.

.

قوى قوى قوى  

Posted by: فاتيما in

فلاش باك لورا
سنة كاملة
نفس المعاد تقريباً
و نفس المكان
مدرسة خاصة على بعد كام شارع من بيتنا
أنا و ماما و يوسف واقفين عند السكرتيرة
بنحاول ندخل الولد المدرسة
و المحاولات فاشلة بجدارة
و السبب ؟؟
إنتو إتإخرتوا قوى و فين أبوه ؟
بعد وصلة بكاء منى و طبطبة من يوسف
و محاولات عنترية من ماما لمقابلة صاحب المدرسة اللى هوه المدير كمان
خرجنا نجرجر أذيال الخيبة بعد ما رفض يقابلنا
و بعد ما أستشعر بخبرته أن الولد دا عنده مشاكل و هما مبيحبوش كده
الحمدلله ربنا سهللها و يوسف دخل مدرسة تانية
بس بعد ما اجبرت أنى ارجعه لوالده و إلا هتبقى ورطة أكبر و ملهاش حل
الفلاش باك .. خلص
كلوز أب
بقى على نفس المكان
النهاردة و بعد مرور سنة كاملة و يوسف مبقاش معايا
أنا و فى إيدى ملف فيه اوراقى واقفة عند السكرتيرة ( واحدة جديدة خالص ) و بسأل
عندكم وظيفة خالية ؟
مؤهلك إيه؟
مكتبات
عندنا أمينة مكتبة فعلأ .. بس عاوزين مدرسة رسم .. بتعرفى ترسمى ؟
يعنى .. بحب الرسم و خدت فيه 18 من عشرين فى الثانوية العامة
طب خدى الكرت دا و كبريهولى و هنشوف المستوى إيه
خرجت أشترى قلم رصاص و أستيكة و براية و مسطرة و رجعت
قعدت فى ركن أرسم و احاول اركز
خلصت الرسمة و أديتهالها
ثوانى أدخلها للمدير و أرجعلك ..هاتى السى فى بتاعك
بعد دقيقة ندهتلى عشان المدير( صاحب المدرسة إياه ) عاوز يشوفنى
رجل كبير عدى السبعين بيبصلى بتركيز فباغته بالتحية
سلامو عليكو
أهلاً .. إنتى خريجة إيه ؟
آداب يا فندم قسم مكتبات
مم ..كويس ...أسمك إيه ؟
فاطمة
لأ.. هنببقى نندهك بطة
اللى حضرتك تشوفه ما حضرتك فى مقام والدى طبعاً
طب إحنا هنشوف شغلك مؤقتاً فى الرسم و بعدين نبقى نمسكك المكتبة
ربنا يسهل و حضرتك هتشوف شغل بإذن الله يرضيك
طيب ..أهلا و سهلاً بيكى
خرجت من عنده و السكرتيرة بتهمسلى
على فكرة ..إستلطفك و دا مبيحصلش كتير
ربنا يستر لأنى أسمع إنه صعب شوية ( طبعا مقولتش أزاى )
لأ مش مع الكل ..مع الناس الكسلانة بس هوه اللى يهمه الشغل و الجدية
لأ متقلقيش أنا مستعدة ليهم قوى
فى أقل من نص ساعة
كنت ماضية إستلام عمل و أسمى بقى فى كشف الحضور و ألانصراف
و خدت جدول الحصص و دخلت أخر حصتين
العيال !!
يجننوا على كل المستويات
فى خامسة إبتدائى
أشقيا قوى ... بس لطاف
رسمتلهم بليتشاو على السبورة و قلتلهم يرسموا زيه
و يلونوه
و يسموه بإسم يعجبهم
الى سمى مهرجه دقدق و كيمو و زوزو و ننس ... و أسامى عجب
يا خرابى على العيال و براءتهم
لو كل الشغل هيبقى كدا أبقى أنا بحلم و محدش يا ريت يصحينى
المدرسة قرب البيت يعنى مفيش بهدلة فى المواصلات و الحمدلله
و الاجازة جمعة و سبت زى ما تمنيت
بتمنى ربنا يرضى عنى اكتر و ميحصلش حاجة تبوظ فرحتى دى
أقولكم حاجة و متضحكوش عليا
يتهيألى يوسف كان قاعد وسط العيال النهاردة و بيرسم المهرج زيهم
و بيلونه بسرعة و جاى بفرحة يفرجهولى و يقولى
حلو يا ميس
أنا بحسد مدرسينه و زمايله و التختة اللى قاعد عليها
اكيد شقى و مجنن المدرسة بتاعته
بس شقاوته لذيذة زى الولاد اللى شفتهم النهاردة
عايزة اقولكم إيه ..إيه
ياااااه
كلام كتير و مش هيوفيكم حقكم
عشان دعتولى بذمة و ربنا إستجاب
ربنا ما يحرمنى من دفا قلوبكم
و حد مميز عارف نفسه قالى على وصفة يبدو إنها سحرية فعلاً
و جابت نتيجة .. ربنا يخليك ليا يا أنس
عايزة أطمنكم إن كل الطبطبات بتاعتكم مبتروحش هدر و فى محلها
أما أنا ...فأنا خجلانة
من كرم مشاعركم
بس فرحانة عشان إشتغلت ...هبقى ليا لازمة و لوقتى معنى
و لما أشوف يوسف هقوله ..ماما أشتغلت يا روح ماما
و حاسة إنكم هتفرحولى ... يمكن اكتر منى
خايفة أفرح قوى ..بس و ماله
هفرح و مش هخاف
و هفرح قوى
حاجة كمان قوى
بحبكم
قوى
قوى
قوى
الحمدلله
الحمدلله
الحمدلله
ألف حمد و ألف شكر

This entry was posted on الخميس, ديسمبر 18, 2008 and is filed under . You can leave a response and follow any responses to this entry through the .

