.

.

مـشـوار طـويـل  

Posted by: فاتيما in

إمبارح كان عندى عشرين
فى تالتة جامعة و بعيش أجمل ايام حياتى
الدنيا حلوة قوى
و اللى حواليا كلهم نور فى وشوشوهم و قلوبهم
و بكرة دا بتاعى أنا
هعمل فيه ما بدالى
هحب و اتجوزاللى بحبه
و اخلف خمس عيال يكونوا أسعد و احسن ناس
الكل هيشاور على أسرتى و يحسدنا على سعادتنا و حالنا اللى يفرح
لكن
اللى بحبه و بتمناه بقى لواحدة تانية
اتجوزت أنا واحد تانى خالص
و خلفت يوسف
إكتشفت إن جوازى كان غلطة كبيرة فى حقى و حق إبنى و اهلى
حبيت أصلح الخطأ كلفنى التصليح غالى
كلفنى سمعتى و كرامتى و شقتى
و جهازى كله من اكبر قطعة موبيليا لاصغر معلقة
كلفنى شبكتى و كل اللى كتبهولى أبويا من فلوس
كلفنى عزة نفسى قدام قرايبى و معارفى و جيرانى
كلفنى سبع سنين من شبابى و أعصابى و مستقبلى
ابويا راح من غير ما اشوفه
و فى آخر المطاف كلفنى إبنى الوحيد
اللى مطلعتش من التجربة السيئة دى إلا بيه هوه بس
بقالى سنين بيعدى عليا عيد ميلادى و أنا حزينة
و بعمل كشف حساب مماثل للمذكور أعلاه
فأقرر محتفلشى و لما حد يقولى كل سنة و إنتى طيبة
أرد بتهكم و أقوله : طيبة !!
طب إزاى ؟؟؟!!
السنة دى غير كل سنة
الوضع أصبح محير
موش هنكر أبداً إن مع كل ما سبق
بقى فيه تحسن كبير
على الأقل رجعت اعيش وسط أهلى من تانى
و فيه إحتمال ارجع شغلى قريب لو ربنا اراد
و صديقات عمرى ما زلن يبحثن عنى و يسئلن بإستمرار
و أصبح عندى مدونة تربطنى بعشرات القلوب الحلوة اللى بترجعنى للدنيا من جديد
لكن
فى وسط كل هذا مفتقدة يوسف قوى
الكام سنة اللى فاتوا كان أول واحد يقولى
كل سنة و انتى طيبة يا ماما
و كان الوحيد اللى بيحتفل معايا لمدة ست سنين عجاف
الناس عادة بتطفى الشمع و تتمنى امنية للسنة الجاية
عشان تتحقق
يعنى ممكن طيب أقدر أطلب أنا كمان ؟؟
خلاص هقول
يمكن حظى المرة دى يطلع حلو و اللى بتمناه يحصل
يا رب
لا يكتر عليك إنك تجيب طلبى و دعائى
متحرمنيش من وجود يوسف معايا السنة الجاية لو كان لينا عمر
و ساعتها هعمل كشف حساب أحسن من كده
هبطل أزعل من نفسى
و هبطل ألومنى على الفشل و الأخفاق
من شوية
صحيت من نومى أغسل وشى و أبص فى المراية
و أقولى
إمبارح كان عمرى عشرين
النهاردة بقى عندى خمسة و تلاتين
ياااااه
دا كان مشوار طويل قوى

This entry was posted on الخميس, مايو 15, 2008 and is filed under . You can leave a response and follow any responses to this entry through the .

86 كــــلام بيطــبطـــب عـــلى قــــلبى و روحــــى

كل سنه و انتى طيبه يافاتيما ...
ولازم تكونى طيبه ان شاء الله علشان يوسف...لازم تاخدى بالك من صحتك علشان يوسف
لازم تضحكى علشان يوسف
يوسف حيرجع لما تضحكى...لما ماتفكريش كتير يوسف حيرجع ...
يا ما يا فاتيما ناس فقدت اولادها بعد الشر عن يوسف ز همه جامدين مؤمنين بقضاء الله و قدره

قولى اللهم اجرنلى فى مصيبتى و عوضنى عنها خير
ربك احن علينا من اهالينا يا بطوطه
و ربنا احن على يوسف منك و بيحبه اكتر منك ....
اضحكى..و فرفشى و يوسف ان شاء الله حيرجع

ايه ده فين التورته...و الحاجه الساقعه؟

لأ تورتى إيه يا مفروسة دانتى داخلة على طمع
بقولك كشف حساب و مشوار طويل و السكة بعيدة و التورتة هتسيح فى الحر
بقى
و ميرسى يا حبيبتى قوى
و إنتى طيبة إنتى كمان
و حاضر هخلى بالى من نفسى تأكدى من كده عشانه هوه قبل أى حاجة

طبعا كل سنة وانتى طيبة وعقبال 100 سنة يا ستى
وسنة جديدة عليكى وباذن الله تكون سعيدة ويوسف فى حضنك دايما
وسيبك من كشف الحساب ممكن يتاجل لمرحلة تانية
واعتبرينا كلنا اخواتك والصغير مننا ابنك او بنتك وكلنا بنقولك كل سنة وانتى طيبة يا ماما فاتيما
وعلى التورتة والشموع نجيبها ليكى يا ستى لحد عندك ويوسف ايكون معانا باذن الله
كفاية حزن يا ام يوسف والجاى ايكون احلى واسعد ان شاء الله
تحياتى وتقديرى
خالد

كل سنه وانتي طيبة يا قمر

ويارب يديكي الصحه ويرجع يوسف ويلايقي زي القمر زي ما انتي

بس علشان خاطر يوسف خدي بالك من نفسك

ربنا كريم ومش بيظلم عباده وده امتحان واختبار من ربنا بيشوف صبرك قد ايه

صلي وادعي لربنا وان شاء الله حاسة اني ربنا مخبيلك حياه جميلة انتي ويوسف

فين يا ختي الحاجه السقعه بس خليها دايت
هههههههههههههههه

بوسة من خدك ده وبوسه في الخد التاني

وحضن كمان اشلا ما حد حوش بس محدش يفهمني غلط
هههههههههههههه

كل سنه وانتي طيبه يا فاتيما ..
كل سنه وانتي اجمل (معلش عديها اكيد هتكوني حلوه حتى لو بجبنه..:) )
مع اني جعان وعايز التورته بتعتي والحاجة الساقعه .. بس تكون ساجعه ساقعة

