خـااااااالـص  

Posted by: فاتيما in


لأن الموضوع وسع قوى
و كمان فيه ناس محترمة كتبت فى الموضوع دا
أكثرهم تميزا و شمولا فى التغطية
الأخ شقير
و آخرهم الصديق وجهة نظرى
فكان لازماً عليا إنى اخد موقف
و لو بأضعف الإيمان
و هو إنى أقول إنى موش معاهم خاااااالص فى الأتحاد دا
محدش خد رأيى و لا أنا وكلته يتكلم بإسمى و لا يجمعنى معاه فى حزمة واحدة
و إذا اخترت حد فموش هيكونوا هما خااااالص
أنا عملت الشكل دا و هحطه فى الشريط الجانبى للمدونة عشان أقول رأيى النهائى فى القصة دى
بشكر زمايلى و أصدقائى المدونين اللى نبهونا للمسرحية الهزلية العبثية دى
و ما اكترها هذى الأيام
اللى عاوز الشكل دا عشان يحطه عنده
يتفضله
و اللى عنده شكل اكثر إقناعاً و يكون احسن
لأنى على قدى و موش بعرف أعمل لوجوهات عدلة
يكسب فينا ثواب و يعمل لوجو موحد نستخدمه كلنا
عشان نقول بصوت عالى
أنا موش معاهم
خااااااالص
بس كدا

55 كلام بيطبطب على قلبى

أحبك و بعد  

Posted by: فاتيما in


أحتاج إليك
و أهرب منك
و أرحل بعدك من نفسى
فى بحر يديك
أفتش عنك
فتحرق أمواجك شمسى
وجهك فاجئنى كالامطار
فى الصيف و هب كما الأعصار
و الحب فرار
و البعد قرار
و أنا ....
أنا لا املك أن أختار
حبك يا لهفى
تضحية و عطاءات من غير حدود
و أنا لا أملك أن أعطى
و دروبى أمنية و وعود
أمصيرى أن أمشى
و غدى أمس
و أحباء
و قيود
حررنى رفقا أنصرنى
ساعدنى كى اهجر طيفى
فالحب كظلى يتبعنى
يعدو بجنون من خلفى
و أنا أعصارك يعصف بى
يهدر يقطفنى من صيفى
أحتاج إليك
و اهرب منك
........................
البوست دا تقليدا للبت خيخة و أى كلام
يعنى بصيت فى ورقها و رحت غشة منها بس الفرق فى إختيار الغنوة فقط
و حقوق الملكية الفكرية كلها ليها

58 كلام بيطبطب على قلبى

يا راعى الملك  

Posted by: فاتيما in



كاتب قصيدة حلوة قوى

روحو شوفوها


صحيتونى من أحلامها نـومة  

Posted by: فاتيما in

إييييييه
خبر إيه على رأى سوووو
إيه يا إخواننا التاج الحلو دا
لأ و كمان تاج هاتريك زى بتاع المرة اللى فاتت
أنا متفاءلة عشان أصلاً بحب رقم تلاتة
و المرة دى تاج الأحلام دا جايلى من حبايبى
سالى حاجات جوايا
زيانور مامت زياد و نور
أحمد سمير الأغلبية الصامتة
و الله أسئلة جميلة بس إجاباتى ممكن تصدمكوا
يعنى طب أجاوب و منضربشى بقلة من بتوع آبى ؟؟
طب محدش يرجع يقوللى إيه الحاجات الغريبة اللى إنتى كاتباها دى
عشان كلنا فى وقت ما كان لينا احلام عجيبة برضو يعنى كدا موش أنا لوحدى
هاااه
ماشى ؟
خلاص نبتدى و ربنا معاكو
-----------------
أذكر 5أحلام تخص ماضيك
كنت هتتخلى عن إيه فيها و هتتمسك بإيه لحد دلوقتى
-----------------
1- كنت بحلم أبقى واحدة مشهورة يعنى مذيعة زى نجوى إبراهيم او ممثلة زى فاتن حمامة
او حد كدا من اللى كنت بشوفهم فى التليفزيون و أنا صغيرة
لما كبرت حبة إعدادى يعنى بقيت أتمنى اكون مطربة و صوتى حلو زى فيروز و لا وردة
الحلم دا لسه موجود لحد النهاردة و بتمنى ساعات لو تحصل معجزة و أصحى من النوم
الأقى صوتى بقى حلو يعنى موش عاوزة أبقى مطربة خلاص
بس أغنى لنفسى حتى بمزاج و سلطنة
2- كنت بحلم أبقى لاعبة كورة قدم و ألعب فى الأهلى و كمان منتخب مصر
و طاهر أبو زيد يحبنى و حسام حسن يضرب الحكم عشان مرضيش يستذوق
و يحسبلى ضربة جزاء
ونص الفرقة تتخانق مع المدرب عشان عاوز يقعدنى إحتياطى و الماتش محتاجنى
و الجماهير العريضة فى المدرجات تقعد تهتف بقى
فاطمة ...بيبو ... فاطمة... بيبو
و بيبو دا اللى هوه يبقى محمود الخطيب اللى هيطلع بيحبنى و بحبه فى صمت
و مبيصارحنيش يا كبدى عشان مراته و عياله و بيته ميتخربشى
و حفاظاً على مستقبل النادى و الجمهور و الوطن
الكلام دا كان زمااان على فكرة يعنى فى منتصف التمانينات كدا
و يعنى حتى قبل ما كرة القدم النسائية دى ما يخترعوها
يعنى أختكو و لافخر من رواد اللعبة دى على مستوى العالم
و كنت بلعب أيام إبتدائى مع عيال الجيران فى الشارع و كانوا دايما يوقفونى جون
و اتخانق معاهم عشان أبقى عايزة ألعب فى الهجوم عشان أجيب جون ... ميرضوش
و بعدين أبتدى أضرب وفى الآخر إنضرب
الحلم إندثر عشان بقيت تخينة و أصلاً مينفعش ألعب اللعبة دى فى كل الاحوال
بقيت أتفرج بعد كدا و أشجع بس
حتى طاهر أبو زيد الخاين أتجوز و محمود الخطيب الله يسهلله بقى
و حسام حسن ربنا يديله الصحة لسه بيضرب فى الحكم
و حتى لو فكرت دلوقتى ألعب مع يوسف فى أى مكان أو جنينة
مينفعش عشان عيب قوى أجرى قصاد الناس بعد ما بقيت فى السن و الحجم دا
عشان إنتم عارفين إن اللعيب مهما كانت شعبيته لازم ييجيله يوم و يعتزل بدل ما يقولوله
كفاية .... يا حازم
3- كنت بحلم يبقى عندى أب تانى غير أبويا الله يرحمه عشان كنت بخاف منه قوى
أصله كان شديد معانا شويتين يعنى نظام علق محترمة بين الحين و الآخر و روحه دايما فى مناخيره
و مفيش مناقشة الأ نادرا و كانت أسعد لحظات حياتى لما بيخرج للشغل
و كنت أتمنى لو يروح يسافر بلد بعيدة و ميرجعش الا كل خمس ست سنين مرة
المهم ميعقدش معانا و خلاص
الحلم دا تلاشى بعد ما إبتدت المشاكل بتاعتى اللى إنتو عارفينها
و جه ابويا عييى بالجلطة و صحته إتدهورت
وساعتها أكتشفت إن الراجل اللى مكنش عاجبنى و عاوزة أغيره دا
كان صمام الامان الحقيقى
و الدرع الواقى اللى كان بيحمينا من غدر الزمن و عمايله
اللى مكناش بنخاف منه و لا نعمله حساب و بابا فى عز صحته لأنه رغم كل عصبيته دى
كان هوه الأمان كله
و بقيت أقول جهنم أبويا و لا جنة أى حد فى الدنيا
4- كنت بحلم يجيلى سرطان و أموت بعد ست شهور زى ما بشوف فى أفلام السينما
كدا و دا كان أيام أعدادى و ثانوى يعنى فترة المراهقة عشان محدش يفتكر الحلم دا كان قريب
إيه غريبة دى ؟؟!! عادى ماهو كان عندى أسبابى ساعتها ؟
يعنى عشان أهلى و المجتمع المحيط بيا كله يسيبونى اعمل كل اللى نفسى فيه
الست شهور اللى فاضللى فى عمرى
يعنى كل اللى نفسى فيه بجد
و محدش هيرفضلى لى طلب بقى و أنا بلعب فى آخر عشر دقايق من الماتش
و فى الآخر هاموت موتة درامية و أسيب ذكرى مؤثرة لكل الناس
الحلم دا كاد أن يحوم فوق رأسى من كام سنة كدا للأسف بس الحمدلله ربنا ستر
و طبعا لا أتمنى أنه يتحققلى أبداَ و لا يتحقق لحد خالص خالص بحبه و لا حتى بكرهه
5- كنت بحلم قصة حياتى تكون من القصص الرومانسية اللى الناس تتحاكى بيها
زى حكاية سندريلا مثلاً
يعنى أتعذب لحد ما ييجى الاميرالوسيم إسمه إيه دا
و ينتشلنى
و نخلف خمس عيال و نعيش فى تبات و نبات
الحلم دا كاد أن يتحقق و محصلشى لأنى صحيت من الحلم لقيته تحطم على صخرة الواقع
--------------
أذكر خمس أحلام تخص مستقبلك و ما تتمناه منه
----------
1- بحلم يوسف يرجع و يكون أنسان كويس لنفسه و للناس
و أقف قصاد ربنا و انا ماسكة يوسف على إنه عملى الطيب فى الدنيا
و أبقى فخورة إنى طلعت بحاجة كويسة
2- بحلم لما أموت الناس تفتكرنى بالخير و تقول الله يرحمها كانت ست محترمة
3- بحلم إنى أعوض أمى و إخواتى و يوسف عن سنين العذاب اللى مروا بيها بسببى
4- بحلم أعيش مستورة و مكونش عبء على حد و لغاية ما ربنا يخدنى
أفضل بصحتى عشان محدش يشيل همى و يحتاس بيا
5- بحلم ساعات ساعات - موش دايما عشان عارفة إنه صعب جدا -
أنى ممكن اكون لسه ينفع أبقى سندريلا و ما زلت مستنية الأمير
----------------
أذكر شخصين - على الأقل - متواجدين فى حياتك كنت تتمنى وجودهم من قبل
-----------
يوسف إبنى
عشان وجوده غيرنى و بدل اولوياتى فى الحياة و خلانى اقل أنانية
و عندى تشبث بالمستقبل
المدونة بتاعتى
عشان عرفتنى بناس كتير حلوة غيرت نظرتى و خلتنى أبص لبكرة بشكل إيجابى
-----------------
أذكر شخصين - على الأقل - غير متواجدين فى حياتك و تتمنى وجودهم مستقبلا فى حياتك و حياة أولادك
-------------
يوسف
عشان موش عارفة أعيش الحياة كأنى أنسانة عادية و هفضل كدا روح ناقصة لن تكتمل الإ حينما يعود
الأمير
اللى هييجى ينتشلنى
---------------
اخيرا لمن تهدى التاج
الموضوع دا صعب قوى يا جماعة
حبايبى كتير قوى و موش عارفة أديه لمين و لا مين
بس مبدئياً هبعته للأسماء الأتية
-----------
البت خيخة و أى كلام
أختشى و حبيبتشى
رودى بنوتة مصرية
أم نور القمر
دودا أمتداد عقلى فى العالم السحرى
حبيبة الروح
دوللى قوس قزح
العقل و القلب و الجدعنة
أحمد مبارك
الحنون و اللى مبيحبش الجبنة
شخابيط إيمان
الجميلة اللى شبه نسرين
ميادة قاف ميم أيامنا الحلوة
و اللى بترسم على الجواز من يوسف

