.

.

طلعوا الكراسات  

Posted by: فاتيما in



البت خيخة اختشى و حبيبتشى
سألتنى سؤال فلسفى عميق فى الحياة
إزاى يا فاطمة حطيتى الموسيقا الحلوة دى فى مدونتك ؟؟
طبعاً قبل ما أحاول أقولها الطريقة و أقعد أشرح
لازم فى الأول أقول إنى إتعذبت تلات شهور عقبال ما عرفت إزاى
طبعاً دا سببه الخيابة و قصور اللغة
أدخل مواقع كتير من اللى بيسموها بتاعة ال " hosting " يعنى إستضافة
و احاول مفيش فايدة
بس احاول تانى
و أختكم لإنها على باب الله حاسوبياً
فربنا كرمنى فى لحظة تجلى
صحيح جت متأخرة
بس أهو زى ما بيقولو
beter than never
يعنى بالبلدى أحسن من مفيش
و المهم نبتدى بقى الحصة و طلعوا الكراسات
يلا بتبصولى كدا ليه ؟؟
أوعو تكونو نسيتوها !!
نهاركم أزرق
طب طلعوا الأقلام
و دا وقت تبرى القلم فيه يا خيخة ؟؟
متستلفيش من اللى جنبك
مجبتيش معاكى براية من البيت ليه ؟؟
طب أديها يا رودى البراية و موش عايزة كلام
واد يا سوووو سيب الشندوتش دلوقتى و كوله لما تيجى الفسحة
و إبقى إدينى حتة
يلا كل واحد وشه فى كراسته
و إياك أسمع نفس
نبتدى
ماشى
الأول عنوان الموقع كالتالى
هتلاقيهم ناس ذوق و بيقولولك
wellcome
و إتفضلى و الكلام دا اللى بيتقال على الباب
تروحى سيادتك دايسة على المستطيل البرتقانى اللى مكتوب عليه
join us
تلاقى بيانات مطلوبة و ضرورية تمليها كلها و تدوسى
sigh up
بعد ما تدخليها هتلاقيه دخلك على صفحة جديدة مكتوب عليها
step 1
لو عايزة تحطى لنفسك صورة حطى بس الصفحة دى موش مهمة قوى و دوسى على
skip this step
بعد كدا هتلاقى صفحة step 2
....برضو عديها و دوسى على
nothanks
و الصفحة اللى بعدها step3
عديها برضو موش مهمة و دوسى
later ,thanks
هتلاقيه راح مدخلك على الصفحة المهمة فى الليلة كلها
اللى حاطط فيها تلات أختيارات و تحت بيقولك روحى ببساطة على
" profile "
دوسى على المستطيل البرتقانى اللى مكتوب عليه بروفايل تلاقى نفسك بقيتى فى صفحتك الخاصة
و مكتوب فى ترويستها يعنى أعلى الصفحة
أسمك اللى اخترتيه
و تحت منه شوية مربعات سودا مكتوب عليها حاجات كتير اولها على الشمال
upload
دوسى عليها
هتدخلك على صفحة فيها تلات أنواع من ال upload
دوسى على
upload music
تلاقى خانة مستطيلة المفروض سيادتك تحطى فيها الغنوة اللى تعجبك
بس لازم تكون أصلا موجودة فى جهازك
يعنى دوسى
browse
تروح مفتوحة شاشة على الديسك توب بتاعك و أختارى أى غنوة بس بشرط تكون
منتهية ب mp3 موش حاجة تانية يعنى هيا أصلا بتشتغل على برنامج الwinamp بس موش حاجة تانية
بعدين تدوسى على كلمة
upload
هتلاقى شريط أزرق فى أبيض عمال يلف و دا معناه إن التحميل شغال
أستنى لحد ما يخلص بعد دقايق و يفتحلك صفحة جديدة فيها بيانات
موش مهم تكتبى فيها حاجة و دوسى على الكلمة اللى فى الآخر
اللى هيا
submit
و متسألنيش يعنى إيه عشان نص الكلام موش عارفه و بجيبه بالويم كدا و بالفكاكة
كدا سيادتك هتلاقى صفحة جديدة فيها
upload music complete
الحمدلله كدا إنتى سجلتى الغنوة بتاعتك فى صفحتك الخاصة
بصى فوق كدا فى الترويسة
هتلاقى كلمة profile اول كلمة على الشمال دوسى عليها
هيدخلك صفحتك الخاصة اللى متسجل عليها غنوتك و اى غنوة بعد كدا
إضربى بعينك كدا نواحى اليمين تحت كلمة youre music
هتشوفى تحتها لينك غنوتك اللى إنتى دخلتيها
دوسى على اللينك دا
تلاقى صفحة الغنوة و هتسمعيها بتشتغل من البلاىليست الموجود قصادك على الشاشة
و هتلاقى تحته شريط مكتوب عليه
to embed this content, copy & paste the code below
دوسى على الشريط اللى تحته هتلاقيه بقى لونه أزرق هوه دا ال"code "
و خدى نسخة منه و روحى على مدونتك
صفحة الملوخية
يوووه
قصدى صفحة التخطيط
إفتحى أضافة عنصر صفحة
و بعدين إختارى HTML/JavaScript
و أفتحيه و حطى فيه الكود اللى إنتى أخدتيه من صفحة الغنوة
و دوسى حفظ التغييرات
و حفظ كمان فى صفحة التخطيط
أرجعى لمدونتك تانى و ادخليها كدا
المفروض تسمعى إيه؟؟؟
الغنوة
و هولع فى نفسى لو ما أشتغلتش !!!
عموما أتمنى اكون شرحت كويس بس أنا عارفانى خايبة قوى فى الشرح
بس مين عارف ؟؟
يوضع سره
آه قبل ما أنسى يا خيخة الموسيقى بتاعة دمى و دموعى و إبتساماتى اللى عجباكى موجودة فى المكان دا
أول واحدة فى القايمة تحت إسم
hopeless-love
شفتى حتى إسمها حزين ؟؟
لازم تنزليها على جهازك الاول و بعدين تبقى تحطيها على صفحتك
فى موقع itoky
تحياتى يا نوران و أى حاجة تعصلج قوليلى
و يا رب أى حد يقرى البوست يستفيد منه و يفيدنا معاه
و أهو الواحد كل شوية يتعلم حاجة فى الكمبيوتر
و كتر خير الدنيا
وعلى طريقة آبى الفيكونية
كان معكم إستاذ دكتور لواء مهندس إتصالات فنية عسكرية مدرعات
فاتيما أم يوسف أفندى رفعنا العلم

