.

.

كل ليلة معاكم ..  

Posted by: فاتيما in ,


هل توجد كلمات تكفى لوصف إحساسى كان شكله إيه النهاردة ؟!!
مظنش
إزاى الواحد يقدر يختصر كتب و مجلدات فى تلات أربع كلمات ؟!
فرحتى لما عرفت إن ليا حاجة هتتنشر فى عدد مدونات مصرية للجيب كانت كبيرة صحيح
بس مش اد فرحتى النهاردة و أنا ماسكة فى إيدى الكتاب
و حواليا كل القلوب دى اللى بتحبنى
و يوسف كان إسمه بيلمع ما بين السطور زى نجمة فى السما
عالية عليا و بس النهاردة طولتها
حبيبى و روح قلبى بقى كلمة و سطور و كام صفحة فى كتاب
هيقراه الناس و يعرفوا حكايته و حكايتى معاه
هيفتكروا إسمه ... و يدعوله من قلوبهم الجميلة
سامحونى لو كنت متلخبطة و متوترة و مش عارفة أتلم على روحى
بس الحدث الليلة دى جلل ... حاجة كبيرة قوى
و فاتيما ام يوسف اللى كانت من سنة تقريبا بتتدارى ورا شاشة و لوحة مفاتيح
و حاسة بوحدة و إفتقاد شديد لروح قلبها يوسف
الأم دى اللى كانت فاقدة الامل فى رجوع إبنها
و بتكره روحها لأنها السبب فى حرمان طفلها من العيش بشكل طبيعى زى أى عيل فى سنه
الإنسانة دى اللى كانت خايفة من خيالها و مرعوبة من بكرة و اللى مستخبى وراه
و من اى حد بس مش يكلمها .... دا يبص فى وشها حتى
الواحدة دى
النهاردة بقت حد تاني احسن الف مرة
و أقوى ألف مرة
و أشجع ألف مرة
و عندها ألف امل فى بكرة
و شعور اكيد بإنها مش ضعيفة و مش هتسمح لحد يدوسها من تانى
و لا يهز صورتها قصاد نفسها من تانى
و لا يشكك فى ذرة من امومتها لأبنها تانى
و جنب الحنين و الأشتياق ... بقى فيه يقين بإن بكرة احسن و احن
عليها و على يوسف
روح قلب ماما
عندى كلام كتير و إحاسيس كتير ... بس مش عارفة أقول إيه ؟
اقول إنى مهما شكرتكم مش هقدر اوفى قدر جميلكم عليا ؟
أيوه جميل ... أصل محدش طلب منكم تساعدونى
و مبقاش حد يساعد حد كتير الأيام دى
لكن من إمتى القلوب الطيبة بتستنى حد يقولها ساعدينى
مديتوا إياديكم الحنونة و عملتوا حائط دفاع
كل ما آجى أتكعبل ... و لسه حأقع ... تلحقونى
تسندونى
تقولولى متخافيش
و لا يهمك
إحنا معاكى و بندعيلك .. و مستنيين يوسف زيك ...و معاكى
النهاردة من اول ما روحت الحفلة .. لحد ما مشيت
الكل حواليا ... معايا ...كلمة ألف مبروك مبطلتش أسمعها
نظرات الفرحة فى العيون أسرتنى ...الناس اللى جاية و بتقولى منعرفشى حد تانى من المشتركات فى الكتاب
بس إحنا جايلنك إنتى مخصوص
حرص ناس حلوة كتير إنها تقولى ..إكتبى اهداء ... و كأنى حد مهم للدرجة دى عشان يبقى لإهدائى قيمة
كنت جايبة معايا قلم يوسف اللى كان بيعلقه فى رقبته و يرسم بيه
حبيت اكتب بيه عشان احس إن يوسف شاركنى البهجة
و جبت كمان معايا أرنوبه نوتى ... بس كنت مقعداه فى الشنطة
عشان لما يوسف يرجع و احكيله عن اليوم دا .. أقوله إنى خدت حد من صحابه يحضر بداله
يااااااااااااه
معقولة اللى بيحصل
الوقت اللى عدى فى غيابه ... دى تبقى نتيجته ؟!!!
معقولة ... ربنا بيحبنا يا يوسف قوى كدا
معقولة !!!
المفروض دلوقتى أقول حصل إيه بالتفصيل ..صح
بس أنا فى حالة غريبة جميلة ملهاش وصف
و بعدين مش عارفة إبتدى منين و ازى و لا بمين ؟؟
أبتدى بميومة البهية الجميلة مى بهاء و دودا و صحبة الورد الجميلة التى لاتقل عنهم رقة
و لا بصديقتهم هدى الشخصية المتميزة جدا و اللى سعدت بلقائها و وجودها
إتكلم عن دوبا حبيبتى ...اللى هيا لوحدها ساتر أمان من العجز و اليأس
و الخوف اللى لازمنى لزمن طويل
و مجييها النهاردة كانله قيمة كبيرة عندى يارب يقدرنى ييجى يوم و أقدر اردلها شوية من جمايلها دى
أتكلم عن كل حد جه النهاردة عشانى و عشان ينجح الحلم الجميل بتاعنا
ميرا الاميرة وومن امرءة بعقل رجل اللى لازم تخلى بالها من صحتها شوية و خالد همس الاحباب أخويا الغالى اللى بحس بامان فى وجوده و كأن ماجد اخويا معايا تمام
و مهاميهو الشقية احسن تستاهل اللى كان بقالى كتير مشوفتهاش
دوللى حبيتى وش الخير القلب و العقل و جدعنة الدنيا كلها ... عسقلانى عسقول العزيز و الغالى على قلبى
مروة الرقيقة اجمل زهرة من زهرات الجنة ...و مفقوعة مرارتها سحورة الطيوبة و زوجها العزيز و سلوى الحالمة رئيسة حزب الأحلام زميلتنا فى التخصص و شقاه ...
رودى بنوتة مصرية الى جت مخصوص و قعدت شوية رغم إنشغالها الأيام دى
و ربنا يطمنا عليكى يا ام نور القمر ...شمس الدين ربة السيف و القلم و الأفكار المتميزة
يا رب منساش حد بس كان فيه ناس كتير جميلة حضرت
أيوه الصباغ طبعا نار على علم .. و سووو العجوز اللى معدى التلاتين آخر سلاسل الظرفاء
و بطوط حبوب ..أجدع دكتور سنان فى مصر
الناس اللى كنت بقرلهم و بشوفهم لأول مرة .. و إتشرفت لأنى قابلتهم
سلاسل المحمدات ... محمد صباح الصباح
... محمد مفيد فى الصميم .. محمد حمدى دماغى ... محمد الغزالى ...
و سلاسل البنات القمرات .. البرنسيس وسبر اللى عاوزة تروح المكسيك ...
إيناس رقة أحساس و هيا كدا فعلا
احبابى اللى حرصوا يكلمونى زى حنين القلب حنونتى الطيبة جنية البحر الإسكندرانية الغالية
و العزيزة عاشقة الرومانسية اللى يتهيألى إنها وخدانى بالحضن فى الموبايل
مش بتكلمنى و بس
الناس اللى بعتتلى السلام زى دعاء مواجهات و كتير كتير ..
بس أنا من فرحتى نسيت نفسى
الناس الجميلة اللى خدت منى إهداء و كأنى مؤلفة أل يعنى
كأنهم بيبعتولى سلام من البعد زى واحدة مفروسة فروستى حبيبتى
و يا جماعة كل اللى كتبتله إهداء يسامحنى لو مكنش الإهداء اد كدا
لأنى كنت متوترة و محدثة إهداءات بقى
و يا مهندس مصرى متقلقش ... مضيتلك نسختك الساعة خمسة و كأنك قصادى
و كانك حضرت يا محمد تمام
بس يا عيال كنت فرحانة قوى لأنى بمضى فاتيما ام يوسف
عشان إسم حبيبى ملازم إسمى ...
إما الكتاب نفسه .. فلااااااااا ... دا عاوزله قعدة كبيرة
عشان الأسامى المتميزة اللى شوفتها الليلة دى ... كلامهم على المنصة بس .. خلانى متشوقة أقرلهم
مش بس بوستاتهم ..لأ مدوناتهم كاملة .. بس ربنا يسهل
الغلاف مميز حقيقى و دا كان إنطباع الكثيرين .. و سمراء النيل قالت أبلغ وصف
إن حتى لونه بناتى .. شبهنا كدا و لايق علينا
بتمنى العدد يلاقى صدى عند الناس كلها خاصة خارج مجتمع المدونين ..
عايزين تعرفوا حصل إيه فى الحفلة و تفاصيلها ؟!!!
كانت طبعا حلوة ... مقدرش أقول حاجة غير كدا .. مش تحيز لكن حقيقى
التنظيم كان حلو و محصلش مشاكل الحمدلله خالص ... الحاضرين كانوا عدد ما شاء الله كبير قوى
و يفرح كدا ... و المكان كان متسع ليهم و كل عدد بيطلع بيزداد النظام و الإحترافية
فى الحكاية كلها
الناس اللى إتكلمت كانت عفوية و بسيطة
اولهم و طبعا اللى كانت منورانا قوى .. ست البنات غادة عبدالعال صاحبة مدونة عايزة إتجوز
و اللى كان ليها دور كبير فى تشجيعى ( من غير ما تاخد بالها ) فى إنى أعمل مدونة لنفسى
مش عايزة أنسى إسم حد من اللى إتكلموا بس ممكن حد تانى يكتب عنهم
بشكل أفضل منى لأنهم يستاهلوا كلهم الإسهاب اكتر
بس بصراحة سمعنا أشعار و أراء طيبة و متميزة من مدونين و مدونات
الحفلة كانت شيك و هادية و المكان مريح نفسيا لأى حد يقعد فيه
و بعدها إتعرض فيلم قصير
إسمه .. كل البنات بتحب الشكولاتة
هوه حد يقدر يقول غير كدا
بس إيه يعنى صحيح ؟!!! ...إكمن انوشكا بتمثل فيه خلاص يعنى ؟؟
منا حاطة صورة على جنب بقالى شهور
بقول فيها بموت فى القطط و القهوة و الشكولاتة ... محدش عبرنى يعنى
و لا عمل فيلم و لا حاجة
أرزااااق
كان نفسى أشوف ناس قوى النهاردة .. كنت بتلفت عليهم ..بس محصلشى
لكن مازلت بتمنى تيجى المناسبة و اشوفهم بعينى زى ما بشوفهم بقلبى
فريق عمل مدونات مصرية للجيب
أعجز عن شكره مهما قولت .. إيناس لطفى و احمد البوهى و احمد سلامة الغالى
و العزيز احمد مهنى اللى فى الآخر كان واقف زى أبو العروسة بيسلم على المعازيم
و يطمن إنهم ماشيين مبسوطين
و الولد يا حبة عينى بيقولى مبروك و يا رب تكونى سعيدة و كدا
قالشى حاجة اكتر من الكلمتين دول ّّّ...
طبعا لسه برد عليه و أقوله شاكرة فضلكم عليا و على يوسف
و الحنفية كانت هتتفتح و أعيط
الشاب يا كبدى إتخض و إتاخد كدا ... معلشى يا احمد جت فيك
أصل إنت مش متخيل إنتم عملتوا إيه لينا أنا و إبنى و لحكايتنا
بس ربنا بس اللى عالم محبتى و تقديرى ليكم و دعواتى من قلبى
إن ربنا يوفقكم فى كل خطوة بتعملوها
لأنكم ناس محترمة و جميلة قوى .. بجد
أنا راجعة البيت و حاضنة نسخ الكتاب
و كأنى واخدة يوسف فى حضنى
حاسة لأول مرة من وقت طويل إنى عملتله حاجة كويسة
حاجة تقوله و تثبتله إن ماما لسه فكراه مهما بعد
و إن كل حاجة حلوة بتحصل فى حياتها
سببها هوه
هوه فى الاول ... و فى الآخر
البوست اللى تم إختياره كان إسمه كل ليلة
و بحكى فيه عن كل ليلة بتعدى عليا من غير يوسف ... بيبقى شكلها عامل إزاى
حزن و حنين و ألم إنتظار
أما كل ليلة معاكم ... فمفيهاش غير الفرحة و الحب
يوسف
بحبك يا روح قلب ماما
و كماااااااااااااااااان
يا سكان العالم السحرى اللى إسمه المدونات
بحبكم قوى
قوى
------------------------------------
بوستات متعلقة بالحدث
آه قبل ما أمشى ..
اوعوا تنسوا التبرع بالدم
يوم الجمعة اللى جاى
أه .. اللى بعد بكرة دا علطول
فى إنتظاركم
و كلنا معاها

