.

.

علشان ... تستاهل  

Posted by: فاتيما in

حبها نار فى القلب تستعر
و النيران لا تخبو
و لكن تشتعل
و الفؤاد اصبح لا يحتمل
و العقل يحادث النفس و ينفعل
أيا نفس ماذا فعلت فى دنياك ... حتى يعتريك ما أعتراك ؟
فعودى يا نفس إلى ربك و مولاك
لعله بنظرة من عطف يرعاك
و قولى : احببت يا رب
و ليس بيدى
فحقق يا إلهى منايا و مطلبى
و يا رسول الحب
احمل منى إليها سلام
و هدىء من روعها إن كانت تبكى و لا تنام
و قل لها حبيب القلب
يهديك السلام
فإصبرى أميرتى على الهجر و الأيام
فالغد لناظره قريب
و بعد الليل يجب أن ينقشع الظلام
.........
( أ )
كنا لسه فى أول سنة جامعة
و قصة الحب بتبتدى فى هدوء ... يسبق العاصفة
عاصفة هبت رياحها من عندى ... و إنتهت و لم تهدأ الأ و هي تسكن قلبه
هو ... ( أ) و دا أول حرف ف إسمه
و زى ما الألف يعتبر اول الحروف فهوه كمان
كان يعتبر اول شاب محترم أصادفه
كل اللى قبله كانوا لا يتعدوا شوية عيال تافهة بتعاكس البنات
و هيا خارجة من المدرسة الثانوى
و اولاد الجيران اللى كنت بلعب معاهم كورة زمان و شايفهم دايما زى أخواتى
تقريباً كان اول حد متميز دخل حياتى من باب الاحترام
و انا داخلة الجامعة أساساً و عندى استعداد أحب
بس ألاقى حد يستحق المشاعر دى ... و قد كان
من اولها إنبهرت بشخصيته و تفكيره
و إتشديت لجدعنته و حيائه
كلنا كنا متلخبطين فى بداية السنة و محدش عارف هيروح قسم إيه
جمعتنا الحيرة و اللقاءات ... بعدها حول ( أ ) من قسم تانى
عشان يستقر فى شلتنا
و مش كل مرة هأقولكم
إنى كعادتى ... طول عمرى متهورة فى الحب و معنديش تفاهم
بس مجرد حسيت بقلبى بيدق
قررت أتعامل مع الموقف عادى خالص و بمنتهى الصراحة
و اللى يحصل يحصل
كنا مختلفين فى نواحى كتير أى ناحية فيهم كفيلة بالقضاء
على قصة الحب دى فى مهدها
فروق فى الوضع المادى و الإجتماعى
و كمان فكرة إحتمالية وجود سنين إنتظار
طويييييلة بعد التخرج ... دا غيرأصلا صعوبة التعامل مع بابا
و اللى كانت ف التوقيت دا تعتبر حكاية دونكيشوتية بحتة
و يمكن حتى محاربة الطواحين تجيب نتيجة
مجدية اكتر ... من الوقوف فى وش بابا
و مع كل هذا إتفأجت إنه بيبادلنى المشاعرو خجله منعه
يا سلام ... وقتها كان حظى من السما
إنسان جميل و طيب و مهذب و متدين ... والأهم بيحبنى
فى خلال أسابيع ... كنا قايلين كل حاجة
و بدءت فصول القصة تتوالى
شهرين تلاتة و فى يناير حصلت حرب الخليج الاولى
و مدولنا اجازة نص السنة أسبوعين زيادة
الفراق دام بينا شهر و يمكن أكتر ... مكنش فيه ساعتها تليفون أكلمه
و لا موبايلات طبعا
عشنا البعد و ثقل وطأته فى الخيال
وفى أول يوم رجوع للكلية ... إدانى القصيدة دى
و كأنه بيدينى حتة من قلبه
مكنش بيقولى بحبك دايما ... لكن نظرة عينه كانت بتعبر فى صمت جميل
بمجرد لما ادخل المدرج الصبح و قبل ما أقول حتى صباح الخير
حب هادىء و متزن و خجول
عدى نص السنة التانى ... و فترت العلاقة من طرفى
صارحت نفسى و إكتشفت إنى مبهورة بيه
كان نقيض لأغلب الرجالة اللى فى حياتى
و كنت أتمنى أرتبط بحد مغاير لشخصية بابا اللى كان عاملى شبه عقدة
كان صعب شوية لأ شويتين ... جرىء و بشكل صارخ ... كتوم
و نادرا ما يعبر عن مشاعره
اما هوه ... فكان العكس ... بسيط و سلس و هادى و رغم صمته حنون
ورغم إن كل شىء كما تمنيته
لكنه ... لم يكن حباً
كان إنبهار و رغبة مستترة منى فى المرور بقصة حب وفقط
و كان الموقف زى الكابوس الجاثم على ضميرى ... و لازم يتكتبله خاتمة
و زى نزار قبانى ما بيقول على أن من بدأ المأساة ... ينهييها
فى آخر يوم إمتحانات ... طلبت منه نتكلم فى موضوع مهم و ضرورى
لسه بننقى مكان و هنقعد أهو .... بادرنى بحنان
لم يختفى لآخر لحظة
وحشتينى
أنا عاوزة أقولك حاجة مهمة
قولى يا ستى
أنا ...........
مالك إتكلمى خضيتنى .. فيه حاجة ف البيت ؟
.... أنا مش قادرة اكمل علاقتنا دى ....
طيب مالك متوترة كدا ليه ؟
.....................
عموما أنا قلبى كان حاسس
أنا أسفة ... أنا ....
.. براحة على نفسك يا بنتى ...على فكرة أنا لازم أشكرك
!! ... على إيه ؟
لأنك قولتيلى ف وشى و صارحتينى ... بدل ما اكتشفها لوحدى
و العلاقة بينا تنتهى بشكل مش حلو و أنا محبش دا يحصل بيننا
!!!!!!!!!!!!!!!!!!
الموقف دا حصل من 19 سنة تقريبا
و رغم كل هذا الوقت ... ما زلت أسيرته حتى اليوم
ليه ؟
أقولكم
لأن هذا الإنسان تسبب (دون أن يقصد طبعاً ) فى ما عانيته فى حياتى
بعد ذلك من تقبل قسوة الآخرين
خلانى أتصور و بسذاجة تصل لحالة غباء مطلق إن كل قصة حب بين إتنين
ممكن تنتهى النهاية الشيك دى و ميجراش حاجة ... و حصل خير
فعلاً ... ما هو حصل خير بعد كدا
لأنى و هذا الإنسان علاقتنا تحولت من الحب او الإعجاب
لتاخد شكل صداقة و اخوة حقيقية
هوه الحمدلله متجوز من إنسانة تستحقه و تقدر قيمته
و ممكن يتقال إنها تميمة حظه و لها نصيب كبيرمن نجاحه و إستقراره
و فى لحظة صراحة بينى و بينها فجأتنى إنها تعرف إن كان بينا قصة قديمة
و لأنها واثقة فيا و فيه و فى نفسها طبعااااا
معندهاش مشكله فى وجودى فى حياتهم و مرحب بيا فى أى وقت
طب م الدنيا جميلة و وردية اهو ... اومال قلبت معايا انا كحلى لييييييه
كل اللى عرفتهم بعد كدا و مش كتير قوى محدش يتوهم
كان للأسف فراقى عنهم درامى و سىء للغاية
كان بيحبنى حب الناس العاقلة اللى لما تلاقى هيحصل مشاكل
بتبعد عشان متوجعشى دماغها ... وعنده حق طبعا مقدرش ألومه
إبن عمى
اللى كنت مخطوباله ... لما بعدنا كان فراقنا صادم عنيف و منيل بنيلة
و لحد النهاردة لما بيشوفنى صدفة بيعاملنى ببرود قاتل
مع محاولتى إنى أعتذرله على اد ما امكننى و منفعشى
و بابا قعد بسببه سنين مش طايقنى
فحدث و لا حرج .. لمجرد إنى فتحت بوقى بس
و قولت نفارق بالمعروف كان الأنتقام هو سيد الموقف
و احال حياتى و حياة إبنى و اهلى إلى جحيم
الله !!!! الناس دى مالها غلست معايا كدا ؟
ليه مكنوش زيه ؟
غالبا العيب فيا ... مش غالبا دا اكيد و مش هقول سوء حظ
لكن هقول حظى كان فى معرفته هو ... حلو
لأنى رغم مرور كل هذا العمر و مشاعرى اللى واخدة شكل محايد تماماً
ما زلت أتمنى أقابل راجل زيه .. و مش هوه طبعا
لأنه الآن فى حكم الاخ و الصديق و زميل العمر
اللى مهما بعدت عنه شايلاله ف قلبى محبة لا تزول
و ربنا يهدى سره و يسعده
لكن فى احيان كتير بيعدى عليا وقت
زى الأيام دى
أحن و أشتاق لزمن كان قلبى فيه بيعيش ببراءة و عذوبة
قصة حب جميلة رقيقة مفيش حاجة خدشتها و لا أفسدتها
لما حاولت ادور على ذكريات ملموسة من احباب فارقونى
أى حاجة .. ملقتيش
لقيت ذكريات مليانة عنف و قسوة وتصرفات توصف بحاجة شبه الحب
شبهه .. مجرد شبه ... و محدش فيهم حبنى بجد
و لا حد فيهم إحترمنى و قرب منى و بعد عنى بهدوء و لطف كما فعل هو
و لما وحدتى أوقات توجعنى
و أدخل فى دور حسرة على نفسى
بحاول ادور على لمحة نور تخفف عنى
و إكتشف بعد التدوير و البحث الطويل
إنى معنديش غير قصيدة الشعر دى
أقراها و كإنى رجعت للزمن 19 سنة و أحس بحاجة غريبة
تقدروا تقولوا حالة صدق نادرة لم يصادفها قلبى من زماااااااااان
صحيح مبقتش الإنسانة اللى كان بيوصفها
و لا المشاعر دى بقت موجودة و لا حية
و ذهبت لمن تستحقها .... لكن ايه المشكلة ؟
أنا واخدة المسألة ببساطة شديدة
هذه المشاعر كانت لى و لوهلة من الزمن
و أظن من حقى أن إستحضرها وقتما شئت
و أذكرها بالخير ... هى و صاحبها
ثم أعود
و اطويها فى قلبى مرة آخرى
و أدعو له بالسعادة
و أتمنالوا الخير ... لأنه لم يجرحنى يوماً
بالعكس
معاملته الطيبة ليا ... خلتنى أحاول أكون اكثر تسامحاً
و ابص لكل اللى جرحوا قلبى بنظرة إشفاق
لأنهم لم يملكوا هذا النوع من الرقى و السمو الإنسانى
و يا عزيزى ( أ ) إينما كانت أراضيك
و إن لم تصلك كلماتى أبداً و لا أحسست يوماً ... إمتنانى العميق
أنا بشكرك فعلا من كل قلبى
و كلما جرفنى حنينى لبعض النقاء ... أعود لقصيدتك
و لزمن أنصفنى و لو قليلاً
و أتنهد تنهيدة طويييييلة
و أتمنالك الخير
من قلبى
علشان ... تستاهل

