.

.

إحـم .. إحـم  

Posted by: فاتيما in



يا ساتر
النهاردة يا جماعة هتكلم عن مكان من اهم الاماكن فى حياتى
هتكلم عن الحمام


أيوه الحمام
يعنى بيت الراحة
محل الأدب زى ما ستى الله يرحمها 
ما كنت بتقول عليه
لأ موش هقول كلام يقرف
عشان عارفة إن فيه ناس فافى
ممكن يغمن عليها 
و ناس تانية ممكن تجيب اللى فى بطنها
مع إن الحمام دا 
أعظم حاجة ممكن الأنسان يحتاجها
و جرب كدا تكون عايش فى مكان من غير حمام لمدة سبع تمن ساعات ورا بعض 
و شوف
كفاية إنى أقتبس كلمة
أحمد زكى فى فيلم البداية لما قال إن
- الحضارة الانسانية إبتدت بإختراع التواليت


أنا هتكلم عن المكان دا 
و اهميته عندى من زمااااان قوى
يعنى مثلاً و انا صغيرة
- فى العصر العثمانى كدا -
مكنتش بحب الاكل خالص
و أسوأ لحظات حياتى لما يبقى قدامى طبق الغدا و موش عاوزة أكمله
ساعتها طبعاً يقعدوا يزعقولى و لازم تخلصى طبقك كله
أقوم أقعد أفلفص بأى سبب
و أقف أتحنجل قدام بابا

- اصل ورايا واجب أروح أعمله الاول
- لأ خلصى اكلك ... يعنى شاطرة أوى فى المدرسة يا خى
- اصل طب عاوزة أنام عشان مدروخة
- لأ خلصى أكلك و بعدين أتخمدى
- اصل انا عاوزة أعمل تواليت
- ............!! خلاص غورى أدخلى الحمام
بس برضو هتطلعى تخلصى اكلك 


طبعاً أنا جرى على الحمام 
و أقعد جواه لحد بابا ما يزهق
و يخش ينام
و أخرج أنا أخبى الطبق
فى آخر رف فى التلاجة 
جوه جوه بعيييييد
و روح يا زمان
و تعالى يا زمان
وبابا يكتشف وجود الطبق 
بالصدفة البحتة 
أثناء إحدى غارته الإستكشافية على التلاجة وانضرب علقة محترمة  
بس يعنى الحمام كان المنقذ المؤقت 
من الأكل اللى كنت مبحبوش





كمان كان مهربى لما أتضايق 
و أعيط و محبش حد يشوفنى
يعنى أبقى لسه دابة خناقة مع واحدة صاحبتى و لا بابا و لا أى حد
و موش عاوزة حد يشوف اى دموع فى عينيا على رأى أنغام
أقوم ملقيش غير الحمام أدخله
و أقعد أعيط مع نفسى
طبعاً الكلام دا قعد لفترة
بس دلوقتى بطلت
عشان مبقتيش أخاف 
حد يشوف دموعى زى زمان





دا غير الخصوصية اللى الحمام 
بيحققها للبنى آدم
يعنى تدخل كدا تقعد 
و تروق نفسك
و محدش يستجرى يقطع عليك خلوتك
أقصى حاااااجة حد يخبط
و يقولك خلصنا
بس موش هيقدر يدخل عليك عنوة كدا
أو مثلاً يمنعك تدخل الحمام من أساسه
محدش يقدر يقولك 
لأ متدخلش
و دا السبب الأساسى
فى كون الحمام هو الملاذ الاول والأخير 
لأى مدخن  بيشرب سجاير من ورا أهله
بعد البلكونة




و يااااه بقى لو الحمام
فول أوبشن يعنى واسع
و الإضاءة فيه كويسة 
و شباكه بحرى
و تدلعه كدا ببخور 
او معطر للجو أو فنييك




لكن الحق يقال 
أكتر حاجة بتخلينى 
أحس إن الحمام دا من اريح الاماكن عندى
و أهميته لا تكيل بالبتنجان
فعلاً
هوه القراية



أيووووه
من صغرى و أنا لازم اخد معايا
مجلة و أقعد جوه لحد ما اخلصها كلها
و بعد ما كبرت شوية
أنتقلت من قراية مجلات الأطفال
الى مرحلة قراية الجرايد
ثم قراية كتب بأكملها
و المذاكرة كمان
يعنى يوم الامتحان الصبح 
ألبس و أشرب فنجان القهوة الدوبل و أخد الأكلسير و اوصل للباب
و أقف شوية أفتكر ورق المادة اللى عليا النهاردة 
أنا نسيته فين ؟
نسيته فيييين ؟؟
فى الحمام طبعاً 
هيكون فين تانى ؟!!!
يا إما على الغسالة 
يا إما على حرف البانيو



عادة القراءة جوه الحمام دى
بقت متأصلة 
و نتناقلها جيل عن جيل
يعنى بابا كان بيقرى الجرايد 
 لما يحلق دقنه ويشغل إذاعة لندن 
عشان يسمع الاخبار
الجيل اللى بعد كدا اللى هوه
يبقى بسلامتى بقيت أقرى فى الحمام 
وأخد الكاسيت أشغل أغانى
يوسف بقى الجيل التالت
كان بيدخل الحمام و يقرى مجلات
و قصص و زيادة عننا 
ياخد الفيديو جيم الصغنن
يلعب فيه على ما ينتهى 
من أداء أحد حقائق الحياة



و هكذا تتطور سلوكيات الأنسان عبر الزمن يا جماعة 
و تتغير الأشكال
و يبقى الحمام
رمز التحضر و الراحة
و الثقافة كمان




و أستأذنكم بقى 
عشان أنا لسه مقرتيش جرايد النهاردة و هروح أعمل القهوة بتاعتى
و أخدها أشربها 
و أنا بقرى الجرايد فى مكانى المفضل




إيه فيه حاجة ؟؟
بتبصولى كدا ليه ؟!!
هشربها فى الحمام ... فيه مشكلة ؟؟!
آه منا نسيت أقولكم
إنى بحب أشرب قهوتى 
على الريحة !!

This entry was posted on الأحد, مايو 25, 2008 and is filed under . You can leave a response and follow any responses to this entry through the .

