش اطهر ولا انقى ولا اعظم من حب الام لابنها او بنتها

ربنا يرجعلك يوسف بالف خير ويجمع شملكم قريب يارب


سلامي لماما




سلامووووووووووووووز

سلام عليكم
فتيما ان شاء الله هيرجع ويفطر معاكى فى رمضان وتخديه فى حضنك كمان بس مش نملك فى حياتنا غير اننا نصبر هو ده مفتاح النجاه من كل همومنا والامنا
ربنا يسعدك ويرد الغايب ويجعلك من الصابرين ويعوضك خير وانا واحده من ضمن الناس بنتظر بوستاتك يا طمطم لانها بجد بتكون صادقه وخارجه من القلب وسامحينى لو غبت فى التعليق بس والله متابعه بوستاتك
خالص تحياتى

يعني كل اللي مش عاوزاه بتعمليه تقريبا كل يوم
تفتكري بعد كل دا ممكن يوسف يبقي قاسي عليكي
مش مش مش مش مش مش مش مش مش ممكن ابدا

يا جماعة حصل مشكلة في مدونتي القديمة
و لا استطيع إضافة المشاركات بها
لو كنتم مهتمين بزيارتي رجاء تفضلوا بزيارتي من الان فصاعدا على رابط مدونتي الجديدة
http://fatmaistheword2.blogspot.com/
سأنتظركم

انا نفسى بقى يبقى يوسف وفاطمة الصغيرة

أولا تروحي وتيجي بالسلامة

ثانيا .. تصدقي بجد إننا فعلا حاسيين إن يوسف إبننا إحنا كمان؟ خليتينا كأننا عايشين معاكي .. أو بمعنى أدق .. عاشيين الإحساس اللي جواكي كأنه إحساسنا إحنا

مساء الخير
ياطمطم يا غاليه

بتأخر شوية كتيير انا
معلش حكم السن اصلى باجى من بعيد
وبصراحة باجى ماشى
:)

وتروحى وترجعى بالسلامة

مش هقولك انك وجعتى قلبى بجد لأنى عارف ان الكلام بيخرج اللى جواكى ويريحك شوية زى مانتى قلتى وكمتن بيطمنا عليكى

وعمر كلامك اللى كلة حب دة ما يزهق بالعكس وزى ما قالولك انا كمان باجى علشان اطمن عليكى واعرف اخبارك واخبار يوسف

بس هقولك حاجة .
إذا سمحتيلى طبعا

تفتكرى فية ابن فى الدنيا بينسى امه
مهما طال الوقت ومر الزمن
إلا الأم يا أم يوسف الأم هى الوطن والبيت والحضن والأمان مهما الأبن أتغرب عنها بتفضل جواه وبيعرفها ويحس بيها حتى لو ما شفهاش خالص قبل كده

وده مش بإرادته على فكره دى حاجة كدة من ربنا مالناش يد فيها

وأذا كنا أحنا حبيناه من كلامك وحبك وإرتياطك بيه بالشكل ده
تفتكرى لو قلبك دق وحبيتى وارتبطى بإنسان ما شافش يوسف هيكون أقل مننا فى حبه ليوسف ؟أكيد لأ
أما عن ست الحبايب اللى هيا تيتة مامة مامة يوسف فهتفضل شايله همك على طول زى مانتى شايله هم يوسف
ايييييوة علشان الأمهات كدة ، وعلشان الاولاد غاليييييين كدة
دة طبيعى

قولى كل اللى عاوزة تقوليه
هنا زاوية البوح
دون قيود

لكن كمان
عيشى....
مش عاوز عمرك يمر فى الأنتظار

سافرى ، وروحى وتعالى ، وأخرجى ، وحبى وأتجوزى !!!!.
كل دة مش هيغير حاجة فى حبك ليوسف ولا هينسيكى ، زى ما مافيش حاجة هتنسية
لأنه من بديهيات الحياه
علاقة الام بالأبن

طولت عليكى مش كدة
حلوة المزيكا اللى مع البوست
:)
يارب رجع يوسف لأمة طمطم

تحياتى وتمنياتى بالسعادة
(F)

ولا رخامة ولا حاجه


المهم

البوست الجي يكون ..عاوزة بدل .. مش عاوزه

ربنا يخليكم لبعض دايما ويرزقك بالذرية الصالحة كمان وكمان


سلامي ليوسف بك

فاتيما
انتى تثيرى
شجونى ودموعى
قدرة غير عادية
بصدق ادعوا لك
لا اعلم اين يوسف
وما اسبابغيابه
ولكنمااعلمه
انها حكمة من الله
لكى يعلمك رسالة لتدركيها
فاسال الله ان ينير عيناكى لتلك الرسالة
ربما يريدالله انيعلمك خلقا
او يعدك لشىء كبير