This entry was posted on الأربعاء, أبريل 15, 2009 and is filed under . You can leave a response and follow any responses to this entry through the .

41 كــــلام بيطــبطـــب عـــلى قــــلبى و روحــــى

ماشاء الله
بس انا عندي ثقة لحد دلوقتي ان فيه ناس كتير كدة

في اي حاجة مش شرط الحب

متخافيش
مش يمكن الخير كله متشاللك بعدين
سواء بعدين دنيا او آخره

عارفة الواحد بيحب يرجع يبص لزمان و يفضل يفتكر
وانها بتبقى مجرد زكريات

ساعات بتهون علينا و ساعات اهو يعني

عامتاً

كان عندي سؤال

يعني اية

دونكيشوتية؟؟؟

معلش يعني اصلي جاهلة

يلا عشان عندي امتحان بعد ساعتين كدة

دعوات

سلام عليكِ

عارفة يا فاتيما احساسك عالى اوى
وعايزة دنيا كاملة وعالم مثالى
عشان كدا الايام خبطتك

بس مسيرها تروق وتحلى
الايام السيئة مش بتدوم والايام الجميلة مش بتدوم والدنيا بتدور وتلف وتحلى

جميل ثقته المتبادلة والاحترام اللى بينك وبين الصديقك واخوك الحالى وزوجتة
ربنا يديمها ويصلحلك الحال
ويسعدك دائما :)

