.

.

شر الحواديت  

Posted by: فاتيما in

عارفين نفسى و منتهى أملى إيه الأيام دى ؟
نفسى فى شر زى بتاع الحواديت
أصل أشرار القصص الخيالية دى طلعت ناس طيبة بجد
شرهم ساذج و عبيط و من السهل التغلب عليه فى أغلب الأحوال
و لو قارناه بشر الواقع هيبقى كأنك بتقارن عصفورة بقبيلة من الضباع
يعنى خد عندك مثلاً حدوتة سندريللا
و شوف أبشع شر واجهته كان إيه ؟
مش إن مرات أبوها منعتها من حضور الحفلة بتاعة إبن ملك البلاد ؟
و مع ذلك راحت الحفلة رغم المصاعب و بقت عروسة الامير
و لا الجميلة و الوحش كان إيه أقسى ما تعرضت ليه ؟
إنها تعيش فى قصر فخم مع واحد شكله مكعبر حبتين و كان بيعبدها عبادة
و فى الآخر طلع امير وسيم برضو و إتجوزته
دايما تنتهى القصة بنهاية سعيدة و بهزيمة الشر
اللى هوه طيب و غلبان و ساذج أصلاً
طب خدوا مثال تانى للشر العبيط
قصة الأميرة بياض الثلج و المعروفة بسنووايت و الأقزام السبعة
فاكرين مرات أبوها الملكة الشريرة الساحرة اللى حبت تتخلص منها
( عشان بس المراية تقولها إنك احلى واحدة يعنى غيرة ستات مش اكتر )
و بعتتها الغابة مع صياد الوحوش عشان يبقى يقتلها هناك
( كان ممكن تقتلها بدم بارد جوا القصر لكن برضو طلعت بنت أصول شوية )
ساعتها الصياد رق لحالها و سابها تهرب فى الغابة
( حتى الصياد اللى قابض فلوس طلع فى قلبه شوية رحمة )
وحوش الغابة عاكسوها بس لحد ما وصلت بيت الأقزام
( الوحوش اللى معندهاش مشاعر طلعت أرق من بعض الآدميين )
و عاشت سنووايت مع الأقزام السبعة فى بيتهم
( رغم إنهم براويين و مبيحبوش الأغراب لكن إستقبلوها)
إستخبت فى بيتهم فى سلام
( يعنى لقت ملاذ آمن و صحبة و حماية و محدش داس لها على طرف )
لحد ما الملكة عرفت إنها لسه عايشة و قررت تتخلص منها بشكل نهائى
طب عملت إيه ؟
عملت سم مخصوص و حطته فى تفاحة
( شايفين الشياكة تفاحة و حاجة معتبرة مش دم و عنف)
و إتنكرت فى شكل بياعة تفاح عجوزة
( قامت بالمهمة بنفسها مقلتشى أنا ملكة و برستيجى و الحركات دى )
و قدرت تخدع سنواويت و أقنعتها تاكل التفاحة المسومة
هتقولولى كل اللى عملته دا و بتقولى عليها شريرة طيبة ؟!!
أيوه ... تابعوا معايا كدا باقى أحداث القصة
سنواويت بعد اول قطمة من التفاحة حصلها إيه؟
( وقعت فى سبات عميق بس و ما متتش يعنى الشر مكنش فظيع أهو )
و سنواويت نفسها إثناء الغيبوبة جرالها أى حاجة ؟
(أبداً كانت نايمة فى سرير جميل حرير و مكنتش حاسة بأى ألم )
حواليها الأقزام بيحرسوها و يطلوا عليها كل صباح
( رغم إنعدام الامل فى صحيانها تانى )
مش بس كدا .... دا كمان آل إيه صدفة
كان فيه أمير معدى جنبهم و لقى المشهد المؤثر دا
( خدو بالكوا امير يعنى إبن ملك و شجاع و مقاتل وكل الصفات الهايلة)
حب سنواويت من اول نظرة و قرر يحارب عشانها الملكة الشريرة
( يعنى البنت فاقت من الغيبوبة لقت الشر إنزاح و تلاشى فى الهواء )
وبعد فواقنها هتلاقى الأمير الوسيم منتظرها و واقع فى غرامها مقدماً
( مع إنه لا كان يعرفها و لا حاجة يعنى حب فى المطلق كدا )
ويتجوزها و يعيشوا فى تبات و نبات
( يا سلااااااااااام )
طب بذمتكم بعد دا كله أبقى عندى حق
و لا بتجنى و بقول شر الحواديت طيب ؟
أصلى بصراحة عشت شر الواقع و بقولكم عن تجربة
إنى بتمنى قطمة من تفاحة سنووايت
هتقولولى اللى يسمعك يقول إن عمرك ما دقتى تفاحة مسمومة أبداً
و عشان كدا منتيش مدركة بشاعة اللى بتطلبيه
أقولكم لااااااااااا
أنا بقالى سنين مبكولشى أصلاً غير التفاحة اللى من النوع دا
بس أنا تفاحتى كانت شكل تانى خاااااااالص
تفاحتى كانت رديئة الصنع و سمها بطىء
و مفعوله كان بياخد وقت طوييييييييييل
مروحتش فى النوم من اول قطمة و لا حاجة
أنا كلتها كلها لحد آخرها
و أنا عارفة إنها مسمومة و إنى بموت على مهلى
للأسف الشديد سم تفاحتى مكنش معمول بشر من بتوع الحواديت
بدل ما أروح فى سبات عميق
فضلت صاحية و عينى مفتحة
بتفرج عليا ما بين الموت و الحيا
و الشر طليق فى المملكة
و الزمن بيعدى و محدش غيره بيعدى من جنبى
المؤلم إن من بين كل الناس اللى كنت أتمناها تعدى
مكنتش منتظرة غير واحد و بس
أميرى اللى بستناه
و لسه بستناه لحد دلوقت
هوه طلبى دا ممكن يكون غريب ؟؟!!
غريب إنى أتمنى تفاحة زى بتاعة سنووايت
متهيألى مش غريب
التفاحة دىمن اول قطمة هتاخدنى فى عالم محسش فيه بألم
و محدش يصحينى فيه غير واحد بس مفيش غيره
يقولى متخفيش تانى و يحارب أشرار زمانى و يهزمهم
و يطبع على جبينى بوسة منتظراها من كتير
و يقولى بكل حنان
إصحى يا ماما
أنا خلاص جيت و عمرى ما هسيبك أبداً
أبداً
أبداً

