.

.

زى الأيام دى  

Posted by: فاتيما in

الزمان
من سنة فاتت
التاريخ
21 يناير 2008
المكان
شقتنا
أتنقل ما بين حجراتها بخطوات مثقلة
و بكلم نفسى
الساعة بقت تمانية ... لازم أصحى يوسف دلوقتى
عشان يلحق يستعد ويلبس و ينزل مع جدته
لازم .. المعاد الساعة حداشر
و مفيش وقت
فى الأوضة اللى كنا نايمين فيها
أقرب بهدوء من سريره ... و أبص فى وشه قوى
و أتأمل ملامحه
نايم يا حبيبى زى الملايكة فى براءة و سكينة
لو بس ينفع يكون زيهم
كنت حرضته على الصعود لأبعد سما عشان محدش يطوله
يوسف ... يسوفة
قومى يا قطتى عشان تلحق المعاد
يلا يا عم مين قدك
هتشوف بابا النهاردة و تحكى معاه الحكايات
و تقوله على كل المغامرات اللى عملتها و هوه مسافر
يلا يا حبيبى قوم ..مفيش وقت
بكل كسل و جمال الدنيا يتمطع
و يتكوم فى حجرى
طب أنام شوية كماااان
لأ يا حبيبى ... مينفعشى تتأخر على بابا
بعدين يفتكرك ولد دلوعة متحترمشى المواعيد
أنا عاوزه ياخد عنك فكرة كويسة و يقول عليك راجل
طييييييييب
يقوم يجرى على الحمام و أنا بتابعه بعيونى
شكله حلو حتى من ضهره وعمال يجرى زى فراشة وسط الجناين
لو بس عنده جناحات زيها
كنت أخليه يطير ... يطير لأبعد حتة و محدش يلمسه
فى طريقى للمطبخ عشان اجيبله الفطار
عديت على الصالة
فيها أربع كراسى و ترابيزة
النور المطفى و الشباك المقفول خلونى مخدتش بالى إن فيه حد قاعد
على كراسى من الكراسى
لما دققت شوية كدا
لقيت خيال راجل عجوز متكىء على عصايا
و ساكت مبيطلعشى حس
بصيت ناحية الخيال ... خفت
إتسمرت فى مكانى
بعدين إنتبهت
أنا عارفة الراجل دا
بس إيه اللى جابه ؟ .. أنا مش عايزة حد معايا
و قولت للناس كلها محدش ييجى عشان مش عايزة أشوف حد
يقوم هوه ييجى
و النهاردة كمان ؟!!
عملت نفسى كأن مفيش حاجة و روحت المطبخ و رجعت
عديت على الصالة و كأنها فاضية و لا كأنى شايفاه
خلاااااااص يا يوسف لبست ؟!!
أيوه
طب تعالى إشرب اللبن و خلص اكلك
هلعب يوجى على الكمبيوتر شوية
طيب بس وطى الصوت
ماما
نعم
خلى بالك من زوزو و من لعبى
حاضر يا حبيبى ... إنت كمان خلى بالك من نفسك
هما هيعملوا فيا حاجة ؟!!
لأ يا حبيبى بالعكس دول هيحبوك قوى .. بس دا ميمنعشى
إن الواحد يخلى باله على روحه
و إفتكر الكلام اللى قولناه إمبارح قبل ما تنام
طييييييييب
امى واقفة على باب الأوضة
تعالوا فى الصالة عشان اول ما التليفون يرن هننزل علطول
يوسف بيطفى الكمبيوتر و النور
و أنا ماسكة شنطته بحطله فيها لعبة كان عاوز ياخدها معاه
خرجنا للصالة و العجوزفى صمته شامخ
مش راضى حتى يبص ناحيتنا
إتمنيت يوسف ميكونش شافه
اصله هيسألنى مين دا يا ماما ؟؟!!
مكنتش هعرف أرد أقول إيه
جرس التليفون رن
وقلبى جوا ضلوعى بيتعصر
أمى قامت ترد و رجعت
يلا التاكسى مستنينا و فيه المحامى و يا دوب نلحق المعاد
جاءت اللحظة التى أكرهها اكتر من اى شىء فى الدنيا
لحظة لا يمكن وصفها
مهما الزمن عدى و مهما إتعلمت كل فنون الكلام
ماما بتفتح باب الشقة
و يوسف بيحصلها
و بعدين يفتكر و يروح باصصلى
ماما ... ما تيجى معانا ؟
مينفعشى يا حبيبى .. مش هقدر مش إحنا متفقين
طيب .. بس متقعديش تعيطى بقى
مش هعيط ... بس خلى بالك من نفسك و من تيتة
متخافيش ...ماما
أيوه يا حبيب ماما
خلى بالك من اللعب بتاعتى و اوعوا يضيعوا
متخفشى ...هترجع تلاقيهم زادوا
هوه أنا هرجع إمتى ؟؟
..............
يلا هات حضونة كبيييييرة لماما
يرمى نفسه فى حضنى و أتمنى لو الزمن يقف بهذه اللحظة
و ميتحركشى
يا حبيبى هيوحشنى حضنك قوى قوى
الأسانسير وصل
روح قلب ماما يدخل مع جدته و أقفل من وراهم الباب
أهمس لروحى بسرعة
إمسكى نفسك
إمسكى نفسك
وإوعى تعيطى قصاده لحسن يتفزع
يشاورلى بإيده الصغنونة الرقيقة و يزعق و الأسانسير نازل
عشان يسمعنى
باباى يا ماما
باااااااااااااى
أعود خطوات للوراء و إتلفت حواليا
محدش يقولى إن دا كابوس
و يا ريت يصحينى منه ؟
محدش
دخلت الشقة و على اول كرسى فى الصالة إترميت
و بطرف عينى لمحته
إنت لسه قاعد ؟!!
خلاص يوسف مشى
فاهم
مشى
إنفجر فى نوبة بكاء و أنا انظر إلى السماء متمتمة
ليه يا رب
ليه؟
وخلاص حاسة إنى بتخنق و روحى بتتسحب منى
فأتوقف لثوانى عشان آخد نفسى
تلتقى عيناى صدفة بعينى الغريب
اود لو أسأله كيف أحتمل كل عذابات البعد
أزاى ساب يوسف يروح معاهم و هوه عارف إنه مش راجع ؟
كيف إستطاع أن يوقف سكين الأفتقاد من السريان فى قلبه ؟
كيف تجرع مرارة الصبر كل هذه الأعوام
و هو لا يعلم بموعد العودة ؟
كيف إنتظر القميص كل هذا العمر ؟
كيف عبر ليالى البكاء الطويلة حتى فقد نور عينيه ؟
و هو ينطق بكلمة واحدة لا غيرها
يوسف
يوسف
سر الحياة عندى و عنده
وليه جالى أنا ؟
و النهاردة من غير ميعاد ؟
يمكن عشان كنت بودع يوسف
و بسيبه يروح لدنيا تانية
و ناس تانية
و مكان تانى بعيد عن عيونى
و أتصور إن يعقوب حضر ليشاطرنى الألم
وليذكرنى بما أصابه
و يشد من أزرى
و يحذرنى إلا أفقد نور عينى
ولأول مرة يتحرك من مكانه من ساعة ما جه
إقترب منى فى هدوء
و مال على جبينى
و طبع قبلة حنونة
توقفت عن البكاء و أنا ببتسم
لأنى إكتشفت فجأة إن فى الوقت اللى كنت بستعد فيه أكون وحيدة
بعد يوسف ما سابنى
لقيتنى
مكنتش لوحدى
مكنتش لوحدى
----------------------------------------------------------
و تولى عنهم و قال يا أسفى على يوسف
و إبيضت عيناه من الحزن فهو كظيم
من وحى الأيام اللى شبه الأيام دى
واول بوست إتكتب
فى مدونتى

