.

.

كنا هناك ...فى الجنة  

Posted by: فاتيما in

آه .. مالجنة تبقى إسكندرية
و إسكندرية هيا الجنة
مش نافع أدخل انام من غير ما احكيلكم على اللى حصل النهاردة
يوم كالعادة زى كل أيامى معاكم .. جميل و مميز و فارق
الحكاية إبتدت لما هنودة القمراية قالت نفسى أشوفكم و نتقابل قبل ما أسافر من تانى
رميت حمولى على الله ... و على لماضة و خالد همس الاحباب و هنودة
حددت اليوم و هما حددوا المكان و المعاد
التلات 24 مارس 2009 فى نادى الاطباء من الساعة عشرة الصبح
بعد ما هنودة و العبدةلله ما كتبنا ندوءات لأهل التدوين إسكندرانية و غيرإسكندرانية ...
إستقرت الامور على ما إتفقنا عليه
و عليها .... النهاردة الفجر كنت فى موقف السوبر جيت أنا و ماجد اخويا
واقفة بستنى خالد همس الاحباب و هشام جعلونى مريضاَ نفسياً
عشان أتونس بيهم و نسافر سوا
الساعة ستة صباحاً كنا قاعدين متبتين فى كراسينا فى الأتوبيس
و بنقول يا رب اليوم يبقى زى ما بنتمنى و يكون سعيد على الكل
و نلحق نقعد بما يكفى عشان نتعرف على كل الحاضرين
و ربنا سهل فى المشوار و على تسعة و نص كنا قدام النادى فى إنتظار الست الحكيمة
لماضة عشنا تدخلنا
لحد عشرة مكنش لسه حد جه ...عشرة و دقيقتين ... هلت بنوتة جميلة رقيقة من بعيد
تطلع مين؟؟؟؟
هنودة القمراية الإسكندرانية ... اللى واخداها الغربة مننا و من روحها
هنودة يا جماعة زى ما تخيلتها و احلى ...حد كدا ملائكى .. حالم
.يعنى مينفعش تقول عليها بتدرس كمبيوتر خالص الصراحة
لأ ... ينفع تقول إنها فنانة شاعرة اديبة
حاجة كدا من الحاجات اللى بتخلى صاحبها شكله مختلف عن باقى الناس
... تحسها و هيا بتكلمك
إنها طايرة تجيب حاجة من قلب السما و راجعالك تانى
... رقيقة و ضحكتها حلوة
قعدنا نحكى لحد ما جت مدونة كنت اول مرة أسمع إسمها
الشهيرة بشيمو القمر و اللى قالت إنى بقول إسمى شيمو القمر مش غرور
دى ليها قصة ...هتكتبها البوست الجاى فى مدونتها ...
بصراحة أثارت فضولى ...هيا شخصية جميلة و تدخل القلب علطول
بعد شوية جت لماضة الطعامة حبيبة ماما ... ست البنات و الدكتورات ...
و تخيلوا الزئردة السنتوفة لماضة
داخلة النادى و لا زعيم الأمة فى زمانه و إحنا وراها و داخلين على حسها
...حاجة تفرح بصراحة و الواحد مش متخيل إن البنوتة الكتكوتة دى
هتبتدى قصة الكفاح الطبى و تتلطم م فى التكليف يا حبة عينى
شوية و وصلت حبيبة قلبى ...حنين القلب حنونة اللى من و إحنا
فى الأتوبيس بتطمن علينا فى موبايل خالد
- وحشتينى يا طمطم ...خلى بالك يا خالد من فاتيما
- إنتوا فين دلوقتى ؟
- فاضللكو كتير على ما تيجوا ؟
- كلمونى اول ما تقربوا عشان أنزلكو علطول ؟
طب تفتكروا الأستاذ خالد المناكف يسكت ؟؟!!! لا يمكن ...
يرد عليها بمنتهى البراءة
- هوه إنتى جاية ؟؟!! ...ليه إن شاء الله
أقوم أرد أنا
- يا بنى بس ... خدولكم هدنة شويتين من المناقرة إنتو الجوز
مفيش فايدة
دخلنا النادى ...على البحر يا إخوانا ...خدوا بالكو من المعلومة دى
أصلها أساسية ... يعنى كنا قاعدين على بحر إسكندرية كدا عينى عينك
من غير حاجة ما تفصلنا عنه ... و لسه
إبتدت البنوتات الامامير فى التوافد
جت حنان الشافعى ... رياح الحنين .. بس مقعدتشى كتير
سالى الطيوبة ... حروووف
نبض إسكندرية و اللى طلعت تقريباً أقدم واحدة فى المجموعة اللى قاعدة بتدون ..
طلعت بتدون بقالها سنتين و شوية و آل محرجة إنها متعرفناش قوى ؟؟!!!
يا بنتى دحنا اللى المفروض نبقى محرجين اكتر منك
جت كمان داليا ... ماى كورنور و اللى رغم إنى لسه يا دوب متعرفة عليها
من آخر بوستين فى المدونة عندى
إلا إنى لما شفتها حسيت إننا مثلاً كنا جيران و روحنا سوا المدرسة
من إبتدائى لحد الجامعة
و إتفرقنا شوية و بنتقابل أهو ... أدهشتنى اكتر لما قالت إنها طبيبة أسنان !!!
إيه يا جماعة ... إسكندرية الطب فيها مستواه الجمالى و الإنسانى
و المهنى مرتفع كدا إزاى ... بتاكلوا إيه ؟؟
جه كمان أحمد ...أسير الجراح ...كان منورنا و كان خجول حبتين
و نتمنى منكونش صدعناه برغينا
و نتمنى يجيى يزورنا فى مصر إن شاء الله بعد ما يخلص الجيش
بتاعه على خير
الكوم الكبير بقى ....اللى كنت قلقانة قوى من إنى أشوفها وجهاً لوجه
لحسن ابوظ الصورة الذهنية ليا عندها
و اللى من قبل ما أسافر و هيا مستقبلانى و حضاننى بحبها ...الجميلة الغرقانة حب
عاشقة الرومانسية ... دودو ... نبضات قلب ولهان
البنت من اول ما هلت من بعيد ...جريت عليا و إترمت فى حضنى ...
أنا حسيت كأنى مامتها
بجد ... و جايبلى ورد و مدلعانى ...و قعدت تتكلم بحب و حماس يأسر اى حد
و يخلى الحجر يبقاله قلب ...أنا سعيدة قوى إنى شوفتك يا دودو
و سعيدة اكتر بكلامنا سوا ..و بالورد ..و الفضفضة ...و الفسحة الحلوة
و القلب و الكلام الاحلى ...و نظرة الاحترام و الجدعنة الإسكندرانى اللى على أصلها
و بعدين فى الآخر خالص ... زمردة الجميلة خدت إذن من الشغل ساعة و جت تشوفنا ...
برضو صيدلانتك يا إسكندرية فيهم حاجة غير ... البنت وقفت معانا ييجى ساعة
و فيه طلة و شخصية تجبرك تتشدلها متعرفش إزاى ...
طلبت منها ترجع لمدونتها اللى مطنشاها بقالها مدة
و قالت يمكن قريب إن شاء الله
و بعدين تعالوا هنا يا بنات إسكندرية ...قولولى
جايبين الجمال و الخفة و دفا القلب دا منين ؟؟؟
من البحر ؟؟؟!!!
اكيد من البحر و السما و كل فتفوتة فيكى يا إسكندرية
مين جه تانى ؟؟؟
مفيش حد خلاص ...بس كنت اتمنى طبعاً اكبر عدد يحضر و ملحوقة المرة الجاية
الاخلاق اللى رغم البعد كتب بوست و كأنه جاى أول واحد
و متهيألى إنه كان كدا ..معانا بقلبه و شياكته و ذكريات المرة اللى فاتت ....
كل مدونى إسكندرية المتغربين كانوا على بالنا ... نسرين بسيونى ...المراكبى
وكل احباب هنودة المشاركينها غربة زى كفاية طيبة فيض قلبان ...و لكن
فيه كمان مدونين كنت اتمنى يقدروا ييجوا لكن الظروف اكيد منعتهم ...
زى جانا و روفى واحمد سلامة و ناس كتيريا رب منساش أسامى و حد يزعل
فيه كمان قلوب جميلة محبتش تفوت الفرصة من غير ما تسلم و لو بالصوت
و بلاش الصورة زى ستيتة حسب الله الحمش اللى عاشقة الرومانسية قالت فيها شعر
