.

.

فكّرونى  

Posted by: فاتيما in


- مامااااااا ..أنا نازلة عاوزة حاجة ؟
- أيوه هاتيلنا معاكى ...... و إنت راجعة
- حااااضر
ال ..... دى مش كلمة أعوذ بالله وحشة
و ضد الروقابة و لا حاجة

دى مجرد دلالة على أى شىء
زى العيش .. الدقيق ... مسامير
حلقات للستارة .. دوا .. أكل للقطط ... لبن
فكة م البنك و انا معدية عليه ف سكتى ...كدا
أى شىء يخطر على بالكم و ممكن الحاجة ام فاتيما
تقوله ع الصبح لما بسألها ... ماما عاوزة حاجة ؟؟



طبعا البديهى إنى لما أرجع ع العصر .. أكون جبت اللى هيا طلبته
سهلة أهى و مفيهاش حاجة خالص
لاااااااا .. مين اللى قال ؟
هوه فيه حاجة الأيام دى بالساهل ؟!!!
لازم يبقى فيها إن


و إن المشكلة يا حضرات تكمن
فى إن ... أختكم فاتيما
بقت بتعانى من حالة فقدان ذاكرة جزئى
لأ و كمان إيه؟ .... إنتقائى
يعنى ف حاجات و حاجات
و ساعات و ساعات



مثلاً
ماما قبل وقفة العيد الكبير بيوم طلبت منى اجيب عيش بلدى
و انا راجعة م الشغل عشان الفتة
بتاعة اول يوم دى كلكوا عارفينها

الساعة تمانية و نص الصبح نازلة كالعادة .. هاتى عيش
و قولتها حاضر
روحت الشغل و عادى ... و بعدين لسه بقول لروحى
هيا ماما كانت عاوزنى أشتريلهاااااا... هاه ؟
و بعيد عنكم أقعدلى سبع ساعات أفرك ف تلافيف عقلى
و أحاول أعصر ف مخيخى و أفتكر
هيا ماما كانت عاوزة إيه ؟؟
كانت عاوزة إيه؟؟
و لا يمكن أبدااااا أفتكر
و خلاص يئست من الحكاية .. قوم ربنا يكرمنى
و بالصدفة البحتة

و انا خارجة مدهولة من محطة المترو
الاقى واحدة قاعدة و بتبيع عيش
فلمبة تنور فوق دماغى زى أفلام الكارتون

و ييجى على بالى الله يرحمه ... الاخ أياه اللى إكتشف قانون الطفو
لما قال .. وجدتها وجدتهااااااا
و الاقى روحى انا كمان وجدتها
الحمدلله يا رب ... ماما عاوزة عيش




المنظر دا بيتكرر طول الوقت و مش كل مرة بلاقى
وسائل مساعدة كدا ف سكتى
و غالباً بروح البيت بخفى حنين
و منظرى بيقى ويييحش قوى



المشكلة إن الموقف دا إنتقل للشغل
و انا المفروض شغلتى أفتكر و افكر المديرين بتوعى كمان
بس مبيحصلش .... دايماً أنسى مين سأل على مين
و مين عاوز إيه من مين
و أصلا بقالى أهو ييجى حوالى خمس شهور
و مش حافظة نص الناس

اللى هناك مع إنى بصبح عليهم كل يوم
و قالولى أساميهم وانا مبركزش

و عادى الواحد ينسى حاجات المفروض يجيبها او يعملها
بس لما الحكاية توصل لأكل العيش كان لازم يبقالى فيها وقفة





طبعا الحل المثالى اللى تبادر لذهنى
إنى أكتب فى نوتة صغننة كل حاجة عشان أفتكرها أول بأول
و قولت و الله فكرة مش بطالة



مبدئياً
نسيت أشترى النوتة
و بعد كام يوم لما أفتكرت صدفة
انى لازم أشتريها و الحمدلله جبتها
دخلنا ف تانى دحديرة ...إنى بقيت أنسى
اكتب فيها انا عاوزة إيه
يعنى المفروض مثلاً اول ما اقول ...انا عاوزة اشترى شامبو
اروح .... جايبة النوتة
و كاتبة شامبو
مرحلة أروح دى .. بتتنسى تتعمل من أساسه
و أفتكر بعديييين بقى على مهلى
أو بالصدفة واقفة قصاد فترينة

و شفت الشامبو فأشتريه



يا دى الخيبة .... دى أعراض زهايمر مبكر دى و لا إيه؟؟!!
و الله ليه لأ ...هو الواحد بعد كل اللى جراله
من أحداث جلل

مستبعد فيوزاته تضرب و مخه يهنج ؟



بس دى تبقى وكسة كاروهات و منقطة .... زهايمر و من دلوقتى ؟
أومال كمان عشرة خمأشر سنة هيجرالى إيه؟؟
هيكتبولى إسمى و عنوانى تاتو على دراعى ؟



يكونش النسكافيه السبب ؟
طب دنا بقيت أقلل منه هوه و القهوة التركى


يكونش حالة الأرق اللى ساعات بتبقى عندى؟
مش كل يوم الأرق دا ...و بنام أوقات كويس و ساعات معقولة


يكونش ضغط العمل ؟
لا ضغط و لانيلة الدنيا عادية و هادية ... أنا هستعبط؟!!


يكونش كبر السن ؟
إحم إحم .. مش للدرجة دى دنا لسه ما وصلتش للأربعين يعنى الله


يبقى اكيد التفكير مفيش غيره ؟
طب دى نحلها إزاى بقى إن شاء الله ؟؟



أنا مش غايظنى ف الفيلم دا كله إلا ..... حاجة واحدة بس
إنى بنسى الحاجات العادية هوا
و دايماً بفتكر الحاجات الرخمة بسرعة

و ممكن الذكريات تمتد معايا ضاربةً فى عمق التاريخ
لحاجات حصلت و انا ف أبتدائى مثلاً و تيجى ف بالى بكل تفاصيلها
و كأنها حصلت إمبارح ..دا إيه الحوسة دى يا رب؟



و بناء عليه و بس قبل ما أنسى
و حيث إننا داخلين على سنة جديدة

و الناس عادة ف آخر السنة بتعمل كشف حساب للى فات
و حصر للاحداث و الشخصيات و تأرشفها
و توثقها عشان نفتكرها

فأنا قررت أعمل العكس .. غلاسة و إستقطاع



و أكيد لسبب ما قوى ... بس الحقيقة
مش فاكرة إيه هوه دلوقتى



بس بصراحة نفسى شوية أبطل أفتكر كل الحاجات
اللى بتتعبنى

و اللى راسخة فى ذاكرتى بدون سبب منطقى
غير انى غاوية انكد على روحى و روحى تنكد عليا
و لأنها غالبا بتكون متعلقة بأشخاص (بعضهم) و بجد
بكون فقدت رغبتى

فى معرفة أى شىء يخصهم خالص
و لا عاوزة أفتكر اساميهم حتى

لكن للأسف دا مبيحصلش رغماً عنى و خارج إرادتى
ففكرت بما إن مدونتى هيا المكان الوحيد تقريباً
اللى بفتكر فيه كل حاجة ... بتسعدنى
فليه لأ محاولش
انسى فيها كمان كل حاجة .. بتضايقنى