108 كــــلام بيطــبطـــب عـــلى قــــلبى و روحــــى

ماشاء الله ماشاء الله
الف الف مبروك
إن مع العسر يسر
إن الله مع الصابرين

ربنا يوفقك في العمل وتثبتي كفائتك في فترة قصيرة ان شاء الله

الف مبروك ياحبيبتى:)
شوفتى بقى ربنا كبير وكريم ازاى
يارب نباركلك قريب على رجوع يوسف

bgd ana mbsouta 3shanik awy ya fatima
rbna ysbt akdamik feha we yg3lha fat7et 5er 3aliky we yft7ha 3liky fe ay 7ga bt3mliha fe 7yatk isa :)

مبرووووووك يا ماما فاطمة
يارتني ارجع بمريله كحلي تاني على راي عمنا منير واجي اقعدلك في اول تخته وامسك السنبورة على راي عمنا سعيد صالح
واتشاقى مع الاولاد دي
على فكره رسمي حلو انا كمان
:)
وعاوزه نجمه في الكراسه لا تلت نجوم جنب بعض بالقلم الاحمر
ربنا يسعدك دايما يارب
ويوفقك في شغلك ويردلك يوسف في اقرب وقت
فرحتيني يا ماما

فاتيما

انا زعلانه اوي اوي منك والله

بس قبل العتاب

الف مليون مبروك الشغل يا احلي فاتيما في الدنيا

بعد كده
كده يا طماطم انا مرضتش اروح عيد ميلاد اابي عشان قولتي مش جايه وادور عليكي الاقيكي روحتي
والله زعلانه جدا وبعيط اهه عااااا
صالحيني بقي
بس والله العظيم كان نفسي اشوفك
وعموما انا خلاص مش زعلانه
عشان فرحتيني والله فرحه بجد
وانا مستنيه اهه اقرب تجمع عشان اشوفك
ربنا يفرح قلبك كمان وكمان يا جميله
سلام

بطه
انا تراجعت عن اعتزالى التعليق فى المدونات عشان بس اقولك الف مبروك
ربنا يجعله خير ليكي و ييسرلك امورك و تحسني عملك و تُجيديه و تكونى عند حسن ظن رب العمل بيكي و تثبتي نفسك لنفسك وللي حواليكي يااااارب
يارب يجعلها بدايه الافراح والحاجات الحلوه فى حياتك يارب
صدقيني عن ثقة و تجربة الشغل بيفرق كتير اوي اوي و بيهون كتير و بيدينا قدرة علي الاستمرار

عنيا تكاد تكون دمعت
ألف مليون مبروك
يااااااا رب يكرمك و يثبتك في الوظيفة و يعليكي فيها و يعزك

انتي تستاهلي تفرحي والله

الف مبروك يا قمر

يا رب تقابلي يوسف بسرعة و تقوليله
و يا رب يوسف كمان يرجعلك زي ما اتمنيتي تشتغلي و اشتغلتي

ربنا يكرمك و يفتح عليكِ يا رب

سلام عليكِ

اة صحيح

لو كنت قاعدة معاهم كنت هرسم بلياتشو و اسمية ( كَعبَر) :D

الف مبروك يا حبيبتى وربنا يريح قلبك بضم يوسف وزيارة النبى كمان
انا مبسوطالك اوى يا فاتيماولا اقولك يا بطة هههههههههههه
ربنا يهنيكى ويحققلك امانيكى كووووووووووووولها كلها امين يارب العالمين
اصبرى شوية كمان وهتلاقى الدنيا احلوت اوى ماهى لازم تحلو علشان ربنا جميل
كل الامنيات الحلوة ليكى يا ام يوسف

طبعا انا مبسوطة جدا انك اشتغلتي و لاقيتي فعلا نفسك

اول خبر عدل اسمعه النهاردة الحمد لله

بكره تروق و تحلي :)
و كويس ان الاجازة جمعة و سبت

الا قوليلي صحيح هو انتي سيبتي الحضانة ولا ايه
؟؟؟؟

الف مليون مبروك
وعقبال اول مرتب
وربنا يكرمك ان شاء الله
ممكن اجى الفصل يا ميس
بس بدون ضرب ولا شخط
والله هتبقى ميس 100%
يا بخت التلاميذ بيكى
تحياتى وبالتوفيق دائما

ياااااه :)
بجد فرحت أوي أوي أوي يا تمتومة ليكي

يارب دايما تبقي كدة و ترتاحي

فكرتيني بأيامي مع الأطفال:)...أصلا بقالي فترة قاعدة بفكر أرجع للتدريس تاني بس مش عارفة آخد قراري الحمدلله

صدقيني إن شاء الله هتتبسطي أوي أوي معاهم. الأطفال فعلا بيحسسوكي إنك في حلم، و لو الإدارة كويسة وبقية الناس اللي حواليكي كويسين يبقى إن شاء الله هتفضلي عايشة الحلم دة علطول
:)))))
بجد فرحانة فرحانة أوي ليكي
ربنا يريح قلبك دايما ويسعدك يا توما..و لعلمك العيال هيموتوا فيكي عشان انت حنينة أوي بجد
مبروك مقدما..و ربنا يديم عليكي نعمه كلهاويقربلك البعيد

مبروك يا ميس بطة
:D:D:D:D
وان شاء الله ايامك كلها تبقي حلوة

الف مليون ديشليون مبروك ليكي فرحة قلبك بالوظيفة و عقبال يا رب ما ربنا يكملك فرحتك بابنك يا رب و يجمعكم علي خير يااااارب


تصدقي رغم فرحتي بيكي
و رغم ان البوست شكلك فيه مبسوطة اوي(ربنا يديمها عليكي)


الا اني عيطت من قلبي لما بتقولي كنت حاسة ان يوسف كان بيرسم مع الاولاد و جه يوريني الرسم
و انك بتحسدي مدرسينه و مكتبه و فصله عليه


ربنا يقر عينك بيه يااارب
و يجمعك به زي ما جمع سيدنا يوسف بأبوه يعقوب
يااااارب


مبروك الشغل يا جميل

الف مبروك
ويارب تبقي فاتحة خير عليكي ويوفقك
وكل حاجة بتيجي بس ربنا اللي بيحدد المعاد

وبرده ربنا محدد معاد رجوع ابنك لحضنك تاني
كرم ربنا مفيش اكبر منه

تحياتي

ايه ده
هو دعوات الحج بتاعتي اشتغلت بسرعة و لا ايه ؟
و لسه ان شاء الله الجاي اجمل و احسن
ربنا يكرمك يا فاطمة و يقر عينك بيوسف
و الف دشليار مبروك
:)

اولا الف مبروك ع الشغل الجديد وربنا يطمنك على يوسف دايما ويرجعهولك بالسلامه..

