الثلاثاء، 3 يونيو، 2008

من العالم الخيالى أحدثكم


نعمة الخيال موش موجودة عند أى مخلوق تانى غير الإنسان
التعامل مع الأطفال عن قرب بيخلى أى واحد أى كان دماغه على قده
مدفوع تلقائياً للتحليق عالياً فى عالم المخلوقات العجيبة
موش بس الشخصيات اللى بتبقى فى الكتب و حواديت الكارتون
و خيالات صانعى الأفلام و القصص المصورة
لاااا
دا من عالم الواقع يبدأ خيال آخر و مخلوقاته كالتالى
المخلوق الأول من العالم الخيالى هي
الانسة قفاشة
و قفاشة دى للى ميعرفهاش عبارة عن إيدى الشمال لما بضمها زى ما تكون على شكل بطة
و لما بحرك صوابعى الأربعة على الإبهام تقوم كأنها بتفتح منقارها و تقفله
زى ما كنا بنلعبها زمان خيال على الحيطة
و قفاشة مخلوقة هدفها الأساسى فى الحياة تقفيش يوسف فى أى مكان من جسمه
و معاكسته و مسك حاجاته المرمية على الأرض
و عضه فى ودانه و خدوده و كل حتة تقدر توصلها بدون ادنى مقاومة من يوسف
لأنه بيحبها جدا جدا
و نتيجة الحب الكبير دا بقى لقفاشة ولدين صغيرين هما إيد يوسف الشمال و اليمين
و سميناهم قافوش و فاشفوش
ومحدش يقولى أزاى أنسة و عندها ولدين عشان يوسف مسألشى
هتسألوا إنتو؟؟!
و لما التلاتة بيتجمعوا بتحصل مهازل و حواديت
قفاشة ليها أهداف تربوية بحتة لأنها بتساعدنى فى شد ودن يوسف لما يغلط
و لما يسيب حاجاته على الأرض و ميرضاش يلمها
ساعتها قفاشة تظهر عشان تشيلهم و تهدده بإنها هتخبيهم منه
فيشيلهم أسفاً و مضطراً
لأنه عارف إنها لما بتقفش فى حاجة مبتسيبهاش
المخلوقة التانية فى العالم الخيالى هيا الست
أون ننص
و دا تحريف لفظى لأم منص الشهيرة
اللى كل ما تحب تسوح حد و تقوله مفيش فايدة تقوله عند أم منص
و اول مرة يوسف نطق إسمها قالوه كدا
و عجبنى الصراحة و كلبشت فيه و بقيت بنطقه كدا
- ماما
- نعم
- عاوز أشترى عجلة
- الميزانية لا تسمح يا يوسف و بعدين هتسوقها فين مفيش مكان
- فى الشارع
- لأ عشان العربيات و إنت عارف دا كويس
- هبقى أخلى بالى
- مينفعش يا حبيبى الشارع معمول للعربيات تمشى موش عشان العجل بتاع الأولاد الصغيرين
- مليش دعوة هشتريها برضو
- آه طبعاً ... دا عند أون ننص إنشاء الله
طبعاً أم منص بتفصل النقاش و تجيب آخره
لأن محدش عارف أراضيها فين ؟
لكن على ميييين؟؟!
دا يوسف إبنى و ربنا ما يحكمه على غلابة
- ماما
- نعمممممم
- عاوز أجيب أسكوتر
- مفيش ميزانية و بعدين لما نرجع عند تيتة نبقى نجيبه
- إشمعنى
- عشان عندها طرقة كبيرة تلعب فيها لكن هنا المكان ضيق
- ألعب بيه فى الشارع أو أجرى بيه فى السوبر ماركت
- الشارع فيه عربيات و السوبر ماركت ممنوع تجرى فيه بأى حاجة عشان الحاجات متقعش
- مانا بركب العربيات بتاعتهم و إنتى بتزقينى
- أيوه أنا أزقك معلش لكن أنت تزق نفسك فى السكوتر دا مينفعش
- ماليش دعوة هجيب واحد و أسوقه برضو
- آه طبعاً ... دا عند أون ننص إنشاء الله
يسكت لحظتين و بعدين يتكلم كأنه بيجيب من الآخر عشان يخلص
- ماما
- هاه
- هيا أون ننص دى ساكنة فين ؟؟!!!
- محدش عارف ... بتسأل ليه ؟
- أصلى عاوز أزورها و ألعب مع ننص إبنها دا اكيد عنده لعب كتير حلوة
- آه يا إنتهازى
يعنى موش عاوز تزوره عشان تصاحبه لأ دانت طمعان فى ألعابه
يا ساااااتر
- لأ لأ يعنى طب هوه شكله إيه؟
- يعنى غالباً هيكون ولد صغير مجرم و شقى و تاعب قلب مامته
و بيطلب طلبات كتير و عيد ميلاده فى شهر تمانية
يسكت ثوانى و يبصلى بخبث
- ماما إنتى بتضحكى عليا