75 كــــلام بيطــبطـــب عـــلى قــــلبى و روحــــى

يااااااااه فاتيما أول تعليق.....
انا كنت داخلة من شوية ومش لاقيت حاجة وقولت ادخل تانى وكأن قلبى حاسس

بس بجد موضوع مميز ....تعرفى بقى إنك نصفتى باب الراحة ده اللى مهضموم حقه واللى الناس بتفتكر له الوحش وتنس له مش الحلو ده الحلو والنظاقة والآدمية كلها....

وتعرفى ان اتفاجئت ان فى الخارج لما وجدوا ان كتير من الناس بتحب القراءة فى الحمام ...اتبنى على ده كتب صغيرة مخصصة للدخول بيها فيها قصص ونكت وحاجات من دى واالشاب الأمريكي "دبليو. سي. بريفي" يعنى اسم دبليو سى نسبة اليه.....والغريب ان ده كان عام 1903
غير معهد ثقافة قراءة الحمامات اللى قاموا بانشائه

على العموم كل المعلومات على الرابط ده

http://www.islamonline.net/arabic/arts/2003/09/article14.shtml


تحياتى لموضوعاتك اللذيذة

معلش غلطة مطبعية احب اصلحها او بتلكك وعايزا اخد قصب السبق لصالحى

اتبنى على ده كتب صغيرة مخصصة للدخول بيها فيها قصص ونكت وحاجات من دى
( والسبب فيها)االشاب الأمريكي "دبليو. سي. بريفي

وشكرا لاتساع ورحبة مدونتك

هههههههههههه
ههههههههههه
بجد فطستينى على نفسى من الضحك
الحمد لله انتى اللى قلتى انك من العصر العثمانى يعنى انا ما كدبتش لما قلت العيد الماسى وبعدين الحمام حلو ومريح وبيت الراحة بس ما حبكتش الثقافة وسماع الاغانى فى الحمام طب لو حد مزنوق يعملها على نفسه يعنى علشان خاطرك
كان عندنا واحد فى الشغل بيدخل الحمام وياخد جريدة يخلصها فى الحمام ساعة اتنين هو وحظه كنت بتخنق منه بصراحة
وناس تحب تشرب شاى وقهوة على الريحة فى الحمام مش عارف ازاى
انا اسرع واحد يدخل الحمام ويخرج منه لما اكون مستعجل
بس فى الصيف احيانا بنسى نفسى شوية
وفعلا الحمام مهم جدا طبعا
تحياتى وتقديرى
خالد

الحمام هو المكان الوحيد إلي ممكن أدخن فيه في بيت أبويا، لما كنت عايش هناك طبعا كنت بدخل الحمام 15 مره :) .... بس بعد ما بلاد شاليتني وبلاد حطيتني وسبت بيت أبويا ييجي من 20 سنه كده، لسه لما أزورهم وأتزنيء في سيجاره لازم أدخل الحمام، لا يمكن أدخن قدام أبويا وأنا في السن دا :)

دخول الحمام لازم يكون بجرنال أو بمجله .... ودلوقتي لما الدنيا إتطورت بقي بالاب توب الوايرليس ... الإنترنيت ورايا ورايا، مش حتقدر تغمض عينيك ... لأ لأ ماتخافيش مبكتيبش التعليق دا من الحمام :)

تحياتي علي السيره العطره دي :)

موعدنا غداً لنتحد ولو لدقيقة
الساعة الرابعة عصراً نرسل رسالتنا الأخيرة
http://kawlansadida.blogspot.com/2008/05/blog-post_24.html

26.05.2008

القهوة بتشربيها على ريحة اية باضبط
هههههههههههههههههههههههه
اية يابنتى دة الحمام عندك دنيا تالنيه احنا عندنا بيحصل خناقات على الحمام الواحد مابيعرفش يتهنى بيه اول مايدخل الحمام تلاقى الخبط والرزع شغاااااااااااااال الله ينور
تحياتى لكى

الحمد لله ظهر الحق وزهق الباطل
احمدك يارب
انا كده مبسوط ومجلجل قوى
عارفه ليه
لانى لقيت ام زمل
ايوه ماهو انا برضه من ايام العصر العثمانى
وبكده هستشهد بيكى تحكى للناس عن العالم الكبير وحكيم زمانه فى العصر ده
العلامه عبده الرايق
طبعا فاكرانى اوعى تقولى نسيت
اما عن الحمام
اشكرك جدا جدا جدا
لان التدوينه دى خلتنى ادور فى الشقه لغايه ما اكتشفت بالصدفه البحته ان عندنا حمام

هههههههههههههه
خلاص شدي السيفون
الريحه وصلت لحد عندي
هههههههههه
تعرفي بقى اني زيك بالظبط
بموت في حاجه اسمها حمام بدخله في اليوم بمعدل 50 مره في اليوم
مش بقعد جواه كتير بس بحب طول ما انا قاعده اغسل ايدي اخد حمام
المهم ادخل الحمام وخلاص
وكل ما اروح اي مكان حتى لو كنت فين ومع مين
اسال اول حاجه
فين الحمام اللى هنا
مره كنا داخلين سينما انا وزمايلي
قلتهلم فين الحمام
قعدت هناك في الطراوه لحد ما الفيلم ابتدى
:))
فعلا بيت الراحه
ابقى تعالي صيفي عندنا

ههههههههههه

فاتيما اعتقد ان دة البوست المنفرد
فى حب الحمام ههههههه
بس تعرفى انا بعمل زيك كدة بالظبط
ومشكلتى بقى فى المجلات لو مش لقتها فى مكانها بتكون خناقة ههههههههه
لا والجيم بقى مش ولادى الى بيستعملوة لانى انا بستولى علية حضرتك هههه

فكرتك غريبة وجديدة من نوعها


دمتى اجمل قلب

رندا

اكيد هاتشربيها على الريحة

احسن لو زيادة ممكن تحصل تطورات مش مرغوب فيها

انا كنت احب اوى اكمل نومى فى الحمام
تلاقينى قعدت على رف البانيو وساعتها ماما كانت حاطة الغسالة فى الحمام
جنب البانيو
اقوم احط ايدى على الغسالة واعملها مخدة لراسى واخدلى تعسيلة كدة مافقش منها الا لما حد يخبط عليا علشان استعوئونى جوة

