ها ابدأ بنفس السؤال
ليه معرفتيش تفرحي؟؟
هل ادمنت الحزن والشكوي
يا بنتي الحمد لله ابنك بخير وكان في حضنك
ليه مش شايفه نعم ربنا
مبهدل ومش مسرح
اكيد اللي من غير ام حاله يغم
يعني مرات ابوه الولده ها تسرح له؟؟!! ما طبيعي الولد حذر ومكسوف
وضعه مش طبيعي وظروفه مش عاديه
انتي غلطانه اوي في حق امك
ورأيي ان عمه كتر خيرة
اه كتر خيرة وهو ماله مش مضطر يتحط في موقف سخيف زي ده الا عشان ده خير ومش مستوعبه حكايه التجسس وكده دي
كان احسن لهم يفضلوا حارمينك من الولد احسن لك تعتذري ليه في التليفون عن عصبيتك
عشان تحنني قلبه ويرضي يجيبه تاني وتالت وتطمنينا عليه.. بصي علي نص الكوبايه المليان
متخليش جراح الماضي تفسد فرحتك اللي كنتي مستنياها
ولا تخليكي تفكري غلط
مكالمه تلبقفون لعم الولد مش عشان سواد عيونه عشان يوسف بس
تقبلي نصيحتي بحب وود والله وان بدت كلها قسوة
تحياتي

الاخت العزيزة
ادعو الله لك ان يصبر قلبك علي بعده عنك
وان يرده لك قريبا ان شاء الله

وانا رغم اني معرفش الحكاية من زمان لكن هي واضحة وانا فهمت مضمونها
واتفهم تماما ليه معرفتيش تفرحي
انت بتقولي شربتي وارتويتي لكن الحقيقة انك مفرحتيش لانك مرتوتيش ابدا
ويمكن محسيتيش انك حضنك بقلبه زي ما حضنك بايديه
الولد معذور طبعا تماما
لكن
نظرة في وجهه افضل من مفيش
واذا كانت الايام مرت وشوفتيه هتشوفيه تاني وتاني
واصبري من قلبك

تحياتي لك

ليه ما عرفتيش تفرحي ؟
لأن كل امنياتك تشوفي يوسف .. و يوم ما تشوفيه ح تتمني يرتمي بحضنك زي آخر يوم بعد عنك .. قلب ام و ده طبيعي رغم ان الواقع مش كده لكن صعب تطبعي مشاعرك بواقع فرض عليكم أنكم تبعدوا عن بعض

و لأن يوم ما شوفتيه مش قادرة تظهرى ألمك لانه ألد اعداءك منتظر يشعر بتاثير ده عليكِ


مش قادرة أقولك غير ربنا يصبر قلبك و يجمع بينك و بين يوسف في خير عاجل غير آجل

و تشعري بحقوقك و كرامتك تترد لك
صدقيني الألم صعب أكيد .. لكن ان شاء الله ربنا يجبر كسرك و يأجرك و يعوض كل الخير ب يوسف

دمتي بكل الخير و ان شاء الله الجاي احلى و أفضل

يوسف شافك وكان طاير من الفرحه يا عينى
عارفه حلم بيكى فى اليوم ده

وفى اليوم التانى قرا فى المقرئه ( وبالوالدين احسانا) واول ما افتكر افتكرك انتى

عارفه كمان دلوقتى عمال يتخيل شكل القطه الصغيره الى هتديها له وكمان نفسه يلعب بيها معاكى

عارفه ايه تانى؟؟ انه كان عايز يسب لك رسمه له او صوره تخطيها فى مدونتك بس ملحقش

كل يوم بيسهر يقول امتى ارجع لماما

بس صدقينى انتى طنتى زهقانه انك تشربى مين ايد الد اعدائك

ربنا يقرب البعيد ياااااااااااارب

فاتيما مش عارفة ارد من دموعى
بس اهم حاجة انك شوفتيه يا فاتيما
انتى شوفتى يوسف
دى كفاية
طلعى انفعالاتك بأى شكل بقى مش مهم
المهم انك شوفتيه
هرجعلك تانى اكون هديت

انتي يا حاجه
اول لما ابتديت اقرا كان قلبي بيتعصر و عامله 111 و الدمعه بتشاور عقلها على النزول..لغاية يا اختي لما قالك البعيد اتجوز وجاب اخ ليوسف
ابتسمت
حتقولي عليا هابله ...ماشي
بس انا شوفت حاجه ......انتي مع كل الغضب و الكره اللي جواكي مش عارفه شوفتيها ولا لأ

يوسف بقى عنده مرات اب...يوسف مش طبيعي لأن ظروفه بقت ملخبطه....بقى عنده مرات أب

و اخو البعيد قالك الست يظهر حتخلص تارك.....
اصبري وادعي فى الأيام المفترجه رجب و شعبان و قبل رمضان إن شاء الله يوسف يرجع لحضنك

اهي الست اللي اتجوزها ديه هيه اللي ممكن تخلي ابنك يرجعلك

اصبري....إن الله مع الصابرين

البت مفروسة دى بتفكر زيي
ولاتكونش بتسرق افكارى
تعرفى يا فاتيما
انا متفائلة خير ان شاء الله
مرات ابوه ان شاء الله هاتكون سبب ان يوسف يرجع لحضنك تانى
دة مش بعيد الواد يهرب لوحده ويجيلك
مرات الاب خدها يا رب
وهى كمان ربنا رزقها بنونو هايشغلها جدا وأكيد مش هاتقدر على الاتنين
واحلى حاجة اننا وشنا حلو عليكى
اللهم قر عينيك برؤية يوسف
اللهم احمع بين فاطمة ويوسف ابنها كما جمعت بين يوسف ووأبيه يعقوب انك على كل شىء قدير
قولوا آمين

فاطمه

الطبيعي جدا من وجهه نظري ولو كنت مكانك
انى اضربهم باحقر شبشب بورده عندي فى البيت واكرشهم زي الجزم القديمه واهزق بكرامتهم الارض
اهنيكي على قوتك وصبرك بصراحه
اصل انا من النوعيه اللى لما باتظلم اوى وتجيلي فرصه اخد حقي حتى لو بالزعيق والشتيمه باخده باحس ان ربنا بيقولى طلعي غلك وغلبك ومبحبش افوت الفرصه اللى ربنا بعتهالى
اصل احنا بشر يا فاطمه مش ملايكه
مينفعش شخص او شويه اشخاص يبقو معذبيني واخدو منى كتير وكتير اوى ومفيش يوم بيعدي عليا غير وانا موجوعه منهم ومن اللى اتعمل فيا وبعدين اقابلهم صدفه او بمعاد من غير ما احرق دمهم واكلهم بسناني

ومامتك اكيد حتقدر موقفك وحتقبل اعتذارك أسأليني انا ياما زعقت فى ماما وقت ما بابقي مقهوره وملاقيش غيرها معايا وبأرجع اعتذر وهى اصلا بتكون مسامحه من قبل الاعتذار

ويوسف ربنا معاه بجد ظروف الاسره المفككه ديه صعبه جدا علي طفل فى سنه وصدقيني القسوه مش فى الاطفال ابدا مفيش طفل قاسي يا فاطمه هو بس مخضوض مش مستوعب وعارف انه ماشي ومش حيقعد معاكي فا بيأقلم نفسه على الوضع وديه رحمه من ربنا والله صدقيني لو كان قعد يعيط ومسك فيكي وسحبوه منك بالعافيه كنتى حتتعذبي اكتر الغفله اللى هو فيها ديه رحمه من ربنا هو طفل وكتير عليه اوى انه يحس ويستوعب كل اللى بيحصل عشان كدخ ربنا لاهيه عنك وعن ابوه وعن مرات ابوه وعن كل الليله ديه
بس بكره لما يرجع ويستقر معاكي حترجعو زي الاول واحسن باذن الله

كله كوم وموضوع الخمستاشر جنيه اللى عاوز يدفعهوملك دول كوم تانى
احيه بجد على الاستفزاز
هو بيطمن مش بتشتغل يعني مفيش فرصه ان يجيلها عريس وتتجوز وتعيش حياتها ميعرفوش ان النصيب لما ربنا بيأذن بيه مفيش حاجه بتعطله

ربنا ينصرك عليهم يا فاطمه ويرجعلك ابنك وتشوفي حقك منهم بعنيكي عشان قلبك يبرد

معلش بقي اصل انا من مؤيدي الانتقام
ده ربنا سبحانه وتعالى قال على نفسه المنتقم يبقي ليه احنا منفرحش بأنتقامه للمظلوم

ماما فاتيما
انا عاوزه اسالك شوية حاجات واسمحيلي بالتطفل
بس بجد احساسي اني متكتفه ونفسي اعمل معاكي حاجه
اولا يوسف عنده كام سنه
ثانيا ايه اللى نقل حضانته لواالده ؟؟
السؤالين دول انا عاوزه اجابتهم
لاني هسال والدي هو محامي بالمناسبة
وليه في القضايا دي كويس قوي
يمكن يجعل سره في اضعف خلقه واسمع منه حاجه بيها تقدري ترجعي يوسف لحضنك
بس الي قلتيه ده مش مبشر اعذريني فيه شوية تخوفات عندي كده

انا بصراحه مكنتش ناوي اسيب تعليق
أقرأ وأمشي وخلاص
بس مقدرتش حكايتك انهارده هزتني
وحسيت أد ايه عذاب أم بعد كل تلك الفتره من البعاد وتقابل ابنها وهو في حالة هلع من مجرد ان حد يعرف انه زارها
مش حقولك ربنا يصبرك ويقويكي علي ما ابتلاكي من زواج زي ده , لأن دي دعواتنا دايما ليكي
لكن حقولك خليكي قويه امامهم ومتشعريهمش بأي لحظة ضعف أو نقطة ضعف فيكي حتي لو كان روح قلبك ابنك لأنهم سيحاولوا يبتزوكي بيه
ووجوده معاهم بالنسبة لهم ورقه يلعبوا بيها ممكن للعب بأعصابك أو للضغط عليكي

يا فاطمه كوني دوما قويه ودوما قلوبنا ودعواتنا معاكي
المهم الحمد لله اتطمنا وياكي علي يوسف
وياريت متفقديش الأمل وتحاولي تشوفي محامي يفتش في ثغرات القانون لأرجاع ابنك اليكي
وأنا أعرف محامي دكتور انما عقر في قضايا الأحوال الشخصيه ومن المحامين كبيري الخبره لو تسمحيلي أتكلم معاه وأسأله ايه ممكن تعملي ؟
ده لو وافقتي

وعموما بتمنالك التوفيق والسعاده من كل قلبي

ودمتي بكل خير

يعني ياجميل اسمع عنك من ناس كتيرة يوم اما اجي الاقيك كاتب بوست تراجيد يكده بس تعرفي دايما انا شفية في الاشياء الي مش ولابد اشياء حلوة قوي زي الي اكتشفتها في بوستك هنا عارفة هي ايه انك شخصية بتراجعي نفسك وقادرة على مواجهة الصعاب بحبك وانا اول مرة ااقرا عندك موضوع يخصك تخياتي لكي واتمنى البوست الجاي اجي الاقي فيه اخبار سعيدة