This entry was posted on الاثنين, سبتمبر 08, 2008 and is filed under . You can leave a response and follow any responses to this entry through the .

22 كــــلام بيطــبطـــب عـــلى قــــلبى و روحــــى

فكرة رائعة فكرتك وتناولك لأبطال الشر الخياليين رائع بحق ، لكن الشر الواقعى دوما أقسى بالفعل .. ملأ الله حياتك بالخير كله ..

كتبت التعليق السابق متعجلا لخروجى للمدرسة وعدت الآت لأجدنى لا زلت أول المعلقين .. هو يوم سعدى إذن ..
بخصوص تمنيك التفاحة المسمومة أو القاتلة ببطء ، فقد أفزعتنى أمنيتك تلك ، فكثيرا ما شعرت بأنك قوية وأكبرتك لذلك واحترمت أحزانك كثيرا ، فلا تجعليها تهزمك على الأقل لأن هناك من يحتاجك وأؤكد لك أننى مررت بلحظات كانت الدنيا فيها قاتمة لأقصى درجة وتوقف الزمن بالفعل عن المرور تماما وأصبح العمر كله لحظة واحدة كئيبة ، لحظة عمرها مئات الأعوام وفجأة انقشعت الغيوم بقدرة القادر العظيم من حيث لا أدرى ، لذا عليك دوما أن تطلبى من الله أن يعينك على تحمل أعبائك مهما كانت قاسية بشرط ألا تفقدى الأمل أبدا وصدقينى سيأتى الفرج حتما من حيث لا تدرين .. انتهزى فرصة الشهر الكريم وتقربى إلى الله أكثر لتجتاحك السكينة ويغمرك النور بفضله عز وجل وبإذنه تعالى .. خالص حبى .

