.

.

جـوا الأودة ... برا الأودة  

Posted by: فاتيما in

فترة الحمل
دى أجمل فترة ممكن تمر بيها أى ست فى الدنيا
صحيح ترجيع اول خمس شهور عمال على بطال
و قريفة فى المزاج
و كل حاجة ريحتها بايظة و طعمها متغير
و اللبس مقاسه مضروب فى عشرة
بس دا كله و لا حاجة جنب كل المميزات الآخرى
يعنى دا ييجى إيه جنب أن الناس اللى حواليك فى أى حتة تروحها
يفضلوا يدلعوك دلع
ما بعد المرىء بشوية
يعنى أى مكان تتواجد فيه ست حامل تسمع كلام من عينة
- أتفضلى أقعدى هاتوا كرسى للمدام بسرعة
- متشيليش حاجة يا ستى أنا اللى هشيل
- الدنيا حر تعالى قصاد المروحة أنتى
- خليكى فى مكانك و أنا هجيبلك الحاجة لحد عندك
- لازم تشربى حاجة بقى لا البيبى يزعل مننا
- كلى تانى إنتى بتكلى لأتنين دلوقتى
- محدش يضايقها لحسن البيبى يطلع عصبى
- نامى براحتك و أى حاجة تبقى تستنى
يا لهووووى
إيه الهنا اللى الواحدة كانت فيه دا ؟؟
طبعاً أنا بتكلم عن الحمل لأول مرة
و معرفشى بعد كدا المرات التالية بيبقى شكلها إيه
بس أتصور إنها مش زى اول مرة أبداً
ناهيكم بقى عن إحساسى الشخصى
يعنى كل السعادة اللى فى الكون متجمعة فى قلبى
ربنا كرمنى و هبقى أم
يعنى الحلم اللى قعدت أحلمه من و أنا عندى خمس ست سنين
و ماسكة عروسة بلبسها و أسرحها و أغنيلها عشان تنام
زائد إحساسى الطاغى بأنوثتى لأول مرة فى حياتى
و محدش يستغربها لكن دى حقيقة فعلاً
انا محستش إنى إنثى مكتملة إلا لما بقيت أم
مش لما إتحبيت او لما إتجوزت
طبعاً كل ما يتعلق بالمرحلة دى فضل راسخ فى ذهنى و عقلى كويس قوى
لأنى كنت متاكدة إن هييجى يوم
و هتسأل عنه
من صاحب الحق الأصيل فيه
يعنى كتير كان يوسف يسألنى و بشكل مفأجى
- ماما
- نعمممم
- بسرعة لونيلى وشى عشان الماتش خلاص هيبتدى ى ى ى ى
- طيب طيب مصربع على إيه مالنتيجة معروفة و الأهلى هيغلب كالعادة متقلقش
- أنا لولعبت معاهم هجيب عشرة أهداف لوحدى
- آه مانا مخلفة كابتن ماجد شخصياً
- أنا شاطر فى الكورة يا ماما مش مصدقانى ؟؟!!
- لأ إزاى ؟!! أنت بتلعبها من و إنت فى بطنى أصلاً
- ......؟؟؟؟
- أه و إنت جوا بطنى تسع شهور مكنش وراك حاجة غير لعب الكورة و التشلييت
- هاها ... يعنى لعبت كاس عالم فى بطنك
- أيوه إتريقأ إتريقأ
هات وشك و غمض عينيك يا بعجر عشان الألون متدخلشى فيها
طبعاً يوم الولادة لما الدكتور قالى هنعمل قيصرية كنت متضايقة قوى
عشان المشهد اللى طول عمرى أشوفه فى الأفلام لما الست تولد
و يجيبولها البيبى بين إيديها
كان هيفوتنى خلاص
بس بعدين بقيت ممتنة للطب قوى
إنى خلفته بعملية قيصرية
عشان لما يسألنى سى يوسف مستقبلاً
أنا أتولدت إزاى ؟؟
مبقاش مضطرة أقول حاجات مش عارفة هقولها إزاى
يعنى اكيد الاجابة هتختلف عن إجابتى زمان
لما اخويا الصغير سألنى عن الموضوع دا
و كان عنده وقتها 9سنين
الحقيقة لحسن الحظ إن القطة السيامى بتاعتنا وقتها كانت حامل
و جت ولدت فى سريرى
ساعتها ندهته يتفرج عليها و هيا بتولد فى الخباثة كدا
و بصراحة الواد كان ذكى و أستوعب الفكرة لوحده
عشان كدا بنصح بتربية الحيوانات الأليفة اللى زى دى
عشان بتجاوب على أسئلة يمكن نحتارإحنا البنى آدمين بعقلنا فى صياغة إجاباتها
بس هل يتوقف العقل المدهش ليوسف عن السؤال
و لو بشكل تعجبى
- ماما فيه أصوات جوا بطنك !!!
- آه يا حبيبى عشان جعانة فمعدتى بتقولى اكلينى
- طب ما تاكلى
- أصلى عاملة ريجيم و باكل حاجات بسيطة و معدتى كانت متعودة تاكل كتير
متخدش فى بالك هيا كمان شوية هتسكت
- أنا إزاى كنت قاعد جوا من غير أكل يا ماما ؟!!
- ماهو يا حبيبى أنت كنت قاعد فى كيس كبييير كدا زى ما يكون
أودة مخصوص علشانك
و باب الأودة دا بينه و بين معدتى
ممر طويل أسمه الحبل السرى
بعد ما اكل الأكل ينزل فى معدتى تروح إنت عامل دليفرى و تطلب أوردر
تيجى المعدة تخبط على باب أودتك
زى عمو بتاع التوصيل
تروح سيادتك فاتح الباب و واخد الاكل و واكله
- طب و كنت بتسلى بإيه جوه الأودة دى ؟؟
- غير كاس العالم و الكورة طبعاً
كنت بتلعب بوكس
عارف البتاعة المتعلقة فى السقف و الملاكم بيقعد يضرب فيها دى ؟؟
- آه شوفتها فى الكارتون
- أهو معدتى بقى كانت البتاعة دى و كل شوية حضرتك تلعب بوكس
أروح أنا أعو أعو
( دا لفظ معناه التقيؤ و الترجيع متعارف عليه بينى و بين يوسف )
- هييههه
- بتضحك يا مجرم ؟؟!!
- أنا كنت بلعب معاكى يعنى
- لااااا مانا جيت بعد كام شهر لما إنت كبرت شوية
و بقيت راجل كدا قد خمس شهور و نص
قعدت اكلمك و أتفقت معاك و طلبت منك متعملشى كدا تانى
و إنت سمعت الكلام و مبقتش تضرب عشان إنت شاطر و بتحب ماما صح ؟؟
- صح
- إنت حبيبى يا يوسف
