.

.

ب ... ب ... ب  

Posted by: فاتيما in

من كام يوم و انا مروحة ... عديت على كوبرى قصر النيل
و على جنب بتلفت بعينى ... شوفت البرج
برج القاهرة ... فاكره ؟؟
اوعى تقول مش فاكر ... دنا كنت بشاورلك عليه فى الأفلام العربى ؟؟
و أقولك لما نرجع هبقى اخدك و نروحه عشان تشوف مصر كلها من فوق
هاه ... إفتكرته ؟؟؟
صحيح الوقت سرقنا و ملحقتش انفذ وعدى ليك
بس دلوقتى كل ما بعدى على البرج بتجينى فكرة
حبيت اقولهالك ... يمكن تعجبك
إيه رأيك يا روح ماما ؟؟ ... لما ترجع من عند بابا
نروح سوا البرج
بس قبل ما نروح ... هنشترى بالونات كتييييييير قوى
عشان نطلع نطيرها من فوق
أنا عملت حسابى و إشتريت منفاخ ننفخ بيه البالونات
عشان نفسنا مينقطعشى
و كمان كل شوية أشترى بالونات عشان تكفينا
أصلنا محتاجين عدد كبير قوى
ليه ؟؟
أصلنا بعد ما ننفخهم كلهم
هنسميهم أسامى
بالونة إتنين منهم هيكونوا للزعل ... لو كنت زعلان منى
بالونتين تلاتة هيكونوا للغضب و الغيظ ... من الفرقة اللى إتفرضت علينا
تلات أربع بالونات للحزن .. اللى هاجمنا من كل إتجاه
و كام بالونة كمان للخوف ... اللى عشنا فيه كل العمر اللى فات
و كمان هننفخ بالونات
بعدد الشهور اللى عدت من لحظة ما روحت لباباك
و كل مناسبة فاتت و إنت مش معايا
بالونة لعيد ميلادك العاشر
و واحدة لعيد ميلادى اللى فات ... و واحدة كمان للى جاى
و بالونة للعيد الكبير و إتنين للعيد الصغير
واحدة لراس السنة اللى عدت
و واحدة لمولد النبى
كمان 30 بالونة بعدد ايام شهر رمضان
بالونتين لعيد الام
و إتنين عشان شم النسيم
و بالونات كتير كتيييييير ... لكل يوم صحيت فيه
من غير ما اطل فى وشك
و أطمن عليك و أقولك صباح الخير يا قطتى
هنلم كووووووووول البالونات دى
و نطيرها من فوق البرج
يقوم الهوا ياخدها وتبعد بعيييييييييد
بعييييييييييييييد
و يبعد معاها كل الحزن
و الغضب و الزعل .... و كل حاجة ضايقتنا
و بعد ما نتاكد إنها خلاص
راحت بعيييييييد
نقعد نضحك على منظرها و نفكر هيا هتروح فين بعد كدا ؟
بس كمان مننساش نحمد ربنا الاول
ونطلب منه إننا منجيش فى يوم من الأيام ... نطير غيرها تانى
و كمان نقول يا رب
إن كل ولد و مامته يرجعوا لحضن بعض من تانى
و يا ريت ميبعدوش لاى سبب
إيه رأيك فى الفكيرة دى ؟؟!!
أنا متأكدة إنها هتعجبك ... صح ؟؟
قولى رأيك بصراحة
أوعى تكون بتضحك عليا فى سرك
و تقول ماما دى ست غريبة
أوعى ... طب يعنى ممكن تقول كدا مش هضايق قوى
بس ممكن لو سمحت تقول حاجة تانية كمان
قول ماما أصلها بتحبنى زيادة شوية
و أنا أصلى واحشها زيادة شوية
و إن نفسها ترجع تلعب معايا زى زمان
و قول برضو إن ماما بتدعيلى دايما
إن ربنا يحفظنى من أى شر
و بتقول يا رب تحرس يوسف و تصونه فى كل مكان يروحه
و حتى لو مكنش قاعد معاها
و حتى لو مرجعش لحضنها من تانى
و لو مينفعشى خلاص ... بلاش مشوار البرج
و لا البالونات
و بس هيا هتفضل تدعي ....يا رب
يوسف يبقى كويس
يبقى يا رب
كويس

ب ... ب ... ب

برج

بالونات

بحبك

This entry was posted on السبت, أبريل 04, 2009 and is filed under . You can leave a response and follow any responses to this entry through the .

61 كــــلام بيطــبطـــب عـــلى قــــلبى و روحــــى

يارب يتحقق قريب الموضوع ده :)
مش عارفة اقول حاجة غير كدة بجد
بس عايزة ابقي اروح معاكم
منكن؟

اول تعليق اول مرة عندك
انا شاطرة D:

حبيبتى الغاليه الغاليه الغاليه

وحشتينى جدا جدا يا طمطم انا اعتذرتلك كتير عن غيابى فى البوست اليى قبل اليى فات وهسيبلك تعليق على البوست اليى فات لانك قلتى كلمه مش عجبتنى خالص واختك الكبيره هتعضك عليها عشان تحرمى تقوليها تانى

يوسف بئه واليوم ده انا هطلع معاكو البرج بس عشان اشوف الفرحه طالعه من قلبك وبتطل من عينك يا فاتيما ويوسف فى حضنك ومستخبى فى قفصك الصدرى

عارفه مش هتطفل بس هاحبه قوى انى اشوف الفرحه اليى طالعه من القلب مرسومه على وشك الجميل الانثوى الطيب ده

ربنا يريح قلبك ويطمنك على روحك يا حبيبتى يا غاليه

كفاية طيبة
يا ستى إنتى شاطرة من غير أى حاجة
و نورتينى اول تعليق و حتى كان آخر واحد يا حبيبتى ...
ربنا يسمع منك و يحصل
و ساعتها إهلا و سهلا يا ستى تعالى
بس هاتى بالوناتك معاكى



mahasen saber
محاسن يا ينت أبيها الغالى و النص التانى لقلبى
إنتى متزعليش منى يا حبيبتى لسببين
اولهم غنى مقدرشى على زعلك
و تانيهم إنى مقولتش غير الحقيقة و رأيى فى نفسى دون مواربة
و بعدين كل بنى آدم عادى مولود بالانانية و بتكبر وعاه او تقل بمرور الوقت و تغير الظروف من حواليه
جايز اكون دلوقتى أنانيتى فى حالة كمون
فأنتى مش حساها ...
لكن هيا بتطلع فى وقت تانى ...مثلا لما بقول مش عاوزة ادى نموتى لحد و لا اكلم حد على الماسنجر و كدا ...
دى انانية منى ... بس لا اخجل من إنى أعترف بيها ... أنا أنسانة يا محاسن و فيا عيوب زى كل الناس ...
أنتى بس اللى شايفانى بعين المحب
أما حكاية تيجى معانا البرج دى
فشكل الخروجة دى هتلاقى إقبال جماهيرى من الجميع
طيب خلاص
لما يوسف يرجع ..و أجيبه تشوفوه
نبقى نروح كلنا البرج و نطير البالونات سوا ...بس إنتى كمان هاتى بيدو و طيروا بالوناتكو إنتوا كمان
و شوفوها و هيا بتبعد بعيييييييييد
بوسة و حضونة يا حبيبة قلبى