جعلونى مريضاً نفسياً
الله يبارك فيك يا هشام
كلك ذوق و شياكة منك قوى تفرحلى مع إننا لسه بنتعرف يا دوب ...
أشكرك من قلبى
و عقبالك يا عم

موناليزا
يا حبيبتى ربنا يخليكى ليا
دعواتك الحلوة إنتى و كل الاحباب سندانى
قوى
قوى
بتمنى أردلك و لو ربع دا
تحياتى و حبى يا مون مون

Z_DIVA
ميرسى يا ديفا
عارفة إنك دايما بتيجى تتطمنى عليا و أتمنى اكون دايما زى ما بتحبى تشوفينى ...
ربنا يسمع منك يا حبيبتى
و بتمنالك كل الخير اللى ف الدنيا انا كمان

لماضة
يا طعامة يا حبيبة ماما
المريلة مش كحلى يا قمر دى رمادى
و بعدين تعالى هنا
يا بنوتة
هتتشاقى فى زمنك و زمن غيرك
شدى حيلك و هاتى لنا عيالك و أنا أرسم معاهم و نلعب كلنا سوا
و عشر نجوم يا حبيبتى عشان خاطرك ..بس مش فى عز الضهر ..
متحرمشى منك يا حبيبة قلبى

يوميات فنانة مفروسة جداا
ياسميناااااااا
يا حبيبتى حقك عليا
أنا لآخر يوم مكنتش عارفة إنى جاية
بس ملحوقة
يوم التبرع بالدم الجى فى أول أسبوع فى مارس ...إعملى حسابك من دلوقتى
متعيطيش يا قطتى حقك عليا
بوسة على خدك و حضونة
و الله يبارك فى عمرك يا حبيبتى
سلامى لماما العزيزة

NSREEN BSUNEE
الله يبارك فيكى يا نسرينا
و الأعتزال دا ملوش رجعة ؟!!
وحشتينا و إبتديت اكره الورد برس لأنك روحتى هناك و قولتى عدولى ...
ربنا يروق بالك يا رب
و تعودى يا حبيبتى
و هقرب اختفى خجلاً من حركة الشياكة دى و سعيدة بيها قوى
قوى
قوى

نعكشة
تسلم عنيكى يا نعكوشة
ميرسى يا حبيبتى على مشاعرك و الدعوة الحلوة ...
صديقة ليا قاللتى مش جايز تكون السنين العجاف أوشكت على الإنتهاء خلاص ...
ربنا يسمع منك و منها
و كعبر دا هايل ...و هحطلك 3 ستيكرز على شكل نجمة
نجمة احمريكا
و نجمة أصفريكا
و نجمة اخضريكا
و كلهم ألوان فسفورية عشان ينوروا فى الضلمة و كعبر يمشى من غير ما يتكعبر على وشه

DREEM
الله يبارك فيكى يا حبيبتى
وشك حلو عليا
كنتى أول تعليق المرة اللى فاتت و إديتنى إحساس كدا ن الحكاية ممكن تبقى ممكنة و ليه لأ
ضم يوسف و زيارة النبى ؟!!
تبقى الدنيا مفيش بعد كدا و مش عاوزة حاجة تانية تريح قلبى
مع إنه طمع شوية بس مشروع ..مش كدا
متحرمشى منك و لا من دعواتك
مش بقولك وشك حلو

شمس الدين
شموسة
إنت فين يا جميل غطسانة ...
أنا مسبتش الحضانة لأنى مشتغلتش فيها أصلاً ...
نصيب
ربنا كان كاتبلى مكان تانى اجمل أهو
و حكاية الاجازة دى متصدقيش مفرحانى اد إيه ..
لأن اجازاتى هتكون نفس اجازات يوسف
عشان يلاقينى لو جه يزورنى و كمان لما يرجعلى أكون معاه علطول ...
متحرمشى منك يا شموستى
و شدى حيلك و أرجعيلنا ببوست حلو من بتوعك
تحياتى و حبى

بجد بجد الف مبروك والله فرحتلك من قلبي واكيد انتي تستاهلي اكتر من كده واكيد برضه يوسف فخور بيكي دلوقتي وطبعا مش تنسي بقى تحكلنا عن مغامراتك المدرسية في الموضوع ده علشان انا بحب الحكاوي دي قوي

وربنا يصبرك على بعد يوسف ويقر عينك بيه يارب

تحياتي

همس الاحباب
الله يبارك فيك يا خالود
و تعالى اهلاً و سهلاً تنور
بس و إنت جاى هات العصايا من الفصل اللى جنبينا عشان أنت اول واحد هتنضرب بيها ...
مجبتش كراسة الرسم ليه يا أستاذ ..
نسيتها ؟!!
نسيت تاكل
نسيت تشرب
نسيت تطلب مصروفك و تجيب حاجة حلوة
أشمعنى الكراسة نسيتها
و كمان الألوان !!!
طييييييب
أما أشوف همس هشتيكلها
متحرمشى منك يا خالد
تحياتى الخالصة يا اخى العزيز

WISH i WERE A BUTTERFLY
هبهوبة يا فراشة رقيقة
ميرسى يا حبيبتى على كل دا
أنا أصلاً كانت أعد اوقاتى فى شغلى القديم أيام مهرجان القراءة للجميع
كنت جايبة كاسيت من البيت و بنشغل أغنى و نقعد نرسمو نلون و نعمل أشكال بالصلصال و اعمال بالخرز و عيشة ...
كانت اجمل أيام ..
تحسى إنك بتعيشى طفولتك مع كم براءة لا حدود له
و تتفاجى بكم الجمال و الذكاء اللى فى العيال و اد إيه بيحسوا بيكى ن غير حتى ما تقولى فيكى إيه ...
ملاحظاتك ذكية يا هبة ..
الادارة ليها دور كبير أنهم يسيبوكى تشتغلى و تحلقى مع الطيور الحلوة دى فى البراح ...
أتمنى يبقى حظى معاهم حلو
تعيشيلى يا حبيبتى
يا من غير ما توشى ..بترفلاية رقيقة صغننة

T3BAN
الله يبارك فيك يا سيدى
بس الحصةالجاية تجيب معاك علبة الألوان بتاعتك عشان متقعدش تستلف من اللى جنبك
هاه
أشكرك من قلبى
بجد

MONY
الله يبارك فى عمرك
و فى عبدالله و رودينا
و فى أبوهم
يا رب
متحرمشى منك يا حبيبتى أبداً
و سلامة قلبك ..بس أصلى عشت الموقف دا عشرات المرات مع يوسف ...
تعرفى المهرج اللى رسمته انهاردة دا
كنت شوفته فى برنامج اطفال أسمه دادى و دانى ...عبارة عن شخصية ولد و باباه و بيرسموا سوا كل حلقة حاجة جديدة ...
كنا مسميناه يوسف و ماما كدا مع نفسنا يعنى
أنا و يوسف رسمنا سوا المهرج دا بعد ما شوفنا الحلقة مع بعض ...
النهاردة و أنا برسم على السبورة إفتكرته و إبتسمت بينى و بين نفسى
أول حاجة أعملها فى شغلى كانت برضو تخصه و مرتبطة بشكل ما بيه
عمرك شفتى طفل جميل كدا
إبنى يوسف كدا
و عبدالله و رودينا كدا
و كل اطفال الدنيا يستاهلوا كل الحب اللى فى الكون
قلبك وجعك عشان إنتى قلبك رقيق و ام بجد مش مجرد كلمة و بس
ممكن بقى تبوسيلى القطتين بتوعك
و متحرمشى من طلتك عليا أبداً يا مونى