طبعاً الخيال الواسع اللى عنده موقفش عند مجرد التواجد داخل هذا المكان الضيق
و بدأ يفكر فى طريقة وصوله للدنيا
- أنا هحط الشمعة فى التورتة بنفسى و أولعها كمان
- حطها بس ملكشى دعوة بالكبريت إحنا متفقين على إيه ؟؟
- يا ماما أنا كبير و بقيت عندى سبع سنين
- يا حبيبى أنت كبير و كل حاجة بس الكبريت و النار خطر
و حتى الكبار اللى زيى بيحصلهم حوادث
و بعدين من فضلك متزعلنيش النهاردة عشان عيد ميلادك دا اهم يوم فى حياتى
- يا سلاااام بتضحكى عليا
- لأ طبعاً فى اليوم دا من سبع سنين روحت المستشفى و بتألم
و خرجت منها و أنا شايلاك على إيدى و سعيدة جدا
أن عندى إنسان يحبنى و يخاف عليا و يخلى باله منى لآخر العمر
بعد ما كنت معنديش حد يقولى يا ماما
- طب أنا طلعت إزاى من بطنك ؟
- الدكتورعملى عمليه و فتح بطنى و طلعك
كنت نايمة ساعتها بس قالولى بعد ما صحيت
أن سيادتك قعدت تعيط و تعملهم إزعاج و بهدلت الدنيا و قولتلهم
صحولى ماما
و رجعونى بطنها تانى
- أيوه أنا كنت عايز أقعد جوا ... طب ليه مرجعونيش ؟؟؟
- و تحرمنى من إنى أشوفك يا يوسف؟؟
و بعدين لازم كنت تخرج
و تعمل حاجات مكنش ينفع تعملها جوا بطنى
- زى إيه مش كنت بلعب كورة و أكل
- و هيا دى الدنيا بس ؟؟!! مش فيها حاجات تانية كتير مهمة
زى تشوف أهلك و تتعلم و تلعب مع أصحابك و تشوف الدش و تشتغل على الكمبيوتر
و تربى قطط و عصافير و تروح كل حتة نفسك تروحها و بعدين لما تكبر تشتغل
و تعمل إختراعات و الناس تفتكرك بالخير و تتجوز و ...
كل دا هتعمله إزاى و إنت جوا فى بطنى ؟؟؟!!
- أه صح !!!
طب خلاص ماشى خلينى برا أحسن
- و بعدين تعالى هنا إنا نسيت أهم حاجة ممكن تعملها كمان
- إيه
- لو أنت مش برا بطنى مين بقى إن شاء الله اللى هيجيبلى أحفاد يقولولى يا تيتة ؟!!
بعترف إن تجربة الحمل كانت ممتعة جداً
و أنا على باب المستشفى
وطبعاً شايلة يوسف و نفسى بالعافية لأن الحكاية أول مرة صعبة شوية
و رغم إنها كانت علقة لكن أجمل علقة خدتها فى حياتى
كنت بفكر فى المرة الجاية اللى هاجى فيها المكان دا
عشان أخلف البيبى التانى
و يا ريت تكون بنت عشان بحب البنات
و اجيب أخوات ليوسف اللى طلبها منى بصفة رسمية بعد سنين
- ماما أنا عايز أروح ملجأ للأطفال
- حاضر لما نرجع عند جدتك يا حبيبى نبقى نروح سوا
- لأ دلوقتى
- مينفعشى دلوقتى قولت لما نرجع إيه سبب الإستعجال يعنى ؟؟
- عشان اجيب أخ من هناك زى فيلم ستيوارت ليتل
- مينفعشى يا حبيبى دا فيلم يعنى فيه حبة خيال
لكن فى الواقع مش أى حد كدا يدخل ملجأ ياخد منه طفل ببساطة و يروح بيه
- طب نحاول أنا هتكلم معاهم و أفهمهم
- يا حبيبى فيه قواعد و قوانين و بعدين ربنا يسهل لما نرجع نشوف الحكاية دى
- أنا عاوز أخ ألعب معاه
- بكرة نرجع المدرسة و يبقالك أصحاب يكونوا زى أخواتك و أكتر
- أنا لسه هستنى ؟؟ طب إنتى مينفعشى تخلفى ولد دلوقتى
- لا يا بابا مينفعشى عشان أنا مش متجوزة و مينفعش أخلف
- يعنى متعرفيش تخلفى طيب من غير ما تتجوزى ؟؟
- لأ لازم أكون متجوزة
- طب مينفعش تخلفى لوحدك ؟؟
- لا مينفعش
- ليه!!!!
- عشان ييجى البيبى لازم تحصل الرحلة العجيبة
و الرحلة دى بدأت لما كنت سيادتك عبارة عن حاجة صغنونة قوووى فى جسم بابا
و بعدين لما باباك باسنى إنت إتنقلت من عند بابا لعندى
و روحت داخل جوا بطنى
فى الأودة اللى قولتلك عليها و قعدت تاكل و تكبر لحد ما يوم ربنا محدده
خبطت على بطنى و قولت
خرجونى بقى
- يعنى مفيش حد دلوقتى فى الاودة بتاعتى ؟
- لأ يا حبيبى هيا فاضية و مقفولة لحد مانا أتجوز تانى و أخوك يقعد فيها زيك
و بعدين أنا أصلاً زعلانة منك جدا
- ليه
-عشان لما الدكتور كشف عليا قالى إنى حامل فى بنت
و خلاص بعد ما قررت أسمى البنت حبيبة و إذ أفأجى يوم الولادة
إن الناس بتقولى مبروك جبتى ولد
ممكن أعرف بقى إزاى الكلام دا حصل ؟؟
- مش عارف ( بإندهاش )؟؟
- لأ عارف و مش عاوز تقول
- أقول إيه ؟؟!!
- تقول الحقيقة كلها و تعترف فوراً
- يعنى ( بضحكة و محاولة تبرير ساذجة )
أنا كنت بضحك على الدكتور و مستخبى منه
- لأ أنا خايفة من حاجة بقى و مكنتش عاوزة أقولها بس هقولها
- إيه
- أن بطنى كان فيها تؤام و كان معاك بنت اللى هيا حبيبة و إنت طفشتها
صح؟؟
- معرفش بقى (مسايراً للموقف بإبتسامة خبيثة )
- وديت البت فين يا يوسف ؟؟؟ ( محاولة لتضييق الخناق عليه )
إعترف احسنلك
- معرفشى معرفشى ( مدافعاً )
لأ مكنش فيه حد معايا جوا أنا متأكد
- لأ قول الحقيقة مكنش فيه بنوتة معاك ؟؟؟
- لأمشوفتهاش خالص عشان أصلى أنا كنت قافل باب الأودة
و كمان الدنيا كانت ضلمة
طب مش يمكن حبيبة تكون خرجت من ورايا و أنا نايم ؟؟!!!
ممكن ممكن