ربنا يحققلك كل ما تتمنى يا أجمل فاتيما
وتلفى مع يوسف العالم كله وتتفرجى على كل العالم ويوسف فى حضنك والسعادة والفرح بينطوا من عنيكوا.
كلامك على قد ما فيه بهجة وضحك على قد ما فيه وجع حسيته.
ربنا معاكى ويحققلك كل ما تتنميه
مش بعيد على ربنا
ادعيه أنت بس
تحياتى
شيمو القمر

ربنا يارب يخليهولك وتكونوا مع بعض دايما

ابقي زودي بقي البلالين علشان اجي معاكم

ان شاء الله تحققى وعدك ليه قريب
وتكونوا مبسوطين يااااارب :)

بصي انا حالي منيل و مودي زفت بقاله فترة و لسه مكمل

بس موضوعك خدني فترة قريته لحتة غريبة و رجعت منها لحالي المنيل و انا بكتب التعليق دلوقتي

و يابخت يوسف بيكي :)

وربنا يخليكي ليه :)

و ربنا يخليكوا لبعض لانكم لثواني خرجتوني من مشاكل كتير انا فيها دلوقتي
..... انا واضح فعلا محدش بياثر فيا الا الاطفال :):)

ميرسي ليكي بجد

يارب يرجعهولك بالسلامة يا فاتيما و تنفخوا كل البلونات في جو مليان ضحك و هزار و طاقة سعادة و راحة جوة قلبكوا

بحس ان يوسف ده نسخة منك
مش قصدي الشكل
لكن الروح و طريقة التفكير و القلب المميز اللي بيحس بالحاجات بطريقة مختلفة و اللي بيشكل الحزن باسلوب عجيب يخليه صدبق اللي مصاحبك عليه الصبر و الأمل

فكرتك حلة قوي
وبحب كل بوستاتك اللي بتوريني دايما قد ايه يوسف مالي أكبر جزء فيومكم
انا كنت شايفاه فعنيكي رغم كل الحكايات اللي كانت بعيدة عنه و عن حاجات تانية و ناس تانية

وحشتوني انتوا الاتنين

ووحشتني اليوسفيات كنت غايبة عنهم بقالي زمان

يارب يرجعهولك ويسعدك و يسعدنا بيه

مش عارفه اقولك ايه يافاتيما بجد البوست مضيع منى كل الحروف والكلام
وبجد لمس قلبى بشكل موجع يارب يارب يافاتيما يرجعلك ابنك ويفرحك بيه ويريح قلبك ياااارب قريب انت القادر على كل شىء فرح قلب والدته برجوعه وفرح قلبنا بفرحتها برجوعه

يا فاتيما وحشني كلامك عن يوسف ، و جيت لاقيتك عامله لي نداء إنساني

أعتذر عن الغياب و التقصير ، و أتمنى العودة سريعا إن شاء الله

أسألك الدعاء ، و أدعو لك و ليوسف باللقاء و عدم الفراق ، يا رب

أنا بلاقي على طول فاتيما

وأعرف إنها حد قمة في الطيبة

وكمان كنت بخش عالمدونة دي وبقرا المواضيع من حين لآخر

بس لسه مكتشف إن فاتيما هي صاحبة المدونة دي

بجد انت حد قمة في الطيبة

تحياتي ليك ..

كنت متأكده ان البوست ده هيكون عن يوسف
بكيتينى يافاتيما والله
):
ربنا يرده لحضنك فى اقرب وقت يارب
وان شاء الله يرجع وتروحى معاه البرج وتطيرى البالونات دى كلها مره واحده فى عمركم كله
لانه باذن الله مش هيغيب عنك تانى

اعترف لك بحاجه يافاتيما؟
انا قلبى بيوجعنى من كلامك وبحسه وكأنى انا ام يوسف

تعرفى ياطمطم
النهارده وانا راجعه من الشغل لقيت الدنيا بتمطر فربنا ألهمنى انى ادعى فى المطر لان الدعاء مستجاب
والله دعيت لك وليوسف انه يرجع لحضنك وربنا يرد كيد اى حد يريد بيكى شر انتى وابنك

على فكره بقى انتى نسيتى توريلى صوره يوسف فى اللقاء
وانا كمان فرحتى بيكى نسيتنى

ربنا يسعد قلبك بقرب روح قلبك منه بالروح والجسد
ويرجع لحضنك تانى يااااااااااارب

انا قلت لك انى بحبك قووووووووى
طيب معلش نسيت
بحـــــبك قووووى ياارق من رأت عينى

يارب يا يوسف ترجع لماما حبيبتك دى بجد بتحبك موووت ربنا يرجعك ليها بالسلامة ومايحرمك من حضنها ولا قلبها بجد انت محظوظ ان لك أم بتحبك كل الحب ده مش بحسد بس بتمنى لك كل خير وترجع لها بألف سلامة وليك بلونه من عندى علشان تطيرها من فوق مكتوب عليها كلمة حب بس دى مش عشان تبعد دى علشان كل الناس تعرف أد إيه هى بتحبك وأكيد انت كمان بتحبها.....

