.

.

حسك فى الدنيا  

Posted by: فاتيما in

أبويا مكنش راجل عادى و لا أب عادى
صحيح مكنش أسم كبير فى الصحافة ...
لكن كان كبير ف الدنيا
دنيتى أنا على الأقل
حاجات كتير عرفتها عنه بعد ما عييى
و قعد ف السرير 8 سنين بحالهم ما يتحركشى
و دا مصير مكنش سهل بالنسبة لإنسان طول عمره كان شعلة نشاط دائم
بعد موته ...
إبتدى يتكتب عنه كلام من ناس عرفوه عن قرب طول مشواره المهنى
فإكتشفت حاجات مذهلة مكنتش عارفها عن أبويا
يعنى مثلاً يوم ما إتقتل السادات سنة 81
كنا أجازة من المدرسة
و قاعدة بتفرج على التليفزيون لأن مفيش غير العرض العسكرى
فجأة إنقطع الأرسال و معرفتش فيه إيه ...
كان عندى ساعتها 8 سنين و عيلة لكن لسه فاكرة
بس اللى فكراه كويس قوى إن بابا جه بعد كام ساعة فى حالة إستنفار و قلق
و قعد على ترابيزة السفرة يكتب فى ورقه بس كان متسربع
و التليفون مبيطبلش رن
و كلنا بنسأله
- فيه إيه يا بابا
- مفيش بعدين تعرفوا
و دا اللى حصل فعلاً لما إتذاع خبر إغتيال السادات
و اللى عرفته إن بابا كان اول صحفى ينشر الخبر دا
عن طريق وكالة الاخبار اللى كان مراسلها فى مصر
و لأنه كان صحفى فى الرياسة فخد إذنهم الأول عشان ينشر الخبر
و خد فيه كام ألف حلوين كدا
و دا فى الصحافة سبق مهم بينضاف للسيرة الذاتية لأى صحفى
و كمان بابا كان من اول مجموعة شباب لسه طلبة فى قسم صحافة
يقرروا يعملوا جريدة أسبوعية فى منطقة القناة
اللى كانت منطقة ساخنة بسبب الحرب
و هوه كان من حوالى عشرة خمستاشر واحد قعدوا ضمن المقاومة الشعبية فى الحى بتاعه
بعد 67 و كان معاه سلاح
و لأن بابا مكنش لسه إتخرج هوه و صديق عمره و معهموش كارنية نقابة
دوروا على صحفى منتسب للنقابة عشان يطلعوا ترخيص للجريدة دى
و قاموا بالعمل فيها من الألف للياء
و نجحت و عاشت من السبعينات لحد دلوقتى
و طالب قسم الصحافة المغمور مسك رئاسة تحريرجريدته
اللى كان بيقول عليه بنته التانية
سنة كاملة كانت فيها الجريدة صوت المعارضة فى المحافظة كلها
و كانت من أزهى عصورها بشهادة المعاصرين له
بابا كان من اوائل الصحفيين اللى عدوا القناة بعد إنتهاء الحرب
و دا كان شرف عظيم لأى صحفى وقتها
بعد سنين القناة فيها كانت ممنوعة على أى مصرى
و ياما كتب حكايات عن المرحلة ما بين 67 و 73
يمكن ييجى مناسبة و أحكيهالكم
كان صحفى فى رئاسة الجمهورية أيام السادات
و كان دايما يطلع فى التليفزيون من ضمن المراسلين اللى حوالين الريس
و كان لما بيجيلى المدرسة كأنه حسين فهمى اللى جه
و البنات يحسدونى
و الحقيقة كانت الزيارات دى بتتكرر كتيييير لأنى كنت تلميذة متفوووووووووقة
و مبعملشى مشاكل خااااااااااااااالص
اللى فكراه كويس إن بابا كان دنجوان كبير
و شاب وسيم رغم الشعر الأبيض اللى زحف على شعره بدرى بدرى
و كان بصراحة رغم الشيب المبكر دا .... مشيبنا و مجنن ماما من الغيرة عليه
كان شخصية متحدثة و بطلاقة و دمه خفيف جدا
زمان سمعت جملة بتقول
بعض الناس ما أن تفتح فمها حتى تتمنى أن تسكت
و بعض الناس ما أن تغلق فمها حتى تتمناها أن تفتحه
بابا كان من النوع التانى ...
كان ساكت أغلب الوقت فى البيت
و كنت بفرح لما يجيلنا ضيوف لأنى ساعتها هسمع حواديته و نوادره
فى السياسة و الادب و احوال البلد و الفن و الرياضة و كل شىء ...
و ساعات كتير كنت بغش منه حاجات قالها و أروح أقولها كأنها من بنات أفكارى
الحقيقة إن كان عندى كنز نفيس مقدرتش قيمته غير لما راح منى
بابا كان أب صعب حبتين ...
كان من النوع اللى بيقسو على اولاده
عشان يطلعهم جامدين
و مفهمتش دا إلا بعد تجربة
أبويا اللى أول ما إتخرجت
شغلنى فى مكان كل زمايلى كانوا يحلموا بيه ....
و مع ذلك سبته بعد كدا
و جابلى عرسان كانوا زى الفل و الله ...و مع ذلك رفضتهم
و أصريت أتجوز واحد مش مناسب و رضخ لرغبتى