ليه معملش قايمة للنسيان و يمكن ع السنة الجاية
أكون نسيت منها كام حاجة

أحاول
و لتكن بنودها كالتالى

-----------------------------------------


1- عاوزة أنسى كل علقة كنت باخدها من بابا و انا صغيرة
2- عاوزة انسى كل كلمة دبحتنى من أى حد عرفته ف كل عمرى
3- عاوزة انسى اول مرة ركبت فيها طيارة
4- عاوزة انسى كل راجل قرب منى و مقدرتش أصرخ و احمى نفسى
5- عاوزة انسى اليوم اللى توفت فيها جارة عمرى وصديقتى
و زميلتى ف المدرسة و الجامعة .. (سماء) الله يرحمها
6- عاوزة انسى السنة اللى إنخطبت فيها و أى تفاصيل متعلقة بالخطوبة دى
7- عاوزة انسى يوم ستة أكتوبر 93 عشان إتبهدلت فيه إنسانياً و صحياً
8- عاوزة انسى يوم وفاة ستو الله يرحمها لأنها كانت سندى و ملاذى
9- عاوزة انسى كل حاجة بتفكرنى بأبو يوسف و غصب عنى بلاقينى فاكراها
زى يوم ميلاده و برجه و يوم خطوبتنا و كتاب كتابنا كل ما اعدى جنب الجامع
و لما أعدى جنب الفندق مش عاوزة افتكر الفرح و الزفة
و الأغانى اللى كانت شغالة وقتها و لا الشارع اللى هوه ساكن فيه
و أسامى أخواته و اهله و أى حاجة تخصه لأن مجرد فكرة
وجودها ف ذاكرتى و شغلها لحيز و لو سلبياً ... تفكير بيعكننى
11- عاوزة أنسى و جداااا آخر يوم شفت فيه وشه و تواجدت معاه فى مكان
12 - عاوزة كمان انسى رقم 95 و امحيه من دماغى
13- عاوزة أنسى بهدلة اهلى معايا و الحسرة اللى بلمحها دايما
ف وشوشهم و مش عاوزة تروح بمضى الزمن
14- عاوزة انسى اليوم اللى أنحكم عليا فيه بالنفى و التغريبة ست سنين
15- عاوزة انسى الوقت اللى ضاع من عمر يوسف و سعادته بسببى
16- عاوزة انسى يوم وفاة بابا لأنى ملحقتش أشوفه و اطلب منه يسامحنى
وأوصله لآخر مكان و اخد عزاه زى أى بنت
17- عاوزة انسى وجدااااااااا اليوم اللى مشى فيه يوسف
18- عاوزة انسى كل المناسبات اللى بتعدى عليا و هوه مش ف حضنى
19- عاوزة أنسى إن مليش وجود فى حياته و لأجل غير مسمى
20- عاوزة أنسى إنى ما زلت بنى آدمة قليلة الحيلة
و خصومى ما زالوا غير شرفاء و بجبروتهم كما هم
21- عاوزة أنسى إنى واحدة ست و قلبها لسه بيدق و مستنى معجزة
22- عاوزة أنسى كلمة أمان ... لأن أصعب حاجة إن تتمنى بكرة
و تبقى عارف من جواك ... انه أكيد مش هيكون بتاعك
عاوزة أنسى كل هذا
و إزاى
معرفش؟


عاوزة أبطل أفتكر كل الأحداث البايخة دى
بالتواريخ و الوجوه

وتصرفات االأشخاص
و حتى اللبس اللى كنت لابسه و كل شىء

كل شىء



و ساعات بستغرب من مخى و رزالته الصراحة
إشمعنى دول كلهم فاكراهم .. و الباقى لأ ؟؟
و بسأل بجد... يكونش دا فعلاً زهايمر
و انا أوشكت أنفصل نفسياً و عصبياً عن الحاضر
و أعيش ف الماضى

و لا دى حالة نفسية ف اللا شعور و كدا
بس انا مخدش بالى ؟!!


وياترى انا لوحدى هكذا
و لا فيه ناس كتير زيى
معرفش



بس على كل حال
بمناسبة إننا داخلين على 2010 و مش رايحين كاس العالم
والبلد كلها شكلها ... مش رايحة
هيا كمان ف حتة

و انا شرحه ... كمان مش رايحة ف حتة
و كلنا قاعدين و براحتنا بقى
فياريت انتوا كمان تقولولى
عندكو قايمة زى دى ... و لا مفيش؟؟



ولو حبيتوا تعملوا قايمة وعاوزين تنسوا
نفسكوا 2009 تاخد معاها إيه
و هيا ماشية وغير مأسوف عليها؟؟

هنتظر تعليقاتكم و ادينا بندردش


و كنت عاوزة أقول حاجة مهمة
أنهى بيها البوست

آه
لأ إستنوا كدا
هاه
يوووه ..... كانت على طرف لسانى
أدينى نسيتها أهو


طب لما أفتكر هبقى أقولها
و إن مكنش السنة دى

يبقى السنة الجاية و عليكو خير


و مش بعيدة .. دى كلها كام يوم بس
بس متنسوش وقتها برضو
تبقوا تفكرونى



كل سنة و إنتوا طيبين
-----------------------------



بردان أنا ... تحت الغطا

بفرك كفوفى ... محتاج دفا

و عقل سارح فى الحنين

و قلب ... نبضه إختفى

يا طعم الحاجات اللى فاتت

يا طعم الحاجات اللى ماتت

ليه دايما فى الشتا ... بفتكر

اللى كنت فاكره أتنسى


عادل إبنى


جعلونى مدوناً  

Posted by: فاتيما in



بسسسس

محدش يحوشنى
هصور قتيل الليلة
آه منكم آه


كدا يا غجر .. بقى أقولكو البت بسكوتة
عاملة إستفتاء شعبى عن التدوين و المدونات
و روحوا شاركو فيه

و انا كلى ثكة و تمأنينة
أنكم رايحين و مشاركين ومجاوبين و كدهوه

اتريكو بتنيمونى فى الدرة .. فى عز البرد بتاع ديسمبر
و محدش لا راح و لا شارك و لا بعت
غير سبعة بس

و كمان انا منهم ؟!!!


طيب ..ماش
ى ... معلش بقى الستة اللى جاوبوا يكلمونى
أما الباقى ..... لسانه ميخاطبش لسانى


إيه الحركات دى ؟؟
لا صحيح



طب هحط النشابة على جنب
و هتكلم من غير ضرب


إيه دا ... جبتولى إنحباط و جبتوا للبونية
إوكتئاب (مصطلحات يوسفية)

إيش حال ما كنا قايلين ..عاوزين حاجة تخلينا نشوف بعض
بعيوننا
إحنا ..مش عيون غريبة و احكامها الغير منطقية خالص
زى المسابق
ة الموكوسة أياها
و اللى تكلم عنها العزيز أحمد شقير
و مش هحط لينكها ربنا يجعل كلامنا خفيف عليهم

والنتيجة مطلعش فيها و لا مدونة مصرية ضمن احسن عشر مدونات
استعوضنا ربنا ..إكمن أى حاجة مدن إيجيبت دلوقتى
بقت بتعمل حموضة و كرشة نفس عند العالم

و قولنا خلاص ... و إبتلعنا السدمة الكاتلة
بشوب عصير قصب و إنتهينا



قو
م يا غجررررررر ... لما ييجى حد متحمس
و
مننا فينا
يقول هعمل إستفتاء .. تطنشوه؟!!!