جميل البوست وربنا يرجع يوسف لحضنك ومايحرمك منه أبدا وبجد ميرسييييي على التاج بس أنا جاوبته من قريب وأتمنى انك تشوفيه فى مدونتى كلمات من ذهب ويارب يعجبك

فاتيما
فلبى وجعنى مع كل حرف قراته
ما العن الزمن الذى يفرق ام مثلك عن وليدها
اعرف امهات تركوا اولادهم للاب وبنامون ملئ جفونهم مطمئنين
فالاب ايضا حنون على اطفاله
جمعك الله ويوسف عن قريب باذن الله
ادعى له دائما وثقى فى رحمة الله

ربنا يحقق الحلم ده قريب يارب ويرجع لحضنك وميبعدش ابدا عنه :(

ربنا يرده لحضنك يارب ويفرحك بيه

ربنا يسعدقلبك يارب
خليكى فرحانه علشان انا افرح

إن شاء الله تخديه وتروحي البرج وتلعبوا وتروحوا اسكندرية كمان وتقفوا قدام البحر وتفتكروا الأيام دي وتضحكوا عليها

إن شاء الله يرجع قريبا لحضنك
وتلعبوا سوا وتطيروا بالونات وتركبوا عجل وتعوضوا كل ايام الظلم والحرمان

:(:(

بجد بوست مؤثر اوووووي

بس ان شاء الله يتحقق ياجميله

وصدقيني هتطيروا كل بلالين الزعل والحزن والغيظ وكل حاجه وحشه

وهيفضل معاكو شويه كمان فرحه وحب وتفاؤل وسعاده

ربنا يجمعكوا ياااارب

ان شاء الله هيحصل يا حبيبتى
ويومها بقى البلالين على حسابى
بس النفخ عليكوا انتوا ههههههه مش انتى جبتى منفاخ ولا هى قطعة نفس وخلاص
:)

ربنا يقرب اليوم ده يارب يارب يارب
ويفضل فى حضنك طول العمر
اللهم آمين

جمعك الله بك على خير ان شاء الله

ربنا يارب يحققلك حلمك وامنيتك

ويرجعلك ابنك لاحضانك في اقرب وقت

ومش تفترقوا عن بعض ابدا

مهما كانت الاسباب

مهما كانت الظروف

تعيشوا طول العمر في حضن بعض

تحضنوا بعض بعيونكم

وتقفلوا على بعض رموشكم

عشان محدش يقرب لحد فيكم

يارب يحققلك امنيتك

تحياتي ليكي ولقلبك الجميل

كل الحب

سارة

يااااااه ..

انا مش عارفة اقولك ايه والله ..

غير انك ام عظيمة بجد .. وبتحب ابنها بجد ..

وان شاء الله هايتحقق الحلم ده وتطيروا البالونات سوا ..

بس انا عايزة اسأل سؤال وليكى طبعا حق الرد او لا ..

هو انتى مش بتشوفيه خالص ؟؟

دمتِ بخير ..

الله يسامحك يا فاتيما
ايه النكد اللي ع الصبح
هو انا ناقصة
عارفة يا فاتيما اني ساعات ببقى فخورة بيكي لأن الفرق بينا أنك بتقدري تقولي اللي جواكي
بس انا لأ
تقدري تقولي المعاناة في صمت
يخرج احيانا على شكل اشعار أو سرد أو ايا ما كان
تفاهات ...كلمات في السياسة
المهم افرغ الشحنة اللي جوايا
بس ساعات بتحل عليا لعنة القبقاب
ايون اني أكون عاملة زي المضروبة قبقاب
كل نازل يرف
بس الخوف ن حد يقرأ كلامي ويزعل بيخليني اسكت
خاصة ان في البيت الكل مرتاد نت
فلو فتحت مدونتي في البيت ادون سهل الجميع يوصلها
ومش عاوزة حد يزعل
بس ساعات ببقى عاوزة انفجر
اصرخ
اهرب من نفسي
بس ع فين؟

خلاصة الكلام
بلاش بوستات من دي تاني ع الصبح
او اقولك اكتبي في أوله ممنوع القراءة لستات البيوت
وش مدلدل لسانه

ربنا يرده لحضنك ومتتحرميش منه
وبجد بجد كل مرة حتتكلمي عن يوسف حتكلم انا عن شجاعتك وفهمك للدنيا
وتضحيتك
ويارب يا رب يوسف لما يجي المرة الجاية اشوفه واحكيله قد ايه انتي كنت مشتقاله
واقوله ان امك عاقلة قوي
وبتحبك قوي وضحت براحتها علشانك قووووووووووووي
وكفاية بقى ألا أنا بعيط قوي

لاستاذة الفاضله كلماتك هذة تجاه فلذة كبدك توجعني انا شخصيا واتمني من الله العلي القدير ان يكون قرة عين لكي وبصراحة اجدك ان هناك نهر من الحب يتدفقتحيتي لكي
عبد الجليل

اما عن يوم المكتبة فأنا سعيد بهذا اليوم واتمني ان اكون مش انا اللي صدعتكم بكلامي وان شاء الله تتكرر المشاركات اذا كان في العمر بقية
عبد الجليل