حتى بعد ما فشلت فى حياتى الزوجية
و رجعت بمشاكلى و كان هوه فى بداية مرضه
بص لماما و قالها
- أعملى كل حاجة و ادفعى أى فلوس بس نخلصها من الكارثة دى
أبويا
كان نفسى أسمع منه و أنا صغيرة كلمة بحبك او وحشتينى
او الحاجات العبيطة بتاعة البنات دى
لكن الحقيقة بعد ما كبرت و بقيت ام
إكتشفت إن بابا كان بيحبنى قوى قوى قوى
علمنى تعليم محترم
و صرف عليا لحد ما إتخرجت
و أشتغلت
و اتجوزت
و خلفت
و إتطلقت
و مشيت
و رجعتت
و حتى بعد موته انا عايشة بمعاشه و فى شقته
دا حتى لما طفشت فى لحظة ضيق
برضو رحت شقة المصيف بتاعته و لبست بيجامته
و حسيت اد إيه حسه لسه ف ى الدنيا
و إنه لسه موجود فى كل حتة حواليا
هوه دا العمل الصالح اللى بيقعد للبنى آدم و يخلى الناس تفتكره
بعد ما بقى تراب ؟
متهيألى كدا
بابا كان غاوى تصوير و لما بشوف البوم الصور بتاعى و أنا صغيرة
بحس اد إيه كان بيدلعنى
ماما قالتلى إنه كان مبسوط لما جيتى بنت عشان هو بيحب البنات قوووووووى
و سمانى على أسم جدتى اللى هيا والدته لأنه كان بيحبها حب أقرب للعبادة
الأبوة الحقيقية
تصرفات و أفعال و تحمل مسئولية مش شهادة ميلاد وكلمة حب و حضن
و سلامو عليكو وقت الاحتياج
و هوه دا الحب اللى كان بين إيديا عمر بحاله
و محستوش إلا فى الآخر
كان نفسى أحضر موته
و أبوس كل حتة فى وشه
و اروح اوصله لآخر مكان
لكن مقدرتش و ملحقتش ....
لكن عرفت إنى كنت آخر واحدة بابا يكلمها فى التليفون
و بعدها بطل كلام مع الكل
آخر حاجة قالهالى ...
- هترجعى إمتى يا امل ؟... وحشتينى
و طبعاً قولتله قريب و مرضتيش أقوله لسه فاضل وقت
و خليت يوسف يكلمه
أبويا كان نفسه اطلع صحفية زيه
كنت فى فترة الثانوية العامة لا أريد أن اعيش ف جلباب أبى
كانت مسيطرة عليا فكرة السينما و كنت عاوزة اطلع مخرجة ...
ساعتها خدنى برضو براحة و قالى
- و مالوا ... طب يا ريت تبقى زى يوسف شاهين كدا ...ورينى
و بعلاقاته فى الوسط الصحفى له مخرج صديق وعده يساعدنى فى دخول المعهد
لولا ربنا نفخ فى صورتى و جبت مجموع دخلنى كليه الآداب ..
.لسه لحد النهاردة لما بدخل الكلية لأى سبب
بفتكر اول مرة دخلتها مع بابا و كنا رايحين نزور وكيل الكلية
عشان أدخل قسم مكتبات
ساعتها بابا جه معايا و قعد يقولى هنا كنت بعمل كذا ..و هنا كذا ...
و القسم بتاعك كان الكافتيريا بتاعتنا زمان ... بيغظنى يعنى
و حاجات كتير لسه فكراها كأنها إمبارح
لما دخلت عالم التدوين حسيت إنى بحقق لبابا أمنيته دون أن ادرى
صحيح منيش صحفية و بكتب على قدى خالص ...
لكن بقيت بستحضره مع كل بوست اكتبه
ساعات أبقى نايمة و أقوم تلح عليا فكرة
و حاسة إنى لو مقومتش كتبتها دلوقتى هيجرالى حاجة
الفكرة تطاردنى و العبارات تتخانق و تزق فى بعضها فى دماغى
و لازم أقوم أفتح الجهاز و أكتبها فورا
إفتكرت لما كنت بقوم أروح الحمام بليل ... و ألاقى بابا قاعد على ترابيزة السفرة
و منهمك فى الكتابة و مش حاسس بالدنيا و الوقت
كان نفسى يبقى عايش و يقولى رأيه فى المدونة و أسلوبى
كان طبعاً هيقولى وحشة و دا نكش فراخ بس هيبقى باصصلى بفخر و سعيد بيا
كان نفسى يوسف يعرفه اكتر و يلحق يتكلم معاه ... بس أنا كفيلة بإذن الله
إنى اخلى يوسف يفتخر بجده طول العمر
لو الزمن يرجع
هقول و أعمل كتير
لكن ربنا قدر لكل شىء معاد و وقت
الحاجة الوحيدة اللى عمرها ما هتكون مرهونة بوقت و لا سبب
هيا إنى بتمنى لدقايق
بابا يحط المفتاح فى باب الشقة و يدخل من برا شايل اكياس و جرايد
أمسك فى دراعه و أقوله
- عاوزة شكولاتة ماكسى ...ماليش دعوة
ياخدنى من إيدى و أروح معاه للبقال
و أنا حاسة إن الدنيا كلها ملكى
و أرجع معاه و أنا باكل الشكولاتة و هوه بيحيى بإيديه الناس و الجيران
لحظات امان عمرها ما هترجع
لكن بتمناها
بابا
حسك فى الدنيا مهما كنت فين دلوقتى
و بحبك قوى
قوى

