.

.

واحدة واحدة  

Posted by: فاتيما in

طب واحدة واحدة
و بلاش كل دا
ييجى مرة واحدة لتجنن كدا
لو دا النظام معاك بالشكل دا
مقدررررررش عليه
أيوووه
واحدة واحدة على أختكو الغلبانة
موش ممكن يا عيال اللى حصلى النهاردة دا ؟
قلب أتخطف منى
النهاردة كنت فى دنيا تانية و أجمل عالم تشوفه عيونى
حفلة توقيع أول عدد من مدونات مصرية للجيب
ناهيك عن الحلم الذى تحقق و خروج أول وليد الى النور
كلنا شيلناه النهاردة و فرحنا بيه
و بروحنا
و بحبابيبنا
أيووووه
آخر واحدة دى ستوب عندها شويتين تلاتة خمسة
إيه المكان اللى الواحد كان فيه دا ؟!!
عارفين زماااان لما كنا بنروح رحلة تبع المدرسة و لا الكلية ؟؟
و تبقى قاعد تفكر فيها من قبلها بكام يوم و تحضر و يجيلك حالة قلق
و توتر مغمور بسعادة
و كل ما المعاد يقرب قلبك يدق و يرقص ؟؟
دا اللى حصلى من أول ما وصلت على باب العمارة اللى فيها الدار
أول ما وصلت و طلعت السلم لقيت اخويا و صديقى الغالى سوووو
البيه واقف يدخن - يا بنى السجاير صحتك - و إستقبلنى بمرحه و خفة روحه
و عرفنى على الجميلة آبى و البنت أصلاً جاية من كوكب تانى فعلا
و قمر بجد فى الشكل و الروح
و كان معاها عريسها إسلام اللى واضح إنه بيحبها موووت و ربنا يسعدهم يا رب
هقولكم بعد المدخل دا شفت مين
انا هبتدى بالبنات القمرات
لقيت شوية بنات قمرات بيقربوا عليا
و لقيت فيهم بنوتة سفروتة كدا بتقولى أنا لماضة ... معقول مرمر ؟؟
طبعاً إديتها حضونة كبيرة و فرحت قوى بيها و كتبتلى إهداء لمض زيهاعلى العدد
و إهداء على الجوانتى بتاع الدكاترة إياه !!
و أهو ده عيبه داليا الجميلة بصراحة إتفأجات شكلها أصغر و أجمل من الصورة اللى كانت فى مخيلتى
و كمان سلوى رئيسة حزب الأحلام و هيا شخصية لطيفة و هادية قوى بصراحة محدش غيرها ينفع تبقى ريسة لأحلامنا
كمان جت نبضات اللى أنبسطت قوى لما شوفتها و هى أرق بكتير من تصوارتى و تبادلنا حوار جميل قربنى منها أكتر
و شوفت مفقوعة مرارتها من حماتها و قولتها بصراحة موش باين عليكى الفقعة أصلها امورة و جدعة موش مقهورة
و جت رودى بنوتة مصرية مع بنتها نور القمر بس البنت راحت للناس كلها و مرضيتش تخلينى أشيلها
و دا مؤشر موش كويس يخلينى أفكر اكنسل جوازتها من يوسف مدام بتعمل معايا كدا و إحنا لسه على البر ؟
جت كلاكيت تانى و تانى و كانت اكثر هدوءا عن المرة اللى فاتت و لما سألتها الهانم مقالتشى الإ فى الآخر
و أنا ماشية أنها فى مووود مكتئب شوية ... معلشى طلعت ندلة و مقدرتش أستنى أعرف ليه
بس المفروض تكون أتعودت بقى على ندالتى بس أنبسطت قوى أنها قعدت المرة دى اكتر
و شفت d oddaحبيبتى اللى جابتلى وردة روز حلوة زيها و قعدت تقولى كلام مفيش أجمل منه عنى
وعن يوسف و عايزة أشكرها و أقولها أنك أنتى اللى هتبقى ام عظيمة لأنك موش نقصك حاجة عشان تبقى كدا
و طبعا معاه أنتيميتها البهية ميومة مى بهاء و جابتلى وردة حمرا حلوة هحطها فى فازة جنب الكمبيوتر
مع وردة دودا و عايزة اقولها أنا خجلانة من حبكم الكبير دا و حياة يوسف
شفت امانى آخر العنقود و كعادتها عصفورة رقيقة و زى النسمة كدا فى خفتها و شفافيتها
شفت بنات حلوة كتير يسمحونى لو وقع منى أساميهم
بس فيه مدونة كانت حاضرة معانا الأحتفال و عندها ولد أسمه نور
و دلوقتى انا محرجة جدا أقول إنى موش فاكرة بالظبط
مدونتها و إسمها بس فاكرة ذوقها و شياكتها و يا ريت تسامحنى
الألزهايمر بقى و عمايله
- لأ هيا كتر خيرها فكرتننى قوس قزح متزعليش و حياتك
الرجالة بقى ....
طبعا بعد سوووو عم الشباب كله
دخلت ادور على عم مراكبى ... و شوفته قاعد كدا فى هدوء
إيه الجلال اللى نازل عليه ده
حسيت بدفا فى طلته و إنه فعلا نبع حكمة و فرحت بنفسى لأنى توقعت شىء و لقيته بيتجسد حقيقة
قابلت الراجل الطيب أبو خالد و مكنتش مصدقة أنه جه و طخ المشوار دا عشان يشوفنا
... هوه بقى وشه كله سماحة و طيبة و إتمنيت لو كانت ماما جت معايا عشان تشوفه بنفسها
لأنى مهما وصفت سماحته و النور اللى طالع من قلبه موش هقدر اوفيه حقه أبداً
كمان قابلت أحمد مبارك أخويا العزيز اللى لما شوفته قولت كلمة السر جبنة و رغم إنى موش
مشاركة فى العدد الاول دا لكن هوه صمم ياخد منى كلمة للذكرى و المحبة المتبادلة و
خايفى يكون الواد دا مخموم فيا !!
شوفت خالد همس الاحباب و إتشرفت بمعرفته هو إنسان لطيف و مهذب و وعدنا المرة الجاية يجيب
المدام و الاولاد عشان نتعرف عليهم
قابلت محمد عبدالعاطى جست هيومن و تبادلنا حوار و سألته عن الأوشاعة السخيفة إنه لاقدر الله
تعرض لحادث و الحمدلله طلع مقلب بس رخم شويتين و سعيدة إنى شوفته أصله بجد بحس إنه أخويا الصغير
و شفت احمد سكر يا عيال ... بس إيه دا ؟؟... هادى كدا و رزين قوى و ذوق و مجامل و على الطبيعة
إنسان من اللى بيقولو عليه روحه خفيفة و حسه هادى و سعدت بيه قوى و يسافر و يرجع بالسلامة يا رب
و قابلت احمد سلامة مستر كوفى و بصراحة الولد وسيم شكلاً و موضوعاً و أخلاقا - أنا موش بعاكس
يا أحمد إنت زى أخويا ماجد - و سعيدة قوى إنى قابلته
شوفت كمان خالو احمد الصباغ و اللى دايما متألق و قرفته حلوة على أى مكان يبقى فيه
و قابلت أتنين بحبهم قوى وليد راعى الملك kingtoootو كمان جت معاه بوبو هبة مراته
و الله و اكبر ماشاءالله عليه ربنا يحرسه إبنهم العسوله عمر
و مقعدوش كتير عشان الجو كان صعب و عمر كان يا حبيبى متضايق
بس فرحت إنى شوفتهم و الله فعلاً و أتمنى أشوفهم فى المرات الجاية
مين تانى ؟؟
شوفت مايكل ما يكليتو و صاحب المضيفة و دكتور محمد اللى هوه دكتور حر
و ناس كتير عرفونى بنفسهم و أنا لعوامل كبر السن و الشخيخوخة
بترجاهم يسامحونى لو كنت نسيت أى حد
و عايزة أشكر الناس اللى كلمتنى على موبايلات الأحباب اللى كانوا موجودين
يعنى وزة القمرين أنين الحزن اللى فى عز فرحتها أفتكرت تسلم عليا
و كمان محمود رئيس جمهورية نفسى اللى بعتز بمعرفته جدا و كتر خيره حرص إنه يكلمنى برضو
و سنووايت أميرة الحواديت اللى بعتتلى السلام مع شهرزاد و بقولها ميرسى قوى على ذوقك و رقتك
ناس حلوة كان نفسى ييجوا الليلة دى بس مجوش و أفتقدتهم قوى
البت خيخة و أى كلام اختى و حبيبتى و ام شيكو
كان نفسى تيجى و تشوفى الناس الحلوة دى كلها و كلهم سالو عليكى
أرجو يكون غيابك مانعه خير عشان وحشتنى النهاردة
قوى و رودى و سووو كمان قلقانين قوى عليكى و كلنا عاوزين نطمن يا غالية
و كمان أفتقدت الناس اللى برا مصر و مقدروش يكونو موجودين
و طبعاً عذرت كل اللى مقدرشى ييجى لأسباب صحية أو إجتماعية أو لبعد المسافات
أو ظروف طارئة زى
خالتى فرنسا ربنا يشيفيها و عبده الرايق و مهند الباحث عن الحقيقة و نيجرو و بطوط و سالى و دوبا
و ميادة قاف ميم و دكتورة خمسة فضفضة و صيدلانية طالعة نازلة و إيمان شخابيط
ومونا ليزا و مجداوية و بنت القمر و نسرين بسيونى و هدى بدال ما نطق
و زيانور مامت نور و زياد و واحدة مفروسة و قطة الصحراء
و لعلها خير و سدورة و الطائر الحزين و أكتب بالرصاص و سنوهى و صالح سعيد ادهم
و برقش و أحمد سمير و عمو و حسن أرابيسك
و محمد هيرو و الباشمهندس مستر جى كيلر و عبدالحميد ميدو و سيد المكسرات و خطيبته كراملة
أقول مين و لا مين ؟؟
كان نفسى أشوف الناس كلها كلها بس إن شاء الله ملحوقة
و المرات الجاية تتعوض
عاوزة أعتذرلكل حد طلب منى تليفونى و أنا بسخافة قولتله معلش موش هينفع
و عاوزة كل حد على سفر يا ريت يطمنا عليه فى مدونته فى أقرب فرصة
يعنى الناس اللى خرجت من اللقاء على الطيارات زى عم مراكبى و أحمد سكر
و الناس اللى سافرت داخل الحدود زى لماضة و أهو ده عيبه و أبوخالد الراجل الطيب
شكر أخير بقى عشان أنا محرجة عاطفياً جدا
من الواد سوووو اخويا و صديقى العزيز
اللى أصر إلحاحا يعملى عيد ميلاد
و يجيب تورتة و بيبس
و إدبس فى تمنهم و أنا مشيت طرازنة كدا من غير ما أقوله أشارك حتى بأى حاجة
و يبقى عندى شوية من الأحمر
بس عاوزة أقوله ربنا يخليك ليا و فلوسك حلال قوى يا واد
دا التورتة أتوزعت على ييجى خمسة و عشرين واحد قاعد و كفت و فاض كمان
و دا عشان نيتك حلوة و خير
و آبى و كلاكيت تانى و تانى و مفقوعة و أبوخالد و سكر .... و كلهم كلهم أحتفلوا بيا ...
كانوا عاوزين يحطولى شمع و حركات قولتلهم شمع إيه
هتحطوا خمسة و تلاتين شمعة أنتو عاوزين تولعو فى التورتة ؟؟
و بعدين محدش يغنى هابى بيرذداى ... عشان هعيط
آه .... ماهو المفروض الواحد حتى لو مبيحسش خالص
لازم قدام طوفان الحب و المشاعر الجميلة دى قلبه لو ميت يقوم تانى
عاوزة أشكركم قوى قوى على الحفلة الجميلة دى
و على إحتضانكم ليا من أول ما دخلت العالم السحرى بتاع المدونات
أنا موش هتكلم عن حفل التوقيع المرتبك و لا تنظيمه الغريب
و لا الجو الحر اللى خلانى أخس أتنين كيلو على الأقل
و انا واقفة بس رجعت زدتهم تانى لما كلت التورتة و لا هتكلم عن أى تفاصيل آخرى
زى الأخراج الفنى للكتاب و اللى ليا عليه تحفظات
لا ااااااااا
موش وقته خالص
لإنى دلوقتى طايرة فى السما و محدش هيحصلنى
و حاسة إن مشاعر الفرحة اللى بتغمرنى دى محستهاش من كتيييير
من ييجى كدا أربع شهور
تقريباً من ساعت يوسف ما مشى
و أفتقدت دفئه و حنانه و حضوناته
بس كل الدفء اللى طالع من قلوبكم الحلوة دى هيخلينى أدخل انام دلوقتى
و أنا حاسة كأن يوسف الليلة دى فى حضنى
و بحق و حقيقى
ربنا ميحرمنى منكم أبداً
آه قبل ما انسى
الحاجة ام فاتيما بتسلم عليكم جميعاً و بتدعيلكو ربنا يسعد أيامكو
بس كدا

