.

.

شرفتونا يا أنا أنثى  

Posted by: فاتيما in

يا حبيبتى يا محاااااااسن
و إنتم تعرفوا ليه بقول كده
حاجة مفرحة لما الواحد يلاقى صدى لما يكتب
خصوصاً لما يكون بيحاول يعبر بصدق عن مشاعره و قضاياه المصيرية
و يحاول يعلى صوته ... يمكن ... لعل حد يسمعه و يتفهم
بصراحة .... شرفتونا
يا مشاركات فى أنا أنثى
و شرفتونا
يا بنات و ستات المدونات

كنا هناك ...فى الجنة  

Posted by: فاتيما in

آه .. مالجنة تبقى إسكندرية
و إسكندرية هيا الجنة
مش نافع أدخل انام من غير ما احكيلكم على اللى حصل النهاردة
يوم كالعادة زى كل أيامى معاكم .. جميل و مميز و فارق
الحكاية إبتدت لما هنودة القمراية قالت نفسى أشوفكم و نتقابل قبل ما أسافر من تانى
رميت حمولى على الله ... و على لماضة و خالد همس الاحباب و هنودة
حددت اليوم و هما حددوا المكان و المعاد
التلات 24 مارس 2009 فى نادى الاطباء من الساعة عشرة الصبح
بعد ما هنودة و العبدةلله ما كتبنا ندوءات لأهل التدوين إسكندرانية و غيرإسكندرانية ...
إستقرت الامور على ما إتفقنا عليه
و عليها .... النهاردة الفجر كنت فى موقف السوبر جيت أنا و ماجد اخويا
واقفة بستنى خالد همس الاحباب و هشام جعلونى مريضاَ نفسياً
عشان أتونس بيهم و نسافر سوا
الساعة ستة صباحاً كنا قاعدين متبتين فى كراسينا فى الأتوبيس
و بنقول يا رب اليوم يبقى زى ما بنتمنى و يكون سعيد على الكل
و نلحق نقعد بما يكفى عشان نتعرف على كل الحاضرين
و ربنا سهل فى المشوار و على تسعة و نص كنا قدام النادى فى إنتظار الست الحكيمة
لماضة عشنا تدخلنا
لحد عشرة مكنش لسه حد جه ...عشرة و دقيقتين ... هلت بنوتة جميلة رقيقة من بعيد
تطلع مين؟؟؟؟
هنودة القمراية الإسكندرانية ... اللى واخداها الغربة مننا و من روحها
هنودة يا جماعة زى ما تخيلتها و احلى ...حد كدا ملائكى .. حالم
.يعنى مينفعش تقول عليها بتدرس كمبيوتر خالص الصراحة
لأ ... ينفع تقول إنها فنانة شاعرة اديبة
حاجة كدا من الحاجات اللى بتخلى صاحبها شكله مختلف عن باقى الناس
... تحسها و هيا بتكلمك
إنها طايرة تجيب حاجة من قلب السما و راجعالك تانى
... رقيقة و ضحكتها حلوة
قعدنا نحكى لحد ما جت مدونة كنت اول مرة أسمع إسمها
الشهيرة بشيمو القمر و اللى قالت إنى بقول إسمى شيمو القمر مش غرور
دى ليها قصة ...هتكتبها البوست الجاى فى مدونتها ...
بصراحة أثارت فضولى ...هيا شخصية جميلة و تدخل القلب علطول
بعد شوية جت لماضة الطعامة حبيبة ماما ... ست البنات و الدكتورات ...
و تخيلوا الزئردة السنتوفة لماضة
داخلة النادى و لا زعيم الأمة فى زمانه و إحنا وراها و داخلين على حسها
...حاجة تفرح بصراحة و الواحد مش متخيل إن البنوتة الكتكوتة دى
هتبتدى قصة الكفاح الطبى و تتلطم م فى التكليف يا حبة عينى
شوية و وصلت حبيبة قلبى ...حنين القلب حنونة اللى من و إحنا
فى الأتوبيس بتطمن علينا فى موبايل خالد
- وحشتينى يا طمطم ...خلى بالك يا خالد من فاتيما
- إنتوا فين دلوقتى ؟
- فاضللكو كتير على ما تيجوا ؟
- كلمونى اول ما تقربوا عشان أنزلكو علطول ؟
طب تفتكروا الأستاذ خالد المناكف يسكت ؟؟!!! لا يمكن ...