البوست و الصورة و الغنوة
إهداء للحبيبة دائما
لحبيبها دائما
إيمان فوزى

This entry was posted on الخميس, أكتوبر 30, 2008 and is filed under . You can leave a response and follow any responses to this entry through the .

53 كــــلام بيطــبطـــب عـــلى قــــلبى و روحــــى

الله يرحمه
واضح انه كان راجل محترمو كان حاجة كبيرة قوي
ياريته كان شد عليكي شوية في بعض حاجات
و انتي كنتي استريحتي من مشاكل كتير دلوقت
الله يرحمه و يحسن إليه

إيه يا محمد دا
إنت سايب الشغل و قاعد قصاد النت
لأ دنت قاعد قصاد المدونة و أنا لسه برش مية
دنا لسه منزلة البوست حالاً
اهو كدا الناس المصحصة ...
الله يرحمه يا محمد و جملتك صح و بوقلها لنفسى كتير والله ...
بس دا نصيب و متقدر مفيش منه هروب
تحياتى يا أجدع مهندس مصرى

ربنا يرحمه ويحسن اليه


والحمد لله أنه خلف بنت تدعي له وتترحم عليه لان كده بيكون الولد الصالح الذي يدعو له

وده اللي بيكون باقي له في الدنيا بعد موته


ربنا يسعدك ويهنيكي يارب


تحياتي يا ست الكل

متغاظة منك اوى يا فاتيما

بقى يكون عندك بابا جميل بالشكل ده وبكل المواصفات دى وبالشخصية الهايلة دى
ومتسمعيش كلامه وتتجوزى واحد من اللى جابهوملك

كان يمكن الحال يبقى غير الحال دلوقتى


مش قصدى ابكتك
بس احنا فعلا ليه بيصيبنا الغباء مع اهالينا فى بعض الاحيان
ونتمسك بحاجات نحس ان هى دى اللى هتكمل سعادتنا فى الدنيا
وان اهالينا مش مقدرين مشاعرنا ومش فاهمنا ومش ومش ومش

ويطلع فى الاخر ان اغلب الاوقات الاهل بيكون عندهم بعد نظر وفعلا فعلا فعلا بيكونوا عايزينا نطلع احسن منهم
واحنا بمنتهى الغباء والخيخنة ورخامة الاطفال فى عيوننا وفى طريقة كلمنا
نقولهم لأ مش عايزين نصايحكم
عايزين نعمل اللى فى دماغنا

ونعمل اللى فى دماغنا وتطربق علينا بعد كدة
ونجرى نروح على حضنهم ونقولهم
عاااااااااااااااااااااا
عااااااااااااااااااااااا
عاااااااااااااااااااااااا

وهما يطبطبوا ويدلعوا ويبصوا لبعض ويقولوا
اعملى اى حاجة وادفعى اى فلوس لازم نخلصها من الكارثة دى
ويبصولنا ويقولولونا متقلقوش
متخافوش
اطمنوا
احنا هنتصرف

واحنا ننام ملئ الجفون
علشان عارفين ان هما هيصلحوا ما افسدناه بعندنا الغبى وبخيخنتنا الرخمة


الله يرحم والدك
ويرحم امواتنا جميعا

ادعيله كتير يا فاتيما

سلام
اختك خيخة

رحم الله موتانا وموتى المسلمين

عارفه
كلامك فكرنى بكلام عمى يوم ماجدى اتوفى

قالى

لو ابوك عضم فى قفه بس عايش تاكد انه شايل عنك بلاوى كتير اوى
اول ما يموت هتلاقى نفسك مش قادر على الى كان قادر عليه العظم الى فى القفه