This entry was posted on الاثنين, مايو 19, 2008 and is filed under . You can leave a response and follow any responses to this entry through the .

64 كــــلام بيطــبطـــب عـــلى قــــلبى و روحــــى

يا عم يا عم
ايه الجمال ده يا فاتيما
ما شاء الله
شرح ولا أجدع مُدرسة
لا ييجى منك يا قمر
اطمئنى جدااااااااااااا


دخلت مدونتك النهارده العصر لقيتك حاطة البوست اللى قبل اللى فات .. بس كان ورايا نشر غسيل وحاجات كتير معرفتش ارد
دخلت الوقت لقيتك ما شاء الله نزلتى بعده بوستين
ألحق بقى أقولك الكلمتين قبل ما أصحى الصبح ألاقينى فى البوست العشرين
هههههههههههههههه

سين سؤال : ليه الهرتلة الغريبة دى يا بنتى .. انتى حد زعلك ولا داس لك على طرف
مش معنى ان المشكلة لا تزال قائمة ان اخواتك وحبايبك المدونين يزهقوا منك
احنا بس زعلانين عشان خاطرك وحاسين بالعجز ومش عارفين نعملك ايه عشان نرجعلك يوسف ونفرح قلبك به

انا بتابعك علطول يا فاتيما بس مش دايما بقدر أعلق وانتى بجد من الناس اللى بحبهم وشاغلينى
عايزاكى تجمدى كده وبطلى ضعف
ولو حتى ضعفتى احنا كلنا قوتك
ولا احنا قليلين فى البلد دى ولا ايه ؟؟؟؟؟

طب تعرفى بقا انا اول مرة يجينى تاج وعلطول فكرت فيكِ عشان بس أشيل لمحة الحزن اللى سامعاها فى دقات الكيبورد بتاعتك دى ولو حتى شوية صغيرين

