.

.

أحـتـرف الهـذيـان  

Posted by: فاتيما in

أحترف الهذيان
أعوم و أسبح ضد التيار
عينان للنور تهفو
لزورق ...
أو ربان
لم أعد أرى
سوى الحيتان
فبعد أن إنقلب الميزان
لم يعد قلبى
للحفقان
إنقطعت عنى
وسائل الامان
لم أعد أقوى
سوى
على الهذيان
لم يتركوا لى
سواه
ملجأ و ملاذ
و وسيلة للإنقاذ
هذيانى ينقذنى
يحيينى...
و يميتنى أحيان
قررت إحتراف الهذيان
بعد أن
إحترق المنطق
و إحترقت الرحمة فى الإنسان
هذيانى ... أسلم منطق
تعلمته منذ
جئت فى الأيام
محوت نظريات
ديكارت
و أرسطو
و أفلاطون
من قواميسى العقلية
و بت أعتنق الهذيان
أعطى فيه دروساً
و محاضرات
أحيان
أعلم الإنسان
كيف يقهر الأنسان
كيف يستهزىء
و كيف ينافق
بالهذيان
كيف يضحك
و كيف يبكى
و كيف يعيش
و يتعايش
تحت مظلة
الهذيان
اجل
إنه أسلم الاحوال
--------------------
القصيدة الجميلة دى كتبتها شعلة حماس المدونات كلها
الحبيبة
و كنت مكسوفة منها و بشكرها عليها و أنا بقول فى عقل بالى
طب يعنى هييجى يوم و أحطها فى المدونة ؟
هوه ينفع الواحد يتمنظر بنشر قصيدة إتكتبت عشانه
طب دى حقا تبقى عيبة كبيرة
و بعدين إكتشفت الأيام دى بالصدفة
إنها أصدق كلام يعبر عن حالى
طب دا سبب كويس يخلينى احطها من غير ما حد يقول حاجة
و لا حد هيقول ؟؟
طب اللى هيقول حاجة
يبقى يعتبرها حاجة من جملة الهذيان
الذى أحترفه
كلمة اخيرة
ميرسى يا دودو

This entry was posted on الأحد, أغسطس 17, 2008 and is filed under . You can leave a response and follow any responses to this entry through the .

51 كــــلام بيطــبطـــب عـــلى قــــلبى و روحــــى

أنا جيت أعلق علي ردك، متحطليش قصيده والنبي .... جايه لواحد حمار تحطيله شعر وعايزاه يعلق عليه؟؟ هههه

أسف والله إني خليتك تعيطي.... إنتي عارفه وبأشكرك ألف شكر علي تقبلك لدربشاتي.

مصيبتي إني دربش كده علي الحقيقه، مبعرفش أداري كلامي والا أبقي دبلوماسي وخصوصا لو كان عن حقوق أو مظالم أو فتنه.

ما علينا.

شوفي يا ستي، أول حاجه لازم تحطي أهدافك. عايزه إيه تعمليه في دنيتك. إنتي حره في أهدافك، عايزه تشتغلي، عايزه تدرسي، عايزه تتجوزي وتقعدي في البيت عايزه تشتغلي رقاصه (هههه) .... براحتك خالص بس حطي هدف. من غير الهدف حتفضلي تلفي في حوالين نفسك مانتيش عارفه رايحه فين وجايه منين وكل واحد حيلطش فيكي شويه حسب ظروفه. متستنيش الأفعال، لازم إنتي إلي تبتدي الفعل.

ربنا يدي لمامتك طولة العمر علشان تفضل واقفه جنبك، إنما لما مامتك تموت (ومحدش عارف الأعمار، ممكن أنا إلي أموت قبل ما أخلص الكتابه دي) حتعملي إيه؟ إخواتك ليهم حياتهمن ولو شالوكي يوم مش حيشيلوكي التاني، ولو إشتكيتي يوم مش حيسمعوكي التاني.

أصدقاءك المدونين حيقعدوا يقولولك "يا حراااام" ميت سنه؟؟ نصايح وصداقه وإلي يقدر يساعد في حاجه بيساعد، إنما في الأخر كل واحد شايل نفسه بهمومها بالعافيه.