ده كان ايام المدرسة وهروبا من المذاكرة ادخل الحمام علشان انام شوية
لكن ايام الاجازة
ماكنتش بدخل الحمام الا علشان تلبية نداء الطبيعة او انى لا قدر الله اتهف فى نافوخى واقرر انى استحمى واشيل الجلخ من على جتتى

بس خلاص
سلام يا احلى فاتيما
اختك خيخة

اه صحيح يا فاتيما
لو رحنا نادى اكتوبر تيجى معانا ولا ما ينفعش
بلغينى علشان احتمال اجمع بعض حريم التدوين ونروح النادى وتبقى قاعدة حريمى فقط
وانتى مطلوبة بالاسم يا هانم وفيه حريم كتير عايزين يتعرفوا عليكى

ههههههههههههههههههه
الناس كلها يا فاتيما بتعمل كده .......انا بقى كنت مسمياه وزارة الثقافة...لما بابايا كان بيدور على الجرنال او المجله أ قوله فى وزارة الثقافه

بس تصدقى انا ابن خالى رفض عروسه علشان حمام بيتهم كان مكركب....يعنى اى حمام بيعكس صورة اهل البيت

يعنى المشكلة القائمه حاليا بينى و بين جوزى هوه الحمام ...خلاص فاض بيا و مليت من انى ادخل وراه علشان انشف مطرح الوضوء..ده غير انى حاطه سجاجيد جوه و عاملاه حكايه ...بس بموت و بتفرس و باتنرفز لما يكون بيحلق و لا يغسل و شه و تلاقى الحمام كله ميه
و بعدين سمعت ان الصفحه اللى فيها كلام قرآن حرام تدخل فى الحمام اقوم مقطعة الجرنال ستين حته هههههههه
واخد الفحة اللى فيها الكلمات التقطعة و دمتم...بس برضه على فكرة العياط فى الحمام مش كويس.....انا رغيت كتير...حروح زيك بقة

ههههههه
دا نتي بنت نكته رهيبة بقى .. طب والله انا كنت حاسه انك لو ركزتي شوية هتطلعي بلاوي
الله يحظك بقى .. بيت الادب ايوه انا فاكرة الاسم ده .. والله اسم روش زيك
يا ميمي يا شقية يا روشة..
شوية جد بقى اقول لك سر انا عندي نفس المشكلة اقصد العادة والحمد لله زوجي العزيز كمان .. من وجهة نظره ان ده وقت ضايع ولازمن نستفيد منه!!
طبعا ان بافطس م الضحك لان الوقت الضايع كتيييييييير قوي.. المهم استمري يا جميلة وفوتي خدي التاج اللي سبته لك عند البقال اقصد عند نور وزياد على البلوج سبوت
لازمن تجاوبي على التاج يحسن - بسم الله الرحمن الرحيم يجعل كلامنا خفيف- يقطعوا عنك النور وانتي ب تقري ف الحمام!!
حضونة كبيرة
زيانور

فزوووووووووورة ؟!
ـــــــــــــــــ
مكان بتقعد فيه مجعوص كده لواحديك
بابه مقفول عليك و عزلته تخبيك
حيطانه لو غلبان مدهونة زيت ألوان
و لو أنت غني يبقوا قيشاني أو سيراميك
و عجبي
KING TOOOT

طبعا الحمام فيه شفاط .. والنبي شغليه علشان انا خلاص .. وكمان والنبي حبه بخور يسندوني لحد ما اكمل زحف لغايه ما اخلص الكومينت ..

صدق من قال .. بيت الراحة
وصدق الشاعر العظيم الذي لا ادري من هو بالظبط
رايح الحمام اعمل مجلس ..

وفي مثل كمان بيقول
اعمل اليوجا في بيت الراحة
مثل صيني لم يسمع غنه الصينينن من قبل علشان انا الي مؤلفه

تحياتي

طيب كويس ان احنا لسة مشفناش حد بيدخل الحمام بالاب توب بتاعه ويا حبذا لو نت ستالايت ياسلااااااام
هو تقريبا كل اللي بتقولي عليهم بيدخلوا يعملوا حاجات جوه الحمام الا الحاجة الوحيدة المخصصة ليه هههههههه
وبجد انا مبسوط ان انتي ابتديتي تغيري من مووود الحزن

تحياتي

ممكن استاذن ومش اعلق على البوست الى عندك ده واقولك شكرا بجد على الاغنيه دى يمكن كنت محتاج اسمعها انا قريبت التدوينه اه وعرفت انها ببتكلم على احد معجزات الحياه وهى الحمام الى شهد بداياتى مع التدخين من وراء الاهل بس كنت محتاج الاغنيه قـــــــــــــوى

إيمو الجميلة
يا حبيبتى ميرسى على تشجيعك
و ميرسى اكتر على المعلومات الهايلة اللى أرشدتينا ليها
موش قادرة تنسى مهنتك و إنك مكتبات برضو و تحبى توصلى الناس لمصادر المعلومات ...
معلومة الاخ دبيليو سى دى أنا اول مرة أعرفها و مبسوطة الصراحة إن الأسم فكرته أصلاً جاية من القراية و الكتب و الثقافة برضو ...
الله ينور عليكى يا حبيبتى
و دمتى بألف خير

خالد
همس الاحباب
الله
جرى إيه يا خالود
إنت بتدخل التواريخ فى بعضيشها ليه؟؟
أنا بقصد بالعصر العثمانى
يعنى أيام الله يرحمه عثمان احمد عثمان
يعنى من السبعينات كدا أيام أبتدائى بتاعى موش اللى بتقول عليه دا
إنت يظهر عاوز درس تاريخ من بتوع الرايق ...
و الحمدلله مبيحصلش مشاكل عندنا خالص
أصل عندنا حمامين عقبال أملتك
تحياتى يا أبو همس

