.

.

جـوا الأودة ... برا الأودة  

Posted by: فاتيما in

فترة الحمل
دى أجمل فترة ممكن تمر بيها أى ست فى الدنيا
صحيح ترجيع اول خمس شهور عمال على بطال
و قريفة فى المزاج
و كل حاجة ريحتها بايظة و طعمها متغير
و اللبس مقاسه مضروب فى عشرة
بس دا كله و لا حاجة جنب كل المميزات الآخرى
يعنى دا ييجى إيه جنب أن الناس اللى حواليك فى أى حتة تروحها
يفضلوا يدلعوك دلع
ما بعد المرىء بشوية
يعنى أى مكان تتواجد فيه ست حامل تسمع كلام من عينة
- أتفضلى أقعدى هاتوا كرسى للمدام بسرعة
- متشيليش حاجة يا ستى أنا اللى هشيل
- الدنيا حر تعالى قصاد المروحة أنتى
- خليكى فى مكانك و أنا هجيبلك الحاجة لحد عندك
- لازم تشربى حاجة بقى لا البيبى يزعل مننا
- كلى تانى إنتى بتكلى لأتنين دلوقتى
- محدش يضايقها لحسن البيبى يطلع عصبى
- نامى براحتك و أى حاجة تبقى تستنى
يا لهووووى
إيه الهنا اللى الواحدة كانت فيه دا ؟؟
طبعاً أنا بتكلم عن الحمل لأول مرة
و معرفشى بعد كدا المرات التالية بيبقى شكلها إيه
بس أتصور إنها مش زى اول مرة أبداً
ناهيكم بقى عن إحساسى الشخصى
يعنى كل السعادة اللى فى الكون متجمعة فى قلبى
ربنا كرمنى و هبقى أم
يعنى الحلم اللى قعدت أحلمه من و أنا عندى خمس ست سنين
و ماسكة عروسة بلبسها و أسرحها و أغنيلها عشان تنام
زائد إحساسى الطاغى بأنوثتى لأول مرة فى حياتى
و محدش يستغربها لكن دى حقيقة فعلاً
انا محستش إنى إنثى مكتملة إلا لما بقيت أم
مش لما إتحبيت او لما إتجوزت
طبعاً كل ما يتعلق بالمرحلة دى فضل راسخ فى ذهنى و عقلى كويس قوى
لأنى كنت متاكدة إن هييجى يوم
و هتسأل عنه
من صاحب الحق الأصيل فيه
يعنى كتير كان يوسف يسألنى و بشكل مفأجى
- ماما
- نعمممم
- بسرعة لونيلى وشى عشان الماتش خلاص هيبتدى ى ى ى ى
- طيب طيب مصربع على إيه مالنتيجة معروفة و الأهلى هيغلب كالعادة متقلقش
- أنا لولعبت معاهم هجيب عشرة أهداف لوحدى
- آه مانا مخلفة كابتن ماجد شخصياً
- أنا شاطر فى الكورة يا ماما مش مصدقانى ؟؟!!
- لأ إزاى ؟!! أنت بتلعبها من و إنت فى بطنى أصلاً
- ......؟؟؟؟
- أه و إنت جوا بطنى تسع شهور مكنش وراك حاجة غير لعب الكورة و التشلييت
- هاها ... يعنى لعبت كاس عالم فى بطنك
- أيوه إتريقأ إتريقأ
هات وشك و غمض عينيك يا بعجر عشان الألون متدخلشى فيها
طبعاً يوم الولادة لما الدكتور قالى هنعمل قيصرية كنت متضايقة قوى
عشان المشهد اللى طول عمرى أشوفه فى الأفلام لما الست تولد
و يجيبولها البيبى بين إيديها
كان هيفوتنى خلاص
بس بعدين بقيت ممتنة للطب قوى
إنى خلفته بعملية قيصرية
عشان لما يسألنى سى يوسف مستقبلاً
أنا أتولدت إزاى ؟؟
مبقاش مضطرة أقول حاجات مش عارفة هقولها إزاى
يعنى اكيد الاجابة هتختلف عن إجابتى زمان
لما اخويا الصغير سألنى عن الموضوع دا
و كان عنده وقتها 9سنين
الحقيقة لحسن الحظ إن القطة السيامى بتاعتنا وقتها كانت حامل
و جت ولدت فى سريرى
ساعتها ندهته يتفرج عليها و هيا بتولد فى الخباثة كدا
و بصراحة الواد كان ذكى و أستوعب الفكرة لوحده
عشان كدا بنصح بتربية الحيوانات الأليفة اللى زى دى
عشان بتجاوب على أسئلة يمكن نحتارإحنا البنى آدمين بعقلنا فى صياغة إجاباتها
بس هل يتوقف العقل المدهش ليوسف عن السؤال
و لو بشكل تعجبى
- ماما فيه أصوات جوا بطنك !!!