.... و داليا وش الخير قوس قزح و احمد ال سكررررر و عبده الرايق الامير الطيب
فيه ناس مشيت عشان شغلها زى داليا و عشان مواعيد مهمة زى حنين القلب
و نبض إسكندرية و رياح الحنين و الباقى قعد
دا بالنوسبة للناس الحلوة اللى جت
أما عن حالة الطقس .. فإليكم النشرة الجوية
فى الاول كان الجو متقلب ... حبة شمس دافية
و بعدين تقلب لشوية هوا ورياح و غيوم ..
و مطرت لدقيقة و لا حاجة .... و بعدين الجو بقى حلو و رايق
قوم البت لماضة و عاشقة و هنودة و كل سلاسل القمرات الإسكندرنيات
يقرروا يعملوا معانا واجب و يفسحونا فى بحرى
رحنا قلعة قايتباى يا عيال ... و محدش يقول و إيه يعنى ؟؟؟!!!
لاااااا ... دى مش أى حاجة كدا ... دنا رايحها مع أغلى الحبايب
طبعا عدينا على عزة بتاع الجيلاتى
حاجة مفتخرة و تحس أنك مش عايز تاكل حاجة فى الدنيا تانى بعد الأيس كريم دا
مشينا لحد اللسان اللى قصاد القلعة و إحنا بناكل الأيس كريم
و نعاكس فى القطط اللى ماشية
إكتشفت إنى و هنودة و حرووووف مهاويس قطط ...و بنموت فيهم
خالد راح يزور حد معرفة فى السريع و هشام كمان راح يزور مريض ( ربنا يشفيه )
و خدوا معاهم احمد أسير الجراح
و سابونا عند البحر نقعد نحكى و نرغى لحد ما يرجعولنا ...
قعدنا على الصخور اللى عند اللسان نتكلم و البحر حوالينا بيحضننا
آه ... حسيت كدا ...أنى قاعدة فى حضنه أنا و أحبابى
إتكلمنا فى إيه ؟؟؟
يووووووووه ...حاجات كتييييييير
فى التدوين و الناس الحلوة اللى بنعرفهم فيه
قطعنا فى فروة ناس كتير ... بس بالخير طبعاً ... متقلقوش
كمان إتكلمنا عن الأسباب اللى خلت كل حد فينا يدون و يكتب أصلاً
حكينا عن البحر و القطط و غربة هنودة فى قطر و رومانسية عاشقة المفرطة
و أحلام شيمو القمر و كتاباتها
حرووووف و خفة دمها و طيبتها
لماضة الطعامة و التكليف اللى هيوديها بعيد و هنفضل مشغولين عليها
التغيير اللى عمله التدوين فى حياتنا و اللى غالباً كان تغيير للأفضل
اللهجة الإسكندرانى اللى كل ما بنوتة فيهم تقول منها كلمة انبسط قوى
هنودوكى بحرى ... و نطلعوكى القلعة .... سماعت و نزالت
و الفتحة اللى بيحطوها فوق الأفعال دى
يا خرابى على جمالهم
إتكلمنا فى حاجات كتير قوى ... بس إحساس عجيب و غريب
و كاننا بنقعد القعدة دى كل أسبوعين تلاتة مثلاً ...
سبحان الله
مجمع القلوب و مقربها رغم البعد و المسافات
تحس إنك مصاحب الناس دى من زمن بعيد ... و مفيش بينكم فواصل
و لا بين قلوبكم حجاب
يا ترى دا إحساسى لوحدى و لا الكل كدا ؟؟
متهيألى الغالبية ... لأن اليوم كان جميل قوى ..و الوقت جرى قوام
و نظرة الفرحة كانت فى كل العيون صادقة
لماضة كان لازم تمشى .. و زمردة جت فى السريع قعدت معانا شوية
طبعاً كان لازم أجرى بسرعة عشان أرجع مصر قبل الساعة عشرة
عشان عب السلام
دا واحد صاحبى متعرفهوش هبقى احكيلكم حكايته مرة
المهم كان لازم نفارق الحبايب عشان ألحق أرجع فى معاد مناسب
خالد بصراحة و هشام يعنى و نعم الاخوة ...حتى احمد أسير الجراح أصر يوصلنا
و إتكلم فى الموبايل يطمن من خالد إننا رجعنا مصر خلاص وكتر الف خيرك يا احمد
البناتيت القمرات ...هنودة و زمردة و عاشقة الرومانسية و حرووووف
كانوا عاوزين يوصلونا لحد المحطة
و عرق الجدعنة الإسكندرانى نقح ... و إبتدت الإقتراحات و إحنا ماشيين أصلاً
و مفيش وقت لاى حاجة من الأساس و عاشقة و حرووووووف بيقولوا
تعالوا نجيب حاجة تاكلوها فى السكة ..طب حتى تاكلوا فشار من محطة الرمل
طب معرفشى إيه ...طب إيه ...يا لهوووووووى على الشياكة
بقولكم البلد فيها حاجة فى الجو و البحر بتخلى الناس شكل تانى
أصفى و اروق
انا سعيدة قوى باليوم دا ...و نفسى يتكرر كل فترة
سعيدة إنى شوفت هنودة قبل ما تسافرو إحساسى بيها طلع مش بقى فى فى محله
دا طلع المحل ذات نفسه
حرووووف إنسانة جميلة قوى و صافيييييية .. زى المية الرايقة
إعترافات قلب .. شيمو القمر شخصية إجتماعية و عندها فكر محترم ...
نبض إسكندرية حد مميز قوى ...أما داليا
.داليا ...مش هقول حاجة ... مش هقولك غير إنى هدعيلك من قلب قلبى
إن ربنا يصلحلك كل الاحوال ..لأنك تستاهلى كل الخيرإنتى و يحيى و فارس
عاشقة الرومانسية ... يا بنتى إنتى فوق كل وصف ممكن يوفيكى حقك
إنتى بتفكرينى بروحى زمان ...قبل ما يدوسنى القطر
كنت واخدة كل حاجة بحب جارف كدا و عايشة على نبض قلبى ...
الشبه دا مش عادى دحنا حتى طلعنا بنجيب برفانات من ماركة واحدة يا بنتى ؟؟؟
ربنا ما يحرمنى من طيبة قلبك و يكتبلك كل السعادة
كل اللى مقدروش ييجوا النهاردة انا فاكراهم بالخير
مروة ست البيت و سمكة واحده و بنت القمر
و جرى جرى ركبنا الميكروباظ ... و متفهموش إيه الحكاية
السهر و لا الهوا و لا إيه
إحنا يا دوب بنقول بسم الله
لقينا نفسنا بناكل رز مع الملايكة إحنا التلاتة خالد و هشام و انا
و هوب صحينا لقينا البوابات
و الغالى بابا أبو خالد بقلب الأب الحنون مهنش عليه يفوت اليوم
من غير ما يطمن علينا إننا وصلنا و بخير
ربنا يخلى حضرتك لينا يا رب و يديك الصحة و راحة البال
خالد كان لازم ينزل الاول عشان كان طريق المرواح بتاعه
فسابنى فى عهدة هشام و نزل
قبل ما أقوله ... ربنا ما يحرمنى منك ابداً يا خالد ... إنت نعم الاخ بجد
هشام جعلونى مريضاً نفسياً إنسان اخلاق بجد و هادى و محترم
و بعدين طلع صديق للغالى سوووو
يعنى جاى من طرف ناس مهمة و كنت اتمنى ييجوا النهاردة بس معلش
عارفة الظروف يا سوووو و المرة الجاية تبقى اولنا
اليوم كان حلو بجد ...مش عارفة عشان إسكندرية أصلا حلوة
و لا عشان الشخصيات اللى جات النهاردة كانت أصلاً حلوة
و لا لأن النية كانت خير فربنا بارك فى اليوم
عارفين ؟؟
متهيألى كل الأسباب دى مجتمعة
عقبال كل مرة نيجى فيها لأجمل مدينة فى الكون
إدعولى المرة الجاية ادخلها و معايا يوسف
أنا بشكركم من قلب قلبى على كل لحظة حلوة عدت عليا فى اليوم دا
و كل الأيام من ساعة ما عرفتكم
ب ح ب ك م
----------------------------------
نبضات قلب ولهان .... لقاء السحاب
شيمو القمر إعترافات قلب ..... أجمل إعتراف
حنين القلب .... تصدقوا وحشتونى
خالد همس الاحباب ..... يا إسكندرية يا
هنودة غربة .... متأخرة كتيييير
هشام جعلونى مريضاً نفسياً .... الثلاثاء الى فات