عندك معاش أبوكي الله يرحمه وعندك بيت ومش عايزه عريس غني. طيب عايزه إيه بالظبط؟

إنتي عامله في حكاية يوسف دي زي الدول العربيه، قايمين نايمين يتكلموا عن قضية فلسطين ووقفوا حياتهم تماما لمده 50 والا 60 سنه لغاية ما يحلوا القضيه. وفي الأخر إكتشفوا إنهم لو من مش عارف كام سنه كانوا عملوا إيه كان بقي حالهم أحسن دلوقتي وكانت الدنيا إتحلت.

أسف، مش قاصدي أقلل من شان حكاية يوسف، أنا حاسس بحرقة قلبك ودا شيء طبيعي من أم. بس يعني معندكيش مفتاح فوري للحل، توقفي حياتك خالص؟ قلتلك قبل كده إن دوام الحال من المحال، وفي لحظه تلاقي الدنيا إتشقلبت وإلي فوق بقي تحت وإلي تحت بقي فوق. وتلاقي حلك جالك لحد عندك وإنتي محركتيش صباعك.

تمرد؟ لأ ما بنصحش ابدا حد يتمرد علي أمه... ربنا يخليهالك. بس هاتي رجالة العيله، ويا عم إنت وهو، عاجبكم حالي؟ عاجبكم حياتي؟ أنا أهدافي بعد مافوقت هي 1 2 3 4 .... مين فيكم راجل ويقف معايا ... مش عايزه مساعده بس مش عايزه عوائق.

وبعدين هما إلي مربيينك وعارفينك، مين قال إن الست لو لقت ثغره حتمشي علي حل شعرها؟ طب ماهي لو عايزه تنحرف ما حتنحرف حتي لو متجوزه.

ومن غير إستقلال بحياتك ... مع إن دا إختيار لو لزم الأمر، لأن محدش حيشيل شيلتك غيرك، وعاجلا أو أجلا حتستقلي بحياتك.

ومن غير ماتناطحي أمك ولا تقولي أنا حره، بس في وقفه جامده حاسمه محطوطلها أهداف مشروعه مرسومه مظبوط علشان تقنعي الناس إنك عايزه تغيير حقيقي مش لسه حنجرب ونشوف.

أقولك إيه تاني! متعيطيش وخليكي جدعه كده ويالا لملمي نفسك وظبطي حياتك.

تحياتي يا ست فاتيما ههههه

جميل ان حد يكتب قصيدة علشانك و خصوصا لو بالرقة دي
بس يا بنات ليه الهذيان صحيح كل اللي حولينا غير منطقي بس عايزاكم تكونوا اقوى من كده
ربنا يوفقكم

تحياتي

معتز
ازيك يا صديقى
يا عم و لا يهمك انا هييجينى اعز منك أعيطله
آه بس متسوقش فيها قوى بقى و كل مرة فين يوجعك
كلامك صح
و مقتنعة بيه ألف فى المية
بس التنفيذ عاوز وقت مناسب
و مناخ مناسب
حكاية إنتى عايزة إيه
دى مش معضلة قوى
يا معتز أنا عاوزة إبنى فى حضنى
و أمارس حياتى بشكل طبيعى عادى زى باقى خلق الله
و مش هجرى ورا عريس أنا
الطبيعى إن الواحد بيعيش حياته لحد ما يقابل نصيبه
يعنى مش بيفتعله و لا يبقى هاجس فى دماغى إنى لازم إتجوز تانى عشان أى سبب
الهاجس الوحيد
و اللى عارفه إنه مبالغ فيه
و مش طبيعى هوه يوسف
و اللى عاوز يلوم يلوم
مش هقاوحه
بس برضو مش هغير قناعتى إن إبنى جزء من مستقبلى
و لازم يبقاله أولوية ...
أنا عارفة إن دماغى ناشفة
بس أنا بشغل دماغى و الله
و عندى أفكار و مشاريع و محاولات
بس فى الغالب لا تكلل بالنجاح لأن حاجات تانية بتعطلها
بس أرجع تانى
و أقولك كلامك صح ألف فى المية
و ربنا يدينا العمر و نتواصل
و تطمن عليا يا سيدى
و تحس إن إهتمامك دا جاب نتيجة
و الدروبشات دى بقت عادى و عارفة إنها لمصلحتى بس أنا اللى ساعات بعيش فى دور البسكوتة
تحياتى يا معتز
و دمت بكل خير صديق و اخ