51 كلام بيطبطب على قلبى

إحـم .. إحـم  

Posted by: فاتيما in


يا ساتر
النهاردة يا جماعة هتكلم عن مكان من اهم الاماكن فى حياتى
هتكلم عن الحمام
أيوه الحمام
يعنى بيت الراحة
محل الأدب زى ما ستى الله يرحمها ما كنت بتقول عليه
لأ موش هقول كلام يقرف عشان عارفة إن فيه ناس فافى
ممكن يغمن عليها و ناس تانية ممكن تجيب اللى فى بطنها
مع إن الحمام دا أعظم حاجة ممكن الأنسان يحتاجها
و جرب كدا تكون عايش فى مكان من غير حمام لمدة سبع تمن ساعات ورا بعض و شوف
كفاية إنى أقتبس كلمة أحمد زكى فى فيلم البداية لما قال إن
- الحضارة الانسانية إبتدت بإختراع التواليت
أنا هتكلم عن المكان دا و اهميته عندى من زمااااان قوى
يعنى مثلاً و انا صغيرة - فى العصر العثمانى كدا -
مكنتش بحب الاكل خالص
و أسوأ لحظات حياتى لما يبقى قدامى طبق الغدا و موش عاوزة أكمله
ساعتها طبعاً يقعدوا يزعقولى و لازم تخلصى طبقك كله
أقوم أقعد أفلفص بأى سبب
و أقف أتحنجل قدام بابا
- ورايا واجب أروح أعمله الاول
- لأ خلصى اكلك ... يعنى شاطرة أوى فى المدرسة يا خى
- طب عاوزة أنام عشان مدروخة
- لأ خلصى أكلك و بعدين أتخمدى
- طب عاوزة أعمل تواليت
- ............!! خلاص غورى أدخلى الحمام
بس برضو هتطلعى تخلصى اكلك
طبعاً أنا جرى على الحمام و أقعد جواه لحد بابا ما يزهق و يخش ينام
و أخرج أنا أخبى الطبق
فى آخر رف فى التلاجة جوه جوه بعيييييد
و روح يا زمان و تعالى يا زمان
وبابا يكتشف وجود الطبق دا بالصدفة البحتة أثناء إحدى غارته الإستكشافية على التلاجة
يعنى الحمام كان المنقذ المؤقت من الأكل اللى كنت مبحبوش
كمان كان مهربى لما أتضايق و أعيط و محبش حد يشوفنى
يعنى أبقى لسه دابة خناقة مع واحدة صاحبتى و لا بابا و لا أى حد
و موش عاوزة حد يشوف اى دموع فى عينيا على رأى أنغام
أقوم ملقيش غير الحمام أدخله و أقعد أعيط مع نفسى
طبعاً الكلام دا قعد لفترة بس دلوقتى بطلت
عشان مبقتيش أخاف حد يشوف دموعى زى زمان
دا غير الخصوصية اللى الحمام بيحققها للبنى آدم
يعنى تدخل كدا تقعد و تروق نفسك
و محدش يستجرى يقطع عليك خلوتك
أقصى حاااااجة حد يخبط و يقولك خلصنا
بس موش هيقدر يدخل عليك عنوة كدا أو يمنعك تدخل الحمام من أساسه
محدش يقدر يقولك لأ متدخلش
و دا السبب الأساسى فى كون الحمام هو الملاذ لأى مدخن من ورا أهله
بعد البلكونة
و يااااه بقى لو الحمام فول أوبشن يعنى واسع
و الإضاءة فيه كويسة و شباكه بحرى
و تدلعه كدا ببخور او معطر للجو أو فنييك
أكتر حاجة بتخلينى أحس إن الحمام دا من اريح الاماكن عندى
و أهميته لا تكيل بالبتنجان فعلاً
هوه القراية
أيووووه
من صغرى و أنا لازم اخد معايا مجلة و أقعد جوه لحد ما اخلصها كلها
و بعد ما كبرت شوية أنتقلت من قراية مجلات الأطفال
الى مرحلة قراية الجرايد
ثم قراية كتب بأكملها
و المذاكرة كمان
يعنى يوم الامتحان الصبح ألبس و أشرب فنجان القهوة الدوبل و أخد الأكلسير و اوصل للباب
و أقف شوية أفتكر ورق المادة اللى عليا النهاردة أنا نسيته فين ؟
نسيته فيييين ؟؟
فى الحمام طبعاً هيكون فين تانى
يا إما على الغسالة يا إما على حرف البانيو
عادة القراءة جوه الحمام دى بقت متأصلة و نتناقلها جيل عن جيل
يعنى بابا كان بيقرى الجرايد و لما يحلق دقنه يشغل إذاعة لندن عشان يسمع الاخبار
الجيل اللى بعد كدا اللى هوه يبقى بسلامتى بقيت أقرى فى الحمام وأخد الكاسيت أشغل أغانى
يوسف بقى الجبل التالت كان بيدخل الحمام و يقرى مجلات و قصص
و زيادة عننا بقى ياخد الفيديو جيم الصغنن يلعب فيه على ما ينتهى من أداء أحد حقائق الحياة
و هكذا تتطور سلوكيات الأنسان عبر الزمن يا جماعة و تتغير الأشكال
و يبقى الحمام
رمز التحضر و الراحة
و الثقافة كمان
و أستأذنكم بقى عشان أنا لسه مقرتيش جرايد النهاردة و هروح أعمل القهوة بتاعتى
و أخدها أشربها و أنا بقرى الجرايد فى مكانى المفضل
إيه فيه حاجة ؟؟
بتبصولى كدا ليه ؟!!
هشربها فى الحمام فيه مشكلة ؟؟!
آه نسيت أقولكم
إنى بحب أشرب قهوتى على الريحة !!

75 كلام بيطبطب على قلبى

واحدة واحدة  

Posted by: فاتيما in

طب واحدة واحدة
و بلاش كل دا
ييجى مرة واحدة لتجنن كدا
لو دا النظام معاك بالشكل دا
مقدررررررش عليه
أيوووه
واحدة واحدة على أختكو الغلبانة
موش ممكن يا عيال اللى حصلى النهاردة دا ؟
قلب أتخطف منى
النهاردة كنت فى دنيا تانية و أجمل عالم تشوفه عيونى
حفلة توقيع أول عدد من مدونات مصرية للجيب
ناهيك عن الحلم الذى تحقق و خروج أول وليد الى النور
كلنا شيلناه النهاردة و فرحنا بيه
و بروحنا
و بحبابيبنا
أيووووه
آخر واحدة دى ستوب عندها شويتين تلاتة خمسة
إيه المكان اللى الواحد كان فيه دا ؟!!
عارفين زماااان لما كنا بنروح رحلة تبع المدرسة و لا الكلية ؟؟
و تبقى قاعد تفكر فيها من قبلها بكام يوم و تحضر و يجيلك حالة قلق
و توتر مغمور بسعادة
و كل ما المعاد يقرب قلبك يدق و يرقص ؟؟
دا اللى حصلى من أول ما وصلت على باب العمارة اللى فيها الدار
أول ما وصلت و طلعت السلم لقيت اخويا و صديقى الغالى سوووو
البيه واقف يدخن - يا بنى السجاير صحتك - و إستقبلنى بمرحه و خفة روحه
و عرفنى على الجميلة آبى و البنت أصلاً جاية من كوكب تانى فعلا
و قمر بجد فى الشكل و الروح
و كان معاها عريسها إسلام اللى واضح إنه بيحبها موووت و ربنا يسعدهم يا رب
هقولكم بعد المدخل دا شفت مين
انا هبتدى بالبنات القمرات
لقيت شوية بنات قمرات بيقربوا عليا
و لقيت فيهم بنوتة سفروتة كدا بتقولى أنا لماضة ... معقول مرمر ؟؟
طبعاً إديتها حضونة كبيرة و فرحت قوى بيها و كتبتلى إهداء لمض زيهاعلى العدد
و إهداء على الجوانتى بتاع الدكاترة إياه !!
و أهو ده عيبه داليا الجميلة بصراحة إتفأجات شكلها أصغر و أجمل من الصورة اللى كانت فى مخيلتى
و كمان سلوى رئيسة حزب الأحلام و هيا شخصية لطيفة و هادية قوى بصراحة محدش غيرها ينفع تبقى ريسة لأحلامنا
كمان جت نبضات اللى أنبسطت قوى لما شوفتها و هى أرق بكتير من تصوارتى و تبادلنا حوار جميل قربنى منها أكتر
و شوفت مفقوعة مرارتها من حماتها و قولتها بصراحة موش باين عليكى الفقعة أصلها امورة و جدعة موش مقهورة
و جت رودى بنوتة مصرية مع بنتها نور القمر بس البنت راحت للناس كلها و مرضيتش تخلينى أشيلها
و دا مؤشر موش كويس يخلينى أفكر اكنسل جوازتها من يوسف مدام بتعمل معايا كدا و إحنا لسه على البر ؟
جت كلاكيت تانى و تانى و كانت اكثر هدوءا عن المرة اللى فاتت و لما سألتها الهانم مقالتشى الإ فى الآخر
و أنا ماشية أنها فى مووود مكتئب شوية ... معلشى طلعت ندلة و مقدرتش أستنى أعرف ليه
بس المفروض تكون أتعودت بقى على ندالتى بس أنبسطت قوى أنها قعدت المرة دى اكتر
و شفت d oddaحبيبتى اللى جابتلى وردة روز حلوة زيها و قعدت تقولى كلام مفيش أجمل منه عنى
وعن يوسف و عايزة أشكرها و أقولها أنك أنتى اللى هتبقى ام عظيمة لأنك موش نقصك حاجة عشان تبقى كدا
و طبعا معاه أنتيميتها البهية ميومة مى بهاء و جابتلى وردة حمرا حلوة هحطها فى فازة جنب الكمبيوتر
مع وردة دودا و عايزة اقولها أنا خجلانة من حبكم الكبير دا و حياة يوسف
شفت امانى آخر العنقود و كعادتها عصفورة رقيقة و زى النسمة كدا فى خفتها و شفافيتها
شفت بنات حلوة كتير يسمحونى لو وقع منى أساميهم
بس فيه مدونة كانت حاضرة معانا الأحتفال و عندها ولد أسمه نور
و دلوقتى انا محرجة جدا أقول إنى موش فاكرة بالظبط
مدونتها و إسمها بس فاكرة ذوقها و شياكتها و يا ريت تسامحنى
الألزهايمر بقى و عمايله
- لأ هيا كتر خيرها فكرتننى قوس قزح متزعليش و حياتك
الرجالة بقى ....
طبعا بعد سوووو عم الشباب كله
دخلت ادور على عم مراكبى ... و شوفته قاعد كدا فى هدوء
إيه الجلال اللى نازل عليه ده
حسيت بدفا فى طلته و إنه فعلا نبع حكمة و فرحت بنفسى لأنى توقعت شىء و لقيته بيتجسد حقيقة
قابلت الراجل الطيب أبو خالد و مكنتش مصدقة أنه جه و طخ المشوار دا عشان يشوفنا
... هوه بقى وشه كله سماحة و طيبة و إتمنيت لو كانت ماما جت معايا عشان تشوفه بنفسها
لأنى مهما وصفت سماحته و النور اللى طالع من قلبه موش هقدر اوفيه حقه أبداً
كمان قابلت أحمد مبارك أخويا العزيز اللى لما شوفته قولت كلمة السر جبنة و رغم إنى موش
مشاركة فى العدد الاول دا لكن هوه صمم ياخد منى كلمة للذكرى و المحبة المتبادلة و
خايفى يكون الواد دا مخموم فيا !!
شوفت خالد همس الاحباب و إتشرفت بمعرفته هو إنسان لطيف و مهذب و وعدنا المرة الجاية يجيب
المدام و الاولاد عشان نتعرف عليهم
قابلت محمد عبدالعاطى جست هيومن و تبادلنا حوار و سألته عن الأوشاعة السخيفة إنه لاقدر الله
تعرض لحادث و الحمدلله طلع مقلب بس رخم شويتين و سعيدة إنى شوفته أصله بجد بحس إنه أخويا الصغير
و شفت احمد سكر يا عيال ... بس إيه دا ؟؟... هادى كدا و رزين قوى و ذوق و مجامل و على الطبيعة
إنسان من اللى بيقولو عليه روحه خفيفة و حسه هادى و سعدت بيه قوى و يسافر و يرجع بالسلامة يا رب
و قابلت احمد سلامة مستر كوفى و بصراحة الولد وسيم شكلاً و موضوعاً و أخلاقا - أنا موش بعاكس
يا أحمد إنت زى أخويا ماجد - و سعيدة قوى إنى قابلته
شوفت كمان خالو احمد الصباغ و اللى دايما متألق و قرفته حلوة على أى مكان يبقى فيه
و قابلت أتنين بحبهم قوى وليد راعى الملك kingtoootو كمان جت معاه بوبو هبة مراته
و الله و اكبر ماشاءالله عليه ربنا يحرسه إبنهم العسوله عمر
و مقعدوش كتير عشان الجو كان صعب و عمر كان يا حبيبى متضايق
بس فرحت إنى شوفتهم و الله فعلاً و أتمنى أشوفهم فى المرات الجاية
مين تانى ؟؟
شوفت مايكل ما يكليتو و صاحب المضيفة و دكتور محمد اللى هوه دكتور حر
و ناس كتير عرفونى بنفسهم و أنا لعوامل كبر السن و الشخيخوخة
بترجاهم يسامحونى لو كنت نسيت أى حد
و عايزة أشكر الناس اللى كلمتنى على موبايلات الأحباب اللى كانوا موجودين
يعنى وزة القمرين أنين الحزن اللى فى عز فرحتها أفتكرت تسلم عليا
و كمان محمود رئيس جمهورية نفسى اللى بعتز بمعرفته جدا و كتر خيره حرص إنه يكلمنى برضو
و سنووايت أميرة الحواديت اللى بعتتلى السلام مع شهرزاد و بقولها ميرسى قوى على ذوقك و رقتك
ناس حلوة كان نفسى ييجوا الليلة دى بس مجوش و أفتقدتهم قوى
البت خيخة و أى كلام اختى و حبيبتى و ام شيكو
كان نفسى تيجى و تشوفى الناس الحلوة دى كلها و كلهم سالو عليكى
أرجو يكون غيابك مانعه خير عشان وحشتنى النهاردة
قوى و رودى و سووو كمان قلقانين قوى عليكى و كلنا عاوزين نطمن يا غالية
و كمان أفتقدت الناس اللى برا مصر و مقدروش يكونو موجودين
و طبعاً عذرت كل اللى مقدرشى ييجى لأسباب صحية أو إجتماعية أو لبعد المسافات
أو ظروف طارئة زى
خالتى فرنسا ربنا يشيفيها و عبده الرايق و مهند الباحث عن الحقيقة و نيجرو و بطوط و سالى و دوبا
و ميادة قاف ميم و دكتورة خمسة فضفضة و صيدلانية طالعة نازلة و إيمان شخابيط
ومونا ليزا و مجداوية و بنت القمر و نسرين بسيونى و هدى بدال ما نطق
و زيانور مامت نور و زياد و واحدة مفروسة و قطة الصحراء
و لعلها خير و سدورة و الطائر الحزين و أكتب بالرصاص و سنوهى و صالح سعيد ادهم
و برقش و أحمد سمير و عمو و حسن أرابيسك
و محمد هيرو و الباشمهندس مستر جى كيلر و عبدالحميد ميدو و سيد المكسرات و خطيبته كراملة
أقول مين و لا مين ؟؟
كان نفسى أشوف الناس كلها كلها بس إن شاء الله ملحوقة
و المرات الجاية تتعوض
عاوزة أعتذرلكل حد طلب منى تليفونى و أنا بسخافة قولتله معلش موش هينفع
و عاوزة كل حد على سفر يا ريت يطمنا عليه فى مدونته فى أقرب فرصة
يعنى الناس اللى خرجت من اللقاء على الطيارات زى عم مراكبى و أحمد سكر
و الناس اللى سافرت داخل الحدود زى لماضة و أهو ده عيبه و أبوخالد الراجل الطيب
شكر أخير بقى عشان أنا محرجة عاطفياً جدا
من الواد سوووو اخويا و صديقى العزيز
اللى أصر إلحاحا يعملى عيد ميلاد
و يجيب تورتة و بيبس
و إدبس فى تمنهم و أنا مشيت طرازنة كدا من غير ما أقوله أشارك حتى بأى حاجة
و يبقى عندى شوية من الأحمر
بس عاوزة أقوله ربنا يخليك ليا و فلوسك حلال قوى يا واد
دا التورتة أتوزعت على ييجى خمسة و عشرين واحد قاعد و كفت و فاض كمان
و دا عشان نيتك حلوة و خير
و آبى و كلاكيت تانى و تانى و مفقوعة و أبوخالد و سكر .... و كلهم كلهم أحتفلوا بيا ...
كانوا عاوزين يحطولى شمع و حركات قولتلهم شمع إيه
هتحطوا خمسة و تلاتين شمعة أنتو عاوزين تولعو فى التورتة ؟؟
و بعدين محدش يغنى هابى بيرذداى ... عشان هعيط
آه .... ماهو المفروض الواحد حتى لو مبيحسش خالص
لازم قدام طوفان الحب و المشاعر الجميلة دى قلبه لو ميت يقوم تانى
عاوزة أشكركم قوى قوى على الحفلة الجميلة دى
و على إحتضانكم ليا من أول ما دخلت العالم السحرى بتاع المدونات
أنا موش هتكلم عن حفل التوقيع المرتبك و لا تنظيمه الغريب
و لا الجو الحر اللى خلانى أخس أتنين كيلو على الأقل
و انا واقفة بس رجعت زدتهم تانى لما كلت التورتة و لا هتكلم عن أى تفاصيل آخرى
زى الأخراج الفنى للكتاب و اللى ليا عليه تحفظات
لا ااااااااا
موش وقته خالص
لإنى دلوقتى طايرة فى السما و محدش هيحصلنى
و حاسة إن مشاعر الفرحة اللى بتغمرنى دى محستهاش من كتيييير
من ييجى كدا أربع شهور
تقريباً من ساعت يوسف ما مشى
و أفتقدت دفئه و حنانه و حضوناته
بس كل الدفء اللى طالع من قلوبكم الحلوة دى هيخلينى أدخل انام دلوقتى
و أنا حاسة كأن يوسف الليلة دى فى حضنى
و بحق و حقيقى
ربنا ميحرمنى منكم أبداً
آه قبل ما انسى
الحاجة ام فاتيما بتسلم عليكم جميعاً و بتدعيلكو ربنا يسعد أيامكو
بس كدا