This entry was posted on الجمعة, مايو 23, 2008 and is filed under . You can leave a response and follow any responses to this entry through the .

110 كــــلام بيطــبطـــب عـــلى قــــلبى و روحــــى

أول تعليق
فاتيما ازززززززيك يا قمر
كل سنة وانتى طيبة يا حبيبتى وعقبال 100 سنة وانتى متهنية ويوسف فى حضنك ان شاء الله

شوفى بقى أنا كنت هعيط وانا بقرا
حسيت ان أهلى كلهم كانوا متجمعين وانا مش معاهم
انا زعلانة جداااااا ومقهووووووووورة والله .. انتى عارفة انا من دمياط وصعب آجى .. وكمان ابنى هيبقى مشكلة

بس فرحانة أوووووى ان حلم الشباب بيتحقق فى أى حاجة بيحبوها وقلوبهم بتفرح ويحسوا بسعادة ونشوة وفخر بأنفسهم

دايما يارب فرحانين وناجحين ومتجمعين فى الخير

أسيبك تنامى يا قمر
تصبحى على خير

دمتى بكل الخير
سالى

يعنى دخلت وخرجت وهنيت وباركت ومخدتش حتة من التورتة
انتى بخيلة ولا ايه ؟؟
ههههههههههههه


يا بخيلة
ههههههههههههههههههههه


بهزر اوعى تزعلى

وجوه كتير تعرفيهم من خلف شاشة و ضوء
ووجوه كتير تعرفك بالكلمة تحت و فوق
ووجوه كتير وسطهم تلقي البراح فارد
مع أن المكان مزحوم و الجو كان مخنوق
و عجبي
KING TOOOT

صباح الخير فاتيما
كان فعلا يوم جميل جدا
و انا كنت سعيدة انى شوفتك و اتعرفت عليكى
مع انك نسيتى اسمى :)
بس ولا يهمك انا بردو نسيت بعض الاسماء و اتغلبط لان كل واحد بيقول اسمه هو مش اسم مدونته و طبعا حاجة تلغبط
كل سنة و انتى طيبو و سعيدة يارب

انا ام نور بس الولد

داليا

كان يوم جميل فعلاً بيكم ..