يرد عليها بمنتهى البراءة
- هوه إنتى جاية ؟؟!! ...ليه إن شاء الله
أقوم أرد أنا
- يا بنى بس ... خدولكم هدنة شويتين من المناقرة إنتو الجوز
مفيش فايدة
دخلنا النادى ...على البحر يا إخوانا ...خدوا بالكو من المعلومة دى
أصلها أساسية ... يعنى كنا قاعدين على بحر إسكندرية كدا عينى عينك
من غير حاجة ما تفصلنا عنه ... و لسه
إبتدت البنوتات الامامير فى التوافد
جت حنان الشافعى ... رياح الحنين .. بس مقعدتشى كتير
سالى الطيوبة ... حروووف
نبض إسكندرية و اللى طلعت تقريباً أقدم واحدة فى المجموعة اللى قاعدة بتدون ..
طلعت بتدون بقالها سنتين و شوية و آل محرجة إنها متعرفناش قوى ؟؟!!!
يا بنتى دحنا اللى المفروض نبقى محرجين اكتر منك
جت كمان داليا ... ماى كورنور و اللى رغم إنى لسه يا دوب متعرفة عليها
من آخر بوستين فى المدونة عندى
إلا إنى لما شفتها حسيت إننا مثلاً كنا جيران و روحنا سوا المدرسة
من إبتدائى لحد الجامعة
و إتفرقنا شوية و بنتقابل أهو ... أدهشتنى اكتر لما قالت إنها طبيبة أسنان !!!
إيه يا جماعة ... إسكندرية الطب فيها مستواه الجمالى و الإنسانى
و المهنى مرتفع كدا إزاى ... بتاكلوا إيه ؟؟
جه كمان أحمد ...أسير الجراح ...كان منورنا و كان خجول حبتين
و نتمنى منكونش صدعناه برغينا
و نتمنى يجيى يزورنا فى مصر إن شاء الله بعد ما يخلص الجيش
بتاعه على خير
الكوم الكبير بقى ....اللى كنت قلقانة قوى من إنى أشوفها وجهاً لوجه
لحسن ابوظ الصورة الذهنية ليا عندها
و اللى من قبل ما أسافر و هيا مستقبلانى و حضاننى بحبها ...الجميلة الغرقانة حب
عاشقة الرومانسية ... دودو ... نبضات قلب ولهان
البنت من اول ما هلت من بعيد ...جريت عليا و إترمت فى حضنى ...
أنا حسيت كأنى مامتها
بجد ... و جايبلى ورد و مدلعانى ...و قعدت تتكلم بحب و حماس يأسر اى حد
و يخلى الحجر يبقاله قلب ...أنا سعيدة قوى إنى شوفتك يا دودو
و سعيدة اكتر بكلامنا سوا ..و بالورد ..و الفضفضة ...و الفسحة الحلوة
و القلب و الكلام الاحلى ...و نظرة الاحترام و الجدعنة الإسكندرانى اللى على أصلها
و بعدين فى الآخر خالص ... زمردة الجميلة خدت إذن من الشغل ساعة و جت تشوفنا ...
برضو صيدلانتك يا إسكندرية فيهم حاجة غير ... البنت وقفت معانا ييجى ساعة
و فيه طلة و شخصية تجبرك تتشدلها متعرفش إزاى ...
طلبت منها ترجع لمدونتها اللى مطنشاها بقالها مدة
و قالت يمكن قريب إن شاء الله
و بعدين تعالوا هنا يا بنات إسكندرية ...قولولى
جايبين الجمال و الخفة و دفا القلب دا منين ؟؟؟
من البحر ؟؟؟!!!
اكيد من البحر و السما و كل فتفوتة فيكى يا إسكندرية
مين جه تانى ؟؟؟
مفيش حد خلاص ...بس كنت اتمنى طبعاً اكبر عدد يحضر و ملحوقة المرة الجاية
الاخلاق اللى رغم البعد كتب بوست و كأنه جاى أول واحد
و متهيألى إنه كان كدا ..معانا بقلبه و شياكته و ذكريات المرة اللى فاتت ....
كل مدونى إسكندرية المتغربين كانوا على بالنا ... نسرين بسيونى ...المراكبى
وكل احباب هنودة المشاركينها غربة زى كفاية طيبة فيض قلبان ...و لكن
فيه كمان مدونين كنت اتمنى يقدروا ييجوا لكن الظروف اكيد منعتهم ...
