.

.

سمك .. لبن ... تمر هندى  

Posted by: فاتيما in ,

تحدييييييييييث
_____________
فى بداية الكلام أحب الاول أعبر عن مشاعرى و أقول
عاااااااااااااااااااااااااااااااا
و بعدين نبتدى القول
الاول
ازيكم يا عيال
ثانيا
العريس الحمدلله بخير و ربنا يطمنا عليه دايما
ثالثا
معلش مردتش ع التعليقات بقالى مدة
أصل نفسى طابق عليا حبتين اليومين دول
سمعاااااااااااك يا زملكاوى يللى بتضوحك ضحكة خبيثة
و بتقول عشان ماتش إنبى
لأ ... إطلاقاً منين جالك الإنطباع الشرير دا ؟؟
دنا ميت فل و سبعتاشر
عااااااااااااااا
أنا و لا هاممنى حاجة
عااااااااااااااااااا
و عادى خالص أصلاً
عاااااااااااااااا
الدورى ف جيبنا
بس إتنشل إمبارح ف الاتوبيس من جيب جوزيه الورانى
يلا ... عادى أنا روحى رياضية
و لأن روحى رياضية
فمش عاوزة حد يجبلى سيرة الماتش دا خاااااااالص
و لا كمان يجيب سيرة ماتش الزمالك و الاسماعييييييييلى
عشان منخسرش بعض ... هاه
التحديث دا سببه الرئيسى
إنى أصحح معلومة نبهنى ليها مهندس مصرى
و قالتها داليا وش الخير قوس قزح بالفم المليان فى تعليقها عندى
و بعدين يا طمطم التجمع بعد
البؤجة
هيكون فى الازهر بارك
الازهر باااااااااارك
لو حد تاه على
مسئوليتك
و عشان إنتوا عارفينى مش وش مسئولية
فاحب اصلح الخطأ و أقول للى جاى بعد البؤجة
تعالى فى الازهر باك
الازهر بااااااااارك
أشوفكم على الف خير يوم الجمعة
إن شاء الله
يا كل الأهلوية و ياللى ملكموش ف الكورة كمان
بس الزملكاوية و الأسماعلاوية بقى
ميبقوش ييجوا ناحيتى خالص يوميها
عشان كرشة النفس
بس خلاويص
الغنوة إيه ؟
الغنوة إييييييييييه ؟؟؟
هفتكر أهو ...
المصريين أهما ....
لأ لأ .. مش دى
طيب
كان فيه فراشة صغننة ... تالالالا
لأ و لا دى برضو
أه .. إفتكرتها خلاص
إحم إحم
تاراااااااااا
الليلة عيد و العريس بيتجوز
تاراااااااا
و مدام العريس بيتجوز
يبقى العروسة هتتجوز
و عريس الهنا ... يبقى أنس صاحب المضيفة
يعنى أقصد كان الليلة دى
و يااااااه ... يا ما كان فى نفسى أروح قوى
عشان اقف جنبه و أشاركه الفرحة
لكن معرفتش للأسف
أصله عمل الفرح فى بنها العسل
و أنا مليش فى العسل .. مقضياها بصل من يوم الخميس
ليه ؟
هتعرفوا بعد شوية
بس برضو قلبى مع أنس و بدعيله
ربنا يسعده و يهدى سره
أدعوله إنتوا كمان و حياتكم ... من القلب ... هاه
و عشان مبقاش زعلانة إنى مروحتش الفرح
تعالوا نتخيل إننا حضرنا
إدينى شغلت الدى جى
و التورتة اللى فوق دى رمز
لأنس اللى واقف زى القمر مع عروسته
و بيبتدوا حياتهم الزوجية بالتطنيش
و كل واحد بيتكلم ف موبايله
تخيلوا منظرهم و هما منورين الكوشة
بس متبصوش للواد قوى و تركزوا
هاه
الله اكبر ... و كله يقرا المعوذتين فى سره
مش عاوزة الواد يتحسد يتحقد
آه ... حاجة كمان بلاش منها
محدش يمد إيديه ع التورتة ... دى للفرجة بس
و خليكوا حلوييييين يا إما مش هخدكم معايا فى أى حتة بعد كدا
إيه المعازيم يقولوا علينا إيه ؟
عمرنا ما كلنا تورتة ؟!!
يلا ... عقبالكم يا بنات و ولاد المدونات
و عقبال ما أفرح بيكم عما قريب
و احط صور التورت بتاعتكم
و خصوصا المهندس مصرى محمد الأخلاق
اللى بيدور على عروسة
