.

.

عـلى حـافـة الـيـم  

Posted by: فاتيما in


المكان بيتنا
الزمان
آخر ليلة قبل الرحيل
التوقيت
الساعة حداشر بليل
أنا و تيتة عمالين ندور فى الشقة من اودة للتانية
بنلم فى حاجاتك و نشيل و نحط
دا آه و دا لأ
طب بلاش لعب كتير عشان لو خدوها منك غلاسة متزعلشى عليها
فى هدوء أمر على أوضة خالك الأقيه ماسك الموبايل و أنت قاعد قصاده بيصورك
و يسألك أسئلة عن الفترة اللى قعدتها معانا و عايز تقول إيه لكل حد فينا
و إحساسك إيه و انت ماشى بكرة خلاص
مرضيتش أقف أسمع رغم إنك ندهتنى
لكن قولتلك هبقى أشوف التسجيل دا بعدين عشان تبقى مفاجأة
رنين التليفون و الموبايل لا ينتهى و الكل بيسأل خلاص هيمشى بجد ؟!!
معقول !! ... طب مفيش أى بارقة امل إنه يقعد؟!!
تتوالى الردود و الترتيبات و ينتهى التسجيل مع خالك و تأتى لحظات ما قبل النوم
فتندفس فى حضن تيتة و تقعد تتكلم معاها
لحد ما تروح هيا فى النوم و بعدين تيجى فى حضنى زى كل يوم
أسئلة كتير و كلام عن ما سيحدث غدا و أنا أضمك لحضنى و أنا أعجز حتى عن البكاء
و كأن البكى هيكون إهانة لهذا الموقف الذى يحتاج لإختراع نوع جديد من المشاعر لم يوصف بعد
أضمك ليا جامد و اخد حضونات كتير و أبوسك فى عينك فتضحك و تقولى
- هوه عشان هروح بكرة لبابا بتبوسنى عشان البوسات فى العين تفرق زى الغنوة ؟؟!!
أبتسم و أبدأ فى تلاوة النصايح المعتادة التى لطالما أرددها على مسامعك بس متفرقة
و النهاردة كان لازم أقولها متجمعة عشان مفيش وقت كتير
عاوزاك تكون ولد مؤدب عشان يقولو إن ماما عرفت تربى راجل
لازم تسمع كلام بابا و تكون كويس معاه عشان يحبك قوى و يفتخر بيك
حاول تصاحبه و تكونو أصدقاء عشان لما تطلب منه إنك تكلمنى او تشوفنى هوه يوافق علطول
لو حد من عمامك او جدتك او حتى بابا قالوا عليا كلام وحش متتدخلش فى الكلام و تعمل فيها زورو و تدافع عنى
أوعى تسمح لأى حد غير جدتك و باباك يشوفوك بلبوصة و أوعى حد غريب يدخل معاك الحمام فى المدرسة
إياك إياك حسك عينك تروح عند الجيران لوحدك و تدخل مع أى حد فى بيته من غير بابا
متنمش جنب حد غير بابا أو جدتك بس و لو حد غريب جه جانبك و قعد يبوس فيك أبعد عنه و قوله مبحبش كده
يا ريت متلعبشى فى الشارع خالص ممكن قصاد الشقة لكن تخرج بره مدخل العمارة لأ
عشان أنت عارف اللى بيخطفوا الولاد الصغيرين بقو كتير إزاى و أنا قولتلك أنهم بيعملوا
حاجات وحشة فى الأطفال عشان هما ناس مريضة نفسياً
لو لقيت نفسك لوحدك و مفيش حد معاك فى البيت متفتحش الباب لحد
و لو عرفت تكلمنى فى التليفون يبقى كويس قوى بس لو منعوك متعملشى مشاكل معاهم
لو جابولك أكل غريب منتش متعود تاكله متقولشى لأ من أولها دوقوه الاول و جربه يمكن يعجبك
متلحيش أنك تروح ماكدونالدز زى مكنت أنا وانت بنروح عشان ممكن بابا
يكون ميزانيته لا تسمح فبلاش تحرجه
عاوزاك تبقى شاطر فى المدرسة عشان إنت أصلاً ذكى و نبيه و بكره لما تكبر هتبقى احسن واحد فى الدنيا
متقلقش على ألعابك هتفضل فى مكانها و محدش هيقرب ناحيتها بالعكس هزودهالك
يعنى كل ما الاقى لعبة جديدة مكنتش عندك قبل كدا و هتعجبك هجيبها
كل ليلة قبل ما تنام عاوزاك تفكر فيا شوية صغننة و تبعتلى بوسة و الملايكة هتوصلهالى علطول
عاوزاك تعرف إنى بحبك و هدور على حل ترجع بيه هنا تانى معانا و متقلقش لو الموضوع دا خد وقت كتير
و لو قالولك عكس كدا متصدقهموش
كمان عاوزاك تعرف أن أهل باباك خناقاتهم معايا انا و أهلى لكن أنت ملكشى دعوة بكده
و إحنا العايلتين بنتخانق على مين يحبك و يعيش معاك و يسعدك أكتر
فخليك كويس و أفتح قلبك ليهم لأنهم بيحبوك زينا
و لازم ك.....
يوسف
يسوفة إنت نمت ؟!!!
نوم العوافى يا حبيبى
اضمك ليا أكتر و القطة بتاعتك تيجى تتحشر وسطنا كأنها حاسة بإنك ماشى
و عاوزة يكونلها نصيب فى وداعك
أبصلها بدهشة و أقول سبحان الله
أفتكر فجاة آية
عن واحدة كانت فى يوم مكانى
و عملت اللى بكرة هعمله و ارددها مرات ومرات
" وأوحينا إلى أم موسى أن أرضعيه فإذا خفت عليه فألقيه في اليم ولا تخافي ولا تحزني
إنا رادوه إليك وجاعلوه من المرسلين "
أتمتم بينى و بين نفسى
إنا رادوه إليك
إنا رادوه إليك
فلا تخافى و لا تحزنى
و اليوم أكررها كثيراً
و حتى ترد إلى حضنى
لا أملك سوى أن أخاف غصب عنى
و لا أستطيع أن أمنع قلبى من الحزن
لكن اللى ممكن أقوله دلوقتى
أنك وحشتنى قوى
و مطرح ما بتنام كل ليلة
هبعتلك بوسة مع الملايكة
و أقولك
تصبح على خير يا حبيب ماما

