.

.

جيالك يا إسكندرية  

Posted by: فاتيما in

تحدييييييييث
خدوا بالكم يا جماعة المكان إتحدد خلاص بناء على توصيات حبيبتى لماضة
و هنودة القمراية فى البوست دا ...
التفاصيل بقى كالآتى
المكان
نادى الاطباء ( و مشكرين يا لماضة ) اللى فى سابا باشا على البحر
بجوار كوبرى إستانلى ...
وإبقوا إسألوا يا إخوانا الإسكندرانية جدعان قوى و مش هيتوهوكم و لا حاجة
المعاد
زى ما قولنا التلات 24 مارس بدءاً من الساعة عشرة
و اللى ييجى بعد كدا يدخل علطول يلاقينا جوا إن شاء الله فى إنتظاره
و إن شاء الله السكة هتبقى سالكة
دى إسكندرية يا عالم
إسكندرية يا هووووه
و برضو تابعوا التعليقات عندى و عند هنودة اللى سايبة نمرة موبايل مخصوص لليوم دا
عشان اللى يحتاس يتكلم فيها يستفسر عن أى حاجة
بس كدا خلاص دلوقتى ...
أشوفكم يوميها على ألف خير
لأ
إستنوا هنا ... هوه أنا قولتلكم بحبكم البوست دا و لا مقولتش ؟؟!!
إهيه .... مقولتش ؟؟؟؟؟
طاه .... مش هقول بقى عشان إنتوا عارفين لوحدكم من غير قوالة
سلام مؤقتاً
-------------------------------------------------
الحكاية إبتدت لما ....
البت القمراية هنووووودة قالت عاوزين نتقابل
بس أنا مسافرة على 27 مارس
قولت إسأل داليا قوس قزح وش الخير ... هنتلم إمتى فى أقرب معاد
عشان يوم المكتبة
البنية تشكر قالتلى هسأل و ارد عليكى .. قوم طلع المعاد فى اول جمعة من أبريل
قولت مبدهاش بقى و خلاص ..أنا نفسى أعمل المشوار دا من زمن ..
أعمل جنونة ... و أشد الرحال على ست البلاد كلها
إسكندرية الجميلة
عاوزة أشوف لماضة و حنين القلب و بنت القمر و سمكة واحده
و أدى عاشقة الرومانسية حضونة كبيرة و مروة ست البيت
و زمردة الجميلة
و أشوف هنودة قبل ما تشدها بحور الغربة فى سفر طويل بعييييييد
و طبعا كنت اتمنى أشوف نسرين بسيونى بس عارفة إنها مش فى مصر حالياً
خلوا بالكم
المعاد إن شاء الله يوم التلات الجاااااااى دا علطول
الموافق
24 مارس 2009
الكل معزوم ... مهياش عزومة حريمى يعنى
عشان كتبت أسامى بنات بس ...أصل معرفشى
من مدونى إسكندرية الرجال يعنى
غير الباشمهندس إسكندرانى أوى و عارفة إنه مسافر دلوقتى
و كمان أعرف
ta3ban
من خلف الشاشة
هوه و وليد صباح الخير يا مصر
دول مدونى إسكندرية اللى متواصلة معاهم
بس أى حد من الى جم المرة اللى فاتت او اللى مقدروش ييجوا
و نفسهم يشاركونا طبعا ألف مرحب بيهم ...
و واحد من الجماهير يسألنى ...
ليه يا كابتن لطيف ميبقاش المعاد يوم الجمعة بدل التلات
أرد و أقوله عشان عندى سببين مهمين
الاول
عشان الجمعة الجاية و السبت ... عيد الام و الكل هيبقى مشغول أكيد
بمعايدة الامهات و الحموات
كل سنة و هن طيباااااات
و اختكم عندها بصيص امل إن إذ ربما يوسف ييجى
و لا حتى يتصل فى التليفون
فبالتالى مينفعشى خالص الجمعة الجاية دى
و الجمعة الى بعدها تكون هنودة سافرت خلاص و متقدرشى تيجى
و السبب التانى و إنتوا مش غرب يعنى ...
و دون إحراج ... ومل الآخر أختكم عايشة على إعانة الحكومة متمثلة فى معاش بابا
و أنا بقبض المعاش بعد يوم 20 و بالتالى على يوم التلات يكون ربنا فرجها
و بقى معايا ميزانية مناسبة للسفرية دى .... و لا أجيلكم مشى يعنى ؟!!
و مش عاوزة حد يستجدع ( و الجدعان كتير الصراحة ) يقولى أسلفك
و لا تعالى معايا فى العربية أوفر و الكلام دا
عشان بريستيجى بينقح عليا ... فى الجزئية دى بالذات
بالنوسبة لباقى التفاصيل بقى ....
فطبعا معنديش أى فكرة عن أى حاجة
يعنى مثلاً عن المكان ...
لو تحبوا المطرح يبقى بتاع المرة اللى فاتت ... ماشى
و لو إنى أتمنى نقعد فى حتة نشوف فيها البحر كويس
إنما اهل إسكندرية ادرى بشعابها
و لماضة أو حنين القلب يقولونا فين و إزاى
و إحنا تحت امرهم
اللى عنده أى إقتراحات ... نحن نرحب بها
و اللى مش مناسبه المعاد .. يقولنا على يوم تانى بس قبل يوم 27 ضرورى
و ظبطوا مواعيدكم و ظروفكم ...و قولولى مين جاى
عندكو أسبوع أهو ترتبوا حالكم على قدر الامكان
أنا متشوقة لكل شبر فيكى ... يا احلى بلد فى الكون
و عماااااااااار يا إسكندرية

This entry was posted on الثلاثاء, مارس 17, 2009 and is filed under . You can leave a response and follow any responses to this entry through the .

78 كــــلام بيطــبطـــب عـــلى قــــلبى و روحــــى

تروحي و تيجي بالسلامة

و ياريتني كنت اقدر احضر
ملحوقة
أما أشوف ترتيب لقاء مدونين في القاهرة أثناء أجازتي الشهر الجاي

تسلم يا باشمهندس
و لما ترجع بإذن الله إنت عارف أنا اول واحدة جاية و مفيهاش كلام
ترجع بالسلامة إن شاء الله
خالص ودى و دعواتى

اول زيارة ليك

سمعت عنك كتير بجد الكل بيشكر فيك اخدت لفه كده فى المدونة

بجد انتى حد حلو قووووى .. ربنا يطمن قلبك يارب و يبارك فيك

اما عن اللقاء تروحوا و ترجعوا بالسلامه يارب

تحياتى ياجميله (:

الأستاذة الفاضلة/ فاتيما
صاحب مدونة / روح قلب ماما
" تحية طيبة" وبعد..
بداية أنا كمان بحب اسكندرية جدا واتمنى لكِ إجازة سعيدة وترجعي بألف سلامة أنت وكل المدونين أصدقاء، ولقد أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية.
أرجو الاهتمام والرد سريعا بالموافقة أو الرفض.
تحياتي وتقديري.
شيماء إسماعيل.
باحثة بالماجستير- كلية الآداب جامعة القاهرة.

بصي بئا انا حبيتك قبل مشفتك وعاشقة حكتلي كتير عنك وبتحبك حب واا حبيتك من حبها وحشوفك يوم جمعة ان شاء الله يعني حشوفك

السلام عليكم
اتمنى جدا انى اقدر احضر الميعاد اذا تقبلتونى بينكم بس المكان فين والساعة كم
ياريت ظروفى تسمح واقدر اكون معاكم واتعرف على الاسرة الجميله دى
لكم كل الود والتقدير

ايه ده بجد
والله مش مصدقه نفسي من الفرحه
عماله الخبط في حروف الكيبورد وانا بكتبها
ده انا اجيب رمل الشط كله وافرشلك بيه اسكندريه
وهأجل سفري مش هسافر التكليف الا لما تيجي مجتش من اسبوع عشان عيونك
وربنا يستر بقى
هبعتلك تليفوني
شوفوا المكان اللى تحبوا تتقابلوا فيه وانا تحت امرك
تنوري اسكندريه يا ست الكل

خوساااااااره :(

يارتني ف مصركنت جيت والله ..