وجهة نظرى
يا شيخ
مبتدخنش قدام الوالد
طب و الله إنت راجل اخلاق و مراعى للتقاليد
عقبال ما تبطلها خالص يا رب
و لو كان عندى لاب توب كنت هخده معايا الحمام طبعااااا
بس متقلقش
هرش معطر و أفتح الشباك قبل ما ادخل على المدونة
دنتو حبايبى برضو
و شفيتم

wispers just for anighit
ربنا يسهل

رئيسة حزب الأحلام
معلش يا لولى
أصل أنا بقى بخدها من قصيره و أصحى عكس الناس ...
يعنى الحمام ملكى طول الليل ...
و بعدين عندنا حمامين أبقى إتفضلى
بس زمان كان عندى رزع و خبط برضو
بس أحب أطمنك إن دى مرحلة مؤقتة و هتنتهى
لما سعادتك تروحى بيتك و تلاقى الحمام بتاعك لوحدك أغلب الوقت تقريبا لأن المحظوظ بيكى هيكون أغلب الوقت بره أو نايم ...
يعنى أصبرى و هتنولى
تحياتى يا لولى

عبده الرايق
مااااشى يا عم
بس متنكرشى إن اغلب قرارتك الثورية و أفكارك التقدمية و مشاريعك الجهنمية كان الألهام بتاعها نازل عليك فى لحظة تجلى من إياهم فى الحمام ...
إعترف
و اطمن قوووووى
لما حد يسألنى عن عبده الرايق العلامة
طبعاااا هقول
و لا أعرفه

لماضة يا طعامة
ماشى يا مرمر
طششششششششش
و شوية معطر فشش فشاش
طب إنتى بتخشى الحمام نضافة و تطهير
أختك بقى بتدخله روقان و حصة قراية
و بجد أنا محبش اخرج أروح مكان أقعد فيه مدة طويلة من غير حمام ...
دى احد حقوق الإنسان يا جماعة
و تعالى إنتى صيفى عندنا عشان الشباك بتاعنا ورا السفون عدل
و موش هكمل بقى أنتى عارفة الباقى
باى يا طعامة

رندا
يا ماما أصلاً لما اخويا المتجوز ييجى يعدى علينا بعد الشغل اول مكان يدور فيه على جرايد النهاردة بيكون الحمام
إحنا أصلا حاطين كرسى مخصوص عشان نحط عليه الكتب و المجلات و يا ويله اللى يحرك حاجة من غير أذن صاحبها ...
و الفيديو جيم دا لوحده حدوتة
بس أيام يوسف ما كان موجود
كنت بقعد أقوله خلى بالك يا بنى
خلى بالك يا بنى
لحد ما مرة وقع منه واحد فى التواليت
و موش عاوزة أقولك اللى حصل بعدها ...
عشان محدش يقولى يا مقرفة
بصوت عالى ...
تحياتى يا رندا

خواطر رئيس شاب
لأ
ما انا ساعات بشرف نسكافيه برضو

بت خيخة و أى كلام
بت يا نونو مانا كنت بتهرب برضو من المذاكرة بدخول الحمام بس حكاية النوم دى معملتهاش الصراحة خالص ...
و بعدين فين نادى اكتوبر دا ؟؟
بعد نادى سبتمبر كدا ؟؟
قولولى فين عشان أعرف أقنع ماما و اخد الموافقة على وصلة السنكحة دى ..
و إمتى بالظبط كمان عشان أشوف المعاد متوافق عليه من الرياسة و لا لأ ...
و امنى ينفع عشان عاوزة أشوفك يا هرابة و أشوف باقى حريم النت الجميلة
و كلمة مطلوبة دى موش مريحانى ...
تكونوش هتتلموا عليا و تنزلوا فيها ضرب عشان البوست المقرف دا ...
طب خلاص خلاص حرمت
هستنى التفاصيل بقى
و بوسة لشيكو
متقلقيش غاسلة إيدى و منشفاها بالفوطة أهو

واحدة مفروسة
يا فروسة إنتى بتقولى عليه وزارة الثقافة ...
أيام الجامعة كنا مسمينو العميد ...
كل شوية حد يسيب أكلسيره معانا ...
- رايح فين يا بنى ؟؟
يسكت شوية و يقول
- رايح عند عميد الكلية
قوم كلنا ندعيله ربنا يفكها عليه
و بعدين أيوه كدا
أنا احب الستات الروشة دى اللى تدلع الحمام كدا و تخلى جوه مميز ...
أنا عملت كدا و حطيت صور و ستيكرزات ليوسف فى الحمام عشا أشجعه يقعد جواه و ميخفش عشان فى الاول كان بيخاف يقعد لوحده ...
طمنتى قلبى و الله
يعنى موش لوحدى اللى عندها العادة دى
و المولع بالقراءة عموما مبتفرقش معاه الاماكنى و ريحيتها
طب كده تمام
سلامى لزوجك العزيز و أشكريه على ذوقه الحلو فى إختيار مراته

سارة
و إنتى سكر مكرر

زيانور
يا إخوننا ربنا يريح قلبكوا
و يريحكو عموما
يعنى موش أنا لوحدى أصل زمان لما كنت أقول إنى بقعد أقرى و أذاكر فى الحمام
كانت نظرات الإستنكار و القرف تلاحقنى زى ما اكون عملت الى ما يعمل ...
بس طمنتونى على روحى
و جوزك راجل حكيم و بيفهم و الله
الوقت دا مهدر طب ما نستغله خصوصاً وقت النزول للشغل و الجامعة و المدرسة
هنقرى امتى و نشرب الشاى و لا القهوة امتى و لا نلحق نصم الكلمتين اللى قبل الأمتحان إمتى ؟؟؟
و يا ستى هروح حاضر استلم التاج و أمضى إستلام
تحياتى لحبايبى نور و زياد

وليد يا راعى الملك
أنا عاااارفة الحل
القصرية
صح ؟؟!!!

