.

.

يـا عـااااااااااتـيـف !  

Posted by: فاتيما in



- ماما
- نعم
- أنا لما أروح المدرسة هبقى أشطر واحد عارفة ليه؟
- ليييييييه
- عشان عندى معلومات كتير كتير هقولها للميس بتاعتى
- يسوفة
- هاه
- منكن اطلب منك طلب و تحاول تفتكر تعملهولى ؟؟
- إيه!!
- متتكلمش فى الفصل إلا لما المدرسة تسألك ... مسألتكش خلاص
متعقدش إنت تتكلم عمال على بطال
- طب كدا مش هتعرف إنى شاطر
- لاااا يا حبيبى إنت بتعرف الأجابات و المعلومات لنفسك اولاً
و الواحد لازم يختار اوقات مناسبة لكدا
و كمان الميس بتاعتك ممكن متبقاش فاضية تسمعك
أو تكون مش مركزة و لا حاجة
و لا تكون ......
و لا تكون .........
و لا تكون ............
فلاش باااااااااااك لورا
القاهرة سنة 1983
مدرستى الأبتدائية الخاصة فى حى المنيل
سنة خامسة أو سادسة مش فاكرة بالضبط
حصة العربى
مدرس اللغة العربية بتاعنا يبقى
أستاذ جمعة
و كان طالع معاش من مدارس الحكومة و شاء حظنا العثر
يشغلوه فى مدرستنا
عارفين الشكل النموذجى بتاع نكت الكاريكاتير بالمللى
البدل القديمة
الخلق الضيق
إستخدام ألفاظ مهجورة فى الشتيمة
زى يا خنزير ... يا بغلة ... درر طالعة من بوقه
الشعر الأبيض و النضارة اللى واكله نص وشه
و الجرنال دايماً تحت باطه
و ريحة الشراب بتفحفح لما يرفع رجليه على التختة
عشان يريح العضمتين شوية إثناء الحصة
و مش ناقص غير طربوش حتى تكتمل الصورة
يدخل من باب الفصل و كأن باب دولاب جدتى إتفتح
و طلع منه مخلوق قديم
من اللى بنشوفهم فى الأفلام الأبيض و الأسود
- إفتحو الكتب يا بهايم و مش عايز أسمع نفس
( همهمة بين التخت تعبر عن ضيقنا من تعرضنا للشتيمة
و خدوا بالكم كانت مدرسة خاصة يعنى مش متعودين على المعاملة دى )
- الدرس النهاردة إسمه العقل زينة
مين هيقرفنا و يقرا ؟؟
يقوم كام واحد و واحدة من العيال المستبيعة يرفعوا إيدهم
و الأستاذ جمعة ينقى واحد واحد
يقريه فقرة و يقعده مع كلمات التشجيع و الثناء زى
- إترزعى يا به
- إقعد يا زفت
- على صوتك يا ختى إنتى مطفحتيش على الصبح
- متقرى عدل ياله جاتكم البلاوى
و مضى قطار التهزيىء فى طريقه لحد عندى ووقف
- قومى يا بت كملى
البت دى اللى هيا سعادتى
و الحمدلله كنت بعرف إستقرى كويس
قريت آخر كام سطر فى الدرس و خلصت
- إترزعى إقعدى
بس خلاص و المفروض أقعد بقى و أسكت
و احمد ربنا إنى متقليش إقعدى بشتيمة و لا حاجة
لكن إزااااااااى ؟!!
بعد ما قعدت
قومت تانى و أنا هخرق السقف من الحماس
- أستاذ ... أستاذ ...لو سمحت ممكن أقول حاجة ؟؟
شششششششششش
لنا هنا وقفة لثوانى
عشان أقولكم معلومة كدا سريعة عن موضوع الدرس
كان عنوان الموضوع " العقل زينة "
و كان بيحكى عن حوار داير ما بين أعضاء الجسم كلها
القلب و المعدة و الرئة و هكذا و كل عضو فيهم بيحاول ينسب لنفسه الفضل
فى عمل جسم الإنسان بشكل سليم
كل عضو عاوز يقول أنا الأهم و ما ان إحتدم النقاش ما بين الأعضاء
حتى تدخل العقل بكل هدوء عشان يقول إنى أهم عضو
لأنى بدى الإشارات لكل حد فيكم فيقوم بوظيفته على اكمل وجه
و أنا اهمكم جميعاً فى الحقيقة
ساعتها الأعضاء كلها إقتنعت برأيه و قالت الجملة التاريخية دى
و اللى بقت عنوان الدرس و هيا إن
" العقل زينة "
الوقفة خلصت
و نرجع للبت اللى عاوزة تقول حاجة و أستاذ جمعة سالها
- حاجة إيه يا ختى ؟
- أنا عاوزة أقول حضرتك إنى مش مقتنعة بحكاية إن العقل زينة
- نعم ؟
- أصل حضرتك الزينة دى مش مهمة قوى فى الحياة
- إزاى بقى يا فالحة مش إنتوا بتلموا من بعض فلوس كل سنة
و تشتروا زينة تعلقولها فى الفصل عشان يبقى شكله عدل
و نعرف نقعد فيه و نستحمل خلقكم ؟؟
يبقى الزينة دى بتخلى الحاجة تبقى أحسن و لا لأ ؟
- بس إحنا بنقطع الزينة دى بعد شهر و الفصل بيرجع زى ما كان
يعنى الزينة دى ممكن متبقاش موجودة طول الوقت
و العقل مينفعاش ميبقاش موجود طول الوقت
- الدرس بيقول إن العقل هوه أحسن عضو و زينة الأعضاء كلها
زى ما الناس تيجى تعمل فرح و تعلق الزينة
فالجيران تعرف إن عندهم حاجة مهمة
- بس لو معلقوش الزينة دى مش مهم قوى ... جارتنا اللى ساكنة فوقينا
إتجوزت من غير ما تعلق زينة
- عشان جارتك دى فقرانة و معهاش فلوس تجيب
و بعدين الواحدة لما تحب تتزين
مش بتجيب حتة دهب و لا مجوهرات تلبسها
يعنى بتدور على أغلى حاجة
و تبقى دى الزينة
يعنى الزينة معناها الشىء الغالى القيمة
فهمتى يا غبية
- بس ماما عندها عقد معمول من الخرز و دا زينة أهو و مش غالى ؟؟
- إنتى دماغك دى عاوز كسره ... و هوه الدرس كدا فى مقرر الوزارة
و إنسدى بقى وجعتى دماغى
- أصلى مش مقتنعة يا أستاذ
- و هنا إنفجر غاضباً ... ما عنك ما إتزفتى ... إنتى تحفظى الدرس زى ماهو كدا
و السؤال لما يجيلك فى الإمتحان آخر السنة تجاوبى زى ما هو مكتوب
فى الكتاب و بس
و هجيب السؤال دا فى إمتحان الشهر لما أشوف هتجاوبيه إزاى ...
- مش هجاوبه طبعا ...عشان مش مواقفة ...
- ##.....*##@@..##@@**## ..... إطلعى أقوفى
و وشك فى الحيطة لحد آخر الحصة
فاكرة نفسك هتفهمى احسن من الوزارة
عيال آخر زمن
و هكذا إنتهى الموقف بوقوفى و وشى فى الحيطة و أنا مصممة على رأيى
إن العقل مش شوية زينة و خلاص
و بعدين إيه يعنى لما رأيى يبقى غير رأى المقرر بتاع الست الوزراة ؟!!
طبعاً لما الأستاذ جمعة جاب السؤال دا فى إمتحان الشهر
ليه العقل زينة ؟؟؟؟
جاوبت زى ما أنا عايزة
و مش زى المقرر
و خدت نمرة زى وشى و كحكة حمرا زى قرص الشمس
و محدش يسألنى باباكى عمل معاكى إيه ؟؟
لأن الحقيقة السيد الوالد الله يرحمه
كان متعود على الكحك فى الشهادة و بالتالى محسش بأى شىء ملفت فى الشهر دا
و هيا العلقة بتاعة كل شهر طبق الأصل دون أى تعديلات تذكر
الشىء البايخ بجد بقى
كان لما جه سؤال عن العقل زينة فى إمتحان آخر السنة
إضطريت أسفة وقتها إنى إنحى رأيى جانياً و اكتب رأى الوزارة
عشان انجح و اجيب درجات و أعدى الليلة
أنا بقول الكلام دا كله ليه دلوقتى ؟؟
أصلى فى فترة ما فى نظامنا التعليمى
تصورت إنى إنسانة ليها عقل بتفكر بيه
و قررت إن مش عاجبنى توصيف الوزارة للعقل و كانلى رأى تانى خاص بيا
و كمان تجرأت و قمت قولت لأستاذى
أل يعنى جبت التايهة و الراجل هيكافئنى
على إكتشافى و فلسفتى الخاصة
خالو بالكم الكلام دا سنة 83 يعنى ايام الروقان و الهدوء
و فى مدرسة خاصة مش حكومة
يعنى كنا 32 تلميذ فى الفصل مش أكتر
و المدرس كان كبير فى السن
و يفترض إنه خبرة فى مجاله مش لسه إبن إمبارح
و بيقبض فلوس كويسة مش مرتب حكومة هزيل و مش مضغوط نفسياً
لكن مع ذلك الموقف تطور لوقوفى و وشى فى الحيطة لآخر الحصة
بدل ما يناقشنى و يستوعبنى
و حتى يقولى إحتفظى برأيك و جاوبى برأى المقرر
بعد مضى ربع قرن من الزمان
الموقف المفروض المفرووووووض يتحسن
و اللى معرفتش أعمله إبنى يعمله بقى
و نظام التعليم الحالى لازم يشجعه على التفكير و إبداء الرأى
يعنى لما يوسف يتصور بنفس البراءة
إنه لما يقول رأيه هيقابل بديمقراطية فكرية مماثلة للى بناقشه بيها فى البيت
و إكتشف إن دا مش هيحصل فعلاً
و فى الآخر برضو
هنسمع كلام المقرر و كلام الوزارة حتى لو مش داخل دماغنا
يبقى ال25 سنة دى كأنها معدتش و لا فاتت من عمر الزمن
إحنا زى ما إحنا محلك سر
و يمكن بنرجع لورا كمان
ولما الولد سألنى ... قلقت
و إستحضرت تجربتى السابقة و نصحته النصيحة الهدامة دى
بإنه يحتفظ برأيه و معلوماته لنفسه حتى يأتى وقتها و مكانها المناسب
و لأنى عارفة إن زمنه أسوأ من زمانى بمراحل
و الفصل هيبقى فيه 70 عيل غيره على الأقل
و مدرسته خلقها هيبقى أضيق من خرم الأبرة
فيبقى يجيب من الآخر احسن بدل ما ينصدم
و يحط وشه فى الحيطة و يشيل فى قلبه يا حبيبى
و يبقى يقول رأيه للى هيقدر رأيه
و بلاش يعاكس الست الوزارة الحلوة الكومل اللى مبتغلطشى أبداً
بس برضو أنا عندية و محرمتش
و بعد ربع قرن ما زلت مصرة على أقوالى
إن لأ بقى
مش صح خالص اللى مكتوب فى الدرس
و العقل مش زينة
فى الفترينة
يا عاااااااااتيف
هه