عزيزتي
تبقى الام دائما في قلب الابن مهما طال الفراق ومهما كانت اسبابة

والقصة التالية دليل لنجاح ليوسف ان شاء الله:\

وقفت المعلمة أمام الصف الخامس في أول يوم تستأنف فيه الدراسة، وألقت على مسامع التلاميذ جملة لطيفة تجاملهم بها، نظرت لتلاميذها وقالت لهم: إنني أحبكم جميعاً، هكذا كما يفعل جميع المعلمين والمعلمات، ولكنها كانت تستثني في نفسها تلميذاً يجلس في الصف الأمامي، يدعى تيدي ستودارد.
لقد راقبت السيدة تومسون الطفل تيدي خلال العام السابق، ولاحظت أنه لا يلعب مع بقية الأطفال، وأن ملابسه دائماً متسخة، وأنه دائماً يحتاج إلى حمام، بالإضافة إلى أنه يبدو شخصاً غير مبهج، وقد بلغ الأمر أن السيدة تومسون كانت تجد متعة في تصحيح أوراقه بقلم أحمر عريض الخط، وتضع عليها علامات x بخط عريض، وبعد ذلك تكتب عبارة "راسب" في أعلى تلك الأوراق.
وفي المدرسة التي كانت تعمل فيها السيدة تومسون، كان يطلب منها مراجعة السجلات الدراسية السابقة لكل تلميذ، فكانت تضع سجل الدرجات الخاص بتيدي في النهاية. وبينما كانت تراجع ملفه فوجئت بشيء ما!!
لقد كتب معلم تيدي في الصف الأول الابتدائي ما يلي: "تيدي طفل ذكي ويتمتع بروح مرحة. إنه يؤدي عمله بعناية واهتمام، وبطريقة منظمة، كما أنه يتمتع بدماثة الأخلاق".
وكتب عنه معلمه في الصف الثاني: "تيدي تلميذ نجيب، ومحبوب لدى زملائه في الصف، ولكنه منزعج وقلق بسبب إصابة والدته بمرض عضال، مما جعل الحياة في المنزل تسودها المعاناة والمشقة والتعب".
أما معلمه في الصف الثالث فقد كتب عنه: "لقد كان لوفاة أمه وقع صعب عليه.. لقد حاول الاجتهاد، وبذل أقصى ما يملك من جهود، ولكن والده لم يكن مهتماً، وإن الحياة في منزله سرعان ما ستؤثر عليه إن لم تتخذ بعض الإجراءات".
بينما كتب عنه معلمه في الصف الرابع: "تيدي تلميذ منطو على نفسه، ولا يبدي الكثير من الرغبة في الدراسة، وليس لديه الكثير من الأصدقاء، وفي بعض الأحيان ينام أثناء الدرس".
وهنا أدركت السيدة تومسون المشكلة، فشعرت بالخجل والاستحياء من نفسها على ما بدر منها، وقد تأزم موقفها إلى الأسوأ عندما أحضر لها تلاميذها هدايا عيد الميلاد ملفوفة في أشرطة جميلة وورق براق، ما عدا تيدي. فقد كانت الهدية التي تقدم بها لها في ذلك اليوم ملفوفة بسماجة وعدم انتظام، في ورق داكن اللون، مأخوذ من كيس من الأكياس التي توضع فيها الأغراض من بقالة، وقد تألمت السيدة تومسون وهي تفتح هدية تيدي، وانفجر بعض التلاميذ بالضحك عندما وجدت فيها عقداً مؤلفاً من ماسات مزيفة ناقصة الأحجار، وقارورة عطر ليس فيها إلا الربع فقط.. ولكن سرعان ما كف أولئك التلاميذ عن الضحك عندما عبَّرت السيدة تومسون عن إعجابها الشديد بجمال ذلك العقد ثم لبسته على عنقها ووضعت قطرات من العطر على معصمها. ولم يذهب تيدي بعد الدراسة إلى منزله في ذلك اليوم. بل انتظر قليلاً من الوقت ليقابل السيدة تومسون ويقول لها: إن رائحتك اليوم مثل رائحة والدتي! !
وعندما غادر التلاميذ المدرسة، انفجرت السيدة تومسون في البكاء لمدة ساعة على الأقل، لأن تيدي أحضر لها زجاجة العطر التي كانت والدته تستعملها، ووجد في معلمته رائحة أمه الراحلة!، ومنذ ذلك اليوم توقفت عن تدريس القراءة، والكتابة، والحساب، وبدأت بتدريس الأطفال المواد كافة "معلمة فصل"، وقد أولت السيدة تومسون اهتماماً خاصاً لتيدي، وحينما بدأت التركيز عليه بدأ عقله يستعيد نشاطه، وكلما شجعته كانت استجابته أسرع، وبنهاية السنة الدراسية، أصبح تيدي من أكثر التلاميذ تميزاً في الفصل، وأبرزهم ذكاء، وأصبح أحد التلايمذ المدللين عندها.
وبعد مضي عام وجدت السيدة تومسون مذكرة عند بابها للتلميذ تيدي، يقول لها فيها: "إنها أفضل معلمة قابلها في حياته".
مضت ست سنوات دون أن تتلقى أي مذكرة أخرى منه. ثم بعد ذلك كتب لها أنه أكمل المرحلة الثانوية، وأحرز المرتبة الثالثة في فصله، وأنها حتى الآن مازالت تحتل مكانة أفضل معلمة قابلها طيلة حياته.
وبعد انقضاء أربع سنوات على ذلك، تلقت خطاباً آخر منه يقول لها فيه: "إن الأشياء أصبحت صعبة، وإنه مقيم في الكلية لا يبرحها، وإنه سوف يتخرج قريباً من الجامعة بدرجة الشرف الأولى، وأكد لها كذلك في هذه الرسالة أنها أفضل وأحب معلمة عنده حتى الآن".
وبعد أربع سنوات أخرى، تلقت خطاباً آخر منه، وفي هذه المرة أوضح لها أنه بعد أن حصل على درجة البكالوريوس، قرر أن يتقدم قليلاً في الدراسة، وأكد لها مرة أخرى أنها أفضل وأحب معلمة قابلته طوال حياته، ولكن هذه المرة كان اسمه طويلاً بعض الشيء، دكتور ثيودور إف. ستودارد!!
لم تتوقف القصة عند هذا الحد، لقد جاءها خطاب آخر منه في ذلك الربيع، يقول فيه: "إنه قابل فتاة، وأنه سوف يتزوجها، وكما سبق أن أخبرها بأن والده قد توفي قبل عامين، وطلب منها أن تأتي لتجلس مكان والدته في حفل زواجه، وقد وافقت السيدة تومسون على ذلك"، والعجيب في الأمر أنها كانت ترتدي العقد نفسه الذي أهداه لها في عيد الميلاد منذ سنوات طويلة مضت، والذي كانت إحدى أحجاره ناقصة، والأكثر من ذلك أنه تأكد من تعطّرها بالعطر نفسه الذي ذَكّرهُ بأمه في آخر عيد ميلاد!!
واحتضن كل منهما الآخر، وهمس (دكتور ستودارد) في أذن السيدة تومسون قائلاً لها، أشكرك على ثقتك فيّ، وأشكرك أجزل الشكر على أن جعلتيني أشعر بأنني مهم، وأنني يمكن أن أكون مبرزاً ومتميزاً.
فردت عليه السيدة تومسون والدموع تملأ عينيها: أنت مخطئ، لقد كنت أنت من علمني كيف أكون معلمة مبرزة ومتميزة، لم أكن أعرف كيف أعلِّم، حتى قابلتك.
(تيدي ستودارد هو الطبيب الشهير الذي لديه جناح باسم مركز "ستودارد" لعلاج السرطان في مستشفى ميثوددست في ديس مونتيس ولاية أيوا بالولايات المتحدة الأمريكية، ويعد من أفضل مراكز العلاج ليس في الولاية نفسها وإنما على مستوى الولايات المتحدة الأمريكية).
إن الحياة ملأى بالقصص والأحداث التي إن تأملنا فيها أفادتنا بس متفهمنيش غلط ارجوكي وارجو الله ان يعود يوسف لامه لتقر عينها وتقر عينه

يا رب يا يوسف تقرا الكلام دة قريب و تحس أد اية انت كنت واحش ماما و أد ايه هي حنينة و قلبها مفيش زيه..ياا رب يا يوسف تروح معاها البرج وتحقق لها كل أمانيها.. يااا رب يا يوسف تيجي بقى وتخدها في حضنك(ما انت قربت تبقى طولها)و تنسيها كل اللي فات و تفرح قلبها و قلبنا كلنا..يااا رب يا يوسف تكبر وانت في حضنها و تكون سندها و ضهرها و تعوضعا كل اللي فات من عمرها...ياااااا رب يا فاتيما يسعدك و يهنيكي و يريح قلبك

على فكرة يا فاتيما أنا اللي كتيت التعليق اللي فات بس نسيت حاجة مهمة..بوسة كبييييييرة و حضن قد الدنيااا

ان شاء الله البرج في انتظاركما قريبا
ربنا ينوللك اللي في بالك
تحياتي

أزال المؤلف هذا التعليق.