مضوعك مؤثر أوي يا فاتيما أنتي زي كان نفسي أعيش في الحواديت لكن هيهات
أن شاء الله رمضان الجاي أبنك حيكن في حضنك و بيطبع علي جبينك ٦٠٠ بوسة

كل سنة و أنتي طيبة رمضان كريم

لكل أحبائي المدونين أرجوا زيارتي للتعرف علي تفاصيل أفطار جماعي

يا فاتيما ..
خللي بالك ان الشر اللي في الحواديت ده عشان الصغيرين مش الكبار، عشان كده بيكون على اد تحملهم لتخيله .
و بالرغم من كده بنسمع للحواديت دي ، و بننشد ليها برضه ..

لكن الحال غير الحال ، احنا الكبار مش محتاجين قصة تتحكالنا ، حياتنا كلها قصص و عبر ، مؤلمة اوي انا عارفه ، بس العبرة باللي بيصبر مهما طالت محنته ، عارفه و الصبر ده محسوب من حسناتك انشاء الله ، ربنا ما بيروحش حاجه هباء، و انشاء الله تلاقيه معاكي و في حضنك على طول ...

أبنتي الغالية فاتيما
أخيرا كتبتي ..المهم كل عام و أنتي بخير
كل عام و أنتي إلي الله أقرب كل عام و أنتي منوره دنيانا و بمشيئة الله سيعود لك يوسف يأم يوسف و ستفرحين بنجاحه و ستزوجيه و ستكوني له هاد و دليل
دمتي أبنتي بخير و ربنا يحقق لك كل ما تتمني فأنتي تستحقينه
أبتك /أبو خالد

فااااتيييمااااااا
يااااااااه انا اول مادخلت مدونتك حسيت احساس غريب اوى مش عارفه ايه هو الصراحة
حسيت بالاسترخاء والهدوء
ماشاء الله مدونتك جميلة اوى بكل حاجة فيها
واكيد صاحبتها اجمل:)

على فكرة انا مليش فى المجاملات اللى فى قلبى بينزل عالكى بورد على طوول:)

وكل سنة وانتى بألف خير
وبعيد عن اى تفاح مسموم:)

بحب مشاعرك واحساسك أوي يافاتيما

كل اللي بتقوليه عميق أوي

ياريت لو كان الشر فعلا طيب وساذج زي الحواديت

دي ساعات في حواديت بيصعب علينا الشرير فيها من سذاجته والمقالب اللي بتحصل له

بس تفتكري ينفع الشر يبقي زي شر الحواديت في الزمن ده ؟؟

أظن الأسهل اننا نروح ندخل الحواديت دي ونعيش جواها

---------

ربنا يرجع لك يوسف بالسلامة يارب
ويفرحك بيه

كل سنة وانتي طيبة


Lyssandra

فاتيما

بحبك عشان شافافيتك .... لا مش الشفافية بتاعت الديموقراطية والكلام ده ههههههه
لا شفافة
شايفاكى كلك على بعضك
بحنيتك وحزنك
بالنور اللى بيلمع فى عينك
بروح قلبك ابنك
بحب ضى احساسك

خليكى على حبك للدنيا اواعى تكرهيها ربناقريب اوىىىىىىىىى
افضلى اشكيلوا ولا تشكى لغيرو فضفضى معاه ده اعلم بحال كل البشر

يارب يويو يبقة معاكى وفى حنضنك رغم كلامك الا انى بحس انه مالى عقلك وقلبك ومبيغبش عنك
ويارب يبعد عنك شر التفاحة وسمها