This entry was posted on الثلاثاء, أغسطس 05, 2008 and is filed under . You can leave a response and follow any responses to this entry through the .

92 كــــلام بيطــبطـــب عـــلى قــــلبى و روحــــى

بصى يا ام يوسف انتى غلطانه طبعا لانى النظام التعليمى المصري من قديم الزمان قائم على التحفيظ بس احفظ وانت ساكت وادلقهم فى ورقة الاجايه واحمد ربنا

يعنى جت على العقل زينه انا عارفه كانت مناهج ايه دى كانو بيشتغلونا اكمننا عيال صغيره ومش فاهمين ويقولولنا عمر وسحر فالحديقه لا وكان فى شويه مدرسين ياخراااااااابى نسخه طبق الاصل من اللى انتى وصفتيه دا وبيدرسو للاطفال ابرياء ياعينى هههههههههه

عاوزه اقول ملحوظه على جنب رغم انى لسه جديده فالتدوين بس بحبك جدا وكنت اتمنى ابقى معاكو يوم الجمعه عااااااا

هههههههههه
باباكي الله يرحمه متعود على الكحك؟؟ يا خبر أبيض :))

ضحكني أوي أوي "باب دولاب جدتي اتفتح وطلع منه مخلوق قديم":) اتخيلته أوي في الوصف اليع دة

بس عارفة؟حبيتك أوي في موقفك دة. أيوة نظام التعليم في مصر مش عايز خلاص المناقشات دي، بس برده بجد جدعة إنك عبرتي عن رأيك..و هو الموضوع بالبساطة دي...إذا هم بيسكتونا من و إحنا صغيرين ومش بيقبلوا أي رأي لينا..عايزيننا نكبر و نغير طريقتنا إزاي؟؟؟ مش منطقي

فاتومتي اول حاجة حقولها يمكن مستوى المدارس الخاص اعلى من مستوى المدسة العادية لكن اللي بيتفوقوا في ان المعملة دي زي المعلمة دي يعني دي زبالة و دي زبالة و خلي استاذ جمعة يلم نفسه
ههه

من الحجات الي بعتقد بيها :
"لا يجب أن تقول كل ما تعلم .. بل يجب ان تعلم كل ما تقول"

حلو انك قلتيله ان معلوماته لنفسه ..
وطريقه تربيه جميله جدا ربنا يخلي حبيبي ..
اولا :
تحيه لانك طريقه التربيه غير العاديه الي كلمتيه بيها

ثانيا:
حلو انك قلتيله ان المعلومات ليه لنفسه .. بس كنت عايزك تزودي كتييييييييييير اوي في الحته ديه .. انه يكون كويس في حياته لنفسه مش لحد تاني وحتى لو النظام معارض هوا يعمل الكويس لنفسه ويكون مرن يعرف يتصرف في كل المواقف ويعمل الي عايزه في الاخر

ثالثا
الايمان الشخصي بتاعي ان حتى يوسف ممكن يعدل حال مصر .. يعني لو ربينا اولادنا ان هيلاقي صد من الاساتذه بس بقليل من الحنكه ممكن يتنلقشوا مع الاساتذه .. بالاضافه لتعليمهم فن التعامل معا الناس .. يعني لو عرف انه بين الحصه والحصه لو شاف ان المدرسه رايقه وراح قالها في ما معناه .. "الدرس جميل جدا وفي الامتحان هجاوب زي ما علمتيني .. بس كنت عايز اعرف حاجة " ويقول الي عنده .. لو كل الاولاد حاولوا يخلقوا جو حوار مع المدرسين بتوجيه الاهل من البيت الموضوع هيفرق ..
هل الي بقولوا ده خيالي ؟؟ لا لاني او الاصح لاننا عملناه في ثالث ثانوي واصبحنا مع المدرسين تصوري اصحاب واصبحنا النرم التاني بنتناقش في الدراسه بطريقه فعلا جميله ..

ايه الي انا كاتبه ده كله ..
يخبر .. معلش على الازعاج بس بعوض الكام بوست الي فاتوا
:)

تحياتي ليكي يا فطوم ولحبيبي يوسف

خير ما عملتى يا حبيبتى
يا ستى مش لو مرت 25 سنه لالالا ده لو مرت 100 سنه مش فيه حاجه هتتغير
مدام بيقول احفظوا اللى فى الكتب
ومش تزعلى منى احنا برضه اتعودنا على كده الحفظ لاننا الاستاذ كان بيقول نفس الكلام احفظوا الدرس ولما تمتحنوا اكتبوا اللى حفظتوه
يعنى من الاخر مش مهم الفهم لالا المهم الحفظ
وانتى كنتى فى مدرسه خاصه فما بالك بالحكوميه تخيلى انتى بقى ايه اللى كان بيحصل فيها خصوصا انى كنت شقيه جدا
عارفه كنت فى تانيه اعدادى وكنت ولا بفهم الجبر ده وبعدين استاذنت اروح الحمام ورجعت بعد ربع ساعه وافتكرت الاستاذ خرج ودخلت ومش اخدت بالى ان البنات كانوا واقفين كتير عند السبورة ووقفت على الكرسى وقولت
يا ناس حد يحوش الراجل ده عننا هسقط وربنا حد يشوف لينا حد يفهمنا
وطبعا البنات كلها بصت ليه وتبرق واخيرا ظهر من وسط البنات الاستاذ واتاريه كان بيشرح بيشرح ليهم حاجه وهو قاعد وانا مش شوفته ومش هقول اخدت كام عصايه دى اسرار.
ربنا يحفظ ليكى يوسف وتعيشى وتعلميه
سلام

انتى حطيتى ايدك على الجرح
بجد نظام التعليم مش متطور وعشان كدة الواحد خايف للمدارس تقفل ونعد فى البيت ههههههههههه
ليه بقى لان الطلاب مش مقتنعين بطرييقة التعليم وشايفين انها مابتحققش المطلوب منها
يعنى الطالب عاوز ايه من التعليم
عايز تربيه
عايز انشطة
عايز بعد مايخلص يلاقى شغلانه باللى اتعلمه
وياترى مدارسنا بتقدم اى حاجة من الحاجات دى للاسف ودة بينى وبينك
بلاش اقول
وتحياتى لكى يااحن قلب فى مصر

فاطيماتاااااااااااا
رجعت ليالي زمان رجعت ليالينا

رجعتينا كتييييييييير قوي
التخته والسبورة والطباشير والفصل والمدرسة والسندويتشات ولمة الولاد والكانتين والواجب ووشك للحيط والكراريس واقلام الجاف والحبر والرصاص والمسطرة والبراية والوسائل والشطار فيناحيه والبولاده في ناحيه والمصروف وشنطة المدرسة ورايحين المدرسة وجايين من المدرسة والنوم بدري والصحيان بدري وجرس المدرسة واللي يتأخر يدفع غرامه وصفا وانتباه وماتطلعشبره الطابور وسمع هس وماترغيش مع اللي جنبك وماتوشوش زميلتك في بوقها وعيد المعلم وعيد الأم وعيد ميس فلانه وميس علانه والرحلات والتبرعات والكحك في الصاجات والكحك في الشهادات وفلان مع فلان ضد فلان ومصر اليوم في عيد
ايه ده كله ايه ده كله
شفتي قد ايه قلبتي المواجع
على اللي راح ومش راجع
مدرسه صفاااااا
مدرسه انتبااااه

تحياتي
حسن أرابيسك
عندك حق في كل اللي قلتيه على الشاعره الجميله شيماء في البوست السابق

ههههههههههه وراثة يافاتيما هيجيب اللى انتى حكيتيه ده منين ؟؟؟

منك طبعا وبدليل الموقف بتاع استاذ جمعة اللى اساتذة المحروسة زيه وانيل شوية شويتين كمان


