.

.

بـص ... شـفـت العصفورة !!  

Posted by: فاتيما in



- قطة و عصافير
- يا قطة يا عصافير
- قطة و معاها عصافير يا ماما
- مينفعش يا بابا نجيب الأتنين سوا... إنت موش بتشوف تويتى و سلفستر بيعملوا إيه فى الكارتون ؟؟!
- أيوه بس أنا هخلى بالى من العصفورة و موش هخلى القطة تيجى جنبها خالص
- طب بليل و إحنا نايمين هتعمل إيه ؟؟
منقدرش نمنع القطة من غريزتها أول ما تشم ريحة العصافير موش هتسكت إلا لما تاكلهم
بص أختار حاجة فيهم يا قطة يا عصافير
- خلاص عصافير
- ماشى آخر كلام ؟؟
- أيوه نجيب عصافير
- طيب
- و بعدها بشوية هنجيب قطة
- برضو!!!
تانى يوم كنا فى محل الحيوانات
البنت اللى بتبيع محتاسة فى سعر القفص و الحاجات
لأن مامتها راحت مشوار و موقفها مكانها لغاية ما ترجع
وقفنا انا و يوسف ننقى ألوان العصفورتين
و كل ما ننقى عصفورة البنت تقول ... لأ دا ولد ...
ننقى عصفور تقولنا .... لأ دى بنت
لحد ما فى الآخر أستقرينا على ولد أخضر رفيع و سفيف كدا
و بنت زرقا مكلبظة خالص و شكلها كدا شقية
و جبنا القفص بمشتملاته اللى هيا المسقى و حوض الاكل و المرجيحة
و بتاعة الكالسيوم دى موش فاكره اسمها كان إيه
المهم دفعنا و خدنا العصافير على البيت
و دقينا مسمار فى الحيطة و علقنا القفص
و إبتدت الطقوس التقليدية
- ماما إحنا هنسمى العصفورتين دول إيه ؟؟!
- و الله يا يوسف موش عارفة إنت إيه رأيك ؟؟
- سمى البنت و انا هسمى الولد
- طيب .... ممممم .... هسميها سوسو شكلها سوسو خالص
- ههههه و أنا هسمي الولد فوفو .... حلو؟؟
- يجنن طبعا .... فوفو و سوسو ... يا حلولى
- لو سمحت متتريأيش على أصدقائى و تجرحى مشاعرهم
- متراجعة ... خلاص خلاص انا أسفة يا فوفو بيه و يا سوسو هانم يللا بقى نحطلهم اكل
فى البداية كنت واخدة قرار إن رعايتهم هتكون مهمتى لوحدى
عشان منقارهم صعب قوىو لو عوروا الولد مرة هيكرهم و يتعقد منهم
أصلاً اول مرة أنا شخصياً أربى عصافير و معلوماتى عنها طشاش ...
بس اللى حصل بعد كدا خلانى أقول
جااااى
آجى يا مؤمنين أدخل إيدى جوا القفص أحطلهم اكل و لا حتة خيارة
يروحوا ناقرينى ولا أجدع شنيور
و لما آجى انضف مكانهم برضو إيدى متسلمش منهم
عارفين نقار الخشب بتاع الكارتون بتاع زمان دا
أهو العصفورتين كانو نقار الخشب و إيدى هيا الشجرة
أى أى .... يا ولا د اللذينا !!
إيه اللى أنا عملته فى نفسى دا يا ربى ؟؟
مانا طول عمرى بربى فى قطط وآخر إحترام
إيه بس اللى خبطنى فى دماغى و خلانى أسمع كلام يوسف ؟؟!
بقيت ألف إيدى بقماشة و ادخلها براحة كدا و هما برضو آخر شقاوة
و طول الوقت يصوصوا و يعملوا دوشة كبيرة بشكل مزعج خصوصا لما اقرب ناحية القفص
أقول دول خايفين منى و لا حاجة
و بكرة يتعودوا
- يوسف تعالى كدا جنب القفص ثانية واحدة
- ليه ؟؟
- معلشى بس تعالى فيمتو ثانية كدا عشان خاطر ماما
يوسف ينفذ كلامى
أبص الأقى العصافير سكتت خالص و أتكتمت
- طب إبعد كدا و تعال جنبى
الواد يبعد
الأقى العصافير عاملة دوشة و نازلة صوصوة
الله دول بيخافوا منه و لا إيه دول ؟؟!!
غريبة قوى الحكاية دى
لأ خدوا اللى أغرب بقى
فى يوم من ذات الأيام لقيت يوسف بيدخل إيده فى القفص
يحطلهم أكل و لعب من بتاعته
و أنا بكل فزع بصرخ فيه
- طلع إيدك يا يوسف لحسن تتعور
بكل هدوء
- متخافيش يا ماما دول طيبين خالص حتى شوفى كدا
و أشوف كدا دى الأقيلكم
سى يوسف ماسك العصفورتين كل واحدة فى إيد و بيخرجهم برا القفص !!!
و موش بس كدا
لااااااا
دا كمان بيحطهم فى جيب الشورت بتاعه و هما قاعدين جوه ساكتين و لا يفكروا إنهم يطيروا حتى
- يا خرابى يا يوسف .... عملت كدا إزاى يا واد ؟؟!!
- عادى خالص هما أصحابى و بنلعب
سبحان الله
طول الوقت كنت أقوله إن الحيوانات بتحب الاطفال قوى
مكنتش متصورة إن كلامى
هيتجسد بالفعل لحم و دم و ريش و صوصوة
طبعا بعد الواقعة دى
بقيت أتفرج على يوسف و العصفورتين كل يوم
و هما واقفين على كتافه شوية
و قاعدين فى جيبة شوية
و را كنين على حرف صندوق اللعب شوية
و بقى هوه المسئول الاول عنهم و مسئوليتى إقتصرت على التنضيف وراهم بس
هو أنا أصلاً أستجرى اهوب أيدى ناحيتهم ؟؟؟!!
و طبعا إلاهتمام إبتدى ياخد شكل تانى
- ماما
- نعم
- هوه سوسو موش بتخلف عيال ليه
- عشان العصافير مبتخلفش يا حبيبى العصافير بتبيض ...
- أيوه أيوه بشوفهم فى التلفزيون بيطلعوا من البيضة بس هيا بتجيب البيض إزاى ؟؟
- و الله يا يوسف موش عارفة هما ليهم موسم و طريقة معينة
بس أنا خبرتى قليلة فى العصافير نبقى نروح المحل و نسأل البنت هيا هتعرف أكتر مننا
بعد يومين كنا فى المحل و قابلتنا الست الكبيرة صاحبة المحل
(مامت البنت اللى باعتلنا سوسو و فوفو)
و قعدت تدينى فى فيتامينات و مقويات و حاجات للخصوبة
و بيت خشب صغنن كدا يتشبك فى القفص عشان العصفورة سوسو تبيض فيه
و قعدت تقولى على حبة تعليمات خلتنى احس إنها شوية كدا
و هتنصحنى نعملهم تلقيح صناعى
المهم خدت الحاجات كلها و حطيتها فى المية و شربوها و جه معاد التزواج
و الأتنين موش طايقين بعض و لا بيدخلو البيت الخشب و لا بيضة واحدة تلوح فى الأفق
فى الآخر إضطريت أقنع يوسف إنهم ممكن يكونوا لسه صغيرين على الخلفة
و إنتهزتها فرصة عشان أفهمه إن ساعات ربنا بيحرم عباده من الأطفال
لأسباب ما
و لازم المخلوق دا يقبلها عشان ربنا مبيعملش حاجة وحشة لحد
و الولد الحمدلله أقتنع
و مر الوقت و الصداقة تتوطد بين الاصدقاء التلاتة
لكن ....
و آ ه من كلمة لكن
شهر العسل بين يوسف و العصافير لم يدم طويلا
و تحطمت السعادة و الهناء على صخرة الفيروسات
- يوسف تعالى إدينى حضونة
- ييجى فى حضنى و بحذر معهود فى المواقف دى ... فيه إيه مالك يا ماما ؟؟
- بص إحنا لازم نضطر آسفين نبيع سوسو و فوفو لمحل العصافير تانى
- بفزع .... لأ دول صحابى حرام عليكى لا يمكن أتخلى عنهم
- إستنى بس هقولك ... أصل فيه مرض خطير بييجى للطيور و العصافير إسمه إنفلونزا الطيور
- خلاص نديهم من المضاد الوحوى بتاعى ( يقصد المضاد الحيوى )
- يا حبيبى مينفعش أصل العيا بتاعهم دا ملوش علاج لحد دلوقتى و لو قعدوا هيموتوا مننا
و لو مرضهم إتنقل لينا إحنا كمان هنموت
- بدفاع متشبث ... بس العاشرة مساءاً بيقولوا مصر مفيهاش الإنفلونزا دى أنا سمعت المذيعة بتقول كدا
- أيوه يا حبيبى صح المذيعة قالت كدا بس المرض دا فى بلد جمبنا أسمها تركيا
يعنى بعد أسبوعين تلاتة هييجى عندنا
(و دا اللى حصل فعلا بعد شهر تقريبا من بيع العصفورتين أصل عادةً المسألة بتبقى مسألة وقت )
- طب يعنى ألعب معاهم تانى أزاى عيونه بترغرغ
بمحاولة سريعة لإحتواء الموقف بسرعة
- بص إيه رأيك ننفذ إتفاقنا القديم ؟؟
- بتاع إيه ؟
- نجيب قطة
و هوه بيمسح الدموع من عيونه
- طب بس بشرط نجيبه ولد !!!
بعدها بيوم روحنا نبيع العصافير تانى
لقيت المحل مقفول
روحنا المحل اللى جنبه ... ما هو موش معقول هرجع بيهم البيت تانى
دانا ما صدقت إن يوسف وافق بسلاسة
كان شاب صغير اللى واقف و اول ما دخلنا خطف القفص بالعصفورتين بسرعة و لهفة
و سألنى متوجساً بعد تفحص شامل
- حضرتك عاوزة فيهم كام ؟؟
- اللى تدفعه موش هدقق معاك و خد القفص و الاكل دا كمان كنت شاريه و مالوش لازمة دلوقت
بخبث بيسألنى
- إنتى عاوزة تبيعيهم ليه ؟؟
ببراءة تامة
- أصلنا مسافرين و محدش موجود ياخد باله منهم خالص
و لتدعيم الأسباب كملت
و بعدين كمان مبيخلفوش والولد كان عاوزهم يخلفولوه عصافير صغننة
الولد ينظر لى بإندهاش
- ماهو طبعا لازم مايخلفوش
- دانا حتى جبتلهم الفيتامينات و البيت الخشب و كل حاجة
بضحكة مشوبة بسخرية واضحة
- يا مدام واضح إنك لسه جديدة فى الحكاية و اللى أشتريتى منهم مبيفهموش حاجة خالص
و الجوز دا عمره مهيخلف أبداً أصلاً
- ليه ؟ دنا جايبهم من المحل اللى جنبك علطول و إيه السبب يعنى عشان ميخلفوش أبدا ً ؟؟؟!!
- عشان جوز العصافير دول دكورة !!!!
- نعمممممممممم
طبعا خدت فترة أستوعب الصدمة
بس اللى معرفتش أستوعبه هجاوب إزاى قدام البياع علىسؤال من البرىء الواقف جنبى
و عمال بيشد فى حرف البلوزة و بيقولى
- ماما ماما ... هوه يعنى إيه دكورة ؟؟!!!!