ولا اقلك كفايه اقلك كل سنه وانتي طيبه ديه عندي تسوى كتير

وان شاء الله نحضر عيد ميلادك وانتي بتحتفلي بيوسف لما يتخرج من احسن كليه هوا نفسه فيها امين يا رب

تحياتي

كل سنه وانتى طيبه

وبعدين ايه دا

عيد ميلادك مع محمود

عيد ميلا محمود ابنى انهارده

كل سنه وانتم طيبين

وصدقينى

ان شاء الله السنه الجايه

هنقلك كل سنه وانتى طيبه

وهيكون معاكى يوسف

والله قلبى حاسس ان فرجه قريب

قريب اوى ياام يوسف

وبكرا افكرك

مره تانى كل سنه وانتى طيبه

تحياتى

اخيكى احمد سكر

ابوسك حبيبى منين ولا فين
الف عين واحنا بين كل دووووووول
ابوس الايدين ولا ابوس العنين
ولا اخلص واقصر وابووووووس
كل سنة سنة سنة وانت طيب يا غالى
كل سنة سنة سنة وانت دايما قصادى

عارفة الاغنية دى يا فاتيما بتاعة مصطفى كامل
انا بحبها اوى

وبحب اسمعها فى كل مناسبة حلوة
او حتى لو مافيش مناسبة ونفسى هفت عليا انى ارقص على اغنية باشغل الاغنية دى وهاتك يارقص

علشان كدة انا بهديهالك
كل سنة وانتى طيبة يا قمرة المدونات
وانشاء الله ربنا هيستجيب لدعائك والسنة اللى جاية هتكون احلى من السنادى

روحى يلا اشترى تورتاية وحطى خمسة وتلاتين شمعة واوعى تخنسرى انا مابحبش الناس اللى بتخنسر فى عمرها

واعملى هابى بيرث داى
واطفى الشمع انتى ومامتك واخواتك
وكلى حتة تورتة كبييييييرة اوى
وشغلى الاغنية بتاعة مصطفى كامل وارقصى عليها وهيصى وافرحى
وبصى فى المراية وقولى لنفسك بمنتهى الثقة
ان بكرة اكيد احلى

كل سنة وانتى طيبة
اختك خيخة

كل سنه وانتى طيبه ياصديقتى الرقيقه والجميله وعقبال 100سنه ويارب تكون ايامك الجيه احلى واسعد وربنا يعوضك عن كل اللى شوفتيه فى حياتك من حزن والالم وتكون ايامك كلها حب ونجاح دائم

هو فعلا مشوار طويل مش عشان السن ولكن عشان لحظات الالم والتجارب اللى بتكون ساعات اكبر من سن وخبره الانسان فى الحياه وكما قال الشاعر :
مشيناها خطا كتبت علينا ومن كتبت عليه خطا مشاها
قد ايه البوست مؤثر جدا اللى ماثر فيا اكتر ان تجربتك كانت اكبر كتير من عمرك بس انتى اخدتى نصيبك فى الدنيا من الاختبار والحزن والالم وانتظرى قريبا نصيبك من السعاده والحب

على فكره ...انا اشريت شريط عمرو خيرت مخصوص اللى فيه موسيقى اغنيه عبد الوهاب امتى الزمان يسمح ياجميل عشان اسمعه فى الوكمن قد ايه توزيع عمرو خيرت مبهر لهذه الموسيقى وقد ايه بتلمس قلبى لما بسمعها كنت اتمنى انك مش تغيرها وتخيلها موسيقى دائمه لمدونتك لانها معبره جدا عن كلماتك الشفافه الرقيقه وكانت حتكون متماشيه مع هذه المدونه عميقه المشاعر لان هذه الموسيقى بتقول كتيررررررررررر

عموما انا بفكر اعملها موسيقى لمدونتى لشدة ارتباطى بيها وتاثيرها عليا واول مره اجد موسيقى لعمرو خيرت تنافس حبى لموسيقى خلى بالك من عقلك التى اشعر دائما انها اكثر تميزا من كل مقطوعاته الموسيقيه


سعيده انى لحقت اهنيك بعيد ميلادك فى نفس اليوم ومش اتاخرت لان ديه اجمل حاجه فى التهنئه انها تكون فى نفس اليوم

تحياتى

قلب بيحبك

همس الاحباب
و انت طيب يا خالود
و يا سيدى حااااضر
هنبسط و أفرح و كل حاجة أنتو عاوزينها و الله انا موش نكدية على المستوى الشخصى بس الكتابة فعل آخر
و تعيش و تعايدنى و سلامى لكا من عنك خصوصاً القطة الصغننة همس

رودى الرقيقة
هوه مين اللى يجيب حاجة ساقعة لمين ؟؟
إيه يا إخواننا ؟؟
أنا هكبر سنة و اجيب تورتة و بيبس كمان
يعنى موت و خراب ديار و لا إيه
لاااا لااااا
متخدوش على كدا دنا ملفسة و المفروض أصلاً تلمولى
و إنتى طيبة يا حبيبتى و كلامك هحطه فى دماغى و اوعدك احاول أنفذه بجد و بحماس
تحباتى لنور الجميلة و بوسيلى مامتها العسل

AHMED MUBARK
يا احمد و انت طيب دايما
و برضو حاجة ساجعة و جاتوه ؟؟!!
أنا هبتدى أندم إنى عملت البوست ده بقى
أنا قولت هلم هدايا و بتاع
يللا أدينى خدت عظة عشان السنة الجاية
أصلا مفيش عيد ميلاد السنة الجاية
أنا وقف عند ال 35 و موش ناوية أتزحزح مطلقاً
و دمت لى اخ صغير غالى يا أحمد
تحياتى العطرة

أحمد سكر
و انت طيب يا سكر
إيه دا عيد ميلاد إبنك معايا
طب خلاص يا إخواننا اللى عاوز تورتة و بيبس يروح لأحمد سكر يجد ما يسره
كل سنة و هو طيب و يا رب تشوفه عريس
و تشيل عياله
و أشكرك من قلبى على مشاعرك الطيبة و يا ريت إيميلى ميكونش ضايقك
و تحياتى يا عزيزى