إنتى كأنك بتوصفينى أنا ... يعنى أنا ننص
صح؟؟
أخبى ضحكتى و أعمل نفسى بريئة
- موش عارفة بس أكيد هيبقى شبهك كدا
- طب أنا هأروح أشوفه و ألعب معاه و هعرف العنوان لوحدى
- آه طبعاً ... دا عند اون ننص إنشاء الله !!
أون ننص بتلوح فى الأفق عند كل طلب يتعدى ميزايتتى
أو قدرتى على الفعل
و بصراحة بتساعدنى فى تأجيل أى حلم صعب التحقيق فى ظروفنا اللى دايما ملخبطة
المخلوقة التالتة و الاخيرة فى العالم الخيالى هيا
البزاقة اللطيفة
وبزاقة دى يعنى حلزونة بس باللغة العربية الفصحى بتاعة حلقات الكارتون
و يوسف إتعرف عليها فى ليلة ظلماء ممطرة و إحنا راجعين من بره
و بنعدى فى جنينة العمارة اللى كنا ساكنين فيها
و يوسف بيدوس برجله فى الأرض فجأة سمعنا
خرششششششششششت
إيه الصوت دا ؟
بنبص فى الأرض لقينا حلزونة متفعصة و مكسور صدفتها تحت كوتشى يوسف
الأول كنا ماشيين نتكلم على الكارتون بتاع الموززات - الجاسوسات سابقاً-
و ماسكين اكياس الطلبات و بنضحك
تبدل المشهد فورا فى ثوانى بعد الخرشششششششششت دى
يوسف ساب الكيس اللى فى إيده
و راح باصص فى الأرض على جثة الحلزونة و سكت ثانيتين
و أنفجر فى العياط
- عااااااااااااااا
- بس يا بنى بتعيط على إيه ؟
- أنا قتلتها عاااااااا
- معلشى يا حبيبى مكنش قصدك و الدنيا ضلمة و بتمطر
- عااااااااا
- و بعدين هيا روخرا غلطانة برضو
ماهى ماشية ببطء قوى ... طب شايفك جاى
تتآخر شوية على جنب عشان متفعهصهاش
- إهىء إهىء
إهىء إهىء دى يعنى الحالة خفت شوية عن عاااااا
و إبتدى يقتنع إنها موش جريمته لوحده
طبعا طلعنا و قعدنا فى نكد لحد معاد النوم
و كان لزاماً عليا أصلح الموقف المنيل دا بأى شكل
خدته فى حضنى قبل النوم و غيرت فى طبقة صوتى
و خليتها طفولية عبيطة كدا
- يوسوف يوسوف
- إنتى مين ؟
- أنا البزاقة اللطيفة
- إنتى اللى موتى من شوية ؟؟
- لااااااااااا ... أنا أختها التؤام و جئت إليك حتى أقول إننى لست غاضبة منك
لأنك دوست على أختى دون قصد
- يعنى أنتى موش زعلانة منى ؟؟!!!
- لااا بالعكس أنا احببتك جدا ورأيتك عندما بكيت على أختى فعرفت إنك ولد طيب
لا تؤذى المخلوقات و أريد ان اكون صديقتك
- طيب إنتى شكلك إيه ؟؟
- أنا بزاقة لطيفة ملونة بألوان قوس قزح الجميلة
- طيب تعالى أقعدى معايا فى البيت علطول
- لا ينفع ... لكن كلما أوحشتنى سأتى إليك لنتحدث و نلعب سوياً
- طيب هستناكى
- حسناً تصبح على خير يا صديكى
- و انتى من أهله
و نام يوسف أفندى و ضميره مستريح
البزاقة اللطيفة دى بتظهر دايما لما يكون ناوى يعمل حاجة تزعلنى
و تعتبر صوت ضميره يعنى تحذره إنه ميبقاش أنانى و يظلم حد
و يعتذر لما يغلط لأن الأعتذار بيصحح جزء كبير من الخطأ
زى ما هى سامحته على غلطته مع اختها التؤام
و بقوا خلاص أصدقاء
إيييييييه !!!
بصوا متقلوش عليا مجنونة
لإن الشخصيات الخيالية دى جاءت من العدم
بس عملت تواصل حقيقى بينى و بين إبنى
و اللى مبقدرش أقوله و يقبله منى
بيسمعه من قفاشة و أون ننص و البزاقة اللطيفة
و يهتم بيه
مع إنه عارف إنهم خيال فى خيال
عارفين ؟؟
وحشونى قوى هما الأربعة
و مبقتش بشوفهم و لا اكلمهم
كانوا فريق جميل و كنت مسمياهم
عصابة الأربعة
يا ترى وحشوه هوه كمان و لا نسيهم؟
يعنى بيفتكرهم ساعات ؟
متهيألى عمره ما هينساهم خالص
و لا هما كمان ينسوه
الحمدلله على نعمة الخيال
و بالنيابة عن قفاشة
و اون ننص
و البزاقة اللطيفة
بقوله مطرح ما بيكون
يا يوسف
وحشتنا قووووووى و بنحبك