This entry was posted on الثلاثاء, يناير 20, 2009 and is filed under . You can leave a response and follow any responses to this entry through the .

45 كــــلام بيطــبطـــب عـــلى قــــلبى و روحــــى

اول تعليق على البوست
والمدونه بشكل عام

ان شاء الله يرجع يوسف تانى لحضنك
خلى املك فى الله وخلى عندك حسن ظن بيه

سيدنا يعقوب انتظره ورجع له

يَـٰبَنِىَّ ٱذۡهَبُواْ فَتَحَسَّسُواْ مِن يُوسُفَ وَأَخِيهِ وَلَا تَاْيۡـَٔسُواْ مِن رَّوۡحِ ٱللَّهِ‌ۖ إِنَّهُ ۥ لَا يَاْيۡـَٔسُ مِن رَّوۡحِ ٱللَّهِ إِلَّا ٱلۡقَوۡمُ ٱلۡكَـٰفِرُونَ

كان عنده يقين باجابه دعائه

ادعى مقلب القلوب يرد لك ابنك ان شاء الله

تحياتى

فاتيما

بكتينى يا فاتيما ووجعتي قلبي لدرجة انى مش عارفه اطبطب عليكى

ربنا يا بنتى يرجعه لحضنك تاني ويهدي العاصي معلللللش

فاتيما انا مستعده اساعدك باي شكل ارجوكي لو فى حاجه اقدر اعملها قوليلى

السلام عليكم ورحمة الله وبركاته

ازيك يا طمطم وحشاني والله وعلي بالي علي طول

كنت قايمه اصلي الفجر قلت ابص بصه علي الريدر اللي بقالي ازيد من 3 اسابيع ما تابعتش حاجه فيه كان اول بوست هو ده ، حسيتك بتقطعي في قلبي ولقيت الدموع نازله من عيني وانا متخيلاكي وانت بتودعي يوسف اللي ان شاء الله يرجعلك قريب وتفرحي بيه في حضنك وتملي عنيكي منه

هادعيلك في صلاة الفجر ان ربنا يفك كربك ويردلك الغايب وريح قلبك


سلام يا قمر

فاتيما
حبيبتى

ادعى بيقين
والله فرجه قريييييييييييييب

وحكمته اعظم


احبك

بصى يا فاتيما
انا بصراحة جاية اثبت حضور
احسن تفتكرى انى مش متبعاكى او مقطعاكى لا قدر الله