أحمد مبارك
للأسف معندناش شفاط
إستنى ميغماش عليك
عندنا شباك بحرى مفتوح علطول و عليه شبك
و عندنا معطر جو بريحة الورد البلدى
وواحد بالياسمين
و مفيش بخور حالياً عشان خلص
موش عاوزة أقولك إن مراية الحمام هى أكتر مراية بحب أقف قصادها و أحط الجبنة
أحمد ...
احمد ...
مبتردش ليه ؟؟
أستنى مراية الحمام عليها كولونيا
فش
فش
يا لهوتينى
الواد فيص !!!

hero
لأيا محمد موش تصحصح كدا معايا
وجهة نظرى رابع تعليق أعترف أعترفات تفصيلية مفاداها إنه بياخد معاه الاب توب الحمام ...
و الراجل كويس و بعقله الحمدلله
و الواحد ممكن يعمل أى حاجة فى الحمام مدام متخذ وضع الجلوس ..
يعنى ساعات كنت اقعد أخيط او أكتب ملحوظات ...كدا
ما نت قاعد على كرسى يا بنى و إيديك فاضية و الأيد البطالة إيه ؟؟؟
و ميرسى يا محمد على إنك مهتم بتغيير الموود
قلبك فيه الخير
بس موعدكش إنى هفضل كدا كتير أصلى اوقات بقلب و تطلع منى حركات ندالة فخليك مستعد برضو لكل الإحتمالات
و تحياى يا بطل

رئيس جمهورية نفسى
يا محمود إنت فيك حاجة لله
أصلى النهاردة قريت بوست لنرمين صاحبة مدونة كلاكيت تانى و تانى
و كنت عاوزة اهديها غنوة مخصوص عشانها و قررت من اليوم أنى احط تنويه على جنب إنى كل غنوة جديدة احطها هشغلها مخصوص عشان حد بعينه تحية منى ليه ..
بص جيت أغير الغنوة لقيت تعليقك ..
قولت خلاص خلى نرمين لبكرة و خليك إنت النهاردة عشان الغنوة عجبتك قوى كدا
و تحياتى يا محمود
إنت بس تؤمر و أختك تنفذ
تحياتى لأميرة الصعيد
و لشقيقها اكثر رئيس جمهورية متواضع شفته فى حياتى

ههههههههههههههههههههه
انا كمان بحب حاجه اسمها حمام بس عند بابا كنت بعمل زي خيخه كنت كتير بتروح عليا نومه لو صاحيه من النوم بدري اخد تغفيلة كدا في السريع وكمان كنت بستخبي فيه لو بابا زعقلي كنت اجري علي الحمام واقفل علي نفسي هههههه

ودائما بحب الحمام دائما ومتوضب كدا يعني الحمام بتاعي بستريح كدا نفسيا لما اخلية نظيف ومفروش
ايوة مفروش فرش الحمام من الستارة لي ستارة البانيو وفرش الارضية وكل يوم عندي ادمان لازم اغسل الحمام مع اني الاستخدام لي اتنين بس بس بحب كدا اشوف لمعه في السيراميك كمان بقي ممكن تلاقيني اقعد فيه لما الدنيا تبقي حر بحس انه طراوه اوووووي

ودلوقتي بقعد فيه كتير لما نور عاوزة تعمل بيبي بقعد علي طرف البانيو استناها وممكن القعده تطول اعبال ما تخلص ههههههههه

بس عيبي بقي لو هموت محبش ادخل الحمام عند حد الا لو حسيت اني الحمام نظيف وهيكون برضة غصب عني

فعلا يا فاتيما الحمام ده مهم جداا في حياه الانسان

هههههههههههههه
حمامات قوم عند قوم جواهر
بس بجد الحمام دا اهم مكان في البيت هو والمطبخ طبعا

ههههههههههههههههههههه
عسل يا فاتيما

على فكرة انا جيت الحفلة والتفاصيل عندي في مدونتي نوريها هتعرفي ايه اللي خلاني ما عرفتش اشوفكم
باذن الله تتعوض بقى
تحياتي وتقديري

افففففففففف انا داخله وقافله مراخيرى كده برضه هههههههههه
عارفه قصه القرايه دى عند ناس كتير قوى قوى بس مش عارفه ازاى انا الاستمتاع الوحيد بالموضوع ده هو الشاور اه بخور ومعطر وتأخدى شاور اوك انما حاجه تانيه الواحد ما بيصدق يجرى
ههههههههههههههههههههههه
بس بجد ضحكتينى قوى
هو انتى اتعديتى من خيخه وهتقلبى المدونه روائح واصوات ولا ايه

انا ذيك أحب أقري في الحمام .. بس لما أتجوزت جوزي محرج عليا القراية في الحمام بيقول حرام تدخلي بكتاب او جرنان احسن يكون فيه كلام ربنا فبطلت اخد الجرنان عشان صفحة الوفيات والأدعية اللي بتبقي فيها ... بس ده مايمنعش اني ساعات باخد كتب واخبيها تحت هدومي وأنا داخلة الحمام عشان ماأتهزقش وأإديها قراية وأقفل الباب بالمفتاح عشان ماحدش يعرف أنا بأعمل ايه جوة .. والحمد لله العلي العظيم ان بقي عندنا حمامين يعني لو نسيت نفسي وبت جوة ماحدش هايخبط يخرجني

ههههههههههههههههههه
يا روايحك يا فاتيما

تصدقى انا عندى حمامين علشان الحكاية دى
لان جوزى من عينة ثقافة الحمام و الولاد معندهمش تفاهم عايزين ندخل يعنى عايزين ندخل والا .. طبعا و الا دى كارثة
علشان كده الحمام التانى نجدة لنا

انا كنت زيك زمان يحلا لى البكا فى الحمام و اخرج فريش جدا ولا كأن اى حاجة حصلت كأنى المراة الحديدية :)

عارفة احلى حاجة فى البوست ده ايه ؟
انك اكيد ضحكتى من قلبك و انتى بتكتبه :)

نادى اكتوبر فى محافظة اكتوبر اللعينة

انا كنت بفكر اعمل يوم حريمى بحت ونتجمع فيه ونقعد ننم على باقى خلق الله

مبدئيا اللى كنت هاقولهم
رودى وبنتها
وابى
ودوبا وابنها
وشاهى وبغبغانتها التلاتة
ودعاء وبنتها
وانا وشيكو
وكان هيبقى الجمعة اللى جاية لأ اللى بعدها
يعنى اول جمعة فى شهر يونيو
كانت هتبقى 6 يونيو تقريبا

الاول كنت ناوية نتجمع عندى فى البيت
نتغدى وبعد كدة نطلع على النادى
ومتخافوش كنت هاوزع هانى يعنى القعدة فى البيت هتبقى حريمى وعيالى فقط

