.

.

جوا المحفظة  

Posted by: فاتيما in

قدام شباك التذاكر وقفت و أنا على آخرى
عاوزة أهرب بأى شكل من كل المشاكل اللى بتطاردنى
و ملهاش حل غير البعاد
و لو مؤقتاً
كلمت الموظف و أنا بدفع الفلوس
- ممكن لو سمحت تقعدنى فى مكان يعنى ... محدش يضايقنى فيه ؟
- على عينى حاضر
- متشكرة قوى
طلعت الأتوبيس و الكرسى بتاعى كان جنب الشباك
طول السكة كنت مع نفسى
و الرمل
و السما
فى وسط الطريق سرحت
خفت
بكيت
خرجت منديل امسح دموعى
و لحسن الحظ مكنش فيه حد جنبى عشان يقولى
- بتعيطى ليه ؟؟!!
صداع شديد من العياط مسكنى و الدنيا صيام
و مقدرش أشرب قهوة و لا أخد مسكن
قررت أنام
غمضت عينى
بعد شوية صحيت و طلعت المراية أبص على وشى
لقيتنى بقيت شبه حد غيرى
إستغربت
قلقت
دخلت المراية فى الشنطة بسرعة و إيدى خبطت فى محفظتى
اللى كتير مبفتحهاش وفكرت أشوفها بعد غياب
المحفظة كانت هدية من صديقة من شلة الجامعة
إسمها دينا
دينا قطعت علاقتها بيا بعد 4 سنين صداقة بسبب خلاف
ناتج عن سوء فهم عبيط
حاولت أصلحه و منفعش
رغم وساطة الأصدقاء المشتركين اللى كلهم نصحونى
إنى أكبر دماغى و أنساها احسن
فقررت أكبر دماغى
و أنساها احسن
لأنى مفيش إختيار تانى قصادى
كنت ناوية أتخلص من أى ذكرى ليها عندى
لكن قلبى مطوعنيش أرمى هدية عيد ميلادى الاولى منها
جوا المحفظة
فيه اوراق كتير و صور أكتر
صور ليوسف فى مراحل مختلفة من عمره
مرصوصين جوا حافظة البطاقة الشخصية اللى
المفروض أروح أعمل رقم قومى بدالها
بس هكتب فيه عنوان إيه و أنا بقيت زى حبيبة عبدالحليم ليس لى عنوان؟
جوا المحفظة
ورقة سوليفان ملفوف فيها اول سنة
وقعت من سنان يوسف
يوميها وقفت أنا و هوا فى البلكونة نرميها فى عين الشمس و نغنى
عملت نفسى رميتها بعيد ...
لكن الحقيقة إنى تبتت عليها جامد علشان متوقعش
لسه شايلاها معايا عشان يبقى معايا حتة منه
جوا المحفظة
كيس صغير مليان صور شخصية ليا و لأخواتى و لصديقاتى
و كارنيه الجامعة بتاع سنة رابعة مكتبات 94
و كارنية السنة التمهيدية بتاعة 95
اجمل سنين عمرى قضيتها فى الجامعة
لما كنت فاكرة الدنيا و الأيام كلها قصادى وقاعدة مستنيانى اكسرها إنجازات
تيجى الأيام دى تتفرج عليا و الدنيا هيا اللى مكسرانى ستميت حتة
كمان جوا المحفظة
فيه كارنية التبرع بالدم اللى بيفكرنى بيوم حسيت فيه
إنى عملت فايدة لحد غيرى فى الحياة و كنت متحاوطة بقلوب بتحبنى بجد
جوا المحفظة
فيه دفتر صغير للتليفونات تقريباً 80% من أرقامه
يا إما إتغيرت
يا إما انا بطلت أستخدمها
لأنى مبقتش أعرف أصحابها خلاص و لا هما عاوزين يعرفونى
جوا المحفظة كتيب فيه أذكار الصباح و المساء
كان صدقة جارية على ستو الحاجة نعيمة
و اللى تبقى مرات خال والدىو شوفتها أنا و يوسف سنين فبل وفاتها
و كانت رمز للطيبة و الرحمة
جوا المحفظة
جواب من ماجد أخويا كتبهولى بعد 6 شهور من رحيلى انا و يوسف
بيطمنى على أحواله و يقولى إنه سجلى شرايط أغانى
و بيطلب منى أسجله شريط عليه كلام يوسف و لزماته
و بيطلب يسمع مخصوص كلمة كانوا بيقولها سوا
أول ما كانوا يشوفونى داخلى الاوضة عليهم
" يلا نضرب ماما "
و كنت بعمل نفسى بعيط يقوم يوسف يتحمقلى ويزعق لماجد
جوا المحفظة
جواب بينى و بين بابا الله يرحمه كنت كاتباه قبل ما أنزل أروح الشغل
و لزقته بسلوتيب على مراية الحمام
ماما كانت فى العمرة و أخويا الكبير فى شقته
وبابا جه القاهرة و مسافر تانى إسماعيلية و أنا لايصة لوحدى مع ماجد
اللى كان وقتها عمره 8 سنين
و نص الخطاب كالآتى
يا بابا
صباح الخير
لو سمحت تغير انبوبة البوتجاز اللى جنب الديب فريزر
لأنى مبعرفش أغيرها ...
و لو كنت هتسافر قبل ماآجى
يا ريت تسيب فلوس
و
شكراً
و دا كان رد بابا عليها
صباح النور
دا منظر مطبخ يا أمل ...غيرت الأنبوبة
و مرفق 200جنيه 100 ليكى
و 100 للأستاذ هانى و يا ريت
ييجى يقعد معاكى ...
القطط ميتين من الجوع
... هاتى لهم لانشون أو سرحيهم بأحسان
بابا
وحشتنى قوى يا بابا ...
يا ريتك كنت موجود دلوقتى
مكنتش إتبهدلت و لا بقيت عاملة زى المركب الصغير فى محيط واسع
مش عارف أمتى يرسى على بر
والدى ميت من سنة و نص و زيادة
بس و أنا قاعدة فى الأتوبيس
حسيت فجأة إنى إتيتمت
و أبويا لسه ميت حالاً النهاردة
آخر ورقة جوا المحفظة كانت خواطر كتبتها فى وسط المعمعة ....
يا هذا
هل تئذن لى ببضع ثوان
أبكى فيها امامك
ثم أصمت
أعدك إننى لن أثقل عليك
بأكثر من دمعتين
و سأخفض صوتى و أنا أنهنه
كى لا أجرح أذنيك
سيكون شجنى صامتاً
لن تدرى حتى أنى بكيت
سأمسح هاتين الدمعتين
قبل أن تغادرا خدى
و تعكر صفو أيامك
ثق فى وعدى
فالمذبوح فى لحظاته الأخيرة
لا يقوى على الكذب
............
الأتوبيس وقف عشان وصل المحطة
عندى حبوب للنوم
و حبوب للصحيان
و عندى حبوب للضحك
بس معنديش حبوب للحزن
عشان دا موجود طبيعى
مقطع من حوار لوحيد حامد
من فيلم
الأنسان يعيش مرة واحدة