This entry was posted on الاثنين, مايو 12, 2008 and is filed under . You can leave a response and follow any responses to this entry through the .

75 كــــلام بيطــبطـــب عـــلى قــــلبى و روحــــى

ربنا يخلوهيلك ويطرحلك فيه البركه ويبقى وزير او حتى يبقى من الناس الى فوق افضل مننا باذن الله

هو انا كنت اول تعليق
لووووووووووووووووووووووووووووووووو لى

صباح الخير يا فاتيما..ان شاء الله يا حبيبتى حيرجعلك و ينام فى حضنك ..و تديله كل اللعب....

السلام عليكم حبيببتي
اللهم رده اليكي ردا جميلا تقر به عينك يارب العالمين
ربنا يبارك فيكي ويعينك يارب يارب من قلبي بدعيلك
تحياتي

ربنا يحميه ويحفظه يارب

ويرده اليكى ردا تقر به عينك وتفتخرى به ..

اللهم اجمعهما فى الخير وعلى خير يارب

ربنا يبارك لك فيه
ويملأ قلبك صبرا وحبا ورضا بما قسمه الله

يارب

تحياتى

بكرة يرجع ويكب هو في البلوج ... وأنا هدخل أتريق عليه واقوله يا روح قلب ماما انت :D

زمن وفترة وهتعدي :)

فاتيما حرام عليكى بجد
انا اعصابى تعبت وهتجنن

مش ممكن يكون فى كده ابدا، طب هو جوا مصر ولا برا؟

ولو جوا مصر ازاى مش عارفه تشوفيه، ده حتى لو مش فى حضانتك من حقك تشوفيه ولو مرة

امال قوانين جديدة ايه ومحكمة اسرة ايه وبلا ازرق من اللى فلقوا دماغنا بيه

صدقينى انا متعصبه جدا لانى حاسه بيكى بجد واصعب حاجة فكرة ان ابنك يبقى بعيد ومش عارفه عامل ايه ولا مين زعله او مين لمسه وازاى

اتمنى بجد انه يفضل فاكر كلامك وينفذه، واتمنى اكتر من ربنا ومفيش حاجه تكتر على ربنا انه يرجعلك فى اقرب وقت ويرده ليكى ان شاء الله فى اقرب وقت

وبدعيلك انتى وكل ام فى ظروفك ربنا ما يوجع قلب ام على ابنها ابدا لانى بجد اتوجعت من كلامك، ربنا يكون فى عونك

عارفه احلى حاجه بجد النصايح بتاعتك لانك اكيد كده بتفيديه هو
ومش هتسببى ليه الم ربنا يكملك بعقلك ويرد لكى تانى

أبنتى الغالية /فاتيما
مدونتك أكبر شاهد عليك
سيأتى يوما يقرأها يوسف
و يرى بعينه كم الحب و الحنان
و الصبر من أجله
مهما حاولوا تغيير حبه لأمه
سيراه قريبا بأذن الله
حين تطلع عيناه على كل هذا الحب
دمتى أحن أم