ها قلتوا ايه
الغايب يعلم الحاضر
وتبلغونى بالموافقة علشان اعمل حسابى اعمل غدا ولا ماعملش

بس خلاص
سلام
خيخة

ههههههههه

الحمام بيت الراحة والهروب من اى شىء يتعب ووممكن نجبر علية زى ما قالت

ام يوسف

ياترى لو ابنك عمل كدة هتعملى اية .,؟

ربنا يكرمك ويوفقك

تحياتى

فاتيما يا حبيبتى

الشعوب المتقدمه تقاس من مدى تحضر حماماتها فى الشوارع والاماكن العامه

مش زى عندناحاجه تقرف

انا برضه واخواتى عندنا عاده القراءة فى الحمام من اول ميكى لحد كتب الدراسة
تحسى كده انه مكان للتفكر والتامل كده وتنزل الافكار على البنى ادم وهو قاعد على كرسى العرش

وتلاقيه خارج يقول يوريكا يوريكا
وجدتها وجدتها زى صاحبنا ارشميدس

واضح انه مكان ولاده النبوغ والعبقرية
تحياتى يا قمر

هو انا لسة قايل الكلام ده ان اللي اخترع الحمام ده عبقري بس مش لدرجة القراية في الحمام يعني بس تعرفي ان في الدول الاوروبية وامريكا معندهمش شطاف
تفتكري الناس دي علي قد ما هم نضاف كدة في لبسهم أكلهم وشوارعهم مستحملين يعيشو من غير شطافة ازاي ؟؟

يا تيما اية الجمال دة انتى بقيتى كاتبة تجننى قوى الموضوع متماسك جدا ولذيذ وتغيير عن نوعية بوستاتك السابقة واعتقد ان وجودك وسط المجموع فالبورصة عمل فرق فنفسيتك وحسيتى ان جنبك ناسبيحبوكى بجد وياريت تنزعى الغلالة الرقيقة اللى حواليكى شوية بشوية
انا مش سامعة اى اغانى ع مدونتك فية اية حد بيعمل فية مقلب ههههه هحاول ادخل واطلع يمكن اسمعهامتشوقة اعرف حاطالى اية هههههههه تحياتى يا احلى ام

تصدقي اني دلوقتي بصمت بالعشره اننا اخوات

انا اول ما اقوم من النوم .. اعمل الفيسكافيه بلاك .. واخد الجرنان .. واخش اتعايش بروقان

انتعاش فكري حقيقي

وبعدين الحمام ده كيف على فكره .. يعني انا مش فاهم الناس اللي تدخل الحمام خمس دقايق وتطلع دي عايشه ليه
الحمام مكان ليه احترامه وكيانه الخاص
لازم ياخد حقه
هو اي مكان والسلام ولا ايه
ده بيت الراحه
محل الادب
الكنيف
المراحيض
وتعددت الاسماء .. والقعده واحده


ملحوظه
ايوه اظهري الجانب الساخر اللي جواكي ده ياشيخه .. خلي الناس تعرف اننا اخوات بجد
وحاجه كمان .. انا مانستش اسمك في البوست لما اتكلمت عن التاج .. وروحي شوفي بنفسك
وش واحد عامل نفسه ناصح



سلامووووووووز

انا بقى يا حبيبتى عاويه رغاوى زى الافلام العربى القديمه

ههههه
قهوه..ع الريحه

موضوع القرايه فى التواليت ده مزاج عند ناس كتير

بس انا اخويا مره قالى ان الحمام معمول لهدف تخلصى هدفك..وتطلعى علطول
حاجه كده عشان اللهم احفظنا ..

تعرفى اجمل حاجه فى الحمام فعلا انه له خصوصية مش لاى مكان تانى
علشان كدا شرب السجاير فيه بيكون بمزاج انا مجربتش قارى فيه رجايد بصراحة قبل كدا ولا مجلات لكن جربت فعلا لما اكون مخنوقة ومش عايزة حد يشوف دموعى بنسحب مباشرة علي الحمام واخلص كورس البكاء والشحتفه على راحتى وبمزاج واغسل وشى وكان مفيش اى حاجه
تحياتى يا جميله

تيما هقتلك مش لاقية الاغنية مش ظاهرة عندى هموتك بجججججججججججججججججججججددددد

هههههههههه

قهوة فى الحمام

بالهنا والشفا يارب

والله بوست جميل قوى

دورة تدريبية فى فوائد الحيمام

ايوه الحيمام


ربنا يحفظلك يوسف يارب ويحميه
يارب

كل الحب

ومن يجروء على ان يقلل من قيمة هذا المكان الرائع
بجد بوست جديد وفريد من نوعه ورائع جدااااااااا
دمتى بخير

اول مره اقرألك بس بجد لذيذه
انا كمان مهما كان تأخيرى عن الشغل ..ال break بتاع الحمام ده شيئ مقدس

بنوتة مصرية
ام نور القمر
أيوه فاكرة حكاية التواليت دى مع يوسف
كنت بدخل أقعد قصاده على الأرض و أجيب طبق غويط و أقعد عليه الدبدوبة بتاعته عشان تعمل تواليت هيا كمان
و أقعد أشجعهم هما الأتنين مين اللى هيخلص الأول و طبعا طبقها اللى هوه المفروض التواليت يعنى بيبقى فاضى و يطلع يوسف أشطر منها ...
دا غير الصور و الأستيكرز و الألعاب و القصص اللى بتتحط على كرسى على جنب إستعدادا لدخول يوسف أفندى فى أى لحظة ....
وملحوظة غريبة بقى عشان موضوع الطرواة اللى قولتى عليه دا أنا ملاحظة أن أغلب شبابيك الحمامات اللى دخلتها فى بيوت فى حياتى بتبقى بحرى ؟؟
ربنا يخلى نور و أم نور و الحمام دايما بيبرق

سنووايت
لاااا
الحمام بس
المطبخ لأ
مقولنا مبحبش الطبيخ يا أميرة الحواديت ...
خلينا فى الحمام و بسسسس

nonoymm
قريت يا نونوييم البوست بتاعك و معلشى تتعوض
بس المرة الجاية تعالوا فى المواصلات أصل وسط البلد دى ماسأة فى الركنة و العربيات ...
معلشى يا حبيبتى المرة الجاية تيجى و أتشرف بمعرفتك إنتى و الناس الحلوة اللى جت معاكى