منتظراكى يا قمر تيجى تستلمى التاج المصون

ربنا يخليكى لنا ويرجعلك يوسف بالسلامة يارب

أختك سالى

ههههههههه
ههههههههههه
فاتيما فطستينى على روحى من اسلوبك انتى دمك خفيف جدا
انا حروح اجربه و اقولك ياميس

وبعدين بئي تول سويا تول سويا يارودي هاتي البيايهزهقتني يا مس

تويس يعني لما تضيعها اعمل ايه بئي اقولهم اي في البيت

وسوو عمال ياكل عمال ياكل ومس بيديني حته وبيضربني كمان واااااااااااااع

لساني اتعوج بجد هههههههههههه


ايه ده يا عم يا عم

برافو عليكي انا كمان هجربها

والله استاذه بجد يجي منك

صباحو فل عليكي

مرسى جدا جدا جدا
اصلى انا كمان شرحه كنت محتاسه
و بعدين واحده صحبتى لسه جديده سالتنى
لقتلها لما اعرف اقولك
ربنا يجازيكى خير

http://forafact.blogspot.com/feeds/posts/default

دى وصفه سهله دى وصفه هايلة

لا بجد شرح جامد يافاتيما بس تلات شهور يا بنتى علشان توصلى لحاجه طب كنتى سالتينى

عموما فى موقع تانى هكتبلك اللينك بتاعه وده تسجلى عليه وتنزلى اغانى برضه او تدورى فيه على اغانى هتلاقى كتير
http://www.imeem.com/

بس بجد المزيكا دى تحفه
سلامى يا احلى فاطيما

الموسيقى حلوة جدا ده اولا
ثانيا شرح ولا اروع ومبسط وسهل جدا جزاكى الله خير الجزاء فى البت خيخه وباقى المجموعه كلها

سعادة اللواء فريق أول
المهندس
الطبيب
الفنان
الموسيقار
الفيلسوف والحكيم
فاتيما
نشكرك للغاية..كتر البكا يعلم النواح مش كده..
يافندم والله دي معلومات هايلة جدا ومؤثرة وأهو كلنا غشينا منك.. ليه لأنك اترقيتي مشير أغاني حلوة..
تحياتي ياأم يوسف

أنت عاملة واجب جامد قوى قوى قوى بالدرس الخصوصى دا وبصراحة تستاهلى عليه لقب دكتورة فاتيما ، انت متعرفيش الموضوع دا كان مهم بالنسبة لى اد ايه وكل واحد عارف الحدوتة فاكر انه الوحيد الحاسوبى عظيم ، بجد انت ام عظيمة وانسانة أعظم انك تقدرى تفرطى فى معلومة مخابراتية ضخمة ، واشكر الصديقة التى كانت سببا فى أعطائنا هذا الدرس القيم من أما نبيلة مثلك ، رغم انك استاذة عنيفة شوية فى الحصة ، بس انا قدرت اضحك عليكى واكل سندويتش وانت بتشرحى أأأ
ميرسى يا أم يوسف

كنت واقف من بعيد قلت أشوف آخرتها إيه
في إللي كنتي بتكتبيه و أفهمك و أعرف ده ليه
بس لما سألت بوبو قالت أنك بعد حبه
النهار حايبان يا شابه ،، يصحى و يفتّح عينيه
وعجبي
KING TOOOT

السلام عليكم ورحمة الله وبركاته

مانتحرمش من زوقك يا طمطم

ايه الشرح الهايل ده انت المفروض تِدَرِِسي في الجامعه الامريكيه

متشنكرييييييين يا ام يوسف

عاااااااااااااااااا
انا ماشية على الخطوات واحدة واحدة وعمالة اعمل كل حاجة انتى قايلة عليها
واذ فجأتن تقوليلى لازم mp3
وانا كل الاغانى اللى عندى ميديا بلاير
يعنى هاضطر انزل الوين امب الاول وبعد كدة اعيد كل الخطوات
بس بجد والله الف شكر يا فاتيما
انا هارجع للبوست ده تانى بعد ما حمل البرنامج واحول كل الاغانى اللى عندى للوين امب

بس مقلتليش دى موسيقى لعمر خيرت مش كدة
طب اسمها ايه

سلام
خيخة

معلش يا فاتيما
ماكنتش قريت البوست لحد الاخر كنت توقفت عن القراية اول ما لقيتك بتقولى mp3
بس لما رجعت قريته بالكامل
عرفت الموسيقى اللى انتى حاطاها بتاعة ايه
دمى ودموعى وابتسامتى
وانا بقول برضه لازم هتتطلع حاجة حزينة
اصل بعيد عنك محسوبتك تحب النكد موووووووت

