.

.

آه ... يا رجلى  

Posted by: فاتيما in ,

أل أنا صاحية بدرى على غير العادة
و شاربة مج النسكافية المعتبر و مروقة مزاجى
ولابسة و متوضبة عشان أفسح نفسى و أزور معرض الكتاب
رايحة لوحدى بقى عشان محدش يضايقنى و أتفرج على الكتب براحتى
و منقية يوم الحد بالذات عشان اول يوم بعد الاجازة
يعنى كله رايح شغله و مدارسه و كلياته
و الجو هيبقى رايق و المعرض هيبقى فاضى
و متكعبلشى فى أى حد
هيا دى النية
لكن تقولوا إيه فى الحظ الدكر
ماشية فى قاعة من القاعات و منسجمة قوى فى الفرجة
و الاقى اللى واقف قصادى من الجهة التانية و ساكت
ببصله كويس لقيته زميل من أيام الجامعة و إشتغلنا سوا 3 سنين
فى اول شغل ليا و حضر فرحى كمان
إيه يا رب الموقف المحرج دا .. مش عاوزة أشوف حد أنا
أسلم بقى ... خلاص وشى جه فى وشه
- أهلااااااا يا مجدى ازيك
- ازيك يا فاطمة عاملة إيه .. إنا قولت مش هتعرفينى
(شكله إتغير طبعا بفعل عوامل الزمن دول عشر سنين )
- كويس إنك إنتا اللى عرفتنى
- دى عشرة كلية و شغل يا فاطمة معقول .. إنتى جاية لوحدك و لا معاكى حد ؟
- لأ .. لوحدى عشان أعرف إتفرج فى هدوء... إنت معاك حد
- آه ... معايا مدير المكتبة بيلف فى قاعة تانية
( الراجل دا متخانقة معاه قبل ما أستقيل و مش عاوزة أشوف وشه )
و معايا ن
( مش هكمل بقية إسمها .. بس هيا المفروض زميلة قديمة
لكن تصنيفها الحقيقى إنها تنتمى لفئة الجوارح
النوع دا اللى بينقض على البشر و يقتات على جراحهم)
و كمان معانا يحيى
(اخيرااااا حد بحبه و عاوزة أشوفه )
- طب ممكن آجى أسلم على يحيى دا وحشنى قوى
خرجت معاه أسلم على اللى واقفين و كان معاهم واحدة جديدة معرفهاش
بس سلمت عليا بحرارة و قاتلى بيتكلموا عنك دايما بكل خير
طب كويس و الله
إما الست نون فعلطول و هيا بتسلم عليا ... علت صوتها
و سمعت الناس اللى واقفة على بوابة المعرض
- إزيك يا فاطمة و إزاى ..... أبو يوسف يعنى
( يا سلااااااااام ... منتى عارفة إننا إتطلقنا بعد مشاكل )
بصيتلها و رديت ببرود
- إحنا سيبنا بعض من زمان
و باقى الخمس دقايق اللى وقفتهم مبصتش ناحيتها و كأنها مش موجودة
يحيى فرح لما شفنى و كان قليل الأسئلة لأنه غالباً عارف كل حاجة
لكن مجدى هوه اللى كل شوية يبسأل
- إنتى مش كان معاكى ولد
- آيوه .. يوسف
- هوه عنده قد إيه دلوقتى ؟
- تسع سنين و شوية
- و إنتى فين دلوقتى ؟
- فى الدنيا
- يعنى بتشتغلى فين ؟؟
- مبشتغلش
- ليه كدا !!
- أصلى بعد ما رجعت أنا و يوسف منفعش أرجع شغلى ففصلونى
- إنتوا روحتوا فين ؟؟
- إنت مش عارف القصة و لا إيه .. واضح إنك مكنتش بتسأل عن اخبارى ؟؟
يحيى هز راسه مؤكدا إنه هوه كان بيسال عليا
- إنا عرفت إنك مشيتى كام سنة كدا
و سكت
لكن سيل الإسئلة ما زال ينهمر من الطرف التانى
- كنت سمعت إنك عملتى دراسات عليا ..خسارة إنك مكملتيش
- أصل الامكانيات حالياً لاتسمح .. بس ربنا يسهل قدام
ويا ريت تبطل أسئلة بقى
رجاء يدوى فى صمت
لكن إزاااااى يتحقق الرجاء ؟
- و مجبتيش يوسف معاكى ليه ؟
- يوسف مع والده دلوقتى
- بيزوره يعنى
- لأ قاعد معاه.. أنا سلمتهوله عشان يروح المدرسة
- بس بتشوفيه و تكلميه
- لأ ...
سكت شوية مستنينى أقول حاجة ... مقولتش
فرد مستنكراً
- بتهرجى .. بقاله أد إيه مع أبوه
- سنة تقريبا ً
كل الحوار دا و اللى واقفين يعرفونى و ميعرفونيش بيتفرجوا
و يسمعوا
- سنة بحالها ؟؟ ...و إنتى إزاى تسكتى على كدا ؟
- ظروووف
- لااااااا .. ظروف إيه دى ؟
دنتى تحاربى الدنيا
و بكل ما اوتيتى من قوة ... إنتى وراكى إيه تانى يعنى
و الولد ذنبه إيه
لازم تفكرى فى مصلحته
يحيى مسك دراعه و كانه بيقوله كفاية كدا
راح مغير الكلام
- طب ربنا يسهل إن شاء الله
بفتح بقى و أنا على وشك أبدأ الدفاع عن نفسى
و إبتدى أشرح موقفى
و بعدين حسيت إن فجأة إكتئبت
فسكتت
يحيى بصلى بشفقة و كأنه حزين على حالى قائلا
- ما هوه ابوه كمان شاف حاله من بدرى
لقيت الموقف كدا بقى أبوخ من إنى أكمل وقوف
و زى اللى كانت ماشية فى حالها
و إترمى عليها جردل مية
فى وسط شارع و بقت فرجة
تمتمت بكام كلمة عشان أعرف أمشى
- أسيبكم بقى قبل ما المدير ما يطب علينا و أنا مش عاوزة أشوفه
سلمت عليهم و كعادة نون باغتتنى بخباثة
- سورى يا فاطوم مكنتش أعرف الحكاية
بصيتلها كدا فيما معناه بلاش تستعبطينى
عشان مش ناقصكى
و سيبتهم و دورت وشى
و مشيت و بخطوات سريعة و كانى خايفة لحد فيهم يندهنى و يحصلنى
يعنى يا رب أنا جاية النهاردة عشان مشوفش حد
و برضو مفيش فايدة
طب اعمل إيه يعنى؟
مخرجشى خالص عشان محدش يضايقنى ؟
مينفعش
طب إقعد أنقى فى الناس اللى ماشية فى الشوارع ؟
مينفعش
طب إنا زعلانة ليه دلوقتى ؟
زملاء قدامى و قابلونى صدفة
و بيسألونى على اخبارى
إيه المشكلة فى كدا ؟
مفيش ؟... لأ .. هوه فيه مشكلة
و فيا مش فيهم
أصل أخبارى هيا اللى سخيفة
مش الموقف هوه اللى سخيف
الجواز ... وإتطلقت
الشغل ... وإترفدت
الدراسات العليا .. ومكملتش
يوسف .... ومش فى حضنى
يعنى فشل على كل الجبهات و الأصعدة
و الله يا رب أنا راضية بكل دا و قابلة الخسارة فى كل حاجة
لكن الآخرين ... لما لا يتركونى أقبل و أرضى ؟
طبعا بعد ما سيبتهم علطول نفسى إتسدت ... و روحت على البيت
طول السكة و انا بفكر فى الناس و قسوتهم
و احوالى اللى إتدهورت لدرجة إن زميلى يوقف يدينى محاضرة فى الامومة
و يوجهلى إتهام علنى إنى مقصرة و المفروض احارب لآخر نفس
طب هوه يعرف إذا كنت قصرت فعلاً و لا لأ ؟؟
على أى أساس يهاجمنى و هوه ميعرفش ظروفى ؟!!
طب لما زميل دراستى و شغلى و اللى المفروض يعرفنى
كويس و سمع وضعى الحالى فحكم عليا الحكم دا
اومال الناس اللى متعرفنيش خالص بتقول عليا إيه؟؟
الناس اللى بتحبنى لله فى لله و بتدخل هنا تطل عليا
و بتقرى كلامى عن يوسف
فى آخر كل بوست
بيقولوا عليا إيه فى سرهم ؟
بيقولوا ضعيفة و جبانة
أم منظر متستاهلش تكون ام
وجعانا ليه بحزنها و هيا السبب فيه بتخاذلها
و الام اللى بجد هيا اللى متسكتش إلا لما تهد الدنيا كلها
و تملى الدنيا صراع و مواجهات و ليكن ما يكون
يا ترى هوه دا إنطباع الناس الحقيقى عنى و عن اللى زي حالاتى؟
أنا حاليا أشبه باللى عايش فى مصيدة و بيفكر إزاى يطلع منها
بأقل خساير ممكنة لأن فيه حد مستنيه برا القفص
و معتمد عليه فى مستقبله
فمينفعش أتهور
مبفكرش فى بكرة ؟؟!!!
مين اللى قال؟
بفكر طبعا و لكن بعقل و من غير جنان
هبتدى بالإستقرار فى شغل .. و دا هيحصل
و بعد الشغل ادور على مكان مناسب تحسباً لأى طوارىء
و بعد كدا أرفع القضية و امشى فى التفاصيل كلها
و أنا مش محتاجة اتسند على حد
غير ربنا
و روحى
و هيا دى ظروفى و محدش ادرى منى بحالى
و محدش من حقه يحكم عليا و يتهمنى بإنى ام فشنك
هوه لازم كل حد أقابله احكيه كل حاجة ؟؟
لازم أعرى روحى و ظروفى و مشاكلى
و أعمل زى الغرابة اللى طول الوقت تشتكى و تنعق
وبعدين إزاى اثبت إنى ام كويسة ؟
كان المفروض ارد على زميلى واللى حواليه بكل الكلام اللى فوق دا ؟؟
و لا كنت اطلعله الكتب اللى إشتريتهم ليوسف
عشان أفهمه إنى لسه فكراه حتى و هوه مش معايا
و إنى مش طول الوقت مقضياها فسح و خروجات رامية الواد لأبوه
أومال لو كنت لابسة دبلة ومتجوزة و لا شايلة عيل
كانوا عملوا إيه ؟!!
الامومة فى نظرهم معناها إيه ؟
على فكرة .... أنا مبكتبش الكلام دا عشان زعلانة على روحى
أنا مش محتاجة حد يعلمنى إزاى احب إبنى
صحيح منيش ام مثالية ... لكن الحمدلله على كل حال
أنا بكتب عشان زعلانة على الناس
الناس اللى بتعيش فى دور القضاة و بيعلقوا المشانق من غير ما يعرفوا الحقيقة
البوست ده إنه مش موجه ليكم بالذات
لأن تقريبا كل اللى بيدخل هنا رغم عدم معرفته بكل التفاصيل
لكن الأغلبية
قلبها فيه الخير و بتطبطب على قلبى