هو في حد يعرف ان القمر رايح ومايروحش

لو بعرف اعوم كنت عديت البحر الاحمر وجيتلك :(

بس للاسف مابعرفش ههههه

ملحوقه ياقمر

هتنوري اسكندريه كلهاااا وماجاورها كمان

انا مش جاااااااااااااااااى

يوم التلات عندى جلسة فى المحكمة علشان اعلام الوراثة

واساسا انا ماينفعش اخرج برة اكتوبر اللعينة فى وسط الاسبوع
واساسا انا ماينفعش اسافر برة القاهرة

واساسا انا جاية اقولك انى بحقد عليكم
علشان هتتقبلوا من غيرى

سلام
اختك خيخة

فاتيما
كل التوفيق لاخواننا المدونين و اخواتنا المدونات في لقائهم بالاسكندرية و في مسيرتهم التدوينية
**********
كل عيد ام و انت بخير يا ست الكل
وربنا يجيب لك يوسف اليوم ده سالم و غانم
مودتي

ترورحوا وتيجوا بالسلامة إن شاء الله

وإن شاء الله تبقى أجازة سعيدة

ماشاء الله :).رحلة حلوة جميلة إن شاء الله

ابقي سلميلي على البحر متنسيش :).بجد هو عارفني. بس قوليله هبة و هو هيفرح علطول

ربنا يسعدك يا تمتوم
بتمنى يوسف يكلمك قريب أوي بجد

:)
سلام

طب انا ماما عايشه فى اسكندريه
ايه رأيكم ادب خناقه مع جوزى و اروح لامى قال يعنى غضبانه و اجى اشوفكم
ايه رايكم فى الفكر الارهابى ده
ربنا يسعدكم فى اليوم ده و تقدروا تنبسطوا و يبعد عنكم المطر
بجد نفسى اشوفكم قوى

تروحي وتيجي بالسلامة ياقمر وابقي سلمينا علي إسكندرية وبوسيلنا بحرها بعنيكي

إن شاء الله يكون يوم كويس
بالتوفيق وربنا يسعدكم

sweet violet
إنتى نورتى المطرح كله
و ميرسى على ذوقك
اللى سمعتيه اكتر اكيد مما أستحق
و بشكرك على دعواتك الطيبة من قلب قلبى و فى إنتظارك دوماً تنورينى
خالص حبى ليكى




shimaa esmail
يا أستاذة شيماء متشكرين على مجاملتك و تمنياتك الرقيقة لينا
أنا رديت على إيميلك و اتمنى نتفق و منختلفشى إن شاء الله
و ربنا يوفقك فى رسالتك و تاخديها بامتياز ...و الاهم منه المرتبة الله يخليكى عشان مهمة قوى قوى





حررروووف
اهلا باللى جاى من ريحة الحابيب
عاشقة شخصية رقيقة و اكيد أنتى زيها
المعاد يوم التلات يا حروف
و لا تقصدى يوم تانى ؟؟
فى كل الاحوال يسعدنى نتقابل
خالص حبى



بس خلاص
و عليكم السلام
إنتى من اهل إسكندرية ؟؟
طيب ..بسى يا ستى
تابعى البوست دا كل يوم و إنتى تعرفى آخر التفاصيل ...
و هبقى اكتب تحديث فى البوست لما نتفق خالص على المكان ...
المعاد هيكون من اول اليوم ...
يعنى توصلى وقت ما توصلى تروحى على المكان المتفق عليه علطول و هتلاقى حد هناك خصوصا لماضة اللى أكدت حضورها ..
و البقية إن شاء الله تأتى
خالص حبى ليكى يا و لا يهمك



لماضة
يا حبيبة ماما أنا جاية أشوفك جرى
حكاية التكليف دى فيها مشاكل ؟؟
اوعى ... مش عاوزة أسببلك قلق
و بعدين تعالى هنا
يعنى عمالة أقول اهل إسكندرية ادرى بشعابها و ألقح كلام عليكم و أتراذل
تقومى فى الآخر تقولى هنروح فين ؟؟
يا بنتى إنتوا اللى تقولوا
إيه المكان اللى ينفع نقعد فيه كام ساعة من غير تكاليف جامدة و نبقى براحتنا و الناس تعرف توصله بسهولة
غالبا هيبقى المكان بتاع النوبة اللى فاتت بقى ...
طب لما نشوف يا مرمرتى
لحد ما أشوفك بقى
خلى بالك من نفسك يا حبيبتى
بوسة و حضونة




mony el-shreef
ليه بس كدا ؟؟
إنتى مسافرة برا يا مونيى
طب ترجعى بالسلامة
و خسارة لينا احنا يا حبيبتى
و معلشى تتعوض لما تنزلى اجازة غن شاء الله
خالص حبى




بت يا خيخة
معلشى يا نونو
أصل المعاد حكمنا
كان نفسى نعمل لوكاء حريمى من بتوعنا
بس عارفة إن برضو هيكون يوم جمعة
و تكون هنودة سافرت خلاص ..
خيرها فى غيرها
و نتقابل إن شاء الله يوم المكتبة و غالبا هيكون بؤجة الخير فى ديله بالمرة
بوسيلى شريف قوى
و ربنا يسهلها فى مشوار المحكمة
و ربنا يبارك فى عمركم جميعاً
بوسة و حضوناااااااااات




assafo anaroze
الف شكر ليك يا أسافوا على تمنياتك الطيبة دى
و كل سنة و كل امهاتنا بخير



حسام غانم
الله يسلمك يا حسام
شكرا ليك جدا




wish i were a butterfly...
طب ما تحاولى تيجى يا هبهوب
مينفعشى ؟؟!!!
طيييييييب
اسلملك على البحر بس ؟؟!!!
دنا هبسهولك من هنا و من هنا
ربنا يسمع منك و يسوفة يتكلم
هقولكم طبعا لو حصل
هقولكم إيه ...دنا هجننكم قوالة
بوسة و حضونة يا حبيبتى
ياللى من غير ما توشى ..بترفلاية رقيقة صغننة





صيدلانية طالعة نازلة
يوه
هوه لازم تدبى خناقة عشان تسافرى لمامتك ؟؟!!
مينفعشى تيجى لأغراض سلمية
يعنى تسلمى على ماما و علينا ؟؟
أنا كمان كان نفسى تيجى قوى ...
بس هتبقى معانا بقلبك الحلو دا
و مش هبعد عن المطر .. دنا بعشق مطر إسكندرية
كنا بنقف أنا و يوسف نغنى تحته و نضحك
و بعدين ناخد إفلونزا ..زى ما يوسف كان بينطقها
المطر بتاع إسكندرية بيفكرنى بيه
يبقى ازاى أبعد عنه ؟؟
خالص حبى يا حبيبتى




وومن
الله يسلمك يا ميرا يا اميرة
بقى يا بنتى متاخديش اجازة من المدير الفقر بتاعك دا
و تضربيها صرمة
و تجيبى معاكى خطيبك و تتفسحولكم يوم
إعتبروها رحلة مع نقابة و لا رايحين زيارة و شموا نفسكوا شوسة بعيد عن ظغوط القاهرة و الشغل
فكرى كدا و لسه قدامنا وقت
ينكن
ينكن ينفع و لا حاجة
بوسة و حضونة يا حبيبتى





mohamed ghalia
شكرا ليك يا محمد
طب ما تجيب بطوط حبوب و تيجوا
عموما تابع التعليقات يمكن تلاقى حد من المدونين اللى تعرفهم جاى و يشجعك على المجى إنت كمان ...
خالص تحياتى ليك يا عزيزى

