.

.

حـاجـاتـى  

Posted by: فاتيما in

عندى لعب و حاجات كتيييير قوى
كنت بلعب بيهم مع القطط بتاعتى و العصافير
و بعدين بقيت بألعب بيهم مع ولاد خالى
كان نفسى أخد الحاجات كلها معايا المدرسة
بس ماما قاللتى بلاش عشان متضيعيش
و كمان عشان منجرحش مشاعر الولاد التانية اللى ممكن ميكونش باباهم و ماماتهم
معاهم فلوس كفاية يجيبولهم بيها لعب زى بتاعتى
فالولاد تزعل و تتضايق و أبقى أنا السبب و ربنا يزعل منى
عندنا دلاوب فى الحيطة تيتة قالتلى إنه مخصوص عشانى
أحط فيه لعبى و حاجاتى
لما جيت مع ماما نقعد مع تيتة قعدنا نرص الحاجات فى الدولاب سوا
و هيا دى ممتلكاتى
دبابديبى و أرانيبى و عرايسى
نوتى - أنوبة و إبنها - ميكى و ميمى - مانكى توتو - بوتة - حسونة - موزة - كلوب - هادى - دباديبو
ألعاب ماكدونالدز
يووووه كتير و أغلبها شخصيات أفلام الكارتون اللى بحبها
و كمان عشان بتفكرنى بالحفلات بتاعتهم اللى بيعملوها
كل يوم جمعة وسبت و كنت بحب أروحها عشان بقعد ألعب مع الولاد فى المتاهة
كروت يوجى
بحب يوجى و المبارزات بتاعته و حافظ كل أسامى الوحوش و بحب أجمع فى أشكال الكروت كلها
دا غير لعبة الكمبيوتر بتاعته و بتاعة جوى و ساعات كنت ببدل فى الكروت المتعادة مع أصحابى
فوانيس رمضان
كل سنة تيتة و جدو كانوا بيبعتولى فانوس جديد و اقعد أشغله جنب التليفزيون
عشان بيغلوش على الشاشة و اعاكس ماما و هيا بتتفرج
السنة اللى فاتت رصيتهم جنب بعض و شغلتهم كلهم سوا ماما قعدت تضحك
و تقولى إننا دلوقتى كأننا فى حتة إسمها شارع السد كانت
هيا و تيتة بيروحوها زمان يشتروا منها فانوس رمضان لخالو ماجد
أقنعة و وشوش
بحب الأقنعة قوى و بحب ألبسهم و اتنكر فى شخصيات كتير و كمان عندى ألوان للوشوش
بلون بيها وشى وقت ماتشات الكرة عشان أشجع
الأهلى و بلبس فانلته و أقول جوووووووون
كتبى و مجلاتى
عندى قصص القراءة للجميع بتاعة دقدق و بكار و كتب تلوين فظيعة بعتتها تيتة
و كتب تانية أشتريتها مع ماما و كمان مجلات
و لما رجعت هنا لقيت مكتبة جدو مليانة مجلات ميكى و ماجد و أستريكس و أوبليكس
و تان تان و سوبر مان
و يووووه حاجات كتير قوى كانت بتاعة ماما و خالو و خالو لما كانو صغيرين
و تيتة قاللتلى دول بتوعك دلوقتى أقعد أقرى فيهم على مهلك و هزودهمولك كمان
عشان القراية مهمة و ممتعة وماما كمان تبقى امينة مكتبة
يعنى عيب قوى مطلعش بحب القراية
و أنا قولتلها صح
أدوات القتال
عندى سيوف عادية وواحد بتاع زورو و بلطة و درع و مسدسات و سهم و قوس و دبابات
و عربيات كتيييير و عساكر و محاربين
حاجات صغننة
عندى ميداليات كتييير عشان بحب اجمعهم و موبايلات بتغنى أغانى ماما بتقول عليها هابطة
و ميكانو بعمل بيه أشكال كتير
و ميكانو بتاع خالو ماجد فيه صامولة و حديد عملته مرة على شكل راديو و كده
ديسك توبى
عندى على الكمبيوتر 63لعبة بس اكتر ألعاب بحبها يوجى و طرازن و هيركليز
و كيف تزعج جارك و هارى بوتر و كرة القدم الفيفا
اللى ماما دايما تقول عليها فيفا عبده و كل العاب الجيم هاوس اللى فى الموقع بتاعهم
أدوات مكتبية
عندى ألوان خشب و فلوماستر و ألوان ميه و شمع و كراسات يعنى عددها كميات فظيعة
برسم فيها و اعمل قصص و ألونها و رسوماتى بتعجب كل حد
و عندى برايات و أساتيك و مساطر و إستيكرز بأشكال حلوة و مقص مخصوص لوحدى
قطط و عصافيرى
كان عندى قطط كتير سيامى و بلدى و رومى زى أوشه - طأطأ - توتوس - عفروتو - تيتو - زوزو
و عصفورتين رجعناهم للراجل أسمهم سوسو و فوفو
حصالتى
عندى حصالة و اتفقت مع تيتة تعملى الشهادة التمويلية - أنا سميتها كدا - و سبت الحصالة
عشان تيتة و ماما تزود الفلوس فيها و لما أرجع الاقى فيها ميت جنيه خمسين جنيه
مليون جنيه كدا
حاجة كمان بتاعتى بس محدش بيشوفها كتير
نجمة فى السما إسمها نجومة ...
ماما قاللتلى الفضاء مليان نجوم بالهبل و كل واحد فينا من حقه يكونله نجمة فى السما بتاعته
و تكون ملكه محدش ياخدها منه
و البنات نجمتهم لونها بيبقى دهبى و الولاد نجمتهم لونها فضى ...
و لما نخرج البلكونة بليل ببص لفوق كويس و ادور عليها
وبشاورلها و اقولها متشكر يا نجومة
عشان جاية تطمن عليا فى وقت متأخر زى دا ...
ممممممممم
إيه تانى ؟؟
موش عارف فيه إيه تانى ...بس ماما قاللتلى قبل ما امشى
إنها هتخلى بالها من حاجاتى
و موش هتديها لحد خالص
و هتحافظ عليها لغاية ما أرجع ألعب بيهم تانى عشان المكان عند بابا ضيق و موش هيكفى
آخر يوم كان نفسى أروح ماكدونالدز بس منفعشى عشان الزحمة و القلق ...
ماما طلبت وجبة هابى ميل بالتليفون
و لقيت اللعبة بتاعتهم على شكل نحلة تبقى شخصية من شخصيات فيلم جرافيك ...
أسم النحلة بولين
و أنا قولتلهم فى البيت يخلوا بالهم من بولين لحد ما أرجع
سبته فى العلبة بتاعته اللى على شكل خلية نحل و نيمته جوا و غطيته
و حذرت ماما وتيتة بلاش كل شوية يخبطوا عليه
و يفتحوا عليه العلبة
لحسن يتنرفز و يطلع يقرصهم
عالله يفتكروا بقى