اخص عليكى يا طمطم كنت اجلتى غضبك ده شويه
معلش عارفه انه غصب عنك بس كويس انك شوفت الجزء الحلو فى الموضوع معلش اعذرى الولد لسه صغير واكيد ان شاء الله لما يرجع كلنا وانتى هتعلميه يتكلم ازاى ويتصرف ازاى ومتنسيش انك مربيه فيه الاساسات يا طمطم
وبعدين انتى بقيتى نكدللى كده ليه
والنبى افرديها بقى ولا ابعت لكى مكوه ولا خروف
والله انا فرحت انك شوفتيه ربنا كبير يا طماطم

خللي إيمانك برحمة ربنا أكبر سلاح
مهما ليل العمر طوّل تقتله شمس الصباح
زرع بيت الشر مهما لبســّوه توب الصلاح
مش حايتحول ملاك ، مش حايبقى له جناح
و عجبي
KING TOOOT

فاتيما العزيزة
============
اولا اعتذر ان كنت سببت ليكي ضيق من غير قصد
ومقدرة الشحن العاطفي اللي انتي فيه
============
شوفي خلينا نكون متفقين ان حكايتك مازال فيها بعض الاجزاء الغير واضحه بالنسبه لي علي الاقل وخوصا ليه مستردتيش يوسف قانونا وليه اتنازلتي عن حقك المادي وكده
انا احترم الجزء من حياتك الذي تستطيعي الفضفضه به
لذلك انا او غيري حين نترك تعليق يكون في حدود معرفتنا بجوانب القصه
قد تكون الرؤيه خاطئه ايضا
انا معرفش مثلا حكايه محضر عدم الاتصال بالتليفون عشان كده نصحتك
المهم انتي بتقولي انه احد افراد كتيبه الشر
وانا معنديش مشكله في ده ولا ها اجادلك فيه
جاي يتجسس وماله... لكن في جزء مضيئ يا فاتيما
حاولي عذاباتك ما تمنعكيش تشوفيه
ان الولد جه لحد عندك جايين يرجعوا الميه لمجاريها يمكن فيه سبب ولو كان مش الحب
جايين يتفاوضوا في الحقوق الماديه
او يسقطوها
كويس يبقا معاكي كارت ربحان
في نقطه كويسه اوي لا حظتها في التعليقات
ان ممكن كون عاوز يرجعلك الولد وخصوصا انه اتجوز والولد ها يكون عبء علي مراته
بس مش ها يدي هولك ببلاش
ممكن يكون ها يساومك بحقوقك الماديه مثلا... وعاوز يقفل الصفحه دي خالص
طبعا ده تخمين بس حطي الاعتبار ده في تفكيرك برضه
اخيرا معلش حقك عليا وها ارجع اقولك برضه.. من صادق مودة وعشم.. ايملي في البروفيل يا فاتيما لو تحبي يكون عندك
تحياتي

صباح معطر بالورد والياسمين
مش عارفه اقولك ايه غير ان كلماتك دمعتنى ولا املك غير دعواتى الدائمه لكى
لكن ....كلها اختبارات وانتى اخدتى نصيبك من الاحزان وانتظرى قريبا جدا نصيبك من السعاده ...عرافتك الساحره

ربنا يرجعه لحضنك ويعوضه ويعوضك عن لحظات الحزن اللى عشتوها بلحظات السعاده

اصبرى ....وباذن الله فرج ربنا قريب

اغنيه فضل شاكر جميله اوى واشكرك على هديتك ورقتك وسعيده انى شوفتك


تحياتى

قلبى معاكى دائما
وبيحبك اوىىىى

اااااااااااه
يا قلبى
=====
أنا سعيدة جدا جدا انك شوفتى يوسف وانه طول شوية وبما انى شفت صورة يوسف فأحب أنى اقولك انهم كل اللى قدرو عليه انهم يعلموه الخوف مش اكتر وانك لو بشوية حضونات كتير هتشيليهم تماما

واضح زى مقلتى انه جاى يعمل حملة إستطلاع وأكيد أبو يوسف عارف بس الولد ميعرفشى وواضح كمان انهم عملوا كده من إلحاح يوسف فى انه نفسه يشوفه

فيه جوانب سلبية كتير فى اللى حصل ده طبعا ومنها كل اللى قلتيه بس انا برده عند رأيى بس اساس يوسف متين ومش هيتزعزع ابدا هو بس وكأنه وقع فى وسط بركة وكل اللى عليه انه ياخد حمام محترم وهيرجع احسن مما كان

والجوانب الحلوة كتير جدا ويكفى انك اخدتيه فى حضنك وشفتى عيونه وسرحتى شعره وان كان على مامتك فهى بس خايفة على مشاعرك ومشاعره والحمد لله انك راضيتيها ومتقليش هى مقدرة وفاهمة وعارفة واثقة ان ده رد فعل طبيعى لكل اللى حصل وبيحصل

فيه نقطة عجبتنى جدا وهى ان ابو يوسف اتجوز وخلف ويمكن بالفعل يزهق من مسئوليته ويسيبهولك وربنا يسهل

أكيد دعوات الناس وصبرك ورضا ربنا هو الاساس دمتى صابرة قانعة وبشر الصابرين

انا رقم موبايلى مع رودى وخيخة لو تحبى فى اى وقت تكلمينى وده هيسعدنى جدا

لما عرفت انك شوفتى يوسف من آبى ومن قبل مروح للبوست وانا بعيط ومبسوطة قوى انك اخدتيه فحضنك

اتعلمى تبطلى تكشفى عن سفالتك امام سفالة الآخرين وتعاملى بعقلك اللى ربنا ميزك بيه عنهم وهزقيهم بس بالاخلاق

انا واثقة ان يوسف فى منتهى السعادة وهو حاضن لعبتك وانك قلتيله ان الامان كله هنا حواليك وفى انتظارك

انا قريت لك كتير لكن دى اول مرة اعلق و كل اللى اقدر اقولهولك

دوام الحال من المحال

زمان من عشرين سنة و انا صغيرة اوى كت شايفة ناس ملايكة و ناس شياطين
دلوقت شفت كل حاجة على حقيقتها و محدش بيمنع حد عن اهله و بعد اما يكبر هيروح مطرح مهو عايز و محدش هيقدر يمنعه

فاطمة اسمعى فعلا كلام ماماتك
استمرى فى حياتك عشان صدقينى و اسالينى برضة الحياة مبتقفش عند حد

الصبر و محدش بيجيب حق حد
ربنا اللى بيخلص لكن متعيشيش عشان تستنى حقك. حقك هييجى لحد عندك لكن المهم ييجى و تكونى انت كويسة و مبسوطة مش ييجى يلاقى الغضب اكلك

تحياتى و دعواتى و قبلاتى ليكى

تشاااااااااااوووووووو

بصى يا فاتيما أنا متابعاكى من فترة بس فعلا أول حاجة جت فى دماغى أنهم عاملين حملة استطلاع عشان يرجعولك يوسف زى ما مفروسة قالت. يمكن انتى مش شايفة النقطة دى لإنك جوه الموقف نفسه بس أسألى نفسك شوية أسئلة:

1. ليه دلوقتى جايبينه و جاينلك؟؟ ماهو كان ممكن يفضل معاهم و هو أكيد بيزن عليهم علشان يجيلك بقالو 5 شهور. اشمعنى الشهر ده وافقوا يجيبوه؟؟

2. كمان موضوع ان مرات طليقك ولدت بقالها شهرين. انتى أكيد عارفة الستات بيبقوا عامين ازاى من قلة النوم و التعب بعد الولادة فهى صعب انها تهتم بيه و خاصة انه مش ابنها و مش بعيد انه يكون صعب عليها أو حتى قالت لباباه انها مش قادرة على اتنين.

3. موضوع انه جايبه من ورا أخوه مش داخل دماغى نوهااااااااائي :) برضه ارجع و أقولك ليه؟؟ و أفرضى ان أخوه عرف يبقى يخسره؟؟ مش بعيده شوية؟؟

4. برضه لازم تحترسى و تسألى نفسك ايه المقابل اللى هما عاوزينه عشان يرجعوه؟ و يا ترى حتقدرى تستحملى و تضحى علشان يوسف؟؟

بجد فاتيما أنا بحبك أوى و حاسة بيكى و أكيد يوسف كان نفسه يترمى فى حضنك بس مرعوب منهم ده مهما كان طفل صغير

كمان متقلقيش فرج ربنا قريب أكتر ما أنتى متخيلة و ربنا اللى رجع سيدنا يوسف لسيدنا يعقوب بعد كل السنين دى, قادر يرجع يوسف لفاتيما :)

فاتيما
طريق الاف ميل بيبداء بخطوه وان شاء الله مره ولا التانيه ويوسف يكون فى حضنك على طول ان شاء الله
كان عندى كلام كتير بس انفعالاتك فى البوست ضيعت كلامى كله

فاتيما حبيبة قلبي

والله العظيم انامتفائله جدا جدا

يا بنتي كفايه كلمة انه ابو يوسف اتهد يعني ده يبشر انه انتقام ربك قرب اوي

وبعدين اخو يوسف اللي لسه جاي هيخلي الست التنيه ديه مش فضياله يعني هما اللي هيجيبوهولك ان شاء الله قريب

وبعدين لازم بقي تشوفي نفسك يا حجه شويه العمر بيجري يا فاطيما وهتلاقي نفسك لوحدك يا حبيبتي لازم تتبتدي من جديد في كل حاجه وانزلي ودوري علي شغل مش لازم تخصصك يا ستي الشغل مالي الدنيا بس اللي يدور بجد ومتسستسلميش ابد ابدا اوعي تنكدي علي نفسك ابدا وربنا هيكرمك لانك بنت حلال وتستاهلي كل خييييير

وبعدين اوعي تخافي علي يوسف دا انتي اللي زرعتيه فيه في الاول كفيل يقضي بيه بقية عمره كله هو بس خايف من عمه ربنا يجزيه لو كانت نيته وحشه
وربنا مبينساش حد ابدا وحئك هيرجعلك ان شاء الله

تعرفي هستني بوست الانتصار قريب جدا ان شاء الله

سلام يا حبيه قلبي

انا جيت لك تانى اهو

بصى يا جميل
من ناحية يوسف متقلقيش خالص
كده كده السن ده بختلط بناس مختلفة و بيلم عادات و تصرفات زبااالة و غريبة
و بيرجع بعد كده لاساسه بمجرد ما يحصل له تقويم

و بردو ممكن يكون مش عارف يعبر عن مشاعره نتيجة خوفه و بعده عنك .. و انتى كمان عمالة تحلمى و تتخيلى اللقاء ده من شهور و كنتى راسمة حالة خاصة له فاى مخالفة لخيالك ده من ناحية الفرحة و المشاعر هيبقى فى حاجة غلط
و ده مش شرط لان انتى ناسية ان فى طرف تانى و له خياله اللى الله اعلم اتقال له ايه .. فهمانى طبعا