This entry was posted on الأربعاء, مارس 04, 2009 and is filed under , . You can leave a response and follow any responses to this entry through the .

98 كــــلام بيطــبطـــب عـــلى قــــلبى و روحــــى

ألف مليون مبروووووووووووووك يا قمر
مش بس عالكتاب
ولا عالبوست

ألف مبروووووووووووك ومليون مبرووووووووووووك كمان عالفرحة اللى فى قلبك وعينك

بجد يا فاتيما انا فرحانة اوووووووووى وسعيدة جدااااااااا انك فرحتى بالشكل ده

يارب يارب ياااااااارب يجعل كل ايامك أفراحك

على فكرة دودو بعت ليوسف بوسة دلوقت وعرفته انه يوسف ابن فاتيما
عقبال يارب ما تخديه فى حضنك وتهريه بوس

بجد بجد انا اللى عايزة ابوسك دلوقت
اموووووووووووووووووووووووه

مبرووووووووووك
ياه لو اعرف ان هشام علاء رايح
كنت خليته ياخدلي نسخه يوقعهالي
انا لازم اشوفك واخد نسخه موقعه
مبروك يا ماما وعقبال كتابك يارب

حبيبة قلبى ونور عينى وحبى اللى ما قابلتهاش الا من خلال التعليقات
واللى باموت فيها وفى كتابتها واحساسها
نور عينى يافاتيما ياأم يوسف
الف مبروك
اقسم بالله فرحتى كانت كبيره وانا باكلمك النهارده مهما اوصف مش هتصدقى
والفرحه بقت اضعاف اضعاف وانا شيفاكى بتطنططى من الفرحه فى البوست
حاسه بيكى كانك قدامى وشيفاكى
الف مبروك يااحمل ام فى الكون كله
الف الف مليون مبروك
انا باعشق اسكندريه
اول مره اكرهها لانها بعدتنى عنك ولو كنت من سكان القاهره كنت اكيد اول واحده هتلاقيها مستنياكى النهارده
بحبك جدااااااا
اول مره قريت فيها مدونتك جبتها من البدايه
وقعدت فيها اكتر من 4 ساعات متواصله
انتى كنز والله يافاتيما بقلبك واحساسك بالناس
عقبال يارب مااشوف لك كتاب خاص ليكى لوحدك ياقلبى
والله جسمى كله قشعر وانا باقرا البوست ده
بكيت من الفرحه وضحكت كمان
حسيت انى معاكى

العزيزة عاشقة الرومانسية اللى يتهيألى إنها وخدانى بالحضن فى الموبايل مش بتكلمنى و بس
***************
ياريتنى كنت جنبك واخدك بالحضن فعلا
فرحانه ان احساسى وصلك


منا حاطة صورة على جنب بقالى شهور بقول فيها بموت فى القطط و القهوة و الشكولاتة ... محدش عبرنى يعنى
*****************
والله انتى سكرررررررررررررر
ضحكتينى

طولت قوى
عارفه
بس ده لانى فرحانه بيكى مووووت
بحبـــك

انا ممكن اجيب الكتاب ده منين؟
نفسى اشتريه
على الاقل يكون عندى حاجه من ريحتك
هههههههه
يهمنى الرد
ويهمنى ان الكتاب يكون عندى
بحبك مووووت

مبروك .. من كل قلبي مبروك انا مبسوط اوي
بجد مبروك وبجد انتي تسهلي

مش عارف انا من كتر ما انا مشغول مكنتش اعرف ان الكتاب نزل اصلا لو اعرف كنت حاولت افلفص واجي ابارك ليكي
ربنا يكرمك والف مبروك وليكي وليوسف
تحياتي

يوسف
مبروكـ عليكـ الكتاب الى منور فية اسمكـ والكتاب التانى لماما اكيد هيكون وانت فى حضنها وبتحكى كل حاجة برضة معاكـ وانت تكتب كلمة تقولها فيها انها كانت جوهـ قلبك اوى
مبروكـ عليك يايوسف علشان تعرف ماما بتحبك قد اية دلوقتى مكتوب جوة كتاب وكل الناس روحها جواهـ

*
طمطم
ااااة لو تعرفى دموعى نزلت ازاى وااة لو تعرفى كنت بدعيلكِ قد اية
ولو تصدقى مش قدرت اسال داليا اية الى حصل قلت انا حسيتة وشوفتة وكانى كنت معاكم
بعتذر لانى مش قدرت اجى ياقلبى بس روحى كانت معاكى وشيفاكى وحساكى اوى
الكتاب الى جاى يوسف هيكتبة معاكى انا احساسى كدة
والف مبروكـ اسم ام يوسف ويوسف منورين
هجيب الكتاب ومع انى كنت بقرا كلماتكِ بس لازم احتفظ بيها عندى فى كل مكان
الف مليووووون مبروكـ على يوسف وعليكى
دة بداية يافاتيماويارب الكتاب الى جاى يكون بتاعكِ لو حدكـ بتحكى فية روجوع يوسف لحضنكِ انا معلش متلخبطة بقى من فرحتى والله
بحبــــــــــــكِ اوى اوى وفرحـــانة اكتر مما تتخيلى
حسة مشاعركـِ اوى ومتخيلة فرحتكِ اوى
مبروووووووك ياقلبى من جوهـ
بحبكِ