This entry was posted on الخميس, أكتوبر 23, 2008 and is filed under . You can leave a response and follow any responses to this entry through the .

50 كــــلام بيطــبطـــب عـــلى قــــلبى و روحــــى

كل دة جوا محفظة كنا عاوزينك تحطى صورة ليها ونشوفها اخر بوست عندى بيتكلم عن حاجة كدة فرفشى وروقى

اة صحيح دة اول تعليق ليا هنا وكمان اول تعليق يا بختى

السلام عليكم ورحمة الله وبركاته

يااااه يا فاطيما وجعتي قلبي

انا كمان عندي محفظه زيك كده وفيها ورق وصور وحاجات كتير ل حاجه ليها ذكري معايا
يارب ترسي مركبك علي بر الامان و يردلك الغايب ويطمن قلبك عليه


سلام

يااااااااااااااه يا فاتيما كل ده جوه المحفظة

انا كمان محفظتي فيها كارنيهات وصور بس مفيهاش جوابات محتفظه بيها برا بخاف اتسرق واخسر ذكرياتي

ربنا يريح بالك ويطمن قلبك يا حبيبتي

فاطمه [أم يوسف]
ما كتبتيه هو بعضا منك
نحن نحيا بذكريتنا
فهل رأيتى شجرة بدون جذور
من قال لكى
أن الراحلبن قد تركونا
ومن قال لكى
أن الغائبين لن نراهم
تجربتى تقول لكى
أن من أعتصم بالله تعالى
صمد وتحمل وأتسع صدره لأنواء الحياة
ما قدره الله سيكون
ما لم يقدره لن بكون
الأ يكفيك هذا الحب الذى بفبض من قلبك
أنظرى أمامك
فلا حزنا بقى
ولا سعاده دامت
فلعل الله تعالى جعل حزنك ما مضى
وجعل القادم من الابام
هى أبام سعادتك
أعتصمى بالله