نيجى بقى لعم يوسف
من كلامه واضح جدا ان الزيارة لا صدفة ولا شىء
انا مقدرش احكم على نيته ايه منها لكن عمره ما هيعرض تصالح و تهدئة النفوس الا لو كان معاه اذن بالكلام ده

حكاية ان طليقك اتجوز و الست مطالعة عينه دى كويسة جداااا
ليه بقى
لو ناوى يكمل معها غالبا هتحصل مشاكل بسبب يوسف
و لو مش ناوى يكمل معها هيكون متاكد ان اى ست فى حياته مش هترضى بوجود طفل فيها
يعنى فى كل الحالات ان شاء الله الجوازة دى هتكون سبب فى انك تشوفى يوسف على الاقل

اما عن انفعالات فاعتقد سببها الاساس شعورك بان يوسف اتغير
المرة دى كانت تجربة لكى و مقدرتش تتحكمى فى مشاعرك
المرة الجاية لازم القلب يتركن بعيد و يشتغل العقل بس و يعرف ازاى يستغل الموقف لصالحه

فاتيما متخفيش هو لسه بيحبك و فاكرك بس متاخد شوية الظروف اللى فيها كبيرة عليه

انا فرحانة اووووى انك شوفتيه و فرحانة اكتر انك كنتى فى البيت وقت ما جالك
شايفة ربنا بيحبك ازاى :)

مش عارف ليه لما مشيت شويه ف البوست
حسيت انو مش يوسف اللي انا بكلمه ومصاحبه .. حسيتو حد غريب
---
موقف ف منتهي القسوه
--
اعذريني انتي مش جواكي سفاله
بس الغضب - وده طبيعي جدا- ف الموقف ده ..هو اللى حركك
مش عارف أقول ايه بس حسيتني بتنفض وأنا بقرا البوست
ربنا يكون ف عونك
عاجبني انك بصيتي للجانب الإيجابي
يااااااه ..انتي قويه اوي
يلا زقططي كده وطنينا عليكي
والمره الجايه يوسف هيبقي أحلي وأجمل
ويترمي ف حضنك
سلااام

شوفتي يوسف ياحماتي
الف مبروك الف الف مبروك
لولللللللللللللللي
دي اكيد علامه من ربنا يافاتيما
وبصي لنص الكوبايه المليان الله يخليكي

بطوووووووووووط

وبعدين معاك ياقمر

ان شاء الله المرة الجايه يوسف هيجي ومش هيمشي تاني وهتفرحي فرحه جامده اوي لاء انتي مش هتفرحي بس انتي هتظأططي كمان

بطتي ..... انا بحبك جداً

وزة

الكومنتس بتاعتك صعبه أوي
مش عارف احنا قد الثقه دي ولا لأ
---
بس بجد بوجه لأي حد أمر
بلاش القسوه دي
أم مجروحه بجد بجد والله انا سبت الشاشه ووطيت وقعدت مصدوم
--
ياريت نقدر نسمعك حتي ونخفف عنك
ربنا معاكي
سلااام
اخوكي الصغير أو ابنك أي حاجه
بس بعزك اوي
سلاام

فاتيما
انت قلبك طيب وتلقائيه فى تصرفاتك بلاش تلومى نفسك دى ظروف مش عاديه حاسه بكى اوى
بس انا عايزه اقولك الحمد لله انك شفتى يوسف ورغم عيوب اهل والده عليكى ان لاتذكريها امامهم علشان خاطر عيون يوسف
وسلامته النفسيه وعلشان تكتر عدد المرات اللى تشوفيه فيهاوطالمازوجه والده متعبه
فابشرى قريب ان شاء اللهحايرجع لك احرصى على ضبط اعصابك علشان مايكونش فى عند المهم الحرص على سعاده يوسف وده لما تكون الامور هاديه
مامتك حاتكون عذراكى وربنا يخليكوا لبعض . ربنا بيحبك
والكل بيدعى لك يوسف طفل
مش عارف يعبر غن شعوروه والوضع جديد عليه . خللى لقاءتكم دايما سعيده ده اللى حايفكر فيه وحايستمر معاه ماسمعه منك وحضنك ولعفتك عليه حايتحفر فى ذاكرته كلنا بفتكر طفولتنا وبتأثر فينا تفتكرى مدرسه ابتدائى اكتر من ثانوى . اما عمه ووالده فربنا يهدى وربنا اسمه الحق والعدل احرصى على
ان تكون العلاقه بدون توتر علشان عيون يوسف هو عايش معاهم
فكرى فى يوسف وانطباعاته بعد الزياره وربنا يجمعكم على خير ويكتب لكم كل اللى فيه الخير عارفه انه مش سهل
بس ربنا حايقوكى وقبل ماتقوللى حاجه فكرى فى تأثيرها على يوسف وده اللى حايديكى القوه حطى نفسك مكان يوسف وشوفى كان جايبقى عايز ايه واعمليه. ربنا معاكى يارب سادعو لك وليوسف فى صلاتى

تعرفي ...

انتي بعد ما قلت كل الكلام ده رجعت في الاخر جبتي الدرر بجد والله


يا ستي


لو أردت أن تعرفي قدرك عنده فانظري فيما أقامكي

الابتلاء ده أنواع وعلى قدر الابتلاء بيكون منزلة الوحد عند ربنا

لذلك أكثر الناس بلاء .. النبياء ثم الصديقين ثم الذين يلوهم

احمدي ربنا على نعمه التي لا تحصى

واديكي قلت زي ما كانوا جايين يحرقوا دمك برضو شفتي الواد واستمتعي بيه شوية


ربنا يرده لك على خير وتقر عينك بيه يارب

والله نفسي اعمل لك حاجه ومش عارف ازاي

لو انتي تعرفي قولي لي وانا مش هاتأخر والله


ربنا معاكي يارب

مش مشكلة يا فاتيما اى حاجه حصلت
مش مشكلة اى خناقات مش مشكلة اى زعل
الاهم من كل ده انك اطمنتى على يوسف واخديته فى حضنك
على فكرة انا متابعه باستمرار كل بوستاتك يعنى متزعليش

الحمد لله ان حضرتك شوفتيه
ماشي مبهدل ومش مسرح ( ماهو مرات الراجل لسة والدة برضو ) مش عذر بس عامتاً
ساعات الرجالة مبياخدوش بلهم من مظهر عيالهم

و بعدين
أول ال عيث قطر

ومادام شوفتيه مرة إن شاء الله تشوفيه كتيييييييير
وبدعائك و دعائنا ان شاء الله الوضع يتحسن

بصي
متكدبيش اخوة و برضو متصدقيهوش
يعني متكدبيهوش إنه اتغير و بقة كويس
بس متعلقيش آمال عليه بحيث لو طلع كداب متضايقيش
و حاولي تتفاوضي معاة يجبلك ابنك اكتر
بحيث يتعود عليكي تاني
6 شهور كتير برضو في حياة طفل صغير
كيد هيبقي متوجس
وبعدين ساعة و تلت مش كتير برضو
فملحقش يخد عليكي
كويس انك بعتي معاة لعبة

و إن شاء الله يا رب الاحوال تتصلح

و ربنا يعنك يا رب و يصبرك و يكرمك
و يفرج همك و يريحلك بالك

خدي بالك من نفسك

بس فيه حاجة بس عايزة اقولها محشورة في زوري الصبر مش انك تزعقي و بعدين تسامحي ولا تتأسفي

عارفة انه ساعات بيبقي صعب
بس مال مامتك كانت فرحانة برضو انها شافت حفيدها

ربنا يجيبهولكوا بالسلامة يا رب

دمتي بخير و سلامة

سلامٌ عليكي

عارفه

يمكن مفرحتيش لانك مشوفتيش يوسف الصغير حبيبك ابنك اللى انتى عارفاه وعايشه على خياله ما سيبتيه
يمكن يا فاتيما
ويمكن لانك شوفتى عيوب فى يوسف ابتدت تظهر من حياته مع والده واهله
يمكن بردو
يمكن يكون خوفك عليه انه يكون شبهم
او انه يكون متهدد منهم
او انهم يكونوا مخوفينه
ويمكن لانك انفعلتى على عمو
ويمكن لانك لما شوفتيهم افتكرتى او تجسد لكى ذكريات
بس بقولك امك وامى وكل ام ده حالها
كفاية انها شافت يوسف
ده اللى اتربوا عليه هما مش زينا متمردين
ياريت تفهمى ده ومش عيب على فكرة انك طلعتى انفعالك اكيد هى فاهمه كويس
ويا فطومه خصيمك النبى افرحى ده انتى شوفتى يوسف
وربنا بأذن الله هيرجعهولك واحنا مش هنزهق ابدا دعا

سلامى يا فطومه

مع إني لسه خارجه من المستشفى بعد عمليه كده على الماشي..إلا إني أول حاجه عملتها يوم الجمعه.زإني عديت عليك علشان أعرف إللي حصل في اللقاء الحريمي .زولكن ما لقيتش حاجه ..والنهارده لقيت الموضوع إللي قطع قلبي وغاظني جدا ده ..ربنا يقويك ..ويرجع يوسف لحضنك الدافي ..أنا كنت ناويه لما أكون كويسه وقبل ما أنزل مصر أعمل عمره ...وأدعي ربنا يكرمني في إمتحاناتي ..لكني هخلي دعواتي الأساسيه ليك إنت ..إن ربنا يرجع لك حبيب قلبك ويعمل ما فيه خيرك..
بس علشان خاطري ..لو لي عندك خاطر ما تزعليش كده علشان لما يوسف يرجع يلاقيك ورده مفتحه ..
تحياتي

والله ما عارفه ابدأ منين واقول ايه ؟
يا حبيبتى هونى على نفسك شويه معلش انا لو هموت من العطش هشرب غصب عنى علشان مش اموت
يوسف كان وحشك ليه تكسرى فرحتك معلش اسلوبه مش زى ما كنتى بتتمنى بتربيه عليه
يا عالم يمكن بكرة ربنا يرجعه ليكى وتغييرى فيه كل اللى انتى عايزاه وتربيه براحتك ويعيش معاكى علطول (حد عارف بكرةفيه ايه)
وبخصوص بقى حرق الدم اللى من اخو طليقك ده الطبيعى وانتى عارفه انه جاى علشان يعرف اخبارك يبقى مش كنتى اتعصبتى ولااتنرفزتى انا عارفه انك مش عرفتى تمسكى نفسك بس كنتى لازم تبينى ليه ان انتم كلكم خلاص انتهتوا من حياتى ومش مأثريين فيه
اكتر حاجه وجعانى ومش كنت هستحملها لو كنت مكانك ان يوسف مش احس انى وحشاه وان عمه يتحكم فيه فى وجودى بجد حاجه توجع
واخيرا
حسبيا الله ونعم الوكيل
فى كل انسان ظلمك
والله انى احبك فى الله واتمنى نكون اصدقاء حتى اتعلم منك الصبر
سلام وخلى بالك من نفسك

ملحوظه صغغنه
احسن حاجه عملتيها انك قومتى صالحتى امك انتى ام وحاسه قد ايه الام بيصعب عليها من ضناها
على فكرة انتى معزومه عندى لما تفوقى وتنزلى اسكندريه ماااااااااااشى
سلام

لا حول ولا قوة الا بالله
ربنا يكون فى عونك
ويصبرك بجد
بس بصراحة ومن غير زعل
انتى زودتيها حبتين ونكدى على نفسك وعلى والدتك بدون سبب
الحمد لله يوسف كويس واكيد لازم تحصل تغيرات دول 6 شهور مش 6 ايام يا اختى
بس الحمد لله فرجه قريب وانتى ما كنتيش مصدقة ان يوسف ممكن يرجع فجاة وبالسرعة دى
بس ربنا اكرم من الكل وايرجع عاجلا او اجلا لحضنك
انا نفسى اقول كلام كتير بس مش اينفع دلوقتى بعدين ان شاء الله
المهم حمدلله على سلامة يوسف والحمد لله انك اطمنتى عليه وبكرة اكيد احلى يا ام يوسف تحياتى

تمت إزالة هذه الرسالة بواسطة المؤلف.