و ربنا يوفقه إن شاء الله
و أنتهز هذوها المناسبة عشان أقوله كمان
حمدلله ع السلامة يا باشمهندس
و عقبالك كدا ... و لا تتخيل مدى سعادتى
إنى هشوفك قريب فى يوم البؤجة بتاعة الخير
و طالما جبنا سيرة اليوم دا بالمرة أفكركم
بناء على قرار تدوينى عظيم الشأن أستصدرته كلا من
وش الخير داليا قوس قزح و قمر التدوين كله آبى هانم بتنجانى
بالقيام بخطوة جديدة ف الفكرة العظيمة
المعروفة لعموم الشعب التدوينى
بأسم
بؤجة الخير
الخطوة دى تبقى التالتة و التفاصيل كلها هتلاقوها
و مش لازم أقولكم بقى و اوصيكم اللى حضر نفسه و عنده حاجات
هيتبرع بيها .... هينورنا
و اللى ملحقشى يرتب حاله .. فيه أفكار تانية موجودة عند البت خيخة
اللى مش أى كلام
اما اللى مش لاحق يتبرع بأى شكل و محرج ييجى لهذا السبب
مفيش داعى للإحراج خالص ... هيسعدنا وجوده
و مشاركته معنويا كفاية و الموضوع مش فرض و لا إلزام يعنى
و بعد التبرع هنقعد فى نادى المهندسين ف الزمالك عشان
نقضى يوم مميز إن شاء الله
إيه تانى يا فاتيما ؟
إيه تانى يا ام يوسف ؟؟
آه
أنا طبعا سعيدة لأنى هشوفكم .
قلبى فرحان أصلا ًمن قبل ما أشوفكم
عشان المرة دى قبل ما اجيلكم
سمعت صوت يوسف حبيبى و إتباشرت خير
كمان النهاردة كان عيد ميلاد صديقة غالية و قريبة لقلبى
و مع إنها مش هتقرى التهنئة دى لكن لازم أقولها برضو
كل سنة و إنتى يا توتو حبيبتى
و صديقتى و اختى و ساعات بتبقى .. امى
و ربنا يخلى احمد و معاذ و يكونوا احسن ناس ف الدنيا
إيه كمان ؟ .... إيه كمان ؟
آه
أنا كنت عاوزة أكتب البوست دا من بدرى
بس نفسيتى من الخميس اللى فات و هيا مش تمام
قولولى ليه ؟ ..... أقولكم
لا ..... أرخم و أسيبكم
تخمنوا أحسن ؟!
أيوه فكروا شوية
إعصروا مخكم .. هاه
سامعة واحد شطارة من آخر بلاد المدونين
بيقول جايز ... يمكن ...إحتمال ... عشان الماتش
الله يفتح عليك يا بنى
تسلم رجليك .... يا حبيب والديك
المااااااااااتش
بصوا أنا أهلوية من زمااااااااان
و بابا الله يرحمه كان إسماعلاوى صميم
و كمان زملكاوى قديم حبا فى الاسماعيلى ... و نكاية ف الاهلى
بس عادى يعنى معنديش مشكلة خالص
و اننا نتغلب من الزمالك
عادى
بس متغلبش من الأسماعيلى بقى
بأتقهر قوى معندكوش فكرة
هتقولولى إيه الى جاب الأسماعيلى هنا ؟
أقولكم ... أصل الماتش شكله مودى على هناك
بس برضو عااااااااااااادى
و أنا مش متعصبة
و لا متشددة
و لا متنرفزة
و لا مكبرة المواضيع
و لا زعلانة
و لا متغاظة
و لا واخدة الموضوع بحساسية
و لا أى حاجة من دى خالص
و الجو لتيشف و مفيش حاجة
بس عاوزة أقول كلمتين صغننين على جنب كدا
من باب الفضفضة بس مش اكتر
و بكل هدواااااااااااء
هسأل سؤال برىء
إيه
إيه بقى
هاه
إحنا شكلنا بقى وحش و لا حاجة ؟
اللى بيحصل دا ؟
بقى إحنا نتكشوح الكشوحة دى ؟؟
و محدش يقولى يعنى إيه إحنا ؟!
بقى فريق الاهلى يحصل فيه كدا ؟
دا كلام ... و هل هذا يصح ؟
الواد ماجد أخويا أصلا زملكاوى
و بقالى كام سنة أقوله يا بنى
تعالى و شجع الاهلى عشان نفسيتك تتوازن
و تبص للحياة بمنظار أبيض من غير خطين حمر
يقولى لااااااا ... الزمالك دا مدرسة
اقوله طيب ... ابقى خلى وزراة التربية و التعليم تنفعك