This entry was posted on الخميس, مايو 01, 2008 and is filed under . You can leave a response and follow any responses to this entry through the .

77 كــــلام بيطــبطـــب عـــلى قــــلبى و روحــــى

هييييه
الاول وغند مين فاتيما
تراتاتااااااااا

قلب فوفو و قلب سوسو و قلب يوسف بيحاوطهم
هو خلا في قلب بيته حصن لحياتهم و بيتهم
يوسف الأمور صغير بس فاهم كل حاجه
هو جارهم أو صاحبهم أو باباهم أو مامتهم
وعجبي
KING TOOOT

اكيد الناس خايفه من العصفورتين اللى واقفين..
انا رأيى لا قطه ولا عصافير
اللى نفسه يربى اى حاجه يربى بنى ادم
يكفل يتيم ويزوره كتير..انا كان عندى قطط وتكاليف اكلهم لحد دلوقتى حاسه انها ذنب فى رقبتى
البنى ادم اولى

السلام عليكم ورحمة الله وبركاته

هههههههه
بقي في الآخر يطلعوا الاتنين دكورا

كويس انك بعتيهم :-)

عاجبني اوي اسلوبك في التربيه والحوار مع يوسف وتعويده علي اخد رايه في كل حاجه من غير غصب ماشاء الله


ربنا يرجعهولك بالسلامه

ياه طبعا العصافير

انا مش عارف اعلق بجد الحنان والحب اللي في البوست بيطلوا من وسط الكلام يوجعوا القلب ويرجعوا تاني

وشكلي كده ادمنت الوجع ده

النهارده انا طلعت تعليمات لامن المعلومات في الشغل يقفلوا كل المواقع الشخصية
وطبعا انا اول واحد اتزنق ومقدرتش ادخل اي بلوج من الشغل
عشان كده بدخل من البيت

ودي مشكلة لان قوات الاحتلال في البيت مش بتديني فرصة خالص

طيب انا مش هشرح يعني اية .....
لان البلوج بيشرح يعني اية امومة وتربية

تحياتي

بالمناسبة سوسف مش هيهرب بس هيرجع وهينجح

وصدقيني لما هيكبر هيكون عنده تجربه انسانيه تخلية قوي جدا وانسان جدا

انا متاكد

العصافير طيور رقيقه بتحس بالحب والحنان

وطبعا مفيش ارق من قلب طفل صفير


ربنا يخلهولك ويرجعهولك بالسلامه

علشان يحس بكل الحب دة وهواكيد هيرجع

تحياتي اول مرةاعلق عندك بس متابعه

مواضيعك اللي دايما ناعمه وقويه

وكلها حنيه هههههه

ههههههههه والله موتينى من الضحك
فكرتينى بفيلم الحاسه السابعة لما قعد سنين مربى العصافير وفى الاخر طلعت دكورة

