.

.

تاج من عروسة البحور  

Posted by: فاتيما in ,

تاج
بعد كل هذوها العمر ؟؟
متستغربوش
الواحد أصله حاسس إنه فى التدوين بقاله زمن طوييييل
و بعدين أنا يتبعتلى تاج ليييييه ؟؟
طب دنا أساساً و بالذات دونا عن كل البشر اللى مدلدقة و معترفة بكل حاجة ؟!!
هوه فيه حاجة لسه مقلتهاش ؟!!
طيب... حيث إنى كنت داخلة على إكتئاب خفيف من الدرجة التالتة
و حيث كنت ناوية ارزع بوست كئيب من بتوعى ..
بس تراجعت و قولت اخليه بعد يوم المكتبة
و حيث إنى القريحة أصلاً ناضبة و قاطعة النفس
و حيث إن عروسة البحور اللى هيا دودو عاشقة الرومانسية
تبقى هيا اللى مباصيهولى و البنت متوسمة فيها خير
و حيث إنى مقدرش أردلها طلب
عشان كل الحيثيات دى
اجاوب و معلشى إستحملونى
إسمك
فاطمة الزهراء الشهيرة بفاتيما
الأسم المشهورة بيه وسط اصحابك
فاطمة - امل - فاتيما
سنك ؟
36
هتمهم فى مايو لو ربنا إدانا عمر
مجال دراستك ؟
مكتبات ... اخصائية مكتبات ... أمينة مكتبة من الآخر
إسم مدونتك ؟
روح قلب ماما
صورتك الرمزية فى المدونة بتعبر عن ؟إيه ؟
عن قصتى انا و روح قلبى يوسف
على فكرة كنت بقف الوقفة دى كتير لما كنت انا و يوسف لوحدينا
كنت بشيله و أقف نبص سوا من الشباك على الدنيا و أقول فى سرى
امتى هنعيشها سوا ...و لا زلت أسأل نفس السؤال لكن للأسف ...لوحدى
هل فكرت فى إغلاق مدونتك ؟ و السبب ؟
فكرت طبعا ..قولت لو المدونة عملتلى مشاكل قانونية مع اهل طليقى
يبقى ساعتها هضطر أقفلها ...كان تفكير عبيط وقتها
و لو حصل مشاكل دلوقتى ممكن امسح اللى يقلقنى و أسيب الباقى
و حاليا لا أفكر مطلقاااااا فى غلقها و ربنا يحيينا و لا نضطر أبدا
إيه رد فعلك لو حد قل ادبه عليك فى المدونة ؟
الاول هاخد نفس طويييييييل و اغير المحطة .. قصدى أمشى بعيد حبتين
و أرجع أرد على الكلام البايخ ... و خلاص بقى عندى شبه مناعة
من ردود الأفعال المعاكسة لرأيى
اللى عاوز يقول حاجة يقولها .. حتى لو رخمة مجراش حاجة
هوه اللى بكتبه قرآن يعنى و محدش المفروض يناقشه و لا يعترض عليه ؟؟؟!!!!
أسوأ مدونة دخلتها ؟
كذا واحدة ... كانت مدونات لمثليين و مثليات
حسيت إن الحكاية صعبة قوى و خوفت على إبنى قوى
هيحصل إيه للأيميلات بعد ما تموتى ؟
الواد اخويا ماجد غالبا اللى هيدخل يرد عليها لأن معاه الباسورد
و متهيألى هيكمل هوه فى المدونة و لو شوية .. عشان خاطرى
محبة و اخوية يعنى و هيحافظ عليها عشان يوسف يشوفها
إديت الباسورد لحد قبل كده ؟
ما قلنا الواد ماجد اخويا
السفر بالنسبالك ؟
مبحبوش قوى ... مجرد وسيلة تنقل مش اكتر
لو لرؤية حبيب ماشى يسعدنى ... لكن مش متعة .. سفر يعنى غربة
و الغربة عندى قاتلة ... ذكريات السفر عندى أرتبطت بالهروب و البعد
المود بتاعك إيه ؟
غالبا
مبتهجة.... متفهموش ليه مع إنى مفروض مبقاش كدا
و متفائلة .... بهبل غريب ملوش مبرر
و مشتاقة ..... طول الوقت لحد بستناه
و خايفة ..... حتى لو زالت الأسباب
و حزينة ..... حتى لو فيه اللى يفرحنى