شكرا يا فاتيما
اختك خيخة

ههههههههههه ايه الشطاره دى يا ام يوسف افندى رفعتى العلم بس حلو المعلومات بجد انا بريح دماغى واشغل الريل ببلير عندى فى المدونه وخلاص واغير براحتى بس تسلم ايديك يا ريس

ام يوسف الغالية
بجد تنفعى ميس انا انتبهت قوى للشرح
وكانى فى مدرسة ابتدائى بس تعرفى لو المدرسين بيشرحوا زيك كده كنا بقينا عباقرة بجد
بس بجد برافو عليكى وميرسى على المعلومات الجميلة دى وخفة الدم العالية
وبعدين سووو مش بياكل اليومين دول عامل رجيم ومش بيجيب معاه غير 150 سندوتش بس هههههه
تحياتى
خالد

sally
إنتى اللى جميلة و الله
و إيه رأيك أنفع مدرسة موش كدا ؟؟
و نضام القر دا آخرته إيه
نقوا عليا لما تخلونى أبطل كتابة بقى و تزعلوا و تعملولى نداءات
أستحملوا خلاص
و ميرسى يا حبيبتى على التاج هروح أستلمه بس هجاوب عليه بعد البوست الجاى اللى هيكون ليوسف
و من قبلها بقول موش عاوزة نق على الواد

واحدة مفروسة
يا فندم إحنا جنب خفة دمك و لا حاجة
و إنتى بس تلاقيكى أستحضرتى النموذج التقليدى للمدرسات اللى كلنا تقريباً عاصرنه فضحكتى
و الحمدلله البوست مفيد اهو
طب دنا كنت فاكرة إن الوصف هيبقى مبهم و صعب ...
يا ستى أى خدمة و إنتى تشاورى و أنا أقول علطول ...
سلمى على صاحبتك و ربنا يكرمها هيا كمان و تستفيد من نكش الفراخ بتاعى

بنوتة مصرية
معلش يا رودى صاحبتك برضو اللى قاعدة جنبك فى التختة
حبوا بعض
و بكرة كل واحد يجيب حاجته معاه
و تجربيها ليه يا رودى مانتى يا بنتى مشغلة الريل بلاير يعنى كله تمام أهو
أشكرك يا رافعة من معنوياتى دايما
ميرسى يا حبيبتى و صباحاتك كلها فل

أهو ده عيبه
يا بيبو أنا جربت الموقع اللى قولتى عليه ده هوه و كل المواقع المشابهة اللى البلوج سبوت ذات نفسياته قال عليها فى التعليمات بس مفيش فايدة
و فى الىخر أتكعبلت فى الموقع دا صدفة و ربنا كرمنى ...
الحكاية دى مثال على إنى و الله بييجى منى و لو بعد حين ...
يعنى طولوا بالكم معايا و انتو تشوفوا آخرة صبركم خير إن شاء الله
و بعدين محبتش أطلب من حد موش ألاطة و لا حاجة بس تقدرى تقولى عند مع نفسى
يعنى أنا هعرفها يعنى هعرفها و بعدين أنا فاضية بما يكفى إنى أدور و أتعلم أعمل الحاجة لوحدى مدام الوقت يسمح بدل ما اطلبها من حد ميكونش فاضى يفهمنى او يدلنى ...
و صحيح خدت وقت طويل بس أهو الواحد بيتعلم و بينفع غيره و ياخد ثواب
ادعو ليوسف بقى عشان هوه السبب لأنى كنت عاوزة أحط غنوة وردة مخصوص ليه و دا السبب فى اصرارى على التعلم
هوه و مفيش غيره
كل شىء يبدأ عنه و ينتهى برضو
تحياتى يا بيبو يا جميلة

رئيس جمهورية نفسى
يا محمود يا مشجعنى دايما
الموسيقى بتاعة منصور الرحبانى و وصلتلها بأعجوبة موش لاقيه أى موسيقى للرحبانية على النت خالص لقيت دى بالعافية و الحمدلله أصل ليها ذكريات عندى و أرجو تكونو مستمتعين بيها زيى و أشكرك من قلبى يا ريس

