.

.

المهنة : حارس عقار  

Posted by: فاتيما in












فاكر يا حبيبى لما كنا بنعملك ركن فى الأوضة
تحط فيه حاجاتك
وكنا بنسميه فيلا يوسف ؟!!
أهو فيلتك الجديدة
فى إنتظارك يا يسوفتى
أنا بعد إذن سيادتك يعنى .. بقعد فى فيلتك كل يوم
عشان اشتغل على الكمبيوتر شوية
منه أستفيد و اتعلم .. و منه كمان أخد بالى من حاجتك
مؤقتا لحد ما ترجع
متقلقشى خالص ... ماما حارس عقار ممتاز
و مصحصحة جداً و بحافظ على ممتلكاتك قوى
و إنت وحشتنى قوى
بس خلى بالك من حاجة مهمة
أنا مش هشتغل حارس عقار ببلاش
آه
لازم تدينى اجرتى عن ذلك
وإنت عارف القاعدة المتبعة كويس
أعطوا الاجير حقه قبل أن يجف عرقه
ربنا قال كدا
يعنى لازم سعادتك تعرف إن اجرتى عن الحراسة
تتكلف كالأتى
بوسة و حضونة عن كل يوم
و إحسبها إنت بقى
تدينى حقى كاش و لا بالتقسيط .. مش هيبقى دا المشكل
أصلى مش هروح فى حتة يعنى .. و كمان أنا واثقة فيك
و فى إنك راجل و أد كلامك
ومتقولشى كتير ... و هدفع دا كله ازاى !!؟؟
أنت بس إرجع و ملكشى دعوة
المهم إنك تكون مبسوط
و تعجبك الفيلا
و حارس الفيلا
يا روح قلب مامت ... صاحب الفيلا
و اللى مبتحبش فى الدنيا حد
أد ما بتحبك
ماما

This entry was posted on الأحد, أبريل 12, 2009 and is filed under . You can leave a response and follow any responses to this entry through the .

54 كــــلام بيطــبطـــب عـــلى قــــلبى و روحــــى

ربنا يردة ليكى في القريب العاجل ان شاء الله ويتمتع بفيلته وانتى معاه باذن الله
يارب تكوني بخير يا أم يوسف

انا عاوز فيلا زي دي وهديلك الاجره متخافيش
يا رب تبقى فيلا كبيره ويرجع ونروح نفرقع البالونات ونطيرها ويطير معاها كل الالم اللى شوفتيه بس انتى عندك مواهب كتير اهو على فكره انا مش هياس وهستغلك فيها لتعليم الاطفال لغايه لما يوسف يرجع ويعلمهم معاكي
بوسات كتير يا ام يوسف

يارب ترجع لها يا عسولة يا يوسف
فيلتك تحفة ياقمر ماما
عقبال اكبر واحلى فيلا وتكون ماما في حضنك
انا عارفة انك لما تكبر مش ها تسيب ماما خالص ولا حتى لما تتجوز
ربنا يرده لحضنك يا فاتيما

اضحكك
حكيت لك ان عفرتو قال لي من سنتين كده -وبكل جدية- ماما هو لما اتجوز ومراتي تقول لي متروحش عند مامتك اعمل ايه؟
رديت عليه وانا كاتمة الضحكة: اعمل اللي تعوزه ياحبيبي .. اللي تحس انه صح اعمله
قال لي: خلاص انا اقول لها رايح الشغل وآجي ابوسك يا حبيبتي

شوفتي سبع الرجال ولدي جبيصي؟
ايوه كده اضحكي واستبشري بفرج من الله
وعزة الله قريب قوي وبكرة تشوفي
بحبك

ايه الجمال ده ذوقك حلو قوى خالص

عقبال ما اعمل لولادى فيلل زى بتاعت يوسف اصلى غيرت منه بصراحة

ربنا يرجعهولك يا رب وتعيشوا انتم الاتنين فى اجمل فيلا فى مصر قادر ربنا

ربنا يكرمك ويحقق كل امانيكِ
بوسة وحضونة كبيرة خالص
تحياتى
شيمو القمر

اللللللللله

حلوه اوي يامامتي

بجد كميله موووت

ربنا يرجعهولك يااااااارب

ومش تتفرقوا ابدا تاني

بحبك

وجيالك مني مسج قريب اوي

فاطيما
يااجمل ام ربنا يعوض صبرك خير
وتفرحي بيوسف جنبك

ومتنسيش تبقي تدفعى ليا فلوس الدكتور لانك رجعتيلى الاكتئاب تانى

مليش دعوة عايزة فيلا زى دى وكمان يكون نفس مهندس الديكور ......