و كل مرة على مدار سنة و شوية ... من ساعة ما رجعت
الاقيه نازل ساعة ماتش القمة
أروح أصطاده عند باب الشقة
رايح فين يا ماجد ؟
هشوف الماتش مع أصحابى عل القهوة
طيب .. خلى بالك من نفسك
سلام ... لو عوزتوا حاجة كلمونى
طيب
مااااااااااااااجد
نعم
متشيلش فى نفسيتك يا بابا
دا ماتش و يعدى و المهم صحتك
طرااااااااااخ
دا صوت باب الشقة بيترزع
إيه ؟
لأ .. مش ف وشى طبعا
ميقدرش
و ميغركوش إنه أطول منى بمتر و كام سنتى
دنخته الكبيرة برضو
و بعدين أنا بقدر ظروفه ... زملكاوى يا نضرى
و بيصعب عليا و الواحد لازم يخلى ف قلبه شوية رحمة
هييييه
دى تنهيدة على جنب
أصل كان كل مرة الحوار بيمشى كدا زى ما قلتلكم كدا
و بعدين كالعادة .... يتغلبوا
و فى آخر الماتش أروح مكلماه على الموبايل
عشان اواسيه و اطيب خاطره
لحد ما الواد يا كبدى ... قرب يبطل تشجيع و فرجة ع الكورة من أساسه
الخميس اللى فات بقى
الموقف إنقلب تماما
و بقيت أنا اللى عاوزة أتعالج .... و أرزع الباب بنفسى
صحيح متغلبناش
بس اوشكنا نتغلب ... الصراحة لازم تتقال
لأ و من ميييييييييين ؟
من عيال من دور عيالنا ... يادى الفضايح و اللى بجلاجل فضة
طول الشوطين و أنا عمالة أتشال و أتحط
وصوتى يكاد يكون واصل لعم عب السلام البواب
و أنا قاعدة بشت ... قصدى بشجع ف اللعيبة
و لا حياة لمن تنادى
يكونشى السبب إن إستاد الكلية الحربية بعيد حبتين ؟
يمكن
قعدت بعد الماتش مكبوسة كبسة من ام رز و لحمة
و أنا متغاظة غيظ
و ماجد رجع من بره و الصراحة مرضيش يكمل عليا
أصل شكلى كان باين ... إكمن وشى كان مائل للحمرة قليلاً
و أنا هطق و أسأله براحة كدا
إيه دا ؟؟
إيه الأفترا اللى فيه لعيبة الزمالك دا ؟
إيه الشباب اللى صحتهم كويسة دول ... مش عايشين فى مصر زينا ؟
و حازم امام الصغير دا نظامه إيه بالظبط ؟
يعنى نفسى أعرف مامته بتاكله إيه كل يوم ؟
دا لازم يشغلوه ف المقاولين العرب
عشان الخبرة و المهارة الهايلة اللى عنده دى
و اللى خلته ياخد فريق الاهلى
فحت و ردم و سفلتة ؟
منظرنا كاهلوية بقى مش نتيف خااااانس
الدورى هيضيع يا إخوانا
دا إذا مكنش ضاع خلاص
و الأسمعلاوية هيفرجوا علينا الفضائيات
لأمؤاخدة يا سلوى يا رئيسة حزب الاحلام هستعير إسم مدونتك
و اقول
إسترها يا رب
يا رب ما تشمت حد فينا قادر يا كريم
قولوا آمين ... مبتقولوش ليه !!
الأسماعلاوية يمتنعون
و الزمالكوية ميقولوش حاجة خالص
صحيح ملهموش ف الدروى بس أنا عارفة اللى ف ضميرهم
نرجع للملعب ... قصدى للأستديو التحليلى
يوووووووه
قصدى لموضوعنا الأصلى بعد كل الرغى الفاضى دا
عاوزة أقولكم
مفيش بوستات جديدة لحد يوم الجمعة الجاى
عشان عاوزة أزوركم فى مدوناتكم
لحسن بقيت مقصرة معاكم قوى
و اللى جاى يوم البؤجة .. يقول
و اللى مش جاى هعتبره ف حكم الزملكاوى
و هينطخ عيارين
أو يقام عليه الحد
القصد قبل ما امشى
ألف مبروك يا انس
كل سنة و إنتى طيبة يا تغريد
أشوفك بكل خير يا مهندس يا مصرى
و إن شاء الله أشوفكم كلكم على خير يوم الجمعة الجاى
سلام مؤقتاً يا احلى صحبة
و ناس و عالم
بجملة الخطرفات بقى الموقع
مليان قوالب مدونات حلوة
تنفع أكتر للبناتيت
أكتبوها ... يمكن تنفعكم