و عمار يا إسكندرية
يا جميلة يا ماريا
وعد و مكتوب عليا
و مسطر ع الجبين
لأشرب من الحب حبة
و أنزل بحر المحبة
و أسكن حضن الاحبة
و الناس الطيبين

This entry was posted on الثلاثاء, مارس 24, 2009 and is filed under . You can leave a response and follow any responses to this entry through the .

68 كــــلام بيطــبطـــب عـــلى قــــلبى و روحــــى

اووووووووووول تعليق
ل
عاشقه الرومانسيه
اللى ناويه تغير اسمها وتخليه عاشقه فاتيما
هههههههههههههههههههههههه

كده اقدر انام وانا مطمئنه
سبحان الله

لسه بابعت لك ميل علشان اطمئن لقيتك
سيبالى تعليق على المدونه
ودخلت عندك جرى اشوف البوست

بحبك موت يافاتيما
انتى انسانه قوى
بجد والله انتى ملاك
قطر ايه اللى داسك ده امال لو شفتك قبل القطر ما يدوسك كان حصلى ايه؟
ههههههههههههههههه
بعد الشر عليكى ياقمر
كل الكلام اللى انتى كتبتيه ده كتير عليا قوى
وانتى لانك انسانه قوى وصافيه قوى شفتى اننا كويسين قوى
وانتى اكتر واحده عارفه الاسكندرانيين
بيقولوا علينا جدعان
تكونش اشاعه دى يااختى؟
ههههههههههه
اول لما روحت فرجت ماما على الفيديو والصور وقريت لها البوست بتاعك اللى فى الكتاب
وحسيت ان الكلام مخنوق على لسانى وعايزه ابكى
فخلصت بسرعه وقمت من قدامها
وحسيت انها هى كمان عندها نفس الرغبه فى البكاء علشانك
ماهى ام برضه واحساسها بيكى اكبر منى اكيد
وفرجت الفيديو لاحمد لما جه من الشغل وناديت على شيماء صاحبتى تشوف الكتاب والفيديو وكنت فخوره قوى بالكتاب يافاتيما

والله سعادتى النهارده محدش فى الكون يقدر يتحملها فى قلبه

ربنا يراضيكى بنور عينك يوسف زى ما بتراضى كل اللى حواليكى وتحبيهم

بوسه وحضونات كتير
ولو انى خدت حقى تالت ومتلت النهارده

احم احم


دستور ياهل الدار



حد خالع راسه؟؟؟

يا بنتى انتى هنا كمان



يعنى مش كفاية نص البوست عنك


و كمان التعليقات..؟؟

سورى سورى


أنا آسفة جدا
إنى دخلت كدا شمال

(( وش مكسوف


أول مرة اعتقد آجى مدونة حضرتك
بس سمعت عنك كتير
و من ناس كتير


بجد حبيتك من كلامهم عنك
و كنت عاوزة أتعرف عليكى أوى



و الحمد لله ... أخيرا أتكتب لى شرف الدخول و التعليق عندك


لا و كمان فى ديل عاشقة الرومانسية

يعنى ان شاء الله فى أمل

هههههههههههههههههه






بجد أنا مبسوطة اوى لفرحكم
حسيت انى كنت معاكم



ان شاء الله أشوفكم كلكم قريب


دمتى بكل ود

انا عمالة ادور فى مدونات الناس اللى راحت على حاجة تطمنا على اللقاء ده
واللى طلع زي ماتوقعته
من احلى اللقاءات
ربنا يسعدكم يارب
يارب المرة الجاية ابقي معاكم :)

زادك الله سرور وفرحة

ايه الوصف الرائع والجمال والدفا ده كله

أنا سعيده ليكي قوي يا فاتيما إنك استمتعتي بوقتك بين أصحابك واخواتك

وصفك للبنات رائع ويدل ان انتي أصلا قلبك جميل

ياريت تكرريها تاني بس المره دي مش هفوت الفرصة إني أشوفك

للأسف كنت مرتبطة بمشاوير امبارح وكان هيبقى صعب جدا إني آجي أشوفكم

ربنا يفرح قلبك دايما ويقسم لكِ الخير

دمتي سالمة

حمدا لله على السلامة يا قمر
اللقاء جميل جدااااا كالعادة وعيشتينى معاكوا كأنى موجودة تمام
عقبال المرة الجاية يا حبيبتى
ربنا يفرحك دايما ويبارك فى حياتك

انا مبسوطة انه كان يوم جميل لكى
يارب كل ايامك تكون احلى من بعض

و الحمدلله ان الناس كلها كانت جميلة
كان نفسى اشوفهم اوى و اتعرف عليهم

بس يارب يكون خالد قدر يقنعهم بانهم يزورونا فى القاهرة يوم


ان شاء الله المرة الجاية يكون معاكى يوسف .. و انا كمان :))

طمطم ياقمرية والله انا فرحتي بزيادة علشان طلع يوم جميل وانبسطي فيه وان شاء الله اشوفك قيرب وتتعوض بوووووووسان وحضون كبيييييييييير زي حضنك لاوسف ماهو انا بموت في حضونات المهمهات الحونينات

فاتيما
انابجد حزينة اللى ما عرفتش اتواصل معامكم واجى اشوفكم
انا من اسكندرية بس لا اعرف اميل او تليفون احد
انشاء الله المرة القادمة اكون معاكم انا ويوسف الجميل
نورتو اسكندرية بتشريفكم ليها
وحمدا لله عللى السلامة

حمد لله على السلامة ..

كنت متاكدة والله انك هاتتبسطى ..

اسكندرية حتى من الجنة فعلا من جمالها وشوارعها واهلها ..

كان ناقصك كمان لسان جليم .. حاجة وهم كده ..

كويس انك غيرتى جو مع الناس اللى بتحبيهم ..

وان شاء الله فى أحد اللقاءات ابقى معاكم علشان اتشرف بمعرفتك ..

وان شاء الله دايما متجمعين فى الخير ..

دمتِ بخير ..

إن كيدهن عظيم و الله
هههههههههههههه
خليتي الاجتماع حريمي يا فاتيما انتي و لماضة
مااااااااااشي
انا مارحتش الكلية الاسبوع دة علي فكرة يعني لو كنت اعرف كنت هاجي
زي الاجتماع الجميل اللي فات
و ماشفتش البوست غير الساعة حداشر الا تلت بالظبط
بس اجمل حاجة انكوا طمنتونا علي زمردة عشان بقي لها كتير مش بتتابع ولا بتدخل و هجرت المدونة
يا رب تبقي دايما بخير و تبقوا كلكوا بخير يا رب و الحمد لله انكوا اتبسطوا..
تحياتي
و ان شاء الله المرة الجاية تبقي اجتماعات غير قاصرة علي الجنس الناعم بس
ههههههههههه
تحياتي
رومانسي

نسيت أسألك يوسف عامل ايييييييييييه؟

خياااااااااااااااااااااانه
هشام ابن منتقتي يروح ومايقوليش انه رايح
ماشي يا اتش
ماشي

معلش يا فاتيما والله كان نفسي اجي .. بس حوارات ضرايب واقرار ضريبي وليله مايعلم بيها الاربنا

بس برضه رحت اسكندريه
اه والله
رحت انا واتنين صحابي .. طلبت معانا ناكل في بلبع .. قمنا هوب مسافرين ومتحركين من القاهرة على الساعه 2 بعد نص الليل .. ووصلنا هناك الساعه اربع وربع
كنت عايز اتصل بيكم اشوفكم فين .. لكن قلت تلاقيكم مشيتو من بتاع ساعه ولا ساعة الا ربع

وعلمك علمك علمك .. والله العظيم وحشتوني ووحشتني القعده معاكم
ووحشني اكتر نظرتك لي وانا باشرب سجاير وانتي بتقوليلي بطلها
بجد اختي مش هزار

ربنا يسعدك دنيا وآخره
ويارب حياتك كلها تبقى فرح يارب

سلامي لماما وبوسيلي ايدها





سلاموووووووووووز

فطوم
انا كنت مبسوطه اوى والله وانا قاعده معاكى وكنت وحشانى اوى

كان يوم جميل واتمنى يتكرر تانى
ومش جديد عليكى انى احس بحنيتك واهتمامك بيه وخوفك عليه
ربنا يخليكى ليه ومش يحرمنى منك

وحشتينى مووووت من امبارح

ربنا يسعدكم يارب ويرضى عنكم

كان نفسي اكون معكم يومها لكن قدر الله وما شاء الله فعل

كل التحية والاحترام

اللللللللللله ع الجمااااااال

:(:(

يارتني كنت معاكو بجد

خوساااااااااره انا نفسي نتقابل كلنا فعلا

مبروك عليكم اللمه الحلوه دي .. بجد حسيت اني كان نفسي اكون معاكو ..
باين اوي الحب الي كان موجود ربنا مايحرمكوا من بعض

المرة الجايه اما انزلمصر هجيبكوا اسوان ماشي :D

حمدلله ع السلامه يا قمراااايتي

اه صحيح يا مامتي ..
انا عايزاكي تكوني ضيفه ف برنامجي
بس اول ما ارجع من مكه ان شاء الله هزبط معاكي الحوار ده
موافقة ؟

أنت جميلة كده على طووووووووووووووول

أنا حبيتك قوى وأنت الوحيدة اللى كنت متخيلاكى بشكل ولقيتك نفسه

مبسوطة قوى إنى شفتك وتشرفت جدا بلقائك .

بجد كان من الأيام التى لا أستطيع نسيانها .