This entry was posted on الجمعة, يونيو 20, 2008 and is filed under . You can leave a response and follow any responses to this entry through the .

90 كــــلام بيطــبطـــب عـــلى قــــلبى و روحــــى

فاتيما
========
كتبت بوست من فترة اسمه تابوهين والتالت عن اسئله بنتي اللي تقريبا في سن يوسف عن الله والسياسه وطبعا سألت عن الجنس
مضحكه تلك الاسئله وشائكه تلك الفترة اول ما بتجيلهم ورقه الاجابه من بره البيت بيبطلوا يسألوا
:)
وساعتها لازم نطوع احنا ونقدم المعلومه من غير ما تطلب
:)))
تحياتي ومودتي

يا خراشي يا طمطم
إيه الواد ده
يا لهوي يا لهوي
ده زي العسل
ما شاء الله و لا قوة إلا بالله
يا نهار
بقى أنا ممكن يبقى عندي ولد سكر زيه كده؟
بس على كده لازم أتجوز واحدة سكر زيك كده علشان يطلعلها لحسن ده أنا وحش اوي

ده أنا كل ما اقول أنا هآخد الجزيئة دي و أعلق عليها يطلع اللي بعدها أنقح منها
و الله يا طمطم الحوار الطويل اللي في الآخر ده ملهوش حل
يا خبر
عسل سكر شربات مكرر

ربنا يردهولك بقى

ربنا يسعد قلبك يا فاتيما

يلا سلام

وحشتينى يا فاتيما

إية الجمال ده ما شاء الله

ياريت كل الامهات تمارس امومتها بجمال

وثقافة زيك كده,,,,,

وبعدين أول مرة اسمع يقول كلام كويس عن فترة الحمل.....ربنا يرد عليكى يوسف
سالما غانما اللهم آمين يارب العالمين

بجد بوست تحفة ...أنا أضايقت لما خلص

تحياتى وممممممممممممممواه

انا جاى اقول صباح الخير
وامسى واصبح على ام يوسف
واقولها تصبحى على خير
والصبح ابقى اعلق
ده لو كان فى العمر بقية
والفاتحة مقدما يا ام يوسف
هههههههههههه

ما شاء الله الله اكبر على يوسف
بجد زى العسل ربنا يخليه ليكى ياااااااارب ويطمنك عليه دايما


انا مليش دعوه انا عايز اتجوز هشوف الموضوع ده وبعدين اجى اتكلم

ماشاء الاطفال عليهم اسئلة كتير وزى العسل ربنا يخليه لك يارب ويفرحك بيه
تحياتى لكى ياقمر

سؤال ارجو الاجابة عنه
انا اول مرة اجى هنا
يعنى ايه كاتبه على العداد بيطلوا عليا فى غيابك ؟؟
ونفسى افهم فين يوسف؟؟
غايب فين وعنده كام سنة لانى دخلت المدونة بتاعة الرسم وبرضه ما فهمتش حاجة
من فضلك يا ام يوسف تطمنينى احسن انا قلقانة اوى
اللى فهمته من البوست انك مش متجوزة يعنى احتمال تكونى مطلقة ويوسف عند باباه
صح ولا غلط؟؟

فاتيما حوارك جميل يعبر عن امومه طاغيه وقلب مليئ باحنان والعطف ربنا يرجلك يوسف بالسلامه والله انتي خليتيني حبيته ونفسي اشوف الولد ده وربنا يكرمك ويملى حياتك سعاده , تحياتي لكي والسلام ختام

امممممممم
-------
روعه .. قصدعت أضحك كتير أوي
الحوار ده تم ف السبع العجاف
كنتوا لوحدكوا والونس بيولد كلام
والكلام لذيذ اوي
عاجبنى أسلوب تربيتك ليوسف أوي
00
تعرفي
انتي ممكن تكتبي ف أصول تربيه الأبناء
وترسيخ مبدأ التفكير والإقناع
------
بجد رائعه
تحياتي
سلام

السلام عليكم
حسةبيكى اوىىىىىىىىىىىىىى وحسة اوى ازاى بعد التعب دة ما تلاقيش يوسف فى حضنك. عارفة وانا حامل عشان انا فى غربة ولوحدى مليش هنا اى حد كنت انا اللى بعمل كل حاجة بنفسى وكان كل حاجة على قلبى زى العسل وفرحانة اوى ومستنية التسع شهور يخلصوا ويوم ما رجعت من المستشفى انا اللى وقفت نظفت وطبخت بس كانت نفسى صعبانة عليا اوى وكنت تعبانه اوى بس كل ما محمد بيكبر شوية بشوية بانسى كل التعب على فكرة امبارح اول مرة يمشى لوحده. ربنا يردلك يوسف بالف سلامة وتخبيه جوا قلبك وحضنك عشان ميبعدش عنك تانى ابداااااااااا

الله الله الله
بجد والله كنت في عالم تاني وانا بقرا
البوست ده حبه اركز حبه اضحك حبه
اخمن بجد انت حكايه
وتعالي هنا نسيتي تقولي له اهم حاجه
مكنش هيعرف يعملها وهو بطنك
مين كان يخطب ق.م يعني كده
بوسه كبيررررررررررررررررره لكي ولخطيبي
السكر ابو دم عسل ده اللي عاوزه اكله اكل

ماشاء الله عليكي انتي و يوسف تتاكلو أكل
البوست حلو أوي بيجسد احاسيس جميله أعتقد ان كل أم مرت بيها
أنا مش عندي اولاد..ولما حملت مره مالحقتش احس الاحاسيس ديه...لأن ربنا ما اردش فى الشهر التالت
بس الاطفال جمال بيبقى عندهم براءه فظيعه و ذكاء خارق
و انتي ماشاء الله بتعرفي تبسطي المعلومه
ربنل يخليكو لبعض و يجمعكوا على خير

ماشاء الله عليكى
وعلى طريقة سردك
رغم ان البوست طويل الا اننى لم اسنطيع مقاومتة
فعلا رائع
تقبلى تحياتى
ومتعك الله بالحب
ودمتى رائعة

أنا كنت بضحك على الدكتور و مستخبى منه

هاكله .. هاكله كده مم مم مم ..

وبعدان انتي بتغلسي عليه ليه ؟؟
لو اشتكالي انا مش هسكت انا بقول اهو .. وقد اجذر من فنزر

ربنا يخليه العسل حبيبي ده

:)

مش بجامل و الله
بس صدقيني لو قولتلك ده اجمل حوار شوفته بين ام و ابنها بجد و زي ما حد قال في التعليقات زعلت بجد ان الحوار خلص
دايما متعلق بالاطفال و بشتاق ليهم و بتمنى ان ربنا يرزقني الزرية الصالحة و صدقيني بوجودي في مدونتك بشتاق ليهم اكتر
:)
تحياتي يا فندم
سلام

ده انت كده هتخلي الرجالة لما يشوفوا المميزات ده كلها يتمنوا انهم يحملوا
هههههههههههههههههه
وسلاماتي ليوسف كتير
تحياتي

ههههههههههه
ههههههههه
ايه الجمال ده ده ولد ولا بقلاوة
ربنا يخليه ليكى وتفرحى بيه بس الحوار شيق قوى ودمه سكر
ووصفك للحمل رائع جدا جدا وتغذية الطفل جامدة قوى بجد

ماهو يا حبيبى أنت كنت قاعد فى كيس كبييير كدا زى ما يكون أودة مخصوص علشانك و باب الأودة دا بينه و بين معدتى ممر طويل أسمه الحبل السرى بعد ما اكل الأكل ينزل فى معدتى تروح إنت عامل دليفرى و تطلب أوردر تيجى المعدة تخبط على باب أودتك زى عمو بتاع التوصيل تروح سيادتك فاتح الباب و واخد الاكل و واكله
بجد وصف جميل قوى
هههههههه
اسلوبك بجد تحفة يا ام يوسف
تحياتى وتقديرى

طمطم وبعدييييييييييين بقىىىىىىى
هتخلوني اعملها خامس
اجمل فترات حياتي هي الحمل والولادة واول عشر ايام كدة بعد النونو ما يجي
على اد تعبي ومعاناتي تتخيلي انا ما بشربش مية اول اربع شهور ولا بالكل تقريبا والااغرب ما بطيقش الجوولا ريحة الهوا
غريب وتعب بس جميييل
ربنا يبارك في يوسف وتخاويه يارب العالمين من الزوج الصالح
تحياتي