هناك 61 تعليقًا:

نبضات يقول...

أول التعليقاااااات
وصباح معطر بالورد والياسمين من موقع عملى وانا حقرا واتمعن واتعمق فى البوست ثم اعلق خصوصا انى قاعده فاضيه دلوقتى مش عندى شغل

تحياتى

إنسان مقيد يقول...

عزيزتي
القفاشه فكرتني لما كان بابا يرجع من الشغل بليل ونستخبى منه تحت السراير عشان بيفضل يطبقنا ويزغزغنا ونتيجة لتطبيقه بينا ده كتير ناس بتفتكر اني كنت لاعب جمباز من صغري وان ده سبب ان انثنائتي غريبه كلاعبي الجمباز
بس للاسف مكنش في فحياتي اون ننص ولا البزاقه

تحياتي

على الهامش مكنش فيه شخصيات ولاديه كلهم شخصيات نسائيه؟

نبضات يقول...

الله الله يافتيما
بوست راااااااااائع

عارفه انه مع احترامى لكل ماتكتبين البوست دا من اجمل البوستات رغم طبعا اعجابى بكل ماكتبتى وستكتبى بروحك واحاسيسيك الرقيقه والعاليه والتى المسها واحسها دائما فى كلماتك وبين سطورك لكن البوست دا حاله مختلفه جميله اوى علاقتك بيوسف واسلوب تربيتك له ومعالجتك لاحساسه بالذنب

عالم الخيال والشخصيات الكرتونيه كلها حاجات بتعبر عن العالم المثالى اللى بينصر فيه الخير على الشر والعدل على الظلم عارفه انا فضلت متعلقه بالكرتون لحد الصف الثالث اعدادى وبمجله ميكى بطريقه رهيبه وهذا العالم الخيالى فيه معانى جميله وعميقه.. جميل انك بتعرفى تستخلصى هذه المعانى وتربطيها بالشخصيات عشان تعلمى يوسف ازاى يفكر وازاى يعيش وتساعديه فى تكوين شخصيته وهذا الكلام عمومى ولسه مش اتكلمت فى موضوع البوست . بالنسبه للبوست ... عجبتنى اوى فكره اختلاق شخصيات من العالم الواقعى انتى مبتكره وهذه اللغه الخاصه بيكى انتى ويوسف بس ومحدش يفهمها غيركم ودا طبعا قبل ماتعرفيها لنا احنا كمان
وجميل ان الانسان يخلق لغه خاصه يتعامل بيها مع الناس القريبين منه اوى ومحدش يفهما غيره هو واللى بيحبهم
استمتعت جدا بالبوست وضحكت كتير وحسيت برده بمشاعرك وانتى بتكتبى وباحاسيس مختلفه اعجز عن التعبير عنها وسعدت جدا بالتعرف على الشخصيات قفاشة و أون ننص و البزاقة اللطيفة وقبليهم يوسف الجميل اللى نفسى اشوفه واخده فى حضنى وتاليه البزاقه اللطيفه عجبتنى اوى واشكرك انك عرفتينا عليهم دا شرف لينا يافندم

اكيد وحشوه واكيد حيرجع لهم وعمره ماحينساهم مهما كبر ذكريات الطفوله دى وارتباط الطفل بيهم بتفضل بداخله مهما كبر وبتاثر كمان فى افكاره وطريقه تفكيره فى الحياه

واخيرااا...بجد يافاتيما انت ام جميله اوى وخلاقه ومبتكره وانسانه اجمل وقلب كله مشاعر واحاسيس عاليه ومحتاج حد جواهرجى عشان يعرف يتعامل معه وليس بشر عادى ....ومش بجامل

تحياتى
قلب بيحبك وبيحب يوسف

بنوته مصرية يقول...

احجز اول صف علشان اشوف كويس ههههههههه

هرجع تاني يا قمر

ليلـــــــــــــــــــــــــــــى يقول...

يا فاتيما انتِ شخصية جميلة قوى و بجد أنا بحس بكل حاجة بتكتبيها.
أنا مع نبضات فى موضوع الجواهرجى بجد :)))
ان شاء الله يوسف يرجع قريب و ما يفارقش حضنك أبدأً يا جميلة.
و عمره ما حينسى الشخصيات الخيالية أبدا عشان أنا لسه فاكرة حاجات من و انا فى سنه كدة.

صباح الخير يا مصر يقول...

فاتيما
******
ربنا يرجعه لحضنك بالسلامه انشاء الله
وتكتبنا بوست من العالم الحقيقى احدثكم بس انشاء الله تبقى تعزمينا عشان كلنا متشوقيين نشوف يوسف فى حضنك و لا ساعتها هاتقولينا عند ام منص
تحياتى و تمنياتى لك باخبار سعيده فى القريب العاجل انشاء الله

Sally يقول...

ازيك يا فاتيما
بوست جميل جدااااااااااا وحلو اوى العالم الخيالى ده .. اكيد مكنش فيه نت لما كان يوسف معاكى .. حسيت وانتى بتحكى انى مقصرة مع دودو ومش بعامله كطفل والمفروض اعملله عالم خيالى كده

يمكن لانى متعودتش على كده وانا صغيرة
مش عارفة الحقيقة

بس ايه البزاقة دى ؟؟ والحلزون والصدفة ؟؟ايه الكائن ده انا معرفوش ؟؟

زيدينا وعلمينا يا فاتيما
ربنا يكرمك ويرجعلك يوسف يا احن ام فى الدنيا

Doba يقول...

من اهم فترات الاطفال واللى بتأثر عليهم على مدار حياتهم هيه من والبيبى فى بطن مامته ويتعلم الصح والغلط بهدوء فى اول تلات سنين وبعدها الحلال والحرام فى التلات سنين اللى بعدهم

اقصد بمعنى آخر ان اهم فترة اول 6 سنين فى حياة الطفل وكل ما يحدث بعدها بيكون نتاج ال6 سنين دول

يوسف مولود فى شهر اغسطس - يوم كام؟؟

اشكرك لاعطائى أفكار جديدة
وربنا يبارك فى عقلك لاختلاق الافكار دى لسعادة ابنك

وكل سنة وهو طيب مقدما
=====
على فكرة
مفيش طفل يقدر ينسى مامته مهما بعد عنها وماشاء الله عليكى زرعتى فيه قيم حلوة وخليتى ليه فكر ناضج وخيال مبدع وانا متأكده انه بيبادلك كل الافكار ومشتاقلك اكتر منك
=====
يجمعكم ربنا على كل الخير
=====
انا نفسى أقابلك جدا ولو يوم الجمعة فى نادى اكتوبر مش هيناسبك شوفى اى مكان يعجبك وينفع الباقيين ونتجمع فيه

سلامى لوالدتك الغالية
وربنا يبارك فيها لحسن تربيتها ليكى
هبة

dodda يقول...

ده انتى طلعتى حدوته متنقله!!!!

وده ان دل على شىء ...يبقى انا عندى حق...

نجرب عالم سمسم؟؟؟

لا حياة مع اليأس

فاتيما يقول...