تقبلى مرورى

كله بلاء والله ربنا يعافى الجميع

كلماتك جميلة قوي يا فاتيما

قوية في رقتها ومشاعر الحزن اللي بتلفها على استحياء من فقد إنسان لم تقابلي مثله بعد الإبتعاد عنه

بدعيلك من كل قلبي تقابلي راجل يقدر قيمتك ويحبك بعدد كل سنين العذاب اللي عشتيها وبعدد سنين عمرك الطويل المديد اللي جاية بإذن الله

افتحي قلبك يا فاطمة للحياة لأنك تستحقي كل الحب وكل الخير وكل السعادة

دمتي سالمة

عارفة المشكلة انك طيبة اوى ورقيقة جدا علشان بتدورى على براءة وصدق فى زمن ضاع فيه كل قيمة جميلة من حياتنا
بس اكيد مش من كل الناس
ربنايسعد ايامك يارب ويحققلك كل اللى بتتمنيه

سيدتي فاتيما
و الله الدنيا ديه اللي تجرح قلب طيب زيك مفيهاش خير
صراحتك و لانك مابتنفقيش جعلتك معرضة لمواقف عدائية و من مين من الناس اللي كنت بتظني انهم بيحبوكي و يمكن يفهموك
بس الدنيا كده ناس وحشة و ناس شربات زيك كده بس قليلون او معدودين على رؤوس الاصابع
سيدتي اكيد حتلاقي الايد الحنونة اللي حتقدر قيمتك و انسانيتك اللي مالهاش زي
مودتي

بجد قلبك طيب موووووووووت ربنا يسعدك ويحقق كل أحلامك ويارب تنولى راحة البال ويارب يرزق باخير من فى الدنيا ويعوض صبرك خير اللهم آمين..... وبجد كفاية انك تشوفى يوسف ربنا يرجعه ليكى بالسلامة يارب يسعدكوا وما يفرق بينكم أبدا

مش عارفه اقولك ايه يامامتي

بجد قعدت ارتب كلام كده وف الاخر مسحته

بس والله انتي اخر واحد يستاهل الي بيجراله ده بجد

ربنا معاكي

وكل حياتك ان شاء الله هتبقى لحظات حلوه

اصبري بس

وربنا مع الصابرين

مش عارفة ليه لفت نظرى قوى العنوان

علشان ... تستاهل

وعمالة اقرا واشوف هو مين اللى علشان يستاهل فحصله حاجة عد كده

هل بتقوليها لنفسك
علشان تستاهلى ونتيجة اختيارك وقرارك
ولا بتقوليها للقصيدة لانها حلوة وانك محتفظة بيها وبجمالها علشان تستاهل

وحشتينى قوى
وعمالة ازن على خيخة علشان نتجمع ف اول مايو علشان نحتفل بعيد ميلاد اتنين غاليين قوى فاتيما وداليا قوس قزح

اتمنى نتقابل قريب
علشان تختارى معايا اسم النونة الجاية
اول واحدة تعرف اهو من المدونين

بحبك قوى
وبوسات كتير لغاية مشوفك

هبة

الناس اللى زي (أ) صحيح مش كتير بس موجودين

ان شاء الله تقابلي واحد كدا يستحق قلبك الجميل ومشاعرك المرهفة

حقيقي كتير الذكريات الصادقة بتريح الانسان لما بيفتكرها وبتيله هدوء وسلام نفسي حتى لو كانت ماضي وراح

على فكرة صور فيلا يوسف عجبتنى مووووت ربنا يخليه لكى ويرجع ينور فيلته واسمحيلى هاخد افكار منها واعملها لبناتى في اودتهم بس قلت قبل ما اسرق افكارك استأذنك

شوفتى حرامية بس مؤدبة وعندى مبدأ

أنا عد إذنك اخدت الصور كلها بتاعت فيلا يوسف علشان احتفظ بيهم معايا

ابنى وانا حرة
عندك اعتراض

يسلم ايديكى
وقلبك
وعقلك
وروحك

انتى عاملة حاجات
وبتعلمى كل ام حاجات

الى لقاء قريب
هبة

فعلا حد بالشياكة والكرامة والرقى ده مينفعش غير انك تتمنيله الخير

ربنا يرزقك بحب جديد احلى مما تتوقعى وتحلمى يعوضك خير عن كل اللى مريتى بيه

خالص ودى
سالى

العيب مش فيكى ..

العيب فى الناس اللى بقيت مادية لابعد حد .. وقاسية لابعد حد .. وما عندهاش مشاعر لابعد حد .. ولا عندها احترام للطرف التانى لابعد حد ..

الرجل الاول اللى قبلتيه فى حياتك للاسف هذا النوع من بين الرجال نادر ..

النوع الل يحترمك ويقدرك .. ويكون متفهم مشاعرك ..

مش هو اللى لابس وش الملائكة واول موقف تبدأى تاخديه يكشف عن وجه القبيح ..

ربنا يبارك فيه وفى زوجته لانه فعلا يستاهل ..

ويبارك لك فى يوسف ..

دمتِ بخير ..

الدنيا دي غريبة قوي يا فاتيما.. يا امة بتدي الناس اللي نفسهم فيه بدري أوي قبل ما يعرفه انه نفسهم فيه يا امة متأخر أوي بعد ميكون حاجات كتير مبقتش تنفع..الحلو فيكي و اللي بحبه فيكي اوي اوي هو الرضا..لأن في الأول و في الأخر كله مكتوب!ربنا يعوضك خير و يرضيكي و يراضيكي على قد ما تستاهلي
بوسة و حضن كبير قد الدنيا

ليكى تاج عندى فى مدونة كلمات من ذهب يا ريت تقبليه معلش بتقل عليكى

انا كتبت تعليق طويل وبعد كدة مسحته

وكتبت تعليق صغنن وبعد كدة مسحته

وكتبت تعليق على البوستين اللى فاتوا وبعد كدة مسحته

وكتبت تعليق متوسط الطول
عريض الكلمات
وبعد كدة مسحته


وكتبت قصيدة شعر خيخية تليق مع المناسبة دى و بعد كدة مسحتها

وانقهرت من العياط ومتسالنيش ليه وبعد كدة مسحت مناخيرى


وبعد كدة مش عارفة اكتب اى حاجة
لان عارفة لو كتبت حاجة احتمال انتى اللى تعيطى وتمسحى مناخيرك وتمسحى تعليقى