110 كلام بيطبطب على قلبى

حـاجـاتـى  

Posted by: فاتيما in

عندى لعب و حاجات كتيييير قوى
كنت بلعب بيهم مع القطط بتاعتى و العصافير
و بعدين بقيت بألعب بيهم مع ولاد خالى
كان نفسى أخد الحاجات كلها معايا المدرسة
بس ماما قاللتى بلاش عشان متضيعيش
و كمان عشان منجرحش مشاعر الولاد التانية اللى ممكن ميكونش باباهم و ماماتهم
معاهم فلوس كفاية يجيبولهم بيها لعب زى بتاعتى
فالولاد تزعل و تتضايق و أبقى أنا السبب و ربنا يزعل منى
عندنا دلاوب فى الحيطة تيتة قالتلى إنه مخصوص عشانى
أحط فيه لعبى و حاجاتى
لما جيت مع ماما نقعد مع تيتة قعدنا نرص الحاجات فى الدولاب سوا
و هيا دى ممتلكاتى
دبابديبى و أرانيبى و عرايسى
نوتى - أنوبة و إبنها - ميكى و ميمى - مانكى توتو - بوتة - حسونة - موزة - كلوب - هادى - دباديبو
ألعاب ماكدونالدز
يووووه كتير و أغلبها شخصيات أفلام الكارتون اللى بحبها
و كمان عشان بتفكرنى بالحفلات بتاعتهم اللى بيعملوها
كل يوم جمعة وسبت و كنت بحب أروحها عشان بقعد ألعب مع الولاد فى المتاهة
كروت يوجى
بحب يوجى و المبارزات بتاعته و حافظ كل أسامى الوحوش و بحب أجمع فى أشكال الكروت كلها
دا غير لعبة الكمبيوتر بتاعته و بتاعة جوى و ساعات كنت ببدل فى الكروت المتعادة مع أصحابى
فوانيس رمضان
كل سنة تيتة و جدو كانوا بيبعتولى فانوس جديد و اقعد أشغله جنب التليفزيون
عشان بيغلوش على الشاشة و اعاكس ماما و هيا بتتفرج
السنة اللى فاتت رصيتهم جنب بعض و شغلتهم كلهم سوا ماما قعدت تضحك
و تقولى إننا دلوقتى كأننا فى حتة إسمها شارع السد كانت
هيا و تيتة بيروحوها زمان يشتروا منها فانوس رمضان لخالو ماجد
أقنعة و وشوش
بحب الأقنعة قوى و بحب ألبسهم و اتنكر فى شخصيات كتير و كمان عندى ألوان للوشوش
بلون بيها وشى وقت ماتشات الكرة عشان أشجع
الأهلى و بلبس فانلته و أقول جوووووووون
كتبى و مجلاتى
عندى قصص القراءة للجميع بتاعة دقدق و بكار و كتب تلوين فظيعة بعتتها تيتة
و كتب تانية أشتريتها مع ماما و كمان مجلات
و لما رجعت هنا لقيت مكتبة جدو مليانة مجلات ميكى و ماجد و أستريكس و أوبليكس
و تان تان و سوبر مان
و يووووه حاجات كتير قوى كانت بتاعة ماما و خالو و خالو لما كانو صغيرين
و تيتة قاللتلى دول بتوعك دلوقتى أقعد أقرى فيهم على مهلك و هزودهمولك كمان
عشان القراية مهمة و ممتعة وماما كمان تبقى امينة مكتبة
يعنى عيب قوى مطلعش بحب القراية
و أنا قولتلها صح
أدوات القتال
عندى سيوف عادية وواحد بتاع زورو و بلطة و درع و مسدسات و سهم و قوس و دبابات
و عربيات كتيييير و عساكر و محاربين
حاجات صغننة
عندى ميداليات كتييير عشان بحب اجمعهم و موبايلات بتغنى أغانى ماما بتقول عليها هابطة
و ميكانو بعمل بيه أشكال كتير
و ميكانو بتاع خالو ماجد فيه صامولة و حديد عملته مرة على شكل راديو و كده
ديسك توبى
عندى على الكمبيوتر 63لعبة بس اكتر ألعاب بحبها يوجى و طرازن و هيركليز
و كيف تزعج جارك و هارى بوتر و كرة القدم الفيفا
اللى ماما دايما تقول عليها فيفا عبده و كل العاب الجيم هاوس اللى فى الموقع بتاعهم
أدوات مكتبية
عندى ألوان خشب و فلوماستر و ألوان ميه و شمع و كراسات يعنى عددها كميات فظيعة
برسم فيها و اعمل قصص و ألونها و رسوماتى بتعجب كل حد
و عندى برايات و أساتيك و مساطر و إستيكرز بأشكال حلوة و مقص مخصوص لوحدى
قطط و عصافيرى
كان عندى قطط كتير سيامى و بلدى و رومى زى أوشه - طأطأ - توتوس - عفروتو - تيتو - زوزو
و عصفورتين رجعناهم للراجل أسمهم سوسو و فوفو
حصالتى
عندى حصالة و اتفقت مع تيتة تعملى الشهادة التمويلية - أنا سميتها كدا - و سبت الحصالة
عشان تيتة و ماما تزود الفلوس فيها و لما أرجع الاقى فيها ميت جنيه خمسين جنيه
مليون جنيه كدا
حاجة كمان بتاعتى بس محدش بيشوفها كتير
نجمة فى السما إسمها نجومة ...
ماما قاللتلى الفضاء مليان نجوم بالهبل و كل واحد فينا من حقه يكونله نجمة فى السما بتاعته
و تكون ملكه محدش ياخدها منه
و البنات نجمتهم لونها بيبقى دهبى و الولاد نجمتهم لونها فضى ...
و لما نخرج البلكونة بليل ببص لفوق كويس و ادور عليها
وبشاورلها و اقولها متشكر يا نجومة
عشان جاية تطمن عليا فى وقت متأخر زى دا ...
ممممممممم
إيه تانى ؟؟
موش عارف فيه إيه تانى ...بس ماما قاللتلى قبل ما امشى
إنها هتخلى بالها من حاجاتى
و موش هتديها لحد خالص
و هتحافظ عليها لغاية ما أرجع ألعب بيهم تانى عشان المكان عند بابا ضيق و موش هيكفى
آخر يوم كان نفسى أروح ماكدونالدز بس منفعشى عشان الزحمة و القلق ...
ماما طلبت وجبة هابى ميل بالتليفون
و لقيت اللعبة بتاعتهم على شكل نحلة تبقى شخصية من شخصيات فيلم جرافيك ...
أسم النحلة بولين
و أنا قولتلهم فى البيت يخلوا بالهم من بولين لحد ما أرجع
سبته فى العلبة بتاعته اللى على شكل خلية نحل و نيمته جوا و غطيته
و حذرت ماما وتيتة بلاش كل شوية يخبطوا عليه
و يفتحوا عليه العلبة
لحسن يتنرفز و يطلع يقرصهم
عالله يفتكروا بقى