السلام عليكم ورحمة الله وبركاته

طمطم عارفه انت عملتي فيا ايه انهارده ، اكنك جبتي سكينه تلمه وقعدتي تقطعي في قلبي ،بجد حسيت كل كلمة كتبتيه واكني شايفه المواقف دام عنيا ، عيط كتير وانا بقرا الكلام اللي حاسه انه طالع من قلب محروق ومشتاق ،ربنا يردهولك يارب قريب وتفرحي بيه ويكبر قدام عنيك
براحه علينا يا طمطم كمان بوستين بالشكل ده ومش عارفه هايحصلنا ايه


وارجع اقول لما احنا اللي بعيد وادينا في الميه البارده زي ما بيقولوا وبقي ده حالنا ،امال انت بقي تبقي ايه

الله يكون في عونك ويردهولك قريب

سلام ياقمر

انا حقيقه مش فاهمه الوضع ومن زمان نفسى ادخل مدونتك
بس لا تحزنى ربنا حيردهولك ان شاء الله بقالى فتره متوقفه عن كتابه هايله المايله مليش نفس اكتب فيها انتى زكرتينى باحداث قديمه رجعتينى ليها تانى

ربنا ما يحرم اى ام من ابنها
تحياتى ليكى سومه_87

عارفه بجد والله حمقت وكنت حدمع انا وبقرى كلامك لولاى انى فى كافيه نت كل الى حقدر ااقوله ليكى ربنا يرده ليكى سالم غانم
فاتيما لو احتجتى اى استشاره قانونيه فى الموضوع ده ايميلى فى البروفيل انا تحت امرك فى اى وقت

الحقيقة يا فاطيما موش عارفة اقول ايه!!!
انتي قلتي كل حاجة واي كلام فارغ بجد قدام الحضن الكبير اللي عايزة اديه ليكي... وعلى فكرة ربنا اكيد هيرجعه علشانك وعلشانه وعلشان قلبي اللي واجعني عليكوا لما بادعي ليكوا انا بادعي ليا انا..
حبـــــــي وقبـــــــلاتي
زيانور

كلامك وجعنى اوى
وبكانى اوى
فكرنى بذكرى لاء هى مش ذكرى لانها بالرغم من انها فات عليها سنين كتير الا انها عايشه جوايا لحد ما اموت
نصايحك ليوسف هايله حقيقى ام مثالية بكل المعانى
ربنا يرجعه بالف سلامة ويخليكى ليه

عقبال ما خلصت البوست مكنتش شايفه الكلام من كتر الدموع
انتى جمعتى كل النصايح اللى ممكن ام تنصحها لاولادها فى مختلف الظروف
يارب تفرحى بضمه و حضن منه فى القريب
العاااااااجل يارب
قولى اميييييييين

ربنا يخليه ويحفظه ويبارك فيه ..

مش عارف اقول نكد ومواساه لان قلبي وجعني ..
ولا اهزر علشان اهون ..
بس كل الي عايز اقوله .. يا رب متتحرموش من بعض ويبقى ولد كبير بشخصيه حلوه واثق من نفسه عارف مصلحته ..

انا بجد مش عارف اقول ايه .. بس قلبي وجعني .. وربنا يخليه ..

تحياتي

بجد بعيدا عن المشاكل اللي بينك وبين ابو يوسف بس الام اللي تدي نصايح لابنها زي دي تجاه الانسان اللي عمل فيها كل ده مش بتدل الا على انك ام مثالية وان شاء الله ربنا هيرجعلك يوسف ابنك وهيكون سندك في الدنيا وسبب في دخولك الجنة
ربنا معاكي
تحياتي

السلام عليكم

قلبى معك أختى الحبيبة والله قلبى معك
ولا أستطيع أن اقول انى أعلم تماما ما تمرين به لأن لا أحد على وجه الأرض يستطيع ذلك
ولن أكذب عليك كذب أبيض ولا أى لون لأن الكذب اذا لم يكن للاصلاح بين الناس أو بين الزوجين او فى الحرب فهو خطية
فلن أكذب عليك عندما أقول لك من يتق الله يجعل له مخرجا
ولن أكذب عليك عندما أقول أن طمئنة نفسك بالآية الكريمة انا رادوه اليك ستكون الوصفة السحرية لك وردديها دائمة بيقين وبدعوة خالصة والله قريب مجيب الدعاء

لن أكذب عليك عندما أقول أن من يتعمد الاضرار بزوجته السابقة ويتفنن فى ايذائها فقد ظلم نفسه أولا


قال تعالى :
واذا طلقتم النساء فبلغن اجلهن فامسكوهن بمعروف او سرحوهن بمعروف ولا تمسكوهن ضرارا لتعتدوا ومن يفعل ذلك فقد ظلم نفسه ولا تتخذوا ايات الله هزوا واذكروا نعمت الله عليكم وما انزل عليكم من الكتاب والحكمه يعظكم به واتقوا الله واعلموا ان الله بكل شيء عليم
صدق الله العظيم


قد يكسب فى الدنيا بغير حق ولكن الله لا يغفل ولا ينام والله يملى للذين ظلموا
فلا تحسبى رجوع يوسف له انتصار فالعبرة بالخواتيم

ولن أكذب عليك عندما أقول ان الصورة الغير صحيحة لوالده واهله كما ذكرتك التى ألصقتيها الآن بمخيلته ستكتب فى ميزان حسناتك وسيعلم يوسف بنفسه انه ليس كذبا ولا يدخل تحت بند الكذب ولكنه تضحية وحبا له

ربنا يرده اليك ولا أعرف كيف عاد اليه وأنت لك الحضانة حتى يبلغ !!!