فاتيما ازيك وحتينا
اخبارك ايه دلوقتي
عارفه يا فاتيما حكاية المحفظة ديه عند الناس كلها
انا شخصيا كل لمااغير المحفظة اسيب القديمة فى الدرج بكل ما كانت تحمله من اوراق و صور و ذكؤيات
تلاقي محفظة من ايام ثانوي
وواحدة ايام الجامعه
وواحده ايام الشغل
هههههههههههههه
كل واحدة باورافها و صورها
اشتري محفظة جديده
و بعدين انا نفسي فى حاجه نفسي المحطة اللى انتى فيها تكون محطة تحول للأحسن و للافضل لحياتك
و كلو احد فينا فى حياته محطات
و الناصح اللى يستفاد و يوظف المجطة لصالحه
فاهماني يا فاتيما؟؟؟
مهم اوي انك توظفي المحطة لصالحك

مش عارفة اقولك ايه
اه
انتى كنتى رايحة فين والدنيا صيام؟
طماطم ياحبيبتى ممكن حضن كبير
ماتزعليش ان شاء الله القادم اجمل

رغم الحزن اللي في البوست ده بس انا سعيد انك رجعتي تكتبي تاني
و منتظر بوست فرايحي شوية المرة الجاية
:)

يا فاتيما ... لا يكلف الله نفساً الا وسعها
هوني على نفسك ... حاولي ماتفكريش ف حاجه ممكن تضايقك ... استغفري ربنا وصلي على النبي :)

ياااااااااااااااااه
يا روح قلب ماما
ده انتي عشتي الماضي كله في السفر
بحلوها وبمرها
الانسان بيبقى محتاج
فعلا يفتكر اللي فات من حياته
في السنين اللي فاتت
بتبقى احيانا حلوه
وبتديله امل في المستقبل
وبتقويه وبتساعده
روح قلب ماما
اعذريني لان مش متابع المدونه كويس
ويارب تكوني بخير

ياه ذكريات عمر فى المحفظة متها القاسى ومنها السعيد
بجد ربنا ان شاء الله هيكرمك
ولكن اذا ضاقت واستحكمن حلقاتها فرجن وكنت أظنها لا تفرج

نفسي اشوفك و اتعرف عليكي يا فاتيما

فاكرة لما فبوستات كتير عندي قلتيلي انك فيكي كتير مني

دلوقت آمنت اني كمان في كتير منك

الاتوبيس و الطريق الصحراوي و السفر و الوحدة
إحساس عارفاه و واجعني قلبي عليكي من اللي انا حاساه
رحت و جيتي لأزمان كتير ناس كتير بسبب محفظة روحتلها انت بايدك
ويمكن بتغيبي عنها شهور بقصد عشان توحشك و لما تمدي ايدك و تجبيها تحسي نفس اللي حستيه ده تاني
رغم صعوبته و ألمه

و الله نفسي أخدك في حضني مش بس أطبطب
حاسة اني عارفة وشك دلوقت و تعبيره

جميل قوى إنى المحفظة فكرتك بكل الذكريات دى
اوعى تفرطى فيها
تقبلى تحياتى
دمتى بود وفى سعادة

ربنا يسعدك يارب ومش يحرمنا منك ابدا


ويفرح قلبك

تعرفي ..

انتي شكلك كبيرة عند ربنا قوي علشان كده بيختبرك كتير وبيضيق عليكي كتير علشان يطهرك من ذنوبك ويخفف حملك

ربنا يختم لك بخير يارب

يااااااااه
اخيرا فاتيما رجعت تكتب باحساسها الطبيعى
رجعت لينا ولمدونتها
رجعت تحكى عن مشاعرها وذكرياتها
وعلشان كده حمدلله على السلامة يا ست الكل
بس اسكندرية كانت منورة فى رمضان مش كده
وجميلة قوى مغارة على بابا
قصدى المحفظة كل ده ذكريات محتفظة بيها
بس تعرفى انى كل مغير محفظة بحتفظ بصورقديمة من ايام الدراسة وكارنيهات الجامعة
شكلها عادة عند المصريين
ربنا يزيح همك ويسعدك ويطمنك على يوسف
يارب
تحياتى

عايزة اطبطب عليكى .. بس كده

جميله ذكرياتك و خواطرك يا فاتيما
لكن طول عمرك حزينه ؟؟؟؟؟؟؟؟
كفايه حزن يا حبيبتى
صحيح انتى امل و لا فاطمه؟؟

اثر فيا اوي الخطابين دول
متخيلة شكلك وانتي بتقرأيهم
بتبكي وبتضحكي في نفس اللحظة

الانسان من غير ذكري لا شئ
ساعات تكون سعيدة وساعات تكون للاسف حزينة
لكن من الذكري يصنع الانسان

تحياتي

ياااه
والله اوحيتي لي بفكرة تقليب المحفظة بتاعتي انا كمان!!!