62 كلام بيطبطب على قلبى

طلعوا الكراسات  

Posted by: فاتيما in



البت خيخة اختشى و حبيبتشى
سألتنى سؤال فلسفى عميق فى الحياة
إزاى يا فاطمة حطيتى الموسيقا الحلوة دى فى مدونتك ؟؟
طبعاً قبل ما أحاول أقولها الطريقة و أقعد أشرح
لازم فى الأول أقول إنى إتعذبت تلات شهور عقبال ما عرفت إزاى
طبعاً دا سببه الخيابة و قصور اللغة
أدخل مواقع كتير من اللى بيسموها بتاعة ال " hosting " يعنى إستضافة
و احاول مفيش فايدة
بس احاول تانى
و أختكم لإنها على باب الله حاسوبياً
فربنا كرمنى فى لحظة تجلى
صحيح جت متأخرة
بس أهو زى ما بيقولو
beter than never
يعنى بالبلدى أحسن من مفيش
و المهم نبتدى بقى الحصة و طلعوا الكراسات
يلا بتبصولى كدا ليه ؟؟
أوعو تكونو نسيتوها !!
نهاركم أزرق
طب طلعوا الأقلام
و دا وقت تبرى القلم فيه يا خيخة ؟؟
متستلفيش من اللى جنبك
مجبتيش معاكى براية من البيت ليه ؟؟
طب أديها يا رودى البراية و موش عايزة كلام
واد يا سوووو سيب الشندوتش دلوقتى و كوله لما تيجى الفسحة
و إبقى إدينى حتة
يلا كل واحد وشه فى كراسته
و إياك أسمع نفس
نبتدى
ماشى
الأول عنوان الموقع كالتالى
هتلاقيهم ناس ذوق و بيقولولك
wellcome
و إتفضلى و الكلام دا اللى بيتقال على الباب
تروحى سيادتك دايسة على المستطيل البرتقانى اللى مكتوب عليه
join us
تلاقى بيانات مطلوبة و ضرورية تمليها كلها و تدوسى
sigh up
بعد ما تدخليها هتلاقيه دخلك على صفحة جديدة مكتوب عليها
step 1
لو عايزة تحطى لنفسك صورة حطى بس الصفحة دى موش مهمة قوى و دوسى على
skip this step
بعد كدا هتلاقى صفحة step 2
....برضو عديها و دوسى على
nothanks
و الصفحة اللى بعدها step3
عديها برضو موش مهمة و دوسى
later ,thanks
هتلاقيه راح مدخلك على الصفحة المهمة فى الليلة كلها
اللى حاطط فيها تلات أختيارات و تحت بيقولك روحى ببساطة على
" profile "
دوسى على المستطيل البرتقانى اللى مكتوب عليه بروفايل تلاقى نفسك بقيتى فى صفحتك الخاصة
و مكتوب فى ترويستها يعنى أعلى الصفحة
أسمك اللى اخترتيه
و تحت منه شوية مربعات سودا مكتوب عليها حاجات كتير اولها على الشمال
upload
دوسى عليها
هتدخلك على صفحة فيها تلات أنواع من ال upload
دوسى على
upload music
تلاقى خانة مستطيلة المفروض سيادتك تحطى فيها الغنوة اللى تعجبك
بس لازم تكون أصلا موجودة فى جهازك
يعنى دوسى
browse
تروح مفتوحة شاشة على الديسك توب بتاعك و أختارى أى غنوة بس بشرط تكون
منتهية ب mp3 موش حاجة تانية يعنى هيا أصلا بتشتغل على برنامج الwinamp بس موش حاجة تانية
بعدين تدوسى على كلمة
upload
هتلاقى شريط أزرق فى أبيض عمال يلف و دا معناه إن التحميل شغال
أستنى لحد ما يخلص بعد دقايق و يفتحلك صفحة جديدة فيها بيانات
موش مهم تكتبى فيها حاجة و دوسى على الكلمة اللى فى الآخر
اللى هيا
submit
و متسألنيش يعنى إيه عشان نص الكلام موش عارفه و بجيبه بالويم كدا و بالفكاكة
كدا سيادتك هتلاقى صفحة جديدة فيها
upload music complete
الحمدلله كدا إنتى سجلتى الغنوة بتاعتك فى صفحتك الخاصة
بصى فوق كدا فى الترويسة
هتلاقى كلمة profile اول كلمة على الشمال دوسى عليها
هيدخلك صفحتك الخاصة اللى متسجل عليها غنوتك و اى غنوة بعد كدا
إضربى بعينك كدا نواحى اليمين تحت كلمة youre music
هتشوفى تحتها لينك غنوتك اللى إنتى دخلتيها
دوسى على اللينك دا
تلاقى صفحة الغنوة و هتسمعيها بتشتغل من البلاىليست الموجود قصادك على الشاشة
و هتلاقى تحته شريط مكتوب عليه
to embed this content, copy & paste the code below
دوسى على الشريط اللى تحته هتلاقيه بقى لونه أزرق هوه دا ال"code "
و خدى نسخة منه و روحى على مدونتك
صفحة الملوخية
يوووه
قصدى صفحة التخطيط
إفتحى أضافة عنصر صفحة
و بعدين إختارى HTML/JavaScript
و أفتحيه و حطى فيه الكود اللى إنتى أخدتيه من صفحة الغنوة
و دوسى حفظ التغييرات
و حفظ كمان فى صفحة التخطيط
أرجعى لمدونتك تانى و ادخليها كدا
المفروض تسمعى إيه؟؟؟
الغنوة
و هولع فى نفسى لو ما أشتغلتش !!!
عموما أتمنى اكون شرحت كويس بس أنا عارفانى خايبة قوى فى الشرح
بس مين عارف ؟؟
يوضع سره
آه قبل ما أنسى يا خيخة الموسيقى بتاعة دمى و دموعى و إبتساماتى اللى عجباكى موجودة فى المكان دا
أول واحدة فى القايمة تحت إسم
hopeless-love
شفتى حتى إسمها حزين ؟؟
لازم تنزليها على جهازك الاول و بعدين تبقى تحطيها على صفحتك
فى موقع itoky
تحياتى يا نوران و أى حاجة تعصلج قوليلى
و يا رب أى حد يقرى البوست يستفيد منه و يفيدنا معاه
و أهو الواحد كل شوية يتعلم حاجة فى الكمبيوتر
و كتر خير الدنيا
وعلى طريقة آبى الفيكونية
كان معكم إستاذ دكتور لواء مهندس إتصالات فنية عسكرية مدرعات
فاتيما أم يوسف أفندى رفعنا العلم

64 كلام بيطبطب على قلبى

وصلة صراحة تانية  

Posted by: فاتيما in

يا أخواننا اللى بتعملوه دا حرام و الله
موش ممكن كم التشجيع و المساندة دى كلها ؟؟
ليا أنا و يوسف ؟!!
و كلمة بنحبك و بنحب يوسف دى
معقول بتتقال بجد فى الواقع يعنى أنا صاحية و موش حلم ؟؟!!
ربنا يسعد قلبكو بجد
التعليقات على وصلة الصراحة اللى فاتت إديتنى صورة شبه كاملة عن اللى ممكن اكون بمر بيه
و منيش فاهماه قوى لكن كلامكم ساعدنى أفهمه
اللى حصل إنى لقيت نفسى بدور فى دايرة مغلقة مبخرجشى منها الأ نادراً
و لإنى موش بكتب فى اللا محيص كان لازم أقف شوية مع نفسى افكر
هيا الناس دى هتستحملنى لحد إمتى ؟؟
و هفضل أستنفذ مشاعرهم الجميلة دى لغاية ما فى يوم أصحى الأقى محدش بقى بيجى خالص ؟؟
قررت فى لحظة متهورة إنى لما اكتب فى حاجة تخص مشاعرى تجاه يوسف و كالعادة هتكون حزينة
إنى أرفع التعليقات عشان محدش يضطر يكتب من باب العطف و التضامن
الحركة دى قوبلت بردود أفعال متابينة
ناس قالتها بصراحة إنه شغل عيال زى كلاكيت تانى و تانى
و ناس حبت تنمق الكلمة شوية و قالت متبقيش حساسة كدا زى الطائر الحزين
و ناس يا حبايبى إفتكرت إن هيا السبب فى قرارى دا زى خمسة فضفضة و ميادة قاف ميم و هيرو
و ناس إستخدمت مصطلح كبير قوى على العبدةلله و قالو نضج تدوينى زى مراكبى نبع الحكمة
و ناس يا يعنى إتخضت و قلبها كالها عليا بشكل جامد زى رودى بنوتة مصرية و أخويا الغالى سوووو
و ناس جت فيها كدا و لسه يا دوب بيقولوا معايا يا هادى زى لونج ديستانس و برقش و الغزالى
و ناس بتصارحنى إنى سلبية و بضعف نفسى بنفسى و لازم اخد موقف اكثر قوة من ذلك
و أكتب بشكل إيجابى اكتر و احاول أصلح امورى زى بنت القمر و وجهة نظرى
و ناس بتقول إنها بتستفيد بجد من تجربتى فى حياتها الحالية أو المستقبلية زى آبى و مفقوعة مرارتها
و ناس تكتفى إنها هتدعيلى و تدخل تطمن عليا بغض النظر عن أى حاجة بكتبها و بيتقول إنها هتشجعنى على أى حال مهما كان الموقف ولإننا بنكتب لروحنا اولا قبل ما نحاول نرضى حد تانى زى موناليزا و دودا و واحدة مفروسة
و أهو ده عيبه و أحمد مبارك و خالد همس الأحباب و قطة الصحراء و البت خيخة اللى موش عارفة
هيا مخاوية و لا إيه
لأنى كنت بفكر فى فكرة البوست الجاى تكون عن ممتلكات يوسف و لعبه و حاجاته
و ناس خدتها بهزار عشان لو أتكلمت جد هتقولى كلام يزعلنى زى زيانور
و ناس ماقلتشى حاجة خالص لإنها مترقبة من بعيد بس أنا عارفهم و عارفة إنهم مهتمين بجد لكن فى صمت
و الكل فى الغالب الأعم بيقول بنحبك و بنحب يوسف ( ربنا يخليكوا لينا يا رب )
وبيعاتب برقة و لطف زى سكر و يطالبنى أجمد و أبطل الحركات دى
عشان إحنا إصلا موش ناقصين تباعد و كفاية علينا خالتى فرنسا و اللى عاملاه فينا
بفراقها المؤلم الذى أتمناه أن يكون مؤقت
و أنا حتى الآن لم اكتب بوست عنها لأن فكرة أبو حجر العسقلانى عجبتنى اكتر
و حطيت ليها نداء على الشريط الجانبى
و هفضل حطاه لحد ما تستجيب للنداء ...
واللى عاجبه الشكل يتفضل ياخده عنده فى مدونته عشان كل ما تفتح مدونة من بتوع أحبابها
و قلبى حاسس
إنها أكيد بتعمل كدا
تلاقينا بنقولها أرجعى يا خالتى فرنسا
أنا حطيت صورتك فى المكان بتاع يوسف عشان تعرفى إنتى غالية عليا إزاى
و غالية علينا كلنا
و حتى تعودى ...كلنا بنحبك و بنفتقدك
و أصلاً أصلاً يا بنتى
هيا دى ناس ينفع حد يسيبها ؟؟!!!
تحديث
فرنسا رجعت بالسلامة و كانت بتعمل عملية
و الحمدلله تمت بسلام بس هيا حبت متقلقناش عليها
ربنا يتمم شفاها
و ربنا ما يحرمنا منها أبداً
و تعيش فرنسا حرة مستقلة