خيخة يا حبيبتى
و إنتى طيبة يا نونو
و مع إنى مبحبش مصطفى كامل الا فى غنةو ( طول الوقت ) أصل ليها ذكريات بائسة عندى ....بس هدور عليها و أسمعها و أحاول أعمل حاجة من اللى قولتيه دا كله
بوسة جامدة ليكى و مبروك على مدونات مصرية للجيب
عقبال ما اشوفلك كتب بإسمك
و عقبال ما يقبضوكى كمان إحنا اتهرينا شغل لله و للوطن نفسنا نشتغل مرة واحدة عشانا و عشان عيالنا

نبضات عرافتى الساحرة
يا خرابى يا نبوضة !!
100 سنة اعمل فيهم إيه دول كلهم لاااا
موش عاوزة أعيش لغاية أرذل العمر عشان مبقاش رذلة على اللى حواليا
ربنا بس يحسن خواتيمنا و يبقى بيحبنى قوى لو خدنى من غير مرض طويل و من غير ما بقى عبء نفسى و مادى و جسدى على حد و ...إيه دا انا بتكلم على الموت ليه دلوقتى ؟؟؟
شوفتى بقى أنا دايما احدف شمال كدا ...
المهم خلاص يا جميل خلصتى الأمتحانات و ملكيش حجة
و مستنية التاج ّو غالباً سيادتك الوحيدة اللى هتبلى ريقى و تجاوبى عليه و الباقى طنشنى خالص ..
و موسيقى عمر خيرت دى متقلقيش هرجعها تانى لأنها الموسيقى الدائمة بس أنا بحط حاجات تانية حسب المناسبة ....
بس أنا بموت فى خلى بالك من عقلك و سيادتك كنتى حطاها أنتى و كراكيب نهى محمود فمنفعشى أغلوش عليكو
و لو عاوزة أمتى الزمان حطيها
هوه حد يقدر يقاوم سحر مزيكا عمر و لا سحرك إنتى كمان يا عرافتى الجميلة ؟؟
كل سنة و إنتى صديقتى البريئة الجميلة
و تحياتى يا نبوضتى

ماتخيلتش انك حتردى عليا دلوقتى انا قلت بقه مشغوله بالتورته والاحتفال والتاج اول بوست حكتبه بس لسه بفكر حكتب ايه عن نبضات ؟؟؟
على فكره انا حاولت اضيفك على الايميل بس تقريبا مانفعشى عموما انا ايميلى snowwhite_atef1@yahoo.com
عشان لما يجيلك اضافه منه تعرفى انها نبضات عرفاتك الساحره بعنز جدا بهذا اللقب وكل سنه وانتى طيبه
ولو مش بتقعدى على الايميل مش مشكله


تحياتى ياقمر

كل سنة وانتى طيبة يا فاتيما
وطالما مش هتبقى طيبة غير ويوسف فى حضنك يبقى كل سنة ويوسف معاكى وفى حضنك ان شاء الله

متعذبيش نفسك بكشف الحساب لان مفيش حاجه بترجع بس الحمد لله على كل حال ومحدش عارف بكرة فيه ايه

خلى بالك انتى بس من نفسك وتفائلى خير ان شاء الله ومفيش حاجه بتضيع عند ربنا
بالنسبة للتورته انا راضيه باى حاجه ان شالله نايتى :)

كل سنه وانتى طيبه يا فاتيما والسنه الجايه متدخلش عليكي من غير يوسف انشاءلله
ياريت التدوين بيدينا السعاده اللى ممكن تهون علينا بس للاسف التدوين علاقات الكترونيه وفضفضات لا بتداوي جرح ولا بتطيب خاطر

خيخه
انتى بتسمعي مصطفي كامل
منك لله يا شيخه ده اكتر مطرب باكره فى حياتي
هو مطرب اصلا ولا حلاق؟؟؟؟
:)

كل سنة وانتى طيبة
ومادام انتى من جيل السبعينات الى فات
كان فى مسلسل طه حسين (الايام )

لما قريت طريقك الطويل لقيته زى ما بيكون بيغنى اغنية المسلسل
دورت عليها ولقيت الكلمات بس
قولت اهديها لك فى عيد ميلادك

أيام ورا أيام
لا الجرح يهدا
ولا الرجا بينام

ماشي في طريج من كام سنة ماشي في طريج تعب الطريج ما تعبت انا تعب الطريج
ماشي في طريج الشوج
ماشي وجلبي
مطرح ما أخطي
يبدر الأحلام
العتمة سور
والنور بيتوارى
وايش للفجاري
في زمان النوح
ميتا تخطي السور يا نوارة
ويهل عطرك ع الخلا ويفوح
ويشدنا لجدام
من عتمة الليل النهار راجع
ومهما طال الليل بييجي نهار
مهما يكون فيه عتمة ومواجع
العتمة سور ييجي النهار تنهار
وضهرنا ينجام

دوامة سودة ودايرة تحت وفوج
والدنيا بحر غويط وعالي الموج
لكن ما دام في الجلب حب وشوج
مهما ميزان الدنيا كان معووج
لابد يوم يصفى الزمان ويروج
ودي حكمة الأيام

منذر

والله أنا قلبي كان حاسس انه عيد ميلادك أول ماشفت البروفيل اتغير ل35 بدل 34
كل سنة وانتي طيبة وحنينة ومرتاحة بإذن واحد أحد..وصدقيني وصدقي الكل بكرة أحلى من النهاردة
روقي عشان خاطري وسيبيها على الحنان المنان الرحمن الرحيم
وبقولهالك تاني ماتقسيش على نفسك

يارب السنة الجاية تحتفلي ويوسف معاكي
ألف بوسة
وألف وردة حمرا
:)

كل سنه وانتي طيبه يا روح قلب ماما
كل سنه وان شاء الله يبقى يوسف معاكي وبخير
كل سنه وان شاء الله تبقى وسط اهلك سعيده
كل سنه وانتي ان شاء الله سعيده هنيئه في حياتك
كل سنه وانتي باذن الله تبقى راضيه عن نفسك وحياتك
كل سنه وانتي احسن واحسن باذن الله
mrgkiller2020

كل سنه وانت طيبه يافاتيما
وعقبال مليون سنه تقضيها
في ضحك وفرح ولعب مع يوسف
ولاد يوسف وولاد ولاد يوسف
عندي له عروسه حلوه
انا جايه اخطبه لنفسي
ان شاء الله هيرجعلك
باذن الله خلي املك في ربنا كبير
ضاقت ولما استحكمت حلقاتها فرجت وكنت اظنها لا تفرج
انا بشرب كانز فيروز وبحب الجاتوه
شيكولاته جهزيهم بقي مش خطيبه يوسفه
كل سنه وانت طيبه يافاتيما