بحبك

بحبك

بحبك

فاتيما ياروح قلب سالي

بجد بجد بحبك اوي وبحب يوسف وبدعي ربنا ليل نهار انه يرجعلك

وممكن مكنش باجي كتير هنا بس والله العظيم دايما في بالي


اقولك ايه بس

حسيت باحساسك
احساس حد بياخد جزء منك
والمفروض تشكريه لما يوريكي لحمك كده من بعيد

ياقلبي يافاتيما

الحمدلله علي كل حال

الحمدلله انه بخير


ويارب يجي يعيش معاكي وتجوزيه كمان وتفرحي بيه وتشييلي عياله وعيال عياله يارب



ربنا كبير يافاتيما ومابينساش عباده


عليكي بقيام الليل يافاتيما

بجد ابقي بين ايدي ربنا كده قبل الفجر بساعه
ادعي وعيطي وابكي واشكيلو همك وادعي انه يفرجه

وباذن الله ربنا هيحلهالك من حيث لاتدري


بحبك يافاتيما وبدعيلك دايما

فاطمة

من جمعك ابنك بعد 6 اشهر قادر ان يغيرة بين عشية وضحاها

(يتغير االانسان من الكفر للايمان فى لحظة)

ورب موقف بسيط يقلب حال الانسان 360 درجة

الحمد لله ان يوسف بخير

ومثل هذا الاخ (اخو طليقك) اجبنمن ن يفعل شىء من وراءهم

ربنا يكرمك ويبارك فيك

(اعتقد من ضمن تعليقاتى عندك فى مرة سابقة قلت لك وماذا تفعلى لو ان يوسف لا يحب الشيوكولاتة)

على قد ماقلبى وجعنى على الموقف بس بجد فرحت انك الحمدلله شوفتيه وان ربنا استجاب دعواتنا بانك تشوفيه قريب عرفتى بقى ان معانا سلاح قوى وهو الدعاء
الحمدلله بجد ويارب دى تكون بداية خير
(مش قصدى ترجعيله)بس على الاقل ممكن يبقى فيه تفاهم بانك تشوفى يوسف على طول
ربنا مايحرمك منه ابدا ولا من مامتك واخوكى
وماتزعليش ياحبيبتى تلاقى يوسف كان مخضوض وعارف انك مش هتزعلى منه ومتنسيش انه مش كبير كفاية عشان يتحكم فى الوضع
وربنا يكرمك لانك صالحتى ماما هى كان اهم حاجة عندها انك تشوفى يوسف وتبقى مبسوطة وده حصل يبقى الفرج جاى وبداية الغوث قطرة
ربنا يفرحك قريب يارب

فاتيما
*********
يارب تكونى روقتى...احنا كنا فين وبقينا فين ...الحمدلله ربنا بعتلك بشاره انك مش لوحدك و ان كل الناس اللى دعولك ربنا بيستجيب منهم بس كل شئ بميعاده اللى محدده ربنا
ودعينا نري الشئ الايجابى فى الموضوع و ما تحمليش نفسك اكتر من طاقتك...فهم يستطيعوا ان يكونوا اخساء ولكنك لا تستطيعين اتركى الجانب الخسيس للمحامى ده شغلهم و هما عارفينه كويس بحكم اضطرارهم للتعامل مع كل الاشكال

بعد ما تهدى نقدر نفكر كويس ايه مبررات الزياره؟؟!! هل نجح ضغط محاميكى ...ام رغبه منهم فى انهاء الموضوع وديا و ده اكيد ها تكون نصيحة محاميهم لتجنب خساره فى الجوله القادمه؟؟!!يبقى برده ده له تفكير ازاى اتعامل مع هذه المتغيرات و احصل على مكاسب تهمنى مقابل ترك عظمه لهم تهمهم
اهدأى وبعدين هاتعرفى تفكرى و لو عايز اى حاجه اؤمرى اخواتك و اصدقائك

لكن كونى على ثقه ان ربنا مع قلب ام و دعاء اخوات واصدقاء عن ظهر الغيب
وهو افضل الدعاء

تحياتى

انتي شفتيه وحضنتيه وبوستيه
صحيح متغير شوية انما ملحوقة غير ربنا اللي يعلم هما قعدوا يقولوله ايه قبل ما يجولك،، ما تقولش لحد انت عارف لو حد عرف الحوارات دي
فيفي،، معلش،، حسيت بيكي عشان بتفكريني بناس برضه حاسة انا بيهم فحسيت بيكي اوام
طمطم،، كان ممكن نزعل ونهلل ونعمل بوليكا بس مش نشتم معلش حبيبتي ملحوقة ربنا يغفر لك ان شاء الله

سيبك انتي ،، انا قلت بأه هتدخلي تتكلمي عن يوم الجمعة يا فوفة :)

ربنا يسعد ايامك ويريح بالك ويهدي حالك ويطمن قلبك

مها ميهوووو

مش هاقدر غير انى اقول منهم لله
بس يوسف برضه معذور لانه جاى الزياره وفى ناس معاه صحيح اخو ابو يوسف اقلهم غدرا كما قلتى ولكن الولد برضه كان خايف
ام يوسف
لا تستسلمى للاحزان

تمت إزالة هذه الرسالة بواسطة مشرف على المدونة الإلكترونية.

وجعتى قلبى يا فاتيما
ربنا معاكى بس حاولى تشوفى احسن ما فى الناس يعنى افتكرى لعم الولد انه جابهولك
و حتى لو عايز يرجعكم لبعض...الناس بتبقى شايفه ان ده المفروض و حتى لوانتى رافضه و ده شعور انسانى ماحدش يقدر يلومك عليه ...ما تزعليش كده من محاولات الصلح
و اتأكدى كل ما العلاقات كانت اهدأ مع طليقك ده هايكون احسن ليوسف
ربنا يصلحلك الحال و يرجعلك يوسف

السلام عليكم و رحمة الله و بركاتة

ازيك يا فاتيما

علي فكرة كثرة القسوة بتعلم الجفاء

الكلام دا حقيقي
انت اتعذبتي كتير اوي اوي اوي علشان بعد ابنك عنك
و حتي لما شوفتيه دا مشفاك قلبك العليل
لسبب لان هما بيحنسوكي بيه مش انت بتاخديه للابد

وضعك كأم و عاطفتك المغرقة تجاه ابنك مقوينهم عليكي و دا مخليكي متضايقة اكتر و مش قادرة تفرحي

هو انا بس عايزة ا سئل سؤال برئ , هو ليه انت مش بتاخدي ابنك طالما هو لسة في سن الحضانة ؟

شئ غريب
بصي
الناس دي ناس باين عليهم مش تمام , و معلش ياريت ميكونش جواكي تجاههم اي مشاعر لا بالسلب ولا بالايجاب ... عارفة ان دا صعب بل قمة في الصعوبة , بس بجد داالحل الوحيد اللي هيخليكي محتفظة باعصابك لاني مش عايزة اقوللك 75% من الامراض العضوية سببها نفسي و انت فيكي اللي مكفيكي

والدتك ست طيبة و مش حاية بالنار اللي جواكي
و مش قادرة تتفهم ولا تقدر موقفك

و معلش مع احترامي التدين لا بالسبحة ولا بالدقن ولا بالحجاب ولا بالنقاب
اه دي اشباء مكملة و لازمة لكنها مش هي اساس المعيار في الحكم

التدين في وجة نظري السول قال عليه لما قال : انما بعثت لاتمم مكارم الاخلاق

و اساسي الواحد مش بيتعلم ببلاش

ربنا معاكي و الله يا فاتيما مش عارفة اقوللك ايه بس لان كلامي مش هيغير من الوضع شئ

إيه دا يا بنتي ... دانتي حكايتك حكايه!!

شوفي، أنا كل ما أعرف شوية تفاصيل أكتشف إن في تفاصيل أشد، وفي أشد من الأشد... دي ماكانتش جوازه وطلاق، دي كانت حروب عسكريه وفضايح.

بصي، أنا مش عارف كل الحكايات ولا كل النوايا، بس حعلق علي النقط إلي عرفت أجمعها من البوست دا ومن تعليقاتك:

1- هما ماتكلموش قبل ما ييجوا علشان تبقي مفاجأه ويدكوش فرصه ترفضوا ييجوا. يعني فرض أمر واقع علشان برضه يقدروا يوصلوا المعلومه إلي جاينلها.

2- التصرف الطبيعي جدا في موقف زي دا هو طردهم من علي الباب مباشرة. مافيهاش هزار ولا تفكير. بررررره. يوسف مش يوسف، ياخدوا ويشبعوا بيه لحد ما يزهقوا.

3- علي ذكر نقطة يوسف، تفتكري بجد هم عايزين ياخدوه؟ في راجل يطلق واحده ويجوز ويخلف ويبقي عايز ياخد إبنه من جوازه قبل كده، وخصوصا مع السجل الإجرامي المستمر... يعني هو مش باقي علي عيله ولا علي منظره قدام إبنه. الموضوع هو كروت بتتلعب علشان مكاسب... وواضح إن إلي أعصابه أجمد وعنده كروت قانونيه و"عضليه" أكتر هو إلي بيجيب نقط.

4- وبما إن سيادتك مستكينه أوي وبتاخدي القلم وتخافي، وبتتنازلي عن حقوقك بسهوله، فإنتي مش عايزه نقط جديده، بس علي الأقل متخسريش نقط قديمه. متخسريش نفسك ولا تخسري مستقبلك.