زى جانا و روفى واحمد سلامة و ناس كتيريا رب منساش أسامى و حد يزعل
فيه كمان قلوب جميلة محبتش تفوت الفرصة من غير ما تسلم و لو بالصوت
و بلاش الصورة زى ستيتة حسب الله الحمش اللى عاشقة الرومانسية قالت فيها شعر
.... و داليا وش الخير قوس قزح و احمد ال سكررررر و عبده الرايق الامير الطيب
فيه ناس مشيت عشان شغلها زى داليا و عشان مواعيد مهمة زى حنين القلب
و نبض إسكندرية و رياح الحنين و الباقى قعد
دا بالنوسبة للناس الحلوة اللى جت
أما عن حالة الطقس .. فإليكم النشرة الجوية
فى الاول كان الجو متقلب ... حبة شمس دافية
و بعدين تقلب لشوية هوا ورياح و غيوم ..
و مطرت لدقيقة و لا حاجة .... و بعدين الجو بقى حلو و رايق
قوم البت لماضة و عاشقة و هنودة و كل سلاسل القمرات الإسكندرنيات
يقرروا يعملوا معانا واجب و يفسحونا فى بحرى
رحنا قلعة قايتباى يا عيال ... و محدش يقول و إيه يعنى ؟؟؟!!!
لاااااا ... دى مش أى حاجة كدا ... دنا رايحها مع أغلى الحبايب
طبعا عدينا على عزة بتاع الجيلاتى
حاجة مفتخرة و تحس أنك مش عايز تاكل حاجة فى الدنيا تانى بعد الأيس كريم دا
مشينا لحد اللسان اللى قصاد القلعة و إحنا بناكل الأيس كريم
و نعاكس فى القطط اللى ماشية
إكتشفت إنى و هنودة و حرووووف مهاويس قطط ...و بنموت فيهم
خالد راح يزور حد معرفة فى السريع و هشام كمان راح يزور مريض ( ربنا يشفيه )
و خدوا معاهم احمد أسير الجراح
و سابونا عند البحر نقعد نحكى و نرغى لحد ما يرجعولنا ...
قعدنا على الصخور اللى عند اللسان نتكلم و البحر حوالينا بيحضننا
آه ... حسيت كدا ...أنى قاعدة فى حضنه أنا و أحبابى
إتكلمنا فى إيه ؟؟؟
يووووووووه ...حاجات كتييييييير
فى التدوين و الناس الحلوة اللى بنعرفهم فيه
قطعنا فى فروة ناس كتير ... بس بالخير طبعاً ... متقلقوش
كمان إتكلمنا عن الأسباب اللى خلت كل حد فينا يدون و يكتب أصلاً
حكينا عن البحر و القطط و غربة هنودة فى قطر و رومانسية عاشقة المفرطة
و أحلام شيمو القمر و كتاباتها
حرووووف و خفة دمها و طيبتها
لماضة الطعامة و التكليف اللى هيوديها بعيد و هنفضل مشغولين عليها
التغيير اللى عمله التدوين فى حياتنا و اللى غالباً كان تغيير للأفضل
اللهجة الإسكندرانى اللى كل ما بنوتة فيهم تقول منها كلمة انبسط قوى
هنودوكى بحرى ... و نطلعوكى القلعة .... سماعت و نزالت
و الفتحة اللى بيحطوها فوق الأفعال دى
يا خرابى على جمالهم
إتكلمنا فى حاجات كتير قوى ... بس إحساس عجيب و غريب
و كاننا بنقعد القعدة دى كل أسبوعين تلاتة مثلاً ...
سبحان الله
مجمع القلوب و مقربها رغم البعد و المسافات
تحس إنك مصاحب الناس دى من زمن بعيد ... و مفيش بينكم فواصل
و لا بين قلوبكم حجاب
يا ترى دا إحساسى لوحدى و لا الكل كدا ؟؟
متهيألى الغالبية ... لأن اليوم كان جميل قوى ..و الوقت جرى قوام
و نظرة الفرحة كانت فى كل العيون صادقة
لماضة كان لازم تمشى .. و زمردة جت فى السريع قعدت معانا شوية
طبعاً كان لازم أجرى بسرعة عشان أرجع مصر قبل الساعة عشرة
عشان عب السلام
دا واحد صاحبى متعرفهوش هبقى احكيلكم حكايته مرة
المهم كان لازم نفارق الحبايب عشان ألحق أرجع فى معاد مناسب
خالد بصراحة و هشام يعنى و نعم الاخوة ...حتى احمد أسير الجراح أصر يوصلنا
و إتكلم فى الموبايل يطمن من خالد إننا رجعنا مصر خلاص وكتر الف خيرك يا احمد
البناتيت القمرات ...هنودة و زمردة و عاشقة الرومانسية و حرووووف
كانوا عاوزين يوصلونا لحد المحطة
و عرق الجدعنة الإسكندرانى نقح ... و إبتدت الإقتراحات و إحنا ماشيين أصلاً
و مفيش وقت لاى حاجة من الأساس و عاشقة و حرووووووف بيقولوا
تعالوا نجيب حاجة تاكلوها فى السكة ..طب حتى تاكلوا فشار من محطة الرمل
طب معرفشى إيه ...طب إيه ...يا لهوووووووى على الشياكة
بقولكم البلد فيها حاجة فى الجو و البحر بتخلى الناس شكل تانى
أصفى و اروق
انا سعيدة قوى باليوم دا ...و نفسى يتكرر كل فترة
سعيدة إنى شوفت هنودة قبل ما تسافرو إحساسى بيها طلع مش بقى فى فى محله
دا طلع المحل ذات نفسه
حرووووف إنسانة جميلة قوى و صافيييييية .. زى المية الرايقة
إعترافات قلب .. شيمو القمر شخصية إجتماعية و عندها فكر محترم ...