تحياتى
شيمو القمر

انا اتاخرت اوى

اولا الف حمد لله على سلامتك

وفعلا نورتى اسكندرية حضرتك والاستاذ خالد والاستاذ هشام

تسلمى يارب على كلماتك الجميلة وبجد كان يوم جميل

وان شاء الله اكون موجود قريب فى القاهرة

انا مقدرش انزل القاهرة غير ليكم انتو بقى

ههههههههههههههة

وان شاء الله الزيارة الجاية لاسكندرية

يكون يوسف فى حضنك

بس فعلا انا كنت حاسس انى كنت رخم فى بعض الاوقات

بس انا مش كنت اقصد اى حاجة والله


ونورتو اسكندرية

كل الحب


اسير الجراح

سووووو بيحور يا رجالة انا قلتله قبلها بأربع ايام وهو قالي مشغول ايه لحقت تنسي يا عم سووووو

يابختك فاطيما ومن غير حسد يعلم الله
وبأتمنى يجمعك ربك وربى ورب الكون
بالحبيب الغالى (يوسف)وما
تفترقوا ابداً يارب
بدعيلك ياطمطم
ويشهد ربى
يجمعك
انتى والغالى
فى اقرب وقت وما يحرم
ام من ولدها ابدا يارب يارب يارب

السلام عليكم

ما اجمل هذا اللقاء
وان شاء الله يتكرر كل شهر
ويكون في كل المحافظات

،،،،
حضرتك اتكلمت وحكيتي اللي حصل
حسينا اننا كنا معاكم

وان شاء الله نكون معاكم في المرات القادمة

،،،،
فيه ناس قلوبها من ذهب وفضة
تسمعها وتشوفها تحس انك تعرفها من زمااااااان

وفيه قلوب تحسك بسرعة ووجه يدخل قلبك بسرعة

فيه حاجات كثيرة

الصداقة والاصدقاء نعمة كبيرة

تحياتي

يا ولاد المحظوظة
يا بختكمممممممم

ناس ليها اسكندرية وجوها
وناس ليها محكمة الاسرة واعلام وراثة


انا مش بحقد لا سمح الله
انا بس بنق عليكم


حمدلله على سلامتك يا فاتيما

سلام
اختك خيخة

والله حسيت انى كنت معاكم ايه الوصف الدقيق ده يا فاتيما
تعرفى لو كنت شفت البوست قبلها كنت روحت بس معلش خيرها فى غيرها
المهم حمدالله على السلامة ووحشتينا

عملوها الوحوش
ياريتني كنت معاهم ياريتني كنت معاهم :(:(:(:(

ههههههههههههه

يارب يدميها محبة و صداقة و...
حاجة لله عشان اعرف اروح

هههههههههههههههه

يارب بجد اكون موجود المرة الجاية بعد الوعكة دي ماتمشي
هههههه

و بجد الناس هنا في منهم كتير يستاهل و نفسي ااقبلهم برضه و خصوصا عدوتي حروف و كمان عاشقة .....و ...
ناس كتير مش عاوز انسي حد

وكمان يوسف :):):) ده اولهم

بس بلاش قطط عشان مش بحبهم .... انا من النوع اللي بيحب الكلاب :):)

دمتي بوز (علي رائ سووول)

هههههههههه

الحمد لله
ان اليوم كان جميل
والناس اللى جاءت كانت فوق الوصف
بصراحة
اليوم من اوله كان جميل والحمد لله
وما ينفعش تكونى فى مكان وما يكونش جميل برده
يا ست الكل انتى ليكى شعبية ولا جمال عبدالناصر فى عزه
انتى ماشوفتيش اللافتات اللى متعلقة جوه قلوب الناس
وبتقول بنحبك با فاتيما
انا بصراحة شوفتها جوه قلوب كل الناس
وبصراحة تستاهلى اكتر من كده
وبعدين انتم نمتوا اه
انا مش بعرف انام فى المواصلات
بس غمضت عينى وقعدت استرجع ذكريات اليوم الجميل
دايما مجمعين فى الخير يا ام يوسف

هههههههههههه
خلي بالك أنا ممكن تعتبريني إسكندراني إنتساب
لإني قعدت فيها كذا سنة
و لهجتنا تكاد تكون لهجة واحدة
و قريبة منا قوي
كلها ساعة الا ربع و أكون في إسكندرية و كنت بأعملها كل ما نفسي تهفني على البحر و الجو الحلو هناك

فرحت لفرحكم يا أحسن ناس
و دعيت لك في عمرة الخميس اللي فات
:)

روح قلبي فاتيما..

بجد انتي روح قلبي و بجد بجد حسيت لما شوفتك اني أعرفك من زمان و ان كان بينا كلام كتير و امبارح كنا بنكمله...ايه الطيبة و الحنية و الرقة اللي انت فيها دي؟!و اله العظيم و أنا ماشية في التاكسي كنت بعيط و بفكر يا ترى حشوفك تاني امتى..كلامي معاكي حسسني ان الدنيا حلوة و مش صعبة قوي زي ما احنا شايفنها طول ما فيها ناس زيك..يا رب يا رب يا فاتيما يسعدك و يهنيكي و يفرح قلبك و يرجعلك يوسف القمر بالسلامة

الحمد لله طمنتيني والله
انا مبسووووووووووووووووط جدا لانكم انبسطتم ويارب دايما
نورتو اسكندريه ويارب تتجمعوا تاني واكون معاكم
تحياتي

ربنا يسعدكوا الحمدلله يوم جميل
من الحاجات الي بتمني فعلا اني احضرها وانا في مصر لقاءات جميله كده :)
اجمل حاجه في البوست الوصف الرائع المكتوب من جوه القلب والاجمل برضه الناس الي حضرت و الروابط الي انتي حاطاها ليهم اتعرفت علي مدونات رائعه منهم

تحياتي

اولا: ازيك يا ام يوسف
وازي الاسرة الكريمة.
ثانيا:انا سعيد جدا للتطور الايجابي اللي انا حاسه من بوستاتك( وانا متابعها كلها بجد)انفتاحك تاني على الحياه والناس ممتاز جدا واعترافات حبيبة من كام بوست بجد من اجمل اشكال تطهير النفس اللي صادفتها.
ثالثا:
وه المهم جدا
ياريت اعرف الكتاب ممكن اشترية منين هنا في الكويت؟
واخيرا تقبلي كل الحب والتقدير مني ومن ست الناس

ما شاء الله يا فاتيما ..السعادة بتتنطط وسط السطور ..ربنا يديم عليكى الفرحة ويسعد قلبك على طول

زعلت اكتر بعد وصفك التفصيلى للقاء انى ماقدرتش اجى
الجروب كله كان جميل وكان نفسى اتعرف عليهم واشوفك جدا..وشوقتينى فعلا اشوف لماضة وعاشقة الرومانسية وباقى الجمع الجميل واللى مقدرش ييجى
قدر الله وما شاء فعل
ان شاء الله يكونلى نصيب المرة الجاية..ونروح الشيخ وفيق فى بحرى ..ده كان المفروض تجيبى منه تيك اوى للبيت عندك
:)
ضحكتينى فعلا بحكاية نزالت وسامعت .. كذا مرة اسمع التعليق ده على كلامنا هههههه..

أسعد الله ايامك يا فاتيما
ونورتينا حتى من غير ما نشوفك

فاتيما
لما يتلاقى المكان الجميل بالشلة الجميلة و المتخلقة و المحبة كمان اكيد حتحس ان الدنيا مش سايعاك من الفرح
اتمنى ان لمتكم تكون دايما و تفضلوا حبايب عشان توصلوا بالفكر التدويني الى ارقى مستوى بالاضافة الى وظيفته السياسية و الادبية تكون له وظيفة اخرى ارقى هي خلق علاقات اجتماعية متميزة بين البشر
مودتي
ايه انا في انتظارك في مدونتي الجديدة التي تحمل نفس اسم القديمة بس دي على البلوج سبوت

حمد الله بالسلامه .. انا كنت عارفه انه هيكون لقاء جمي ... بجد بجد كان نفسى احضر واسعد بهذه الصحبه الجميله لكن ظروف العمل منعتنى اتمنى ان استطيع الحضور فى مرات قادمه لكى اسعد بهذه الصحبه الجميله
لكى كل الحب والتقدير

تصدقى يا فاطمه
أنا سعيد بفرحتك وبفرحة الشباب الاسكندارنى من المدونين بك .
أحساس أنسان بحب وأحترام آخرين به
بدون أن يربطه بهم مصلحه ما.
من أحبه الله تعالى أحبه خلق الله
وأنتى أنسان صادق المشاعر والكلمات
وما يصدر من القلب يصل الى القلب
خصوصا فى هذا الزمن الذى امتلاء
بالتصنع والزيف .

