.

.

لما يغادرك حبيب  

Posted by: فاتيما in ,

لما يغادرك حبيب
غالى
لأى سبب كان
لسفر او فراق او رحيل إجبارى زى حالاتى
بيبقى الموقف شبيه بحادثة كدا و حصلتلك
و إنت معدى الشارع
و شايف العربية جاية عليك
و هتخبطك خلاص
و رغم محاولتك تفاديها
إلا إنك مبتقدرش تعادى القدر
و برضو بتتخبط خبطة تطيرك فووووق فى الهوا
تنزلك على الأرض
ولحسن الحظ أو لسوءه ... مش متأكدة قوى من الحكاية دى
إنك مبيجرلكشى حاجة ساعتها و تفقد الوعى
لأ
بتقوم بسرعة من وقعتك
و تطمن الناس اللى إتلمت حواليك مخضوضة
و تقولهم
أنا كويس ... أنا كويس
مفيش حاجة
و لحد ما تروح بيتكم و تحكى تفاصيل الحادثة و تاكل و تنام
مبتبقاش فعلاً حاسس بحاجة
لكن بعد صحيانك و مرور كام ساعة
يبدأ التعب يحل عليك
و تقول آآآآآآآآآآآه ه ه ه
لما يغادرك حبيب
مبتحسش فى الأول بألم الفراق
و لا بجسامة حجمه
لكن بتبتدى أعراض الإنسحاب تبدأ واحدة واحدة
و من غير ما تحس تلاقى جواك فراغ رهيب
و إن روحك بقت صحرا واسعة محدش يعرف أولها من آخرها
رغم وجود ناس حواليك
إنت نفسك تبقى مستغرب من نفسك
لما تبتدى تفتقد حبيبك فى أبسط
و أعبط التفاصيل
يعنى مثلا تكتشف إن ريحته وحشاك قوى
و تجرى على آخر بيجامة كان لابسها عشان تضمها
و تستنشق عبيره
و تفضل محتفظ بهدومه و معلقها على الشماعة
عشان كل يوم
تمسكها و تضمها لحضنك زى المجانين
لحد ما الناس حواليك تقلق عليك
و تسألك
فترد تقول
أنا كويس .. أنا كويس
مفيش حاجة
و لما الموضوع يزيد و تحاول تطمن اللى حواليك
يبقى مفيش حل غير إنك تشيلها
و تحطها أخيرا فى سبت الغسيل و تبصلها
و كأنك بتقنع نفسك
إن صاحبها لسه قالعها من ساعات بس
و إنه موجود بس هوه راح مشوار و راجع
لما يغادرك حبيب
يوم ورا يوم بيوحشك حضنه
و تحس بعده ببرد هائل
و تقعد تفكر فى ضمك ليه
و ملمس شعره لما كنت بتدفس فيه مناخيرك
و تفضلوا تحكوا الحكايات لحد ما يغلبكوا النوم
بيوحشك صوته
و ضحكاته المجلجلة
و صخبه الدائم
و تلاقى الحيطان اللى كانت بتضمكوا
بقت ساكتة
و كأنك فجأة بقيت واقف وحدك فى مركب صغير وسط محيط
و يتهيألك كتيرإنك نسيت صوته كان عامل إزاى
و يتهيألك كمان إنك لو سمعته فى أى حتة
مش هتقدر تميز نبراته
و لولا إنك مسجل له على الموبايل مشاهد صوت و صورة
يمكن كنت تنسى بجد .. فتترعب أكتر
و تستعجب من إمكانية أن ينسل بنى آدم منك
بهذه الغرابة و الكيفية
و كمان تستهجن روحك قوى
فى إن إزاى ... تنسى ملامح وشه بسرعة كدا ؟؟
لولا وجود الصور الفوتوغرافية عشان تفكرك
وتبدأ تفتقده و بجنون
فى الأول
كنت بتقعد تتفرج عل كليباته على الكمبيوتر
و على ألبومات صوره
و تضم هدومه زى المجذوب
و بعدين تقرر تقوى قلبك
فتشيل هدوه من ضرفة الدولاب عشان مش كل ما تفتحه
تعيط
و تلم أشياؤه المتنطورة هنا و هناك فى مكان مقفول
عشان متشفهاش فين ما تروح
ومع محاولة إقناع نفسك إن دا الصح
تبطل تجيب سيرته عشان متضايقش اللى حواليك
بحكاياتك المستمرة عنه
و يبطلوا بالتالى يسالوك وتبطل إنت ترد عليهم بجملة
أنا كويس ...أنا كويس
مفيش حاجة
لكن .....
لما تختلى بنفسك
تهاجمك أشباح الوحشة و الإفتقاد
فتكتشف إن غيابه
بيكثف حضوره اكتر
و إنك مهما سكتت ... كل حاجة حواليك بتجبرك تتكلم
و تحس إنه حبك لازم يكون غير كدا
فتقرر إنه
لما يغادرك حبيب
تكون إيجابى
فتبدأ تبعث الحياة فى أوضته من تانى
او تعمله ركن مخصوص فى أوضتك إنت
كل ما تلاقى حاجة فى محل ممكن تعجبه ... تشتريها
و تحطها فى مكانه الخاص
و تمنى روحك إنه يوم هيرجع و يشوفها
و يعرف إنك كنت بتفكر فيه
و منسيتوش لحظة
تبدأ تتكلم عنه كتير من تانى وبسلاسة تنطق إسمه أربع خمس مرات فى الساعة
من غير ما يهمك إن اللى بيسمعك إحتمال يزهق
تحاول تفتكر كل تفاصيل حياتك معاه
و بدقة
و تقرر تسجلها
عشان لو فى يوم نسيت ... الكتابات دى تفكرك
تعلق صوره فى كل حتة فى أوضتك
عشان فين ما تتلفت .. تلاقيه بيبصلك وبيضحكلك
و عشان تقوله و تقول لنفسك
كان فيه واحد هنا
ملء السمع و البصر و القلب
و لو كان ساب المكان دا غصب عنه و عنك
فدا مجرد غياب مكانى
لكن فى حقيقة الأمر
فهوإنه لم يغادر الروح و لا القلب و لا العقل
و لو لثوانى
و مكانه محفوظ و لو غاب ميت سنة ضوئية
و إنه حتى
لو غادرك حبيب
فإنت لن تغادره فى يوم
و هتفضل تقول لنفسك لحد ما يرجع
أنا كويس .. أنا كويس
مفيش حاجة
إنظر يداى اللتان هما
قد طوقاك مخافة البين
إقسم إنك عائد إليهما
إنى لمدود الذراعين
إبراهيم ناجى