بتعمل إيه فى اوقات فراغك ؟
غالبا بعمل حاجات عبيطة ... و بتبقى جوا البيت و تخص يوسف
لما بلاقينى فاضية بقعد اغير فى شكل مدونته ... بقعد اطلع اللعب بتاعته
الجديدة أوضبها و أرتبله الجزء بتاعه فى الاوضة اللى مسمياه فيلا يوسف
و أقعد أعلق حاجات على الحيطة ... حاجات من هذا القبيل يعنى ....
الاكلة المفضلة ؟
الشكولاتة .. الأيس كريم ..الحلويات عموما .. البيتزا .. الرز بالخلطة
صوانى المكرونة و الكوسة و البدنجان اللى عليها بشاميل
بصوا أى حاجة تزود فى الوزن و خلاص
الصفات اللى أخدتها عن والدك ؟
عينيه - تهوره - أنانيته - جاذبيته - طريقته فى الحب
حبه للكتابة و قراية الجرايد و الكتب
الصفات اللى اخدتها من والدتك ؟
دماغها الناشفة - إبتسامتها - حظها من الدنيا
أكتر 6 حاجات بتكرههم ؟
ستة بس ؟؟ طيب
من واحد لخمسة بكره ... بعد يوسف عنى
و بعدين رقم ستة .... الظلم
مش هقول باقى النواقص زى الكدب و النفاق و ... و ....
عشان كل الناس تقريبا بتكرهها و انا زيهم
أكتر 6 حاجات بتحبهم ؟
برضو ستة ؟!! ... طييييييب
من واحد لألف ... يوسف
و بحب العيال الصغيرة عموماً
و القطط
و البحر
و الشيكولاتة
و الشتا و المطرة و الشوارع
و الليل بوحدته و سكونه
و الشعر و الموسيقى و الغنوة الحلوة
و الحضن الحلو من حد بيحبنى قوى ... وأكون وحشته بجد
و كل حاجة ربنا خلقها عشان نحسها و نستمتع بيها
شخصيتك نوعها ايه ؟؟
ع الريحة سكر خفيف
إيه يا اخواننا السؤال الغريب ده ؟؟!!
نوعها إيه ؟؟
مش عارفة اجاوب إزاى ؟؟ .. بس طب يعنى منكن تقولوا على شخصيتى عادية
أنا بنى آدمة عادية خالص ... مجنونة و طقة ساعات ... و كئيبة و باردة ساعات
و بحب الدنيا و مقبلة عليها ساعات ... و نفسى قافلة من كل حاجة فيها ساعات
بحب ربنا و بقصر فى حقه كتير ... وبحاول أرجع ألم شتاتى و اتعدل من تانى ساعات
شخصية عادية جدا ... زى كل الناس
لماذا دخلت التدوين من الأساس ؟
نصيب أولاً و قبل كل شىء ... لكن السبب الأساسى
كان الهروب من الوحدة الرهيبة
اللى عانيت منها بعد رحيل يوسف ... التدوين كان ملاذ و ملجأ
كيان إتكلم فيه مع ناس أساسى إنى معرفهاش .. و مش لازم يردوا عليا
بس المهم إنى اكتب عشان متعبش و حنينى يقتلنى
اجمل كلمة قيلت فى وصف مدونتك ؟
كلام كتير قوى الحمدلله ... أنا محظوظة بيكم قوى
اهمية التعليقات بالنسبة لك إيه ؟
مهمة جدا طبعاً ...التعليقات عندى يعنى
التواصل و الحميمية
و النصايح والتشجيع
و الطبطبة و الصحصحة وقت الغلط
و الحب الغير مشروط من غير هدف و لا غرض
و الدعااااااااء..... دا بقى كوم لوحده
أحلى بوست كتبته ؟مع لينك له و السبب ؟
كتير ... اليوسيفات
تقريبا كلها
وخصوصا بوستات ذكرياتى مع يوسف
من العالم الخيالى احدثكم
بتحصلى ساعات
خطيب ماما
شفت العصفورة
كتاب الأغانى
هدهود مش هيقول
كل حاجة فيها اسم يوسف بحبها
أفضل مدونة قرأتها ؟
كل شوية اكتشف حاجات فى منتهى الجمال
مينفعشى أقول حاجة و أسيب حاجة ... كل مدونة بدخلها و بتعجبنى
مببطلش أزورها
السؤال ده صعب حصر إجابته
أفضل بوست قرأته ؟
برضو دا سؤال يصعب تلخيص اجابته ...بوستات كتير و لناس كتير
مقدرش احصرهم مهما حاولت
الشغل بالنسبه لك ؟؟
هوه إحنا لاقيينه ... بصوا أنا من أنصار عمل المرأة و لو حتى و هيا قاعدة فى بيتها
الشغل بيعمل تغيير فى شخصية الواحدة و المفروض يكون للاحسن طبعاً
و إستقلال مادى مفيهاش كلام ... بس حتى لو فيه فلوس الشغل برضو مهم
العمل شكل من أشكال العبادة فعلاً مش مجرد عبارة او أكليشيه
الإنترنت بالنسبة لك ؟
بقى جزء أساسى من حياتى ... و الحمدلله إنه مش بيضيع فى الهيافات
تمرر التاج لمين ؟
احبابى معزوش عليهم .. اللى حابب يتفضله
بس بناء على طلب خيختى حبيبتى
اللى لما تطلب طلب ... يبقى أمر و قلبى ما يستجريش يتكلم بعده
اهديها التاج ده تلبسه و تورينا قد إيه هيلمع و ينور فوق جبيبنها
و إنا متاكدة من كدا من غير تفكير
و كل تاج و إنتوا طيبين
و يا ريت محدش تسول إليه نفسه إنه يحدفلى تاجات تانى
عشان انا قولت كل حاجة خلاص أهو
ده مش ناقص غير الأسم الرباعى و الرقم القومى بقى
سلام

This entry was posted on الأربعاء, أبريل 01, 2009 and is filed under , . You can leave a response and follow any responses to this entry through the .