اول ما شفت العنوان فى الريدر عينى برقت وبوقى اتفتح شبرين وقلبى فضل يدق بعنف
ولما دخلت وقريت الميعاد اصبت باحباط ورغبه شديده فى البكاء
لانى مش هاقدر اقابلك الا يوم جمعه علشان شغلى
اجازتى الجمعه
وطبعا انتى مش هتغيرى الميعاد علشان فرد واحد
يااااااااااااارب انا نفسى اشوف فاتيما يسر لى امرى من عندك واجعل لى نصيب اشوفها
لو حصل نصيب هجيب معايا حروف
ولو تقدرى تخلى الميعاد اول جمعه فى ابريل يبقى كتر خيرك
حتى ربنا يكون فرجها على اختك الغلبانه هى كمان وقبضت
وحياه يوسف
فكرى فى الميعاد لانى متاكده انى هاكون سعيده لو شفتك
اللى خلانى لمسه السما من فرحتى وانا باكلمك فى التليفون هيكون حالى ازاى لما اشوفك
...........
):

بالله عليكى يافاتيما نفسى اشوفك


اقولك على حاجه غريبه؟
كنت باسمع اغنيه دايما بتفكرنى بيكى لانغام
اسمها اشهدى يااسكندريه
وعينى جت على الريدر وشفت الخبر
بجد
بجد بجد
انا بحبك ونفسى اشوفك واخد الحضن اللى انتى مديونه بيه لي

فكرى علشان خاطرى

يارب يوسف يجيلك يوم الجمعه او السبت

فكرتى؟

فكرى تانى

بالله عليكى

أشكرك جدا على الرد الاخت الجميلة فاتيما رفيقة الدرب في التخصص
وربنا يسهل ولا يكون هناك اختلاف أبدا وليس هناك ما يدعو لذلك، وسواء اتفقنا أو اختلفنا لكِ مني كل الود والحب والاحترام والتقدير.
وأشكرك على أمنياتك الطيبة لي ادعِ لنا.
ولقد قمت بالرد على رسالتك الرقيقة التي غمرتني بسعادة لا توصف.
أجمل وأرق تحية لكِ ولشخصك الكريم.
شيماء

انا من فتره نفسيتى تعبانه
ومحتاجه حاجه تفرحنى
يارب تكونى انتى سبب السعاده دى
يااااااااااااااااااااارب
ها؟
فكرتى؟
بالله عليكى بقى ولا لازم اعيط؟

عاشقة الرومانسية
من غير عياط يا بنتى
أصلو مينفعشى أول جمعة من أبريل
عارفة ليه ؟؟
عشان هيكون يوم المكتبة
هنتجمع برضو بس فى دار أيتام و جمعية خيرية عشان ندى قصص و مجلات للاطفال اللى الجمعية ساعدتهم ميبقوش اطفال شوراع و وفرتلهم التعليم و الرعاية
لو ينفع إنتى اللى تيجى مصر اليوم دا يبقى كويس
و لو منفعشى خلاص يبقى إن شاء الله تتعوض
و بعدين يوم التلات اللى بنتكلم عليه دا
ممكن لو معرفتيش تاخديه اجازة
أبقى تعالى بعد الشغل
و نقعد و لو ساعة حتى
و بعدين تبقى تروحى ...
معلش المعاد جه كدا لأن هنودة مسافرة يوم 27 و مكنش يناسب معاد تانى
سيبها على ربنا يا حبيبتى
و لو ربنا كاتبلنا نتقابل
هيحصل إن شاء الله و هتتسهل من عنده
و هتاخدى حضونتك كاملة
و بلاش عياط إتفقنا ؟؟؟






شيماء غسماعيل
شكرا ليكى يا عزيزتى
و فى إنتظار إستبيانك
و يشرفنى اكون مصدر إفادة و لو بقدر ضئيل على قد حالى فى موضوع رسالتك خصوصاً إنى ذات الجناحين
جناح فى المكتبات
و الجناح التانى فى التدوين
و يبقى عيب عليا قوى
لو بخلت باى شىء على السماء الواسعة و اللى بستمتع بالتحليق فيها كل يوم
بالجناحين دول
...
ربنا يوفقك إن شاء الله فى كل خطواتك
خالص تحياتى ليكى

عاااااااااا

لا بقى كدة بجد تبقوا عاملين عليا مؤامرة رسمى بجد بقى فعلا

انا همووت وارووح اسكندرية بقالى بتاع سنتين وشوية مشوفتهااش

وبجد فى الوقت دة بالذات نفسى اروحها

يابختكم

اة لو اعرف اهرب واااجى ..
بجد بجد كدة حراام بقى انتوا ناويين تموتونى .. ناقصة اسكندرية ..


والنبى يافاتيما تسلميلى على حنين القلب اوى اوى وتديها بوووسة كبيرة خاالص

اوعى تنسى وتقوليلها دى من موجهات..

وترجعى بالف سلااامة ياارب

واااااااااااااااااااااااااااء
وااااااااااااااااااااااااااء
عاااااااااااااااااااااااااااا

كده ها تتجمعوا وتشوفي البت العسل عاشقة الرومانسية
عااااااااااااااااااااااااااااا

حقد دفين
نظرة ماكرة
حاجب مرفوع والتاني نازل زي توفيق الدقن

ها اقرأ ياسين بنية انك تشوفي يوسف يوم السبت .. يارب تقبل

برضه تاني
عاااااااااااااااااااااااااااااا

يا شريرين
الثلاثاء محضرة الدراسات العليا يعني افلسع العيال .. مينفعش

تاني عااااااااااااااااااا

ربنا يارب يجعلها عليكي زيارة سعيدة ويوم هنا في هنا

واحضني البنت عاشقة الرومانسية واديها بوسة من ستيتة هدية

بحبك

أختي الحبيبة فطومه

سعيدة إنك هتيجي اسكندرية

ربنا يفرح قلبك ويهنيكي

ويارب تقدري تشوفي يوسف أو حتى تسمعي صوته

فكرة السفر رائعة والجو عندنا دلوقتي تحفه وخصوصا فترة النهار

تغيير المكان ورتم الحياة بيعمل تجديد للنفسية وبيغسل القلب من الأحزان وخصوصا لما تقابلي أصدقاء ليكي بتحبيهم وبيحبوكي لله وفي الله

لو هتقعدي أكتر من يوم عرفيني نتقابل في اسكندرية ونروح نادي أكاسيا ونادي نقابة المهندسين ولو تحبي كمان تجيبي أصحابك أهلا بيهم

دي مش عزومة مراكبية زي مابيتقال على الاسكندرانيين دي من قلبي والله

إيميلي هو

eegychamp@hotmail.com

خالص مودتي وتحياتي

وانا طيب :((((

:(((

هتشوفى كل دول وانا لا :((

وهنودة كمان :(((

سلمولى على بعض كتير :(

مش كنتي قلتي من زمنات يا فطومة يا قمرية على الموضوع ده على العموم ربنا يسعد اوقاتكم وتتعوض باذن الله مرية اخرية

ازيك يا طمطم
وحشانى جدا يارب تكونى بخير يا عاشقة اسكندرية
يعنى انا عايزة افهم انتى اصحابك بس فى اسكندرية
مفيش حد فى بورسعيد
ولا انتى بتتقلى علينا ؟

انا كنت عايزة نعمل يوم عندنا فى 27/3
لذوى الاحتياجات الخاصة ؟
عموما تروحى وترجعى بالسلامة وسلمى لى على كل شبر فى اسكندرية وبوسى لى لماضة وسمكة وحنين وكل اللى هناك

كل سنة وانتى طيبة
يا

أغلى
وأحن
وأطيب
وألذ

أم

ربنا يفرح قلبك
ورحلة سعيدة
سلامى للماضة

هبة

اه يا مامتي انا عايشه ف السعودية للاسف

تروحي وتيجي بالسلامه

اسكندرية حتنور يوم الثلاث
و ان شاء الله يكون يوسف معاكي
و لو علي البحر
حافظه شبر شبر
من ابوقير لبحري

دعاء مواجهات
بلاش العاااااااااا دى يا حبيبتى
و النبى من غير زعل
المعاد إتحدد كدا طوارىء
لو تعرفى تاخدي اجازة و تفلفصى ...
تعالى ....
أسلملك على حنين القلب ؟!!!
دنا أهريها سلامات و حضونات يا بنتى
هيا من الناس اللى متشجعة أروح عشانهم لأنى عارفة إن نزولها مصر شبه مستحيل و بالتالى مصر هيا اللى تروحلها أسهل ....
الله يسلمك يا حبيبتى و متحرمشى منك