يارب ترجع يا يوسف بجد لماما انت اتأخرت أوى وكمان وحشتنا احنا كمان من كتر ما وحشت ماما ...

يارب يرجعلك بجد وما يفارق حضنك أبدا وينور فيلته

تقبلى مرورى

انا اول مره ازور مدونتك مش عارفه ليه بجد اول مادخلت شوقتينى انى اكون ام اوى مع ان لسه بدرى اوى ده انا لسه مخطوبه بس قد ايه احساسك جميل اوى،،نفسى يبقى عندى ابن اعمله زى مابتعملى ليوسف بجد ماشاء الله عليكى،،،ربنا يخليه ليكى و مش يحرمك منه ابدا ابدا يارب و يفرحك بيه عن قريب

ايه الفيلا الجميلة دي
تحفة بصراحة

وانتي الحارس بقي
طيب خلي بالك كويس لحد ما صاحب الحاجة يجي

تحياتي

الله ايه الفيلا الجميلة دي
معمولة بمزاج عالي الحقيقة
المفروض تكتبي المهنة مهندسة ديكور يا فطومة

أوقن أن الله سيرده إليك إن شاء الله ويقرأ معاكي الكلمات دي من كمبيوتر فيلته المصونة بإذنه تعالى

بحبك خالص يا فاتيما

رساله الى يوسف

ولدي الغالي
(واسمح لي ان ادعوك ولدي)
اعتقد واتمنى انك يوما ما سوف تقرا جميع رسائل امك وتعليقات الزوار
يوما ستدرك كم تعذبت في بعدك
يوما ستلعن لحظات الفراق
وتتمنى عوده الزمن
لكي تعوضها
يوما ستضمها الى صدرك وتخرج كل الحنين المحبوس

ولدي الغالي
عندما ياتي هذا اليوم
ارجوك
تذكر ان تقول لحارس العقار
انت مفصول لا تبتعد عني ولكن
ابحث عن عمل اخر واستانف
حياتك
لانيي يا ولدي مهما ابلغته بذلك الان فلن يستجيب
اما اذا طلبت انت ذلك
فستقر عينا الحارس وسيستجيب!!!!

كان نفسي في ام كده

ان شاء الله يرجعلك بسرعة :):)

انشاء الله قريب قوى قوى يبقى معاكى يا طماطم و نيجى كلنا مدونين و مدونات نحتفل و نقص شريط افتتاح الفيللا بس انتى تلاحقى علينا
اقولك اعملى لينا شادر زى بتاع الافراح فى الشارع و انتى و سوفه مكان العريس و العروسه

ربنا يرد الغائب ويحفظه دوما
بس هو يشوف الفيلا الخطيرة دى وهو اكيد هيرجع فى لحظتها
وتقبلى فائق احترامى

السلام عليكم

كيف حالك اختنا الطيبة ام يوسف .. ربنا يبارك فيكي ويجمعك بيوسف دايما يارب ويطمنك عليه ويسعد قلبك بيه قريبا ان شاء الله وتقر به عينك وان لا تتفرقوا أبدا ..

جامدة يا فيفي وربنا وربنا وربنا
انتي اصلا جامدة من يومك بس ما كنتش متوقعة اشوف اللي انتي عمالاه ده.. يا بنت الايه يا فاتيما يا لذينا انتي
:)

مها ميهوووو

إن شاء الله في القريب العاجل

هيرجع يوسف لاحضان احضانك

وتقعدوا سوا في الفيلا

وتكوني حارس للعقار ولصاحب العقار كمان

ربنا يكرمك ويسعدك ويفرح قلبك ياارب

سارة

إن شاء الله يرجعلك قريب
ربنا يسعده ويباركلك فيه

انتي جميلة اوي يا مامت يوسف
ربنا ما يحرمكم من بعض

مش عارفة ارد


ربنا يرجعهولك بالسلامة ينور حياتك وينور فيلته يارب العالمين

فنانة يا فاتيما

جميل قوي ان الموضوع ده مخليكي ايجابية وعندك القدرة علي الأنتاج والأبداع يعني بتطلعي افكار حلوة في وسط كل الأحداث الي فيها مع ان الطبيعي في الحالة دي زي مابيقولوا بالبلدي كده ان الواحد نفسه تتسد عن اي حاجة بس الحمد لله ان هو اداكي دفعة علي التفكير والحركة والأنتاج