مش ممكن كم الحنان والطيبة دي بجد


ربنا يبارك لك فيه ويجعله قرة عينك يارب


ويارب يرده لك بالسلامة ويصبرك على بعده


نفسي اشوفه بجد قوي


سلامي له لما يرجع وقولي له عمو انس بيسلم عليك


تحياتي

زي السكر بجد
وعقبال ما يرجع تاني في حضن الاودة

ده الحال في الطفل الاول مااوعدكيش في التاني بتلاقي الدلع ده
بيقولوا عليكي عندك خبرة ويبطلوا بتابعوكي
ربنا يخليلك يوسف ويرجعهولك بالسلامة

فتيما روح قلبى

مش عارفه اقولك ايه حوركم مع بعض جميل جدا واجمل ما فيه انك بتحاولى تفهميه كل حاجه باسلوب بسيط ومن غير ما تستخفى بعقله او تكدبى عليه ودى حاجه مهمه

انا معرفش الاحساس اللى بتتكلمى عليه لانى مجربتوش بس حاسه فعلا ان وقتها ده قمه اكتمال الانوثه بدليل ان اللى ربنا مش بيرزقها بتحس دايما انها ناقصه حاجه حتى لو كانت ملكة جمال

سلامى ليكى يا فاتيما وحضونه كبيرة

ربنا ماحرمني من سؤالك عليا يا فاتيما ربنا يهنيكي ويسعد قلبك ويطمنك يارب

ابكيتينى
فقط..

بنت القمر
نورتى يا ضى القمر
بفرح لما بشوفلك تعليق هنا
عارفة اللى مضحك بجد
أسماء الحاجات اللى بالى بالك و إختراعى لأسماء حركية لها عشان لما تتقال متبقاش محرجة لحد و لا لينا
طبعاً كنت اتمنى اكتبها على الملأ بس أنا بلف حوالين التابوهات مقدرش أقتحمها كدا بشجاعة زيكم
تحياتى يا ضى القمر

nigro
بكرة ربنا يديلك كل اللى فى نفسك يا نيجرو
و متهيألى هتعمل معاهم أتكر من كدا كمان بس يا ريت تحامل تكون قريب منهم على قد ما تقدر و تخلى بينك و بينهم لحظات خاصة مخصوص بتاعتكم بس
إنت هتكون أب هايل صدقنى
كفاية قلبك الطيب
والأطفال بتحس بده علطول
تحياتى يا أخويا الصغير

إيمو الجميلة
خلصتوا الأمتحانات و لا لسه ؟؟
يا حبيبتى عقبال ما تبقى أم و ربنا يديلك و على فكرة هتدلعى قوى قوى لأنك البكرية بتاعتهم و كمان الكل بيحبك قوى فدلع للصبح بقى
و المهم تجيبى بنوتة شبهك و شبه نسرين
تحياتى يا حبيبتى

همس الأحباب
خااااالود
أقرالك الفاتحة ربنا يكرمك و يخليلك المدام و همس
لااااا
أنت فهمت إيه ؟؟؟!!!
دن كنت بعمل منظر بس هناك
هوه أنا قد مفقوعة و مفروسة و الزعيمة الكبيرة بتاعتنا خالتشى
أنا بس كنت بهدى النفوس

بطوط حبوب
يا رب
يا رب
تكرم بطوطى الحبوب و ترزقه ببنت الحلال الحلوة الطيبة و تجيبله عيال زى الفل يكتب عنهم بوستات للصبح بس و هما فى حضنه و ميتحرمشى منهم أبدا أبداً
يا رب

رئيسة حزب الأحلام
يا لولى ربنا يسمع منك و يرزقك إنتى كمان بالذرية الصالحة عشان يمكن هما اللى ينهوا حالة الحيرة اللى قولتى عليها
تحياتى يا حبيبتى

جوة البيت برة البيت خد الشيبسى معاااااااك
بطاطس شيبسى لذيذة وطعمة وقرقش انا ويااااااااااااك


معلش يا فاتيما بس كلمة جوة الأودة وبرة الأودة فكرونى باعلان شيبسى بتاع زمان

المهم يا جميل
طب انتى ربنا كرمك انك خلفتى قيصرى وجاوبتى بقلب جامد
انت جيت من بطنى
انا بقى تحسبا ان شريف يسألنى السؤال المحرج ده
عملت اييييييييييييه
السنادى فى معرض الكتاب قعدت ادور على اى كتاب يقدر يفيدنى فى الموضوع ده
وفعلا اشتريت كتاب اسمه من اين يأتى الاطفال
وقلت علشان لو شريف سألنى ابقى اطلع الكتاب واقراه واجاوب على شريف خصوصا انه مكتوب بطريقة علمية مبسطة تخلينا نقدر نقول لولادنا الحقيقة المرة من غير تزييف ومن غير احراج
وربنا يستر

المهم يا جميل
انا بقى وقت الحمل بتاعى كنت ارفض اى مظهر من مظاهر الدلع
هانى يجى يقولى تعالى ارتاحى شوية اقوله لا هاغسل المواعين
يروح الشغل ويرجع يلقينى غيرت نظام الشقة
يقولى زقيتى البوفيه ازاى
اقوله زقيته ببطنى
كان عندى فى الاول انتريه الكنب بتاعه تقيل اوى وكبير جدا
وبرضه هانى يجى يلاقينى مغيرة مكان الكنب
وهو عارف ان الكنب ده لازم علشان يتزحزح من مكانه لازم اتنين على الاقل يكونوا مع بعض
بس تقولى ايه
اختك ساعتها كانت صحتها جامدة
طب اقولك على حاجة
انا قبل ما اولد بيوم واحد
كنت عند ماما واول ما لاقيت ماما نزلت تشترى طلبات للبيت وتعمل مشاوير
روحت نضفت الشقة كلها
وماما شقتها اد شقتى مرتين

اصلى كنت بخاف اوى انضف قدام ماما
لانها كانت هتبهدلنى لو كانت شافتنى بنفض وانا بطنى قدامى مترين

شوفتى والنبى الخيبة اللى كنت فيها
يعنى اهلى عايزين يدلعونى وانا بكل غباء اقول لأ هاوضب الشقة برضه وهاعمل شغل البيت برضه

واللى يلاقى دلع ومايدلعش يبقى عبيط
واختك خيخة كانت اكبر عبيطة ممكن تشوفيها فى حياتك

كفاية عليكى كدة

سلام
اختك خيخة

سبهللة عاالآخر
للأسف
اللى فهمتيه صح
و كله حقيقى
و بالملى
إنتى نورتينى

ahmed-k
اهلاً يا أحمد
ربنا يرزقك باللى زى يوسف و لماضته
و بفرح قوى لما بسمع حد يقول حبينا يوسف من غير ما نشوفه
بحس إنى عرفت أوصفه صح و خليتكو تشوفوه بعيونى جميل أد إيه
نورت يا عزيزى

sagi
مصطفى يا روح حيرانة
أنا بجاوبه الإجابات اللى كنت أتمنى أسمعها و انا صغيرة قده
كانت أغلب الأجابات معرفش لما تكبرى عييييب
دلوقتى الطفل بيتفرج ع الدنيا بحالها
إنا جبت الأجابات دى من الفرجة معاه على الكارتون و من قراءاتى لقصص و مجلات الأطفال زمان من صغرى و كمان مشاهدة الأفلام الأجنبية بتاعت الخيال العلمى و المغامرات
بقيت لما أحب أوصله فكرة بقتبس من الحواديت و الأفلام و اللى شوفناها سوا مع بعض ...
عشان كدا اللى بيقولو الفن حرام رأيهم مبيقنعنيش أبداً
لأن الفن المهم نوظفه فى إيه
أنا أستفدت منه مع إبنى و بشكل مهذب
يبقى حرام إزاى ؟؟
الحرام هو المبتذل منه بس
أنا عايزة أقول فرحانة بيك قوى
بس خايفة الكلام دا يطفشك
هعمل نفسى عاااادى خالص كدا
و مش واخدة بالى
و لا إنت كمان
بس لما تختفى تانى بقى
برضو هستنى تخلص حيرة
و ترجع
تحياتى يا روح حيرانة