تحياتى القلبية

حبيبتي فاتيما
عرضك للموضوع ومقارنتك للشر في الحواديت والحقيقه جميله ..وعايزه أقولك إن الشر هو دايما شر وقاسي جدا على ققلب كل إللي بيعاني منه ..ماهما كان كبير أو صغير
إحساسك حاسه بيه قوي ..واغنية ورده خليتني أبكي أصلي بتلكك على النكد اليومين دول ..
يارب الشر يختفي من حياتك ويرجع لك يوسف يارب
حاولي تعيشي اليوم إللي غنت عايشاه وخلي بكره لبكره
تحياتي

هي كلمه واحده إنتي قلتيها في أخر البوست: إصحي يا مامي.

علي رأي نور الشريف: مرحبا بكم في العالم التالت .... أنا بقولك مرحبا بك في حياة الواقع.

إنتي عايشه الواقع مينفعش تعيشي علي حلم، مينفعش تستني تاخدي مخدر. إنتي عايشه واقع حسني مبارك وجمال مبارك وأحمد عز ورفاقهم من نجوم الشر في لجنة السياسات ومجلس الشعب وغيره.

واقع مافيهوش قانون وفي بلطجه، واقع الضعيف بيتمسح بيه الأرض، دا لو إتسمحله يعيش علي الأرض.

عايزاني أقولك أسلوبك الأدبي جميل؟ طب والله العظيم أسلوبك الأدبي جميل، والفكره في البوست جميله .... مقارنه شر قصص الأطفال بشر قصص الأوغاد.

بس دي كانت قصه وإسلوب أدبي متميز والا إحساس فعلي؟

والباقي إنتي عارفاه وقولتهولك قبل كده.

متتعبيش نفسك وتردي عليا. صدقيني أنا عارف أنا بضايقك قد إيه ... بس ملعون إلي ضحكني وضحك الناس عليا، ويا بخت إلي بكاني وبعد الناس المفتريه.

كل سنه وإنتي طيبه.

ام يوسف الغاليه
في بعض الاحيان احلامنا بتتحول لكوابيس
تفتكري الحكايات اللي من النوع ده حيكتب لها البقاء
كان الله في عون الحكايات اللي بتستحمل اضغاث احلامنا
تقبلي تحياتي

قبر الرجل فمـهُ ( الأكثم بن الصيفي ) ..

قبل التعليق ع شخصك .. وع خيالك الهارب .. من واقع صادم متوغل .. بين خلايا أجسادنا ..

أريد التعليق ع كلمات الأخ / الأخت وجهة نظري ..
يا عزيزي أحلامنا ليس هي ناتج نومنا العميق .. ولكن هي نتاج خيال .. خيال أنعم الله بنا عليه .. الخيال هو السعادة المؤقتة والمخدر الوقتي .. وبدون خيالنا سوف نستسلم لواقع أليم مؤلم .. دعها تتخيل وترسم بفرشاه لوحة خيالية .. ولكن نصيحتك لها تكون .. هكذا ( إياكِ وإياكِ .. من السُباتْ الدائم .. خدي غفوة بين كل واقع وواقع .. وبين كل صدمة وصدمة .. وأتركِ لخيالك العنان ولكن اكبحِها وقتما تُريدي .. )

عودة للتعليق عليكِ :

( أريد إن أفكك أزرار قميصـي .. ليصبح صدري عـاري .. يخترق هذا الأثـير
لماذا أُرغمْ دائماً .. ع أستنشاق هذا الهواء الملوث .. !
أراه يقتحم فتحتا أنفي رغمـها ..
لماذا لا أستنشق هواء نقي .. حتى الهواء يتحكم فيَّ .. ! )

الخيال هو مُنشط الحياة .. وبدونه سوف نصبح أجساد جوفاء خاليه .. ولكن تحكمي فيه .. سيكون خيال فقط .. لا وَهَــــــــــــــــــــــــــــمْ

دمتِ بكل ود ..