وأجمل ما فيه اني قبلتكم مرةتانية :)

ربنا يسعدك دايما

ربنا يخلينا لبعض
بجد يافطومة مش باين عليا الفقعة
يعني خدعتكوا .. ربنا يخليكي ياحبيبتي
وأديني رجعت أسم مفقوعة تاني
عشان لاقيت الناس ماتعرفش غير مفقوعة قلت خليها مفقوعة
مفقوعة مفقوعة بس أعيش
عقبال العدد الجاي ونلاقيلك حاجة فيه

ياااه .. ماليش دعوة ... حقد شديد قوي منتشر مؤذي جدا جدا... لعلمك بقى اي حاجة تحصل لك النهاردة يبقى ده قررررري الفظيع عليكي!!!
هو اي نعم انا ماكنتش هاقدر اجي على كل الاحوال بس برضه باحقد عليكي جامد جدا خالص قوي وانك شفتي كل الناس دي وانا لأ
ياااااااااااااااااااااعععععععع!!
ماليش دعوة انا بحقد عليكي.. وكمان تورتة يااااااع
لأ بجد والله انا مبسوطة قوي انك سعيدة وشفتي الناس الحلوة دي وربنا يفرح قلبك يا ميمي.
ولو حصلك حاجة ماليش دعوة بيها انا باهزر طبعا وعيني باردة والله من يومي..
حتى شوفي هابص اهوه ..
يا ساتر فيه واحدة بتصوت الظاهر اصابتها نيران صديقة...!!!
ههههههههههه
حضونات وفيتامينات
زيانور

قولت لاسلام كلمه واحده ورفع حواجبينه قوي قولت له فاتيما دي احن حضن قابلته فى حياتي كله دفاااااا قوي ههههههه عرفتي ليه استغرب بيبني وبينك هقولك
يوسي ليه ايد ماما يا فاتما قولى لها من ابي واسلام كنتي اكتر حد مستنيه اشوفه بجد
ربنا ميحرمنيش منكم كلكم يا رب وتفضلوا عيلتي اللى بحبها يا رب

كل سنه وانتى طيبه مره تانى
وكان نفسى اكون موجود معاكم والله بس الشغل ومسافة السفر بس ان شاء الله تتعوض تانى باذن الله
كل الى حقدر اقوله ليكى حاجه واحده بس استعير عنوان بوست فرنسا هانم الاخير
(0 انها حقا عائله محترمه )

انا كمان كنت مبسوطه قوي قوي اني شفتك يا ماما
وكمان كل الناس الجميله دي بجد كان يوم لا يوصف
ربنا يديم المحبه بينا
بس احلى حاجه حصلتلي بجد اليوم ده اني جيت وشفتكم
كان نفسي اكمل معاكم
كل سنه وانتي طيبه يا ماما

صباح معطر بالورد والياسمين انا لسه صاحيه من النوم قلت ابص على مدونتك بسرعه احساسى قالى انك ممكن تكونى كتبت بوست عرافتك الساحره بقه بجد كان يوم جميل وكنت سعيده مووووت انى شفتك بس شكل اصغر كتير مماتخيلت لكن جمالك ورقتك مثلما تخيلتك ومن اول ماوصلت وانا بدور عليكى ونفسى اشوفك وكنت سعيده جدا بالدقائق اللى اختطفها فى الكلام معك بجد نوووورتينا كان يوم جميل بس كان حيكون اجمل لو كل واحد فينا كان معلق اسم مدونته عليه عشان فى ناس كتير كانت موجوده ومش شفتها وكان نفسى اشوفهم قد اااااايه جميل انك الواحد يشوف الشخصيات اللى بيقرالها ومرتبط بيها عن طريق افكارها وكتابتاها فى ارض الواقع وشخصيات مش عاديه ناس لها فكر فى الحياه وقد ايه سعيده موووووت بكل اللى شوفتهم
وسعيده بان كتابات المدونين اصبح لها شكل ملوموس انا اشريت الكتاب وحقرئه وكتب عنه بوست ان شاء الله
بصراحه كان يوم جميل جدا رغم السونه اللى كنا فيها واتمنى اشوفك قريبا فى اى تجمع للمدونين اخر بس بشرط مش يكون عشان التبرع بالدم لسبب بسيط انى بخاف وادوخ من شكل الحقن حتى ولو مش كنت انا اللى باخدها مابالك لما اتبرع بالدم لاتتتخيلى قد ايه بخاف وبدوخ من هذا الموقف وممكن يغمى عليا

اشكرك عن كلماتك الرقيقه عن نبضات وانا حسيت ان الاقاء دا قرب بينا اكتر رغم ان اللحظات الللى قضينها معا كانت قليله جدا

تحياتى
قلب دائما بيحبك

بجد احنا اتبسطنا خالص علشان شفناكي.. والله انا عرفتك اول ما شفتك حتى قبل ما تعرفينا بنفسك.. انتي سكورة خالص وبنت حلال وتستاهلي كل الحب اللي الناس بتحبهولك دا
كل سنة وانتي طيبة مني انا وعمر

السلام عليكم
انا لحد دلوقتى مش مصدقة وكانى كنت فى حلم جميل وحسيت انى طلعت من عالم الخيال الى عالم الواقع واول مرة يكون الواقع جميل كدة
تحياتى لكى

هههههههه
ام يوسف الغالية
طبعا احنا كنا اسعد بوجودك وسطنا زى القمر كده يوم تمامه
واحنا حواليكى نجوم صغيرة
كل سنة وانتى طيبة وعقبال 100 سنة
وعقبال عيد ميلاد يوسف ونحتفل بيه احنا برده
ربنا يديم المحبة علينا جميعاونتقابل دايما فى المناسبات السعيدة
وعليه المرة الجاية انتى تجيبى يوسف وانا اجيب همس ونبقى كده خالصين
ههههههه
وسلامى لام فاطمة الغالية
وتحياتى ليكى
خالد

اه نسيت اقولك خمسة وتلاتين شمعة ليه
انا كنت احط شمعة واحدة بس
وثانيا شغالة تحكى عن يوسف حسسيتنا انك عندك 150 سنة وطلع انه يوسف اكبر منك وانتى اخته صغيرة
ربنا يخليكوا لبعض ونشوفكم مع بعض عن قريب باذن الله
تحياتى
خالد

ربنا يجمعكم على الخير وهايل انك كنتى مبسوطة....


والاهيل ان كل الناس دى اتجمعت على شئ واحد جميل

تحياتى

فاتيما ازيك يا حبيبتى
والله حسستينى انى كنت معاكو تسلم ايديكى يا قمر فيه ناس زى ما كنت متخيلاهم انت وصفتيهم زى ابى العزيز ابو خالد وزى سكر وزى خالد همس الاحباب
ومفقوعه وبنوته وابى وسووو وناس كتير من اللى قولتى عليهم بجد يا بختك انا كان نفسى اكون معاكم
بس اهه المرة الجايه
وكل سنه وانتى طيبه يا عسل
سلام

عملوها الوحوش.........يا ريتني كنت معاهم
هموما تجمع جميل وبالتأكيد احنا الخسرانين لأننا ما جيناش
بس الجايات اكتر من الرايحات لو كان في العمر بقية
تحياتي

ياريت تشاركينا في الجروب ده يا ماما فاتيما
http://www.facebook.com/group.php?gid=14647563577

الحنينة الجميلة فاتيما

ياريت أنا كان نفسى أجى بس كنت بطلع الرخصة الرائعة...وكنت فاصلة ..
بس بصراحة انتى حسستينى كأننا معاكم...أنا بصراحة كنت نفسى اشوفك واشوف لماضة....
المهم إنك انبسطتى وأنا كنت متأكدة انه هيكون تجمع جميل ومبهج.....