علشان ... تستاهل  

Posted by: فاتيما in

حبها نار فى القلب تستعر
و النيران لا تخبو
و لكن تشتعل
و الفؤاد اصبح لا يحتمل
و العقل يحادث النفس و ينفعل
أيا نفس ماذا فعلت فى دنياك ... حتى يعتريك ما أعتراك ؟
فعودى يا نفس إلى ربك و مولاك
لعله بنظرة من عطف يرعاك
و قولى : احببت يا رب
و ليس بيدى
فحقق يا إلهى منايا و مطلبى
و يا رسول الحب
احمل منى إليها سلام
و هدىء من روعها إن كانت تبكى و لا تنام
و قل لها حبيب القلب
يهديك السلام
فإصبرى أميرتى على الهجر و الأيام
فالغد لناظره قريب
و بعد الليل يجب أن ينقشع الظلام
.........
( أ )
كنا لسه فى أول سنة جامعة
و قصة الحب بتبتدى فى هدوء ... يسبق العاصفة
عاصفة هبت رياحها من عندى ... و إنتهت و لم تهدأ الأ و هي تسكن قلبه
هو ... ( أ) و دا أول حرف ف إسمه
و زى ما الألف يعتبر اول الحروف فهوه كمان
كان يعتبر اول شاب محترم أصادفه
كل اللى قبله كانوا لا يتعدوا شوية عيال تافهة بتعاكس البنات
و هيا خارجة من المدرسة الثانوى
و اولاد الجيران اللى كنت بلعب معاهم كورة زمان و شايفهم دايما زى أخواتى
تقريباً كان اول حد متميز دخل حياتى من باب الاحترام
و انا داخلة الجامعة أساساً و عندى استعداد أحب
بس ألاقى حد يستحق المشاعر دى ... و قد كان
من اولها إنبهرت بشخصيته و تفكيره
و إتشديت لجدعنته و حيائه
كلنا كنا متلخبطين فى بداية السنة و محدش عارف هيروح قسم إيه
جمعتنا الحيرة و اللقاءات ... بعدها حول ( أ ) من قسم تانى
عشان يستقر فى شلتنا
و مش كل مرة هأقولكم
إنى كعادتى ... طول عمرى متهورة فى الحب و معنديش تفاهم
بس مجرد حسيت بقلبى بيدق
قررت أتعامل مع الموقف عادى خالص و بمنتهى الصراحة
و اللى يحصل يحصل
كنا مختلفين فى نواحى كتير أى ناحية فيهم كفيلة بالقضاء
على قصة الحب دى فى مهدها
فروق فى الوضع المادى و الإجتماعى
و كمان فكرة إحتمالية وجود سنين إنتظار
طويييييلة بعد التخرج ... دا غيرأصلا صعوبة التعامل مع بابا
و اللى كانت ف التوقيت دا تعتبر حكاية دونكيشوتية بحتة
و يمكن حتى محاربة الطواحين تجيب نتيجة
مجدية اكتر ... من الوقوف فى وش بابا
و مع كل هذا إتفأجت إنه بيبادلنى المشاعرو خجله منعه
يا سلام ... وقتها كان حظى من السما
إنسان جميل و طيب و مهذب و متدين ... والأهم بيحبنى
فى خلال أسابيع ... كنا قايلين كل حاجة
و بدءت فصول القصة تتوالى
شهرين تلاتة و فى يناير حصلت حرب الخليج الاولى
و مدولنا اجازة نص السنة أسبوعين زيادة
الفراق دام بينا شهر و يمكن أكتر ... مكنش فيه ساعتها تليفون أكلمه
و لا موبايلات طبعا
عشنا البعد و ثقل وطأته فى الخيال
وفى أول يوم رجوع للكلية ... إدانى القصيدة دى
و كأنه بيدينى حتة من قلبه
مكنش بيقولى بحبك دايما ... لكن نظرة عينه كانت بتعبر فى صمت جميل
بمجرد لما ادخل المدرج الصبح و قبل ما أقول حتى صباح الخير
حب هادىء و متزن و خجول
عدى نص السنة التانى ... و فترت العلاقة من طرفى
صارحت نفسى و إكتشفت إنى مبهورة بيه
كان نقيض لأغلب الرجالة اللى فى حياتى
و كنت أتمنى أرتبط بحد مغاير لشخصية بابا اللى كان عاملى شبه عقدة
كان صعب شوية لأ شويتين ... جرىء و بشكل صارخ ... كتوم
و نادرا ما يعبر عن مشاعره
اما هوه ... فكان العكس ... بسيط و سلس و هادى و رغم صمته حنون
ورغم إن كل شىء كما تمنيته
لكنه ... لم يكن حباً
كان إنبهار و رغبة مستترة منى فى المرور بقصة حب وفقط
و كان الموقف زى الكابوس الجاثم على ضميرى ... و لازم يتكتبله خاتمة
و زى نزار قبانى ما بيقول على أن من بدأ المأساة ... ينهييها
فى آخر يوم إمتحانات ... طلبت منه نتكلم فى موضوع مهم و ضرورى
لسه بننقى مكان و هنقعد أهو .... بادرنى بحنان
لم يختفى لآخر لحظة
وحشتينى
أنا عاوزة أقولك حاجة مهمة
قولى يا ستى
أنا ...........
مالك إتكلمى خضيتنى .. فيه حاجة ف البيت ؟
.... أنا مش قادرة اكمل علاقتنا دى ....
طيب مالك متوترة كدا ليه ؟
.....................
عموما أنا قلبى كان حاسس
أنا أسفة ... أنا ....