سلام
اختك خيخة

فاتيما
عندك حق تماما
هناك نماذج فريدة من البشر تجبرك على احترامها حتى لو اختلفتم
ونماذج عجيبة تصيبك بالاعياء والقرف وربما الرعب بمجرد اقترابك من جحيمهم
والله هو المنتقم الجبار من امثال هؤلالءالظلمة الجبارين عديمى القلب والعقل
ربنا يعوضك خيرا

الحب مش كلمة بتترمى علشان حبة حنان
أو حد بيحتمي فى التاني من الزمان


انا عارف من البداية
عايزانى اكون نهارك
او جنة فى عز نارك
واخد من الحزن تارك واوفيلك للنهاية
وان تاهت خطوتى او غابت يوم بعيد
تسيبينى فى غربتى مستنى عذاب جديد



عارفة الاغنية دى يا فاتيما ؟

عارفاها مش كدة
اسمها حبيبتى بتاعة رياض الهمشرى

افتكرتها وانا بقرا البوست ده

فاتيما
انت مخلوق طيب جدا جدا
وانا قلقان عليكي بصدق
فاتيما الانجليز بيقولوا
You cannot drive your car looking in your back mirror
ارجوكي
بصي قدام لبكرة
وعاوز منك حاجة واحدة بس

ممكن تقوليلي انتي خططك ايةالسنة الجاية
هتكوني فين
مع مين
عزيزتي
جميل جدا الحزن والشجن اللي انتي فية
بس ارجوكي
حاولي تخرجي من نهر الذكريات
الى ضفة الواقع
من اجل فاطمة ويوسف على حد سواء
وتقبلي كل المودة

السلام عليكم

مش عارف اقول ايه
انا لما حصل معاى كده والله قلت زى ما الاول قال انتى كده فرحتينى :D برغم انى كنت اكتر حد فى الدنيا شايف الدنيا سوده وانا بسمع الكلام ده

بجد ربنا معاكى ويخليك يوسف وان شاء الله ربنا يعوضك كل خير
دمت بكل خير
سلاااااااام

فاتيما

القصيدة عجبتنى اووووى يا طماطم

ومش لاقية اى كلام اعلق بية بجد غير انك خلتينى فى حالة ذهول من احساسك اللى انتى قدرتى توصلية ليا

انتى رائعة يا فاتيما

؟؟؟؟؟؟؟؟؟؟؟؟؟؟؟؟؟

هى دى حالتى من كلامك

دمتى بخير حبيبتى الغالية

تحياتى وبوسة كبيرة اوى لشخصك الطيب ووجهك الجميل

عرفتي "أ" لأن زي ما قلتي بالضبط كنت بنوتة عطشانه للحنية
سيبتي "أ" لأنك بنوتة عاقلة ومش بتضحكي على نفسك
عرفتي ابو الهول وابن العم ومخلص علشان السبب الأول
اتجرحتي لأن ده ابتلاء من ربنا
انتي مش بتحبي "أ" وانا عارفه انك عارفه كده
أنتي بتحني للحنية وانا حاسة بيكي قوي .. ساعات بنلوم نفسنا "مع اننا مغلطناش" ونقول لها مش يمكن لو كذا كنت بقيت سعيدة
بس بسرعة بترجع فاتيما للعقل اللي كان عندها وهي بنت 18 لما خدت قرار ده مش حب وتقول مكنتش ها اتجوز من غير حب حقيقي تحت اي بند
واللي غدر منه لله
واللي اتغدر له الله
وربنا يرد يوسفك ويفرح قلبك

مين اللي رزقك ب "أ" في الأول؟
قادر سبحانه يجيب ب أو ت أو حتى ي موافقين بس حنين بيد رحمتك يارب

وما تقوليش لي مش ها اتجوز
اصلا قدر الله نافذ نافذ وانا يا ستي بدعي ربنا
انا حرة بقى

بحبك

السلام عليكم

كيف حال اختنا الطيبة ام يوسف ..

لقد عانيتي كثيرا فاصبري فالقدر يخبئ لكي خيرا وفيرا ..

حبيبتى فاتيما
كل ده واكتر انتى شيلاه فى قلبك
وانا عارفه ومش مستغربه خالص
لانى كان ممكن استغرب لو كنت لسه مش قابلتك
لكن بعد ماشفت بعينى وحسيت انتى اد ايه انسانه طيبه وحنونه ومتسامحه
مفيش اى مجال للاندهاش
"أ" مش هو السبب فى تسامحك مع الناس اللى جرحوكى
لانك بطبعك متسامحه
لو شخصيتك عكس كده كان الوضع هيختلف كتير حتى لو كان فى حياتك مئااااات زي "أ"
هو كل الموضوع هو لحظه حنين لاحساس افتقدتيه مع كل اللى قابلتيهم فى حياتك
الا هو
اما عن ابو الهول وابن عمك وطليقك
فهما مش قاعده
هما مش اكتر من نماذج
اه هى نماذج وحشه وكلها جت ورا بعضها
بس فى النهايه هما مش كل الناس

حاسه بيكى قوووووووووووووى على فكره
ومقدره احساسك وحنينك لاحساس زى ده مع كل الظروف اللى مريتى بيها

لازم اقولك ان الورده البيضا جميله ياوفاء(اه انتى وفاءواخلاص كمان)ولو ان فاتيما اجمل بس انا بقصد الصفات

وكمان الاغنيه رووووووووعه وماشيه مع البوست نااااار

بـــحـــبـــكـــ

نعكشة
الأول ازيك يا نعكوشتى
و ثانياً ... أنا كمان متاكدة أن الناس دى لسه موجودة و الدنيا بخير
العيب عندى أنا
تقوليش فيا مغناطيس بيجذب الأشخاص الخطأ و يبعدنى عن الكويسين بالمشوار
الدونكيشوتية دى يا ستى نسبة إلى دون كيشوت ...دا راجل طيب عبارة عن شخصية فى رواية قديمة بتحكى عن فارس حب يحارب الشر فدماغه لسعت ...
اسامة أنور عكاشة أستوحى من قصته فكرة مسلسل رحلة السيد ابو العلا البشرى بتاع محمود مرسى
اللينك دا ممكن يشرح شوية
http://www.shatharat.net/vb/showthread.php?t=127

خالص حبى ليكى و عالله تكونى حليتى كويس فى الامتحان يا ست البنات
هاه




إحساس طفلة محبة للرومانسية بس واقعية
و الله يا عزيزتى إنتى إسمك ممكن ينطبق على البوست دا خالص و فعلا أنا محظوظة لأن الناس دى تقبلتنى فى حياتها بشكل متحضر كدا ...
انا متقبلة مرورك دايما