صحيح ساعات ممكن يتغاظوا منى و من عجزى و مش لازم يفهموا موقفى

بس بيحاولوا بيتفهموا و يحسوا

و يتالموا معايا

و الأهم كمان إن العطاء بيمتد و يدعولى

أنا بكتب البوست دا للناس التانية اللى بتتسرع فى إطلاق الاحكام
و واخدة الدنيا فى المطلق كدا أبيض و أسود
و بقولهم يا جماعة
محدش يحكم على حد غير لما يعرف كل حاجة
و حتى بعد ما يعرف .. لازم يفهم إننا مش كلنا زى بعض
يعنى قدرتك إنت تختلف عن غيرك
و لا يكلف الله نفساً إلا وسعها
و لو سمحتم اللى فى ظروفى عامله كدا
زى اللى رجله مكسورة
و ماشى بيعرج وهيخف على مهله و فى أوانه
و مش هيطلب منكم مساعدة
و هيحاول يمشى لوحده و على قد خطوته
بس يا ريت لحد ما يخف
محدش فيكم و هوه ماشى
يخبط فى الرجل المكسورة دى و بعدين يكمل طريقه عادى كدا
من غير ما يحس إنه داس على غيره و لا حتى يقول معلش
لأن الى ميحسش بالآم غيره و يهتم بمشاعرهم
يمكن ييجى عليه الدور فى يوم
ورجله تتكسر لأى سبب
و ساعتها هيبقى قاعد
يتفادى الخبطات على أد ما يقدر
و يستنى حد يقوله
معلش
و مش اكتر من كدا
إقترب منى كيفما شئت
لكنى لن ادعك تقترب بما يكفى
لتؤذينى

This entry was posted on الاثنين, يناير 26, 2009 and is filed under , . You can leave a response and follow any responses to this entry through the .