نبض إسكندرية حد مميز قوى ...أما داليا
.داليا ...مش هقول حاجة ... مش هقولك غير إنى هدعيلك من قلب قلبى
إن ربنا يصلحلك كل الاحوال ..لأنك تستاهلى كل الخيرإنتى و يحيى و فارس
عاشقة الرومانسية ... يا بنتى إنتى فوق كل وصف ممكن يوفيكى حقك
إنتى بتفكرينى بروحى زمان ...قبل ما يدوسنى القطر
كنت واخدة كل حاجة بحب جارف كدا و عايشة على نبض قلبى ...
الشبه دا مش عادى دحنا حتى طلعنا بنجيب برفانات من ماركة واحدة يا بنتى ؟؟؟
ربنا ما يحرمنى من طيبة قلبك و يكتبلك كل السعادة
كل اللى مقدروش ييجوا النهاردة انا فاكراهم بالخير
مروة ست البيت و سمكة واحده و بنت القمر
و جرى جرى ركبنا الميكروباظ ... و متفهموش إيه الحكاية
السهر و لا الهوا و لا إيه
إحنا يا دوب بنقول بسم الله
لقينا نفسنا بناكل رز مع الملايكة إحنا التلاتة خالد و هشام و انا
و هوب صحينا لقينا البوابات
و الغالى بابا أبو خالد بقلب الأب الحنون مهنش عليه يفوت اليوم
من غير ما يطمن علينا إننا وصلنا و بخير
ربنا يخلى حضرتك لينا يا رب و يديك الصحة و راحة البال
خالد كان لازم ينزل الاول عشان كان طريق المرواح بتاعه
فسابنى فى عهدة هشام و نزل
قبل ما أقوله ... ربنا ما يحرمنى منك ابداً يا خالد ... إنت نعم الاخ بجد
هشام جعلونى مريضاً نفسياً إنسان اخلاق بجد و هادى و محترم
و بعدين طلع صديق للغالى سوووو
يعنى جاى من طرف ناس مهمة و كنت اتمنى ييجوا النهاردة بس معلش
عارفة الظروف يا سوووو و المرة الجاية تبقى اولنا
اليوم كان حلو بجد ...مش عارفة عشان إسكندرية أصلا حلوة
و لا عشان الشخصيات اللى جات النهاردة كانت أصلاً حلوة
و لا لأن النية كانت خير فربنا بارك فى اليوم
عارفين ؟؟
متهيألى كل الأسباب دى مجتمعة
عقبال كل مرة نيجى فيها لأجمل مدينة فى الكون
إدعولى المرة الجاية ادخلها و معايا يوسف
أنا بشكركم من قلب قلبى على كل لحظة حلوة عدت عليا فى اليوم دا
و كل الأيام من ساعة ما عرفتكم
ب ح ب ك م
----------------------------------
نبضات قلب ولهان .... لقاء السحاب
شيمو القمر إعترافات قلب ..... أجمل إعتراف
حنين القلب .... تصدقوا وحشتونى
خالد همس الاحباب ..... يا إسكندرية يا
هنودة غربة .... متأخرة كتيييير
هشام جعلونى مريضاً نفسياً .... الثلاثاء الى فات

و عمار يا إسكندرية
يا جميلة يا ماريا
وعد و مكتوب عليا
و مسطر ع الجبين
لأشرب من الحب حبة
و أنزل بحر المحبة
و أسكن حضن الاحبة
و الناس الطيبين

جيالك يا إسكندرية  

Posted by: فاتيما in

تحدييييييييث
خدوا بالكم يا جماعة المكان إتحدد خلاص بناء على توصيات حبيبتى لماضة
و هنودة القمراية فى البوست دا ...