آبى الجميلة
يا احلى كوكب
يووووه
معلش يا بيبى نسيت أحط مشابك على باب البوست عشان تسدو مراخيركم
المرة الجاية لما آجى أتكلم فى موضوع ذو روائح نفاذة هبقى أفتكر الجزئية دى
و الشاور دا بقى قصة تانية خالص
تأتى بعدين المهم السبب الأساسى و مستلزماته يعنى نتسلى على ما نخلص
و بقيت زى خيخة ؟؟
هوه أنا أطول يا بيبى ؟؟
دى أستاذتنا كلنا
طعم و لون و رااااائحة

مفقوعة مرارتها
و بعييييين فى الراجل دا بقى ؟؟؟
موش كفاية إن فيفى تبقى أمه و سكتنا و أستحملنا ..
كمان هيقفلنا على باب الحمام يقول إيه يدخل و إيه ميدخلشى ...
يا بنتى إنتى ملكيش غير الأربعة بتوعى يقدوا معه قد ساعتين كدا يعرفوه أهمية القراءة للجميع ...
دنا بقولك حاطين كرسى مخصوص كأنه رف يتحط عليه الجرايد و المجلات و الكتب
تقوليلى بيمنعك ؟؟؟
أبعتهم !!
أبعتهم يا بنتى ؟؟
طب خلاص
بلاش المرة دى

قوس قزح
دوللى حبيبتى
و إنت موش معانا يا حاج فى الموضوع دا و لا إيه؟؟
ملكيش يعنى فى القراية جوا الحمام ؟؟
طب لما أفسد اخلاقك و أشجعك
جربى كدا
صدقنى هتلاقى التركيز و الروقان كله نزل عليكى و هتتعودى ..
انا دلوقتى بدخل الحمام عشان أقرى الجرايد
موش بخد الجرايد و انا داخلة الحمام ...
و حكاية المرأة الحديدية دى كانت بتحصلى ...يظهر كلنا كنا هذه المرأة فى يوم ما ..
وحشتنى يا دوللى بجد

بت خيخة و اى كلام
سكسة أكتوبر ؟؟؟
لاااااا
لا يا ماما لااااا
دنا أقول ما أقول للحاجة هتحدفنى باللى فى إيديها طوالى
أنا مسمحولى بالتحرك فى نطاق القاهرة و ضواحيها
و موش أى ضواحيها كمان يعنى ضواحى بعييييدة ممنوع و أقعد ساكتة متكلمشى كتير و أوجع قلبها ...
دا زائد إنى موش مسموحلى بالزيارات المنزلية عند أى حد ...
متسأليش ليه بس هوه كدا و مفيش داعى أتناقش كتير عشان النتيجة فى الآخر هتبقى منتيش رايحة و خلاص
طب يعنى لو ينفع مكان تانى يبقى كتر خيركو
لو منفعشى مشى معادك زى مانتى عاوزة و أجلينى أنا لوقت تانى و مكان تانى ..
و بعدين إيه حكاية الغدا اللى عندك دا ؟؟
إنتى ناوية تعمليلنا مائدة الرحمن و لا إيه
أنا لما نتقابل نبقى ناكل بره فى مطعم أى حاجة و ندلع روحنا كدا
دا زائد إنك عاملة دعاية زفت لطبيخك و عاوزنا نيجى بعد الكلام دا أزاى ؟؟
بهزر
بهزر
متبصليش كده
أنا قصدى ندلع روحنا فى اليوم دا و منشيلش هم الاكل و الواجبات المنزلية دى ...
عموما أنا قولتلك اهو بصراحة على الموقف بأبعاده
و فى إنتظار أى مواعيد آخرى تناسبنى
و تحياتى يا نونو و بوسة لشيكو

tamer nabil
بص بقى إنت بالذات أنا ضميرى واجعنى علشان خاطرك
لأنى فكراك كويس و فاكره إنى قرفتك بالتخبيط فى عكازينك أكتر من مرة و كنت و الله عاوزة أتكلم معاك بس حسيت إنك معنكش رغبة للكلام مع حد أو مستنى حد معين و مجاش فخفت أتكلم معاك ..
بس ندمت بعد كدا و المرة الجاية لن أتردد بعد الآن
و بعدين بخصوص موضوع الحمام و القراة و يوسف لما يعمل كدا ..
طب ماهو بيعمل كدا و انا اللى معلماه بنفسى ...
قصدك على السجاير يعنى ؟؟؟
لااااااا
دنا كنت أهد الحمام على دماغه
أل سجاير أل
نورت يا تامر

هههههههههه فكرتينى بزوج عمتى السابق اصل احنا الازواج عندنا معظمهم سوابق
كان بيحب يشرب القهوه فى الحمام
انا الحمام بالنسبالى بيت الاحلام اشد السيفون واقعد احلم فى هدوء وبموت اغنى فى احمام غلبت ماما تقولى العفريت يطلعلك العفريت يركبك مفيش فايده اللى هى مش قادره تعرفه ان العفاريت بتطفش من صوتى فى الحمام
تحياتى ليكى سومه_87

اهوده عيبه
إنتى متاكدة يا بنتى إننا موش أخوات تؤام
و بعد كدا فصلونا عن بعض فى فيلم عربى زمااااان
أصل أنا و انتى متشابهين فى حاجات كتير قوى قوى بشكل مخيف ...
الأرواح جند مجندة
و إحنا الحمدلله إئتلفنا و اتلاقينا
و ساعات و الله حكاية يوريكا دى بتحصلى لما اكون بفكر فى حاجة و فجاة كدا الاقينى وصلت لتفسير و نتيجة مكنتش شايفها قبل كدا ...
تحياتى يا بيبو

tamer sala7
لا أنت بتسأل سؤال فنى بحت
بس هجاوبك برضو
الأجانب معندهموش شطافة بس عندهم خرطوم معدنى كدا بديل بيستخدم محل الشطافة
و الناس الغنية شويتين عندهم حاجة أسمها بيديه يعنى شبه التواليت كدا و فيه دش صغير بيحل محل الشطافة
و كفاية كدا عشان الناس اللى بتقرف
متدعيش عليا و عليك