5- الزياره دي واضحة المعالم من الأول، أستقصاء عن حالتك لإنك مبتعمليش تحركات جديده يعرفوا منها إنتي فين، وبتعملي إيه، وناويه علي إيه .... وها، بعد يوسف عنها حيساوي إيه في المساومه الجايه، حتبقي مستعده تتنازل عن إيه؟

6- طبعا لو إشتغلتي ولا حد يعرف أي حاجه، ولا حتي جيرانك ولا المحامي ... يعني بالعافيه مامتك وإخواتك. نفس الكلام لو حتدرسي. ولا بني أدم يعرف حاجه. وأنصحك برضه متتكلميش هنا ممكن يكون حد وصل لمدونتك بالصدفه وبياخد منها معلومات. الحذر واجب جدا في كل حاجه.

7- الراجل إتجوز والا إتنيل دي مش قصتك خالص ويا تري مراته مطلعه عينه والا رجله، ويا تري حتقبل يوسف ولا بتضغط علشان تلاجعهولك ..... دي قصص مالكيش دعوه بيها ولا تحطيها في إعتبارك ولا في أمالك وحساباتك لآن لو بنيتي حساباتك علي قصص حتخسري.

8- يوسف مضغوط عليه ومتحذر ومحفظينه يقول إيه ويمشي فين ويعمل إيه، إنتي النهارده عدو (بصراحه كده) ... لما ياخدوا أسير ويعملولوا غسيل مخ ... أهم عملولوا غسيل مخ. طفل في السن دا ممكن يجيبوه من الشمال لليمين.

9- يوسف جرح جواكي... قصه بايته مالهاش حل دلوقتي، فلحد ما يقضي الله أمر كان مفعولا، مهوش ورقة ضغط ولا حتي بشلن... إلي النهارده بفلوس بكره حيبقي ببلاش.

10- إنتي عملتي أقل واجب في الردود علي أخوه ... لو حد تاني كان رزعله كل قاموس الشتايم. لا تحسي بأي ذنب خالص.

11- إختيار الأب والقصه كلها مقدره من الله، إنتي ساهمتي فيها، بس إنتي لو من الأول عارفه نهايتها كنتي إبتديتيها؟ موضوع وإنتهي وله جراحه... جواكي، بس إوعي تكسرك ولا توقف مستقبلك. إنتي حره.

12- أأأأأأه ... ربنا مش بيسيب حد ... دا أكيد وأكيد وأكيد .. عندي قصص وحكايات شخصيه كتيره أوي. "حسبي الله ونعم الوكيل".... جامده أوي الكلمه دي. بس إوعي تتعلمي الشماته ولا تستني تشمتي.

دا علي قد ماقدرت أجمع من الحكايه.

نصيحتي: إنسي كل إلي حصل في البوست دا.... كأنه محصلش خالص. عموما هو لحد دلوقتي مالوش قيمه، ممكن يكون له قيمه مستقبلا وممكن لأ. حانشوف.

الحكمة بتقول
لا تدع سقالة الاخرين تكشف عن سفالتك

هى دى الحكمة يا فاتيما

وانتى معملتيش بيها
انتى عملتى عكسها
الحكمة بتقولك فيما معناه
متخليش سفالة الاخرين تستفزك وتخرجك عن شعورك وتنزلى لمستوى الانسان السافل اللى ضايقك

لكن انتى عملتى العكس
يعنى ماتتمحكيش فى الحكمة بتاعتى



نيجى بقى لشوية استفسارات

بصراحة انا مش فاهمة حاجة

يوسف بعيد عنك من شهر يناير
يعنى من حوالى ست شهور
ومرات ابو يوسف عندها عيل عنده شهرين دلوقتى
معنى كدة ان ابو يوسف متجوز من سنة على الاقل
معنى كدة ان يوسف يوم ما راح عند ابوه فى شهر يناير
كان ابوه متجوز

انتى عمرك ما قولتيلنا ان ابو يوسف اتجوز

طبعا انتى حرة تقولى اللى انتى عايزاه

بس انا كدة اتلغبطت وبقى عندى كم هائل من الاسئلة
هابقى اقولهالك بعدين لما اشوفك يوم التبرع


تانى حاجة بقى انا مستغربلها
البوست ده
رغم انك بتحكيلنا فيه انك شوفتى يوسف
لكن عايزة اقولك ان البوست ده
اقل بوست فيه نسبة مشاعر امومة
يعنى كل البوستات اللى قبل كدة اللى بتتكلمى فيها عن يوسف
كانت فياضة بمشاعر الامومة
ولذلك يكمن استغرابى
ازاى لما تشوفى يوسف متعرفيش توصللنا احساسك بيه لما شوفتيه بعد غياب ست شهور تقريبا؟

حاسة ان مشاعر الغضب من اهل يوسف طغت على مشاعر امومتك تجاه يوسف فى البوست ده


يعنى ايه خدتى يوسف فى حضنك جامد ؟

بس هو ده الى عملتيه
؟؟؟؟؟؟؟؟؟؟؟؟؟؟؟
يعنى مقعدتيش تبوسى فيه فى كل حتة فى وشه وصوابع ايده وتبصيله اوى
دموعك مانزلتش لما شوفتيه؟
قلبك مادقش من فرط الانفعال

قلبك ماتخلعش عليه وهو ماشى


مش فاهمة انتى ليه اهتميتى انك تحكيلنا الجانب المتعلق باهل يوسف اللى جم معاه
اللى هو عمه ومرات عمه
وماهتمتيش انك تحكيلنا عن مشاعرك لما شوفتى يوسف؟


اقولك على حاجة
انا كمان معرفتش افرح
واللى خلانى معرفش افرح هو كلامك
كلامك فيه حاجة قاسية وبرود غريب


حاسة ان البوست ده كتبتيه بعد ما الجماعة نزلوا من عندك علطول
وعلشان كدة
مشاعر الغيظ منهم
هى اللى طاغية على البوست

انا عايزاكى تكتبى بوست تانى
توصفلنا مشاعرك لما شوفتى يوسف



اخر حاجة بقى علشان ادخل انام

بصى يا جميل
بدل جابولك يوسف النهاردة
اعرفى وافهمى وتأكدى
ان يوسف هيرجعلك فى اقرب وقت الى حضنك
وهيتربى وسط اهلك ومامتك واخواتك

صدقينى مرات ابوه لو استحملت يوسف شهر
مش هتستحملوا الشهر التانى
ومامة ابو يوسف
لو عندها صحة النهاردة علشان ابن جوزها
فهى معندهاش صحة بكرة وهتتعب منه
مش هيلاقوا حد اولى بيوسف
غيرك انتى
وهتلاقيهم جايبينلك يوسف بنفسهم ومعاه شنطة هدومه


بس خلاص


انا حاسة ان انا كنت سخيفة فى النعليق ده

متزعليش منى


سلام
اختك خيخة

فاتيما

مش قلتلك هشوفى يوسف وبكرة تقولى رندا قالت هيبات فى حضنك
طلامة بباه اتجوز مش هتقدر يعيش معاها كتير مش تقلقى هى بنفسها هتبعتة ليكى وممكن اوى يعيش معاكى
فاتيما اسئلينى انا........
هيرجع هيرجع هيرجع ان شاء الله
مش تخلى فى نفسك اى غضب ولا حزن
افتحى قلبك لابنك بس ومش تفكرى فيهم خالص ربنا موجود عارف ومطلع على كل شئ وعارف انك قد اية اتظلمتى
ومامتك كانت صح فرحتها بيوسف تعمل اكتر من كدة
وعلى فكرة باباة يعرف انة جيلك دة اتفاق بيهم مش تقنعينى ان اخوة يبقى شهم مع نفسة يعنى بس الاتفاق الى بينهم خلى بابا يوسف يقولة انا مش فى الصورة
ربنا يرجع يوسف ليكى بالسلامة بكرة يكبر ويجيلك لوحدة ومش يحتاج حد يجيبة لعندك ويقعد فى حضنك ويبيت معاكى كمان
فاتيما انا ابنى عندى النهاردة على فكرة الحمدلله ومبيت عندى وسافر معايا كمان هو واختة يارب عقابلك
ربنا معاكى ويصبرك لازم تكونى اهدى علشان لما يرجع يوسف يلاقى مامتة قوية متماسكة امسحى اى حزن واى دمعة
وانتظرى فرج ربنا صدقينى الفرج قرب اوى اوى
مشاء الله يوسف بقى طولك يعنى قرب يكبر ويخرج لوحدة
الصبر ياقمر الصبر
وصدقينى كما تدين تدان
ربنا هياخد حقك
ومش دة الى يهمك المفروض
سيبى ربنا عندة التصرف

وحشتنيى اوى واسفة على التاخير كان عندى ظروف جامدة والله
مستنية زيارتك ماشى

بحبك اوى


رندا

اول مرة احس ان مامتك عندها حق فى طلبها منك يا فاتيما
انك تكونى حريصة اوى و تبعدى اى حاجة فيها مشاركة بمعلومات عنك

انت محتاجة دلوقتى الحرص ده علشان مفيش اى سبب يخليكى تتنزلى عن حق و تاخدى حقك كامل فى حضانة يوسف

و ان شاء الله هتقدرى يا فاتيما ترجعيه يوسف بتاع زمان

اناكمان بحبك و ربنا الاعلم

إحنا كلنا اخواتك وأهلك
وطبيعي إنك تفكي عن نفسك بكلمتين
والدليل أنت قولتيه في اخر كلامك ان الحمد لله إن دموعك وقفت بعد ما بحبحتي حبتين عن الخنقة اللي جواكي

ضاقت ولما استحكمت حلقاتها
فرجت وكنت اظنها لا تفرج

وإن شاء الله فرجه قريب

أخيكي
وليد

السلام عليكم أختى فاتيما
انا اول مرة ازورك بس من كلمات البوست حسيت انى عارفاكى من زمانمش عارفة ليه كنت عاوزة امد ايدى واخدك فى حضنى
بس اقولك الزيارة دى مبشرة جدا جدا والله واضح انهم مش هيقدروا على تحمل مسئولية دكتور يوسف العسل ده
ادعي ربك حبيبتي كتييييير اوى يزرع حبك الجامد جوا قلب يوسف وان شاء الله تفرحي بيه وهو من الصالحين وحفظة القرآن البار بيكى يا قمر

الحمد لله ان الدعوة نفعت و شوفتيه و في أقرب عمرة نكثف الدعوات ان ربنا يرجعه لحضنك تاني و تربيه صح
:)
افرحي انك شوفتيه و ادعي ربنا يتمم لك باقي امنياتك على خير

شوفتى يوسف؟؟؟
خدتيه ف حضنك؟؟؟
"وان شكرتم لأزيدنكم"

والميه مش من ايد.. حد سقاكى الله ماءً طهورا
واجب عليكى ان تفرحى بما اهداك الله وتشكرى "الا اكون عبدا شكورا"

خدى بعضك واقعدى فى اوضتك شويه وفكرى بطريقه تانيه..
وقولى لمامتك مش كتر خيرهم..كتر خير الله
ربنا يفك كربك ويزيل همك..ويعينك فى الابتلاءويرزقك صبرا جميلا