This entry was posted on الأربعاء, مايو 21, 2008 and is filed under . You can leave a response and follow any responses to this entry through the .

62 كــــلام بيطــبطـــب عـــلى قــــلبى و روحــــى

كأنك بتتكلمى عن ابنى
اكيد هو و يوسف هيكون اصحاب اوى ان شاء الله
و مش عارفة اشمعنى ماكدونالدز اللى بيحبوه اوى كده مع ان فى محلات تانية كتير بتقدم العاب و فيها بردو منطقة العاب

اما اليوجى ده فبينى و بينك حاولت افهم بيتلعب ازاى معرفتش ابداااااا

ان شاء الله يلعب بهم قريب تانى و يزودهم كمان و كمان

فاتيما ربنا يخليهولك و يردهولك بالسلامه اول مره اعلق في اي بلوج مع اني بقراهم كتير

بس كده علي فكره مع انن ناس كبيره كده و انا شخصيا مخطوبه عندي ششويه حقد علي اللعب و المجلات دي كلها

يدوبهم في صحه و سعاده ان شاء الله و تجيبيلو غيرهم كتير

انا قريت البلوج بتاعك كلو في ساعه تقريبا معرفتش اسيبو الا لما اقراه كده و لعلمك مع كل الي حاصل ده انا متفائله جدا ان ربنا هيكرمك لانك بتراعي الناس في غيبتها و بتكلميه علي باباه كويس فالي يراعي ربنا اكيد ربنا هيجازيه كل خير
انا بتاعة مكتبات زيك علي فكره وعموما العباقره الي زينا رايهم لا يمكن ينزل الارض ابدا