34 كــــلام بيطــبطـــب عـــلى قــــلبى و روحــــى

فاتيما

مش عارفة اقولك ايه بس عندك عندك حق في كل كلمة

بس تعالي هنا مين قال ان في حد ممكن يقول عليكي أم مش كويسة ياريت كل الأمهات يبقوا زيك بجد مش مجاملة

ياما امهات ولادهم في حضنهم وعايشين معاهم غرب
ومش مقدرين معني الأمومة ولا نعمة الأولاد

انتي مش مضطرة تدافعي عن نفسك لآنك مش في موقف دفاع وصدقيني مهما قولتي ودافعتي برضة اللي في نفوس ناس موجود

خلي اللي في القلب في القلب محدش بيطلع علية غير ربنا

إن شاء الله فرجة قريب

فاتيما يا حبيبتى
ولا اقولك يا ام يوسف؟
انتى مش ام وحشه ولا فشنك ولا حاجه بالعكس انتى ام هايله
ويوسف يوم ما يرجعلك ان شاء الله هيلاقى فى حضنك حنان وعطف
مش موجود عند امهات كتير

فكرى فى بكره وعلى اقل من مهلك
اعملى اللى يرضى ربك وابنك
اوعى تعملى حساب للناس

بصى على كلامهم واضحكى عليه لانهم مش فاهمين
قولى لنفسك دايما انك جدعه وجامده والدنيا مش هتكسرك

ان شاء الله يوسف هيرجعلك
ماتقلقيش
وخلى ثقتك فى وجه الله

اما بالنسبه لصاحبتك اللى هى قريبه قاسم السماوى دى
فانا معاكى فى طريقتك معاها لانها مش بتحس بحد وعموما
الايام يومين يوم لك ويوم عليك

طبع الدنيا كده سبحان الله

ومحدش عارف الخير فين

هونى على نفسك يا حبيبتى

وادعى ربك كمان انه يرجع لحضنك بسرعه

والله ربنا رحيم قوى قوى

على فكره
فى اول البوست انا فرحت لكلامك وانتى بتقولى انك خارجه وكده
قلت اخيرا هتغير جو وتفك عن نفسها
بس معلش ياحبيبتى
نفسى اسمع عنك اخبار كويسه يا فاتيما

اتمنى لك كل الخير

أول مرة ادخل وأرجو أن تسمحي لي أعلق
أنا عارفه انك مأذية جدا داخليا ومش ناقصة حد متعرفيهوش يجي ناحية جراحك

بس برضوا لأن مناخيري طويلة وحشرية هاأقول لك
لو جبتي عشرين عمر على عمرك مش ها تقدري تغيري طابع الشعب المصري
شعبنا فيه حاجات حلوة مؤكد لكن فيه صفات زفت لا تعليم بيغيرها ولا مدنية بتنجرها
ومن أهم هذه الأشياء دس الأنوف والأسماع في مالايعني غير صاحبه
مع ان من حسن اسلام المرء تركه مالا يعنيه بس كأن الحديث ده محدش سمع عنه

كل واحد يسمع قصة أو حتى يتخيلها يحب قوي قوي يحللها بوجهة نظره اللي هي مؤكد وجهة نظر بهيم لا عاش اللي انا عايشاه ولا فاهم حاجة

طيب ايه الخلاصة لاصة هذا الشعب لايحترم من صنف الستات الا ست واحده قوية قررت طريقها ورمت اللي يجي في سكتها بالضربة القاضية وتجاهلت تعليقات السخفاء ولا تعني لها شماتة الشامتين شيء ومؤكد أن روح ماما راجع راجع لحضنك لو باعدت بينكم بحار والله الذي لا اله الا هو ها يرجع ليكي لوحدك
ها تقولي ياستيته انتي هابلة ومش فاهمة
ها اقول لكي انا خبرة الزمان عرفتني يقينا بإسم الله العدل راجع راجع بس ياريت لما يرجع يلاقي ماما قوية ومفترية علشان حضنها يضمه صح
تحياتي واسفة للتطويل

يا طمطم ازيك
المشكلة مش فيكى ولا فى انك تقعدى فى البيت ولا انك تخرجى لاننى ممكن انتى وفى البيت يجيلك ضيوف من نفس العينة المشكلة كلها يا طمطم فى الناس اللى بتحكم على الحاجه من برة باحكام مسبقة من غير ما تجرب او تعرف الجانب الاخر من القصة علشان تحكم كويس علشان كدة بقول دائما وابدا احكام الانسان من ذاته وطول ما هو على قناعه داخلية باللى عمله او اللى بيعملها وعارف انه مش بيغضب ربنا ميهمهوش راى الناس
بس كل اللى حقولوا ليكى انتى مش ام وحشة يا فاتيما انتى ام يفتخر بها ويوم ما يرجع يوسف لحضنك ان شاء الله لوحده حيعرف دة وحيحس بيه من غير ما انتى تقولى

اهم اصحابك اللى شوفتيهم دول
اطبعى البوست اللى عندى بتاع مناخير بونكيو وابعتيه فاكس ليهم بس خلاص

معلش يل فاطومة
و لا تزعلى نفسك
ولا تحطى فى دماغك اصلا
الناس عندها حب استطلاع عاوزة تعرف اي حكاوي
و بعدين بعد ما يسمعوا الحكايات كلها
ياريت بيشجعوا الواحد بكلمة
الا بيتصعبوا
يعنى ناس نكد فى نكد
و لا تحطى فى دماغك و يقولوا اللى يقولوه
يروحوا يشوفوا نفسهم همه الاول
ناس تفرس

بقولك ايه يا اختى لو قاعدة مش وراكي حاجة تيجيش تقومي اختك مفروسة؟؟؟
بوسة ليكي كبيييييرة

ام يوسف .. امومتك هي حق مكتسب ليكي ومافيش حد من حقه يحاكمك ولا يتهمك بالفشل او الخضوع
انا عارفة اني انا كمان مش من حقي اقول اللي هقوله دلوقتي لكن اعتبريني اختك الصغيرة
انتي اللي اديتيهم الفرصة يعملوا منك شو خاص بيهم سواء اللي كان معاكي او اللي ضدك
لما بنبص على مشاكلنا انها واحد اتنين تلاتة الدنيا بتضلم في وشنا
مع ان كتير جدا بيكون ده قدر من ربنا مالناش يد فيه
بس انتي مش مضطرة تردي على اسئلتهم مش مضطرة ترضي فضولهم
آلامك جزء منك مش هي كلك
بدليل انك لسة بتستنية وبتعملي كل جهدك انه يرجعلك
ممكن يكون عندك خطة لده وممكن لا وممكن ربك يحلها من عنده من غير سعي منك
تأكدي ان قلب الام هو اللي هينتصر في النهاية .. قلب الام اللي ماحدش من حقه يجرحه او يتسلى بتعذيبه
كنتي تقدري تنهي كلامك معاهم كنتي تقدري توقفيهم لازم تفهمي العالم كله انك اقوى من كده لازم توري نفسك انك اقوى من كده