43 كلام بيطبطب على قلبى

وصلة صراحة  

Posted by: فاتيما in


إحساس سخيف جداً
إنك تكتشف فجأة إنك بقيت تقييييل معنوياً
يعنى حملك بقى صعب على قلب اللى قصادك
إنت عمال تشتكى و تجتر فى مأساتك كل شوية
و اللى قدامك عمال يطبطب و يواسى
و يقولك معلش بكرة تفرج
إنت قاعد تبتز فى مشاعره
و هوه بيستحمل
و يقولك معلش بكرة تتعدل و هتشوف
إنت شغال عياط و نهنهة على روحك
و هوه موش عارف يقولك إيه تانى بس عشان يقدر يريحك ؟!!
دا بالظبط حالى و حالكم معايا
بقالكم أربع شهور من ساعت ما فتحت المدونة دى
البداية كانت مشجعة و منبئة بشىء مختلف
أنا بكتب عشان هدف محدد
و إنتم بتسمعونى و تردوا عليا
بوستات متتالية عن علاقتى بإبنى
و تعليقات متسائلة أومال هوه فين ؟؟
بوستات متتالية عن عذاب البعد
و تعليقات حنونة تدعو للصبر
تصدقونى لو قلتلكم بصراحة
علاقتى بيكم من اجمل التجارب فى حياتى
أصلاً هيا حالياً اجمل ما فى حياتى بعد يوسف
لكن الواحد لما بيحب حد لازم يخلى عنده دم
و يبقى حسيس زى ما جدتى كانت بتقول
يعنى معملش زى الصاحبة الرغاية الشكاية البكاية اللى كل يوم تمسك التليفون و تتصل بصاحبتها
تقعد ساعتين تلاتة تشتكيلها من الدنيا و أحوالها الزفت و مشاكلها
مع جوزها و عيالها و الجيران و الكون
مشاكل شكاوى عياط و نكد فى نكد
دا حالى هذه الأيام معاكم و محدش يقولى
لأ أبداً موش كده خالص !!
طب إسمعوا كدا
- يوسف بعيد عن حضنى
- معلش ... بس موش المفروض تكون الحضانة معاكى ؟؟
- المفروض بس مينفعش عشان الظروف
- يوسف وحشنى و عاوزة بس أشوفه و لو من بعيد
- معلش .... بس يعنى ما ترفعى قضية رؤيا و تشوفيه
- لااااا .... مقدرشى عشان عندى ما يمنعنى
- يوسف بيكبر و خايفة ينسانى و يكرهنى
- معلش ... عمر الأبن ما ينسى امه
- لا ... برضو خايفة من دا
- يوسف كان كل الدنيا و حياتى من غيره و لا حاجة
- معلش ... طب ليه متحاوليش تشتغلى
- مانا بحاول أرجع شغلى بس فيه مشاكل لازم تتحل الأول و عاوزة وقت
- يوسف إتظلم فى الدنيا بسببى و مستقبله غامض
- معلش ... لو محتاجة أى مساعدة من أى نوع أحنا أخواتك و على أتم أستعداد
- لأ متشكرة متتعبوش نفسكو لما احتاجلكو هطلب بنفسى
يوووووووه
هوه كل ما تقولولى على حاجة أقفلها فى وشكو كدا ؟؟
طب مطلوب منكو إيه تعملوه مثلاً
طبطبة
طبطبتو
مساندة
ساندتو
عروض جدية للمساعدة
و عرضتوا
إييييه بقى ؟؟
طب أكون سخيفة و أكمل وصلة الصراحة معاكو ؟؟
أكمل ....
يا أصدقائى أنا فى البداية و حتى اللحظة اللى بكتب فيها البوست دا مازلت على إتفاقى مع نفسى
و العقد المبرم مع عالم المدونات من اول بوست
العقد ينص على إنى بكتب عشان روح قلب ماما قبل أى حد تانى
موش عاوزة حد يسقفلى و لا يقولى برافو
مع إن الكلمة نور
لكن لأن عندى احساس ما
( يمكن يكون سببه إنى بتفرج على أفلام وقريت زمان روايات عاطفية )
فبالتالى عندى هاجس بيطاردنى إنى ممكن اموت فى أى لحظة قبل ما يرجع يوسف
و هوه جايز يكون أعتاد على عدم وجودى معاه
بس دا لا يمنع إنه ساعات هيفكر فيا و لو من باب الأنسانية
و خصوصاً كل ما يكبرو يتقدم بيه العمر ...
عاوزة أسجلله كل حاجة مريت بيها فى بعده عنى
عاوزه يعرف إنى كنت بفكر فيه طول الوقت
و مفيش ثانية ضاعت من البعاد الإ و هوه فى قلبى
كنت فاكرة لما بدأت المدونة دى إنى بكتبله هوه و بس
و محدش أصلاً هيهتم
بعد شوية لقيت ناس بتدخل و تهتم تسيب تعليق و تساؤل و دعاء
الوقت مر و التعليقات زادت و دا اسعدنى جداً لدرجة
نستنى
إن كل شىء و له حدود
إذا زادت إنقلب معناها
و هوه ما يحدث من مدة بسيطة من بعض التعليقات
محدش جرحنى بأى كلمة
بس بقيت أحس إن كتير من التعليقات لمجرد التواجد عشان مزعلشى
لكن حسيت ما بين السطور بملل و إحساس بالعجز يبدو إنى مررته ليكم عبر تدويناتى عموما
و يظهر إن رادار الإحساس عندى بقى مفوت و بقيت بضغط على مشاعركم دون وعى
يعنى إيه المطلوب منكم اكتر من عرض المساعدات و محاولة الفهم و الدعاء و الطبطبة؟!!
و الله حرام عليا
اللى بعمله فيكم دا
كفاية بقى وجع لقلوبكم الطيبة و الجميلة
و بجد موش سخرية و الله دا نوع من الوقفة مع النفس و النظر بعين تانية
الملخص عشان مطولشى عليكم
إنى قررت بشكل جدى إنى لما اكتب بوست عن مشاعرى تجاه يوسف
هرفع التعليقات
عشان محدش يضطر يكتب شىء رغما عن مشاعره الحقيقية عشان بس يجاملنى
و ميجرحنيش و خلاص .... لأنه موش قادر يعملى حاجة غير كدا
و يتصرف ضد قناعاته هوه الشخصية
و كمان لأنى بكتب دون تفكير فى ردود الأفعال و التفسيرات المحتملة من ناحيتكم
يعنى آخر بوست كتبته مكنش نوع من جلد الذات مطلقاً
أنا جلدتها من زماااان و اللى حصل حصل
بس كل الحكاية إنى زى ما قولتلكم بسجل و اوثق علاقتى بإبنى
بكتب كل حاجة عاوزة أقولها و توصله كاملة بعيوبها و محاسنها
عاوزة أغسل روحى من كل ما شابها السنين اللى فاتت كلها
حلوة كانت و لا وحشة
سعيدة و لا تعيسة
مبهجة و لا مؤلمة
و أقف قدام يوسف بكل وضوح
أعرفه ماما كانت و بقت إيه بسببك و عشانك
مجاش فى بالى إنكو هتفتكرونى بعذب فى روحى و امسكلها الكرباج
و حتى لو عملت كدا تانى
و كتبت عن عملية التعذيب دى بوست جديد فى المستقبل
هبقى أرفع التعليقات ساعتها أحسن
موش عاروزة حد يفهمنى غلط و لا يفتكر إنى بصادر على رأيه
أنا عاوزة أريحكم من واجب عاطفى ثقيل
مجبرين على عمايله رغماً عنكم
أنا بحبكم بجد
و موش عاوزة حبى يتلف حوالين قلوبكم يخنقوها
أه و عايزة كمان أعتذر لأصحاب ال 22تعليق فى البوست اللى فات "حقك عليا "
و أقولهم حقهم عليا
و كفاية دعاهم و كلامهم الحلو
و أشكرهم من قلبى
و أشكركم كلكم
يا أصدقائى فى العالم السحرى
شكر كبييييير قوى
على
وجودكم حقيقى فى حياتى

36 كلام بيطبطب على قلبى

حـقـك عـلـيـا  

Posted by: فاتيما in

حقك عليا ياحبيب ماما
إنى سمعت كلام قلبى بس لما جيت اتجوز و رفضت اشغل عقلى نهائياً رغم
إنى متعلمة كويس والله ومخى موش فاضى قوى
إنى إبتزيت مشاعر امى و أبويا و أجبرتهم على قبول إنسان غير مناسب ليا إطلاقاً
و دفعتهم لتقديم تنازلات هائلة تحت ضغوط نفسية
إنى أفسدت حياة اخواتى الأتنين بدون أى ذنب أقترفوه و دفعوا معايا
فاتورة العذاب و البهدلة لمدة سبع سنوات كاملة دون أى تخاذل ليوم واحد
إنى عذبت امى سنين طويلة و مقدرتش تضحياتها و رغم كل مصائبى و عيوبى
ما زلت طفلتها المدللة و كل دقيقة بقضيها معاها بتخلينى أتيقين قد إيه أنا ام فاشلة مقارنةً بها
إنى أسأت أختيارشريك الحياة لأنه كان من بيئة و تعليم و ثقافة مختلفة تماما عنى
و رغم إن جاتلى نصايح كتير من كل الإتجاهات تحذرنى من سوء إختيارى
أنا بس اللى إتغابيت
إنى اخطأت لما رفعت على أبوك قضايا عشان اخد حقوقى و أتطلق لإن دا أستفزه
و خلاه يهد المعبد على ادمغتنا كلنا بس صدقنى مكنش عندى حل تانى ساعتها
عشان احمى نفسى
إنى لما المشاكل و القضايا إبتدت و لاقيتنى عاجزة عن صد الضربات المتتالية دعيت ربنا إنه يخدك عنده
وعشان تصورت إن فوق فى السما محدش هيقدر يعذبك
و لا يهوب ناحيتك و لأنى موش قادرة احميك من شياطين الأرض
إنى هربت بيك على مكان بعيد عن كل اللى يعرفونا و عيشتك فى ظروف غير طبيعية
لطفل فى سنك و بسبب حاجات و أخطاء ملكشى اى ذنب فيها
إنك إتحرمت سبع سنين من إنك تشوف ابوك و تندهه ببابا و كمان أبوك إتحرم منك
و ربنا بيخلص الذنب دا منى دلوقتى
إن ظروفى الصعبة كانت السبب فى حرمانك من دخول المدرسة فى معاد بدرى
إنى السبب فى إنك عشت معايا فى حالة حصار و وحدة و بعد عن الناس و الحياة الطبيعية زى خلق الله كلهم
أن لما المشاكل خلصت و رجعنا مكنتش أقدر احتفظ بيك و لا ينفع تفضل معايا زى ما كنت عايز و بتتمنى
إنى مقدرتش اسيبك تاخد معاك كل لعبك اللى بتحبها و لا القطة الرومى زوزو و لا حتى الارنوب نوتى
إنى مقدرتش اكون أم قوية بما يكفى أنى أوعدك بإنى أقدر أرجعك أو حتى أشوفك فى أى وقت
و لا أقدر اهوب ناحية سور المدرسة اللى إنت فيها عشان ألمحك من بعيد
إنى أم ضعيفة لإنى سبتك تواجه المجهول و تدخل دنيا جديدة عليك على غير رغبتك
و لا حتى فى الوقت اللى تختاره
إنى مقدرش أوعدك أنى أوفرلك أى حماية و أمان لو رجعت تعيش معايا بحكم محكمة لأسباب كتير
معرفشى أقولهالك دلوقتى
إنى غلطت كتير فى حقك و رغم غلطاتى الكتير دى كلها بس مكنتش مقصودة و الله
و لا كان دا أبداً تخطيطى لحياتنا أنا و انت و أبوك
و عمرى ما تخيلت ثانية لما ولدتك إنى هحطك فى الوضع الغريب و المؤلم دا فى يوم
أنى بحبك أكتر من روحى لكن معرفتش اترجم الحب دا صح و إنى بدفع تمن أخطائى فى حقك دلوقتى غالى قوى
من عذابى فى بعدك عنى
إن الزمن لو رجع بيا تسع سنين لورا كنت هطلب من ربنا يكونلك أم تانية غيرى
لأنى تستاهل يكونلك أم احسن منى بكتير
و حقك عليا

22 كلام بيطبطب على قلبى

مـشـوار طـويـل  

Posted by: فاتيما in

إمبارح كان عندى عشرين
فى تالتة جامعة و بعيش أجمل ايام حياتى
الدنيا حلوة قوى
و اللى حواليا كلهم نور فى وشوشوهم و قلوبهم
و بكرة دا بتاعى أنا
هعمل فيه ما بدالى
هحب و اتجوزاللى بحبه
و اخلف خمس عيال يكونوا أسعد و احسن ناس
الكل هيشاور على أسرتى و يحسدنا على سعادتنا و حالنا اللى يفرح
لكن
اللى بحبه و بتمناه بقى لواحدة تانية
اتجوزت أنا واحد تانى خالص
و خلفت يوسف
إكتشفت إن جوازى كان غلطة كبيرة فى حقى و حق إبنى و اهلى
حبيت أصلح الخطأ كلفنى التصليح غالى
كلفنى سمعتى و كرامتى و شقتى
و جهازى كله من اكبر قطعة موبيليا لاصغر معلقة
كلفنى شبكتى و كل اللى كتبهولى أبويا من فلوس
كلفنى عزة نفسى قدام قرايبى و معارفى و جيرانى
كلفنى سبع سنين من شبابى و أعصابى و مستقبلى
ابويا راح من غير ما اشوفه
و فى آخر المطاف كلفنى إبنى الوحيد
اللى مطلعتش من التجربة السيئة دى إلا بيه هوه بس
بقالى سنين بيعدى عليا عيد ميلادى و أنا حزينة
و بعمل كشف حساب مماثل للمذكور أعلاه
فأقرر محتفلشى و لما حد يقولى كل سنة و إنتى طيبة
أرد بتهكم و أقوله : طيبة !!
طب إزاى ؟؟؟!!
السنة دى غير كل سنة
الوضع أصبح محير
موش هنكر أبداً إن مع كل ما سبق
بقى فيه تحسن كبير
على الأقل رجعت اعيش وسط أهلى من تانى
و فيه إحتمال ارجع شغلى قريب لو ربنا اراد
و صديقات عمرى ما زلن يبحثن عنى و يسئلن بإستمرار
و أصبح عندى مدونة تربطنى بعشرات القلوب الحلوة اللى بترجعنى للدنيا من جديد
لكن
فى وسط كل هذا مفتقدة يوسف قوى
الكام سنة اللى فاتوا كان أول واحد يقولى
كل سنة و انتى طيبة يا ماما
و كان الوحيد اللى بيحتفل معايا لمدة ست سنين عجاف
الناس عادة بتطفى الشمع و تتمنى امنية للسنة الجاية
عشان تتحقق
يعنى ممكن طيب أقدر أطلب أنا كمان ؟؟
خلاص هقول
يمكن حظى المرة دى يطلع حلو و اللى بتمناه يحصل
يا رب
لا يكتر عليك إنك تجيب طلبى و دعائى
متحرمنيش من وجود يوسف معايا السنة الجاية لو كان لينا عمر
و ساعتها هعمل كشف حساب أحسن من كده
هبطل أزعل من نفسى
و هبطل ألومنى على الفشل و الأخفاق
من شوية
صحيت من نومى أغسل وشى و أبص فى المراية
و أقولى
إمبارح كان عمرى عشرين
النهاردة بقى عندى خمسة و تلاتين
ياااااه
دا كان مشوار طويل قوى