فاطمه
يوجد مثل شعبى يقول
الفاحت نازل
البانى طالع

ربما يسود السواد لفتره ما
لكن
لابد من يوم موعود ترد فيه المظالم
ابيض لكل مظلوم
أسود لكل ظالم

الصدق والوضوح سيسود
الزيف والتصنع سينجلى
كما ينجلى أى ليل حالك السواد

جعل الله تعالى كل أيامك نهار ساطع
تظلى فيها بمحبة لاتنقطع
وخير متدفق وأحترام من القلب والعقل
تحياتى لكى

انا جيت انا جيت
الاول حمد الله على سلامتكم
ثانيا كان نفسي اقعد معاكم اكتر بجد كنت زعلانه قوي وانا ماشيه
ونمت احلم بيكي يا ماما
الشوكولاته بتاعتك مش عاوزه اكلها
وباخدها معايا في كل حته
بحبك يا ماما

بعيداً عن الكلام ده كله ... أنا بعترض على كلمه واحده..."يعنى مينفعش تقول عليها بتدرس كمبيوتر خالص الصراحة
لأ ... ينفع تقول إنها فنانة شاعرة اديبة "
أنا ماعرفش طبعاً هنوده أنا بس عايزه أعرف فكرتك عن اللي بيدرسوا كمبيوتر وحشه أوي كده ؟؟؟ يالهوي :)) لأ والله دي ناس عاديه جداً لسه بني آدمين يعني أنا بدرس كمبيوتر وكمبيوتر أوي أوي :) وحاسبات ومعلومات وشغاله مبرمجه ولسه بني آدم برضه ... أعذريني أنا من أشد المتعصبين للمجال علشان كده الجمله دي شدتني أوي
وبعيداً عن كل ده ...ربنا يفرحك كمان وكمان يا فاتيما يا أم يوسف يا جميله

انا زعلان من نفسي قوي
بجد زعلان
و مش عايز حد يزعل مني بجد
بس الظروف الي عملت كدة مش انا
اليوم كان صعب علي الأخر
دخلت المكتبة الساعة 11
طلعت 7
من غير محس بالوقت خااااالص

ايووووووووووووووه يا جدعان
مممم مش لاقيه كلام
ولا حرف ضاعت الحروف ويا موج بحرك الدافي

احرجتيييييني اووووووي بحنيتك وكلامك
وكنت بتمنى نتكلم اكتر
حظي دايما وحش

لو لقيت طريق مدونتي هآجي اقولك
متخافيش
انا مكلمه مباحث امن دول العالم يدلوني عليها تان


بحبك اووي

أزال المؤلف هذا التعليق.

فاتيما ياحبيبتى ضرورى تدخلى على الرابط ده
http://www.tadwina.com/feed/1015
انا حطيت مدونتك على الموقع ده علشان تتشهر اكتر وناس اكتر تدخل عندك

يمكن احس انى عملت حاجه تسعدك

بحبك جداااااااااااااا

الحمد لله إنه كان يوم رائع
جميل إنكم استمتعتم بوقتكم

ان شاء الله دوما في الخير متجمعيييين
وعقبال ما اشوفك يارب
تحياتي

عارفه ليه كل لقاءات المدونين جميلة جدا كده؟

عشان ما حدش ليه مصلحة .. حب إنساني لله في لله

unconditional love

ده اللي إكتشفته من لقاءاتي القليلة مع المدونين بجد

مرة زراعة ومرة طب
الناس مقامات طبعا

عارفة أكتر حاجة بحبها في مواضيع اللقاءات دي ايه يا فطومة
وصفك للناس
بتشوفيهم بعيون ملائكية غير عيون البشر
بتوصفيهم بقلبك ووجدانك وكل كيانك
وتتخطي حدود الشكل لعمق المضمون
وطبعا غزلك في اسكندرية دا قصة تانية خالص قصة من فوق السحاب
ربنا يرزقنا الجنة

السلام عليكم

الف حمد الله على سلامتك و سلامتكم جميعا
تصدقى ان نوركم صلح جو اسكندريه يومها بجد يوم الاثنين الجو قلب بشكل غريب و دعيت ربنا ان بكره يكون يوم حلو لكم او لو حتكون نوة جامده تلحقوا تأجلوه لكن الحمد لله ربنا ستر و كان يوم الثلاث جميل .. سعدت جدا لسعادتكم و كان نفسى اكون معاكم بس بجد كان غصب عنى و الله مريم كانت تعبانه و سخنه و كنت بها عند الدكتور و غايبه من الكى جى من يوم الاحد اللى فات و لسه غايبه للنهارضه ..
ان شاء الله المره الجايه يكون فيه نصيب و اشوفكم كلكم و يكون معاكى يوسف يارب و اخذه فى حضنى و ابوسه و اخطبه لمريم كمان بعد اذنك يعنى .. )
سعيده لانك افتكرتينى و بأشكرك و يارب تنورى اسكندريه تانى قريب اليومين الجايين الجو حيكون تحفه بجد و ان شاء الله
ربنا يجمعنا على خير ..

دمتى غاليتى بكل الخير فى حفظ الله

خالص مودتى و ارق تحياتى

انا مبسوطه انك مبسوطه ويارب دايما
انا كمان بحباسكندريه بس بعيده عليا
وللاسف كمان معظم اللى قلتى عليهم مش عارفاهم اوى :(

يعنى كنت هحس بغربه
بس برضو مبسوطه انك مبسوطه

فاتيما الجميله
بجد انتي جميله
حبيتك جدا
حبيت ضحكتك الصافيه زي البحر تمام
حبيت عينيكي اللي كلها حنين
حبيت حبك للناس اللي حواليكي
حبيت مجرد وجودي جنبك
كان مني عيني اقعد معاكم كتير
بس ظروفي جت ككده
ملحوقه ان شاء الله قريب ياااارب

حبيتك جدا

اقول ايه بس بحبك جدا
وانتي عارفة مش قادرة اقوللك كدة فاتيما مستصعباها انا حقوللك ياممتي اوك اينعم انا كبيرة ومش عايزة اكبرك بس هو بئا من حبي ليكي اوكي ياممتي ياحببتي كلامك عليا فوق الوصف مش حقدر اقوللك غير ربنا يخليكي لينا كلنا
دمتي بالف خيررررررررررر

فاتيما الجميلة

انا بجد مش عارفة اشكر اللقاء دة ازاى اللى خلانى اشوفك فية

اكيد طبعا كنت هاخسر كتير لو مكنتش رحت اللقاء واتعرفت بيكى

انت شخص وحد اول ماتشوفية زى ماوصفك ضياء بالظبط تحسى انك من العيلة

حد قريب قوى وحنين قوى انا مش لاقية كلام اوصف بية اعجابى بيكى يا عاشقة اسكندرية

مش عارفة اقولك اية غير انى معجبة بيكى بجد

وحبيتك فى الله ووحشتينى جداااااا والله انتى وهنودا وكل الناس اللى كانوا هناك

دمتى بخير ياارق فاتيما

تحياتى

عاشقة الرومانسية
إنتى كمان وحشتينى قوى يا دودو ...
يا بنتى كفاية كلام حلو متهيألى العيال يوميها زهقوا من إسمى و مش عاوزين يسمعوه تانى خلاص ....
أنا مبسوطة لأنك مبسوطة و سعيدة كدا
إنتى تستاهلى كل خير
و يا رب نقرى غسمك فى الأعداد الجاية من مدونات مصرية للجيب ...
و أنا اللى آجى جرى عشان أخد توقيعك على الكتاب يا ستى ...
سلميلى على ماما و اخوكى ...إنتوا باين عليكم ناس طيبين قوى قوى ...
مش إشاعة إن الأسكندرانية جدعان
دى حقيقة مؤكدة عشتها انا و يوسف ست سنين كاملين ...متهيالى لو كنا فى حتة تانية كان ممكن الوضع يبقى مختلف ...
اكيد ...على الأقل كانت نفسيتى هتختلف
بحركم بيخلى الواحد راضى و هادى و صابر...
إبقى سلميلى دايما ع البحر عشان انتو أصحاب قوى زى ما شوفت
شكراً لأنك ضفتينى فى الموقع بتاع تدوينة دوت كوم ...
كلك ذوق و متحرمشى منك أبداً
بوسة و حضونة





soul.ooo.whisper
محدش خالع راسه إتفضلوا يا رجالة
قصدى يا بنات ...
إدخلى وقت ما تحبى يا بنتى إنتى تنورى كل وقت و أى وقت
إن شاء الله تبقى معرفة خير و تيجى فرصة و نتقابل أكيد
نورينى علطول هنا و خالص حبى ليكى







كفاية طيبة
إن شاء الله يا طيوبة
و تكونى معانا المرة الجاية
لا و كمان تكون معانا هنودة ...تخيلى الروعة بقى ...
ترجعوا بألف سلامة إن شاء الله
و خلى بالك من هنودة لما تجيلك
هاه
خالص حبى ليكى





الطائر الحزين
و إنت كمان يا إيهاب
ربنا يخليك يا رب







elmasrya mirs writer
الاول نورتى
و ثانيا شكرا ليكى على ذوقك و مجاملتك الطيبة
المرة الجاية إن شاء الله تنورينا
و تحضرى لقاء جميل من هذه الأيام
خالص تحياتى و حبى