نبضات
يا عرافتى الساحرة
أزيك يا حبيبتى
أنا حطالك غنوة مخصوص عشانك أنتى و إيمان شخابيط
حاجة كدا من وحى البوست و الشخصيات الخيالية و الأحلام إنكم تكونوا باليرنيات تطيروا زى الفراشات فى خفتها و يا ستى جواهرجى غيه و الكلام الكبير دا
أنا كل اللى عملته إنى إستخدمت خيالى بس
و إنتى كييفة مجلة ميكى و قصص أطفال يعنى عارفة الخيال دا
و لما يبقى عندك أولاد إن شاء الله هتلاقى نفسك بتسترجعى اللى قريته و عرفتيه زمان
أنا عملت كدا و كل قرايتى للمجلات و القصص و فرجتى معاه على الكارتون و برامج الأطفال جات بفايدة أهو
و منحرمشى منك يا نبوضتى

فاتيما يقول...

إنسان مقيد
طب كان عندك قفاشة بس مستترة أهو
و بعدين الشخصيات كلها نسائية بحكم إن محسوبتك اللى أخترعتها فلازم تبقى كدا
و بعدين ما هو قفاشة مخلفة قافوش و فاشفوش و دول ولاد أهو ...
موش كدا برضو
تحياتى يا كريم

فاتيما يقول...

بنوتة مصرية
إنتى روحتى فين يا رودى ؟؟
طيب
مستنياكى

فاتيما يقول...

ليلى
اهلاً بيكى
و متشكرة قوى على رأيك الحلو فى مطرحنا المتواضع ...
و تفتكرى كدا أصل ساعات دماغى بتصورلى إنه ممكن ينسى ...
أشكرك يا حبيبتى من كل قلبى

فاتيما يقول...

صباح الخير يا مصر
طب بس هوه يرجع و متقلقوش يا جماعة
و أون ننص موش هتتدخل خالص فى أى حاجة دى بتبقى ساعات الطلبات الصعبة بس
و أشكرك من كل قلبى على مشاعرك الطيبة

فاتيما يقول...

sally
ازيك يا ام دودو
أنا صلحت فى البوست و قولت اهو بزاقة دى يا ستى يعنى الحلزونة
اللى فى الصورة دى
أم صدفة على ضهرها دى
أيوه
و بتمشى ببطء شديد
و إسمها باللغة العربية بزاقة سمعناها كدا فى الكارتون
و منتيش مقصرة و لا حاجة يا سالى
إنتى بس حاولى تقعدى تتفرجى معاه على الكارتون اللى بيبه و إنتى تبقى فيه مصطلحات و شخصيات مشتركة ما بينكون محدش يعرفها غيركو و لو أنى فتنت خلاص على صديقته السرية البزاقة اللطيفة بس هوه موش هيزعل إن شاء الله
نورتى يا حبيبتى و مبسوطة إن البوست عجبك
بوسيلى دودو

فاتيما يقول...

doba
ازيك يا حبيبتى
و ربنا يبسمع منك يا رب
و كلامك تمام بس الواحد ساعات يطرح التساؤلات كدا بشكل عفوى
أصله وحشنى قوى قوى
و كان نفسى آجى مشوار اكتوبر بس الحاجة والدتى عندها محاذير معينة و موش عاوزة أزعلها
موش عارفة أحدد مكان مناسب بس يعنى فيه ناس زى خيخة و رودى هييجوا من سفر فموش عاوزة أعذبهم يعنى
ربنا يسهل و نتفق على منطقة وسط
و هقول ساعتها على المعاد إن شاء الله عشان كلنا نتجمع و نتقابل
تحياتى يا حبيبتى
و لو بتسألى عن تاريخ ميلاده عشان تعرفى برجه فهوه يا ستى 21/8 يعنى أسد كاد أن يصبح عذرائياً
يعنى واخد قوة و جاذبية الأسد مع رقة و عاطفية العذارء
هذا و الله أعلم

فاتيما يقول...

dodda
برضو يا دودا يا حبيبة الروح ؟؟
يا بنتى إيأسى منى بقى
قريتى الإيميل اللى بعتهولك و لا لأ؟؟
أتمنى متغيريش رأيك فيا بعده و تعرفى السبب إنى مقدرش أسعى ورا حاجة كدا لظروفى الخاصة
و سلوى على مى لما تكلمك بقى

خمسة فضفضة يقول...

السلام عليكم ورحمة الله وبركاته

ازيك يا طمطم اخبارك ايه

ما تتصوريش البوست ده فرحني اد ايه
بجد عجباني اوي طريقتك في تربية يوسف وتعليمه
ربنا يردهولك قريب ومايفارقش حضنك ابدا

سلام

واحدة مفروسة يقول...

هههههههههه
انتى عارفه يا بطوط الاطفال بيبقى ليهم كلمات تجنن صراحه
و الواحد من كتر حلاوتها بتلزق فيه و بيتكلم بيها بعد كده
حلوه بزاقه...قفاشه
ههههههههههه

رئـــــيسـة حزب الأحلام يقول...

الله البوست دة جميل اوى وانا بقراه غريزة الامومة نقحت على
والطفولة كمان وانا بموووووووووت فى الاغنية دى
تحياتى لكى ياقمر
وربنا يسعدك

محاولات مخنوقة يقول...

فاتيما يمكن اول مره اكتبلك بس حقيقي بوست رائع عجبنى اوى طريقة تعاملك مع ابنك وفكرتينى بنفسي مع بناتى الاتنين ليا كمان شخصيات خيالية معاهم لدرجة ان جوزى بيقولى خلاص اتجننتى بس فعلا دا بيجيب نتيجة هايلة مع الاطفال .. على فكره انا نفس عمرك بالظبط وكمان برج الثور .. ربنا يخليك يوسف انتى فعلا ام رائعة

HERO يقول...