مجرد خواطر
يا حبيبى يا محمد
عقبال ما يجرى منك و متعرفيش تحصليه إلا بالعافية
و عقبال كمان ما تخاويه
ظروف حملك كانت صعبة قوى و مدلعتيش
أنا مكسوفة من نفسى بقى كدا خالص
الحمل الجاى بقى
ربنا يسمع دعاكى و يستجيب
تحياتى يا حبيبتى

mayada
يا قاف ميم إتفضليه بالهنا و الشفا
بس يرجع بس
و لسه فيه حكايات كمان و كمان
أنا بنشرلك الغسيل كله أهو
مترجعيش تقولى أتضحك عليا بقى
سلمى على ماما كتيييير

اولا اسمحيلى اهنيكى على اختيار الأغانى الرائع
اغنياتك يا فاتيما بتشيلنى وتحطنى زى موج البحر
وكلامك مينفعش اعلق علية لأنة ببساطة الاحاسيس ميتعلقش عليها نستطيع فقط التصفيق لها
والقول بأنك مبدعة فى نقل احاسيسك وذكرياتك لهو ضرب من ضروب الجنون فلا معنى لأن تخبر الشمس عن أن ضوئها ينير العالم كلة
حبيبتى اعتذار منى عن البوست فمدونتى وربما انتى اعلم الجميع بمدى صدق حديثى ومدى ما يفرضة علينا الواقع من مهاترات فى مجتمع ظالم لا يرحم
تحياتى

واحدة مفروسة
يا فروسة متحرمشى من ذوقك
و ربنا يرزقك أن شاء الله
و لو ما أردشى يبقى كاتبلك توزعى حبك على ناس كتير بدل ما تركزيها فى شخص واحد و بس زى حالاتى
على فكرة إنطباعاتى دى حسيتها بعدين يعنى بعد الولادة بمراحل لما دخلت فى المشاكل و ما تلاها
غكتشفت إن مرحلة الحمل دى كانت أجمل مرحلة عشتها و ما نتج عنها كان و مازال الحاجة الوحيدة فى حياتى و قدرت أعملها و إفتخر بيها
بوسة على خدك و يا بخت خيخة شافتك

طارق الغنام
أهلا يا فندم
خطوة عزيزة
ميرسى على ذوقك و رأيك فينا
اتمنى تيجى دايما
و تكون الموضوعات بتمس حاجة جواك
مش بتجاملنى بس شياكة
نورت جدا

فاتيما انتى محاولتيش تشتغلى مدرسةاو مساعد تيتشراو حتى شادو تيتشر فحضانة اطفال او كى جيهات.؟؟ لو تحبى انا ممكن اشوفلك داخل القاهرة انتى موهوبة فالتعامل مع الاطفال جدااااا والشغل افضل وسيلة لأخراج موهبتك دى لو تحبى انا ممكن اساعد لو سمحتيلى لأن كل طاقة الخيال والحب والتفاعل مع الاطفال دى مهدرة انا مش عارفة دراستك اية بس ممكن بقدراتك دى اشوفلك مكان كويس ومحترم وبراتب جيد فكرى وقوليلى

ahmed mubarak
أيوووووه
مانا عارفة
أول ما يرجع الواد
هتتلموا عليه
يا شباب المدونات
يعنى أنت و نيجرو و بطوط و مصطفى وأحمد سلامة و مادو 80 محمد هيرو و مستر جى كيلر و محمد جست هيومن تيوظولى دماغ البونى اللى حيلتى
و تعملوا عصابة منظمة
و تمرعوا الواد عليا
لااااااا
ميغركوش طيابتى دى
الحنية دى فى البوستات بس
لكن فى الحقيقة بقى
أنا وحش
و كاسر كمان
و معنديش يا ماما أرحمينى
أنا بقولكم أهو

بحبك بجد يا فاتيما ...خلصنا امتحانات
بس المذاكرة شغالة أدعيلى
على فكرة انا بذكرك فى دعائى انتى ويوسف ان يرده عليكى ربنا بكل خير

أما عنى أمومتى المنتظرة ...وخدت قرار بطولى بالزواج وجه الفدائى المنتظر
اللى بجد مشفقة عليه من دلوقت,,,,,,
فعيالى إما هيكون مدلعين أوى.......أو عيال تنشن أوى ,,,,لأنى مش هعرف أكون أم مبدعة وفنانة زيك ...ربنا يخليكى يوسف ,,,,ويجعله ابن صالح لك فى الدنيا والاخرة


تحياتى ومحبتى

عارفة .. مش عارف ليه ؟
و أنت ذووووق قوى ى ى ى
و نورت قوى ى ى ى

shreef
متشكرة جدا يا شريف على رأيك
و على مجييك
متتصورش بفرح بالكلام دا جدا
و ربنا يكرمك
و يرزقك باللى يكون
روح قلب بابا
يا رب

أفاق الحرية
يا شيييييخ حرام عليك
دا الست بتتدلع كام شهر قصاد الراجل اللى بيتدلع طول السنة و العمر
عارف لو الست تعامل جوزها على إنه إبنها البكرى
و الراجل يعامل مراته على إنها أمه
المشاعر المتبادلة بينهم ساعتها هتكون كلها عطاء و حب لا ينتهى و لا يقدرش حد يدتخل فيه يفسده مهما حصل
بس مين يقدر على دا
و مين كمان يستاهل دا
ميرسى على زياراتك و طلتك علينا

همس الاحباب
يا خالد
يا رافع معنوياتى
على فكرة ميرسى على حركة الشياكة بتاعت المرة اللى فاتت
أنا حسيت إنك أخويا و خايف عليا و بيوصلنى لحد ما يطمن تمام إنى روحت
كلك ذوق و متحرمشى من الأخوية دى
سلامى لهمس و مامتها اللى لازم نشوفها فى أقرب فرصة أن شاء الله

نونو يام
إيه يا نونو التعذيب دا
حكاية المية دى أنا عارفها بتبقى ممنوعة بعد القيصرية علطول بس فى شهور الحمل الأولى ؟؟؟
دا صعب قووووى
بس و لا حاجة جنب الطلة فى وش البيبى اللى لسه مولود أهو
دى معجزة إن الواحدة تولد بجد
ربنا يخليكى يا حبيبتى
و يسمع دعاكى و يجعلنا أنا و يوسف فيه نصيب

صاحب المضيفة
يا أنس لما يوسف يرجع
طبعاً هكله اكل الأول لوحدى و أشبع منه
و بعدين أقولكم عشان نتجمع و يسلم عليكم و يشكركم عشان خدتوا بالكم من مامته فى غيابه ...
و ساعتها تسلم عليه بنفسك يا صديقى