KOCHIA
الله يبارك فيكى يا كوشكش
ربنا مفيش اكرم منه بجد
تعرفى إنى مكسوفة من نفسى قوى قدامه
حاسة إنى طماعة قوى و مستعجلة
بس هو عالم بأنى كن وصلت لدرجة صعبة قوى و كنت على الآخر ...
بس أراد ميخذلنيش
و يخذل كل القلوب الحلوة اللى حواليا دى
تحياتى و حبى يا حبيبتى

مبروك على فرصة العمل

وفقكم الله الى ما فيه خيري الدنيا والاخرة

مهندس مصرى
يا محمد ربنا يكرمك يا رب
إنت النوبةدى متوصى بيا جامد قوى
طبعاً مش أنا زى اختك و يوسف دا زى أبن اختك برضو
أنا بحس بكدا معاك و مع كل اللى بيجي هنا و يدعيلى من قلبه مع إنه مش ملزم بدا و لا مضطر له
ربنا يخليك يا محمد و يطمنا دايما عليك
تحياتى يا أجدع مهندس مصرى
و ألف ديشليار يبارك فيك

مسدس صغير
أولاً
اهلا بيك و نورت
ثانياً أشكرك من كل قلبى على دعواتك الطيبة
و تحياتى الخالصة ليك

HERO
الله يبارك فيك يا بطل
تفتكر يوسف هيحس بكدا
بصراحة بتمنى و لو إنها قد تبدو شغلانة تقليدية عادية لكن بالنسبالى مش هتبقى كدا بأذن الله ...
أما عن الحكاوى فمتقلقش يا هيرو
لو لقيت حاجة و غالباً هلاقى هقول علطوووول إنتو عارفينى مبيتبلشى فى بوقىقى حدوتة و لا ممكن أعز عليكم حاجة
دعواتى و تحياتى ليك

أحمد سعيد بسيونى
الله يبارك فيك يا احمد
و شكراً على المشاعر الطيبة دى
تحياتى و تقديرى

مبرووووووووووووووووووووووووووووووووووك
مبرووووووووووووووووووووووووووووووووووك
مبرووووووووووووووووووووووووووووووووووك
مبرووووووووووووووووووووووووووووووووووك
مبرووووووووووووووووووووووووووووووووووك
مبرووووووووووووووووووووووووووووووووووك

ما شاء الله و لا قوة إلا بالله

مبروك يا طمطم
فرحانلك قوي قوي قوي بجد بجد بجد
يا رب اجعلها أول حلقة في مسلسل فرحة قلب فاتيما

و الله يا طمطم أنا كنت عاوز أسألك عن موضوع دار الفتيات الأيتام إياه
بس خفت ليكون ماكملش فأفكرك فتزعلي
بس خلاص الحمد لله
يا خراشي يا طمطم
أما لو كان موضوع زي ده تم و ما عرفتش
ده أنا كنت زعلت منك زعل
يلا الحمد لله
مبروك يا طمطوم يا أختي
مبروك يا غالية
ربنا يتمم فرحتك يا رب



يلا سلام

الف مليووووووووووووووووووووون مبروك ياطمطم ياجميلة

والله انتى تستاهلي كل خير ياحبيبتى
ربنا يكرمك فيها يارب
ويبقى وشها حلو عليكى
ويرد الله لك يوسف مردا جميلا
وتشوفيه وهوه بيدوشك مع العيال العسل اللى معاكى ياااااااااااارب

سلام ياقمراية

برافو عليكى يا فاتيما
الف مبروك الشغل
ان شاء الله هتنبسطى فيه و يوسف يرجع
و كل حاجه تبقى عال

مبروك
مبسوطه اوي عشانك رغم البرد والكسل قلت لازم اخد تاكس واجي اقولك مبروك
:))

الحمد لله
ماشاء الله يا فاتيما يا أم يوسف يا جميله
ربنا يريحك قلبك وبالك ويفرحك دايماً يارب من قلبي ربنا يعلم
ربنا يكرمك يارب

حبيـــــــــــــــبى
ألف مبرووووووووووووووووووووووووووك
عقبال يارب ما اباركلك برجوع يوسف ياااااااارب

طب تصدقى بقى انا لسه داعيالك امبارح وانا واقفة بغسل الاطباق ..
والحوض والحنفية والمطبخ يشهدوا عليا
هههههههههههههههههههههه

يااااااااارب دايما فرحانة يا حبيبتى
ربنا يفرحك كمان وكمان وكمان ياااااارب

مش قلتلك ان بعد العسر يسرا
ولسه ان شاء الله الجاى أحلى وأحلى وأحلى
بس خليلكى مع ربنا ودايما قولى ياااااااارب

سالى المبسوطة جداااااااا عشانك

ربنا يسعدك و يسعد ايامك و يارب كلام صاحبتك يكون صح

انا عايزة نجمة احطها علي اورطي :D

سلام عليكِ

الف مبروك يافاتيما
ويجعلها يارب فاتحة خير عليكي ويرزقك بالحلال يارب

ولو احتجتي اي حاجه في حوارات الرسم وانك تشغلي العيال صبيان نقاشة معايا انا ماعنديش مانع
وهابقى اعينك ملاحظ انفار قد الدنيا
واهو منها العيال يتعلمو حاجه جديده تفيدهم في الايام اللي جايه



سلامي لمامتك وبوسيلي ايدها






سلامووووووووووووووز

فرحانة قوي يا فاتيما



ألف مبروك ويااارب تتثبتي وتملي مكانك
حاولي تقري عن الرسم كتير و تدوري في النت على رسومات الاطفال و أسس تعليمها

أنا متأكدة ان ده حايملى وقتك أكتر و حايفرحك أكتر و أكتر عشان عارفاكي بتحبي تعملي الحاجة على أصولها

يابخت الاطفال الللي حاتدرسيهم
متخيلة جرعة الحنية و الاهتمام والضمير اللي حاتدرسيلهم بيه

يابخت طل تلميذ تعامله مدرسته زي ابنها وتعمل معاه اللي بتتمنى تعمله مع ابنها

رااااب يكرمك و يسعدك بكل اللي بتعمليه و يجعل عملك ده فيه فايدة لكل حد فيهم بتدرسيه و تعلمي فاكرته طول عمره و لحد مايتجوز و يخلف و يقعد مع اولاده وهم بيرسموا و يقولهم أنا كان عندي ميس اسمها فاتيما علمتني أرسم كدا

مش ملاحظة حاجة.. المدير ارتاحلك و السكرتيرة كمان

ياااارب يحبب فيكي خلق ربنا كلهم كلهم عشان انت تستاهلي كده وأكتر
مش ملاحظة حاجة كمان

ان فوسط فرحتك حطتينا كلنا كلنا سبب لفرحتك ده - بعد فضل ربنا سبحانه و تعالى طبعا- رغم ان مش احنا السبب ولا حاجة
كله جاي من جواكي انت يا فاتيما .. قلبك اللي مليان حنان و خير و بساطة و حب هو اللي بيفتح قدامك السكك وبيخليكي تستحقي فضل ربنا عليكي

بحبك قوي
وفرحانة معاكي قوي
وعقبال الفرحة الكبيرة ياااارب

يااارب

والله بنفرح دايما لفرح اخوانا واخواتنا المدونين ..