كلام كتير كتير كتير عاوز اقولهولك
خلاصتة
لو الفترة دي عملت كده في شخصه زي ما انتي شفتي
يبقى ده ادعى انك تلاقي طريقه تشوفيه بيها من فترة للتانية بعيدا عن اي منغصات مقرفة من اللي ذكرت واللي حرقت لي دمي لمجرد قرايتها
ربنا يصبرك يا رب
بس متفرطيش في فرصة رؤيته لفترات دي ولو دقايق وهي هتفرق ، محدش له فيه غيرك ، وانتي بس تقدري تشيلي شوية الغبار اللي عكروه ، ولو في دقايق لكل مرة ، وتبدأي من الاول تاني مش هيبقى مستحيل متنسيش ان الاساس موجود وانه اتربي على ايدك انتي مش حد تاني
وياريت تتمالكي اعصابك وتحسبيها كويس لو حصل كلام من ده تاني عشان متفقديش تركيزك وتعرفي تستنتجي بصورة اوضح ايه اللي بيحصل بينهم ، عشان خاطر يوسف مش عشانك بس

اولا الف مبروك انك شوفتى يوسف بس تخيلى انا جسمى عمال يقشعر من اللى انتى حسيته واحساسك ان ابنك مش ليكى
شعور قاسى رغم انى ماجربتش غلو الضنا بس قدرتى تنقلى الاحساس دة بشدة لانه احساس حقيقى مخيف
الف تحيه لكى وربنا يسعد ايامك ويهدى لك الحال لانك بالفعل انسان تتحب فى الله

يا حبيبة قلبي ..
وجعتيني جدا جدا باحساسك دة ..
ربنا يرفع عنك البلاء دة .. و يارب يا رب.. يوسف يرجع يعيش معاكي ..
انا مش عارفة اقولك ايه .. مفيش كلام ممكن يوصف الاحساس اللي اتقل لي من كلامك دة .. من وجعك و من دموعك ومن غربتك في الدنيا التعبانة دي ..
ربنا يعافيكي يا رب من الابتلاء دة .. و يارب يا رب يفرح قلبك ..قريب ان شاء الله هتفرحي..
وجعتي قلبي و الله .. يا رب.. فرح قلبها .

ده الموضوع طلع معقد جدا
بس ازاى يتحكم له بالحضانه و هو كان مقدم شهاده زى ديه...ازاى ما يتحاكمش اساسا
ربنا يعينك

أبنتي الغالية/فاتيما و الأفضل فاطمة
لن أقول لك سوي كلمة و احده
فصبرا جميل و الله المستعان
و قلبي معك أبكيتيني فاطمة
دمتي أبنة عزيزة غالية

معلش يا ام يوسف

انت ممكن تكوني أخدتي الموضوع على فجأة

لكن فعلا ليه قلبتي على نفسك ده كله



خذى من الأمر ما يريحك ويفرحك فقط

اعلم ان نسيان الأخر صعب

ولكن قدر الله

وقدر الله لا يأتي إلا بخير

انا مش زعلانة منك يا بنتى

انا مش عايزاكى انتى اللى تزعلى منى


يا فاتيما انا مصدقاكى

بس انا مستغربة ردود افعالك

بصى تعالى نتفق على حاجة
كلام فى البوست ده مش هتكلم تانى
علشان ساعات الكلام الغير مسموع
ومقروء فقط
بيدى انطباع تانى خالص


بصى يا ست الكل
لو جيتى يوم التبرع
نبقى نتكلم وهاقولك رأيى
علشان المناقشة بينى وبينك مش هتنفع كدة على صفحة التعليقات وبالقطاعى
النهاردة اسيب تعليق اجى كمان يومين اشوف الرد وهكذا
انا مبعرفش اتناقش مع حد بالقطاعى كدة


متزعليش منى بقى

يلا سلام
اختك خيخة

64اوك نكمل مناقشة
نيجى من الاول
لا مصدقاكى لكن كنت مستغربة
انا اعتقدت انك عارفة ان ابو يوسف اتجوز
علشان كدةكان يكمن استغرابى
لو انتى عارفة ماقولتيش ليه؟

واساسا قعدت افكر مع نفسى واقول
طب لتفترضى يا بت يا خيخة ان فاتيما كانت عارفة ان ابو يوسف متجوز
كان ايه اللى هيحصل يعنى؟
بصراحة لما سألت نفسى السؤال ده
لاقيت ان ماكنتش حاجة هتتغير

فبالتالى ابو يوسف متجوز او مش متجوز دى نقطة مالهاش اى اعتبار
لانها مش هتفرق كتير فى الاحداث


نيجى بقى لموضوع رد فعلك مع يوسف
انا هاقولك على حاجة
اولا انا عرفت الموضوع ده من مفروسة
قابلتها فى النادى امبارح ووسط الكلام عن التدوين لقيتها بتقولى
مش فاتيما شافت يوسف
هى قالت الجملة دى وانا جسمعى قشعر وعنيا اغرورقت بالدموع

كان معاها اللاب توب بتاعها قريت نص البوست ومكملتش وقولتلها هابقى اكمل قريته فى البيت

ماكملتش ليه بقىىىىىىىىىى؟
علشان الاحساس اللى اتناقلى من اسلوبك فى كتابة البوست
الاه وهو انك معرفتيش تغرقى يوسف بحنانك اللى انتى بتغرقينا بيه فى كتابة اى بوست عن يوسف

كنت متوقعة الاقى بوست مليان مشاعر امومة مكبوتة وانفجرت

تحيلى كدة انك جبتى كيس مليان شكولاتة كتيييييييير وطعمها حلو وفرقعتيه
مش الشكولاتة دى هتغرق كل اللى حواليها

انا كنت متخيلة كدة انك لما تشوفى يوسف مشاعر امومتك ليه هتنفجر وتغرقه

لكن العكس حصل

تعالى نتخيل حاجة تانية
نفس الكيس بتاع الشكولاتة الجميلة بدل ما نفرقعه بدبوس
نخرمه بدبوس
ايه اللى هيحصل؟
اللى هيحصل ان الشكولاتة هتنزل برضه من الكيس ده بس هتنزل بطيئة وواحدة واحدة على مهلها خااااااااااااالص ومش هتغرق اللى حواليها
دى يادوبك هتلحوسهم بس


انتى بقى عملتى كدة
لحوستى ابنك بحنانك
وماغرقتيهوش

وده شئ غير متوقع من امومة فاتيما اللى كلنا حاسيناها من كتابتها لاى بوست يخص يوسف



انا كنت متخيلة حاجة تانية فى دماغى
ولما لاقيت الحاجة اللى فى دماغى دى ماحصلتش
انا زعلت واضايقت
وعلشان كدة يمكن تعليقى الاولانى كان سخيف
لانى كان نفسى لقاءك بيوسف يطلع زى اللى فى دماغى


هتشوفيه واقف على باب اوضتك
هتاخديه بالحضن رجلك مش هتشيلك من الفرحة هتقعى انتى وهو على الارض وانتوا فى حضن بعض
هتقعدى تبوسى فيه زى المجنونة لدرجة انك مش هتاخدى بالك اساسا من انه ماقالكيش يا ماما ولبا هتاخدى بالك من شعره اللى مش هتسرح

انت واخداه فى حضنك وتقريبا بتفعصيه جواكى
عايزة حضنك يبلعه ويدخل جوة جلدك

هتلبسى اسدالك وتطلعى برة وعنيك مليانة دموع وفرحة وبتشكرى اخو طليقك انه خالاكى تشوفى ابنك
مش هتركزى فى كل السخافات اللى عمال يقولها
انتى مركزة فى يوسف وعمالة تقولى بينك وبين نفسك يوسف طول وعنيك فرحانة برؤياه

بتدخلى جرى تجيبى اللعبة الجديدة وبتديهاله وبتفتحيها قدامه وبتقعدى على الارض معاه وتلعبى معاه باللعبة ومش سامعة ولا كلمة من اللى اخو طليقك
بيقولها
انتى عمالة تراقبى نظرات عين يوسف الفرحانة باللعبة

ومامتك تندهك تقولك فاتيما ردى على فلان ده بيقولك كذا

تقومى انتى تلتفتى التفاتة صغنونة وتسمعى هو بيقول ايه وتردى عليه رد كويس
وترجعى تانى تلعبى مع يوسف
تقومى تجيبله كوباية اللبن اللى بيحب يشربها بطريقة معينة من ايدك


ايوة هتحسى ان يوسف متغير وحاد وخايف بس هتكدبى كل المشاعر السلبية دى ومش هتخليها تغطى على فرحتك بوجود يوسف

عم يوسف هيقوله يلا علشان نمشى
كنتى هتقوليلى علشان خاطرى يا فلان خليكم نص ساعة كمان
كان هيستنى يا فاتيما نص ساعة كمان
علشان شاف فى عنيكى انك ضعيفة من غير يوسف
ولو ماكنش استنى
كان هيمشى وهو حاسس بالذنب انه ماستناش نص ساعة وريح قلبك فيها



كان بايدك يا فاتيما تسعدى نفسك الساعة دى وتستغلى الفرصة صح

ده من وجهة نظرى انا طبعا


وعارفة ان اللى ايده فى المية مش زى اللى ايده فى النار

عارفة انى حتى لو كنت فى ظرف مماثل ليكى
اكيد تصرفى كان هيختلف عنك
لان كل انسان مختلف عن التانى

بس بصراحة كنت متوقعة انك تتصرفى بشكل مشابه للى انا كنت متخيلاه

ويمكن علشان كدة كان تعليقى الاولانى سخيف
لانى لاقيتك اتصرفتى على النقيض تماما


انا اسفة يا فاتيما
مقصدش انى ازعلك منى
بس انا اديت الحق لنفسى انى احاسبك على
انك متصرفتيش زى ما انا كنت متخيلة


زى ماكون كنت بتفرج على فيلم ومتوقعة نهايته
ان البطل والبطلة يتجوزوا
اقوم الاقى المخرج خلى البطل يغرق فى النيل والبطلة تموت مشلولة

اكيد طبعا هاضايق من المخرج
لانى كنت متوقعة النهاية المألوفة لأى فيلم


ارجوكى ماتزعليش منى

ربنا وحده اللى يعلم انى لا اقصد انى ازعلك ابدا
او ازعل اى حد

وبعدين انا دلوقتى بعيط ومش عارفة بعيط ليه


شكرا على الاغنية بتاعة عايدة الايوبى


يلا سلام
اختك خيخة

ربنا معاكى و ينصرك انشاء الله على كل اعدائك و البوست جميل و ربنا يوفقك
تحياتى

ازيك يا فاتيما
انا بجد اللى فرحت اوى انك شوفتى يوسف
انا عزراكى انك معرفتيش تفرحى و انك حاسه انك هتفضلى كده لحد ما يوسف يرجع لحضنك علطول
بس دى اول خطوه انه يرجع هوا اكيد مستغرب بقاله فتره ماجاش
اكيد انتى واحشاه بس مش عارف يعبرلك
عن اللى جواه والله اعلم ايه اللى فى دماغه من نحيتك
بس انا متأكده انه بيحبك وانه هيبقى احسن معاكى
فمتستعجليش ربنا بيفتحلك الطريق واحده واحده عشان لما يرجعلك يرجع علطول مش بس زيارات
اما بالنسبه لمامتك اكيد عارفه انتى حاسه بايه و انتى الله يكون فى عونك
و اول ما هتقوليلها معلش هتنسى علطول
اهم حاجه ما تزعليش بلاش يا ستى تفرحى اوى بس ماتزعليش الأحسن جاى فى الأخر
"ضاقت فلما استحكمت حلقاتها فرجت وكنت اظنها لا تفرج "
ربنا معاكى بجد بدعيلك علطول و كلنا كده وان شاء الله ربنا هيستجيب لدعائنا ربنا معاكى ويحرسك دايما يا ام يوسف