طبع البشر الفضول وحب المعرفة وعلى رأى آبى كثيرون عندهم مناخير طويلة بيزرعوها ف اللى ملهومشى فيه

عامل الناس على قدر عقولهم
================

انا عاوزة اقولك على حاجة على جنب

انتى من الاول اصلا رايحة وانتى مستخبية جوه الشرنقة وخايفة من البداية انك تقابلى حد يعرفك - عارفة - كنت هقولك تعالى نروح سوا ومع بعض - النقطة انك لما تحبى تعملى حاجة حلوة لازم تكونى مع اللى يقويكى

انتى بقى رايحة مستخبية وكل كلمة قالوها كانت بتوصلك وهيه عامله زى السهم اللى بيرشق ف قلبك

بصى يا طمطم

انتى عندك من القوة اللى بيخلينى انبهر بيها حتى لو انتى مش بتعترفى بده ولما بتكونى قوية مش بيهمك ولا اى حد وبتردى على اى أسئلة وانتى عندك صدرية فولاذ لا يمكن يدخلها اى سهم

الناس هتفضل زى مهيه ومش هيتغيرو لكن انتى اللى عندك مفتاح القوة - وانتى الوحيدة اللى تقدرى تحكمى على نفسك وتصرفاتك - انتى ومن تثقى بآرائه

كنتى روحتى وانتى وسط مجموعة المدونين اللى بتحبيهم وهما رايحين كنتى هتنبسطى جدا وهتعملى اللى نفسك فيه وهتبقى قوية بيهم

انتى معملتيش حاجة غلط وزى مقولتى اى حد كان ممكن يكون مكانك فحاولى يكون ردك للكل - بأنا زى الفل والحمد لله وكمان يوسف واحنا الاتنين مفيش احسن من كده لان ربك هو اللى شاء انكم تكونو ف القدر ده وبرده مفيش احسن من كده ليكم ف الوقت ده

بوسة كبيرة ووحشتينى والف سلامة على رجلك اللى سليمة وزى الفل

وأخيراً أحب أقولك

العقل نعمة
الإحساس نعمة

هبة

السلام عليكم
عارفة دة طبع فيه الناس مش هيتغير ومش هينفع نراضيهم مهما عملتي
وعاوزة اقولك نصيحة حاولي تبقي ثقيلة يعني تقفلي اللي ادامك
ما تخليهوش يتمادى في اسئلته
يعني اللي سالتك فين ابو يوسف ما ترديش عليها
لو رخمت قوليلها مجاش
فين يوسف في البيت تجاوبي اجابات تقطم الكلام ما تخليش اجاباتك تفتح لسؤال تاني
وسواء الناس عرفت ظروفك او لا مش هتفرق يعذروكي او لا انسي وامش في طريقك ما حدش ادرى بظروفك غيرك
ربنا يوفقك يارب ويريح قلبك
تحياتي

في حجات مشتركة بينا
منها حبنا للقطط ودي أجمل حاجة
منها ظروفك اللي شبة ظروفي من بعيد

مش عاوزة ادخل اطبطب أو امدحك
بس عاوزة اقزلك كلامك عن رجليكي المكسورة وانها حتتصلح على مهل جميل ومعبر عن فهمك
يمكن مش صح انك تخلي يوسف جنبك دلوقتي
انتى ادرى بظروفك من اي حد
يمكن لو فضل مش حتقدري تديله مقومات الطفولة اللي محتاجها
مش حتقدري تدخليه مدرسة زي والده
يمكن متقدريش توديه ملاهي كل اسسبوع وتدخليه سينما وابوه يقدر
هو طفل دلوقتي مش حيفهم غير مفردات المادية مش المعنوية
يعني صعب دلوقتي قوي تخيروه بيحب مين فيكم اكثر ولا عاوزيعيش مع مين فيكم
اختيارك صح لحين اشعار آخر
وده في حد ذاته عين العقل
مش الأمومة اني اخد موقف يريحني
العذاب كل العذاب في البعد مش في القرب
واختيارك للبعد معناه تضحية
والأمومة تضحية بعقل

وسيبك من الناس اللي همهم يدوا موشحات لبعض
ما دمتي عرفتي مصلحة ابنك وعملتيها
نفضي للناس اللي حواليكي
لما ابنك حيكون جنبك محدش فيهم حيراعيه
ولا وهو في حضن اوه حد فيهم حياخد باله ولا حيحس بيكي
يعني لا ناقة لهم في الموضوع ولا بعير
اعذريهم ما دي آخره التربية الغلط

طب ينفع اشوفك يوم الجمعة بإذن الله
رايحين معرض الكتاب
إن شاء الله
ناوية اروح لسحر غريب
نفسي اشوفكم يا ناااااااااااس
حتجننوني
بحب يا فطومة
وبحب القطط جدا
دمتي بحفظ الرحمن

انت عندك حق فى كل اللى انتى قلتيبه
ومحدش من حقه يحاسبك او يحكم عليكى من غير ما يعرف ظروفك
انتى اكتر واحدة تحسى بنفسك ومهما اللى حواليكى عرفوا ظروفك مش هيقدروها زيك
سيبك من كلام الناس وبصى لبكرة
حاولى تشغلى نفسك واشتغلى واثبتى ذاتك وارمى اى حاجة وراء ضهرك
اما بخصوص يوسف فان شاء الله هيرجعلك وان كان بعده محزنك ومضايقك معلش بردوا افتكرى انه مش مع حد غريب هو مع والده واكيد هيزورك واكيد والده بيحبه زيك وهيعلمه وهيخليه احسن الناس واكيد هو ده اللى انتى عايزاه
ويوسف اكيد عمره ما هينساكى وبيحبك جدا وممكن هو اللى ياثر على والده انه يكون معاكى
سيبيها على ربنا وسلمى امرك له وان شاء الله هتتحل من عنده
تحياتى ليكى يا قمر

حمد علي سلامتك من معرض الكتاب ياطمطم
هو ده طبع بلدنا
لما نتكلم في الدين تلاقي سبعين مليون مفتي
كوره سبعين مليون خبير
سياسيه سبعين مليون محلل
يعني في دمهم لاتقلقي حتي لو كان يوسف معاكي ووالوضع عادي هيلاقوا مدخل يبعبعوا فيه وخلاص
يلا بوسه ليكي ياطمطم