وردهـ ليوسف ووردهـ ليكى

خمسميت الف مبروك يا أم يوسف
أنتي فعلا تستحقي النجاح ده وأكتر
ربنا ينولك اللي في مرادك دوما

خالص تحياتي

مبروك الف مبروك
قلبك الجميل محتاج الفرحة ديه
تحياتي

ابقوا خلوا التوقيع بعد كدة يوم جمعة

علشان الناس الخيخة اللى زي حالاتى ما يتحرموش من التجمعات الجميلة دى

الف مبروك يا فاتيما
وربنا يخليلك يوسف ودايما كدة بتتكلمى عنه وبتحكيلنا عن اخباره وعن شقاواته

ربنا يفرح قلبك دايما


سلام
واشوفك على خير ان شاء الله

اختك خيخة

طمطم كتزعلش انى مجتش والله غصمن عنى يعنى بعدين ابقى اقولك فى سرك انتى عارفه ان صعب افوت ده بس الاصعب اللى عندى يا قمر
الف مبروك وربنا يفرحك دايما

طمطم يا حبيبتى الناس الطيبه اللى زيك ربنا بيحبب فيها الناس و فعلا انتى متستهليش غير الفرح بعد الحزن الطويل اللى عشتى فيه
يارب يكون الكتاب ده دفعه و شحنه انك تبقى اقوى و اجمد
كان نفسى قوى ابقى معاكم بس يارب اقدر اكون معاكم فى اى تجمع جاى انشاء الله
و الف مليون مبروك يا طماطم

مش هقولك مبروك
هقولك ربنا يديم سعادتك دي
وتأكدي ان كلنا أخوات وجمعنا حب الاخوه اللي مش لمصلحه ولا اي حاجه غير اننا عايزين نعمل حاجه تفضل ليوسف ولاولادنا كلها
مبروك موضوعك

مبروك والبقية تأتى

الف مبروك يا فاتيما أم يوسف
انا دايما بقلبي معاكي وان لم اعلق

ربنا ليه جوايز اسمها جوايز الصبر
بعضها في الدنيا وكتير قوي قوي منها ان شاء الله في الآخرة

وبين كل عسرين يسر صغنن كده جميل يخلي الحياة تنور بلون وردي زيك وزي مدونتك

الف مبروك مرة تانية وبحبك رغم اني عمري ما شفتك ودي مش شفقة هانم واحسان بيه ولا حاجة
ده شيء في القلب .. حب الناس .. جزء من الجوايز

انااااااااااا جه

ايه ده كمان اسمي مكتوب

بجد انا اللى كنت مبسوطه اووووووي اني اتعرفت عليكي
انتي عسوله اوي وطيبه اوي اوي اوي

على رغم من فضيحة المكسيك ههههههه
قعدت اقرى في الاهداء وانا مروحه وطول الطريق عماله اضحك

ربنا يفرحك دايما دايما ويبقى في كل فرحك يوسف جنبك

تشاو :)

ألف ألف مبروك

وإن شاء الله من نجاح إلى نجاح

ومن فرحة إلى فرحة

انا

فرحانة
فرحانة
فرحانة

وانتى عارفة ليه
ربنا يديم سعادتك
ويحبب فيكى خلقه كمان وكمان
يا ام قلب وعقل دهب

الف مبروك يا يوسف انك منور بين السطور وانا بس حابة اقولك ان ليك ماما من ألماظ حافظ عليها وحبها وخاف عليها واوعى ف يوم تقسى عليها ده نبض قلبها عايش بس باسمك وبيك ودايما يارب تاخد بايد مامتك لبر الامان وتعرفها دايما وتقولها اوعى تنسى ان ف الدنيا ناس حلوين وطيبين كتير بيحبوها

غلاوتك كبيرة قوى
وانتى عارفة كده

اخرجى بقى للضوء ومتخافيش على عيونك من الانوار عيونك بقت عيون صقر تقدر تقتحم اى مجال وتتغلب على اى مصاعب

سوقى عربيتك للشارع الواسع اللى فيه عربيات كتير - مشينا ف الشارع السد حبة ومشينا ف الشارع الضيق - حاولى بقى تسوقى عربيتك لحتة براح ومتخافيش من العربيات التانية معاهم هتحسى قد ايه انتى سواقة ماهرة

بالتوفيق دايما يا قلبى
هبة

الاجمل من وجهة مظرى ان اراكى
ان تغمربنى بحضوناتك وبسابيسك اللى بعتبرها ملكيه حصريه

فرحت بيكى اوى
عيونك الطيبه وهى مليانه فرحه
ملت الدنيا ورد وشوكلاته وحجات ومحتاجات..
بموت فيكى

مبروك يا فاتيما ومبروك ليوسف
والله يابنتى مش عارفة اقولك ايه
ماهو انتى لو تعرفى احساس اللى مجاش وافتقد اللمة الحلوة دى وفاتته فرصة انه يشوفك ويباركلك وجها لوجه ...كنتى تعرفى احنا حاسيين بايه
والله خليتينى مبسوطة بالبوست بتاعك اكتر مانا مبسوطة بالبوست بتاعى
يا فاتيما انتى دعالك كل اللى قرا البوست من غير المدونين حتى ...كل اللى قروا عندى الكتاب من اهلى أقسم بالله دعولك ربنا يجمعك بابنك ..وده لأنك مسيتى قلب اللى قرا بشكل عجيب

يارب يا فاتيما تتعوض المرة الجاية واقدر اشوفك انتى ونجلاء وايناس وكل اللى كنت باحلم اشوفهم

ربنا يفرح قلبك دايما

ايه ايه انتى نسيتى انك شفتينى هههههههههههههههههههه انا بهزر يا قمر
بجد كنت سعيدة انى شفتك ولو ان ما لحقتش اتكلم معاكى من الزحمة بس تتعوض ان شاء الله وكنت حاسة بفرحتك قوى ربنا يديم عليكى الفرح يارب

1000 مبروك ليكي وليوسف وإن شاء الله من نجاح الي نجاح

كان نفسي اكون موجود في التجمع الجميل ده بس مش عارف انا كنت في غيبوبة وفقت ولا لسه مفقتش علشان لسه واخد بالي دلوقتي بس من موضوع الكتاب وحفلة التوقيع بس إن شاء الله هحاول اركز شويه واحضر الحفلات الجايه


و1000 مبروك مرة ثانيه

وانتي اجمل بجد

انا انا صبحه الموبايل اللي كلمتك منه عاشقه الرومانسيه

ربنا يسعدك ياااااااااارب

الناس الجميلة اللى زيك لازم ربنا يكرمهم يا بطة ولسة وحياتك ,, بكرة تشوفى تعويض ربنا ليكى هيبقى ازاى .. خير مخلف معوض
انا والله كنت هاجيلك بس البت ايمو اتأخرت فالجامعة والمزغودة الصغيرة كان عندها درس بس وربنا كنت بدعيلك وبتخيل شكلك .. ملحوقة يا بطة
ربنا يكرمك ويسبغ عليك من واسع كرمه وفضله
وهشيل مبروك الكبيرة لعودة يوسف لحضنك
يا أم يوسف

ياه يا فاطمة
ياه يا أم يوسف
ما تتخيليش فرحتي قد إيه و انا شايف فرحتك في البوست ده
ربنا يفرحك دايماً يارب و يرجع يوسف لحضنك و تفرحي بيه
تمام كده كويس قوي إنك شيلتي لي نسخة بالإهداء
كلها شهر و نص و آجي أستلمها منك يداً بيد :)

فرحتك فرحتني بجد يا فاطمة

مبروووووك يا فاتيما
وربنا يوفقك دايما ونسمع عنك بالخير
تحياتي ليكي وليوسف طبعا

حاجات جوايا
دايما سباقة فى الخير و المباركة و المساندة يا سالى
عقبال يا رب لما نباركلك إنتى كمان فى الأعداد الجاية و فى كتابك الخاص
و الفرحة اللى أنا فيها دى عارفة ليه كبيرة قوى كدا ؟؟
عشان ضربتها فى عدد القلوب الحلوة اللى حواليا و إنتى منهم
فكترت و كبرت و إتضاعفت
فبدل ما كان قلبى بس فرحان فرحة يتيمة ...
بقى قلبى غرقان لشوشته
متحرمشى منك أبدا يا حبيبتى
و عقبااااااااااااااالك
أشوفك بس و ليكى حضونات و بوسات مخصوص
بوسيلى دودو بقى