التفاصيل بقى كالآتى
المكان
نادى الاطباء ( و مشكرين يا لماضة ) اللى فى سابا باشا على البحر
بجوار كوبرى إستانلى ...
وإبقوا إسألوا يا إخوانا الإسكندرانية جدعان قوى و مش هيتوهوكم و لا حاجة
المعاد
زى ما قولنا التلات 24 مارس بدءاً من الساعة عشرة
و اللى ييجى بعد كدا يدخل علطول يلاقينا جوا إن شاء الله فى إنتظاره
و إن شاء الله السكة هتبقى سالكة
دى إسكندرية يا عالم
إسكندرية يا هووووه
و برضو تابعوا التعليقات عندى و عند هنودة اللى سايبة نمرة موبايل مخصوص لليوم دا
عشان اللى يحتاس يتكلم فيها يستفسر عن أى حاجة
بس كدا خلاص دلوقتى ...
أشوفكم يوميها على ألف خير
لأ
إستنوا هنا ... هوه أنا قولتلكم بحبكم البوست دا و لا مقولتش ؟؟!!
إهيه .... مقولتش ؟؟؟؟؟
طاه .... مش هقول بقى عشان إنتوا عارفين لوحدكم من غير قوالة
سلام مؤقتاً
-------------------------------------------------
الحكاية إبتدت لما ....
البت القمراية هنووووودة قالت عاوزين نتقابل
بس أنا مسافرة على 27 مارس
قولت إسأل داليا قوس قزح وش الخير ... هنتلم إمتى فى أقرب معاد
عشان يوم المكتبة
البنية تشكر قالتلى هسأل و ارد عليكى .. قوم طلع المعاد فى اول جمعة من أبريل
قولت مبدهاش بقى و خلاص ..أنا نفسى أعمل المشوار دا من زمن ..
أعمل جنونة ... و أشد الرحال على ست البلاد كلها
إسكندرية الجميلة
عاوزة أشوف لماضة و حنين القلب و بنت القمر و سمكة واحده
و أدى عاشقة الرومانسية حضونة كبيرة و مروة ست البيت
و زمردة الجميلة
و أشوف هنودة قبل ما تشدها بحور الغربة فى سفر طويل بعييييييد
و طبعا كنت اتمنى أشوف نسرين بسيونى بس عارفة إنها مش فى مصر حالياً
خلوا بالكم
المعاد إن شاء الله يوم التلات الجاااااااى دا علطول
الموافق
24 مارس 2009
الكل معزوم ... مهياش عزومة حريمى يعنى
عشان كتبت أسامى بنات بس ...أصل معرفشى
من مدونى إسكندرية الرجال يعنى
غير الباشمهندس إسكندرانى أوى و عارفة إنه مسافر دلوقتى
و كمان أعرف
ta3ban
من خلف الشاشة
هوه و وليد صباح الخير يا مصر
دول مدونى إسكندرية اللى متواصلة معاهم
بس أى حد من الى جم المرة اللى فاتت او اللى مقدروش ييجوا
و نفسهم يشاركونا طبعا ألف مرحب بيهم ...
و واحد من الجماهير يسألنى ...
ليه يا كابتن لطيف ميبقاش المعاد يوم الجمعة بدل التلات
أرد و أقوله عشان عندى سببين مهمين
الاول
عشان الجمعة الجاية و السبت ... عيد الام و الكل هيبقى مشغول أكيد
بمعايدة الامهات و الحموات
كل سنة و هن طيباااااات
و اختكم عندها بصيص امل إن إذ ربما يوسف ييجى
و لا حتى يتصل فى التليفون
فبالتالى مينفعشى خالص الجمعة الجاية دى
و الجمعة الى بعدها تكون هنودة سافرت خلاص و متقدرشى تيجى
و السبب التانى و إنتوا مش غرب يعنى ...
و دون إحراج ... ومل الآخر أختكم عايشة على إعانة الحكومة متمثلة فى معاش بابا
و أنا بقبض المعاش بعد يوم 20 و بالتالى على يوم التلات يكون ربنا فرجها
و بقى معايا ميزانية مناسبة للسفرية دى .... و لا أجيلكم مشى يعنى ؟!!
و مش عاوزة حد يستجدع ( و الجدعان كتير الصراحة ) يقولى أسلفك
و لا تعالى معايا فى العربية أوفر و الكلام دا
عشان بريستيجى بينقح عليا ... فى الجزئية دى بالذات
بالنوسبة لباقى التفاصيل بقى ....
فطبعا معنديش أى فكرة عن أى حاجة
يعنى مثلاً عن المكان ...