مبروك وعقبال ما تكتمل الفرحة بعودة يوسف لحضن امه ..

تحيتي

الف مبروك علي الشغلانه والحمد لله انها قريبه و لذيذه هتاخد من وقتك كتير و هتستمتعي بيها
وان شاءالله قريب يبقي ابنك معاكي في نفس المدرسه :)))


تحياتي

امسكى بباب الخير هذا قدر استطاعتك
الف مبروك
ها هم اشباه يوسف امامك فعليك -همتك معهم كانهم يوسف
لا تقتصرى على الرسم من أن لاخر اعطيهم نصائحك

لوووووووووووووووووووووووووووولي
بجد ا نا فرحانه اخر حاجه والخبر ده
اكتر حاجه خرجتني من اللي انا فيه
كل سنه وانت طيبه يااجمل ام يوسف
والف الف مبروك ياحبيبتي ع الشغل
الجديد يااجمل بطه

مبرووووووووووووووووووووووووك

بجدانتي مشمتخيلةانا فرحتازاي بجد

ربنا يباركلكفي شغلك يارب ويكون بدايةالسعادةليكي انشاء الله

مبروك من قلبي

الف مبروك يا فاتيما
وربنا يوفقك يارب وتبقى اسعد الناس ويرزقك ما تتمنى
على فكرة انا بمر كتير بس نادرا لما بعرف اعلق ومش عارفة السبب منين ؟!!

بجد فرحتينى بشغلك وانا منتظرة الجاتوة ههههههه مش هتعزمينا على جاتوة الشغل ولا اية ؟؟
ربنا يوفقك

الف مبروووووك
لولولوللللللللللللللللللللللى
ربنا يوسع رزقك ويكرمك يارب

مبروك ميس بطة
ربنا يديم عليكى الفرحة ويكملها برجوع يوسف لحضنك يارب

كده الأمل فى زيارتك اسكندرية اقتصرت على الاجازات والعطلات الرسمية يا فاتيما ولا ايه!!؟؟

بسم الله ما شاء الله

ألف ألف مبروك .. خبر بجد مفرح جدا جدا

ربنا يباركلك كمان وكمان وإن شاء الله من أحسن لأحسن

هو سبحانه أعلم بحالنا غني عن سؤالنا .. لكن لازم ندعوه ونحن موقنون بالإجابة والفرج يوما ما

الــــــــــــــــــــــــــف مليون ديشيليون مبروك با بطه
و تكون ميس بطه بدايه مرحله سعيده جديدة ليكى يا بطوط
افرحى ولا يهمك افرحى من كل قلبك
اسعدى برحمه ربنا و فرجه الى بأذن الله هيكمله عليكى بعوده يوسف لحضنك قريب بأذن الله
عجبنى قوى انك خلتيهم يتعلموا حاجة جديدة و كمان يرتبطوا فيها
يا ريتك درستيلى رسم و انا صغيرة كنت اكيد هحبه
ربنا يوفقك يا بطوط يا جميل و نيمع عنك دايما كل خير
بالتوفيق يا قمر مع حبى

لولووووولىىىىىىىىىىىىىىىىىى


الف مليون مبروك يا حبيبه قلبى
والله انا كنت حاسه انه هيكرمك ولسه الفرحه الكبيرة لما يوسف يرجع بالسلامه
عارف يا فطوم والله حسيت انى سمعاكى وانتى بتحكيلى وحسيت انى شايفه الفرحه فى عنيكى والله لقيت عنيه دمعت
ربنا يوفقك
ويحفظك ويكرمك
مووووووووووه وحشتينى اوى خالص

مليون مليون مليون مبروك يا فاتيما ياقمر
بجد فاتيما فرحتينى جدا جدا وفرحت اكتر لانى حسيت بالامل والتفاؤل بين كلماتك وان شاء الله على طول كدا يارب
عقبال ما أبارك لك برجوه يوسف لحضنك يارب وان شاء الله يكون الشغل الجديد والحياة الجديدة فاتحة خير وسعادة عليكى
ريم

على وشى ضحكة مرسومة من اليمين للشمال وف عينيه دموع غالية تستحقيها والله

ربك عالم بالحال
الحمد لله

بالتوفيق يارب

انا مش اتأخرت اهو يا ميس
انا جبت كراسة رسمى وألوانى
هنرسم ايه النهاردة
=======

عارفة

رجعتينا لذكرى أوقات مميزة كلنا بنشتاقلها مووووووت - كل ولد وكل بنت قدامك يوسف غالى صغير - أمانة بين ايديكى - كلهم عليمهم الصدق والحب والحنية والأخلاق الكريمة - تمتلكى يا غالية الكثير من المواهب التى تخترق القلب بسهولة ويسر

انا مش قلقانة عليكى ابدا - انا واثقة ان بقلبك المليان حب وخير هتحتلى كل قلوب اللى حواليكى

استعينى بالله على الفترة الجاية وان شاء الكريم هتبقى كلها بمبى بمبى بمبى

يسعدك قلبك يا فاتيما يارب

الف مبروك يا طمطم بجد فرحت اوي الله يلعنه النت اللى مخلاناش نفرح من الاول معاكي بقولك ايه خليهم يرسموا خرفان بمبي كتير ويسموها هي كمان ههههههه ربنا معاكي يا رب

مبروك يا فطوم
يلا .. المره الجايه هتدرسي يوسف ..ولا لأ..

ادرسله انا ..