اسمع عنكو دايما كل خير

ربنا يخليك ليه ويخليه ليكى ويردو لحضنك فى ااقرب وقت يارب
كان فى كلام كتير وطار

روح قلب أبو خالد /يوسف و أم يوسف
من البوستات الماضية فهمت أنك أغلقت
باب التعليقات و حاجات زى كده
أوعى ..أوعى أنتى فاهمه
أولا ما شغلنى عن مدونتك الأيام الماضية
كان غياب فرنسا و إبتعاد شيرين
فكنت فى غاية الحزن..
لأننى أشعر أننا جميعا أصبحنا أسرة واحده وما يصيب أحد منا يؤثر فى الأخر
لذا يافاطمة لا تغلقين شئ لأننا نفرج عن أنفسنا جميعا فى هذة التعليقات
و أيضا لأنها تواصل إنسانى جميل..
فاتيما و الأفضل فاطمة:
أما عن كلام يوسف ففى تعليق سابق
لى تخيلت كم أنتى تهتمين بكل شئ من رائحته ..ربنا يرجعهولك يافاطمة و
تقر عينك به قريبا إن شاء الله
دمتى روحنا جميعا

ياسيادة اللوا الفريق الطيار أفهم من كده أن يوسف لايفارقك أبدا بلعبه ورائحته وملامحه وكلماته وحركاته وضحكاته وقفشاته وتسللاته ولغته وملابسه وعالمكم الخيالي ..
تركيبة العلاقة بين الأم والإبن أو الإبنة لما يكون بعيد عنها..شكلها كده أسوأ شئ في الكون، الجميل اللي انتي عملتيه إنك خليتيها أحب شئ في الكون للناس اللي بتقرالك..عموما يعني ذكرياتك مع جو..هي الحياة.. الحياة التي تتداخل مع الحياة الحقيقيةالتي لاتحتمل..
الخيال هو الذي يجعل حياتنا تحتمل.. صباح الفل عليكي وعلى جو!!
خالص محبتي

لعبك يا يوسف جمييييلة وأحلى حاجة فيها إن ماما عارفة تحافظ عليها وتنظمها وفتحت نفس الواحد يرجع عيل صغير...ماتخافش عالنحلة في الحفظ والصون
........
طمطم بلاش موضوع قفل التعليقات ده انا مع أبو خالد تضامنا قلبا وقالبا
تحياتي
:)

يختي عسل .. والله ما شاء الله عليه ..

عارفه نفسي في ايه .. نفسي اجيب يوسف وسط اللعب ديه واقعد العب معاه واغلس عليه .. اصل انتي عارفاني غلس .. وبستمتع جدا وانا بشاكل الاولاد .. بقعد اخد اللعب واجري بيها ..

ربنا يخليه .. وتجبيله كمان وكمان
:)

ربنا يخليه يارب ويرجع لحضنك

وان شاء الله اجى العب معاه بالحاجات دى اللى اغلبها مكانش موجود ايامى :)

احنا اتكروتنا قوى فى الطفوله بس ملحوقه ، ده اذا كان يوسف يستحمل واحده عيلة زيى

تحياتى يا احلى فاتيما

صباح معطر بالورد والياسمين
انا قلت اصبح عليكى وانا بقرا البوست دلوقتى وانا بشرب الكابتشينوا ولى عوده للتعليق بس زعلانه منك فى حاجه صغنطوطه انت نسيتى تردى على تعليقى فى البوست السابق نسيتينى فى زحمه التعليقات ...وش بيعيط

تحياتى

انا بس جايه اطل عليكى واقولك عاوزة اشوفك بكرة فى حفل التوقيع يا ريت تيجى
وتعليقى على البوست بقى
شليهم له علشان انا عارفه انه هيرجع قريب قلبى بيقولى

وحشتنيى جدااا ...ومعلش كنت بعيدة عنك الفترة اللى فاتت بسبب انقطاع النت ومروحة البروسيسور وقفت وحلفت ما هى دايرة...بس الحمد الله تعافينا اليوم
بس أجى الاقى انقلاب فظيع..اغلاف ..ورفع التعليقات...

انت فعلا زى كا قال دكتور زين خلتى الفراق اللى هو حاجة صعبة وبتوجع الى شىء جميل بحب نلتف حوله معاكى...وبنفضفض عن نفسنا
وعلى فكرة أنا من الناس اللى هأحبط جدااا لو قفلتى المدونة وهأضرب عن التدوين ودى مش مجاملة ..دى حقيقة