كلاكيت تانى و تانى
طبعا يا نرمو
حد يقابلكو و معنوياته مترتفعشى
كمان انا عاوزة أغير المووود عشان مكتبش حاجات حزاينى
أنا حطالك غنوة روق أعصابك بتاعة لورا خليل ...
و الله بتشتغل عادى عندى كل ما ادخل المدونة يمكن طيب الصوت عندك فيه حاجة ؟؟

soooo
يعنى هوه أنت كنت مستنى البوست دا عشان تصل الى هذه الحقيقة يا سووو
ربنا عالم مكانتك فى قلبى و بلاش أقول كتير عشان بقيت أحس إنك بتحرج قوى
و بعدين و الله انا كنت بقول كلمتك دى على الحمام و النوم
أقول لماما خمس دقايق دول يعملوا إيه فى الزمن دا ...
و اللى يقولك هنام ساعة كدا و أبقوا صحونى !!
ساعة إيه دى اللى بيناموها ؟؟
دا نا بعوز ساعة عشان أدخل بس فى النوم ...
ناس غريبة
أبقى فكرنى أكتب بوست عن النوم يا سووو
بجملة الفضايح بقى
و تحياتى يا اخويا الغالى
الحاجة بتسلم و تدعيلك

dodda
الرغاوى دى بتاعة يوسف بقى
كنا نملى البانيو و يعوم فيه مع البطة و ألعاب البحر و البالونات و كل حاجة بلاستيك ...
و بعدين اللهم ما احفظنا دى أنا مبصدقهاش قوى
اللى هيتأذى عموما موش هتفرق معاه جوا الحمام و لا براه
اللهم ما احفظهم هما منى بس
تحياتى يا حبيبتى و احلى حاجة صورة مى عشان كل ما توحشينى أروح أبص عليها

قطة الصحراء
أيوه كدا الناس الرايقة أهى بتؤكد على كلامى
جربى بقى القراية يا قطة هتلاقى نفسك دماغك متظبطة و كمان بتختصرى وقت عشان بتعملى حاجتين فى وقت واحد
يعنى بلغة الحمامات
2*1
تحياتى يا قطتى الحلوة

كلاكيت تانى و تانى
يا حبيبتى انا مشغلاها اهو
موش عارفة أعمل إيه ...
طب عموما هيا بتقول
روق أعصابك
اوعى إنت تكون مهموم
و أحسب حسابك
إن ما فى شى بيدوم
أحترت كتير كتير
عم تحلم بالتغيير
خبرنى شو بيصير
لولا بتروق أعصابك
بعرف إنك مجروح و الدمعة فى عينيك
بدك تنسى و تروح و القصة صعبة عليك
وسع قلبك شى شوى
بيحكو يحكوا شو عليك راح
تسمع بعد كتير
روق ...ما تحرق أعصابك
بتقل موش معقول اللى عم بتشوفه حواليك
بالآخر شو ما تقول راح تبقى الحالة هيك
القصة طويلة كتير
و أنا مثلك همى كبير
ما بيسوى ما بيصير
تبقى هيك مسكر أبوابك
روق أعصابك

كاميليا
يا زهرة الكاميليا
الحيمام دا عالم يتسع لكل ما يمكنك تصوره
للمذاكرة و شرب القهوة و الكتابة
و الخياطة
و ساعات تقسير البطاطس عشان مفيش وقت ...
يعنى حاجات كتير مدام البنى آدم عايش و فيه نفس يبتكر ...
دمتى بكل خير و مبسوطة قوى بمجييك هنا

monaliza
يا مونا ازيك
موش تقليل من قيمته بس أصلى لما كنت أقول لحد كنت بقرى الجرايد و لا بذاكر فى الحمام يبصلى بصة كدا موش لطيشفة خالص ...
نظام أزاى تعملى كدا يعنى ؟؟
طب دا أروق مطرح فى الدنيا
نورتى يا حبيبتى و ميرسى دايما كدا مشجعانى

mohra
اهلا بيكى و الحمدلله جايلى فى بوست موش نكدى بس موش دايما هتلاقينى كدا ...
طب كويس و الله
أدى الناس اللى بتقدر قيمة الحاجة الغالية لما تشوفها
نورتى

سومة مجنونة فى بلد عاقل
لااااا يا سومة دا الغنا دا عاوز بوست لوحده
بصى أنا كنت بأخد الكاسيت و اسمع فيه و أعلى الصوت عشان أغلوش على صوتى
أصلى بتسلطن قوى و أنا بغنى فى الحمام و أحلى صوت يطلع منه و لا أجدع أستوديو فى مصر ...
أهو بيشجع الواحد يطلع اللى جواه و بيكتشف المواهب
و إيه حكاية الازواج السوابق اللى فى عيلتكو دول ؟؟؟
طب ما الراجل كدان دماغ و بيشرب قهوته فى الحمام أهو و عال العال
طفشتوه ليه يا بنتى ؟؟؟
يللا
ملوش فى الطيب نصيب
و نورتى يا ست العاقلين

الحمام انت متعرفيش ياحماتي الحمام
ده بالنسبه ليه ايه ياخرابي علي الحمام
انا وانا صغيره كنت شقيه مووت طبعا دلوقتي
عقلت عشان تجوزيني يوسف
كل ما ماما تكون عاوزه تضربني ولاحاجه
اجري علي الحمام تقوم تخاف عليه تقولي اطلعي يابنت وانا مش هعملك حاجه
وبقيت اعمل اللي يعجبني ومتقليش حاجه عشان
بتخاف لاجري علي الحمام
وكنت مش بحب المذاكره خالص اقوم ادخل الحمام واقعد بالساعات
ماما تقولي ده كلام
اقولها مدخلش الحمام يعني
ده انا من غير الحمام اضيع

ميادة يا قاف ميم
معلشى يا حبيبتى لسه واخدةبالى من التعليق دا حالا ...
بصى متقلقيش لو ليكى فى يوسف نصيب هخدلكو شقة أربع حمامات و صالة ...
يعنى براحتك على الآخر
و سلامى لمامتك العزيزة
حمات إبنى

إرسال تعليق