تحياتى ومحبتى لك وليوسف الجميل

نسيتى اسمى مع انى اكتر واحد اكلت تورتة

كل سنة وانتى طيبة

وفعلا كان يوم جميل جدا جدا جدا

أبنتى الغالية /فاطمه
كونك رقيقة المشاعر و جميلة الروح و الخلق تجدين كل الناس جمال
الأجمل أنك كنتى معنا و كان نفسى مامتك
تكون معاك لترى حب الناس لك
و فعلا فاتيما كانت ليلة جميلة
و ناسها جمال جدا
دمتى أحن أم

عقبال المرة الجاية باذن الله تعالى

ويارب يكون دايما على معرفة وذكرى حلوة



تحياتي

يامفقوعه ياقاف ميم يامفروسه ياقاف ميم
ياللي ضغطك عالي ياقاف ميم
بجد والله كان نفسي اجي عشان اشوفك انت وابي ومفقوعه من حماتها
كان نفسي اشوفكم موووووووووووووت ولو لدقايق بس مفيش نصيب بقي بس ان شاء الله
في اول اجتماع هاجي باذن الله
بس ده ميمنعش اني متغاظه مووووووت ههههههههههه ربنا يسعدك ياحماتي ويسعد ايامك بس تعالي هنا مين دي اللي كنت عاوزه تجوزيها يوسف شغل الحموات ابتدي بقي عاوزه تجبيلي دره ههههههههههههه
ربنا يسعدك يارب ويفرح قلبك علي طول
وحماقي عامل شغل في البلوج مخليه يتحزم ويرقص بوسه كبيره للحج مامه فاتيما قولي لها من خطيبه يوسف

فاتيما حبيبتى

مكنتش مصدقه بجد انى هشوفك يا قمر اطمنى انا رجعت وعمر الشقى بقى

للاسف قبل ما امشى دورت عليكى ملقتكيش علشان اسلم عليكى لان كان لازم الحق اركب اخر معاد

بس انتى بجد زى العسل وجميلة الشكل والروح ربنا يخليكى ليوسف ولينا كلنا

بجد والله الواحد كان نفسه يبقى موجود معاكو بس المشكلة بقى في السفر والكسل والحاجات دي بس انا باعتبر نفسي عرفت كل واحد من وصفكك ليه وطبعا كان يوم لذيذ يا بختكوا وان شاء الله احاول ابقى في المرات القادمة وطبعا ده مش غريب انك تكوني محبوبة من الناس كلها لأن شخصيتك حلوة وسلامي ليوسف

تحياتي

om dodo
أولا أهلا بيكى و منورة
ثانياً و انتى طيبة يا فندم و ميرسى على دعواتك الحلوة كلها
و متعيطيش و لا حجاة معلش مسيرها تتكرر ان شاء الله العدد التانى و ساعتها تجيبى دودو و تيجى ...
و موش بخيلة و لا حاجة أصلاً التورتة بتاعة سووو ربنا يخليه ليا ...
و تحياتى العطرة ليكى

وليد يا راعى الملك
ازيك يا أبو عمر القمر
و أزاى هبة الجميلة ...أنا فرحت بمعرفتكم على الطبيعة و بصراحة حاسة إنى ندلة و سيبتكم لوحدكم كدا و مقعدتش معاكم كفاية بس معلش الواحد كان مسروع موش عاوز يبطل يتعرف على الناس الحلوة كلها ...
تحياتى يا راعى الملك

قوس قزح
أنا أسفة يا رينبو و الله
حقك عليا
معلش قولتلكو الشيخوخة بقى
إنا فرحانة إنى شوفتك قوى و بجد إنتى شخصية لطيفة و تحسسى الواحد بالونس و الألفة ...
ربنا يديم المحبة و يجمعنا دايما على كل خير
تحياتى لنور و إخواته و مامتهم القمر

محمد موش مجرد جست هيومن
أنا كمان يا محمد إنبسطت إنى شوفتك و إتكلمنا شوية
و المرة الجاية نتكلم أكتر و أكتر إنت عارف الستات رغايين قوى
و الرجالة تستحمل بقى عشان هما أخواتى الصغيرين
ههه
تحياتى يا عزيزى

مفقوعة مرارتها
لاااا يا حبيبتى خداع إيه لا سمح الله
انا كان قصدى إنك شكلك بت جدعة محدش يستجرى يقهرك و لا يفقعلك المرارة
أنا مبسوطة إنى عرفتك و أسفة لو كنت نكدت عليكى فى الآخر كدا و خضيتك
معلش ساعات الواحد مبيعرفش يمسك نفسه
بس أنا كنت سعيدة جدا بيكى
و ربنا يديم المحبة
و لقب مفقوعة دا خلاص بقى ملكية فكرية ليكى و ماركة مسجلة
تحياتى يا حبيبتى

زيانور
الحنونة مامت زياد و نور
يا حبيبتى و لا يهمك قرى زى مانتى عايزة ...أنا كنت فى الجنة امبارح و الجنة لازم الواحد يتحقد عليها طبعاً
بصى المرة الجاية لن أقبل إنك تقولى موش هآجى و لازم تيجى نشوفك و تتعرفى بالعالم الجميل دا اللى إنتى جزء أصيل منه و تشبيهيه قوى
أحقدى زى مانتى عايزة أنتم حتى حقدكم فيه الخير

آبى الجميلة
اللى قولته أقل حاجة إنتى إنسانة لطيفة و حبوبة جدا ...
و إسلام محظوظ بيكى بجد موش كلام
و شكله كدا قلقان عشان خد باله إن عيلتك كبيرة قوى و لو بس فكر يزعلك هيلاقى ألف حد يقفله و يقوله البنت بنتنا بتشتكى منك ليه و بتاع ...
ربنا يهنيكم يا حبيبتى
و لو على الأحضان كل ما هشوفك هديكى حضونة محترمة تليق بيكى

رئيس جمهورية نفسى
و انت طيب يا محمود و متحرمشى منك و لا من سؤالك ..
أنا فرحت و الله لما سمعت صوتك و مع إنى مكنتش سامعة نص الكلام بس حسيت فى نبرة صوتك بالونس و المودة بجد من غير ما نشوف بعض و لا حاجة ..
بس إنت صعيدى على حق يعنى الشهامة و القلب الطيب من غير غرض
انا إتشرفت بصداقتك دى بجد
و سلامى لأميرة الصعيد و المرة الجاية تيجوا سوا نشوفكو

لماضة يا طعامة
يا مرمر انا أكتر و الله
يا بنتى دنتى قطة صغننة الواحد ممكن
يشيلك جوه جيبه
لأ ... جوا قلبه
دا التعبير الصح
إنتى حبوبة قوى و ربنا يسعد أيامك كلها

نبضات
عرافتى الساحرة
يا حبيتى أنا اللى أسعد بيكى
و على فكرة لإقتراحك دا فى محله و كان المفروض دا جزء من النجاح التنظيمى لأى تجمع كبير زى دا إنهم يعملوا بدج يتعلق على الجيب كدا عشان اللى قصادك يعرفك و ييجى يسلم عليكى مباشرا من غير إحراج ...
يا ريت المرة الجاية لو إتعمل حفل للعدد التانى نبقى إحنا نعملها لوحدنا بإتفاق غير رسمى يعنى ...
و بخصوص حكاية التبرع بالدم دى موش لازم يا نبوضة تتبرعى مدام بتقلقى و تخافى ...تعالى بس نشوفك
و بعدين المرة اللى فاتت أنا متبرعتش عشان كان عندى جيوب أنفية بتسبب دوار فمكنش ينفع لحسن أدوخ و لا حاجة
بس روحت أشوف الجماعة و أسند اللى هيحتاج يتسند لو داخ ...
تعالى للمساندة المعنوية و التسنييد
و عشان تتعرفى على الناس أكتر
و تحياتى يا حبيبتى و طبعا لازم تعرفى إنى هكتب بوست أومال عرافتى أونطة ؟!

bobo
انا سكورة ؟؟
اومال إنتى تبقى إيه بقى ؟؟
إنتى رقيقة قوى و لو مكنتيش شايلة عمر كنت إفتكرتك بنوتة فى تانية جامعة و جاية مع خطيبها
ربنا يحرسك أنتى و وليد و تشوفوا عمر عريس و يبقى عنده مدونة هوه رآخر ماهو لازم يطلع لباباه و مامته
ربنا يديم المحبة يا رب
و تحياتى يا قمر

رئيسة حزب الاحلام
طبعاً يا ريسة لازم تكونى بتحلمى موش إنتى ريسة الأحلام كلها ...
مانا بقول عليه عالم سحرى عشان كدا
كل ما تمشى جواه أكتر كل ما تلاقيه يسحرك و يشدك لجواه كمان و كمان
و تفضلى تفكرى فيه و يستحوذ عليكى
أنا سعيدة بمعرفتك يا سلوى ...
و اتمنى اليوم دا يتكرر قريب قوى عشان والله وحشتونى بعد ما روحت البيت بدقايق

