.

.

سكووووووووت ... هنتبرع  

Posted by: فاتيما in

و ظهرت الرؤية
و الست الكومل نوران
حطت المعاد النوهائى ليوم الخير
المعروف
بيوم تبرع المدونين للدم
المرة الاولى كانت فى أول أبريل
و المرة التانية هتبقى واحد أغسطس
صاحبة الفكرة و المبادرة هيا خيخة ربنا يكرمها
و يهدى الناس الغريبة اللى بتفتكر دعوتها دى بهدف آخر غير الخير
أنا فوجعت بصراحة لما قريت البوست دا
عند البت خيخة
بس رجعت و قولت معلشى
و مسير اللى هييجى يعرف بجد
أن العمل كله من اوله لآخره
خاااااااالص النية لله
و بعدين يا جماعة
أحد مسئولى المركز اللى كان فى إستقبالنا المرة اللى فاتت
كان مرحب بأى أسئلة و إستفسارات
و يكفى تعرفوا
أن كيس الدم الواحد
( 450 مللى على فكرة مش ليتر كامل )
ممكن يتقسم على أربع أشخاص آخرين و يستفيدوا منه
بسبب حاجة إسمها الصفائح الدموية
و عشان معكش قوى فى الكلام
الاخ المسئول دا ممكن يشرحها تانى لأى حد عاوز يستفهم اكتر
و كمان بيفرجونا فى جولة سريعة على المركز و طريقة سير كيس الدم المتبرع به
و مستوى النضافة هناك
و اللى قلقان من حاجة ممكن يأما يسأل
او حتى يمتنع عن التبرع لو مش مرتاح للحكاية
زائد إنهم هيقيسوا الضغط و يسألوا شوية أسئلة الأول
عشان يتاكدوا إن حالة المتبرع تسمح
وإن التبرع مش هيضره
داغير إنكم هتملوا إستمارة ببعض البيانات عشان تكونوا متسجلين عندهم
و دا إجراء عادى و طبيعى
المكان مكيف يا جماعة عشان الناس اللى حرارة الجو بتتعبها
و اللى هيدخلوا يتبرعوا الباقى اللى قاعد فى إنتظارهم هيكون وقتهم مش مهدر
لأننا هنعقد نحكى و نتعرف أكتر
يعنى اللى جاى و هوه مش ناوى يتبرع مفيش مشكلة
( أنا المرة اللى فاتت متبرعتش أصلاً لكن المرة دى ناويها )
لكن الحضور فى حد ذاته شىء كويس
و لو حتى عشان يساندنا و يونسنا و ياخد فكرة للمرة الجاية
طبعاً مش عاوزين عزومة يا جماعة
نفسى أشوفكم و أسلم عليكم الكل جمعااااااء
و نفسى بصراحة اكتب الأسامى واحد واحدة
بس بالمنظر دا أنا محتاجة بوست لوحده مليان أسامى و بس
جدول الأعمال كالأتى
أولاً
هنتقابل إن شاء الله يوم
الجمعة
1 / 8/ 2008
الساعة
العاشرة صباحاً
قصاد
أو بيقولولها بالبلدى كدا
المصل و اللقاح
فاكسيرا
51 ش وزارة الزراعة
بالنوسبة للمواصلات
متهيألى مترو الأنفاق
كنت أظن إن محطة محيى الدين أبو العز أقرب محطة
لكن بناءاً على سؤال صديقى و أخويا الصغير نيجرو
قررت أدعبس تانى و سالت اخويا ماجد
و إتضح إن
محطة الدقى
هى أقرب المحطات للمكان
و اللى ينزل فيها يركب تاكسى لحد المصل و اللقاح
و يديله 2 أو 3 جنيه و كويس قوى
أو أى ميكروباس رايح فيصل من ميدان التحرير هيعدى قصاد المركز كمان
و فيه مواصلة التاكسى
بقى للناس المريشة
البت خيخة كاتبة نمرة موبايل فى مدونتها إنقلوها تحسباً
عشان إحنا هننتظر مدة قصاد المركز
و بعد كدا هندخل جوا
و اللى متلخبط حبتين يبقى يكلم البونية
عشان يعرف إحنا فين
النوبة اللى فاتت كنا تقريباً 11 نفر و عندى إحساس جميل إننا المرة دى
هيكون عددنا يفرح