وانا اقرا البوست مع الاغنيه المصاحبه واللى بموت فيها ....عيونى دمعت
فعلا ...اشرار الحواديت كانوا اطيب كتير من شر الواقع الذى نعيشه
ربنا يكتبلك السعاده يافاتيما
عارفه كل اللى كتبتيه قبل كده حاجه والبوست دا حاجه تانيه حسيت من وراء كلماته بقد ايه عانيتى وتالمتى كتير اوى
لدرجه الشر اللى اكتر من شر الحواديت
باذن الله يرجعلك وباذن الله ربنا يوعدك بالانسان اللى يقدر يعوضك انتى ويوسف
على كل الايام الحزينه
ويارب ماتقبلى اى حد شرير تانى فى حياتك
نفسى اخدك فى حضن طويل اوىىىىىىى
وقولك مش تخافى
بكره اكيد احلى من النهاردا
وطول مااحنا عايشين فى امل فى بكره

منتظراكى فى فطار رمضان فى ساقيه الصاوى اتمنى تحضريه حيكون جميل جداااا

على فكره ...صورة فاتن حمامه اللى انت حطاها جميله اوى انا عندى واحده زيها لانى بهتم بجمع صورها وابتسماتها فى منتهى العذوبه والرقه

والاغنيه المصاحبه جميله موت بتحسسنى انى نفسى اكون ام كل ماسمعاها


تحياتى
عرفاتك الساحره
قلب دائما محب لكى

يا رقتك يا شقاوتك...
اوقات كنت بسأل نفسى ... ازاى الخير يكون ضحية للشر كده، وليه سلبى وضعيف بالشكل ده .. وليه الشر بيهزمه لانه اقوى .... ومين اللى بيحدد لنا ادوارنا بين الخير والشر .. ومين اللى بيحدد النهاية .. احنا والا ارادة ربنا .. ولو ارادة ربنا بتتحق من خلال الطريق اللى احنا بنختاره.. وطالما طريق الخير مهضوم الحق .. مكسور الجناح .. متألم .. ميت بحسرته .... يبقى ليه بنفرح بأدوار الخير رغم الاعتراف بخيبتها ونحكى ونتحاكى عن حياة اصحاب ادوار الشر واستمتاعهم بيها ... والا يكونش الخير والشر ده حاجة نسبية .. ويكون حكمنا احنا اللى غلط وفرحانين بالخيبة والضعف والاستسهال وبنبص على العنب البعيد ونقول عليه مر .. مش عارفة بس زمان كان ف الحواديت تفاحة مسمومة دلوقتى السم ف العسل ومش من مرات الاب لا يمكن من من اصحاب الدرجة الاولى من القراب والام والاخوات ...
فاتيما احب اقولك انك لمستى وجع جوايا ، واحب اقولك انى فقد الامل انى الاقى خير ف اللى حواليا والشر بقى مهارة اساسية للتعامل واللى معندوش المهارة دى يبقى طيب وعبيط وساذج وغلبان وحقه ضايع لانه بيراعى معايير محدش بيفكر فيها غيرهلانه مش زى اللى حواليه....