سنووايت
يا اميرة الحواديت
يا حبيبتى يا ريت
بس يرجع للأودة مينفعشى
يرجع لصاحبة الأودة
دا الأهم
أنا مقصرة فى حقك قوى
و وشى منك فى الأرض خالص

مفقوعة مرارتها
مانا قولت كدا و توجست خيفة
عشان أصلاً الأم فى الحمل التانى بتكون شايلة العيل الأولانى
يعنى مبتعرفشى تكون براحتها زى الأول و عليها مسئولية خلاص
يا ستى كله نعمة من ربنا
هوه إحنا طايلين ؟؟
ربنا يرزق كل من يتمناها
أمومة و لا أبوة
بوسيلى أحمد و عمر
و أنا لمة التعابين مع حماتك عشان خاطرك أنتى بس
و متخليهاش تطول بقى لحسن هتهور
وفى الآخر هتعور

أهو ده عيبه
يا بيبو ربنا يرزقك
و أنا متاكدة من دلوقتى إنه هيكون طفل مميز جدا
لأنك أنسانة مميزة و حنونة جدا ً
و دمااااغ
ربنا خلق الأنثى فى الأصل عشان تكون أم
مش لازم بيولوجياً على فكرة
لأنى بشوف أمهات بشهادة الميلاد بس
لكن وقت العطاء
مفيش
نفسها و بس
لكن الواحدة ممكن تكون أم من غير خلفة
أم لأخواتها
لأولاد أخوتها
لتلاميذها
لأصدقائها
لأمها كمان لو الام إحتاجت منها الرعاية و تبادل الأدوار
الامومة الحقيقية فى الحنان و العطاء
ربنا يخليكى ليا و ليوسف يا بيبو

نسرين بسيونى
لازم أسأل يا نسرينا
أنتى أختى الصغنونة يا بنت
و بعدين حاسة إنك مخنوقة و مش عارفة أعمل غيه عشان أفك الخنقة
بس قلبى بياكلنى عليكى
فأعدى أطمن
ربنا يخفف عنك يا رب

شيماء سمير
أنتى هتبكى فى كل الأحوال
عشان قلبك دا كتلة إحساس حية
متقدرش تلمس شىء إلا و تتحرك و تدوب رقة ...
يا بنتى إنتى هتكلى ولادك آكل زى ما القطط بتعمل من كتر حبك و هلعك و خوفك عليهم ...
ربنا إن شاء الله يرزقك بإبن الحلال الأول
و بعدين القطط الصغننة تشرف
بوسة على خدك و بالمرة تمسح الدمعة

بت يا خيخة
يا بت أنا كل يوم أكتشف أنك حاطة الأسم دا عشان الحسد بس
طب دنتى لازم تنخفى من قدام أمى خالص
أصلى مبطقش شغل البيت دا خالص
و ماما طول عمرها متحسرة عليا تقولى ليه مطلعتيش زيى و بقيتى خايبة
بقى غاوية تنضيف و شقى و إنتى حامل ؟؟
يا مفترية
حركة نقل العفش دى أنا بعملها أسبوعيا يا نوران من زهقى
و لما كنت فى المنفى كنت بغير نظام الاودة تقريبا كل يومين ...
إحنا دماغنا دى متركبة غلط و لا إيه ؟؟
و لا دا له تفسير نفسى بحت مفاداه إننا عندنا ملل نفسى و بنطلعه فى قلب كيان الحاجة ...
ربنا يكرمك بقى و تخاوى شريف
و إحنا هندلعك غصب عنك بقى
بلا قلة دلع مرىء

كلاكيت تانى و تانى
نرمو يا طاقة النور
يا حبيبتى أنا بحاول اختار الغنوة اللى بحس إنها لايقة على فكرة البوست
و سعيدة إنها بتعجبك
و حكاية البوست اللى فى مدونتك دا أنا متحيرة بسببه
لأن أصل القصة بدأ من لقائنا الجميل
بحاول أفسر تقصدى مين بالظبط
و يمكن يكون فيه سوء تفاهم
بس إنتى أصلاً مقولتيش حاجة ممكن تتمسك عليكى أو تمسك بسوء حتى
الظن السيىء هييجى منين و من مين بس ؟؟؟
عموماً ربنا يصلح الاحوال و يهدى النفوس
و تفتحى التعليقات عشان اللى مزنوق فى كلمة يقولهالك
بخصوص موضوع الشغل دا يا نرمين
إنتى بتخجلينى بكرم اخلاقك و الله
بس أنا لأول مرة هقولها و مخصوص عشانك و عشان متفتكريش إنى بصدك غلاسة و لا حاجة
أنا يا جماعة طول عمرى طول عمرى
محبش علاقتى بالناس اللى بحبهم تتعكر بالمصالح ...
يعنى عمرى ما أفكر اطلب من صديقة او صديق طلب شخصى
عشان محسش إن العلاقة ممكن تفسدها الظروف بأى شكل ما
زائد أن ظروفى الحالية يا نرمو تمنعنى بشكل طارىء لكن مش هيدوم أن شاء الله
أنا بشكرك من كل قلبى بجد مش مجاملة
و تأكدى أن وقت ما ظروفى هتسمح
أنا اللى هجيلك لحد عندك أقولك
يا نرمين يا حبيبتى
أختك بتتقل عليكى و تقولك ساعدينى
أنا حاليا هكتفى بمساعدتك النفسية
و بالقوة اللى بتمدينى بيها من طاقة النور و فرجتى عليكى و انتى بتردى الأساءة بالمعروف ....
كلمة واحدة أخيرة
متزعليش منى يا ريت
و كمان
متحرمشى ى ى ى ى
منك يا رب

إيمو الجميلة
متنشنيين دا إيه
دول هيطلعوا قمر القمرات
بس إنتى خدى القرار البطولى
و ملكيش دعوة
هما أصلاً هيتخطفوا من مامتك و باباكى
و أنتى اللى هتقعدى تتحايلى عليهم عشان تخديهم تدلعيهم حبة من نفسك
أنا كنت بقول زيك
أنا لما اخلف هرعب العيال و هبقى أم صعبة و الامومة مخيفة و بتاع
صحيح مخيفة و مرعبة لكن ممتعة و بتستفز جواكى طاقات و حاجات مكنتيش تتصورى إنها عندك من أصله ...
ربنا يوفقك يا قمر فى المذاكرة
و ربنا يسمع دعاكى يا يا حبيبتى
أنا كمان بحبك قوى

حلم الأمومة يلف و على كل بنت يدووور
و كأنه قطر السعادة ، بيفوت يا ناس بالدور
جنين بياكل و يشرب في أودة بالتكييف
و لما ينزل يزعق في الأم و الدكتور
و عجبي
KING TOOOT