ستيته حسب الله الحمش
ضحكتينى قوى من الحقد الدفين و النظرة الماكرة بتاعة توفيق الدقن دى ...
أضحك الله سنك دايما يا ستيته
ربنا يخليكى و يستجيب لدعائك و نيتك
إنتى بتحاضرى فى الجامعة ؟؟؟
دحنا بنعرف ناس هايلة قوى كدا
متقلقيش يا ستى
لو جت عاشقة الرومانسية هديها الحضن بتاعك اول حاجة
خالص حبى ليكى يا حبيبتى





elmasrea moslema lellah
جزاك الله خيرا يا مسلمة
و متشكرة قوى على الشهامة و واجب الضيافة الإسكندرانى الجميل دا
و مش غريب على اهلها ...
على فكرة أنا عشت فى إسكندرية ست سنين و عارفة إنها فى الشتا احلى من الصيف و فى البرد احلى من الحر و من غير مصيفين احلى بالمصيفين ...
للأسف مش هعقد اكتر من يوم واحد لأن خالتى ما زالت مقيمة عندنا لفترة النقاهة بعد خروجها من المستشفى
فمينفعشى أسيبها مع ماما يومين كاملين
بحالهم
مسيرها تتعوض
و لو معادنا و مكاننا هيكون مناسب
يا ريت تبقى تحاولى تيجى و تنورينا
خالص حبى ليكى





كفاية طيبة
يا حبيبتى منتى اللى طفشانة فى قطر
نعمل إيه بس
اوعدك لما تنزلى اجازة يكون فيه معاد مناسب نتقابل كلنا فيه
هسلملك على هنودة اكيد
و زمانها بتقرى تعليقك دلوقتى
خالص حبى ليكى يا حبيبتى






قلب ينبض بالحب
محنا من زمنات أهو يا بدورة
ادينى بوقل من قبلها بأسبوع أهو
عشان تلحقوا تحضروا حالكم
فكرى و شوفى كدا إيه النظام
هيسعدنى مجييك اكيد
خالص حبى يا حبيبتى و سلامى لبوس بوس






نهر الحب
ازيك إنتى يا أنوس
و الله نفسى اجيلكم
بس عشان خاطرى خلى المعاد فى أول مايو
عشان كدا شهر تلاتة جاب آخره
و عندنا يوم المكتبة فى اول جمعة من إبريل ...
خلى معادك فى اول مايو نكون شمينا نفسنا و بقى معانا ميزانية للحضور
خالص حبى ليكى و لنسمة و لكل اهل بورسعيد الجميلة





doba
و إنتى كمان طيبة يا اجمل الامهات
و اجدعهم
طبعا هسلم على لماضة كتير
و هديها حضن مخصوص منك
بوسيلى يسوفة العسل يا ميس







mony elshreef
فى السعودية ؟!!
ترجعى بالسلامة يا حبيبتى
و ملحوقة لما تنزلى أجازة إن شاء الله
خالص حبى ليكى




ta3ban
إسكندرية منورة باهلها
يااااااه ... يبقى يوسف معايا ؟!!
دنت متفائل قوى
دنا بقول يا رب يكلمنى او حتى ييجى ساعتين و يمشى ...
و الله مش بعيد على ربنا أى حاجة
تابع بقى التعليقات عشان تعرف مين اللى جاى من المدونين الرجالة عشان متبقاش فردانى و بطولك وسطنا و نسببلك أى أحراج و لا حاجة
خالص تحياتى و ودى

ده أول مرور ليا على المدونة وشدنى العنوان ..

أصل وحشتنى اسكندرية اوى ..:(

شكلى هاحقد انا كمان من حقد بتاع ستوتة ..

تروحى وترجعى بالسلامة ..

وانا متاكدة انك هاتتبسطى ان شاء الله ..

ونصيحة للمكان لو عايزة تشوفى البحر على طول وقاعدة ظريفة عليكى وعلى نادى المهندسين ..

التذكرة باربعة جنيه وقاعدة جميلة ..

ولا بقى لو بحرى وتروحوا عند عزة قصاد المراكب والحتة الحلوة دى ..

بس عيبها ممكن تلاقى حد من البلكونة بيقولك عندك حق .. وتلاقى البياع خد حتة من اللى بتاكليه كده يعينى .. D:

ان شاء الله هامر باستمرار هنا ..

والبوست اللى فات بجد يقطع القلب ..

ربنا يكون فى عون حبيبة صاحبتك ..

ما تنسيش تحكيلنا على الزيارة ..

دمتِ بخير ..

بجد يا فاتيما حتنوري اسكندرية,و بجد بجد أنا نفسي أشوفك قوي..يا ريت تقولي لي على المعاد و المكان و لو ممكن تبعتي لي رقم الموبايل عشان أكلمك اذا قدرت أجي و ان شاء الله حاجي.كل سنة و انت طيبة يا فاتيما يا مامت يوسف

انا جاااااااااااااااى

ان شاء الله انا جايه علشان اشوفك يا روحى
ومبسوووووووطه وهفضل احلم بيوم التلات من النهارده

موووووووووه لحد ما اشوفك يا حبيبتى

يافاتيما
يافاتيما
تصدقى؟
ان شاء الله هتصدقى
ههههه
انا جااااايه وهانشوفك ياشابه
فرحااااااااااااانه موت
وقلبى بيرقص
ونفسى احضنك جااااااامد وابوسك كتيييير
سبحان الله الحب ده ولسه مش شفتك
لما اشوفك هيحصل ايه؟
هروح معاكى على القاهره؟
هههههههههههههههه
فرجت ياقمر
وهاشوفك
اوعى بقى تنسى النسخه بتاعتى من الكتاب اللى عليها توقيعك
زى ما قلتيلى


لو خلصت النسخ اللى عندك عادى ومش هزعل كفايه عليا اشوفك
نفسى اشوف ستيته كمان هى وكيارا

بحبك يااجمل ام

كل سنه وانتى حبيبتى طيبه وبخير
ويكون يوسف فى حضنك
عايزه اشوف صورته بقى؟
يمكن اغير رأيى واسيب عفروتو ابن ستيته واتجوزه

بحبـــــــــك جــــدا

يا ريت تبلغوني ولو في كومنت او ميل او عن طريق لماضه

فاتيما الجميلة روح قلب ماما

اولا كل سنة وانتى طيبة
ثانيا تروحي وتيجي بالف سلامة
ثالثا
خدي بالك من موضوع الدكتورة شيماء اسماعيل دا صدقينى هيعجبك اوي
انا مجرب قبلك
وكمان الاسئلة دي هتلخيكي تاخدي بالك من حاجات فى مدونتك انتى ممكن متكونيش مش واخدة بالك من منها

تحياتى
وابقى سلميلى على اسكندرية اصل قلبى هناك
انتى فاهمة بقي


تحياتى

كريم بهي

اولا : كل سنة و انتى اطيب ام و احن ام و اشجع ام فى الدنيا

ثانيا : تروحى و ترجعى بالسلامة ان شاء الله و تكون رحلة سعيدة

ثالثا : عاااااااا نفسى اجى معاكى لانى باعشق اسكندرية و نفسى اشوف كمان البنوتات الحلوين دول .. خصوصا حنين القلب اللى عاملة فرح انها هتشوفك
بس التلات صعب جدا .. بس هحاول
و لو نفع التهرب من العفاريت التلاتة هبعت لكى ايميلى يوم الاحد بالليل
ادعى لى ينفع

مووووووواه
سلام

السلام عليكم
تروحي وتيجي بالف سلامة
رغم كل اللي كتبتيه في تدويناتك الاخيرة برضه احبك جدا وبشدة في الله
ربنا يريح قلبك ويهدي بالك ويقر عينك بيوسف وبزوج يتقي الله فيكم يارب العالمين
وبشر الصابرين