86 كلام بيطبطب على قلبى

لما قابلته مرة صدفة  

Posted by: فاتيما in


مشهد فلاش باك
أكتر من عشرين سنة ورا
إحدى الدول الخليجية
أنا و اخويا الأكبر منى بسنتين
قاعدين فى البيت وقت الضهر
و معاد مرواح المدرسة المسائية باقى عليه أربع ساعات
خناقة جامدة تندلع بينى و بينه على مشاهدة التلفزيون
هوه عاوز يشغل فيلم اجنبى فى الفيديو
و أنا عاوزة أشوف حلقة الشهد و الدموع
شكل الخناقة بيتطور من التراشق بالألفاظ لمرحلة إستخدام القوة و تنتهى بأختكو
و هيا حاضنة التلفزيون بإصرار عشان أمنع تنفيذ المخطط
و لإن الحلقة خلاص بدأت
راح شددانى من ضهرى
رجعت لورا لوحدى ؟؟
لأ طبعاً
روحت واخدة التلفزيون معايا و بمنتهى السلاسة أروح سايباه
يقع على الأرض و يتكسر
المشهد أصبح كالآتى
أنا واقفة ببص للتلفزيون و هوه واقع على الأرض عمالة أصرخ و أشتم
أخويا ينظر لى بغيظ و لمحة تشفى إنك تستاهلى اللى هيجرالك لما بابا يعرف
ماما اللى كانت متابعة الموقف بذهول تنظر الينا فى دهشة
و تتجه الى التليفون لتطلب بابا صارخة
- شوفلك حل فى ولادك الأتنين بوظو التليفزيون و ماسكين فى خناق بعض
و بنتك مولعة الدنيا موش قادرة عليها
طبعا بابا بخبرة و ذكاء حب يفض الأشتباك و يبعد البنزين عن النار فقالها
- طب إبعتيهالى الشغل دلوقتى و لما ارجع هشوف حكايتهم إيه و اطين عيشيتهم
طبعاً الأول غلست و بعدين ضربتها فى دماغى و قلت التهزيىء فى الشغل
هيبقى أرحم و يمكن ميبقاش فيها ضرب
لبست و نزلت روحت شغل والدى اللى كان جنب البيت بشارعين
وصلت الشركة لقيت بابا قاعد فى المكتب ماسك ماكيت مجلة الشركة اللى هوه بيحررها
بصفته رئيس قسم العلاقات العامة و المسئول الأول عن أعداد المجلة من الألف للياء
قاعد جنبه مصور محترف و كان باكستانى الجنسية
و بيتكلم عربى مكسر
شبيه باللغة العربية بتاعة شعوب و قبائل شبة الجزيرة العربية قبل مجىء الأسلام
يعنى كل كلمة
عاوزة عامل مطبعة عشان يفك حروفها و يلمها تانى عشان تتفهم
أول ما دخلت و بوزى قدام تلت تشبار لقيت المصور بيسلم عليا
- كيف حالوكا ؟؟
نطقه للسؤال خلانى أبتسم و رديت بطريقته
- خيرون الحمدولله
بابا شاورلى على كرسى على جنب و قاللى
- أقعدى يا هانم
قعدت من سكات عشان هانم دى معناها موش مطمئن
قعدت أتفرج على اللى بيعملوه
و المكتب مليان ألوان و أوهو و كوريكتور و مساطر
و مقص و حاجات كتير كدا
و قعد السيد الوالد يشغلنى
راح مدينى جزء الأبراج و قالى رتبيه
كان دايما بيتريأ
على الأبراج و حظك اليوم اللى بتبقى فى المجلات و الجرايد
و يقولولى دى قص و لزق
و مكنتش بفهم ساعتها قصده إيه
النهاردة فهمت
أنتهى الدوام الساعة أتنين و فى طريقنا للمرواح
و فى وسط الطريق الأقى بابا بيجرى ناحية واحد واقف قدام شيراتون العاصمة
بيوقف تاكسى و جنبه شنطة
بابا وقف يسلم عليه بحرارة و لقيته بيشاورلى عشان آجى أسلم
قربت أسلم على عمو المهم صاحب بابا كنت فى نص هدومى و هوه بيعرفنى ليه و يقوله
- دى بنتى المفترية فى سنة تانية أعدادى
الراجل مد إيده يسلم عليا و أبتسم و أنا محرجة موووت
- و دا يبقى محمود السعدنى الولد الشقى
بصيت فى الأرض و قعدت أعصر فى مخى
محمود السعدنى محمود السعدنى ... أنا عارفة الأسم دا ؟؟
- آه موش حضرتك تقرب لصلاح السعدنى الممثل ؟؟
أنا أصلى بحب التمثيل بتاعه قوى بس
يا ريت حضرتك تبقى تقوله إن اللبس بتاعه موش حلو و يا ريت يلبس على الموضة
و كأن صلاح السعدنى دا يبقى الولد جارنا اللى كان ساكن فى الشقة اللى قصادنا زماااان
و كنا بنلعب مع بعض دايما و لازم يسمع نصايحى و يبطل خيابة بقى
و بابا قاعد يبرقلى عشان أسكت
وأنا و لا كأنى بهبل فى الكلام
عيلة يا جماعة فى تانية إعدادى بقى
و لسه خارجة أصلاً من خناقة
و موعودة بعلقة محترمة لما نروح
و الدنيا حر و رطوبة
و عندى مدرسة بعد ساعتين
و كمان فاتتنى حلقة من الشهد و الدموع !!!
يعنى الواحد هيفكر فى إيه و لا إيه ؟؟
المهم الراجل بصلى بصه كدا نظام دى عندها حاجة فى دماغها معلش
و راح مكمل كلام مع بابا
فى أحوال الصحافة و آخر أخبار الدنيا هنا و فى مصر
و أنا بقى واقفة أسمع و أنا متململة
و كل شوية أركن أيد على خد و أنفخ
و بعدين أنقل الأيد التانية على الخد التانى و أبص للسما
و المصور الباكستانى قاعد يصورنا و يشاور لى و يقول
- ماما ... سمايل
و أنا عاوزة الأرض تنشق و تبلعنى
و نخلص بقى من الوقفة دى
عاوزة أروح
المهم المحادثة خلصت و بابا عزمه على البيت بس كان هوه أصلا طالع على المطار بعد ساعات
فمنفعشى
سلامات متبادلة و تحيات
و كل واحد راح فى إتجاه
فى السكة بابا قعد يتكلم عنه و يقول عنه حكايات كتير و أنا أحاول أفتكر فى الأسم دا و فجأة
- هوه موش دا اللى ليه كتاب عندنا أسمه الولد الشقى فى السجن و بيكتب فى آخر صفحة فى مجلة المصور
دا بيفطسنى من الضحك ساعات الله !! ... موش دا اللى السادات طفشه من مصر
و عمل كتاب عن رحلاته فى أرض الله الواسعة بعد كده ؟؟
- أيوه هوه أومال أنا بقول إيه من الصبح بكرة لما تكبرى هتعرفى الراجل دا يبقى مين ؟؟
- يا خسااااارة
طبعاً إنتهى الموقف عند الكلمة دى لكن بمرور الأيام و قراءة المزيد
من مقالات هذ ا الرجل الجميل
لمبة فى قلبى و عقلى نورت
الأول كنت بستتقل دم كتابته و أزهق منها بسرعة
لأنه كان بيكتب عن ناس كتير معرفهاش
أسامى و شوارع و أحداث غريبة بعيدة عنى كانت لا تعنينى و لا تمسنى فى هذا الوقت
لكن لما بقيت فى ثانوى و دخلت الجامعة
الحال إتبدل
قابلت ناس كتير و حياتى وسعت
و أكتشفت إن الناس اللى كان السعدنى بيكتب عنهم موجودين حواليا من لحم و دم
و مقالاته الأخيرة دائما كانت بتشدنى
فى آخر صفحة فى الأخبار
طريقته فى السخرية و الردح أحيانا بشياكة لمن يتصورون أنه موش فاقسهم
و لسانه هيسكت عليهم
حبيته قوى
و أحتفظت بالصور اللى أتصورتها معاه أنا و بابا للذكرى
عشان أفتخر إنى فى يوم وقفت جنب الراجل دا فى شارع
كان لسان حال ولاد البلد الجدعان اللى محدش يستجرى يضحك عليهم
نموذج للصحفى الواعى اللى دفع تمن رفضه إنه يكون مطبلاتى
و أجمل ما فى رحلة عمره جنب الحصيلة الهائلة من التجارب و النماذج البشرية الحقيقية بلا رتوش
حاجة تانية أجمل
و هوه أنه بيدى درس لأى حد بيشاور روحه يبيع نفسه و ينسى الناس
و دى القاعدة الثابتة الفعلية
فى الآخر ذهب المنتفعون جفاء
وبقى محمود السعدنى فى قلوب الناس
هقول إيه بس و لا إيه ؟؟
يا عم محمود
أنا أفتقدك فى الليالى السودا اللى إحنا عايشينها دى
لما ساعات أقعد أقرى فى كتاب من كتبك
أحس انك بتوصف حالنا دلوقت و كأنك لسه قارى جرايد أمبارح
و كأن بحق الأرض كروية و الزمن بيعيد نفسه
لكن فضولى بيدفعنى أسأل لو حالتك الصحية بتسمحلك تتابع اللى حاصل فعلا
كنت هتقول إيه ؟؟؟
هتقول إيه لما تعرف اللى حصل للعراق اللى شافت من غربتك راقات ؟
هتقول إيه على الحال المايل اللى بقينا فيه كمصريين نفسيا و ذهنياً و إنسانياً
و على كل المستويات ؟
لأ بقى ...
هتقول إيه لما تعرف مين اللى ماسك رئاسة تحرير الأهرام و الأخبار ؟؟!!
أتصور إنك هتقول
كلمة أبيحة
بخفة ظل و حرفنة كعادتك
و هتحزن قوى على ما وصلت ليه الكيانات الصحفية اللى كانت كبيرة
متهيألى
هتفرح بالصحافة المستقلة و الفضائيات
و كنت هتفرح بالمدونات
و تقول كام كلمة مشجعة ترفع بيها معنويات أصغر واحد فيهم لأعلى سما
لأن دا اللى بيعمله كل أستاذ و أب و صحفى عظيم زيك
و من حوالى سنة يمكن اكتر ... قريت لبلال فضل مقال فى جريدة الدستور
فى عيد ميلادك باعتلك كلام من قلبه
و يعدد أفضالك عليه و على كل حد قرب منك او قرالك أو حتى سمع عنك من بعيد
و كان بيحكى عن أول مرة قابلك فيها كان احساسه إيه و ركبه بتخبط فى بعضها و إحتضانك ليه
حسيت بمعنى كلامه بجد
لأنه موهوب و يستحق يكون تلميذك و أزعم أنه حالياً الألفة فى مدرستك
وً لأنى منلتش شرف إنى اكون عارفة قيمتك بجد لما قابلتك مرة صدفة
فأتمنى أقولك
بس المرة دى موش صدفة
عايزة أقولك ربنا يخفف عنك
و يزيح من عليك
و يجازيك حسنات على أى ألم بتحسه
و أقولك
إنى فرجت يوسف الصور و قولتله أنا متصورة جنب واحد
من أعظم كتاب الأدب الساخر
فى مصر و العالم كله
و عاوزة أقولك إننا فاكرينك قوى كل ما يضيق الحال
عشان رؤيتك فى الحياة دى موش بتتكرر عند ناس كتير
و صلاح عبدالصبور الجميل قوى زيك ... بيقول الكلمة نور
و دلوقتى الليل طال علينا
و فى الليلة الظلماء .... يفتقد البدر
مفتقدينك بجد
و لا أطفأ الله يوماً أنوارك
فى قلوبنا و عقولنا