بس اللي عجابني اكتر ملحوطة السيد الوالد عن المطبخ بتاع سيادتك اللي هو تيبيكال من مطبخ حظرتنا

كل ده عشان اقول لك واهرب من الشجن وان العمر بيجري وكأنه لازمن نفتح المحفظة عشان نفتكر السنين والحنيني والبشر اللي كانوا
بوسات كتيرة يا ميمي

كوبس انك بتكتبي هنا لكن طالما افتكرتي الوالد لازم تدعي له وتترحمي عليه بيقولوا انهم بيفكرونا بيهم عشان محتاجين دعانا
تحياتي

فاتيما
جئت اجرى
بجناحى الهزيلين
اربت عليك
ان البحر اشتكى من دموعك
قالها لى _سرا_
فهو يخاف ان تغضبى منه
لانه ملاذك
ولكن قلبى لن يسام يوما من كثرة دموعك
لانه سيبكى معكِ.. بل اكثر

من المفترض ان تكون كلماتى بها نوع من التفاؤل
ولكننى على يقين
انك الاجدر بمصالحة نفسك
وبثها ما تحتاجه

احبك فى الله
وحشتينى
وادعيلى انا وعصفورى
ههههههههههههههه

وجعتى قلبى وخليتينى دمعت
الله يسامحك

ده منظر مطبخ يا امل؟؟؟؟؟؟؟؟

الله يكسفك يا فاتيما زى ما كسفتينا قدام باباكى

مش كنتى تغسلى المواعين ولا حتى تندهيلى اجى اغسلهملك انا


امل مين؟



فاتيما
فاتيما
فاتييييييييييييمااااااااا

سمعانى مش كدة؟

لو سمعانى تبقى عارفة انا عايزة اقولك ايه

سلام
اختك خيخة

عمرى ما شلت صور لاى حد من اللى بحبهم فى محفظتى
بخاف المحفظة تضيع ويضيع معاها ذكريات

بشيل كام صورة ليا بس
علشان لو احتجتهم فى اى جهة محتاجة كارنيه عليه صورتى


ليه قلتى ان اغلب اصحابك مش عايزين يعرفوكى تانى؟

عموما
هما الخسرانين مش انتى

عزيزتي فاتيما

أصعب شيء البكاء في مكان عام لأن الواحد قلبه بيتقطع مرتين مره من البكاء ومره من نظره الاخرين إن لمحوا دموعه


على الهامش

حافظي على المحفظه لو مش عشانك فعشان سنه يوسف

تحياتي

فين المنديل اللى بيمسح الدموع يا ريتنى كنت منديل فى شنطتك
انا كمان زيك بس مش برجع لهم كتير

طالب ثانوى
إنت يا أستاذ يللى سايب المذاكرة و عامل مدونة
يا بنى نصيحة من أختك الكبيرة
التدوين دا أدمان و ربنا يستر عليك منه
ربنا ينجحك أن شاء الله بمجموع يوديك مطرح ما تحب
تعليقك كان اول تعليق هنا و فى المدونة عموماً
إنت نورتنى
تعالى دايما
تحياتى ليكى

خمسة فضفضة
و عليكم السلام يا فضفوضتى
ربنا يسمع منك يا حبيبتى
و حياتنا بتتجمع فى محفظتنا ساعات من غير وا نقصد
تحياتى يا حبيبتى

بنوتة مصرية
أه يا رودى تصورى
لما أشوفك هبقى أوريكى المحفطة هتلاقيها حامل و بطنها منفوخة من كتر اللى جواها ...
ميرسى يا رورو على الدعوات الحلوة

mohmed
يا صديقى أنا و الله عشمى فى ربنا كبير
أنا بس بحكيلكم شوية بشوية كنت فين المدة اللى فاتت
أصل أنت جديد شوية على المدونة و لسه متعرفنيش قوى
انا أصلى البوح بالنسبالى ضرورة مش ترف او شىء مؤقت
الحكى بالنسبالى حاجة ملحة عشان أتوازن نفسياً بعدها
و اجمل ما فى الفضفضة أنك تتكلم مع صديق يقسم معاك الهم و يضاعف الفرحة
و حالياً أنا بقسم الهم معاكم و لما أفرح أفرح بيكم و منكم
تحياتى ليك يا عزيزى