This entry was posted on الثلاثاء, يناير 13, 2009 and is filed under , . You can leave a response and follow any responses to this entry through the .

28 كــــلام بيطــبطـــب عـــلى قــــلبى و روحــــى

ربنا يصبر قلبك ويفرحك بيه وبقربه ومايحرمكمش من بعض وتبقى دايما كويسة ربنا يهون عليكى الفراق لغاية ما ياذن سبحانه من عنده بنهاية الفراق ده وتقعدى تفتكرى الايام دى وتستغربى ان ماكانش عندك حل لمشكلتك لكن الحى الذى لايموت سمع دعائك وفرحك بقرب ابنك منك مش قادرة اقولك الايات عن ام موسى بتوجع قلبى ادايه بس شوفى الحكمة ربنا سبحانه هواللى بيخلق القوانين لما تخاف عليه مش تحضنه لا ترميه فى اليم لما يكون الخطر من ناحية فرعون يتربى عليه السلام فى بيت فرعون رددى دايما مع نفسك يامن يجيب المضطر اذا دعاه ويكشف السوء ربى انى مسنى الضر وانت ارحم الراحمين عبادك كثير اما انا فليس لى رب سواك --قال احد الصالحين مامعناه انه حاول معايشة لذة الوصول الى الله سبحانه وتعالى وطرق كل الابواب فوجد الكثير والكثير من الناس قد سبقوه الى باب الصلاة والزكاة والجهاد وسائر القربات الابابا لم يجد عليه الااقل القليل الاوهو باب الذل والخضوع لله سبحانه وقيل ان الله سبحانه خاطب ادم بعد المعصية قائلا كنت تدخل علينا دخول الملوك والان تدخل علينا دخول العبيد وهذا احب الينا --واذا لم يصح هذا الحديث لابأس من التذلل لله فى كل الاوقات خاصة فى الكرب االلهم فك كربها وسائر المؤمنين