السلام عليكم

ربنا يخليه لك ويخليك له

وتنفذي ما وعديه به


والبلونات تبعد بعيد
سواء الزعل او الغضب
و0000و0000
ويبقي الحب والفرحة

وتكونو متجمعين علي طول
علي الحب والخير


تحياتي

؛)
:)
ربنا يجمعكم على خير

الله ع الفكره

جميله زيك وزى يوسف
يارب قريب
انا عاوزه اجى معاكوا

تعرفى انى عمرى ما رحت البرج!!!


انا حستنى لما اروح معاكوا اول مره

وحشتينى اوى

ربنا يجمعكوا على خير
ويحقق كل امنياتك
وان شاء الله تروحو البرج وتطيروا بلالين للصبح
يلا ونعمله عيد قومى للبلالين
وتبقى هيصة
ربنا يخليكوا لبعض ودايما مع بعض
تحياتى

لو روحتي من غيرى هاقطعك يا طمطم

يا مبكياني على طول انتى

ان شاء الله يرجع لحضنك صدقينى



وعلى فكره قصة خايف من الحقيقه كملت عليا بكا

اعمل فيكم ايه دلوقتي مش شايفه اكتب

يا ريت البالونات تبقى للسعاده بس من غير حزن و لا غيظ و لا غضب
ربنا يجمعكم قريب

لا تعليق
احساسك قوي جدا وكلامك بنج

العزيزة اوى اوى فاتيما دخلت المدونة سابقا وكنت تايهة فى موضوع يوسف قعدت ادعبس فى المواضيع لغاية ماوصلت وعرفت وياريتنى ماعرفت دمعى لم يجف ويكاد قلبى ينفطر عليكى وودت لواضمك ضمة كبيرة ولم يتوقف لسانى عن الدعاء بان يربط على قلبك والايحملك مالاطاقة لكى به ويتحقق امل اللقاء قريب غير بعيد عاجل غير اجل وفى انتظارالبشرى باللقاء وطبتى حبيبتى وحفظك الله للغالى يوسف ام مالك

ازيك يا فطوم
وحشتيني

منين جايبة طاقةالحب دي كلها
كل دي امومة
ولا انت عندك اكتر منها بكتير ؟؟
انتي مميزة اوي
واكيد ان شاء الله ربنا هيحقق لك رغبتك الجميلة دي
واسرع مما تتخيلي

انا علي فكرة بتبسط اوي لما بقرأ حاجة عندك
بحس اني بطلع من عندك بطاقة حيوية جميلة بتدفع للامام

تحياتي

بحق دعوات كل محبيك .. وانا اولهم .. ان شاءالله سيحقق حلمك فى رجوع يوسف لحضن أمه

لعلى لاافهم سببا واضحا لتكل الفرقة .. كما واننى لست ممن يدسون انوفهم فيما لايعنيهم ..

لكننى اتخيل ان والده يقرأ هذا الكلام

فكيف يطيق حرمان ابن من امه؟

انا آسف .. يبدو ان انفعالى ائد

عموما .. كلنا نحب الذهاب الى البرج .. فهى فكرة رائعة .. خصوصا البلالين

الا ان يقلل هذا من فرصة متعتك بيوسف

ربنا يخليه لينا كلنا .. ويسعدك به دائما

ب .. ربنا يطرح فيه بركة

ب .. ربنا يمنحك معاه بسمة

ب .. ربنا يديكي معاه بداية حياة جديدة إن شاء الله

شيماء جمال
متحرمشى منك يا شيماء و ربنا يسمع منك يا حبيبتى




صمت المشاعر
يا ستى اهلا و سهلا .. بس هوه يرجع




dandona
شكراً يا دندونة
متحرمشى منك



adel
لأ بص بقى يا عادل عشان نكون على بينة من أولها يا بن الحلال
لما تكون متضايق و مودك حزين
احب انصحك متجيش النواحيدى خااااالص
أصلى غالبا بكتب بمود حزين و قليل لما يقلب على فرايحى
بس مبسوطة إن البوست خرجك من الحالة
و لو ثوانى
خالص ودى و إحتراماتى



hanooda
أيوه يا هنودتى
إنتى بتعرفى تقرينى قوى ...
يوسف مش إبنى بس ... يوسف صديقى و صاحبى ..أنا مفتقدة اللعب معاه و البراءة بتاعته و الأفكار اللى كان بيوحيلى بيها و يخلينى أبتكرها ...
عشان كدا كل ما يوحشنى أنزل أشتريله لعبة ...و أفكر هيقول إيه لما يشوفها و أنا هعمل معاه إيه بيها
جايبة ألوان و جلايتر و قص و لزق و اعمال فنية للاطفال عشان نبقى نقعد نلعب بيها سوا انا و هوه ...
أنا مفتقدة أبنى
و كمان مفتقدة صديقى الغالى
و رفيق أيامى
إنتى وحشتينى قوى من ساعة ما سافرتى
و وحشتنى نظرات عيونك الساكتة اللى مليانة ألف كلمة و كلمة
بوسات و حضونات من هنا لقطر



الشموع البيضاء
متقوليش حاجة يا حبيبتى
أنا حاسة باللى عاوزة تقوليه
كفاية دعوتك الحلوة دى عليا انا و يوسف


احمد كمال
اخيرااااااااا يا أحمد
بقى بذمتك ينفع كدا ؟؟
طب مدام ظهرت و بان عليك الامان
خلاص ...
المهم إنى اتطمنت عليك يا عزيزى
أنا بدعيلك و الله ربنا يصلح احوالك و يكتبلك الخير و يروقلك الحال ...
و تعود لنا بكامل حيويتك و طاقتك و أفكارك الصافية المثمرة
فى إنتظارك و خلاص نشيل النوداء الإنسانى بقى و لو إن الصورة كانت منورة البلوج و عاملة رجل على المدونة ....