انا طبعا قريت البوست ده والبوست اللى قبله

ويصراحة معنديش اى كلام

فأرجوكى تقبلى حضورى
وسامحيني على عدم تعليقي


سلام
اختك خيخة

ربنا معاكي

--------------

ومعلش زيي زي ناس كتير

مش قادرة تقول حاجة

يااااه يا فاتيما
البوست فظيع و الله
خلاني اعيط
ربنا يرجعه لحضنك تاني يا رب
مافيش حاجة بعيدة على ربنا سبحانه و تعالى

بس على جنب كده انتى اسلوبك حلو اوي فى الكتابة
ليه مش تكتبي قصص؟
و حتبقى شغلانة حلوة و الله
تحياتني يا قمرة

هاونى على نفسك يا بنتى
ده احنا اللى بنقرا البوست بكينا ..اومال انتى عاملة ازاى

مش كده يا فاتيما ..كده مش هتقدرى تستنيه
الحمدلله هو كويس و انت شوفتيه بعدها و مهما كان هو برضه فى حضن والده .. هو بس لو يسيبه يجيلك و يصبر قلبك بروْيته

ربنا برجعه لحضنك قريب يارب
وربنا معاكى ويهون عليكى
خدى بالك من نفسك

انا كمان زي خيخة جاية اثبت حضور عشان تعرفي اني متبعاكي دايما وقلبي معاكي وبدعيلك والله دايما.. ربنا يرد غيبته وتفرحي بيه

طيب ماانتي اخترتي اسمه (يوسف)
قبل ماتعرفي انه هيبعد عنك شويه
واسمه فرض عليه قصته وقصته فرضت عليه
النهايه ان راجع لك ان شاء الله
ربنا معاكي ياحبيبتي ويرجع بالف سلامه

ربنا يصبرك يا فاتيما ويرجعة لحضنك تانى بالسلامة
ان مع العسر يسر
يارب يفرح قلبك قريب قوى برجوعة ليكى بالسلامة

ربنا يرجعوا لك بسلامه يرجع تاني لي لحضنك

ازيك يا قمر
يارب تكونى بخير وان شاء الله يوسف يرجع لك وتعيشوا مع بعض
لا تيأسى من رحمة الله

لازم تكونى بيقين يعقوب حتى يعود اليك يوسف حتى ولو تاخر وتولى الى زمن بعيد

وتقولى إنى لاجد ريح يوسف

ان شاء الله يعود اليك برحمة الله ويقينك

فاتيما

طب اقولك ايه بس مش لاقية كلام مش لاقية غير اني قلبي يبقي معاكي ويدعيلك

ربنا يردهولك بالسلامة إن شاء الله

ما تخافيش يا فاتيما ان شاء الله يوسف هيرجعلك تانى وتملى عينك منه وتاخديه فى حضنك ... خلى عندك امل وعزيمة واجمدى كده
تحياتى وقلبى معاكى

الصبر والدعاء وإن شاء الله يوسف يرجع لحضنك تاني وللعبه بس براحة علي نفسك وعلينا

الفراق دائما لة صعوبتة وأهوالة
ولما تعدى الايام علينا ويجي التارخ مش بس بنفتكر الاحداث لأ داحنا بنشم ريحة الفراق فى كل حاجة حوالينا
حتى فى شكل الجو بيكون لة عطر مميز
مش هاقدر اقولك ما تفتكريش أو ماتعيطيش أو حتى ما تصرخيش
لأن دة حقك
بس بردة افتكرى ان يوسف دلوقتى كبر سنة
يعنى لازم بردة تفرحى وتدعيلة
ربنا يرجعهولك بالسلامة

ده بوست حزين قوي

كله يهون إن شاء الله

ربنا مطلع على كل شيء

وده إبتلاء .. وإن شاء الله تنجحي فيه

المرة دى معايا مناديل يعنى هناخد راحتنا ونعيط ذى مااحنا عايزين
مش عارفة اعمل حاجة غير انى اطبطب عليكى وبعدين اخدك فى حضنى واكمل بكاء
ماتزعليش ياحبيبتى يوسف هيرجع تأكدى من ده عارفه انه واحشك اوى بس انتى عارفة كمان انه مايحبش يشوفك زعلانة
اجمدى بقى وقومى اعملى حاجة لو كان معاكى كنتوا هتعملوها سوا تخيلى وجوده واعمليها ولما تهدى صلى ركعتين قضاء حاجة وادعى وانتى ساجدة وبإذن الله هترتاحى
ربنا يريح قلبك وتشوفيه يارب قريب

عاشقة الرومانسية
نورتينى و شرفتينى بالزيارة
و أشكرك من قلبى على مشاعرك الطيبة
عندى شعور دائم بالأمل فى رجوع يوسف
لكن بيوحشنى قوى
قوى
و شعور الأفتقاد بيغطى على الامل
و الالم
و دعواتك يا عزيزتى
تحياتى الخالصة ليكى





صبرنى يا رب
أسفة لو كنت بكيتك
بس دا منطقى لأنك ام اولا
و إنسانة مرهفة الحس من غير حتى ما تبقى ام
و بحس كتير فى كلامك بحنان غامر و دفء
دعواتك و كلماتك و حنانك
دول مش كفاية ؟!!
عاوزنى اطمع فى حاجة تانى ؟؟!!!!
معقول !
بوسيلى البنات




