.

.

مى ... يا أبهى من البهاء  

Posted by: فاتيما in










لما كانوا زمان



بيخوفونى بيكى



عشان ما بسمعش الكلام



كنت اخاف على نفسى جداً



و رغم إنى مشفتكيش



بس لما كبرت ...



لقيت حاجات كتير



تخوف اكتر ...



محدش قاللى عليها



مع إنها موجودة بجد



أمنا الغولة ... دا إسم القصيدة اللى كتبتها صاحبة الصورة دى



اللى كبرت و قررت تحارب الخوف و الألم و تحوله لشعاع من نور



لما جيت أدور على صورة احطها مع البوست ملقتش احلى من كدا



و البسكوتاية دى تبقى
ميومة البهية
كما احب أن أسميها
و
مى بهاء



كما يعرفها الجميع فى عالم التدوين بمدونتها






النهاردة السبت سبعة فبراير كان حفل توقيع اول كتاب ليها



مناصفة مع الاديبة الموهوبة



مشيرة محمود



و اللى فى تجربة جديدة و غريبة حبتين



قرروا الإتنين بحكم الصداقة و المغامرة والتى أظنها محسوبة و ناجحة



إنه كل واحدة منهم تنشر إبداعها ليحتضن إبداع الآخرى



فكان الكتاب و اللى عنوانه






أشبه بمنزل من طابقين يسكنه جارتين حبيبتين



القصة و القصيدة



و أجمل ما فى الأمر إن التجانس ما بينهم كان شكله مقصود



بينما هوه فى الواقع لم يكن متفق عليه



و يمكن زى ما قال الأستاذ مصطفى اللى أدار اللقاء
السبب إن فيه خيط خفى بيجمع الأفكار و الهموم لكل الجيل الحالى دون إتفاق مسبق



فداه اللى خلى هذا الشعور ينتاب كل من يفر و يقرى فى الكتاب
يعنى اللى هيقراه غالباً هيحس إنه روح واحدة و إحساس واحد



رغم إختلاف الكاتبتين



لكن الإتنين إتفقوا فى مواجهة الألم و الصمود امامه بكل شجاعة
و شجن ممكن



بتحطى كحل



عشان تكونى احلى



و لا عشان دموعك تبقى سودا ؟




حبر القلم



شايفاه قصايد عالورق



و لا بقعة ع الهدوم ؟



الوحدة عندك




فرصة للخيال




و لا تقليب للمواجع ؟
الازمة بتقويكى



و لا بتقوى الزمن عليكى ؟




كادر الحياة مليان زوايا




و عيونك الكاميرا




و اللقطة تحت امرك





---------




مش عارفة إتكلم عن إيه بالظبط لأن المشهد كان جميل فى كل الزوايا




نظرة عينين ميومة لما شافتنى و لأنها غالبا لم تتوقع حضورى




ومش عارفة ليه ؟... وكأنه كان ينفع أفوت اليوم دا




و مبقاش موجودة ؟!!




و الحضن الجميل الكبير اللى خدته منها و كمية التواضع الرهيب




مع إنها فى يوم يستوجب الفخر و الشديد كمان




لكن بنفس نظرة الطفلة فى الصورة المغموسة براءة ترد
لما أباغتها بالسؤال




- يا بنتى مقولتيش ليه من بدرى كان الواحد عمل بوست و عزم ناس كتير تيجى




- أصلى عاملة حاجة كدا على قدى و الحكاية مش جد قوى




على قدك ؟!




قصدك قد الدنيا يعنى .. كدا تمشى و تبقى معقولة
------------




ذكرياتك اللى بتاعتك أوى




شقة .. مفتاحها معاك

و كل لحظة حنين بتجيلك




تاخدها هناك


على بابها ترمى الحاضر




و تقفل وراك




تجرى عالأوضة الى بتحبها




بعد ما عملت نفسك




مش واخد بالك




من شقوق الحيطان




و شوية الكراكيب




و إنت خارج تتكعبل




فى حاجات مش بتاعتك




و تكتشف ساعتها




إن كل اللى دخلوا الشقة معاك




معاهم نسخة من المفتاح




و إن مستحيل حد فيكو




يغير الكالون




........




الحاضرين كان فيهم ناس متميزة كتير على سبيل المثال




طارق إمام و باسم شرف




الأستاذ مصطفى بيومى اللى ادار الحوار شخصية متميزة




و من نوعية الناس اللى تبنى مش تهد




أحباء ميومة كانوا حاضنينها و طبعاً أولهم و اجملهم و أقربهم








و اللى نظرة الحب و إستقبالها ليك كفيل بإنه ينسيك




أى حاجة ممكن تكون وحشة فى الدنيا




والدة مي جت و عملت حالة كدا من الحنان غريبة و حميمية




و كمان جوزها و اولادها شاركوا فى الإحتفال بيها




بكل حب و شياكة معروف طبعاً وارثينها من مين




إهداء ميومة ليا و ليوسف كان مش عادى زيها
كتبتلى كلمات رقيقة و رسمت وش بيضحك ليوسف
وتيجى تقولها مبروك ترد عليك برد شديد الرقى لدرجة تخليك تتكسف من روحك