.. براحة على نفسك يا بنتى ...على فكرة أنا لازم أشكرك
!! ... على إيه ؟
لأنك قولتيلى ف وشى و صارحتينى ... بدل ما اكتشفها لوحدى
و العلاقة بينا تنتهى بشكل مش حلو و أنا محبش دا يحصل بيننا
!!!!!!!!!!!!!!!!!!
الموقف دا حصل من 19 سنة تقريبا
و رغم كل هذا الوقت ... ما زلت أسيرته حتى اليوم
ليه ؟
أقولكم
لأن هذا الإنسان تسبب (دون أن يقصد طبعاً ) فى ما عانيته فى حياتى
بعد ذلك من تقبل قسوة الآخرين
خلانى أتصور و بسذاجة تصل لحالة غباء مطلق إن كل قصة حب بين إتنين
ممكن تنتهى النهاية الشيك دى و ميجراش حاجة ... و حصل خير
فعلاً ... ما هو حصل خير بعد كدا
لأنى و هذا الإنسان علاقتنا تحولت من الحب او الإعجاب
لتاخد شكل صداقة و اخوة حقيقية
هوه الحمدلله متجوز من إنسانة تستحقه و تقدر قيمته
و ممكن يتقال إنها تميمة حظه و لها نصيب كبيرمن نجاحه و إستقراره
و فى لحظة صراحة بينى و بينها فجأتنى إنها تعرف إن كان بينا قصة قديمة
و لأنها واثقة فيا و فيه و فى نفسها طبعااااا
معندهاش مشكله فى وجودى فى حياتهم و مرحب بيا فى أى وقت
طب م الدنيا جميلة و وردية اهو ... اومال قلبت معايا انا كحلى لييييييه
كل اللى عرفتهم بعد كدا و مش كتير قوى محدش يتوهم
كان للأسف فراقى عنهم درامى و سىء للغاية
كان بيحبنى حب الناس العاقلة اللى لما تلاقى هيحصل مشاكل
بتبعد عشان متوجعشى دماغها ... وعنده حق طبعا مقدرش ألومه
إبن عمى
اللى كنت مخطوباله ... لما بعدنا كان فراقنا صادم عنيف و منيل بنيلة
و لحد النهاردة لما بيشوفنى صدفة بيعاملنى ببرود قاتل
مع محاولتى إنى أعتذرله على اد ما امكننى و منفعشى
و بابا قعد بسببه سنين مش طايقنى
فحدث و لا حرج .. لمجرد إنى فتحت بوقى بس
و قولت نفارق بالمعروف كان الأنتقام هو سيد الموقف
و احال حياتى و حياة إبنى و اهلى إلى جحيم
الله !!!! الناس دى مالها غلست معايا كدا ؟
ليه مكنوش زيه ؟
غالبا العيب فيا ... مش غالبا دا اكيد و مش هقول سوء حظ
لكن هقول حظى كان فى معرفته هو ... حلو
لأنى رغم مرور كل هذا العمر و مشاعرى اللى واخدة شكل محايد تماماً
ما زلت أتمنى أقابل راجل زيه .. و مش هوه طبعا
لأنه الآن فى حكم الاخ و الصديق و زميل العمر
اللى مهما بعدت عنه شايلاله ف قلبى محبة لا تزول
و ربنا يهدى سره و يسعده
لكن فى احيان كتير بيعدى عليا وقت
زى الأيام دى
أحن و أشتاق لزمن كان قلبى فيه بيعيش ببراءة و عذوبة
قصة حب جميلة رقيقة مفيش حاجة خدشتها و لا أفسدتها
لما حاولت ادور على ذكريات ملموسة من احباب فارقونى
أى حاجة .. ملقتيش
لقيت ذكريات مليانة عنف و قسوة وتصرفات توصف بحاجة شبه الحب
شبهه .. مجرد شبه ... و محدش فيهم حبنى بجد
و لا حد فيهم إحترمنى و قرب منى و بعد عنى بهدوء و لطف كما فعل هو
و لما وحدتى أوقات توجعنى
و أدخل فى دور حسرة على نفسى
بحاول ادور على لمحة نور تخفف عنى
و إكتشف بعد التدوير و البحث الطويل
إنى معنديش غير قصيدة الشعر دى
أقراها و كإنى رجعت للزمن 19 سنة و أحس بحاجة غريبة
تقدروا تقولوا حالة صدق نادرة لم يصادفها قلبى من زماااااااااان
صحيح مبقتش الإنسانة اللى كان بيوصفها
و لا المشاعر دى بقت موجودة و لا حية
و ذهبت لمن تستحقها .... لكن ايه المشكلة ؟
أنا واخدة المسألة ببساطة شديدة
هذه المشاعر كانت لى و لوهلة من الزمن
و أظن من حقى أن إستحضرها وقتما شئت
و أذكرها بالخير ... هى و صاحبها
ثم أعود
و اطويها فى قلبى مرة آخرى
و أدعو له بالسعادة
و أتمنالوا الخير ... لأنه لم يجرحنى يوماً
بالعكس
معاملته الطيبة ليا ... خلتنى أحاول أكون اكثر تسامحاً
و ابص لكل اللى جرحوا قلبى بنظرة إشفاق
لأنهم لم يملكوا هذا النوع من الرقى و السمو الإنسانى
و يا عزيزى ( أ ) إينما كانت أراضيك
و إن لم تصلك كلماتى أبداً و لا أحسست يوماً ... إمتنانى العميق
أنا بشكرك فعلا من كل قلبى
و كلما جرفنى حنينى لبعض النقاء ... أعود لقصيدتك
و لزمن أنصفنى و لو قليلاً
و أتنهد تنهيدة طويييييلة
و أتمنالك الخير
من قلبى
علشان ... تستاهل