اولا انا مش هعملك مصلحة انا هاحد ثواب يعنى انا كمان مستفيدة منك
ثانيا موضوع ظروفك دى انا مريت بية وكنت بخاف اخرج برة بيتى لفترة لغاية ما واحدة صاحبتى مصرية عايشة فأمريكا قالتلى شئ جميل جدا
ان الله لا يترك المؤمنين المتوكلين قالتهالى بالانجليزى مثل من الدين المسيحى وعشان كدة فتحت محلى ومخفتش وكملت حياتى ومترعبتش
وانا مستنياكى بس انا كل اللى هعملة انى هوصلك باللى يساعدوكى ولو بأرقام تلفونات وانتى وجدارتك
وياريت تصدقينى لما اقولك ان التعامل مع الاطفال شغلتى وبفهم فيها وطاقتك دى حرام تضيع فالهوا واسمعى نصيحتى وبلاش حتى انا اعملى اعلان فالوسيط ومتحكيش لحد عن مكان شغلك بس بلاش تسيبى اجمل ما فيكى يضيع طاقتك وجمال مشاعرك فية اطفال كتير محتاجنلها وخصوصا لو قدرتى تشتغلى فمكان فية ايتام او مدرسة فيها اطفال سن صغير
بالنسبة للتعليقات اسفة مش هقدر او مش عاوزة بحبكم بس كدة افضل انا مش طالبة زعامة ولا عاوزة اطلع القمر انا بكتب عشان بحب اكتب وبس
وانا مش هزور الا اللى استريح عندة بس
الوقت دة اللى بيضيع فالكلام بلا طائل بنتحاسب علية زى كل شئ فحياتنا ربنا بس يسامحنا ويغفرلنا بعض ذنوبنا واخطائناويهدينا للخير
وانتى بالذات لازم ازورك بسسامحينى لو معلقتش الا لو حسيت انى ممكن اساعد بشئ بجد او اعرض عليكى فكرة ممكن تكون غايبة عنك وانا تحت امرك دايما لو تحبى
تحياتى وشكرى

بارك الله فى عقلك و سرعة ردودك و تعاملك مع المواقف

ما شاء الله عليه

ههههههه

يا خبر ابيض
دى حوسة
يعنى انا لما اتجوز واخلف
ابنى حايقعد يقرر فيا كدة؟
ههههه

هابقى اخليه يجيى يقرا عندك بقى
هقوله روح عند طنطك فاتيما
انا معرفكش
هههه

تدوينة عالية قوى

تحيتى

صباح معطر بالورد والياسمين
بوست جميل قد ايه الامومه حاجه جميله وحلم لاى بنت وان كان الحلم دا بالنسبه ليا مشروط بشرط معين

استمتعت وضحكت وحسيت اوى بمشاعرك المعبره عنها كلماتك وايضا مشاعرك اللى بين سطور كلامك وانا اقرا البوست
دائما بوستاتك بتعبر عن انك ام مميزه جدا ربنا يخليكى ليوسف ويخليهوليك

بجد يوسف دا بنبونايه وافتكرت جمله لماما كانت بتقولهالنا لما تكون مضايقه
انا نفسى ادخلكم بطنى تانى واولدكم من اول وجديد وربيكم تربيه من اول وجديد ومختلفه لانى مش مقتنعه بتربيتى ديه هههههه

وصورة فاتن حمامه نورت مدونتك ...لانى من محبى فاتن حمامه ودائما بتفكرنى بممثله اجنبيه عندها نفس الرقه والعذوبه فى الاداء اسمها أودرى هيبورن
لما تشوفيها تحسيها فاتن حمامه باحساسها ورقتها

تحياتى
وش ماسك قلب بنبض

السلام عليكم

ازيك فاتيما

اسف ع الغيبه لكن مش معني كده انك تنسيني ولا حتي زياره وواحده

علي فكره مش قادر اقولك اد ايه انا بحب حوارك مع يوسف
بحب اسمعه

بتمني اكون موجود

تحياتي
وتنوريني

الله يا فاتيما ..
انتي ام جميلة اوي يا حبيبتي ..
ربنا يخلي لك يوسف ..
و يبارك لك فيه .. و يفرح قلبك بيه .

فاتيما لو سمحتى اعلق لنرمو عندك عشان تعليقاتى مش بتتبعت عندها
___________________________________
كـــلا كـــــــــيت تـــانى وتـــــانى

يعنى لما تفتح معايا مدونتك اخيرا واكتبلك تعليق طويل فى البوست اللى بيتكلم عن مفهوم السعاده مش يتبعت
مش عارفه ليه حظى معاكى كده
عموما وحشتنى واتمنى اشوفك قريب
ومدونتك لها نفس روح وقوة شخصيتك
سلامى إلى لينا

تحياتى

هههههههههه بتزنقيه فى الكلام مش عيب كده اعملك فيكى ايه خلاص ان شاء الله لما يرجع هنعمل عليكى حزب انا وهو نور ونقرر فيكى ههههههههههه

يا سلام عليكى يا فاتيما وعلى احساسك العالى بجد
ربنا يخليلك ابنك الجميل يوسف
وتمنياتى لكى بمزيد من التوفيق
لانك تستاهلى كل خير
تحياتى

عندك كمية أحاسيس أمومة تكفي العالم وتفيض
تحياتي

شقيقة الروح

ازاى تقولى كده بس
كلمتك زلزلتنى والله .. انا مش ممكن ازعل منك
انتى مخلوقة غالية جدا عند روحى الضعيفة

هو استنتاجك التانى يمكن صح
فترة اكتئاب متكرر
نفسى اكلمك كتير جدا واعتقد لمحت ايميل ليكى برة هروح اشوفه واكتبلك

انا مش مقاطعة مدونتك الرائعة ابدا ابدا
انا بآجى دايما اطمن عليكى وعلى كل الناس الجميلة دى من بعيد .. سامحينى

الموضوع الاخير اكتر من رائع كعادتك

دمتى رائعةوقريبة
يا شقيقة الروح

هدى

بجد استمتعت جدا بالحوار المفيد ده اللى يعلم أطفالنا كل حاجة من غير ما يقحمهم فى استفسارات وألغاز لا تستوعب عقلهم الصغير
بجد ربنا يبارك لك فى يوسف يا أم يوسف
تحياتى

ربنا يكتبها للجميع

ويا رب يرجع يوسف ..وتجبيله حبيبه

بوستك الجميلة وصلتنى
احم
بحبك يا فطومة
وادعيلى جدا
جدااااااااااااااا

الوقت يمر
بحبككككككككك

يا كميله ما شاء الله ههههههه
بس على فكره مش كل السيدات بتتعامل كويس فى الحمل فى ستات بتاخد بالجزمه فى الحمل وبعد الحمل وقبل الحمل بس اقول ايه ربك بيعوض
ربنا يردلك يوسف ويهد القوى
اسم حبيبه حلو قوى تصدقى لسه مقترحاه على احد المدونين تصدقى بايه يا فاتيما انا جالى زهايمر
انا قايمه لاعك اكتر ولا اقع فى المدونه من طولى
منتظره دعمك فى الخناقه عندى سلام
سومه_87

وليد
يا راعى الملك
نفسى أعرف بقى لما عمر يكبر شوية و يبتدى يسأل الأسئلة دى
هترد عليه برباعيات برضو ؟؟
ربنا يحيينى و أقراها فى مدونتك
تحياتى لبوبو و عمر القمر

كلاكيت تانى و تانى
يا حبيبتى أنا فاهماكى قوى
و ربنا يسهل و تكون فترة للهدوء و ألتقاط الأنفاس و ترييح الأعصاب
و تروح لحالها و تفتحى التعليقات لعسن نبضات بعتالك نداء عبر مدونتى اهو عتلاقيه بعد تعليقك بشوية
الأحباب تناديكى يا نرمو
و يا حبيبتى أول ما ينفع هكلمك علطول أقولك و أكسبك الثواب أن شاء الله
تعالى براحتك و لما تحبى تنبهينى لحاجة مانا أختك برضو و كتير بعك الدنيا و بحتاج لحد عاقل حنون زيك يلحقنى
تحياتى ل لينا و أخوها
و لمامتهم القمر