بصى معدش فيه تعليم متحرمهوش من التفكير والابداع فيه
عشان يبقة ولا طال بر ولا بحر يعنى ولا مخ نضيف ولا تعليم

بجد يافاتيما انا كنت عندك اليوم اللى انتى علقتى فيه عندى ومعرفش معلقتش ليه بس اللى انا فاكراه انى علقت وجيت ادور ملقتهوش حصل خير

ربنا يحميهولك (يويو) تعالى شوفى الرد على تعليقك عشان اعلنت حاجة مهمة بالنسبالك ههههههههههه

ربنا يحميهولك يارب

سلاااام

مش كل المدرسين
كان عندنا استاذ عربى اسمة استاذ شعيب كبير فى السن وعنده عرج فى قدمة وكان يشرح لنا بسحر عجيب (فى نفس سنة 83) وكان عندنا كراريس خط لو تفتكرى لا يهدأ له بال الا اذا كتبنا خط كويس ولا يتعدى شخص الكل لازم يكتب ويحسن خطة وكان يكتب بالطباشير على السبورة ولا اجدع قلم يوكن 20 المقطوط بتاع الخطوط
======
الحال اسوأ بكثير من زمان
لم تعد هناك طفولة

ههههههههههههههه انا مكنتش بعترض بس اول ما الميس تدخل اسيب لها الفصل اه والله مش بقتنع ولا بحفظ فباخدها من اول الطريق واطلع اعد النمل اللى ماشى
المديره بتاعت المدرسه تعدي تضحك وتقولى عربى صخ اقولها اه يا ميس تموت على روحها من الضحك وده وانا فى ثانوي بس والله كنت شاطره وهاديه اوي بس مش بقتنع وشايله الزينه وحطه مكانها نخلات ودبورات اعمل ايه بقى هههههههههههههه

أول ما قريت قلت لنفسي: ليه كده يا فاتيما؟؟ لأ طبعا، سيبي الولد يقول رأيه ويناقش.

علي آخر ما خلصت قرايه، إقتنعت بوجهة نظرك. ولا نظام التعليم ولا نظام المدارس ولا النظام في مصر كلها بيسمح إن أي حد يقول رأيه.

ممكن يتعلم يقول رأيه في البيت ويناقش كل حاجه .... إنما في المدرسه، مفيش وقت حد يسمع رأي جد في المعلومات.

تحياتي.

هههههههههههههههههههههه
عسل يافاتيما انا كان عندي استاذ جمعه
بس في الجامعه تصدقي اه والله
اسمه دكتور عبد الرحمن الوصيفي الله يعرفه يقول له اني بدعي له ههههههههههههه
كان يحب يكرشني قوي المحاضره ويقول لي انت وش
عشان مش فاهمه الشعر اللي كان بيقوله
وارشف بالالحاظ خمره ريقه كاني امري اليت لاذقت اسفنطا
ليه وليه اني بساله اليت لاذقت اسفنطا يعني ايه
شفتي اخص عليه صح ههههههه
ومين دي بقي اللي يقول ليوسف حاجه
والله نفطعه جطيع لا الا زوج المستقبل
ده احنا اسوده عااااااااااااا

هههههههههههههههه

استاذ جمعه كرهك وخوفك فى انك تسألى ؟؟!!

وخلاكى تربى يوسف انه باش يتكلم من غير ما يتسأل؟؟!!

تفتكرى ده له بعد سياسى

سؤال خبيث

السلام عليكم
اول مرة ازورك بس الصراحة دمك شربات
ولو على الشتايم بتاعت الاستاذ المبجل
لا ده مش بيشتم ده بيغازل ويجامل ومش بتفرق حاليا بين خاص وحكومة انا طول عمرى فى خاص وشوفت الحكومة برده وما فيش فرق هى الوزارة تعمل اللى هى عيزاه واحنا بقى نربى عيالنا بمزاجنا
احيك على البوست الاغنية جميلة
اتمنى زيارتك
تحياتى

سلام عليكم ورحمة الله وبركاته
ههههههههههه

اه منك يا طمطم علي طول كده غلاباوية

فكرتيني بفيلم القبض علي علي بابا لما كان الواد ابن يحيي الفخراني مش عاجبه التنبي وابن تمام ومقتنع انهم شعراء منافقين

مش ممكن يافاتيما

بحب كلامك وحكاياتك أوي

إيه يابنتي الدماغ دي ؟؟

والله إنتي بجد دماغ

بحبك أوي يا فاتيما


كل ما أقرأ جزء أضحك وأقول هاعلّق علي ده
وبعدين تهت لأن كل كلامك جميل

بحبك وبحب يوسف جداااااا

عارفه أنا لو شفته هانبقي أصحاب أووووي ي ي ي ي ي ي ي

ربنا يخليهولك ويباركلك فيه ويرجعه لحضنك يارب


lyssandra

السلام عليكم
وحشاني يا فاتيما
انا مرعوبة جداااااا يا فاتيما السنة السودة اللي الواد دخلها المدرسة حسستني انه على الفاضي ووقت الواد بيقعده فيها بيضيع
عمالة اصلح والدراسة اهه جاية وهتبوظ تاني
حسبي الله ونعم الوكيل في النظام الفاشل دة واللي قايمين عليه
ربنا معانا بقى ويقدرنا باللي ابتلانا بيه
طريقة عرض حلوة اوي تسلم يديكي
تحياتي

ههههههههههههههههه
هوا في مصر كمان
هيا دي بقى تربية وزارة التربية والتعليم
اصل انا مادخلتش مدارس مصري غير في اولى ابتدائي بس
والباقي كلو تعليم سعودي
بس انا كنت برضو نفس نظامك وكنت بقولها بالفم المليان (انا مش مقتنعة اقنعيني)
بس عمرو محد عمل معايا كده بصراحة
:D:D:D
بس انا فاكرة ان فيه ناس كانت بتتخنق مني :D
واصحابي كانو بيتخنقو ويقولو لي
احفظية زي ماهوا مش لازم تفهميه
وانا فاكرة فيه امتحانات كتيراوي كنت بعمل بالمبدأ دا وخلاص
بس بصراحة بحيي فيكي شجاعتك الأدبية
وممكن يوسف يورثها منك
ممكن ليه لاء:D
بس بتهيألي غلط أوي انو احنا نربي الأطفال على انهم مايعبروش عن ارائهم
مهم اوي الطفل يتعود على التعبير عن رأيو حتى لو واجه معارضة من مدرسو
لأنو لو ما اتعودش على الادلاء برأيو عشان المدرس بتاعو
يبقى بكرة مش هيدلي برأيو عشان المدير بتاعو
وعشان الوزير بتاعو
وعشان الرئيس بتاعو

لما يكون في بلدنا بيطلع عين أهالينا
لما يكون رأينا مايهمش غير نفسينا
لما يكون تعليمنا عقيم و حقير و قديم
يبقى يادوب العقل مابينا مجرد زينة
وعجبي
KING TOOOT

كالعادة تكتبين بشكل سردى جميل للغاية

تصدقى

حسيت ان قاعدة ف وسط الفصل ومتخيلة شكله بكرشه وريحته

ممتازة فى البوست ده
ولكن
وهيهات من لكن دى
====

التعليم سيبقى عقيم كما هو إلا أن يشاء الله وربنا يستر على ولادنا

تحياتى
هبة

بطووووووووووط


عامله ايه وحشاني اوي

اقولك علي سر .... مش عارفه ليه انا بفكر فيكي انتي وفرنسا ديما متعرفيش تقوليلي ليه يابطتي ,,,

فااااا بحبك وكدا

سلاموووووووووز
وزة

جيتي ع الجرح يا فاتيما ..موضوع التعليم ده عملي مشكله..فيه حاجات كتيره مش عاجباني في المدارس بتاعت الولاد ..مع إننا بند
فع فيها قد كده ..والمفروض إن هو ده العلم المتقدم بس لا متقدم ولا حاجه ..
وعاصم كاتب عن مشكلته مع مدرسة العربي في مدونة الزعاريييير وإللي تسببت إنه نقص 7 درجات في العربي..مع إني نبهتها كذا مره على ضرورة توضيح المطلوب من السؤال للأولاد ..ولكن لا حياة لمن تنادي ..
ده غير مشكلة عدم تقبل المدرس والمدرسه لرأي الطالب ودي بقى مشكلة الزعرووووور الكبير زياد ..لدرجة إنه صمم على رأيه مع مدرسة العربي ولما سأل جده ..جده قاله إنه رأيه صح ..فراح وقال للمدرسه جدي بيقول إن علمك قاصر ..يعني بالعربي مش بتفهم ..طيب قوليلي أعمل إيه ..؟؟؟؟؟

وشكرا ليك على نشر خبر نجاح زياد ..شجعتي عاصم إنه هو كمان يكتب عن نجاحه..