خمسة فضفضة
و عليكم السلام يا فضفوضتى
وحشتينى قوى إنتى كمان
متحرمشى منك أبدا و لا من دعواتك
و عاجزة عن الشكر يا حبيبتى





shimaa samir
مشموشتى يا عصفورة
ربنا عالم باللى فى قلبى
و لعل بعاد يوسف فيه خير
زى ما سيدنا يوسف إنكتبله الخير فى بعاده
يبقى الصبر
و الحنين
أنا كمان بحبك يا عصفورتى
و سلامى للعصفور





بت يا خيخة و أى كلام
بصى يا نونو
إنتى ليكى غلاوة عندى متتقدرش
بصى إنتى علمتينى درس فى كرم الاخلاق عمرى ما هنساه و بشكرك عليه
و لهذا
لو جيتى فى يوم و قررتى متعبرنيش خالص لسبب او من غير سبب حتى
عمرى ما أستجرى افتح بوقى
و لا أقول مقطعانى ليه و بتاع
إنتى معاكى كارت عضوية دائم فى قلبى
يعنى براحتك يا نونو
بس دا لا يمنع غن إسمك لما بييجى فى صفحة التعليقات ...
بيعمل شغل حلو قوى
يعنى بيحسسنى إن اللى كتبته ليه صدى
عند واحدة مش عادية زيك
مل الآخر كدا يعنى
بوسيلى شريف و بس كدا

عارفة ... مش عارف ليه!!!
وليد
وشى منك فى الأرض
أنا مقصرة قوى فى حقك
و زيارتك دى غمرتنى بذوقك
متحرمشى من طلتك عليا و دى اجمل من أى كلام يتقال
تحياتى الخالصة ليك



واحدة مفروسة
البوست خلاكى تعيطى
عشان قلبك فيه الخير يا فروستى
و يمكن لأنى وصفت وصف دقيق للمشهد و إنتى خيالك واسع و فياض
فإنفعلتى قوى بالموقف
حكاية الكتابة دى و الله فكرة حلوة
بس أنا ماليش فى القصص دا فيه ناس عباقرة مالية المدونات و أنا مجيش جنبهم حاجة
ثانيا تعالى هنا يا فروسة
هوه يا ست الستات الكتابة فى مصر تعتبر شغلانة ؟؟!!
معتقدشى
تحياتى و حبى يا حبيبتى




bobo
نورتينى يا حبيبتى
أزاى راعى الملك و ولى العهد عمر القمر
أنا مقصرة معاكم قوى و سامحينى
و المهم إنك بخير يا حبيبتى
سلامى لوليد و عمر




mayada
إيوه يا ميودة
كان قلبى حاسس من غير ما عرف
كنت بحب الإسم دا قوى
و بحب القصة
و بحب يوسف شاهين و يوسف فخر الدين و يوسف عوف
و إتمنيت لو يبقى عندى ولد و أسميه يوسف
و جه روح قلب ماما
يوسف
و سبحان الله وحكمته
فى الإسم و القصة
بس تعالى هنا قوليلى
بتسلميلى على ماما يا قاف ميم و لا بتطنشى ؟؟





أنين الصمت
نورتى المدونة و التدوين كله
و أشكرك من قلبى على الدعوات الطيبة دى
و ربنا يسمع منك يا أنين
تحياتى ليكى




عاشقة القمر
منورة المكان كله
و أشكرك على سؤالك
و دعواتك
و كلماتك الطيبة
تحياتى الخالصة ليكى

نهر الحب
ازيك إنتى يا أنوس
مفيش يأس و لا حاجة يا حبيبتى
فيه إفتقاد و حنين
و إجترار ذكريات بس
تحياتى ليكى و لنسمة يا حبيبتى




الطائر الحزين
إنى لأجد ريح يوسف
و الله بشوفه فى كل لفتة حواليا و بحس إنه راجع إن شاء الله
عندى ركن فى اوضتى عملاه مخصوص ليه
و مسميه فيلا يوسف
معلقله صور لوينى ذابو و دباديب و كل الحاجات اللى بيحبها
و كل يومين تلاتة اطلع لعبه القديمة و الجديدة اوضبها و أحاول أتخيل فرحته بيها لما يرجع و يلاقيها
بقوم من سريرى أصبح عليه
و أقوله تصبح على خير قبل مروح فى النوم
بكلمه فى سرى و أشكيله من الدنيا
و أتفق معاه على فسح و خروجات هنعملها سوا
هيرجع إن شاء الله يا إيهاب
بس لغاية ما يرجع
هيفضل يوحشنى
بس كدا




وومن
يا ميرا يا اميرة
متقوليش حاجة يا حبيبتى
أنا عارفة و حاسة
و ساعات فيه مشاعر بتبقى اكبر من إنك تعرفى تصوغيها فى جمل و كلمات
بس كفاية عليا إنى حاسة باللى فى قلبك
يا ميرا
سلامى للعريس و لشيكو بقى