هههههه
بيعيط علشان داس على الحلزونة ويقول قتلتها ؟هههههههه
بيفكرني بنفسي لغاية دلوقتي لما اموت ناموسة باعد اعيط برضه واقول انا قاتل انا قتلتها ههههههه
باسم الله ما شاء الله عليكوا انتوا الاتنين عاملين زي اتنين اطفال صحاب بعض
ربنا يخليهولك ويرجعهملك هما ال 4 تني ان شاء الله

تحياتي

mohra يقول...

الاول اعذرى جهلى ...يعنى ايه ام منص؟؟؟
ثانيا برافو عليك واضح انك ام جامده جدا
ثالثا ربنا يرجعلك يوسف

عبده الرايق يقول...

ام يوسف انا بحيكى جدا جدا
وعلشان انتى اختى انا برجو منك تقوليلى على عنوان ام منص
لانى عاوز اشترى فيلا فى الساحل الشمالى وفيلا فى الشرم وقصر قى القاهره
ياريت ام منص تكون عندها حتى سيخ حديد واحد نبدء بيه البناء
ربنا يكرمك فى يوسف يارب

بت خيخة وأى كلام يقول...

انا كمان عندى الانسة قفاشة بس انا مسمياها الزوغزيغة
بس دى بقى ايدى اليمين

وعندى العضة عضعوضة اللى هى سنانى
ودى اللى بعض بيها شريف فى اظؤظته

بس ايه البزاقة دى؟
هههههههههههههههههه
اول مرة اعرف ان الحلزونة اسمها بزاقة
اسمها مش عاطفى خالص

ربنا يخليهولك يا فاتيما
ويرجعلك بالسلامة

اختك خيخة

الطائر الحزين يقول...

ام منص
وفى الزمخشرى أم ينى

ولما حد بيقول لى عند أم منص

أقول له طيب يا سى منص

ده ساعات أيام زمااااااااااان بقى

ربنا يقر عينك بلقاءه ان شاء الله

شهرزاد يقول...

الله جميلة أوي الأغنية بتاعت نيللي
أنا بحبها جدا
أجمل حاجة في الاختلاط مع الأطفال إنهم بيغسلوا ببرائتهم كل همومنا
كان نفسي أكون مدرسة في حضانة لأن الأطفال في السن دي بيبقوا بريئيتن وكلهم أمل

القفاشة دي أنا عارفاها أوي :))
بس انتي قلتي عصابة الأربعة مين تاني غير أون ننص والبزاقة والقفاشة؟؟؟
أجمل مافي كلماتك تلقائيتها
أسعد الله أيامك

نبضات يقول...

الاغنيه جميله اوى واغنيتى المفضله من وانا صغيره وإلى الان ومنزلها على الكمبيوتر بتاعى فى البيت والشغل
عارفه انا مسمعتهاش لما علقت لكى لانى كنت فى عملى و عندى مشكله فى سمعات الكمبيوتر فى الشغل ولما فتحت دلوقتى سمعتها واتعجبت كتير انك خمنتى انها حتعجبنى اوى وانا متاكده انا حتعجبن ايمان ايضا عشان احنامتشابهين كتيرررررررررررررر

تحياتى
واشكرك من اعماق قلبى
اغنيه ررررائعه

فاتيما يقول...

خمسة فضفضة
و عليكم السلام و رحمة الله و بركاته
ميرسى يا فضفوضة
دايما كدا مشجعانى و رافعة معنوياتى كام و كإنسانة
يا ترى فيه إحتمال نشوفك يوم الجمعة ؟؟
التفاصيل هتلاقيها فا اعلى يمين الصفحة الرئيسية للمدونة
لو قدرتى تيجى
يا ريت
هنكون سعدا بيكى قوى
تحياتى يا حبيبتى

فاتيما يقول...

واحدة مفروسة
أيوه عليهم كلام زى حبات السكر
طعمين ىخر طعامة
ربنا يرزق اللى معندوش عيال
و يرجع اللى غايبين لأحضانهم
و يخلى عيال الناس كلها
جاية الجمعة و لا لأ ؟؟

فاتيما يقول...

رئيسة حزب الأحلام
لولى يا حبيبتى
عقبال ما يبقى عندك و تعملى شخصيات من الخيال برضو ...
طبعا من غير مناقشة و بكل ديمقراطية
إنتى جاية يوم الجمعة إنتى و مفقوعة مرارتها
و العيال
مفيش فصال فى الموضوع دا
أنا أسوأ من حمات أختك بمراحل
و قد أعذر من أنذر بقى

فاتيما يقول...

محاولات مخنوقة
يا ستى أنا إتشرفت بمعرفتك
و صفاتنا المشتركة دى شوقتنى أقرالك
و يا ريت تكتبى عن شخصياتك الخيالية دى مع بناتك عشان تلهمى الأمهات اللى لسه فى سنة أولى امومة
نورتى و تعالى دايما

فاتيما يقول...

hero
ميرسى يا سى هيرو
و بعدين إنت متهيألى عارف القصص دى كويس عشان ملك و قريبتك آية و كل عيال العيلة اللى فضحيانك دول ...
ربنا يسمع منك
و دمت اخ عزيز يا بطل الأبطال

فاتيما يقول...

mohra
متعرفيش أم منص ؟!!
بتهرجى
دى شخصية مشهورة جدا
محدش شافها و لا عارفلها عنوان
بس و الله أعلم واحدة عندها نفوذ و حيثية كدا يعنى المستحيل كله بيروح فى الىخر يتحط عندها
و أى حد عاوز حاجة موش ممكن هتعمليهالو قولوليه عند أم منص
هيفهم علطول
دمتى بكل خير يا دكتورة

فاتيما يقول...