وتذكرى

لا يكلف الله نفسا الا وسعها

فايقنىانك بوسعك تحمل فراق يوسف حاليا
لانه الله اعلم بنفسك اكثرمنك

يا من تسكنين الروح
بغير استئذان
حقا انى لاحبك فى الله

اية يابنتى شغل العيال دة انتى مش وعدتينى تيجى عندى وتزورينى وبعدين انا شفتك وشفتينى يعنى حجتك خلاص راحت ياقمر مش محتاجة زواق ولا تجهيز انا مش كونداليزا رايس ولا حاجة ههههه بس انا احلى صح
حبيبتى انا مستنياكى تفضى وتقررى تيجى انا لوحدى فشم النسيم العيال الغجر رايحين لابوهم وانا لوحدى والنبى فكرى وتعالى غيرى جو ولا اجى اخدك عندنا فسيخ يجنن وعندنا تلفونات و5 موبيلات واتنين كمبيوتر و4 تافزيون هههههههه واللى بيدخل عندنا مبيخرجش هههههههههه
ياريت تفكرى انتى محتاجة تغيير جو
تحياتى

اهئ اهئ اهئ اهئ اهئ اهئ اهئ اهئ
فتيما قوليلى يوسف فين و انا اروح اجيبه...قطعتى قلبى يابنتى...

والله لو يعرف يوسف أن فيه قلب بيفكر فيه كده، عمره ما هيسيبوه..

هيرجع، أكيد هيرجع

ممكن تقبلى دعوتى وتقبلى منى التاج؟

انا باجي على طول لكن مكتبتش حاجة عندك قبل كده .. كان بيعجبني الكلام واغادر بسلام..

بس المرادي قلبي وجعني ..
ربنا معاكي على طول متقلقيش ..

لا يافطومة ماحدش هايقولك زهقتينا
انت تكتبي وتكتبي وتكتبي
وهيه دي الحاجة اللي هاتفضل دليل أبدي على كل حتة مشاعر حسيتي بيها
واحنا بنحبك وعايزين نفضل نشاركك رضيتي أو أبيتي ...وهوه ده النظام ماشي

ماتغيبيش بأه
:)

فطومة
في تاج تم تمريره إليكي
ياريت تدخلي عندي عشان تستلمي ورقة الأسئلة
تحياتي يا قمر
:)

هو ينفع كدة
يعني آجي لطماطم اللي بتيجي عندي تضحكني الاقيها بتعيطني في بيتها
ربنا يقوي قلبك ويصبرك يارب
انتي لما بتختفي كدة قلبي بياكلني عليكي
بتوحشيني يابطوط

ان شاء الله هيرجع لك بالف سلامه
ربنا يحرصه ويحميهولك يارب

ازيك يا فاتيما
انتِ لسه مرجعتيش ؟

طمنينا عليكى يا جميلة فى اقرب فرصة

دمتى بكل خير
سالى

سلام عليكم
طمطم انتى فين طمنينا عليكى اللهى يكرمك ومش تتاخرى علينا كده
وحشتينى موووووووووووت يا طمطم بجد
خالص تحياتى

وحشتيني ...!!
موش هتطلي علينا بقى ..؟؟

طال غيابك أيتها الأم الحنون
نفتقدك..
أبو خالد

ممكن الهانم ترجع بقى؟؟؟
انا معنديش بنات تبات بره
انا عاوزاكى بقى عندك مفاجأاااات وحاجات حلوه كتيير وهيصه وزمبليطه فى الصالون......
فاتيماااااااااااا
عودىىىىى

فاتيما انتى فين وحشتينى خاللللللللللللللصصصصصصصصصصصصص

ام يوسف الغالية
طبعا وحشتينا قوى وغيابك طال علينا
تيجى بالسلامة وتنورينا باذن الله
ولا من لقى احبابه نسى اصحابه
تحياتى ليكى

ياااه إنت لسة مارجعتيش؟؟؟

يارب تكوني مبسوطة و بخير

وحشتيني يا فاتيما

كثيرا ما يدفعنا كبر الوجع
على الخجل من المواساه
مش عارفه اقول ايه
بس اكيد اكيد بكرة اجمل قولي يا رب وشوفي هوه هيعمل دي ده وعد وبشاره

يا جماعة موش عارفة أقول إيه؟؟
أنا دبت خجلا من شدة الحب
أرجو إنى اكون استاهله بس
ياdodda
مبروك مدونتك و بشكرك من قلبى
يا قطتى الحلوة
أنتى كمان وحشانى من قبل ما أشوفك
يا سنوهى
أشكرك و قبلت التاج و يشرفنى
يا محمد يا موش جست هيومن لا أكتر
انا اللى سعيدة بيك لأنك شخص مميز و بعتبرك اخويا الصغير فعلا بجد
يا مامت زياد و نور
يا حبيبتى متحرمشى منك أبداً و مبروك المطرح الجديد هيكون دخوله أسهل على الكل
بت يا خيخة
انا كويسة و الله موش عارفة ليه بتقلب معايا نكد بس أنا مهوناها متقلقيش
يا سكر
يا فندم المدونة بتاعتك و تنور فى أى وقت
يا مايكل
أنا مبسوطة قوى بمعرفتى لمعنى أسمك ..أنا هندهك بعد كدا بمايكل ملاك مايكيليتو
يا sally
انتى منورة المكان و سعيدة بيكى قوى
و أرجو أن نتواصل دائما
فراشة
معلشى فهمت غلط بس الغلط مردود المهم كل حاجة خلصت على خير و تحياتى دوما لكى