ملاضة
الله يبارك فيكى يا حبيبة ماما
و عقبال كتابك و الدور عليكى بقى
بخصوص الشوفان أنا كنت بقول لخالد همس الاحباب و إحنا مروحين ...
إننا عاوزين يوم نطلع إسكندرية
لحسن حبايبنا فيها بقوا كتير و وحشونا قوى
وحشونى أنا قوى بالخصوص و عاوزة أجيلكم
فقالى قريب بإذن الله يكون الجو رايق و المعاد مناسب عشان الميزانية كمان لأن عندنا الشهر الجاى كام حاجة
فيمكن غالبا فى شهر 4 إن شاء الله
متحرمشى منك يا مرمرتى

عاشقة الرومانسية
إيه دا كله يا دودو !!!
كل الكلام الحلو دا عشانا أنا و يسوفة
الله يبارك فى عمرك يا حبيبتى
أصل بصى بقى ...
الصوت كان باين عليه
منيش خبيرة أصوات صحيح ...بس مينفعش حد يبقى بيكلمك و صوته مليان فرحة و حب كدا و القلب ميسمعشى
شوفتى بقى هتبهتى عليا و تخلينى رومانسية زيك أهو !!!
و 4 ساعات يا بنتى ..هتخلينى احسن بالذنب كدا ...
و بعدين اوعى تقولى أى حاجة عن إسكندرية و تزعلينى .. دنا بعشقها زيك تمام و لو لم اكن قاهرية لتمنيت أن اكون سكندرية ..أنا إسكندرانية الهوى يا دودو و نفسى آخد يوسف لما يرجع و نعيش فيها تانى لآخر العمر
و ساعتها هنبقى جيران بالسكن زى ما إحنا جيران بالقلب و المدونات
أنا كمان بحبك يا حبيبتى
و ربنا ما يحرمنى منك إبداً
و عقبالك إنتى كمان العدد الجااااااااااااااى
بوسة و حضونة

آه بخصوص الكتاب
شوفى إنتى جاية مصر أو إحنا نيجى إسكندرية فى زيارة لمدونى إسكندرية
أى المعادين الأقرب هتكون نسختك معايا
متقلقيش من الموضوع دا خالص
و مؤقتا كدا البوست المنشور ليا فى الكتاب موجود هنا فى المدونة و إسمه كل ليلة و طالما قريتى المدونة يبقى اكيد إتكعبلتى فيه و لا حاجة
خالص حبى يا حبيبتى

ahmed mubarak
الله يبارك فيك يا حنون و مبتحبش الجبنة ...
و بعدين فى حكاية الشغل اللى واخدك مننا دا ؟!!
على فكرة و أنا راجعة إمبارح إفتكرتك و أنا معدية على كوبرى قصر النيل ...أصلا أصلا كل ما أعدى عليه أفتكرك لما أشوف الولاد الكومل اللى مش جلالات الحيا دول واقفين
و أتخيل المنظر زى ما وصفته ...
عقبالك يا أستاذ
و ربنا يباركلى فى عمرك

رندا
أرد الاول بالنيابة عن يوسف اللى كان غالبا هيبصلك شوية كدا محرجاً و بعدين ربنا يفتح عليه بكلمتين معتادتين فى المواقف اللى زى دى لما أفكره و أقوله ..قول لطنط شكرا
فيرد بحماس
متشكر يا حضرتك
.....
أرد أنا بقى !!
أصل اللخبطة و الفرحة منى ليكى و منك ليا ..
القلب واحد و المشاعر تقريبا زى بعضها عندى و عندك
أصلك سبقتينى فى كل حاجة و عشان كدا عارفة أد إيه الواحد ما بيصدق يلاقى لحياته معنى و شكل تانى غير الحزن
بس تعرفى احلى حاجة إيه ؟
إن مشاركنى فرحتى ناس زيكم
فيه حد محظوظ قدى ؟؟
ينفع أقول شكرا ؟؟!!
تكفى ؟!!
لأ طبعاً متكفيش ..بس متلخبطة زيك
و عقبالك يا رب
و بحبك قوى

ahmed-k
و خمسميت ألف من عندى على اللى عندك يبقوا مليون ..
الله يباركلى فى عمرك يا احمد
و عقباااااااااااااااالك
النوبة الجاية و نجيبك من الغردقة اللى بعداك عننا طول الوقت كدا
خالص تحياتى يا اخى العزيز

واحدة مفروسة
الله يبارك فيكى يا حبيبتى
إنتى اللى قلبك جميل عشان فرحانلى أنا و يوسف قوى كدا
خالص حبى يا فروستى
و عقبااااااااااالك
بوسة و حضونة

مش هعرف أوصف لك أد إيه فرحتي لما عرفت إن ليكي موضوع في الكتاب. بجد فرحت جدا جدا جدا و رحت حكيت لمامتي :$. و دة شجعني أكتر إني أروح الحفل لأن كان واحدة بس هي اللي رايحة عشانها ..بس لما عرفت إنك رايحة بجد قررت أروح عشان أشوفك وبس
دي فرحتي
بس حزني بأة... إني مش شفتك:(. قعدت أدور في كل الوشوش بس مش شفتك. أيوة جيت متأخر و قلت يمكن تكوني خلاص مشيتي وزعلت جدا جدا، بس كمان اتمنيت ألاقيكي ف آخر لحظة على الأقل بس أسلم عليكي لأني شفتك مرة واحدة ومن وقتها نفسي أقابلك تاني
بس دلوقتي لما لقيتك بتقولي عن الفيلم.. عرفت إني كنت لسةموجودة:(لأني مشيت قبل الفيلم بدقايق بس

الحمدلله على كل حاجة
فرحت أوي أوي أوي بيكي وليكي،وبكلماتك اللي بجد بتوصف إحساسك وكأنها بتتكلم. يارب دايما كدة وأسعدكمان
إن شاء الله فعلا حياتك هتبقى أحسن يا توما:).خدي بالك من نفسك يا حبيبي

بت خيخة و أى كلام
يا خوخة مش بإيدى يا حبيبتى المعاد
و بعدين إحنا فيها اومال يوم الجمعة دا يبقى إيه غير تجمع جميل و البركة فيكى إنتى اللى إبتديتيها و بعدها الكل إتشجع ...دنا من الناس اللى كان ليكى فضل تشجيعهم
فاكرة ؟؟!!
عقبالك يا حبيبتى و فى كتاب منفصل عشان حكاياتك و السيرة الخيخية مليانة بحكايات لازم تتحط فى كتاب نحتفظ بيه كلنا
إن شاء الله و قريب
أشوفك انا كمان على ألف خير يا حبيبتى
و حسكم عينكم حد تسول إليه نفسه و يفكر ييجى قبل منى
انا بقولكم أهو

الطائر الحزين
الله يبارك فيك يا إيهاب
عقباااااااااالك يا غالى

appy
أيوه أيوه
كلمينى إنتى بطريقتك العيالى اللى شبه يوسف كدا ...أقوم أنا خلاص بقى
يا ستى و لا يهمك ..عارفة الحكاية
بس إتطمن من دوبا عليكى
بس كمان مش جاية التبرع ؟!!
طب لما نشوف البت خيخة تحددلنا معاد حريماتى عشان نقعد نتلم و ننم بقى
و الاهم تنورينا
الله يبارك فيكى يا حبيبتى
بوسة و حضونة

صيدلانية طالعة نازلة
يا حبيبتى متحرمشى منك
دايما كدا رافعين معنوياتى
بس خلوا بالكم .. مخمومين فيا برضو
إنتى قولتى كلمة بليغة و فى محلها قوى
حكاية الشحنة دى
أنا حاسة فعلا إن دى خطوة كبيرة رغم إن ممكن كتير يشوفوها حاجة عادية
لأ مش شايفها كدا
شايفة حاجة كبيرة مقوينى و مفرحانى
و مقربانى من يوسف
لو عملنا تجمع نسائى حاولى تيجى و يارب المعاد اللى هيتحدد يناسبك
إن شاء الله
و عقبااااااالك يا حبيبتى
بوسيلى الأستاذ سيف جامد

محمد مفيد
سعيدة قوى يا محمد إنى شوفتك
بس على فكرة
كنت فكراك اكبر من كدا سناً..
أصل أسلوبك وأفكارك و طريقتك فى الكتابة ما شاء الله توحى بشخصية ناضجة عمرياً و كدا
يشرفنى إنى شوفتك يومها
و يشرفنى اكتر إنك تعتبرنى اختك و ممنونة ليك أنا و يوسف
الله يبارك فيك وعقباااااااااالك