على فكره نقلك لحفل شيماء سمير كان هايل ..يارب أشوفها في تجمعكم الجاي ..
ومكونتش أعرف إنك متذوقه للشعر كده ..ياريت بقى تقري شوية الحاجات إللي كاتباها على مدونتي عايزه أطير ..وتبقي تقوليلي رأيك وبصراحه

هههههههههه
ام يوسف
البوست كالعادةرائع جدا جدا
سردا وفكرة ومضمون
بس نظام التعليم نظام فاشل بكل المقاييس يعتمد على التلقين والحفظ
مش التفكير والمناقشة والابتكار
لنا الله
وربنا يلطف بينا
وينجينا مما فيه
تحياتى وتقديرى

تصدقي فعلا أحنا طول عمرنا بندرس ان العقل زينه
وهو مش زينه ده شيئ أساسي وبدونه عجلة حياة الجسم تتوقف
بالشكل ده مش زينه خالص
ده أنتي بتركزي في حاجات عجيبه ههههه
بس معاكي حق فيها
أصلي دايما كنت بصدق كلام الوزاره الحلوه الأموره
وأنا كنت في مدرسه حكوميه
وفي تالته ثانوي كنا 25 واحد في الفصل
أما في الإبتدائي كنا أقل عددا من كده

حظوظ بقه يا ستي


دمتي بخير

عارفه يا فاتيما اصلا اصلا المواضيع اللى كنا بناخدها زمان بياخدوها اخواتنا دلوقت التعليم بقى خيبه كبرى
تحياتى ليكى ربنا يحرسلك سوفه
سومه_87

ازيك يا ام البراءه متشكره على ذوقك فى الرد على الكومنت وشكرا كمان مره على مرورك المستقبلى وزيارة الكريمه القادمه لمدونتى و فعلا هيا حلقه مفرغه زى ما قلتى بس الحلقه دى لو فيها راجل انسان فعلا وعارف ان فيه امانه معاه متاكده انها مش هتبقى مفرغه دى تجنن وتتعلق فى الودان كمان ..اما التعليم فربنا يستر على ولادنا ويرحم ايام الكتاتيب تصدقى طلعت عباقره ولا هما اليى كان عندهم جينات العبقريه طبيعى..شاكره ليكى ذوقك كمان مره وشاكره سعة صدرك...الف شكر فى رعاية الله وامنه .

رئيس جمهورية نفسى
أزيك يا محمووود
انا غلطانة من ساسى لراسى يا ريس
بس زمان كنت صغننة و زهرة بريئة مكنتش فاهمة
و المدرس دا فهمنى اللى ماشى إيه و إن رأيى ممكن يتسخف و يبقى سبب فى إهانتى كمان
المؤسف إن أسلوب الحفظ و الدلق على ورق الأجابة مازال هو سيد الموقف بعد ربع قرن و كأن الدنيا واقفة ما مبتمشيش
تحياتى ليك يا ريس

سمر الشافعى
بصى يا سمر مش مشكلة تكون المناهج حاجة تكسف أهو اللى عاملينها ناس تاكل عيش و خلاص إنما المشكلة فى المعلم نفسه اللى المفروض إنه يحاول يدارى فى عيوب المنهج العبيط دا و يعمل منه حاجة و يأثر فى شخصية الطلبة بالإيجاب مش السلب زى ما حصل معايا
ملحوظة برضو على جنب يا ستى مشكرين على المشاعر الجميلة دى يا رب الواحد يكون مستاهلها و يا ريتك جيتى فعلاً بس إن شاء الله تعملى حسابك على المرة الجاية إن شاء الله و مفيهاش فصال دى

wish i were butterfly
يا قطة الحكح دا كان عادة و مش فاكرة إن مرة جت الشهادة من غيره فى إبتدائى أصل أختك الكبيرة و لا فخر كانت نموذج يحتذى فى الشقاوة و االبلطجة و آخر حاجة كنت بعملها هيا المذاكرة و محدش يقول الحاجات دى ليوسف لما يرجع لحسن تعرفوا شغلكم ...
تعرفى بقى إن الحكاية دى جت معايا بالعكس
يعنى من يوميها و انا لحد دلوقتى بتجنب أقول رأيى لما احس إن اللى قصادى هيحرجنى و يمكن يوجهلى إهانة
بقيت اختار اللى ممكن أقول قصاده دون قلق و دا فى أحيان كتير بيضيعلى حقى
و احيانا برضو كرامتى مكدبشى عليكى
يعنى التأثير كان سلبى جدا مش إيجابى
يللا أهى أيام و عدت
و البركة فيكم بقى يا فراشة يا رقيقة
جيلك إنتى اللى هيدى الفرصة لأبنى يتكلم و هوه مرتاح مش مكبوس
تحياتى ليكى يللى من غير ما توشى
فراشة رقيقة فعلاً

بنوتة
يا بنوتة أستاذ جمعة بقى راحت أيامه و الله يرحمه عايش و لا ميت
لكن المشكلة فى إنه بيمثل نموذج موجود وسطنا لحد دلوقتى و لو حتى اختلف الشكل و السن
برضو تكبير الدماغ و ضيق الخلق لسه موجود
لااااا كمان دا فيه جملة دلوقتى موجودة مكنتش على أيامى و عمرى ما سمعتها و أنا صغيرة
جملة .. إحنا بندرس على اد فلوسهم !!!
يعنى بالقطارة و أى كلام كمان
ربنا يستر على الكل يا بنوتة
و تحياتى ليكى يا حبيبتى

ahked mubarak
مطولتش و لا حاجة يا احمد
متتصورش أنا ببقى فرحانة بكلامك دا أد إيه
بحس إنك عامل زى ماجد اخويا كدا و منزعج على إبن اختك و دا حقك عليا و على يوسف ...
أنا مش مبسوطة من نصيحتى دى يا احمد لانى بعلمه يكش بس أصله ما شاء الله عنده طلاقة و بيدخل جادم فى اللى قصاده و بيحب يحس إنه ظاهر اصله برج الأسد يا سيدى و عنده ميول للزعامة و القيادة و حابب يكون له شخصية ملفتة و دا اللى بيخلينى فخورة و فى نفس الوقت مرعوبة عليه لحسن حد يصدمه صدمات و خصوصاً إنت اكيد عارف الطفل بيبقى باصص لمدرسينه إزاى و عاوز يكون مصدر تباهي و لو مدرسة او مدرسة احرجه و لا أهانه هتعلم فيه لوقت طويل
دنا يا بنى لسه فاكرة الموقف دا من 25 سنة و زيادة و لا العيب فيا و أنا قلبى أسود حبتين تلاتة ؟؟
بص انا متهيألى نوع المدرسة كمان بيفرق و نوعية المدرسين بالتالى بس الشكل العام غير مشجع و بالتالى النصيحة دى ممكن تجنبه أشياء كتير
مش هقولك شكرا بقى على الإهتمام عشان دا طبيعى منك يا صديقى

حنين القلب
حنونة بلش ندخل فى مسابقة للشقاوة عشان أنا برضو هكسب
طب الموقف بتاعك دا أنا عملته فى مدرس الحساب ( برضو 9 بس كنت فى رابعة إبتدائى بقى و كان يوم أسود و بابا تانى يوم جالى المدرسة و إترنيت علقة محترمة فى البيت و كدا
و تعرفى يا حنونة انا أصلى إشتغلت فى مدرسة لفترة مش كبيرة بس شوفت بنفسى إن العيب مش فى المدرسين بالعكس فيه منهم ناس كتير دماغها و تعاملها مع العيال كويس جدا بس نظام التدريس و العبء الواقع عليهم و قلة المرتب و الأمكانات هيا اللى بتخلى الحكاية صعبة قوى
الله يكون فى عوننا جميعاً
أهل و أبناء و معلمين
تحياتى ليكى يا حبيبتى

رئيسة حزب الاحلام
لولى
ليه بلاش تقولى ؟؟
طب دنتى يا لولو أكتر واحدة ممكن تقول و ناخد كلامها كشاهد عيان على ما آل إليه الحال من سوء
إنتى موجودة فى مدرسة و بتعانى فى وظيفتك و عجزك عن إنك تعملى اللى بتحبيه و اللى شايفاه صح و ممكن يخدم كل الاطراف
إنتى من اكتر الناس اللى ممكن يتكلموا يا حبيبتى و نركز فى كلامهم
تحياتى ليكى و لسالى و سحورة

حسن أرابيسك
حسن يا فناااااان
أزيك و الله بتوحشنا قوى
مين بقى بذمتك اللى رجع مين للزمن الحلو دا ؟؟
كل المفردات دى بالمللى يا حسن يخربيت كدا
إنت إيه حكايتك مع زمان و ذكرياته ؟؟
أنا متهيألى بعد ما قريت ردك
هيطلع إنك كنت قاعد فى التختة اللى جنبى فى الفصل و كنت الولد اللى بتخانق معاه طول الوقت و أقوله وديت القلم بتاعى فين و يقولى مخدتوش
و حضرت معايا كل التفاصيل دى
يا حسن إبقى عدى و سلم و سيب بعض من عبير كلماتك و عبق الزمن الجميل
تحياتى يا قنان يا كبير

رصيف نمرة خمسة
أزيك يا عزيزتى
متقلقيش من حكاية التعليقات ساعات النت بيمل حركات غريبة
و تعالى فى أى وقت ميهميكش و بعدين بخصوص موضوع يويو دا
فأحب اقولك طبعاً يسعدنا
و يشرفنا تكونله عروسة أمورة زيك
بس احب احذرك
إن الواد مخطوف
قصدى مخطوب لبنت خاله سلمى ذات السبع ربيعاً
و متكلمين عليه كلاً من لماضة
و ميادة قاف ميم أيامنا الحلوة
و يعنى لو تحبى تتجوزيه بعد كل هذوها الحقائق الرهيبة
فكدا الواد بدل ما يبقى يويو
هيبقى ميتو
أى الحاج متولى
و ساعتها هتبقوا كلكم أرامل
لانى هقطم رقبته أحسن و لا إنه يتجوز على مراته الاولانية واحدة تانية و لا تالتة
أدينى شرحتلك الموكف أهو
و التحذير واجب
وتحياتى ليكى يا حبيبتى و ميرسى على مشاعرك الحلوة دى