طبعا الاب مستحيل يتعوض
بس للاسف على رائيم مش بنعرف قيمتهم
الا لما يرحلوا
او لما احنا بنكون ابهات وامهات

مشاعرك جيشه تجاه ولدك

بس نصيحه وانتى فى الوحده دى لا تنهكى راسك بعميق التفكير
ولا تعيشى احداث بخيالك وتتخيلينها بطريقه غير ما حدث فى الواقع
لان ده خطر جداً

ربنا يفك كربك ويفرج همك

تحياتى

إذا مات ابن آدم انقطع عمله إلا من ثلاث : علم ينتفع به ، وصدقة جارية ، وولد صالح يدعو له
وبسم الله ماشاء والدك
توفرت له الثلاثه
يعني لسه عايش
معاكي ومقويكي ربنا يرحمه يارب ويجعل مسواه الجنه
تعيشي وتفتكري

ربنا يرحمه ويدخله فسيح جناته
بس انا مبسوط قوى انك كتبتى عن والدك
وحسيتى بحبه وخوفه عليكى
مع الاسف كلنا مش بنحس بقيمة النعمة وخصوصا الوالدين الا لما يرحلوا
المهم انك وقفتى على اول الطريق الصح
ربنا يوفقك
وتعيشى وتفتكرى يا ام يوسف

أه على معنى الفقد

والحنين حتى لرائحة العرق فى جلباب كان يرتدية

تستحقين الاشاده
علي كلامك الرائع
اللهم تقبله وارحمه

فاتيما :)
وحشتيني جدا..
عارفة اني مقصرة معاكي..
معلش :)
الله يرحمه .. و يفتح له بابا الى الجنة و يفرش له في قبره من الجنة و يلبسه من الجنة ..
:)
انتي جميلة اوي يا فاتيما..
يوسف عامل ايه ؟؟
يا رب تكونوا بخير.

أسأل الله أن يتغمد روح والدك بواسع رحمته وأن يجعله مع النبيين والصديقين والشهداء وحسن أولائك رفيقا ,
فلأب المراعي لبيته المتقي الله فيهم ولا يبخل عليهم بعطفه ورعايته ليستحق
أن يدعوا له أبنائه لتضاف لميزانه,
فكوني يا امل (فاطمه)خير خلف لخير سلف
ربنا يبارك فيكي
وما رويتيه من مشهد إنقطاع الإرسال يوم 6/10/81حدث معي تماما فكان إجازه وتقريبا كان باقي أيام قليله على إجازة نصف العام وجلسنا نشاهد العرض
وحدث ما حدث ولأننا في الغردقه لم نعرف إلا من خلال إذاعة لندن لأن الإرسال المصري كان يعمل لدينا لمدة ساعتين فقط في اليوم وهذا اليوم كان مخصص للعرض
وبعض الأغاني الوطنيه وخلاص
المهم رجعتيني لذكري يوم لن أنساه أبدا لأني رغم صغر سني كنت أحب هذا الرجل من السيارات التي كنت تمر في البلد ومعلق عليها ميكروفون وتذيع أغنية يا سادات يا رئيسنا يا سادات يا حبيبنا
والصور التي كانت معلقه بكل مكان
ومكتوب عليها الرئيس المؤمن محمد انور السادات
ياااااااااه أيام

يلا سلامووووووووووز ولا أقولك
سلاجوااااااااااااافه

فاطمه
أنا قرأت البوست السابق
أحساسك بالوالد عليه رحمة الله
رائع وصادق
شعور الابنه بأبيها
حنان الاب على أبنته
وحقيقة أشعر أنك تريدى أن تجعلى يوسف
أمتداد لابيكى.
والدك سمح ووافق أن تختارى حياتك ولم يعترض , الا يدل هذا على ديمقراطيته
مشكلتك مع الاسره أنهم فقدوا الثقه فى حسن أختيارك أو أنهم لم يصلوا الى مستوى الوالد فى عمق التفكير وحسن الادراك.
فاطمه
تدويناتك تلمس عقلى ومشاعرى
وأرى وبوضوح ورائها كاتبه أو صحفيه
أحساس صادق وقلم يحسن التعبير
ريما بعد قليل من التدقيق
نحصل على سكينه فؤاد جديده
ولكن اسمها فاطمه
الاتتذكرى المسلسل التلفزيونى
(مين ما يحبش فاطمه)
فاطمه
لديك قضيه كبيره
1- قضية المطلقه والاسره والمجتمع
2-قضيه كيف تختار الفتاه زوجا لها
3-قضبه كيف تنظر بناتنا لانفسهم
هل كأنسان أم كسلعه بنطبق عليها
فانون السوق
مدونتك هى صحيفتك الخاصه
أكتبى وأكتبى ولاتتوقفى ولاتيأسى