السلام عليكم ورحمة الله وبركاته

كل سنة وانت طيبه يا طمطم وان شاء الله السنه الجايه ربنا يحقق لك كل اللي تتمنيه ويردلك يوسف ويطمنك عليه


سلام

نبضات عرافتى الساحرة
لالا تورتة إيه و بتاع إيه مفيش الكلام دا الجو العام غير مشجع بس اخويا جايلنا بكرة و يمكن لما ييجى نعمل حاجة حلوة و نعمل جو ...أنا كبرت بقى على الحاجات دى و ياما كلنا تورت و جاتوهات بقالى أكتر من ربع قرن بكلها لحد متخنت و عمالة اعمل فى ريجيم مفيش فايدة ...
و بخصوص موضوع الايميلات دا لو مكان قصدك نبعت لبعض رسايل ماشى بعرف لكن حكاية المسانجر و الشات دى صعبة بالنسبة لى قوى فمعلشى ...
و أنتى عرافتى عشان تنبئتى بالمدونة دى
و الساحرة عشان إنتى بسيطة و تسحرى القلب
و العرافة الساحرة عشان بنتشارك فى حب موسيقى عمر خيرت
تحياتى يا نبوضة الجميلة

أهو ده عيبه
وانتى طيبة يا بيبو و ربنا يخليكى ليا يا رب
و كشف الحساب دا غصب عنى بفتكره موش بس فى عيد ميلادى لأ فى أيام كتير ...
و أرجع و أقول نصيبى و مكتوبالى مهما اتمنيت غير كده ...
و لو عرفت آجى الخميس الجاى هجيبلك معايا شكولاتة يا قمر
تحياتى

نسرين
يا واحدة من جنيات بحر إسكندرية
يا رب يا نسرين يسمع منك ربنا إحنا بقينا يوم الجمعة و بيبقى فيها ساعة إستجابة ...
و أخبار الطيران إيه على حسك ؟؟

منذر
منورنى و الله و يا رب تنورنى علطول
إنت كمان من الجيل بتاعنا و لا عجبتك الغنوة و المسلسل فى المجمل ...
هيا بصراحة كلمات سيد حجاب الرائع تقدر تقول منطبقة على جزء كبير من حياتى لأنى فى وقت ما كنت كفيفة العقل و القلب و مشوفتش اللى حواليا شافوه و حذرونى منه ...
بس الحمدلله فتحت و أشكرك من قلبى على مرورك و زيارتك الحلوة دى
تحياتى يا فندم

ايه ده احنا بنلعب في نفس المنطقة تقريبا.... كل سنة وانتي اطيب واهدأ واسعد - مع يوسف طبعا!!-
حضونات وفيتامينات للصبح وللمغرب كمان...
تصبحي على سعادة يا ميمي يا جميلة..
زيانور

ميومة البهية
إيه دا ؟؟
كنتى بتعملى إيه عند البروفايل يا شقاوة ؟؟
و بعدين أنا خلاص كنت بقول لأحمد مبارك إنى وقفت عند ال 35 و هجرش على كدا موش هتحرك تانى ...
بهزر طبعا
و خخلاص يا ستى هتفاءل و على فكرة أنا معتمدة على كلامكم و تشجيعكم و عالله بقى ميحصلشى حاجة عشان همسك فى رقبتك إنتى اول واحدة ...
ألف بوسة و ورد احمر ليكى إنتى يا حبيبتى و سلامى لدودا

LONG DISTANCE
يا باشمهندس محمد اهلا و سهلا بيك
منور المكان و انا متشكرة ليك جدا على كل دعواتك الطيبة دى اللى صعب قوى تتحقق كلها مرة واحدة لحسن أعمل زى حماقى ما بيقول
طب واحدة واحدة
و بلاش كل دا
ييجى مرة واحدة
لتجنن كدا
و أشكرك جدا على إهتمامك بمدونتى و تسجيلها فى مدونتك بهذا الشكل الجميل و المميز
أحييك من قلبى
اهلا بيك دايما

كل سنة وانتي طيبة يا فاتيما
كل سنة وانتي اجمل فاتيما
خدي من السنين تجاربها بخبراتها وخليكي زي ما انتي بروح العشرين علشان لما يويو يرجع السنة الجاية لاقيكي لسة بقلب وروح واحد وعشرين
قبل ما تتطفي الشمع هاقولك ربنا يحققلك كا امنياتك ياااااااااااااارب

MAYADA
و بعدين بقى ؟؟؟
الواد دا عرايسه كتروا قوى إحنا هنجوزه مين و لا مين يا بنات ؟؟؟
طب بس يرجع و نسأله لحسن ممكن يتعقد خالص و يقولى موش عاوز جواز خالص ..
يا ستى إحنا نتشرف بالنسب دا
و بعدين جاتوه إيه و فيروز كانز إيه ؟؟
هوه مين بيجيب لمين ؟؟
لاااا يا ماما دنا هبقى حماتك
يعنى أخد مديش
إنتى مبتروحيش عند سحر فى مدونة حماتى ملاك و لا إيه
روحى عشان تتعلمى و تعرفى حموات الأيام دى شكلهم إزاى ...
نورتى يا قاف ميم

خمسة فضفضة
و عليكم السلام و رحمة الله بركاته
الله يكرمك يا فضفوضة و ربنا يخليكى ليا تعيشى و تدعيلنا كدا و ربنا سامع و شاهد
تحياتى يا حبيبتى و ربنا يديم الود

زيانور
لا متقوليش ؟؟
أنتى كمان من البرج دا او اللى بعده أو قبله طوالى ...
طيب معشان كدا بقى متفقين تقريبا فى كل حاجة ...
و انتى طيبة يا حبيبتى و ميحرمنيش منك أبداً و لا من طلتك عليا
تحياتى للقمرين نور و زياد

خلتينى أحتار اقول اية ولا مقولش ...بس هقول كل سنة وانت بخير وحنينة وطيبة...وأكيد إن شاء الله السنة الجاية لأ بكرة يكون أحسن من أمبارح...إنتى نفسك قولتيها...الوضع النهاردة افضل من قبل كده وسط اهلك واصحاب عمرك مستنينك ...وأصحاب جدد بحنيتك وجمال احتوائك كسبتيهم.....
ويارب يوسف يرجعلك ويتملى قلبك بيه
وتتطمنى يارب...وصدقينى مفيش وضع بيفضل على حال...انا لما بضايق بتذكر ان ربنا قريب اقرب من حبل الوريد ...وإنه مع الصابرين يعنى معاى
وإنه أحن عليا من أبويا وأمى...يعنى إنتى على باب ربنا وقريبة منه جدا ومعاكى...