تحياتي

السلام عليكم
حبيبتي مبروك عليكي ويجعله قدم سعد يارب
ويمكن تكون مقدمة كويسة باذن الله ولما يوسف يرجعلك بالسلامة تقدري تحطيه في المدرسة اللي انتي فيها
ودة بقى بيجي من الواسطة مادام انتي فيها بقى
جمدي قلبك واجتهدي انهم يتمسكوا بيكي في المدرسة دي وتبقى المهمة سهلة
وباذن الله يرجعلك يوسف بالسلامة يارب
تحية من قلبي

مش هادعي علي النت اكتر من اللي دعوا كفاية عليه كدة

بس والله فرحت بجد وعنيا دمعت كمان يا بخت الولاد بيكي بجد يارتني معاهم اقعد ارسم مهرج ولا حتي خروف اورانج

الف الف الف الف الف الف الف مبروووك

اللهم افتح لها ابواب رزقك وبارك لها فيها

اللهم آآآآآآمين
اللهم آآآآآآمين
اللهم أأأأأأمين

nigro

يا أبو قلب دهب
ألله يبارك فى عمرك
حاسة بفرحتك قوى و الله
و متحرمشى منك أبداً
و بعدين تعالى هنا
بقى عاوزنى أشتغل من غير ما أقولكم ؟!
يعنى أنكد عليكم طول الوقت و اول ما يبقى فيه خبر حلو منتقساموش سوا ؟!!
طب ازاى
هيا الفرحة تبقى فرحة من غير ما احبابك يشاركوك فيها ...
ربنا يخليكم ليا
و تكمل فرحتى بيوسف فى وجودكم طبعاً
تحياتى ليك يا أبو قلب دهب

آخر العنقود
الله يبارك فيكى يا أمانى
و ربنا يسمع منك و منكم جميعاً
تحياتى ليكى و لكل أسرة أبو زيد
على رأى خيخة العسل
و منحرمشى منك يا سكر معقود

mohra
ميرسى يا مهورة
أن شاء الله يا حبيبتى يحصل اللى بتتمنيه ليكى
و ليا

بنت القمر
الله يبارك فيكى يا امانى
كنت عارفة إنك لازم هتعلقى البوست دا
و تقوليلى مبروك
تحياتى ليكى و أديها لمون بقى

rehab mostafa
ميرسى يا رحوبة على مشاعرك الحلة
و بتمنالك أنتى كمان كل خير فى الدنيا
تحياتى و حبى يا حبيبتى

حاجات جوايا
صادقة يا سالى من غير ما أشهد اى حاجة فى المطبخ خالص
بس ما شاء الله يا عيال
دنتوا جامدين قوى قوى
و سركو باتع أهو
طب ما تدوها قوى فى موضوع يوسف بقى
أنا بهزر طبعا و عارفة أنكم بتدعوا من غير أنا ما اطلب و لا اتخيل حتى
يمكن ربنا هيرجعه فى معاد احسن و انسب
يمكن مستنى لما أشتغل فى المدرسة دى عشان لما يرجعلى ادخله فيها و يروح معايا و يرجع معايا و ميغيبش عن عينى حتى لما يروح مدرسته
يا لهوى معقول
معقول
مش بعيدة على ربنا أبداً
يا رب
يا رب
يا رب
و متحرمشى منك يا حبيبة قلبى
و بوسيلى دودو

نعكشة
تلت نجمات يا نعكوشتى
واحدة على قورتك
و واحدة على خد الشمال
و واحدة على الخد اليمين
بعد ما أبوسهم

soooo
أهلاااااا يا عم
لازم أشتغل يعنى عشان أقرى أسمك فى صفحة التعليقات
أصل غايب بقالك مدة
متحرمشى من الدعوات الحلوة دى ابداً
و بخصوص عرض المساعدة شايلاك لعوزة
و بعدين أنت تاخد العيال و الميس بتاعتهم بالمرة عشان أنا كمان أتعلملى حاجة للزمن
تحياتى يا اخى العزيز

hannoda
هنودتى يا قمراية أسكندرانية
الله يبارك فيكى يا حبيبتى
كنت عارفة أنك من الناس اللى هتفرحلى يمكن أكتر منى ..
أنتى من الناس اللى قصدتهم بالجملة دى بجد
حكاية التدوير دى ناويها بس لما النت يتعدل شوية لحسن بطىء قوى و مغلس معايا بس ناوية متقلقيش خالص
اللى بتقوليه بتمناه فعلاً لنى و أنا صغيرة فى أعدادى ربنا كرمنى بمدرسة فنون أسمها ميس سحر علمتنى يعنى إيه اعمل من أى حاجة حواليا شىء جميل يفتح النفس
كانت بتخلى فصلنا مسئول عن المعرض السنوى بتاع المدرسة و كنا بنعمل كل حاجة من الألف للياء و شوفى رغم مرور أكتر من عشرين سنة لكن الحاجات دى فى دماغى مبتطلعشى و كنت بعملها مع يوسف ...و دلوقتى هعملها مع الولاد فى المدرسة و أتمنى اكون مؤثرة فيهم و لو ربع تأثرى بمدرستى دى الله يمسيها و يصبها بالخير مطرح ما هيا موجودة
أنا حطيتكم من ضمن أسباب الفرحة لأنى زى ما بفكر فيكم فى وقت حزنى عشان منتظرة منكم لمسة طبطبة و نصيحة
برضو بتيجو قوى على بالى لما أنجز خطوة و اعمل حاجة مهمة ..
لأنكم جزء من تفكيرى و إحساسى و وقتى
و دوركم فى حياتى كبير بس أنتو متاخدوش بالكم قوى يمكن
متحرمشى منك يا هنودتى ابداً
و طبطيلى على هانم

جنى
كلك ذوق و اخلاق يا سعيد
و ربنا يسمع دعواتك يا رب
تحياتى ليك و تقديرى

عبدالله
الله يبارك فيك يا عبدالله
و يوسف يبقى معايا فى المدرسة
يااااااااا رب

الطائر الحزين
إن شاء الله يا إيهاب
حكاية النصايح دى مش عارفة هيتقبلوها و لا إيه ...
لازم الاول ياخدو عنى فكرة كويسة و يحترمونى
و بعدين يسمعوا منى أى حاجة
لحد دلوقتى الفصول اللى دخلتها العيال فيها لطاف قوى و حابين الحكاية
أصلنا زىما نكون بنلعب و نرسم و نلون سوا كدا فى قعدة صحوبية
و كمان هما فى خامسة إبتدائى يعنى سن متفهم قوى و تعليقاتهم جميلة و ذكية
ربنا يكرمنى و أكون قدها
تحياتى يا طائرى الحزين

mayada
يا قاف ميم عقبال ما أفرحلك إنت كمان يا قمر بالجواز بقى و النونو
طمنينا عليكى أنتى فينك الأيام دى
اكتبى بوست جديد عشان نعرف بس ان كله تمام
سلامى لماما العزيزة
حبى و كل امنياتى بالخير ليكى يا حبيبتى
و مرات أبنى

founoon
الله يبارك فيكى يا حبيبتى
ممكن اتخيل فرحتك لأنىشوفتك و لما سلمت عليكى حسيت اد إيه أنتى أنسانة جميلة و طيوبة
و بتحسى بغيرك و حريصة توصليله مشاعرك دى
متحرمشى منك يا حبيبتى و سلامى لشيماء و نرمين