دنا زعلانة بشكل بشيع
(يوسف برضو)



دحنا المدونين و ما نكتبه يضمنا
على رأى إيناس نهر الحب ف..الحزب اللى بلا مقر


و المدون فينا طول عمره قاعد
على قرافيصه القعدة السودة دى

من ايام التاريخ الفرعونى على رأى .. المراكبى


و كل ما تعدى علينا سنة كل واحد يعمل
هوليلة ف مدونته
و عيد ميدان(يوسف برضك)

و نيجى ناكل ف التورت و نلعب
ف الشمع و نلهف الهدايا و نروح
ادى حفلة من اجمل الحفلات ..عند خيخة


و التدوين بيأثر فينا و فى حياتنا اليومية و الإنسانية و الإجتماعية
وبيخلينا أحسن و روح قلب ماما خير مثال
يذكر ف هذا المجال
لأنى لو
لا هذه المدونة
بجد و لولاكم بعد ربنا
كان زمانى نزيلة ف اب
و العزايم
من سنتين بتعالج و بلا طائل



مش بس على المستوى الشخصى .. دحنا خرجنا من ورا الشاشات
و تحررنا من العالم الإفتراضى التخيلى

و زى ما ساعدنا نفسنا.. بنحاول نساعد غيرنا
و التبرع الخيخى بالدم و و زيارات أبو الريش
و إفطار الصائم وبؤجة الخير تفكركم

عند وش الخير قوس قزح و آبى هانم بتنجانى و خالد همس الاحباب
أقول إيه و لا إيه ؟؟



يعنى بعد دا كله ... منعرفش نلم بعضينا
خمس دقايق
نجاوب فيهم على اسئلة متعديش العشرة

طب مفيش حد عنده رغبة يعرف هوه فين
و الآخرين فين ؟؟؟



انا سخصياً جاوبت و عندى فضول شديد
أعرف إجاباتى ف محلها و لا لأ

عاوزة اعرف لما أخترت مدونة نوارة نجم كاحسن مدونة
و بت خيخة و أى كلام كمدونة لا أفوت ليها أى بوست
و المراكبى كأحسن معلق فى اى مكان يروحه
و داليا قوس ق
زح كأحسن شخصية تدوينية
هيا و خيخة و خالد همس

و لما إخترت بمنتهى التحيز مدونتى كاحسن شكل
لأنى فعلا بحب قالبها جدا
و مبفكرش أغيره ف يوم لأنه بيريحنى نفسياً


اخترت اسامى تانية كتير ... شقير و آبى و غيرهم
و كتبت الإختيارات دى
و ارجو محدش يعتبر كتابة بعض منها دلوقتى
تأثير على الراى العام التدوينى
( إيه الكلام الكبيرالعبيط اللى انا بقوله دا ؟؟؟ )



بس عاوزة اعر
ف انا صح و لا حكمى عاطفى
و لسه بشوف التدوين من ناحية مختلفة
عن باقى العالم

و يا ترى يا هل ترى
الناس اغلبها هيكون رأيها مختلف
عنى
و لاّ متفق معايا


طب أعرف منين ؟؟

منتوا مجوبتوش



و البنت معندهاش عينات كافية تفرزها
و ترتب على أساسها وصولاً لنتيجة


دول عشر أسئلة بس ... يا عياااال
مش هياخ
دوا وقت يعنى
و الموضوع ف السوكتيم
محدش
هيطلع علي الأجابات و لا يقولكو إكتبوا مين
يعنى اجدع من أجدع صندوق استنخابات فيكى يا بلد


دنا قعدت أشجع فيها
و اقولها متقلقيش
أبو الف مين يجاو
ب
و انتى مش هتلاحقى على الفرز

يطلع مفيش حد
خالص كدا يبل ريقها
غير سبعة!!!
آه يا بلد


كدا تنيمونى ف الدرة
وسط القوالح ف عز البرررررد
فضحتونى
و كسفتونى
و احبطتونى
اكتر
منا منحبطة خلقة
وزعلتونى
و وصلتونى
لدرجة إنى أل
طش صورة المصرى القديم دى
من عند الباشمهندس المراكبى
عشان أعمل اللوجو البائس دا

و انا لا بتاعة لوجوهات و لا بتاعة لطش حاجات
و عالله عم مراكبى ميرفعش عليا قضية

بس انا فى حالة يأس
تام و هوه اخلاق و هيقدر
و حقوق الملكية ر
اجعة ليه اولاً و اخيراً



و معلش يا بسكوتة ...الفكرة
هايلة
بس لسه ف بدايتها

و السنة الجاية تبتدى من اول ديسمبر
والناس تتشجع أكتر من كدا
و حد فنان و بيفهم .. نصعب عليه
و يعملنا لوجو محترم مش خيبة زى بتاعى


بس مؤكتاااا اللى هيستجدع و ن
اوى يشارك
ييجى على نفسه و ياخده و يحطه عنده
لحد آخر الشهر بيوم
مع لينك الإستفتاء

أهو دوس هنا


انا هقفل التعليقات عندى ... ليه؟



أصلى حالياً ق
اعدة ف الدرة و بولع ف القوالح
عشان أتدفى ...أهو أتسلى لحد ما تجاوبوا



وبعدين هتكلمونى انا ليه؟؟
روحوا
كلموا بسكوتة و جابوا
الإيميل أهو





أنا عاوزة البنت تبعتلى وهيا بتعيييييييط
و بتسالنى على نجار بلوجرى إبن حلال
ييجى يصلح باب الإيميل بتاعها

اللى هينكسر من كتر تخبيطكوا عليها بالإجابات



عاوزين على ليلة راس السنة نعمل حفلة كبيرة
نعرف منها مين اللى المدونين و المدونات
اللى ساكنين العقول و القلوب

و المجتمع التدوينى بيقدرهم
و منه كمان نعتبره نوع من التقييم الذاتى

مننا فينا زى ما قولت و بكل حب
و من غير اى هدف تانى غير ذلك

و لا جوايز و لا بتاع .. التقدير الادبى و كفى
إنتوا عارفين الادب حلو و فضلوه على اللحمة




هاه .. هطلع من غيط الدرة قريب
و لا هفضل ف مكانى و حد هيتبرعلى ببطاطين؟؟؟؟!!



و متخلونيش اكشف راسى بقى و أدعى عليكو
أحسن دعوة الولية
ف ساعة المغربية
مش كويسة ع النفسية
أنا بقولكو أهو ... وانا قلبى أسود



يلا ... جرى على بسكوتة
و مبدئياً
بشكركم من قلب قلبى

يا احلى صحبة
و ناس
و عالم


اللوجو البائس
ف الشريط الجانبى فوق

خدوه و حطوه مع اللينك
فى مدوناتكو


حين الفشل  

Posted by: فاتيما in




البنى آدم مخلوق كامل
يعنى دوناً عن سائر المخلوقات الأخرى
ربنا إداله قلب و عقل و روح و جسد
يفترض فينا نعيش بكل هذه النعم
و نستغلها الإستغلال الامثل
و نبعد بيها عن الحضيض عشان الحسنات تزيد و السيئات تقل
البنى آدم دا ممكن يكون راجل و ممكن يكون ست
مش هتكلم عن الرجالة .. و هتكلم عن نفسى
و اعتقد ان من حقى|.. ولاّ دى كمان هتبقى عيبة؟!!!
أصل الواحدة طالما بنى آدمة ... تبقى بقواعد المنطق كدا
و بناء على اول سطرين ف البوست
تبقى عندها قلب و عقل و روح و جسد