اعتذر عن تأخرى فسامحينى ,,

يا فاتيما
يا فاتيما
يا فاتيما
قبل ما كمل البوست عيطت
شريف نايم
بصيت عليه اديتله بوسة
خفت عليه
مش قادرة اكمل التعليق
مش عارفة اكتب اقول ايه
اقولك استحملى
مش هاقدر اقولها لانى ام زيك
وبتجنن من فراق شريف عنى وقت الحضانة

اقولك هونى على نفسك
لأ متهونيش على نفسك
بس لازم تعملى حاجة
حاولى بدبلوماسية مع ابو يوسف انك تاخدى يوسف
شوفى ايه اللى يرضيه علشان يرجعهولك

طبعا اكيد انتى عملتى كل الافكار اللى انا بطرحها عليكى واكيد عملتى اكتر منها مليون مرة
بس انا فعلا قلبى محروق علشانك

مش عارفة اقولك ايه يا فاتيما
بجد مش عارفة

نصايح جميلة لابنك وربنا يرجعهولك بالسلامة انتى ام ممتازة انا حسيت دة من نصايحك لابنك



تحياتى لكى

ربنا يجمعكم ببعض ويردكم لبعض عن قريب جدا يارب


دمت بسعادة وهنا

أزال المؤلف هذا التعليق.

عاجز عن اى تعليق

ربنا يصبر قلبك

يا الله
كل ده عشان حيروح لباباه شوية ولا الحكاية اكبر من زيارة
ان شاء الله ربنا يرده لك ردا جميلا باذن الله

صوت من مصر

واحدة مفروسة

nonoymm

كاميليا

ربنا يخليكوا لينا انا و يوسف و ربنا يسمع دعاكم يا رب
و دمتم بألف خير
و منتحرمشى منكو

أهو ده عيبه
لأا يا بيبو هوه جوا مصر بس بحاول الأ أستفز الطرف الىخر لحسن ياخده برا مصر ...
و قانون إيه و محكمة أسرة إيه و النبى يا بيبو تقفلى على الموضوع دا لحسن لو إنفتحت فى السيرة دى هيترفه عليا قضايما سب و قذف بالجملة فخلينى ساكتة احسن
و تحياتى يا حبيبتى و معلشى وجعت قلبك

آبى
يا أحلى كوكب
أتمنى بس يكونوا بيسيبوها يتبع النصايح دى و ميلخبطوش دماغه
ربنا يستر

أبو خالد يا راجل يا طيب
طب تفتكر لو يوسف قرى المدونة هيستوعب اللى فيها و هوه صغير كدا ؟؟
و لا قصدك لما يكبر ؟؟
و هيا المدونة هتفضل لغاية ما يكبر و يستوعب ؟؟؟
صحيح إحنا كلنا مفكرناش فى الموضوع دا ليه مع إن مدوناتنا بقت جزء مهم من حياتنا
تحياتى ليك و للمحظوظين بيك يا راجل يا طيب

خمسة فضفضة
و عليكم السلام يا حبيبتى
و سلامة قلبك و عيونك و روحك الحلوة دى
و خلاص يا ستى البوست الجاى هغير الدفة شوية و أكتب عن حد حلو قوى مفتقداه اليومين دول و حابة أتكلم عليه
يا رب ميوجعش قلبك بقى

somaa mahaba
أهلا يا فندم و نورتى المكان كله
بصى هوه شوية شوية هتستوعبى اللى بيحصل و بينكتب و فيه فلاش باك كتير لورا و فيه لخبطة بس معلش
واحدة واحدة الصورة هتكتمل بس إنتى يفضل عندك صبر تيجى و تقرى و متزهقيش من النكد و اللون الحزاينى بتاعى
و نورتى يا ست سومة

رئيس جمهورية نفسى
حمدلله على السلامة يا محمود
و كتر ألف خيرك على كل حاجة
و كمان بتعرض مساعدة قانونية
لأ دانت كده هتخلينى أسترد ثقتى فى المحامين تانى بعد اللى شوفته منهم
أشكرك من كل قلبى و شايليك لوقت عوزة يا عزيزى

زيانور
أه و حياتك يا امول أدعيلى عشان أنتى أم و دعواتك إنشالله مستجابة
سلامى لنور و زياد