- آه يا حبيبى عشان جعانة فمعدتى بتقولى اكلينى
- طب ما تاكلى
- أصلى عاملة ريجيم و باكل حاجات بسيطة و معدتى كانت متعودة تاكل كتير
متخدش فى بالك هيا كمان شوية هتسكت
- أنا إزاى كنت قاعد جوا من غير أكل يا ماما ؟!!
- ماهو يا حبيبى أنت كنت قاعد فى كيس كبييير كدا زى ما يكون
أودة مخصوص علشانك
و باب الأودة دا بينه و بين معدتى
ممر طويل أسمه الحبل السرى
بعد ما اكل الأكل ينزل فى معدتى تروح إنت عامل دليفرى و تطلب أوردر
تيجى المعدة تخبط على باب أودتك
زى عمو بتاع التوصيل
تروح سيادتك فاتح الباب و واخد الاكل و واكله
- طب و كنت بتسلى بإيه جوه الأودة دى ؟؟
- غير كاس العالم و الكورة طبعاً
كنت بتلعب بوكس
عارف البتاعة المتعلقة فى السقف و الملاكم بيقعد يضرب فيها دى ؟؟
- آه شوفتها فى الكارتون
- أهو معدتى بقى كانت البتاعة دى و كل شوية حضرتك تلعب بوكس
أروح أنا أعو أعو
( دا لفظ معناه التقيؤ و الترجيع متعارف عليه بينى و بين يوسف )
- هييههه
- بتضحك يا مجرم ؟؟!!
- أنا كنت بلعب معاكى يعنى
- لااااا مانا جيت بعد كام شهر لما إنت كبرت شوية
و بقيت راجل كدا قد خمس شهور و نص
قعدت اكلمك و أتفقت معاك و طلبت منك متعملشى كدا تانى
و إنت سمعت الكلام و مبقتش تضرب عشان إنت شاطر و بتحب ماما صح ؟؟
- صح
- إنت حبيبى يا يوسف
طبعاً الخيال الواسع اللى عنده موقفش عند مجرد التواجد داخل هذا المكان الضيق
و بدأ يفكر فى طريقة وصوله للدنيا
- أنا هحط الشمعة فى التورتة بنفسى و أولعها كمان
- حطها بس ملكشى دعوة بالكبريت إحنا متفقين على إيه ؟؟
- يا ماما أنا كبير و بقيت عندى سبع سنين
- يا حبيبى أنت كبير و كل حاجة بس الكبريت و النار خطر
و حتى الكبار اللى زيى بيحصلهم حوادث
و بعدين من فضلك متزعلنيش النهاردة عشان عيد ميلادك دا اهم يوم فى حياتى
- يا سلاااام بتضحكى عليا
- لأ طبعاً فى اليوم دا من سبع سنين روحت المستشفى و بتألم
و خرجت منها و أنا شايلاك على إيدى و سعيدة جدا
أن عندى إنسان يحبنى و يخاف عليا و يخلى باله منى لآخر العمر
بعد ما كنت معنديش حد يقولى يا ماما
- طب أنا طلعت إزاى من بطنك ؟
- الدكتورعملى عمليه و فتح بطنى و طلعك
كنت نايمة ساعتها بس قالولى بعد ما صحيت
أن سيادتك قعدت تعيط و تعملهم إزعاج و بهدلت الدنيا و قولتلهم
صحولى ماما
و رجعونى بطنها تانى
- أيوه أنا كنت عايز أقعد جوا ... طب ليه مرجعونيش ؟؟؟
- و تحرمنى من إنى أشوفك يا يوسف؟؟
و بعدين لازم كنت تخرج
و تعمل حاجات مكنش ينفع تعملها جوا بطنى
- زى إيه مش كنت بلعب كورة و أكل
- و هيا دى الدنيا بس ؟؟!! مش فيها حاجات تانية كتير مهمة
زى تشوف أهلك و تتعلم و تلعب مع أصحابك و تشوف الدش و تشتغل على الكمبيوتر
و تربى قطط و عصافير و تروح كل حتة نفسك تروحها و بعدين لما تكبر تشتغل
و تعمل إختراعات و الناس تفتكرك بالخير و تتجوز و ...