راجى
الله يبارك فى حضرتك
على فكرة حد سالنى عن حضرتك بس مش فاكرة للأسف مين ...
لكن كنا نتمنى وجودك وسطنا
المرة الجاية و يكون لحضرتك حاجة منشورة إن شاء الله
خالص تحياتى ليك و البقية تاتى من عندك بقى فى شكل بوست او كتاب خاص بيك

ستيته حسب الله الحمش
الله يباركلى فى عمرك يا حبيبتى
حلوة قوى قوى جوايز الصبر دى
تنفع عنوان بوست بجد
و معناها احلى و احلى
و حساها قوى يا ستيته فعلاً مش كلام
حاسة إن ربنا باعتلى خير أنا و يوسف بعد كل اللى فات دا
بيشد على قلبى و يقولى أنا مش ناسيكى
و مش هضيع اللى راح منك و من يوسف فى النسيان ...
إحنا مشوفناش بعض رؤى العين
لكن بنشوف بعض بقلوبنا
بكلامنا اللى بين السطور و اللى لو كدب هيبان و مش هيتصدق ..
لكن عشان كله بصدق و مفيهوش خداع
الارواح جند مجندة
و ربنا ما يحرمنى من حنيتك
و لا دعواتك
خالص حبى و على رأى يوسف
بوسة و حضونة ليكى

princess...whisper
اهلا اهلا اهلا
طبعا إسمك مكتوب يا جميل
أنا كمان سعيدة إنى شوفتك و إتعرفت عليكى ...
هنقعد نحب فى بعض على فكرة و أقولك إنتى كمان عسولة و لطيفة قوى قوى
و حكاية المكسيك دى أصلها ملخبطانى
ازاى بنوتة حلوة من بنوتاتنا الامامير عاوزة تهج تروح آخر بلاد المكسكيين كدا ؟؟!!
و بعدين أنا قولت يا عيال محدش يركز قوى فى الإهداءات عشان كنت متوترة حبتين ..بس مدام ضحكك يبقى كويس
ربنا يسعد ايامك كلها عزيزتى
تشاو أنا كمان من قلب قلبى
و عقبااااااااااالك

حسام غانم
الله يبارك فيك
الف شكر ليك على ذوقك و كرم اخلاقك
و عقبالك إنت كمان
قدها إن شاء الله و قدود
خالص تحياتى و إحتراماتى

يا حبيبتى يا غاليه وبجد انتى كده عندى من غير ما اكزن بزورك او اعرفك بس انا بحبك من كام مره دخلت المدونه عندك واليى شجعنى على الزياره تانى مش تعليقك عندى الرقيق زيك بس
زانما لانى قلت لا مينفعش كده ده لازم ولازم ولازم ادخل اسلم من قلبى عليكى وروحى تبوسك وتضمك انتى ويوسف جامد

انا مش هخبى عليكى انا كل ما بدخل مدونتك ببكى ودلوقت الدموع مغرئه عينى لانى حاسه بيكى قوى قوى قوى يمكن عشان امهات زى بعض الله اعلم
المهم انا برضه شكلى نكد وهنكد عليكى بكلامى ده مليون مبروك عليكى شويه يا فاتيما مليون فرحه لقلبك الامومى الطيب شويه عليكى برضه يا فاتيما

ربنا يباركلك فى ابنك ويجمعك على خير بمن تحبين

انا كنت هحضر طبعا بس لولا انشغالى ومقدرتش اسافر بعد ما خلصت مشاغلى للقاهره وطبعا مكنتش تنفع تتاجل بس انا كلمت مهنى الصبح واعتذرتله ليفتكر انى عبيطه ولسه مقموصه ولاا حاجه وقلتله يوصل سلامى للجميع وليكى وعارفه انه شكله موصلش السلام وشكله هو اليى هيتضرب

انا مخدتش بالى ان الجمعه الجايه لقاء التبرع بالدم بس ده فرصه كويسه قوى قوى انى اشوفك يا جميله واشوف كل حبايبنا

ربنا يجمعك بكل من تحبين على خير
يا ام الملاك يا حبيبه
ومليون مليون مليون مبروك عليكى الفرحه يا ام قلب طيب

اسالى محمود الريس سألته عليكى قد ايه
من كتر ما بحبك

دوبا
ممكن أقول إيه بس ؟؟!!
متهيالى إنتى حاسة بكل حاجة مش عارفة أقولها ...
كلامك ليوسف هبقى أقرهوله و يا رب يحصل دا قريب ...
إنتى من الناس اللى عملت معايا فرق كبير يا دوبا
خلتينى افكر فى اوقات كتير بشكل تانى
احسن
و أقوى
بدوس بنزين و مبخافش زى الاول
هيا حياة و لا اكتر
يبقى اعيشها على أد ما قدر
زى مانا عايزة و بتمنى
ربنا يخليكى ليا
وجودك امبارح كانله معنى و قيمة كبيرة عندى
متحرمشى منك أبدا يا حبيبتى
و بوسيلى يسوفك العسل
بحبااااااااااااك

dodda
أنا كمان بموت فيكى
و طبعا الحضونات و البسابيس بقت حصرياً و بتاعتك بس مش لحد تانى
بس يعنى يعنى ممكن يوسف يبقى معانا فيها و عارفة إنك هتقولى طبعااااا
الورد حطيته جنبى على الكومودينو اللى جنب السرير و جنب صورة يوسف
قولتله طنط دودا و طنط ميومة بعتينلك الورد دا و بيقولولك الف مبروك يا حبيبى
و بعتله من بسابيسك شوية قبل النوم
فاضل الحضونات لما يرجع تدهيله بنفسك
بحبك إنتى و مى اد الدنيا
و سلمولى على هدى قووووووووى

jana
كل الكام الحلو دا و مش عارفة تقولى إيه؟؟!!
الله يبارك فيكى يا دفعة
و اللمة دى إن شاء الله تتعوض تانى فى أيام احلى ليكى و لكل المدونين
بكرة اجمل و احلى بإذن الله
إشكريلى كل اللى عندك على مشاعرهم الطيبة و دعواتهم الصالحة
ربنا يجعلها من نصيب يوسف و تفرحوا برجوعه ليا و ليكم معايا
و ساعتها ...ياااااااااه
الكون مش هيساع فرحتى ...
ربنا يبارك فى عمرك
و عقبال كتابك لوحدك يا حبيبتى

bos bos
معلشى يا بسبوسة
الفرحة خدتنى و العدد ما شاء الله كان كتير و الالزهماير بقى
ربنا يكتر الأفراح و المناسبات الحلوة و نتقابل دايما
خالص حبى ليكى يا بسبوسة إنتى و بدرية
الرقيقة

جعلونى مريضا نفسياً
الله يبارك فيك يا استاذ
و عقبالك يا رب
و الظاهر بقى صبرنى يا رب الله يمسيها بالخير كان عندها حق و سيادتك لازم تشوف حل فى حكاية النوم دى اللى ملخبطة الدنيا من شغل و جواز
و كمان وقت ما تصحى تدينا فى فوازير تعقدنا بيها ...
و فى الآخر تقول ملحقتش آجى
طييييييييب
عندنا تبرع يوم الجمعة و تفاصيلة فوق على اليمين و حاول تيجى نشوفك
و مش لازم تتبرع يعنى بس المهم تيجى
اهو نلاقى طريقة نعكنن عليك و نصحيك بيها من النوم و خلاص
خالص تحياتى ليك

كيارا
كدا يا بنتى
ينفع كدا ؟!!
طب الواحد كان قاعد مزنوق و مش عارف يقوم و لا يجى شمال و لا يمين
طب بعد ما خلصنا الكلام تعالى طيب أسلم عليكى دنتى إسم معروف قوى فى التدوين و يشرفنى أتعرف عليكى وجها لوجه ...
طب المرة الجاية بقى و شاكرين لسيادتك على حركة الشياكة دى و ممنونين لموبايلك اللى خلانا نسمع صوت الجميلة دودو
و عقبال ما نجيلك الحفلة الجاية نباركلك إنتى
ميرسى على الدعوة الحلوة و
ربنا يسعدك إنتى يا حبيبتى

dreem
يا حبيبتى ربنا يخليكى لينا انا و يوسف ...
كفاية كلامك الحلو دا عشان احس بمشاعرك دى من غير ما تتحركى خطوة واحدة
عقبالك يا حبيبتى فى الأعداد الجاية
و آجى أباركلك من قلبى
و بوسيلى البنات قوى
و ربنا يسمع منك و أسمع مبروك بتاعتك دى قريب قوى
يا رب