حسام غانم
يا حسام إنت نورت المكان و أنا مبسوطة بمعرفتك جدا ...
شكرا على ذوقك و طلتك علينا

عاشقة الرومانسية
يا دود مانتى بتقرينى خلاص و حاسة بقلبك الجميل الشفاف ....
الدنيا كانت بتشتى عندكو ..الله
و كمان دعيتلى ؟!!!
يا بختى أنا و يوسف
و بعدين يا ستى يوسف إبن إختك الكبيرة يعنى ابنك برضو و الخالة والدة
مش كده ؟؟؟
بوسة و حضونة يا عروسة البحر




joudy
ميرسى يا جودى على زياراتك و كلماتك الرقيقة و دعواتك الطيبة دى كلها
و كمان ميرسى على البالونة
خلى بالك لما أشوفك فى لقاء تدوينى قادم هطالبك بيها ...
هاه





القدر و أنا
متلعنيش القدر يا عزيزتى
احنا بنعيب على الزمن و العيب غالبا بيبقى إحنا سببه بشكل او بآخر ..
و نفسى أعمل زى ما بتقولى و مبعرفشى
كل ثانية بتعدى و يوسف مش قصاد عينى بحس إنى أهدرتها من حقه عندى
أتمنى يكون محبوب و هناك من يحنو عليه لأنه يستحق كل الحب اللى ف الكون
مش اللى ف قلبى أنا بس
اتمنى دا يكون بيحصل
و اتمنى تدعوله كلكم ربنا يحرسه مكان ماهو موجود
بس





أيوشة
متشكرة يا أيوشة
متحرمشى منك يا عزيزتى


نـــــور
ميرسى يا نور على الكلمات الطيبة و الدعوة الأطيب ...
و خلينى فرحانة ؟؟
حااااااااضر



جعلونى مريضا نفسياً
منا بقول برضو كدا يا هشام ...
ساعات خيالى بيقفز للمشهد دا
و أقول كله هيبقى ورا ضهرنا ...
نفسى خيالى يبطل يقفز ..
و نقفز أنا يوسف للحظة دى بجد ...
ربنا كبير قوى و كرمه قريب





ahmed-k
إن شاء الله يا احمد
ربنا يسمع منك و تكون موجود ...
البت آبى هانم بتنجانى قالتلى كنت ناوية لما يوسف يرجع نعمله حفلة ...
نبقى نخليها خروجة للبرج
و كله يجيب بالونات الزعل و الحزن بتاعته و يطيرها مع بالونات يوسف
و كمان تبقى فرصة تشوفوه و تاخدوا نصيبكم من الفرحة برجوعه ...
إدعيلنا إنت بس يا احمد



mony elshreef
ياه يا مونى ...يا بنتى أغلب بوستات اليوسفيات بهذا الشكل
مع انى كنت عاوزة اكتبه بشكل مفرح ..
معرفشى ليه بيقلب معايا دايما على شجن ...
متحرمشى من دعواتك



حاجات جوايا
نعمممممممم
بلالين إيه اللى على حسابك ؟؟
إنتى تجيبى دودو و تيجى تطيرى معانا البالونات ...
كل واحد يطير بالونته اللى مزعلاه
ممكن تعملى كدا مع دودو دلوقتى من فوق السطوح و لا من البلكونة لما يكون زعلان من حاجة و عايزاه ينفس عن غضبه ..
أهو فكرة عبيطة كدا و السلام



الطائر الحزين
ربنا ما يحرمنى من دعواتك دى
و لا من طلتك عليا يا طائرى الحزين

saragebaly
ألف شكر ليكى يا سارة على كل الكلام الجميل ده
و كمان على الدعوات و التمنيات الطيبة دى
تحياتى ليكى من قلبى



لجين أبو الدهب
يا ستى لا أم عظيمة و لا حاجة
كل ام لازم تحب إبنها و اكتر من كدا مليون مرة ...
ساعات بحس إن حبى مجرد كلام و بس مش اكتر
و لأ ... مش بشوفه للأسف




ست البيت
يا رب يا ستوتة يسامحنى
يار ب
و بعدين طيب أعملك إيه فى روحى بس
و إنتى المفروض تعملى حسابك بقى ...
متقرليش حاجة ع الصبح
و إنتى تبقى فى السليم اضمن ...
و بعدين ما تقولى كل اللى نفسك فيه و لا يهمك
اومال احنا عاملين المدونات ليه ؟؟!!
و فخرك بيا دا كرم و عطف منك على شخصى الضعيف ..مستهلوش يا ستوتى



الأستاذ عبدالجليل
يا أستاذى تحيتك تشرفنى
و دوما ستجدنا سعداء بحضورك فى أى مناسبة قادمة ...
تحياتى لاولاد حضرتك و لكل اهل المنصورة




خايف من الحقيقة
يا محمود عاوزة أقولك إنى قريت تعليقك و بكيت قوى فى آخر سطرين ..
تعرف ليه ؟؟
مش بس لأن القصة مؤثرة و جميلة
عشان حاجة تانية كمان
من قبل عيد الام و أنا كل دقيقة أفكر يا ترى يوسف هيعمل إيه دلوقتى ؟؟
يا ترى فى الفصل لما اصحابه اللى قاعدين جنبه لما يقعدوا يتفاخروا بهدايا عيد الام اللى ناويين يجبوها لأمهاتهم و يقعدوا ياخدو رأى بعض و يفرجوها لبعض زى ما كنا بنعمل و غحنا عيال ...
بحاول أتخيل يوسف هيكون بيتقبل الحاجات دى ازاى و هيرد عليهم يقول إيه لما يسألوه
جبت ايه لمامتك ؟؟؟
قعدت اطرد المشهد ده من ذهنى لايام عشان أعرف اكمل العيشة ...
حسيت إن إبنى بيعيش نوع جديد من اليتم و كرهت نفسى قوى ...
بس رجعت و قولت يا رب
يا رب
هونها عليه
هونها عليه
مش فهماك غلط يا محمود
بتمنى بس يكون عنده حد او حاجة تعوضه
الحرمان ده
بس



dahlia
متحرمشى منك يا داليا
بوسيلى يحيى و فارس و احضنيهمولى قوى




a.samir
منور يا احمد
و عقبال ما تاخد ولادك تزوروا البرج
و تطيروا بالونات الفرح و السعادة




hasona
أشكرك يا حسونة
ربنا يسمع منك
ألف شكر ليك على المشاعر الطيبة دى



مهندس مصرى
ربنا يسمع منك يا محمد



dodda
خلاص ...إنتى جاية و هاتى بالونات زعلك و ضيقك لما نطيرها هيا كمان
الخروجة دى هتبقى بتاعتكم مع يوسف
عشان تشوفوه و تطيروا معاه الحزن بعيد
سلمى على ميومة قوى



همس الاحباب
و تجيب هموسة يا خالد
إنت معانا فى الخروجة دى
آبى و دودا و صبرنى يا رب قالوا جايين أهو ...