كان مالها القطط يعنى ، انا برضه كنت بربى عصافير ومكنوش بيبيضوا الظاهر كان بيضحك عليا

وفى الاخر بطلت الموضوع ده خالص لما انتهى نهاية ماساوية وعصفورة قتلت العصفور اللى معاها وبعدين اضربت عن الطعام حتى الموت

لكن سبحان الله انهم كانوا بيحبوه ومش بيخافوا منه ربنا يحبب فيه خلقه

السلام عليكم


وياترا جاوبتيه ولا سكتى...؟؟



زى العسل يوسف

وانتى ام جميله


جبيله حوض سمك اكيد حيفرح بيه



مدونتك جميله




اختك
sad

فاتيما الأم الحنون
تصورى أنا أعانى من هذة المشكلة
و لكن اللى بايع لى خبير ،و الا يمكن غشنى
الله أعلم ..و الله أنا نفسى يبيضوا
علشان مريم و أحمد احفادى

يا شماتت ابله ظاظا فيا

كنت واثق والله لما قولتي ان في موسم التزاوج مش طايقين بعض

اصل مستحيل دول حيوانات دول في موسمهم بيقرفونا احنا


ربنا يردلك يوسف يا رب ويقر عينك بيه

تحياتي

بطووووط .... عامل ايه واحشني

حكايتك مع يوسف

انا كمان نفسي اوي اجيب عصافير
وكل ما اقول لبابا نكون وقتها في الشتا يقوم يقولي لو جناهم دلوقتي هيموتوا
واستني الصيف اقوم انسي وعلي كدا لحد دلوقتي

سلاموووووووووز وبوسه جامده جدا جداً
وزة

ارجو المرور علي اخر موضوعاتي في مدونة الباحث عن الحقيقة يهمني رايك
تحياتي

ما شاء الله عاجبنى طريقتك فى التعامل مع يوسف

ربنا يحميه ويخليكوا لبعض

الاثنين دكره ولا حاجة عادجت مضمونة فى هذا الزمن

وأرى أن انفلونزا الطيور ليس لها علاقة بالعصافير والحمام والا كان العصافير على الشجر بهدلت الدنيا


كله يهون علشان خاطر يوسف

نقر العصافير وخربشة القطط

ربنا يبارك لك فيه

وويعوض عليكم بسوسو وفوفو جديد

يا سلام على الدماغ العالي!!! والله يا ميمي انا عندي فوبيا من اي حيوانات ومعرفش امسك كتكوت حتى بس بوست روعة واسلوبك روعة وعجبني قوي اداء يوسف مع العصافير اصل الاطفال احباب الله!!
انت ليه ما تجمعيش كل البوستات اللي كتبتيها واللي جاية ان شاء الله وتعمليهم كتاب مش عشان تعملي كتاب لكن عشان يوسف والله فكرة حاولي تنظمي المغامرات كده وتدوينيها ..وانا هاشتري الكتاب وعد والله !!!
بوسات كتيرة..
ودمتي لنا بطَلتك الجميلة
زيانور

أنا كنت داخلة عشان التاج بس لقيت بوستين بعديه..أمسك الخشب يعني مش قصدي حسد ولاحاجة
إجاباتك حلوة وتلقائية وعرفتني عليكي أكتر..ويارب أشوفك بجد انشاء الله
البوست ده جامد جدا وفيه كالعادة الحوارات اللي بحبها بينك وبين يوسف
وطريقتك اللي باتعلم منها بجد يا أم يوسف البهية
:)

هههههههههههههههه

حتة موقف بقى

جاااااااااااامد جدا


ربنا كون في عون يوسف وفي عونك قبله


تحياتي

أزال المؤلف هذا التعليق.

ههههههه... ده حته مقلب ...عجبتني
المضاد الوحوي ...
ربنا يخليهولك يارب ...وتشوفيه عريس

ام يوسف الغالية
اسمحيلى يا طمطم انا ملحقتش البوست اللى فات
بتاع الجواز وعاوز اعلق عليه هنا ممكن؟

من فضلك من فضلك فكرى فى الموضوع دة ،
او على الأقل خلى الباب مفتوح شوية
اليوم اللى بيمر مش بيرجع تانى
اكيد اكيد ما فيش مقارنة بين شخص محترم ترتبطى بية وبين حبك ليوسف ، دى حاجة ودى جاجة تانية.

الوحدة شئ مؤلم جدا لية تحكمى على نفسك بية ،
حد يشيل معاكى ،
أكيد فاهمة..

اما القطة واعصفورة دة فموضوع جامد بجد .
طبعا نهاية تفطس من الضحك ،
بس لا تمحى ما داخل الكلمات ، من معانى
جميلة ورموز واسلوب يحتذى بة فى التربية

فصغارنا ليسوا صغاراً
بل نحن من نراهم هكذا
ونكتشف هذا حين نتعامل معهم
ورغم اننا نكتشفهم
إلا اننا نأبى اندهاشهم وفضولهم الجميل
ونجبرهم على الإعتياد مثلنا
إلى ان يعتادوا ما نعتاد
فنقتل البرائة

ملحوظة
يوجد استدراك لدى أرجوا المتابعة

يا رب رجع يوسف لأمة

تحية وتقدير
وامنية بالسعادة

ههههههههههههههههههههه
والله العظيم قلبي كان حاسس
اصلها حصلت برضه مع بنات اخويا وجابو عصافير وبرضه طلعو دكوره
تقريبا اللي بيبيعو مش عارفين اي حاجه
اهو اي حاجه تفرح العيل وخلاص


بقالي كتير ماجتش
هلف لفه سريعه اشوف ايه الحياه



سلامي لوالدتك العزيزة




سلامووووووووووووز

عاوز احكيلك عن مادو وميرى
اللى خانقنى
وكنا فاكرينهم الاثنين نتى
ولا يوم ما مادو أثبت ذكورته
كان احتفال عالمى ف البيت
مادو جاب عيل
كانت البت ميرى مضبطاه تلطيش
أصله قله شويه
لما جاب العيل من هنا
لأ وايه خمسه ف بطن واحده
ومن غير خصوبه
بصينا لقيناه شم نفسه
وشنبو خط .. وبدا يهريها ضرب
كان الاول بيشحتف على بوسه
بس نقول ايه : أثبت برائته
وشم نفسو
بيصوصو علطوول علشان هوا عايزها تدخل القفص وهيا مغلسه
***
عارفه يا ماما فاتيما
ياللى على اسم تيته فاطمه
أحب المخلوقات لى بعد ماما
بجد بطلع الكلام بالعافيه : مخنوووق أوى
بس لما قريت كلامك وكنت اساسا حذفت الموضوع بتاع المدونه وكنت هحذف المدونه اساسا
لقيت الرد بتاعك .. مش عارف
فرحت ..ولا زعلت
بس انا قريته 4 مرات
حسيتنى ما أستاهلشى مشاعر كده
وبعدين انا اساسا مش أهل للثقه دى
وبعدين يوسف طفل برئ وجميل
انا بجد ملوث
روح ملوثه متخبطه ف الطين
كنتى حيرانه تسمينى ايه صح
التسميه اللى فوق دى هيا لايقه عليا اوى .. بجد مش هتفرق معايا بردو تصدقينى ولا لأ
بس انا برفض العاطفه الأموميه دى
انا بقدرك بمنتهى القوه ..
وبحترمك جدا
.. ومن قرايتى ليكى كونت صوره عنك
جميله فيها عيوب زى اى شخصيه
بس عيوبها هيا اللى محلياها
***
انتى ... ام يوسف صاحبى
وبجد ... نفسى اتنينى اقرالك كده علطول
ومن غير ما أعلق بس اقرا عن الوله يوسف واشوف صوره ممكن ف يوم ابقى زيه
وأرجع تانى طفل ..
اهو هبل وبيتقال وخلاص
ماعلينا .. خلى بالك من نفسك أوى
سلام .. ما تقلقيش عليا أنا هعافر زى ما اتعودت وان الدنيا ادتنى ألم
هرزعها ألمين
سلام