تحياتى وأحترامى الكبير لشخصك

تعيشي وتفتكري ياروح قلب ماما
ربنا يرحمه
ويكون في الجنه ان شاء الله

جميل تذكرك لوالدك بكل خير ليتنا نعرف بقيمتهم قبل ان يتركونا ولكن لللاسف نشعر بقيمتهم بعد المغادرة رسالة حلوة منك اوى اننا نتذكر والدينا بكل خير ونحاول نديهم قبل فوات الاوان جزاكى الله خيرا
والف تحيه لكى حبيبه قلبى

الله يرحمه ويغفرله ويجعل مثواه الجنه هو وكل المؤمنين

تعيشى وتفتكريه يا رب
وكله نصيب يا فاتيما الجواز والاولاد والموت كله مكتوب

ربنا يديكى طوله العمر وتفتكريه دايما

طول عمرك كلامك للقلب على طول يا طمطم
بجد اثر فيا اوي
انتي دايما جميلة وكلامك اجمل

ربنا يخليكي موجوةد وسطينا على طول

ممممممممممممموااااااااااه

مها ميهوووو

الأب الى زى كده اكيد كنز لا يوجد مثله وسط بنى البشر و تخجل الدموع اذا الدموع لحظة فى البكاء عنه

ربنا يرحمة و يجعل تربيته ليكى فى ميزان حسناتة ان شاء الله
ان شاء الله كلنا نتقابل فالجنة و تعرفينى بيه
ان شاء الله
انا والدى طيب جدا برضوا ربنا يخليه ليا يا رب
و بجد انا اول مرة اكمل بوست طويل كده للاخر
غالبا باخد المضمون و خلاص
لكن بجد و الله انا قريته كله
و كان نفسى تكتبى اكتر
بس انا فرحان اكتر لانك بتدأتى تتفاعلى شوية بتنزيلك بوست جديد
و ان شاء الله كل مشاكلك تتحل

انتى برضوا حد محترم جداااا يا ام يوسف
انا مش عاوز اطول
لكن بجد والدك واضح انه الله يرحمه كان حد عالى الفكر و محترم
و شرف لاى حد ان والده يكون كده

تحياتى

اسلام

المشكله اننا مش بنحس بقيمة الحاجه الا لما تروح مننا خصوصاً الكنوز دي
ربنا يكرمك يا فاتيما
انتي عارفه ان بابا حارب في 73 يعني من الرجاله اللي ما تتعوضش برضه :) ربنا يخليه ليا
باباكي حاجه تشرف والله ادعيلوا دايماً بالرحمه
يارب تشوفي يوسف رجل مشرف كده وربنا يخليهولك يارب

الله يرحمه

عندك قدرة عجيبة لما بتحكي عن حد بتحبيه

بتخليني اشوفه كويس قوي
و أحس اني أعرفه و فاهماه و فاهمة طبعه ووصلاني روحه

أب زي ده نعمة كبيرة جدا يا فاتيما
سواء في حياته أو حتى فرحيله
أصل الناس اللي بتشيل حياتنا بين كفوفها و تلفها بأجمل رعاية و حماية عمر ما احساسنا بالفخر بيهم ممكن يقلله أي شيء
ولا الرحيل

أنا حاسة اني فخورة بيه كانه ببايا أنا كمان

الحرمان منه صعب جدا
لكن برضه السعادة و الراحة اللي أكيد بتحسيها فقلبك بسبب قربه و روحه اللي جواكي كبيرة جدا و بتهون كتير

يارب تشوفي يوسف زيه و تعيشي سنين طريلة معاه تعرفي ترسمي فيها صورت باباكي فقلبه و خياله زي ما هي جواكي بالضبط

وآخرتها مع بوستاتك ده يا فاتيما

بس أقولك

أنا ما برتاحش راحة قد اللي بحسها هنا و أنا عايشة معاكي كلمة كلمة

ياااااااه يا فاتيما

انا مش عارفة اقولك ايه

وانا بشوف كلماتك كنت بعيط لاني افتكرت بابا وخصوصا اني الشهر الذكري الثانية لوفاته فالحاله مش قادرة اوصفلك ازاي

الله يرحمة هو وبابا ويدخلهم فسيح جناته ادعيلو واقري الفاتحه له

مش هنقول ياريت وياريت لان ده مقدر ومكتوب وقصمة ونصيب

تحياتي لكي
رودي

الله يرحمه ويدخله فسيح جناته وربنا يجمعك بوالدك فى الجنة ان شاء الله وجزاكى الله خيرا على سرد قصة والدك لانى بجد بتعملنا بعض العبر وخبرات من سابقونا وشكرا