وزة القمرين
و أنا كمان و الله

قطتى الحلوة
أنا خايفة فى يوم تبطلى تيجى عشان بفكرك بحاجات تضايق أصلى عارفة برجنا دا عاطفى خالص و قلبه لما بتوجع يللا السلامة مفيش حاجة تخففه و تخرجه من الكآبة بسهولة
بس معلشى بقى المهم أنك سعيدة بيكى

صيدلانية طالعة نازلة
بصى بقى أنا بقول المرة الجاية لما اكتب بوست مووده حزين هحط علبة كلينيكس جنب لينك التعليقات
إيه رأيك
و الله يا جماعة غصب عنى
معلشى و يا رب بس النصايح تيجى بفايدة و يسيبوها يتبعها

أحمد مبارك
يا عزيزى متقولشى حاجة
أنا عارفة و حاسة باللى نفسك تقوله
و موش عارف تقوله
و مفيش داعى تعصر مخك عشان تقوله
هوه واصلنى من غير ما تقوله
دمت بألف خير

hero
يا فندم لا مثالية و لا حاجة دا بس الواحد موش عايز لما الولد يكبر و يفتكر كنت بقوله إيه على أبوه يحس إنى كنت غلاوية و قلبى أسود و يبقى منظرى موش حلو قصاده ...
هوه موش هيقولهالى فى وشى تأدبا يعنى بس هبقى شايفاها فى عينيه و موش هقدر أستحملها خالص
و ربنا يصلح الاحوال

مجداوية
يا حبيبتى لا متأخرة و لا حاجة مانا عارفة إن كل واحد ساعات يحصله مشاغل
تعالى فى الوقت اللى يريحك و يناسبك
و بعدين يا ماما مقلنا لا قانون و لا محاكم و لا حاجة
قانون التلات ورقات و بس
و لو كل زوج كان بيقرى الأيه دى و يفقهها مكنش فيه واحدة و أطفالها أتبهدلوا بس ربنا بيلقى على مسامعنا النواميس الألهية عشان عارف إننا هنخالفها و نتبع الأهواء
و أنا مبقتش أثق فى العباد و منتظرة قضاء ربنا عشان القضاء البشرى زى ما قلت ... قانون التلات ورقات

نوران الغالية
نون يا حبيبتى متقوليش حاجة
و ربنا يخلى شريف و يخلى يوسف و يخلى كل أبن لأمه ....
أنا عارفة أن البوست دا صعب قوى على كل حد عنده قلب و عنده عيال كمان
بس أنا بحاول فى المدونة دى أكتب كل تفاصيل بتجمعنى مع يوسف موش عارفة دا ممكن يهم حد تانى غيرى أنا وهوه بس يعنى ممكن اكون بفيد حد بصحى مشاعر فى حد بحنن قلب حد على حد بفرغ شحنة الغضب و الألم من جوايا بدل ما أفرغها فى حد
يعنى ...يمكن كل دا
و قدركو بقى تعيشوا معايا كل الحكاية
متحرمشى منك يا حبيبة قلبى و بوسيلى شيكو و هاتيه معاكى يوم التبرع عشان أديله حضونة جامدة بعد أذنك

رئيسة حزب الاحلام

صاحب المضيفة

ربنا يسمع دعاكم و يستجيب لكم يا رب
ربنا يديم المحبة

أحمد سكر
موش لازم تعلق بأى حاجة يا سكر
كفاية سؤالك علينا و إهتمامك دا
تحياتى ليك

لعلها خير
لأ موش شوية بس دول شويتين تلاتة عشرة
و الموقف دا بقاله حوالى 115 يوم و قابل للزيادة الى آجل غير معلوم
هوه دا الموقف بإختصار عشان موجعشى قلبك

محمد يا موش مجرد هيومن
انا أسفة يا محمد عديت تعليقك غصب عنى
بدون قصد والله
و يا سيدى هوه يرجع و اكتبوا لبعض و عوكوا فى البلوج زى مانتو عاوزين
و تحياتى يا أخويا العزيز و اتمنى أشوفك يوم التبرع إنشالله

طيب انا بتاعت افعال مش اقوال ...
عاوزه حضونه حلوه
فاتيما انا مش عايزاكى تقفلى على نفسك كده
الحل مش حتلاقيه وانت لوحدك...يمكن يكون اللى بتكتبيه ده هو طريقك ليوسف
لو سمحتى لما حد يعرض مساعده تواصلى معاه ولعله خير
والله انت غاليه عندنا كلنا..ويوسف حتشوفيه ..ان الله مع الصابرين
وانت صابره اوىىىىييييي
دعاء سيدنا يعقوب اكثرى منه
انما اشكو بثى وحزنى الى الله
ربنا يرده ليكى عاجلا وليس اجلا امين