اللى بيخاف من عفريت بيطلع له؟؟
اليتيم من له أب مشغول وأم تخلت

اعانك الله

اقلك علي حاجه
مش هقعد اقلك ولا تزعلي نفسك ومتعبريش حد وميهمكيش من حد كفايه انك عارفه نفسك
عايزه اقول بس ياريت الناس تسيب كل واحد في حاله بجد ياريت محدش ليه دعوه ودع الخلق للخالق العيب ان احنا بنحب ندخل في خصوصييات بعض ونحشر نفسنا ولازم نعرف اسرار بعض طب ليه ده حتي دينا الجميل منع ده ليه ناس عندها حب استطلاع وتقعد تقول لا ده غلطان وده وحش ودي معرفش ايه لو كل واحد يبص لعيب بتاعه مش هيفضي يشوف الناس وينشغل بمشاكلهم ياريت بجد لو عايزين نساعد حد نقف جمبه نطبطب عليه نستني لما اهو اللي يجي ولو محتاج يفضفض هيجي عليك ومش هيستني منك تسأله بجد ده عيب فينا ووحش جدا ربنا يهدي الحال بجد وربنا يصبرك وعارفه مدي شعورك دلوقت بس برجع واقولك سيبك من كل الكلام ده وعيشي حياتك زي ما يريحك وينسبك وتبقي سعيده كده او كده الناس بتتكلم متعبريش حد ربنا وحده عالم بالنفوس

اسوأ المشاعر
ان يصبح مصيري في يد من لا يعرف قدري, وان انام خائفا ,وان امشي منزعجافي يومي, ومتحسرا علي ما هو فات
تحياتي يا جميله وسيبك من كل ده
سمكه بتقولك ولا يهمك

تسلمى ياطماطم
وانا معاكى بوجه لهم نفس رسالتك

لا إله إلا الله
بجد فيه ناس تستاهل الحرق
يعنى مش كفاية اللى انتى فيه

بجد حسبى الله وتعم الوكيل

روقى يا طمطم وسيبك من اى حد

كل واحد يدور عاللى عنده ويشغل نفسه بيه

الإبداع الحقيقي حري ٌبالتعبير عن ذاته ، والفكر الإنساني لم يخلق ليختنق في ظلام الصدور، والمبدع الحقيقي يمتلك دوماً الحق المطلق في أن تجد أعماله طريقها للنور باعتبارها خلاصة تجربة إنسانية كاملة تستحق النشر .
من هذا المنطلق تعمل دار رواية للنشر الإلكتروني على إفراد مساحة كاملة للنشر لكافة مبدعي الشبكة العنكبوتية بإعتبارها الخطوة الأولي نحو النشر الورقي، وفي سبيل الحلم في أن يصل إنتاجك للجميع تتعهد الدار خدمة النشر الإلكتروني على موقعنا أولاً بصورة تليق بالأعمال مع توفير الدعاية اللازمة والمناسبة له على الشبكة على كافة المستويات ثم تقديم ما يصلح منها لدور النشر المختلفة شرط أن يكون حجم هذه الأعمال صالحاً للنشر الورقي .
بدايتنا هي الحلم المشترك ودافعنا للاستمرار هو الأعمال المميزة من أجل أن نحقق معاً توازناً للنشر الإلكتروني والورقي ... الجديد عندنا هو اختيار أفضل عمل سنوي يصل إلينا كل عام من خلال لجنة تنعقد لذلك وتعتمد في اختيارها في الأساس على استقراء القبول الذي لاقاه العمل المختار لنشره بصفة سنوية في معرض الكتاب مع التزام الدار بتكليف نشره وعمل الدعاية اللازمة له كاملة و بصورة مرضية لصاحبه .
يبقى أن ننوه أننا لن نخضع لشروط النشر المعتاد وتعسف دور النشر التقليدية و يكفي فقط أن يمثل عملك تياراً أدبياً ناضجاً سواء أكان العمل في صورة رواية أو ديوان شعر أو مجموعة قصصية .


موقعنا ( http://rewaya.tk )


إيميلاتنا
rewaya12@hotmail.com
rewaya12@yahoo.com

حبيبة قلبي

اول مرة اشوف مدونتك

وجعتيني اوي

ربنا يكون معاكي

ويصبرك

ح ادعيلك دايما ان شالله

بصى بقى يا طماطم الناس كلها كده بنفس الرزاله اللى انتى بتحكى عنها
شوفى انا متجوزه بقالى 10 سنين و كان مكتوب كتابى قبل كده وعلى واحد تانى و الكلام ده انتهى من 12 سنه و لسه ساعات اصحاب قدام اشوفهم و يسألونى سبتوا بعض ليه؟؟!!!!!!!!!! كان الموضوع لسه من شهر و لا اتنين
الناس كلها فضوليه بطبعها و تحب تعرف المواضيع كلها عشان اما يتحكى قدامها تعرف تفتى كويس بحكم انها ملمه بكل جوانب و اسرار الموضوع
المهم انك تفضلى قويه و متماسكه عشان تعرفى تفكرى و تتصرفى صح

بصي فاتيما أنا حاسة بيكي قوى...
أنا و جوزي متجزين بقالنا سنتين و لسه ربنا ما رزقناش بأطفال
و الناس ما بتسيبناش في حالنا و ما حدش فاهم ان دي قلة زوق أكتر من أنه اهتمام
يعني واحدة قالتلي في وشي: ما علش أنا بنتي قعدت سنتين من غير خلفة برضه و ما كانتش عاوزة تروح لدكاترة (طب أنا مالي بده كله؟؟؟!!!! هو أنا كنت اشتكتلك؟)
و الله الحمد لله أنا مقتنعة انه رزق زيه زي أي حاجة و حييجي في وقته ان شاء الله

معلش طولت عليكي بس عاوزاكي تتأكدي أن الناس دي ابتلاء من عند ربنا و لسه ياما حتقابلي من الأشكال دي كتير و ممكن بعد كده تعتذري بطريقة شيك زي "ما علش يا جماعة ما بحبش أتكلم/أفتكر الموضوع ده و خلاص"

اعتقد يا فاتيما..
رغم فصاحتك
وايلوبك الرائع فى الكتايه
الا ان مهجمك يخلوا من بعض الكلمات اللى انا اسفه جدا انتى لاوم تذاكريها وتكتبيها 100 مره كل اسبوع مش حقول كل يوم...