رحم الله والدك ووالدى وادخلهم فسيح جناتة
وغفر لهم كل الذنبوب
عندما نلمس وجع القلب او وجع البشر نجرى الى دفئ القلوب ونكلمهم كانهم معنا ونبكى ونتمنى ان يسمعوا صرختنا ونتمنى ان ياخدونا بين احضانهم فى دفئ ويربطوا على اكتافنا فى حنان
ولكن
دعواتهم لنا باقية فيكفينا انهم توفاهم الله وراضين عنا
الحمدلله انى اطمنت عليكى ياقلبى
ربنا ينور طريقك ان شاء الله

كل الحب لاجمل صديقة وروح قلبى

رندا

لما بابا كان بيسافر
كنت اقعد اسمع اغنية انغام
حسك فى الدنيا يابا
واقعد اعييييييييط

بهديلك الاغنية
وامسكى نفسك وبلاش تعيطى


حسك فى الدنيا يابا
بيهدينا الاجابة
ويعلمنا الحقيقة
نكبر ونزيد صلابة

داير فى الدنيا داير
وبرغم الحمل ساير
تدوقنا البشاير
وتداويلنا الاصابة

الشرف اللى فى يمينك
شوقنى ابوس جبينك
ولسة محتاجينك
يا منتهى الطيابة

كبرنا صحيح كبرنا
لكنك لسة خيرنا
تهدينا وتفتكرنا
بالدعوة المستجابة


عيطتى طبعا
طب روحى امسحى دموعك ومناخيرك
وحملى الاغنية واسمعيها بصوت انغام
وانتى تعيطى بجد

ادعيله كتير يا فاتيما

ربنا يرحمه يارب

ومتزعليش منى اذا كنت خليتك تعيطى

سلام
اختك خيخة

صاحب المضيفة
الحمدلله على نعمة إنى عرفت قيمته يا أنس
أشكرك على دعواتك الحلوة اللى دايما بتطمن قلبى
تحياتى ليك إنت

خيخة
لأ إتغاظى على قد ما تقدرى مش هقدر أمنكع و لا الوم
أنا متغاظلى سلف ...
بس هوه النصيب
و الغباء المستحكم برضو مش هنكر يعنى
بس الحمد لله على كل شىء
المميزات دى مكنتش شايفها بوضوح فى حياة بابا ...
كانت المشاكل و العصبية و التوتر و الإنشغال مغطى عليها
لكن بعد ذهاب كل ذلك إنجلت الصورة و وضحت و شفتها بحقيقى مش متغلوشة
الله يرحمه و يحسن اليه و يحسن لموتانا جميعاً
و ميرسى على الغنوة سمعتها زمان و عيطت طبعاً هوه إهو أنا أقدر معيطش ؟؟
بوسيلى شريف قوى

momken
كلمة عضم فى قفة دى ماما قالتهالى ...
لما كان بابا فى حالة صحية سيئة كنت بقولها الواحد بيدعيله لو الموت راحة يختاره ربنا عنده ...
كانت بتقولى بس متقوليش كدا ...دا لو عضم فى قفة و محطوط على سريره أهو ساتر عننا بلاوى ...
يظهر أن دى حكمة حقيقة و متجربة و إحنا منعرفش ....
ربنا يغفر لموتانا جميعاً
و تحياتى الخالصة يا ممكن

mayada
يا قاف ميم ربنا ما يحرمنى من حنية قلبك و دعواتك الجلوة
سلامى الحار لحماة إبنى ست الكل
و للقمر الصغننة يا عمتو

همس الأحباب
البركة فى ربنا و فى الاحباب كلهم راحلين او على قيد الحياة
كل واحد فيهم بيخلق فيا شىء و يسيبه يكبر فى قلبى
متحرمشى منك يا خالد و سلامى لهمس و مامتها و لبابا أبو خالد لو كنت بتكلمه

الطائر الحزين
آه يا إيهاب
أنت جبت الكلمة الصح
معنى الفقد و الحنين
أنا عايشة طول الوقت فى حنين لا ينفذ لكل ما كان جميل فى حياتى
دمت بكل الخير و الود

محمد مفيد
منور يا أستاذ مفيد
و شكراً على الأشادة
بفرح بزيارتك جدا متتصورش قد إيه
نورت قوى

قهوة بالفانيليا - شيماء على
نورتى يا سيماء
و إنتى اللى جميلة قوى قوى
معلش مقصرة معاكى شويتين بس الظروف بقى ...
ميرسى يا حبيبتى على سؤالك عن يوسف
أتمنى يكون بخير
و أتمنى أنتى كمان تكونى دايما فى خير
تحياتى ليكى من قلبى

ahmed-k
سلا جوافة
يلا فروالة المهم أن فيه سلامات و خلاص
إنت غردقى المنشأ بقى دنا فكراك بتشتغل هناك مؤقتا و لا حاجة ...
أنا كمان كنت بحب السادات قوى ..رغم إنى كنت صغيرة قوى وقتها بس كنت بحب أشوفه و هوه بيتكلم فى الخطب بتاعته و أسلوبه كان مميز ...و بعدين كان بيطلع بابا جنبه فى التلفزيون ...
يعنى كنت مفهمة العيال فى الفصل إن أبويا راجل بيقف جنب الريس
شوف إنت بقى !!
تحياتى ليك يا صاحب اطيب دردشة