فاتيما
ازيك يا قمر بجد والله وحشتينى جداا
يارب تعرفى تضيفى ميلى من ابى او من قوس قزح اكون سعيدة جداا
اما عن استاذ جمعه فهو نموذج موجود فعلا للاستاذ محدود الفكر والعقل ودا المثل المطبق من قبل وزارة التربية والتعميم تعميم الخطا وطمس الفكر
وقتل الابداع 00 للاسف الشديد مفيش تفكير فى خلق شخصية مفكرة او مبدعه
وتلاقى امثلة مستر جمعه دول منتشرين فى كل المدارس اقول اية
كويس اننا بقينا كدة لسة عندنا شوية فكر على قدنا نقدر نكمل بيهم حياتنا

هههههههه الحال ممكن ينعدل مع كادر المدرسين الجديد
ده من الناحية المادية ومن الناحية التربوية لا تنتظرى المزيد

عموما التعليم فى مصر اساسا تراكمى فاشل لانه المفروض يكون أكاديمى مش تراكمى وفى الاخر معظم اللى بيتخرجوا مش فاهمين حاجة وأهى شهادة وخلاص

ربنا يرحمنا برحمته
وإشتبشرى خير فلقد أخبرنى أحدهم بان نظام التعليم سيجدد جذريا قريبا ... تقريبا إشاعة والله اعلم

ربنا يخليلك يوسف يارب
بصى يا ستى بما ان خبرتى فى مجال التدريس ده سنه واحده وان شاء الله تكبر وتكبر بس افضل زى مانا
المهم انا باخد العيال بهدوووووووووووووووووء وبحب اسمعلهم والله
انا عارفه انى مش هنفع فى حياتى بالطريقة دى بس ربنا يسهلها بقى
ويارب قدرنى على انى اربيهم صح

السلام عليكم
كلامك فكرنى بمدرس ربنا يسامحه بقى على اللى كان بيعمله فينا
المدرس دا مدرس مادة من اعظم المواد الا وهى القرآن الكريم(اصلى ازهر)
الراجل لو كنتى حضرتى له حصة هترجعى بالزمن ورا وتبوسى استاذ جمعة وتشكريه على المعاملة الانسانية
اللى بيعاملها ليكوا يعنى استاذ جمعة كان شتيمة بس ومش بالاب وبالام
لا مدرسنا بقى شتيمة بالاب وبالام وبكل حاجه دا غير الضرب اللى تحسيه داخل معركة ضد الهكسوس
ساعتها كنت طفلة وكنت بصراحة بكره حصته موووت ومكنتش بحب احفظ اوى عشان كنت بكره المدرس دا
لكن مع الوقت لما كبرت بقيت احفظ مع نفسى.


وبالنسبة لجيل ابنك والجيل اللى جاى ربنا معاهم
وذنبهم فى رقبة........ و انتى عارفة بقى رقبة مين هى اللى هتشيل كل الذنوب بقى.

سلاموز.

مهو هو دة حال التعليم فى مصر هو الحفظ و بس لكن ان الواحد يفهم او يبتكر اى شىء مفيش
تحياتى لكى و سلامى

ضحكتينى يا فاتيما فى عز منا ماليش نفس للضحك
النماذج دى بتبقى سبب ان الواحد مش بس يكره التعليم
لا ده ممكن يكره نفسه
بس المدرس التحفه ده شغلوه فى مدرسة خاصة ازاى
مش قادرين يدوه قرشين زيادة يستحمى ويجيب بدلة
الحمد لله اننا نفدنا من التعليم وربنا يستر على الاجيال الجاية
سلامى ليكى يا فاتيما وحضونة كبيرة

فاتيمااااا
أحن أم
أولا أحب أهنيكى على ذاكرتك
انا بقعد أعصر فى دماغى نص ساعة عشان أفتكر حوار دار من يويمن مش من 83 هههههههه
ثانيا ربنا يخليلك يوسف وعوديه على الديمقراطية مين عارف يمكن ييجى يوم ويبقى زعيمها
ثالثا لا تلقى بالا لا لمناهج تعليم ولا لأسلوب تعليم ولا معلمين فى مصر عامة سواء فى إللى فات أو إللى جاى
طالما فى خلل فى وظائف العقل المدبر وهو الحكومة
إللى هى العقل
إللى مش زينة
يبقى لازم الخلل يوصل لكل حاجة
حتى التعليم
وإحنا بطبيعيتنا كشرقيين مش عارف دى طبييعة ولا تعود متعودناش نعيش على الديمقؤاطية
لا فى البيت ولا فى الغيط ولا فى أى مكان تانى
دايما عندنا ناس بتأخد قرارت وتنفذها لأن طبعا كل واحد عارف شغلها ومية مية
فإزاى حد ينصحنى أو يعدل عليا
فتلاقى القوانين مش مدروسة
ولا المناهج
ولا نظم التعليم ولا أى حاجة خااااااااالص
بس بعد ده كله
إن شاء الله
بكرة هيكون أفضل
بيوسف وإللى زيه
تحياتى ليكى

المكان: مصر بعد العودة من الخارج برضه

الزمان: أولى ثانوي سنة 1986 - فصل المتفوقين

الإمتحان: لغة إنجليزية - جنرال ساينس

السؤال: هل الطماطم فاكهة أم خضار

الإجابة: طبعا فاكهة .. إيه السؤال التافه ده (علميا الطماطم فاكهة مش خضار)

النتيجة: صفر

حاولنا نقنع المدرسة المتخلفة إن إحنا اللي صح لكن مافيش فايدة .. قالت لنا: إنتم متخلفين؟ فيه حد يقول إن الطماطم فاكهة؟ ده الحمار يعرف إنها خضار

ماقدرناش نقولها مين هو الحمار في الحقيقة

الطائر الحزين
طبعاً فاكرة يا إيهاب كراسة الخط و حصة الخط دى كنت بستناها من الأسبوع للأسبوع تصور ؟؟
و طبعاً بعد كدا عدى عليا مدرسين و مدرسات محترمات من جنسيات كتير كمان مش مصريين بس و لما سافرت الأمارات كانت المدرسة الخاصة اللى كنت فيها بيدلعونا دلع جامد و كنا اربعة بس فى الفصل يعنى كأننا بناخد درس خصوصى تمام و كانوا متنقيين على الفرازة مستوى تربوى متميز و الامكانات متاحة و لعقلية كانت أرحب و أهدى و دا اللى خلانى أغير من أسلوبى شوية و احاول أقول بشكل مختلف رأيى بس صدمتى فى هذا السن الصغير خلتنى إنتبه لحاجة و ياللأسف ما زالت وجودة حتى اليوم
إن التعليم يعنى مقرر الوزارة و بس
و التعليم مش يعنى دماغك و شخصيتك بتتكون !!
أخلص تحياتى يا طائرى الحزين

آبى
يا قمر التدوين كله
ما شاء الله
إيه الفتوح دا ؟؟
بقى تخرجى من الفصل اول ما المدرسة تيجى !!!
يعنى بت مخلصة من يومك و مبيهمكيش حاجة
بس اطيد كنتى بنوتة لذيذة و مهما عملتى محدش كان بيهون عليه يزعلك
و حتى المديرة كمان إستخدمتى سحرك عليها ؟؟
أهو المديرة بتاعتك دى كانت ست متميزة
اكيد كانت عارفة إن مدرسة العربى دى مستواها مش اد كدا فمبتدقش قوى على اللى بيعترض
و بعدين هوه إحنا لينا بركة غير النحلاية و الدبور بتوعك !!
دمتى بكل خير يا حبيبتى

وجهة نظرى
تصور يا معتز إن دا لسه لحد دلوقتى
و المفروض اقعد افهم يوسف ( لما يرجع غن شاء الله ) إن اللى فى دماغنا حاجة و مقتنعين بيها صحيح
بس اللى هنكتبه فى الورق حاجة تانية
شفت الإزدواجية البشعة اللى غصب عننا لازم نطبقها
لحد إمتى بس كدا ؟؟
الكارثة إن المدرسين شخصياً مجبرين على دا
اللى بيدرسه لازم يكون متفق مع سياسة الوزارة و المنهج حتى لو كان المنهج فيه اخطاء فادحة
المتنبى
المتنبى ى ى ى ى
الله يرحمه و أدينا بنضحك ضحك البكا زيه

أه نسيت
إنت أزيك يا معتز
و ازاى احوالك
معلش إندمجت فى الموضوع و نسيت أقولك
ازيك

mayada
يا قاف ميم ازيك يا حبيبتى يا أجدع عمتو فى النت ...
بيت الشعر دا كنت باخده فى الجامعة برضو و لما الدكتور شرحه كنت هموت من الضحك على الروقان بتاع الشعرا بتوع زمان
أل إيه قبلة الحبيبة لها طعم الخمر و التفاح الممزوج بالعسل !!!
إيه الروقان دا
متفكرنيش بدكاترة الجامعة عشان كان عندى دكتور علم نفس كان مجننا زى دكتورك دا تمام
ربنا ما يحرمنا منك يا ميودة
يا خطيبة إبنى يا أجدع من ميت أسد