لو تحبوا المطرح يبقى بتاع المرة اللى فاتت ... ماشى
و لو إنى أتمنى نقعد فى حتة نشوف فيها البحر كويس
إنما اهل إسكندرية ادرى بشعابها
و لماضة أو حنين القلب يقولونا فين و إزاى
و إحنا تحت امرهم
اللى عنده أى إقتراحات ... نحن نرحب بها
و اللى مش مناسبه المعاد .. يقولنا على يوم تانى بس قبل يوم 27 ضرورى
و ظبطوا مواعيدكم و ظروفكم ...و قولولى مين جاى
عندكو أسبوع أهو ترتبوا حالكم على قدر الامكان
أنا متشوقة لكل شبر فيكى ... يا احلى بلد فى الكون
و عماااااااااار يا إسكندرية

كل ليلة معاكم ..  

Posted by: فاتيما in ,


هل توجد كلمات تكفى لوصف إحساسى كان شكله إيه النهاردة ؟!!
مظنش
إزاى الواحد يقدر يختصر كتب و مجلدات فى تلات أربع كلمات ؟!
فرحتى لما عرفت إن ليا حاجة هتتنشر فى عدد مدونات مصرية للجيب كانت كبيرة صحيح
بس مش اد فرحتى النهاردة و أنا ماسكة فى إيدى الكتاب
و حواليا كل القلوب دى اللى بتحبنى
و يوسف كان إسمه بيلمع ما بين السطور زى نجمة فى السما
عالية عليا و بس النهاردة طولتها
حبيبى و روح قلبى بقى كلمة و سطور و كام صفحة فى كتاب
هيقراه الناس و يعرفوا حكايته و حكايتى معاه
هيفتكروا إسمه ... و يدعوله من قلوبهم الجميلة
سامحونى لو كنت متلخبطة و متوترة و مش عارفة أتلم على روحى
بس الحدث الليلة دى جلل ... حاجة كبيرة قوى
و فاتيما ام يوسف اللى كانت من سنة تقريبا بتتدارى ورا شاشة و لوحة مفاتيح
و حاسة بوحدة و إفتقاد شديد لروح قلبها يوسف
الأم دى اللى كانت فاقدة الامل فى رجوع إبنها
و بتكره روحها لأنها السبب فى حرمان طفلها من العيش بشكل طبيعى زى أى عيل فى سنه
الإنسانة دى اللى كانت خايفة من خيالها و مرعوبة من بكرة و اللى مستخبى وراه
و من اى حد بس مش يكلمها .... دا يبص فى وشها حتى
الواحدة دى
النهاردة بقت حد تاني احسن الف مرة
و أقوى ألف مرة
و أشجع ألف مرة
و عندها ألف امل فى بكرة
و شعور اكيد بإنها مش ضعيفة و مش هتسمح لحد يدوسها من تانى
و لا يهز صورتها قصاد نفسها من تانى
و لا يشكك فى ذرة من امومتها لأبنها تانى
و جنب الحنين و الأشتياق ... بقى فيه يقين بإن بكرة احسن و احن
عليها و على يوسف
روح قلب ماما
عندى كلام كتير و إحاسيس كتير ... بس مش عارفة أقول إيه ؟
اقول إنى مهما شكرتكم مش هقدر اوفى قدر جميلكم عليا ؟
أيوه جميل ... أصل محدش طلب منكم تساعدونى
و مبقاش حد يساعد حد كتير الأيام دى
لكن من إمتى القلوب الطيبة بتستنى حد يقولها ساعدينى
مديتوا إياديكم الحنونة و عملتوا حائط دفاع
كل ما آجى أتكعبل ... و لسه حأقع ... تلحقونى
تسندونى
تقولولى متخافيش
و لا يهمك
إحنا معاكى و بندعيلك .. و مستنيين يوسف زيك ...و معاكى
النهاردة من اول ما روحت الحفلة .. لحد ما مشيت
الكل حواليا ... معايا ...كلمة ألف مبروك مبطلتش أسمعها
نظرات الفرحة فى العيون أسرتنى ...الناس اللى جاية و بتقولى منعرفشى حد تانى من المشتركات فى الكتاب
بس إحنا جايلنك إنتى مخصوص
حرص ناس حلوة كتير إنها تقولى ..إكتبى اهداء ... و كأنى حد مهم للدرجة دى عشان يبقى لإهدائى قيمة
كنت جايبة معايا قلم يوسف اللى كان بيعلقه فى رقبته و يرسم بيه
حبيت اكتب بيه عشان احس إن يوسف شاركنى البهجة
و جبت كمان معايا أرنوبه نوتى ... بس كنت مقعداه فى الشنطة
عشان لما يوسف يرجع و احكيله عن اليوم دا .. أقوله إنى خدت حد من صحابه يحضر بداله
يااااااااااااه
معقولة اللى بيحصل
الوقت اللى عدى فى غيابه ... دى تبقى نتيجته ؟!!!