48 كــــلام بيطــبطـــب عـــلى قــــلبى و روحــــى

باشكرك بشده وألحاح
على اجابه التاج
ولو بايدى اجيب لك تاج ألماس

طيب ما حطتيش الاسم الرباعى والرقم القومى ليه؟
هههههههههه
اول مره اعرف موضوع ان اسمك امل ده
بس حلو احسن من الكئابه

إديت الباسورد لحد قبل كده ؟
ما قلنا الواد ماجد اخويا
*****************
طيب بلاش تذق يامعلم كده واحده واحده علينا
هههههههههههههههه


منكن تقولوا على شخصيتى عادية أنا بنى آدمة عادية خالص
***********************
مين دى اللى عاديه
انتى سوبر فاتيما ياحبيبتى
ياريت كل الناس تكون عاديه كده
(:


الصفات اللى اخدتها من والدتك ؟
حظها من الدنيا
***********************
وبشر الصابرين



البوست رغم انه فيه كتييييير جدااااااااا
من خفة الدم الا انه ملياااااااان شجن وحزن
ولا انا اللى حاسه بكده بس؟
ربنا يرد لك يوسف ويقر عينك بيه يااااااااااااارب

بحــــــــبك

فاتيما
وحشتينى أوووووووى بجد
كل شوية ابص عالريدر اشوفك نزلتى جديد ولا لأ
كنت محتاجه اقرالك اوى وبدور عليكى انتى بالذات
بصراحة اول مرة احس الاحساس ده مع حد


عجبتنى اوى الحاجات اللى بتحبيها والحاجات اللى بتكرهيها

ربنا يرجعلك يوسف بالف سلامة يارب يارب يارب

دودو بيسلم على يوسف
وكل ما يشوفنى دخلت مدونتك يقوللى "آف إين ؟"
والترجمة .. " يوسف فين ؟"

سلام يا غالية
متتأخريش تانى
بحبك اووووووووووى

ميرسي اوي لعاشقه عشان مررتلك التاااج

بجد الحجات الي قريتها ماخلتنيش غير اني بحبك اكترررررر

ربنا يكرمك يا قمر ياااااارب ويرجعلك يوسف لحضنك

وعقبال تاج كده في الريقم القومي ورقم البطاقه ونزل صورتك :D

هههههههه

ربنا يخليكي ياقمره

وماتنسيش تردي عليا ف موضوع البرنامج

هو التاج ده كاس وداير ولا اييييييه

تاج جميل يا جميل ولايق عليكى موت

انا فرحانة ان التاج مر ليكى ..

لانى كنت احباشوف اجاباتك ..

وما شاء الله كلها عاقلة وعسولة زيك ..

ربنا يبارك فيكِ ويبارك لك فى يوسف ويقرب لك البعيد ..

دمتِ بخير ..

انتى سكرايه واله
التاج بيقول ان وراه دماااااغ
وياروح قلبى مرحة رغم كل اللى مريتى بيه
ربنا يسعدك وينورلك عينك دايما بيوسف
اول مرة اجيلك واستمتعت عندك جدا
ولذا فرمان ملكى ممنا نحن مدونة شقاوة قلم ان قلمنا الشقى سيمر عليكم كثيييييرا
تقبلى مرورى يافاتيما

التوقيع
ملكة بحجابى

مامتي
كل تاج وانت يبخير شفتي بعتللك تاج ازاي وانا اللي كنت حبعتهوللك يالا خيرها في غيرها
وحشاني جدا
بلنوسبة للمدونة تتابعيها خليكي في حروف في عالم خيالي دية الرئيسية
بحبك
دمتي بالف خير وصحة

حلوة الاجابات خصوصا احسن 6 حاجات بتحبيهم
وكمان الاكلات الفضلة

هههههههههههه

دة أول تاج عملته في حياتي
:)
فرحت أوي لما شفته تاني :)). بس مش هقدر أعلق دلوقتي

هرجع تاني قريب إن شاء الله

فاتيما
اول مرة اتعرف على شخصيتك الحقيقية و الشكر لعاشقة اللي دبستك في التاج
سيدتي
يظهر من اجاباتك الحزن الكبير الذي خلفه غياب يوسف في حياتك
اتمنى رجوع الغيبين يا رب و تشعري بالامان في حضنه
اسعدني جدا التعرف عليك بجد
مودتي

هو في حد في الدنيا بيحب القططط زي أنا؟
بجد كان نفسي اشوفكم بس هيه نصيب

إن شاء الله ملحوقة
بنى أدمة عادية بس طيبة ومش بتحب تكسف حد
لينا لقاء بإذن الله

انا بحب التاجات اللى من النوع ده اوى
اللى هى تبقى اسئلة شخصية فى معاميق الواحد


استغربت من حكاية انك واخدة من مامتك حظها من الدنيا
وكمان واخدة من باباكى انانيته
حسيت ان باباكى كان راجل جامد مع مامتك

رغم انى كنت متخيلة ان مامتك جامدة وباباكى حنون بحكمة مش بهبل


مدية الباس وورد لاخوكى؟؟؟؟؟؟؟؟؟؟

قبل موضوع يوسف
ياترى كنتى بتحبى السفر عادى
وموضوع يوسف وغربتك معاه هو ده اللى خلاكى تغيرى وجهة نظرك
ولا انتى من الاساس مش بتحبى السفر؟


حلوة الصورة لايقة مع العنوان جدا



سلام
يا فاتيما


اختك خيخة

انا عايزة التاج ده
بس مش عايزاه كدة وخلاص
عايزاك تعملى تحديث للبوست وتكبى اسامى تديهم التاج وانا اكون من ضمن الاسامى اللى هتكتبيها

كلامك يدل على طيبة قلبك

عاشقة الرومانسية
يا بنتى بتشكرينى على إيه ؟
إنتى يا ستى مينفعشى أرفضلك طلب
على فكرة إنتى قارئة ممتازة لما بين السطور و بتعرفى تعبرى صح عن المشاعر
كلمة الشجن هيا اللفظة المناسبة لحالى
يعنى الحزن ممزوج بالفرح و محدش منهم غالب على التانى ...
أنا كمان بحبك يا دودو