كل دا هتعمله إزاى و إنت جوا فى بطنى ؟؟؟!!
- أه صح !!!
طب خلاص ماشى خلينى برا أحسن
- و بعدين تعالى هنا إنا نسيت أهم حاجة ممكن تعملها كمان
- إيه
- لو أنت مش برا بطنى مين بقى إن شاء الله اللى هيجيبلى أحفاد يقولولى يا تيتة ؟!!
بعترف إن تجربة الحمل كانت ممتعة جداً
و أنا على باب المستشفى
وطبعاً شايلة يوسف و نفسى بالعافية لأن الحكاية أول مرة صعبة شوية
و رغم إنها كانت علقة لكن أجمل علقة خدتها فى حياتى
كنت بفكر فى المرة الجاية اللى هاجى فيها المكان دا
عشان أخلف البيبى التانى
و يا ريت تكون بنت عشان بحب البنات
و اجيب أخوات ليوسف اللى طلبها منى بصفة رسمية بعد سنين
- ماما أنا عايز أروح ملجأ للأطفال
- حاضر لما نرجع عند جدتك يا حبيبى نبقى نروح سوا
- لأ دلوقتى
- مينفعشى دلوقتى قولت لما نرجع إيه سبب الإستعجال يعنى ؟؟
- عشان اجيب أخ من هناك زى فيلم ستيوارت ليتل
- مينفعشى يا حبيبى دا فيلم يعنى فيه حبة خيال
لكن فى الواقع مش أى حد كدا يدخل ملجأ ياخد منه طفل ببساطة و يروح بيه
- طب نحاول أنا هتكلم معاهم و أفهمهم
- يا حبيبى فيه قواعد و قوانين و بعدين ربنا يسهل لما نرجع نشوف الحكاية دى
- أنا عاوز أخ ألعب معاه
- بكرة نرجع المدرسة و يبقالك أصحاب يكونوا زى أخواتك و أكتر
- أنا لسه هستنى ؟؟ طب إنتى مينفعشى تخلفى ولد دلوقتى
- لا يا بابا مينفعشى عشان أنا مش متجوزة و مينفعش أخلف
- يعنى متعرفيش تخلفى طيب من غير ما تتجوزى ؟؟
- لأ لازم أكون متجوزة
- طب مينفعش تخلفى لوحدك ؟؟
- لا مينفعش
- ليه!!!!
- عشان ييجى البيبى لازم تحصل الرحلة العجيبة
و الرحلة دى بدأت لما كنت سيادتك عبارة عن حاجة صغنونة قوووى فى جسم بابا
و بعدين لما باباك باسنى إنت إتنقلت من عند بابا لعندى
و روحت داخل جوا بطنى
فى الأودة اللى قولتلك عليها و قعدت تاكل و تكبر لحد ما يوم ربنا محدده
خبطت على بطنى و قولت
خرجونى بقى
- يعنى مفيش حد دلوقتى فى الاودة بتاعتى ؟
- لأ يا حبيبى هيا فاضية و مقفولة لحد مانا أتجوز تانى و أخوك يقعد فيها زيك
و بعدين أنا أصلاً زعلانة منك جدا
- ليه
-عشان لما الدكتور كشف عليا قالى إنى حامل فى بنت
و خلاص بعد ما قررت أسمى البنت حبيبة و إذ أفأجى يوم الولادة
إن الناس بتقولى مبروك جبتى ولد
ممكن أعرف بقى إزاى الكلام دا حصل ؟؟
- مش عارف ( بإندهاش )؟؟
- لأ عارف و مش عاوز تقول
- أقول إيه ؟؟!!