كلبوزة لكن سمباتيك
أهلاً بيكى يا سمباتيك
و نورتى المدونة
لأ الهذيان دا تبعى أنا
لكن دعاء زى الفل و لسه بعقلها
هيا بس إتمشت شوية فى المدونة و إنفعلت بشوية حاجات راحت كاتبة القصيدة الجميلة دى و اللى بعتبرها توصيف أصيل ليا
تحياتى ليكى
و نورتى المطرح كله

إنتي تاني؟ مبتحرميش؟ ههه

لأ يوسف هاجس طبيعي جدا ويوسف هو المستقبل. دي حاجه مش عايزه كلام. بس لازم تتعلمي تحاربي بالسلحه إاي في إيدك النهارده مش إلي ممكن تيجي في إيدك بكره.

يوسف مش جاي النهارده، ومعركته لسه بكره.... ف يا إما ييجي بكره وإنتي قويه يا إما ييجي بكره وإنتي لسه بتعيطي.

متخليش حاجه توقفك. كل حاجه وليها حل، بما فيها حلول الغصب والعنف. بس أنا شايف مستقبلك ولا فيه غصب ولا عنف... بس ناقصه ترتيب ويتحط موضع تنفيذ.

مقلتلكيش تعملي مصنع ينافس حديد عز، بس لو إشتغلتي بـ 200 جنيه في الشهر حتي دا يبقي إسمه حطيتي رجلك علي أول الطريق.

بصي ... عايز في ظرف يومين تحطي قرارات لنفسك، ويومين كمان تعملي مجلس حرب تعلني فيها قراراتك وتطلبي أهلك يقفوا جنبك.

متجيش هنا تاني غير لما تقوليلي انك إبتديتي.

علي رأي آبي، وقد أزعر من فنزر ... وحتاخدي قله في دماغك شكلك كده.

انا قريت البوست اللي فات ولقيتك كاتبة مستوية عالاخر ومش مستعده لكلام من نوعية بلاش ضعف وحاجات كده ومحدش يزعل مني
عارفة انا كنت بستغرب قوي اما حد يجي يقوللي حاجة ويبتدي كلامة ويقوللي :
هقولك على حاجة بس اوعدني متزعلش
بستغرب جدا
جدا
يعني هو عارف انها هتزعلني ومع ذلك بيشترط علي اني مزعلش !!!
انا لسه معلقتش على البوست اللي فات ومش هعلق دلوقتي
اما الاقيكي فايقة كده في وقت ما ابقى انكد عليكي بتعليق سخيف على البوست ده
حاليا هسكت عشان بقالي كتير مفتحتش المدونة بتاعتك وسبتها زي ما بحب اعمل كتير
سلام

حااااااضر يا معتز
و متقلقش عليا
بس بلاش التهديدات دى و حياتك
يعنى متزنقونيش فى كورنر
و تقولى يومين
يعنى وسعها شوية لحد ما الجو يهدى
و غبار المعركة ينقشع و تتضح الرؤيا
و المناخ يكون واضح
و مش هعمل يا سيدى مصنع حديد و لا حاجة
بس بما إنك جبت سيرة الصناعة
لإانا هقتحم مؤقتاً مجال صناعة من قديم الزمان
و هعمل حاجة تانية خالص
هتكون موضوع البوست الجاى
و بلاش و النبى قلل آبى هانم بتنجانى
أنا دماغى مصدعة خلقة
ربنا ما يحرمنى من طلتك و سؤالك
تحياتى يا صديقى