حاجات جوايا
إنتى كمان يا سالى ...
إنتى جارتى من البدايات فى المدونة دى
و غلاوتك عندى كبيرة و و العشرة الى تولدت ما بيننا عبر الأيام هيا اللى خلت عندك الإحساس الجميل دا
إنى اوحشك و تبقى عايزة تطمنى عليا
بوسيلى دودو قوى قوى قوى لحد ما ييجى يوم و أشوفه ...
يا رب تشوفيه فى احسن حال دايما و تشيلى عياله و تجوزيهم كمان
أنا كمان يا حبيبتى بحبك قوى



mony elshreef
يا ستى عاشقة مبيجيش من وراها غير كل خير و ناس زى الفل زيك ...
و بعدين فعلا مش فاضل غير التلات حاجات دول يا مونى بجد ...
موضوع البرنامج منا قولت تحت امرك يا مونى بس إنتى عارفة إنى بتواصل عبر الأيميلات بس ... يعنى لو عاوزة تبعتلى أى اسئلة عليكى و على إيميلى و هرد عليكى إن شاء الله بسرعة و كما تتمنى
معلش أنا عارفة إن حكاية رفضى للماسنجر و التليفونات دا سخيف جدا بس يا ريت تعذرينى و تتقبلى طريقتى فى التواصل ...
خالص حبى ليكى يا مونى



صبرنى يا رب
الله يكرمك يا صبرنى
دايما كدا رافعة نعنوياتى من الحديد
بوسيلى القمرين بتوعك



لجين أبو الدهب
متأدكة يا لجين إنها كلها عاقلة ؟!!
يا بنتى دنا اكتى واحدة بعترف بتهورى و جنانى ...
يمكن شايفنى بعين المحب بقى
ميرسى يا حبيبتى على الدعوة الحلوة
و ربنا يتقبل منك و دمتى إنتى كمان بألف خير


ملكة بحجابى
إنتى اللى سكراية يا ملكة
لا دماغ و لا حاجة دا دماغى دى اللى مغلبنى وراها ...
أهلا بيكى دايما و بقلمك الشقى
تنورا فى كل وقت



حروووووف
يا خرابى على مامتى دى !!!!
حلوة قوى يا حروف ...قوليها دايما يا بنوتة يا جميلة إنتى ....
إنتى ميجيش منك غير الخير يا قطتى
آه صحيح اخبار القطاطيط إيه معاكى ؟
و ماشى خلينا فى حروف و عالمها الخياى الحلو زيها ...
أنا كمان يا أحلى بنات إسكندرية بحبك



adel
الله يكرمك يا عادل
كلك ذوق و إتفضل التاج هدية منى
لما نشوف اجاباتك هتكون إزاى
خالص ودى و احتراماتى



wish i were abutterfly...
معقول ؟!!!
هوه التاج دا من بدرى و أنا مش واخدة بالى ؟!!!
طيييييييب
هستناكى يا حبيبتى
يا من غير ما توشى بترفلاية رقيقة صغننة



assafo anaroze
إحساسك فى محله يا أسافو
و شكراً لمشاعرك الطيبة و دعواتك الحلوة ...
بس قولى بقى ...إنتى بتتكلم مصرى كويس قوى كدا أزاى ؟!!!
ساعات بيتهيألى إنك مصرى
صحيح الحكاية دى و لا انا غلط ؟
فى إنتظارك دائما يا عزيزى


ست البيت
انا كمان كان نفسى تيجى و أشوفك
بس ملحوقة إن شاء الله فى الجايات
و لو كنتى جيتى يا ستى كنتى هتلاقى منافسين غيرى فى حب القطط
هنودة و حرووووف معانا فى الادمان دا



بت خيخة و أى كلام
و الله يا خوخة ما يغلى عليكى
و أدينى عملت تحديث يا ست الستات و فى انتظار هلتك علينا بالتاج عشان تزيديه جمال و بهاء باجاباتك ...
و لازم تنكشينى يعنى ...
بابا كان جامد معانا كلنا
مش ماما بس ...
بس كان حبيب كبير قوى قوى
كان مشيبنا يا بنتى
عشان كدا كنت بحس ان ماما حظها كان قليل حبتين ...
و مدية الباس ورد لماجد عشان بثق فيه و الواد بيحترمنى يعنى مش هيعمل فيا حركة غدر من اى نوع ...
و بعدين إيميلى مفيهوش أى حاجة دنا بقعد احكيله و هوه يقولى لخصى و مش مركز أساسا معايا ...أصل أنا بتعامل معاه على إنه إبنى يا خوخة ...
عارفة إنتى الاحساس دا ...
الصحوبية و مفيش نظام قلق و خوف
و غلاسة الاخوات الرجالة
و الحاجات دى ...
قبل موضوع يوسف كان السفر عادى ..
يظهر إنى اتعقدت منه لن بقى معناه بعدى عن مكانى و احبابى ...
الظاهر كدا
نورتينى يا حبيبة قلبى
و بوسة و حضونة
بس دا لا يمنع إنى لما أشوفك يوم الجمعة إن شاء الله
إنى أبقى برضو اضربك عشان المقلب بتاع اول ابرير يا هانم


راجى
متحرمشى يا أستاذ راجى
كلك ذوق و نورتنى

مبروك التاج
وكل تاج وانتى طيبة
بس كعادتك دائما صريحة
والصراحة راحة
المود بتاعك إيه ؟غالبا مبتهجة.... متفهموش ليه مع إنى مفروض مبقاش كدا و متفائلة .... بهبل غريب ملوش مبررو مشتاقة ..... طول الوقت لحد بستناه
و خايفة ..... حتى لو زالت الأسباب
و حزينة ..... حتى لو فيه اللى يفرحنى
سبحان الله
تحياتى وتقديرى