همس الأحباب
خالد أبو همس
يا خالد إنت أصلك اخلاق و الله و مجامل قوى و بعدين أنا بتكلم من واقع شهادة الميلاد و السجل المدنى يعنى أنا خلاص راكبة الجمل و شارخ على الأربعينات خلاص كلها كام سنة هتفرزى حبات السبحة كدا لو ربنا كتبلنا عمر
و بصراحة إنت كلامك صح بخصوص يوسف أنا فعلا بحس إنه الراجل بتاعى و اكبر منى ساعات لما ييجى يطبطب عليا و يطمنى و يقولى متزعلش و اللى مضايقك هكسره من الضرب و كدا ...
و ربنا يخليك يا خالد
و يديم المحبة يا رب ما بينا

el gazaly
مجتيش ليه طيب يا عم ؟؟
دى الدعوة عامة و تعال كنا نتعرف و تشوف ناس كتير بتقراهم أسامى على النت و صدقنى هتنبهر اكتر لما تشوفهم لأن غالبا هيكون الواقع أحسن بكتير من توقعاتك ...
المرة الجاية تيجى و تنورنا
تحياتى يا عزيزى

حنين القلب
معلشى ملحوقة و المرة الجاية تيجى يا ستى و تشرفينا ..
و الناس الحلوة اللى قولتى عليهم دول فى الواقع أطثر جمالا و الله بس أنا من فرحتى بيهم الواحد بيهرب منه الكلام
المرة الجاية بنفسك
تحياتى الخالصة

شكله كان يوم جميل، وكان نفسي أكون موجود وأحضر، لكن الجايات أكتر من الرايحات إنشاالله. ألف مبروك للمدونين.

أحمد سمير
يا احمد طب مجيتش ليه يا بنى كنا نشوفك
كنا هنعرفك علطول عشان أصلا إنت حاطط صور كفاية و لا تكون محرج تيجى
و لا موش عاوز تعرفنا يا كابتن ؟؟
و لا فيه ظروف ؟؟
طيب هنمشيها ظروف المرة دى
بس المرة الجاية موش مسموح بأى إعتذارات و هتيجى هتيجى
ماشى
تحياتى يا عزيزى
و موش ناسية التاج

شهرزاد
أولا انا مبسوطة بيكى قوى
و ثانياً فرحانة إنى شوفتك امبارح و هدخلك مدونتك كتير إن شاء الله
ثالثا كفاية تكونى صديقة لسنووايت عشان أحبك قوى
رابعاً بقى أختك الكبيرة ملهاش فى الفيس بوء دا ( على رأى آبى ) موش عارفة ليه نفسيتى موش مرتاحله بس هدخل أشوف الجروب دا إيه و أشكرك على إنك فكرتى فيا بجد
خامساً أوعى بقى تزعلى منى و تبطلى تيجى تزورينى و الفيس بوء يعمل ما بينا فورتينة
تحياتى يا شهروزة

إيمان الجميلة
يا إيمو التجمع كان مفتقدك و لماضة لذيذة قوى و تشبهك فى خفة الروح
المرة الجاية لازم هتيجى و تتعرفى بالناس الحلوة دى كلها
عشان الحلو لازم يتعرف بالحلو
و تحياتى يا حبوبة
و بوستك الآخير عن باباكى حلو قوى بجد

محمود الدوح
يا محمود إنت أنهين فيهم ؟؟
إنت اللى كنت قاعد جنب سوووو و لا مين ؟؟
فكرنى طيب عشان أنا فاكرة وشوش بشوشة كدا بس موش عارفة الأسامى
أنت ساعدنى عشان أختك غلبانة والنبى
و بالهنا و الشفا على قلبك يا محمود
نورت

أبو خالد يا راجل يا طيب
أنا و الله لما شوفتك واقف على السلم فى هدوء كدا كنت حاسة إنك إنت بس أتكسفت أقول و أستنيت لما تعرفنا بنفسك
مكنتش متوقعة إنك تيجى فعلاً عشان المشوار المتعب دا ..
بس إنت راجل طيب و نوارتنا كلنا و كان نفسى تشوف خيخة قوى كانت هتتنطط من الفرحة لما تشوفك ...
و معلشى معرفتش أرحب بيك اكتر من كدا أصلى كنت مشدوهة و مبهورة بالجمع الجميل دا ...
بس يكفينى فخرا إن عيد ميلادى ال35 بقى مميز بوجودكو معايا و حواليا و دى ذكرى هتفضل معاسا لغاية آخر العمر متحرمشى منك أبداً أبداً
و الحاجة وصلها السلام عشان بتقرى التعليقات دايما و بتشكرك

والله انا كنت الاسعد وان شاء الله فى ااقرب وقت يكون فى تجمع بلوجر ححاول اجى بس اميره الصعيد صعب علشان البيت والاولاد

صاحب المضيفة
أنا أتشرفت بمعرفتك يا ابو مالك بس معلش ملحقتش أقعد أتكلم معاك كفاية
بس خيرها فى غيرها أن شاء الله
و ربنا يديم الود و المحبة
و تحياتى يا أبو الكرم كله

mayada
يا جميلة يا قاف ميم
يا لذيذة يا قاف ميم
يا متزعليش و ملحوقة يا قاف ميم
أدينا بنكتب اهو عشان اللى محضرش يعرف اللى حصل من أكتر من عين ..
المرة الجاية تيجى يا حبيبتى
و بخصوص الخطوبة لازم أقولك من أولها أن الواد دا خطابته كتير يعنى الحمدلله مطلوب على مستوى الجمهورية و كل واحدة بقى و شطارتها معاه
و معايا عشان برضو لى وضع و برستيج كفله لى الدستور بصفتى امه ...
و سلامك وصل يا جميلة
و تحياتى يا قاف ميم قوى قوى

أهو ده عيبه
حمدلله على السلامة يا داليا
و معلشى أصلى أتخطفت على البورصة عشان الواد سووو أخويا الغالى كان عاملى حفلة عيد ميدان ...
و المرات الجاية محدش يتحرك من مطاريحه
بقى الا لما نسلم على بعضينا
أنتى الأحلى و الاجمل ...
و تحياتى يا حبيبتى

hero
كسل إيه يا عم دنت لسه شباب أومال إحنا نقول إيه بقى ؟؟
المرة الجاية موش عاوزة أسمع الأعذار دى خالص و لازم تيجى بجد
و متشكرين يا سيدى على رأيك و ذوقك و دمت بألف خير و سعادة

وجهة نظرى
الله
إنت مكنتش موجود ؟؟
أومال حد عرفنى بنفسه على إنه وجهة نظرى ليه ؟؟
يمكن قال حاجة تانية و انا مسمعتش كويس ؟؟!!
إحتمال
المهم المرة الجاية يا كابتن تبقى تيجى بقى
تحياتى يا فندم

رئيس جمهورية نفسى
ماشى يا محمود تعال إنت طيب و بلاش أميرة الصعيد عشان الظروف
أهو تبقى انت جيت و جبت حاجة من ريحتها ...
أنا أترقب اللقاء القادم ان شاء الله بكل سعادة و شوق للقاكم جميعاً
تحياتى يا ريس

فاتيموووووو

بصى بقى

من الاخر ....
لا تعليق

رغم الزحمه
الا انه كان يوم بديع
ولكن سقط مني مدونين كثر
اتمني التقدم والازدهار لكل المدونين

الحبيبه ام يوسف
كل سنه وانتي طيبه وان شاء الله يارب السنه الجايه يكون يوسف معاكي
طاب عارفه انا اتفرست امبارح واتعكننت علشان عرفت ان الريس كلمك في التليفون وانا لا بس انبسطت لما عرفت بعيد ميلادك الهايل وسط الناس اللي بتحبك بجد
واعرفي يا ستي ان في اي تجمع زي كده انا معاكم بقلبي وبعقلي بس زي ما الريس قال صعب اني اكون معاكم
بجد بجد انا نفسي اشوفكم كلكم بس الظروف

مبروووووووووووك
انا فرحانه اوى لفرحتكم والله وفرحانه اوى باحمد القاضي بالذات لانه فعلا يستحق النشر الورقي ونفسي اشوفله باذن الله كتاب لوحده قريب
كان نفسي اكون موجوده وكان نفسي اشتري الكتاب بس تتعوض باذن الله وانزل اجازه واشوفكم كلكم يارب
:)