يارب يوسف يرجع لفيلته ولحضن مامته حبيبته

فى الاول من العنوان افتكرت ان البوست على حارس العقار بتاعكم اللى كنتى كلمتينا عليه فى اللقاء

لكن طلع ان الكلام على اجمل حارس عقار لاجمل فيلا فى الدنيا
اما عن الفيلا نفسها فهى تحففففففففه
نفسى فى واحده زيها
عااااااااااااا
لما يوسف يرجع هخليه يعزمنى على الشاى فيها
بلاش غداء والله ما تحلفى عليا لا انتى ولا يوسف هو الشاى بس ياجماعه
ههههههههههههههههههههههه
قوليلى بقى هو نوتى اللى على الحيطه فى الصوره رقم 7 ؟؟؟؟؟
يوسف اكيد هتعجبه الفيلا قوى لانها عجبتنا كلنا

ان شاء الله يرجع لها قريب جدااااااااا
زوقك حلو قوى يافاتيما

فيلا شيك شيك الصراحه

الله
ذوقك حلو
ممكن توافقى تجوزينى يوسف واقعد معاهفى فيلته؟
مش علشان هى حلوه انما علشان تبقى حماتى علشان محاسن ام بيرو بتعند معايا ومش راضيه تجوزنى الواد:(

انا معزوم في الفيلا لما يرجع يوسف ان شاء الله

ربنا يرده ليكى يارب قريب
يارب انت الرحمن الرحيم رده لها وقر عينها بيه وفرج عنها قريبا
ياااااارب نفرج قريب برجوعه ليكى وتفرحينا كلنا بندعيلك ومنتظرين اليوم الى تكتبى فيه انه معاكى وتفرحى وتفرحينا

قريب جدا هيرجع باذن الله

فاكرة الوصفة ؟؟؟؟


ربنا معاكي يارب

ما شاء الله ..

دى قيلا جميلة جدااااا ..

احلى من مية فيلا كبيرة ..

وهاتكون احلى ان شاء الله برجعة يوسف ووجوده فيها ..

ربنا يردهولك ردا جميلا عما قريب حبيبتى ..

دمتِ بخير ..

الله جميلة اوووى

ده انتى كده اللى هتدفعى فلوس ليوسف انه سايبها لكى كل ده
و بعدين دى فيها عرايس للبنوتات .. انتى عاملة حساب انه ممكن يجيب ضيوف معاه ولا ايه

عموما انا عندى اللى عايزين يجوا ليوسف يوم ما يرجع و يلعبوا معاه و يملوا الفيلا فرحة و دوشة و هيصة لحد ما توصل لحار العقار اللى بحق و حقيقى تحت

ربنا يرجعه بالسلامة لفيلاته

اه صحيح
اياكى تدفعى لاسامة حاجة
ده عامل ابونيه عند الدكتور و ما بيصدق اى حاجة و يستخدمه

سلام يا احلى ام عرفتها

الحبيبة فاتيما الغائب قادم قادم والغالى يوسف سيعود وسيملاء حياتك وتعيشوا مع بعض فى اجمل فيلا سيعود بدعائنا الذى لاينقطع ابدا سيعودباليقين فى استجابة الدعاء سيعود بالامل الذى يملاء قلوبنا اللهم اما رده الينا ردا ردا جميلا وانزل على قلبك وقلب يوسف السكينة حبيبنى ولازلت افتقد ان اضمك الى ابنتى ام مالك

ربنا ييسر لكما الخير

اول زيارة يا فاتيما بس متبعاكى
من عند ستيتة لعاشقة الرومانسية
احسن ناس :)

قريت بوست التغريبة ودا
كان اول بوست اقراه
بس معرفتش اعلق

ربنا يردهولك بالسلامة انتى عمله فيلا جميلة موووت
اسمحيلى اقلدك بقى واعمل لسومة واحدة زيها