ماما فاتيما
جميلة الإجابات بجد
دايما بحس بقلبك الأبيض فى كل كلمة ليكى
دمتِ بكل الود

انا بحبك اوي ونفسي اخدك في حضني

ياااااااااه تاج جميل والاجمل هو روحك اللي في الاجابه واللي حسيت انك قاعده قدامي وبتتكلمي عادي وبرد عليكي

فاتيما
انا الاسعد بتواصلي مع مدونتك
انا مغربي بس خايف لا ينقطع التواصل و ما وصلش خطابي كويس
اللغة وسيلتها الاساسية التواصل و انا اصلا بحب المصرية و احب اني اتواصل بها
مودتي

والله ماكنت اعرف ياقمر

خلاص ماشي

انا هبعتلك الاسئله ان شاء الله قريب

اخلص من التاجات بس

ميرسي اوي ياقمر

ممممموووواه

نورتي التاج يا فاتيما و نور أكتر بيكي..مع اني كنت فاكرة انك قلتي كل حاجة عنك بس بجد التاج دة وراني حاجات
أكتر و أجمل..عقبال التاج الجاي يا قمر
حبي و تقديري

اولا ازيك .. ووحشتيني جدا

التاج جميل
وانتي جميلة جدا وواضحة وصريحة

نفسي حد يقول لي يعني إيه تاج بالعربي

مش إنتي تخصص مكتبات؟ دوري وقوليلنا يقى

ان شاء الله يوسف يرجع لحضنك
بالمناسبة وزنك كام كيلو دلوقتي من كل الاكلات دي!

همس الأحباب
منت عارفنى يا خالد
متناقضة بشكل مزعج
كان لازم احط الكلمة دى
سلملى على همس و مامتها قوى لحد ما نشوفك يوم الجمعة بإذن الرحمن
و إعتبر نفسياتك متدبس فى التاج دا
غلاسة و خلاص



mohamed ghalia
الاحلى ألف مرة من الاجابات و التاج
كلمة ماما فاتيما دى
ربنا يسعدك يا محمد و أشوفك دايما فى الخير ...و سلامنا لبطوط حبوب
مش تقول يا بنى إنه قريبك !!!
عشان نحدفله سلام دايما



كيارا
وحشتنى يا ست البنات ...
كنتى غطسانة فين ؟؟
خلاص يا ستى ... ليكى منى حضونة مخصوص من بتوع يوسف
خلى بالك هاه
من بتوع يوسف مش أى حاجة
و إعتبرى التاج موصوفلك و جاوبى يا قمراية



assafo anaroze
كدا يا أسافو ؟!!!
بقى أنا قولت فرصة تعلمنا اللهجة بتاعتك و ناخد منها كام كلمة ..
تروح إنت قالب على المصرى
طيب
بس إبقى غدينا كام كلمة كدا ثقافة عامة و كمان لحسن ننسيك المغربى ...
سلامى لاهل بلد من اجمل بلاد العرب
خالص ودى أنا ايضا



mony elsreef
و لا يهمك يا مونى
ما قولتلك إن العيب عندى أنا
فى إنتظارك يا حبيبتى
و جاوبى التاج دا كمان مع تيجانك التانية
بوسة و حضونة يا حبيبتى



dahlia
طب يا ستى جاوبيه بقى و ورينى هينور جبينك أزاى ...
بوسة و حضونة كبيييييرة من القاهرة لإسكندرية



kochia
أزيك إنتى يا كوشكش
إنتى كمان وحشانى و مقصرة معاكى قوى
قوى
قوى
سامحينى
و طالما التاج جميل ...خديه منى و جاوبيه يلا


يا مراكبى
إيه يا باشمهندزززززز
بتدبسنى يعنى و لا إيه النظام ؟؟؟!!
بس مش هينفع برضو
عارف ليه ؟؟؟
المشكلة إنك بتكلم امينة مكتبة
و بنت صحفى كمان فوق البيعة
يعنى و أنا قاعدة قصاد الجهاز دلوقتى برد عليك و جنب منى مكتبة من الأرض للسقف مليانة كتب و مراجع
و من ضمنهم المعاجم و أشباهها ....
و الله ما هكسفك و لازم اقولك
إستنى كدا و هرجعلك ....
.....
.............
.......................
بص يا فندم
محيط المحيط بتاع الاخ بطرس البستانى
الله يرحمه
بيقولك يا سيدى إن التاج ليه كذا معنى ...
اولهم إنه معناه ملبس
يعنى لما حد يقول توجه .. يعنى ألبسه تاج
و التاج نفسه بقى يعنى إكليل
( و متغلسشى و تقولى يعنى إيه اكليل ...هاه )
و لما بيقولوا إن العمائم تيجان العرب
يعنى هيا ملابسها التى تزدان بها ...
و التاج كمان ليه معنى غريب قوى ...
الأسد .... غريبة قوى
يمكن عشان الفرو اللى حوالين وشه !!!؟؟؟
يمكن ...
دا من محيط المحيط يا سيدى ...
و أى خدمة سعادتك
على فكرة حاجة على جنب كدا
لما كنت بشتغل ...كان بيجيلنا
أسئلة على التليفون و نرد فيها على الناس ...
كنت بستمتع جدا بالخدمة بتاعة الرد على الأستفسارات دى ...
كنت بعتبرها أشبه بلغز و مطلوب حله
لما كنت صغيرة مكنتش شاطرة فى حل الألغاز خالص ...
بس فى شغلنا ..
الشطارة تتلخص فى طريقة البحث و إزاى توصل للمعلومة و كل المطلوب منك تبقى عارف مصادرك و إزاى تنكش فيها و تلاقى طلب السائل و توصلها للى بيطلبها و هوه يحدد عاوزها و لا لأ ...
يلا إدينا إشتغلنا ببلاش عشان خاطر عيونك ...
ربنا يباركلك يا نبع الحكمة
سلامى لفادى و مامته و كل الأسرة
و يا رب دايما علطول حسك فى الدنيا و بألف خير
سلام عشان رغيت قوى قوى كدا