واحدة مفروسة
إيد دا يا فروستى حتى المحافظ عندك ماشية على صراط مستقيم و آخر نظام ؟؟
أنا لما شفتك قولت دى هانم و ليدى بجد
على فكرة بحاول دلوقتى أتنصح و أستفيد من اللى مريت بيه خصوصاً فى الفترة الاخيرة دى لأنى إكتشفت حاجات كتير كنت عميانة عنها
و ناوية مبصش ورايا تانى و أتنازل عشان أى سبب تانى
تحياتى ليكى يا فروستى فى أرض الأحلام

موناليزا
الحضن وصلنى يا مون مون
كنت رايحة إسكندرية يا حبيبتى
هحكى إن شاء الله باقى الرحلة لما ربنا يريد
تحياتى ليكى من قلب قلبى

مهندس مصرى
معلش يا محمد القصة حبكت ...
البوست الجديد عن التدوين و ما يختص بيه و مفيهوش نكد إن شاء الله
تحياتى ليكى يا رافع راسنا فى الغربة

rehab mostafa
متقلقيش يا رحوبة
أنا بخير يا حبيبتى
أنا بفضفض و احكى معاكم بس

long distance
ياااااااه
يا مستر جى كيلر
وحشنى مجييك هنا
أزيك إنت و عامل إيه؟؟
أختك من عشاق الدعبسة فى الماضى و النكش فيه
بحس إنه مهما كان فيه أهو جزء كبير من اللى أنا فيه دلوقتى
تعالى وقت ما تحب انا كمان مزورتكش بقالى مدة و يا ريت تسامحنى

funcky doctor
يا ريت يا دوك
ربنا يسمع منك
تحياتى الخالصة ليكى

hannoda
أزيك يا قمراية إسكندرانية
أنا و إنت بنتشابه فى حاجات كتييييير
أولها و أهمها حب إسكندرية
حب دا إيه
دا غرام عنيف
أنا كنت قاعدة فيها شهر تقريباً و رجعت منها على نن عينى و نفسى أعيش فيها عمرى اللى باقى لو ليا عمر
بس يكون يوسف معايا لكن يوسف دلوقتى هوه الحاجة الوحيدة اللى بقت بتربطنى بالقاهرة و مخلينى رجعتلها
لو ينفع لما يرجع أروح أسكن هناك لحد ما موت
مش هتأخر
لما تيجى مصر لازم إن شاء الله نتقابل
و هتاخدى كل الحضونات اللى ليكى عندى
بوسة على خدك يا حبيبتى

mohmed ghalia
المحفظة فى أمان يا محمد بس حتى لو ضاعت ذكرياتها فى قلبى مهما حصل
تقبل إنت تحياتى و تمنياتى بالوصول للسعادة

صاحب المضيفة
مش كدا يا أنس و النبى
أنا برضو بقول كدا
ساعات أحس إنى وحشة قوى عشان كدا ربنا مش راضى عنى و مش معقول كل الحاجات دى بتحصلى سوء حظ أنا مش شرارة يعنى ...
بس أرجع تانى و أتمنى يكون ربنا بيخلص منى الوحش و يكون شايلى خير كبير فى الآخر
عشان منظرى قدام يوسف حتى يبقى مش وحش
منحرمشى من دعواتك الحلوة أبداً

همس الاحباب
يا خرابى يا خالد
تموتوا فى النكد يا عيال و لا إيه ؟؟
يا سيدى إنت عارفنى مقدرش اكون وسطكم و مبعبعش علطول
المحفظة دى شكل من أشكال التعبير عن البنى أدم و متهيألى كل ما تبقى فيها حاجات كل ما يبقى معناها حاجات اكتر
ربنا يسعد أيامكم كلها
و تحياتى لبابا أبو خالد لو كنت بتكلمه
آه و بوسة لهموسة الجميلة

radwa osama
أولا اهلاً بيكى يا رضوى
ثانيا إنتى شكلك حنينة قوى
ثالثاً تعالى دايما

mohra
لا حزينة و لا حاجة يا مهرة إنتى لو شوفتينى مش هتقولى كدا خالص بس يظهر لما آجى اكتب بيطلع الكلام كدا
أنا الحمدلله بخير بس حابة أفضفض معاكم
دمتى بكل الخير يا حبيبتى