الطائر الحزين
بلاء !!!
أومال مش حساه بلاء ليه
دى نعمة يا إيهاب .. إن يكون عندك زاد كويس من الذكريات الطيبة اللى تساعدك وقت الضيق و الخنقة
لو تقصد الفشل فى صمود الحب
دا نصيب و مكتوب
متحرمشى من طلتك عليا يا طائرى الحزين




elmasrya - mrs writer
وصفك للحالة بيسعدنى جدا
عارفة ليه ؟
لأنه حسسنى انى عرفت أوصف و اوصل شعورى كويس و إنكم فهمتوا القصد و الاهم حسيتوه قوى
أفتح قلبى اكتر من كدا يا مصرية ؟؟
دا مفتوح ع البحرى أهو و حابب كل الدنيا حتى اللى يوجع القلب




أيوشة
لا مشكلة و لا حاجة يا أيوشتى
دا نوع من التكيف مع الحياة الصعبة
معرفتش اعيشها كما يجب ...
يبقى أفتكر منها الخير على اد ما أقدر
متحرمشى منك و لا من دعواتك الحلوة




assafo anaroze
العيب مش ف الدنيا يا أسافو
الدنيا فيها الخير و الشر
و المفروض البنى آدم يتعلم إزاى يعايشها و بسرعة ياخد القرار الصح فى الوقت الصح بالشكل الصح
اختك بقى بتنشن دايما على الراجل الغلط فى الوقت الغلط فالدنيا بتيجى معايا بالعكس ...
الحمدلله دلوقتى تمام بعد نهاية كل شىء
الواحد بيبص ورا و يتعلم من اخطائه على قدر الأمكان
نورتنى بزاف



( joudy )
يا جودى متحرمشى منك يا حبيبتى أبداً
و طبعا هروح أشوف التاج اكيد
بس بستسمحك تستنى عليا شوية علشان اجاوبه بروقان
ماشى ؟؟


mony elshreef
متقوليش حاجة خالص يا منمونتى ...
أنا زى الفل أهو متتكلميش و كأنى ف مأساة دنا بفضفض معاكم و احكى بس مش اكتر
أنا الحمدلله
زى الفل

doba
أنا قعدت شوية متنحة قصاد تعليقك و مش مستوعبة الموضوع ...
الف مليون مبروووووووووووك يا حبيبة قلبى
دا اول خبر يفرحنى قوى من مدة طويلة
عارفة و تصدقنى لو قلتلك ...
حاسة إن إختى حامل و هتجبلنا ولى عهد و تزود سلاسل العيلة بكتكوت صغنن ..
بنت
انا عاوزة بنت
إتصرفى و متقوليليش إزاى
هجوزها ليوسف بعد إذنك و إذن أبوها
طب ولد ماشى مش هقاطع
و لا أقولك هاتى تؤام و متزعليش حد
ألف مليون مبروك
أنا عمالة ازن ع البت خيخة تعمل لقاء حريمى من بدرى و من غير ما أعرف بس وحشتينى و قلبى حاسس بإن اللقاء دا فيه شىء حلو و مش عادى
إنتى اللى خليتيلوه معنى تانى و فرحة
و أعياد ميلاد مين يا ست الستات
دنتى بالبيبى المستخبى جوا دا عيد لوحدك
أنا متشوقة من دلوقتى أشوفك و أطبطب عليه و اوصيه عليكى و أقوله يشد حيله و يطلعلنا حلو و كويس و ميتعبكيش ...
خلى بالك من نفسك بقى قوى
و كلى كويس .. و لبن و كالسيوم للصبح
و حاجات و صور يوسف إيه اللى بتقولى عليها ... دا الواد خالص بقى عندكو ..دنتى حماته و أمه التانية يعنى
لما نتقابل هجيبلك معايا شوية حاجات زى بتاعت فيلا يوسف تبقى تعملى منها فيلا للعيال
الله
حلوة العيال دى .. صح
هتبقى ام العيال مش يسوفة العسل بس
يا رب
يا رب
يسعدك و يريح بالك و يتم لك على ألف خير ...
ألف مبروك يا حبيبتى
ألف مليون مبروك
بوسات و حضونات كتيييييير مش ليكى بس
شوية منهم للبيبى
هاه

reem
حقيقي كتير الذكريات الصادقة بتريح الانسان لما بيفتكرها وبتيله هدوء وسلام نفسي حتى لو كانت ماضي وراح

إنتى أوجزتى البوست كله فى الجملة دى يا ريم
الله عليكى
و يا بنتى خدى اللى يعجبك و لا يهمك
مش للعيال
تبقى أحلى سرقة ف الدنيا لو هتخليهم فرحانين و مبسوطين



حاجات جوايا
فعلا يا سالى .. علشان يستاهل
بوسيلى دودو كتير




لجين أبو الدهب
لأ يا لجين
العيب عندى يا بنتى
إختياراتى خطأ أساسا
عارفة بيت الشعر بتاع الامام الشافعى
و لا ترجو السماحة من بخيل
فما فى النار للظمآن ماء
البيت دا يلخص كل شىء ... كنت بختار ناس غلط ... و النتيجة دى منطقية و الواحد المفروض يكون أوعى من كدا
بس النصيب ساعات يحكم
و غباء القلب بيحكم ساعات تانية
و ربنا يباركله هوه و مراته دا دعائى أنا كمان




dahlia
ماهو لازم أرضى يا داليا
إن صبرتم .. أجرتم و أمر الله نافذ
و إن ما صبرتم .. كفرتم ..و أمر الله نافذ
أصله نصيب و إنكتب
أحسر نفسى يعنى و لا إيه
كل واحد منهم كان من نصيب واحدة تانية غيرى .. مكتوباله عند رربنا
و عاوزة أقولك حاجة بالمناسبة دى بقى
إن وشى حلو قوى على اللى بيسبنى و يفلسع ..كلهم ما شاء الله و الحمدلله متجوزين و مستقرين و ناجحين
و اول ما يفارقونى يا بنتى علطول ...
لما بقيت شبه متاكدة إن وشى مش حلو
أصل ماما دايما تقولى ..
الستات قرف
يعنى فيه واحدة يبقى وشها حلو على جوزها ( ماما كانت كدا على فكرة مع باب )
اول ما يرتبط بيها ربنا يفتحها عليه قوى و ينجح ..
و فيه ستات زى حالاتى كدا ... وشهم فقر ( هيا مقلتش بس أنا ربطت الاحداث ببعض )
عشان كدا بقولك العيب فيا
و كمان الرضا ضرورى لأنهم كلهم الحمدلله كويسين و محدش إتوكس بسببى و دا عاملى حالة رضا نفسى كبير ..إنى مأثرتش فى حد بشكل يحطمه ..
الحمدلله
بوسيلى يحيى و فارس يا ست الستات