الطائر الحزين
و يباركلى فيك يا راجى
متحرمشى منك

انجى
اولاً
أهلا بيكى و خطوة عزيزة
ثانياً
أنتى بس شدى حيلك و جيبى عيال و هتلاقى ربنا فتح عليكى كدا و بتجاوبى كأنك مذاكرة لأمتحان الثانوية العامة
و البت خيخة و أى كلام بتقول أنها جابت لأبنها كتب أطفال بتشرح المواضيع الصعبة دى يعنى هتلاقى كتب خارجية فى المقرر ...
ربنا يسعد أيامك يا إنجى
اسمك حلو قوى على فكرة

نبضات
يا عرافتى الساحرة
وحشتينى اليومين اللى فاتو دول
أفتقدتك
ربنا هيكرمك أن شاء الله و هتبقى ام جميلة شكلا و مضمونا
و هتبقى عيلة مع عيالك لأنك فيكى طفولة كدا و براءة
و بعدين علطول كدا كسفانى بشياكتك دى و دايما تاخدى بالك من أى حاجة جديدة أحطها يعنى كلك ذوق
فاتن حمامة أحد الأشياء المشتركة بينا يا نبوضتى لأنها أرق ست شفتها فى حياتى
زمان لما كنت مراهقة مكنتش بحب ممثلات السينما ساعتها و مكنتش أتمنى أبقى واحدة منهم عشان المشاهد و اللبس بتاعهم كان فضايح خالص بس أتمنيت أكون زى فاتن حمامة لأنها تقريباً الممثلة الوحيدة فى جيلها اللى فرضت شروطها كأنثى محتشمة يعنى عمرى ما شفتلها مشاهد أغراء و لا لبس مكشوف حتى فيلمها اللى بموت فيه " طريق الأمل " عملت فيه دور فتاة ليل عملته بكل شياكة و دا مثل للناس اللى بتستعبط الأيام دى و تقولك الدور بيفرض مفرداته و الكلام الهجص دا
ما فاتن حمامة عملت الدور دون إبتذال أهو ...
أنا رغيت كتير معاكى بس أصلك وحشتنى و بتخلينى أدخل فى مواضيع كتير
بوسة على خدك الحلو دا

bar2sh
أزيك يا إبراهيم
يا سيدى بكرة ربنا يرزقك باللى تعمل معاه الحوار ده أن شاء الله
و أسفة على تقصيرى فى حقك و ملحوقة
نورت يا أستاذ

قهوة بالفانيليا
ميرسى يا شيماء
ربنا يا حبيبتى يسمع دعاكى
و يفرح قلبى
و قلبك كمان

آبى
يا أحلى كوكب
كدا يا آبى تعملوا حزب عليا
دنا غلبااااااان
تعرفى أنى كل شوية لما كان يزنقونى فى حاجة أروح محولة الكلام و أقوله وديت حبيبة فين يا مجرم أعترف ؟؟
و أهرب من الموضوع الأساسى خالص
يعنى حبيبة مساعدنى الحقيقة من قبل ما تيجى أصلاً
بوسيلى القمر اللى عندك
و عقبال ما تجيبيلنا قمرك أنتى

صالح سعيد
ادهم شرقاوى
أزيك يا أستاذ ؟؟
أنت فين طفشت و رحت و قلت عدولى
لاااا
حتى ماقلتش عدولى
أنا عديت لوحدى من غير ما تقول
أن اطمنت عليك من البوست الأخير و ربنا يوفقك فى المسلسل اللى بتكتبه
ربنا يوفقك فى كل حاجة
و نورتنى جدا

مايكل مايكليتو
منور يا مايكيليتو
أشكرك من قلبى
و عقبال ما يبقى عندك اللى يخلوك تقول عجب العجاب كدا عشان تقنعهم
تحياتى يا عزيزى

rainbow
هدى يا شقيقة الروح
يا حبيبتى أنتى غالية عندى و افتكرت أنك زعلانة و لا حاجة لانك مختفية الفترة اللى فاتت ...
يعنى الأكتئاب دا مالوش آخر طيب
يا بنتى ما كلنا مكتئبون و الله
ربنا يريح قلبك يا رب
أنا قريت أيميلك و حسيت أنى مهمة جدا جدا اكتر ممما أتخيل
ربنا يخيلكى ليا يا رب
و تحياتى يا حبيبتى
و تعالى فى الوقت اللى يريحك طالما الغيبة مش سببها زعل منى
أنا هنا دايما
و بحبك

ayman badr
مشكرين يا عرضحالجى
و عقبال ما يبقى عندك اللى ييعملك حالة الأستنفار دى و يخليك تقول درر
زى حالاتى كدا
بس عالله الواد يوسف لما يكبر ميقولش ماما كانت بتقول كلام عبيط كدا ليه
تحياتى يا عرضحالجى
أنت منورنى قوى

dodda
يا حبيبة الروح
عارفة و انا بكتب البوست دا
خفت ليجرحك و يفكرك بتجربة صعبة مريتى بيها
و قولت خلاص مش هكمله
و بعدين تراجعت
لأنى دعيت ربنا يكتبلك تمرى بالتجربة دى و تكون جميلة و اجمل كمان ألف مرة من تجربتى ...
و كمان لأنى عارفة إنك قوية و جدعة
و قريبة من ربنا كتير كتير
روحت مكملة بقى
ربنا يسعدك يا حبيبة الروح
و مى هتفضل طفشانة لأمتى بقى

shimaa samir
ربنا يوفقك يا حبيبتى
مجبورة الخاطر بإذن الله

سومة مجنونة فى بلد عاقل
ستات إيه اللى تاخد بالجزمة فى الحمل دى
لاااا متزعلنيش يا سومة
طب دا يبقى راجل لامؤاخذة خالص
يعنى ربنا بيبعتلك نعمة متحافظشى عليها جسديا و معنويا
إيه الرجالة دى ؟؟؟
طب خلاص بالنيابة عن الستات المنطهدة بقى
روحى أدخلى فى الخناقى براحتك يا ماما
و حبيبة أسم حلو فعلا يعنى مش لوحدى حسيت بكدا
طب الحمد لله
ميرسى يا سوما و متحرمشى منك

يا حبيب قلبى

الاطفال فى السن ده فعلا بيحاولوا يسألوا بالذات فى النقطه دى
والكلام اللى الام (خصوصا) بتقوله هو اللى بيترسخ فى عقلهم

كلامك كان مقنع وجميل قوى يا فاتيما

بجد ربنا يخليهولك
اخر البوست بجد تحفه

حسيت بأبنى اللى لسه مجاش

سلامى

عيلة مفترية سابقاً
يا عيلة يا مفترية أزيك
و ربنا يديكى يا ستى و تفننى فى الأجابات ...
و بعدين الفضول دا بيعتبر ذكاء و تطمين لكل ام أن أبنها طبيعى كدا و بيفكر بشكل صحيح ...
عشان كدا كانو أهالينا بيعتبروا اللماضة بتاعة العيال دليل على الذكاء ...
تحياتى يا حبيبتى

إرسال تعليق