طظ
دى خصوصيات
انتو مال....كوا
خليك فى نفسك
من حسن اسلام المرء تركه ما لا يعنيه
عفوا..وقتك خلص


انتى مش فاشلهزمش اقل من اى ام بالعكس
انتى حد جميل متحمل كتير
والمفروض الناس يعيدوا تربيه انفسهم لان تقريبا فى ناس كبرت منغير ما تتربى!!!!
المره الجايه حاجى معاكى المعرض
ولو قابلتى حد حفضل اقلك ياللا بقى
عشاناللكلك ده مالوش لازمه

اولا يا فطوم انتى عندك حق مش بيحس بالنار الا اللى ماسكها
وفيه ناس ربنا خلقها مش بتحس غير بنفسها ولا بيهمها ناس ولا بتفكر بعد ما تبعد عنهم هما جرحوهم ولا لاء

المهم ان انتى ولا تحطى فى دماغك واعرفى ان اللى مش بيحس بيكى مش يستاهل تفكرى حتى فى اى كلمه ضايفك بيها

المهم انك عارفه انك ام ومش اى ام انت ام مثاليه جدا كمان
وربنا هيرجعلك يوسف بالسلامه باذن الله

اما بالنسبه للرجل المكسورة
ااااااااااااااااااااه يا رجلى
هههههههههههههههههههههههه
بالله عليكى عاملى كل واحد زى ما يستاهل ومش تضايقى نفسك

بحبك يا فطوم
مووووووووووووووه

ولا يهمك يا ست الكل
كل ده عادى وسمعتيه كتير ولسه هتسمعى اكتر منه
المهم انتى ايه
سيبك من الناس وكلامها
المهم انك مقتنعة بافعالك وانك مش مقصرة بالعكس انتى نفسك تبقى اعظم ام فى الدنيا ونفسك ابنك يبقى اعظم واحد فى الكون
لكن كل شىء بامر الله
وعسى ان تكرهوا شيئا وهو خير لكم
اكيد ربنا ليه حكمة فى ذلك
يا ريت نشوفك يوم الجمعة فى معرض الكتاب وليكى يا ستى اننا مش هنسال عن حاجة
ربنا يوفقك ويسعدك ويقر عينك برؤية يوسف
تحياتى

اللى ما يعجبكيش كلامه طرقعيله بلا قرف
انتى ما تعمليش حساب لحد
واللى موجوع وجعك يبقى يفتح بقه
بلا قرف
روقى ياختى وكبرى دماغك لحسن انتى نرفزتينى وعايزة اقول 100 تييييييييت

وومن
ميرا يا حبيبتى
كلامك ساعات أقول إنه حقيقى
و بحس إن يمكن ربنا بعدنا عن بعض انا و يوسف عشان اقدر قيمته قوى قوى
و هوه كمان يمكن يحس بيا اكتر من اى طفل عادى
مع غنى و الله من قبل ما ييجى و لا حتى انا آجى الدنيا أنا مسستنياه و بحلم بأمومتى ليه و لأى طفل ربنا يرزقنى بيه
الامهات اللى بتحكى عنهم يا ميرا
غافلين عما يمتلكون من كنوز بس
إنما الغفلة لا تعنى إنهم مبيقدرش خالص
دا نوع من عدم التقدير اللحظى بس
و ربنا يكرمك يا ميرا
و هتكونى ام عظيمة إن شاء الله
لأنك من دلوقتى بتستعدى أهو و بتفكرينى بحالى بس ربنا يكتبلك حظ إن شاء الله احسن من حظى الأف مليون مرة يا رب
كل الحب و الود ليكى يا حبيبتى





عاشقة الرومانسية
أم يوسف احلى ألف مرة طبعا بس قولى اللى يعجبك
بصى بين التعليقات هتلاقى تعليق دوبا
و الطائر الحزين
كلامهم راشق على الحالة بالظبط
أنا رايحة و أنا خايفة من عفريت يطلعلى ...فطلع !!!
بس صعب عليا إن الناس بتجرح كدا من غير حتى ما تسال روحها اللى قصادها دا فعلا مقصر و مهمل و لا دا آخر جهده ؟
ثقتى فى الله اكبر من اى حاجة فى الدنيا يا عاشقة صدقينى
و إلا مكنتش لسه بعقلى لحد دلوقتى بعد كل اللى مريت بيه
و الحمدلله
ألف حمد و شكر
تحياتى و حبى ليكى و مبسوطة قوى بزيارتك و طلتك الحنونة عليا



ستيته حسب الله الحمش
يا ستى نورتى المطرح كله و قولى كل اللى يعجبك و من غير حشرة مناخير و لا حاجة ....
بس يعنى أى كان طبع الشعب المصرى و عيوبه ... بفترض احيان بسذاجة يمكن
أن الناس اللى عارفنى و عارفة اخبارى مش المفروض تتسلى بسؤالى تانى لما تشوفنى صدفة و تقعد تحاكمنى على الملأ كدا مع إنهم مفروض عارفين
و لو حتى مش عارفين يا ستيته ...
يعنى المفروض عارفينى أنا
عارفين إن فاطمة دى عشرة سبع سنين و قلبها دا مش جامد و قاسى لدرجة إنها ترمى إبنها بمزاجها و متحاربش الدنيا قبل ما دا يحصل ...
يعنى إفتراض ساذج صحيح
بس تصورت إنه هيحصلى من الناس اللى تعرفنى و مش مشكلة مع اللى ميعرفوش
القوة اللى بتتكلمى عليها دى يا ستيته بتخوفنى
بتحسسنى إنى هتغير لواحدة مبحبهاش
بخاف قلبى يجمد و يبقى قاسى
معرفش
احاول
طولى زى ما تحبى
و إنتى نورتينى بجد
و ألف شكر على نصايحك و إهتمامك
متحرمشى أبدا من الشياكة دى



رئيس جمهورية نفسى
محمووووووووود
يا جدع إنت فين ؟
كدا غايب بقالك مدة
انا قولت إنت زعلان منى و لا حاجة ؟؟
طب الحمدلله إنك مش زعلان
كلامك تمام يا ريس بس متنكرشى ان قناعة الإنسان الداخلية و قوته بيبقى عاوز احيان يستمدها من الآخرين
الى حواليه و اللى بيحبوه و يعرفوه
ساعات بيبقى حاسس إنه عاوز تاييد من الناس بأنه ماشى صح و فى طريقه تمام
مش إنه غلط و دماغه رايحة شمال و كدا
أصل منظرى كان مش لطيف قدام زميلتهم الجديدة و أنا بيتقالى فيما معناه إنك ام معملتيش حاجة و وراكى إيه غير كدا
حسيت إن زميلى اللى زاملنى 7 سنين بيقول كدا اومال الست دى بعد ما امشى هتقول عليا إيه ؟؟
صحيح مش هشوفها تانى و مجراش حاجة قوى
بس جايز أنا مكبراها زيادة عن اللزوم يعنى
يمكن ...لا
اكيد
منور يا ريس و واحشنى زيارتك



$$ appy $$
يا قمر التدوين كله
متهيألى و لا ميت بوست هينفعوا
الحشرية دى مزاج و متعة
إنتى وحشتينى قوى و ياريت أشوفك يوم الحفلة بتاعة سحورة فى المعرض
بوسة و حضونة يا بيبى