هههههههههه
ههههههه
ده كلام برده
انا لسه راجع من اسكندرية الساعة 1 صباحا،تقولى هنروح اسكندرية تانى
ده كلام يا جدعان
بس بجد اسكندرية تحفة والبحر شكله يجنن
انا قعدت فى الشمس اكتر من 9 ساعات لحد مارجعت شيكولاته سودانى
بصى يا ستى بما انك قررتى انك تروحى اسكندرية وحددتى يوم الثلاثاء
احب اقولك انى ....
جااااااااى وامرى لله
اما موضوع حنين القلب ولماضة يجمعوا مكان يبقى انسى يا عمرو دول محسوبين على سكان اسكندرية غلط دول اخرهم نهاية الشارع اللى هم سكانين فيه
ههههههه
بالنسبة للمكان لو عايزة المكان اللى تجمعنا فيه المرة اللى فاتت ما فيش مشكلة
لو عايزين مكان على البحر
فيه اماكن فى العصافرةوسيدى بشر كتير حلوة
قررى انتم عايزين ايه وانا اجيبلكم بدل المكان اتنين

يشرفنى ان ادعوك لحضور حفل توقيع أول كتاب لى فى عالم الادب " لست الا بعض الاوراق" والذى يقام باذن الله يوم الاحد 5 ابريل 2009

المكان : مكتبة ديوان بمصر الجديدة
العنوان : 105 شارع ابو بكر الصديق مصر الجديدة – مقابل نادى ضباط الجلاء بمصر الجديدة
التاريخ : الاحد 5 ابريل 2009
الميعاد : 7 مساءا

فى انتظار تشريفك

همس الاحباب

يا ربنااااااااااااا
اروح منه فين ده يا ربى

فاتيما
بصى بقى من اولها كده
خاااااااااالد ده لو جاى انا مش جايه
وانا اخرى الشارع اللى انا ساكنه فيه
ماشى يا خالد
نصيحه مش تيجى احسنلك
مش انت بتقول كنت هنا امبارح طبعا وانا اقول البلد كانت مضلمه ليه
و9 ساعات فى الشمس ليه؟؟
بيحمصوك

مش ليك دعوة واحنا هنرتب امورنا
مااااااااااااااااااشى

حنين القلب
هههههه هههههه
دى الحقيقة المرة انك اخرك الشارع اللى انتى ساكنة فيه
انكرى كده
ثانيا اسكندرية كانت منورة بوجودى والبحر كان بيضحك والسماء كانت صافية والنور مقطعش ولا دقيقة
ولو حتى قطع انا كنت هنور برده
اكيد عيب عندك انتى واحتمال كبير يكون عندك عشى ليلى
ثالثا: طبعا انا جاااااااااى علشان خاطر ام يوسف
ورينى شطارتك وهتنظمى امورك ازاى
بعد اذنك يا ام يوسف اناعايز اشوفها اتعمل ايه
بس خليكى شاهدةلو ما طلعتش قد كلمتها هنعمل ايه ؟؟؟
انا راضى بحكمك
وشكلى كده هنقطع وهنبيع والكيلو من ده هيبقى يوم الثلاثاء بقرشين
حد قال هااااات .

لجين أبو الدهب
نورتى المدونة فى اول مرور
و الحكاية مش طالبة حقد
و النبى يا جماعة
متبصولناش فى الخروجة دى
دحنا رايحين نشوف الحبايب و نرجع طوالى
إقتراحك طبعا ممتاز ...
بس يتهيألى لازم يكون معانا مهندس عشان ندخل بالكارنيه بتاعه ...
أما نشوف المكان هيرسى على إيه
شكرا ليكى على إقتراحاتك
قصة حبيبة واقعية ...
و صاحبتى دى تبقى أنا ...
التفاصيل بتاعة إسكندرية اكيد هحكيها لما نرجع لو ربنا مد فى عمرنا
خالص تحياتى و اهلا بيكى دايما




dahlia
إنتى فى إسكندرية يا داليا ؟!!!
طب هايل
تابعى البوست و التعليقات اللى فيه اول بأول لحد ما نرسى على المكان و تعرفيه ...
إن شاء الله نتقابل على خير
و كل سنة و إنتى طيبة يا ام يحيى




حنين القلب
يا حنونة ازيك يا حبيبتى و أنا اللى فرحانة اكتر منك إنى جاية أشوفك ...
لأنى عارفة إن نزولك القاهرة مش سهل
و بعيييييين روقى الانانى إنتى و خالد
و بطلوا شكل ...
دحنا لسه ماجيناااااااااااااش
ياعيال ...
و بعدين حد يزعل من خالد
دنا أخونا الأمير الطيب ...
دنا كنت هزعل قوى لو مكنش قال أنا جاى ...
خليها عليكى و معلشى بقى
بوسة و حضونة كبيرة دلوقتى مؤقتاً لحد ما أجى بنفسى يا حنونتى
أمووووا أنا كمان






عاشقة الرومانسية
مش فولتلك يا دودو ؟؟!!!
سيبها على ربنا و هتتسهل لوحدها إن شاء الله ...
بخصوص النسخة حاضر هجيبها معايا ...
معرفش كيارا هتقدر تيجى و لا إيه ؟؟
ربنا يسهل و ظروفها تساعد
ربنا يهدلكوا الاحوال دايما
كل سنة و إنتى اللى تفضلى علطول طيبة كدا
و السنة الجاية تبقى فى إنتظار النونو
و تنضمى لسلاسل الامهات يا رب
و هجيب صورة يوسف حاضر ...
بس خلى بالك
دا مقرى فاتحته على ييجى تلاتة أربعة قبلك ...
و العينة بينة من أولها اهو






بنت القمر
حاضر يا امانى
إن شاء الله نسيب تعليق عندك
و إنتى كمان إبقى طلى علينا
و شوفى وصلنا لإيه ...
متشوقة أشوفك و أسلم عليكى
أشوفك على خير بإذن الله




كريم بهى
كل سنة و إنت بألف خير يا كريم و الوالدة بخير إن شاء الله
و الله يسلم عمرك يا رب
متوصنيش على شيماء إسماعيل دحنا طلعنا خريجين قسم واحد و كلية واحدة و الدكتورة اللى بتشرف على رسالتها ممن أدين لهم بالولاء و اتشرف بإنهم درسونى ...و ربنا يوفقها إن شاء الله
و قلبك فى إسكندرية ؟؟!!!
تقصد إيه ؟؟
مش فاهمة خااااااالص يعنى ....
هاه
لأ فاهمة بس بغلس عليك
طيب يا سيدى نسلملك على إسكندرية
فكرتنى ببيت شعر يتقال فى المناسبة دى و يبقى لايق عليك ...

امر على الديار ديار ليلى
أقبل ذا الجدار و ذا الجدارا
و ما حب الديار شغفن قلبى
و لكن حب من سكن الديارا
....
خلاص نسلملك على الديار ..
قصدى أسكندرية لخاطر قلبك يا كريم
خالص تحياتى ليك




قوس قزح
كل سنة و إنتى اللى طيبة يا حبيبتى
يا وش الخير كله
يا رب ينفع و تيجى
و يسهلهالك يا رب ..
هنتظر إيميل المجى
بوسة و حضونة يا دوللى




عاشقة النقاب
و عليكم السلام يا نونو
و يا رب يحبك من احببتنى فيه
و يكرمك من اوسع باب يا اكبر قلب
متحرمشى منك ابداً يا حبيبتى




همس الاحياب
يا خالوووود
لو كنت قولت مش جاى
كنت هنكبس كبسة جامدة
انا قاعدة مستنية تعليقك دا متتصورش إزاى ...
أصل الواحد لما يسافر و لو فى حتة قريبة و يبقى عارف و مطمن إن اخوه هيبقى موجود بيبقى حاسس بلأمان و الراحة و مش شايل هم حاجة
اما بخصوص المكان فبلاش العصافرة عشان ليا فيها ذكريات و ممكن أنكد عليكم بسببها ...
و كمان بعيدة قوى فى آخر البلد
خلينا فى النص ...
سيدى بشر فيها مكان إيه اللى تقصده يا خالد
أكتب إسم النادى او الكافيتريا او البلاج عشان اكتبه فى تحديث البوست و الكل يبقى عارفه و يروح عليه علطول
و بعيييييييييين بلاش مناكفة فى حنين القلب يا واد
طب إستنى لما نروح هناك
لحسن تتقمص و تغضب و تقول مش جاية
و لو إنى عارفة إنها مش هتعملها
بس برضو ...حبوا بعض يا عيال
و بلاش شقاوات على رأى يوسف
فى إنتظار ردك يا اخى الغالى




sherif
الأستاذ الغالى شريف
إن شاء الله جاية لو ربنا أراد
يشرفنى إنك تدعونى للحضور و التواجد مع حضرتك فى يوم جميل و مهم زى دا
و عقبال ما تبقى أيامك كلها نجاح
و إنجاز و دائما تحاط قلوب بتحبك و محظوظة بمعرفتك زينا
ألف مبروك مقدما على نجاح اليوم