معقولة ... ربنا بيحبنا يا يوسف قوى كدا
معقولة !!!
المفروض دلوقتى أقول حصل إيه بالتفصيل ..صح
بس أنا فى حالة غريبة جميلة ملهاش وصف
و بعدين مش عارفة إبتدى منين و ازى و لا بمين ؟؟
أبتدى بميومة البهية الجميلة مى بهاء و دودا و صحبة الورد الجميلة التى لاتقل عنهم رقة
و لا بصديقتهم هدى الشخصية المتميزة جدا و اللى سعدت بلقائها و وجودها
إتكلم عن دوبا حبيبتى ...اللى هيا لوحدها ساتر أمان من العجز و اليأس
و الخوف اللى لازمنى لزمن طويل
و مجييها النهاردة كانله قيمة كبيرة عندى يارب يقدرنى ييجى يوم و أقدر اردلها شوية من جمايلها دى
أتكلم عن كل حد جه النهاردة عشانى و عشان ينجح الحلم الجميل بتاعنا
ميرا الاميرة وومن امرءة بعقل رجل اللى لازم تخلى بالها من صحتها شوية و خالد همس الاحباب أخويا الغالى اللى بحس بامان فى وجوده و كأن ماجد اخويا معايا تمام
و مهاميهو الشقية احسن تستاهل اللى كان بقالى كتير مشوفتهاش
دوللى حبيتى وش الخير القلب و العقل و جدعنة الدنيا كلها ... عسقلانى عسقول العزيز و الغالى على قلبى
مروة الرقيقة اجمل زهرة من زهرات الجنة ...و مفقوعة مرارتها سحورة الطيوبة و زوجها العزيز و سلوى الحالمة رئيسة حزب الأحلام زميلتنا فى التخصص و شقاه ...
رودى بنوتة مصرية الى جت مخصوص و قعدت شوية رغم إنشغالها الأيام دى
و ربنا يطمنا عليكى يا ام نور القمر ...شمس الدين ربة السيف و القلم و الأفكار المتميزة
يا رب منساش حد بس كان فيه ناس كتير جميلة حضرت
أيوه الصباغ طبعا نار على علم .. و سووو العجوز اللى معدى التلاتين آخر سلاسل الظرفاء
و بطوط حبوب ..أجدع دكتور سنان فى مصر
الناس اللى كنت بقرلهم و بشوفهم لأول مرة .. و إتشرفت لأنى قابلتهم
سلاسل المحمدات ... محمد صباح الصباح
... محمد مفيد فى الصميم .. محمد حمدى دماغى ... محمد الغزالى ...
و سلاسل البنات القمرات .. البرنسيس وسبر اللى عاوزة تروح المكسيك ...
إيناس رقة أحساس و هيا كدا فعلا
احبابى اللى حرصوا يكلمونى زى حنين القلب حنونتى الطيبة جنية البحر الإسكندرانية الغالية
و العزيزة عاشقة الرومانسية اللى يتهيألى إنها وخدانى بالحضن فى الموبايل
مش بتكلمنى و بس
الناس اللى بعتتلى السلام زى دعاء مواجهات و كتير كتير ..
بس أنا من فرحتى نسيت نفسى
الناس الجميلة اللى خدت منى إهداء و كأنى مؤلفة أل يعنى
كأنهم بيبعتولى سلام من البعد زى واحدة مفروسة فروستى حبيبتى
و يا جماعة كل اللى كتبتله إهداء يسامحنى لو مكنش الإهداء اد كدا
لأنى كنت متوترة و محدثة إهداءات بقى
و يا مهندس مصرى متقلقش ... مضيتلك نسختك الساعة خمسة و كأنك قصادى
و كانك حضرت يا محمد تمام
بس يا عيال كنت فرحانة قوى لأنى بمضى فاتيما ام يوسف
عشان إسم حبيبى ملازم إسمى ...
إما الكتاب نفسه .. فلااااااااا ... دا عاوزله قعدة كبيرة
عشان الأسامى المتميزة اللى شوفتها الليلة دى ... كلامهم على المنصة بس .. خلانى متشوقة أقرلهم
مش بس بوستاتهم ..لأ مدوناتهم كاملة .. بس ربنا يسهل
الغلاف مميز حقيقى و دا كان إنطباع الكثيرين .. و سمراء النيل قالت أبلغ وصف
إن حتى لونه بناتى .. شبهنا كدا و لايق علينا
بتمنى العدد يلاقى صدى عند الناس كلها خاصة خارج مجتمع المدونين ..