تاج جميل يا فاتيما

كالعادة كل ما ادخل لازم اخرج علي الاقل مدمعة ده ان ما عيطتش

حتي التاج لقيت فيه دموع من عين بتضحك

ربن يقر عينك بابنك
و يرجعهولك سالم غانم ان شاء الله
آمين
آمين
أمين

فاتيما
كنشكرك بزاف على الكلمات ديالك فحقي
و في حق بلادي
كنتمنى دوام التواصل
مودتي

جميل التاج ده
بس ده من اقدم التاجات اللي شفتها في المدونات
:)
بصي بقى يا ستي
عايز اغلس عليكي
دي التاجات اللي عندي في المدونة

التاجات اللي جاوبتها

عايزك تروحي تختاري منهم واحد على الأقل و تجاوبيه
:)

و حتلاقيكي عارفة اغلبهم و قريتي نصهم قبل كده على الأقل

و أنا في إنتظار إجابتك على التاج اللي تختاريه من الـ 6 تاجات دول

جميله اجباتك بتدل انك انسانه حساسه وطيبة القلب

يعني عايزه إيه مش فاهم؟ إديني ملخص مش فاضيلك.

بسم الله الرحمن الرحيم
ام يوسف
ربنا يرجعهولك بالسلامه..وبجد انتى واضحه جدا وصادقه..واشكرك على زيارتى ويارب نبقى اصدقاء
وياريت تخرجى من عباءة يوسف
لانه لما يكبر شويه..هايحتاج خبرتك فى الحياه
وانا عن نفسى احب استفيد من خبرات الاخرين فى الحياه
دمتى صديقه مرحه..سعيده باذن الله

طعمية سخنة
الاول منور المدونة
ثانيا لما قريت الاسم تصورت إن المدونة لواحدة بنت او ست ...
بس لما قريت السؤال اللى فى الآخر ...
تاكدت إنك مذكر بالثلث ...
أصل مفيش واحدة تسأل واحدة وزنك بقى قد إيه أبدااااااااا
دا سؤال من المحرمات يا أستاذ
ممكن اقولك على فكرة ...
بس غلاسة منى مش هقول غير إنى مش رفيعة طبعاً و بحاول دايما اخس و مبعرفشى
اهلا بيك دايما




mony
ليه بس الدموع يا مونى ؟!!!
هوه أنا قولت حاجة ؟
اومال لما تقرى البوست الجاى هتعملى إيه ؟؟
طب بلاش تقريه بقى عشان النكد
متحرمشى من دعاكى الطيب دا ابدا
و بوسيلى العسولين الصغننين



assafo anaroze
ايو كدا يا شيخ
بزاف دى يعنى جدا ...صح
إحنا كمان كنشكرك يا أسافو
و كنتمنى تيجى دايما و ربنا يسعدلك أيامك كلها
خالص ودى




مهندس مصرى
يا محمد حرام عليك !!!
يا باشمهندز بقولكو اوعى حد تسول إليه نفسه يباصيلى تيجان تانى
تقوم برضو نفسك تسولك ؟!!!
طب بص اوعدك اختار منهم بس وقت تانى بقى
إنت جاى إمتى يا أستاذ غحنا بقينا فى أربعة أهو ؟؟؟




صمت الحنين
أشكرك يا عزيزتى
و نورتى المطرح كله




وجهة نظرى
طيب بلاش البصة دى طيب ...
إيه يا جدع هوه أنا قولت عاوزة حاجة
انا ماليش دعوة يا باشا بأى حاجة
هما ضحكوا عليا و قالولى خدى التاج دا جاوبيه و أنا معملتش حاجة و الله العظيم بريئة يا باشا ....
مفيش ملخص أعتبرها تهييسة و خلاص يا معتز ...
المهم طمنى عليك و على اخبارك إنت
مفتقداك جدا





الفراغ
يا ام المدونين حضرتك نورتى المدونة كلها و المفروض نرش مية و ورد و عطر فواح و نعلق زينة كمان
شكراً على دعاك الطيب و ربنا يستجيبلك إن شاء و يكتبلنا أنا و يوسف نصيب فيه ...
حكاية العباءة دى فيها نظر شوية
لأنى بكتب غالبا فى تلات موضوعات
يوسف
هذيانى او ما بنفسى
و التدوين و اهله
يعنى فيه حاجات تانية أهو و إن كانت كلها تدور فى فلك إبنى اللى هوه نياى كلها ...
متهيألى صعب اخرج من عباءة يوسف و إلا كان حضرتك بتطلبى منى اخرج من عباءة الدنيا كلها ...
دمتى بكل الخير و شرفتينى جداً

خلاص
وعد الحر دين عليه
:)