بت خيخة و أى كلام
بت يا خوخة انا حطيت صورة لدوبا فوق أهو و بطنها كبرت شوية ..يلا بقى حدديلنا معاد ملكيش حجة ...
و بتمسحى التعليقات ليييييييييه
عاوزة أقراهم كلهم و لو هعيط معاكى
فين القصيدة ؟؟
كان نفسى أقراها و أمسح تعليقك ليه ؟؟
إنتى كنتى هتشتمى يا بت و لا إيه ؟؟
الغنوة دى اول مرة أسمعها مع إنى بحب رياض الهمشرى جدا كمطرب .. بس مش لاقيله أغانى على النت خصوصا الآخرانية ..أنا عندى ليه أول شريطين طلعهم ..متهيألى أنا الوحيدة فى المصر اللى إشتريتهم سنة 90 و 92 و محدش غيرى سمعهم ....
كلمات الغنوة تعبير مهذب عن ندالتى
اللى أنا معترفة بيها أساسا
عشان كدا مش ناوية احط حد فى الموقف دا تانى بعد ما جرحت بيه إنسان محترم زمان .. بس دايما قلبى كان بيوقعنى مع ناس تانية للأسف محبتنيش نص ما حبيتها
هوه سوء تقدير منى ...عارفة
بوسيلى شريف يا خوخة
و ربنا يطيب جرحك اى كان

خايف من الحقيقة
يا محمود يا عزيزى ليه كل القلق دا
إحتمال لأنك وصفت نفسك بإنك خايف على الناس ..و منهم
يمكن
بس عاوزة أقولك إن نهر الذكريات دا هوه اللى محافظ على نفسيتى من الجفاف اللى ممكن يصيبنى لو رسيت على ضفة الواقع
عارف ليه ؟
لأن ضفتى هتكون قاحلة جدباء و منظرها ممكن يسد نفسى عن الدنيا ...
سؤالك على قدر اهميته
على قدر صعوبته
كل المدة دى يا محمود و ما زلت لا تعرفنى جيدا ... معقول ؟؟!!!
منتش عارف إنى مش من النوع دا من البشراللى ممكن يقولوك هنكون فين السنة الجاية و مع مين ...
مقدرشى اجاوبك ع السؤال دا
لأنى معرفش الغيب و اللى ممكن اخمنه إنى هكون ممكن لوحدى و ممكن مع يوسف
و ممكن أكون مع حد يشاركنى حياتى و معانا يوسف و ممكن اموت أصلا و مبقاش موجودة
ممكن ابقى فى سجن او مستشفى او برا الحدود أو هربانة من مكيدة جديدة أو حاجة عاشرة غير دول كلهم ...
سؤالك فيما معناه ..إعملى حاجة بدل الجلوس على الأطلال و البكاء على ما فات
صح ؟
أنا مش ببكى يا محمود
أنا بحكى و أفضفض معاكم
بدور على شغل صدقنى .. بس يتوائم مع ظروفى ...
و طبعا لن أتسول عريس أو حتى حب جديد
و موضوع يوسف ... مش هحكيلك عنه
إنت عارف من غير ما أقول
متقبلة مودتك و خوفك عليا لأخر حد و مدى
و متحرمشى منك أبداً و لا من سؤالك
تحياتى لست الناس و العيال
و إبقى طمننى على صحة قلبك
اللى شكلى وجعته اكتر ما هو موجوع






إمبارح كان عمرى عشرين
نورت المدونة يا فندم
و كويس إن المكتوب فرحك و سببلك سعادة و الدنيا فيها كل حاجة بس فكرة إنك لما تلاقى الشىء الغالى تقدر قيمته و تحتفظ بيه و لا تلقه بعيدا
نورت





نبض إسكندرية
يا أسماء أنا سعيدة لأن الحالة وصلتك
و القصيدة كمان عجبتك ؟؟
دا نصها بس .. النص التانى كان فيه غزل عفيف جميل و الواحد احرج يحطه ..
أصل خلاص الشعر مبقاش كله حرير و غزا الشيب مفرقه و العيون و كلى مبقتش الأنسانة اللى هوه كان بيوصفها فقلت مفيش داعى انشرها عشان متحاكمش بتهمة التزوير و التدليس
تحياتى أنا اكتر يا حبيبتى





ستيته حسب الله الحمش
بصى يا ستوتة
إنتى لخصتى قصة حياتى العاطفية فى تعليقك دا ...بالمللى
بس خلى بالك من جزئية مهمة
أنا عارفة و متاكدة
إن المشاعر تجاه ( أ ) كانت و ما زالت صداقة و أخوية مش اكتر ...
و الوضع لم يتبدل عن زمان
و أصلا لم يتبدل خالص فى يوم
دايما شايفاه أخويا
و زميل عمرى و فقط
لأن مشاعرى واضحة و مفهومة عندى جدا
و طول عمرى مينفعش أتجوز واحد مبحبوش حب حقيقى و رغم كل ما مريت بيه ما زلت مصرة على المبدأ دا ..
بس بحاول أختار حد صح المرة دى و بلاش الحفرة بتاعة كل مرة لأنى المرة دى مش هقع فيها لوحدى ..
يوسف هيكون معايا
يا ستوتى أدعى زى ما تحبى كل اللى ييجى منك خير و محدش عارف النصيب فين
أنا كتبت البوست دا لنى حابة أفضفض معاكم و احكى الحكاية ببساطة و رغم تاكدى أن ( أ ) لن يقرأها ..
لكن مجرد إحساسى إن عاوزة أكتب القصة و أعبر عن إمتنانى ليه و لو بالغيب
دا بيسعدنى و يرضينى و يكفينى
انا كمان بحبك يا ستوتى



جنى
و عليكم السلام يا جنى
أنا بخير يا سعيد و صابرة الحمدلله
و كويسة أهو و متقلقش عليا
المهم إنت تكون بخير
و صحتك دلوقتى تكون احسن