وعن اذنك كمان هى عايزة تكون صديقة ليوسف روح قلب مامته

تقبلى مرورى

بسم الله ما شاء الله
الفيلا تحفة
والحارس حكاية
ربنا يرجعه ليكى يالسلامة
وان شاء الله تتجمعوا قريبا على خير
وتاخدى كل المتاخرات من الحضونات
ربنا ما يحرمكوا من بعض ابدا
تحياتى

فاتيما
ربنا يرجعه لك بالف سلامة
دى اقدارنا ولا بد نحمد الله عليها
حقيقى انت ام عظيمة جدا
ربنا يخليكما لبعض ونبارك فرحتك برجوعه لحضنك

ربنا ياااااارب يرجعهولك بالسلامه

وجميله اووووي فيلا يوسف

انتي ام جميله اووي بجد

ربنا يكرمك يارب ويجققلك ما تتمني ويجزيكي كل خير

سيدتي فاتيما
و الله كل يوم بازداد احترام و تقدير لشخصك الكريم لحنانك الكبير لامومتك الراقية بالرغم من ان يوسف غايب عنك
امنيتي يا فاتيما انك ترجعيه لحضنك
يا رب
مودتي

الله يسهله ياعم يوسف علي الفلل
طبعا انتي عارفه يافاتيما ان الفيلا
من حق الزوجه وانا هسمحلك تقعدي فيها شويه خلاويص
بوسه ياجميل ربنا يرجعه بالسلامه

انت مش بس حارس عقار..انت أحلى مهندسة ديكور و أحن أم في الدنيا.ربنا يرجعهولك بالسلامة يا فاتيما

فاتيماتاااااا
أول ما شفت الديكور الهايل ده بتاع فيلا يوسف قلت خلاص نقعد احنا في بيوتنا بقا ونبطل شغل خلاص راحت علينا
المهم الديكور للوهلة الأولى من إطلالتي عليه حسيت انه حضن كبييييييييير مليااااااااااان حنيه بشكل رهيب
لكن بصراحة وبقولها برضة بجد على قد شياكة والوان فيلا يوسف اللي بتاخد العقل الا انها سببت بعض الوجع لي
كل الدعاء والأماني الطيبة بلم الشمل عن قريب
تحياتي
حسن أرابيسك

استمتع بدخول هذة المدونة
ولكن مايؤلمني حقا هو فراق فلة كبدك
فعلا اولادنا اكبادنا تمشي على الارض

عبد الجليل

ربنا يرجعه ليكى يا حبيبتى
وينور فيلته
وبيته
وقلبك

حبيبتى انا بخير بس مشغوله شويه
وحشتينى مووووووووووووووت

موووووووووووووه وحضن كبير اوى خالص لاعظم ام فى الدنيا

رئيس جمهورية نفسى
وحشنى إسمك فى صفحة التعليقات يا ريس
حمدلله على سلامتك
و إفتح صفحات التعليق عندك عشان نعرف نتفك معاك بكلمتين لو سمحت
ماشى
طييييييب
و متحرمشى منك يا رب




appy
يا قمر التدوين كله
يا ستى الفيلا و صاحب الفيلا و حارس الفيلا ...أنتى تؤمرى بس
و أى حاجة فيها عيال انا موافقة بالثلث ...
إنتى اللى خدى بوسات و حضونات كتير
و حمدلله على السلامة



ستيتة حسب الله الحمش
إزيك يا ستوتة
إيه ياختشى العيال دى
آه ... ماهو ربى يا خايبة للغايبة
ماااشى
يا ستى هما بس يكبروا و يتجوزا و نفرح بيهم و ربنا يسهلهم ببنات الحلال
أنا كمان يا حبيبتى بحبك




شيماء جمال
يا قمر و شمس فى سما واحدة
إنتى اللى حلوة قوى خالص
و بتجاملنى قوى خالص
و ربنا يسعدك قوى خالص




mony elshreef
ميرسى يا مونى و متحرمشى منك
و فى إنتظار المسج بكل سعادة





أسامة عبدالعال
متحرمشى من دعواتك الحلوة دى يا أسامة
بس أنا عملت إيه دلوقتى طيب ؟؟!!!
يا بنى الإكتئاب دا مرض الناس اللى عندها دم ..
مين عايش فى عالم اللخبطة اللى عايشينه دا و ميجيلوش إكتئاب و سدة نفس عن الدنيا
و بعدين المفروض أنا اللى يكون جايلى إكتئاب ... و لا إنتا هتكتئبى سلف ؟؟