بطوط حبوب
لااااااااا
دا سؤال و لا ليه دعوة بالخباثة خااااالص مالص يا محمود
مطلقاً
حتما
جداً
طبعاً يا بطوط دا عامل زى نظرية الأوانى المستطرقة كدا
كله بينفد على كله و المستوى بيبقى ضحل فى كل حاجة
ربنا يفتحها فى وشكو يا شباب
انا معتمدة عليكم بقى لما يوسف يكبر تخلوا حياته احسن من دلوقتى
سلام يا بطوط يا حبوب

tote
أهلا بيك نورت المطرح كله
و شكراً على ذوقك و رأيك فينا
هوه الشتايم دلوقتى بقت موجودة فى كل حتة مش المدارس بس و بقى عادى خالص بس دا لا يمنع إن سماعها ما زال مؤلم و جارح خاصة لو جه من المعلم اللى يفترض يربينا و يعلمنا ....
أنا وصلت للنتيجة بتاعتك فى الآخر
نمشى حسب نظام التعليم العقيم دا
و برضو يبقى لينا رأينا الخاص بينا بس يتقال فى وقته و لحد يقدره
أكيد إن شاء الله هزورك طبعاً
و تحياتى الخالصة ليك

خمسة فضفضة
و عليكم السلام يا فضوضتى
ازيك يا حبيبتى
أنا غلباوية ؟؟؟
دنا مجرمة حرب يا بنتى قولتلكم و مبتصدقوش
دنا لو حكيت اكتر من كدا هشلفط منظرى كأم قصادكو بس و مالو منتو حبايبى مش حد غريب
و بعدين يعنى بطل قصة احمد رجب مش كان عنده حق بذمتك
بيخلونا ندرس حاجات من غير الجوانب التانية و دا شىء ضرورى
يعنى من حقى أعرف الشاعر دا توجهاته إيه و بعدين أقرر يعجبنى شعره بغض النظر عن فكره و لا احط الأتنين فى كفة واحدة و أرفضه
دا الصح
بس مش مقرر الوزارة
تحياتى ليكى يا حبيبتى

lyssandra
أزيك يا حبيبتى
يا ستى مشكرين على ذوقك
و أنا سعيدة جدا إنى بعرف أرسم بسمة على وشك و وش اى حد بيدخل هنا
دا يشرفنى و يحسسنى إنى بكتب حاجة ممكن تأثر فى حد غيرى و غير يوسف
و ربنا يقرب البعيد يا ليساندرا و يرجع يوسف و تشوفوه و ساعتها يا ستى
إيقوا إصحاب زى مانتى عايزة
و أصلاً هوه يطول ؟؟!!

عاشقة النقاب
ازيك يا نونو
ماهو للأسف لازم تقعدى تصلحى اللى المدرسة بوظته
و تبقى عاملة زى وكيل النيابة و تقعدى تعصرى فى الولد عشان تعرفى خد إيه و المدرسة قالت إيه و العيال اللى معاه حصلهم إيه عشان تطمنى عليه و تعرفى أول بأول لخبطوا إيه فى دماغ الولد عشان تلحقى تصححى المفاهيم
ربنا يعينك و يعين كل ام و أب
و يستر على العيال دى اللى جايبنهم فى زمن غريب
كنا فاكرينه هيبقى أحسن من زماننا
طلع أوحش بمراااااااااحل
بوسة على خدك يا حبيبتى

yasmina
ازيك يا ياسمينا
بصى يا ستى أختك كمان كانت فى الأمارات لمدة 4 سنين و من صميم التجربة أقولك إن برا الأمكانيات ماديأ مساعدة ستاف المدرسة كله على إنهم يبقوا ريلاكس قوى فى الشرح و التفاهم مع الاولاد
و بعدين أسلوب الحياة عموماً مش زى مصر
يعنى قبل المدرس ما يدخل الحصة أرجعى بقى ساعتين تلاتة من ساعة ما صحى من النوم لحد ما جه على باب الفصل
إيه كم النغصات و الكآبة اللى حصلتله على الصبح من بهدلة مواصلات لبهدلة من المدير و قلة فلوس و عبء مهنى و إجتماعى و اللى هيشوفوه بعد ما يخرج من المدرسة لحد ما يروح بيتهم
يعنى كل دى ضغوط و أعباء
تخلى التدريس عملية مستحيلة نفسياً
و برضو العيال ملهاش ذنب فى دا
البيضة و لا الفرخة بقى ؟؟
تحياتى ليكى من قلبى

وليد
يا راعى الملك

دايما إنت كدا بذوقك تحرجنى
و تقول عاللى ف بالى و تكتبنى
و تعبر عن خوف بيملى قلوبنا
نفسنا ميقربش من إبنك و إبنى
سلملى على بوبو و عمر القمر

doba
ازيك يا حبيبتى و إزاى يسوفك العسل
ربنا يشاء قريب يا دوبا عشان العيال دى مصيرها مبهم
و الواحد بيبقى حاسس إنه بوشين معاهم
و مقهور زيهم تمام
و كلنا تحت أمر الست الوزارة بغض النظر عن اللى بتقوله
و لعل و عسى الوضع يتحسن بحلول جيل جديد من التربويين و المدرسين
بوسة و حضونة

هههههههههه
ما كنتى تعديها زينه و خلاص
رغم ان النمط اللى بتحكى عليه ده موجود بس كان فى برضه مدرسين مختلفين الواحد فاكرهم لغايه دلوقتى

آنين الحزن
أنتى فين يا وزة
يا قمرين
يا بت بتروحى تغطسى فين ؟؟
بتفكرى فيا أنا و فرنسا كتير ؟؟
أنا يشرفنى أبقى مع فرنسا هانم قمر السويس كله فى حزمة واحدة
لأ و كمان فى بالك و تفكيرك
أنا كمان يا حبيبتى بحبك
و يا ريت التجمع الجاى للحريمات تيجى نشوفك بقى من نفسنا
و سلامى للأستاذ المنيع و يا رب يكون مقدر الجوهرة اللى خاطبها دى و يكون آخر تمام معاكى يا قمرة
طمنينا عليكى و إكتبى بوست جديد المدونة بتاعتك وحشتنا قوى
تحياتى يا حبيبتى

إيما أم البنين
أزيك يا ام الزعارير
و ألف مبروك للفريق الجميل الناجح اللى مشرفنا
و بعدين حتى عندك كمان المفروض مدارس مستواها متقدم و أحسن من كدا و برضو فيه قصور ؟؟
طب بس خلى بالك لما زياد قالها رأيه عملت إيه ؟؟
أكيد معملتش معاه زى استاذ جمعة !!
يعنى هوه جاتله الفرصة يعبر عن رأيه و يبحث و يسأل ناس تانية و بعدين يناقش مدرسته
و يا حبيبى قالها علمك قاصر !!!
ما شاء الله عليه
أنا عاوزة أقعد مع الواد دا شوية يدينى جرعات شجاعة
أنا معرفش أقول كدا لحد خالص بعد ما كبرت كدا و بقيت ام
بس برافوا عليه
شجاع و بيدافع عن رأيه
متهيألى يوسف برضو كدا فى مدرسته
بتمنى كدا
الجيل الجديدي كله يتسم بالشجاعة و الإقدام فعلاً

إن شاء الله شيماء تيجى التجمع الجاى أنا بأكدلك من دلوقتى إنكم هتنسجموا مع بعض قوى لأن فيه قواسم مشتركة كتير ما بينكم
و هروح يا حبيبتى أزور المدونة اللى فيها الخواطر و هقولك رايى بقى بس إحنا على قدنا برضو
بوسيلى الزعارير القمامير

همس الأحباب
خالو
ازيك
يا رافع معنوياتى دايما و مشجعنى كدا علطول
متحرمشى منك يا أبو همس
و عشان تعرف إنى لما كتبت فى تاج الأسرار إنى متهورة مكنتش مصدقنى
أهو البوست دا نموذج للتهور و لسه يا ما فى الجراب يا حكاوى
ربنا ما يحرمنا من سؤال علينا
و تحياتى يا اخى العزيز

ahmed-k
أزيك يا أحمد ماهو يا بنى جيلنا كان آخر الفصول الغير مزدحمة و بعدها إبتدت الأعدادا تزيد من 40 ل 50 ل60 ل 70 و يزيد و البركة تقل و التعليم يتنيل زيادة
كنت باخد بالى من حاجات غريبة ؟؟
جايز لأنى كنت وقتها عندى مصادر تانية للقراية زى المجلات و الكتب و الجرايد و الفرجة على الأفلام الاجنبى و خصوصاً الخيالية و التاريخية كنت بحبها قوى
فكانت دماغى بتشطح لحاجات أبعد
عبيطة يمكن بس كان لازم تدخل دماغى عشان أصدقها
تحياتى ليك يا احمد

سومة ..مجنوة فى بلد عاقل
يا سومة بتهرجى ؟؟
اوعى تقوليلى أن درس العقل زينة دا لسه موجود لحد دلوقتى ؟؟
هموت روحى لااااااااااا
أنا أصلى لسه مش متابعة الدروس لكن بكرة لما يرجع يوسف هبقى معاكم أول باول و همشيكم على جدول الحصص متلخبطهوش
أنا بقولكو أهو
تحياتى الخالصة يا حبيبتى

عايزة أتطلق
أهلاص بيكى
طريقة شكرك كدا بتوحى بإنك زعلانة و إنى لخبطت فى الرد السابق عليكى
لو دا حصل فأنا أسفة جدا مكنش قصدى حاجة
و إن شاء الله هاجى أزورك قريب بس طولى بالك عليا عشان أنا بطيئة حبتين
تحياتى ليكى