د.زين الغالى
يا خراااابى
دكتور زين الفيلسوف الكبير
و أحد أباطرة تكنولوجيا المعلومات فى مصر و العالم العربى
بيقول إنه بيغش منى ؟؟
دنا ماما دعيالى جامد النهاردة عشان أسمع الكلام الحلو دا ...
و يعنى اللى كنت متوقعاه حصل ..
توقعت إنك هتحط غنوة لعلى الحجار
بس موش يا مصرى ...
لأ ...
واحدة تانية
عموماً خليها عليا المرة الجاية هحط غنوة لعلى مخصوص عشان حضرتك
و تحياتى يا فيلسوف

سهى زكى
القلب الكبير قوى
إيه دا ؟؟
طب موش كنتى تدينى حتة من الشندوتش و أنا أفوتلكم ...
يعنى ما هو الواحد يشرح بهدوء أزاى و هوه على لحم بطنه ؟؟؟
طيب المرة الجاية اللى هياكل من غير ما سقاسمنى هيتذنب على الحيطة و يرفع إيديه لحد البوست ما يخلص ...
و معلومات مخابراتية إيه يا سهى أنتى عاوزة تودينى فى داهية ؟؟
لا سر و لا حاجة
و يا حبيبتى أنا شغلت البلاى ليست من شهر تقريبا طب مسألتيش من بدرى ليه و أنا كنت عملت البوست دا ساعتها ..
أى حاجة تعجبك فى تقنيات المدونة و موجودة عندى أسألينى ...
لأ أنتى أبعتى أمر و قولى
دا إيه
و أنا اجاوب على عينى يا ستى
و سلمى على نهى الجميلة

وليد يا راعى الملك
يا رايق إنت
و لامم المسائل كلها فى كام سطر
الله ينور عليك يا شيخ
و يخليلك بوبو و عمر

خمسة فضفضة
و عليكم السلام
إيه يا فضفوضة ؟؟
بقولك قصور فى اللغة تقوليلى الجامعة الأمريكية ؟؟
أدرس هناك !!!
أنتى عاوزة تبوظى سمعة البلد
إنتى شكيلك من القلة المندسة اللى قالوا عليها فى بوست آبى و لا إيه ؟؟؟

الله الله ياطمطم
ده أول درس خصوصي أخده ومادفعش فلوس
تسلم ايدك ياحضرة الدكتورة الأستاذة الموسيقارة الجبارة
أنا هاذاكر كويس وأعمل الواجب
تحياتي ياقمر التدوين اللي دايما بدر في تمام الكمال

:)

بت يا خيخة
بتحبى النكد ؟؟
و مين سمعك
أنا أصلاً اللى ماسكة توكيل النكد ..
الموسيقى حلوة جداً و ليها ذكريات عندى فبحبها و حبيت أسمعهالكو كمان
و معندكيش وينامب ؟؟
إنتى عكس الناس كلها اللى غالبا معندهموش الريل بلاير و عندهم الوينامب لأنه الأقدم ...
بس تنزيله من على النت سهل و موش هياخد منك وقت
و كمان الأغانى هتلاقيها فى مواقع كتير بصى فيه موقع مميز بحبه قوى أسمه موالى
http://www.mawaly.com/
بيجيب أغانى نادرة و قديمة كنا بنسمعها زمان و ناس زى عمر فتحى و الفور إم و حاجات كدا من زمااان بتاعنا
هتلاقى أغانيه وينامب أنا دايما بلاقى عنده حاجات حلوة
و تحياتى يا نونو حتى نلتقى ان شاءالله

آبى
يا أحلى كوكب
سيبك من البوست و قوليلى إيه رأيك فى آخر سطرين ؟؟
عرفت أتقمص الشخصية كويس
طبعا عمرى ما هاجى نصك بس الواحد حس بسعادة و هوه بيقلدك ...
ربنا يسعد قلبك يا أبى

خالد
همس الاحباب
150 شندوتش و موش راضى يدينى حتة !!
طب قولى يا خالد المعلم يشرح كويس أزاى فى ظل الظروف الصعبة و المعقدة دى و النبى ؟؟
أرجو بجد يكون البوست أفاد الناس اللى بحبهم بجد و نفسى أعمل حاجة قصاد ألف حاجة بيعملوهالى
ربنا يخليكوا ليا
و سلامى لهمس و قولها طنط فاطمة العيال نرفزوها و خلوها تدعق جامد