و بالتالى عندى أدوار ف الحياة ألعبها
و مقدر عليا أعيشها


إبتدت اولها بدور الأبنة .. لما امى و ابويا خلفونى


و ندموا بعدين بس مقالوش طبعا إنما دا امر بديهى .. ما عليناااا


تانى دور كان الاخوة ... بقيت اخت لأتنين واحد فيهم اكبر منى


الأخ الأصغر ..لعبت معاه دور مختلف كل اخت كبيرة تعرفه كويس

و هو الامومة المبكرة


جنب عيلتى الصغيرة عندى عيلة كبيرة


لعبت دور الحفيدة لستى الله يرحمها و كان من اجمل أدوار عمرى


لعبت و ما زلت دور بنت الاخت لخالتى اللى مربيانى و بتعتبرنى بنتها

لأنها مخلفتش غير ولاد


عشت طول حياتى ف دور الطالبة من حضانة لحد ما خلصت جامعتى


بعدها عشت دور الفتاة العاملة ... لما إشتغلت فى اكتر من مكان


و بقالى زملاء و مديرين من كل طبقة و صنف و لون


و لعبت دور الصداقة مع ناس كتير كويسة


و لغاية ما ربنا أذن و اتجوزت .. فلعبت دور الزوجة لبعض الوقت


و بقيت حامل و خلفت يوسف .. فبقيت ام منذ هذا الحين

و لحد كتابة هذه السطور




ادوار كتير قوى زى منتوا شايفين
و الواحدة متقدرش تعيش بوجه واحد و بس
و إلا تبقى مش طبيعية أو محطوطة ف سجن مثلاً
او مقعدة او أى وضع مش عادى
انا بتكلم عن الإنسانة العادية التى يفترض تكون ... انا
الادوار دى هيا اللى بتخلينى كل يوم أصحى من النوم و اخرج من سريرى
عشان أؤديها و بحماسة غالباً... و فتور قليلاً
فيه أدوار ما زالت موجودة و حاضرة
اما البعض الآخر ..فتلاشى ف الهواء و إختفى
إما بسبب سوء تصرفى أو بسبب القدر و النصيب و امر ربنا
و لإن كتر النواح بيعلم البكى
فكتر الحاجات اللطيفة اللى مريت بيها علمتنى
إنى مزعلش على اللى فات و أبص لقدام
و اعتبر ما ينقصنى حاجة كدا
زى ما يخطئك لم يكن ليصيبك
و ما أصابك لم يكن ليخطئك
و اذا كان فيه أدوار انحرمت منها ف الكام سنة اللى فاتوا
فدا له أسبابه و مبرارته و ربنا مقدرها
فمجيش انا و أندب حظى بقى بغباء منقطع التفكير
و لازم احمد ربنا و أصبر عشان
إن صبرتم أوجرتم و امر الله نافذ
و إن ما صبرتم كفرتم و برضو امر الله نافذ
فنصبر و اجرنا على الله و خلاص



لكن الصبر يا جماعة .. مش معناه الموافقة على هذا النقصان للأبد

يعنى انا حالياً ابنة و اخت و امراءة عاملة

و صديقة و قريبة و زميلة و جارة


و الحمدلله على كل هذا .. لكن أهم دورين ف حياتى

و حياة أى إنسانة طبيعية و ست طبيعية و ربنا خالقهم فيها


للأسف ناقصين نوعا ما .. و اللى اقصد بيهم الام و الزوجة


انا ام مع وقف التنفيذ مهما إنقال العكس

لأنى لا امارس هذا الدور ف الواقع



لكن بعيشه ... هنا ف المدونة و ف قلبى و عقلى و خيالى

و حتى ف كلامى


كمان دور الزوجة .. اللى أنا مأجلاه للآن بمزاجى

لأنى معنديش قدرة و لا إستعداد
اعيشه حالياً و ابنى مش موجود ف حضنى

او على الأقل مهواش معايا و لو لنص الوقت
و النص التانى مع أبوه

عشان يبقى عندى احساس بالتوازن و لو لبعض الوقت

زائد أنى ملقتش الشخص المناسب

و بناء علي ما سبق ...هذين الدورين مؤجلين لحين إشعار آخر


لكن و لا واحد فيهم مرفوض و منتهى تماماً

و الا أبقى بهرج






انا بقول الكلام دا كله ليه ؟؟
عارفة إن دا هيكون سؤالكم .. ؟؟
لأن جالى أكتر من تعليق غريب عجيب بعد ما قلت انى بمر بحالة حب
سببولى حالة دهشة و سدة نفس على سدة النفس اللى عندى أصلاً
حد تعليقه كان رايح ف سكة .. أنك ام و فكرى فى كدا و بس
دول عادى متفهمة وجهة نظرهم
بس فيه واحد انونيمس رزييييل قارفنى بقاله شهر و زيادة
تعليقاته منصبة كلها على انى ام هفأ و بجرى ورا غرايزى
و بصطاد عريس و حاجات كدا
و انا اللى قبل كدا قولت لا اريد عريساً و مبفكرش وليه دلوقتى بتراجع
طبعا هوه واضح إنه بيقرالى من مدة و تقريباً إنصدم فيا
بس يا نضرى صدمة وصلت لدرجة الشتيمة و الإهانة
و عاوزة أقوله و اقول لأى حد عموماً
يا جماعة الادوار اللى الواحدة بتعيشها دى
عبارة عن قطع بازل
بتتجمع سوا و ف مكانها الصح عشان تبقى صورة
الصورة دى المفروض صح و مكتملة
و عينك لما تقع عليها تحس انها كدا تمام ..و مضبوطة
انا بنى آدم طبيعى ... عاوزة اكون مضبوطة انا كمان
من حقى العب كل الادوار لو ربنا كاتبهالى
من حقى اكون زوجة و حبيبة




طب دنا عاوزة أقول إنى أصلا اصلاً طول عمرى


و من أولى جامعة و انا ف المنظر دا


اللى يحبنى ..محبوش


و اللى أحبه ..ميحبنيش


او يحبنى بس مش لدرجة إنه يحاول يكون معايا


حظ مدوحوس ... عارفة

أعملولكو إيه يعنى ؟؟


و بعد كل اللى شوفته و البهدلة اللى كنت فيها


و فقدانى الثقة فى انى الاقى أى راجل خلاص .. ممكن اكونله


و قولت خلينى بقى لوحدى و ف حالى وقلت انى لا أريد عريساً

عشان الناس الطيبة اللى كتر خيرها وبتتطوع تجيبلى عرسان

و مش عاوزة افضل اقول لأ و احرجهم معايا

فرفضت الفكرة شكلا و موضوعاً لأنى مبدورش على جواز و بس

انا بدور على بنى أدم يكملنى ... واكون بحبه

و دا مبيجيش بجواز الصالونات

طب تصوروا لو كل دا إتنسف ف توقيت ما

و حصلت لحظة سحرية و جه الشخص دا


بغض النظر عن أى حاجة و عن أى ظروف عندى و لا عنده


تمنعنا أو تشجعنا تكمل القصة اللى مبصوص فيها دى
المصادفة دى مبتحصلش على رأى د.ستيتة ف العمر كتير

لحظة نادرة ..لا تتكرر


لما تيجى اللحظة دى .. و الشخص دا

مش من حقى أتمسك بيها ... و بيه و لو شوية ؟؟


ليه مستكترين عليا الإحساس بالحب و الرغبة فى لعب الدور دا ؟


هوه انا مش بنى آدم و بشر زى باقى الناس ؟

و ليه أصلاً متصورين إنه بيأثر على دورى كأم و ينتقص منه؟؟


احد التعليقات قالت إنها مرت بتجربة شبيهة و انصدمت

و بعد ما فاقت من الصدمة


اللى استغرقت تلات سنين لقت حبها لاولادها هو الوحيد اللى زاد


طب يا جماعة ماهو حب الواحدة لأبنها لازم بيزيد

و عمره ما بينقص


بغض النظر عن وجود حد ف حياتها و لا لأ ؟


ليه دور يطغى على دور؟

و دور يقلل من قدر دور ؟


وليه عاوزين تحرمونى من حق اصيل ليا ؟

و تحسسونى انى فجأة تحولت


لواحدة انانية و بتجرى ورا غرايزها

و بترمى الحب الحقيقى ف حياتها (اللى هوه يوسف) بحثاً عن سراب ؟


ليه محدش متخيل انى عاقل و رشيد بما يكفى

إنى ارتب حياتى
بشكل لا يظلم احدا .. ابنى و حبيبى و أنا ؟

و ليه محدش متصور انى ممكن انجح فى

خلق معادلة متوزانة لحياتى اللى اتلخبطت دى


من غير ما اكسر قلب... إبنى وحبيبى و أنا ؟


و ليه محدش متخيل انى بشر و بنى آدم

ليها قلب و عقل و روح و جسد


و من حقى أتمسك بكل أحلامى لحد ما تعيينى الحيل


و أوصل و بنفسى لقناعة اكيدة انى عملت ما ف وسعى لإنجاح حياتى

و ما لم يتم لنهايته سببه فعلاً إن ربنا قاسملى حاجات


و حاجب عنى حاجات و السعى وصل لحد كدا و وقف
ويا ناااااس .. دى حياتى و من حقى أمشيها زى ما انا شايفة