ماشى ...وبعدين نسيتينى....
حاجات يوسف تجنن والفضل لفاتيما

تحياتى وممممممممممواه

فاطيمااااااتاااااا
ايه ياستي ده
انتي قعدتي تعصري فينا تعصري.تعصري
لما قلبتي ذكريات الطفولة الجملة كلها وفكرتينا بلعب لها ذكريات عندنا مش بالضرورة هي ولكن لعب شبيهه تخيلي حتى اللعب واخد مساحة في الوجدان والذكريات وكل ده كنا على طول بنسترجعه اثناء شراء اللعب لأطفالنا أكبادنا حلم الليل والنهار
نسترجعه وهما بيلعبوا ومجرد يخلصوا رجعوها مكانها
أنا بقا في المواضيع دي عيل قوي اقعد العب مع ولادي ومع ولاد اختي بلعبهم وبكون اعيل منهم ولازم اخد حقي قوي في اللعب
بكرة ان شاء الله تشوفي ولاد يوسف وتفتكري مابك للعب يوسف وينطبق الآمر أيضا وقتها على يوسف
هكذا الأيام
اشياء كثيرة لم نشعر بهاصغاراً لكننا أدركناها كباراً أباء وأمهات

بقولك معاكي السلم والتعبان
ارابيسك

انا كمان عندى العاب ماكدونالدز وعندى دباديب كتيييير ودبدوب كبييييييير طولى كدا بس ويله يا سواد ليله اللى يقرب منها من اطفال العيلة لما يجو عندنا
ايه بس بقى مش تضحكى
هو انا كدا حاجتى محدش ينفع يجى جنبها خالص خصوصا العابى المفضله
:(

انا راجع تاني اعلق
بس احب انوه لسيادتك ان ليكي تاج عندي
ارجو استلامه واجابته لو ماكنتيش جاوبتيه قبل كدة
تحياتي

ده فى كمان مفأه عشانك يا يوسف
ماما جبتلك صحاب كتيييير بيحبوك اوى كلهم مستنين رجوعك بالسلامه
وكلهم حيلعبوا معاك
حنعمل حفله كبيره عشانك

بحبك يا روح قلب ماما وبموووت فى ماما
وموضوع النحله متقلقش منه كله تحت السيطره.

فاتيما معلش سؤال بس لو مفيش ايتها ازعاج

ازاى بتحطى الريدر على المدونة، قارئ المدونات ده

ارجو الافاده
مقدمه لسيادتكم/ راجى عفو الخلاق الاسطى عبد ربه الحلاق

بقولك ايه يا واد يا يوسف انا هاجي العب معاك
هجيب شوية البلي اللى عندي وعندي كمان فوريره او نحلة زي ما بنقول عليها
ونلعب دور سوبر ماريو على الطاير ونشوف مين هيوصل للقلعة الاول
ده طبعا بعد اذن ماما فاطمه وبعدين هي هتبقى الحكم

فكرتيني بنفسي وانا صغير يا
روح قلب ماما
بجد كان عندي العاااااااااب كتير اوي اوي
ربنا يخليلك يوسف
حبيب البي
ويلعب بيهم دايما
شكلي كده هلعب معاه واجيب انا كمان
العابي ونلعب مع بعض
mrgkiller2020

الله عليك وعلى لعبك يا سى يوسف
المهم حافظ على العساكر والدبابات والطائرات بتوعك احسن نحتاجهم فى غزو ماكدونالز قريبا
احسن انت عارف انا عندى همس كل لعبها عرايس وكده ما تنفعش للغزو
ربنا يخليكى ليوسف وتفرحى بيه وتاخديه فى حضنك عن قريب باذن الله
وخلى بالك من اللعب بتاعته
هو انت مخاصمنى ليه بقالك فترة مش عايز تنورنى
تحياتى وتقديرى

حاجاتك تجنن يا يوسف يا بختك بمامتك اللي مدلعاك جامد ..الا ممكن تتبناني علشان الكتب الكتيييير واللعب الكتيييير دي
انا خبيت البوست عن نور احسن يعملي تحقيق ومش هاخلص الا بوعد قاطع ان ادلعه مثل ما مامتك مدلعاك كده
حضونات وفيتامينات
زيانور

rainbow
ماهو كل العيال على دا الحال
بس بينى و بينك انا شخصياً بحب ماكدونالدز بقعد فيه براحتى و محدش بيغلس عليكى من اللى شغالين هناك
و بيهتموا بحفلات الأطفال و يفرحوهم
قوم أنا أفرح معاه كأنى عيلة زريه
و يوجى دا بقى موضوع كبير يعنى اكبر من مستوى فهمنا إحنا الكبار
بس عشان خاطر عيونهم كل حاجة نجيبها
من غير تحليلات و تفسيرات
و دمتى بكا خير أنتى و إبنك العزيز

emmy
أخ
مانا كنت خايفة من الموضوع دا ؟؟
الحقد هيشتغل على لعب الواد بقى ؟؟
يا ستى بكرة تجيبى عيال و تقعدى تلعبى بحاجاتهم معاهم و تنبسطى
ربنا يتمملك على خير
أتمنى البلوج يكون منكدش عليكى قوى
بس أنا سعيدة بحضورك و بإنى خليتك تعلقى و دا شرف ليا
نورتى يا إيمى