أحمد سلامة
أولاً ازيك
و ثانياً روق كدا منفعل ليه
يعنى يا أحمد هيا الجملة إستهلالية لا اكثر و لا اقل
أنا عارفة أن لما أقول محدش يدينى كلام فى عضمى
إن مش الكل يعنى هيلتزم حرفيا بالتوجيهات دى
عارفة إن اللى نفسه يقول حاجة هيقولها برضو غصب عنى
و ممكن يعنى يأجلها شوية
زى ما هتعمل إنت كدا
لكن أنا عارفة مقدماً إن اللى هيحب يقول مش هتفرق معاه غير مسألة التوقيت
أنا لو مش عايزة اسمع رايكم بجد
مكنتش كتبت البوست خالص
كنت إتصلت بواحدة من صديقاتى و قعدت عيطتلها فى التليفون و خلاص
انا بكتب عشان حاسة
إن الكتابة عمل سحرى
بالنسبالى أنا شخصياً
يعنى حاسة إنه بيعمل فرق معايا
و مع واحد من خمسين واحد بيدخل يقرى و
إكتب اللى يعجبك يا احمد
و خلى بالك
كل حد بيكتب تعليق
عارفة إنه بيقوله بقدر يوازى خبرته فى الحياة
و بقدر محبته ليا كمان
تحياتى ليك يا عزيزى

فاتيما
=======
انتى حد بيحبك من ورايا ايه ده البنت دودو دى سهنونه بس يالا مش مهم انا كمان بحبها
المهم انتى كروتى الاسئله بتاعتى ليه لا يا حبيبتى دى للفيكونات والفياكين
دا انا مستنى اابتك اركبى الاسكوتر وتعالى بسرعه جاوبى يا قمر
هاتى حضونه كبيره علشان محتاجه لها

آبى
يا قمر التدوين كله
معلشى يا حبيبتى مخدتش بالى إن الإسئلة للفيكونات كمان
طب أنا جاية حالاً أهو
و خدى حضونات كتير لأنك إنتى كمان وحشتينى و شكلنا غحنا الجوز محتاجين
جرعات حنان جامدة
بوسة على خدك يا بيبى
و دعاء أخلاق بصراحة و أنا مستغربة إزاى هرشتنى بسرعة كدا
و لا انا اللى مفوضحة على الفضائيات من اول حلقة بقى و أنا معرفش
يلا سلام و ركب السكوتر مع إنى مليش فى السواقة بتاتاً

لا اعرف هل اصبحت تحترفى الهذيان وحدك ام نه اصبح سمة للجميع

قرأت تدوينات سابقه
ربما ان سلامه سبقنى بنفس ما كنت سأقوله

افضل الصمت انا ايضا


أحمد مهنى

الهذيان حاجة ملحة
وضرورية من ضروريات الحياة

وإذا كنت مش مصدقة بصي في الشارع على أي حد ماشي وشوفيه عامل ازاي
يعني انت مع القطيع
ومش معنى ده ان دي حاجة كويسة
وبردو مش معنى ده ان الحالة دي في مخرج منها
وكل يغني على ليلاه

عارفة
سعد باشا قال مفيش فايدة
غطيني و.... يا صفية :(

وليد

بجد قصيده رائعه
حلو اوى ان حد يحس باحساس جواكى ويعبر عنه كده

تسلم ايدك يا دعاء
فاتيما ربنا يصلح حالك ويرد ليكى يوسف
انا مش هتكلم الا لما نتقابل
مااااااااااااااااشى
سلام يا اصفى واطهر قلب

فاتيما
أول مرة أزورك
مفاجأة حلوة جدا انى الاقى شعر دعاء
دعاء انسانة جميلة جداااا
ومتأكده انك لازم تكونى زيها
الشعر ده لمس حاجة جوايا
يوسف اسم جميل وسورة يوسف عزاء كل محزون ومكروب
ونهايتها سلوى لينا كلنا
عارفة كمان احنا سننا متقارب
تحياتى

مش هبص لكلام القصيدة
لكن هبص لاحساس الناس بيكى
و ازاى بيعبروا عنه فى قصايد

انت اكتر حد يا فاتيما شوفته الناس بتحبه من غير ما تشوفه
حتى لو شايفة نفسك تهذى الناس بتحب هذيانك

خدى بالك من نفسك يا فاتيما علشان الناس اللى بتحب دى

احساسها عالى قوى وبجد تستاهليها ومن غير مجاملة لانى مبحبش أجامل
بس بجد صادقة قوى
تحياتى