طالما لا بعمل حاجة غلط .. و لا حرام



من فضلكم ترفقوا .. وانت خصوصاً يا اخ أنونيمس
انا زهقت شكوى منك و يا ريت تقرى البوست دا
و تتقى الله فيا شوية
انا مش ام سيئة زى ما بتقول
انا حرمت من هذا الدور رغماً عنى و مش بمزاجى
و لما قولت انى مبفكرش ف الجواز .. كنت بتكلم بمنتهى الصدق
و حتى الآن ..التفكير فى الزواج مؤجل لغاية ما الاقى حل
يرضى جميع أطراف الحكاية اللى يوسف اول واحد فيهم
فأرجوك تسيبك منى و تشوف حد تانى غيرى
اما الاخت صاحبة التعليق التانى
فأرجوكى .. انا مش هقول عليكى معقدة
بس انا تجربتى لا تقل سوءاُ عن تجربتك ف الزواج
و مع ذلك انا مبسقطش فشلى ف التجربة على كل حاجة حواليا
لكن برجعه على البنى آدم اللى شاركنى في التجربة الزفت دى
لأن دا الصح ... كان العيب ف الإختيار
لكن الجواز ف حد ذاته ... مش غلطة الواحد يخاف منها و يحجم عنها
يعنى لما اخويا الصغير كل ما اقوله عقبال ما اشوفك عريس يا حبيبى
و يبصلى مستغرب
نظام انتى آخر واحدة تتكلم عن الجواز و تشجع عليه
اقوله ... انا مش مقياس .. انا اخترت غلط و بس
لو كان واحد تانى غير اللى اتجوزته .. كان شال جميل أبويا على راسه
و حمد ربنا على زوجة بتحبه و ابن سليم و معافى و اسرة بتحتضنه
لكن هوه مكنش يستاهل .. و كان حتة بازل اتحطت ف مكان غلط
و الحمدلله إنشالت






ارجوكم ... متستخسروش فى أى واحدة ف ظروفى او شبهى


إنها تكمل الصورة

و تكون قلب و عقل و روح و جسد


و لا تنكروا عليا إنسانيتى و آدميتى

اللى بتمنى أعيشها كاملة زى باقى خلق الله

و يكفينى حين الفشل .... إنى حتى نلت

شرف المحاولة

بس خلاص




لو جالى فلوس
قبل يوم الجمعة
إحتمال أروح لقاء المنصورة
لسه معرفش
اللى رايح كيد ؟؟

يدينى فكرة

و بدل ما أروح لوحدى

نبقى صحبة أحسن
بس من دلوقتى ..انا مودى نيلة
عشان محدش يفتكر أنى هكون صحبة ممتعة
و يتشجع على هذا الأساس إنه ييجى معايا
انا حذرتكو أهو


صباح الخير أيها الملل  

Posted by: فاتيما in


مبدئياً و على بلاطة

من اولها كدا


البوست دا تهييسى بحت

يعنى محدش ييجى فى آخره يقولى


إنتى عاوزة تتهببى تقولى إيه؟


تتهببى دى مش من قاموس الفاظى المعتاد

بس إحنا متفقين أعلاه إنه تهييس ماشى ؟

طييييييب


الاول نجر رجلكم و نقول

كل سنة و إنتوا طيييبين بمناسبة راس السنة الهجرية


اللى طلعت يوم جمعة

و مخدناش اجازة على حسها


بس يعنى اللى كانوا خدوا اجازات كانوا عملوا بيها إيه؟؟

يلا ..أدينا عيدنا عليكم و اهو كله بخسارة

نبتدى بقى البوست

بسؤال تمهيدى


ركزوا معايا و مش عاوزة ناس

تفتحلى بوقها قد كداااا


أجب سيادتك يا بيه

و سعادتك يا هانم عن السؤال الآتى


إيه هيا العلاقة يا شطار

ما بين كلاً من


كسر النحس


خطف العيال


و صلاح جاهين


؟؟؟؟؟؟؟؟؟؟؟؟؟؟؟؟؟؟؟؟


سكوت رهيبى و حالة إذبهلال عام


ليييييه؟؟


مش كله واخد اجازة و صاحى على مهله

إيه مالكم؟؟


صعب السؤال ؟
و لا صعب و لا حاجة

انتوا اللى كسلانين تفكروا


طب اجاوب انا

عشان النهاردة موسم و كفاية عليكم الفرجة على الكفار

الأفلام الدينية النهاردة



الحكاية بمنتهى البساطة إنه اختكم عندها دور كآبة و سدة نفس

الكل يستعبط و يعمل نفسه مش عارف ليه


و متحرجونيييييش

ما احرجتونيش !!.. طب كويس دا العشم برضو


المممممهم قوم كونى من عشاق صلاح جاهين الجميل

و كمان سعاد حسنى سيدة الاحزان


فبحب جدااااا غنوة شيكا بيكا

مش بس عشان هيا غنوة حلوة


عشان كمان كلها عبر و حكم


و صلاح جاهين قالنا فيها إيه؟؟


فبدال ما نطق يا ولا ... نضحك

(الله يصبحك بالخير يا هدى رينبو)


الراجل يا جماعة ادانا روشتة علاج أهو

قالك بدل ما يجرالك حاجة من النكد .. تعمل إيه ؟؟


تضحك... برضو يا ويكااااا


و الصراحة هوه نصحنا

و مقدرش يا حبيبى يعمل بالنصيحة


لا هوه و لا سعاد حسنى كمان


يمكن ... عشان باب النجار مخلع


و الاتنين مقدروش .. يطبقوا القاعدة


و لا نفع يضحكوا ..

فطقوا ماتوا
فى ظروف أقل ما توصف به

هو المأساوية


و لهذا بقى لزاماً عليا

بعد ما وصلت لهذه الحقيقة


إنى إكراما لخاطر سعاد و لعيون عم صلاح


إنى بدل ما اطق ..لازم أضحك

لحسن يجرالى حاجة


فكرت ..أعمل إيه؟


أعمل إيه؟؟


تعملى إيه يا طماطم؟

تسوى إيه يا فطوم ؟


هاه يا فطمطم خلصينا


مخمخى يا أبو الفطاطيم

زى ما نيجرو ندهلك آخر مرة


قوم تفتق ذهنى

(ختدوش بالكوا من تفتق دى )


عن حاجة بقالى مدة بعملها ..إسمها

محاولة كسر النحس


أصلى كنت عاملة قايمة بالأماكن و الحاجات

اللى مش ناوية أعملها الا لما يرجع يوسف


و بعدين الوقت عدى .. و الواد مرجعش


قوم انا فكرت .. ما يمكن الحكاية لازم تمشى بالعكس


يعنى اعمل الحاجات دى .. يمكن إذ ربما ساعتها النحس يتفك


دا كلام علمى على فكرة

بس انتوا متخدوش بالكوا

و بناء عليه بقيت اروح ماكدونالدز عادى

و دخلت سينما


و الليلة دى

عملت الزغلولة الكبيرة بقى


قررت أروح مسرح العرايس ....تصوروا؟؟


كنت بقول لااااا يمكن ... بس استبيعت


كان المفروض اروح مع شخصية عزيرة علي قلبى


لكن رغم إعتذارها .. إلأ إنى صممت على إنى اتبع الوصفة


قررت أروح و لو لوحدى أهو اقعد وسط العيال


أصل اختكو عاشقة للعرايس و لمسرح العرايس

و لأى حاجة ليها علاقة بيه


و زمااااان ف عصور ما قبل التاريخ

لما كنت عيلة ف إبتدائى


اول مرة روحت المسرح دا كان مع المدرسة

و العالم اللى من جيلى
و ما يقاربه يمكن يكونوا

راحوا نفس المسرحية دى و يفتكروها معايا


كانت مسرحية من اروع ما شافت عينى


إسمها


صحصح لما ينجح
(النص مكتوب هنا )