رئيس جمهورية نفسى
يعنى يا محمود الكلام طار راح فين؟؟
أوعى يكون راح معاك المحكمة؟؟
هزعل قوى أصلى متعقدة من المحاكم و المحامين
حتى تلاقينى ببصل لتعليقاتك شذراً كدا و متوجسة منك خيفة أصلى عندى حساسية من مهنة المحاماة ...
بس إنت شكلك هتغير رأيى و هتفكلى العقدة دى و أبطل كل ما أصادف محامى أتحسس مسدسى ...
ألف شكر يا محمود على وجودك هنا و إهتمامك دا
تحياتى الخالصة

أبوخالد
يا راجل يا طيب
معلشى و لا يهمك أنا عارفة إنك كنت قلقان على فرنسا و شيرين و زعلان عليهم ..
بس الحمدلله ربنا يطمنا دايما عليكم كلكم
و خلاص أنا عيلة قوى و أخوخ من خيخة
يعنى رجعت فى كلامى أهو و موش هقفل التعليقات
أنا عمرى ما أستغنى عنكم أبداً
تحياتى يا راجل يا طيب
و فيه أمل إننا نشوفك بكره و لو إنى عارفة إنه بيبقى صعب ؟؟
أنا هروح على امل إنى أقابلك هناك

عارفه يا ام يوسف
الكلام راح فين والله طار مع دموع عنيه قبل ما انزل المحكمه وانا بلعن كل قانون يحرم امها من ابنها اى ما كان السبب عارفه ليه لانى رغم انى لسه متجوزتش بس عارف افتقادك ليوسف لانى بفتقد كتير اولاد اخواتى عرفتى الكلام طار فين
بصى يا ام يوسف والله مش حنكر وحقول لا بس فعلا فى ما بين المحامين نسبه من المحامين اقل ما يمكن يتقال فيهم حسبى الله ونعمه الوكيل بس صوابع ايدك مش زى بعضها
على فكره انا فضلت سنيتن فى بيتنا مستنى اى فرصه بعيد عن المحاماه للسبب ده وخوفا انى ممكن اظلم حد ودعوة المظلوم ما فيش بينها وبين ربنا حجاب بس لما سالت ناس قالولى كلمه واحده بس اشتغل محامى وحكم ضميرك وده الى بحاول اعمله وربنا يسهل
لسه كل ما حاجى حتحطى ايدك على المسدس :D وش بيضحك

بصدق مع كل كلمه بأقرأها بتهزني جدا وبتلمس بداخلي شيء ما ..
تمنياتي بعودةابنك في احضانك في القريب بإذن الله ربنا يرجعه لكي بكل خير وينور حياتك من تاني ..
وتمنياتي لكي بحياة سعيده في الدنيا والآخره ..

د.زين الغالى
و هوه ينفع يفارقنى يوسف لحظة واحدة ؟؟
دنا بجيب سيرته فى اليوم ييجى ميت مرة
و لما يحصل حاجة أقول يوسف لو كان موجود كان قال كدا و لا عمل كدا ...
لحد ما بقيت أحسن إنى بضايق اللى حواليا ...لأنهم موش عارفين يقولولى حاجة غير إن شاءالله يرجع و يقول كدا و يعمل كدا تانى
الخيال ؟؟
دا اجمل نعمة خلقها ربنا يا غالى
إنت عندك ما يبرر ذلك
كفاية روايتك الأخيرة
عشان تؤكد على قيمة الخيال و تأثيره الرائع فينا
تحياتى يا فيلسوف

ربنا يردة اليكى بالسلامة وتلعبو لما تشبعو

اتمنى تكونى بخير

ميرسى يا فاتيما على المعلومات دى كلها وجزاكى الله كل خير

شكر خاص من عبد ربه الحلاق مع تقديم 50% خصم على البواريك الكانيش

فاتيما بجد اتمنى اشوفك بكرة باذن الله

تحياتى يا احلى فاتيما

ميومة البهية
نعممم
بتقولى ليوسف ميخافش على النحلة ؟؟!!
دحنا اللى مرعوبين منها و خايفين نهوب ناحية الدولاب ...
متهيألى إنتى من الناس اللى البوست دا قريب منهم عشان كتاكيتك الصغننين
تحياتى ليك و ليهم

ahmed mubarak
يا واد يا حمادة إنت تنور
تعالى ألعب مع يوسف و هجيبلكو شكولاتة و عصير و ادلعكو آخر دلع
و بعدين نقعد فى الآخر نتفرج على الكارتون لحد ما تناموا منى
ربنا يسعدك و تبقى أحسن أب لأحسن عيال فى الدنيا