ميومة البهية
يا حبيبتى
أنتى تؤمرى بس
و كمان شوية هجمع الكراسات
و أصحح
وأما نشوف مين هيروح البيت بكحك
و مين يومه هيعدى على خير

تصدقي بالله انا من يومين سجلت ف اتوكي ده ووصلت للبتاعة الزرقا اللي بتقول ان التحميل شغال وفكرت اسالك بس تراجعت.. والله ولا ليكي عليا حلفان ان ده حصل عموما نص المنهج كده انا عملته لوحدي النص التاني هاكمله -يبقى كده الحساب نص شهر بس ..!!
عموما متشكرين يا ستي وواضح اننك محترفة بس بتخافي م الحسد....
شكرا يا سعادة اللوز
حضونةوفيتامينه
زيانور

طيب مهو يجي منك اهو خلاص اشتغلي مدرسة بس بلاش مدرسة كمبيوتر علشان انا مفهمتش حاجة ... انا بهزر طبعا بالعكس شرحك جميل جدا بس انا اصلا عامل اغنية عندي بس تشكري ممكن امسح الاغنية بتاعتي واعمل الطريقة بتاعتك على فكرة

تحياتي يا بتاعة المدرعات

اختى العزيزه ام يوسف
تقريبا على موقع سالميه فى جزء لموسيقى الرحبانيه ان شاء الله ارجع من المكتب واجيب ليكى اللينك

تسلم ايدك ياروح قلب ماما
انا فعلا كنت بدور
على اغاني ارفعها بنفسي
علشان احطها في المدونه
وتشتغل
اشكرك على التوضيح والشرح
mrgkiller2020

انا فيرى فيرى شكرا يا ام يوسف
ومش عارف اقولك ايه
لكن ايه بقى الحكايه بالظبط ؟؟؟؟
عماله تشرحى برتقالى واصفر وبروفيل وصفحه الويب ايه القصه ؟؟؟
هو ده برنامج انتخابى ؟؟؟؟؟؟؟

شكرا يا فاتيما والله كنت تايه فى الموضوع ده

اختى العزيزه ام شريف
حتدخلى على موقع سالميه ومن مجموعات الاغانى تختارى منوعات غنائيه
وبعدين المجموعه التانيه فى المجموعه التانيه حتلاقى الحان لزياد رحبانى ولو لقيت حاجه تانى حبلغك

حماتي انا طبعا الالفه الاولي هنا
بتقولي ايه جايبه صفر مش ممكن
لا ماليش دعوه هي كوسه بقي
لازم تطلعيني الاولي امال حماتي ازاي
جميله الشرح ياقمر بس انا بشغل علي الريل اريح بقي

اكلك منين با بطه؟؟؟
تعليقات البوست ده مش هنا انا لقيت النتيجه فى كل المدونات!!!

دي وصفه سهليه
دي وصفه هايليه
:)
عملتها ونجحت لاخر خطوة ان كل امتدادات الاغاني اللي عندي رام
مش عارفه بقا الموسيقي
اللم بي ثري دي
تتجاب منين
يعني لحد براوس ووقفت
لو عندك موقع بقا موسيقي واغاني توافق مزاج عم اي توكي ده يبقا ثانكس

صباح معطر بالورد والياسمين
حعلق بسرعه عشان عندى شغل كتير بعد عودتى من الاجازه لانى كنت واخده اجازه من الشغل برده عشان الامتحانات
الموسيقى جميله جدا وعلى فكره ديه من مؤلفات المؤلف الموسيقى الياس رحبانى تقريبا كده ابن فيروز وايضا موسيقى دمى ودموعى وابتساماتى من تاليفه وموسيقته عموما جميله جداااا وايضا زياد رحبانى من الرحبانيه موسيقاته مميزه جدا والياس رحبانى له كتير من المقطوعات الموسيقيه اللى فعلا فوق الجميله

على فكره باذن الله ححضر حفله التوقيع مدونات مصريه للجيب يوم الخميس واتمنى اشوفك هناك