مهندس مصرى
يا محمد متحرمشى منك أبداً
يلا شد حيلك و منتظرينك كلنا تنور مصر و تنور تجمعاتنا
ربنا يكتب ليوسف نصيب من دعواتك الحلوة دى
و عقباااااااااالك يا أجدع مهندس مصرى

micheal
الله يبارك فيك يا مايكليتو
عقبالك يا عزيزى
دايما كدا سباق بالخير و كرم الاخلاق
طب مجيتش ليه كنا نشوفك يوميها؟!
اكيد إنشغلت ...
المرة الجاية و يكونلك بوست منشور إن شاء الله
يا رب أشوفك دايما فى احسن حال
شاكرة ليك قوى من قلبى

wish i were a butterfly
معقولة ؟!!!
لأ متقوليش ...
كنت هناك إمبارح و أنا مشوفتكيش ؟؟
دنا هناك من تلاتة العصر
و فضلت موجودة لحد الأخر
و قمت بعد الفيلم علطول و روحت مع خالد همس الاحباب تقريباً أواخر الناس
يا ألف خسارة
دنا كنت عمالة أتلفت على كام حد كدا من اللى كنت مستنياهم و إنتى كنتى منهم يا هبهوب ..
ينفع كدا ؟
ملناش نصيب
ربنا يكرمنا و يعوضها المرة الجاية
لما نعمل لقاء نسائى بحت هينفع تيجى يوميها ...
طب لما أعرف من خيخة المعاد و التفاصيل و اعلن عن كدا تبقى تحاولى و المرة دى مش هنتوه من بعض
و يكفينى مؤقتا إننا كنا فى حتة واحدة و تنفسنا من الهوا النقى اللى كان مليان فرحة و كنا على بال بعض
بوسيلى روحك و إديها حضونة بقى متسألنيش أزاى لحد ما أشوفك تانى و اديكى البوسة و الحضونة بنفسى
خالص حبى يا من غير ما توشى بترفلاية رقيقة صغننة

mahsen saber
يا محاسن
يا بنت أبيها الغالى ( الله يرحمه و يحسن إليه )
أزيك يا ست الستات
كدا أسأل عليكى اللى يعرفوكى شكلاً لأنى متشرفتش بشوفانك قبل كدا ... يقلولولى إنك مشغولة مع إبنك و مش عارفة تفلفصى
أنا كنت هزعل قوى و بعدين قولت معلش لازم إتزنقتى و مقدرتيش تيجى
بس كان نفسى قوى تضرى اليوم دا لأنها حفلتك و كنت أتمنى تدوقى الفرحة دى لأنى عارفة إن الفرحة قليلة قوى
و ربنا يسعد أيامك و يعوضك خير
أنا عارفة إن كلامى كتير بيوجع خصوصا لما حد يكون عايشه او حاسه لأنه فى خضم صراع كبير و مشابه و أنا مجربة كل اللى إنتى بتمرى بيه دلوقتى و كان الله فى عونك يا حبيبتى عشان كدا كان نفسى تخرجى حبة من الحياة دى و لو كام ساعة و بعدين ترجعى تانى و خلاص
و عشان أشوفك كمان
أنا سالت عليكى احمد مهنى و أحمد سلامة
الشباب دول زى الفل و الله يا محاسن و لما تقابليهم مرة هتفهمى قصدى
محترمين كدا و مهذبين بشكل يخليكى لا تتصورى إن ممكن حد فيهم يفكر يضايقك او يزعلك فى حاجة ...
معقولة ممكن تعرفى تيجى التبرع بالدم ؟!!طب يا ريييييت
أنا هكون هناك من بدرى إن شاء الله
تعالى وقت ما يريحك و نورينا
و بتقولى سالتى محمود رئيس جمهورية نفسى عنى !!!
يبقى إتخميت يا جميل و سمعت احلى كلام
لن محمود أصلاً أصلاً مخموم فيا خمة معتبرة
أنا مبسوطة قوى إنه جاى يوم التبرع
ربنا يجيبه بالسلامة إن شاء الله
زمانه بيستعد و لا فى السكة
الف مليون مبروك عليكى إنتى يا حبيبتى
كل معاناتك إترصدت فى كتاب و إتسجلت للزمن و لبكرة و لإبنك
و بكرة يعرف اد إيه مامته تعبت و حاربت و ربنا ينصرك إن شاء الله
خالص حبى من قلب قلبى يا حبيبتى

انتى تستهلى كلام اكبر من كده بكتير يافاتيما
والكتاب انا كنت عايزاه يكون عندى والبوست قريته
تحفه بجد ياطمطم
عارفه ايه اول بوست قريته عندك وخلانى جبت المدونه من بابها تقريبا؟
بوست كان اسمه
لما يغادرك حبيب
لانى فى البوست ده افتكرت بابا وبكيت كتير
وحسيت ان بينا حاجه مشتركه
افتقادك ليوسف ربنا يبارك لك فيه ويخليه
وفقدانى لبابا

وكمان انا بعشق اسكندريه
لانها بلدى حبيبتى
وبموت فى الشيكولاته
وباعشق كمان صوت انغام
وبالمناسبه الاغنيه دى اهداء ليكى

http://www.mawaly.com/file/download/21073.html
ابقى حمليها واسمعيها

ومستنياكى تنورى الاسكندريه يافاتيما
ولازم اقابلك ياقلبى
وفق

مبرووووووووووووووووووووك

ربنا يخلينا على وش بعض يارب

ايه بس الكلام الجميل ده
كل ما ادخل مدونه اقول اخر مدونه وهقوم انام مش قادره اروح انام والوقت بيسرقني مع العالم الجميييييل اوي ده بجد والله
كلامك خلاني ادمع يا فاتيما انتي عسوله اوي وطيبه ربنا يكرمك يارب ويجمعك بيوسف علي خير وبتغظوني وتخلوني اغير حكم انا حقوديه وغلاويه ونفسيتي وحشه وديما كده منفسنه من الناس
وانتي بتحكي حسستيني اني معاكم والله وواضح ان كان يوم جميل ومن غير ما تقولي انا تاكده انه يوم حلو بكل الناس الموجوده الطيبه اللي فيه ناس محترمه وارقيه بجد عالم التدوين ده من احلي وارقي حاجه قبلتها في حياتي وغير تفكير الواحد وحس ان الدنيا ليها طعم تاني وان لسه في ملايكه وناس حلوه كتير وموجود الحب في الله من غير اي مصالح
عايزه اقلك بجد ربنا بيحبنا ان عرفنا العالم ده
بحب احساسك اوي وكلاماتك وكتابتك ورحك الحلوه ولو قلت هقول ناس كتير فعلا كده
والف الف مليون مبروك وديما سعيده ومتبقيش لوحدك ابدا ابدا
ربنا يسعدك وعايزه ارغي كتير كتير والله
مش عارفه اقول ايه
غير اني مبسوطه علشانك
والف مبرووووووك من فرح لفرح ويبعد كل هم عنك
امووووه بوسه كبيره

كان كفايه عليا اشوفك انتي وعاشقه الرومانسية مبسوطين وكان نفسي اتكلم معاكي اووي فيس تو فيس

بس اعمل ايه جت 6.30 وماما قالتلي يلا عشان مش اتاخر

ربنا يخليكي يارب ويكرمك ياااااااااااارب

أزال المؤلف هذا التعليق.

كلمة مبروك مش كفايه بجد
مليون مبروك مع استمرار النجاح والتوفيق

انا جيت اهو زي ماوعدتك ومش هبطل اجي ابدا :)

متشكره اووووووي لذكر اسمي والكلام الجميل ده :)

اتمناكي دايما بكل خير :)

بقالى كتير قوى مش بعلق فى المدونات
وبقالى كتير قوى مقرتش حاجه اتأثر بيها
.
.
مش عارف أقول اى حاجه
.
.
ربنا يكرمك دايما
.