تحياتى وممممممممممممواه

سنووايت
يا اميرة الحواديت
يويو ؟؟
إنتى عارفة إنى ساعات بدلع يوسف بالدلع ده ؟؟
و غالبا بقوله يسوفة
و قطتى المشمشية ...بس يويو كان من الأسامى الشائعة ....أنتى مكشوف عنك اللحاف و لا إيه ؟؟
و انتى طيبة يا حبيبتى و أهو أنا زى الفل ...
طول مانتو جانبى و معايا و حواليا
تحياتى يا اميرة

إيمان الجميلة
يا حبيبتى مل سنة و إنتم معايا و مسنداينى كدا و محوطين قلبى ...
كلامكم بيدفى قلبى و يشجعنى و يدينى امل بجد ...
ربنا كريم و أنا بقوله و الله بينى و بينه و انا واقفة فى البلكونة ادمع و ادعى ..ز بقوله يا رب طب بلاش عشانى أنا
عشان أمى و أخواتى و عشان أصحابى و أصدقائى اللى بيحبونى ؟
عشان كلهم تبرد قلوبهم و يبقى عندهم ثقة زيادة فى إن العدل هيتحقق و الظلم ينتهى ...
بصراحة أنا بتحامى فيكو و بتحجج لو أنا مستهلشى يعنى يعنى ...طب أنتو و امى و اخواتى ملهومش ذنب و يستاهلوا يتكأفوا على صبرهم معايا و جنبى ...
ربنا إن شاءالله هيكرمنى عشان يوسف و أهلى ...
و كمان عشانكو يا إيمو
متحرمشى منك يا جميلة

تركت تعليق وقالى يوجد خطئ

غريبة قوى

فاتيما

كل سنة وانتى طيبة ايوة طيبة طبعا
وسعيدة كمان

عارفة احيانا اشعر باننا مش فى دنيا
بل فى مكان واسع يضيق بكل الاشخاص الى فية من كثرة الزحام
وكأن يوجد شخص واقف على ابعاد من هؤلاء الاشخاص امامهم ولكن على بعد منهم وكانة لا يريد الاقتراب منهم لانة لا يستطيع النظر فى عيونهم
ومعة لستة يناى منها على اسم اسم
بل ويفكر فى من علية الدور
لكى ياخذة بالقوة على نفس التفاصيل
الى فى البوست بتاعك
ايوة نفس التفاصيل
انا مريت بها
والغريب فى نفس السن
وكآننا عندما نكتمل نفس السن ينادى علينا هذا الرجل وياخذ منا كل شئ
ياخذ بيتنا حريتنا حتى فلذة اكبادنا
وكاننا نعاقب على هذا السن
ولكن مع مرور الوقت يرجع لنا
الله تعالى حقنا فهو فوق كل ظالم
لن استطيع ترك ايميلى
ولكن ارجوا ان تتقبلى منى زيارتى وصداقتى
دمتى بكل خير وبكل حب
ايوة غداً اجمل وان بعد العسر يسر
انتظرى اليسر ولا تياسى

مع حبى ومودتى

دمتى لابنك اجمل ام

رندا

إيه ده كله .. أغيب إسبوع ألاقي فاتني 5 بوستس مرة واحدة؟ أنا قريتهم كلهم ورا بعض جمعت فيهم قصة حياتك كده زي البازل

وبمناسبة عيد ميلادك وبناسبة البوست الأخير ده .. أحب أقولك كلمتين مش من تأليفي لكن دايما بيعبروا عن الموقف ده

حلوة الحياة حتى لو في آخرها
حلوة الحياة حتى ولو فتافيت

وعلى رأي صلاح جاهين

أحب أعيش ولو في الغابات
أصحي كما ولدتني أمي و ابات
طائر .. حوان.. حشرة .. بشر ..بس أعيش
محلا الحياة.. حتي في هيئة نبات


يارب يكون قصدي واضح ووصلك

كل سنه وانتى طيبه يا فاتيما
مش عارفه ليه حاسه بطعم مرارة فى كلامك بس بجد تجربه صعبه بس الحمد لله انها عاديت انا حاسه بيكى اوى لانى احتمال امر بنفس التجربه كله مقدر ومكتوب .
ان شاء الله السنه الجايه يكون معاكى يوسف لازم تتحلى بالصبر ربنا يقربكو من بعض ويصلح ليكى الحال اللهم امين
سلام يا حبيبتى واعرفى ان فيه ناس كتير بتحبك وتحب تقراه كلامك مش تغيبى علينا

كده يا فاتيما رديتى على الناس كلها وجت عليه ونمتى ماااااااااااااشى وبعدين كل الناس عايزين جاتوه وحاجه ساقعه...عيب يا جماعه ده واجب علينا حبيبتى فاتيما انا مش عايزة ولا جاتوه ولا حاجه ساقعه انا عايزة لحممممممممممممممممممممه
انا مستنياه منابى
سلام

كل سنة وانتى طيبة و عقبال 100 سنة
و قبل عيد ميلادك الجاى ان شاء الله يكون يوسف رجع لحضنك
و اعتبرى السنين الوحشة دى هى نصيبك من الدنيا من الحزن و الالم و انتهوا خلاص و الباقى هيكون فرح ان شاء الله
و ان شاء الله ترجع شغلك تانى يارب و تحققى كل امنياتك بتاعت سن العشرين بجد المرة دى