هذه المرة لم استطع تمالك نفسي دون البكاء

كلماتك اخترقتني اختراقا تسللت إلي داخلي وانتقلت بسرعة رهيبة إلي داخل قلبي لتلمس فية اوتاراً وتدق عليهم بعنف وتحدثني نفسي بانك محقة كل الحق هذا ما يحدث عندما نفقد من نحب

نعم نعاني من اعراضاَ انسحابية والاما رهيبة وشعور بالوحشة والفقد

لكني دائما ما اتمسك بكلمة أبي " ربنا بيخلق في قضاه رحمة "
ونعم بالله والحمد لله الذي لا يحمد علي مكروة سواه
يداخلني شعور بأن ما كتبت لم ولن يخفف عنكي ابدا

لكنها محاولة لمشاركتك فيما تشعرين

تقبلي خالص مودتي

سلام عليكم
ازيك يا طمطم يا رب تكونى بخير

الامر من الفراق يا طمطم الاشتياق والحنين لمن هم عنا بعاد وربما هناك من تكتب علينا الحياه عدم رؤيتهم ونظل طوال الحياة نردد تلك الجمله التى تثقل وتعزز وجودنا بين البشر
انا تمام خالص انا كويس
وكاننا نسكن النفس المتالمه والمشتاقه
لا اذاقك الله ابدا فراق من تحبين وجمع عليكى شملك قريبا يا طمطم
وسنظل نقولها احنا كويسين وبخير رغم الجروح والالام
خالص تحياتى ليكى يا طمطم

يابخته بجد
ان شاء الله راجع بسرعه
ماهو كل الحب والحنان ده زي المغناطيسي
لازم يجذبه لحضنك

لقد خلقنا الله احرار
يا عزيزتى
انا بعتبر ام سيدناموسى رضى الله عنه مثال عظيم
هيا و سيدنا يعقوب رضى الله عنه ...
الأتنين امثلة عظيمة على الصبر و فقدان الضنا مع رضا و إنتظار لقضاء الله
أم موسى رمته بيدها للمجهول محتسبة
و سيدنا يعقوب إنتظره من المجهول محتسبا
و ما بينهما احاول أن أتعلم
تحياتى ليكى من قلبى

وومن
سامحينى يا ميرا لو كنت بكيتك
بس إنتى عارفة الكتابة فعل محرض
و كلام والدك حقيقى جدا
و ربنا بيكتبلنا الخير حتى فى الكرب و المحن
بس إحنا مبنبقاش غالباً شايفنها
عارفة زمان لما حكيت ليوسف
ليه سميته على إسم سيدنا يوسف
و حكيتله قصته كلها ...
يوسف زعل قوى و قالى ليه ربنا يبعد الولد عن باباه كدا
و هوه بيحبه ؟
قولتله ربنا بعده عشان كاتبله الخير
شوف لما سيدنا يوسف راح مصر حصله إيه؟؟
بقى حاكمها و المتحكم فيها
و بقى سيد قومه
تفتكر لو كان قعد جنب باباه كانت حياته هيكون شكلها إيه؟؟
كان ممكن يبقى حد عادى و خلاص
بس ربنا أرادله يكون شخص مهم
بس كل شىء ليه تمن
و بطلب من ربنا
إن تمن الفراق يكون على قدر الألم ...
و أشوف يوسف حد محترم
و كويس قوى
ساعها البعاد دا هيكون كله خير
و مش هفتكر منه اى شر
تحياتى و حبى يا حبيبتى

only spot
و عليكم السلام يا مشمشة
أنا بخير يا حبيبتى متقلقيش
الفكرة بتاعتك دى كانت فى بالى البوست اللى فات ..
لما تسائلت الأم تعمل إيه لما تفقد إبنها و لا يمكنها أن تراه ثانية ؟؟
الإنسان عموماً يعمل إيه ؟؟
و دا من أصعب الأسئلة فى الدنيا
و غالبا ملهاش إجابة مريحة
ربنا يجنبنا الفراق
و الآمه
و نفضل نقول أنا كويس
بجد كويس
و مفيش حاجة
خالص حبى يا شيكو

mayada
يا قاف ميم
ربنا عالم إنى بحس طول الوقت
إن يوسف فى نظرى
يستحق حب اكتر من حبى دا
مليون مرة
و يا ريتنى أقدر اترجم الحب دا
لشىء ملموس
بدل ما أشيله فى قلبى و بس
تحياتى ليكى و حبى يا حبيبتى