ربنا يارب يرجعه لحضنك بألف سلامه وانتي اللي تربيه وتصلحي فيه كل اللي أفسدته عائلة والده
ماتندميش على الاختيار الخطأ .. مهما كان ربنا مش بيعكل حاجه وحشه
وافرحي انه بخير .. أنا معاكي ان في حاجات تحزن كتير بس كفايه انك تشوفي ابنك وتطمني عليه
وقولي حسبي الله ونعم الوكيل في كل اللي ظلمك وافترى عليكي
وان شاء الله ربنا يكرمك ويفرح قلبك بيه يارب :)

فاتيما

ياه يافاتيما

انا بجد دمعت ومش قادر اتخيل القساوة اللي مزروعه جواهم دي

عارفه تقريبا ده اطول بوست قرأته في كل المدونات
لكن يقرأ وانا حاسسنس بتفرج علي مسلسل درامي

يارب الحلقه الاخيره تبقي بعوده يوسف لحضن فاتيما ويبقي هواللي وحشه حضن امه

عارفه دموعي نزلت وانتي بتقولي انه خرج ومفتكرش يسلم عليكي لولا ندهتيله


يارب يارب يارب ما ياخد قسوة اهله
وربنا يوفقك

اخوكي برقش

رندا
انا مبسوطالك قوى قوى يا حبيبتى
ربنا يريح قلبك دايما و يرجعوا لحضنك نهائياً
..........
مش ينفع يافاتيما خلاص الحمد لله على كدة انا كل املى لما يتجوزوا شقتهم تكون جنبى علشان يكونوا جنبى
..............
إنتى معايا فى نفس الظروف تقريباً و ممكن تقوليلى إذا كنت ببالغ و لا دا الطبيعى ؟؟
..........
اقولك بصى ميحسش بالنار غير الى كابشها صح
يبقى عمر ماحد هيحس بانفعالك دة غير حد وقف نفس الوقفة اعذرى كل الى قالك انتى زوتيها اعذريهم اوى عندهم حق لانهم مش حسوا بالانفعال ولا بشئ غالى اتاخد منهم دة ابنك

اقول اسئلى اى حد لو من حقة ترقية فى شغلة وحقة يكون خلاص اساسى يعمل اية لو تعدوة فى الترقية وهو لقى نفسة مظلوم والكل يقعد يترقى وهو لا واخدوا حقة منة هيعمل اية مش هينهار فى عملة مش هيدخل للمدير ويتكلم ولو مديرة قالة لا مش حقك هيعمل اية وممكن اوى يزعق مش هيعمل كدة ولا اية مالبالك بقى بقطعة منك اتخدت منك
مع انة غصب عنك وكنت اتمنى انى اعرف اصرخ زيك كنت خرجت كل طاقتى بس انا اختلف فى الموقف لما حصلى بلاقى نفسى صامتة منهارة صمتا جسدى يرتعش الما بس كل الكلام بيكون خلص
يااااااة اقول اية بس كل الى اقولة ليكى هدى نفسك علشان يوسف لما يرجع
يفتكر شئ واحد فقط ان امة كانت صابرة اولادنا مش بينسوا ابدا ولما بيكبروا بيعرفوا كل حاجة وبيقدروا يحكموا على كل حاجة
اوى تقوليلة كلمة اهانة على اهل ابوة ولا ابوة نفسة
انا بكون منهارة من جوة بس مش اقدر اقول لاولادى كلمة ولما كبروا قالوا عمرك ماغلطى غلطة فى حقة ولا سمعنا منك كلمة غلط علية عارفة لية يافاطمة علشان ولادى مش علشانة هو تخيلى اب بيقول كلام وام بتقول كلام نفسية الاولاد بتكون اية يبقى لازم حد من الطرفين يكون اذكى خليكى انتى الاذكى وصدقينى يوسف هيرجع
.............
رأيك هيفصل حاجات كتير
لأنى بحس إنى بتدلع و بفترى أوقات
و بحس إن دا أقل من اللى مفروض أعمله أصلاً
.........
مش تحكمى على موقفك بالطريقة دى مش تتعبى عقلك ولا قلبك اكتر من كدة
انا فى لحظات كان عقلى وقلبى بندول ساعة شغال 24 ساعة وفى لحظة قلت لا لازم اهدى شوية علشان بكرة وعملت كدة كونى قوية لان اى ضعف مش هيغير شئ من الى حاصل يبقى نعمل اية
نعيش لبكرة للامل ودة الى بادينا نعملة
.............
معرفش إيه الصح و الغلط
بس بحاول اكون نفسى
و مخبيش
............
تخبى لية انتى من النوع الصريح مع نفسة ومش بيعرف يخبى مشاعرة وبالذات قدام اخوات واخوة جمال ياريت انا وقت ازمتى كنت الاقى ناس حلوين كدة كنت قلت اكتر منك بس مع الاسف مكنش فى عالم اسمة التدوين
.............
يظهر إن دا مش عادى و لا إيه ؟؟
...........
هى الصراحة تبقى مش عادى فى الزمن دة ياربى لية الكل بيكون راسة فى الرمال لية ولية كل واحد عندة احساس مش بيعرف يقولة بصراحة انتى جميلة اوى يافاطمة
..........
أنا الحمدلله بخير و احسن
بس رد فعلى دا كان عادى
و لا زى نوران ما قالت
........
انا رديت على الجزء دة اعذرى نوران
هى من خوفها عليكى قالت الكلام دة
لازم تقولك الكلام دة علشان تكونى قوية الصديق الصح بيقوى صاحبة وهى كانت تقصد كدة
..........
البوست دا أقل كم امومة قرته ؟؟
مش عارفة
بس إستمتعى بسفريتك إنتى و العيال
و إنتم السابقون يا راندا
...........
وان شاء الله تسافرى مع يوسف وتعوضية عن كل الغربة مش هو مغترب عن حضنك
بكرة حضنك يملاة ويحتوية بس خليكى جمدة علشان يوسف يرجع يلاقى قوة حضنك
صدقينى لما نتناسى الى تعمل فينا
بيكون قلبنا اصفى لبكرة صفى قلبك
وسيبى ربنا يعمل كل الخير لانة عادل
مش ممكن يخزل قلب ام ابدا بس استنى بكرة

طمطم بحبك اوى وحاسة بيكى اوى اوى
ربنا يصبرك
رندا

كان الله فى عونك وأراح قلبك ذات يوم قريب ، تجربتك القاسية لا يصلح معها سوى الصبر ، أمدك الله بك دوما .

عزيزتى فاتيما
لم اقصد ابدا انك تكونى ضعيفه
او تستعطفى من قاسيتى منهم
انا قصدى بلاش تهاجمى
كان معى فى الفصل وانا طفله
صديقه فى نفس ظروف يوسف وكانت
تقوللى كان نفسى ماما تحضنى
وتنسى اللى عمله فيها بابا
انا زعلانه منه بس بحبه غصب عنى
وكانت رغم حبها لامها الا انها
كانت بتتعب من زيارتها لان الوقت بيضيع فى كلام كان بيتعب نفسيتها حطى نفسك مكان يوسف عايز حضن دافى
وكلام جميل ووعد بانك على طول معاه حتى لو كان مش جنبك انا عارفه ان اللى جواكى كله حب وشوق ليوسف
ده لازم يوصله ومافيش حد فى الدنيا مهما كان ابوه او امه سىء يحب يسمع ده هو حايكبر وحايعرف مين الظالم والمظلوم وحايعرف صبرك ومعانتك علشان مش عايزه
تجرحيه واتحملتى انك تشوفى ناس مش طايقهم علشان خاطر عيونه. ربنا يهدى سرك ويريح قلبك ويطمئنك عليه
ويجمعكم على خير ياااااااااارب

لا أجد سوى الكلمات التى رددتها كثيرا

فى بيت الله الحرام وامام الكعبة

(اللهم ياراد يوسف لأبية رد يوسف إلى أمة)
______________________

أنا حزينة اوى على فاتيما الطيوبة العسولة اللى بتحب كل الناس وبتعاملهم بشخصيتها مش بتلبس أقنعة الشر..

وف نفس الوقت أنا مقدرة انك مش ممكن ابدا تعملى كدة بدون دوافع قوية جدا واسباب لا يقوى على تحملها بشر..


-------------------------------

اللهم هون عليها يا الله يارحمن يارحيم ياحى ياقيوم....

عمر الصورة اللى انا رسماها ليكى ما بهتت
ولا هتبهت ابدا
هتفضل محتفظة بالوانها الصريحة
الغامق منها والفاتح
الملعلع والهادى

عمر صورتك ما هتتشوه بينى وبين نفسى يا فاتيما


ايوة انا اعرف ان اللى ايده فى المية مش زى اللى ايده فى النار

بس ماجربتش ان ايدى تكون فى النار
علشان كدة بتكلم وقلبى جامد

يمكن لو حصلى ظروف مشابهة لظروفك
كنت اتصرفت اكتر من تصرفك


وبعدين انا ماكنتش بعيط علشان انتى كتبتى سخافات
واساسا انا مش شايفة فى ردودك عليا اى سخافات

انا كنت بعيط علشان مضيقالك ومتغظالك وصعبان عليا انك متستمتعيش بوجود يوسف حتى ولو وجوده ده كان مجرد ساعة زمن


انا معنديش حاجة تانية اقولها
لو انتى عندك حاجة
قوليها


تعالى نغير المود ونضحك شوية

فاكرة يوم الجمعة
لما وريتكم انا كنت بجرى ازاى من الكلب
على طريقى الرملة سخنة الرملة سخنة


اييييييييييييوة
اهه انا مش عايزة اكتر من الابتسامة الصغنونة اللى اترسمت على وشك دلوقتى