ربنا يصبرك يا ام يوسف ويرد ليكى يوسف
قريب ان شاء الله
تحياتى

وحشتنى ...حخلص امتحانات يوم الخميس من هذا الاسبوع واشكرك بعمق على زيارتك ليا فى مدونتى وعلى التاج الذى سعدت بهدائك لى به وان شاء الله اول ماحرجع حجواب عليه انا قلت اعدى عليكى بسرعه اسلم. مع ان صعب جدا الانسان يذكر 10 حاجات عنه بس ححاول ومتاكده انه حيكون مضحك جدا..ربنا يستررررر
جميل ان الانسان يحس ان فى ناس بتحبه وممكن تسال عليه ومش بتنساه لما يغيب
على فكره انا قرات كل البوستات اللى فاتتنى عندك بسرعه كلها جميله ..قد ايه انتى ام جميله وحنونه وجميل انك بتحاولى تحافظى على صوره بابا يوسف فى عينيه حتى ولو كان خلاف ذلك ربنا يرجعه لكى ويعوضك عن لحظات الالم كلها بلحظات السعاده التى يستحقاها قلب جميل مثل قلبك

بحبك وحشتينى


تحياتى

أبنتى الغالية/ فاتيما
نعم ستبقى المدونة و آثارها
و سيقرأها يوسف عندما يكبر
و سيعرف كل عذابات أم
سيعرف كم عانت
كم خاطبت لعبه
كم عبثت بحاجاته
كم فتحت دولابه و رتبت مافيه
كم تخيلت كم بكت كم حرمت
من أجل ضناها
كم تكلمت كم كتبت ،كم و كم و كم
وسيعلم مدى الظلم الواقع على أحب مخلوق لديه على أمه
أبنتى أكتبى و أكتبى و دونى لا تجعلى شاردة
تفلت دونما تسجيل ..
دمتى قلب حنين

حبيبة الكل فطومة

انا باتفق مع كذا حد النهاردة..أولا مع أبو خالد العزيز في إن المدونة شاهد تاريخي هايقراه يوسف لما يكبر بإذن الله..وهايكون تأثيرها عليه جامد وحقيقي أوي وهاينفي أي ذرة شك فيكي اتزرعت عن طريق ناس تانية
ثانيا مع دودا صديقتي في ان لو في حل على أرض الواقع تواصلي مع صاحب الحل ده ليه لأ؟
وإحنا في خدمتك لو عايزة أي حاجة مش هانتأخر ..بجد لو في إيدي حاجة أقدر فعلا أعملها مش هاتردد لحظة..عندك شك؟

تحياتي يا غالية
:)

اشكرك على المتخرجين اللى انتىاضفتيهم وانا كنت فعلا كتباهم بس مش عارفة الكيبورد نسانى وتحياتى لكى

بوست بجد ابكاني

اد ايه احساس صعب جدا و الظروف بتفرق بينك و بين اقرب مخلوق ليكي في الدنيا ديه
بجد احساس يا رب ما حد يحسه ابدا
و ان شاء الله يُرد اليكي لان حبك ليه بالصدق ده اقوى من اي حاجة تانية في الدنيا ديه

ان شاء الله يرجع لحضنك قريبا جدا
تحياتي لحضرتك

سلام

باذن الله هيرجعلك
والله انا بدعيلك كترررررر انه
يرجعلك
عمري مااتمنيت حاجه تحصل كده
قد مابتمني انه هو يرجعلك
ربنا يحميه ويحفطه

fatima, wa7shteny ... rabena yr3holek bel salama en shaa Allah.
Love you :)

dodda
يا رضوى والله أنا بشكرك من كل قلبى على رغبتك الصادقة فى مساعدتى بس أنا عندى تفاصيل و ظروف أنا أكثر الناس دراية بيها و عارفة أن المسألة معقدة و يمكن تكونى متصورة أنك ممكن تحليها بس نواياك الطيبة دى لا محل لها من الواقع بتاعى و أنا أفضل الا أشرك احد بحبه و أعزه منعا للمشاكل ...
عموما أنا لن الومك لو كنتى متضايقة منى بس الحقيقة أنا مكشوفة قدمكوا جدا و بكتب ادق تفاصيل عن نفسى لأنى واخدة راحتى بأنى بعيدة و محدش يعرفنى قوى و لو كنتى معانا فى لقاء تبرع الدم اللى فات اللى نظمته خيخة كنتى هتعرفى إنى مسألتش حد عن نمرة تليفون و لا موبايل لأنى أفضل اكون بعيدة قدر الأمكان عشان أكون حرة أكتر فى الكتابة و فى الشجاعة كمان دا غير أنى عشت 6 سنين وحيدة و خلاص أتعودت على الوحدة أنا كمان قفلت موبايلى للأبد ...
لا ألومك لو قلتى إنى برواية أو سخيفة أو جافة فى معاملاتى هيبقى عنك ألف حق بس هيا دى طبيعتى الحالية و عندى صعوبة فى تغييرها و يا ريت لو تقبلينى زى ما أنا لأنى سعيدة بيكى و موش عاوزة أخسر العلاقة الجميلة بينا عبر الفضاء الجميل اللى بيجمعنا دا
و أشكرك على كل حاجة حلوة منك