انا عيدى ميلادى قبلك بتلاتة ايام :)
كل سنة واحنا طيبيبن و كل المدونين بخير

فاتيما
كل سنة وانتى طيبة
اسوأ شىء ان ربنا يبتيلنا واحنا نزود الابتلاء بالنظر فيه بنظرة تبعدنا عن مواصلة الطريق
الحمد لله يا فاتيما انتى احسن من غيرك كتير صدقينى وبكرة كمان احسن واحسن
خلى يقينك بالله كبير ان يوسف حيرجع
مش ممكن العقبات الاهم الايمان بان الله قادر زى مانتى قلت
خلاص بقى كفاية حزن
تعانلى مع الحياة بانفتاح اكبر ابحثى عن اشياء تسعدك قديما وعودى اليها
اعتبرى نفسك فى اجازة شوية وحترجعى تانى للشغل (يوسف و الشغل واهلك والحبيب الرفيق) وشوفى كنت حتعملى ايه فى الاجازة اذا كنتى فى احوالك الطبيعية
ان شاء الله الجى احلى

كل سنة وانتي مش كدة
باذن الله تكوني السنة الجاية احسن من كدة بكتير.. تكون حياتك استقرت وروح قلب ماما معاكي والناس الحلوة اللي بتحبك تزيد وتزيد
انتي بجد تستاهلي كل خير
كل سنة وانتي طيبة

غير انك لا تزالين ضحكة
تشرق بين الدموع
في وجه طفل
فما احلاكِ يا ابنة الخمسة ة الثلاثين عاما .. و يا صاحبة الفؤاد
الذي ينبض كفؤاد ابن اربعة عشر

اشتقتك كثيرا يا فاطمة

كل ثانية وانتي الى الله اقرب والعام الجاي تكوني اكثر طاعة واكثر رضى وتقر عينك بحبيب العمر اللي بصحيح بروح قلب ماما ييوسفة يارب يخليه ويبارك فيه
باذن الله انا حاسة ان السنة دي هتتهني بيه ان شاء الله وهيرجع لك بعون الله اوعي تفقدي الامل وادعي ربنا كتيييييييييييييير اوي واثبتي مادام انتي على حق
ربنا يعينك يارب
تحياتي

ان شاء الله السنة الجاية تبقى احلى ويكون ابنك في حضنك ويكون اول واحد يقلك كل سنة وانتي طيبة يا ماما وهو اللي يكتبلك كشف حسابك ويعملك جرد كمان ههههههه

وبجد والله انا شايف انك انسانة فولاذية بتستحملي جامد وربنا يعينك ويصبرك وينصرك

تحياتي

كل سنه وانتي شمعه وسطنا اما يوسف ان شاؤ الله تحنفل بيكم قريب يا رب

كل سنه واحنا جنبك يا اختي العزيزة
وان شاء الله يوسف يبقى معاكي وفي حضنك قريب

وبعدين في ايه
لا
بصي ياستي
الكلام ده مش هينفع
احنا عايزين نحتفل بيكي ونعمللك هابي بريز داي تو يو هوف
لازم نعمل هوف دي
وياستي التورته على حسابي
هو انا هلاقي اعز من اختي فاتيما

يلا بقى حددي امتى وانا اقول لكل الناس


منتظر الرد






سلاموووووووووووووز

وبعدين ايه ده؟؟
انتي مواليد خماشر مايو؟؟
ده انتي شخصيه مهمة قوي على كده
اكيد منطقة خماشر مايو اللي بعد حلوان اتعملت عشانك


روقي بقى يا ام يوسف
روقي وقولي يارب

عارفه
ربنا ده حنين قوي علينا
والله العظيم مافي احن علينا من ربنا

ويلا منتظر ردك على تعليقي عشان نعمل الهابي بيرزداي تو يو هوف
حلوه الهوف دي




سلامووووووووووووز

كل سنة وانتي مع يوسف يارب
ربنا يرجعهولك بالسلامة وتنسي التجربة المؤلمة دي علي خير
ويعوض ربنا صبرك خير

أبنتى الغالية/فاتيما
لا أجد سوى كلمة
أنتى إنسانة جميلة
كل عام و انتى بخير

ماله يوسف؟
بجد قلقتيني عليه ووجعتي قلبي والله
ربنا يصبرك

كل سنة وانتى طيبة ياجميل وربنا يعينك بس الحزن مغلف عيد ميلادك بس انا كنت هاعيط بجد الله يكون فى عونك واسعد الله ايامك وارجع لك عمر بالسلامة ومشوار طويل فعلا

فاتيما
انا اول مرة ادخل مدونتك وياريتنى ما دخلتها وفى نفس الوقت مش عارفة اقولك اية لان مهما قولت او اى حد قال عمر ماالكلام هيطفى النار اللى جواكى ولا احساسك ببعد يوسف عنك00احساس صعب اوى ياام يوسف بس كل اللى اقدراقولة ليكى ربنا يصبر قلبك يارب ويرجعلك يوسف فى حضنك تانى 0
تحياتى ليكى يا أم يوسف00كل سنة وانتى طيبة

أولا كل سنه وإنتي طيبه ولو إني شاكك إنها متأخره شويه.

مشوارك طويل ومليان مشاكل زي مافهمت من مدونتك، ومشاكلك بتطعن فيكي وتحسي إنها جرح مفتوح ملوش علاج، كل يوم الصبح بيزن عليكي، وكل لحظة فراغ ينط قدامك. إسئليني انا، عندي جروح كتيره من دي.

الحل لكل دا إنك تعملي لنفسك زي ما أنا مسميه: "عالم موازي" ... انا إتولدت النهارده، عندي هدف كبير جديد لازم أوصله بمشيئة الله، وهدف متجدد وبيكبر، أحط فيه مخي كله، لأني لو فضلت واقف عند فتره زمنيه واحده من حياتي حغرق في الألم، ومش حينفع علاج ومفيش حل. لازم يكون في Cutting point، وأحس إني واحد جديد خالص، في عالم تاني خالص.

أوحش حاجه إن الواحد يحس إنه ضعيف وإن عمره ودنيته إتسرقوا منه، ويقعد يلف في نفس دايرة الحزن والتفكير وهوا عارف إن الحلول إلي في إيده معدومه. حيضيع عمره زياده.

أسف، شكلي كده بلخبط في الكلام، بس انا مبحبش أواسي، إنما بحب ألاقي حلول.

كل سنه وإنتي طيبه، وإنشاء الله ربنا يهدي الجميع ويرجعلك يوسف تاني يملا عليكي حياتك.