اللى مجاش النهاردة اكيد فاته ساعات من البهجة فى صحبة مى




لكن لو جاب الكتاب مش هيفوته عبيرها الذى لا يخفت




الجميع أتفق على أن العمل القادم يجب أن يكون ديوان خالص ليها




و يكون لصديقتها الاديبة مشيرة محمود مجموعة قصصية او رواية خالصة ليها




و هى كاتبة متميزة بحق و بكرة هتكون من الاديبات المهمات




و مع إن الكل أجمع على نجاح فكرة التجاور ما بين القصة و القصيدة فى





ختم مرور




لكن أنا شخصياً طماعة
و كان نفسى أقرى أشعار اكتر و أكتر من كدا و أستمتع

و يبقى فى القلب سعادة شخصية لأكتر من سبب




اولهم إن مصر بخير و المواهب تتدفق بس الدنيا تلاحق عليهم




تانيهم أن المواهب دى إنضمت إليهم و بجدارة و إستحقاق حبيبتى ميومة البهية




تالتهم لأنى قدرت آجى يوم مميز زى دا




و فى الآخر أسيبكم و أسيب نفسى مع قصيدة لما قريتها حسيت




إنها مكتوبالى مخصوص








حلمك لو جزيرة بعيدة




وسط بحر الصعب




ح تعمل إيه؟




بتقول ما فيش فايدة ..!











دى جملة بايخة




بتتكسر على حروفها




كل أنواع الحلول











مركب الإرادة




اللى إنت راكنه جنب منك




فاكره إيه؟




جزء من ديكور حياتك




مش طريقة للوصول ؟






لو حتى شايف الامل




ورقة شجر ..




نشفت و طارت فى الهوا




هوه الخريف كل الفصول ؟




.......









ألف مليون مبروك يا حبيبتى يا مى









يا أبهى من البهاء ذاته


----------------------------------
دودا .... إمتداد عقلى أنا ام العروسة

This entry was posted on السبت, فبراير 07, 2009 and is filed under . You can leave a response and follow any responses to this entry through the .

20 كــــلام بيطــبطـــب عـــلى قــــلبى و روحــــى

ربنا يخليكى يا فاتيما
واحنا بنحبك اوى

بس يهنى انتى كده نزلتى اكتر من قصسده
وانا مش حقدر احرق اكتر من كده!!!

بس لو مكنتيش انتى اللى تكتبى مين اللى
يكتب؟؟؟


مبسةطه اوى انى شوفتك...
يا احلى طمطم فى الدنيا

انتى بجد شخصيه رائعه يافاتيما بحبك للناس واهتمامك بيهم ومشاركتهم
انا بجد بحبك
مبروك لصاحبتك على الكتاب والقصيده الاخيره روعه بجد

ياااااااه يا بطوط مش قادرة اقولك انتي عملتي فيا ايه

خلتي قلبي اللي الليلة حزين يرفرف من الفرحه دلوقتي

اه حقيقي فرحة النجاح فرحة الناس اللي بتحب بجد

الف الف الف الف مبروووك لمي

مبروك ، مشاعر صادقة وجميلة

السلام عليكم
ألف ألف مبروك لمي

أكيد كنتي عايزة تسربي الخبر

وتعملي زي وكالات الانباء

يلا احنا معزومين من غير أي تعب لك

ومبسوطين طبعا
وفرحتنا كبيرة

تقبلي تحياتي

لأني مش عارفة اكتب ولا نص كلمة دلوقتي

عندي سؤال واحد بس...

هو فيه كده؟

يعني ينفع يكون في حد بجمال روحك ده؟

حد يرد عليا .. أرجوكوا

الحائرة
الفخورة بمعرفتك
المبهورة بحنيتك
اللي مش لاقية كلام يعبر عن اللي هيه حسة بيه دلوقتي
مي بهاء

بدأت اشعر انني الاحمق الوحيد الذي لم يصدر كتابا هذا العام :D
المدونات افرزت جيلا جديدا من الكتاب الشباب بشكل يثير الحماسة

اتمنى لمي بهاء التوفيق و لمشيرة محمود ايضا

و في انتظار كتابك الخاص
ربما نفعلها سويا العام القادم
من يدري
:)

الف مبروك لمي ودمتى بكل خير يا اطيب واحن قلب اخت بين المدونين

dodda
يا ست الهوانم انا كمان شرحو
و سعيدة إنى شوفتكم و جيت يوم حلو زى دا
و عقبال ما كل ايامكم ما تبقى أفراح
أفراح
و بس
بوسة و حضونة يا حبيبتى