المهنة : حارس عقار  

Posted by: فاتيما in












فاكر يا حبيبى لما كنا بنعملك ركن فى الأوضة
تحط فيه حاجاتك
وكنا بنسميه فيلا يوسف ؟!!
أهو فيلتك الجديدة
فى إنتظارك يا يسوفتى
أنا بعد إذن سيادتك يعنى .. بقعد فى فيلتك كل يوم
عشان اشتغل على الكمبيوتر شوية
منه أستفيد و اتعلم .. و منه كمان أخد بالى من حاجتك
مؤقتا لحد ما ترجع
متقلقشى خالص ... ماما حارس عقار ممتاز
و مصحصحة جداً و بحافظ على ممتلكاتك قوى
و إنت وحشتنى قوى
بس خلى بالك من حاجة مهمة
أنا مش هشتغل حارس عقار ببلاش
آه
لازم تدينى اجرتى عن ذلك
وإنت عارف القاعدة المتبعة كويس
أعطوا الاجير حقه قبل أن يجف عرقه
ربنا قال كدا
يعنى لازم سعادتك تعرف إن اجرتى عن الحراسة
تتكلف كالأتى
بوسة و حضونة عن كل يوم
و إحسبها إنت بقى
تدينى حقى كاش و لا بالتقسيط .. مش هيبقى دا المشكل
أصلى مش هروح فى حتة يعنى .. و كمان أنا واثقة فيك
و فى إنك راجل و أد كلامك
ومتقولشى كتير ... و هدفع دا كله ازاى !!؟؟
أنت بس إرجع و ملكشى دعوة
المهم إنك تكون مبسوط
و تعجبك الفيلا
و حارس الفيلا
يا روح قلب مامت ... صاحب الفيلا
و اللى مبتحبش فى الدنيا حد
أد ما بتحبك
ماما

ب ... ب ... ب  

Posted by: فاتيما in

من كام يوم و انا مروحة ... عديت على كوبرى قصر النيل
و على جنب بتلفت بعينى ... شوفت البرج
برج القاهرة ... فاكره ؟؟
اوعى تقول مش فاكر ... دنا كنت بشاورلك عليه فى الأفلام العربى ؟؟
و أقولك لما نرجع هبقى اخدك و نروحه عشان تشوف مصر كلها من فوق
هاه ... إفتكرته ؟؟؟
صحيح الوقت سرقنا و ملحقتش انفذ وعدى ليك
بس دلوقتى كل ما بعدى على البرج بتجينى فكرة
حبيت اقولهالك ... يمكن تعجبك
إيه رأيك يا روح ماما ؟؟ ... لما ترجع من عند بابا
نروح سوا البرج
بس قبل ما نروح ... هنشترى بالونات كتييييييير قوى
عشان نطلع نطيرها من فوق
أنا عملت حسابى و إشتريت منفاخ ننفخ بيه البالونات
عشان نفسنا مينقطعشى
و كمان كل شوية أشترى بالونات عشان تكفينا
أصلنا محتاجين عدد كبير قوى
ليه ؟؟
أصلنا بعد ما ننفخهم كلهم
هنسميهم أسامى
بالونة إتنين منهم هيكونوا للزعل ... لو كنت زعلان منى
بالونتين تلاتة هيكونوا للغضب و الغيظ ... من الفرقة اللى إتفرضت علينا
تلات أربع بالونات للحزن .. اللى هاجمنا من كل إتجاه
و كام بالونة كمان للخوف ... اللى عشنا فيه كل العمر اللى فات
و كمان هننفخ بالونات
بعدد الشهور اللى عدت من لحظة ما روحت لباباك
و كل مناسبة فاتت و إنت مش معايا
بالونة لعيد ميلادك العاشر
و واحدة لعيد ميلادى اللى فات ... و واحدة كمان للى جاى
و بالونة للعيد الكبير و إتنين للعيد الصغير
واحدة لراس السنة اللى عدت
و واحدة لمولد النبى
كمان 30 بالونة بعدد ايام شهر رمضان
بالونتين لعيد الام
و إتنين عشان شم النسيم
و بالونات كتير كتيييييير ... لكل يوم صحيت فيه
من غير ما اطل فى وشك
و أطمن عليك و أقولك صباح الخير يا قطتى
هنلم كووووووووول البالونات دى
و نطيرها من فوق البرج
يقوم الهوا ياخدها وتبعد بعيييييييييد
بعييييييييييييييد
و يبعد معاها كل الحزن
و الغضب و الزعل .... و كل حاجة ضايقتنا
و بعد ما نتاكد إنها خلاص
راحت بعيييييييد
نقعد نضحك على منظرها و نفكر هيا هتروح فين بعد كدا ؟
بس كمان مننساش نحمد ربنا الاول
ونطلب منه إننا منجيش فى يوم من الأيام ... نطير غيرها تانى
و كمان نقول يا رب
إن كل ولد و مامته يرجعوا لحضن بعض من تانى
و يا ريت ميبعدوش لاى سبب
إيه رأيك فى الفكيرة دى ؟؟!!
أنا متأكدة إنها هتعجبك ... صح ؟؟
قولى رأيك بصراحة
أوعى تكون بتضحك عليا فى سرك
و تقول ماما دى ست غريبة
أوعى ... طب يعنى ممكن تقول كدا مش هضايق قوى
بس ممكن لو سمحت تقول حاجة تانية كمان
قول ماما أصلها بتحبنى زيادة شوية
و أنا أصلى واحشها زيادة شوية
و إن نفسها ترجع تلعب معايا زى زمان
و قول برضو إن ماما بتدعيلى دايما
إن ربنا يحفظنى من أى شر
و بتقول يا رب تحرس يوسف و تصونه فى كل مكان يروحه
و حتى لو مكنش قاعد معاها
و حتى لو مرجعش لحضنها من تانى
و لو مينفعشى خلاص ... بلاش مشوار البرج
و لا البالونات
و بس هيا هتفضل تدعي ....يا رب
يوسف يبقى كويس
يبقى يا رب
كويس