شفقة هانم و إحسان بك
يا أهلا بيكم
أنا جامدة يا جماعة متقلقوش عليا
دى فضفضات بس مش اكتر
و ربنا كبير قوى و مفيش اكرم منه
المهم اخبار ال ( شخص ما ) إيه ؟؟
ربنا يسعد قلبكوا يا رب




جعلونى مريضا نفسياً
متحرمشى منك يا هشام
و حااااااضر هخفها شوية انا عارفة إنها قلبت نكد على الآخر
البوست الجاى إن شاء الله لو ليا عمر هيكون حاجة تانية خالص
المهم
نورتنى بجد





ريكو
يوسف كبر سنة فعلاً
يا ريكو
و بقى طولى دلوقتى
و اكيد فى المدرسة إتعلم حاجات
و فهم اكتر من الاول
ربنا يسمع منك الدعاء المخلص يا عزيزتى
سعيدة جدا بزيارتك دى





يا مراكبى
يا نبع الحكمة
بتوحشنى تعليقاتك يا شيخ
يعنى تغيب تغيب
قوم لما تيجى تعلق يبقى البوست حزين
طب اعملك إيه و إنت بتنشن بقى على الجو الحزاينى ؟؟
معلش لأنه حزين
بس إنت عارف إختك بقى و عمايلها
المهم سلامى لفادى الفنان و مامته
و شكرا على ردها عليا فى مدونة فادى
الظاهر العيلة كلها اخلاق عل الآخر
الواحد مكسوف من الشياكة دى قوى
نورت يا نبع حكمتى




موناليزا
بعمل كدا فعلا يا مون مون
بوضب فى حاجاته كتير
و بجيبله لعب بيحبها
و بحط خطط مستقبلية لينا سوا
أنا مبقصدش والله أنكد عليكم
كل الحكاية إنى عاوزة أسجل اللحظات دى كتابةً للتاريخ
يعنى يمكن لما يوسف يرجع و تيجى مناسبة و يقراها
يقدر يحس إنى كنت فكراه و منسيتوش عمرى ...
بحكى مشاعرى فى كل المواقف
و الموقف دا من اسؤا لحظات حياتى
و مكنش ينفع يتحكى غير كدا
و بعدين إنتى حضنتينى أجمل حضن بكلامك
متحرمشى من دعواتك يا حبيبتى
و ربنا يصبر قلبك إنتى كمان




dodda
دودا يا حبيبة الروح
علامات التعجب دى ليها معانى كتير
بس ممكن اتخيل منهم معنيين تلاتة
المهم ميكونش منهم إن فيه زعل منى
و لا يأس من حالى
لأنى بخير و يقينى ثابت لم يهتز
و متهيألى كدا متبقيش زعلانة
إتفقنا !؟؟!
حبى و ودى يا حبيبتى
و سلامى لميومة البهية

يارب
بحق كل لحطة الم صادق
بحق
كل دمعه حزينة
بحق
كل اه مجروحة....ومكتومة
وبعدد كل القلوب اللي بتحبك
وبتحب يوسف
وبعدد دعوات كل ام
وكل اب
وكل مظلوم
يرجعلك سالم
والحضن اللي وحشك
متنحرميش منه ابدا تاني
امين
امين
امين


وصبرا صبرا جميلا والله المستعان

خايف من الحقيقة
يا لهووووووى
يا محمووووووووووووود
أخيرا يا غالى
يعنى بعد الغيبة دى
و تقلان علينا
و قلقانين
و متشوقين لبوستاتك الحلوة
و سايب دا كله و قاعد تدعيلى !!!
يا رب ما يحرمنى منك يا محمود
متتصورش فرحانة بتعليقك أد إيه
و فرحانة اكتر إنى إتطمنت عليك
عودا أحمدا يا محمود
و يا رب تكون صحتك دلوقتى تمام
و شد حيلك كدا
و عد لمدونتك يا شيخ
وحشتنااااا
و سلام حار لست الناس و العيال
تانى
تانى
متحرمشى منك يا رب

انتي هتبطلي الكلام ده بقى امتى

:):):)

بجد حرام عليكي اللي بتعمليه في ده

ربنا ينور قلبك بطاعته ويبرد روحك بلقياه في أقرب وقت يارب


زي ما اتفقنا قبل كده

جربي الروشتة تاني لانك شكلك نستيها

وعاوز اقولك على دواء زيادة والله ام بيخيب ابدا

الاستغفار الاستغفار الاستغفار

وكل ما تزودي كل ما هتلاقي الموضوع أحلى مما تتخيلي بجد والله العظيم


سلام وعاوز اعرف تاثيره في أقرب فرصة يا ست فاتيما

:)):)):))


ربنا يسعدك ويرضى عنك

ام يوسف الغالية
مفتقدينك جدا
وسيبك انتى من البوست حزين ولا مش حزين
المهم انك اقوى من كل ده وعندك صبر ايوب واخرة صبرك خير يا ام يوسف
وقادر الذى اعاد يوسف لابيه يعقوب ان يرجع يوسف لامه فاتيما
فهو القادر على كل شىء
تحباتى وتقديرى