عبدوووووو
ربنا يستجيب لدعاك يا رب
و متشكرة على تحيتك
و عاوز عنوان أم منص ؟؟
من العين دى قبل العين دى
عند اون ننص إن شاء الله

Ema يقول...

كلامك تلقائي ..كان نفسي أكون معاكم في التجمع الحريمي ده ..قلبي معاكم
ياريت تققوللي إزاي لما أضغت على إسم حد من المدونين كتبت إسمه في التدوينه يطلع لك مدونته..وجزاك الله خيرا..

وجهة نظري يقول...

روعه البوست دا بجد، وأسلوبك في التربيه جميل جدا وتوظيفك للشخصيات الكرتونيه والخياليه ممتاز وذكي.

إنشاءالله الأمور حتنصلح ويوسف حيرجع لحضنك تاني، وكل الشخصيات الخياليه حترجع معاه.

أسف لأني شفت البوستين الي فاتو وكان عندي كلام كتير أوي عنهم للتعليق، بس دماغي وعيني كانوا متدمرين من التعب، فيادوبك كان ممكن أقرا وأفكر بس.... إنما مجهود الكتابه كان مستحيل :)

المهم إننا دايما متطمنين عليكي.

فاتيما يقول...

بت يا خيخة
كنت متأكدة إن هيكون عندك مخلوقات موازية
إنتى أم جواكى طفلة لسه مكبرتش
و بعدين زى حالاتى عندك طفل واحد فالعلاقة بينكو تعدت العادى الى مرحلة الصداقة و كل ما هيكبر هتلاقيه أقرب واحد ليكى و كمان حاسة معاه بالأمان لأنك بتديه ضهرك و إنتى متأكدة إن عمره ما هيغدر بيكى او عاوز ياذيكى متعمدا ....
ربنا يحرس شيكو و يرزقك بأخوات ليه
و أنا كامن معرفتش أسم البزاقة دا إلا من الكارتون
الواد يوسف لغته العربية أحسن منى بمراحل بسبب الكارتون و الحمدلله فايدته طلعت أخف بكتير من ضرره
أشوفك يا قمر يوم الجمعة بقى
تحياتى

فاتيما يقول...

الطائر الحزين
موش عارفة ام ينى دى إسكندرانى قوى
إحا تعارفنا مجتمعياً على أم منص و الواد منص ....
ربنا يسمع دعاك يا طائرى الحزين

فاتيما يقول...

شهرزاد
أزيك يا شهروزة
بصى يا ستى عصابة الأربعة مكونة من
قفاشة و أون ننص و البزاقة اللطيفة و يوسف روح قلب ماما
و متهيألى الواحد لو إشتغل فى حضانة هيبطل يحب العيال خالص عشان ساعتها هيبقى شغل و واجبات يومية و فى مصر لا غهتمام بهذه المرحلة و لا حد حتى مؤهل ليها و لا حد هيسيبك تعملى اللى نفسك فيه
و نورتى و حاولى تيجى يوم الجمعة إنتى و سنووايت بقى

فاتيما يقول...

نبوضة يا حبيبتى
أنا خمنت لأنك إنتى و إيمو عليكم رقة و لا الفراشة
و الغنوة دى بتحسس الواحدة إنها عاوزة تطير و ترقص زى الباليرينا لما بسمعها بقعد أعمل زى نيلى و ألف زى الباليرنا ...
الحمدلله إنها عجبتك
و هتيجى يوم الجمعة يا نبوضة و لا لأ ؟؟
تعالى إنتى و عاليا
المعاد بتفاصيله هتلاقيها عند خيخة و اللينك موجود عندى فى أعلى يمين الصفحة الرئيسية للمدونة
حاولى بقى تيجى إنتى و عاليا و إن شاء الله يبقى يوم حلو
هيبتدى من عشرة الصبح و تعالى فى الوقت اللى يعجبك و على مهلك
تحياتى يا عرافتى الساحرة

فاتيما يقول...

ema
غحنا كمان كان نفسنا برضو بس ملحوقة و تتعوض
بصى يا ستى يا رب أعرف أشرح كويس
سيادتك بعد ما تفتحى رسالة جديدة
و تيجى تكتبى البوست بتلاقى
شريط الادوات
اللى فوق دا
فيه جنب المربع بتاع الألوان
و عليه حرف T
على شماله بتاعة كدا لونها اخضر و فوقها نغبشة بالأسود
إنتى فى البوست بتاعك هتكتبى مثلاً
أم البنين
عادى كتابة عادية خالص
و بعدين تظلليليها بالأسود
يعنى تعملى كليك بالماوس عليها لحد ما تبقى مسودة
و بعدين تروحى دايسة على البتاعة الخضرا المنغبشة بأسود دى
هتتفتحلك شريط مكتوب عليه
HYPERLINK
تحت خالص هتلاقى فراغ
المفروض تكتبى فيه لينك مدونتك
أو أى مدونة إنتى عايزاها
و دوسى OK
هتبصى تلاقى ام البنين اللى فى البوست بقت بلون تانى
و عملت رابط لما تدوسى عليه يوديكى مطرح ما تحبى
يا رب أكون عرفت أشرح
و تحياتى يا حبيبتى

فاتيما يقول...

وجهة نظرى
إزيك يا أستاذ
و اخبار الحصاد إيه على حسك ؟؟
المهم تكون بخير
و عقبال ما يبقى عندك زى يوسف
و تكتبله بوستات
بس يبقى فى حضنك و ميروحش بعيد
تحياتى يا عزيزى

nigro يقول...