- تقول الحقيقة كلها و تعترف فوراً
- يعنى ( بضحكة و محاولة تبرير ساذجة )
أنا كنت بضحك على الدكتور و مستخبى منه
- لأ أنا خايفة من حاجة بقى و مكنتش عاوزة أقولها بس هقولها
- إيه
- أن بطنى كان فيها تؤام و كان معاك بنت اللى هيا حبيبة و إنت طفشتها
صح؟؟
- معرفش بقى (مسايراً للموقف بإبتسامة خبيثة )
- وديت البت فين يا يوسف ؟؟؟ ( محاولة لتضييق الخناق عليه )
إعترف احسنلك
- معرفشى معرفشى ( مدافعاً )
لأ مكنش فيه حد معايا جوا أنا متأكد
- لأ قول الحقيقة مكنش فيه بنوتة معاك ؟؟؟
- لأمشوفتهاش خالص عشان أصلى أنا كنت قافل باب الأودة
و كمان الدنيا كانت ضلمة
طب مش يمكن حبيبة تكون خرجت من ورايا و أنا نايم ؟؟!!!
ممكن ممكن

شـيـمـاااااااااء  

Posted by: فاتيما in

موش عشان هيا حبيبتى فى أقل وقت ممكن
و لا عشان لسه عودها أخضر و محتاج يتسند
و لا عشان بحب أى حاجة تخص الأطفال و بتنمى خيالهم
و لا عشان بحبكم و عاوزكم تشوفوا أى جمال تشوفه عيونى
عشان حاجة واحدة بس
إنها موهوبة بجد موش أى كلام
حبيبتى
طالبة لسه فى فنون جميلة و مخلصتشى حتى
لكن تستحق إننا نشجعها و نقولها برافو عليكى
إستمرى
أتمنى فى يوم الأقى أفلامك بتتعرض فى كل قنوات الأطفال
و يوسف بيتفرج عليها يوماتى و أقوله اللى عاملة الحاجات دى
حبيبة قلبى شيماااااااء اكيد
موش إحتمال
روحوا إتفرجوا على الفيلم و قولولها رأيكم و إنطباعاتكم
و كمان أى إنتقادات عشان تتعلم و تستفيد
وأدعولها ربنا يوفقها
و إسمه
قلوبنا الخضراء

من العالم الخيالى أحدثكم  

Posted by: فاتيما in


نعمة الخيال موش موجودة عند أى مخلوق تانى غير الإنسان
التعامل مع الأطفال عن قرب بيخلى أى واحد أى كان دماغه على قده
مدفوع تلقائياً للتحليق عالياً فى عالم المخلوقات العجيبة
موش بس الشخصيات اللى بتبقى فى الكتب و حواديت الكارتون
و خيالات صانعى الأفلام و القصص المصورة
لاااا
دا من عالم الواقع يبدأ خيال آخر و مخلوقاته كالتالى
المخلوق الأول من العالم الخيالى هي
الانسة قفاشة
و قفاشة دى للى ميعرفهاش عبارة عن إيدى الشمال لما بضمها زى ما تكون على شكل بطة
و لما بحرك صوابعى الأربعة على الإبهام تقوم كأنها بتفتح منقارها و تقفله
زى ما كنا بنلعبها زمان خيال على الحيطة
و قفاشة مخلوقة هدفها الأساسى فى الحياة تقفيش يوسف فى أى مكان من جسمه
و معاكسته و مسك حاجاته المرمية على الأرض
و عضه فى ودانه و خدوده و كل حتة تقدر توصلها بدون ادنى مقاومة من يوسف
لأنه بيحبها جدا جدا
و نتيجة الحب الكبير دا بقى لقفاشة ولدين صغيرين هما إيد يوسف الشمال و اليمين
و سميناهم قافوش و فاشفوش
ومحدش يقولى أزاى أنسة و عندها ولدين عشان يوسف مسألشى
هتسألوا إنتو؟؟!