جميل الشعر وأجمل طبعا حالة من كتبت علشانه


يافاتيما انا واثق فيكي جدا

لكن لما باقول خذلتيني يبقى خذلتيني في اني كنت متأكد انك هاتصبري للنهاية

وكنت متخيل انك بدأتي تيأسي

لكن أملي فيكي مش خاب وان شاء الله هايفضل كبير


ربنا يسعدك دنيا واخرة ويمن عليكي من فيض جوده ونعمه يارب


زودك الله الصبر والتقوى

طيب ماشي وماله ياريت كل الهذيان حلو زي هذيانك ربنا يديم هذيانك علينا نعمه ياست الكل

حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟

عندي ثقة فيك ...عندي أمل فيك
بيكفي شو بدك يعني أكتر بعد فيك
عندي حلم فيك... عندي ولع فيك
بيكفي شو بدك أنو يعني موت فيك
و الله رح موت فيك... صدق اذا فيك
بيكفي شو بدك مني اذا متت فيك

ارجوكي
وصلي جزيل شكري
لانها فعلا عجبتني

تحياتي

واخيرا
رجعت لروح قلب ماما
المدونه الجميله
بعد طول غياب
اعذريني ياروح قلب ماما
كنت في تدريب في شركة بيبسي
اتمنى انك متكونيش زعلانه
قصيده جميله اوي
وكلمات روعه
دوما في تالق ياروح قلب ماما
mrgkiller2020

فاتيما الجميله
والنبي ما تزعللى منى
اتأخرت عليكي شوية
بس معلش مشغولة و الله
و كل الهزيان ده علشان اتأخرت عليكي؟؟؟!!!يالهوي!!!!!
بصي يا بطوطة ...دعاء انسانه جميله
بتشوف الناس باحساسها
و ان كانت حست القصيده فيكي...فده معناه انك بتهذي يا ضنايه
و الهذيان ده عااااادي اساليني انا
ساعات الواحد من كتر الحاجات اللى بتمر بيه و مش ملاحق ياخد وقته فى التفكير فى حاجه ...حاجه....
يقوم يهذي
كلنا بنمر بيها...و كل واحد على حسب مواضيعه
وكل واحد على حسب بقى قوته...
ممكن واحد يكون لسه قوي...ممكن واحد نص نص و ممكن واحد زيك انهكهه كتر التفكير اللى بيبقى متضارب مع بعضه و مش عارف يعمل ايه؟؟؟
عارفه بس يوصل...لمش عارف يعمل ايه ديه و حتلاقى الهذيان من كل نوع و لون

كل اللى اقدر اقولهولك ان ربنا ينور بصيرتك و يديكي الحكمه فى التصرف و حسن التصرف
ولا تبعدي عن الاستخاره
ديه لوحدها حتخليكي ترمي شوية كتير من اللى فى مخلك على ربنا هوه يتولاه عنك و عن مخك
سلام ياقمرة و كل سنة و انتى طيبه و رمضان كريم

قصيدة جميلة جدا
وبتحكي عن واقع معظم الناس لأن كتير كلامنا بيكون هذيان
بس بجد كلامك مش هذيان بالعكس كلامك جميل جدا وبحب اقرأه دايما
شكرا لدودو اللي كتبت القصيدة الجميلة
وشكرا ليكي على زيارتك الجميلة للبلوج عندي بجد فرحت بيها

قصيدة جميلة فعلا

ازيك يافاتيما

القصيدة حلوةاوىىى واحساسها جميل عشان دعاء جميلة اصلا

الهزيان مش انتى بس اللى فيه ناس كتير جدا حاسين بكده

يارب تبقى بالف خير

سلاااااااااام

بكتب شعر فيك
بكتب بوست فيك
معقول فى اكتر انا ما عندى اكتر
كل الحجات والمحتجات فيك
وتستاهلى اكتر


الهذيان حق مكفول لكل مصرى
النيل رواه والتلوث هراه

فاطيماااااااتاااااا
ستي كانت تقولي المثل بيقول
لو جارك في خير افرح له
وأنا فرحان قويييييييي عشان اللي انكتب فيكي من كلمات مدونة تستحق فعلاً التقدير على تلك الكلمات الرائعة
وحالةالهذيان حالة ناس كتير كتير
بس اوعي تخلي الهذيان
يمسك فيكي
يتب عليكي
يكتف ايديكي
يغمي عنيكي
يشل رجليكي
اوعي
شد حيلك شدي
وبخطوتك لقدام مدي
وبيوت الحزن هِدي
ويوسف حطي ايدك في إيده
ده انتي فرحه وانتي عيده