الف مليون مبروك
وعقبال كتابك الخاص انتى ويوسف
بصراحة احنا اسعد بوجودك وسطنا
وانا سعيد جدا انك سعيدة ومبسوطة
وان شاء الله المرة الجاية يكون يوسف جنبك وفى الحالة دى كلنا ممكن نسمحلك انك تعيطى واحنا مبسوطين
الف مبروك
ونشوفك دايما على خير
تحياتى

أنا زعلالالالالالالالالالالالالالالالالالالالالالالان
أنال جيت حفل توقيع الكتاب وكنت واقف جنب بطوط وجيت اسلم على حضرتك وحضرتك مخديش بالك خااااااااااااااالص
على الهموم المهم إنى اتشرفت وشوفت حضرتك
واوعى تصدقى إنى زعلان هههههههههههه
ربنا يسعدك دايما
إنتى ويوسف

الغالية جدا فاتيما مامت يوسف..
أول مرة أعلق عندك مع اني بقالي شهر بقرا مدونتك بوست بوست..اللي خلاني أعلق النهاردة هو اني بجد فرحانة عشانك و عايزة أقولك 100000 مبروك على الكتاب و على الناس اللي بتحبك و على كل الحاجات الحلوة اللي بتحصلك..مفيش حد ممكن يحس الكلام اللي انت بتكتبيه عن ابنك قدي لأني تقريبا في نفس ظروفك..الفرق يمكن ان بابا أولادي الاتنين مسافر و لما بينزل أجازة و يخادهم بحس بكل حرف انت كاتباه..قريت مدونتك كلها و أنا لوحدي و هما بعيد عني و مش حتتصوري كمية الدموع اللي بكيتها و كمية الحب اللي حبيتهولك..أتمنى لك كل الخير و السعادة في الدنيا انت و يوسف

الف الف الف مليون
واتنين مليار مبروك يا فاتيما
ربنا يفرحك كمان وكمان
على فكره
انا لسه عارف الخبر من مدونه همس الاحباب
قلت اجى اهنىء وبالمره اشرب الساقع والشربات ويمكن ربنا يرزقنى بعشوه ولا حاجه

عبده الرايق

ياخبر ياكزوفي ياكزوفي ( وش محمر خالص والله ) ده انا طب انا مش هاقولك بقي انا كنت فرحانة قد ايه ولا الإهداء بتاعك عمل فيا ايه أيه رأيك كدة هاعمل بوست بحالة واقول براحتي استني اقري البوست بقي

أشوفك بألف خير وصحة وسعادة بكرة إن شاء الله

تستاهلي كل الخير والفرحة ويارب الفرح يجيب بعضه وتكمل الضحكة في عينيكي برجوع يوسف
وتقولي مي قالت وكده
عقبال كتابك الشخصي ويكون على رفوف المكتبات منور يارب
بسبوسات وحضاضين
آه اشمعنى دوددا تخترع يعني
هههههههههههه
: )))))))))))

فاطيماتاااااا
أم يوسف
ايه المفاجأت الحلوة دي
دي فعلا أجمل مفاجأة في هذا العام العام الجديد لا وايه كمان ونحن على اعتاب عيد الأم وكأن القدر مرتب ومشبك كل حاجاتك الحلوة مع بعض
أولاً انتي تستاهلي ياأم يوسف كل خير وده مش من فراغ ولا حكاية حظ كويسس ابداً انتي ابتديتي أول خطوة ليكي من بدري وكلنا كنا حاسين بيها انك ناوية تغيري أشياء كثيرة ومفاهيم لديكي ولدى الغير عنكي وقد نجحتي بالفعل نجاح جميل وبالطبع كلنا نعرف أن هذا النجاح كان امتداد للدعم الكامل من داخلط وإيمانك بنفسك انكي مازالت قادرة على تحقيق نجاحات كثيرة وأن الدنيا لن تقف بكي عند مطب واحد في حياتك وعسى أن تكرهوا شيئاً وهو خير لكم وهذا النجاح أيضا لنزعة الأمومة القوية والجميلة داخلك بأن هذا البعد المكاني بينك وبين يوسف لن يؤثر على حبك وأمومتك سلباً بل كان العكس تماماً
اليوم فقط أقدر أقول بعلو صوتي
افرح يايوسف أفرح بجد واملى الدنيا هيصه وفرح وتهليل وانت النهارده بتتباهى بأمك الجميلة وسط كل أصحابك وكل اهل والدك وبتقولهم في حد بينكم كده زي ماما الناس كلها بتحبها وليها كتاب والناس كلها بتقرأ لها وإسمها كمان بكره هايزين الجرانيين وبعد بكره هاتنور ان شاء الله القنوات الفضائية
افرح يايوسف من قلبك
ام يوسف الف مبروك وعقبال توزيع المليون نسخة وأشكر لكي سؤالك الجميل
تحياتي
حسن أرابيسك

عاشقة الرومانسية
الغنوة مش شغالة يا دودو بس هدور عليها فى موقع تانى و أسمعها اكيد
خلى بالك فيه بينا حاجات مشتركة كتير أهو
عشان كدا الارواح تلاقت
و ربنا يديم الود و الحب دا
فى أقرب فرصة إن شاء الله نيجى إسكندرية أجمل مدينة فى الكون
و نتقابل يا حبيبتى
بوسة و حضونة و خالص حبى

بعبعة
الله يبارك فيكى
و عقبالك إن شاء يا ستى
نورتينى قوى

سمكة واحدة
يا سموكتى ربنا يباركلى فى عمرك يا رب
و عقبالك يا حبيبتى
الكلام الحلو دا كله أنا مش قده و الله
يا عيال خايفة تكونوا مخمومين فيا
و خلى بالك هييجى يوم و تحضرى معانا اللقاءت دى
فبلاش الحقد عشان يوم لك و يوم عليك يا قمر
و بعدين تعالى هنا ...
هوه كل ما هتيجى عينيكى تدمع
هوه أكتب نكد
اكتب فرح
تعيطوا!!
أعمل إيه بس فى قلبكم الطيب دا بقى ؟؟
شوفولكوا حل فى روحكم
عقباااااااااااالك

كيارا
طب المرة دى بس سماح
لكن بعد كدا لازم نقعد و نرغى و نحكى
و إحنا ميرضيناش تتاخر يا جميل
خالص حبى ليكى يا حبيبتى

eno
دا أقل حاجة يا إيناس
إنتى رقيقة قوى يا بنوتة و مكنش ينفع مقولشى رأيى و إنطباعى عنك
خطوة عزيزة و نورتى المطرح كله
و فى إنتظارك دايما يا حبيبتى
خالص تحياتى و سعادتى بيكى

إنكسارات ...احمد البوهى
يا ألف اهلا و سهلاً
يا خرابى يا احمد
هختفى خجلاً من كلامك دا يا عزيزى
تعليقك عندى النهاردة
المفروض يتبخر
عشان هتحقد و هتحسد دلوقت
متقولشى حاجة ... طب دا كفاية فضلكم عليا اللى أبلغ من كل كلام
و ربنا يرجعك بالسلامة إن شاء الله
خلى بالك من نفسك بس المهم
و ربنا يوفقكم دايما
يا رب

همس الاحباب
يا خااااااالد
يا أبو هموسة الجميلة
الله يبارك فى عمرك و فى همس و مامتها و كل حاجة تخصك يا رب
أيوه أيوه
هتسيبونى أعيط براحتى ؟!!
كدا الكلام ... بس لما يوسف يرجع
طب يا رب أعيط قريب قوى
ربنا يخليكم ليا و إنت خصوصا يا أعز اخ فى الدنيا
و عقبال ما نجيلك دايما فى الأفراح و المناسبات الحلوة إن شاء الله

mohamed ghalia
ليه يا محمد كدا زعلتنى
بقى تبقى موجود على بعد خطوات منى و متقوليش أنا أهو ؟!!!
أنا دلوقتى اللى زعلااااااااااااانة
طب نبهنى يا جدع ... دنا أختك الكبيرة و متتكسفشى يعنى
المرة الجاية متحرمنيش من فرصة السلام عليك و تحيتك كما يجب و يليق بيك
خالص مودتى و إحتراماتى ليك يا محمد

dahlia
أولا إنتى نورتى المدونة و المطرح و قلبى معاهم
ثانياً بشكرك بجد على ذوقك و مباركتك الجميلة و عقبال كورنرك إن شاء الله ما يبقى أشهر كورنر فى عالم التدوين
ثالثا ... ربنا يسعدك و ينصرك و ما يبعدش عنك ولادك أبداً تحت أى ظرف و لا سبب ....
أسفة لو كنت بكيتك
بس مش أسفة على مشاعرك الحلوة ناحيتى أنا و يوسف
نورينى دايما و تعالى بقلبك الحلو دا
و عقبااااااااااالك

الضاحكون
يا عبدوووووووووو
عقبالك يا رايق
قريب إن شاء الله
فيه عدد ساخر بيقولوا عليه و اكيد مدونة الضاحكون هيكونلها نصيب الأسد
دا أقل توقع يعنى
و الساقع و الشربا و العشا و الغدا و كله
بس إنتى مرة تعملها بجد و تيجى مصر
ربنا يبارك فيك يا رب
و عقبااااااااالك