عاشقة الرومانسية
بقيتى استاذة فى فن الحياة يا دودو
مبقولش ( أ ) هوه السبب قوى
أنا قصدى حكايتى معاه هى اللى خلتنى أتعامل مع كل من جاء بعده بالشكل دا
و كلامك قرب كتير من طبيعتى بس إنتى لأنك بتحبينى بتقولى متسامحة و لكن الحقيقة إنى عنيدة قوى و تمسكى بطباع أقرب للعيوب هيا السبب فى المشاكل اللى وقعت فيها طول حياتى ...
العناد و التشبث بما أراه و أشعر بيه حتى و لو كان يؤذينى ...
و أتمنى كل حد ممكن كلامى يلمس قلبه ..
يستفيد ..و بلاش وفاء دى خلينا فى فاتيما زى ما دايما تنادينى يا حبيبتى
بتخلى بالك من نفسك كويس و لا لأ ؟؟
اوعى تكونى بتزعلى عروسة البحور بتاعتى لو سمحتى ...
سلميلى ع البحر ... هاه
أنا مببعتش السلام ليه دلوقتى غير معاكى ...
بوسة و حضونااااات كتير

ليه يافاتيما مُصره تحسسينى انك حد
عادى
انا شيفاكى مختلفه وصورتك جوايا صوره ملائكيه فعلا والله
تعرفى انى انا كمان عنيده جدااااااااااا

انا قصدت من الاسمين الصفات بتاعتهم
وانا باعتز جدا باسم فاتيما

البحر كويس وبيسئل عليكى كتير وبيتمنى ترجعيله


عروسه البحور كويسه مادمتى انتى بخير

وعلى فكره انا من حقى انى اعترض بقى
واطالب بنشر باقى القصيده

بحبك

عفوية الكتابة ورومانسية الفكرة شدتني جدا وتمنيت لو كان هناك لي ماضي اتذكرة

عبد الجليل

ربنا يسعدك يارب ويرضى عنك


تحياتي يا خالتي

أكيد صدقينى ربنا معاكى وأكيد هتسعدى
لأن كل واحد مننا له فى الدنيا ده 24 قيراط هيخدهم هيخدهم فى ايه بقى على حسب
فاعلمى ان ربنا أكيد هيديكى كل اللى بتتمنيه

كلامك حلو قوى
وفكرتينى أنا برده جالى شعر كتير كده
بس مش من واحد بس من كذا حد بس أنا مش كنت بعيش معاهم قصة حب الا واحد وانتهت تقريبا نفس النهاية بس عادى يعنى
ليس كل ما يتمناه المرء يدركه


تحياتى
شيمو القمر

السلام عليكم
زيارتي دي مش تصفح للمدونة أو قراءة لموضوع وتعليق عليه لا دي زيارة مختلفة جدا أنا يشرفني إني أدعو حضرتك للمشاركة والكتابة معانا في مجلة رؤية مصرية يمكن يحالفك الحظ وتكوني أحد أعضاء فريق التحرير
العدد الجديد الرابع يعني هيصد بعد بكرة يعني فجر السبت لو هتقدري تشاركينا ابعتي دلوقتي على بريد المجلة رسالة تأكيدية وجهزي مشاركتك وابعتها بردو على بريد المجلة بس بسرعة عشان العدد بنبدأ شغل فيه يوم الجمعة بعد العشاء .. منتظر الرد والمشاركة
ودمتي بود
لينك المجلة
http://roayahmg.blogspot.com/
بريد المجلة
ibrahemaladawy@gmail.com

رئيس التحرير
كاتب مصري

تسلمي على اللينك

و تسلمي على الدعوة
الحمد لله الامتحان كان حلو

و تسلمي على التوضيح و اللينك

و العيب مش فيكي ابداً
و بصي حوالكي كدة هتلاقي ناس بتحبك جامد
و بتحوط عليكي
من غير مصالح ولا أهداف

الناس كلها مش اتنين رجالة وحشين قابلتيهم

ربنا يكرمك يا رب

سلام عليكِ

عندك حق و معندكيش حق
عندك حق في أحلى كلام سمعته عن الرضا بالمكتوب و الصبر على البلاء..هزتيني بجد..و ما عندكيش خق ان وشك وحش(مش قادرة أقول فقر دي عنك)ده كفاية ضحكتك و وشك اللي يفرح الدنيا بحالها..بس عارفة؟فيه ناس ربنا شايلهم ناصيبهم في مكان احلى بكتيييير من هنا..و بيختبرهم بالبلاء عشان يشوفهم و هما زيك كدة صابرين و راضيين..ربنا يكرمك يا فاتيما يا رب و يريح قلبك

فاتيما ياروح قلبى
ياريت تقبلى دعوه ابراهيم للمجله
فيها مواضيع حلوه وهتعجبك وبنكتب فيها انا وستيته ومعانا ناس كتير جميله
ياريت تكونى معانا

اه صحيح
هى خيخه قافله المدونه بتاعتها ليه؟؟؟؟؟؟؟؟؟؟؟

بحبك
جدا

أولا شعور جميل منك جدا إنك تحملي الذكريات الطيبة دي عن أشخاص مروا على حياتك من زمان

ده في حد ذاته شيء إيجابي في شخصيتك

ثانيا .. مش معنى إن فيه حد من اللي قابلتيهم مشيت أموره كويسة وعلى العكس (زي ما إنتي فاكرة) مشيت أمورك بطريقة عكسية .. إن هو إتكتب ليه الخير وإنتي لأ

كل مقدرات ربنا خير حتى لو شكلها عكس كده .. الخير إبتلاء والضرر برضه إبتلاء .. في كل الحالات الإتنين إبتلاء

المهم بقى النجاح في الإبتلاء

عاشقة الرومانسية
منا حد عادى يا حبيبتى فعلاً
انتى بس اللى شايفنى بعين المحب ...
إعتراضك مقبول بس مفيش داعى للإحراج يا دودو و ربنا ستار حليم
بخصوص المجلة طبعا يشرفنى إنى اكون وسطكم
بس انا بالفعل وسطكم دون ان اكون بكتب فعلا فى المجلة ...
أصلى مبحبش أتقيد بالكتابة و الوقت و المواعيد و ردى على كاتب مصرى ممكن يشرحلك اكتر وجهة نظرى ..
أنا كمان يا حبيبتى بحبك





الأستاذ عبدالجليل
يا أستاذنا متقولش الكلام دا ...
معقول !!!
بقى يعنى عاوز تفهمنى إن مكنش فيه قصة حب نغبشت فى قلبك زماااااان
و لسه باقى منها بعض من عبير الذكريات يتنسمه القلب أحيانا
معقول !!!