بجد فرحت قوي يا فاتيما
قريت البوست امبارح قبل ما أنام و ماعرفتش أنام من الفرحة


أنامتحمسة جدا .. حاحاول اكلم لماضة و أتفق معها على مكان يكون مناسب
بجد سعيدة إني حاشوفكم اخييييرا

تسلم ايدك بجد

hanooda
يا حبيبتى و انا فرحانة اكتر منك و الله
يلا فننونلنا إنتى و لماضة فى مكان كويس
بس و حياتك يا هنودتى يبقى نشوف منه البحر و لو من بعيد ...
و متكونش ميزانيته فظيعة قوى عشان ينفع نقعد فيه كتير من غير تكاليف جامدة قوى برضو
معلشى بغلس فى النقطة دى بس اكمن اختكو من أرباب المعاشات يعنى
و كمان عاوزين فى القعدة و الطلبات نبقى نمشيها إنجليزى و ميبقاش فينا من زعل ...
ماشى ؟؟
بوسة و حضونة يا حبيبتى

سيدتي
يسعد مساك
"الامازيغ بين التاريخ و الحاضر"
في انتظارك
مودتي

سلميلي عليهم كلهم نفر نفر ونفراية نفراية وسلميلي على إسكندرية كمان اللي أنا بحبها جدا وبقالي سنين طويلة ما زرتهاش

أنا شفت إسكندراني قوي في قطر يوم الإثنين اللي فات وعزمني في مطعم عالبحر شبه إسكندرية بالظبط .. كان ناقص بس يعدي تاكسي أصفر في أسود .. هههه

إوعي تنسي تبلغيهم تحياتي

إزيك يا طمطم
أخبارك ايه يا حبيبتى ؟
كل سنة وانتى طيبة وبألف خير يارب يا أجمل واحن ام فى الدنيا
ربنا يفرحك بعيد الام السنة دى بوجود يوسف جنبك يااااااااااااااااااااااارب

بالنسبة للبوست طبعا مش هخفى حقدى الدفين ههههههههه بس هعمل ايه بقى ربنا يجمعكم على خير ويسعد اوقاتكم يارب

كل سنة وانتى طيبة يا قمر

كل ثانيه
وكل أم
مثل فاطمه
مثل فاتيما
مثل أم يوسف
وهم فى رعاية الله
وهم من أحباء محمد عليه الصلاة والسلام
وهم جنة الله على الارض
وهم فى عزه
وهم مكللين بتقدير أولادهم
=========================
الله تعالى
محمد رسول الله صلى الله عليه وسلم
ثم أمى رحمها الله
======================
كل أم مثلك يا من تحملين
أغلى أسم عندى
فى بؤبؤة العين
فى أعماق القلب
فى كل خليه من جسدى
مكانكم لايدنو منه مكان
وحبكم لامثيل له
حبكم لاينقطع
مهما بعدت المسافات
مهما أختلفت الاماكن
مهما كنتم ,أينما كنتم
لكى يا سمية أمى ونيابة عن أمى أقول لك
كل سنه وأنتى فى رعاية الله

امانه امانه امانه
انا مامنهالك ومامنها لهنوووده

سلامي ليكم ولكل اللي حيجي اللقاء التحفه ده

ان شاء الله وقت سعيد ويكون احسن من المره اللي فاتت رغم ان ذكريات المره اللي فاتت لااااااااااااااا تنسى ابدا

لكم مني التحيه مره اخرى

ASSAFO ANAROZE
يسعد مساءاك و صباحك يا أسافو
طبعا جاية أشوف الموضوع
تحياتى و خالص ودى








يا مراكبى
إيه يعنى ... يعنى
نظام بتقول ميهمناش و كدا
عندنا حاجة شبه إسكندرية !!!
مينفعشى يا نبع الحكمة ...
دى مفيش حاجة شبهها
مسيرك مرة تكون فى مصر اجازة و نشد الرحال كلنا على الجميلة إسكندرية
هسلملك عليهم طبعااااا
و لو إن سلامك سبقنى خلاص
خالص ودى ليك و لفادى و مامته






حاجات جوايا
أزيك إنتى يا سالى
بقولك يا بنتى ...
متجيبى الواد دودو و تيجى الخروجة دى
و إلا إنتى سكتك بعيدة ؟؟؟
طب لو مش نافع ...خلاص
احقدى براحتك مش هالومك
كل سنة و إنتى بالف خير يا حبيبتى
و طيبة زى مانتى و اكتر طيابة
متحرمشى منك أبدا







MOHAMED
الله يكرمك يا أستاذ محمد
و كل سنة و إنت ف وسطينا
و مبجييش منك زى ما تعودنا
غير كل الخير دايما ...
ربنا يوصل فى عمرك و يعلى مقام الوالدة فى الجنة بدعواتك ليها و أعمالك الصالحة بأسمها ....
أنا بتشرف إنى احمل أسم هذه الام الغالية ...
و ربنا ما يحرمنى من كلماتك الطيبة





إسكندرانى أوى
يا باشمهندس من غير ما توصينى و لا حاجة
إنت فى بالنا من قبل كتابة البوست
و كتبت أسمك لأنك مينفعش منفتكركش ...
الزيارة السابقة كانت جميلة
و طبعت فى الروح علامة لا تمحى ...
إن شاء الله المرة الجاية اللى نحدد فيها معاد تبقى حضرتك اللى مرتبه بنفسك
و واقف تستنانا هناك اول واحد ...
ترجع بألف سلامة
و هسلملك على إسكندرية
بس كدا ؟؟!!
من عينيا

نفسى اكون اول واحده تشوفك وتستناكى على المحطه يافاتيما
بس ده مش هيحصل للاسف
):
لانى اول مره هاقابلك فيها ومش اعرف شكلك ايه؟
تعرفى انى فرحانه باللقاء ده جداااااااا
رغم انى ما اعرفش حد فيه غيرك ولو جت معايا حروف بس
والوحيده اللى دخلت مدونتها من الناس اللى ذكرتيهم هى لماضه
بس ان شاء الله تكون معرفة خير


اه
نسيت اقولك









بحــــــــــبك مـــــوت

طمطم :(
مش هينفع
فجاة كده جوزى لازم يسافر بكرة و يرجع الاربع
و طبعا صعب انى اسافر و هو مش موجود فى مصر

بس انا عرفت ان خالد مسافر
هبقى اكلمك على تليفونه ان شاء الله علشان اسلم عليكى و على الموجودين


كل سنة و انتى طيبة
يارب يكون اللى فى بالى حصل النهارده و ربنا رضا قلبك

يوم الثلاثاء 24 حاسس ان كل الناس محوشه كل المناسبات تتعمل فيه

:)

يا ليتني كنت معهم

متعوضه يأم يوسف

:)
ونشوفكم على خير ان شاء الله

تروحى وتيجى بالسلامة ياقمر
وكل سنه وانتى طيبه وبالف صحة وسلامة
تحياتى لكى ياقمر

لاللالالالا!!!!!!
بجد دي بقي عزومه مركبيه
ليه كده بس يا فاتيما
مش كنتي تقولي من قبلها كنت عملت حسابي
والله نفسي اشوفك مووووووووووت
انتي هتيجي لحد اسكندريه وكل الناس الجميله دي طب قولي ابعتيلي حتي تعليق في المدونه
انا كنت دخلت انهارده صدفه اقلك
كل سنه وانتي طيبه
الاقي الخبر ده
بدل ما كنت هبقي فرحانه جدااا
بجد انا زعلانه في اسباب كتير مش هعرف
بس عارفه هحاول هحاول اجي ليه كده بس
انا عايزه اشوفك والله ونفسي بجد
ده انا اللي اجي لحد عندك القاهره
ينهار ابيض
قدر الله وماشاء فعل ان شاء الله هتتعوض
بس كان نفسي اعرف من قبلها مش صدفه كده زعلاااااااااااااانه
عوما اكيد هشوفك وهتتعوض ان شاء الله