حاجات جوايا
ما هو لازم يا سالى أقول كل حاجة مخصوص عشان الناس الحلوة اللى مجتش و تحس إنها كانت معانا و لو بالروح و القلب ..
زيك تمام ...
متحرمشى من دعواتك يا حبيبتى أبداً



قوس قزح
إن شالله يا رب
نكون كلنا سوا يا دوللى
يا وش الخير كله
أشوفك يوم الجمعة إن شا الله على ألف خير
بوسة و حضونة كبيييييييرة



قلب ينبض بالحب
خلاص يا بدورة ...
كل ما اشوفك ليكى حضونة من بتوع المهمات دول إسمهم إيه الحونينات ...
يا خرابى على اللغة بتاعتكم يا بناتيت إنتوا ...
أشوفك دايما فى احسن حال يا حبيبتى
و سلامى لبسبوسة بسبس




القدر و أنا
يا بنتى طب ما جيتش على المكان علطول لييييييه ؟؟!!!
المرة الجاية إن شاء الله تعرفى قبل منها بمدة كافية و تحضرى ببساطة و من غير مقدمات حتى ...
إسكندرية منورة بيكم أصلاً مش مستنيانا يعنى ...
الله يسلمك يا ستى





لجين أبو الدهب
الله يسلمط يا لجين
أنا أصلا مبسوطة من قبل ما اروح خالص
إن شاء الله تحضرى أيام حلوة زى دى
إحنا عندنا يوم المكتبة الجمعة الجاية
فكرى كدا و التفاصيل هتلاقيها عندى فى أعلى المدونة على اليمين ...
شوفى ظروفك و هنستناكى إن شاء الله
خالص حبى ليكى




a7med fahmy
لا خليته حريمى و لا حاجة يا احمد
ما خالد همس الاحباب اكد إنه جاى
و هشام جعلونى مريضا نفسيا كمان ...
يعنى سيادتك كنت مجرش فى البيت أسبوع و معرفتش المعاد إلا يومها الضهرية ؟؟
اومال كنت بتعمل إيه بقى إن شاء الله
هنمشيها بتذاكر ..هنمشيها خلاص
المرة الجاية حضورك إجبارى
خالص تحياتى ليك
و يوسف إن شاء الله بخير و شكرا على سؤالك




soooo
الله
يعنى روحت غسكندرية أهو
اومال فلفصت مننا يعنى و البت لماضة قالت مزنوق فى شغل و حركات ...
يعنى لازم كنت اكتب إننا هنروح عند إسمه إيه بلبع دا عشان سعادتك تيجى و لا إيه ؟؟؟
ماااااااااااشى يا سوووو
عموما إنت بعتلنا من غيير ما تعرف حد جميل قوى من طرفك ..هشام شخصية محترمة قوى
إنتا كل اصحابك من النوعية دى و لا إيه ؟؟
هحقد عليك و أبصلك فيهم خلى بالك
المرة الجاية لا بلبع و لا مبلبعشى
و هتيجى يعنى هتيجى
أشوفك على ألف خير يا اخى العزيز
آه ...
و بطل سجاير بقى عشان صحتك يا بنى




حنين القلب
يا حنونة أنا كمان يا حبيبتى زيك و اكتر
مكان نفسى تقعدى معانا اكتر بس مكنش ينفع اعطلك عن الدكتور
إبقى طمنينى و قوليلى عملتى إيه ...
أنا كمان يا حبيبتى ربنا ما يحرمنى منك

الحمدلله ان اليوم كان جميل

وانكم كلكم اتبسطت وفرحتم رؤيتكم لبعض

فاتيما

وصفك للناس فوق الرائع
منهم الي اعرفهم
كلهم حبيتهم بكلامك عنهم

ووصفك لاسكندرية
ارض الجمال والبحر والهوا وكل حاجة حلوة

ربنا يسعد قلووووب الجميع يارب

تحيااتي

سارة

صاحب المضيفة
و يسعدك إنتا كمان يا انس
ملحوقة المرة الجاية و تكون بتقضى شهر العسل هناك و نخطفكوا إنتا و العروسة يوم كدا زى دا و نسيبكم تانى لحضن إسكندرية ...
سلامى ليها و ليك يا اخى الغالى





mony el-shreef
إن شا الله تكونى معانا المرة الجاية
بلاش أسوان و النبى دى هده حيل جامدة و أنا عضمة كبيرة يا عيال و صحتى متجبش خالص ...
الله يسلمك يا حبيبتى
و برنامج إيه اللى بتقولى عليه دا ..
إنتوا هتسيحولى فى الفضائيات و لا إيه ؟؟
لما ترجعى بالسلامة إن شاء الله نشوف ايه الحكاية
خالص حبى ليكى





إعترافات قلب
لأ .. متتخميش كدا
انا فى الغالب نكدية و بعيط الناس كتير ...
بس معاكم الحمدلله مفيش عياط و لا جزن و كله فرح و أمل و سعادة ...
أنا كمان يا شيمو أتشرفت بيكى
و إن شاء الله دايما نتلاقى على الخير و الفرح
خالص حبى ليكى يا حبيبتى






أسير الجراح
لا إتأخرت و لا حاجة يا سيدى
اهلا بيك فى كل وقت
إنتا تنور القاهرة كلها ...خليك هنا دايما و إنت تعرف مواعيد اللقاءات الجاية و تتب حالك على الوقت اللى ينفع و يناسبك و تشرفنا جدا لو قدرت تيجى ...
لا رخم و لا حاجة دى زى ما بيقول خالد همس الاحباب رهبة اللقاءات الاولى
و لا يهمك حاجة
و ألف شكر ليك على الترحيب و الود الإسكندرانى اللى شوفناه منكم فى اليوم الحلو دا ...






جعلونى مريضا نفسياً
لا بيحور و لا حاجة يا هشام
عاااااااااادى
إحنا بس نتلم عليه فى النوبة الجاية
و نعذبه و نقرره و نجبره على الاعتراف و بعدين نكتبه إقرار إن الزيارة الجاية لإسكندرية هيكون اولنا ...
بس كدا بمنتهى السلاسة
و مفيش أى مشاكل
و لا اكراه
و لا حاجة
إنتا كنت احدى مفاجأت اليوم يا هشام
و نورتنا بجد






norahaty
ربنا ما يحرمنى من دعاكى الطيب دا يا نورهانتى
و مرة كمان كدا ربنا يسهل و تحضرى اللقاءت دى لما ترجعى بالسلامة
خالص حبى ليكى يا حبيبتى





hasona
و عليكم السلام يا حسونة
كلامك تمام بجد
و أنا بحاول على اد ما أقدر احكى بتفاصيل دقيقة عشان اللى مقدرش ييجى يحس كأنه معانا
إن شاء الله تحضر معانا فى أقرب فرصة
خالص تحياتى ليك





بت خيخة و أى كلام
أيووووووووه
ما هو النق و القر دا اللى بيخلى الايام دى حلوة
و النبى تقعدى تنقى كدا طول الوقت يا نونو عشان نقك بييجى بالخير
الله يسلمك دايما يا حبيبتى و بسيلى الود شيكو كتييييير





شفقة هانم و إحسان بيه
إيه بقى يا هانم و يا بيه ...
أنامنزلة البوست من قبلها باسبوع
كدا متدخلوش تطلوا عليا أسبوع بحاله
مااااااشى
المرة الجاية إن شاء الله تنورنا
سلامى ليكم و دعواتى باللى فى بالى يا رب يتحقق





adel
نورت يا عادل جدا
كلك ذوق و سيرتك جت بالخير
و إن شاء الله تحضر اللقاءت دى و تبقى تكتب عنها بنفسك ...
حروف و عاشقة شخصيات مميزة بالفعل
و ربنا يديم الود و الحبة ما بينا جميعاً إن شاء الله
خالص تحياتى ليك و نورتنى حقيقى





خالد همس الأحباب
يستاهل كل الحمد يا خالد
و اليوم كان حلو لأنك جيت أنتا
ربنا ما يحرمنى منك أبداً
إنت منمتش ؟؟!!!
طيييييب
ربنا يسمع منك و نتجمع دايما فى المناسبات تكون كلها خير و فرح
خالص حبى من قلب قلبى يا اخى الغالى





مهندس مصرى
إيه دا
يعنى لما أشوفك هتسمعنى للهجة الجميلة دى برضو ؟!!!
ربنا ما يحرمنى من دعواتك الطيبة
و ياه لو لما نقابلك لما ترجع بالسلامة يكون يوسف رجع ...
يااااااااه





dahlia
صحيح بجد يا داليا
حسيتى نفس إحساسى !!!
إنتى إنسانة جميلة قوى
بس حظك ملطش قوى
و عادة لما الاتنين دول يتجمعوا سوا
الجمال الانسانى و الحظ الملطش ...
بيتبقى قصاد حد إستثنائى ...
و هكذا إنتى يا حبيبتى
ربنا يروقلك الحال و تشوفى يحيى و فارس عرسان و تجوزى ولادهم ...
بوسة و حضونة كبيييييييييييرة يا حبيبتى