صبرنى يا رب
خلاص يا صبصب ...
مفيش مرواح من غيرك
خلاص قرار تدوينى رقم واحد ...
إن خروجة البرج دى هتكون من نصيبكوا
عشان تشوفوا يوسف و نطير كلنا الهم بعيد
انا كمان عيطت زيك



mohra
ماهو لازم ينفس عن أى غضب او ضيق او حزن كان موجود يا مهرة
عشان يتخفف منه
اهو مجرد رمز ..
فكرة يعنى و ظاهرها يكون مفرح




ta3ban
متعلقشى يا تعبان بحاجة تاني
منت قولت كلام حلو أهو



أم مالك
أشكرك يا ام مالك على دعائك الكيب
و ربنا يكتبلنا فيه نصيب
يا رب
أيوه و حياتك تدعى ليوسف ربنا يحفظه
يا رب
نورتينى قوى




kochia
يا كوشكش كل أم كدا
المفروض
دنا لازم أكون اكتر من كدا مليون مرة
بس متقيدة و مش عارفة
جميل انك شايفنى كدا ..على عكس الكثيرين فى الغالب ما شايفنى محبطة




sherif
يا أستاذنا الغالى
ربنا يحقق حلمى و كل احلامكو ...
والد يوسف مبيقراش المدونة دا شىء مؤكد ...
و لو إنى صندوق مغلق فى قاع محيط ...
حضرتك من اوائل الناس الذى لن يقلقنى اطلاقاإطلاعهم على ما أحوى من اسرار لأن حضرتك ليك مقام عالى قوى ف قلبى و عينى
لكن الحكاية مبقتش سر قوى ...
و بوست التغريبة حضرتك هتلاقى فيه تفاصيل كتير لو حبيت ...
http://ro7albmama.blogspot.com/2009/03/blog-post_09.html



يا مراكبى
ب ... بتشوف دايما الصورة اوضح
ب ... بتدينى بكلامك امل فى بكرة
ب ... بتطبطب بلا كلل و لا ملل
على قلبى

بدعيلك دايما يا فاطيما
وهذا الجهد وعلى الله التكلان
وفعلا هي فكره حلوه
وإن شاء الله تحققيها قريبا جدا

خالص تحياتي

:)
فكرة والله ..
بس لما دودو يكبر شوية ويفهم .. بدل ما كل ما يضايق يرميلى حاجة م البلكونة ولا يطلع فوق السطح وانا السطح فوقى على طووول ههههههههههههه

دودو دلوقت عنده 3 سنين ادعيله ربنا يهديه ويصلح ما بين يديه ويجعله ذرية صالحة .. اللهم آمين

بس فكرة جميلة والله مش عبيطة خالص على فكرة
ولغاية ما دودو يكبر ان شاء الله
هروح اجيب شادر بالونات واطيرهم للخنقة والغيظ والاكتئاب والزعل والألم والغلب يوووووووه ده انا هخلص بلالين البلد لوحدى
لا خلاص بقى الطيب احسن .. خلينى ماسكة نفسى عشان نلاقيلك بلالين لما يوسف يرجع بالسلامة ان شاء الله

صباحك هنا يا قمرى انا

قادرة أفهم جزء كبير من إحساسك يا فاتيما المتعلق بانه صديق و رفيق ايامك عشان أنا جربته من طفل بموت فيه و هو ابن خالي اللي لقيت نفسي لفترة قصيرة جدا مسئولة عنه فأكله و لبسه و حمامه ونومه و لعبه وكل حاجة

لما سافرت بقيت قلقانة قوي انه يكبر و تخلص مراحل ما عشتهاش معاه بالطريقة اللي بنحبها أنا وهو

عشان كده شايفة شوقك بوضوح جدا و يمكن كمان شايفة قلقك اللي مش بتتكلمي عنه أحيانا من انه يكبر من غير ماتشوفيه ومن غير مايشوف كل اللي بتجبيه له و اللي حايفرحه و حايفهمه في مرحلة لكن مش حايفهمه في مرحلة تانية

يااارب تعرفي على الاقل تشوفيه بصفة دورية ويعرف قد ايه هو مالي حياتك.. بجد عندي فضول رهيب اعرف رد فعله لما يشوف كل ده

ربنا يجبهولك بالسلامة يا طمطم يارب بس ممكن تبقي تاخديني معاكي لاني عمري مش رحته ونفسي اروح قوي خلاص اعتبر ده وعد موووواه ليكي وليوسف

انتى ام جميلة وحنينية اوى
فاتيما انا عن نفسى بكيت وانا بقرا البوست متسالنيش لية بس بعد يوسف عنك وتأثرك بغيابة وجعنى كأنك حد قريب منى وألمة بيألمنى

يارب يارب يارب بحق قرأن الفجر دة
يرجع يوسف لحضنك فى اقرب وقت وانتى اللى تقريلة الكلام دة بنفسك

هاتى بوسه بقا :$

ازيك يا فاتيما
وحشتينى قوى وعارفه انى مقصرة معاكى جدا بس يارب تكونى بخير وصحة وربنا يحقق كل امانيكى ان شاء الله
وتروحى البرج مع يوسف وترموا كل همومكم من فوق
ربنا يسعده يارب ويحفظه وحضونة كبيرة ليكى وليه

فاتيما
اتمنى انك تحققي امنيتك و تضمي ابنك يوسف لحضنك
مودتي

ربنا يرد لك يوسفك وبعدين مش يمكن ربنا سبحانه جعل له من اسمه نصيب ويبقى زي سيدنا يوسف علي السلام

اصبري وربنا سبحانه هيبدلك الحزن ده كله فرح يزيل همك باذن الله وبكرة ان شاء الله تقولي الله يرحمه انس ده قالي كده مرة

تحياتي يا كل الطيبة

فاتيماتاااااا
روحتي استكندرية وقلتي عدووولي
احلى حاجه انك قابلتي الناس الحلوه دي كلها اللي بتتقابل على المحبه
فاطيماتاااا
طم طم
ايه البوست الجميل ده
واللهي عجبتني الفكرة قوي قوي مش عارف انتي جبتيها منين
أنا سرحت وقعدت اتخيل فيها كده..الفكرة طبعاً وقلت يااااه لو كل واحد عنده كده شوية حاجات مزعلاه ومضايقاه في عيشته ياخد بعضه ويطلع على برج القاهرة أو اي حته عاليه في مصر الاهرام او اي برج من الابراج العمرانية اللي قرفانا في عيشتنا او حتى من فوق سطوح بيتهم ويكون طبعا مجهز له شويه بلالاين ويقعد يطير بقا ومع كل بالونه يطيرها يقول مثلا دي للزعل روح يازعل دي للي بيحسدونا روح ياحسد ودي للي يكرهونا روح ياكره ...الخ الخ
ياااه ده انتي كنتي هتلاقي مصر دي كلها كل يوم فوق الأسطح وعمالين يطيروا في بالونات..ياسلام
ياريت صحيح الموضوع كان كده.زبس وحياتك ياطم طم هي الحكومة كانت هاتسينبنا في حالنا وحياتك اول مايشموا خبر راح يشتغلوا لينا في الضرايب.زضريبة البالونات وكل بالونة ضريبة على قد حجم العكننه اللي فيها
يااااه تخيلي انا عشت العمر ده كله ودماغي محدوده جداً كنت فاكر ان البالونات للعب وبس.. ده انا طلعت الخايب حسن مش الشاطر حسن
كل التحية والمحبة ليكي ياطم طم
حسن أرابيسك