هنودة يا قمراية
هقرى البوست طبعا و ربنا يخليكى ليا يا رب ...أنا كمان مستنية البوست اللى فى بالك و بتمنى أنزله قريب
soooo
يا واد ميحرمنيش منك يا رب ...
onlyspot
يا مشمشة متشكرة جدا على ذوقك و أنا أهو تمام و كويسة متقلقيش يا عيال دا نا كنت مسافرة عادى مفيش حاجة
سنووايت
و انا موش موش موش هعمل حاجة غير كدا يا أميرة
رجل المطر
ماشى يا سيدى علم و سينفذ ...
بس أنا حاسة انك متغير شوية
لعلها خير
قصدك إيه ؟ أخاويه ؟طب موش لما نلاقى اللى أمه داعية عليه و هيتجوزنى الأول ؟
يا مراكبى
يا نبع الحكمة بتاعى
صحيح اللى بتقوله دا ؟؟؟
انا سعيدة جدا بكلامك دا
و جاوب يا باشمهندس بقى و سمعنا الحكم

يا عمو
انت منور خالص بس جايلى فى الزنقة كدا معلش بقى و المزيكا دى بتاعة خالد حماد و كانت لمسلسل أوان الورد
shimaa samir
أنا سعيدة بوجودك هنا و اتمنى الا تنقطع الزيارات و سامحينى على تقصيرى معاكى
كلاكيت تاننى و تانى
يا فندم متشكرين على الدعوة الكريمة دى أنتى قدها و قدود ...بس اختك خدت على الإختفاء و لسه فاضل كتير على ما أغير العادة دى بس أشكرك جدا
واحدة مفروسة
اشكرك جدا يا غادة على مساندتك دى و شكرا على الأيميل الجميل بس أنا مليش فى الماسنجر و الحاجات دى فمعلشى بقى دقة قديمة بس أشكرك جدا
محلقة بلا أجنحة
أنا ممتنة جدا لمشاعرك الجميلة و تحياتى للأمارات الجميلة و للعاملين فى مجلة ماجد فكرتينى بالذى مضى

ahmed mubark
أنا سعيدة جدا بكلامك دا و أرجو انك تكتب بعد كدا اللى حاسه لأنك هتسعدنى بيه و تشرفنى اكتر
صاحب المضيفة
المطرح منور والله و حاضر هعمل بوست بالفكرة دى
ميومة البهية
أنا رديت اهو و بشكرك بشدة و عنف على تحقيق الامنية دى و منتحرمشى من السؤال
مفقوعة مرارتها
شفتى بقى التناقضات الفظيعة المريعة
بس دا حبة نكد و بيعدوا يا سحورة
mady
إنت منور خالص و كفاية غن أسمك ماجد على أسم أخويا الصغير عشان أعز كدا من غير حاجة و تحياتى ليك

أبو خالد
يا راجل يا طيب ... أنا كمان أفتقدكم قوى قوى الكام يوم دول
تحياتى ليك و للمحظوظين بيك
dodda
خلاص يا فندم رجعنا نبات جوه أهو
انتى لطيفة قوى يا رضوى
أبى يا جميلة
أنا اهو و انتى كمان وحشتينى خااااالص
مالص و كمان بالص
همس الأحباب
يا خالد هما فين الاحباب دول ..ماهو أنتم الأصحاب و الاحباب .أشكرك جدا على سؤالك عليا
نهى محمود
ياااااااااااه يا نهى
داانا قلت لا يمكن دا هيحصل و تزورينى هنا ...انتى نورتى قوى و موش عارفة اقولك إيه بس يا ريت تيجى تانى

زيانور
هنودة
onlyspot
sally
يا حبايبى متحرمشى من السؤال و الطلة
و يا عيال دا نا كنت مسافرة كام يوم كدا لحقت اوحشكو جامد كدا ؟؟!
دانا حد مهم بقى و انا موش واخدة بالى
أومال لو مكنتش قايلة كنتوا هتعملوا إيه ؟؟
متقلقوش يا كتاكيت أنا ميبعدنيش عكنوا الا الشديد القوى و الحمدلله محصلشى لحد دلوقتى
و انتو كمان وحشتونى قوى قوى قوى
حتى ماما لاحظت و قاللتلى النت و اللى فيه وحشك أصلى كل يوم أقولها هنرجع امتى هنرجع امتى ؟؟
و الست بالخبرة فقستنى علطول ...
وحشتونى و عاوزة يومين أقرى فى البوستات الجديدة بتاعتكو
و كل سنة و انتو طيبين
يا ولاد و يا بنات
مسلمين و مسيحين
عمال و لا لسه لم تعملوا
وحشتووووووووونى

إرسال تعليق