حبيبتي فاتيما

عارفة أنا الايام وذكؤياتها
وعارفة لما تستني التاريخ ييجي عشان تدوري فيه على أي أمل جديد
و أي ريحة جديدة من ريحة الحبايب
وأي خيط نور يقول حاجة عنهم
عارفة لما تبصي في التاريخ ده على وشوش الناس وتتسائلي
معقول مش حاسين انهاردة حصل ايه؟؟
ولما تصحي تلاقي السما كإنها انهاردة غير كل الايام
و الشارع النهاردة غير كل الايام

يارب يرجعلك يوسف بالسلامة
ويملى عليكي البيت
زي ما هو مالي قلبك

من زمان برتاح لما ألاقي في المدونة ربط بين القصتين
برتاح و أطمن عليكي
و أحس ان لو أنا عاجزة بس في حد قادر يطبطب عليكي و يعمل مع قلبك اللي مش قادرة عليه

وآدي الكلام ده أهو بتقوليه في البوست
حبيبتي انت و الله يا فاتيما

يارب يصبر قلبك القوي ده و اللي بتقولي عليه ضعيف

جميل قوي يوسف و طيب قوي و عسل قوي
حسيت اني شفته بوصفك

يارب يفرحنا كلنا بيه

ياااارب

ربنا يباركلك في ابنك وتشوفيه احسن واحد في الدنيا
___________

بخصوص تعليقك حضرتك على تعليقي في مدونة غادة
انا بعتذر قد اكون فهمت الامر خطا بس عذري ان بوست غادة كان بيتكلم عن المجلس القومي للرجل
انا ماكنتش اقصد كلام حضرتك بالذات كنت بتكلم بصفه عامة ولو انك معايا بردو ان في بعض المدونين والناس اللي بتعلق مصممين انهم يخلو الامر بين الرجل والمرأة كأنه صراع الجبابرة وتحدي العمالقةرغم ان اصل العلاقة مودةورحمة وزي ماقولت عند غادة كلنا بنكمل بعض رجل وست مش بنحارب بعض
- بخصوص رأي حضرتك فانا متفق معاكي لازم غادة تفحم الناس اللي بيتكلمو عن ادب التدوين وادب الشباب بمصطلحات مضحكة مثل ادب( الكلينكس وغلطة خارج السياق ) ,leg هذا الكلام الفارغ وهذا ان دل فانه يدل على نفسنة كبار من شباب صغير - اصغر من اولادهم - اقتحم الساحة وكتبه بقت بتبيع وفي علاقة متوطدة بينه وبين القراء وكتب مثل كتب غادةوغادة ورحاب وطارق امام وباسم شرف وجدي الكومي وابراهيم عادل واحمد العايدى
ونهى محمود وشيماء زاهر
- وانا كمان ان شاء الله - وغيرهم اكبر دليل على كدة
- انا كمان عايز اضيف ان الشباب هما اللي بيبعو كتب الكبار فكتاب مثل علاء الأسواني وبهاء طاهر وغيرهم من الكبار اللي بيشترو كتبهم هما الشباب الصغير وليس الكبار الذين يساونهم في العمر
انا مثلك منتمي بشدة لهذا الجيل واحبه واؤيده بكل قوة
واكتب عنه وافكر فيه
اي اننا لسنا مختلفين اطلاقا
________

اتمنى انك تقرأي كتابي
( اعترافات رئيس سابق ) واتمنى انه يعجبك ومستني رأيك فيه
لك كل التحية والود ودمت بكل الخير

!!!!علامه التعجب هى علانه الترقيم المفضله عندى :)

ولا زعلانه ولا يئست منك...

انا بستغرب من طريقتك فى السرد وكأنى شايفه الاحداث..
بس عمرى ما بيئس ان الوضع يتغير..
رينا كبير

الهي كيف أدعوك وأنا انا وكيف أقطع رجائي منك وأنت أنت .الهي ان لم أسألك فتعطني فمن دا الدي أسأله فيعطني؛وان لم أدعك فتستجيب لي فمن دا الدي أدعوه فيستجيب لي ؛وان لم أتضرع اليك فترحمني فمن دا الدي أتضرع اليه فيرحمني.
الهي وكما فلقت البحر لموسى فنجيته من الغرق؛فصلي وسلم يارب على محمد وآل محمد ونجني مما أنا فيه من كرب بفرج عاجل وغير آجل وبرحمتك يا أرحم الراحمين.
اللهم آمين
ربنا يفرجلك همك وكربك يا حبيبتي

الله يصبرك يافاطمة
الله يصبرك ياأم يوسف
هو انا ناقصة يافاطمة ربنا يصبرك!!
اجى من عند موناليزا والالام بتاعتها ربنا سبحانه وتعالى يعافيها ويعفو عنها وعنا يارب اقوم الاقيكى بتعيطى وبتودعى يوسف قبل ما يمشى اخر مرة !!اسيبك تفتكرى تعيطى لوحدك؟ مش ممكن انا فتحتها معيطّة هنا اهوه....كده !!
قلبى ودعواتى معاكى
ومع كل ام بتفارق ضناها
وحتة من قلبها بالغصب عنها