إسكندرانى
إطمن يا باشمهندس
هوه ينفع نروح و منكونش مبسوطين
أنا سلمتلك على البحر لما قعدنا عند قايتباى ...
المرة الجاية تكون موجود معانا و تقوله بنفسك ....
خالص تحياتى ليك
و ترجع بالف سلامة إن شاء الله




عبدالله
الله يسلم عمرك يا عبدالله
طب هترجع إمتى عشان نتورنا فى يوم زى الأيام دى ؟؟
تحياتى الخالصةليك و شكرا على ذوقك




خايف من الحقيقة
يا محمووووووووود
ازيك إنتا يا شيخ ...بتغيب علينا و بتوحشنا
سعيدة لأنك راضى عن التطورات اللى بمر بيها و سعيدة اكتر لأنك متابعنى و بتطل عليا و منستنيش ... يعنى منستيش اختك فاتيما و يوسف روح قلبها ...
بالنويبة بقى للكتاب
مش عارفة ممكن يكون فين هناك
بس اللى أعرفه حلين تانيين
إنى هشيلك نسخة مخصوص ..
لعل و عسى مرة لما تنزل اجازة
تحضر لقاء من لقاءتنا و تنورنا
و ساعتها أشوفك إنت و ست الناس و اديلك النسخة بنفسى ...
فيه حل تانى ...
تبعتلى على الإيميل عنوانك و ابعتهولك فى البريد ...
إختار بقى و إبقى قولى
و تقبل إنت منى كل الاحترام و الود و سلامى للأسرة الكريمة





jana
معلشى يا جانا
انا عارفة إن المعاد مكنش مناسب لناس كتير لأنه وسط الاسبوع ...
المرة الجاية لازم إن شاء الله يكون يوم جمعة و ناس كتير حلوة زيك تقدر تحضره
لهجتكم تجنن أصلاً يا بنتى
و الواد يسوفة كان ساعات يقول كلمة من بتاعتكم انبسط قوى و أقول خلاص الولد خد الجنسية ...
ربنا يسعد ايامك انتى يا حبيبتى
إسكندرية منورة بأهلها أساساً




assafo anaroze
شكرا ليك يا أسافو على مشاعرك الطيبة الجميلة دى تجاهنا
و ألف مبروك على مدونتك الجديدة
اكيد هروح ازورك هناك
ألف مبروك يا اخى




بس خلاص
معلشى حصل خير و تتعوض إن شاء الله
المرة الجاية تنورينا يا ستى
خالص حبى ليكى





mohamed
دايما كدا رافع معنوياتى و غامرنى بعطفك و كرم اخلاقك ...
أنا عاجزة عن شكر حضرتك ما حييت
تقبل خالص ودى و إحتراماتى و دعواتى الصادقة بأن ربنا يمد فى عمرك و يديك الصحة و السعادة





لماضة
نورتى البيت يا مرمر
الله يسلمك يا حبيبة ماما
إنتى عملتى الواجب و زيادة يا حبيبتى
حلى الشكولاتة و هجيبلك تانى و عاشر يا طعامة
انا كمان بحبك يا حبيبتى
و خلى بالك من نفسك قوى






rehab mostafa
يا رحوبة واحدة واحدة
براحة علينا يا جميل ...هوه أنا أجرؤ أقول حاجة عن الكمبيوتر و اللى بيدرسوه ...
أصل إنتى مش فاهمة أنا اقصد إيه ...
أصل هنودة بتدى محاضرات فى المجال دا لناس كبار و كدا ...
قصدى مجال التدريس دا عاوز حد شخصية قوية و لها هيبة فظيعة و كدا
هنودة لما تشوفيها تحسى إنها بسكوتاية خلاص و صوتها واااطى و بتهمس تقريباً
و تبص للسما و تصور السحاب ...
يعنى تصرفات فنانة تشكيلية او اديبة
حاجة من هذا القبيل ...
إنما أنا إن شالله ما اوعى اتكلم عن الناس اللى شغالة فى المجال دا بأيتهوه كلمة
يا رحوبة ...دول احسن ناس يا حبيبتى
أنا بس بعلق على شخصية هنودة مش على المجال نفسه ....
ميرسى يا حبيبتى على دعوتك الكيبة و متزعليييييييييش
هاه




ta3ban
معلشى يا تعبان
بس دا من سوء حظنا لأننا مقدرناش نتعرف عليك بشكل مباشر
ملحوقة إن شاء الله





زمردة
مش مهم الكلام يا زمردتى
أنا قولت لهنودة تديكى حضن منى عشان ركبنا الميكروباظ متلهوجين و معرفتش أسلم عليكى بذمة ...
إنتى إنسانة جميلة قوى
و مغيبيش علينا و تتقلى بقى
انا كمان يا حبيبتى بحبك قوى
قوى

عاشقة الرومانسية
دخلت يا دودو
و ربنا يسعدك يا حبيبتى






mohamed ghalia
الحمدلله يا محمد
كان نفسى تكون معانا
المرة الجاية إن شاء الله





نونو عاشقة النقاب
يا رب يا نونو
و إن شاء الله يا حبيبتى قريب نتقابل على كل خير ...
خالص حبى ليكى





يا مراكبى
كلامك فى محله يا نبع الحكمة
دا حقيقى فعلاً
محدش مرتبط بحد بأى مصالح و لا عاوز منه حاجة غير الكلمة الطيبة و تبادل الاراء و لو فيه خير بيتعمل نبقى نشجع بعض فيه زى ما خيخة و قوس قزح و آبى ما بيشجعونا ...
دمت بكل الخير يا رب






يوم جديد
هما يا حبيبتى اللى بيجبرونى لا شعوريا أوصفهم كدا ...
ينفع حد يحبك و متقوليش عليه أنه اد إيه جميل ...
و إسكندرية دى كوم لوحده اصلاً
ربنا يسعدك يا حبيبتى و يرزقك الجنة كما تتمنين إن شاء الله





rovy
و عليكم السلام يا روفى
ماهى دى روعة اسكندرية
الجو الاوروبى اللى كل ساعة بحال
و هيا حنت علينا و شمست فى الآخر ...
سلامة مريم ألف سلامة ..لازم من تقلبات الجو اكيد ...ألف سلامة عليها
و إنتوا ترضوا بيوسف يعنى بعد كل هذوها المآسى اللى حكيتها ؟؟
طب يا ستى بس يرجع و تعاينى البضاعة الاول و خلى بالك إنك متكلمين عليه ييجى خمس ست بناتيت تانيين ...
المرة الجاية تقدرى تيجى إن شالله و تجيبى معاكى عروسة يوسف ...
بالنسبة لموضوع هدى دا ... أنا أقصد هدى رينبو بدال ما نطق يا ولا نضحك ..
أصلها قالتلى إنها بتتواصل مع روفى ...فإفتكرتك هيا اللى تقصدها ..
حصل خير
و خالص حبى ليكى يا حبيبتى






habiba
أنا كمان مبسوطة إنك مبسوطة إنى مبسوطة ...
إيه التوهة دى ...
المهم يعنى ميرسى يا حبيبة على ذوقك
و اللى لسه بتتعرفى عليهم فرصة و أديكى عرفتيهم ...
عقبال ما نشوفك إن شاء الله قريب
خالص حبى ليكى




حنان الشافعى
أهلااااااااااا
انا كمان يا حبيبتى حبيتك قوى
إنتى شخصية لطيفة بس ملحقناش نقعد معاكى كتير
ملحوقة المرة الجاية إن شاء الله
و متحرمشى منك يا حبيبتى ابداً





حروووووف
لأ قولتى يا حبيبتى ماما زى ما نتى عايزة ...
أنا كمان بحبك جدا و حسيت أنك زى بنتى كدا و بعدين طلعنا بنموت فى القطط
و أنا أعز قوى اللى يحبهم زيى ...
بحس إنه أصلاً عنده حنان مفرط و بيدلدق حبه دا على الحيوانات الرقيقة دى ...
أنا عاوزاكى تحدديلى مدونة واحدة من بتوعك ادخلك فيها علطول لحسن انا بتمخول من حكاية المدونات الكتيرة دى
و بحب أركز فى واحدة ...
مستنية تقوليلى بقى
بوسة و حضونة يا حبيبتى





نبض إسكندرية
انا كمان يا حبيبتى اسعد منك وبكتير
دى معرفة خير و جميل إننا إتعرفنا عشان نبقى نتواصل دايما
ضياء اصله اخلاق جدا و مش جديد عليه يقول كدا
و لا شكله جديد عليكى إنك توصفينى كدا ...إنتى شخصية جميلة و دماغك كبيرة رغم صغر سنك ....
إن شاء الله تتكرر الزيارات دى و تبقوا تحاولوا تجيلونا مصر كمان
خالص حبى ليكى يا حبيبتى



saragebaly
الحمدلله يا سارة
إحنا مشتركين فى عشق غسكندرية
أنا كمان بتمنى اعيش فيها باقى عمرى
ربنا يحققلك امنيتك أن شاء الله
سعيدة إنى نقلتلك وصف عن ناس بتحبيهم
هما حلوين بجد
عقبال ما تشوفيهم و نشوفك
خالص حبى ليكى

تعرفي ؟؟.. ماليش سيرة خلال الاربع الايام اللي فاتوا من يوم اللقاء غير هو اللقاء
بحكي لكل الناس عليه
مش عارفة حاقول ايه عشان احساسي أكبر بكتير من الكلام

كنت حاسة اني وسط ناس قريبين قوي
حتى اللي اتعرفت عليهم من خلال اللقاء فقط
حسيت اني اعرفهم من زماااان
وزي ما قلتي في الللقاء يا فاتيما
كل واحد كان راسم صور في خياله و كان خايف لا ميطلعش الواقع مشابه
بس اللي فاجئني الواقع كان أجمل بكتير قوي و خالي من كل التوجسات

ياااه.. كان يوم مايتصدقش

انا مش عارفة أعبر يا فاتيما عشان أنا فلخبطة عجيبة جدا من يوم الخميس
تخيلي اني لسة ماسافرتش!!