و لما التلاتة بيتجمعوا بتحصل مهازل و حواديت
قفاشة ليها أهداف تربوية بحتة لأنها بتساعدنى فى شد ودن يوسف لما يغلط
و لما يسيب حاجاته على الأرض و ميرضاش يلمها
ساعتها قفاشة تظهر عشان تشيلهم و تهدده بإنها هتخبيهم منه
فيشيلهم أسفاً و مضطراً
لأنه عارف إنها لما بتقفش فى حاجة مبتسيبهاش
المخلوقة التانية فى العالم الخيالى هيا الست
أون ننص
و دا تحريف لفظى لأم منص الشهيرة
اللى كل ما تحب تسوح حد و تقوله مفيش فايدة تقوله عند أم منص
و اول مرة يوسف نطق إسمها قالوه كدا
و عجبنى الصراحة و كلبشت فيه و بقيت بنطقه كدا
- ماما
- نعم
- عاوز أشترى عجلة
- الميزانية لا تسمح يا يوسف و بعدين هتسوقها فين مفيش مكان
- فى الشارع
- لأ عشان العربيات و إنت عارف دا كويس
- هبقى أخلى بالى
- مينفعش يا حبيبى الشارع معمول للعربيات تمشى موش عشان العجل بتاع الأولاد الصغيرين
- مليش دعوة هشتريها برضو
- آه طبعاً ... دا عند أون ننص إنشاء الله
طبعاً أم منص بتفصل النقاش و تجيب آخره
لأن محدش عارف أراضيها فين ؟
لكن على ميييين؟؟!
دا يوسف إبنى و ربنا ما يحكمه على غلابة
- ماما
- نعمممممم
- عاوز أجيب أسكوتر
- مفيش ميزانية و بعدين لما نرجع عند تيتة نبقى نجيبه
- إشمعنى
- عشان عندها طرقة كبيرة تلعب فيها لكن هنا المكان ضيق
- ألعب بيه فى الشارع أو أجرى بيه فى السوبر ماركت
- الشارع فيه عربيات و السوبر ماركت ممنوع تجرى فيه بأى حاجة عشان الحاجات متقعش
- مانا بركب العربيات بتاعتهم و إنتى بتزقينى
- أيوه أنا أزقك معلش لكن أنت تزق نفسك فى السكوتر دا مينفعش
- ماليش دعوة هجيب واحد و أسوقه برضو
- آه طبعاً ... دا عند أون ننص إنشاء الله
يسكت لحظتين و بعدين يتكلم كأنه بيجيب من الآخر عشان يخلص
- ماما
- هاه
- هيا أون ننص دى ساكنة فين ؟؟!!!
- محدش عارف ... بتسأل ليه ؟
- أصلى عاوز أزورها و ألعب مع ننص إبنها دا اكيد عنده لعب كتير حلوة
- آه يا إنتهازى
يعنى موش عاوز تزوره عشان تصاحبه لأ دانت طمعان فى ألعابه
يا ساااااتر
- لأ لأ يعنى طب هوه شكله إيه؟
- يعنى غالباً هيكون ولد صغير مجرم و شقى و تاعب قلب مامته
و بيطلب طلبات كتير و عيد ميلاده فى شهر تمانية
يسكت ثوانى و يبصلى بخبث
- ماما إنتى بتضحكى عليا
إنتى كأنك بتوصفينى أنا ... يعنى أنا ننص
صح؟؟
أخبى ضحكتى و أعمل نفسى بريئة
- موش عارفة بس أكيد هيبقى شبهك كدا
- طب أنا هأروح أشوفه و ألعب معاه و هعرف العنوان لوحدى
- آه طبعاً ... دا عند اون ننص إنشاء الله !!