نهر الحب
الله يبارك فيكى يا أنوس
و جاوه ايه أنتو داخلين على طمع كدا و المرتب أصلاً حاجة رمزيةبس أطمنى ليكو عندى حاجة حلوة بس لما تيجوا يوم التبرع بالدم أن شاء الله ...
سلامى لنسمة الرقيقة
و حكاية التعليق دى سيبيها على راحتها و علقى لما تحسى أنك عاوزة تقولى حاجة بس يكفينى مرورك و إطمئنانك عليا لأنى أنا كمان بعم كدا و بمر عليكى اطمن لكن مش دايما بعلق
سلامى و حبى يا أنوس

البت المشمشية حلوة بس شقية
الله يبارك فسكى يا قطوطة
نفس الدعوة بدعيهالك يا حبيبتى

jana
الله يبارك فيكى يا جنة
هاها
أنتى فكرتينى بصديقتى امقربة داليا ..أصلها كانت عمالة تدورلى على شغل عشان كنت بقولها كل شوية أنا نفسى أرجع أسكندرية تانى ..
فبقت عاوة تمسكنى شغل عشان معرفش أفلفص منه و أطير على هناك
تحياتى ليكى يا حبيبتى

يا مراكبى
الله يبارك فى عمرك يا نبع الحكمة
أنا كمان فرحانة أنى فرحتكو بدل ما كل يوم نكد نكد كدا
بتسلملى على فادى و لا بتنسى ؟!

hopiz
الف مليون ديشيلون يبارك فيكى يا حبيبتى
حاسة بيكى قوى و بفرحتك و مش عارفة أقلك إيه على كدا
غير أنى بتمنى اكون دايما فى حال يرضيكم و يسعدكم
أما حكاية تعليمك الرسم دى بقى فأنا تحت أمرك اول مرة هنشوفك فيها فى لقاء تدوينى تجيبى معاكى كراسة الرسم و علبة الألوان و هيكى اول حصة و عشرة من عشرة من قبل ما أشوف حتى رسمتى حلو و لا ل لأنى عافة أنه هيبقى حلو زى قلبك
تحياتى و حبى يا هوبيز

حنين القلب
الله يبارك فيا حنونتى
برضو مفيش فايدة فى حنية قلبك دى
حتى و إنتى فرحانلى عينيكى بتدمع !؟
متحرمشى منك يا حبيبة قلبى
و ربنا يسمع منك دعواتك
أنا كمان بعيلك ربنا يكرمك من اوسع أبوابه و يرزقك ما تتمنيه يا رب
يا رب
يا رب

محاولات مخنوقة
الله يبارك فى عمرك مليون مليون مليون مرة يا عزيزتى
شكرا على الدعوة و المساندة
و ربنا يريح قلبك أنتى كمان

doba
يا دوبا يا ام يوسف العسل
اتسلم عينيكى و دى دموع الحنية يا حبيبتى
هنرسم إيه النهاردة ؟؟!
النهاردة رسمت مع الولاد بنت لابسة برنيطة فيها ورد و لابسة حلق و بتبسم
لم عملوا دوشة قولتلهم هرسمها مكشرة و زعلانة منكم
قالولى خلاص يا ميس
خلاص يا ميس
إعمليها بتضحك
قولتلهم لأ
خليها مبتسمة بس لحد ما ترسموا حلو و هيا تضحك

متحرمشى منك يا دوبا
يا حبيبتى

$$appy $$
يا قمر التدوين كله
معلشى النت دايما يعملها كدا معايا
أما بخصوص الخرفان ففكرة و الله ليه لأ
بس العيد فات يا بيبى
معلش هنلاقيلهم فوكيرة برضو
ميرسى يا حبيبتى
و وشكم حلو عليا يا قمر

ahmed mubarak
الله يبارك فيك يا حنون
و مبيحبش الجبنة
يا عم ييجى بس و ى حد فينا يدرسه مش هتفرق مانت فى قام خاله و هتاخد بالك منه اكيد
تحياتى ليك يا عزيزى
و متحرمشى منك

نونو عاشقة النقاب
و عليكم السلام يا نونو
الله يبارك فيكى يا حبيبتى
يااااه على الفكرة اللى بتقوليها دى ..معقوله تحصل ؟!!
يا رب
مش بعيد على ربنا و الله
من ناحية تجميد القلب ربنا يسهل أنا متحمسة جداً للشغل و كل القعدة اللى قعدتها دى مخليانى عند كتير قوى عاوز أطلعه
دعواتك يا حبيبتى و تحياتى و حبى

وومن
يا ميرا يا اميرة
الله يبارك فيكى يا حبيبتى
وشكوا حلو عليا يا بنات
مكملتش أسبوع من ساعة ما شفتكم الا و دا حصل ..
أقولك
دا وش العريس يا جميل
سليميلى عليه و قوليله فاتيما بتقولك مجتش تخطب ميرا من بدرى ليه ؟!!!
و سلامى لشيكو مشمشة الجميلة
وشكوا حلو عليا يا بنات

بوسة ع الخد ده
:)
وتنهيدة
وحضن كبير



ليكِ فاطومة

ربنا يوفقك ويسعدك
بحبك

ونستينى؟؟!

مكسوفه اني متأخره
مبسوطه اوي انك الحمد الله مبسوطه ويارب ديما يجعل ايامك كلها فرح وراحه بال
علي فكره الشغل حاجه كويسه جدا ومهمه تحسي فيها بكيانك وانك بتعملي حاجه كويسه ومش اي شغل وخاصا الشغل ما الاطفال لانهم بيتأثروا جدا بالمدرسه ممكن تعلميهم حجات كتير وقيم وحجات جميله وبيستوعبوها في السن ده وبكده تكوني عملت حجات لله سبحانه وتعالي
بجد الشغل مع الاطفال متعه ما بعدها متعه بغض النظر عن الشقاوه واللي بيحصل من وجع الدماغ بعدها بس حاجه مفيده
ربنا يكرمك ويثتك يارب
وانا مبسوطه بجد عشانك والف الف مبروك وبندعيلك والله وربنا يكمل فرحتك قريب انشاء الله
سمكه

مبروووووووووووك الشغل
واضح أنك بتحبي الأطفال عموما يا ميس بطة
:)
ربنا يخليلك يوسف
تحياتي

عندما يرتوي الحلم ...من نهر الايمان
عندما يٌسقط الضوء قلعة الاحزان
عندما يفر الخوف والحرمان...
تصبح كل فرحة
كل لحظة
ميلاد جديد للإنسان....
ويارب
حلمك الكبييييير
يتولد
بكره