تأليف مييييين ؟

صلاح جاهين (صاحب النصيحة العبقرية)


ألحان مييييين ؟؟

محمد فوزى (خطيبى و إنتوا عارفين)


و من يوميها و انا بعشق مسرح العرايس

و لما كبرت و بقيت شحطة ف العشرينات


كنت بروح لوحدى

و اوقات مع صديقاتى من الجامعة و اخواتهم و ماجد اخويا

و خالتى و حفيدها و كمان زمايلى ف الشغل

و ساعات كنت اروح مع المرحوم والغير مغفور له بإذن الله ابو يوسف


و لحد يوسف نفسه ما كان عنده ست شهور خدته مرة

مع انه مكنش مدرك قوى
لكن كنت عاوزة احببه فى الحكاية

و من ساعت ما روحنا ف الوبا زى منتوا عارفين

لما حبينا نجيب ورقة بوستة و غبنا ست سنين يا دوب


مروحناش من وقتها لا سوا و لا لوحدى

غير الليلة

لما كسرت النحس و الحمدلله

و المسرحية صحيح عبيطة
فى زمن سبيس تون و الإم بى سى فور

و نيكولودين وما شابه

بس انا لسه بفرح زى العيال بالعروسة الخشب

و الروح اللى بتدب فيها ببراعة فنان و بالفرجة ع الألوان الزاعقة


و الاطفال اللى بيحضروا و ضحكهم و البراءة و النقاء الذى لم يلوث بعد فيهم

عدة ملاحظات بقى على الليلة دى


- انا رايحة لوحدى ..على باب المسرح لقيت أورطة عيال

بتوع 7 سنين فيما تحت


واحد فيهم جه وقف جنبى و رمى سؤال على الأفيش و الصور الموجودة فيه


رديت عليه .. بكلمتين ما صدق و راح لازق فيا

لحد ما دخلنا المسرح و قعد ييجى نص ساعة واكل ودانى


إكتشفت إنهم مجموعة أطفال تبع دار أيتام و جايين فسحة


الولد بعد ربع دقيقة ندهنى يا ماما ..لما جالى حالة ذهول مؤقت

هما بيقولوا للمدرسات ماما عادى ...بس انا لما سمعتها مكنش عادى بالنسبالى

الدنيا دى غريبة قوى .. يعنى انا نازلة من بيتنا فى معاد مش مترتب

و فى مكان مكنش مفروض اجيله

عشان ولد صغنن برىء

و يقولى الكلمة دى اللى بقالى زمن مسمعتهاش ..

صحيح بيندهنى بيها عادل و ناس كتير

بس مزيكا الكلمة من بوق طفل صغير بيقولها

و بشكل تلقائى و لا شعورياً كدا و الواحد مش مستنيها

حاجة تانية خالص


- كنت عاوزة أطبطب عليه و ابوسه ف شعره حتى .. بس قولت

مفيش داعى ليفتكرونى

ست مختلة و لا بتحرش بالعيال و لا حاجة


معرفش ليه فجأة إفتكرت بوسى فى فيلم آخر الرجال المحترمين


أصلاً الست ف الشباك و انا بشترى التذكرة بصتلى بإستغراب

و سألتنى
إنتى جاية لوحدك

لا عيل و لا خطيبك و لا جوزك و لا حاجة ؟؟!!


قولتلها انا بجيلكوا من زماااان

و اللى بييجى لوحده بتمشوه و لا إيه؟؟


ضحكت و قعدتنى فى مكان حلو و زى ما بحب أقعد دايماً


- العرض الساعة سبعة و الجمهور بدأ دخول القاعة من ستة

طبعاااااا
انا من الناس دول منتو عارفينى بروح بدرى أى حتة

الولاد بتوع دار الإيتام قعدوا يمين المسرح و انا ف الشمال


بقينا نشاور لبعض انا و العيال من بعيد ... و خلاص


كنت جايبة معايا بالونات عشان أنفخها و ارميها للعيال يلعبوا


بس افتكرت بوسى فى آخر الرجال المحترمين تاااانى

و قولت بلااااش ليقولوا عاوزة اخطف عيل و اخده ف إيدى

و انا ماشية و لا حاجة؟


و كمان عدد الاطفال كان اكبر من عدد البالونات

فقولت مفيش داعى يتخانقوا عليها و القعدة تقلب بغم


- بعد شوية جه اب و ام وعيلين و قعدوا قصادى علطول


بنتهم جت تتكلم مع عيل من دار الأيتام .. راحت الأم مزعقة فيها


ملكيش دعوة بيهم ...كنت عاوزة أقوم أتخانق معاها ..بس قولت مفيش داعى

اصل شكلها لبط و
وش خناق ومش عاوزة أغمق الليلة

بس صعب عليا جدا ااا إنها تربى بنتها على إن التعامل مع الطفل اليتيم

يكون بالشكل البشع دا
و على إنه منبوذ ..حاجة تقطع القلب

المهم إن جوزها شكله راجل لطيف و قاعد ساكت و هادى

و واضح إنها الطرف المسيطر فى الجوازة دى


النوعية دى من الستات بتخلينى احمد ربنا جداااا

إن امى مربتنيش أبقى مفترية


مش عاوزة اكون كدا ..حتى لو هاخد حقى


- خلص الفصل الاول و جت الإستراحة ..الهاااانم

اللى قاعدة قدامى ( اللبط ) قامت تروح الحمام


بس و هيا بتقوم .. راحت زغرالى بنظرة

كلها معانى .... نظام انا قايمة و هغيب خمس دقايق


ارجع الاقى جوزى ف مطرحه و ملكيش دعوة بيه...فهمتى؟


فهمتى دى

موجهة ليا ...على اساس إنها من اول ما قعدت اصلاً

و هيا بتحود برقبتها على ورا كل شوية تشوفنى قاعدة لوحدى


و معييش حد لييييه؟؟... يبقى أكيد فيه غرض فى نفسى وطبعا وحش


جاية اخطفلى عيل ..و لا اخطفلى راجل ..الله أعلم بنوايايا بقى

المهم أن حظها المدوحوس قعدها هيا و سبع الرجال جوزها قصادى


قوم كدا منكن أنا أعمل فيلم فى الخمس دقايق دول

و أشبك معاه و لا حاجة و أهدد أمنها


هتقولولى كل دا إستشفتيه من بصة واحدة ..هقولكم

إحنا ستات و نفهم بعضيشنا


و هيا قارشة ملحتى من ساعة ما قعدت


و بعدين اثناء المسرحية قعدت أضحك ملء قلبى الصراحة

و ارد على الممثل اللى بيرتجل مع الاطفال ..كأنى عيلة وسط العيال


بضحك و برد عليه ..قام جوزها هوه كمان ضحك بصوت عالى

عادى يا جماعة الضحك معدى ..بصتله حتة بصة كتمته
صعب عليا بصراحة ؟


و بعدين انا جاية هنا ليه؟؟

مش عشان ابقى على راحتى و اعيش طفولتى ؟


كونها ست سماوية و عاملة حالة حصار على بعلها .