العصافير مزعجة جدا
مررت بتجربة تربية العصافير و لا اظن انني سوف اكررها ثانية
لا اعرف ان كانت عصافيري ( رخوم _ غلوسة ) نفس نوع عصافيرك ( فوفو _ سوسو )لكن عصافيري كان لها صوت يشبه صوت عباس فارس ..
حد انني كنت اشعر ان حلق رخوم سوف يتمزق من حدة نبرة الصوت
الحمد لله ان رخوم اختفى في ظروف غامضة
و ان غلوسة توفت حزنا لفراقه
كانت مخلصة له رغم كل شىء

تحياتي يا ام يوسف

ههههههههههههه
كده برده
وانا باقول ام يوسف اجدع ام واشطر ام
ورايحة تجيب عصافير ليوسف
وتجيب فيتامينات علشان يخلفوا وسفيف يبقى فوفو ومكلبظة تبقى سوسو
وفى الاخر يطلعوا دكورة ههههه
بجد شاطرة قوى يا ام يوسف
تحياتى ليكى
خالد

هههههههههه
العصافير جميلة ومسلية جدا كان عندي بس ماتوا :(

بس صحيح هم ليه ما خلفوش :)

dodda
ما قولنا اول تعليق موش أمله خالص يا بنتى إنتى بس اللى واخدة فيها مقلب كبير بس كترالف خيرك على كل حال
و بصى انا متفقة و مختلفة معاكى
متفقة إن هناك من هم اولى بالفلوس من الحيوانات الأليفة ...
بس مختلفة معاكى لأن تربية الحيوان فى البيت بتعلم الأطفال الرحمة و المسئولية و كيفية إظهار المشاعر لمخلوق آخر و دا غالبا بتلاقيه كتير عند اللى ربى حيوان فى صغره
و بعدين يا دودا القطة بتاعتنا اللى بريبها بتاكل من اكلنا و شربنا يعنى موش بتكلفنا حاجة غير تمن شرائها و دا لا يوازى قدر الأحساس اللطيف اللى بتشيعه فى البيت خصوصا لما يكون فيه أطفال ...
و يا ستى نورتى

وليد يا راعى الملك
بص أنا هجمع الرباعيات دى و أشيلها ليوسف متتصورش بتسعدنى أد إيه و بتتحسسنى بالفخر و يوسف كمان هيكون ممتن ليك لما يرجع
متحرمشى منك أبداً يا وليد
و ربنا يخلى بوبو و عمر تشوفه عريس وتشيل عياله و تقولهم رباعيات

خمسة فضفضة
يا أحلى صيدلانية فى المحروسة
يا رب يخليكى و يكتب لنا نصيب فى دعاكى أنا و يوسف و منتحرمشى منك
و بعدين إحنا بعد ما بعنا العصافير أشترينا قطة حضرتك
و أنا كان ينفع أطلع عيلة و أرجع فى إتفاقى يعنى ؟؟؟

يا خايف من الحقيقة
يا فندم ربنا يخليلنا قوات الأحتلال و تعيش و تمنع ...هوه إحنا لينا بركة الأ هما و سلملى عليهم
و بشكرك من كل قلبى على كل حاجة بتقولها و تعملها عشان تطمن قلبى
و لربنا يديم المحبة

الساحرة
إنتى منورة فى كل الحالات و متعلقيش الا لما تكونى عاوزة دا ...
و مواضيعى ناعمة و قوية و كلها حنية ؟؟
الله !!!!
يعنى مواضيعى طلعت فلورا ...
وأنااللى كنت فكراها هاندى !!!!
يعنى مكتوبة بالإيد هههههههه

أهو ده عيبه
إيه دا الموقف دا كان فى فيلم ؟؟؟
مشوفتوش على فكرة أصلى واخدة موقف من عائلة الفيشاوى كلها بسب البنت المسكينة اللى أسمها ليناو لن أعتبرهم موجودين فى الحياة الا لما يصححوا خطأهم دا ...صحيح أنا و لا ليا اهميه فى الحياة بالنسبة لهم حيالله متفرجة عادية بس دا لا يمنع إنى اخد موقف برضو
المهم أنك حالتك كانت أصعب منى طب كويس بقى إنى مشيتهم قبل ما ترتكب جريمة قتل فى البيت دانا كل شوية أقول ليوسف العصافير رقيقة العصافير لطيفة
كنت هقوله إيه بقى فى الموقف المنيل دا ؟؟؟
نورتى يا بيبو

حزينة
إنتى منورة جدا
و جاوبته سعادتك علطول أول ما خرجنا من باب المحل هو ينفع مجوبشى ؟؟؟
السمك دا عمليه صعبة أصلنا مربيين قطة و انتى عارفة مينفعش
بس أوعدك لما يرجع هشوف عاوز إيه و هجيبه بس يرجع بس
تعالى تانى بقى

أبو خالد الراجل الطيب
إنت كمان عندك المشكلة دى
بص أنا بقى متهيألى المشكلة موش فى البياعين و خبرتهم
أنا متهيألى العصافير هيا اللى ملهاش نفس تتجوز ولا تجيب عيال فى الأيام الغامقة دى
بس ربنا يسهل و يجيبوا عشان الأحفاد الجمال و سلملى عليهم و قولهم جدوا أصحابه بيحسدوكوا عليا يا عيال

مهند
يا باحث عن الحقيقة أعمل إيه بس مالبت هيا اللى قالت دول ولد و بنت ؟؟
و بعدين ربنا برضو شايف و مطلع الحمدلله أنهم مخلفوش يا بنى دانت كنت كل يوم أقعد اجرى وراهم فى الشقة عشان أمسكهم و ادخلهم القفص بتاعهم و هما جوز يعنى أتنين بس كنت هعمل إيه لما يبقوا ستة سبعة ؟؟؟
الحمدلله ربنا سلم
و أنا رديت على الأستفتاء و تحياتى ليك يا عزيزى