ازيك يا قمر
كل عيد ام وانتى احلى ام
ربنا يبارك فيكى ويبارك فى يوسف يا ام يوسف

كل ثانية وانتى بخير يا قمر

السلام عليكم

جيت اقولك كل سنه وانتى طيبه يا ام يوسف و يا احلى و احن ماما ..
و يارب يكون يوسف قالك كل سنه وانتى طيبه و ربنا يجمعك به قريب على خير حبيبتى ..
فوجئت بأنك حتنورينا فى اسكندريه
و رغم انى مش مدعوه و تقريبا معظم اللى حيجوا معرفهمش الا انى باتمنى احضر و اشوفك و كمان اشوف المدونين لانى عمرى ما حضرت اى اجتماع لهم
لكن ميعاد الثلاث ده مع الاسف صعب جدا
لكن اكيد لو سمحتى لى حاحاول و لو ما اقدرتش حأكون معاكم بقلبى و اتمنى انكم تقضوا وقت سعيد و تتجمعوا على خير و بالف سلامه
دمتى ام حنونه و دمتى بكل الخير

تحياتى

فاتيما
انتى بخير؟
قلقانه عليكى مش عارفه ليه

ربنا يريح قلبك ويكون اللى بتتمنيه حصل

ياااااااااريت كان ينفع
السكة بعيدة أوووووووووى
دمياط .........> إسكندرية
مشوار واعر جوى يا بوووووى
ههههههههههههه
اعملوها انتوا بقى وتعالوا وخليكوا حلوين كده
ان شا الله تيجوا راس البر فى الصيف
تعالوا صيفوا اسبوع كده فى شهر 7 عشان تحضروا فرح اختى بالمرة ياااااااااريت والله بجد
فكرى كده
ربنا يسهلها ان شاء الله


كل سنة وانتى طيبة يا قمر
انا حاسه أنه محصلش
صح
معلش يا قمر تتعوض قريب ان شاء الله
هاتى بوسة بقى
أموووووووه

لعل ةعسي يا فاتيما أعرف آجي
إن احيانا المولى عز وجل
بس يعني لازم عشرة الصبح؟.
واللي عنده شغل من9ل 4.30 يعمل ايه؟
معنديش أجازات أحنا بناخد أجازات في الشركة دي بخلع الضرس والوش الجبس
اعمل ايه طيب؟ اني ولماضة وقوس قزح
وشلة البنانيت الجدعان كلهم ومعرفش اشوفكم
طب بقى فرمان لازم اللقاء يبقى من الساعة 3حتى يبقى بعد الظهر
واللي مسافرة متأجر تجيب معاها حد كبير
حراااااااااااااااااااام
حعيط
شوفي صرفة يا فاطومة ...
طب دا أنا كمان ممكن كنت جبت القطة لولو اللقاء معايا
ينفع بقى كده....
بحب قوى وبحبكم كلكم
في حفظ الرحمن

حضرتك صاحبة القصة !!

انا يمكن علشان لسه متابعة المدونة فكنت مش عارفة متعلقة بمين ..

انا ما كنتش اعرف والله ..

انا اسفة لو كنت استغبيت ..

بس بجد من ساعة ما عرفت وانا بدعيلك وامبارح دعيتلك كتير فى القيام ..

بجد مش قادرة اقولك حاجة غير انك ست عظيمة وكان نفسى اكون فى اسكندرية علشان اقابلك ..

وسعيدة جدا انى اتعرفت عليكى ..

عاشقة الرومانسية
يا حبيبتى و لا يهمك ...
خلصى أشغالك و تعاليلانا على النادى طوالى ...
و إنتى مستقبلانى من قبل ما آجى أهو
انا كمان فرحانة قوى إنى هشوفك
و اهلاً بحروف تنور الدنيا و لو إن إسكندرية منورة جاهزة
لما تتعرفى على باقى المجموعة هتنبسطى جداً إن شاء الله
لأنك هتلاقى نفسك معجبة بيهم طبيعى
و لما تروحى هتعقدى تدورى على لينكات مدوناتهم عشان تقريلهم و تتابعيهم من الآن فصاعدا ....
أشوفك على ألف خير يا حبيبتى يوم التلات إن شاء الله
بوسة و حضونات ...
و للأسف محصلشى ...بس معلش




قوس قزح
يا ألف خسارة يا دوللى
كان نفسى تيجى قوى ....
بس معلش ...اللى هيصبرنى إن هشوفك إن شاء الله فى يوم المكتبة الأسبوع اللى بعده ....
بوسيلى العيال و إحضنيهمولى قوى قوى
ربنا كبير يا حبيبتى و كل شىء بأوانه هوه ...




دكتور حر
إيه يعنى ...بتفلفص مننا
و مش جاى ؟!!!
عموماً إنت ليك عذرك
إنت راجل على وش جواز
و ربنا يتولاك برحمته و مش هنبقى إحنا
و الزمن عليك
بهزر طبعاً
ربنا يسعد أيامك و إبقى فى مرة كدا هات العروسة تحضر لقاء معانا عشان نقعد نحرضها عليك ...
مش بهزر المرة دى
هاه




رئيسة حزب الاحلام
كان نفسى تيجى يا لولى
بس عارفة إن المشواير البعيدة دى صعبة بالنسبالك
نفسك هيكون معانا
و كل سنة و إنتى جميلة و طيبة و رقيقة كدا زى مانتى





سمكه واحده
يا سموكه براحة
واحدة واحدة كدا عليا
يا حبيبتى لو بصيتى لتاريخ كتابة البوست هتلاقيه يوم 17 مارس ..
يعنى قبل المعاد بإسبوع تقريباً ...
معلش حصل خير
و إنتى خلاص عارفة المكان و هتلاقينا فيه من عشرة الصبح و نمرة موبايل هنودة موجودة فى البوست بتاعها ...
شوفى ظروفك إيه و تعالى إقعدى إن شالله ساعة و روحى تانى ...
وفقى ظروفك و ربنا إن شاء الله يسهلها
و لو مقدرتيش متزعليش
و خيرها فى غيرها
خالص حبى يا سموكتى





نهر الحب
و إنتى طيبة و بألف خير يا إنوس
ربنا ما يحرمنى منك يا حبيبتى
أبدا




rovy
و إنتى يا رب دايما طيبة و بألف خير يا روفى
يا بنتى طب فيه إيه ؟؟!!!
منتى من الناس المعزومة ...مش إنتى مدونة و حبيبة لقلبنا و كمان من إسكندرية ؟...
يا بنات أعذرونى لأنى مش بكتب كل الأسامى ...الألزهماير بقى
و بعدين ساعات مبخدش بالى من اماكن بعض الاحباب ...سامحونى
يا حبيبتى إنتى خلاص عرفتى المكان و المعاد ...
و بعدين إنتى تعرفينى أهو ...
و لما تيجى إن شاء الله هتتعرفى على الصحبة الجميلة دى و اوعدك إنك لن تندمى لن كلهم ناس محترمة و متميزة ...
لو منفعشى ...
خلاص يا حبيبتى
اوعدك المعاد الجاى يكون أنسب للغالبية
سلميلى على هدى قوى





حاجات جوايا
و حياتك يا سالى لأعملها
بس إستنى شوية كدا لما نخلص باقى المشاوير و المشاريع بتاعة الشهرين الجايين ...
و ألف مبروك لاختك ...عقبال دودو يا رب
إحساسك فى محله يا سالى
إنتى كمان خدى بوسة و حضونااااااااات