تحياتي
حسن ارابيسك

ماهذا بمنطق لمثلك انسان
فأنتي حقا .. مثال للأمان
قد تظلم دنيانا
في بعض الاحيان
فننظر حولنا
لكيلا نشعر بالحرمان
فنجد من هم مثلك
ومثلك قليل .. في هذا الزمان


فاتيما
انا باحبك قوي
ربنا يارب يارب يارب يسعدك ويبسطك ويكرمك ويرضيكي دنيا وآخره يارب

بوسيلي ايد ماما وسلميلي عليها قوي قوي قوي




سلاموووووووووووووز

صوره الباب المقفول اللى فالبوست اللى فات لخصت حالتى وجابت من الاخر حتى الزرعه الخضرا اللى جمبه دى مبقتش موجوده عندى

ايـه دة معقول

حبيبة قلبى .. معنى كدة انها عجبتك فعلا

وبجد دا شرف كبير اوى اوى ليا

وياارب يديم الحب بيننا
سورى انا كنت مشغولة ف حوار شغل اليومين الى فاتوا

فمكونتش بدخل مدونات ولا نت اصلا

ادعيلى

بـــحبـك

لما قرأت كل التعليقات....

كان لازم اعلق تانى

وأقول شكرا اوى بجد لكل حد جميل

قال كلمة طيبة عنى او حد عجبتة لاقصيدة والإحساس وبجد انا بحبكوا

كلكوا وياارب يديم بينا الحب دة

حزين
أزيك الأول
يا رب تكون دايما بخير
ثانياً
الحمدلله إن مش لوحدى التى تهذى فى هذا العالم
و ما دمنا إتفقنا إن الهذيان شائع
يبقى زعلك إنت و احمد سلامة
له ما يبرره
مبروك على العدد التانى
و دايماً الى الأمام و ناجحين و موفقين
دمت بكل خير يا عزيزى

عارفة مش عارف ليه
ازيك يا وليد
أنا مع القطيع
لكنى أشرد احياناً برضو
و البوست الجديد بيحمل هذا المعنى
تحياتى ليك يا عزيزى
يا بتاع الحواديت

حنين القلب
ادينا إتقابلنا يا حبيبة قلبى
متحرمشى منك و لا من حنية قلبك
و دعاكى
و عينيكى الحلوة
تحياتى من قلب قلبى

gannah
أهلاً بيكى و منورة المكان كله
دعاء إنسانة جميلة
و بتقرى الدنيا بقلبها جنب عقلها
و دا اللى مخلى عندها شفافية عالية تجاه الآخرين بعاد و لا قريبين
أنا لازم اروح اتعرف عليكى فى مدونتك قريب و أشكرك جدا على ذوقك
تحياتى الخالصة ليكى

قوس قزح
دوللى يا حبيبتى
أنا شايفة و الله
و غير إنى شايفة
أنا مرعووووووووبة
هخلى بالى حاضر
عشان يوسف
و عشان كل القلوب الحلوة دى
متحسش إن حبها كان فى الهوا
و لحد أى كلام
أشوفك قريب إن شاء الله

ayman bader
يا عرضحالجى
حمدلله ع السلامة من الغياب
و شكراص على ذوقك
و مش هعتبرها مجاملة لأن دعاء شاعرة بجد
مش هزار
تحياتى ليك

صاحب المضيفة
أزيك يا أنس
طب الحمدلله انى لسه عند حسن ظنك فيا
لأن رأيك يهمنى جدا
مش عارفة أشكرك إزاى على دعواتك الحلوة دى
بس جايبة نتيجة صدقنى
تحياتى ليك يا عزيزى

mayada
كدا يا ميودة بتغنيلى فيروز و إنتى عارفة إنى بموت فيها ؟؟
طيب
هرد عليكى

البنت الشلبية
عيونا لوزية
حبك من قلبى
يا قلبى
إنتى عينيا

عاشقة الحب
أشكرك يا ستى
و دعاء اكيد قرته دلوقتى
و بتشكرك عليه
تحياتى ليكى

a long distance
أزيك يا باشمهندس
حمدلله ع السلامة يا جدع
فين الغيبة دى كلها ؟؟
طب المهم العودة
أشكرك يا عزيزى
و متغبش تانى يا مستر جى كيلر