وحشاني جدا يافاتيما
ماعلش ياجميل الكمبيوتر عندي بايظ
فقلت ابلغك عن اخر الاخبار من النت بتاع بابا عن حفلة توقيع الكتاب في المعرض ياريت اشوفك هناك في قاعة كندا دار نشر كيان الساعة تلاتة ونص
اشوفك علي خير ان شاء الله

صاحب المضيفة
ازيك يا انس
يا صديقى أبطل الكلام دا ليه ؟؟
إذا كنت عاملة المدونة دى مخصوص عشان أفضل اكتب عن يوسف
و اكتب
و اكتب
لحد ما يخلص الكلام
البوست دا مجرد توثيق للذكريات مش اكتر
و اختك الحمدلله فى احسن حال و متقلقش عليا و لا يخيب ظنك
تحياتى و خالص ودى يا غالى




همس الاحباب
إزيك يا أبو همس
إنت كمان سايب فراغ و نفسى إن شاء الله نتقابل يوم المكتبة دا و نروح بعده نبارك لمفقوعة مرارتها على الكتاب فى حفل التوقيع و ربنا يسهل و آجى
و إنت تيجى و كل الاحباب ييجوا يقفوا جنب سحر فى اليوم دا إن شاء الله
تحياتى يا اخى العزيز




hannoda
يا قمراية مانا عارفة إننا بنبص لنفس السما و نتشارك الإشتياق لحبيب غائب ....
اجمل حاجة بقى إنك عارفة اللى فيها
دايما و من غير ما أقول
يعنى أحباب كتير بتفتكر إن غاوية أعذب روحى بالذكريات دى
مع إن العكس هوه اللى حاصل
متحرمشى منك يا حبيبتى




mostafa rayan
أولا
بتعتذر على إيه محصلشى حاجة خالص
أنا اللى خفت بس اكون إتفهمت غلط من كلامى و حصل خير يا عزيزى
تانياً
كون إن فيه تعليقات بيبقى شكلها تحريضية كدا على البوستات اللى من النوع دا فيمكن لأن غادة كتاباتها ساخرة و تناولها ساخر للموضوعات
و غالبا التعليقات عندها بتبقى على نفس النهج و مبتقاش جد قوى قوى
يعنى اللى عنده تعليق طريف بيقوله و المسألة بتبقى بسيطة
لكن لو كان الموضوع تم تناوله بشكل مختلف عن كدا كان ممكن تلاقى ردود محتلفة
ثالثا
يا سيدى الف ألف مبروك على كتابك و إسمحلى أضيفه ضمن عطر الاحباب
و عقبال الطبعة العاشرة
تحياتى ليك



dodda
يا حبيبة الروح
الحمدلله
طمنتينى ى ى ى ى ى
دمتى بكل الحب و الخير اللى فى الدنيا



يوميات فنانة مفروسة جدا
ياسمينااااااااااا
يا قمر يا حبيبة قلبى
كل الدعاء الجميل دا عشانى و عشان يوسف ؟!!!
يا رب متحرم منك أبدا
و اشوفك فى احسن حال يا رب و يسعد كل أيامك
ربنا يسمع منك يا حبيبتى
و سلامى لماما الغالية




norahaty
يا نورهانتى حقك عليا
بس أعملك إيه بقى و إنتى حنينة و دمعتك قريبة كدا
أنا و مون مون بنتشارك فى الحمل التقيل و لكن كل بشكل مختلف
بس متهيألى الحمدلله إحنا الأتنين بنقول يا رب سوا
و ربنا يصبر قلبها
و منتحرمشى منك يا حبيبتى
و لا من رقة قلبك



المفقوعة مرارتها
يا سحورة إنتى كمان يا حبيبتى وحشانى
و ألف مليون مبروك على الكتاب
و بإذن الله جاية
هوه معقول افوت مناسبة زى دى
مجييى أقل شىء ممكن أعمله
و الواحد أصلا حاسس إنه مقدرش يساعد بأى حاجة لكن الواحد ييجى بقى يتألط و يقول المؤلفة دى حبيبتى و صاحبتى و كدا
و بكرة يوسف لما يرجع و يكبر و يقرى
و يلاقى كتابك عليه توقيعك إنتى شخصياأقعد أنا أتمنظر بقى
ألف مبروك يا حبيبتى
ألف مبروك

زى الايام دى هيرجعلك يوسف

يااحلى واجمل فاتيما ع وجه الارض

وحشاااانى اوى اوى اوى بجد

وواحشنى كلااامك .