( joudy)
طب يا ستى إنتى إنوى و أنا تحت امرك
بس دا نكش فراخ أصله مش حاجة حلوة قوى ...
متقبلة مرورك و سعيدة بيه



بسنت صلاح الدين
أهلا بيكى دلوقتى و علطول
و بعدين يا بنتى العيلة ام ضفاير بتحن تكون ام و تعامل عروستها كأنها بنتها ...
ربنا يكملك على خير و يرزقك بالخلف الصالح
نورتينى



kochia
يا كوشكش بلاش مبالغة
إنتى بس عاوزة ترفعى نعنوياتى
و هخد بالى حاضر هوه أنا ورايا حاجة تانية غير كدا ...




يوم جديد
ميرسى على ذوقك يا عزيزتى
هيا من ناحية المزاج ففعلاً
كل ما ألف على محلات لعب الأطفال و أشوف حاجة ممكن تنفع احطها و تعجب يوسف بجيبها علطول ...
لا مهندسة و لا حاجة و إلا كنت زمانى اترفدت من بدرى بدرى ...
كل الحكاية إنى بحس الاطفال غاوية ألوان و شد إنتباه بس ....
متحرمشى منك أبدا

خايف من الحقيقة
ليه يا محمود الرسالة دى ؟؟!! ...
بعدين صاحب الفيلا يفتكر
إن حارس الفيلا سجينه ...
مش عاوزاه يحس كدا أبداً ...
أنا إخترت مهنتى دى بملء حريتى و رغبتى و سعادتى و إستمتاعى بكل يوم بيمر عليا فيها ...
و كلامك ف بالى برضو مش نسياه
متقلقش
و متحرمشى من طلتك عليا
و سلامى لست الناس و العيال قوى


adel
يا عادل جمبتك الاولى صعبة و وجعتلى قلبى قوى و بعدين ما إنت زى اخويا الصغير برضو
و ربنا يرزق اولادك بأم احسن منى ألف مرة لأنك شخصية طيبة
و تستاهل كل الخير
وإن شاء الله يحصل كدا





صيدلانية طالعة نازلة
يا لهوى يا صوصو ...
دا المساحة أد تلات إنفار بالعافية
فكرة الشادر دى كويسة ..و أجوز الواد بالمرة بقى توفيرا للنفقات
ههههه
لأ يا ستى إنتى تعملى حسابك تكونى معانا فى مشوار البرج و نروح بعده نقعد فى أى مكان جميل نكمل الفرح برواقة




بنجاواتى
شكراً يا بنجاواتى على دعوتك الطيبة
هوه إسمك دا مش على إسم بخور ؟!!
تفضل إنت فائق إحتراماتى يا فندم



جنى
متحرمشى منك يا سعيد
و من دعواتك أبداً
و يا رب تكون بخير دلوقتى



أحسن تستاهل
يا مهاميهو يا شقاوة
يا بنوتة بلاش مجاملات ...اهى حاجة على قدنا كدا
بصراحة انا بستمتع باللعب مع يوسف و بستمتع بكل تفاصيله
بحس إنى رجعت طفلة و بعمل اللى معرفتش أعمله و أنا فى سنه ..
انا مدينة ليه بالمتعة دى



saragebaly
ربنا يسمع منك يا سارة
متحرمشى منك يا حبيبتى و لا من طلتك عليا



mohamed ghalia
تعيش يا محمد و ميحرمنيش منك



unique
ميرسى يا يونيك
إنتى اللى جميلة مش انا




حاجات جوايا
لا فنانة و لا حاجة يا سالى
أنا بلعب و بحاول أفرح و أتخيل يوسف نفسه يقعد فى مكان شكله إيه
بس