اهو ده عيبه
يا بيبو لا إتكروتنا و لا حاجة برضو كان فيه حاجات بنلعب بيها و ننبسط
كنا بنلعب مع عيال كتير من الجيران و الأقارب ...
دلوقتى مبقاش حد يزور حد و يوسف كان مضطر يلعب لوحده و عشان أشغله و ميزهقش كنت بجيبله لعب كتير ...
لو كنت فى ظروف عادية او ليه أخوات أكيد كان معدل الشراء هيقل كتير
بس الحمدلله متحرمشى من الحاجات الممكن شراها ...
و بخصوص الريدر يا حبيبتى أنا عملت ركن فى اول الصفحة الرئيسية للمدونة و حطيت لينك لوضع الريدر فى المدونة جبته من عند أخويا مهند الباحث عن الحقيقة جزاه الله كل خير ...
يا رب ميكونش دا سرقة علنية و لا حاجة و يزعل منى بس أنا بقتبس منه
و هوه ليه كل الفضل
و يا رب كلنا نستفيد
تحياتى يا بيبو

نبوضة
عااااااااااااا
حقك عليا
أنا أسفة يا حبيبتى
مخدتش بالى و الله
معنتش اكررها تانى
وش بيستعطف

آبى
يا احلى كوكب
أن شاء الله جاية و مبسوطة إنى هشوفكم كلكم ...
ربنا سعد قلبك و طبعاً عريسنا لازم ييجى عشان نباركله و نوصيه عليكى
تحياتى يا قمورتى

إيمو
يا جميلة
حمدلله على السلامة
و معلش يا إيمان ساعات الواحد بيحس إنه عبء تقيل على اللى بيحيوهم و بيبقى عاوز ينسحب مؤقتا لحد ما هوه نفسه يتظبط نفسياً
بس خلاص ألغيت القرار دا و ربنا يستر عليكو
و عقبال ما تجيبى حاجات ولى العهد إن شاء الله و يلعب بيهم فى الجنينة المزروع فيها النعناع

حسن
يا فنان يا كبير
ما كلنا كدا ياعم
بنتمسح فى عيالنا و نقعد نلعب معاهم باللعب
أل إيه بنشاركهم لحظاتهم !!!
لاااااا
دحنا بنرجع عيال قدهم و اكتر و نبعد شوية عن العالم الكئيب اللى إتحطينا فيه اللى أسمه عالم الكبار دا
و خدنا فيه مقلب
تحياتى يا فنان يا كبير

قطة الصحراء
يا قطتى الحلوة ما دى تبقى حاجاتك
و الكل يبعد عنها دلوقتى لحد ما ييجى ولى العهد أول قطقوط صغنن و يمسكها يفرتكها و هيبقى على قلبك زى العسل
و تجيبيله تانى و تالت و عاشر
تحرمشى منك يا قطتى

a.samir
ميرسى يا احمد إنك فكرت فيا كدا
التاج دا جالى من سالى حاجات جوايا
و أنت تانى واحد يبعتهولى
يشرفنى يا فندم
و البوست الجااااى طوالى هلبسه
دمت بكل خير يا رب

dodda
مين اللى تحت السيطرة ده ؟؟!!
دحنا غلابة يا دودا
و النحلة دى مربيالنا الرعب
و العيال ولاد أخويا مصدقين بجد إنها نحلة حقيقة و بيخافو يهوبوا ناحية العلبة ...
يعنى يوسف عرف يعمل نظام أمنى محكم أهو
و الله الواد دا تحفة و لذيذ قوى
و الحمدلله عليه
و الحمدلله عليكو أنتم كمان
متحرمش منك يا جميل