بعد مارحت المطار الخميس بالليل اتفاجئت ان الرحلة اتأجلت ليوم السبت بالليل.. طبعا سيستم دماغي كله اتلخبط و هدومي في الشنط و عربية عمي من ساعتها.. ربنا اداني يومين هدية يا فاتيما في اسكندرية... طبعا أيام السفر ده كلها بتكون لخبطة
أوصل بس و أرتب أفكاري و أجمعها و أحط البوست اللي حايسع كل اللي فقلبي لكل الناس اللي اتعرفت بيها و استمتعت بروحهم الطيبة و محبتهم اللي زي ما قال المراكبي من غير أي هدف أو مصلحة

كنت بموت فيكي يا فاتيما و بعد الحنية اللي شفتها فيكي في اللقاء مش عارفة عمق الحب ده وصل لفين
كل ما أبص جواي و أحاول أشوف آخره وصل فين مش بشوفه

وحشتوني قوي
و آسفة اني اتأخرت كل ده و اختفيت من يومها
هي ظروف السفر وتأجيله المفاجئ ده

ليه بس والله دي عسل خالص

هبقى اجي اخدك انا والله

بس نبقى نتفق

والبرنامج :D

انا ببتدي ف مشروع برنامج ف البلوج بتاعتي

هستضيف فيه بلوجرية كتير

وعايزه ابتدي بيكي ممكن

و ع فكره دعيتلك كتيييييييير اوي عند الكعبه وف الصفا والمروة

ربنا معاكي ياحببتي

:)

انا بصراحة مبسوط لفرحتك دي :))

ربنا يقرحك كمان و كمان

نسيتى تردى عليا ولا أيه !!!!
المهم أنك سعيده وحمد لله على سلامتك
تحياتى
محمد

hanooda
يا حبيبتى دا شعور طبيعى
بيغمرنى أنا كمان كل مرة اشوفكم فيها
إنتى كمان طلعتى احلى من توقعاتى
و إن كنت متوقعة خير
طلعتى حالمة و رومانسية زى خيالى
و طلعتى أضغر من توقعاتى ...يعنى ممكن اعتبرك بنتى بقى ..الغربة مكبراكى فى الاحاسيس و عندك نضج رهيب .. أنما إنتى بنوتة حساها اختى الصغيرة اللى عمرها ما هتكبر ابداً مهما الزمن عدى
و بعدين إيه دا ؟؟؟؟
بقى السفر كان السبت ؟؟؟
طب مش كانوا يقولوا كنا جبنا العيال يوم الجمعة أحسن ...كان عدد كبير يقدر ييجى ...معلش المرة الجاية
اللقا نصيب و لقانا كان اجمل حاجة
المهم إنك وصلتى بألف سلامة
و من هنا لحد ما تيجى الاجازة الجاية
هفضل اقولك ..اللقاء الجاى تكونى معانا
إنتى هتيجى امتى ؟
هتيجى امتى ؟
كان نفسى اديكى بوسات و حضونااااااات كتير تكفيكى لحد ما ترجعى .. بس ملحقتش خالص ...
خدى دول مؤقتا بقى
بوسة و حضونة يا قمراية






mony el shreef
طبعا أسوان زى العسل ... أنا اللى مخستعة خالص بعيد عنك ...
ماشى يا ستى انا تحت امرك ...و يشرفنى جدااااااا
متحرمشى منك يا حبيبتى و ربنا يستجيب إن شاء الله




amr
مش عارفة الواحد المفروض يرد فى المواقف دى يقول إيه ؟؟
يعنى لما حد يفرحلك كدا لله فى لله ...
يعنى هل هناك كلمات تتقال ينفع ترد بيها على المشاعر الجميلة دى ؟؟
مظنش خالص ...
متحرمشى منك يا عمرو ...
و ربنا يسعد كل أيامك يا عزيزى





mohamed
يا أستاذ محمد أنا مستجريش مردش على حضرتك إنت مش عارف غلاوتك و لا إيه ؟؟
الرد فوق وسط الردود على التعليقات
يمكن حضرتك مخدتش بالك عشان الخط صغير حبتين ...بس أعيده تانى أهو

---------------------------------
mohamed
دايما كدا رافع معنوياتى و غامرنى بعطفك و كرم اخلاقك ...
أنا عاجزة عن شكر حضرتك ما حييت
تقبل خالص ودى و إحتراماتى و دعواتى الصادقة بأن ربنا يمد فى عمرك و يديك الصحة و السعادة
---------------------------------
خالص إحتراماتى لحضرتك من قلبى

خلاص ياحببتي

هتفق معاكي ع التفاصيل

وده ميل عملته انهارده عشان اعرف اكلم الضيوف

واتشرف انك اول اد عليه

ومش هضيف غير الضيوف :D

banoota_ahlawia@yahoo.com

الوحشه انا غايبه عن حبيبتى وغاليتى كل ده

عارفه يا طمطم والله والله والله والله ما غبتى عن قلبى وبالى ولو لحظه واحده واعتقد ده يكفى

بس والله يا طمطومه مشغوله بشكل غريب والكمبيوتر برضه مش بيطاوعنى لا هو ولاا النت

والريدر عايزه اغيره اصلا عشان يشرفه ويزينه اسم مدونتك يا حبيبة قلبى وروحى

ربنا عالم انا بحبك ازاى من قبل ما نزور بعض ولا نشوف بعض حتى

وربنا عالم انا عايزه اعملك اى حاجه تسعدك ازاى

سامحينى يا اختى ويا بنتى الحبيبه لو انا رجلى بتتقطع وبتكسل فى الزياره عندك بس انا هقطعها ولاا انها تعمل كده مع حبيبتى طمطم بالذات

لو لسه مش مسامحانى بوسه كبيره من قلبى على دماغك وعلى ايدك عشان تعرفى قد ايه غلاوتك عندى يا فاتيما وربنا عالم

اممممممممممممممممموه لراسك وايدك وقلبك وروحك يا حبيبتى يا اختى الصغيره والغاليه قوى قوى قوى وام الغالى قوى قوى قوى

ربنا يطمن قلبكعليه يا حبيبتى ويطمن قلبنا معاكى

عارفه يافاتيما
يا ان شاء الله تيجوا تاني وتالت ورابع واشوفك زي ما بتمني بجد والله
يا انا اجي لحد عندك واجيلك وده هيحصل ان شاء الله
المهم اني اشوفك
فين وازاي وامتي
طلما انا نفسي اشوفك ربنا ييسر الحال باذن الله نفسي اشوف ناس كتير اوي بحبهم وبعزهم واتنمي اعرف عن قرب ربنا عالم معزتك عندي اد ايه انتي ومحاسن وقوس قزح وناس كتير اوي اوي
وانا مبسوطه ان اليوم عجبك ياطمطم ويارب يجعل اياك كلها سعاده وديما محبه من جميع الناس
انت فعلا حد يستاهل كل الحب ده واكتر
ربنا ميحرمناش منك ويحققلك كل اللي تتمنيه يارب

سيدتي فاتيما
كنت حابب اعلق على موضوغ المراة لكن لم تضعي مكان التعليقات
لذلك حعلق في هذه التدوينة
*****
سيدتي
قضية المراة قضية معقدة و شائكة نظرا لانتظارات الكبيرة التي تنتظرها من المجتمع الذكوري
المراة تعاني بشكل كبير من النظرة الدونية للمجتمع كما ان معاناتها الكبيرة تتجلى في الاظتهاد المزدوج من الرجل نفسه ومن المجتمع هذا الاخير الذي يتجلى اظطهاده في الجانب القانوني خصوصا القانون الجنائي و الاحوال الشخصية
في الختام احب ان اؤكد ان تحرر المراة و انعتاقها يجب ان يكون من صنع النساء انفسهن
تحياتي

إرسال تعليق