اهلا بيكي تاني يا ميمي..
يل ستي انا مواليد شهر 10
واحنا من جيل واحد على كل حال واحمد الله لذلك
كل سنة وانتي احلي واسعد واهدا سريرة
على فكرة انا عندي فكرة لكي ليه ما تكتبيش عن قراءاتك .. كتب .. كتّاب الخ
منتظراكي اصلي والله باتونس بيكي
حضونات وفيتامينات
زيانور

رندا
أهلا بيكى و نورتى المكان
أنتى كمان عندك نفس الظروف ؟؟
أتمنى لأ
و أشكرك من قلبى على مشاعرك الطيبة
و كلامك دا يكاد يكون حقيقة علمية
كلنا فى وقت ما من حياتنا لازم ندفع فاتورة أيام الراحة و عدم شيل الهم
بس كل واحد و حظه و سمعت حد قبل كدا بيقول إن اللى بستريح فى أول عمره بيتعب فى الآخر و اللى بيتعب فى الأول بيستريح فى الآخر ...
بس مقتنعتش عشان فيه ناس طول عمرها مستريحة و ناس طول عمرها تعبانة من أول نفس لآخر نفس ...
أتمنى أنا و إنتى و كل حد بنحبه يكون دفع قاتورته و يبتدى بقى يستريح
سعيدة بالتواصل دا و موش لازم أيميلات ماحنا بنتكلم أهو و كدا احسن بكتير على الأقل كل حد بيدخل هنا يستفيد من تواصلنا دا ...
و تحياتى ليكى من القلب
و ربنا يريح قلبك

عم مراكبى
خمسة و خميسة إنت بتقول خمس بوستات و أمبارح الخميس خمستاشر خمسة ...
و بقى عندى خمسسسسة و تلاتين
هاهاها
إنت بتقر عليا و لا إيه يا نبع الحكمة؟!
المعنى و القصد واصلنى يا فندم و الحمدلله على نعمة الصحة و العيشة فى حد ذاتها
بس الواحد طماع و نفسه فى العيشة مع اللى بيحبه بالمرة
و بمناسبة المعنى دا البوست الجاى إن شاء الله هيكون عن كدا ..
البوست الجاى هيبقى السادس يعنى واحد زائد خمسة هه
تحياتى يا نبع الحكمة الصافى

حنين القلب
أولا
أهلا بيكى و شرفتينى جدا
ثانياً
أتمنى يكون اما اكتبه لا يسبب ليكى نكد أو ألم
ثالتاً
أشكرك من كل قلبى على دعواتك الصالحة الطيبة
رابعاً
احتمال تمرى بالتجربة دى ؟؟...ليه كدا بس ؟؟!! ...أرجوكى حاولى بكل ما تقدرى تتجنبى دا لأنه وؤلم فوق ما ممكن خيالك يوصلك ...و أرجع و أقول المكتوب على جبينك هتشوفيه مهما حاولتى تتلافيه ...
خامساً
فى إنتظارك دايما تنورينى

rainbow
كل سنة و انتى كمان طيبة و بألف خير و سعادة
أنتى كمان زى حالاتى من برج الثور ؟؟
يعنى عندية و قلبك موديكى فى داهية ؟؟
طب كويس و الله
و أنا أقول العيال اللى بتدخللى دى فقسانى علطول كدا ليه ؟؟!!
أتارى هناك أسباب آخرى ...
و منها برضو إنى أصلا زى ما واحدة صاحبتى بتقول عليا ..
أنتى يا فاطمة فضيحة متنقلة
يللا ...
البوست دا فرصة سعيدة عشان نتعرف اكتر و تحياتى يا عزيزتى

كل سنة وانتي طيبة
والسنة الجايه اسعد وكل امنياتك متحققه هتشوفي اعتبري ده وعد بشاره اي حاجة بس صديقه وجدا كمان اتفقنا

لعلها خير
و انتى طيبة يا ستى
و طبعاً أنا احسن من غيرى كتيييير
الحمدلله و عارفة و الله و بشكره
بس بطمع و انتى عارفة البنى ىدم طماع دى طبيعة بشرية زائد إن دا حلم و الواحد من غير حلم بيستناه يبقى موش عايش ...
و خصوصا لما يكون الحلم مشروع و من حقى
تحياتى يا عزيزتى

bobo
هبة أزيك يا حبيبتى
و حلوة قوى التهنئة بتاعتك دى جديدة
و لايقة علي الموقف اكتر ...
متحرمشى منك و لا من راعى الملك زوجك العزيز و بوسيلى القمر الصغنن

كل سنة وانتى طيبة
والسنة الجاية تتحقق امنياتك

وتفضلى معانا انت ويوسف

دمت بكل سعادة

rain man
انا عارفة إنى مقصرة فى حقك يا ميدو
و موش لاقيه كلام أقوله يبرر غيابى عنك
يمكن عاوزة اجرب احس إنى
عنوان مدونتك ...
يمكن ؟؟

nonoymm
يسمع منك ربنا كل الحاجات الحلوة دى
و عقبال ما يوسف يرجع و يقولك بنفسه
متشكر يا حضرتك على كل دا

hero
فولاذية ؟؟
يا راااجل
دنا خيخة خالص - مع الأعتذار لنوران حبيبتى بت خيخة و اى كلام - أنت واخد فيا مقلب طب إستنى البوست الجاى و انت تعرف إنى موش فولاذية خالص ..إستنى
لا ممكن يكون عندك حق لأنى فى مرحلة ما كنت كدا فعلا ..
أشكرك يا بطل من جوا قلبى بجد

آبى الجميلة
يا احلى كوكب
السنة الجاية يكون يوسف وسطنا و تحتفلوا معايا و معاه ...
هيا الحلقة هتتذاع إمتى بقى عاوزة أشوفك لايف

سوووو
يا واد إنت جيبك بياكلك و لا حاجة
تورتة إيه يا عم كبرنا خلاص على الحاجات دى و ممكن لو وقفتونى قصاد التورتة أعيط و أبوظلوكو الدنيا و أقلبها نكد ...
بص أنا هطلب منك طلب تانى و عارفة إنك جدع ...أنا عاوزة لما يرجع يوسف اغنشاءالله نبقى نتجمع كلنا و نجيب عيالنا و نروح جنينة الحيوانات سوا .. عاوزة الفسحة دى تبقى معاكو و نبقى نحتفل بقى زى مانت عاوز وقتها ....
و بعدين أنت بتتريأ يا عم ؟؟
أصلا انا اتولدت يوم 13 و بابا اتشائم ( كان قلبه حاسس ) و راح كاتبنى فى شهادة الميلاد 15 عشان يبقى يوم ثورة التصحيح اللى كانت لسه حاصلة و حب يكون يوم ميلادى مميز ...
و اللى حصل بعد كدا أنهم عملوا مدينة جديدة بالأسم دا مخصوص ..
عشانى طبعاً أومال عشان ثورة التصحيح إياك ...
و تحياتى ي اخى لغالى و صديقى
و الحاجة بتسلم عليك قوى و بجد موش هزار