هيا حرة .... مالى انا هتكتمنى انا روخرا و لا إيه؟؟

بعد ما بصلتى ..روحت بصالها بإبتسامتى

اللى إنتوا عارفينها

مع بعض البرود و كأنى ولا الهوا ... إتغاظت اكتر

وراحت الحمام و جت فى دقيقة و نص بالعدد ..

يا ساتر على الستات لما تبقى هايفة ؟!!!


- بشكل عام المسرح زمااان كنت بحسه كبيييييير قوى

معرفش النهاردة لقيته صغر قوى يمكن

اكون اللى لما كبرت قوى
حساه صغر ف الحجم و الإرتفاع ؟

لونوا حيطانه بألوان حلوة والكراسى بقت أشيك

انا اصلى مروحتش من
سنة 2000 يعنى زمن طويييل

- المسرحية بسيطة و قصيرة ..بس الموسيقى مبهجة قوى

و اصلا لو عملوا إيه


انا هنبسط و هيعجبنى العرض بغض النظر


- طول العرض كنت بفكر فى إتنين كان نفسى قوى يكونوا موجودين


حد منفعش ييجى


و حد إستحالة ييجى


وإفتكرت كمان ولاد هانى أخويا و كل عيال صديقاتى عبير و تغريد

و كل عيال المدونات على رأسهم شريف و ولاد دوبا


و ولاد شاهى و ولاد قوس قزح و ولاد صيدلانية ....و ...

و مش هعقد اقول كل الأسامى انتى عارفين لوحدكو


- الفرجة لوحدى ممتعة و الله و مش وحشة

عشان محدش يقولى
روحتى لوحدك ليه .....كنتى تعالى معانا

و قوليلنا و نروح كلنا و تقعدوا تشيلوا همى و الجو دا

انا بعرف أفسحنى كويس اهو متقلقوش

و ساعات الواحد يبقى عاوز يكون لوحده


- يا ريت اللى يقدر يحضر العروض دى يروح


لأنها مبهجة فعلاً بغض النظر عن بساطتها

متعة القعدة ف المسرح و لا ميت سينما تغنى عنها


و التذكرة ب 10 جنيه مش معضلة و العرض من 7-9

و فيه عروض صباحية بس معنديش فكرة عنها قوى حالياً

و دى بتبقى للمدارس متهيألى بس ممكن جمهور عادى يدخل

زمان كنت بعمل كدا

العروض عموماً يومين الخميس و الجمعة

من كل اسبوع و المواصلات ليها أسهلها المترو - محطة العتبة

و المسرح ف قلب ميدان العتبة ورا المسرح القومى


- دار الإيتام اسمها دار الهنا بالفسطاط

حرصت أسالهم عن إسم الدار و شكرتهم جدا


لأن العيال باين عليها مرتاحة نفسياً و فيه اهتمام بيهم

و باين من كلامهم معايا و شقاوتهم إنهم مش متربيين على خوف و لا حاجة


بصراحة ربنا يبارك لهم ..عاوزين نبقى نروح نزورهم يا داليا

فى يوم من أيام الخير بتاعتك


- انا من مهاوييس العرايس و مسرح العرايس

و اللى يعرف حد هناك
يقوله فاتيما بتقولكوا

متخدونيش حداكو إنشالله ألملكو قصاقيص القماش ؟


- انا مردتيش على تعليقات بوست قبض الريح

مش قلة إحترام و تجاهل ليكم ...ابداً خالص


بس الحقيقة إن من كتر ما عندى كلام كتير ارد بيه

نفسى اتسدت عن أى حاجة تنقال


فسامحونى

و بجملة التسامح

انا اجازة حبتين بقى الكام يوم الجايين و محدش يستعوقنى و يقلق و كدا


و بالتالى .. مش هرد كمان على التعليقات ف البوست دا كمان

لو حد بعد الصداع دا كله

لسه ليه نفس أو إستعداد... يعلق
أصلاً

- أخيراً بسكوتة عاملة إستفتاء ... شعبى

عن التدوين و المدونات

دوس هنا

حاجة زى المحاكمات الشعبية كدا

منا فينا من غير كلاكيع و تنشنة

يا ريت نشارك فيه.. و أهو نشوف بعض

بعيون بعض

مش عيون غريبة عجيبة

زى المزغودة مسابقة أرابيسك الله يمسيها بالخيييييير

هاه

عرفتوا دلوقتى العلاقة بين صلاح جاهين

و خطف العيال و فك النحس ؟


يوه ... يا دى النيلة

اومال انا بقول إيه من الصبح؟؟


إقروا البوست تانى

و من الاوووووول


-------------------------


انا راح منى كمان حاجة كبيرة
أكبر من إنى اجيبلها سيرة
قلبى بيزغزغ روحه بروحه
عشان يمسح منه
التكشيرة

بسكوووووت تدوينى  

Posted by: فاتيما in


بسكوتة
عندها إقتراح هايل
روح و خد فكرة و قول رأيك و شارك
دوس هنا

------------------------------
تدوينات قد تبدو ملهاش علاقة واتنشرت من امبارح للنهاردة
لكنى فعلا شيفاها بوستات صديقة

------------
يوم جديد ..مدونات بعد سنوات
ahmed-k... مدونى مصر مدونون فوق العادة
شيماء الشعب ...مدونى المنصورة إجمممممع و أى حد معدى يدخل برضه


البؤجة بؤجتنا  

Posted by: فاتيما in


تحديييييييييييييييث

-------------------------
جامع زهراء مصر القديمة


من عشرة و نص حداشر ... لحد إتنين


نمر الموبايلات أهى يا جماعة


خالد همس الاحباب

0101345140
داليا قوس قزح وش الخير

0117742287

و المكان فى الصورة فوق


المحطة متحددة بالأزرق


و الجامع باللون الأحمر


اظن كدا .... عدانا العيب عنوان و قولنا


مكان بالضبط و حطينا خريطة


و موبايلات و كتبنا الأرقام


و معاد بالتمام و حددنا


إياااااااك متجوش بقى

بوستات صديقة

فى آخر التدوينة


------------------------------------------


أصل البؤجة بؤجتنا

واللى يحبنا .... ميضربش نار


و يعمل حسابه ع الجمعة الجاية

11/ 12 /2009

إشمعنى ؟؟

دا سؤال !!!