يلا سلام

اختك خيخة

آآآآآآآآآآآآآآآآه

بجد
عايزة احضنك جدااا بجد

شيماء سمير

تؤام مشوارى

اشكرك على كلماتك فى حقى كان لازم اقول الحقيقة يافاتيما وانا كنت لازم اتكلم بصدق عارفة يافاتيما كنت زمان اريد كلمة صدق من اشخاص قريبين منى وكانوا يتصورون انهم لما يكونوا ضد رائ بيجعلونى قوية
القوة بتيجى لما نلاقى حد حاسس بقلبنا بمشاعرنا مش يكون ضدنا
انا قريت ردودك وانك لبستى الوش الشرير لا يافاتيما لازم تكونى هادية مش تقابلى الشر بالشر علشان خاطر ابنك مش يتلخبط ويقول كل الى حوالية اشرار حسوا بالطرف التالت يافتيما مش لية ذنب فى ان اهل بباة وباباة كدة هو متلخبط فى السن دة ومش عارف الصح من الغلط خليكى انتى الصح والحقيقة الصح فى حياتة
بكرة يعرف مين الصح ومين الغلط الدنيا هتعلمة كتير اوى
وهيفهم انك قد اية كنتى الام الجميلة لية
عارفة كمان نسيت اقولك شئ مهم
كل طاقتك خرجت فى يوم ماشوفيتة لانها كانت مقابلة بعد 6 اشهر من الصمت
كان لازم يخرج كل الصمت حتى لو على طريق صرخة لانها بالنسبة ليكى كانت صرخة مكتومة
عارفة بعد كدة لو شوفتى اى حد من اهل يوسف ومهما تكلموا ومهما قالوا مقابلتيك ليهم هتكون مختلفة خالص
خلاص الصرخة طلعت وكل الطاقة خرجت
ابقى افتكرى كلامى دة فى المرة القادمة من مقابلتك ليهم هتكون مختلفة تماما هتكون اهدى جدا ولا كانهم موجودين ولا قاعدين مش هيهمك غير يوسف فقط هو يوسف عندة كام سنة ياترى
ربنا معاكى يارب يرجعلك حضن يوسف

كل الحضن وكل القبلات لاجمل اخت

انا فى انتظارك عندى فى مدونتى مش تتاخرى بقى

ب
ح
ب
ك

رندا

يااااااااه ايه البوست دا

دا انا اللي دايما بيقولوا عني اني متجمد المشاعر ومتحجر الاعصاب ومتشتت الافكار

بجد انفجعت من الموقف المؤثر دا

بس ارجع وااقولك اعملي اللي بيمليه عليكي ضميرك كأم عليها واجب انها تحبب الابن في ابوه على افتراض ان الأب من واجبه يحبب الام في ابنها

ربنا يجمع شملكم ويخلي ايامك سعيده ان شاء الله

انا متفاؤل خير بالمحكمة بتاعتي واياتوها خدمه احنا تحت النظر يا ام يوسف

ما تتكسفشي يا بطابيطو
وبلاش عياط الله لا يسيئك لاحسن معييش الكلينكس وهضطر اديكي كم القميص الجديد بتاعي وامري لله

خلي بالك من نفسك واكيد صبرك دا نهايته خير وخلي بالك من مامتك الست ملهاش ذنب

يلا فتك بعافيه وسعادة

ياااااااااه كل ده يحصل وانا ولا هنا
معلش انشغلت ومقرتش البوست غير متاخر
بس صدقينى يا فاتيما حسيت بكل احساسك
الفرحه ناقصه وومزوجه بالغضب والسخط انى اخد حقى من عدوى وكانه بيتفضل بيه على وده اسوء احساس

وزعلت اكتر من طريقة يوسف معاكى بس ممكن يكونوا ضاغطين عليه
وخايف يروحوا يحكوا حاجه

متصدقيش ان عمه جابه من وراهم لان واضح من كلامك ان شخصيته ضعيفه وممكن يكون حافظ الكلمتين دول
هو جاى يستشف حياتك عامله ازاى ، وبيزق فى النص كام كلمة ان غيرك شاف حياته ال يعنى و بقى للاحسن واتجوز وخلف تقومى ال تغيرى مثلا، ده من وجهه نظرهم الهبلة

الولد للاسف كده ممكن يطبع بطباعهم ، يبقى حاولى تكونى اهدا علشان تعرفى تشوفيه اكتر وتحاولى واحده واحده تلحقيه قبل ما يتغير خالص

بصى عمه مكنش اكتر من موصلاتى يعنى غضبك ينصب على الشخص السبب فى كل ده

انا بجد حاسه بيكى واول البوست فرحت جدا بس رجعت زعلت من اللى حصل فى المقابله وفرحتك الناقصه

يارب يرجعلك بقى وترتاحى ويرتاح لانى حاسه ان الولد مقهور ونفسى تربيه بنفسك وتعلميه كل حاجه

وعموما متزعليش ان اول الغيث قطرة، على الاقل شفناه واطمنا عليه ودى لوحدها بالدنيا

سلامى يا فاتيما واكبر حضونه فى الدنيا ليكى وليوسف

السلام عليكم
الناس قالت كتير اوي
هقولك على حاجة مهمة اوي طلعت بيها من الموضوع دة
انتي انفعالك هنا كان انفعال غيور اوي على امومتك وحقك
دة ابني بتاعي حقي ولدته انا ورضعته وربيته ودي طريقة يجيبوه بيها وكمان مغيرينه دة كلام هقوله لنفسي لو انا مكانك واعتقد انك قلتيه
فالموقف انفعالي غيور على ابنك
طبيعي انك تنتظري ان الولد يكون واخد كم تهديدات وتحذيرات فحتى ربنا يعينه هتحتاجي جدااااا انك تصححي مفاهيم كتير وحاجات بدلوها في مخه وتفكيره وهتقدري باذن الله
النص المليان في الموضوع
ان ابنك قريب اوي هيرجع لك
وانك شفتيه واهي تصبيرة معلش يوسف هبفهم وهيعرف وهيقدركويس
كلمة على جنب
ما تروحي مدرسته تشوفيه بالتواطيء مع مدرسة فصله تصاحبيها وباذن الله يبقى عندها قلب تساعدك
لو تعرفيني على الميل اسم مدرسته يمكن اكون اعرفها او حد عندي يعرفها ويبقى الموضوع اسهل اصل العيلة مليانة مدرسين خاص وحكومة
تحياتي واعذريني على التاخير بس متابعة بالقاريء

ايه ده يا فاتيما. يقالي كتير جدًا مشفنش واحدة زيك كدة. أنا مش عارف أوصفك إزاي. كمية صدق مع النفس فوق الحدود. انت جردت كل اللي ممكن يتجرد وشفتي الدنيا كما ينبغي أن ترى. انت انسانة غريبة. عندك ألف حق في اللي عملتيه واللي حستيه واللي قلتيه.
وتقبلي أخلص تحياتي

فاتيما
يمكن ردى جة متأخر بس سامحينى انا مشغولة جدا الايام اللى فاتت واظن انى هفضل كدة لنهاية الأجازة اللى ضاعت دى المهم
حبيبتى انا لو مكانك كنت اتصرفت زيك واكتر تعرفى ساعات كتير الشوق لبنتى وابنى بيموتنى وهمة جنبى وفحضنى وبكتمة واتحانق وازعق لمجرد انهم بيقولوا هنروح لبابا نقعد ايام معدودة بيبقى جوايا نار وغيرة وحب وبقلبها عليهم ضلمة برغم انى متفهمة موقفهم وعارفة انهم طول الوقت فحضنى ودة من حقهم بس غيرتى بتمنعنى اكون تلقائية وطبيعية واقبل قرارهم
مش كل الاوقات بنبقى امهات اخيار وعاقلين ومش كل الاوقات لازم تتحكم فينا مشاعرنا وقلوبنا ساعات عرق الكرامة بينقح علينا ونحمل اولادنا اشياء همة غير مسئولين عنها بس للأسف لازم يتحملوها لانهم طرف فيها ومانحن سوى بشر يعانى ويتألم
حبيبتى مكنتيش تقدرى تعملى اكتر ما عملتى وحاسة بيكى انا لما بنتى بترجع من عند باباها من غير ماتبوسنى او تعبرلى عن شوقها بفضل ايام طويلة اعاقبها بأهمالى ليها برغم ان كل ذرة جوايا بتتمنى حضنها
احساسك طبيعى وصدمتك شديدة فطريقة تربية ابنك وخوفة وقلقة وتوترة وهو معاكى بس التمسيلة العذر والتمسى لهم كمان العذر اصلهم فعلا شايلين ذنوب كتير قوى لسة بيشيلوا وصدقينى مسر يوم الحال ينقلب والوضع اللى شفتية يشوفوة همة
الصبر بس الصبر وهدوءالاعصاب والتمسك بحكمة الحياة فى ان ننظر الى اعدائنا بكثير من التأنى واللامبالاة ونثق بالفعل ان للحقوق يوما سترد فية فكما سيسترد الله وديعتة التى هى نحن ستستردى انتى ما هو ملك لك يوسف انشاء الله
تحياتى لأرق وأصدق مشاعر تكونت فى أم

اة بالنسبة لحوارك مع خيخة دة اللى بعاتبك علية لا بعاتبكم سويا علية
خيخة مش من حق اى حد يقول لفاتيما تقول اية وازاى وحتى لو هتغير من الحقيقة من حقها لأنها حياتها وهية حرة تقول اية وتخفى اية بس يمكن مشاعرك كصديقة بتحبها وكانت بتتمنالها اقصى قدر من التمتع بلقاء ابنها الذى فقدتة طويلا دة اللى دفعك تقولى تعليقك
فاتيما
انتى مش انتى دوما كنتى دبلوماسية وسيدة الموقف مع المحيطين بك وتعرفى انك اذكى منى بكتير ساعات بتكونى رافضة اوضاع بس بتسكتى عشان المركب تمشة انا عكسك بقلب المركب باللى فيها
بس المرة دى ولأنك فعلا متضايقة فلتت منك الدبلوماسية ومستحملتيش ان خيخة تعاتبك
اسفة انى بعلق عليكم سوا بس انا شايفة ان المناقشة بينكم مبتعنيش الا شئ واحد بس انكم فعلا بتحبوا بعض وحريصين على الاستفادة القصوى من صداقتكم
اتمنى لكم كل الخير والحب
تحياتى ومبروك عليكى مجرد رؤية يوسف لانى عارفة بمشاعر الام انك استرجعتى اللقاء مرات ومرات وندمتى كتير جدا على كل لحظة غلبتك فيها كرامتك واستقويتى فيها بعقلك بس برافو هيجى وقت تكون كل الخيوط بأيديكى وبكرة افكرك
تحياتى يا قمر

اسفة هعلق تانى
بالنسبة لنقطة رجوعك لطليقك انا شايفة انك تفرحى وترقصى كمان لأن ربنا بيبعت ليكى اللى يقولك أن انتقام ربنا بدأ والعد التنازلى فى ازدياد اضحكى من قلبك وافرحى مش شماتة لا حب وثقة فرد المظالم ربنا كبير وكل لحظة قسوة والم عشتيها بسببة هيعيشها وهتعرفى بيها صدقينى انا مجربة بس ادى لنفسك فرصة حسى بالنشوة وبفرحة الانتصار الجزئى لانها قريب قوى هتكتمل وهيسلم عدوك النمر ويقف بلاحول ولاقوة يتجرع ظلمة ويبكى كمدا على حياتة
اصبر ع كيد الحسود فأن صبرك قاتلة
ولا يحيق ياعزيزتى المكر السئ الا بأهلة
سلام