تحياتى

زيانور
محترفة!!!
و الله بتحبينى و بتجاملينى بالقوى
يا امول بقولك قعدت تلات شهور أنشنن و فى الآخر جت صدفة
او رحمة من عند ربنا ....
المهم كملى النص و لا الكل
المهم تشغليه عندك و أسمع إختياراتك هيبقى شكلها إيه
اكيد هتكون مميزة زيك
و بوست نور يجنن
دمتى لى يا غالية

hero
لا يا سيدى خليك فى بتاعتك
انا حاولت أعمل الريل بلاى دا و فشلت ..
بس هو طبعا أفضل لأن نادرا ما تلاقى أغانى mp3 على النت ...
و تحياتى لآية

رئيس جمهورية نفسى
ميرسى يا محمود منحرمشى منك هروح حالا أشوف الموقع و اجيب الموسيقى الحلوة كلها
متشكرة جدا
يا عزيزى

long distance
ميرسى يا باشمهندس
و أتمنى تنفع معاك و تشغلها
و تسمعنا احلى أغانى
تحياتى يا مستر جى كيلر

عبده الرايق
يا باشا منورانى و الله
و بعدين أنا ماليش فى الأنتوخبات دى خالص خالص
أنا بعمل البوست دا لله فى لله
و بصراحة اكتر بعمله لأن يوسف كان السبب فيه
و حبيت حد غيرى يستفيد منه و يدعى ليوسف

سنوهى
طب الحمدلله
يللا ورينا الشطارة و شغله

mayada
إيه دا ؟؟
الريل بلاى !!
خيااااانة
طب موش كنتى تقوليلى و تعلمينى ؟؟
مااااشى
مردود لك يا قمر لما أبقى حماتك رسمى
و تحياتى يا قاف ميم

dodda
و النبى إنتى دايما مديانى برستيجى جامد كدا لدرجة مخيفة
أيوه
خايفة تتصدمى فيا لما تشوفينى يوم الخميس و تحبطى ...
بس أنا حذرتك أهو
عشان متتخضيش ساعتها
تحياتى يا جميلة
و لما أشوف عملتيه عندك و لا لسه

بنت القمر
بجد الوصفة سهلة ؟؟
طب الحمدلله
بصى يا قمورة
الموقع دا فيه أغانى mp3 كتير
ربنا يسهل و تلاقى طلباتك هناك
http://www.mawaly.com/
و تحياتى يا حبيبتى
...
إيه دا ؟؟
بس إنتى عندك ريل بلاير

فاطيمااااااااتاااااااا
الله ينور عليكي
تسلم إيديكي
ست بيت بصحيح
بس كان نفسي تملي الأوضة ميه عشان أنا بموت في الشوربة

ارابيسك

حسن يا فنان يا كبير
معلشى
ما تزعلشى منى
ملقيتش صفحة الشوربة فى كتاب أبلة نظيرة
و أضطريت آخد من اللى تحت الحوض
و بالهنا و الشفا على قلبك
و مزوغ فين الأيام دى ؟؟؟

http://www.boomp3.com/
ياحبيبتى استخدمى الرابط دة فرفع الاغنية او المقطع اللى عاوزاة وابعتية للمدونة وكلها خطوات بسيطة وعادية اسهل من اللفة الطويلة دى
ماهو ياهانم لو كنتى بعتيلى تلفونك ولا ايميلك كنتى سألتينى انا استاذة فالكمبيوتر ومش بسأل البت البتنجانى ابى ولا حاجة
والله هى اللى قايلالى ع كل دة
وحشتينى ياريت اشوفك الخميس
واة انتى اللى بتعملية شغل عيال ع بلاطة عشان ياهان المدونة دى معمولة عشان انتى تكتبى وتطلعى اللى فقلبك واحنا نبقى جنبك
قال تقفل التعليقات قال
تحياتى يا حبيبتى

اختى الحبيبة:رغم انى ضد الاغانى على المدونات ولكن بجد احييكى على المشاركة بما تعلمتيه فمشاركة الاخرين لخبراتنا ومعلوماتنا بيبعث على التعارف الابدى
تعرفى لو اشتغلتى مدرسة هتبقى عسولة اوى وبتقولى يوسف ممكن ينساكى ازاى يابنتى ده كلمة منك باسلوبك ده كفيلة انها تفضل محفورة بالذاكرة
دمتى بخير وسعادة