مفقوعة مرارتها
و حاليا
حماتى ملاك
إيه يا سحورة كدا الست دى إنتصرت عليكى و خلتك تغيرى أسم الشهرة و تجيبى أسمها هيا ....
ماشى يا ستى نتعود على الأسم الجديد بقى
و أشكرك يا حبيبتى
و كل سنة و انتم حواليا و فى قلبى

أبو خالد يا راجل يا طيب
كل سنة و انت اللى دايما طيب و قلبك أجمل من كدا كمان
و ميحرمنيش من طلتك عليا هنا
و لا يحرمش يوسف من دعواتك الطيبة
تحياتى ليك و للمحظوظين بيك

om el basabess
لااااا دا موضوع يوسف دا كبير قوى و عايز تقرى المدونة من أولها ..
اهلا بيكى و نورتى

رئيسة حزب الأحلام
يا سلوى شرفتينى و كل سنة و انتى كمان طيبة و بألف خير و صحة
و يا رب كل واحد يتمنى حاجة تتحققله

الحب الجميل
ليه بس كده ؟؟
يا ريتك ما دخلتى ؟؟
معلشى معلش ...بصى أنا معاكى إن الجو هنا حزاينى و صعب حبتين لكن القصة دى بتحصل كتير و أهو الدنيا فيها كتير و انا سعيدة بدخولك هنا و انى اتعرفت بيكى و أشكرك على مشاعرك الطيبة دى و اللى ليهون عليا الصعب هوه وجود ناس قلبها كبير و نون زيكم كدا حواليا يسندنى لحسن أقع ...
نورتى و متهيألى ان شاء الله لازم هتيجى تانى ...

وجهة نظرى
أزيك أولا ...
و موش عارفة أنت قصتك إيه بس هحاول أفك الخيوط و أعرف براحة كدا ..
لكن كل واحد عموما لا تخلو حياته من مشاكل و منغصات ...
و ساعات فيه مشاكل متتحلش الا بالوقت و الزمن هوه الوحيد اللى يقدر يدوايها ...
و العالم الموازى اللى بتقول عليه ده موجود فى حياتى ...
موجود فى المدونة دى هيا و مدونة يوسف
و فى كل حاجة بتجمعنى بيهو بتكلم عنها هنا ...
تحياتى ليك يا عزيزى و شكرا على اهتمامك بيا و بيوسف

زيانور
أزيك يا امول ...
أنتى مواليد شهر 10 ..إنتى عقرب ؟؟
قولى لأ ... قولى لأ ...
أصلى متعقدة منهم قوى ...
يا حبيبتى يسعدنى أشتراكنا فى حاجات كتير
و فكرتك حلوة بس أنا يعنى ماليش خبرة عشان أنقد كتب و اتكلم عنها ..
يمكن أعرف أتكلم عن تاثيرها و تاثير كتابها فى حياتى و نفسى ...يمكن دا أقدر أقوله لو جت مناسبة ...
أشكرك عموما على مجاملتك ليا و تشجيعك لأسلوبى ..المجاملة دى معناها أنك بتعزينى قوى
و انا كمان شرحو
تحياتى لنور و زياد و امهم

كراكيب نهى محمود
يا نهى نورتنى قوى
و ميرسى يا حبيبتى على كلامك الحلو
و مستنية تحقيق البشارة
و يسعدنى تعتبرينى صديقة
انتى اديبة هايلة و بحب مكعبات رخامك قوى و بتمنى لنفسى و ليوسف نعيش نفس نهايتها ....
بس موش هحط صفحات المدونة دى فى البانيو

يا عمو
كل سنة و انت طيب
و يا رب تكونوا دايما معايا
و مع يوسف بقلوبكو الدافية دى

فاطيما نسيت اقولك تقرئي تعليقي على بوست في الارشيف بص شفت العصفورة
تحياتي

غير معرف
يا ام الملاك
وأنا جاوبت

كل سنه و يوسف معاكى علطول وتبقى برده طيبه انتى وهوا
و ان شاء الله ربنا يرجعهولك ويفضل معاكى بس انتى خدى بالك من نفسك علشان لما يرجع مايلاقكيش متغيره تبقى ماما فاتيما بتاعت زمان
و بكره اكيد يوم جديد و هيبقى احسن
و بما ان الكل سأل على التورته و الحاجه الساقعه انا هسأل بقى على الشيكولاته
سلامى ليكى وليوسف لما يجى قريب

يووه يا فاتيما ده انا كل الصفات بتاعت برج التور معمولة عليا
و بصراحة فى حاجات كتير وحشة و بحاول اغيرها
حتى طيبة القلب دى

انا كمان نفسى اتعرف عليكى اكتر :)

كل سنه وانت اطيب طمطم فى الدنيا
كل سنه وكل الناس اللى بتحبك اكتر واكتر
كل سنه وانتى فى وسط اهلك وكلنا اهلك
كل سنه وانتى فاطيما الىى بموت فيها
كل سنه ويوسف جنبك ومعاكى وحواليكى
كل سنه وانت بخيرانت وكل اللى بتحبيهم

نور
أهلا بيكى
و ميرسى على ذوقك و تعاطفك
و على دعواتك ليوسف و اتمنى زى إنتى ما بتقولى ..أنى أفضل زى ما أنا متغيرش و يوسف يرجع يلاقى واحدة غير اللى سابها
اتمنى
نورتى

rainbow
يا ستى أدينا بنتعرف على بعض أهو عبر المدونتين ...مع إنى عارفة إنى مقصرة معاكى بس سامحينى و هتتعوض إن شاء الله
و تحياتى يا رينبو

dodda
و كل سنة و مدونتى جنب مدونتك
و قلبى جنب قلبك
و روحى بتونس روحك
و تسلميلى يا دودا
و تسلم ميومة البهية السبب فى المعرفة الحلوة دى

إرسال تعليق