جعلونى مريضا نفسيا
بالعكس يا هشام ..زى ما قولت
الفيلا دى كل كام يوم أعمل فيها حاجة جديدة ...
و كلو شوية أفتح دولاب اللعب بتاعة يوسف و أرتبه و أزود فيه حاجات
كل ما يوحشنى أعمل حاجة تخصه
دا بيواسينى و يحسسنى إنى بقوله بحبك من غير ما يكون قصادى و سامعها
جايز لما يرجع و يشوفها يفهم إنى كنت بفكر فيه علطول
بتمنى ذلك يعنى




عاشقة الرومانسية
يا دودو يا حبيبتى يا كلك شقاوات زى يوسف و اكتر ...
نوتى مش هنا ..أول مرة هشوفك فيها إن شاء الله هجيبه تتعرفى عليه ...
نفسك فى واحدة زيها ؟؟
طب شدى حيلك و هاتى العريس و خلفى
و ملكيش دعوة ..هعملك واحدة زيها و احلى كمان ....
بحبك يا عروسة البحور



mohra
يا مهرة !!
بجد ؟!!




نــور
موافقة طبعا يا نور
بس خلى بالك ..يوسف متكلم عليه بناتيت كتيييير ...و مخطوب لبنت خاله
يعنى قصادك جولات و منافسات لحد ما تخدى الفيلا
و صاحب الفيلا ...أن قولتلك أهو




ta3ban
طب إنت بس نور القاهرة و إحنا هنفسحوك فسحة تدوينية تمام ...




صاحب المضيفة
يسمع منك يا أنس يا رب
طبعا فاكرة الوصفة ... متقلقش عليا
و ألف مليون مبروك يا أخى الصغير الغالى




لجين أبو الدهب
ميرسى يا حبيبتى
كلك ذوق و متحرمشى منك



قوس قزح
يا دوللى بتجاملنى ..
دى الوانتها دوشة خالص أنا عارفة
بس حاجة على قدنا كدا
العرايس دى بتاعتى .. أنا عيلة قوى فى الحاجات دى معندكيش فكرة ...
بس يوسف مش هيمانع ..
لو حب نشيلها ..هعلقها فى حتة تانية مش مشكلة ...
و بعدين إنتى جاية تهدى النفوس و لا إيه النظام .. أدفعله دا إيه دنا منتظرة رجوعه بفارغ الصبر عشان اتهنى بحضنه و بوساته ....
و بخصوص اسامة متقلقيش ... المرة الجاية نلمله شوية قرشينات زى ما لمينا للبت آبى هانم بتنجانى القمر

أم مالك
أشكر ليكى كل كلمة كتبتيها بصدق و وصلتنى بصدق ...
متحرمشى منك و لا من خالص دعائك
حتى يعود الغالى




راجى
متحرمشى من دعواتك الطيبة و نورتنى




إحساس طفلة محبة للرومانسية بس واقعية
أهلا بيكى و بسومة الجميلة من قبل ما أشوفها ...
إنتى جاية من عند الحبايب كمان
علقى وقت ما تحبى و تلاقى عندك حاجة تقوليها و متقلقيش من الناحية دى خالص ...



همس الاحباب
يا أبو همس يا طيب يا غالى
ربنا ما يحرمنى منك يا اخى العزيز
و لا من طبطباتك أبداً
أبداً





القدر و أنا
و يرجعلك الغايب إنتى كمان
يا رب
يا رب
يا رب



صمت المشاعر
يا صموتة إنتى اللى جميلة أوى
متحرمشى من طلتك علينا



assafo anaroze
أحيان يا أسافو الغياب يكثف الحضور
و شخص بعيد يكونلك اقرب من كل اللى حواليك مهما كتروا و ملو الدنيا حواليك ...
بتمنى اكتر منك صدقنى اللى بتتمناه
بتمنى بزاف





mayada
بت يا قاف ميييييييييييم
بقى غايبة بقالك شهور و أيام
و بعدين جاية عشان تثبتى حالة و تقولى الفيلا من حق الزوجة و بتاع ..
إيه بقى
يا ميودة الفيلا و صاحب الفيلا يا حبيبتى ...
سلامى لماما و حياتك و بوسة و حضونة كبيييييييرة ليكى قوى