عاشقة الرومانسية
يا عاشقة الروعة تاتى من الناس ترشق فى قلبى ...
يعنى الواحد بيحس بإنه بيعرف ناس حلوة قوى قوى
إزاى يبقى فيه مناسبة عشان ينفع يكون فرحان بيهم و ليهم و ميفرحش ؟؟!!!
عقبالك يا حبيبتى إن شاء الله أصل التدوين بيفجر مواهب فى الواحد ممكن مكنش يتخيلها و بكرة نقولك ألف مبروك إحنا كمان
مين عارف

وومن
يعنى يا ميرا يا اميرة قلبك الحلو دا هيطلع منه إيه غير كدا ؟؟!!
و بعيييين تعالى هناهو
إيه اللى مخليكى كنتى حزينة يا حبيبتى
أوعى يكون العريس
هاتيهولى من رقبتووووووووووو

راجى
الله يبارك فى حضرتك يا استاذ راجى
و عقبال ما نفرحلك

hasona
و عليكم السلام و منور المدونة
خطوة عزيزة
لأ لا تسريب و لا حاجة
كل الحكاية إن كنت هعزم كل اللى بيشرفنى و يطل عليا هنا فى المدونة على المناسبة الحلوة دى و اكيد فيه ناس كتير لو كانت عرفت بدرى بدرى كانت عملت حسابها و جت
ملحوقة و الديوان الجاى لمى هيحصل كدا إن شاء الله
تقبل إنت خالص تحياتى

maii bahaa
ميووووووووووومة
يا بهية و أبهى من البهاء ذاته
---------------------

لأني مش عارفة اكتب ولا نص كلمة دلوقتي

و لما سيادتك متعرفيش .. اومال مين يعرف !!!
أقولك ؟؟
هديكى نسخة من ختم مغادرة عشان تقرى كام قصيدة لواحدة هايلة بتكتب بحروف من نور و ممكن تغششك

ينفع يكون فى حد بجمال روحك ده ؟

لما تكون الملهمة زيك .. تتخيلى حاجة أقل من كدا ؟

الحائرة

سلامتك من الحيرة

الفخورة

أومال أنا أقول إيه؟؟

المبهورة

أنا اللى منبهرة لسنة قدام

مش لاقية كلام ...
بعد دا كله ؟!!!!


ألف مليون مبروك يا حبيبتى
و بحبك

عبدالحميد محمد
ليه بس بتقول حماقة ...
دى مسألة توقيت و نصيب مكتوب ...
فالك حلو و يسمع منك ربنا
تعرف إسمك و طريقة كتابتك للتعليق و الشجن بين السطور فكرنى بحد عزيز علينا إسمه ميدو راين مان و غاوى دايما ياخد فى وشه و يطفش من مدوناته و كأنه يعاقبنا لأننا نتعلق به ...
إتمنى لو كنت هوه ..
إلا ترحل هذه المرة كالعادة
و لو مكنتش هوه
فتشرفت بمعرفتك
خالص تحياتى
و على رأيك
من يدرى !!!

رئيس جمهورية نفسى
الله بارك فى عمرك يا محموووووووود
و عقبال ما يتنشرلك مجموعة قصصك و خواطرك و أشعارك يا ريس
متحرمشى من طلتك عليا
كل الحب و الود يا اخى العزيز

مدونتك رائعة.. ونفسي أعلق فيها من زمان..تقبلي مودتي.

أنا سعيد إني جيت ولقيت مناسبة سعيدة زي دي

إنتي بجد كمان شوية مدونتك دي هتبقى بيت العيلة اللي بيجمع الكل ونعرف منه كل أخبار الناس اللي يهمنا أمرهم

عقبال كتابك إنتي كمان إن شاء الله

ازيك يا قمرة عاملة ايه؟
وحشتينا كتيييييييييييير وجاية على بالي اليومين دول بشكل غريب جدا.. شكلي كدة بحبك ولا ايه؟
اولا مبروك لمي وعقبال الديوان العاشر كمان
ثانيا: الاية من سورة طه بتقول : " فرجعناك إلى أمك كي تقر عينها و لا تحزن" مش عينيها زي ما انتي كتباها .. اصلها لو عينيها يبقى فيه كدة غلطة في الاعراب وتبقى الصح (عيناها ) لانها فاعل مرفوع وعلامة رفعه الالف لانه مثني ، وبما ان القران طبعا مفيهوش غلطات يبقى صلحيها قبل ما اجيب السبورة واديكي حصة نحو
وخدي عندك الموقع دا ارجعيله ف اي حاجة تخص القران
http://mosshaf.com/web/home.html
بوسة وحضن كبير ليكي وليوسف اول ما ربنا يقر بيه عينك

مبروك لمى الف مبروك
انا شوفتها هى و دودا يوم حفلة توقيع مدونات مصرية للجيب و فعلا تحسى انهم اخوات و ناس راقية

انتى كمان جميلة يا فاتيما و فيكى حنان يكفى العالم كله

كل سنة و عيد حب و انتى طيبة و محبوبة دايما

إرسال تعليق