وزة القمرين
وحشتنى تعليقاتك قوى
و و النبى بلاش عصافير دلوقتى لحسن دول بيقولوا المرض توطن فى مصر و يمكن يتحور كمان و ساعتها تبقى ورطة جامدة
بلاش عصافير عشان خاطرى و شوفى الحمام ممكن لأنه مبينقلش المرض
و تحياتى يا حبيبتى

الطائر الحزين
أشكرك من كل قلبى على دعواتك و كلامك الحلو
و ربنا يسهل لما يرجع يوسف نشوف حاجة أصل القط اللى جبناه قريب طالع هادى كدا و تقيل يعنى تقريباً ميت و إحنا موش واخدين بالنا بس يمكن لما يشوف يوسف يتنحرر شوية
و تحياتى ليك و سعيدة بوجودك

زيانور
يا أمول و الله هيا فكرة جميلة بس مكلفة مقدرشى عليها
اللى أقدر عليه إنى أحتفظ بالبوستات دى عندى عشان يوسف يقراها دايما
و يا ستى المطرح مطرحك ادخلى دايما و أقرى زى مانتى عايزة
و متحرمشى منك و لا من مساندتك لقلبى
و تلت بوسات لنور و زياد و للجميلة اللى بتشوفيها لما بتبصى فى المراية

ميومة البهية
يا ميومة وحشتنى و سيادتك تنورنى الوقت اللى يعجبك
و بعدين حسد إيه دى إسمها غبطة و بعدين لو عليكى إنتى أحسدينى زى مانتى عاوزة أنتى من الناس اللى بيجيبوا الخير فى رجليهم ( راجع ماتش النهائى )
و إن شاء الله نشوف بعض البت نوران اللى هيا بت خيخة و أى كلام إقترحت معاد للتبرع بالدم يناسب الناس اللى أتبرعت المرة اللى فاتت و هوه 2 أغسطس
و يا ريت تبقى تيجى و اشوفك و كل الناس الحلوة اللى بحبها تيجى نتقابل و نكسب ثواب كمان
و تحياتى يا حبيبتى

يا صاحب المضيفة
أنا مبسوطة جدا بوجودك و زياراتك
و شفت بقى اللى حصل !!!
و كل ما افتكر نفسى و انا كل شوية ازقهم عشان يدخلوا البيت الخشب و هما يروحوا خارجين بسرعة !!!
أقول إيه دا فيه إيه ؟؟
سبحان الله
يللا أدينا بنتعلم برضو و أنا كنت يعنى مغسلة و ضامنة جنة ؟؟
القصد ...
إنت نورت

سارة
معرفشى ليه حذفتى تعليقك بس أتصور إنك حسيتى إنك تهورتى و تسرعتى فى لحظة
بس أنا سعيدة بيكى قوى
و عموما أنا مليش فى الماسنجر دا و التكنولوجيا خالص بس لوعاوزة تقوليلى اى حاجة و تسألينى إبعتيلى إيميل أنا بعرف أرد على الأيميلات و بفضلها عن أى حاجة تانية أنا حتى قافلة الموبايل بتاعى و مبحبش أستخدمه خالص
إيميلى عندك
modynoty@gmail.com
و موش هزعل لو مبعتيش حاجة
خليك على راحتك و كفاية إنك تدخلى تطلى عليا و على يوسف

human
اهلا بيك و خطوة عزيزة
يعنى مضاد وحوى بس ؟؟؟
دا يوسف ليه مصطلحات كتير جميلة
و ناوية إن شاء الله أكتب بوست تانى عن كدا ( راجع بوست معجم المصطلحات اليوسيفة )
نورت قوى و تعال دايما

عمو
يا غريب الروح
بص أنا لسه على البر يعنى مدخلش حياتى حد أبتدى عشان أبتدى أتردد بس بفكر معاكوا مع دلوقتى و عموما أنا بحاول اتوازن يعنى أفتح قلبى بس مخدش قرارات مصيرية فى غياب روح قلبى
بس
ملحوظة
و إستدراك مهم ربنا يسمع منك
و دمت صديقا ً و تنتهى غربتك عما قريب و يرسو قلبك على شط الوطن

soooo
يا واد مفتقداك قوى
و بعدين إيه الحكاية ؟
هوه العصافير ستاتها هاجرت ولا إيه ؟؟؟
العصافير الرجالة مطفشينهم لازم
طيب
المدونة كلها تحت أمرك و الوادة بتسلم عليك و بتدعيلك
تحياتى يا صديقى العزيز

sagi
و لو إنى موش عارفة ساجى دا مين و ليه بس إنت مبتحبش الأسئلة فموش هسالك
و بعدين سلامتك من الخنقة يا مصطفى و ربنا يفكها عليك
و تعال وقت ما يعجبك و امشى وقت ما يعجبك موش هعد وراك و اغلس و اخنقك أنا كمان كفاية اللى إنت فيه و حساه بين سطورك ...
و خلاص يا سيدى بلاش العاطفة الأمومية دى اللى كابسة على قلبك و عامله تقل دى بلاها خليك صاحب يوسف و بس بس على فكرة برضو هقولك يا بنى أصلك صاحب غبنى هقولك إيه غير كدا ؟؟؟
و أسلوبك دا حادف كدا على وداع و فراق و الكلام دا فموش هاخد عليه و أصدقه حالياً بس بتمنى ربنا يريح قلبك و روحك الحيرانة
و تحياتى دائما يا روح شفافة

صورة حلوة جداياطنط فاتيما
انا صغير السن زى يوسف

rain man
يا ميدو منور و عارفة إنى مقصرة معاك قوى معلشى و مبروك على الشيزوفرينيا
أوعى تكون حالة موش مدونة ؟؟
بص أنا موش عارفة عصافيرك اللى صوتها صعب دى كان شكلها إيه بس عصافيرنا كانت تمام زى اللى فى الصورة بالمللى سبحان الله حتى اللون و الحجم بس معرفشى الى فى الصورة دول دكورة برضو و لا ولد و بنت و لا بنتين و لا إيه بالظبط
و أزى متعرفشى عصفورك راح فين ؟؟؟
غلوسة كلته مثلا ؟؟؟
لازم تعرف ملابسات الحادث و تفك غموض الأختفاء دا و تقولى تطمنى هه...
نورت يا ميدو و وحشنى ندهتك ليا بيا فاطمة

يعني أفهم من كده غنه لولا موضوع أنفلونزا الطيور كان ممكن العقم يكون مستمر لحد دلوقت؟

أكيد المحل اللي إشتريتي منه العصافير في الأول قفل للأبد بسبب خبرتهم العالية والواضحة

همس الاحباب
خالد
و النبى موش عاوزين تريقة ....
و متعيبش عليا لحسن اللى بتعملوه فى الناس هيطلع عليكوا ...
و إنت عندك عيال و الأمر ميسلمش
و متخلينيش أتنرفز و اعلى صوتى و ادعق
و بعدين أعمل إيه يعنى ؟
ماليش فى العصافير أصلاً و اول مرة أربيهم ....
أنا تخصص قطط سعادتك و ممكن أخد فيهم ماجستير
عموما أدينى أتعلمت و لحد الأنفلونزا ما تطلع من مصر او يلاقولها علاج لا عصافير فى البيت
و لما يرجع يوسف نبقى نشوف هنعمل إيه
تحياتى يا خالد و سلامى لكل من عندك