أون ننص بتلوح فى الأفق عند كل طلب يتعدى ميزايتتى
أو قدرتى على الفعل
و بصراحة بتساعدنى فى تأجيل أى حلم صعب التحقيق فى ظروفنا اللى دايما ملخبطة
المخلوقة التالتة و الاخيرة فى العالم الخيالى هيا
البزاقة اللطيفة
وبزاقة دى يعنى حلزونة بس باللغة العربية الفصحى بتاعة حلقات الكارتون
و يوسف إتعرف عليها فى ليلة ظلماء ممطرة و إحنا راجعين من بره
و بنعدى فى جنينة العمارة اللى كنا ساكنين فيها
و يوسف بيدوس برجله فى الأرض فجأة سمعنا
خرششششششششششت
إيه الصوت دا ؟
بنبص فى الأرض لقينا حلزونة متفعصة و مكسور صدفتها تحت كوتشى يوسف
الأول كنا ماشيين نتكلم على الكارتون بتاع الموززات - الجاسوسات سابقاً-
و ماسكين اكياس الطلبات و بنضحك
تبدل المشهد فورا فى ثوانى بعد الخرشششششششششت دى
يوسف ساب الكيس اللى فى إيده
و راح باصص فى الأرض على جثة الحلزونة و سكت ثانيتين
و أنفجر فى العياط
- عااااااااااااااا
- بس يا بنى بتعيط على إيه ؟
- أنا قتلتها عاااااااا
- معلشى يا حبيبى مكنش قصدك و الدنيا ضلمة و بتمطر
- عااااااااا
- و بعدين هيا روخرا غلطانة برضو
ماهى ماشية ببطء قوى ... طب شايفك جاى
تتآخر شوية على جنب عشان متفعهصهاش
- إهىء إهىء
إهىء إهىء دى يعنى الحالة خفت شوية عن عاااااا
و إبتدى يقتنع إنها موش جريمته لوحده
طبعا طلعنا و قعدنا فى نكد لحد معاد النوم
و كان لزاماً عليا أصلح الموقف المنيل دا بأى شكل
خدته فى حضنى قبل النوم و غيرت فى طبقة صوتى
و خليتها طفولية عبيطة كدا
- يوسوف يوسوف
- إنتى مين ؟
- أنا البزاقة اللطيفة
- إنتى اللى موتى من شوية ؟؟
- لااااااااااا ... أنا أختها التؤام و جئت إليك حتى أقول إننى لست غاضبة منك
لأنك دوست على أختى دون قصد
- يعنى أنتى موش زعلانة منى ؟؟!!!
- لااا بالعكس أنا احببتك جدا ورأيتك عندما بكيت على أختى فعرفت إنك ولد طيب
لا تؤذى المخلوقات و أريد ان اكون صديقتك
- طيب إنتى شكلك إيه ؟؟
- أنا بزاقة لطيفة ملونة بألوان قوس قزح الجميلة
- طيب تعالى أقعدى معايا فى البيت علطول
- لا ينفع ... لكن كلما أوحشتنى سأتى إليك لنتحدث و نلعب سوياً
- طيب هستناكى
- حسناً تصبح على خير يا صديكى
- و انتى من أهله
و نام يوسف أفندى و ضميره مستريح
البزاقة اللطيفة دى بتظهر دايما لما يكون ناوى يعمل حاجة تزعلنى
و تعتبر صوت ضميره يعنى تحذره إنه ميبقاش أنانى و يظلم حد
و يعتذر لما يغلط لأن الأعتذار بيصحح جزء كبير من الخطأ
زى ما هى سامحته على غلطته مع اختها التؤام
و بقوا خلاص أصدقاء
إيييييييه !!!
بصوا متقلوش عليا مجنونة
لإن الشخصيات الخيالية دى جاءت من العدم
بس عملت تواصل حقيقى بينى و بين إبنى
و اللى مبقدرش أقوله و يقبله منى
بيسمعه من قفاشة و أون ننص و البزاقة اللطيفة
و يهتم بيه
مع إنه عارف إنهم خيال فى خيال
عارفين ؟؟
وحشونى قوى هما الأربعة
و مبقتش بشوفهم و لا اكلمهم
كانوا فريق جميل و كنت مسمياهم
عصابة الأربعة
يا ترى وحشوه هوه كمان و لا نسيهم؟
يعنى بيفتكرهم ساعات ؟
متهيألى عمره ما هينساهم خالص
و لا هما كمان ينسوه
الحمدلله على نعمة الخيال
و بالنيابة عن قفاشة
و اون ننص
و البزاقة اللطيفة
بقوله مطرح ما بيكون
يا يوسف
وحشتنا قووووووى و بنحبك