نهر الحب
أزيك يا إنوس
على فكرة و أنا بكتب البوست دا مش عارفة ليه إفتكرتك قوى
يمكن لأن فكرتك اللى طرحتيها مش بعيدة برضو عن الموضوع و هوه أسلوب التربية و التعليم كمان
ربنا يستر على العيال كلها
و سلميلى على نسمة اللى أرق من النسمة
أرق تحياتى يا حبيبتى

mercy devil
أهلابيك
تفتكر الكادر هيغير حاجة فى أسلوب التلقين و التكميم بتاعهم دا
مظنوش ...
لأن السياسات ما زالت واحدة و إن إختلفت الأشخاص
و ربنا يسمع منك و تطلع الإشاعة حقيقة
تحياتى ليك جدا

sometimes
اهلا بيكى و نورتى المكان
مانا بقول برضو الجيل الجديد و الشباب بتوع دلوقتى عليه عامل كبير فى تبديل الواقع دا واحدة واحدة و براحة
اللى بتعمليه دا هوه الصح كله
الأطفال محتاجة كدا اللى ياخدهم بالراحة و يشد فى وقت اللزوم
بس يتفاهم معاهم
يتفاااااااااااهم
و الله ينور عليكى و يا ريت تفضلى كدا و خلقك ميضيقش بمرور الوقت
تحياتى ليكى و شكراً على زيارتك

do not press f 1
أزيم و نورتى المدونة
مدونتك لطيفة قوى يا إف ون
أهو المدرس اللى قولتى عليه دا نموذج للتربوى اللى ملوش فى التربية و التعليم خالص
واخدها سبوبة او أكل عيش مش أكتر
و بعدين مبيجيش فى باله كم العذابات اللى بيسببها لمئات الطلبة على مر العصور كان مجرد مجى وقت حصته كأن الواحد داخل جهنم و بيعقد يعد الثوانى عشان الجرس يضرب
قلبتى علينا المواجع و إنا كمان قلبتها عليكى يا إف ون
تحياتى الخالصة ليكى

دعوة للأمل
ازيك يا سالى يللى بتشرى رقة
طب نعمل إيه بس ؟؟
ربع قرن من الزمان و مفيش حاجة بتتغير
معقول ؟؟

أهو ده عيبه
ازيك يا بيبو
متهيألى شغلوه عشان واسطة و لا حاجة و لا كان فيه نقص و بعدين على أيامى مكنتش المدارس الخاصة حد بيحب يشتغل فيها و كله بيفضل يتمرمغ فى الميرى
و الراجل إتمرمغ فى الميرى و بعدين جالنا يمرمغنا إحنا كمان
المفروض إنه خبرة
هوه مكنش وحش فى شرحه و الله كان معقول يعنى بس كان مخه مقفول من كل النواحى مبيدخلش أى حاجة و لا فاتح شباك و لا حتى مركب شفاط ...
أهى أيام
و مالك يا جميل ملكش نفس تضحك الأيام دى ليه
غير الحالة العامة عموماً ....
إنتى كويسة الحمدلله و لا فيه حاجة مضايقاكى ؟؟

المنسى
أزيك يا منسى
عامل إيه يا شاب يا أخلاق
أنا مش ملقية بالأ و لا حاجة أصلى عارفة اللى فيها بس بحس غن منظرى وحش قصاد الولد لأنى فى مناخ مبيسمحش إنه يقول رأيه فى مجال المفروض إنه مجاله
يعنى هوه بيشتغل تلميذ و المدرسة جزء كبير من دنيته
لما تبقى دنيته عقيمة من بدرى بدرى كدا
اومال لما كيبر شوية يا حبيبى نفسه هتنسد قد إيه من كتر الكبت اللى بيشوفه
ربنا يسمع منك و يبقى يوسف ليه دور إيجابى فى الحياة عموماً
ساعتها هحس إنى ام ليها لازمة و عملت حاجة بجد ...
تحياتى ليك يا منسى ى ى ى
و أوعى القطرات تدخل فى بعضيها

يا مراكبى
يا عم مراكبى يوووووووه
ياما من الصنف دا كتير
أنا بتكسفلهم بصراحة لما يبقى الطلبة بتعوهم معلوماتهم أغزر من مدرسينهم
و مش بس كدا
دا بتاخدهم العزة بالإثم و بدل ما تثنى عليك و على معلوماتك و تقول دى اول مرة أسمعها و هبقى أشوف مدى صحتها و أقولكم
تقوم تسفه من أرائكم و ترد على جهلها بإهانة
متهيألى الوضع دلوقتى أسوء
و العيال بتعرف اكتر من المدرسين بسبب النت و القنوات الأطفال
و يوسف لما كان بيقولى معلومة كنت ببين إنبهارى بيها بغض النظر عن أى شىء و نقعد نتناقش فيها
مش عارفة ليه الكل بقى روحه فى مناخيره كدا
يا نبع الحكمة دايما منورنى

هههههههههههههههههه
يا زناتى انفخ البلالين

انا فعلا معاكى ان يوسف يحتفظ بافكاره لنفسة
بس كده فعلا زى ما الدراسات بتقول ان الطفل المصرى لحد سن السادسة ازكى طفل فى العالم
و بعد كده بيكون اغبى طفل فى العالم و ده السبب بقى

انا كنت بعمل اكتر من كده مع المدرسين
مرة اتحديت المدرسة بتاعتى انى حجيب الدرجة النهائية فى امتحان الشهر حتى لو جابته صعب جداااا
و اتنرفزت منى جدا و قالت لى طب اقعد يا مغرور
جه امتحان الشهر وحليت الامتحان كله صح و انا متأكد
(الكلام ده فى تالتة ابتدائى)
لما جه ميعاد معرفة الدرجات
لقيت نفسى ناقص نص درجة
على حاجة مش غلط اساسا
و هى عملاها للى جنبى صح
هو كان خطأ نحوى
و فى المرحلة دى مفيش اساس نحو مقرر فى الدراسة
فصممت انى اخد الدرجه كاملة استكمالا للتحدى
قامت ضربتنى بالقلم
و طلعتنى وقفت بره و رافع ايدى لفوق
بجد كرهت الدنيا من بعدها
و قعدت فترة مش عاوز اروح المدرسة
كل ده عشان المدرسة اتغاظت ان طالب عندها واثق من نفسة
بس بعد كده عرفت ان القلم ده جهل مجتمع


بلاش يا ام يوسف
خلى يوسف يقول اللى هو عاوزة
و اقفى جنبة لو مدرسة او مدرس ضايقة

لان ده فادنى فى حياتى جدا
لو عاوزة يوسف يبقى حاجة خلية يتكلم براحتة

انا طولت انا عارف بس كان لازم اقولك كل الحاجات دى

و الف شكر انك زرتينى فى انقطاعى ربنا يكرمك

تحياتى
اسلام

مواطن مصرى نايم
أزيك يا إسلام
و بتشكرنى ليه دا واجب علينا يا سيدى
المهم حمدلله ع السلامة
و إن شاء الله لما يوسف يرجع تاكد إنى هسانده تماماً قصاد اى ظلم يتعرضله
بس برضو هنيجى فى الآخر يا إسلام و نكتب كما يقول المقرر
و بس
و لو عاجبنا
إنما من ناحية التعبير عن الرأى
فمتقلقش
إحنا كنا طول الوقت نتناقش و نحكى و نتكلم
و ربنا يكرمنى فيه و أشوفه من كبار الكتاب أو المفكرين لأن عنده روح القيادة و الثقة فى الذات جامدة
تحياتى ليك يا عزيزى

سلام عليكم ازيك يا طمطم يا رب تكونى بخير والله وحشتينى جداااا وسامحينى انى بتاخر عليكى فى السؤال
ندخل فى الموضوع
للاسف يا طمطم التخلف مش بس عند المدرسين الى متقيدين بالمنهج الخربان الى خلاص صلاحيته انتهت من زمان وكل الى على العيال انهم يحفظوا وخلاص للاسف انا عانيت من الموضوع ده فى الجامعه وربنا كان رزقنى بدكتور الله يعمر بيته شيلنى الماده عشان كنت بقوم اعانده فى المحاضره واخلفه فى الراى ,,والالذ انه وصل لى سلامه مع احد الزملاء بعد النتيجه ويمكن ده سبب انى رافضه اشتغل مدرسه مش لان كل المدرسين وحشين لا طبعا انا فيه ناس مدينلهم بالفضل وهفضل طول عمرى من جوايا بذكرهم بالخير لكن لانى خايفه مقاومتى تكون هوى قدام الفساد الى بينتشر زى الخلايا السرطانيه وعشش جوانا حتى واستسهل واربى الات مش بنى ادمين من حقهم يفكرو وينتقدو ويعبروا عن رايهم ويقولو لا لما يقتدى الامر
لما يوسف يرجع بالف سلامه خليه يعبر عن رايه وسانديه يا طمطم بلاش احنا الى نكسر ولادنا لازم نبقى الدعامه ليهم واختلاف الراى يا طمطم لا يفسد للود قضيه
خالص مودتى واحترامى ليكى يا جميل ويا رب كده دايما تكونى بخير وممتعانا باسلوبك الجميل فى الكتابه

4 بس فى الفصل؟
مين اللى كان بيطلع الخامس على الفصل؟؟؟

احلى حاجة بتعجبنى فى علاقتك بيوسف الحوار القائم على اى موضوع وقدرتك ماشاء الله على اقناعه
تعرفى امهات قلائل من يفعلن ذلك
ربنا يحميه ويباركلك فيه