سنووايت
أميرة الحواديت
يا سلااام
لسه سيادتك واخدة بالك دلوقتى إنهم مخلفوش ؟؟؟!!
دنا يوسف من اول أسبوع
ماما هيخلفوا امتى
ماما هيخلفوا امتى
كل شوية السؤال دا لما بقيت أقوله كلامك دا اللى مبوظ نفسيتهم مخليهم موش عارفين يخلفوا
و طلع مظلوم فى الآخر
و بلاش عصافير دلوقتى بقى الأمر ميسلمش
و تحياتى يا حبيبتى و بوست السفينة كان جميل قوى

النمر الشرس
أهلا بيك يا نمور
و مدونتك لطيفة قوى
بس قولى بقى عندك كام سنة و قولى معلومات عنك عشان أعرفك كويس و عرفت المكان هنا إزاى ؟؟؟
و دخلت مدونة يوسف روح قلب ماما ؟؟

عم مراكبى يا نبع الحكمة
بفتقد مرورك متغيبش كتير عنى و عن يوسف يا نبع الحكمة
و إنت إستنتاجك فى محله لولا الأنفلونزا مكناش عرفنا خالص المعلومة دى
بس غالباً كنا هنجيب عصفورتين تانيين نحطهم معاهم فى القفص يمكن الحال يتغير ...
و كنت هموت نفسى ساعتها لو طلعوا هما كمان دكورة برضو!!!!
بص أنا كنت دايما بقول ليوسف حاجة
أن البيت اللى كنا عايشين فيه دا ذكورى يعنى كل ما نجيب قطة تطلع ولد و منلقيش بنت عند البياع
و العصافير أهى طلعت ولد
و يوسف لما أتولد كان برضو ولد
يعنى من الآخر مفيش بنات فى المنطقة
حتى القطة اللى موجودة معانا حالياً و دلوقتى فى اللحظة دى قاعدة على حجرى و انا بكتب و منزعجة من تكتكة الكيبورد ...برضو ولد
يظهر بقى كلامى بيطلع صح و أنا موش عارفة
و بفرح بوجودك يا مراكبى
سلامى للمدام و الأولاد

وقولتيله ايه؟ ماهو لازم تكون اجابتك مقنعة برضه انتى عارفة يوسف ماشاء الله عليه مش هيفوت حاجة ذى دى

انا عانيت من المشكله دى بس بالعكس
جبت عصفورين وبعض فتره الاتنين باضوا
طلعوا الاتنين نتى
ورحت عن بتاع العصافير اللى اتأسف جدا ولزقها للولد اللى شغال فى المحل وخد نتايه وادانى دكر
وشكرته
وبعد فتره الاتنين برضه باضوا

monaliza
يا مونمون أنا والله رديت و شرحت بس صعب اكتب بوست عن الحكاية دى عشان الرقابة ....
أصلى هتطرق الى موضوعات حرجة و الفرق بقى بين الولد و البنت و أنا جيت ازاى ياماما و الحاجات دى ..
بس و الله أوحيتيلى بفكرة حلوة
بس عاوزة تفكير و حرص شديد فى أختيار الألفاظ بس أوعدك هحاول ...
و منورة يا حبيبتى
و معلشى مقصرة معاكى خالص

عبده يا رايق
إيه دا يا عم ؟؟
إنت بتغظينى و لا إيه ؟؟
يبقى إنت بقى اللى ساحب العصفورات من السوق و مخلى الصنف ناقص ..
و بعدين تعالى هنا
يعنى عمال تستلف من طوب الأرض ليه مانت حلو أهو و مبخت و رزقك فى رجيلك بالدوبل
جايلك العصافير بعيالها جاهزين أهم
عامةًلما يرجع يوسف هبقى أروح أجيب عصافير من عند الراجل اللى جبت منه ...
أصل الولد لازم يسترد ثقته فى حقائق الحياة العصفورية بشكل مضاعف عشان يتأكد
و نورتينى و الله قوى قوى

انا شربت نفس مقلب العصافير يا اوختى ومتقوليش لحد هههههههههههههههههههههه

هههههههههههههههههههههه
تعيشي وتاخدي غيرها ياأم يوسف

انا كان عندى مورنو ومونتى
وكانوا بيخلفوا وكل حاجه بس للاسف
لاء مش طاروا
دها انا اتنصب عليا فيهم ومن ناس قريبين مننا اوى قالوا القفص بتاعنا اتكسر وهنحط عصافيرنا معاكو للصبح بس والصبح خلعوا بالقفص بالعصافير بتاعتى وبتاعتهم وانا قاعدة من وقتها دمى محروق الكلام ده كان فى سنة 97 كدا
من يومها وانا مقضياها قطط
شكلنا اان ويوسف ميولنا واحده
تحياتى

عصافير يا قطة.......أمممم
طب ممكن نغير الاهتمامات ونخليها
سمك ملون صغنن فى حوض قمر ...كده يا يوسف يا جميل أنت
وسمعت كده أن فى بنات قمرات فى صفوف
متقدمين ليك يا سيدى....مينفعش
يا فاتيما أكون واحدة منهم ولا اية الاخبار...ولا ضاعت الفرصة إهى إهى إهى

على فكرة فى سيمنار يوم الاتنين الساعة 10
وكمان فى مناقشة رسالة يوم الخميس الساعة تقريبا 10 أو 11
ياريت أشوفك يا حماتى المستقبلية

السلام عليكم

تشرفت بمعرفتك يا أم يوسف ربنا يخليكم لبعض دايما

طبعا اخدت جولة بالطفطف عشان اعرفك ورحت المدونة التانية بس معرفتش يوسف عنده كام سنة عشان اقولك تعليقى على رسوماته يا ريت تقوليلى ؟

أنا مش عايزة أبقى فضولية لكن هل يوسف بقى قاعد معاك على طول خلاص ؟

بتمنالك كل الخير والسعادة وربنا يعوضك بأحسن مما تظنى

شرفتينى واتمنى يدوم التواصل الجميل ده دايما

تحياتى وتقديرى

أه معلش نسيت الموضوع اللى اقترحته اختنا الحبيبة موناليزا لتعريف الأطفال حقائق الحياة والتزواج بطريقة محترمة وعلمية ولا تخدش الحياء طبعا بيكون تبعا للسن عشان كده برضه نفسى اعرف عمر يوسف كام لكن عموما التزواج ممكن يتعرف عن طريق تعريف مبسط من النبات والبذرة وكمان البيضة والكتكوت والفرخة والديك وان أصل كل المخلوقات الذكر والانثى وطبعا العارف لا يعرف وأكيد حضرتك حتوضحى المعلومات دى بطريقة صحيحة بس فعلا زى ما قالت أمة الله لازم يعرفها منك