ميرسي ع المساعدة الي مطلبطهاش منك
ميرسييييييي
يا ميس

تسلمي يا فاتيما على معلوماتك المهمة دي

ربنا يبارك لك ويوفقك لكل خير يارب


تحياتي

مدونات مصرية للجيب  

لا تننسوا الخميس 22/5
الساعة السادسة والنصف مساء
حفل توقيع العدد الاول من سلسلة مدونات مصرية للجيب
بمكتبة عمرو بوك ستورز
شارع طلعت حرب
فوق مطعم فلفلة
--------------
اماكن توزيع العدد :
1- عمر بوك ستور شارع طلعت حرب
2- مكتبة البلد امام الجامعة الامريكيه
3- سندباد وسط البد خلف مكتبة مدبولى
4- سنابل شارع شريف
5- الهيئة العامه للكتاب فرع الزمالك
6- مكتبة ديوان الزمالك
7- مكتبة ديوان مصر الجديده
8- مكتبة أفاق شارع القصر العينى
9- المكتبة الدوليه مدينة نصر ش الطيران
10- كشك جرايد كوفى الامريكين - الاسعاف
11- كشك جرايد الجامعه الامريكيه
روابط الفيس بووك والمدونة :
http://www.facebook.com/group.php?gid=13820826455
http://sneen.blogspot.com

كلاكيت تانى و تانى
ماشى يا نرمو هروح أشوف الموقع دا وأعرف إيه الحكاية ...
معلشى مسألتش أصلى عارفة إن فيه حد ممكن يبقى مشغول أو حد مبيعرفش يشرح لحد كدا يعنى ....
و يا ستى هشوفك إن شاء الله الخميس
و ربنا يسهل

monalisa
ليه كدا بس ؟؟
مبتحبيش تشغلى أغانى ...طب ما فيه أغانى دينية و روحانية برضو او حتى الموسيقى الصرفة بلا كلمات ...
عموماً كل واحد و قناعاته
و كما يحب
و أنتى شايفة إن الكلام اللى بقوله ممكن يكون فى دماغ يوسف و ميطلعش ؟؟
طب يا رب يسمع منك و تكون هيا دى الحقيقة و يفتكر كلامى و تحذايراى
أنا مبقولش إنى يعنى مثالية و كدا بس كنت حريصة يكون شخص مميز
و يكبر و هوه كدا
تحياتى يا مونمون

سدورة
كده
طيب
اما أشوف هتعملى الواجب صح
و الا أبعت حد يجيب العصايا من الفصل اللى جانبينا
تحياتى يا جميل

صاحب المضيفة
العفو يا فندم
بس عالله تبقى مفيدة فعلا لكل حد
و أى خدمة أنا أتمنى اعمل ليكو أى حاجة تعبر عن مدى حبى و امتتنانى لكيم

أصلاً أصلاً
أنا آخر واحدة يتبعتلها التنويه دا
اللى بتكلمك دلوقتى موش فاتيما
دى واحدة غيرى
حالياً
أنا فرافيروا
يعنى
أنا جااااااااااى

واد يا سوووو سيب الشندوتش دلوقتى و كوله لما تيجى الفسحة
--------------
ههههههههههههههههههههههه

لا مش هخلي حاجه للفسحه
جعان بقى


ملحوظه
انتي هايله بجد لاني وبالرغم من ان بقالي فتره وفاكر نفسي الشاب الفت الهت الست .. ماكنتش عارف ازاي اعمل الحوار ده



سلاموووووووووز

سووووو
أخويا الغالى
بجد يا سوووو و لا بتجاملنى ؟؟
يعنى عرفت أشرح يا عيال ؟؟
طب الحمدلله
و بلاش حتة من الشندوتش خلاص
أنا كلت تورتة يا عم الواد اخويا جابهالى مخصوص ...
تاخد إنت قطمة ؟؟

الله الله .. مدونتك رائعة بحق تحياتى لك وشكرا جزيلا لمعلوماتك القيمة عن الموسيقى .. بانتظار تشريفك مدونتى دخل الشتا .

شكرا لك ِ على مقالتك ِ وتعريفنا بهذا الموقع ، وإن ظهرت لى اخطاء في تحميل الصفحة منعتني من الإشتراك أظنه معطل !

تحياتي لك ِ ولخفة ظلك ِ في الكتابه ..

محمد إسماعيل سلامه

إرسال تعليق