بجد زعلت اني ما كنتش موجودة بس عرفت الاخبار من شهرزادي هي كمان انبسطت اوي من اليوم وقالتلي يا ريتك كنتي معانا , ان شاء الله المرة الجاية اكون موجودة معاكم علشان فيه ناس كتييييير نفسي اشوفهم وعلي راسهم ماما فاتيما, بجد كان نفسي اكون معاكوا اوييي

علي فكرة جميلة اوي الاغنية اللي حطاها مع الموضوع عاملين جو وحالة سعادة كدة لطيفة

فاتيما

كل سنة وانتى طيبة ياقمر
والسنة الى جاية ان شاء الله يكون فى حضنك يوسف

وانا بعتلك السلام واكيد اكيد نسيت تقولك صح

والله كان سلام كبير قوى بس الظاهر انها نسيت لما شافتكم

صح ياداليا ههههههههه

معلش انا مقصرة معاكى والله عارفة
بس انتى عارفة بقى الامتحانات والوقت صعب قوى
دعواتى ليكى بكل سعادة وحب وخير
وكل سنة وانتى طيبة

دمتى حضن دافئ ليوسف

رندا

الحب فى الله يا فاتيما من اكتر النعم اللى عطاءها بيرجع لصاحبه اضعاف
مش محتاجة اشوفك فى الواقع لانى شايفة ملامحك الحقيقة هنا فعلا
فرحتك المرة دى اسعدت قلبى وطمنتنى عليك
يا احلى الامهات
كل التحية

هههههههههههههه

قبل ما انسي

قوس قزح اسمها داليا وهي ام نور الولد


انا لسة وصلة حالا من القاهرة واول حاجه عملتها دخلت اشوفكم ورغم اني مش نمت ومطبقة والساعه دلوقتي 10.30

يعني ضايعه

اناملي ساعتين قبل ما نور تصحي
واجي اشوفك يا قمر

صحيح كمان خيخه الحمد الله كويسة ولازم تتعودي علي كدا مش خيخه بقي

احنا اتجمعنا امبارح انا وابي وهيثم ونضال وسوو وهي طبعا والصباغ جية اخر خمس دقائق قبل ما نقوم انا وهي

بتضمنك عليها وبتعتزر ليكي انها مش قدرت تيجي لانها كان عندها ضيوف

المهم لما اجي بقي

ياللي دبستيني في تقطيع التورته
هههههههههههههههههههههههههه

حبيبتى فاطمة اجمل ام يوسف

شقيقة الروح

كل سنة وانت طيبة والسنة الجاية يكون يوسف فى حضنك ان شاء الله

والله يا فاطمة بقرأ اللى مكتوب ولم احزن لعدم حضورى الا بسبب عيد ميلادك بجد كان نفسى اقولك كل سنة وانتى طيبة يا طمطم .. لكن قدر الله وما شاء فعل ويمكن المرة اللى جاية تكون اجمل واشوفك ان شاء الله

كنت سعيدة والله لما قريت كلامك وكلام داليا وتعليقات هنا وهناك عن جمال اللقاء .. انا سعيدة بيكو جدا وحاسة زى ما اكون كنت معاكو بشكل او بآخر !!0

بحبك جدا يا طم طم وبتمنى ابتسامتك دى تفضل موجودة وتفضل الاسرة الكبيرة الدافية دى تنمو كل يوم بكل فروعها الطيبة الرائعة دى

ربنا معاكى يا حبيبتى

رجاء خاص : بوسيلى ايد ماما وبلغيها حبى من ضمن الاسماء الكتيرة اللى بعتتلها السلام

والى لقاء ان شاء الله

هدى

ايوه صح نسيت يا رندا ( وش مكسوف جدا )

فاتيما رندا كانت بعت لكى سلام مخصوص جدا
لما قلت لها انى رايحة قعدت تقولى فاتيما فاتيما فاتيما

بس انا والله من فرحة اللقا بيكم نسيت كل حاجة

بس اوعدك المرة الجاية احاول اجيب رندا بنفسها تسلم عليكى :)

يا ريتني كنت معاكم

والله كان نفسي اكون موجود بس للاسف كان عندي شغل في اسكندرية ومكنش فيه اي حد يمسك الشيفت مكاني

الف مبروك علي الكتاب ومعاكم في توقيعات الطبعة الثانية انشاء الله

السلام عليكم
انا جيت يا فاتيما بس لقيتكم مشيتم
انا زعلانة اوي اني ما شفتكيش
يارب اتعرف عليكي واشوفكم كلكم
ان شاء الله نتجمع في الخير دايما يارب

نسيت اقولك يوم ميلاد سعيييييييييييد وباذن الله السنة الجاية نحتفل بيه ومعانا يوسفة باذن الله

اهم حاجه انك اتبسطتى يا ام يوسف
وانا والله من بين السطور حاسه بسعادتك علشان كدا فرحانه انك مبسوطة
بس قلقتينى على نوران
ياريت لو قدرتى تطمنى عليها تطمنينى
يارب دايما سعيدة يا جميله

ربنا يخليكو لبعض ويجمعكو على الخير دايما ..
بجد برغم إني لسه مش عارفاكو قوي بس حسيتكو أهلي ..
كان نفسي أكون معاكو حتى لو أترقبكو من بعيد لبعيد ..
بجد فرحانه جدااااااا لأني حاسه بفرحة لقاكو ..

تحياتي للجميع ..

يا لاهوي يا فاتيما.... في حد إنتحل صفتي؟؟؟

أنا عايش بره مصر، فمافيش حل غير إن المره إلي جايه تعملوها في أوروبا :)

إنتي مستغربة ليه من حب الناس ليكي بالشكل ده رغم إنك جديدة تدوينيا؟

اللي بيخرج من القلب لازم يوصل لقلوب الناس .. دي خديها قاعدة .. وإنتي فعلا دخلتي قلوب الناس دي كلها في أسرع وقت ممكن .. لأنك إتكلمتي من قلبك

أنا إتشرفت بيكي بجد .. ومش عارف أشكرك إزاي على ذوقك ده وعلى الدعاية الجامدة اللي إنتي عاملاها ليا دي .. يارب نشوفك دايما على خير

اختى الحبيبة الغالية ربنا يجعل ايامك كلها افراح وسعادة ويرزقك بحب الناس كمان وكمان
وكل سنة وانتى بالف خير وصحة هنية وان شاء الله يكون يوسف معاكى ونعمللك كلنا عيد ميلاد ماحصلش
انا كان نفسى اكون موجودة عشان اتعرف على كل اخواتى اللى حبتهم جدا من غير مااعرفهم ولكن غصب عنى
ان شاء الله نشوف بعض على خير يارب
بحبك جدااااا

كده برضه تكسفيني بردك الجميل ده على كل الحقد بتاعي ده اللي كان بجد وحقيق زي الواد نور ما بيقول!!
المهم انا عندي ليكي تاج يا ريت تمري تاخديه بس من مدونة نور وزيادر الي على البلوجر:
www.nourzeyad.blogspot.com
منتظراكي
حضونات وفيتامينات للصبح
زيانور

فاتيما ازيك

كل سنة وانتى طيبة يا جميل وعقبال مليون سنة

بجد كان نفسى احضر حفل التوقيع دة اد اية انا مضايقة كان نفسى ابقة معاكوا واشوف كل واحد فيكوا بالاخص انى الفترة دى فى مصر

ياخسارة بجد ومش عارفة اذا كانت الفرصة دى هتتكرر ولا لاءء

بس بجد انا مبسوطة انك مبسوطة وكنتى فرحانة اوى باليوم

بصى لو فى اى تجمعات تانى ممكن نقابل فيها بعض تبقى بلاغينى لانى اولا نفسى اشوفك جداااا