ازيك يافاتيما ياأجمل ام في الدنيا وحشتني معلش اني مقصرة في السؤال عنك بس انا بمر بظروف صحية صعبة شوية الحمد لله رب العالمين يابخت يوسف بيكي وبحنيتك وقلبك الطيب ان شاء الله تبقي خروجه جميلة ويفضل دايما في حضنك مش يبعد عنك ابدا وانا عايزة بالونة انا كمان مليش دعوة ربنا يصلحك الحال ويوفقك يارب ياحبيية قلبي

اختك الصغنونة رحاب السيد

يا حبيبتى ان شاء الله تتحقق هذه الأمنية قريب جدا
ربنا يرده لحضنك بالف خير يا رب
ويا بخت يوسف بمامته الجميلة الحنونة

وان شاء الله هايجى يوم قريب وهو اللى يقولك بنفسه انه عنده احلى ام في الدنيا

وـاكدى فاتيما ان اللى عنده قلب زى قلبك لازم ربنا ينصفه ويبلغه مراده

حبيبتي فاطمة

وحشتيني جدا لأني من أكتر من أسبوعين لم أدخل إلى النت ولم أقرأ مواضيعك الجديدة

لو ضغطتي على إسمي هتدخلي مدونتي وتعرفي السبب

نرجع لموضوعك وكالمعتاد لازم الدموع تملا عيوني لما أقرا كلامك

ربنا يبعد عنك الهم والحزن ويسعد قلبك ويفرحك برجوع ضناكي لحضنك الدافي من تاني

وجعتيني قوي يا فاطمة من الجمل دي:

بالونة إتنين منهم هيكونوا للزعل ... لو كنت زعلان منى
بالونتين تلاتة هيكونوا للغضب و الغيظ ... من الفرقة اللى إتفرضت علينا
تلات أربع بالونات للحزن .. اللى هاجمنا من كل إتجاه
و كام بالونة كمان للخوف ... اللى عشنا فيه كل العمر اللى فات
و كمان هننفخ بالونات
بعدد الشهور اللى عدت من لحظة ما روحت لباباك
و كل مناسبة فاتت و إنت مش معايا

حسيت ان انتي وانتي بتكتبيهم عيونك غرقانه دموع وقلبك كمان

وده خللى دموعي تزداد في عيوني وتسيل على وجنتاي

ربنا يفرج كربك ويزيل همك ويرد ليكي يوسف ردا جميلا اللهم آمين

ممكن تحاولي بقى تخرجي من الحالة دي وتكرري زيارتك لاسكندرية من تاني؟

والمرة دي مش هسيبك ولازم أشوفك بإذن الله

إوعديني وإلا والله هتلاقيني طبيت عليكي في القاهرة ودبستك في أكلة معتبرة

أنا تركت ليكي إيميلي قبل كده للتواصل وهكرر كتابته مرة أخرى
eegychamp@hotmail.com

أحبك في الله

ahmed-k
متحرمشى منك يا احمد أبدا




حاجات جوايا
مش لازم دلوقتى يا سالى
لما يكبر شوية زى ما بتقولى
بوسيلى العسولة دودو قوى


hannoda
يا حبيبتى ربنا يريح قلبك و يزيل همك
أنا بحبك قوى يا هنودة
فضولى اكتر من فضولك ألف مرة
و يا رب يبقى مبسوط
يا رب



قلب ينبض بالحب
ماشى يا بدورة
تعالى معانا
بس هاتى البالونات بتاعتك يا أستاذة



سهر
ميرسى يا سهر على كل الكلام الجميل دا
و أشكرك الف مرة على دعواتك الطيبة دى
و خدى يا ستى على رأى يوسف
بوسة و حضونة كبيييييير ة



اهو ده عيبه
أزيك إنتى يا داليا
أنا كمان مقصرة معاكى قوى
و كان نفسى آجى زيارة بورسعيد بس الميزانية مسمحتشى ...
متحرمشى منك يا حبيبتى أبداً



assafo anaroze
كنشكرك بزاف يا أسافو
كلك ذوق و اخلاق و طيبة


صاحب المضيفة
واد يا انس
تعالى هنا
صحيح الرحمة تجوز على الحى قبل الميت
بس ليه يا بنى الفال دا
هقوله إن شاء الله إن عمو أنس الله يمسيه بالخير كان بيقولى كدا
الله يمسيه و يصبحه بالخييييييير
و يرحمنا جميعاً يا اخى الصغير الجميل
سلامى لآية النساء





حسن أرابيسك
يا فنان يا كبير القلب و المقام
يا شيخ بلاش مجاملة
إنت بس عاوز ترفع معنوياتى
بجد الفكرة عجبتك ؟!!!
طب إنت معزوم على الخروجة دى
و تيجى تطير معانا بالونات الحزن و الهم و الإحباط بتوعك ...
مش يمكن فعلا لما نشوفهم بيمشوا بعيد الواحد يرتاح
و يحس غنه فضى مكان للى جاى بعد كدا
و يبقى مستعدله براوقة بعد ما ينسى اللى فات ؟؟
يمكن
متحرمشى من طلتك يا شاطر حسن


رحاب السيد
سلامتك يا رحاب
اومال هتسافرى أزاى يا أستاذة يا صحفية يا كبيرة ...
متشوى حيلك كدا اومال سبتولنا إحنا العواجيز إيه ...
خلى بالك من نفسك يا حبيبتى و سلامتك ألف سلامة


عاشقة الرومانسية
إنتى كمان يا حبيبتى
بعتلك أيميل ..أقريه و ردى يا عروسة البحور


reem
بشكرك يا ريم من قلب قلبى بجد
على كل حاجة حلوة كتبتيها فى تعليقك
ألف شكر



elmasrya mrs writer
سلامتك من الحزن و الدموع
مبقصدشى و الله اضايق حد و أغص قلبه
على فكرة لما بكتب أى حاجة ..برتاح
بأتخفف من همومى و المى
مش بتعب زى ما بتتصورى
بالعكس
برتاح
شكرا على إيميلك ..هنتواصل اكيد
بس خلى بالك أنا مبدخلش ع الماسنجر و الحاجات دى ..مبرتحشى فى التعامل معاها قوى فسامحينى
إيميلى هو
modynoty@gmail.com
فى انتظارك دوما
و أحبكى الذى احببتنى فيه
يا رب

إرسال تعليق