dahlia
يا دودى حرام عليكى
دنا لو مهندس ديكور أبقى عك خالص
كل الحكاية لعب فى الالوان و بس
كلمة فى سرك ...
أصل بابا الله يرحمه كان محرج علينا نعلق أى حاجة على الحيطة
كنت ساعات أعانده و أعلق رسومات و صور ..
تانى يوم ألاقيه راميها و يقول الحيطة تفضل فاضية
و ساعات كنت أرسم على الحيطة رسومات
و أنضرب طبعاااااااا علق محترمة ...
فبقيت دلوقتى بنفس عن عقدة الطفولة ..
مع يوسف
بقينا سوا نعلق صور و دياديب و لعب و ورق و بالونات و كل حاجة تتخيليها ...
بحاول أخليه يعمل اللى معرفتش أعمله و أنا قده ...
شوفتى بيعملى إيه من غير ما يقصد ؟؟
متحرمشى منك و ربنا يسعدك و يريح قلبك يا رب



حسن أرابيسك
يا شاطر حسن بلاش مبالغات
دا نكش فراخ مش اكتر ...
إنطباعك مش هناقشك فيه لنك راجل فنان و دى قبل ما تكون شغلتك
دى ملكة ربنا مديهالك و إنت ادرى الناس بيها ...
أنا فعلا بعمل كل حاجة فى الفيلا دى بحب و بحنين ليوسف
بحاول أتخيل لما بحط أى حاجة جديدة لما يوسف هيشوفها هيقول إيه و هيعمل إيه
سلامة قلبك من الوجع يا فنان يا كبير القلب و المقام





أستاذ عبدالجليل
أنا اللى مستمتعة بزيارات حضرتك جدا يا أستاذنا ...
من يومين بعت إيميل لهدى عبدالقادر و شكرتلى فى حضرتك جدا ...
قولتلها إنها فى قلوبنا كلنا و إنى لما قابلت حضرتك سالت عليها و أبديت حزنك لغيابها عن ساحة التدوين ...
هدى وصفت حضرتك بالوصف اللايق عليك و كلنا حسيناه لما شوفناك
إنك شخصية محترمة جدا ...
دمت بكل الود و سلامنا لكل من عندك




حنين القلب
حنونة يا حبيبة قلبى
متشكرة لأنك طمنتينى عليكى
و يا رب الإنشغال يبقى فى حاجة كويسة مش مزعجة ...
خلى بالك من صحتك بقى
و كمان متفتحيش الباااااااب
هاه
بوسة و حضونة يا حبيبتى

ما اجمل بيت يكون القلب حارس من بداخلة او ينتظر فيه من يحبه

انتي عسولة قوي

يا رب يا رب يا يوسف ترجع لماما في اسرع وقت
آمين يا رب العالمين

سلام عليكِ

السلام عليكن ياكل فاطمه
السلام عليكن يا كل أم يوسف
السلام عليكن يا فاتحى أبواب الجنه
السلام عليكن يا من فى قلوبهن عوالم الحب
والعطاء والبذل بلا حساب
السلام عليكن يا أطهر عاطفه, يا منه الله على البشر
السلام عليكن يا من وصى بهن الرسول
السلام عليكن يا من قدمكن الرسول على الاباء ثلاث مرات

فاطمه...... فاتيما
أيتها الأم
ليس لروعه مشاعرك من حدود
ولا لأبدع عطاؤك من نهايه
ولا لجمال كلماتك من قدره على أستيعاب
ما تحوى من مشاعر
لكى
ولكل أم
تحيه
وحب
وتقدير
وأحترام
-------
محمد

http://kalamfekalamm.blogspot.com/2009/03/blog-post.html

تصدقى يا طمطم حلمت بيكى انتى ويوسف...

والله كنت معاكم فى الحلم

ان شاء الله ححقق حلمى ده قريب

يا احلى حارس عقار على وجه الارض

فاتيما انا هاعيط خامس مرة النت يفصل عليا وانا بكتب الكومنت

عارفة كان دورى السادس باين وبقيت ال17 وفصل عليا باردو

وبعدها بقيت ال50 والله حراااااااااام

فاتيما يا قمراية وحشتنى جدا جدا

ان شاء الله يرجعلك بالسلامة وتكونوا مع بعض طول العمر ومش تفترقوا وربنا يجعل ايامك كلها فرح مع يوسف وان شاء الله يرجع يعيش فيها مع ماماتة حبيبتة وتتصورلينا انتى وهو فى الفيلا الجميلة دى