مبرووووووووووووووووك
بجد
مبروووووووووك

فاطيماتااااااا
أجمل التهاني القلبية
يا أم يوسف على الوظيفة الجديدة الجميلة
الف مبروك على على عودة اشراقتك من تاني وسط تلك البراعم الخضراء البريئة
خلاص انتي كده دخلتي التاريخ من أوسع أبوابه
انا مش بضحك على فكرة بكلم جد
دخلت التاريخ من خلال ذاكرة كل طفل من دول
سوف تصبحين ان شاء الله جزء من ذكريات جميلة لك طفل منهم عندما يكبر ويتذكر مدرسته الجميلة بتاعة الرسم وهاتعدي عليكي سنين ويقبلك بالصدفة شاب أو شابه ويقولك مش معقول مدرستي بتاعت الرسم ..مش فاكراني انا فلان او فلانه كنت عندك في الفصل..وهكذا سوف تصبحين جزء من الزمن في ذاكرتهم ودي كفايه
انتي ربنا راضي عليكي بدون شك لأنك في المكان ده على الأقل بتعوضي حاجات كتير وفي مكان وظيفة انتي راضيه عنها
شدي حيلك مع الاطفال في مادة الرسم
نوعي معاهم
مش لازم كل مره يعملوا حاجه انتي بتعمليها قدامهم
يعني مره اقترحوا عليهم كل واحد يرسم حاجه من الطبيعه بيحبها
مره كل واحد منهم يرسم حد بيحبه ومايقلقش يطلع هو ولا مش هو
مره خلي كل واحد يعلن عن اللون اللي بيحبه ويرسم من أجله لوحه يضع فيها لونه المفضل
ومرات تعلميهم كيف رسم اي شكل بطريقه بسيطه
يعني اي شكل عباره عن أجزاء من الخطوط يحط خط جنب خط جنب خط حسب الشكل ده خط مقوس ده خط مكسور ده خط مائل وهكذا هايلاقوا نفسهم بيحاولوا وبيعرفوا يكونوا شكل معين
علاوة على لوحات المواضيع
الف مبروك مرة تانيه
مش عارف اقول بقا بطه ولا ام يوسف ولا فاطيماتااااا
تحياتي
حسن أرابيسك

على فكرةانتي فاكراني حد تاني :)

انا كنت حاسة بس دلوقتي اتأكدت

انا مش البنوتةاللي انتي قابلتيها خالص انا اتمنى اقابلك طبعا بس دي مش انا :)

مبروك مرة تانية

فاطمه
أم يوسف
أم كل الاولاد والبنات
طاقة الحب والحنان
المصريه
مرفاء الامان والحنان
ضحكة الامل
أيتسامة الغد
الله تعالى يوفقك
فى أنتظار زياره
محمد
مشاعر وأفكار
شوية كلام

انا اول مره ازور مدونتك وفرحانه اي دخلت على حاجه فرحتك كده ربنا معاكي ويوفقك في شغلك ويخليلك يوسف

ميت الف مبروك يا طمطم
وربنا يوفقك ويسع رزقك ويرزقك من حيث لا تحتسبى
بجد قريت بعض التعليقات وكنت فاكرة نفسى انا اللى بس اللى فرحانة
اتارى الناس كلها بتحبك وفرحانلك من قلبها
=========
عندى سؤال قد يبدو انه غبى شوية
انتى ليه ما حاولتيش تشتغلى فى مدرسة يوسف؟؟

بداية الغيث قطرة

وبكرة مش هتلاحقي ان شاء الله على نعم ربنا العظيمة


ربنا يسعدك ويرضى عنك ويوفقك لك خير

ومش تنسي الوصفة بتاعت الراجل اياه

اوعي تسيبيها وخصوصا لما شفتي أثرها

وكل ما تركزي فيها كل ما هتجيب نتيجة اكبر


كل الود

بجد فرحت لك يا فطومه
مش قولت لك الحياة لازم نعيشها..وندور على جوانب تانيه
إوعي تكوني زعلت من كلامي معاك قبل كده
أنا فعلا بحبك زي أختي
ويمكن موضوع المدرسه ده يعوضك شويه عن فقدك ليوسف لحد ما يرجه ليكي بالسلامه
تحياتي وألف مبروك

يااااااه

اخص عليا

دا انا جايه متاخر اوى

الف الف مبروك يابطه وعقبال يااااااارب ماتفرحى الفرحه الكبيره ونفرح معاكى برجوع يوسف ان شاء الله

فاتيما طمطم يا احلى ام فالدنيا مبروك عليكى الشغل ويا حبيبتى انا بكتبلك الان عشان اخد موافقتك على نشر بعض اجزاء من تدويناتك فى كتاب مدونات مصرية للجيب عدد خاص عن المرأة فمعرض الكتاب مش عاوزة الكتاب يعدى من غيرك يا ارق واقوى ام فى عالم التدوين مستنية ردك انامن ضمن اسرة تحرير العددtahees123@yahoo.com
تحياتى متتأخريش علية فالرد

اهو ده الكلام يا جميل
الف مبروك يا فيفي يا جميله
وحشتيني اوي بأه الله

اوعي تكوني اول ما بتروحي البيت بدل ما تقولي سلامو عليكو
تقومي قايله: قيااااااااااااام

:)

مها ميهوووو

الحمد لله انى دخلت عالبوست ده اناهرده
ربنا يفرحك ويوفقك تاني وتالت علطووووول
ألف ألف مبروك يا فاتيما
:)

هاه يا فاتيما عاملة ايه يا ميس ؟؟
طمنينى
ربنا يريح بالك وينولك مرادك ويكرمك امين يارب العالمين

مش عارف أقولك إيه؟
بس وحشتيني فعلا
أخبارك وأخبار مستر جو إيه؟
كل سنة وانتي طيبة وبألف خير يارب
بالمناسبه انا كنت عاوز أعرض عليكي عرض اني أنشرلك مقامات أم يوسف إيه رأيك، أعتقد ينفع انك توافقي..عموما هاستنى ردك
بمناسبة أبوللو فأنا بكتب في الجزء الثالث حاليا وخلصت التاني ب مش هايتنشروا السنه دي وانما العام القادم أو مابعد القادم لأني منزل كتاب نقد العقل المصري في امعرض السنادي ومنزل رواية أسد قصر النيل في شهر 6 انشاء الله
وتليفونات بقى علشان كان فيه حد قاللي انك عاوزه تكملي وشكلك عاجباكي القعده بتاعتك على ناصية "روح قلب ماما" ..ماعلينا فرحت قوي بتعليقك..وسلامي ليكي ولجو
محبتي الدائمة ياأم يوسف

إرسال تعليق