صاحب المضيفة
أزيك يا عريس
تعالى هنا يا واد يا انس قولى
بقى فرحك قرب و لسه بتدخل على المدونات ؟؟؟
دنت المفروض تكون غرقان لشوشتك فى مليون مشوار يا بنى
ربنا يتمملك بألف خير يا أخى الصغير الطيب الجميل
خالص حبى لآية النساء
و ليك




شيماء جمال
لأ .. إنتى بالذات لازم يجيلك قصايد اد كدا ...
دنتى لغة عربية يا ماما
و لو مكنتش القريحة تجود عندكم ..
اومال هتجود على مين ؟؟؟
و القصة اللى حكيتى عنها دى
يا ستى غالبا بتكون زاد فى الأيام العجاف اللى زى اللى عندى دى
بس يا رب ما تعدى عليكى ايام عجاف ابدا أبداً يا رب
كل الحب ليكى يا شيمو القمر و الشمس فى سما واحدة




رئيس التحرير
الأستاذ المحترم
كاتب مصرى
أشكر لحضرتك انك فكرت تدعونى للكتابة فى مجلتكم الغراء ...
بس للأسف لن يحالفنى الحظ و اكون من أعضاء فريق تحريرها كما ذكرت ..
لأنى عموما مبحبش اكتب بالامر او المواعيد
الكتابة بالنسبالى فعل حرية
شىء بيلح عليا .. اكتبه
لكن مجرد ما تقولى فى طلبك كلمة
معاد النشر بكرة ..
إلحقى أبعتى ..
يلا إجهزى بتدوينة ..
هذه العبارات بتلجمنى
و تصرف شيطان الكتابة عن الذهن فوراً ...
الكتابة و التدوين أمر ذاتى و شخصى بالنسبالى
أفضل إنى اكون رئيسة تحرير نفسى
و أكتب كل ما أشعر به و احبه فى مساحتى الخاصة ..
و بقواعدى الخاصة
و بتوقيتى الخاص ...
و ليس كما يريد الأخرون
أتمنى مكونش ضايقتك بالكلام ..بس طالما بعتلى الدعوة فى صفحة التعليقات .. يبقى لازم أرد عليك فيها برضو و لو كان الرد بلا
ربنا يوفقكم فى عملكم
خالص تحياتى




نعكشة
يا حبيبتى اى خدمة
و الحمدلله يا نعكوشتى
و عقبال كل الإمتحانات كلها إن شاء الله





dahlia
إنتى كمان يا دودى
من الناس اللى ربنا
بيختبرهم و إن شاء الله كاتبلهم بعد الضيق فرج و كل الخير
بوسة و حضونااااااات كتير يا حبيبتى




يا مراكبى
لأ .. خلى بالك يا نبع حكمتى
الشعور الجميل دا مجاش إلا بعد زمن من المرمطة و يظهر إن كل ما الواحد كان بيدوس فى الغميق اكتر يفتكر الشط و يترحم عليه و على سهولة الخوض فيه مقارنة بما حدث وسط الامواج المتلاطمة
إيه الكلام الكبير اللى بقوله دا
شوفت بقى
حتى و أنا برد عليك الحكمة بتتدفق عليا سلف أهو ...
متحرمشى منك يا رب
و اتمنى ان أنجح بعد كل هذا
اتمنى و الله

عارفة يا فاتيما

عارفة فأيامنا ده لما يكون الواحد عايش في مدينة مليانه ضوضاء و شغل وروتين و زحام

بناء عالي وطرق واسعة جدا و سيارات فخمة في الشوارع
فقر و غناء.. رفاهية و حرمان قدام عينك طول الوقت
شد و جذب بين الناس وكل حاجة الناس بتعملها بسرعة عشان اليوم أصلا بقى بيخلص بسرعة وراه الشهر و راه السنين

تعرفي لما يكون حد فينا وسط كله ده عنده جنينة صغير متحوطة بجناين تانية و سور من أشجار عاوزلة لأي أحداث خارجية
الصوت مابيوصلهاش ولا الزحام ونعال أحذية حتى
كلها ليكي انت لوحدك من غير بنيان ولا حاجة حتة خيمة دافية وسط الزرع و بحيرة صغيرة زرقا

أهو هو ده مكان ذكرى الحب الأول البريء في القلب
و القلب اللي يملك الجنينةده جواه ده يبقى محظوظ قوي
المهم ان الجنينة ده ماتكونش ولا اتشوهت ولا اتخدشت زي حال الجنينة بتاعتك كدا

ياااه .. لما تكوني تملكي فقلبك المساحة ده تهربي ليها كل فترة من ضوضاء الذكريات و الاحداث اللي مليانا

ترمي جسمك فيها على نجيل أخضر وفير ... وتسرح عينك مع سما ماليانة سحاب أبيض شبه اللي كان يوم ما كنا مع بعض

أهو أنا تخيلت الذكرى الجميلة اللي حكيتي عنها و بتفتكريها دايما بالجنينة ده.. وتخيلتك قاعدة سرحانة فيها و بتكتبي خواطرك لينا بقلب عمران بمشاعر ايجابية

القلوب اللي بتعرف تكون سعيدة هي القلوب اللي عندها مساحات مافيش اي حاجة بتقدر تشوهها وده عند ناس تانية كتيير صعب

ربنا يخليلك الجنينة جوة قلبك خضرا على طول

hanooda
إهى تعبيراتك دى
اللى بتخلينى دايما أبهت قصادها ...
بتعرفى إزاى تقرينى بسلاسة كدا
إنتى مش عادية يا هنودة
انتى لازم تكونى من الناس اللى بتشوف الطالع و تحس بالأرواح الهايمة اللى محدش عادى يحس بيها ...
إنتى فيكى حاجة غريبة عجيبة
أنا قريت تعليقك على فيلا يوسف
كمان لقطتى الإحساس الصح
و وصفتى اللى بعمله بشكل لا شعورى
و ببقى قصداه
ربنا ما يحرمنى منك يا قمراية
لأ ....
يا احلى قمراية إسكندرانية
عرفتها ف حياتى

إرسال تعليق