واحدة مفروسة
عمرى ما زعل منك يا فروسة
و عارفة يا حبيبتى إن غيابك لأنشغال اكيد مش حاجة تانية
يا بنتى كفاية الشغل و البيت يعنى كويس قوى إنك بتلاقى وقت للمتابعة
مش هننهب بقى
و يا حبيبتى دعاء إنسانة حساسة و موهوبة و عرفت علطول من كام بوست إنى بخرف كتير
بس برضو هيا حللت السبب و حطت الخلاصة
و أنا بشكرها لأنها حطت لتخريفى مصطلح اكثر تهذيباً و جمالاً
ربنا كريم و أنا بقيت كويسة يا فروسة
و يا رب أشوفك فى أقرب مناسبة
تحياتى

lady e
شكراص على رايك
و ذوقك
و متفقة معاكى فى تحية دعاء
و زعلانة منك لأنك بتشكرينى على الزيارة
دا واجب عليا و لازم هيتكرر علطول
و ربنا يطمنا عليكى دايماً

مزمز
شكراً على ذوقك
تحياتى الخالصة

رصيف نمرة خمسة
إيمى يا جميلة
مبسوطة قوى إنى عرفت أسمك يا حبيبتى
الهذيان لسان حالى
بس كان فاضل يتحط فى قصيدة
و دودو عملت فيا الجميل دا
أنا كمان بتمنالك كل خير يا إيمى
بوسة على خدك

dodda
يا حبيبة الروح
الجملة الأخيرة دى بقت شعار المرحلة
إنتى حدفة على السياسة ليه الأيام دى
إيه النظام يا دودا
يا بنتى إحنا عاوزينك
تحياتى من قلب قلبى يا حبيبتى

حسن أرابيسك
يا فنان يا كبير
متقلقش يا حسن
مخلتوش ينتصر
ميهونش عليا تعبكو يروح ع الفاضى
بفرح لما ألاقيك هنا
نورتنى زى ما بتعمل دايما

soooo
سوووو
ازيك
انا قريت التعليق دا بعد ما رجعت من إسكندرية الصبية جنية امبارح
يعنى كله تمام اهو
كان نفسى اسلملك على ماما
بس لما أسلم عليها أنا الأول
لحسن مش طيقانى حالياً
بس لما تروق
هبعتلها كل السلام
أنا كمان بعزك يا واد
إنت عارف و لا مش عارف كدا ؟؟

سمر الشافعى
التعليق دا كله يقلق
مالك يا بنتى قلقتينى كدا عليكى
ربنا يفرجها عليكى و علينا كلنا
و أتمنى أشوفك قريب عشان نعرف نتكلم اكتر
لو كنتى قصادى كنت خدتك فى حضنى و قعدنا نعيط سوا
خلاص
ليكى عندى حضونة لما أشوفك
و تكون مخصوص
فكيها بقى
و ربنا يفكها علينا كلنا
تحياتى يا حبيبتى

دعاء مواجهات
يا حبيبتى طبعاً عجبتنى من اول مرة قريتها فيها
بس كنت محرجة احطها
لكن جه وقتها و ملقتش أحلى منها عشان يوصف حالى
تحياتى ليكى يا حبيبتى
و براحتك المهم الوقت اللى يناسبك
دمتى [الف خير
و ميرسى للمرة الألف على القصيدة الرائعة
و على كل حاجة غيرها

بسم الله الرحمن الرحيم

جميل ان حد يكتب قصيدة علشانك و خصوصا لو بالرقة دي

بس يا بنات ليه الهذيان صحيح كل اللي حولينا غير منطقي بس عايزاكم تكونوا
اقوى من كده

ربنا يوفقكم

انا افتكرتك ان انتي الي كاتباها
حسيت ان انتي اللي بتتكلمي يا فطيما والله ..
المهم خير
هي جميلة جدا ما شاء الله علي كاتبها وناشرها رائعة يا حبيبتي

دمتي بخير

إرسال تعليق