عشان البؤجة الشتوية
طبعااااا

أظن الكل عارفاها

و حس عين حد يزنقنى

و يقول عاوز نبذة تاريخية و لا حاجة

أصل الحكاية إبتدت بفكرة خيخية لولبية

دوس هنا

تلفقتها قلوب محبة و كلها خير و إيجابية


و اقصد بالخير

وش الخير
داليا قوس قزح

و بالإيجابية

آبى هانم بتنجانى كوكب آبى


دوس هنا

اللى ميعرفش حاجة و لسه مستجد .. ي
روح يقرى

و اللى عارف ...يبقى عامل حسابه و إن شاء الله جاى


مش عاوزة أوصيكم بقى


أى حاجة مستغنيين عنها ممكن تنفع لحد تانى

و تفكله زنقة ... هاتوها ف إيدكو و تعالوا


و صدقونى عن تجربة الواحد بيروح الفرحة سبقاه


و كأنه هياخد ..مش رايح يدى


دى نعمة .. متفوتوش الإحساس بيها على روحكم


ناس حلوة قالت هتيجى .. لما أفتح نفسكم

خد عندك

ستيتة حسب الله الحمش ..اخيراااا يا س س

واد يا عاااادل ..هتيجى مليش دعوة إتصرف


شيماء سمير بتسأل بقلب .. و هستناكى يا حبيبتى


بت يا خيخة .. أياك متجيش أنا بقولك أهو


شاهى و النبى تحاولى اليوم بيفرق بوجودك


خالد همس الاحباب انا بتكلم فى إيه

جاى دا يبقى أبو العروسة
... قصدى البؤجة

عسقول متهرجش و تعالى

الشنكوتى طبعا و لا يعرفنا خالص


ربنا يسعده يا رب


بنوتة مصرية ..هتيجى يا رودى انتى و نور

فيه ناس البؤجة متنفعش من غيرهم .. زى احمد كمال

و ساجى .. يا ريت لو تيجى؟؟


ميرا يا اميرة يا ست البنات جاية مبسألش انا بقر حقائق

و شيمااااء يا أونلى سبوت

سوووو ...انت و الصباغ لازم هتيجوا

مايكيليتوووو ..انت أساسى فى اليوم دا

ضياء يا اجمل عقل متهيألى جاى ايام الخير

هو ماركتها المسجلة

دريم يا فضفة عالسريع هاتى البنات و تعاااالى

و وليد كنج توت و هبة و عمر يا بيكاااا .. نورونا

هانى يا مصرى جدا ..لن تندم و الله

الناس الحلوة اللى جاية من المحافظات

بسكوتة من إسماعيلية .. هستناكى يا حبيبتى

ahmed - k تنور القاهرة و قلوبنا يا احمد

فريق بورسعيد الغالى ..بابا أبو خالد و إيناس نهر الحب

و نسمة الرقيقة


صبرنى يا رب
... يا أم مريم نفسى تحضرى معانا


هاتى معاكى الحبايب اللى يقدروا

ييجوا من المنصورة


كل الاحباب سكرة و شيماء الشعب و رحيل

و كل الأسامى مش عاوزة أنسى حد

bos bos

حاولى تيجى و بدرية كماااان


دول الناس اللى برا القاهرة

و نفسهم ييجوا و مش نافع


بس هما معانا برضو

و فى قلوبنا من غير حاجة


سامعة يا دودو و يا حنين يا ام عمر

و يا أم مالك الغالية و داليا ماى كورنر

و كل اهل أسكندرية الماريا

و كمان قبل ما انسى

أستاذ عبدالجليل اللى مش هيقدر ييجى

و ربنا يشفيه

هوه و أستاذ فشكوووول

كل الجمع الجميل اللى جه

لقاء الازهر بارك

اللى يقدر ييجى يا عيال ميتاخرش

كيكى يا قمر و ميمى يا بسكوتايا

و محمد غالية و يا أبو العيلاااا

د. ياسر و الكل ..انتوا عارفين نفسكو ا

مش هعقد أنده واحد واحد

و اللى برا البلد كلها

يا مراكبى و يا وليد و يا هنودتى و يا نيجروووو

و يا مهندس مصرى و يا سبهللة و يا زيانور

و يا
إيما ام البنين و فريق الزعر و الدكتور العزيز الحافى

كأنكم معانا و البؤجة الصيفى

تكونوا رجعتوا بالسلامة


و يا كل الاحباب ..مش عاوزة انسى حد

و محدش يزعل منى لو سقط سهوا أى إسم

و فيه شخصية كانت موجودة البؤجة اللى فاتت

و مش جاية المرة دى ... بس انا قلبى فاكرها

و بغض النظر عن أى حاجة يعنى .... فإنتى وحشتينى

قلبى بيقولى إن اليوم هيكون رائع


و كفاية الناس اللى وعدت بالحضور


وش الخير كتبت ...
هنا

وآبى هانم بتنجانى كتبت بوست يعتبر

آخر حاجة تقريباً


هنا


لكن محدش قال الساعة كام ؟؟؟

طب اقول انا ؟!!


انا سخصياً بروح بدرى ف العادة

و هكون هناك من الساعة 10.30 الصبح


محدش يلطعنى لوحدى كتير

لحسن الشباب البايظ يعاكسنى


قصاد السينما ... يووووه قصدى قصاد الجامع


و هذا ينقلنا للمكان .. هوه الجامع

خريطته عند قوس قزح عموماً


و المواصلة ليه افضلها ... ركوب المترو

لحد محطة الزهراء


تنزلوا منها وتسألوا عن مسجد زهراء مصر القديمة


الجامع تابع ليه

جمعية صحبة خير


اللى هنسلمها البؤج و لو حد حابب يتبرع بفلوس

مفيش مشكلة و جزاه الله خيراً


الحاجات دى كلها بتروح لتطوير عشوائيات مصر القديمة


و بيستفيد منها عدد لا يستهان بيه من الأسر

اللى عايشة مش تحت خط الفقر


هى عايشة و بس لا فوق و لا تحت

لأن الخط نفسه مش موجود أساساً

و طبعا كل حد عنده أسئلة


يقدر يستفسر من رئيسة الجمعية الأستاذة صبرية

و هتكون متواجدة اكيد يوم الجمعة


بعد التجمع و السلامات و الاحضان

و الكلام و الرغى

و تسليم البؤج و صلاة الجمعة


هنتحرك من المكان عشان نقعد فى حتة تانية

معرفهاش لحد دلوقتى


و محدش قال ... بس نبقى نشوف يوميها


جدول الأعمال يشمل

الأحتفال بعيد ميلاد قمر التدوين كله


آبى هانم بتنجانى كعب الغزال


و ما يستجد ....نبقى نشوف إيه


كله يحضر روحه بقى


واللى طلع الشتوى اكيد فرزه خلاص و عرف إيه

اللى هيملى بيه البؤجة بتاعته


نداء هاااااام

اللى معندوش حاجة يا جماعة

و عاوز ييجى... لا يتردد مطلقاً


حضوره فى حد ذاته شىء جميل


هيزودنا و يكترنا و المرة دى معندوش حاجة

المرة الجاية يكون فيه


محدش ينكسف يعنى و بعدين اليوم

للخير و للأحتفال بآبى
و كمان للتعارف

فبلاش حساسيات و قلق و كسوف و الحاجات دى


و مش أتاوة و فردة و اللى مش جايب معاه بؤجة

هنجرسه مثلاً

و نقول إيه دا اخص ..مجبتش بؤجة ليه

و نقيم عليه الحد و نعلقه على باب الجامع

ماشى؟؟


ييجى يشيل و يساعدنا و يساندنا معنوياً


صدقونى منظرنا و إحنا كتير

بيبقى حلو قوى و يرفع المعنويات


باقى جزئية مهمة جداااااا


اللى هيا نمر الموبايلات


طبعا إنتوا عارفينى .. خارج نطاق الخدمة

و الحكاية دى مزعلة ناس شيك جدااا منى


بس معلش و انا بعتذرلهم علناً أهو


وش الخير كاتبة ارقام فى البوست القديم

بس معرفش الأرقام دى شغالة و لا لأ


بس يا ريت يا دوللى و يا آبى

لما تقروا البوست تبقوا تحطولنا ارقام فى التعليقات


عشان أنشرها للناس الحلوة اللى جاية

عشان ممكن ناس تتاخر علينا و تيجى بعد مشوار الصبح

فيعرفوا احنا فين و منتوهش من بعضيشنا

منحرمشى منكو مقدماً

يا داليا و يا رحاب


و يا خيخة

و يا كل اللى ناوى ييجى

و اللى مش هييجى غصب عنه لظروف قهرية

منحرمشى منه برضو

اما بقى اللى مش جاى بمزاجه

ميكلمنيش أصلاً


خلاص كدا ...إتفقنا ؟


الجمعة الجاية


عشرة و نص


قصاد جامع زهراء مصر القديمة


اشوفكم يوميهاعلى ألف خير


يا احلى صحبة

و ناس

و عالم

-------------------------------------------------------

بوستات صديقة
---------------
داليا قوس قزح ...لقاء الخير
آبى هانم بتنجانى ...بؤجه الخير

بت خيخة و أى كلام ...البؤجة بؤجتنا و البتنجانة حبيبتنا
ستيتة حسب الله الحمش ..و بتسأل يا حبيبى البؤجة هتبقى فين ؟تيييييى رررااا