أنا جاي ان شاء الله يوم الجمعة 10 / 4

اجاباتك علي التاج ده تحسي انها
عفويه يعني اجابات من القلب للقلب عدل

ربنا يكرمك يارب

كل التحيه والتقدير ليكي

ايه الكلام الجامد ده يا فاتيما هانم

ربنا يسعدك ويرضى عنك ويرضكي يارب


تحياتي ودعواتي وسلامي ليوسف بك

السلام عليكم ورحمة الله وبركاته

بعد السلام أحب أقول إنى مدونتك جميلة وبجد شكلها رائع تدخل القلب بسرعة جدا سعيدة إن كان ليا نصيب وزورتها ويارب ما تعتبرنيش متطفلة ويارب بجد أكون ضيفة خفيفة ومرحب بيها .....
إجاباتك لذيذة وواضحة وشخصيتك هادية ومرحة بس مرحة بهدؤ لذيذ بصراحة أنا قرأت التاج ده عند ذا حد وأنا نفسى جاوبت عليه بس كله ليه مذاق مختلف ومذاق مدونتك زى مذاق الشيكولا والأيس كريم بجد حلوة جداً....

ربنا يخليلك يوسف وما يحرمك منه أبدا باين عليه شطور وبيحب مامته ربنا يخليكوا لبعض ويارب تشوفيه بيكبر وتفتخر بيه دوما يارب ...

تقبلى مرورى

فاتيما حبيبتى
وحشتينى قوى
اجاباتك حلوة قوى أنا قرأت كتير فى اجابات هذا التاج وانا تقريبا الدرو علىّ
بس اجاباتكك لها طعم تانى

بجد سعدت بمقابلتك
ويمكن أنا فعلا شبه الشمس فى وضوحها وأنا فعلا بحب الشمس جدا والنهار وانا كتبت كده لكن برده عاشقة للقمر

تحياتى
شيمو القمر

لقاء تدوينى يوم الجمعه 10/4
ببورسعيد اللقاء عبارة عن تجمع للتبرع للايتام المعاقين
ولقاء وتجمع تدوينى بعدها
ان شاء الله
ياريت تشرفنا
التفاصيل عندى وعند ماما امولة

فاتيما
لو ماجتيش هزعل جدا
ولا هى اسكندرية وبس؟؟
تعالى وهنفسحوكى
وهنفرجوكى كل حاجة ههههههههههه
بجد نفسى تنورينا

مساء معطر بالورد والياسمين
اجابات جميله جدا
انتى حد جميل جدا سعيده ان صدف الحياه عرفتنى بيه

ومن اجمل وأقرب الشخصيات اللى عرفتها فى التدوين وحسيت ان احنا اصحاب من قبل مااشوفها

وبتمنى دايما تدوم صداقتى بيها للابد

اجابات جميله جدا بدون اى مجامله
وتلقائيه بدون تجمل أو زيف

انتى المفروض تعملى بالصحافه لانك بتعرفى تعبرى عن مشاعرك وافكارك وايضا مشاعر وافكار البشر بطريقه حلوه


على فكره انا اشتريت كتاب انا انثى وكنت سعيده ان لكى موضوع فيه


تحياتى
أجابات مميز لشخصيه مميزه

السلام عليكم

ما شاء الله اجاباتك كلها موفقة وبها كثير من الدبلوماسية علشان ما حدش يزعل .. ربنا يطمنك على يوسف دايما ..

زيارتك اسعدتني جدا .. ودعواتك لي بتمام الشفاء ..

اسمحي لي استمتع بكتابتك الجميلة
عبد الجليل

ازيك ياقمره

انا بعتلك ميل

(=

يا الله
وحشتينى جدا
انا كنت فى اسكندرية
وربنا مقدرشى ااقعد هناك غير سواد الليل
اللى حلمت بيكى فيه
والله يا فاتيما

انا بجد
مش عارفة موضوع الاحلام معاكى
والحمد لله
التعليقات بتتفتح وقت ما بكون
هموت وااقولك على حاجة
وحشانى
ومفتقداكى
وبحبك
ونفسى فى حضنك اللى كان فى الحلم
بالله عليكى اشوفككدة قريب
ادعيلى للمشروع

وطبعا عمرى ما هعلق على التاج
انتى تاج يا فاتيما

ربنا يعزك

ايتها الفرعونية الجميلة

بحبكككككككككككككككككك

مش عايزة ابطل كلام

ادعيلى
بحبكككككك

انا مصدقت فتحت

بحبكككككككككككككككك
ووحشانىىىىىىىىىىىىىىىىىىى
واسالى علياااااااااااااااااا
انا هطحن يا فاتيما

هكونمحتجاكو كلكو

مشروع التخرج عقبال يوسف يااااااااااارب

بحبكككككككككككككككككك

وبعدين ديوانى الثانى تدعيلى فيه اوىىىىىىىىىىىى
عايزاه عشان اشوفك انتى وهدى

يا اشقاء الروح
والقلب
بحبكم

كفايةكدة

بس جوايا ليكى افتقاد كبيييييييييير

اه تعاليلى بئه مين دى اليى انانييه انتى

ازاى تقولى عنك كده وانتى وروحك ابعد ما تكونوا عن كده

دى الكلمه اليى مش فى محلها

حرام تظلمى نفسك يا فاتيما كفايه اليى هيا فيه ارجوكى

يا حبيبتى يا طيبه يا ملاك انتى

ربنا يجازيكى عن روحك الطيبه وصبرك كل الخير

مهندس مصرى
ترجع بألف سلامة يا محمد
لسه كنا جايبين سيرتك إمبارح فى يوم المكتبة
و متقوليش عملتوا إيه و مكتبتيش بوست ليه ... عشان مش عايزة أقولك جانى إنحباط رهيب إزاى ...
كنا نتعد على الصوابع يا محمد
مكملناش عشرة حتى ...
اليوم دا كان عايزك ...
بس الحمدلله عملنا حاجة كويسة برضو و قعدنا نقص فى كرتون و نلون و نعمل تيجان للعيال و لبسوها و إنبسطوا
و علموا داليا قوس قزح لعبة الاولى ...
و الناس اللى جت خليت لليوم قيمة و معنى ...
عقبال اول مرة نشوفك إن شاء الله
خالص ودى يا اجدع مهندس مصرى






mado 80
دايما رافع معنوياتى يا مادو
ربنا يكرمك إنت و يكتبلك كل الخير
يلا شيل التاج و إتدبس فيه يا أستاذ
آه .. وألف مليون حمدالله ع السلامة