واحدة مفروسة
فروستى
وشى منك فى الأرض
بقا انا عمالة ادلع و أثول أه يا رجلى و أروح عندك ألاقيكى تعبانة
سلامتك ألف مليون سلامة
و من ناحية الفرسة هيا فعلاً حاجة تفرس
حبى و أحتراماتى يا حبيبتى



قلب محطم
منورة
و حكاية الشو دى ممكن يبقى عندك حق فيها
بس يعنى دول زملاء دراسة قداى و المفروض بنسلم على بعض و متقابلنش بقالنا 10 سنين فكان المفروض أعمل إيه؟
حكاية إنى أقفل معاهم و أصدر وش خشب
مينفعشى !!
الحاجة الوحيدة اللى قدرت أعملها إنى إنسحبت بهدوء لما لقيت الكلام بقى بايخ
دا طبع و صعب تغييره
بس ممكن مش مستحيل يعنى
شكرا على النصيحة و نورتينى بجد



doba
يا ام يوسف العسل
كنت عارفة إنك هتعلقى البوست دا
أصل مينفعشى متجيش تطبطبى و تحضنينى و تدينى خلاصة الحكمة و تحطى سبوت على مكان الوجع و علاجه
صحيح كلامك إنى فى شرنقة و مبقتش احب اخرج منها إلا مع حد بحبه
بس مش معقول يا دوبا كل مشوار أروحه ادور على حد ييجى معايا ؟!!
أنا عاملة حسابى إنى رايحة المعرض لحفل توقيع كتاب سحر ...يعنى هشوفكم يوم الجمعة و مش هينفع أبص على الكتب براحتى ...عشان كدا نقيت يوم هادى أروحه مع نفسى ...
بس على رأى الطائر الحزين
خفت من العفريت ...فطلعلى ...
مش زعلانة على روحى ... زعلانة على الناس و قسوتها بس ...
بس الواحد بيتعلم من المواقف برضو
و المرة الجاية مش هتبقى كدا أكيد
لسه فيه حظر تجول عندك و مينفعشى تيجى يوم الجمعة ؟؟!!
طييييييييب
بوسيلى يوسف بقى




نونو عاشقة النقاب
و عليكم السلام يا حبيبتى
لاااااا
معرفش أنا حكاية التقفيل دى يا نونو للأسف
بصى أصل هقولك
الناس دى عارفين قصتى كلها من طقطق لسلامو عليكو
منهم اللى بيحبنى و منهم اللى سماوى
بس كلهم عارفين أغلب التفاصيل
مينفعشى بقى حد يقولى ازاى جوزك و هما عارفين إنى متطلقة ...أقوم ارد اقول كويس ..
مينفعشى يبقوا عارفين إن يوسف مش معايا و أقولهم إنه فى البيت ؟!!
مينفعشى يقولولى بتشغلى و هما عارفين إنى مش كدا فقولهم ..أه
هيقولوا عليا ياأما كدابة و مش بتحترمنا
يا هيقولوا دى الصدمة جننتها وحولتها لواحدة مهزوزة و قلبتها 180 درجة
و كل دا مرفوض بالنسبالى
انا مش مكسوفة من حالى و لا اخطائى
بس عاوزة محدش يعلقلى مشنقة من غير ما يسمع و يفهم الاول
ليه اللف دا كله
عشان كدا ببقى مش عاوزة أقابل حد من أصله عشان مضطرش أسمع اللى يضايقنى
متحرمشى من دعواتك يا حبيبتى

ست البيت
يا ستوووووتة
لو كل الناس فاهمة كلامك دا و بتنفذها مكنش حد إنجرح و لا حرج فى حد
أنا كمان بحبك قوى
و جاية يا جميل يوم الجمعة لسحورة
لازم نكون معاها فى يوم جميل زى دا و ربنا يكرمها كمان و كمان
و ليكى عندى حضونة كبيييييييرة
و تيجى بالسلامة و خلى بالك من نفسك
تحياتى مؤقتا



شفقة هانم و إحسان بيه
و شخص ما جميل زيهم
ربنا يسمع لدعائكم و مسلماها لله و الله
و مفيش اكرم منه
بتمنى يكون يوسف بخير و التجربة دى تكون نافعة اكتر ما تضر
بس ساعات لما حد كان قريب ليكى فى وقت يحكم عليكى بقسوة كدا بتبقى الحكاية مأثرة شوية
بس عادى مجراش حاجة
ربنا يكمكما فى الشخص ما و نفرح بيه قريب إن شاء الله
تحياتى و حبى


mayada
الله يسلمك يا قاف ميم
بصى بقى و الله فكرت فى كدا بس بالعكس
يعنى لو كان دا يوم عادى من الاحلام كدا ( الاحلام بتاعتى يعنى ) و شافونى و أنا واخدة يوسف و ماسكين إيدين بعض و قاعدين نتسنكح سوا فى المعرض و نحكى الحواديت و عايشين حياتنا
تفتكرى كان ممكن يقولوا حاجة ؟
أنا نفسى مكنش هيفرق معايا حاجة من اللى هيقوله ..
دنا معايا كل الدنيا
أصل يوسف كان عاملى حائط صد لأى حاجة
و يمكن دا سبب تأثرى ..
يمكن ...
أقولك
هاتى البوسة و و لا يهمك و لا يهمنى منهم
أمووووووووووا

الطائر الحزين
.....اللى يخاف من عفريت يطلعله ؟؟!!
لو كنت إفتكرت المثل دا وقت الكتابة كنت خليته عنوان البوست ..
الله ينور عليك
.....أعانك الله
ربنا يسمع منك و يعنا جميعاً
متحرمشى منك



سمكه واحدة
اسوأ المشاعر
ان يصبح مصيري في يد من لا يعرف قدري وان انام خائفا
وان امشي منزعجافي يومي
ومتحسرا علي ما هو فات
إيه يا بنتى دا ...
إنتى يا سموكتى وصفتى الحال بدقة متناهية
و مدام قولتى سمكة بتقولك و لا يهمك
يبقى خلاص و لا يهمنى
بس تعالى هنا ...
ممكن أعرف ليه بتقفلى التعليقات ؟
يعنى اللى عاوز يكتبلك تعليق و لا يسلم عليكى
يعمل إيه طيب ؟!!