kochia
دى حقيقة كنت ببكى فى الاول و بعدين ضحكت من كلام بابا ...
إنتى كنتى شايفينى و لا إيه ؟؟!!
كلمتك حكمة
من الذكرى يصنع الأنسان
سلامى ليكى و لكل من عندك
و سلامى للأستاذ أوبسسسسس

zianour
طب يلا قلبى فى محفظتك و ورينا الهمة
حكاية المطبخ دى كانت حقيقة و لازم الواحد ينقلها دون تزييف و أصل إنتى مش واخدة بالك أصل طالما بابا هيدينى فلوس لازم يدينى كلمتين فى عضمى الاول و ملقاش حاجة يهزئنى عليها غير المطبخ ...
دمتى بكل الخير من هنا لكندا

بنت القمر
و الله يا امانى بفتكره كتير قوى
و كل ما الدنيا تضلم شوية فى وشى بفتكره لأنه الله يرحمه لو كان لسه عايش كان هيحوش عنى كتير بس النصيب
الله يرحمه و يحسن اليه

shimaa samir
إيه الكلام الجميل دا
دا تعبير صادق عن الحالة و طبيعى يكون مليان شجن
أنا كمان يا حبيبتى بحبك
و تحياتى لعصفورك
ربنا يهدى سركم و يسعد قلبكم
يا رب

ahmed al-sabbaGH
ليه بس يا خالو
و بعدين كويس إنك عيطت عشان بعد الكلام اللى قولتله عن ليلى الواحد كان نفسه يغيظك شوية ...
سلامة قلبك يا خالو
و نورت

بت خيخة و أى كلام
يوووووه
جرى إيه يعنى لما المظبخ كان متبهدل حبة
حبتين
تلاتة مثلاً
مهما مسافرين و أنا لوحدى مع أخويا و كان عمره ساعتها 8 سنين و لا حاجة يعنى كنت أم ظهورات لسه مش بجد ...
و بعدين أصل إنتى يا نون متعرفيش بابا
الله يرحمه كان مريض بالنضافة
محسوك قوى قوى قوى
و أنا مرسياكم على البير و غطاه و قايلكلم قبل كدا مبحبش الأعمال المنزلية متلكاًيعنى الصراحة راحة و أنا مبعرفش مش مبعرفشى قوى لأ بعرف اجيد الأعمال المنزلية بس بكسل بغلس بمل ...كدا
لكن لما الموقف بيتنيل بعمل كل حاجة يعنى
تعرفى حكاية أن الحاجة تضيع دى محطتهاش فى بالى قوى يمكن لأنى متعرضتش للموقف دا قبل كدا الحمدلله ...
حكاية أصحابى دول لأن نصهم أنا قاطعته لأسباب مختلفة و النص التانى قاطعنى برضو لأسباب مختلفة
يعنى عندى و عندهم
بوستيلى شريف و لا طنشتى ؟؟!!

إنسان مقيد
كلامك حقيقى خصوصاً إننا شعب طيب و حنون و اول ما حد يلمحك بتبكى بيحامل يخفف عنك بالكلام و اختك بقى من النوع اللى لماتقفل محبش أتكلم مع حد خالص ...
الحل أهرب من كل شىء لحد ما أتوازن
نصيحتك اللى على الهامش هفكر فيها
تحياتى ليك و ليك وحشة بجد

$$ APPY $$
يا قمر التدوين كله
ربنا ما يحرمنى من كلامك الدافى و إحساسك الحلو كفاية إنى لما بقرالك و أقرى مصطلحاتك الطعمة بفتكر يوسف علطول
إنتى طفلة بريئة فى جسد فتاة كبيرة
و قلبك دا يتقال بالدهب
بلاش الدهب عشان فى النازل دلوقتى
يتقال بالألماظ الحر

السلام عليكم ورحمة الله تعالى وبركاته
فاطيما الواقفة الى نافذتها
ابدالدهر لاتفتحها ولا تغيرها
دانتى باين عليكى حكاية!!!
هل تأذنين لى اصبح بس الحين
واكمل القراءة والتعليق
حين ما ارجع بعد الشغل
إن أذن الله لىّ فى الرجوع
صبااااااااااااااااااح
اااااااااااااااااالفل

إرسال تعليق