وتملوها فرح وسعادة ويملاها عليكى شقاوة ياحبيبتى

:)))

على فكرة انا عايزاكى تدخلى عندى تردى على البوست بتاعى عشان دة غير اللى انتى قصدتية وبجد انا هاستنى اجاباتك يا فاتيما

:)))
هتوحشينى وبوسة كبيرة ليكى ياقمر انتى ويوسف

ربنا يخليكوا لبعض يا فاتيما:))

والله ما مصدقة انى الكومنت نزل دة انا هاعمل فرح
لللللللللللللللللولى

:))))

الطائر الحزين
سعيدة لأنك وصلت لمعنى الفيلا الحقيقى يا إيهاب ...و مش مندهشة من ذلك




نعكشة
ميرسى يا نعكوشة
ناوية إمتى تفتحى التعليقات ؟؟
عشان لنا نحب نغلس عليكى ..
نعرف نغلس براحتنا
هاه



mohamed
كلماتك دايما بتحسسنى إنى حد مهم و إن أى عذابات أمر بها لا تضيع هباء
ربنا ما يحرمنى من حضرتك ابداً
و شاكرة جدا إنك بتعايدنى ..لما قريت البوست دا اول مرة معرفتش أعلق أقول إيه ..إتلجمت خجلاً من كرمك و عطفك
دمت بكل الخير و الود




dodda
دودا يا حبيبة قلبى
انا مبسوطة إنك بتطمنينى عليكى
و بتحلمى بيا كمان .. يادى الهنا
و بيوسف !!
يا بختك
مش هتقولى التفاصيل إيه ؟؟
طيب أنا متباشرة بيكى من غير حاجة
سلميلى على ميومة البهية جدا
و على هدى كمان قوى
أستنى هنا
فين حضوناتى و بسابيسى يا ست الهوانم ؟
؟؟؟؟؟؟؟؟؟؟؟؟؟؟؟؟؟؟




نبض إسكندرية
أسموءة يا جميلة أزيك إنتى يا حبيبتى
بلاش عياط أصل التمبليت دا غلس و ساعات يرخم على الناس الحلوة و ميرضاش يتقبل تعليقاتهم ...
معلشى حقك عليا أنا
إيه طلعت الأسئلة حاجة تانية خالص
طيب آجى أشوف هتطلعونا إيه فى الآخر
أكيد حاجة حلوة زيك
بوسة و حضونة ليكى إنتى و سلميلى على كل حتة ف إسكندرية يا نبض إسكندرية

كالعادة يا فاتيما

بتزرعي يوسف في حياتك بكل الوسائل الممكنة

لأ أنا قلت الكلام بالعكس

هو يوسف مزروع في حياتك وفكل تفاصيلها
بس انت بالحاجات ده بتحطي دلائل مادية عشان تحولي وجوده لواقع ..

ده تحدي بحبه فيكي .. وبحب الناس اللي بتعرف تدور على اللي يريح قلبها و يحايل أحزانها

مش منصف ابدا اشبه الحالة اللي جواي باللي جواكي بس انا حاقارن مقارنة بسيطة بس عشان أوريكي فرق معين

انا بحط مصر في كل حتة حولي زيك برضه
بحط صورها في كل مكان
العلم على الحيطة
حاجات قديمة من بيتنا في مصر بقصد اجيبها معاي هنا و أبدلها بحاجات تانية كل سنة
حاجات فيها ريحة تيتة الله يرحمها و حاجات فيها روح شقتنا

بالضبط زي مابتعملي

بس الفرق اللي بقصده هو اني بعمل ده عشان خايفة على مكان مصر فقلبي ليقل.. خايفة الرابط بيني و بينها يضعف ويتقطع

أما انت أنا متأكده ان اللي بتعمليه مش خوف وتأكيد على مكان يوسف في حياتك

انما طبطبة على وجع الشوق يمكن يرضى و يهدى و تعرفي تضحكي عليه لحد مايوسف يرجع و يبرده

يااارب .. مش حانكل و لانمل من دعاءنا

يااارب.. ترجع يوسف مملكته اللي فايته كتيير قوي وهو بعيد عنها

(:

أبتسامة دامعة

يااااااارب يرجع يا فاتيما قريب

إرسال تعليق