موناليزا
تسلميلى إنتى يا حبيبتى من كل شر



حاجات جوايا
يا ريت يا سالى كل الناس بتفكر زيك
يا جماعة لما بقول على التدوين دا عالم سحرى مببقاش ببالغ
أصل الناس فيه متحضرة و شيك قوى فى إخلاقهم و مليان بقلوب دافيه كتير
و كلامهم الطيب متواصل و حنون
ساعات بيتهيألى أسكن هنا طول العمر
و أسبنى من الدنيا العادية
بس إزاااااى
للأسف مبينفعش
أنا روقت خلاص بعد قراية التعليقات
متحرمشى منكم أبدا
أبدا
و بوسيلى دودو



رواية للنشر الإلكترونى
عندى كام مدونة كدا هقترحها عليكم
لأنها متميزة بالفعل و تستحق النشر
وشكراً على الزيارة


فلة
إنتى منورة يا فلة
و شكراً على ذوقك و نصيحتك
و قلبك فيه الخير
تحياتى الخالصة ليكى

صيدلانية طالعة نازلة
دا مش فضول و رزالة يا حبيبتى
دى تسلية بجراح الناس
يعنى لما حد يبقى عارف الكحاية و برضو يسألك
ليه ؟؟
غريبة قوى
هيا الحكايات فى الدنيا خلصت ؟!!
أنا كويسة طول مافيه ناس زيكم يا حبيبتى بتسندنى




ليلــــــــى
يا حبيبتى ربنا يكرمك و يرزقك إن شاء الله ...
المرة الجاية هستخدم عبارتك دى لأنى مش عاوزة أبقى فرجة تانى
إنتى نورتينى بجد
و ربنا هيكرمك بإذن الله بكل ما تتمنيه



dodda
يا حبيبة الروح
أنا بعرف أقول الكلام يا حبيبتى بس مش يعنى عنصر امفاجأة و عقبال ما إستوعبت ...
و بعدين معقول مشفتش ناس من عشر سنين
أرد عليهم بجفاء ...
فى الاول كنت فاكرة إنى وحشاهم و هيبقى لقاء عادى و كل واحد فى حاله بعد كدا
إنما مكنتش متصورة إنه هينتهى بالسخافة دى ...
إنما الجمل دى ضرورية على رأيك مع بعض الناس و لازم احطها فى موقعها المناسب
والمرة الجاية هكون فى المعرض يوم الجمعة عشان حفل توقيع كتاب سحر المفقوعة مرارتها ( حماتى ملاك )
يا ريت تيجى إنتى و ميومة
و عقبال كتابكما إنتوا كمان
متحرمشى منك يا دودا
يا هانم
و ست الهوانم كمان



حنين القلب
يا حنونة يا حبيبتى ازيك و ازاى رجلك دلوقتى ؟
يا رب تكونى دايما بخير
حاضر يا حبيبتى مش هضايق
بس أتمنى لو حد بيقرى الكلام دا و يكون مش واخد باله
ياخد
سلامتك يا حبيبتى ألف سلامة
أنا كمان بحبك قوى



همس الاحباب
ميرسى يا خالود على جرعة الثقة دى
متحرمشى منك يا رب
و إن شاء لله جاية
معقول مبقاش مع سحر فى يوم زى دا
و أفوت يوم أقدر أشوفكم فيه ؟
أشوفك على ألف خير يا عزيزى
و بوسة لهموسة و سلام كبير لمامتها



dreem
براحة يا ماما براحة
هوه أنا بكتب عشان أتخلص من زعلى و ضيقى أقوم انرفزك ؟!!
لا عشت و لا كنت
هكبر دماغى أهو بس روقى إنتى
و متحرمشى منك ابدا يا حبيبتى

طيب تصدقي بالله أنا زعلت
و سبب زعلي هو الجملة دي

طب لما زميل دراستى و شغلى و اللى المفروض يعرفنى كويس و سمع وضعى الحالى فحكم عليا الحكم دا اومال الناس اللى متعرفنيش خالص بتقول عليا إيه؟؟الناس اللى بتحبنى لله فى لله و بتدخل هنا تطل عليا و بتقرى كلامى عن يوسف فى آخر كل بوستبيقولوا عليا إيه فى سرهم ؟بيقولوا ضعيفة و جبانة أم منظر متستاهلش تكون ام وجعانا ليه بحزنها و هيا السبب فيه بتخاذلها و الام اللى بجد هيا اللى متسكتش إلا لما تهد الدنيا كلها و تملى الدنيا صراع و مواجهات و ليكن ما يكون

بلاش تبقي مضايقة من افعال معارفك الوحشة و فضولهم و تطفلهم و سخافتهم
قوم تعملي حركة مش و لابد برضه و تظني بينا ظن السوء

أنا لاحظت إن محدش من المعلقين علق على جملتك دي و كلهم بيطيبوا خاطرك و ده حقك يا أم يوسف

بس في الإسلام برضه

إجتنبوا كثيراً من الظن إن بعض الظن إثم

رغم إني بأعتبرك أخت والله يا فاطمة بس زعلت من سوء ظنك بينا

ربنا يوفقك و يرجع يوسف لحضنك عن قريب يارب

مهندس مصرى
ليه يا محمد كدا تزعل منى ؟؟
و أنا أقدر ازعلك !!!
حقك على راسى يا سيدى
طب يعنى ليه متصور إن الكلام عليك
طب ليه مشفوتش الجملة دى
=============================
البوست ده إنه مش موجه ليكم بالذات لأن تقريبا كل اللى بيدخل هنا رغم عدم معرفته بكل التفاصيل لكن الأغلبيةقلبها فيه الخير و بتطبطب على قلبى صحيح ساعات ممكن يتغاظوا منى و من عجزى و مش لازم يفهموا موقفى بس بيحاولوا بيتفهموا و يحسوا و يتالموا معايا و الأهم كمان إن العطاء بيمتد و يدعولى
أنا بكتب البوست دا للناس التانية اللى بتتسرع فى إطلاق الاحكام و واخدة الدنيا فى المطلق كدا أبيض و أسود
=========================
طب دى كتبتها مخصوص بقى عشانكم
و انا حسنة الظن بكم يا اخى العزيز وفوق ما تتصور يا محمد
بجد
فوق ما تتصور
دمت بكل الود و الحب
و خلى بالك من نفسك

خلاص
صافي يا لبن
:)

أنا ما كنتش أقصد حاجة
:)
و انا ما اخدتش الكلام على نفسي
لإن عمرك ما حتفكري كده في أخوكي
:)
اللي هوا أنا

بس حبيت ألفت نظرك بس
خصوصاً إن كاتبة إنك شاكة في نوايا الناس اللي بتحبك لله في لله

ربنا يكرمك يا أم يوسف يارب
:)
و أحلى سلام

حليب يا قشطة
و مفيش أى حاجة يا محمد
ربنا ما يحرمنى منكم أبداً
و مش هتنزل اجازة بقى عشان نشوفك ؟!!
ترجع بالسلامة إن شاء الله
تحياتى و خالص إحتراماتى

إرسال تعليق