لماضة يا طعامة
مرمر يا قمر متجيبيش حاجة خالص
هوه عنده ييجى متين بلية و تلاتة أربعة بى بليد و كل ما يمكنك تخيله بيطلع عندنا ...
أنتى هاتيى نفسك بس و تعالى
يا رب يرجع و دا يحصل بجد
أشوفك بكرة يا قمر

long distance
إيه دا ؟؟
محسسنى و انت بتقول و أنا صغير إنها كانت من خمسين سنة الحكاية دى ؟؟
أومال انا يا محمد أقول إيه بقى ؟؟
دنا عديت مرحلة الطفولة دى من ييجى 25 سنة و يزيد ...
دا غير إنها كانت طفولة مشردة بكل معانى الكلمة ...
و يا سيدى عقبال ما تجيب لولادك يا رب
و تعيش معاهم طفولتك من جديد
تحياتى يا صديقى

همس الأحباب
خالد العزيز
معلشى ماهو العساكر دول مسيرهم يوم يرجعوا بلدهم و يبقو عاوزين يتجوزا
يبقى نجوزهم عرايس همس
و أنا كنت سيادت كفى بوست التاج
يعنى متأخرتش غير بوت وزة و رحت باركتلها فى مدونتها ...
و يا ريت تكون جاى بكرة أن شاءالله

زيانور
يا ستى متهيألك إنك موش مدلعهم ..
طب لمى اللعب و الكتب بتاعتهم كدا جنب بعض و شوفي هيفرشوا السرير كله إزاى و لا ترابيزة السفرة بحالها ..
هتتفأجى صدقينى ...
و ربنا يخليهملك يا رب و تعيشى و تجيبيلهم

رئيس جمهورية نفسى
يا محمود أوعى تكون زعلت
بس أصل اختك شافت عذاب القبر بدرى فى المحاكم ...
بس أتمنى إن المجال بتاعك ميغيركش و يضغط على ضميرك و يضطرك تعمل حاجات تتعبك فيما بعد لما تقف مع نفسك شوية
و لو أن الواحد موش محامى و برضو بيعاتب نفسه عشان محدش منزه ..
أنا بس عشان معقدة نفسيا من الصنف كله
فمعلشى جت فيك بقى
و مسدس إيه ؟؟
دا لو حد رمى جنبى بومب فى العيد بتسرع ...
تحياتى يا ريس

الباحثة عن النور
أهلا بيكى نورتى
أتمنى تكون معرفة خير
و اشكرك من قلبى على أمنياتك الطيبة
و تحياتى الخالصة ليكى
و أمنياتى بالخير لحد ما تلاقى النور يا أسيرة

elgazaly
ميرسى يا فندم
و عقبال ما يجيلك زيه
و تعيش و تجيبله

أهو ده عيبه
يا داليا أنتى تؤمرى بس
و البركة فى مهند الباحث عن الحقيقة
ربنا يجازيه خير عننا كلنا

انت مقلتيش حاجه غلط اساسا يا ام يوسف وكلام جزء كبير منه حقيقى فمش حنكر وربنا يجازى اى حد محامى ضرك وبما انى ناوى اترشح نقيب محامين سنه 2020 ان شاء الله فبقولك حقك عليه انا :D وش بيضحك

جميله أوي التدوينه دي، ربنا يخليلك يوسف ويلعب معاكي تاني بلعبه كلها.

وبعدين معاكم بقي
يعني اجيب للاستاذ يحيي ماكدونالدز منين انا بقي كده الواد يحس انه مضطهد علشان صعيدي
ان شاء الله هيلعب بيهم تاني ويكسرهم وتضطري تشتري غيرهم وافرح انا فيكي علشان الفلوس اللي هتكعيها

يارب يرجعلك بسرعة يا حبيبتى
أقدر مشاعرك جدااااااااااااا
ونفسى يرجعلك بسرعة
على حساب أى حد
ربنا يهدى باباه .. أو حاجة تانية ربنا اعلم بها ..
المهم يرجعلك وتخديه فى حضنك وتنسى كل العذاب واللوعة دى
ربنا قادر على كل شئ
اللهم رده إليها مردا جميلا
اللهم آمين

أختك سالى

الفريق والمشير كابتن طيار فاطمة
نسيت..
نسيت اشكرك على الأغنية الجامدة قوي..أنا هاطلب منك طلب خاص أغاني على عندك mp3لو عندك أو متاحة على النت قوليلي مكانها..لأني مش عارف أكتب.. ومش عارف أشرب ولاآكل ولا أنام..عندي نقص في فيتامين الحجار.. ومنير..وأغاني الستينيات كما الأجنبية..(-:
صباح الفل عليكي وعلى جو..