ب ... ب ... ب

برج

بالونات

بحبك

تاج من عروسة البحور  

Posted by: فاتيما in ,

تاج
بعد كل هذوها العمر ؟؟
متستغربوش
الواحد أصله حاسس إنه فى التدوين بقاله زمن طوييييل
و بعدين أنا يتبعتلى تاج ليييييه ؟؟
طب دنا أساساً و بالذات دونا عن كل البشر اللى مدلدقة و معترفة بكل حاجة ؟!!
هوه فيه حاجة لسه مقلتهاش ؟!!
طيب... حيث إنى كنت داخلة على إكتئاب خفيف من الدرجة التالتة
و حيث كنت ناوية ارزع بوست كئيب من بتوعى ..
بس تراجعت و قولت اخليه بعد يوم المكتبة
و حيث إنى القريحة أصلاً ناضبة و قاطعة النفس
و حيث إن عروسة البحور اللى هيا دودو عاشقة الرومانسية
تبقى هيا اللى مباصيهولى و البنت متوسمة فيها خير
و حيث إنى مقدرش أردلها طلب
عشان كل الحيثيات دى
اجاوب و معلشى إستحملونى
إسمك
فاطمة الزهراء الشهيرة بفاتيما
الأسم المشهورة بيه وسط اصحابك
فاطمة - امل - فاتيما
سنك ؟
36
هتمهم فى مايو لو ربنا إدانا عمر
مجال دراستك ؟
مكتبات ... اخصائية مكتبات ... أمينة مكتبة من الآخر
إسم مدونتك ؟
روح قلب ماما
صورتك الرمزية فى المدونة بتعبر عن ؟إيه ؟
عن قصتى انا و روح قلبى يوسف
على فكرة كنت بقف الوقفة دى كتير لما كنت انا و يوسف لوحدينا
كنت بشيله و أقف نبص سوا من الشباك على الدنيا و أقول فى سرى
امتى هنعيشها سوا ...و لا زلت أسأل نفس السؤال لكن للأسف ...لوحدى
هل فكرت فى إغلاق مدونتك ؟ و السبب ؟
فكرت طبعا ..قولت لو المدونة عملتلى مشاكل قانونية مع اهل طليقى
يبقى ساعتها هضطر أقفلها ...كان تفكير عبيط وقتها
و لو حصل مشاكل دلوقتى ممكن امسح اللى يقلقنى و أسيب الباقى
و حاليا لا أفكر مطلقاااااا فى غلقها و ربنا يحيينا و لا نضطر أبدا
إيه رد فعلك لو حد قل ادبه عليك فى المدونة ؟
الاول هاخد نفس طويييييييل و اغير المحطة .. قصدى أمشى بعيد حبتين
و أرجع أرد على الكلام البايخ ... و خلاص بقى عندى شبه مناعة
من ردود الأفعال المعاكسة لرأيى
اللى عاوز يقول حاجة يقولها .. حتى لو رخمة مجراش حاجة
هوه اللى بكتبه قرآن يعنى و محدش المفروض يناقشه و لا يعترض عليه ؟؟؟!!!!
أسوأ مدونة دخلتها ؟
كذا واحدة ... كانت مدونات لمثليين و مثليات
حسيت إن الحكاية صعبة قوى و خوفت على إبنى قوى
هيحصل إيه للأيميلات بعد ما تموتى ؟
الواد اخويا ماجد غالبا اللى هيدخل يرد عليها لأن معاه الباسورد
و متهيألى هيكمل هوه فى المدونة و لو شوية .. عشان خاطرى
محبة و اخوية يعنى و هيحافظ عليها عشان يوسف يشوفها
إديت الباسورد لحد قبل كده ؟
ما قلنا الواد ماجد اخويا
السفر بالنسبالك ؟
مبحبوش قوى ... مجرد وسيلة تنقل مش اكتر
لو لرؤية حبيب ماشى يسعدنى ... لكن مش متعة .. سفر يعنى غربة
و الغربة عندى قاتلة ... ذكريات السفر عندى أرتبطت بالهروب و البعد
المود بتاعك إيه ؟
غالبا
مبتهجة.... متفهموش ليه مع إنى مفروض مبقاش كدا
و متفائلة .... بهبل غريب ملوش مبرر
و مشتاقة ..... طول الوقت لحد بستناه
و خايفة ..... حتى لو زالت الأسباب
و حزينة ..... حتى لو فيه اللى يفرحنى