انت الوحيدة دون غيرك التي تعلم أن في أكل تلك التفاحة سعادتها وأنها مفتاح الفرج وهذة التفاحة هي حلقة من حلقات كثيرة استحكمت ولكنها باإستحكامها فرجت وأنت
أكل التفاحة بالنسبة لكِ هو بداية النهاية لمشوار طويل من الحرمان والصبر والتحمل على فراق أعز الناس
أنت علي يقين أن هناك ألم وتعب من جراء أكلها ولكن هذا لايعنيكِ ولا يشغل بالك قدر ما يعنيكِ ويشغل بالك الأمل الذي تنتظرية بفارغ الصبر ليخلصك من عذابات وإحتمالات كانت كلها من أجله من فارسك الصغير الذي تكبر حوله الأيام ويكبر معها إلى أن يحين الحين فيرفع الحجاب وتكشف الأسرار وفي اللحظة الأخيرة التي تظنين فيها أنك على وشك النهاية تكون البداية الجديدة على يدية بصرخة عاليه مدوية مامااااا
تدركين أن الله أرسل رسوله لكِ بترياق يعافيكِ من سُم التفاحة
دمتي بخير
ولو أجتمعت أشرار الأرض باطنها وظاهرا على أن يضروك بشئ لن يضروكِ الا بشئ قد كتبه الله عليكِ
فات الكتير ما بقى الا القليل
واللي جاي أحسن ان شاء الله من اللي راح فدوام الحال من المحال حينما نبتلى نعرف أن لنا شأن عنده وأننا من أحبائه لذلك يحب الله تعالى دائما أن يختبر عبده المؤمن الذي يحبه ثم الفرج ثم يفيض عليه برحمته التي وسعت كل شئ
وعسى أن تكرهوا شيئاً وهو خير لكم
وعسى أن تحبوا شيئاً وهو شر لكم
وكما عاهدناكي دائما ام يوسف الطيبة الحنينة الصبورة
نريدك دائماً أم يوسف القوية العفية
كل عام وانتي ويوسف بخير وكل من يحبون لكما الخير
تحياتي
حسن أرابيسك

بعد الشر عنك

تفاحتك من الجنة ان شاء الله

يافاتيما الفرق بين الشر زمان والشر دلوقت هو الرحمة

ربنا يجمعك يارب بقلب تحبيه ويحبك


تحياتى وحبى
لكى ول يوسف

السلام عليكم
ربما ما وصفتيه حتى على نفسك عند غيرك هو اقل الشرور
اثبتي فهناك من هم اكثر الما وحزنا منكي
وبرضه بيشوفوا مشكلتك على انها بسيطة واحمدي الله العلي العظيم
اسال الله العلي العظيم ان تقر عينك بيوسف ويرده الله اليك ردا جميلا
ويقر عين كل ام بابنائها يارب
كل عام وانتم الى الرحمن اقرب

ده شر والت ديزني
شر لطيف و أذاه محدود
الشر في الواقع ملوش حدود
ربنا يكفيكي الشر كله و يهديكي و يقسم لك الخير كله
و يرجع يوسف لحضنك

بجد يا فاتيما ربنا هيكرمك من غير تفاحة ولا حاجه لازم تفضلي فايقه علشان تعرفي تفكري كويس وتعرفي ازاي تستقبلي يوسف وتاخديه ف حضنك
ربنا يفرحك قلبك برجوعه ليكي يارب يارب يارب وربنا يكرمك ان شاء الله

ياروح قلب ماما
**************
اولا: كل عام وانتى بخير و صحه
ثانيا بأه صباحوووو قر
ده الاميره اللى ماماتيتش من التفاحه المسمومه زمانها زورت و ماتت ..
وسندريلا زمانها و هى راجعه بيتها بسرعه..اتكعبلت و رجلها جات تحتها و مابقيتش تنفع طبله و لا طار
ايه يا فاتيما...فى أيه ؟؟
اوعى يكون اللى حصل لمهند ابن اللذينه ده نتيجه القر من متبنى فكرة الشر اللطيف
لا يافاتيما لا....مش حلو كده ابدا
خلينا نتكلم جد بأه
عايزك تستغلى الشهر الكريم ده و تدعى و تكثرى من الدعاء و تحسنى الظن بالله و تأكدى ان الله سبحانه و تعالى سيستجيب لكى انشاء الله
مره ثانيه كل سنه و انتى طيبه و بصحه وخير

اه
قلبى وجعنى وجعة
يا فاطمة
مش ممكنة
ولا ممكن توصف
غير بدمعتين حيرانين
ولسان بيدعيلك
وبيدعى لكل مكروب
اه

إرسال تعليق