المسئول بتاع المركز المرة اللى عدت كان متفأجى بنوبة الكرم دى و قاعد متنح شوية
و مش عارف يعنى إيه مدونات و كدا
نفسى المرة دى يتفأجى مفأجاة صاعقة
و مينساش كلمة مدونات بعد كدا فى عمره
ثانياً
بعد إتمام المهمة إن شاء الله هنحتفل بالمدونين الحلوين
مواليد شهر أغسطس
و على رأسهم اخويا العزيز
العجوز اللى هيكمل 30 بإذن الله
و كمان حبوبتى بنتى عبر الفضاء التخيلى
لماضة الطعامة
و معرفشى مين تانى
بس هنشوف
كنت مش عارفة هنعقد فين بالظبط عشان نحتفل
بس بنوتة مصرية يعنى الجدعنة و الاخلاق
أم نور القمر
لحقتنى علطول و قالت هنحتفل إن شاء الله
فى نفس المكان اللى بنعمل فيه اللقاءات الحريمى بتاعتنا
بس المرة دى هندى فرصة للرجالة و اخيراً ييجوا
فى
نادى الزراعيين
اللى قصاد البوابة رقم 7 لنادى الصيد
و القعدة هتعجبكم قوى
يعنى اللى يحب يجيب الجماعة و الاولاد مش هيتكلف
غير تمن التذكرة للفرد 2 جنيه و دمتم
أنا سخصياً احب من موقعى هذا
أسجل شكرى من معاميق امعاقى ل خيخة
لأنها غيرت المعاد ليوم الجمعة
لأن يوم السبت 2/8
هيكون حفل توقيع ديوان
و اللى عنوانه
( أطياف الصمت )
و لانى ناوية أروح اخد بحس البونية و أشجعها
فكنت هشحطط روحى ما بين التائين
تاء التبرع و تاء التوقيع
لكن الله سلم و بقت كل تاء لوحديها فى يوم
ثالثاً
فيه حاجة كنت عاوزة أقولها ضرورى ....
البت الفنانة المفروسة الجميلة جدا جدا
نوت و النية لله
إنها تجيب معاها ألوان الوجوه
و ترسم وشوش الأطفال اللى هييجوا مع امهاتهم فى اليوم دا
نونا يا فنونة
أحب أقولك
أنا مش مل العيال بس عاوزة ترسميلى فراشة صغنونة على خدى الشمال
ليه ؟؟
هوه كدا يعنى نوع من الإفترا و خلاص
ماشى ؟؟
طييييييب
رابعاً
حاجة كمان كنت هقولها ...
إيه
إيه
آه
إفتكرت
يا جماعة يوم الجيمعة دا هجيب معايا صديقة غالية و عزيزة عليا
هيا مهندسة و ملهاش دعوة بالتدوين خالص بس أنا خوتاها بيكم فى كل احاديثى
و مفهماها إن مدونتى يا ما هنا و يا ما هناك و النظام دا
ف إحياة أبوكو ... إدونى برستيجى قصادها على الآخر
و اللى نفسه يبستفنى و لا يدينى كلمتين فى جنابى
لأى سبب كان
يبقى ياخدنى على جنب و يقولى اللى نفسه فيه بس بلاش قدام البونية
حرصاً على البرستييييييج
و مردودلكم فى الخير إن شاء الله
خامساً
حاجة أخيرة بقى
إحنا عندنا فرح
عقباااااااال عندكم
أصل أل إيه ..
حفيد خالتى
اللى هوه يبقى إبن بنت خالتى
إنتص فى عقله و
هيتجوز
المغفلين هيزيدوا واحد
فهنروح عشان مظهرياً نبارك للواد
و بالمرة نلقى عليه نظرة الوداع
و هنعقد اليومين الجايين هناك ناخد بخاطر خالتى
و بالتالى محدش يقلق يا جماعة و يستعوقنى
و لما أرجع إن شاء الله من الفرح هبقى أرد على كل التعليقات الجميلة
( متحرمشى منكم يا رب ) بتاعة البوست اللى فات ( فرحتين )
و الحالى كمان أشوف مين جاى و مين هيفلسع
...بس مش قبل يوم الأربع بقى
هتوحشونى من دلوقتى و ليوم الجمعة الجميل
خلوا بالكو من روحكم
و يوم التبرع تفطروا فطار محترم كدا
و أستودعكم الله
يا أجمل ناس بعرفهم