46 كلام بيطبطب على قلبى

عـلى حـافـة الـيـم  

Posted by: فاتيما in


المكان بيتنا
الزمان
آخر ليلة قبل الرحيل
التوقيت
الساعة حداشر بليل
أنا و تيتة عمالين ندور فى الشقة من اودة للتانية
بنلم فى حاجاتك و نشيل و نحط
دا آه و دا لأ
طب بلاش لعب كتير عشان لو خدوها منك غلاسة متزعلشى عليها
فى هدوء أمر على أوضة خالك الأقيه ماسك الموبايل و أنت قاعد قصاده بيصورك
و يسألك أسئلة عن الفترة اللى قعدتها معانا و عايز تقول إيه لكل حد فينا
و إحساسك إيه و انت ماشى بكرة خلاص
مرضيتش أقف أسمع رغم إنك ندهتنى
لكن قولتلك هبقى أشوف التسجيل دا بعدين عشان تبقى مفاجأة
رنين التليفون و الموبايل لا ينتهى و الكل بيسأل خلاص هيمشى بجد ؟!!
معقول !! ... طب مفيش أى بارقة امل إنه يقعد؟!!
تتوالى الردود و الترتيبات و ينتهى التسجيل مع خالك و تأتى لحظات ما قبل النوم
فتندفس فى حضن تيتة و تقعد تتكلم معاها
لحد ما تروح هيا فى النوم و بعدين تيجى فى حضنى زى كل يوم
أسئلة كتير و كلام عن ما سيحدث غدا و أنا أضمك لحضنى و أنا أعجز حتى عن البكاء
و كأن البكى هيكون إهانة لهذا الموقف الذى يحتاج لإختراع نوع جديد من المشاعر لم يوصف بعد
أضمك ليا جامد و اخد حضونات كتير و أبوسك فى عينك فتضحك و تقولى
- هوه عشان هروح بكرة لبابا بتبوسنى عشان البوسات فى العين تفرق زى الغنوة ؟؟!!
أبتسم و أبدأ فى تلاوة النصايح المعتادة التى لطالما أرددها على مسامعك بس متفرقة
و النهاردة كان لازم أقولها متجمعة عشان مفيش وقت كتير
عاوزاك تكون ولد مؤدب عشان يقولو إن ماما عرفت تربى راجل
لازم تسمع كلام بابا و تكون كويس معاه عشان يحبك قوى و يفتخر بيك
حاول تصاحبه و تكونو أصدقاء عشان لما تطلب منه إنك تكلمنى او تشوفنى هوه يوافق علطول
لو حد من عمامك او جدتك او حتى بابا قالوا عليا كلام وحش متتدخلش فى الكلام و تعمل فيها زورو و تدافع عنى
أوعى تسمح لأى حد غير جدتك و باباك يشوفوك بلبوصة و أوعى حد غريب يدخل معاك الحمام فى المدرسة
إياك إياك حسك عينك تروح عند الجيران لوحدك و تدخل مع أى حد فى بيته من غير بابا
متنمش جنب حد غير بابا أو جدتك بس و لو حد غريب جه جانبك و قعد يبوس فيك أبعد عنه و قوله مبحبش كده
يا ريت متلعبشى فى الشارع خالص ممكن قصاد الشقة لكن تخرج بره مدخل العمارة لأ
عشان أنت عارف اللى بيخطفوا الولاد الصغيرين بقو كتير إزاى و أنا قولتلك أنهم بيعملوا
حاجات وحشة فى الأطفال عشان هما ناس مريضة نفسياً
لو لقيت نفسك لوحدك و مفيش حد معاك فى البيت متفتحش الباب لحد
و لو عرفت تكلمنى فى التليفون يبقى كويس قوى بس لو منعوك متعملشى مشاكل معاهم
لو جابولك أكل غريب منتش متعود تاكله متقولشى لأ من أولها دوقوه الاول و جربه يمكن يعجبك
متلحيش أنك تروح ماكدونالدز زى مكنت أنا وانت بنروح عشان ممكن بابا
يكون ميزانيته لا تسمح فبلاش تحرجه
عاوزاك تبقى شاطر فى المدرسة عشان إنت أصلاً ذكى و نبيه و بكره لما تكبر هتبقى احسن واحد فى الدنيا
متقلقش على ألعابك هتفضل فى مكانها و محدش هيقرب ناحيتها بالعكس هزودهالك
يعنى كل ما الاقى لعبة جديدة مكنتش عندك قبل كدا و هتعجبك هجيبها
كل ليلة قبل ما تنام عاوزاك تفكر فيا شوية صغننة و تبعتلى بوسة و الملايكة هتوصلهالى علطول
عاوزاك تعرف إنى بحبك و هدور على حل ترجع بيه هنا تانى معانا و متقلقش لو الموضوع دا خد وقت كتير
و لو قالولك عكس كدا متصدقهموش
كمان عاوزاك تعرف أن أهل باباك خناقاتهم معايا انا و أهلى لكن أنت ملكشى دعوة بكده
و إحنا العايلتين بنتخانق على مين يحبك و يعيش معاك و يسعدك أكتر
فخليك كويس و أفتح قلبك ليهم لأنهم بيحبوك زينا
و لازم ك.....
يوسف
يسوفة إنت نمت ؟!!!
نوم العوافى يا حبيبى
اضمك ليا أكتر و القطة بتاعتك تيجى تتحشر وسطنا كأنها حاسة بإنك ماشى
و عاوزة يكونلها نصيب فى وداعك
أبصلها بدهشة و أقول سبحان الله
أفتكر فجاة آية
عن واحدة كانت فى يوم مكانى
و عملت اللى بكرة هعمله و ارددها مرات ومرات
" وأوحينا إلى أم موسى أن أرضعيه فإذا خفت عليه فألقيه في اليم ولا تخافي ولا تحزني
إنا رادوه إليك وجاعلوه من المرسلين "
أتمتم بينى و بين نفسى
إنا رادوه إليك
إنا رادوه إليك
فلا تخافى و لا تحزنى
و اليوم أكررها كثيراً
و حتى ترد إلى حضنى
لا أملك سوى أن أخاف غصب عنى
و لا أستطيع أن أمنع قلبى من الحزن
لكن اللى ممكن أقوله دلوقتى
أنك وحشتنى قوى
و مطرح ما بتنام كل ليلة
هبعتلك بوسة مع الملايكة
و أقولك
تصبح على خير يا حبيب ماما

75 كلام بيطبطب على قلبى

إكـدب عـلـيـا مـن فـضـلـك  

Posted by: فاتيما in

تعا و لا تيجى
و اكذب عليا
الكذب موش خطية
فيروز اللى كانت بتقول كدا فى الغنوة لحبيبها
بتطلب منه يوعدها و لو بالكدب لأن الحقيقة صعبة و مؤلمة
أكيد زى ما كان عندها سبب لطلبها دا
فيه ملايين البشر اللى أنا و أنت منهم عندنا كمان
عشرات المبررات و الأسباب للكدب
أنا مثلاً
زمان كنت بكدب عشان أهرب من العقاب
أو عشان أستمتع بنظرات اللى بيسمعنى و هوه منبهر
بالحاجات العظيمة اللى معملتهاش
أو حتى عشان أعيش فى الخيال و أعمل لنفسى حياة موازية
غير حياتى اللى عايشاها
لكن لما كبرت شوية إبتدى الكدب يبقاله تبعات خطيرة
بدفع تمنها غالى
بطلت أكدب كتير و عمال على بطال زى زمان
بصراحة شديدة بقيت إنتقائية
يعنى أكدب فى حاجة بسيطة
موش هتضرنى و تاذى غيرى قوى لو أكتشف إنها موش حقيقة
و النوع دا من الكدب اللى بيقولوا عليه كدب أبيض
و الحقيقة أنا عاجبنى التوصيف دا قوى
لأن اللون الأبيض مريح للعين و القلب كمان
يعنى مثلاً
لما اكدب على يوسف
و أقوله إن باباك بيحبك أكتر من أى حاجة فى الدنيا
اكتر من الفلوس و الرغبة فى الأنتقام
لما أقوله أن باباك أتجوزنى لأنه كان بيحبنى فعلاً موش رغبة فى جوازة مجانية
لما أقوله إن باباك مخلاش أبويا يتكفل بمصاريف الزواج كلها ولا حاجة
لما أقوله أن باباك طيب و الله بس شخصيته ضعيفة قدام امه
و اخواته المحامين فسمع كلامهم و رفع عليا قضايا
ومقدرش يعارضهم
لما أقوله أن باباك خاف علينا أنا و انت لما القضايا و التهديدات كترت
و بقت خطيرة فراح قالنا سافروا بعيد لحد ما المشاكل تنتهى
لما أقوله أن باباك سافر الأمارات يشتغل هناك و بيبعتلك كل شهر فلوس
عشان تعيش و تنبسط و تجيب كل اللى نفسك فيه
لما أقوله أن باباك ملوش دعوة بتصرفات أخواته اللى فاوضونى على الطلاق
مقابل انهم يسيبونى فى حالى أنا و اهلى و يتنازلوا عن القضايا اللى عدت العشرين قضية
لما أقوله أن باباك مكنش سبب أبداً فى ضياع سنين طويلة من عمرى و عمرك
فى المحاكم و الأقسام
و مكنش السبب فى تأخر دخولك المدرسة لأننا كنا هاربنين من البطش
لما أقوله أن باباك و أخواته المحامين علمونى إن اللى يحاول ياخد حقه بالقانون
هياخد احكام زى ما هوه عايز لأن د ا مجرد حبر على ورق
و فى الآخر البقاء للحواة و بتوع التلات ورقات
لما أقوله أن باباك ميعرفشى أى حاجة عن شهادة الوفاة المضروبة
اللى عمامك قدموها فى المحكمة عشان
يوقفوا بيها حكم النفقة بتاعك و كأنك موش من لحمهم و دمهم
و عادى خالص إنهم يفوولو عليك بالموت
لما أقوله أن باباك مسدش نفسى و لا حاجة عن الدنيا
و موش هوه السبب فى إنى لن أثق فى أى أنسان
أقابله بعد كدا لو حتى كان لسه نازل حالأ قصادى من السما بجناحات
لما أقوله أن باباك موش هوه السبب فى إنى أفضل متغربة عن أهلى ست سنين بحالهم
و ماشوفش أبويا قبل ما يموت وأقف آخد عزاه
لما أقوله أن الخير دايما بينتصر على الشر يا حبيبى بس بياخد وقت شوية
تنهيدة طوييييييييييييييلة و صمت
ثم تساؤل
يعنى لو مكنتش كدبت على يوسف و قولتله الحقيقة اللى هيا عكس كل ما سبق
تفتكروا كان الولد ساعتها هيكون نفسيته شكلها عامل أزاى ؟؟
لو كنت شوهت الشكل المثالى للأب من وجهة نظره البسيطة كنت هصلحها بعد كدا أزاى ؟؟
و لما يوسف يكبر
و يفتكر كلامى عن أبوه اللى هوه كان كله كدب هيكون رأيه فيا إيه ؟؟
عموماً
الأسئلة لن أستبق إجاباتها و هاسيبها للأيام
بس السؤال الوحيد اللى متأكدة إنى عارفة إجابته من دلوقتى
لما يسألنى
يا ماما إنتى كنتى طول الوقت بتكدبى عليا
هبقى أقوله ساعتها
إيه المشكلة فى كدا يعنى ؟؟!!!
الناس أحياناً بتضطر متقولش الحقيقة و تكدب
و فيروز قالت
الكذب موش خطية

103 كلام بيطبطب على قلبى

تـعـيـش و تـفـتـكـرنـى  

Posted by: فاتيما in

أحـلام مـؤجـلـة  

Posted by: فاتيما in



عاوز أشترى عجلة و سكوووتر و لاسلكى على شكل سبايدر مان

عاوز أروح مسرح العرايس اللى ماما كانت بتروحه زمان و هيا صغيرة

عاوز أروح برج القاهرة و أطير بالونات من فوق و أشوف الهوا هيطيرها لحد فين

عاوز أزور ملجا للأيتام و نتبنى أخ يروح معايا البيت زى ستيوارت ليتل

عاوز أعمل عيد ميلاد كبيييير و تييجى كل عيلتنا تحضره

عاوز ماما تبنيلى بيت صغير من الخشب عشان يبقى المخبأ السرى بتاعى

عاوز أجيب كلب أربيه و تيتة ما تقولش لأ عشان الكلب هيخلى الملايكة تمشى من البيت

عاوز لما اكبر أفتح مطعم زى ماكدونالدز و ألعب فيه كل أصحابى و أأكل كل الناس ببلاش

عاوز أدخل حفلة الأطفال فى سينما مترو عشان ماما ودتنى و أنا صغير بس موش فاكر كان شكلها إيه

عاوز نعلق زينة و فانوس رمضان فى بلكونتنا عشان يبقى شكلها حلوو الجيران تبص علينا

عاوز أروح إسكندرية مع هشام و سلمى ولاد خالى ونلعب على الرملة و ننزل نعوم فى البحر

عاوز لما أكبر أبقى فنان تشكيكى أو مهندس زى خالو هانى أو مذيع عشان ماما بتقول إنى رغاى

عاوز أزور المتحف المصرى و أشوف التماثيل بتاعت الفراعنة شكلها إيه و نروح كمان نشوف الأهرامات

عاوز أخرج فى كل حتة مع ماما و تيتة و ماجد من نغير ما نخاف من حد يخطفنى

عاوز لما أروح المدرسة بتاعتى أقعد كتير و ألحق ألعب مع العيال فى الفسحة قبل أروح

عاوز أبقى زى بن جتز و اخترع الويندو و أكون أغنى واحد فى الدنيا زيه

عاوز لما القاضى يودينى لبابا أروح أقعد عنده شوية و بعدين أرجع هنا تانى معاكى

78 كلام بيطبطب على قلبى

بـص ... شـفـت العصفورة !!  