بحبك يا مصر
أشكرك من كل قلبى على الدعوة الجميلة الطيبة
و تحياتى الخالصة من قلبى

نبضات عرافتى الساحرة
نبوضة يا حبيبتى وحشتينى قوى قوى
مفتقدة تعليقاتك و صباحك المعطر
يا رب يوفقك فى باقى الأمتحانات يا رب
و يا حبيبتى أنا لازم أسال علطول بس أنا مقصرة معاكى معلش بس بيجيلى مشواير كتير الأيام دى ...
و يا ستى أنا منتظرة بفارغ الصبر ردك على التاج و متوقعة أقرى حاجات طفولية رومانسية رقيقة زيك
و يللا أرجعى بسرعة بقى بالسلامة
تحياتى يا حبيبتى
من قلب بيحبك اكتر

أبو خالد يا راجل يا طيب
ساعات بحس أن لا جدوى للكتابة سوى أنى بخرج شحنة من جوايا لكن موش بفيد حد فعلا و لا بسعده بالعكس بحس إنى بضايق و بوجع قلب الناس و أحيان تانية بحسسهم بالعجز لأنى واقفة فى مفترق طرق لا قادرة اتحرك شمال أو يمين فوق و لا تحت ...
و دا برضو صعب على أى حد يشوفه و يحسه ...
أرجو أن كلامك دا يتحقق والمدونة دى يكونلها معنى فى يوم من الأيام و تساعد يوسف
و تحياتى يا راجل يا أطيب من الطيابة ذاتها

ميومة البهية
مطلقاً يا مى
معنديش ذرة شك فى نواياكم الطيبة و رغبتكم القوية فى مساعدتى
لكن برضو معنديش ذرة شك فى إن وضعى لا يسمح بمساعدات خارجية خالص و الموقف متجمد حتى يلين الطرف الآخر لوحدة و موش هقدر أقول الأسباب لأن دا معناه أنى هقول حاجات موش عاوزة أقولها لا على الملأ و لا لأى حد عموماً و لى أسبابى الخاصة منها و أهمها يوسف برضو ..
يا جماعة موش عاوزة منكم أى حلول و لا مساعدات سوى طلتكم عليا وقت ما تحبوا تيجوا و تعلقوا باللى حاسينه و محدش يشيل همى للدرجة الفظيعة دى لأن الوحيد الذى يملك القدرة على تفريج الهموم كلنا عارفينه و ملناش غيره سبيل
و منحرمشى منكم يا ميومة يا رب
و قولى لدودا متزعلشى منى بقى

رئيسة حزب الاحلام
يا ريسة سيادتك بس تفكرى فى سرك و إحنا نخلى أحلامك اوامر ...
و ربنا يستر على آخر الحفلة اللى هتقلب غم دى

sherif
أهلا بيك يا شريف و أشكرك من قلبى على دعواتك الطيبة و مساندتك دى
و ربنا ما يحكم على حد أبداً بكدا
و نورت قوى و الله

mayada
يا حبيبتى متحرمشى منك و ربنا يسمعها من قلبك و تبقى بشرة خير
أنا ساعات كدا بقول زيك إنه راجع
و أفتكر سيدنا يوسف
و ام موسى
و سيدنا يعقوب
و أقول ربنا هيكرمنى زى ما كرمهم
إن شاءالله
نورتى يا ميادة و فرحانة قوى بمجييك هنا دايما

sara
ألله يخليكى يا فندم و يستجيب لدعاكى
أنتى كمان وحشتينى موش إنتى سارة بتاعة الولايات المتحدة و لا انا موش صح ؟؟
و مدونتك فاضية ليه ؟؟
يللا أكتبى فيها عشان آجلى أزورك هناك بقى
و تحياتى يا عزيزتى

فاتيما الجميله
ربنا يحفظ يوسف ويحميه ويخليكى ليه ويجمعكم على خير انا بكتب لك وانا ببكى بالدموع وبقلبى . بس عايزه اقولك ان
انشاء الله ربنا حايجمعكم على خير ويوسف
حاسس بحبك ووالده حايحس بحسن تربيتك نصايحك
رائعه ومن القلب وفى يوم من الأيام يوسف حايقرأها وحايحس بها. ربنا يكتب لك انتى ويوسف كل مافيه الخير ويهدى والده لما فيه
صالح يوسف . انتى ام جميله اوى وربناعالم بكل شىء وان شاء الله حايطمئن قلبك ويسعدك اسمه العدل
خدى بالك من نفسك وان شاءالله اللى جاى خير
خالص حبى