mohamed
أستاذ محمد
دايما كدا رافع معنوياتى و مدينى برستيجى
متشكرة قوى على رأيك فيا
بس اللى بيسعدنى فعلاً رأيك فى المدونة نفسها و ما تحويه من أفكار و كتابات
ساعات بحس أن اللى بكتبه مبيهمش حد غيرى و بقلق لأكون تقيلة على اللى بيحبونى و مضطرين يتحملوا سخافاتى تأدباً منهم
و ساعات تانية بحس إن لأ ... اللى بكتبه دا واقع ممكن واحدة غيرى تكون عايشه و مكسوفة تكتبه او خايفة حد ينظر لها نظرة عتاب أو شفقة أو إستنكار ...

بس أنا بحس أنى بكتب جزء منى ممكن زى ما ينفعنى ينفع غيرى
أتمنى اكون دايما عند حسن ظنك
و ظنكم جميعاً
تحياتى ليك من قلب قلبى

a long disyanc
و تعيش و يطول فى عمرك يا مستر جى كيلر
أشكرك على الدعوة الطيبة يا عزيزى

رئيسة حزب الأحلام
صحيح يا لولى دا بيحصل كتير قوى قوى
أتمنى الزمن يعلمنا نعرف قيمة اللى فى إيدنا قبل ما يروح
تحياتى يا حبيبتى ليكى و لسحورة و لسالى

حنين القلب
يا حنونتى متحرمشى من الدعوات الحلوة دى
و الموت نصيب
و الجواز نصيب أنا بقول لروحى كل ما آجى أبستفها فى الحكاية دى عشان أهدى
بوسة على خدك يا جنية البحر

أحسن تستاهل
ميرسى يا مهاميهو
بس كلمة فى سرك
كن جميلاً ترى الوجود جميلاً
إنتى شايفة كلامى جميل
عشان إنتى أنسانة جميلة قوى
تحياتى يا حبيبتى

عاليا حليم
منورة يا عاليا
المدونة كلها نورت
عبارتك دى ليها مغزى كبير بيقولى غنك حسيتى الكلام قوى قوى ...
مش هضغط و أقولك السبب إيه بس اتمنى حساسيتك المفرطة دى تخف شوية لأنى بحسك بتتعبى قوى فى تعاملاتك مع الناس بسببها
بس هيا نعمة مش عند أى حد و ربنا يديمها عليكى مع تقليل الخساير
تحياتى ليكى يا صاحبة العندليبيات

مواطن مصرى نايم
أزيك يا إسلام
يا سيدى ربنا يمد فى عمر الوالد و عقبال ما يجوز ولادك يا رب
إنت من الناس اللى بتزهق من البوستات الطويلة ؟؟؟
يبقى هتتعب قوى معايا يا إسلام
شكلك بتنام فى نص الفيلم
يو
نسيت منت مواطن نايم
طب إبقى صحصح كدا معايا دايما
تحياتى يا عزيزى

rehab mostafa
طولة العمر لولداك يا رب
لكى أن تفخرى بيه أيما فخر لأنه حارب و دافع عنا كلنا ....
ميرسى يا حبيبتى على الدعوات ليا و لبابا و ليوسف
بوسة على خدك يا حبيبتى

hannoda
كل كلامك حلو يا قمرايتى الإسكندرانية
أكتر حاجة عجبتنى لما قولتى إنك بترتاحى هنا ...
أنا مبسوطة قوى بكلامك دا
و مبسوطة أكتر لأن المتشابهات بينا بتزيد مرة عن مرة
دمتى بكل الحب اللى فى الدنيا يا هنودة
و ترجعى بألف سلامة يا حبيبتى

بنوتة مصرية
رودى معلش يا حبيبتى أنا أسفة قوى مكنتش عارفة المعاد
أنا كتبت البوست لأنى الأيام دى حاسة بالحنين لبابا قوى و حاسة أنى عاوزة اكتب عنه كتير و أوقل حاجات كتير و يمكن لأنى كنت فى زنقة و أفتقدت وجوده
و ساعات الواحد بيرتاح بالكلام عن السكوت ....
ربنا يرحم والدك الغالى و يسكنه فسيح جناته و حسناته تكبر و تكتر بدعواتك الطيبة ليه
بوسيلى نور القمر و سلامى للباشمهندس خالد

geo amr
اهلا بيك يا عمرو
نورت المدونة
و شكراً ليك على دعواتك الطيبة لوالدى
دمت بكل الخير و نورت