Posted by: فاتيما in



- قطة و عصافير
- يا قطة يا عصافير
- قطة و معاها عصافير يا ماما
- مينفعش يا بابا نجيب الأتنين سوا... إنت موش بتشوف تويتى و سلفستر بيعملوا إيه فى الكارتون ؟؟!
- أيوه بس أنا هخلى بالى من العصفورة و موش هخلى القطة تيجى جنبها خالص
- طب بليل و إحنا نايمين هتعمل إيه ؟؟
منقدرش نمنع القطة من غريزتها أول ما تشم ريحة العصافير موش هتسكت إلا لما تاكلهم
بص أختار حاجة فيهم يا قطة يا عصافير
- خلاص عصافير
- ماشى آخر كلام ؟؟
- أيوه نجيب عصافير
- طيب
- و بعدها بشوية هنجيب قطة
- برضو!!!
تانى يوم كنا فى محل الحيوانات
البنت اللى بتبيع محتاسة فى سعر القفص و الحاجات
لأن مامتها راحت مشوار و موقفها مكانها لغاية ما ترجع
وقفنا انا و يوسف ننقى ألوان العصفورتين
و كل ما ننقى عصفورة البنت تقول ... لأ دا ولد ...
ننقى عصفور تقولنا .... لأ دى بنت
لحد ما فى الآخر أستقرينا على ولد أخضر رفيع و سفيف كدا
و بنت زرقا مكلبظة خالص و شكلها كدا شقية
و جبنا القفص بمشتملاته اللى هيا المسقى و حوض الاكل و المرجيحة
و بتاعة الكالسيوم دى موش فاكره اسمها كان إيه
المهم دفعنا و خدنا العصافير على البيت
و دقينا مسمار فى الحيطة و علقنا القفص
و إبتدت الطقوس التقليدية
- ماما إحنا هنسمى العصفورتين دول إيه ؟؟!
- و الله يا يوسف موش عارفة إنت إيه رأيك ؟؟
- سمى البنت و انا هسمى الولد
- طيب .... ممممم .... هسميها سوسو شكلها سوسو خالص
- ههههه و أنا هسمي الولد فوفو .... حلو؟؟
- يجنن طبعا .... فوفو و سوسو ... يا حلولى
- لو سمحت متتريأيش على أصدقائى و تجرحى مشاعرهم
- متراجعة ... خلاص خلاص انا أسفة يا فوفو بيه و يا سوسو هانم يللا بقى نحطلهم اكل
فى البداية كنت واخدة قرار إن رعايتهم هتكون مهمتى لوحدى
عشان منقارهم صعب قوىو لو عوروا الولد مرة هيكرهم و يتعقد منهم
أصلاً اول مرة أنا شخصياً أربى عصافير و معلوماتى عنها طشاش ...
بس اللى حصل بعد كدا خلانى أقول
جااااى
آجى يا مؤمنين أدخل إيدى جوا القفص أحطلهم اكل و لا حتة خيارة
يروحوا ناقرينى ولا أجدع شنيور
و لما آجى انضف مكانهم برضو إيدى متسلمش منهم
عارفين نقار الخشب بتاع الكارتون بتاع زمان دا
أهو العصفورتين كانو نقار الخشب و إيدى هيا الشجرة
أى أى .... يا ولا د اللذينا !!
إيه اللى أنا عملته فى نفسى دا يا ربى ؟؟
مانا طول عمرى بربى فى قطط وآخر إحترام
إيه بس اللى خبطنى فى دماغى و خلانى أسمع كلام يوسف ؟؟!
بقيت ألف إيدى بقماشة و ادخلها براحة كدا و هما برضو آخر شقاوة
و طول الوقت يصوصوا و يعملوا دوشة كبيرة بشكل مزعج خصوصا لما اقرب ناحية القفص
أقول دول خايفين منى و لا حاجة
و بكرة يتعودوا
- يوسف تعالى كدا جنب القفص ثانية واحدة
- ليه ؟؟
- معلشى بس تعالى فيمتو ثانية كدا عشان خاطر ماما
يوسف ينفذ كلامى
أبص الأقى العصافير سكتت خالص و أتكتمت
- طب إبعد كدا و تعال جنبى
الواد يبعد
الأقى العصافير عاملة دوشة و نازلة صوصوة
الله دول بيخافوا منه و لا إيه دول ؟؟!!
غريبة قوى الحكاية دى
لأ خدوا اللى أغرب بقى
فى يوم من ذات الأيام لقيت يوسف بيدخل إيده فى القفص
يحطلهم أكل و لعب من بتاعته
و أنا بكل فزع بصرخ فيه
- طلع إيدك يا يوسف لحسن تتعور
بكل هدوء
- متخافيش يا ماما دول طيبين خالص حتى شوفى كدا
و أشوف كدا دى الأقيلكم
سى يوسف ماسك العصفورتين كل واحدة فى إيد و بيخرجهم برا القفص !!!
و موش بس كدا
لااااااا
دا كمان بيحطهم فى جيب الشورت بتاعه و هما قاعدين جوه ساكتين و لا يفكروا إنهم يطيروا حتى
- يا خرابى يا يوسف .... عملت كدا إزاى يا واد ؟؟!!
- عادى خالص هما أصحابى و بنلعب
سبحان الله
طول الوقت كنت أقوله إن الحيوانات بتحب الاطفال قوى
مكنتش متصورة إن كلامى
هيتجسد بالفعل لحم و دم و ريش و صوصوة
طبعا بعد الواقعة دى
بقيت أتفرج على يوسف و العصفورتين كل يوم
و هما واقفين على كتافه شوية
و قاعدين فى جيبة شوية
و را كنين على حرف صندوق اللعب شوية
و بقى هوه المسئول الاول عنهم و مسئوليتى إقتصرت على التنضيف وراهم بس
هو أنا أصلاً أستجرى اهوب أيدى ناحيتهم ؟؟؟!!
و طبعا إلاهتمام إبتدى ياخد شكل تانى
- ماما
- نعم
- هوه سوسو موش بتخلف عيال ليه
- عشان العصافير مبتخلفش يا حبيبى العصافير بتبيض ...
- أيوه أيوه بشوفهم فى التلفزيون بيطلعوا من البيضة بس هيا بتجيب البيض إزاى ؟؟
- و الله يا يوسف موش عارفة هما ليهم موسم و طريقة معينة
بس أنا خبرتى قليلة فى العصافير نبقى نروح المحل و نسأل البنت هيا هتعرف أكتر مننا
بعد يومين كنا فى المحل و قابلتنا الست الكبيرة صاحبة المحل
(مامت البنت اللى باعتلنا سوسو و فوفو)
و قعدت تدينى فى فيتامينات و مقويات و حاجات للخصوبة
و بيت خشب صغنن كدا يتشبك فى القفص عشان العصفورة سوسو تبيض فيه
و قعدت تقولى على حبة تعليمات خلتنى احس إنها شوية كدا
و هتنصحنى نعملهم تلقيح صناعى
المهم خدت الحاجات كلها و حطيتها فى المية و شربوها و جه معاد التزواج
و الأتنين موش طايقين بعض و لا بيدخلو البيت الخشب و لا بيضة واحدة تلوح فى الأفق
فى الآخر إضطريت أقنع يوسف إنهم ممكن يكونوا لسه صغيرين على الخلفة
و إنتهزتها فرصة عشان أفهمه إن ساعات ربنا بيحرم عباده من الأطفال
لأسباب ما
و لازم المخلوق دا يقبلها عشان ربنا مبيعملش حاجة وحشة لحد
و الولد الحمدلله أقتنع
و مر الوقت و الصداقة تتوطد بين الاصدقاء التلاتة
لكن ....
و آ ه من كلمة لكن
شهر العسل بين يوسف و العصافير لم يدم طويلا
و تحطمت السعادة و الهناء على صخرة الفيروسات
- يوسف تعالى إدينى حضونة
- ييجى فى حضنى و بحذر معهود فى المواقف دى ... فيه إيه مالك يا ماما ؟؟
- بص إحنا لازم نضطر آسفين نبيع سوسو و فوفو لمحل العصافير تانى
- بفزع .... لأ دول صحابى حرام عليكى لا يمكن أتخلى عنهم
- إستنى بس هقولك ... أصل فيه مرض خطير بييجى للطيور و العصافير إسمه إنفلونزا الطيور
- خلاص نديهم من المضاد الوحوى بتاعى ( يقصد المضاد الحيوى )
- يا حبيبى مينفعش أصل العيا بتاعهم دا ملوش علاج لحد دلوقتى و لو قعدوا هيموتوا مننا
و لو مرضهم إتنقل لينا إحنا كمان هنموت
- بدفاع متشبث ... بس العاشرة مساءاً بيقولوا مصر مفيهاش الإنفلونزا دى أنا سمعت المذيعة بتقول كدا
- أيوه يا حبيبى صح المذيعة قالت كدا بس المرض دا فى بلد جمبنا أسمها تركيا
يعنى بعد أسبوعين تلاتة هييجى عندنا
(و دا اللى حصل فعلا بعد شهر تقريبا من بيع العصفورتين أصل عادةً المسألة بتبقى مسألة وقت )
- طب يعنى ألعب معاهم تانى أزاى عيونه بترغرغ
بمحاولة سريعة لإحتواء الموقف بسرعة
- بص إيه رأيك ننفذ إتفاقنا القديم ؟؟
- بتاع إيه ؟
- نجيب قطة
و هوه بيمسح الدموع من عيونه
- طب بس بشرط نجيبه ولد !!!
بعدها بيوم روحنا نبيع العصافير تانى
لقيت المحل مقفول
روحنا المحل اللى جنبه ... ما هو موش معقول هرجع بيهم البيت تانى
دانا ما صدقت إن يوسف وافق بسلاسة
كان شاب صغير اللى واقف و اول ما دخلنا خطف القفص بالعصفورتين بسرعة و لهفة
و سألنى متوجساً بعد تفحص شامل
- حضرتك عاوزة فيهم كام ؟؟
- اللى تدفعه موش هدقق معاك و خد القفص و الاكل دا كمان كنت شاريه و مالوش لازمة دلوقت
بخبث بيسألنى
- إنتى عاوزة تبيعيهم ليه ؟؟
ببراءة تامة
- أصلنا مسافرين و محدش موجود ياخد باله منهم خالص
و لتدعيم الأسباب كملت
و بعدين كمان مبيخلفوش والولد كان عاوزهم يخلفولوه عصافير صغننة
الولد ينظر لى بإندهاش
- ماهو طبعا لازم مايخلفوش
- دانا حتى جبتلهم الفيتامينات و البيت الخشب و كل حاجة
بضحكة مشوبة بسخرية واضحة
- يا مدام واضح إنك لسه جديدة فى الحكاية و اللى أشتريتى منهم مبيفهموش حاجة خالص
و الجوز دا عمره مهيخلف أبداً أصلاً
- ليه ؟ دنا جايبهم من المحل اللى جنبك علطول و إيه السبب يعنى عشان ميخلفوش أبدا ً ؟؟؟!!
- عشان جوز العصافير دول دكورة !!!!
- نعمممممممممم
طبعا خدت فترة أستوعب الصدمة
بس اللى معرفتش أستوعبه هجاوب إزاى قدام البياع علىسؤال من البرىء الواقف جنبى
و عمال بيشد فى حرف البلوزة و بيقولى
- ماما ماما ... هوه يعنى إيه دكورة ؟؟!!!!


77 كلام بيطبطب على قلبى
يونيو 2008 أبريل 2008

خد بالك


كافة المواد المنشورة في هذا الموقع محفوظةومحمية بموجب قوانين حقوق النشر والملكية الفكرية. لا يجوز نسخ هذه المواد أو إعادةإنتاجها أو نشرها أو تعديلها أو اقتباسها لخلق عمل جديدأوإرسالها أو ترجمتها أوإذاعتها أوإتاحتها للجمهور بأي شكل دون الحصول على إذن مسبق