بتعمل إيه فى اوقات فراغك ؟
غالبا بعمل حاجات عبيطة ... و بتبقى جوا البيت و تخص يوسف
لما بلاقينى فاضية بقعد اغير فى شكل مدونته ... بقعد اطلع اللعب بتاعته
الجديدة أوضبها و أرتبله الجزء بتاعه فى الاوضة اللى مسمياه فيلا يوسف
و أقعد أعلق حاجات على الحيطة ... حاجات من هذا القبيل يعنى ....
الاكلة المفضلة ؟
الشكولاتة .. الأيس كريم ..الحلويات عموما .. البيتزا .. الرز بالخلطة
صوانى المكرونة و الكوسة و البدنجان اللى عليها بشاميل
بصوا أى حاجة تزود فى الوزن و خلاص
الصفات اللى أخدتها عن والدك ؟
عينيه - تهوره - أنانيته - جاذبيته - طريقته فى الحب
حبه للكتابة و قراية الجرايد و الكتب
الصفات اللى اخدتها من والدتك ؟
دماغها الناشفة - إبتسامتها - حظها من الدنيا
أكتر 6 حاجات بتكرههم ؟
ستة بس ؟؟ طيب
من واحد لخمسة بكره ... بعد يوسف عنى
و بعدين رقم ستة .... الظلم
مش هقول باقى النواقص زى الكدب و النفاق و ... و ....
عشان كل الناس تقريبا بتكرهها و انا زيهم
أكتر 6 حاجات بتحبهم ؟
برضو ستة ؟!! ... طييييييب
من واحد لألف ... يوسف
و بحب العيال الصغيرة عموماً
و القطط
و البحر
و الشيكولاتة
و الشتا و المطرة و الشوارع
و الليل بوحدته و سكونه
و الشعر و الموسيقى و الغنوة الحلوة
و الحضن الحلو من حد بيحبنى قوى ... وأكون وحشته بجد
و كل حاجة ربنا خلقها عشان نحسها و نستمتع بيها
شخصيتك نوعها ايه ؟؟
ع الريحة سكر خفيف
إيه يا اخواننا السؤال الغريب ده ؟؟!!
نوعها إيه ؟؟
مش عارفة اجاوب إزاى ؟؟ .. بس طب يعنى منكن تقولوا على شخصيتى عادية
أنا بنى آدمة عادية خالص ... مجنونة و طقة ساعات ... و كئيبة و باردة ساعات
و بحب الدنيا و مقبلة عليها ساعات ... و نفسى قافلة من كل حاجة فيها ساعات
بحب ربنا و بقصر فى حقه كتير ... وبحاول أرجع ألم شتاتى و اتعدل من تانى ساعات
شخصية عادية جدا ... زى كل الناس
لماذا دخلت التدوين من الأساس ؟
نصيب أولاً و قبل كل شىء ... لكن السبب الأساسى
كان الهروب من الوحدة الرهيبة
اللى عانيت منها بعد رحيل يوسف ... التدوين كان ملاذ و ملجأ
كيان إتكلم فيه مع ناس أساسى إنى معرفهاش .. و مش لازم يردوا عليا
بس المهم إنى اكتب عشان متعبش و حنينى يقتلنى
اجمل كلمة قيلت فى وصف مدونتك ؟
كلام كتير قوى الحمدلله ... أنا محظوظة بيكم قوى
اهمية التعليقات بالنسبة لك إيه ؟
مهمة جدا طبعاً ...التعليقات عندى يعنى
التواصل و الحميمية
و النصايح والتشجيع
و الطبطبة و الصحصحة وقت الغلط
و الحب الغير مشروط من غير هدف و لا غرض
و الدعااااااااء..... دا بقى كوم لوحده
أحلى بوست كتبته ؟مع لينك له و السبب ؟
كتير ... اليوسيفات
تقريبا كلها
وخصوصا بوستات ذكرياتى مع يوسف
من العالم الخيالى احدثكم
بتحصلى ساعات
خطيب ماما
شفت العصفورة
كتاب الأغانى
هدهود مش هيقول
كل حاجة فيها اسم يوسف بحبها
أفضل مدونة قرأتها ؟
كل شوية اكتشف حاجات فى منتهى الجمال
مينفعشى أقول حاجة و أسيب حاجة ... كل مدونة بدخلها و بتعجبنى
مببطلش أزورها
السؤال ده صعب حصر إجابته
أفضل بوست قرأته ؟
برضو دا سؤال يصعب تلخيص اجابته ...بوستات كتير و لناس كتير
مقدرش احصرهم مهما حاولت
الشغل بالنسبه لك ؟؟
هوه إحنا لاقيينه ... بصوا أنا من أنصار عمل المرأة و لو حتى و هيا قاعدة فى بيتها
الشغل بيعمل تغيير فى شخصية الواحدة و المفروض يكون للاحسن طبعاً
و إستقلال مادى مفيهاش كلام ... بس حتى لو فيه فلوس الشغل برضو مهم
العمل شكل من أشكال العبادة فعلاً مش مجرد عبارة او أكليشيه
الإنترنت بالنسبة لك ؟
بقى جزء أساسى من حياتى ... و الحمدلله إنه مش بيضيع فى الهيافات
تمرر التاج لمين ؟
احبابى معزوش عليهم .. اللى حابب يتفضله
بس بناء على طلب خيختى حبيبتى
اللى لما تطلب طلب ... يبقى أمر و قلبى ما يستجريش يتكلم بعده
اهديها التاج ده تلبسه و تورينا قد إيه هيلمع و ينور فوق جبيبنها
و إنا متاكدة من كدا من غير تفكير
و كل تاج و إنتوا طيبين
و يا ريت محدش تسول إليه نفسه إنه يحدفلى تاجات تانى
عشان انا قولت كل حاجة خلاص أهو
ده مش ناقص غير الأسم الرباعى و الرقم القومى بقى
سلام