صاحب المضيفة
لا جامد و لا حاجة يا انس
أزى العروسة .. خلى بالك منها يا واد
أصلى هأقول الجملة دى ليوسف لما يلاقى بنت الحلال و قولت لما اتدرب فيك شوية
ربنا ما يحرمنى من دعواتك الحلوة دى
أبداً
ابداً




( joudy )
و عليكم السلام يا جودى
إسمك حلو قوى ... بجد
و شكراً على ذوقك و رأيك فى مدونتى أنا و يوسف روح قلبى ...
لو التاج عجبك ... يلا شيلى على البركة يا ستى ...
متقبلة مرورك بكل حب يا عزيزتى و لا تتوقفى عن هذا المرور بعد الآن
خالص تحياتى ليكى




إعترافات قلب
أزيك يا شيمو
أنتى كمان إتدبستى ؟!!!
طب يلا ورينا الشطارة
يا شمس و قمر فى سما واحدة



نهر الحب
يا انوس دايما تزنقينى كدا
الاول ازيبك إنتى يا حبيبتى
و مش حكاية إسكندرية بس و الله
الحكاية إن اكتر من سفرية فى شهر واحد مينفعشى ...
الميزانية يا أنوس .....
اختك من اصحاب المعاشات يا بنتى ميغركيش المنظر ..
هحاول و الله ...
لو ينفع تاكدى مش هتاخر عنكم
إنتوا أصلا وحشتونى إنتى و نسمة و بابا أبو خالد و داليا أهو ده عيبه و طارق الغنام و كل اهل البلد الجميلة دى ...
اوعدك احاول
و ربنا يوفقكم يا حبيبتى




نبضات
يا عرافتى الساحرة
وحشتينى يا نبوضة
قوى
قوى
أنا عارفة إنك مشغولة و مطحونة فى الشغل و غيابك دا ليه أسبابه
بس بتوحشينى
لو الوقت سامحلك .. جاوبى التاج هدية منى ...
أنا شخصية مميزة ؟؟!!!
اومال صباحاتك المعطرة و مساءاتك و وردوك تبقى إيه ؟؟



جنى
و عليكم السلام يا جنى
الله يخليك يا سعيد
و بعدين أنا مقصرة فى زيارتك من بدرى و يا ريت تسامحنى لأنى بتاخر عليك
ربنا يديك الصحة و يتمم شفاك إن شاء الله بخير
دمت بكل الود و السلامة



أ. عبدالجليل
حضرتك نورتنا فى يوم المكتبة
و شرفت القاهرة بحضورك
نتمنى بس منكونش صدعناك و تعبناك
أرجو يكون نكش الفراخ بتاعى عند مستوى ظنك
و رأيك و نقدك هيفيدنى اكيد و يساعدنى أتطور فى الكتابة للاحسن بأذن الله
خالص ودى لحضرتك و للأسرة الكريمة




mony elshreef
حاضر يا مونى هروح أقراه
اصل بقالى يومين عندى إنفلونزا بعيد عنك و كان عندى مشوار المكتبة امبارح فملحقتش أفتح الميل
هرد عليكى فيه اكيد أن شاء الله
خالص حبى ليكى




shimaa samir
نعمممممم
كنتى فى إسكندرية ؟؟!!!
خياااااااانة
متروحيش ألا لما نرجع احنا ؟؟؟
إيه بقى النظام يا عصفوراية
و حكاية الاحلام دى مخوفانى قوى على فكرة ....
دى مش احلام يا بنتى دى كوابيس
أقولك
يمكن تكونى متأثرة بقصتى أنا و يوسف
و يمكن كمان اكون وحشاكى حبتين
و يمكن لأنك حد شفاف و عنده قلب بيحس على البعد بحاجات متشوفهاش العين ..
ربنا يكرمك فى المشروع
و لو هتعملوا معرض و لا حاجة
و عاوزة حد ييجى يشجع قوليلى آجى على نن عينى
و توقيع الديوان التانى دا مفروغ منه يا حبيبتى و حاضرة بأذن الله لو ربنا مد فى عمرى و محصلشى أى طوارىء
مشروع التخرج بتاع يوسف !!!
يااااااه يا مشموشة
الجملة نفسها ليها وقع حلو
ربنا يسمع منك يا عصفورة يا صغيورة
و سلام للعصفور ...
و إيه حكاية الفرعونية دى بقى ؟؟
يا بنتى لا تسيئى لتاريخنا و تطفشى السياح ....
أنا كمان يا حبيبتى بحبك
بوساااااات و حضونااااااااااات

محاسن يا بنت أبيها الغالى
و يا نص قلبى التانى
هرد عليكى فى البوست الجديد يا حبيبتى
يلا نتقابل هناك

إرسال تعليق