فاتيما طمطم طماطم
عاملة ايه؟ و أخبارك ايه؟
واحشاني بجد يا فاتيما
و واحشاني مدونتك و كلامك عن يوسف
يا رب استجب لكل دعوة دعاها حد بظهر الغيب لفاطمة أم يوسف

عارفة يا طمطم بما إني بعشق أفلام الكارتون و بعشق قوي قوي قوي إني أقعد أتكلم مع الأطفال الصغيرين بنفس اسلوبهم لدرجة إني ببقى أوقات كتير أعيل منهم...قعدت أتخيل كل شخصية من شخصياتك دي
من أول الآنسة قفاشة أم العيال مروراً بننص و نانته و البتاعة الأخيرة دي اللي أسمها زعافة دي
ألا معلش يا طمطم هما تلاتة ولا اربعة ... ولا على اساس إن ننص و نانته باتنين
بجد يا طمطم الكلام مع الأطفال بلغتهم ده متتتتتعة بجد لا توصف
و أفتكر إن أقدر حد ممكن يعمل كده هو الأم بذات نفسها شخصياً
و التوظيف الصح اللي انت اتبعتيه في خيالاتك مع يوسف ده تحفة
ربنا يكملك بخيالاتك
يا لهوي يا طمطم
أنا بجد متغاظ من الظروف الزبالة دي اللي بعدت ما بينكم في الأماكن
ربنا يردهولك يا رب عن قريب
يا رب يا رب يا رب

بجد كان واحشني كلامك قوي يا طمطم
الحمد لله
يلا سلام

فاتيما يقول...

واد يا نيجرووووو
وحشتنى يا اخى الصغير
بكرة يا عم لما ربنا يرزقك بعيال إبقى عيل معاهم عللى كيفك
آه
ماهو بصراحة دا التوقيت المناسب و الناس المناسبة اللى نقدر نعيش معاهم طفولتنا المفقودة ...
و اما نبقى نشوف إختراعات و خيالاتك هيبقى شكلها إيه
و بعيييين منص و أمه شخصية إعتبارية واحدة يا نيجرو إذ إنه فى حضانتها و ميقدرش يمضى على شيكات ...
و بصراحة هما المفروض حسب كلامك يبقوا عصابة التمانية بقى
قفاشة و عيالها الاتنين
اون ننص و ننص
البزاقة اللطيفة
يوسف روح قلبى
و أن معاهم أنا كمان
و لا انا مليش نفسى يعنى ؟؟
حمدلله على السلامة يا صديقى
ربنا يكرمك فى المشروع إن شاء الله إمتياز مع المرتبة التاكى
تحياتى الخالصة من قلبى بجد

اميره الصعيد يقول...

حبيبتي فاتيما
فعلا فعلا منكم نستفيد
ايه الاسلوب الرائع ده في التربيه
عارفه انا فعلا ظالمه يحيي بس هحاول اكون ام عظيمه زيك
ربنا ينور ايامك بيوسف

Ahmed Mubarak يقول...

فاتيما
معلش انا مقصر معاكي الايام ديه بس مشغول حبه..

اعذريني

ربنا يخلي يوسف حبيب قلبي ..
وعايز اقلك ان الحجات دبه هتظل في عقله حتى لغايه بعد ما يكبر

تحياتي

فاتيما يقول...

اميرة الصعيد
متقوليش كدا يا ميرو
إنتى بس إتفرجى معاه على الحاجات اللى يحبها هتلاقى نفسك عايشة المووود و فيه حاجات مشتركة كتير بينكم و ساعاتها تخترغوا شخصيات من الخيال للصبح
تحياتى يا قمر الصعيد كله

فاتيما يقول...

AHMED MUBARAK
و لا يهمك يا احمد و براحتك لما تفضى تعالى
و مدام قولت إنه هيفتكرها يبقى خلاص أنا متأكدة من دا
و عقبال ما يبقى عندك عيال
و شخصيات خيالية
تحياتى يا أحمد و ربنا يوفقك فى اللى بتعمله كله

أحمد سلامــة يقول...

مفيش احلى من تركيبتكم انتو الاتنين على بعض
انا عشان كده نفسي اتخصص اطفال
سيبك من العيانين الكبار ووجع القلب
الطفل خيال متحرك ممكن يجيب الجنة كلها قدام عنيكي في غمضة عين منه
عارفه اللي هو كانك بتدوسي عازرار تتحول الدنيا للون المطلوب

ربنا يحميه ويرجعهولك

على فكرة الاغنية دي من ست سبع سنين قبل النت والدي اس ال والمنتديات كنت بنام احلم بيها واني اعرف اوصلها
:)

KING TOOOT يقول...

كل الخيال الحلو بينكم طالل من زمان
قفاشة و أون ننص و البزافه دي إيه كمان
ولسه يتسألي نفسك حاينسى ولا لاء ؟!
لا عمره حاينساهم ولا ينسى مامته و المكان
و عجبي
KING TOOOT

Ema يقول...

متشكررررررررررره جدا...حقيقي أستاذه

نبضات يقول...

صباح معطر بالورد والياسمين
اشكرك على دعوتك الجميله لكن مش ينفع اجى وان شاء الله تتعوض مره اخرى انا دخلت عند خيخه وقعدت اضحك على اللى هيا كتباه عموما متشوقه للتعرف عليها وعلى ابى ولكن فى مره اخرى وحبلغ عاليا لكن اعتقد انه مش ينفع ليها لانها مش بتخرج يوم الجمعه
وتمنياتى بقضاء وقت سعيد وممتع

تحياتى

فاتيما يقول...