عايزين تعرفوا حصل إيه فى الحفلة و تفاصيلها ؟!!!
كانت طبعا حلوة ... مقدرش أقول حاجة غير كدا .. مش تحيز لكن حقيقى
التنظيم كان حلو و محصلش مشاكل الحمدلله خالص ... الحاضرين كانوا عدد ما شاء الله كبير قوى
و يفرح كدا ... و المكان كان متسع ليهم و كل عدد بيطلع بيزداد النظام و الإحترافية
فى الحكاية كلها
الناس اللى إتكلمت كانت عفوية و بسيطة
اولهم و طبعا اللى كانت منورانا قوى .. ست البنات غادة عبدالعال صاحبة مدونة عايزة إتجوز
و اللى كان ليها دور كبير فى تشجيعى ( من غير ما تاخد بالها ) فى إنى أعمل مدونة لنفسى
مش عايزة أنسى إسم حد من اللى إتكلموا بس ممكن حد تانى يكتب عنهم
بشكل أفضل منى لأنهم يستاهلوا كلهم الإسهاب اكتر
بس بصراحة سمعنا أشعار و أراء طيبة و متميزة من مدونين و مدونات
الحفلة كانت شيك و هادية و المكان مريح نفسيا لأى حد يقعد فيه
و بعدها إتعرض فيلم قصير
إسمه .. كل البنات بتحب الشكولاتة
هوه حد يقدر يقول غير كدا
بس إيه يعنى صحيح ؟!!! ...إكمن انوشكا بتمثل فيه خلاص يعنى ؟؟
منا حاطة صورة على جنب بقالى شهور
بقول فيها بموت فى القطط و القهوة و الشكولاتة ... محدش عبرنى يعنى
و لا عمل فيلم و لا حاجة
أرزااااق
كان نفسى أشوف ناس قوى النهاردة .. كنت بتلفت عليهم ..بس محصلشى
لكن مازلت بتمنى تيجى المناسبة و اشوفهم بعينى زى ما بشوفهم بقلبى
فريق عمل مدونات مصرية للجيب
أعجز عن شكره مهما قولت .. إيناس لطفى و احمد البوهى و احمد سلامة الغالى
و العزيز احمد مهنى اللى فى الآخر كان واقف زى أبو العروسة بيسلم على المعازيم
و يطمن إنهم ماشيين مبسوطين
و الولد يا حبة عينى بيقولى مبروك و يا رب تكونى سعيدة و كدا
قالشى حاجة اكتر من الكلمتين دول ّّّ...
طبعا لسه برد عليه و أقوله شاكرة فضلكم عليا و على يوسف
و الحنفية كانت هتتفتح و أعيط
الشاب يا كبدى إتخض و إتاخد كدا ... معلشى يا احمد جت فيك
أصل إنت مش متخيل إنتم عملتوا إيه لينا أنا و إبنى و لحكايتنا
بس ربنا بس اللى عالم محبتى و تقديرى ليكم و دعواتى من قلبى
إن ربنا يوفقكم فى كل خطوة بتعملوها
لأنكم ناس محترمة و جميلة قوى .. بجد
أنا راجعة البيت و حاضنة نسخ الكتاب
و كأنى واخدة يوسف فى حضنى
حاسة لأول مرة من وقت طويل إنى عملتله حاجة كويسة
حاجة تقوله و تثبتله إن ماما لسه فكراه مهما بعد
و إن كل حاجة حلوة بتحصل فى حياتها
سببها هوه
هوه فى الاول ... و فى الآخر
البوست اللى تم إختياره كان إسمه كل ليلة
و بحكى فيه عن كل ليلة بتعدى عليا من غير يوسف ... بيبقى شكلها عامل إزاى
حزن و حنين و ألم إنتظار
أما كل ليلة معاكم ... فمفيهاش غير الفرحة و الحب
يوسف
بحبك يا روح قلب ماما
و كماااااااااااااااااان
يا سكان العالم السحرى اللى إسمه المدونات
بحبكم قوى
قوى
------------------------------------
بوستات متعلقة بالحدث
آه قبل ما أمشى ..
اوعوا تنسوا التبرع بالدم
يوم الجمعة اللى جاى
أه .. اللى بعد بكرة دا علطول
فى إنتظاركم
و كلنا معاها