ست البيت
يا مروة إنا حرصت اكتب إسمك أهو لحسن تفتكرى إننا ناسينك ...
بصى بخصوص المعاد ...
إنتى خلصى شغلك و كلمينا فى الموبايل بتاع هنودة اللى فى البوست بتاعها
و شوفى غحنا لسه قدامنا وقت أد إيه ..
لو تلحقى تعدى علينا نشوفك و نسلم عليكى
يبقى ربنا بيحبنا ...
لو مش هتلحقى و هيكون صعب عليكى
يبقى معلشى بقى و تتعوض إن شاء الله
أنا عارفة إن معاد وسك الاسبوع دا صعب قوى ...
بس هيا جت كدا معلش
إحنا هنقعد لحد أربعة خمسة تقريباً
ربنا يسهلها إن شاء الله يا حبيبتى
خالص حبى ليكى و بوسيلى القطقوطة





لجين أبو الدهب
و لا يهمك يا لجين ...
مجراش حاجة ابداً ...
و عزومة إسكندرية تتعوض إن شاء الله
إحنا بنعمل لقاءات كتير فى الخير هنا فى القاهرة و أقربها يوم المكتبة و لو جيتى هنا دايما هتعرفى التفاصيل قبلها إن شاء الله
شكراً على ذوقك و كلامك الطيب عنى و دعائك كمان ...
خالص حبى ليكى و نورتى

فاتيما
طمطم
كل سنة و إنت طبة يا أجمل و أحن أم حسيت بيها و عرفتها في الدنيا

أنا آسفة اني اتأخرت عليكي

يارب يسعد قلبك و يسعدنا معاكي بيوسف حبيب قلبي

كل سنة وانتي طيبة ويوسف بخير وربنا يطمنك عليه وتسمعي صوته وتشوفيه قريب يارب قولي امين

كنj عايز أعرف تفاصيل اكثر عن اللقاء الجميل ده يعني مين من المدونيين الرجال حيكون موجود إن شاء الله لأني شايف لحد دلوقتي الموضوع مغلق علي المدونات فقط
والسفر حيبقي بالقطر ولا بأيه والساعة كام علشان نعرف نحجز ولا نعمل ايه والرجوع حيبقي امتي ولا كل واحد مع نفسه يسافر وهناك نتقابل

هو اللقاء هناك الساعة 10 امال الي حيسافر من القاهرة يتحرك الساعة كام 5 الصبح!!!!!!!!!!


انا احتمال اسافر علشان أزور مريض يعني ممكن احضر معاكوا اللقاء وفي النص اروح ازور الراجل وارجعلكوا تاني بس عايز تفاصيل اكثر
أنا لسه مقررتش السفر لما اروح بكرة الشغل واشوف ايه النظام لو لقيت الجو نايم ومفيش شغل يبقي إن شاء الله حسافر معاكوا وده اميلي ياريت تبعتيلي التفاصيل twfeek@hotmail.com

hanooda
و إنتى طيبة يا حبيبتى
و مش متأخرة و لا حاجة خالص
أشوفك على ألف خير بعد بكرة إنتى و كل الصحبة الحلوة اللى معاكى




جعلونى مريضا نفسياً
اهلا بيك يا هشام و كل سنة و إنت كمان طيب ...
المشوار مش للعنصر الحريمى بس المدونون مرحب بهم طبعاً ....
اللى متاكدة من حضوره من مصر خالد همس الاحباب ...
و من إسكندرية غالباً ta3ban جاى هوه كمان ....
إنتا عارف المعاد و المكان أهو ...
و ممكن تنسق مع خالد همس الاحباب لو عايز و دا رابط مدونته و حطله تعليقات لكل ما تريد أن تسأل عنه
نشوفك على خير إن شاء الله
http://hams07.blogspot.com/
سلام

ياسيدى يا سيدى على الفسح اللى من ورايا


يارب ديما تتجمعو فى الخير

كان نفسى ابقى معاكم

وتروحى وتيجى بالف سلامة ويارب يكون يوم ممتع كداا

وتيجى والابتساااااااااااام على الشفايف والضحكة من القلب


اه نستينى

كوووووووووووووووووووووووول سنه وانتى طيبه يا ماما


سلاموووووووووووز

لا عينيا حااااااااااااااااااااضر

كل سنة وانتى طيبة يا فاتيما
ويارب السنة الجاية فى نفس اليوم يكون احلى احلامك اتحقق

اخيرا حتعملوا لقاء عندنا
ان شاء الله احاول اجى ..فرصة جميلة اشوفك واتعرف على مدونين كتير سكندريين مكنتش اعرف انهم من اسكندرية واتشرف بالقاهريين
ونرجع نقول ان شاء الله
:)

لو ليه نصيب اكون معاكم و اشوفكم يبقى حيكون ان شاء الله ..
يارب اقدر و لو مقدرتش تأكدى انه حيكون غصب عنى .. مريم بقالها يومين مش بتروح الكى جى و كانت سخنه جداا
يارب تتحسن على بكره و اقدر اجى بجد نفسى ..
اتمنى ان تصلوا بالف سلامه و ربنا يحفظكم و تقضوا وقت جميل جداا و ممتع ان شاء الله .

سؤال جانبى اختى الحبيبه
مييين هدى ؟؟
البوست اللى فات تخيلت انه غلط فى الاسم
لكن كررتيه فى تعليقك فى البوست ده كمان .. بجد مش واخده بالى !!
على كل حال الله يسلمك غاليتى و تسلمى دوما يارب ..
اطيب امنياتى و ارق تحياتى

روح قلب ماما

لم يسعدنى الحظ دخول مدونتك من قبل

بس ممكن طلب ظغنطوط منك ممكن أجى اللقاء أنا عرفته من عاشقة الرومانسية

أنا اسكندرانية ونفسى أحضر

تحياتى
شيمو القمر

السلام عليكم

ان شاء الله يكون لقاء جميل وممتع

وان شاء الله تكتبي لنا تفاصيله

ربنا يسعدكم كلكم وتقضو يوم من ايامكم الجميلة
السلام أمانة يا فاتيما لهنودة
متنسيش
ولو حصلت معجزة ما ممكن اكون معاكم هو فاضل 5 ساعات بس مفيش حاجة كبيرة على ربنا
تروحو وتتقابلو وتتبسطو وترجعو بالف سلامة

انا عارف طبعا انك اكيد لسه ما رجعتيش بس حد يطمني عملتو ايه
يارب يكون كله تمااام

فاتيما
فين البوست بقى
عايزه اشوف كلامك عن اللقاء
واطمئن على سلامه وصولك
انتى وخالد وهشام
يلا بقى بلاش كسل
بحبــــك

اول مرة اعلق بس مش اول مرة اشوف المدونة علي فكرة

انا عاشقة قالتلي انك قالتي كلام كبير قوي عليا :):)
فبقولها بس انا مفتكرش انها تعرفني
قالتيلي بس بتشوفك عندي

خديتني الجلالة و قلت اجي ابص و اتقس و اشوف الكلام اللي بيتقال عني :):):)

علي العموم انا هاخد لفة في المدونة و انا مبسيبش حتة عادة
هههههههههههه

و بحيكي علي كام صورة برا تحفة(عمر خيرت-سعاد حسني-فيروز) حبيايبي :):)

و ربنا يخليلك يوسف :):) (معلش اصلي بحب الاطفال قوي) :):)
-----------
ميرسي تاني علي الكلام اللي قلتيه عني و انا لسه معرفوش
بس عاشقة بتقولي انا كده هاغير منك فشكل الكلام كان جامد :):)

فاتيما سيبك من الواد عادل ده
ده بكاش قوى واونطجى
اوعى تقوليله كلام يخليه يتمرع علينا
انا بقولك اهو هو مش ناقص نفخه
ههههههههههههه

يا عاشقة انتي مش طردتيني من عندك كمان جاية هنا ....

حسبي الله و نعم الوكيل
كشفت راسي و دعيت عليكي بالعربي و الانجليزي

و بعدين انا منفوخ
ازاي يعني :):)

ده انا حتي غلبان و في خالي من المدونة للفيس بؤ و من الفيس بؤ للمدونة

إرسال تعليق