ربنا يفرحك بيه دايما وعلى فكرة اظاهر كل اللى جاب عصفورين لأول مرة انضحك عليه لأنى انا كمان حصل نفس الشى وكان العصفورين بيقطعوا بعض من الخناق بس أنا طيرتهم قولت طالما هم بالشراسة دى يبقى حيعرفوا يعيشوا فى الدنيا من غير قفص

سلام

سلام عليكم
طمطم الجميله ازيك؟؟
جميل اوى طريقة تعاملك مع يوسف وبجد ربنا يخليهولك ويكرمك فيه والاجمل انك مهتميه بالجانب الحوارى بينكم ودى نقطه مهمه جدا كتير مش فاهمنها ان الحب بيجى من المواقف والاحتكاك والحوار والتواصل وان اهم بنى ممكن الواحد يكسب من وراه هو انه بجد يبنى اعز مايملك هو ابنه او بنته ويدرك انه بيربى عقل وعواطف واحاسيس ومشاعر
بالنسبه لفوفو وسوسو معلش لما يرجع بالف سلامه ان شاء الله يجيب احسن منهم
انا كان عندى عصفور جميل اوى مش كنت حاطاه فى قفص كنت سايباه يطير ويرجعلى تانى بس للاسف حرمت اتعلق باى نوع من الطيور او الحيوانات لانه يوم ما توفى توفى برضه عندى فاتازمت اوى
خالص تحياتى ليكى يا طمطم ودعواتك بقى

الله .. الولد ده عسل خالص ماشاء الله عليه ..

عارفه اكتر حاجة بتعجبني فيكي ايه ..
انك بتدي وتخدي مع يوسف العسل خد وهات .. مش نظام العافيه والزعيق ..

بجد ما شاء الله عليكي

تحياتي ومتحطيش ايدك في قفص عصافير تاني

كويس قوي ..
الواد نطق مصطلح "دكورة"
وبكره يقولك "نتي"..
وهاتبقى ليلة مطينة بطين..
ياهانم انتي مش واخده بالك..
العمر الافتراضي لسن المراهقة لدى الأطفال قل جدا..
خمس ست سنين وبقى مراهق زنديق..
صباح الزندقه..
وبرضه سلميلي على جو..
تحياتي ..
ومعلش الواد كبر!!!!!!!!

يا فاطمة ازيك؟
مش حتصدقى ان نفس الموقف بتاع العضافير حصل معايا بحذافيره و لما جيت أبعهم عرفت برضه :$:$

مع الفرق أنى كنت أنا ووالدتى :)

تقريبا بيعملوا كده عشان محدش غيرهم يبيع لأنهم بيجيبوا عصافير كتير :)))

اولا وحشتينى جدا يا فاتيما

ضحكتينى مووت على حكاية الاتنين طلعوا دكورة
فكرتينى بفيلم الحاسة السابعة
لما فاروق الفيشاوى بقى بيعرف يقرا الافكار
لقى العصافير بتاعته
عاملين يقولوا
يا غبى احنا اتين دكورة

هههههههههههههههههههههههههه

تعرفى يا فاتيما
ان من حوالى اسبوعين بس
اخويا اشترى عصافير
وانا سبب غيابى عنكم
ان شريف كان عايز يقعد هناك عند بابا وماما علشان يلعب مع العصافير

المهم يا جميل
انا قريت كمان البوست اللى فات
وعجبتنى اوى الدروس المستفادة اللى انتى كاتباها فى اخر البوست

وانا معاكى
اوعى تتجوزى واحد متجوز وتكون مراته مش عارفة ايه اللى بيدور من ورا ضهرها
اصلك هتوجعيها اوى من غير ما تخدى بالك

ويارب يكون نصيبك مع حد سنه قريب من سنك
ومايكونش متجوز ولا عنده عيال

ربنا يسعدك يارب يا فاتيما
ويطمنك على يوسف
تحياتى ليكى
اختك خيخة

آبى يا قمر
يا أحلى كوكب فى المجموعة الشمسية جمعااء
لأ إطمنى موش هقول لحد خاااااالص
مالص
و كمان بالص
سرك فى بيييير يا حبيبتى

مفقوعة مرارتها
يا سحورة و حياتك لما نحب نجيب عصافير لكون عاملة مناقصة بين المحلات و اجيب خبرا و متخصصين عشان منظرى قدام الواد ميبقاش خل
و تحياتى يا حبيبتى من كل قلبى ليكى و لكل عيلتك فيما عدا واحدة بس إنتى هارشاها

قطة الصحراء
يا قطتى الحلوة ما خلاص إحنا عرفنا السبب فبطل العجب ...
أنا و إنتى برج واحد و ميولنا واحدة
و يوسف يا ستى برج الأسد يعنى قطة بس بلطجية شوية يعنى برضو من نفس الفصيلة برضو مبعدشى قوى ...
ربنا يخليكى و يسعد قلبك

إيمان
يا إيمو يوسف يتشرف و العائلة كلها يزيدها شرف بس أنا خايفة عليكى دا واد مجرم و إنتى موش قده و بكره لما يرجع هنفكر فى حوض السمك دا بجدية جنب العصافير دا زائد ان الباشا عاوز يربى كلب و سلحوفة صغننة موش عارفة لزمتها إيه دى روخرا ...
يعنى بالمختصر هنعمل جنينة حيوانات شكلنا ....
و جدته هتطردنا بره ...
متحرمشى منك يا حبيبتى و بكره صعب بس أحاول فى موضوع يوم الخميس دا إن شاء الله

مجدواية
يا فندم ألف أهلا و سهلاَ
خطوة عزيزة و نورتينى قوى قوى
بصى يا ستى يوسف حالياً عند أبوه و ام ابوه واخدة الحضانة لأسباب يطول شرحها و يوسف دلوقتى فاضله تلات شهور و يتم 9 سنين إنشالله ....
و موضوع الزواج و الخلفة و الحاجات دى أنا أصلا قولتها ليوسف بس بديهيات كدا من غير تفصيل وعلى فكرة أنا أصلاً عملت كدا مع ماجد اخويا (23 سنة دلوقتى ) لما كان فى سن يوسف كان عندنا قط ولد و قطتين بنات و فهم منهم أزاى الولادة تمت لأن قطة من الاتنين ولدت على سريرى و هوه قعد يبص عليها ...
يعنى كلامك تمام الطبيعة بتساعد على شرح الأشياء اللى صعب نشرحه ...
و لما يوسف يرجع هيشوف دا بنفسه و لو أن القنوات الأطفال مسبتشى حاجة مقلتهش
و أنا إتشرفت والله بزيارتك

only spot
مشمشة يا جميلة وحشتينى يا حبيبتى قوى
و عاملة إيه فى المذاكرة شدى حيلك كدا
أنا قاعدة بعد فى الوقت لحد معاد التبرع بالدم عشان أشوفكو تانى و اليوم الجميل دا يتكرر
و يا حبيبتى مناقشاتى مع يوسف دى برضو تقدرى تعتبريها تفاهم ناتج عن الصداقة قبل الأمومة و البنوة ..
إحنا قعدنا ست سنين لوحدنا تماما يا شيماء ليل نهار كل مناسبة و مشوار مع بعض عشان كدا العلاقة دى لم يقاطعها أحد و لا يخربها و متهيألى عمرها ما هتتكرر لو خلفت طفل تانى بعد كدا
يوسف حالة فريدة
و ربنا يخليكى ليا يا مشمشتى

ahmed mubarak
لأ لأ
موش كله تفاهم برضو ساعات بيبقى فيه زعيق فظيع و خناقات و مقاطعة تمتد لقيمة ساعة كدا يعنى زمن طويل قوى
ميغركش منظرى
يوووه و لا بلاش منظرى عشان الجبنة