انتى محتاجة تتحضنى يا فاتيما

انا جيت وكان بس فى 3 تعليقات
وكتبت تعليق طويييل اد البوست كده وكان كلام من جوايا جدا
مرضيش يطلع :(

ودلوقت مش حكتبه تانى بس حقولك لما يجى يوم مقابله البنات ابقى قوليلى عشان اجى اشوفكم

مش قادر اوصفلك التدوينة دي اثرت فيا ازي بجد جسمي اشعر
ربنا مايفارقنا عن اي حد بنحبه
ويرجع الغايب
دمت بكل الخير

يا حبيبتي والله حاسة بيكي جدا

لأني حسيت بكل كلمة قولتيها في البوست ربنا يصبرك ويفرحك ويصبرني ويصبر كل اللي افتقد حبيبه

فكرتينى ببنت اخويا وقد ايه بفتقدها بعد ما تسافر برغم انها كانت قرفانى مش قوى يعنى وهى بمصر
ولما تنسى فستان ولا لعبه ولا ادخل قوضتهم بعد السفر علشان اروقها
ولما اجمع حجاتها علشان لما تنزل السنه الجايه تلاقيهم
الأمل دايما بيجمل كل شيء وبيقوى
أكبر شيء بيحيى قلب الانسان هو الأمل والأمل فى الله وفى ان بكره هيكون اجمل مهما كان النهارده وحش
صبرك بالله وأبتسمى للحياه لأنها تستحق

dreem
خلاص يا دريم يبقالى حضونة كبيرة لما أشوفك

dodda
يا حبيبة الروح و ست الهوانم
إتفقنا يا حبيبتى
و اول لقاء للبنات هقولك اكيد
تحياتى
و حبى

mostafa rayan
أشكرك على جميل كلماتك
و رقتها
دمت إنت بكل الخير
و نورتنى

lady e
أهلا يا ليدى
و ميرسى على الدعوة الحلوة اللى طالعة من قلب القلب
و ربنا يستجيب إن شاء الله
ليا
و ليكى
و لكل الصابرين

nour shahen
حقيقى يا نور
الامل هو طوق النجاة الحقيقى
مع الإيمان
و الصبر
نورتى يا نوووووووور

ياااااااااااه وكانك بتوصفى حالتى من كام شهر

فارقنى حبيب وسافر وكل كلمة قريتها هنا بتحكى عن حكايتى فى سفره وبعده

الفراق صعب قوى وخصوصا لما حبيب هو فعلا اللى بيغادر مش انا لانه هو اللى بيسيب الذكرى فى كل مكان كان فيه واحنا اللى بنتعب

ازيك ياقمر وحشانى اوى
نفسى بجد اشوفك
ربنا يسعدك ياقمر ويرجعلك حبيب قلبك فى حضنك
تحياتى الغاليه لكى ياقمر

حرام عليك يا طمطم نفسك انا حاسه بكل اللى بتقوليه لانى ام و عارفه قيمه الضنى زى ما بيقولوا بس انتى كده مش كويسه زى ما بتقولى لا انتى تعبانه و تعبانه قوى كمان حاولى تشغلى نفسك بحاجه تغير اتجاه تفكيرك شويه عن يوسف
و يا شيخه حسبى الله و نعم الوكيل فى اللى يحرم ام من ابنها كده و انشاء الله ربنا يكبره لغايه اما يقدر يقولهم طز فيكم انا مش عايزكم و يختارك انتى و بس
طمطم انا بقيت اخاف اجى عندك لانى بابقى فى مووود وحش قوى بعد كده
و متضحكيش عليا لو قلت لك نفسى اكلمك
انا حأكتب الميل و لو سمحتى ابعتيلى نمرتك اذا ماكانش فيها مضايقه
وربنا يريح قلبك قريب انشاء الله و يرد
الغايب و يرجعه لحضنك
امين يارب العالمييييين