ميمي

انا حبيت بس اتونس بيكي
واعدي بالليل وانتي نايمة وابوسك واقول لك وحشاني كاني اعرفك وتعرفيني
وحشاني بلا اي ادعاءات ولا تحفظات

وحشاني بس

عشان كده جيت اتونس بيكي
وابعتلك حضونات وبوسات ليكي وليوسف

انشاء الله يرجعلك ابنك
وتفرحى بيه انشاء الله
وحشانى ياقمر نفسى بجد اشوفك
تمنياتى لكى بالتوفيق ان شاء الله
تحياتى

بجد يا فاتيما انتى من يوم ما نزلتى الموضوع ده وانا مش عارفة ارد ومزاجى وحش جداا لدرجة انى بدخل انام افضل افكر فيكى وفين وفييين عما ييجيلى نوم

ربنا يصبرك يارب
ربنا يصبرك يارب

والله كان نفسى يكون فى ايدى حاجة اعملهالك وارد ابنك لحضنك
بس ما باليد حيلة .. وحتى مش عارفة التفاصيل

ربنا يهدى باباه ويرجعهولك يارب
ربنا كريم ومع الصابرين ان شاء الله


تصبحى على حضن يوسف يا حبيبتى يارب

يا رب يرجعه ليكى بالف سلامه


والله يا فاتيما هيرجع
عايزاكى تكونى على يقين بكده

ربنا هيرده ليكى تانى
علشان مش هيلاقى فى الدنيا دى كلها قلب اكبر من قلبك ولا حنان زى حنانك

عايزة اقولك كلام كتير والله
لما اشوفك بقى
وبصى بقى
وربنا المرة الجايه لو جيت وعيطت برضه انتى حرة الدكتور محرج عليه انى مش اعيط علشان الجبس بيتبل

ربنا يحفظك ويكرمك ويفك همك يا رب
ويرد ليكى يسوفه حبيبى
بوسه كبيرة وحضونه
موووووووووووه

انا باجي هنا كتير اوى
بس مش بعرف اعلق
ولا دلوقتى عارفة اعلق
بس عايزة اقولك ان وصفك ليوسف جميل اوى المرة دي
يارب يرجع ليكي يارب
لماتعرفى ان ربنا معاكى ماتزعليش
اتفقنا ؟ :)

دعاء مواجهات
ازيك يا دودى
إنتى كمان وحشانى
و ربنا يسمع منك يا حبيبتى
تحياتى و حبى




ZIANOUR
امولة
يا ام الزاد و النور
إنتى كمان وحشتينى و ميرسى على البوسة و الحضونات منى ليكى يا حبيبتى
بوسيلى العيال



رئيسة حزب الاحلام
إنتى كمان يا لولى وحشتينى
ربنا يسهل و آجى يوم توقيع الكتاب بتاع سحورة و أشوفك
و عقبالك يا حبيبتى
تحياتى و ودى




حاجات جوايا
سالى يا حبيبتى
أنا بعتذر بجد لو كانت الكتابة بتوجع قلوبكم كدا
بس يمكن لأنها حقيقة فوصلت لكم
و حسيتوها قوى
و ربنا ما يحرمنى منك و لا من دعواتك و لا قلبك الطيب
و يا ريت كل الناس يبقى قلبها حنين كدا زيك يا سالى
بوسيلى دودو قوى



حنين القلب
حنونة
ازيك يا حبيبتى و عاملة إيه دلوقتى ؟
أنا على يقين يا حبيبتى بس إنتى عارفة وجع الإشتياق و حنين القلب يا حنونة
بلاش عياط و حياتك إحنا عاوزين الجبس ينشف و يتشال بسرعة
و بحاول و الله ادخل فى مود لطيف اكتب منه حاجة كويسة مش لاقية الصراحة
بس بفكر
و اوعدك احاول أغير المزاج شوية
سلامى لحواش بقى
و بوسة و حضوووونة جامدة ليكى



كفاية طيبة
إنتى منورة من غير اى حاجة
و إسمك حلو قوى قوى
لأنه خيالى و مبينفعشى يتحقق
و غالباً بيتقال للى مش هيقدر يعمله
ميرسى على الدعوة الحلوة
بس مش فاهمة ليه الواحد يزعل و ربنا معاه ؟؟
تقصدى إنه إختبار ؟
متهيألى قصدك كدا
أنا مش زعلانة يا عزيزتى
أنا مشتاقة و فقط
و دى طريقتى فى إظهار حبى ليوسف
يمكن تكون طريقة مؤلمة
لكن طريقتى التى أعرفها حتى الآن
تحياتى ليكى
و تعالى دوما
و نورينى

آخر تعليق
يمكن آخد جايزة

أنا كنت قلت ايه؟ اني مش حقرأ مدونات في الشغل تاني صح ؟
صح .. بس انا طلعت عيلة وقريت البوست دا
ولأني لم استطع ان امتلك نفسي فقد دمعت عيني
ولأني في الشغل فكان شكلي وحش قوي

وعموما احتسبي الأجر في الصبر
هو في احلى م الصبر في الحسنات
كل يوم بتصبري ليكي يجي كام م ليون؟....
لأ ملا ييين ؟ لأ محدش يعرف كام من الحسنات
لأن الصابرين يوفون أجورهم بغير حساب
بحب يا فافي

ست البيت
كدا يا مروة
أستناكى النهاردة و متجيش !!!
ظروف ؟
طب ...لأ زعلانة
معلشى
طييييييب
كان نفسى أشوفك بجد
و معلش البوست دا أصله من اليوسفيات
يعنى إعملى حسابك لما تشوفى الكلمة دى فوق فى رأس البوست
تعرفى إنه ممكن يكون فيه الجو الحزين دا
متحرمشى من طلتك يا حبيبتى
و النوبة الجاية لازم تيجى
هاه
انا كمان بحبك يا ستوتة

إرسال تعليق