السلام عليكم ا فاتيماا
ياااااااااااااااااااااه
عارفة انا بقرأ في كلامك وبعيط وانا مش حاسة خاااااااااالص
عارفة انا تعلمت درس جاااامد في حياتي
اللي هو .. ان لما تبقي عايزة حاجة اوي اوي و تسألي ربنا يديكي اياها دايمن بدون ملل وكلل ( ودا حالك )
فأكيد ربنا هيديكي اياها
و انا متأكدة ان يوسف بيحبك قوي
و هيحبك اكتر لما يقرا كل كلامك الجميل دا
ربنا يجمعك بيه قريبا حبيبة قلبي

فدا

ربنا يرجعهولك بالسلامة يارب
وتقرى عينك بيه وميسيبكيش تانى ابدا
وجزاكى الله كل خير على كل نصايحك ليه ويارب يكون بينفذها كلها

ربنا يرجعلك يوسف بالسلامة يارب
وتفرحى بية الزمن بيجرى والاحداث بتتغير ويوسف هيرجعلك زى ما يوسف رجع ليعقوب وزى ما موسى عاد لحضن امة
تحياتى

klamt
ليه بس الدموع يعنى لما تيجى تطلى عليا ازعلك كدا ؟؟
معلشى يا حبيبتى و قلبك فيه الخير كله
اتمنى من ربنا يسمع دعاكى و يحقق منايا و مناكم كلكم و ربنا ميخيبش ظننا كلنا
و حياتك تسلميلى على بحر إسكندرية و كل حتة فيها قوى قوى
تحياتى يا عزيزتى

فدا
اشكرك من كل قلبى على شعورك الطيب دا و أنتى بس إدعيلنا ربنا يرجعه بالسلامة و ربنا يستجيب
إنتى نورتى المطرح كله

monalisa
ميرسى يا حبيبتى و ربنا يهدى الاحوال عندنا كلنا و طمنينا عليكى إنتى الاول

كلاكيت تانى و تانى
ميتحرمشى من طبطباتك يا طاقة النور
و أحييكى على الكام بوست الآخرانيين كانوا تحفة و فى إنتظار الآتى
تحياتى

مع ان مكملتش اكتر من ربع ساعه
في مدونتك
لكن كونت صوره عن الموقف اللي انتي فيه
من ساعة ما قريت مشوار طويل
قررت ان اكمل متابعه في مدونتك
بجد البوست ده تعبني اوي اوي
واتاثرت جامد
روح قلب ماما
تسمحيلي اقولك كده
مش هقولك فاتيما زي الباقي
ربنا يصبرك على اللي انتي فيه
ويرجعلك ابنك يوسف
اللي انا حبيته والله
وتعيشي معاه ويبقى معاكي دايما
بس خليكي قريبه اوي من ربنا
انا عاوزك تصبري لان المؤمن مصاب
وادعيله ان ربنا يحافظ عليه
ويرجعهولك بالسلامه
mrgkiller2020

LONGDISTANCE
يا باشمهندس قول زى مانت عايز و نادينى باللى يعجبك ...
و أشكرك على رأيك فى لمدونة عموما و فى البوست دا خصوصا ...
لأنه حقيقى و حصل بحذافيره ...
يمكن عشان كدا وصل لقلوبكوا علطول ..
سعيدة بمعرفتك و بمجييك هنا
تحياتى يا باشمهندس

انا اللي سعيد بمعرفتك الجميله
ياروح قلب ماما
واتمنى اشوفك دايما بخير
ان شاء الله
mrgkiller2020

يا فاتيما
انا ببكي دلوقتي
تاني يا فاطيما
ده تاني بوست اشوفه وببكي بعد ماعلقت على موضوع العصافير عارفة انا خايفة على ابني اللي قلتلك عليه اني اتبنيته
خايفة قوي لأني كل يوم بعمل معاه قبل النوم اللي انت بتعميله
اعمل ايه يا فاطيما مع الناس الشريرة الي هتتسبب في اننا نسيب بعض؟
ردي عليا ارجوكي
انا منهارة بالبكاء

فاتيما
مش عارفه اقولك ايه اكتر من ان قلبى اتوجع بجد
يمكن انا لسه متجوزتش و لسه مبقيتش ام لكن حاسه بيكى قوى قوى
و حاسه قد ايه مرارة الفقد
لن استطيع ان اواسيكى لإنى عارفه ان اللى انتى فيه اكبر من اى كلام
لكن بدعيلك من كل قلبى ربنا يرده ليكى
و لا تخافى و لا تحزنى إنا رادوه إليك
عليكى بالدعاء الصادق و خاصه اثناء السجود و تأكدى انه ابتلاء من الله و ما عليكى سوى الصبر
اعلم ان للصبر مرارة لا يدركها سواكى الآن و لكنى المس فيك الإيمان الذى يستطيع ان يقويكى على الإبتلاء

إرسال تعليق