د.زين الغالى
لا يا دكتور محنا بعد ما خرجنا من المحل قعدت أشرح و أقول
و بقى عارف إن المخلوقات فيها دكر و نتاية يعنى ذكر و إنثى
و قولت كل حاجة و إدليت بإعترافات كاملة عن الحادث قصدى الموضوع
و بعدين صباح زندقة إيه
إحنا معندناش الكلام دا دانا كنت أقطم رقبته و بعدين أرجعها مطرحها تانى
أنا عموما كنت بحاول أجاوب إجابات تحترم عقله عشان فى المستقبل
لما يكبر و يفتكرها ميقولش ماما كانت بتقلل من قدر ذكائى
و هوه الحمدلله طفل ذكى يعنى موش طالعلى خااااالص فى الموضوع دا
كويس
على الأقل واحد فينا يكون عقله فى راسه عشان يعرف ياخد باله منا إحنا الأتنين
سلملى على تسابيح و بوسهالى
و متحرمشى منك أبداً

ليلى
إيه دا يا لوللا
هو البلد كلها واخدة المقلب دا و لا إيه ؟؟
لازم نشوف إيه الحكاية هى البايعين اللى خايبة و لا العصافير هيا اللى بتخم ؟؟
نورتى يا حبيبتى

نوران الغالية
نونو يا بت وحشتينى قوى قوى
أنتى قاطعة بينا قوى و عشان خاطر شيكو و العصافير هنعديها النوبة دى
و مشوفتش فيلم الفيشاوى عشان واخدة منه و من عيلته موقف جمعى لصالح لينا
و شوفتى البوست اللى فات إيه بقى عرقت أتقمض طريقتك كويس ؟؟؟
و يا حبيبتى أنا مستعدة أتجوز واحد عنده أطفال على الأقل يبقى يوسف عنده أخوات و بعدين ساعتها الراجل دا هيكون اب و يفهم رغبتى فى تمسكى بيوسف فى حياتى
و كفاية غياب علينا بقى يا حبيبتى

هقولك على حاجة وهتستغربيلها قوي يا فاتيما
واحدة من التعليقات قالتلك لو تجيبي طفل يتيم وتربيه
انا عملت اللي هيا قالتلك عليه وعايزةاحكيلك على بعيشه
هبدأ الحكاية من اول
انا اسم مدونتك عجبني جدا لأني كنت بفكر افتح مدونة لإبني انا بس
انا عامله ليه مذكرات خاصة بيه وبنموه وتفكيره خطوة بخطوة
المشكلة يا فاتيما اني مبخلفش
واني عاية مع جوزي صوريا امام الناس وان انا منفصلة عنه ولظروف خاصة عندنا عايشين امام الناس متزوجين
وانا وهو اتبنينا طفل
وهو طفل جميل قوي
موش عايزة اقولك ازاي زكي ومتعلق بيا انا وباباه
واحنا احلوت الدنيا في عنينا بسببه
ومستحملة كل مرارة الأيام عشان ابني
وبيني وبين باباه صداقة لا يعلم بها احد
وربنا بعتلي اليومين دول حد يزعجني انا وهو ويهددنا بأشياء ليست حقيقة
جزء منها حقيقة والجزء الآخر كذب وانا حفاظا على اسراري واسرار من اعيش معه لا اريد ان ادافع عن نفسي
بس موش متخيله يا فاتيما ان الدنيا فيها اشرار بالشكل ده
ارجع لروح ماما
ابني اللي منوري حياتي
تفتكري يا فاطيما ان الملاك ده الي بيربي عصافير زي يوسف وبيربي سمك يستاهل من الناس الشريرة دي انها تحرمه من سكونه؟
انا خايفة يا فاطيما اني عشان ادافع عن نفسي لازم نهد البيت اللي احنا عاملينهولو
وانا وباباه متمسكين لغاية دلوقتي موش راضيين ندافع عشان ما نكشفش نفسنا قدام المجتمع وساعتها هنتطلق رسمي
نسيت اقولك يا فاطيما ان اللي مساعدنا على البقاء مع بعض ان فيه مهمة جميلة لازم نكملها عشان تشوف النور وبعدها اتفقنا ان كل واحد هيكون حر
لو كنت مكاني كنت عملتي ايه؟
مستنية ردك

يا ام الملاك
معلشى عشان انتى مكتبتيش اسم أندهك بيه لكن قولتى على ابنك ملاك فهاقولك يا أم الملاك حتى إشعار آخر ...
يا ستى حكايتك غامضة لكن أنا مقدرة كويس إن فيه حاجات مينفعش تتقال و لا تنحكى أبداً لا علنا و لا حتى من خلف ستار ...فموش هسألك خالص عليها
لكن هفترض إنها من الجدية و الخطورة اللى تخليكى تعيشى بسبها مع زوج غير حقيقى و تعيشو زواج مزيف ...
و اتصور ان الزواج المزيف دا هوه السبب فى قدرتكم على تربية الملاك الجميل دا احسن تربية لأن كل واحد فيكم بيديله الحب الكبير دون شروط و لا ضغوط مستقبلية ...
لكن التهديدات اللى جاتلك دى اكيد ليها مبرارت و لو بنسبة خمسين فى المية ليها سند حقيقى و انتى قولتى دا ...
لكن فى نفس الوقت هتهد حياتكم الهادئة و تتسبب بالألم لهذا الملاك ...
لو عاوزة رأيى و بناء على تجربة شخصية
دافعى عن نفسك انتى اولا قبل ملاكك و قبل زواجك المزعوم ...
لأنك لو سكتى هتثبتى التهم على نفسك و من يهددك لن يتركك الا و انتى شبح انسانة و ساعتها لن تسطتيعى لا مساعة ملاكك و لا خطة زواجك و لا حتى هتقدرى تساعدى نفسك
أنا هربت مع ابنى عشان أنقذ نفسى اولا عشان أعرف أنقذه هوه كمان و دلوقتى ببتدى حياتى من جديد عشانه و عشان لما يرجع يلاقينى جاهزة لمواصلة ما قطعناه و نبدأ تانى ...
بيتك و زواجك هينتهى هينتهى و انتى و جوزك متفقين على دا من بدرى ...
يبقى فاضل إيه ؟؟
موش عارفة كلامى دا هيفيدك و لو لأ ...
بس صديقنى لو الألم مكتوب عليكم كلكم هتشوفوه و الله أعلم يمكن دا تمن السعادة القادمة
و تحياتى ليكى يا ام الملاك
و ربنا يفرجها عليكى يا رب

إرسال تعليق