ونفسى اشوف كل الناس الحلويين دول

تحياتى ليكى يا فاتيما

نوراى

احم احم

انا قابلت حضرتك فى الحفله مع نبضات

بس للاسف مقدرتش اقعد كتير لنهايه الحفل بسبسب العمل


تحياتى

لا مش ممكن عاشر مرة اعلق ويتمسح هتجنن ياقمر انا مبزعلش بس ساعات الضغوط بتبقى شديدة وبفضل انى انام فالسرير لما بتضايق كدة لان وشى بيبان علية جدااا بس تانى يوم خلاص بيبقى عادى بقلب الدنيا ورا ضهرى
ولينا كمان بنتى عاملالى قلق تدهل وتخرج فاليوم مية مرة ومرة امتخاناتها الاسبوع الجاى وخلاص فيصت خالص منى ومن المذاكرة
انشاء الله اشوفك قريب ونرغى
تحياتى
كان يوم جميل وعيد ميلادك اجمل وابى كان المفروض تقول لنا كلنا بس ملحوقة

بصي بقى انا اللي اتاكلت في الارجلين في التورته

ومش رضيت اتكلم

انا كنت ممكن اقلبها دم
وهخيطكوا تاني
:)))


سعدنا بوجودك والله يا ام يوسف
وانت تقولي وتسألي زي مانتي عاوزه

انت فوق راسنا على طول

dodda
بصى يا حبيبتى تعليقى من الآخر هيكون مقتبس من عمنا نزار قبانى
أخاف أن أقول للتى أحبها
أحبها
فالخمر فى جرارها
تخسر شيئاً
عندما نصبها


دمتى لى صديقة و قريبة من قلبى

انا عرفت قبلها بيوم انك جاية الحفل وانه عيد ميلادك
بس عرفت انهم عاملين مفاجاة او حاجة زي كده مردتش احرقها اول ما شفتك وانا واقف عند مراكبي وسمعت كلمة منبع الحكمة ورنت في ودني عشان كده سألتك على طول انتي مين :)
انا اتشرف يا فاتيما اني اكون زي ماجد ربنا يخليكم لبعض ويخليكي للمدونين كلهمa
وكل سنة وانتي طيبة

محمد مفيد
اهلا بيك
و للأسف مقدرناش نتعرف على بعض بس ان شاء الله تتعوض المرات الجاية
و اتشرفت بزيارتك دى و هردها ان شاء الله
تحياتى الخالصة

أميرة الصعيد
يا حبيبتى محمود بلغ سلامك للجميع
و معلشى الظروف صعبة بس إنتوا معانا و الله فى قلوبنا ...
و يا رب تيجى فرصة مناسبة و تعرفوا تيجوا و إحنا نتجمع و نشوفكوا
و أتمنى تكون البوستات الللى اتكتبت عن اللقاء تكون شفت غليلكم شوية
تحياتى ليكى يا حبيبتى و سلامى لسعادة الريس ...
و كل أهالى قنا الطيبين

نسرين بسيونى
يا حبيبتى ترجعى بالسلامة
و المرة الجاية يكونلك بوستات مشورة فى العدد الجديد و نيجى نشوفك زى ما شوفنا عم المراكبى ...
و ميرسى يا حبيبتى
إحنا بنهنى نفسينا علينا
تحياتى العطرة

سنووايت
يا اميرة الحواديت
قاتل الله الإمتحانات يا شيخة
كان نفسنا نشوفك قوى
بس شهرزوة قامت بالواجب و وصلتلنا السلام يا جميل
المرة الجاية مفيش أعذار خااااالص
ماشى
تحياتى يا اميرة الحواديت

راندا
يا حبيبتى معلش و ملحوقة
و قوس قزح وصلت السلام عموما ً
و معلشى أعذريها و أعذرينا إحنا كلنا كنا مشدوهين و مبهورين و متلخبطين و موش ملاحقين نتعرف على مين و لا مين و مشاعر كتير مختلطة كدا
لما تيجى المرة الجاية هتعذريها قوى
و عشان كمان نشوفك
تحياتى يا جميلة

لعلها خير
يا حبيبتى أنتى قلبك طيب قوى قوى
و فرحانلى كدا زى ما نكون نعرف بعض من عمر طويل
اتمنى زى ما بنشوف بعض على المدونات
نشوفنا برضو فى اللقاءات المميزة دى
صدقينى المودنين احلى على الواقع ألف مرة و دا عكس التوقعات السابقة إن الواحد بيستخبى ورا الشاشة و لما تقابليه تتصدمى فيه ...
لأ فى عالمنا الجميل دا بتاع المدونات
الصدمة أحلى صدمة ممكن تاخديها فى حياتك
و تحياتى يا حبيبتى و سامحينى مقصرة معاكى قوى

ينوتة مصرية
روووووودى
خياااانة
أتقابلتوا مع خيخة و محدش يقولى ؟؟
نداااالة
طب أبعتيلى ميل و لا حتى الواد سووو
قولولى رايحين الحتة الفلانية و المعاد العلانى و ربنا يسهل اقدر آجى
لاااااا
لا ممكن أسامحكو أبداً


طب خلاص
ماشى
سماح
المهم خيخة بخير
تحياتى يا حبيبتى و بوسيلى خطيبة إبنى

rainbow
هدى يا شقيقة الروح
يا حبيبتى أفتقدناكى هناك
و لولا بس الأدن الوسطى دى و عمايلها
مكنتش قبلت أى أعذار ...
بس خيرها فى غيرها
و المرة الجاية لازم هقولك و تيجى أشوفك
و اتونس بشقيقة الروح
هى حبيبتى
تحياتى يا حبيبتى

قوس قزح
دولى يا قمر
و لا يهمك يا حبيبتى أنا قولتلها ...
الواحد كان متاخد و مخطوف
موش سمعتى حماقى بيقول يللى خاطفنى
يا ريت تقولى
يا ريت
يعنى لو ينفع يا ريت
يعنى موش لازم قوى تقولى
عشان عارف إن الفرحة وخدانا كلنا
و أنا سعيدة إنى عرفتك يا داليا
و طلعتى صاحبة ناس حلوة قوى

tamer salah
معلش يا تامر
الرة الجاية أن شاء الله تتعوض
و إنت إسكندرانى ؟؟
اجدع ناس و الله
سلملى على البحر و النبى سلام أمانة
شكرا لزيارتك الحلوة دى

nonoymm
بتهرجى !!!
كنت موجودة ؟؟
فين ؟؟
يا ألف خسارة
نا كان نفسى أشوفك و الله
دنتى حبيبتى و صديقة مدونة يوسف الوفية
إزاى الكلام دا يحصل
بصى المرة الجاية لازم نعمل حكاية البادج اللى يتكتب عليه أسامينا و كل واحد يعلقه عشان نعرف بعض أسهل و أسرع و الوقت ميضيعش فى التخمينات
ملحوقة المرة الجاية
و تحياتى يا نونويم

قطة الصحراء
ميرسى يا قطتى
و مجتيش ليه سعادتك طيب ؟؟
المرة الجاية مفيش زوغان عشان ناس كتير سألت عليكى
ربنا يروق الأحوال
و أشوفك دايما على خير
تحياتى يا قطتى الحلوة

الباحثة عن النور
يا ستى كلها كام أسبوع و شهرين تلاتة تلاقى نفسك عارفانا كلنا كأنك معانا من سنين أنا نفسى بقالى أربع شهور و حاسة أنى كنت وسط أهلى و أصحابى من أيام ثانوى مثلاً ...
ربنا يديم المحبة
و المرة الجاية تكونى معانا
تحياتى يا اسيرة تبحث عن بقعة نور

وجهة نظرى
يا لهوى تانية على لهوى بتاعتك ...
إنت عايش فى قارة تانية بعيد كدا ؟؟
طب موش كنت تقول يا جدع ؟؟
تيجى بالسلامة
لازم أنا بقى اللى سمعت غلط و لا حاجة
اتمنى طيب يكون البوستات اللى اتكلمت عن اللقاء تكون أرضت فضولك
و عقبال ما تبقى معانا و تغطي الأحداث بنفسك
تحياتى يا سيدى