الايميل olamohammedeg76@yahoo.com
عاجبك كده نسيت ابعته فى التعليق الاولانى

حسيتك قوي دعيتلك ربنا يرزقك الصبر ويرجعلك يوسف قريبا وتأخذية فى حضنك وتحسية ويحسك وتسمعى منة أحلى كلمة فى الوجود وتلاقية أحلى وأعظم وأحن حد فى الوجود ما تبطليش تتكلمى ولا تكتبى ولا تحكى عنة لانة حقك وحقة لأن حبك لة عمرة ما هيخلص وعمرك ما هاتنسية مهما حصل احنا ممكن ننسى حبيبنا صديقناحتى ممكن ننسى نفسنا لكن ابنى أبدا عمرة ما يتنسى!
بادعى ربنا يرجعلك نور عنيكى قريبا ان شاء اللة

ربنا يرجعه لك ولحضنك الدافىء ولقلبك الرقيق والجميل ومش يبعده عنك تانى ابداااااااااااا ويفرحك بيه وتشوفيه اكتر مابتتمنى

دائما بدعيلك برجوع يوسف وبالسعاده التى يستحقها قلب وبالأمان والحب


وحشتنىىىىىىىىىىى جداااااااااااااا

قلب بيحبك ومعكى دائما


تحياتى

السلام عليكم

بجد سعيد لزيارتك من جديد

وان شاء الله يرجع لحضرتك ولحضنك الجميل الى
اى ابن يتمناهعلى طول هيروح منك فان

ولا يروح منو فان

ربنا يخليكو لبعض ان شاء الرحمان

مش عارف اقول ايه
اقولك احسنتي الكتابه والتعبير بدرجة جعلتني احس انه مكتوب عشاني انا
اقولك جيتي على الوتر الحي الميت جوايا .. او الميت الحي
اقولك فكرتيني بحاجات ماكنتش ناسيها قد مانا فعلا كنت بقوي قلبي

كل اللي اقدر اقولهولك .. ربنا يرجعلك يوسف ومايباعدش مابينكم ابدا يارب

3abrtsabeel
نورتينى و اهلا بيكى
أصعب شىء شعور الإفتقاد
و كان الله فى عون قلوبنا جميعاً
تحياتى ليكى





رئيسة حزب الاحلام
أزيك يا لولى
إنتى كمان وحشانى يا حبيبتى
و ربنا يسهل و أشوفك فى يوم المكتبة بتاع داليا قوس قزح
ماهو عيب نبقى مكتبات و مشاركشى فى حاجة زى دى العيال تاكل وشنا
مش كدا برضو ؟!!




صيدلانية طالعة نازلة
يا حبيبتى متقلقيش عليا
انا كويسة
مفيش حاجة
غير العادى يعنى
أصل زى الأيام دى يوسف مشى ...
و تلاقينى كدا مش فى مزاج مش لطيف
بس بحاول أطلع دا فى شكل تنفيسى
و بكتب
و سامحونى لو كنت بقلقكم عليا
و أنكد عليكم
شكراً على سؤالك و مشاطرتك الجميلة
و دعواتك الطيبة
وتحياتى ليكى يا حبيبتى




ريكو
اهلا بيكى
و نورتى عالم التدوين
و أشكرك بجد من قلبى على الدعوات الحلوة
و المساندة النفسية دى
تعاطفك دا بيحسسنى إنى مش لوحدى خالص
و إن الدنيا مليانة قلوب حلوة
بجد
تحياتى و حبى





نبضات
يا عرافتى الساحرة
أزيك يا قمر و أزاى احوالك
وحشتنى ورودك و صباحك المعطر
فين البوستات الجديدة يا هرابة
بطلى كسل بقى
عشان وحشتينااااااااااا
قلب
بيحبك اكتر




آدم المصرى
و انا كمان سعيدة بزيارتك من جديد
شكرا على الدعوات الطيبة
و نورت




soooo
ازيك يا أستاذ ؟؟
البلوج كله نور و الله
مفتقدة تعليقاتك الحلوة دى
و أتمنى متكونش بتجاملنى يا سوووو
ربنا يبرد نيران قلبك و ميبقاش فيه غير السكينة و بس
لكن أنا عارفة إن لكل منا حبيب غادره
و يفتقده مهما حدث
قلبى معاك يا صديقى
و خالص ودى
و إحتراماتى

إرسال تعليق