رندا
و كل الحب ليكى يا جميلة القلوب
و ربنا يستجيب و يسمع دعواتك الطيبة
أتمنى أن يكون راضى عنى بجد
و لو حاسس بيا يبقى شايفنى و مبسوط منى لأنى بقيت بحاول أكتب زيه و بقيت عاوزة أعيش فى جلبابه و بيجامته كمان
و لا يوم من أيامه
دمتى بكل الحب و الخير يا حبيبتى

!!!!!!!! طب انا دلوقتى عاوز اعيط

السلام عليكم
ورحمة الله تعالى وبركاته
اللهم اغفر للمسلمين والمسلمات
والمؤمنين والمؤمنات الاحياء منهم
والاموات انك سميع عليم مجيب الدعوات
الله يافاطيما كلامك حلو وطالعمن القلب
وعلشان كده بيدخل على القلب على طول
عارفة انا برضة والدى او والدتى ماكان عندهم كلام احبك والحاجات دى لكن كنا كلناعارفين ومتأكديين من حبهم
ده وده سر قدرتهم على ايصال حبهم بدون كلام.
تحياتى ليكى ودعواتى كمان بأن يريح الله قلبك ويهدى نفسك ويردلك الغايب
بالسلامة إن شاء الله أنه على كل شىء قدير

حمد لله على السلامة يا فاتيما
وبشكرك جدا على إنك فاكرانى
أنا لسة شايفة البوست ده
ومش عارفة اقولك اية غير ربنا يديم المودة ....شكرا على البوست والصورة بس للأسف ملحقتش اسمع الاغنية

أنا مثلك عرفت أبى أكثر من المحتكين به فى مجال العمل وعرفت قيمته أكتر وأكتر

وأنا كمان زيك مش حاسة إن والدى مش موجود لأن كل حاجة هو موجود فيها
تعليمه لى تربيته ليا علاجى اللى صرف عليه كتير وتعب معايا فيه قوى ...وعربيتى....واللى كان اخر مشوار معايا فيه عمل الرخصة بتاعتى
ربنا يرحم والدى ووالدك رحمة واسعة ويرزقنا الصلاح حتى يتقبل دعائنا

MOHAMED HAMDI
ليه بس يا محمد كدا ؟؟
مش عارفة أقولك إيه غير أنك شخص حساس
و بشكرك على شعورك الجميل
تحياتى ليك و نورت المدونة

NORHANTY
طب ليه يا نورهانتى ميبقاش الطريقتين
ليه منحبش عيالنا قولاً و فعلاً
ساعات الومقف يبقى محتاج الكلمة بس
و ساعات يبقى محتاج الموقف
و ساعات الأتنين سوا ...
ربنا يقدرنى بس و أبقى نص بابا فى عطائه و حمايته اللى مش عارفة كان جايبها أزاى ؟؟
و ربنا يرحم موتانا جميعاً
تحياتى يا حبيبتى

د. أيمان فوزى
معلش يا إيمو أنا اللى مسربعة شوية
الغنوة كانت لعلاء عبدالخالق إسمها
إيدى بتدور على إيدك
http://www.mawaly.com/file/play/25601.html

ممكن حد يقول إنى بزودها عليكى ...لكن الحقيقة إنك من الناس اللى بيحبوا يكثفوا مشاعرهم فى اللحظة مش يهربوا منها ...
تغريد حكتلى كتير عن والدلك الله يرحمه و قالتلى الكلام اللى إنتى قولتيه من أنه كان بيساندك فى كل خطوة و هيا شخصياً كانت معجبة جدا بوالدك و إنه والد إستثنائى و كل حاجة تفيدك مكنش يتاخر فيها و يجيبلك عربية توديكى هنا و هنا عشان متفرقيش عن زميلاتك همسة واحدة ....
أنا كمان اعجبت بيه جدا ...لأانه بيجسد معنى العطاء الحقيقى ...و أنا على يقين بأن ربنا كأفه على كونه والد عظيم و رباكى يا إيمان
و إنتى كمان رديتيلو العطاء بما يليق يا دكتورة إيمان فوزى ...
تحياتى يا حبيبة قلبى
و ربنا يحسن للوالد بحسك إنتى ف الدنيا

قريتلك كتير
كتير قوي يعني
بس مش عارفه مكنتش بعلق ليه
كتير بوستات هزتني
حبك ليوسف وتعلقك بيه كتير كنت بقف عنده وادعيلك
بس البوست ده مختلف قوووووووووووووووووي
بكيت قوي قوي قوي
حسيته حسيته والله العظيم حاسه ان محدش حس بيه قدي
أنا حاسه اني اللي بتكلم فيه بجد
ربنا يرحم والدك ووالدي
ويباركلك في يوسف ومايفارقش حضنك أبدا

كل شي يجنن بمدونتك يعني روووووووعه بس انا كمان عندي مدونه وبجد محتاجه مساعدتك فيها اتمنى تساعديني فيها

إرسال تعليق