عم مراكبى
يا نبع الحكمة
دعاية إيه بس دنا حاسة إنى مقصرة معاك و الله و موش عارفة أعبر عن المشاعر الكتير اللى أنتباتنى لما أشرفت بمقابلتك
بصراحة كنت قلقانة قوى
بس إنت طلعت أحلى بكتير من الصورة الذهنية
صحيح صورتك فى مدونتك مبتسمة و مشجعة
لكن إنت طلتك على الواقع فيها راحة و دفء و شكلك و انت قاعد بيفكرنى بالصور القديمة اللى بيبقى فيها راجل كدا قاعد فى سكون و دعة ...
ربنا يديم المحبة و الود
و تتكرر الفرصة عشان أقعد أرغى معاك كتير بقى و أقولك و أحكيلك ...
تحياتى يا نبع الحكمة

monalisa
و انا كمان يا مونا بحبك قوى
و كان نفسى تيجى قوى
و المرة الجاية هقول من بدرى عشان الكل يحاول ييجى و يعمل حسابه من بدرى بدرى
و يا رب يسمع منك و يوسف يكون معايا السنة الجاية
أنا بتباشر بيكى بجد
و ربنا يطمننا عليكى يا حببتى
تحياتى جدا

زيانور
يا حبيبتى أصل انا عارفاكى ...
قلبك دا كله خير و حياة نور و زياد
و ميرسى يا حبيبتى على إنك بتفكرى فيا
و هروح أشوف التاج و أستلمه
و ألبسه أهو
تحياتى يا يا أموله الحميلة

نوراى
بتتكلمى جد ؟؟
أنتى فى مصر دلوقتى ؟؟
طب يا خسارة ليه مجتيش بس ؟؟
معلشى ملحوقة
و تاكدى أقرب لقاء نتجمع فيه تانى هقول هنا علطول عشان الكل يعرف و يلحق يظبط مواعيده
و تسلميلى يا نوراى
و مصر منورة

asas
إحم إحم
إتفضل
أنت إسمك غريب قوى و عاوز روقان كدا و اتمشى فى مدونتك شوية عشان أعرفك أكتر ...
و مدام جيت مع نبضات تبقى راجل أخلاق و ذوق
و المرة الجاية يكون الوقت يسمح نتعرف اكتر
و أهلا بيك دايما

كلاكيت تانى و تانى
معلش يا نرمو روقى كدا
دنتى اللى بتقوينى و تشجعينى مالك جرالك إيه بس
إحنا حسدناكى و لا إيه ؟؟
و معلش ماحنا كمان كنا بنطلع عنين أهالينا أيام الامتحانات و قبلها و بعدها عادى ...
روق أعصابك يا جميل
و من غير آبى ما تقول حاجة خالص
كفاية قعادى وسطيكم و الله

دكتور حر
يا دكتور محمد أخجلتمونا و الله
أنا يشرفنى الكلام الحلو دا
و بخصوص موضوع التورتة و الدم دا
إبقى خليها ليوم التبرع الجاى
عشان نشوف الدكترة عملى و بالألوان الطبيعية ...
و أنا هبقى أجيب خيط و أبرة معايا
تحياتى يا دوك

أحمد سلامة
أجمد فنجان قهوة على النت
يا أحمد أنا اتشرفت بمعرفتك قوى
و بص انا موش بعاكس أصل عادة الشاب الوسيم بيبقى أليط كدا و حاسس إنه حسين فهمى و بتاع ...
بس إنت شخصية لطيفة و متواضع و بتتعرف على الناس بود و حب
و انا حسيت إنك زى اخويا ماجد هوه قدك كدا و شاب وسيم برضو
عشان كدا لما جيت أوصفلك أفتكرته و حسيت أنك زيه
و ميرسى يا احمد
و تعال هنا صحيح ...
فين فنجان القهوة اللى وعدتنا بيه على مدونتك و الحركات دى
لا شوفنا قهوة و لا طبق الفنجان حتى ..

كل مادخل بلوج الاقي ترحيب غير عادي بزيارة فاتيما هانم للدار يوم حفلة التوقيع
انا حبيتك بس من كلامهم وعليكي
وحبيتك اكتر اما دخلت مدونتك
الله عليكي يا فاتيما
وبجد انا زعلانه اكتر واكتر اما محدش قال علي حفلة التوقيع ديه
فجأه لاقيت الناس كلها عارفه وبرضو الناس كلها راحت الله يسامحكو بقي
انا سعيده اني عرفتك يا فاتيما واتمني بجد نبقي اصحاب
تقبلي مروري يا احلي فاتيما
سلام

مصادفه غريبه أنا كمان عيد ميلادي النهارده...وأنا كمان 35 شمعه ..مش مصادفه غريبه ...كل سنه وإنت بخير وسعاده إنت ويوسف

إنت حسستيني إني كنت معاكم ..لو كنت في مصر كنت أكيد حضرت وإتعرفت عليكم ..بس هي دي ضريبة الغربه..
كل سنه وإحنا طيبين

فنانة مفروسة جدا
يا حبيبتى ميرسى على ذوقك
دا أصلهم ناس حلوة قوى قوى
و عشان كدا مبيطلعش منهم غير الكلام الحلو كله
و أزاى متعرفيش عن الحفلة ؟؟
دا أتكتب عنها فى مدونات كتير بس يمكن إنتى بتدخلى مدونات محدش كتب فيها عن الموضوع ...
ملحوقة و ان شاء الله نتجمع تانى و نشوف بعضنا
بصى نصيحة فعالة ادخلى دايما عند مدونة احمد الصباغ
http://ahmedelsabbagh.blogspot.com/
هتلاقى عنده آخر الاخبار و كل حاجة هتحصل هتلاقيه بينوه عنها من قبلها بكتير ..
تحياتى يا فنانة

ema
يا ستى ترجعى بالسلامة أن شاء الله
و لما يحصل نكون فى معاد عدد جديد من مدونات مصريةللجيب و ساعتها تقدرى تيجى بإذن الله
و عيد ميلادى كان 15/5 يا إيما
بس إحنا الأتنين برج الثور و لا كدا إنتى دخلتى على برج الجوزاء و دا منعطف خطر ...
تحياتى يا أم البنين

سبحان الله

انا شوفت مدونتك مرة واحدة و اتعرفت عليكي و لم استرسل معك في الحديث

و لكن فعلا بجد ماشاء الله عليكي انت بتشعي حنان غريب اوي ماشاء الله فعلا و حسيت بود غريب كدا تجاهك رغم اننا لم نتصافح الا قليلا وواثقة ان حضرتك متعرفينيش قبل كدا

بجد الحفلة دي جمعت ناس كتيرة اوي اوي اوي علي قدر عالي اوي من الرقي و الاحترام

خالص التحية :)

شمس الدين
بصى يا شموسة
أنا اللى أنبسطت لما سلمتى عليا بود و إهتمام كدا و إنتى شكلك شخصية مهمة فى التدوين بس أنا معرفش المعلومة دى للأسف لأنى لسه محدثة مدونات ...
بتمحك فيكو بصراحة و المفروض وواجب عليا أعرفكو كلكوا لأن دى أحسن معرفة فى الدنيا و كنت بتمنى من زمان يكونلى أصدقاء بهذا القدر من الثقافة و النضج و الاخلاق المتحضرة
أنا اللى إتشرفت بيكى يا حبيبتى و هتلاقينى عندك قريب فى مدونتك و ألف مبروك وجودك فى أول عدد عقبال ما يكونلك كتب لوحدك يا رب
و يا بنات أنتو زى بناتى و أخواتى الصغيرين و مفرحين قلبى و لازم لما أشوفكوا أبقى غرقانة على روحى حب و حنية
اومال أطلعاها لمين طيب ؟؟!!

انا اللى فى الصورة دى
http://ahmedessabbagh28.googlepages.com/geebnew3.jpg

محمود الدوح
يا محمود أنا اتشرفت بيك
و أوعدك إنى موش هنسى أبدا لا أسمك و لا شكلك ...
و أتمنى نكون أصدقاء عبر المدونات و نكون أخوات كمان لأنك فى لحظات قليلة كنت لطيف فى تعاملك و وشك مبتسم بسماحة و ود
اتمنى غن شاء الله أشوفك فى اللقاءات القادمة
و تكون فى أحسن حال و إبتسامتك منورة دايما
تحياتى يا محمود

إرسال تعليق