وومن
أزيك يا ميرا يا اميرة
مكزوفة من إيه يا بسكوتاية
هوه إنا قولت إيه يعنى
دنا متغاظة من المدير بتاعك دا غيظ
و نفسى انطحه بخروف من بتوع آبى
مستنياكى يا حبيبتى بكرة إن شاء الله
بوسة و حضن كبيييييييير

maii bahaa
يا خرابى يا ميومة
بسبوسات و حضاضين !!
يا بنات انا كدا مش ملاحقة على جماليات اللغة دى
كل شوية تدهشونى و تخلوا قلبى يبتسم
أقولك إيه ؟؟
عقبال ديوانك الكامل ليكى لوحدك إن شاء الله
و آجى ابارك و اديكى بسبوسات و حضاضين للصبح
أنا رديت على الإيميل بتاعك على فكرة
و على فكرة برضو
ربنا ما يحرمنى منك إنتى و دودا
أبدا
أبدا
ابدا

حسن ارابيسك
يا فنان
يا كبير المقام و كبير القلب
كل الكلام الحلو دا مستهلوش و الله
بس هوه قلوبكم الحلوة اللى حضنتنى كل المدة اللى فاتت دى هيا اللى شايفنى كدا ...
كلامك ليوسف فرحنى قوى
قوى متتصورش قد إيه ...
بس دا كان السبب الاول و الاكبر فى فرحتى ...إن يوسف لما يرجع اقوله إنى كنت بفكر فيه ... و كل حبى و تفكيرى موجود و موثق و الناس الحلوة الكتيرة دى بتقراه و تحتفظ بيه كمان عندها
يا رب اكون بحاول أصلح شوية مما أفسدته من حياته كأبن مكنلوش ذنب فى أى حاجة حصلت و بتحصل
ربنا ما يحرمنى من طلتك و سؤالك و كلامك الحلو
خالص تحياتى
و كمان تحيات يوسف لو كان موجود كان قالك متشكر يا حضرتك

مبروك يا قمر المدونين
انا حضرت بس للاسف عرفتش اسلم عليكى لكن كنت حاضرة علشان مخصوص
وحشتينى اوى

دشليون مبروك فأنت ومدونتك تستحقان ما هو أجمل .. حزين لأننى لا يمكننى الحصول على الكتاب حاليا ..دمت بخير .

صباح معطر بالورد والياسمين

باذن الله اشترى الكتاب وأقرأه

قد ايه كان نفسى احضر حفل التوقيع بس مش جيت لان ماحدش دعانى ولا بعت ليا دعوه على مدونتى . مش حبيت ان أحضر دون دعوه

بس سعيده جدا بهذا الكتاب اللى اكيد حقراه
ومبروك عليكى يافاتيما ولكل المشاركين فى الكتاب

يمكن مش كنت موجوده فى حفل التوقيع بس كنت موجوده بقلبى

تحياتى
عرفاتك الساحرة

أنا عارف إني متأخر في التهنئة جدا بس بقالي اسبوعين بألف الدنيا رايح جاي ومش قادر اتابع الأصدقاء كويس

بجد ده خبر سعيد جدا جدا ودفعة معنوية جامدة ليكي ان شاء الله

الف مبروك وان شاء الله يكون الكتاب ده نقطة انطلاق للأحسن

انا قابلت النهارده ملاك ملاك ملاك انسانه بروح وسمو واخلاق ملاك

بركان امومه متفجر وثائر بالحنان
انسانه من اجمل وارق واخلص وانبل البشر اليى قابلتهم فى حياتى
واحسبك بالصبر ده يا فاتيماانك ان شاء الله داخله بصبرك وطيبتك الجنه

ربنا يبارك فيكى وفى قلبك النقى ويردلك روحك عن قريب بقرة عينك وعينى يوسف

انا النهارده شفت ام من اكثر امهات الكون بساله وشجاعه وحنان
انتى ام عظيمه عظيمه عظيمه

انا سعيده بيكى بشكل غير عادى انا حاسه انى قابلت اختى بعدغياب طويل او سفر
انا سعيده سعبده

احمدك يا رب على نعمة معرفة بشر بالشكل والشاكله دى

احمدك يا رب انى عرفت وقابلت ملايكه من ملايكتك على الارض فاتيما
ويا رب بصبرها جازيها خير وقر روحها بحضن ابنها

اللهم امين
انا بحبك فى الله يا اختى وحبيبتى وصديقتى الغاليه الغاليه قوى قوى
يا ام الغالى قوى قوى يا فاتيما

|لف مبروووك غاليتى ويارب تكونى فرحانه دايما.. ربنا يسعد قلبك كمان و كمان
ان شاءالله تسعدى بيوسف الغالى و يرده الرحمن اليكى قريبا يارب و يبارك لكى فيه و يجعله قرة عين لكى |.. امين

اطيب امنياتى لكى بمزيد من التوفيق و السعاده دائما

تحياتى

السلام عليكم و رحمة الله
علي فكرة فعلا من الناس اللي حرصت اشد الحرص انهم يكتبولي يا فاتيما

بجد انت وشك بشوش اوي و تتحبي من اول وهله
و سعيدة فعلا اني شوفتك و كنت اتمني اني اقعد و اتكلم معاكي كتير اوي بس المشكلة اني عارفة ان في الاوقات دي الواحد بيبقي مش مركز مع اللي حوليه و كنت حاساكي مشغولة اوي
ماشاء الله يعني فعلا ...ربنا يديم حب عبيده عليكي و ان شاء الله عوده يوسف بالسلامة تكلل النعم دي كلها

ايام لقائات المدونين دي فعلا بتبقي ايام تسجل في الذاكرة حقا

شفقة هانم و إحسان بيه
الله يبارك فيكى يا حبيبتى
و عقبالكمااااااااااااااااا
إنتى و زوجك الغالى
و زعلانة جدا لأنى معرفتش أشوفكم
بس تتعوض إن شاء الله قريب
عندنا يوم للمكتبه و حاولوا تيجو بقى
خالص حبى يا حبيبتى

إيهاب رضوان
و لا يهمك يا إيهاب اكيد هتيجى مناسبة و تقدر تجيبه
ألف مبروك لينا كلنا و عقبالك إن شاء الله ...
و الله فرحت لما سمعت إسمك فى حفل جوايز القصة القصيرة ...
مش مهم أى حاجة بس فكرة بس إنهم يبعتلوك تحية خاصة لقصتك و أسلوبك
و عقبال ما تاخد جايزة أولى السنة الجاية
و اجيلك ساعتها بقى أقولك الف مليون مبروك
خالص تحياتى و إحتراماتى

نبضات
يا خرابى عليكى يا نبوضتى
إنتى إمتى يا بنتى هتبطلى الحساسية الزايدة دى !!!
دا حفل عام يا حبيبتى و كل حد عاوز ييجى يحضره ييجى و مش لازم دعوة خاصة و لا حاجة
دا حفلنا كلنا كمدونين و بتاعنا إحنا و مش محتاجين عزومة و لا حاجة
و عقبالك يا ست البنات إن شاء الله
يعنى ينفع متجيش يوم زى دا عشان السبب دا ؟؟!!
معقول !!
يا ستى خدى بالك ...كل لقاء بدعى فيه الناس الحلوة اللى زيكم ...تعرفى علطول إنك من ضمنهم ..و من اولهم كمان
خلاص ؟
طيييييييب
خالص حبى يا عرافتى الساحرة

يا مراكبى
يا نبع الحكمة و لا يهمك
و عقبااااااااااااااااااالك
يا رب
يا رب
سلامى لفادى و مامته
و هوه بطل يرسم ليه ؟؟

MAHASRN SABER
محاااااااااااسن
يا نص قلبى التانى
إحساسك دا إضربيه فى 100 و إنتى تعرفى غحساسى شكله إيه
الكلام الحلو اللى قولتيه دا كله بقوله عليكى فى قلبى من إمبارح للنهاردة ميت مرة
إنتى إنسانة متميزة قوى
و حبوبة قوى
و فيكى ونس غريب عجيب
و عبدالرحمن يا قلبى ..ربنا يحرسه و تشوفيه أحسن حد ف الدنيا
و ربنا يعوضك الخير كله عن اللى شوفتيه و اللى لسه بتشوفيه
بحبااااااااااااااااااااااك
قوى
قوى

ROVY
يا روووووووفى
الله يبارك فيكى يا حبيبتى
كل الكلام الحلو دا أرد عليه إزاى بس ؟؟
مفيش حاجة فى جماله
عقبالك يا رب و نيجى نباركلك
و متحرمشى منك يا حبيبتى

شمس الدين
و عليكم السلام يا شموستى
ميرسى يا حبيبتى على شعورك
انا بقى كنت متوولة لدرجة إنى مخدتش من حد أى توقيعات و زعلت من نفسى جدا بس ملحوقة و هبقى أشيل عندى نسخة ف الشنطة و اخد تعليقاتكم لما أشوفكم فى اى مناسبة قريبة إن شاء الله
و عقبال كتابك الخاص
و قريب قوى
ألف مبروك لينا كلنا يا حبيبتى
خالص حبى و إحتراماتى

إرسال تعليق