رئيس جمهورية نفسى
إيه يا محمود ؟؟؟
أنا لسه هستنى لسنة 2020 ؟؟
و بعدين هتبقى نقيب المحامين على سن و رمح و تقولى حقك عليا ؟؟؟؟
أصرفها من أنهى بنك دى ؟؟
طب قولى هشطبهمولك من النقابة
هقدمهم للمحكمة العسكرية
هجيبلك فيهم أعدام ...
موش تقولى حقك عليا ؟؟
و إنت ذنبك إيه يا عم بس ؟؟
كنت أتمنى أشوفك النهاردة بس إن شاء الله خيرها فى غيرها
و تحياتى سا ريس

وجهة نظرى
أشكرك يا عزيزى
أنت غطسان فين بقالك مدة ؟؟
سعيدة أن التدوينة عجبتك
تحياتى الخالصة

أميرة الصعيد
ليه يا ميرو بس كدا ؟
يا ستى لما يرجع الواد يوسف إبقى هاتى يحيى يلعب معه و يوسف يعزمه على ماكدونالدز دا حتى الواد عشرى و بيحب الناس قوى موش براوى زى امه ..
ربنا يخليلك يحيى يا رب
و يبقى احسن الناس
بوسيهولى يا ميرو

د.زين الغالى
يا دكتور العفو أنا أصلاً كل ما أتكعبل فى غنوة لعلى من أغانيه خصوصاً القديمة أفتكرك و أحسن إن فيها حاجة منك ...
و كمان منى عشان مبقاش شكلى بجاملك أنا كامن أغانيه القديمة جزء من ذكرياتى ...
و حيث إننا أصدقاء فى على و فيروز كمان و الطرب عموماً
بص حضرتك اللينك دا هيوديك على موقع
مميز للأغانى الmp3 هتلاقى فيه حاجات من بتاعتنا ..اللى بنحبها
http://www.mawaly.com
و اللينك التانى دا هيخليك تدخل على صفحة البومات على كلها علطول
http://www.mawaly.com/music/egypt/ali-elhagar/albums/
و أبقى تجول فى الموقع هتلاقى ناس كتير و أغانى كتير من زماننا الشجى
أما الأغانى الأجنبى فلسه أسأل الواد ماجد أخويا عشان مليش فى الأجنبى قوى إلا شوية أغانى بسيطة كدا
بس اول ما أعرف هروح كاتبه اللينك فى الصفحة الرئيسية تحت شباك يوسف علطول
أتمنى الموقع يعجبك
و تحياتى يا غالى

ام يوسف ااقولك على سر
اميره الصعيد اسمها رانيا ولما بتقولك اجيب ليحيى ماكدونالذ من فين ده على اساس انها اختى واختراع ماكدونالذ موصلش عندنا
على فكره لو الامر بايدى والله كنت صفيت النقابه من ناس كتير واهو الباطل بتاع بعض المحامين طلع عليهم وحتتحط تحت الحراسه تانى ان شاء الله ويارب يقفولها اصلا

ياااه رجعتيني للذي مضى
بجد دي كانت أجمل ايام
متهيالي السر في حب الكبار للأطفال انهم بيشفوا فيهم زمنهم الماضي الجميل بكل براءته ونقاؤه
ان شاء الله يرجع لك بالسلامة وتجيبي له الجديد كمان
سعدت جدا بلقاءك اليوم تمنيت لو طالت الأمسية
دمتِ بخير

يلا عايش الطفولة
ربنا يستر عليه فيما هو ات

رئيس جمهورية نفسى
ليه يا محمود كدا ...
و لما تتقفل هتعمل إيه يا بنى ؟؟
لا مينفعش
أومال لو أتوكست فى اى قضية جديدة لاقدر الله أروح لمين و أقول يا مين ؟؟
على رأى الست أم كلثوم ..
لا يا عم خليها بس أنا خلاص على وعدك ليا لما تبقى نقيب هتجيبلى حقى تالت و متلت
ماشى يا ريس ..
تحياتى يا عزيزى

شهرزاد
حقيقى يا شهروزة ...
كلامك صح ..
أنا كنت سعيدة جدا بحياتى مع يوسف لوحدنا كنت بحس بالأمان أكتر لانى عايشة مع مخلوق برىء عمرى لحظة ما أخاف منه إنه هيأذينى أبدا ..
دا غير إنى كنت بلعب معاه و ألون و نغنى و نرقص و يوووه ...
ربنا يا حبيبتى يكتبلك الخير
و انا كمان أنبسطت بيكى و اتشرفت و سلميلى على سنووايت الجميلة

funcydoctor
يا محمود طب سيبه ينبسط شوية بالطفولة
و بعدين إبقى حذره زى ما انت عايز
نورتى يا فندم

إرسال تعليق