أحمد سلامة
يا اجمد فنجان قهوة
أزيك يا احمد مفتقداك و الله
إنت دكتور ؟؟؟!!
يا خرابى
و انا بقول برضو الوسامة دى متنفعشى الا على دكاترة بس ...
ربنا يوفقك و يلا شد حيلك و اتخصص فى طب الأطفال عشان متتصورش هتاخد دعوات صادقة من الامهات قد إيه
أنا لسه فاكرة الدكتور اللى كان بشوف يوسف من أول يوم ولادته لحد ما ما بقى عنده سنتين كان رهيب كنت بحبه قوى و قعدت أعمله دعاية وسط صحباتى لحد ما عرفت بعد رجعت إنه فى السعودية بيشتغل هناك و دعيتله ربنا يكرمه عشام كان عنده ضمير و شاطر ...
و بص البت لماضة عندها كل الأغانى اللى ممكن تكون عدت عليك و إنت طفل روح اقف مذهولا و حمل من الكنوز يا احمد زى ما أنت عاوز و إدعى لللماضة الطعامة
اللينك أهو
http://aghany-eltefoula-elmosharada.4shared.com/account/dir/4463357/f63c977/sharing.html
و مبسوطة بمرورك الحلو دا

فاتيما يقول...

ema
بجد يا أم البنين ؟؟
نفع يعنى ؟؟
طب الحمدلله
و أى خدمة إنتى تؤمرينى المهم بس أعرف أشرح كويس ...
تسلمى و يعود الغالى بألف سلامة لحضن بيته الجميل

فاتيما يقول...

وليد
يا راعى الملك
أزيك يا عزيزى و إزاى هبهوب و عمر الجميل
رباعياتك دى بتوقفنى مشدوهة موش عارفة أرد أقول إيه ؟؟
ربنايخليك لينا أنا و يوسف و منتحرمشى منك
هبة هينفع تيجى هيا و عملر يوم الجمعة و لا صعب ؟؟
يعنى لو ينفع هننبسط قوى لو عرفت تيجى
لو منفعش خلاص يبقى فرصة تانية و إن شاء الله ملحوقة
تحياتى يا راعى الملك

كاميليا يقول...

- هاه
- هيا أون ننص دى ساكنة فين ؟؟!!!
- محدش عارف ... بتسأل ليه ؟
- أصلى عاوز أزورها و ألعب مع ننص إبنها دا اكيد عنده لعب كتير حلوة
- آه يا إنتهازى
....

يا حبيبى

تعرفى؟

أنا بحب يوسف قوى قوى
فوووق ما تتخيلى
باحسه إبنى .. وباتمنى يكون عندى إبن زيه

ربنا يحفظه ويحميه ويبارك لك فيه يارب
ويقر عينك برؤيته دوما حولك ومعك والى جوار قلبك يارب يارب يارب

وبحبك قوى انتى كمان
يا أحلى مامة يوسف

تحياتى

فاتيما يقول...

نبضات
يا عرافتى الساحرة
ليه يا نبوضة؟؟
لسه عندك امتحانات ؟؟
طب تعالى قد ساعة كدا و لا حاجة و أمشى
إحنا إن شاء الله هنقعد فترة كدا نفسح العيال و نقعد ننم و بعدين عقبال ما نتحرك على مكان تانى ناكل فيه مثلاً هيكون بعد إتنين تلاتة كدا ...
يعنى لو ينفع ممكن تيجوا بعد المعاد بتاع عشرة دا براحكتوا
طب موش هضغط عليكى
بس كنت عاوزة أشوفك بجد
لكن تتعوض إن شاء الله
و تحياتى يا حبيبتى ليكى و لعاليا

فاتيما يقول...

كاميليا
يا زهرة الكاميليا
أنا كامن بحبك قوى و بحب حبكو دا ليوسف من غير ما تشوفوه و لا تقابلوه
لكن حاسة إنى قدرت أعمله حاجة إيجايبة بإن فيه ناس كتير حلوة كدا زيكم بتحبه و بتدعيله بالخير و إن ربنا يرده لحضنى ....
إنتهازى دى أقل تعليق يا كاميليا أنا بشتم شاتيم معتبرة بس موش هقولها هنا عشان المدونة دى لا ترحب بالبذاءات و بعدين كلكوا ولاد ناس و نصكوا شعرا رومانسيين زى سعادتك و لو قولت واحدة من الشتايم بتاعتى ممكن يغمن عليكى ...
فبلاش
ربنا يسعد قلبك
و ترجعى بألف سلامة يا حبيبتى

رندا يقول...

عن قفاشة
و اون ننص
و البزاقة اللطيفة

..........

فتومة

كلامك حلو قوى بجد ووصفك يجنن بالذات
اون ننص دى هى مين دى صحيح هههههه
ايوة هما فعلا لما بيفتحوا على الرابع ويقولوا عااااااااا
بتبقى كارثة محدش بيعرف يسكتهم ههههه

ربنا يخليهولك يارب ويحفظة
هتشوفية قريب قوى ياتومة
مش تقوليلى ازاى بس احساس كدة

بوسة ليوسف وبوسة ليكى

رندا

فاتيما يقول...

رندا
يا حبيبتى يا ريت يبقى إحساسك صحيح
و اون ننص غنية عن التعريف يا بنتى
يعنى مفيش اول تحاولى تيجى بكرة ؟؟
طب معلش
ملحوقة
و عموما حسب الظروف و لو لقيتى نفسك فضيتى و ممكن تلحقى اى وقت و تيجى هنستناكى
سلامى يا غالية

إرسال تعليق

الكلمــة نــور .. وبعض الكلمــات قبــور .... عبدالرحمن الشرقاوى

♪♫ روح قلب ماما ... FM ♪♫