يا فاتيما
الكادر ممكن مش هيحل المشكلة كلها بس ع الاقل جزء منها ومتنسيش انوا
من علمنى حرف صرت له عبدا
لو شوفتى المدرسين واحوالهم دلوقتى بالذات وان بعضهم بيستحرم الدروس الخصوصية فعلا والله عن تجربة شخصية ورايت بعينى الكثير ايضا لكنه ع الاقل مش لاقى ياكل وآسف فى اللفظ لاخواننا المدرسين
آهوه الكادر ده نصف العما برضه والباقى للبيت وربنا يكرم والاشاعة تطلع حقيقة فعلا والله بجد هتحصل طفرة فعلا فى البلد دى يمكن الواحد يبدأ يعجب بيها من تانى ولا حاجة

اول تعليق ؟؟
بس من الاخر

هههههههه
دا انتي مشكلة بقى من يومك والله فكرتيني بالاجواء التعليمية اللي ترعرعت فيها
وانا برضه كنت بلسانين ومش فاكرة عدد الشتائم والضرب واللي قلته من كترهم
لكن الصراحة الواحد اترقى لما طلع ثانوي بقى فيه شتيمة بس

ههههههههههههههههه

بس انتي عبيطة لانك كنت بتدي الشهادة للسيد الوالد انا كنت بامضيها انا وخلاص ولما السيد الوالد يسأل اقول اي حاجة ويشتم هو ف التسيب وعدم المتابعة والتردي ف المستوى التعليمي لانهم لا يرسلوا له الشهادة!!!!

ههههههههههههه
فكرتيني بالذي مضى اللي لا يعودها ايام

هييييييييه دنييييييييييييييا
فيتامينات وحضونات

أنا لسه داخل أسأل عليكي، إفتكرت إني مقرتش تعقيبك علي تعليقي عندك هههههه زهايمر والله

أنا كويس ومطحون في الشغل كالعاده، بحاول أغير وجهة نظر الرومانيين عن الزراعه والتسويق والأسواق هههههه ممكن بعد 10 سنين.

أنا بسأل عليكي وأشوف أخبارك إيه.

ياااااااااااه
اخيرا هعلق
لوتعرفى بقالها نص ساعة بتفتح الصفحة
حصللى هبل
وحشتينى
2 بوست يفوتو من غير
بوسة وحضونة كدة
ههههههههههههههه
وحشتينى يا طمطم
لو تعرفى دخلت كاممرة هنا
مش بقرا البوست
بسمع الاغنية
يااااااااااااااااااه
اقسملك بتعمللى حالة من النشوة
تهبل
ببحككككككككككككك يا ارق قلب
ان شاء الله هشوفك يوم الاتنين فى الساقية
افتتاح معرضنا الساعة 7
وعشان التاخير
وعشان هدى هتيجى
وعشان تديها الدواوين
وهى دى الحجة
هههههههههههههه
هنخليه عشان خاطر اجمل نجمتين وزهرتين فى حياتى
الساعة
9
ههههههه
بهزر
هنتقابل 5 عشان مش تتاخروا
تمام
هنزل البوست الجديد اول ما يجيلى البوستر بس
يالا الحقى بقا علقى فى اللى فات
ده هيعجبك

بحبككككككككككككككككككك

only spot
مشمشة
ازيك يا حبيبتى
وحشتينى يا بنتى من يوم التبرع
أنا قولت هتغطشى تانى بس طلعتى جدعة فوق جدعنتك العادية بدرجات
ازيك يا حبيبتى و إزاى احوالك
بصى من ناحية التشجيع
هوه بس يرجع و متخافيش
اثل أنا كمان كنت كدا زمان و كان نفسى بابا و ماما يساندونى و مكنش بيحصل عشان كلنا فى الآخر لازم نرضخ لمقرر الوزارة
إنما فى الحياة العادية فإن شاء الله مش هسيب حد يقهره فكريا و ربنا يقدرنى
لكن نظام التعليم الفاشل دا محتاج يتهد و يتبنى من اول و جديد بفكر تانى و شكل تانى و ناس تانية غير اللى موجودة دلوقتى ....
بوسة و حضونة على خدك يا مشمشة
و خلى بالك من نفسك و كولى كويس يا شيماء لحسن يا بنتى خسيتى خالص و قربتى تختفى !!

الطائر الحزين
آه و الله يا إيهاب
أصل المدرسة كانت لسه فاتحة فرع للأعدادى جديد لأول سنة و مصاريفها كانت عالية حبتين و كنا أربعة فى الفصل تلاتة مصريات و واحدة مواطنة من البلد و كنا مجننين المدرسات و الناظرة كانت تقريباً بتبوس إيدينا عشان نذاكر و تقولنا نتيجة المدرسة فى شهادة الأعدادية فى إيديكم يعنى لو واحدة بس سقطت هتكون نتيجة المدرسة 75 % بس و طبعاً دى كانت نتيجة مخزية جدا كانوا عاوزينها 100%
و بعدين الامكانيات كانت هايلة نتيجة للمصاريف و كمان أغلب طاقم التدريس مصريين و مستواهم ممتاز و مش عاوزة اقولك الصبغة الدينية اللى كانت مميزة المدرسة و البلد عموماً
يعنى حاجة الواحد كان يتمناها هنا و محصلتشى للأسف
دلوقتى المدارس الخاصة بتاخد فلوس اد كدا و تعليم يوك
متسألنيش نتيجة الأعدادية كانت كام بقى عشان عارفاك هتسأل ...
75% للأسف
عشان زميلتنا الأماراتية سقطت
و بعدها إتجوزت و مشوفنهاش تانى
تحياتى يا إيهاب
يا طائرى الحزين

mercy devil
لعل و عسى يا عزيزى كلامك يطلع صح
إحنا نتمنى
و فعلاص كلامك دا أنا بسمعه من ناس كتير مدرسين و بيستحرموا
بس فى الثانوية العامة مبسمعشى الكلمة دى من حد خالص
ربنا يستر
و يفرجها على الكل
أنا بشكرك على زيارتك دى و الله بتحرجنى بذوقك
و إن شاء الله أرد الزيارة قريب
تحياتى ليك

وجهة نظرى
و أنا كمان يا معتز بدخل مدونتك يومياً من غير اى حاجة عشان أطمن عليك
الطحنة دى ملهاش آخر و عرفنا
بس مفيش ريست شوية
يعنى دا اللى بحاربوا بياخدو هدنة
و إنت يا بنى متاخدش أجازة تنزل مصر
تستريح شوية و تغير مناظر
طبعاً رومانيا المناظر فيها تغلب
لكن برضو الاجازة ضرورية
ما تجرب تنزل فى رمضان و تحضر معانا الفطار الجماعى دا و نشوفك ؟؟
طب فكر و قولنا
سلام مؤقتاً يا أستاذ

zianour
لأزيك يا امول
وحشتينى
لاااااااا
اخص عليكلى ظلمتينى
منا عملت زيك كدا مرة واحدة وحيدة
و مضيت الشهادة بنفسى و إديتها للميس
و كان يوم أغبر
الأمضا طلعت مش مقنعة و كلموا بابا
أصلهم كانوا بيحبوه قوووووووى
عشرة بقى الراجل كل يومين تلاتة عندهم
المهم جه و إكتشف العملة البيضا اللى عملتها
و طبعاً محدش يسألنى حصل إيه لما روحت البيت
عشان الاجابة معروفة لوحدهااااااا
و لما أقول بعد كدا طفولتى كانت مشردة
محدش بقى يقولى إزاى ؟؟
و معقول !!!
و لا يبان عليكى و كدا
بس خلاص

موناليزا
أزيك
أصل إحنا اصدقاء يا مون مون
اكتر ما إحنا ام و إبنها
انا حسيت كدا
و مفتقداه جدا كصديق
اد ما مافتقداه كأبن وزيادة
دمتى بكل خير يا حبيبتى

شيماء سمير
مشموشة
أزيك يا حبيبتى
حضونات جادمة يا حبيبتى و بوسات كتير
معلش سامحنى بس متلخبطة الأيام دى فى كام مشوار كدا
ميرسى على الدعوة الحلوة و أوعدك هحاول آجى بس ربنا يسهل و ميحصلشى حاجة تمنعنى و طبعاً جاية أشوفك و أشوف هدهودة الجميلة
ربنا يسهل يا حبيبتى
و كل شوية كدا أروح إقرى من ديوانك و أتوووووووووه
سلامى للعائلة الكريمة يا مشموشتى
و خلى بالك من نفسك

أنتى تنورى البلوج مش تردى الزيارة

والله علي قد ما ضحكت علي اد ما افتكرت الكارثه الي التعليم فيها
علي اد الكبت الي هيجي للعيال بسببهم .. خاصة اني حبيت يوسف بقي ومش عايزاه يتضايق :( .. ربنا يخليهولك .. ويوقعه في ناس بتفهم بقي يارب ..
تسلمي يا جميل

فاتيما العزيزه

مستوى المدارس الان اصبح افضل من السابق مع كل التحفظات على نوعية التعليم

كذلك اصبح اكثر تكلفه على اولياء الامور

تعليم جيد يعنى تكاليف رهيبه

يوجد فى مصر مدارس جيده ولكن لا يستطيع معظم الطلبه دخولها بسبب التكلفه


تحياتى وشكرا

إرسال تعليق